ກອງປະຊຸມໃຫຍ່ຄັ້ງທີ 13 ຂອງພັກສືບຕໍ່ເພີ່ມເຕີມ ພັດທະນາ ແລະ
ບູລະນະແນວທາງການຕ່າງປະເທດໃນສະໄໝແຫ່ງການປ່ຽນແປງໃໝ່
ບູລະນະແນວທາງການຕ່າງປະເທດໃນສະໄໝແຫ່ງການປ່ຽນແປງໃໝ່
ວກ. - ໝູນໃຊ້ລັດທິມາກ-ເລນິນ, ແນວຄິດການຕ່າງປະເທດ ໂຮ່ຈິມິນ ຢ່າງຫົວຄິດປະດິດສ້າງ ແລະ ເສີມຂະຫຍາຍມູນເຊື້ອ, ເອກະລັກທາງການທູດສັນຕິພາບ ແລະ ເຕັມໄປດ້ວຍລັກສະນະມະນຸດອາລະຍະທຳຂອງຊາດ, ແນວທາງການຕ່າງປະເທດຂອງພັກກອມມູນິດຫວຽດນາມໄດ້ຮັບການພັດທະນາ ແລະ ສົມບູນແບບໃນໄລຍະຕ່າງໆຂອງການປະຕິວັດ. ບົນພື້ນຖານສືບທອດແນວທາງການຕ່າງປະເທດໃນບັນດາສະໄໝກອງປະຊຸມໃຫຍ່ຂອງພັກໃນໄລຍະປ່ຽນແປງໃໝ່, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ ສືບຕໍ່ພັດທະນາ ແລະ ບູລະນະແນວທາງການຕ່າງປະເທດຂອງພັກໃນໄລຍະພັດທະນາໃໝ່ຂອງປະເທດ.
ຫວນເບິ່ງຄືນແນວທາງການຕ່າງປະເທດຂອງພັກກອມມູນິດຫວຽດນາມ ໃນ 35 ປີແຫ່ງການປ່ຽນແປງໃໝ່
ເສີມຂະຫຍາຍຢ່າງແຂງແຮງຈິນຕະນາການປ່ຽນແປງໃໝ່ທີ່ໄດ້ລິເລີ່ມແຕ່ກອງປະຊຸມໃຫຍ່ຄັ້ງທີ 6 ຂອງພັກກອມມູນິດຫວຽດນາມ (ປີ 1986), ແນວທາງການຕ່າງປະເທດທີ່ເປັນເອກະລາດ, ເປັນເຈົ້າດ້ວຍຕົນເອງ, ສັນຕິພາບ, ມິດຕະພາບ, ຮ່ວມມື ແລະ ພັດທະນາ, ຫັນເປັນຫຼາຍຮູບຫຼາຍແບບ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ເພື່ອຜົນປະໂຫຍດຂອງຊາດ - ປະເທດຊາດ ແມ່ນເຂັມຊີ້ທິດສີແດງທີ່ທະລຸການພົວພັນຕ່າງປະເທດໄລຍະປ່ຽນແປງໃໝ່ ແລະ ນັບມື້ນັບໄດ້ຮັບຮູ້ຢ່າງເລິກເຊິ່ງກວ່າອີກ.
ຄືປະທານ ໂຮ່ຈີມິນ ເຄີຍເວົ້າວ່າ “ນອກຈາກຜົນປະໂຫຍດຂອງປະເທດຊາດ, ຂອງຊາດແລ້ວ ພັກບໍ່ມີຜົນປະໂຫຍດອື່ນໃດ”(1), ພັກກອມມູນິດຫວຽດນາມ ຍາມໃດກໍ່ຮັບຮູ້ຢ່າງເລິກເຊິ່ງວ່າ ຜົນປະໂຫຍດຂອງຊາດ - ປະເທດຊາດ ແມ່ນເປົ້າໝາຍສູງສຸດແຫ່ງການພົວພັນຕ່າງປະເທດ. ມະຕິສູນກາງພັກຄັ້ງທີ 8 ສະໄໝທີ 9 (ປີ 2003) ເປັນເທື່ອທຳອິດທີ່ຍົກໃຫ້ເຫັນແຈ້ງເຖິງບັນດາປັດໃຈພື້ນຖານຂອງຜົນປະໂຫຍດຂອງຊາດ - ປະເທດຊາດ. ແຕ່ກອງປະຊຸມໃຫຍ່ຄັ້ງທີ 11 (ປີ 2011), ພັກກອມມູນິດຫວຽດນາມ ໄດ້ຢືນຢັນວ່າ ຜົນປະໂຫຍດຂອງຊາດ - ປະເທດຊາດແມ່ນເປົ້າໝາຍສູງສຸດຂອງການພົວພັນຕ່າງປະເທດ, ໃນນັ້ນຜົນປະໂຫຍດຊົນຊັ້ນ, ຜົນປະໂຫຍດຂອງຊາດ ແລະ ຜົນປະໂຫຍດປະເທດຊາດໄດ້ເປັນເອກະພາບນຳກັນ ຢູ່ໃນຜົນປະໂຫຍດຂອງຊາດ-ປະເທດຊາດ.
ໃນໄລຍະປ່ຽນແປງໃໝ່, ການພົວພັນຕ່າງປະເທດຍາມໃດກໍ່ປະຕິບັດ ໜ້າທີ່ປົກຄຸມ ແລະ ເປັນແບບປົກກະຕິ ແມ່ນຮັກສາສະພາບແວດລ້ອມແຫ່ງສັນຕິພາບ, ສະຖຽມລະພາບ, ຍາດແຍ່ງບັນດາປັດໄຈສາກົນອັນສະດວກໃຫ້ແກ່ພາລະກິດກໍ່ສ້າງ ແລະ ປົກປັກຮັກສາປະເທດຊາດ, ຍົກສູງຖານະບົດບາດຂອງປະເທດ. ໜ້າທີ່ນີ້ນັບມື້ນັບໄດ້ຮັບຮູ້ຢ່າງເລິກເຊິ່ງກວ່າອີກ ໂດຍຜ່ານບັນດາສະໄໝກອງປະຊຸມໃຫຍ່ຂອງພັກ. ມະຕິເລກທີ 13- NQ/TW ຂອງກົມການເມືອງສູນກາງພັກສະໄໝທີ 6 (ປີ 1988) ເລີ່ມຕົ້ນຂະບວນວິວັດແຫ່ງການປ່ຽນແປງໃໝ່ດ້ານຈິນຕະນາການ ແລະ ແນວທາງການຕ່າງປະເທດ, ວາງໜ້າທີ່ຍາດແຍ່ງການສະໜັບສະໜູນຂອງສາກົນ ແລະ ທ່າອຽງຫັນເປັນສາກົນ ເພື່ອພັດທະນາປະເທດ. ມາຮອດກອງປະຊຸມໃຫຍ່ຄັ້ງທີ 12 (ປີ 2016), ພັກກອມມູນິດຫວຽດນາມ ໄດ້ກຳນົດຈະແຈ້ງໜ້າທີ່ຂອງການຕ່າງປະເທດລວມມີສາມປັດໄຈແມ່ນ ຄວາມສະຫງົບ, ການພັດທະນາ ແລະ ຖານະບົດບາດຂອງປະເທດ.
ຈາກແຜນນະໂຍບາຍ “ເພີ່ມເພື່ອນມິດ, ຫຼຸດຜ່ອນສັດຕູ”, ພັກກອມມູນິດຫວຽດນາມ ໄດ້ພັດທະນາລະບົບ ທັດສະນະ, ທິດນຳຊີ້ນຳ ທີ່ທະລຸການຕ່າງປະເທດຫວຽດນາມ ໄລຍະການປ່ຽນແປງໃໝ່ ແມ່ນຍຶດໝັ້ນໃນການປະຕິບັດນະໂຍບາຍການຕ່າງປະເທດເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ; ຫັນເປັນຫຼາຍທິດ ຫຼາຍແບບ; “ເປັນເພື່ອນມິດ ເປັນຄູ່ຮ່ວມມືທີ່ເຊື່ອຖືໄດ້ ແລະ ເປັນສະມາຊິກທີ່ມີຄວາມຮັບຜິດຊອບ ຂອງປະຊາຄົມສາກົນ”; ກຳແໜ້ນສອງດ້ານ ຄູ່ຮ່ວມມື - ຄູ່ຕໍ່ສູ້, ທັງຮ່ວມມື ທັງຕໍ່ສູ້; ຍຶດໝັ້ນຫຼັກການ, ເປົ້າໝາຍຍຸດທະສາດ, ແຕ່ມີຄວາມໄຫວພິບ ແລະ ສະຫຼາດຄ່ອງແຄ່ວທາງດ້ານຍຸດໂທບາຍ, “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”,... ກົນໄກປະຕິບັດການພົວພັນຕ່າງປະເທດ ແມ່ນການປະສານສົມທົບຢ່າງແໜ້ນແຟ້ນ, ເປັນຈັ່ງຫວະ ລະຫວ່າງການພົວພັນຕ່າງປະເທດທາງພັກ, ການທູດຂອງລັດ ແລະ ການພົວພັນຕ່າງປະເທດທາງປະຊາຊົນ ພາຍໃຕ້ການນຳພາເປັນເອກະພາບຂອງພັກ ແລະ ການຄຸ້ມຄອງລວມສູນຂອງລັດ.
ດ້ວຍຄວາມຮັບຮູ້ວ່າ ຫວຽດນາມເປັນພາກສ່ວນໜຶ່ງຂອງໂລກ, ແຜນນະໂຍບາຍກ່ຽວກັບການເຊື່ອມໂຍງເສດຖະກິດສາກົນ (ກອງປະຊຸມໃຫຍ່ຄັ້ງທີ 9) ໄດ້ຜັນຂະຫຍາຍຢ່າງແຂງແຮງ, ຫຼັງຈາກນັ້ນເປີດກວ້າງມາສູ່ບັນດາຂົງເຂດອື່ນ ແລະ ສ້າງຕັ້ງແຜນນະໂຍບາຍ ເປັນເຈົ້າການ, ຕັ້ງໜ້າເຊື່ອມໂຍງສາກົນ (ກອງປະຊຸມ 11). ແຜນນະໂຍບາຍສະບັບນີ້ແມ່ນກຳນົດທິດຍຸດທະສາດໃຫຍ່ ເພື່ອກໍ່ສ້າງ ແລະ ປົກປັກຮັກສາປະເທດຊາດ, ແມ່ນພາລະກິດຂອງທົ່ວປວງຊົນ ແລະ ລະບົບການເມືອງທັງໝົດ. ຄວາມຮັບຮູ້ກ່ຽວກັບການພົວພັນລະຫວ່າງເອກະລາດ, ເປັນເຈົ້າດ້ວຍຕົນເອງ ແລະ ການເຊື່ອມໂຍງສາກົນນັບມື້ນັບເລິກເຊິ່ງກວ່າອີກ, ໃນນັ້ນມີຄວາມສະເໝີຕົ້ນສະເໝີປາຍກ່ຽວກັບການປະສົມກຳລັງແຮງປະເທດຊາດ ກັບກຳລັງແຮງຂອງຍຸກສະໄໝ, ກຳລັງແຮງພາຍໃນມີບົດບາດຕັດສິນຊີ້ຂາດ, ກຳລັງແຮງຈາກພາຍນອກເປັນສິ່ງສຳຄັນ.
ການພົວພັນຕ່າງປະເທດສອງຝ່າຍ ແລະ ຫຼາຍຝ່າຍ ໄດ້ຮັບການດັດປັບ, ປັບປຸງ ແລະ ບູລະນະ. ຕັ້ງແຕ່ການ “ເພີ່ມທະວີການພົວພັນມິດຕະພາບ ແລະ ຮ່ວມມືຮອບດ້ານກັບ ສະຫະພາບໂຊວຽດ ແລະ ບັນດາປະເທດໃນປະຊາຄົມສັງຄົມນິຍົມ”(2) (ກອງປະຊຸມໃຫຍ່ຄັ້ງທີ 6) ຈົນເຖິງການຮ່ວມມືກັບທຸກໆປະເທດ ບົນພື້ນຖານກົດໝາຍສາກົນ, ສະເໝີພາບ ແລະ ຕ່າງຝ່າຍກໍ່ຕ່າງມີຜົນປະໂຫຍດ. ຈາກການເຂົ້າຮ່ວມບັນດາເວທີສາກົນເຖິງ “ຄວາມມານະພະຍາຍາມບືນຕົວຂຶ້ນຖືບົດບາດຫຼັກແຫຼ່ງ, ນຳພາ ຫຼື ໄກ່ເກ່ຍ ໃນບັນດາເວທີປາໄສ, ອົງການຈັດຕັ້ງຫຼາຍຝ່າຍ ທີ່ມີລະດັບສຳຄັນຍຸດທະສາດ”(3).
ການປະຕິບັດແນວທາງການພົວພັນຕ່າງປະເທດທີ່ຖືກຕ້ອງຂອງພັກທີ່ໄດ້ປະກອບສ່ວນອັນສຳຄັນ ເຂົ້າໃນການຮັກສາສະພາບແວດລ້ອມສັນຕິພາບ, ສະຖຽມລະພາບ, ອຳນວຍຄວາມສະດວກ ໃຫ້ແກ່ພາລະກິດປ່ຽນແປງໃໝ່, ປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ, ຍົກສູງຖານະບົດບາດຂອງປະເທດ. ມາຮອດປະຈຸບັນ, ຫວຽດນາມມີການພົວພັນທາງການທູດກັບ 189 ປະເທດໃນຈຳນວນ 193 ປະເທດທີ່ເປັນສະມາຊິກຂອງອົງການສະຫະປະຊາຊາດ, ໃນນັ້ນເປັນຄູ່ຮ່ວມມືຍຸດທະສາດກັບ 30 ປະເທດ, ຄູ່ຮ່ວມມືຮອບດ້ານກັບ 5 ປະເທດສະມາຊິກຖາວອນທັງໝົດຂອງສະພາຄວາມໝັ້ນຄົງແຫ່ງສະຫະປະຊາຊາດ, 7 ປະເທດອຸດສາຫະກຳພັດທະນາອັນດັບໜຶ່ງຂອງໂລກ (G7) ແລະ 17 ປະເທດຢູ່ໃນກຸ່ມ 20 ພື້ນຖານເສດຖະກິດທີ່ໃຫຍ່ທີ່ສຸດໃນໂລກ (G20)... ຈາກພື້ນຖານເສດຖະກິດແຜນການລວມສູນແລະແບບປິດປະຕູ, ມາຮອດປະຈຸບັນ, ຫວຽດນາມ ເປັນພື້ນຖານເສດຖະກິດຕະຫຼາດກຳນົດທິດສັງຄົມນິຍົມ ທີ່ມີການເຊື່ອມໂຍງເສດຖະກິດທີ່ເລິກເຊິ່ງ ກວ້າງຂວາງ, ໄດ້ລົງນາມເຊັນແລະເຂົ້າຮ່ວມສັນຍາການຄ້າເສລີເປັນ 17 ສະບັບ, ໃນນັ້ນ ມີບັນດາສັນຍາການຄ້າເສລີລຸ້ນໃໝ່; ລວມຍອດວົງເງິນສົ່ງອອກແລະນຳເຂົ້າທຽບເທົ່າປະມານ 200% ຂອງ ຈີດີພີ, ດຶງດູດການລົງທຶນໂດຍກົງຈາກຕ່າງປະເທດທີ່ຈົດທະບຽນປະມານ 400 ຕື້ໂດລາສະຫະລັດ...
ຫວຽດນາມເປັນສະມາຊິກຂອງທັງໝົດອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍທີ່ສຳຄັນ, ໄດ້ຈັດຕັ້ງຢ່າງສຳເລັດຜົນ ກອງປະຊຸມສາກົນໃຫຍ່ຫຼາຍຄັ້ງ ກໍ່ຄືສຳເລັດຄວາມຮັບຜິດຊອບສາກົນທີ່ສຳຄັນເປັນຈຳນວນຫຼາຍ, ເຊັ່ນ: ສະມາຊິກບໍ່ຖາວອນສະພາຄວາມໝັ້ນຄົງແຫ່ງສະຫະປະຊາຊາດ (ສະໄໝ 2008-2009 ແລະ 2020-2021), ກອງປະຊຸມຂັ້ນສູງ ອາຊຽນ (ຊຸມປີ 1998, 2010 ແລະ 2020), ກອງປະຊຸມຂັ້ນສູງ ASEM (ປີ 2004), ກອງປະຊຸມສຸດຍອດ APEC (ຊຸມປີ 2006, 2017), ເວທີປາໄສເສດຖະກິດໂລກກ່ຽວກັບ ອາຊຽນ (ປີ 2018), ກອງປະຊຸມສຸດຍອດ ອາເມລິກາ - ເກົາຫຼີເໜືອ (ປີ 2019), ແຕ່ງຕັ້ງພະນັກງານ ນັກຮົບເຂົ້າຮ່ວມກຳລັງຮັກສາສັນຕິພາບ ຂອງອົງການສະຫະປະຊາຊາດເປັນຈຳນວນຫຼາຍຮ້ອຍຄົນ...
ບັນດາຜົນງານໃນການພົວພັນຕ່າງປະເທດທີ່ກ່າວມາເທິງນີ້ ແມ່ນຄວາມບັນຈຸຍອດແຍ່ແຫ່ງຄວາມມານະພະຍາຍາມຂອງທົ່ວພັກ, ທົ່ວປວງຊົນ ແລະ ທົ່ວກອງທັບ, ແມ່ນໜຶ່ງໃນຈຸດແຈ້ງສະຫວ່າງ ໃນຜົນງານຮ່ວມກັນຂອງປະເທດ ຄືມະຕິກອງປະຊຸມໃຫຍ່ຄັ້ງທີ 13 ຂອງພັກທີ່ໄດ້ຢືນຢັນແລ້ວ, “ປະເທດເຮົາຍັງບໍ່ທັນມີຍາມໃດທີ່ມີພາລະກິດທີ່ຍິ່ງໃຫຍ່, ມີຄວາມສາມາດບົ່ມຊ້ອນ, ຖານະບົດບາດ ແລະ ອິດທິພົນສາກົນຄືປະຈຸບັນ”(4), ໃນນັ້ນມີການປະກອບສ່ວນທີ່ສຳຄັນຂອງການພົວພັນຕ່າງປະເທດ, ລວມມີການພົວພັນການຕ່າງປະເທດຂອງພັກ, ການທູດຂອງລັດ ແລະ ການພົວພັນຕ່າງປະເທດທາງປະຊາຊົນ.
ກຳມະການກົມການເມືອງສູນກາງພັກ, ນາຍົກລັດຖະມົນຕີ ຟ້າມມິງຈິນ ເຮັດວຽກກັບເອກອັກຄະລັດຖະທູດ, ຫົວໜ້າຄະນະຜູ້ແທນສະຫະພາບເອີຣົບ, ເອກອັກຄະລັດຖະທູດບັນດາປະເທດ ອີຢູ, ສະມາຄົມວິສາຫະກິດ ເອີຣົບ (Eurocham) ແລະ ບັນດາກຸ່ມວິສາຫະກິດ, ບໍລິສັດໃຫຍ່ຂອງ ເອີຣົບ ທີ່ຫວຽດນາມ _ພາບ: VGP
ການສືບທອດ, ພັດທະນາ ແລະ ບັນດາຈຸດໃໝ່ໃນແນວທາງການຕ່າງປະເທດ
ທີ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ບົນພື້ນຖານການຕີລາຄາຢ່າງຮອບດ້ານກ່ຽວກັບຜົນງານ ບົດຮຽນ ທ່າແຮງ ແລະ ກຳລັງແຮງ ຂອງປະເທດພາຍຫຼັງ 35 ປີແຫ່ງການປ່ຽນແປງໃໝ່, ສະຖານະການສາກົນ ແລະພາຍໃນປະເທດ, ກາລະໂອກາດຍຸດທະສາດ ກໍຄືສິ່ງທ້າທາຍທີ່ວາງອອກມາໃຫ້ປະເທດ, ກອງປະຊຸມໃຫຍ່ຄັ້ງທີ 13 ຂອງພັກສືບຕໍ່ສືບທອດບັນດາເນື້ອໃນແກນກາງຂອງແນວທາງການພົວພັນຕ່າງປະເທດຂອງພັກ ໃນໄລຍະປ່ຽນແປງໃໝ່, ພ້ອມທັງພັດທະນາ ແລະ ປັບປຸງຫຼາຍເນື້ອໃນໃໝ່ ເພື່ອການພົວພັນຕ່າງປະເທດຕ້ອງສະໜອງໄດ້ຄວາມຮຽກຮ້ອງຕ້ອງການແຫ່ງການພັກທະນາປະເທດໃນໄລຍະຕໍ່ໄປ.
1- ກ່ຽວກັບການຕີລາຄາ, ຄາດຄະເນສະພາບການໂລກ. ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ສືບທອດບັນດາຄວາມພິນິດໄສໃຫຍ່ຂອງບັນດາສະໄໝກອງປະຊຸມໃຫຍ່ກ່ອນນີ້, ເປັນຕົ້ນແມ່ນກອງປະຊຸມໃຫຍ່ຄັ້ງທີ 12 ກ່ຽວກັບບັນດາຈຸດພິເສດທີ່ມີລັກສະນະກົດເກນ ແລະ ທ່າອຽງທີ່ຍາວນານຂອງໂລກ, ແຕ່ການປ້ອນຂໍ້ມູນ, ດັດປັບໃຫ້ເໝາະສົມກັບສະພາບການໃໝ່. ກອງປະຊຸມຄັ້ງທີ 13 ກໍ່ໄດ້ຢືນຢັນວ່າ ສັນຕິພາບ, ການຮ່ວມມື ແລະ ການພັດທະນາ ແມ່ນທ່າອຽງໃໝ່, ໂລກາພິວັດ ແລະ ການເຊື່ອມໂຍງສາກົນສືບຕໍ່ໄດ້ດຳເນີນໄປ, ແຕ່ເນັ້ນໜັກເຖິງບັນດາທ່າອຽງນີ້ວ່າ ຈະຢືນຕໍ່ຄວາມຂັດຂວາງ, ຄວາມຫຍຸ້ງຍາກຫຼາຍຢ່າງຍ້ອຍວ່າ “ໂລກທີ່ກຳລັງຜ່ານບັນດາການຫັນປ່ຽນອັນໃຫຍ່ຫຼວງ, ມີຄວາມຜັນແປຢ່າງໄວວາ, ສັບສົນ, ຄາດເດົາຍາກ”; ອາຊີ - ປາຊີຟິກ ນັບມື້ນັບທີ່ມີບົດບາດສຳຄັນ, ແຕ່ຊີ້ແຈ້ງນີ້ແມ່ນພາກພື້ນທີ່ “ບົ່ມຊ້ອນຄວາມບໍ່ສະຫງົບຫຼາຍຢ່າງ”... ໃນສະຖານະການມີຄວາມທົດສອບອັນຫຼວງຫຼາຍ, ຄວາມສະຫງົບແບບດັ້ງເດີມທີ່ຜັນແປຢ່າງສັບສົນ, ພັກກອມມູນິດຫວຽດນາມ ໄດ້ພິນິດໄສວ່າ ຜົນກະທົບຂອງໂລກລາບາດໂຄວິດ-19 ຍັງຈະແກ່ຍາວຕໍ່ໄປ, “ເຮັດໃຫ້ປ່ຽນແປງຢ່າງເລິກເຊິ່ງ ຄວາມເປັນລະບຽບຮຽບຮ້ອຍ, ໂຄງປະກອບເສດຖະກິດ, ວິທີການຄຸ້ມຄອງລະດັບໂລກ, ວິທີການເຄື່ອນໄຫວເສດຖະກິດ ແລະ ການຈັດຕັ້ງຊີວິດສັງຄົມຂອງໂລກ”(5). ພາກຕົວຈິງຂອງສະພາບການສາກົນແຕ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ມາຮອດປະຈະບັນໃຫ້ຮູ້ວ່າ ບັນດາພິນິດໄສທີ່ໄດ້ກ່າວມາເທິງນີ້ຂອງພັກແມ່ນຖືກຕ້ອງ.
ຈຸດໃໝ່ໜຶ່ງແມ່ນ ບົນພື້ນຖານການຕີລາຄາການປະຕິວັດອຸດສາຫະກຳຄັ້ງທີສີ່, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ນຳເອົາການຍາດແຍ່ງຜົນງານຂອງການປະຕິວັດນີ້ ເຂົ້າໃນເນື້ອໃນຂອງທັດສະນະພັດທະນາປະເທດ, ບົນພື້ນຖານນັ້ນ ໄດ້ກຳນົດຢ່າງຈະແຈ້ງວ່າ “ຍູ້ແຮງການຫັນເປັນອຸດສາຫະກຳ ທັນສະໄໝ ບົນພື້ນຖານຂອງຄວາມກ້າວໜ້າດ້ານວິທະຍາສາດ ເຕັກໂນໂລຊີ ແລະ ການປ່ຽນແປງໃໝ່ປະດິດສ້າງ” ແມ່ນກຳນົດທິດໃຫຍ່ອັນໜຶ່ງ ໃນຍຸດທະສາດພັດທະນາປະເທດເຖິງປີ 2030.
ຄຽງຄູ່ກັບການສືບຕໍ່ພິນິດໄສກ່ຽວກັບຄວາມສະດວກ ກາລະໂອກາດ ແລະ ທ້າທາຍທີ່ແຊກຊ້ອນນຳກັນ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ຍົກໃຫ້ເຫັນແຈ້ງກ່ຽວກັບສະພາບການໂລກ “ທີ່ມີຫຼາຍບັນຫາໃໝ່, ຄວາມຮຽກຮ້ອງຕ້ອງການໃໝ່ທີ່ໜັກໜ່ວງ, ສັບສົນກວ່າອີກ” ຕໍ່ການກໍ່ສ້າງ ແລະ ການປົກປັກຮັກສາປະເທດຊາດ, ຮຽກຮ້ອງຕ້ອງສືບຕໍ່ປ່ຽນແປງໃໝ່ຈິນຕະນາການຢ່າງແຂງແຮງ, ຄາດຄະເນໃຫ້ຖືກຕ້ອງ, ເປັນເຈົ້າການຕໍ່ທຸກກໍລະນີ. ດັ່ງນັ້ນ, ພາລະບົດບາດຂອງການພົວພັນຕ່າງປະເທດຍິ່ງມີຄວາມສຳຄັນ, ມີໜ້າທີ່ໜັກໜ່ວງ, ເປັນຕົ້ນແມ່ນພາລະບົດບາດເປັນແບບຢ່າງນຳໜ້າໃນການປົກປັກຮັກສາປະເທດຊາດແຕ່ຫົວທີ, ແຕ່ທາງໄກ, ຍາດແຍ່ງກາລະໂອກາດ ແລະ ກຳລັງແຮງພາຍນອກ ເພື່ອຮັບໃຊ້ການພັດທະນາປະເທດ.
2- ກ່ຽວກັບເປົ້າໝາຍການພົວພັນຕ່າງປະເທດ. ກອງປະຊຸມໃຫຍ່ຄັ້ງທີ 13 ຂອງພັກກໍ່ໄດ້ຢືນຢັນວ່າ, “ຮັບປະກັນຜົນປະໂຫຍດສູງສຸດຂອງຊາດ - ປະເທດຊາດ”, ໝາຍຄວາມວ່າ ຖືເອົາຜົນປະໂຫຍດຂອງຊາດ - ປະເທດຊາດ ເປັນກ່ອນອື່ນໝົດແລະສູງສຸດ; ພ້ອມກັນນັ້ນ, ຊີ້ອອກວ່າ ຫຼັກການທົ່ວໄປແມ່ນຕ້ອງສູ້ຊົນເພື່ອບັນລຸຜົນປະໂຫຍດຂອງຊາດ - ປະເທດຊາດໃນລະດັບສູງສຸດ. ການຮັບປະກັນຜົນປະໂຫຍດສູງສຸດຂອງຊາດ - ປະເທດຊາດບໍ່ໄດ້ໝາຍຄວາມວ່າປະເທດຫວຽດນາມໄປຕາມລັດທິຊາດນິຍົມເຫັນແກ່ຕົວ. ກອງປະຊຸມໃຫຍ່ຄັ້ງທີ 13 ຂອງພັກໄດ້ເນັ້ນໜັກເຖິງຜົນປະໂຫຍດຂອງຊາດ - ປະເທດຊາດ ຕ້ອງ “ບົນພື້ນຖານບັນດາຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ, ສັນຕິພາບ, ການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ”, ພ້ອມກັນສູ້ຊົນເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມຢູ່ໃນໂລກ.
ໃນໄລຍະປະຈຸບັນ, ຜົນປະໂຫຍດສູງສຸດຂອງຊາດ - ປະເທດຊາດແມ່ນປົກປັກຮັກສາເອກະລາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ; ປົກປັກຮັກສາພັກ, ລັດ, ປະຊາຊົນ ແລະ ລະບອບສັງຄົມນິຍົມ; ຮັກສາສະພາບແວດລ້ອມສັນຕິພາບ ສະຖຽມລະພາບ, ອຳນວຍຄວາມສະດວກໃຫ້ແກ່ການພັດທະນາປະເທດ; ປົກປັກຮັກສາພາລະກິດການປ່ຽນແປງໃໝ່, ການຫັນເປັນອຸດສາຫະກຳ ແລະ ທັນສະໄໝ; ປົກປັກຮັກສາຄວາມໝັ້ນຄົງທາງການເມືອງ, ຄວາມເປັນລະບຽບຮຽບຮ້ອຍສັງຄົມ ແລະ ພື້ນຖານວັນທະນະທຳຂອງຊາດ. ຄຽງຄູ່ກັນນັ້ນ, ກອງປະຊຸມໃຫຍ່ຄັ້ງທີ 13 ຂອງພັກກໍ່ໄດ້ປັບປຸງກ່ຽວກັບການຮັບປະກັນຄວາມສະຫງົບປອດໄພໃຫ້ມະນຸດ, ຄວາມສະຫງົບປອດໄພດ້ານເສດຖະກິດ, ຄວາມສະຫງົບປອດໄພດ້ານເຄືອຂ່າຍອິນເຕີເນດ, ສັງຄົມເປັນລະບຽບຮຽບຮ້ອຍ ແລະ ມີລະວິໄນ ກໍ່ແມ່ນບັນດາຜົນປະໂຫຍດອັນສຳຄັນຂອງຊາດ-ປະເທດຊາດ. ບັນດາປັດໄຈທີ່ໄດ້ກ່າວມາເທິງນີ້ ມີການພົວພັນຢ່າງແໜ້ນແຟ້ນ ເຊີ່ງກັນແລະກັນ ແລະ ເປັນເອກະພາບນຳກັນ, ບໍ່ສາມາດຖືເບົາປັດໄຈໃດໜຶ່ງ, ພ້ອມທັງເປັນຂໍ້ອ້າງອີງທີ່ສຳຄັນທີ່ສຸດ ເພື່ອກຳນົດຄູ່ຮ່ວມມື - ຄູ່ຕໍ່ສູ້, ການຮ່ວມມື - ການຕໍ່ສູ້ ໃນການພົວພັນຕ່າງປະເທດ, ແມ່ນ “ບໍ່ປ່ຽນແປງ” ເພື່ອຮັບມືກັບສະພາບການທີ່ຜັນແປຢ່າງໄວວາ, ສັບສົນ.
3- ກ່ຽວກັບທີ່ຕັ້ງ, ພາລະບົດບາດ ແລະ ໜ້າທີ່ ຂອງການຕ່າງປະເທດ, ຈຸດໃໝ່ທີ່ພົ້ນເດັ່ນໃນແນວທາງການພົວພັນຕ່າງປະເທດທີ່ກອງປະຊຸມຄັ້ງທີ 13 ຂອງພັກກອມມູນິດ ຫວຽດນາມແມ່ນຄັ້ງທຳອິດທີ່ພັກກຳນົດຢ່າງຈະແຈ້ງສຳລັບທີ່ຕັ້ງ, ພາລະບົດບາດນຳໜ້າ ຂອງການຕ່າງປະເທດ “ກໍ່ຕັ້ງແລະຮັກສາສະພາບແວດລ້ອມສັນຕິພາບ, ສະຖຽມລະພາບ, ປຸກລະດົມບັນດາແຫຼ່ງກຳລັງແຮງພາຍນອກເພື່ອພັດທະນາປະເທດ, ຍົກສູງຖານະບົດບາດ ແລະ ອິດທິພົນຂອງປະເທດ”. ບັນດາໜ້າທີ່ນີ້ທີ່ມີຄວາມພົວພັນຢ່າງແໜ້ນແຟ້ນນຳກັນ, ໃນນັ້ນ ການຮັກສາສັນຕິພາບ, ສະຖຽມລະພາບແມ່ນໜ້າທີ່ສຳຄັ້ນຕົ້ນຕໍ່ ແລະ ເປັນປະຈຳ; ຮັບໃຊ້ການພັດທະນາປະເທດແມ່ນໜ້າທີ່ຈຸດໜັກໃຈກາງ; ຍົກສູງຖານະບົດບາດແລະອິດທິພົນຂອງປະເທດແມ່ນໜ້າທີ່ສຳຄັນ.
ໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດ, ການທູດສັນຕິພາບມິດຕະພາບ ຍາມໃດກໍ່ໄດ້ຖືເປັນວິທີທີ່ດີກວ່າໝູ່ ໃນການປົກປັກຮັກສາປະເທດ. ໃນການຕໍ່ສູ້ປົດປ່ອຍປະເທດ ແລະ ທ້ອນໂຮມປະເທດເປັນເອກະພາບ, ກໍ່ສ້າງແລະປົກປັກຮັກສາປະເທດຊາດ, ການຕ່າງປະເທດແມ່ນໄປນຳໜ້າ ເພື່ອສ້າງທ່າ “ທັງຕີ, ທັງເຈລະຈາ”, ຍາດແຍ່ງການສະໜັບສະໜູນສາກົນ, ທຳລາຍທ່າປິດລ້ອມ, ຂວ້ຳບາດ, ເປີດສະຖານະການພັດທະນາໃໝ່ໃຫ້ແກ່ປະເທດ. ໃນພາລະກິດການປ່ຽນແປງໃໝ່, ການຕ່າງປະເທດ “ນຳໜ້າໃນການກໍ່ສ້າງສັນຕິພາບ, ປົກປັກຮັກສາປະເທດຊາດ ແລະ ດຶງດູດແຫຼ່ງພະລັງໃຫ້ແກ່ການພັດທະນາປະເທດ”(6). ດັ່ງນັ້ນ, ການຢືນຢັນພາລະບົດບາດນຳໜ້າຂອງການຕ່າງປະເທດໃນເອກະສານກອງປະຊຸມໃຫຍ່ຄັ້ງທີ 13 ແມ່ນບາດກ້າວພັດທະນາໃໝ່ ກ່ຽວກັບຈິນຕະນາການການຕ່າງປະເທດຂອງພັກກອມມູນິດຫວຽດນາມ ບົນພື້ນຖານໝູນໃຊ້ຢ່າງມີຄວາມຫົວຄິດປະດິດສ້າງແນວຄິດປົກປັກຮັກສາປະເທດທີ່ມີລັກສະນະເປັນເຈົ້າການສູງ ຂອງປະເທດຊາດ, ລວບລວມຕົວຈິງແຫ່ງການພັດທະນາ ແລະ ເຊື່ອມໂຍງສາກົນຂອງປະເທດ, ຮັບເອົາບົດຮຽນສາກົນໂດຍມີການເລືອກຕັ້ງ ແລະ ເໝາະສົມກັບທ່າອຽງສັນຕິພາບ, ການຮ່ວມມື ແລະ ການພັດທະນາຢູ່ໃນໂລກ.
ກ່ອນອື່ນໝົດ, ພາລະບົດບາດນຳໜ້າ ທີ່ສະແດງອອກໃນການຕ່າງປະເທດ ແມ່ນການຕີລາຄາ, ຄາດຄະເນສະພາບການ, ຮັບຮູ້ໄດ້ກາລະໂອກາດ ແລະ ຄວາມສິ່ງທ້າທາຍຕ່າງໆ ເພື່ອປົກປັກຮັກສາປະເທດແຕ່ຫົວທີ, ແຕ່ທາງໄກ, ຄົ້ນພົບບັນດາບັນຫາໃໝ່ຢ່າງພິບໄຫວ, ເປັນເສນາທິການຍຸດທະສາດ, ຊຸກຍູ້ການປ່ຽນແປງໃໝ່ຈິນຕະນາການ, ຊອກຫາທິດທາງດຳເນິນການທີ່ສະດວກໃຫ້ແກ່ການພັດທະນາປະເທດ. ດັ່ງນັ້ນ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ເນັ້ນໜັກວ່າ “ເພີ່ມທະວີວຽກງານຄົ້ນຄວ້າ, ຄາດຄະເນ, ເສນາທິການກ່ຽວກັບຍຸດທະສາດທາງດ້ານພົວພັນຕ່າງປະເທດ, ບໍ່ໃຫ້ຕົກໃນທ່າຮັບ, ໂດຍບັງເອີນ”. ໜ້າທີ່ນີ້ສຳຄັນທີ່ສຸດ, ຍ້ອນມີແຕ່ “ຮູ້ໂຕເອງ”, “ຮູ້ຄົນອື່ນ”, “ຮູ້ສະຖານະການ” ຈຶ່ງອາດສາມາດຍາດແຍ່ງກາລະໂອກາດ, ຄວາມສະດວກໄດ້ ເພື່ອພັດທະນາປະເທດ ແລະ ປົກປັກຮັກສາປະເທດຊາດໃນໂລກທີ່ເຄື່ອນໄຫວບໍ່ຢຸດຢັ້ງ, ສັບສົນ ແລະ ຄາດເດົາຍາກ.
ທີສອງ, ຮັກສາສະພາບແວດລ້ອມສັນຕິພາບ, ສະຖຽມລະພາບ ແລະ ຄວາມສະດວກ ໃຫ້ແກ່ການພັດທະນາປະເທດ ແລະ ປົກປັກຮັກສາປະເທດຊາດ ເປັນໜ້າທີ່ຮ່ວມກັນຂອງລະບົບການເມືອງທັງໝົດ ແລະ ທົ່ວປວງຊົນ, ໃນນັ້ນມີການຕ່າງປະເທດ. ລັກສະນະສະເພາະຂອງການຕ່າງປະເທດແມ່ນ ນຳໃຊ້ບັນດາວິທີການ, ມາດຕະການສັນຕິພາບ ເພື່ອສະກັດກັ້ນ, ແກ້ໄຂ ແລະ ຍູ້ຖອຍໄພອັນຕະລາຍສົງຄາມ, ການປະທະກັນຕັ້ງແຕ່ຫົວທີ, ແຕ່ທາງໄກ, ຈາກນັ້ນ ປະກອນສ່ວນເຂົ້າໃນການປົກປັກຮັກສາເອກະລາດ, ອຳນາດອະທິປະໄຕຂອງຊາດໄວ້ຢ່າງໝັ້ນຄົງ.
ເສີມຂະຫຍາຍມູນເຊື້ອປົກປັກຮັກສາປະເທດຂອງບັນພະບຸລຸດແມ່ນ ການໄກ່ເກ່ຍ ປອງດອງຢູ່ພາຍໃນປະເທດຈະຕ້ອງນຳໃຊ້ກຳລັງທະຫານໜ້ອຍລົງ, ການໄກ່ເກ່ຍປອງດອງຢູ່ນອກຊາຍແດນຈະບໍ່ຢ້ານສັນຍານເຕືອນ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດ ຫວຽດນາມ ໄດ້ຢືນຢັນວ່າ ສືບຕໍ່ຍູ້ແຮງ ແລະ ເຮັດໃຫ້ການພົວພັນກັບບັນດາຄູ່ຮ່ວມມືເລິກເຊິ່ງກວ່າອີກ, ເປັນຕົ້ນແມ່ນ ບັນດາປະເທດທີ່ໃກ້ຄຽງ, ຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ບັນດາຄູ່ຮ່ວມມືທີ່ສຳຄັນ ແລະ ເພື່ອນມິດທີ່ເປັນມູນເຊື້ອ, “ສ້າງທ່າແຊກຊ້ອນຜົນປະໂຫຍດ” ແລະ “ເພີ່ມຄວາມເຊື່ອໝັ້ນ”. ການປະຕິບັດໜ້າທີ່ດັ່ງກ່າວໄດ້ດີ ຈະຊ່ວຍປັບປຸງສະຖານະການການພົວພັນຕ່າງປະເທດໃຫ່ໝັ້ນຄົງ, ອຳນວຍຄວາມສະດວກໃຫ້ແກ່ການກໍ່ສ້າງ ແລະ ປົກປັກຮັກສາປະເທດຊາດ.
ຄຽງຄູ່ກັນນັ້ນ, ການຕ່າງປະເທດພ້ອມກັບການປ້ອງກັນຊາດ, ປ້ອງກັນຄວາມສະຫງົບຮັກສາໃຫ້ໝັ້ນຄົງເສັ້ນຊາຍແດນສັນຕິພາບ, ການຮ່ວມມື ແລະ ການພັດທະນາ; ເດັດຂາດ, ຍຶດໝັ້ນການຕໍ່ສູ້ ເພື່ອປົກປັກຮັກສາເອກະລາດ, ອຳນາດອະທິປະໄຕ, ເອກະພາບ, ຜຶນແຜ່ນດິນອັນຄົບຖ້ວນ. ພ້ອມທັງ, ຊອກຫາ ແລະ ເສີມຂະຫຍາຍຈຸດທີ່ຄືກັນທາງດ້ານຜົນປະໂຫຍດເພື່ອຊຸກຍູ້ການຮ່ວມມື, ມີຄວາມພິບໄຫວ ແລະ ຫົວຄິດປະດິດສ້າງ ໃນການແກ້ໄຂຄວາມຂັດແຍ້ງບົນພື້ນຖານຜົນປະໂຫຍດຂອງຊາດ-ປະເທດຊາດ ແລະ ກົດໝາຍສາກົນ. ໃນນັ້ນ, ສືບຕໍ່ຊຸກຍູ້ການແກ້ໄຂບັນດາບັນຫາໃນທະເລ ບົນພື້ນຖານກົດໝາຍສາກົນ, ໂດຍສະເພາະແມ່ນ ອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS).
ທີສາມ, ນຳໜ້າໃນການລະດົມບັນດາແຫຼ່ງພະລັງຈາກພາຍນອກໃຫ້ແກ່ການພັດທະນາປະເທດ. ໜຶ່ງໃນບັນດາຜົນປະໂຫຍດພື້ນຖານຂອງປະເທດໃນປະຈຸບັນແມ່ນ ສູ້ຊົນປະຕິບັດເປົ້າໝາຍພັດທະນາປະເທດເຖິງປີ 2030, ວິໄສທັດຮອດປີ 2045. ດັ່ງນັ້ນ, ພັດທະນາປະເທດແມ່ນເປົ້າໝາຍທະລຸໃນທຸກໆກິດຈະກຳການຕ່າງປະເທດ, ຕາມນັ້ນທັງໝົດເສົາຄ້ຳ, ເຫຼົ່າຮົບຂອງການຕ່າງປະເທດລ້ວນແຕ່ມີຄວາມມານະພະຍາຍາມປະກອບສ່ວນເຂົ້າໃນການປະຕິບັດວິໄສທັດ ແລະ ເປົ້າໝາຍພັດທະນາປະເທດ, ໃນນັ້ນການທູດເສດຖະກິດແມ່ນເປັນຫຼັກແຫຼ່ງ. ຄືແນວນັ້ນ, ພ້ອມກັບຈິນຕະນາການນຳໜ້າ, ຈິນຕະນາການພັດທະນາແມ່ນຈຸດໃໝ່ໃນຈິນຕະນາການພົວພັນຕ່າງປະເທດຂອງພັກທີ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ.
ເຊື່ອມຊຶມທັດສະນະ “ການພັດທະນາເສດຖະກິດ - ສັງຄົມແມ່ນໜ້າທີ່ຈຸດສຸມໃຈກາງ”, ການພົວພັນຕ່າງປະເທດສືບຕໍ່ຍາດແຍ່ງເອົາບັນດາປັດໄຈສາກົນທີ່ເອື້ອອຳນວຍ, ບັນດາສັຍຍາການຄ້າເສລີທີ່ໄດ້ລົງນາມເຊັນ, ບັນດາຄຳໝັ້ນສັນຍາ ແລະ ຂໍ້ຕົກລົງສາກົນຢ່າງມີປະສິດທິຜົນ ເພື່ອເປີດກວ້າງຕະຫຼາດ, ດຶງດູດຄວາມຮູ້ ເຕັກໂນໂລຊີ ແລະ ການລົງທຶນເພື່ອຮັບໃຊ້ການປ່ຽນແປງໃໝ່ຕົວແບບເຕີບໂຕ, ຍູ້ແຮງການຫັນປະເທດເປັນອຸດສາຫະກຳ ແລະ ທັນສະໄໝ, ປະກອບສ່ວນເພີ່ມທະວີຄວາມສາມາດເປັນເຈົ້າດ້ວຍຕົນເອງຂອງພື້ນຖານເສດຖະກິດ ແລະ ກຳລັງແຮງສັງລວມຂອງຊາດ, ການຕ່າງປະເທດກໍ່ຍາດແຍ່ງບັນດາສາຍພົວພັນດ້ານການເມືອງອັນດີງານ ເພື່ອແກ້ໄຂບັນດາບັນຫາທີ່ສັບສົນໃນການຮ່ວມມື ແລະ ການເຊື່ອມໂຍງເຂົ້າກັບເສດຖະກິດສາກົນ.
ໃນສະຖານະການໂລກລະບາດຂອງພະຍາດໂຄວິດ-19 ທີ່ຜັນແປຢ່າງສັບສົນ, ພາລະບົດບາດນຳໜ້າຂອງການຕ່າງປະເທດທີ່ໄດ້ເສີມຂະຫຍາຍ ແລະ ສະແດງຢ່າງຈະແຈ້ງໂດຍຜ່ານການເຄື່ອນໄຫວ “ການທູດວັກແຊນ”, ຍາດແຍ່ງຄວາມຊ່ວຍເຫຼືອຢ່າງທັນເວລາ, ມີປະສິດທິຜົນ ຂອງສາກົນກ່ຽວກັບວັກແຊນ, ອຸປະກອນການແພດ ແລະ ຢາປົວພະຍາດ, ປະກອບສ່ວນອັນສຳຄັນເຂົ້າໃນການຕ້ານ, ສະກັດກັ້ນ, ຮັບມືຢ່າງເໝາະສົມປອດໄພກັບພະຍາດໂຄວິດ-19 ແລະ ຟື້ນຟູ, ພັດທະນາເສດຖະກິດ-ສັງຄົມ.
ທີສີ່, ນຳໜ້າໃນການປູທາງ, ໄປພ້ອມກັນ, ຮັບໃຊ້ຜົນປະໂຫຍດຂອງປະຊາຊົນ, ທ້ອງຖີ່ນ ແລະ ວິສາຫະກິດ ໃນການເຊື່ອມໂຍງເຂົ້າກັບສາກົນ. ຈຸດໃໝ່ອັນໜຶ່ງແມ່ນຍຸດທະສາດພັດທະນາເສດຖະກິດ - ສັງຄົມ 2021-2030 ທີ່ວາງອອກກຳນົດທິດ “ການສ້າງພື້ນຖານການທູດທາງດ້ານເສດຖະກິດເພື່ອຮັບໃຊ້ການພັດທະນາ, ຖືເອົາປະຊາຊົນ ທ້ອງຖິ່ນ ແລະ ວິສາຫະກິດເປັນຈຸດສຸມໃຈກາງ”. ນີ້ແມ່ນການໝູນໃຊ້ແນວຄິດ “ຖືເອົາປະຊາຊົນເປັນກົກ” ຢ່າງປະດິດສ້າງເຂົ້າໃນການຕ່າງປະເທດ, ຍ້ອນວ່າ ການປະຕິບັດໜ້າທີ່ການຕ່າງປະເທດສຸດທ້າຍແມ່ນແນໃສ່ເປົ້າໝາຍ ປະຊາຊົນທີ່ຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ, ຮູ່ງເຮືອງສີວິໄລ. ເຊື່ອມຊືມຄຳສັ່ງສອນຂອງປະທານ ໂຮ່ຈິມິນ “ສິ່ງໃດເປັນປະໂຫຍດໃຫ້ແກ່ປະຊາຊົນເຮົາຕ້ອງເຮັດໃຫ້ດີທີ່ສຸດ, ສິ່ງທີ່ເປັນອັນຕະລາຍຕໍ່ປະຊາຊົນເຮົາຕ້ອງຫຼີກລ່ຽງຢ່າງເດັດຂາດ”, ຕິດແທດກັບແຜນນະໂຍບາຍ, ແນວທາງການຕ່າງປະເທດ ແລະ ພັດທະນາເສດຖະກິດ-ສັງຄົມ, ການຕ່າງປະເທດສ້າງສະພາບແວດລ້ອມສາກົນທີ່ເອື້ອອຳນວຍ ເປີດທາງ ໄປພ້ອມກັນ, ຊ່ວຍເຫຼືອປະຊາຊົນ ທ້ອງຖິ່ນ ແລະ ວິສາຫະກິດຍາດແຍ່ງຫຼາຍສຸດກາລະໂອກາດ ຜົນປະໂຫຍດ ແລະ ຫຼຸດຜ່ອນຄວາມສ່ຽງ, ຜ່ານຜ່າສິ່ງທ້າທາຍໃນການເຊື່ອມໂຍສາກົນ, ພ້ອມທັງ, ປົກປັກຮັກສາຜົນປະໂຫຍດອັນຊອບທຳຂອງລັດ ປະຊາຊົນ ແລະ ວິສາຫະກິດຫວຽດນາມ ໃນການເຊື່ອມໂຍງສາກົນ.
ທີຫ້າ, ນຳໜ້າໃນການຍົກສູງຖານະບົດບາດ ແລະ ອິດທິພົນຂອງປະເທດ ໂດຍຜ່ານການເສີມຂະຫາຍພາລະບົດບາດເປັນຫຼັກແຫຼ່ງ, ນຳພາ, ໄກ່ເກ່ຍ, ຮັບຜິດຊອບໃຫ້ດີ ບັນດາພາລະສຳຄັນສາກົນ, ປະກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບ ເຂົ້າໃນຄວາມເອົາໃຈໃສ່ຮ່ວມກັນຂອງໂລກ. ກອງປະຊຸມໃຫຍ່ຄັ້ງທີ 13 ຂອງພັກກອມມູນິກຫວຽດນາມໄດ້ກຳນົດ ການຍູ້ແຮງ ແລະ ຍົກລະດັບການພົວພັນຕ່າງປະເທດຫຼາຍຝ່າຍ, ເສີມຂະຫຍາຍພາລະບົດບາດຂອງຫວຽດນາມ ໃນບັນດາກົນໄກຫຼາຍຝ່າຍ, ພິເສດແມ່ນ ອາຊຽນ, ສະຫະປະຊາຊາດ, ເວທີປາໄສຮ່ວມມືເສດຖະກິດອາຊີ-ປາຊີຟິກ (APEC), ການຮ່ວມມືອະນຸພາກພື້ນ ແມ່ນ້ຳຂອງ ແລະ ບັນດາຂອບການຮ່ວມມື ກໍ່ຄືໃນບັນດາບັນຫາສຳຄັນລະດັບຍຸດທະສາດ, ເໝາະສົມກັບຄວາມຮຽກຮ້ອງຕ້ອງການ, ຄວາມສາມາດ ແລະ ເງື່ອນໄຂຂອງປະເທດ. ຄຽງຄູ່ກັນນັ້ນ, ການສືບຕໍ່ປ່ຽນແປງໃໝ່, ຍົກສູງປະສິດທິຜົນວຽກງານໂຄສະນາກ່ຽວກັບການຕ່າງປະເທດ, ປົກປ້ອງພົນລະເມືອງ, ການທູດດ້ານວັດທະນະທຳ, ຜັນຂະຫຍາຍຮອບດ້ານ ແລະ ແຂງແຮງກວ່າອີກ ວຽກງານຄົນຫວຽດນາມຢູ່ຕ່າງປະເທດ ກໍ່ແມ່ນການປະກອບສ່ວນທີ່ສຳຄັນເຂົ້າໃນການຍົກສູງຮູບພາບ, ຖານະບົດບາດ ແລະ ອິດທິພົນຂອງປະເທດ.
ປະທານ ໂຮ່ຈິມິນ ເຄີຍເຕືອນວ່າ: “ທຸກສິ່ງທຸກຢ່າງປະສົບຜົນສຳເລັດໂດຍຄຳເຫັນເປັນເອກະສັນກັນ”, ການຕ່າງປະເທດພຽງແຕ່ສາມາດປະຕິບັດບົດບາດນຳໜ້າໄດ້ດີກໍຕໍ່ເມື່ອຢູ່ໃນວຽກງານພາຍໃນ-ຕ່າງປະເທດ, ມີການປະສານສົມທົບກັນຢ່າງແໜ້ນແຟ້ນ, ສາມັກຄີແລະຄວາມເປັນເອກະພາບ ຂອງບັນດາຂັ້ນ, ຂະແໜງການ ແລະ ທົ່ວປວງຊົນ, ໃນນັ້ນ ຈຸດລວມຢູ່ທີ່ນີ້ແມ່ນການຮ່ວມມືເພື່ອຮັບປະກັນຜົນປະໂຫຍດສູງສຸດຂອງຊາດ - ປະເທດຊາດ. ເຮັດໄດ້ຄືແນວນັ້ນ ຈຶ່ງສາມາດເສີມຂະຫຍາຍກຳລັງແຮງສັງລວມທົ່ວປະເທດຊາດ ປະສານສົມທັບກັບກຳລັງແຮງຂອງຍຸກສະໄໝ ເພື່ອຮັບໃຊ້ພາລະກິດກໍ່ສ້າງ, ພັດທະນາປະເທດ ແລະ ປົກປັກຮັກສາປະເທດຊາດ.
4- ຜັນຂະຫຍາຍກິດຈະກຳການຕ່າງປະເທດ ຢ່າງໃຫ້ຄົບຊຸດ, ມີຄວາມຫົວຄິດປະດິດສ້າງ ແລະ ມີປະສິດທິຜົນ, ເປັນເຈົ້າກນ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກວ້າງຂວາງ ແມ່ນກຳນົດທິດທີ່ປົກຄຸມການຕ່າງປະເທດໃນໄລຍະພັດທະນາໃໝ່ຂອງປະເທດ. ທີໜຶ່ງ, ລັກສະນະຄົບຊຸດ ສະແດງອອກໃນການປະສານສົມທົບຢ່າງແໜ້ນແຟ້ນ, ເປັນຈັ່ງຫວະລະຫວ່າງບັນດາເສົາຄ້ຳຂອງກາຕ່າງປະເທດ, ລວມມີການຕ່າງປະເທດຂອງພັກ, ການທູດຂອງລັດ ແລະ ການພົວພັນຕ່າງປະເທດປະຊາຊົນ, ລະຫວ່າງບັນດາສາຍພົວພັນກັບບັນດາຄູ່ຮ່ວມມື, ບັນດາຂົງເຂດ, ເປັນຕົ້ນແມ່ນການຕ່າງປະເທດດ້ານປ້ອງກັນຊາດ, ປ້ອງກັນຄວາມສະຫງົບ, ລະຫວ່າງສອງຝ່າຍ ແລະ ຫຼາຍຝ່າຍ... ທີສອງ, ລັກສະນະຫົວຄິດປະດິດສ້າງ ຮຽກຮ້ອງໃຫ້ການຕ່າງປະເທດຕ້ອງມີການປ່ຽນແປງໃໝ່ຢ່າງບໍ່ຢຸດຢັ້ງ, ສະຫຼາດຄ່ອງແຄ່ວແກ້ໄຂບັນດາບັນຫາທີ່ສັບສົນ, ຊອກຫາທິດໄປ, ວິທີການປະຕິບັດອັນໃໝ່ ດ້ວຍ “ຈິດໃຈເປັນເຈົ້າການບຸກໂຈມຕີ, ກ້າຜ່ານພົ້ນອອກຈາກບັນດາຈິນຕະນາການ ບັນດາຂົງເຂດທີ່ເຄີຍເຮັດ ເພື່ອມີຄວາມຄິດ ແລະ ການປະຕິບັດຂ້າມລະດັບຊາດ, ບັນລຸເຖິງລະດັບພາກພື້ນ ແລະ ສາກົນ”(7). ແນ່ນອນວ່າ, ຄວາມຫົວຄິດປະດິດສ້າງຕ້ອງບົນພື້ນຖານຮັກສາໃຫ້ໝັ້ນຄົງຫຼັກການ, ຍຶດໝັ້ນເປົ້າໝາຍຍຸດທະສາດ. ທີສາມ, ລັກສະນະມີປະສິດທິຜົນ ເຊິ່ງສະແດງຢູ່ວຽກເຮັດໃຫ້ການຕ່າງປະເທດໄປສູ່ລວງເລິກ, ແທ້ຈິງ, ປຸກລະດົມ ແລະ ປະສານສົມທົບບັນດາແຫຼ່ງພະລັງພາຍນອກກັບແຫຼ່ງພະລັງພາຍໃນປະເທດຢ່າງມີປະສິດທິຜົນ ເພື່ອຮັບໃຊ້ໃຫ້ດີທີ່ສຸດການພັດທະນາປະເທດ ແລະ ປົກປັກຮັກສາປະເທດຊາດ. ການພັດທະນາປະເທດໃນໄລຍະໃໝ່ເຮັດໃຫ້ເກີດຄວາມຕ້ອງການທີ່ເພີ່ມຂຶ້ນ ໃນການເສີມສ້າງຄວາມຄົບຊຸດ, ຄວາມຄິດປະດິດສ້າງ ແລະ ປະສິດທິຜົນໃນກິດຈະກຳການຕ່າງປະເທດ.
ກ່ຽວກັບການເຊື່ອມໂຍງສາກົນ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໄດ້ວາງອອກຄວາມຮຽກຮ້ອງຕ້ອງການ ກ່ຽວກັບລັກສະນະຮອບດ້ານ ແລະ ເລິກເຊິ່ງກວ້າງຂວາງ. ນັ້ນແມ່ນ, ການເຊື່ອມໂຍງເຂົ້າກັບສາກົນໂດຍຜ່ານທຸກຊ່ອງທາງຂອງພັກ, ລັດ ແລະ ປະຊາຊົນ, ສອງຝ່າຍ ແລະ ຫຼາຍຝ່າຍ, ທຸກຂັ້ນ, ສາຂາ ແລະ ຂົງເຂດ. ບໍ່ພຽງແຕ່ເປີດກວ້າງພື້ນທີ່ເທົ່ານັ້ນ, ການເຊື່ອມໂຍງເຂົ້າກັບສາກົນສືບຕໍ່ລົງເລິກ, ຜັນຂະຫຍາຍບັນດາຄຳໝັ້ນສັນຍາສາກົນ, ໃນນັ້ນປະຕິບັດບັນດາສັນຍາການຄ້າເສລີລຸ້ນໃໝ່ຢ່າງມີປະສິດທິຜົນ, “ເປັນເຈົ້າການເຂົ້າຮ່ວມ, ຕັ້ງໜ້າປະກອບສ່ວນ, ຍົກສູງພາລະບົດບາດຂອງຫວຽດນາມ ໃນການກໍ່ສ້າງ, ກຳນົດຮູບແບບບັນດາກົນໄກຫຼາຍຝ່າຍ ແລະ ຄວາມເປັນລະບຽບຮຽບຮ້ອຍດ້ານການເມືອງ - ເສດຖະກິດສາກົນ” ເພື່ອຜົນປະໂຫຍດຂອງຊາດ-ປະເທດຊາດ ແລະ ຜົນປະໂຫຍດຮ່ວມກັນ ຂອງປະຊາຄົມສາກົນ ບົນພື້ນຖານບັນດາຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ.
5- ເພື່ອໃຫ້ການຕ່າງປະເທດເສີມຂະຫຍາຍບົດບາດນຳໜ້າ ແລະ ສຳເລັດບັນດາທິດທາງ ໜ້າທີ່ທີ່ກ່າວມາເທິງນີ້, ກອງປະຊຸມຄັ້ງທີ 13 ໄດ້ວາງແຜນນະໂຍບາຍ “ກໍ່ສ້າງພື້ນຖານການຕ່າງປະເທດຮອບດ້ານ, ທັນສະໄໝດ້ວຍສາມເສົາຄ້ຳແມ່ນ ການພົວພັນຕ່າງປະເທດຂອງພັກ, ການທູດຂອງລັດ ແລະ ການພົວພັນຕ່າງປະເທດປະຊາຊົນ”(8). ແຜນນະໂຍບາຍໃໝ່ສະບັບນີ້ ໄດ້ສ່ອງແສງຄວາມເຕີບໃຫຍ່ຂອງພື້ນຖານການທູດປະຕິວັດຫວຽດນາມ ໂດຍປະທານໂຮຈິມິນເປັນຜູ້ກໍ່ຕັ້ງ, ພ້ອມກັນນັ້ນກໍ່ແມ່ນຄວາມຮຽກຮ້ອງຕ້ອງການໃໝ່ທີ່ມີລັກສະນະຍຸດທະສາດ ຍາວນານ, ທັງມີລັກສະນະຈຳເປັນຍິ່ງ ຕໍ່ການຕ່າງປະເທດ ແລະ ຂະແໜງການການທູດໃນສະຖານະການໃໝ່.
ລັກສະນະຮອບດ້ານ ຂອງພື້ນຖານການທູດຫວຽດນາມສະແດງອອກໃນ ອັດຕະພາບທີ່ປະຕິບັດການພົວພັນຕ່າງປະເທດ ລວມທັງລະບົບການເມືອງ, ບັນດາອົງການຈັດຕັ້ງສັງຄົມ, ວິສາຫະກິດ ແລະ ປະຊາຊົນ; ໃນທຸກຂົງເຂດການເມືອງ, ການປ້ອງກັນຊາດ, ການປ້ອງກັນຄວາມສະຫງົບ, ເສດຖະກິດ-ສັງຄົມ; ກັບບັນດາຄູ່ຮ່ວມມື, ບໍລິເວນ, ພາກພື້ນ, ຈຸດສຸມໃຈກາງແມ່ນຍູ້ແຮງ ແລະ ເຮັດໃຫ້ເລິກເຊິ່ງກວ່າອີກ ບັນດາສາຍພົວພັນກັບບັນດາປະເທດໃກ້ຄຽງ, ຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ຄູ່ຮ່ວມມືສຳຄັນ ແລະ ເພື່ອນມິດທີ່ເປັນມູນເຊື້ອ, ເປັນເຈົ້າການເຂົ້າຮ່ວມແລະເສີມຂະຫຍາຍບັນດາກົນໄກຫຼາຍຝ່າຍທີ່ສຳຄັນມີລະດັບຍຸດທະສາດ.
ລັກສະນະທັນສະໄໝ ສະແດງຢູ່ໃນ ທາດແທ້ຂອງພື້ນຖານການຕ່າງປະເທດຫວຽດນາມ ແມ່ນການປະສົມປະສານຢ່າງກົມກຽວລະຫວ່າງມູນເຊື້ອ, ລັກສະນະສະເພາະການທູດຂອງປະເທດຊາດ, ແນວຄິດການທູດ ໂຮ່ຈິມິນ, ແນວທາງການພົວພັນຕ່າງປະເທດຂອງພັກກອມມູນິດຫວຽດນາມ ຜ່ານສະໄໝຕ່າງໆ ແລະ ຄວາມຍອດຍິ່ງການທູດຍຸກສະໄໝ; ຢູ່ ໃນການດຳເນີນງານຂອງລະບົບການທູດ ພາຍໃນຂອບຂອງລະບຽບການກົດໝາຍທີ່ນັນມື້ນັບໄດ້ຮັບການບູລະນະ, ຕິດພັນແໜ້ນແຟ້ນ, ນິ້ມນວນລະຫວ່າງການພົວພັນຕ່າງປະເທດຂອງພັກ, ການທູດຂອງລັດ ແລະ ການພົວພັນຕ່າງປະເທດປະຊາຊົນ; ຢູ່ບ່ອນຈັດຕັ້ງກົງຈັກໃຫ້ກະທັດຫັດ, ມີປະສິດທິຜົນ ດ້ວຍວິທີການເຄື່ອນໄຫວ ທີ່ມີວິທະຍາສາດ, ເປັນມາດຕະຖານ ແລະ ດີຈິຕອນ, ມີຄວາມສາມາດປ່ຽນແປງໃໝ່, ມີຫົວຄິດປະດິດສ້າງ ແລະ ເປັນເຈົ້າການຮັບມືທີ່ເໝາະສົມກັບການຜັນປ່ຽນຢ່າງໄວວາຂອງສະພາບການ.
ພື້ນຖານການທູດຫວຽດນາມ ດ້ວຍ 3 ເສົາຄ້ຳຄື: ການຕ່າງປະເທດຂອງພັກ, ການທູດຂອງລັດ ແລະ ການທູດປະຊາຊົນ ຍາມໃດກໍຢູ່ພາຍໃຕ້ການນຳພາ, ຊີ້ນຳຂອງພັກ ແລະ ການຄຸ້ມຄອງລວມສູນຂອງລັດ. ເຖິງວ່າຈະມີທີ່ຕັ້ງ, ພາລະບົດບາດ ແລະ ທ່າດີທີ່ແຕກຕ່າງກັນ, ແຕ່ສາມເສົາຄ້ຳການຕ່າງປະເທດນັ້ນມີສາຍພົວພັນຢ່າງແໜ້ນແຟ້ນທີ່ສຸດ ແລະ ຊ່ວຍເຫຼືອເຊິ່ງກັນແລະກັນ ຍ້ອນວ່າພ້ອມກັນປະຕິບັດແນວທາງການຕ່າງປະເທດຂອງພັກ ດ້ວຍເປົ້າໝາຍຮ່ວມກັນແມ່ນ ເພື່ອຜົນປະໂຫຍດຂອງຊາດ - ປະເທດຊາດ. ສິ່ງເຫຼົ່ານີ້ທີ່ສະແດງເຖິງທາດແທ້ຂອງພື້ນຖານການທູດຫວຽດນາມ ແມ່ນຄວາມປະສົມກົມກຽວເປັນເອກະພາບ ລະຫວ່າງລັກສະນະພັກ, ລັກສະນະຊາດ - ປະເທດຊາດ ແລະ ລັກສະນະປະຊາທິປະໄຕ - ມະນຸດອາລະຍະທຳ. ການຜັນຂະຫຍາຍການພົວພັນຕ່າງປະເທດຂອງພັກ, ການທູດຂອງລັດ ແລະ ການພົວພັນຕ່າງປະເທດປະຊາຊົນ ຢ່າງຄົບຊຸດ ແໜ້ນແຟ້ນ ແລະ ນີ້ມນວນ ຈະເສີມຂະຫຍາຍທ່າແຮງຂອງແຕ່ລະເສົາຄ້ຳການພົວພັນຕ່າງປະເທດ, ສ້າງເປັນກຳລັງແຮງສັງລວມຂອງພື້ນຖານການທູດຫວຽດນາມ. ນີ້ທັງເປັນມູນເຊື້ອ ແລະ ບົດຮຽນອັນລ້ຳຄ່າ, ທັງເປັນສິລະປະ “ເຕົ້າໂຮມກຳລັງ” ອັນຍອດຍິ່ງຂອງການຕ່າງປະເທດປະຕິວັດຫວຽດນາມ ທີ່ຕ້ອງການສືບຕໍ່ຮັກສາ ແລະ ເສີມຂະຫຍາຍໃນໄລຍະໃໝ່.
ເພື່ອກໍ່ສ້າງພື້ນຖານການທູດຫວຽດນາມທີ່ຂະຫຍາຍຕົວຢ່າງຮອບດ້ານ ແລະ ທັນສະໄໝ, ຄຽງຄູ່ກັບການສືບຕໍ່ປັບປຸງ ບູລະນະກົນໄກປະສານສົມທົບກັນຢ່າງແໜ້ນແຟ້ນ, ມີປະສິດທິຜົນ ລະຫວ່າງບັນດາເສົາຄ້ຳ ແລະ ບັນດາອົງການພົວພັນຕ່າງປະເທດ, ສິ່ງສຳຄັນປະການໜຶ່ງຄື ຕ້ອງມີ ຖັນແຖວພະນັກງານການຕ່າງປະເທດ ທີ່ຮອບດ້ານທັງໃນດ້ານຄວາມກ້າຫານ ຄຸນນະພາບ ສະຕິປັນຍາ, ທັນສະໄໝທາງດ້ານແບບແຜນດຳລົງຊີວິດ ແລະ ວິທີການເຮັດວຽກ, ການປ່ຽນແປງໃໝ່, ມີຄວາມຫົວຄິດປະດິດສ້າງ, ທຽບເທົ່າກັບລະດັບຍຸກສະໄໝ. ໃນປະຫວັດສາດຂອງຊາດ, ຫວຽດນາມມີນັກການທູດທີ່ດີເດັ່ນຫຼາຍຄົນ, ແມ່ນບັນດາແບບຢ່າງທີ່ດີເດັ່ນກ່ຽວກັບຈິດໃຈຮັກຊາດ, ຄວາມກ້າຫານ, ຄຸນສົມບັດສິນທຳ, ສະຕິປັນຍາ ແລະ ແບບແຜນ ສິລະປະການທູດ. ຕໍ່ໜ້າຄວາມຮຽກຮ້ອງຕ້ອງການໃໝ່ ໃນການກໍ່ສ້າງພື້ນຖານການທູດຮອບດ້ານ ແລະ ທັນສະໄໝ, ຕ້ອງການສືບຕໍ່ຖືເປັນສຳຄັນພິເສດ ວຽກງານພະນັກງານການຕ່າງປະເທດ, ເປັນຕົ້ນແມ່ນກົນໄກ, ນະໂຍບາຍ ແລະ ການກໍ່ສ້າງ, ຝຶກອົບຮົມພະນັກງານການຕ່າງປະເທດ ໃຫ້ຮອບດ້ານທາງດ້ານຄຸນສົມບັດສິນທຳ, ລະດັບຄວາມຮູ້ ແລະ ຄວາມສາມາດ. ພະນັກງານການຕ່າງປະທດ ແລະ ພະນັກງານການທູດລຸ້ນປະຈຸບັນເສີມຂະຫຍາຍມູນເຊືອອັນສະຫງ່າງາມ, ເດັດຂາດຈົ່ງຮັກພັກດີຕໍ່ພັກ ປະເທດຊາດ ແລະ ປະຊາຊົນ, ອອກແຮງຝຶກຜົນຫຼໍ່ຫຼອມຄຸມສົມບັດການເມືອງ, ສິນທຳປະຕິວັດ, ສູ້ຊົນຢ່າງບໍ່ຢຸດຢັ້ງ, ຍົກລະດັບສະຕິປັນຍາ, ເຂັ້ມແຂງ, ໝັ້ນໃຈຕົນເອງ, ຍຶດໝັ້ນ ແລະ ປ່ຽນແປງໃໝ່ຢ່າງມີຄວາມປະດິດສ້າງ ເພື່ອພາລະກິດການພັດທະນາປະເທດ ແລະ ປົກປັກຮັກສາປະເທດຊາດ.
***
ແນວທາງການພົວພັນຕ່າງປະເທດທີ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດ ຫວຽດນາມ ໄດ້ສືບທອດ, ພັດທະນາ ແລະ ບູລະນະແນວທາງການພົວພັນຕ່າງປະເທດຂອງພັກກອມມູນິດຫວຽດນາມ ໃນໄລຍະການປ່ຽນແປງໃໝ່, ແມ່ນເຂັມຊີ້ທິດໃຫ້ການພັນຂະຫຍາຍການພົວພັນຕ່າງປະເທດຢ່າງຄົບຊຸດ, ມີຫົວຄິດປະດິດສ້າງ ແລະ ມີປະສິດທິຜົນ ໃນເວລາຕໍ່ໄປ. ເພື່ອໃຫ້ບັນດາແຜນນະໂຍບາຍ, ທິດທາງການພົວພັນຕ່າງປະເທດຂອງກອງປະຊຸມໃຫຍ່ຄັ້ງທີ 13 ຂອງພັກໄປສູ່ຊີວິດ, ຕ້ອງການມີຍຸດທະສາດສັງລວມໂດຍໄວ ທີ່ຕິດພັນຢ່າງແໜ້ນແຟ້ນກັບຍຸດທະສາດການປົກປັກຮັກສາປະເທດຊາດ ແລະ ຍຸດທະສາດພັດທະນາເສດຖະກິດ-ສັງຄົມ, ບົນພື້ນຖານນັ້ນ ເປັນເອກະພາບໃນຄວາມຮັບຮູ້ ແລະ ການປະຕິບັດ, ກໍ່ສ້າງແລະຜັນຂະຫຍາຍບັນດາຍຸດທະສາດ, ໂຄງການ, ແຜນການ, ມາດຕະການການພົວພັນຕ່າງປະເທດໃນແຕ່ລະຂົງເຂດ, ກັບແຕ່ລະຄູ່ຮ່ວມມື. ເຮັດແນວນັ້ນ, ຈະເສີມຂະຫຍາຍກຳລັງແຮງສັງລວມຂອງທັງລະບົບການເມືອງ, ບັນດາຂັ້ນ, ບັນດາຂະແໜງການ ແລະ ທົ່ວປວງຊົນໄດ້ ເພື່ອໃຫ້ການຕ່າງປະເທດປະກອບສ່ວນທີ່ສົມກຽດເຂົ້າໃນການປະຕິບັດວິໄສທັດ ແລະ ເປົ້າໝາຍການພັດທະນາປະເທດ ຕາມມະຕິກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໃຫ້ປະສົບຄວາມສຳເລັດ./.
------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 5, ໜ້າ 290.
(2) ເອກະສານກອງປະຊຸມໃຫຍ່ຂອງພັກໃນໄລຍະປ່ຽນແປງໃໝ່, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2019, ເຫຼັ້ມ I, ໜ້າ 97.
(3) ຄຳສັ່ງເລກທີ 25-CT/TW, ສະບັບລົງວັນທີ 8 ສິງຫາ 2018, ຂອງຄະນະເລຂາທິການສູນກາງພັກກ່ຽວກັບ “ການຍູ້ແຮງແລະຍົກລະດັບການຕ່າງປະເທດຫຼາຍຝ່າຍເຖິງປີ 2030” .
(4), (5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ I, ໜ້າ 25, 207.
(6) ບົດຄຳເຫັນຂອງເລຂາທິການໃຫຍ່ ຫງວຽນຝູຈ້ອງ ທີ່ກອງປະຊຸມການທູດຄັ້ງທີ 28, ເດືອນທັນວາ 2013.
(7) ບົດຄຳເຫັນຂອງເລຂາທິການໃຫຍ່ ຫງວຽນຝູຈ້ອງ ທີ່ກອງປະຊຸມການທູດຄັ້ງທີ 30, ເດືອນສິງຫາ 2013.
(8) “ພື້ນຖານການທູດ” ຢູ່ທີ່ນີ້ຖືກເຂົ້າໃຈວ່າ ທຽບເທົ່າກັບວຽກງານການຕ່າງປະເທດ, ລວມທັງການທູດຂອງພັກ, ການທູດຂອງລັດ ແລະ ການທູດປະຊາຊົນ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 978 (ເດືອນພະຈິກ 2021)
