ຜົນງານທີ່ປະທັບໃຈຂອງການທູດຫວຽດນາມປີ 2021:
ນຳໜ້າ, ເປັນເຈົ້າການ, ຕັ້ງໜ້າ ແລະ ມີຫົວຄິດປະດິດສ້າງ
ເພື່ອພາລະກິດການພັດທະນາປະເທດ ແລະ ການປົກປັກຮັກສາປະເທດຊາດ
ນຳໜ້າ, ເປັນເຈົ້າການ, ຕັ້ງໜ້າ ແລະ ມີຫົວຄິດປະດິດສ້າງ
ເພື່ອພາລະກິດການພັດທະນາປະເທດ ແລະ ການປົກປັກຮັກສາປະເທດຊາດ
ວກ. - ປີ 2021 ແມ່ນປີທຳອິດທີ່ພວກເຮົາຈັດຕັ້ງການຊາບຊຶມ, ຜັນຂະຫຍາຍປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ ໃນສະຖານະການສາກົນແລະໃນປະເທດມີການຜັນປ່ຽນຢ່າງສັບສົນ, ຄາດເດົາຍາກ. ປະຕິບັດນະໂຍບາຍການຕ່າງປະເທດໂດຍກອງປະຊຸມໃຫຍ່ຄັ້ງທີ 13 ຂອງພັກວາງອອກມາ, ການຕ່າງປະເທດແລະການທູດຫວຽດນາມໄດ້ຮັບການຜັນຂະຫຍາຍຢ່າງຄົບຊຸດ, ປະດິດສ້າງ, ມີປະສິດທິຜົນ ແລະ ບັນລຸໄດ້ໝາກຜົນຮອບດ້ານດ້ວຍບັນດາຮອຍປະທັບທີ່ພົ້ນເດັ່ນ, ປະກອບສ່ວນສຳຄັນເຂົ້າໃນບັນດາຜົນງານລວມຂອງປະເທດ.
ໂລກສືບຕໍ່ເຄື່ອນໄຫວຢ່າງວ່ອງໄວ, ເລິກເຊິ່ງ ແລະ ສັບສົນ
ຖືກຕ້ອງຕາມການພິນິດໄສຂອງພັກທີ່ກອງປະຊຸມໃຫຍ່ຄັ້ງທີ 13, ສະພາບການສາກົນໃນປີ 2021 ສືບຕໍ່ມີການຜັນປ່ຽນຢ່າງເລິກເຊິ່ງທີ່ສຸດ. ສັນຕິພາບ ການຮ່ວມມື ແລະ ການພັດທະນາ ຍັງຄົງເປັນທ່າອ່ຽງໃຫຍ່ ແຕ່ກໍປະເຊີນກັບອຸປະສັກແລະຄວາມຫຍຸ້ງຍາກຫຼາຍຢ່າງ. ເຖິງຈະມີສິ່ງທ້າທາຍ ແຕ່ໂລກາພິວັດແລະການເຊື່ອມໂຍງສາກົນ ຍັງສືບຕໍ່ຄືບໜ້າ, ໂດຍສະເພາະ ການເຊື່ອມໂຍງທາງດ້ານດິຈີຕອນ. ການແກ່ງແຍ້ງທາງຍຸດທະສາດລະຫວ່າງປະເທດໃຫຍ່ ສືບຕໍ່ຜັນແປຢ່າງສັບສົນ ແລະ ດຸເດືອດກວ່າເກົ່າ, ໂດຍສະເພາະ ຢູ່ໃນພາກພື້ນອາຊີ-ປາຊີຟິກ. ວິທີເຕົ້າໂຮມກຳລັງໃນໂລກແລະໃນພາກພື້ນເກີດຂຶ້ນຢ່າງຍືດຫຍຸ່ນທີ່ສຸດ.
ຄຽງຄູ່ກັບບັນດາສິ່ງທ້າທາຍແບບດັ້ງເດີມ (ການປະທະກັນດ້ວຍອາວຸດ, ດ້ານຊົນເຜົ່າ, ການຂັດແຍ້ງກ່ຽວກັບດິນແດນ...), ຊ່ອງຫວ່າງການພັດທະນາ, ຄວາມບໍ່ສະເໝີພາບ ແລະ ຄວາມບໍ່ໝັ້ນຄົງທາງດ້ານການເມືອງ-ສັງຄົມ ພວມເພີ່ມຂຶ້ນຢູ່ຫຼາຍປະເທດ. ບັນດາສິ່ງທ້າທາຍທີ່ບໍ່ເປັນແບບດັ້ງເດີມ, ໂດຍສະເພາະ ການປ່ຽນແປງຂອງສະພາບອາກາດ ແລະ ໂລກລະບາດ ໄດ້ປະກົດອອກຢ່າງຮຸນແຮງຂຶ້ນ. ພິເສດແມ່ນ ການແຜ່ລະບາດໃຫຍ່ຂອງພະຍາດໂຄວິດ-19, ດ້ວຍການປະກົດຕົວຂອງຫຼາຍສາຍພັນໃໝ່ ທີ່ສືບຕໍ່ສົ່ງຜົນສະທ້ອນບໍ່ດີ ຕໍ່ການພັດທະນາຂອງປະເທດຊາດ ແລະ ການພົວພັນສາກົນ, ພ້ອມກັນນັ້ນ ໄດ້ວາງອອກຫຼາຍບັນຫາກ່ຽວກັບການເມືອງ, ການຕ່າງປະເທດ, ເສດຖະກິດ, ສາທາລະນະສຸກ, ສິ່ງແວດລ້ອມ, ວິທະຍາສາດ-ເຕັກໂນໂລຊີ ແລະ ວັດທະນະທຳ-ສັງຄົມ. ໃນປີ 2021 ຫຼາຍປະເທດໄດ້ຍູ້ແຮງການສັກຢາ, ຫັນມາສູ່ “ສະຖານະປົກກະຕິໃໝ່” ແລະ ເປັນເຈົ້າການປັບຕົວກັບການແຜ່ລະບາດຂອງພະຍາດໂຄວິດ-19.
ເສດຖະກິດໂລກຄ່ອຍໆຟື້ນຕົວ, ແຕ່ບໍ່ສະໝ່ຳສະເໝີ ແລະ ບໍ່ໝັ້ນຄົງ. ທ່າອ່ຽງປັບໂຄງສ້າງເສດຖະກິດໂລກ, ໂດຍສະເພາະການປ່ຽນດິຈີຕອນ, ການເຕີບໂຕສີຂຽວ ແລະ ການປ່ຽນລະບົບຕ່ອງໂສ້ການສະໜອງ ສືບຕໍ່ໄດ້ຮັບການຊຸກຍູ້ພາຍໃຕ້ການກະທົບຂອງການປະຕິວັດອຸດສາຫະກຳຄັ້ງທີສີ່ ແລະ ການແຜ່ລະບາດໃຫຍ່ຂອງພະຍາດໂຄວິດ-19 ກໍຄືຄວາມຕ້ອງການອັນຮີບດ່ວນກ່ຽວກັບການພັດທະນາແບບຍືນຍົງແລະປົກຫຸ້ມ.
ສະພາບການສາກົນໃນປີ 2021 ມີຄວາມສະດວກແລະໂອກາດດີ ທີ່ແຊກຊ້ອນກັບຄວາມຫຍຸ້ງຍາກ ສິ່ງທ້າທາຍ, ກໍຄືບັນດາຄວາມຕ້ອງການທີ່ສັບສົນກວ່າເກົ່າ ສຳລັບພາລະກິດການພັດທະນາປະເທດ ແລະ ການປົກປັກຮັກສາປະເທດຊາດ, ເຊິ່ງຮຽກຮ້ອງໃຫ້ວຽກງານການຕ່າງປະເທດ ແລະ ການທູດ ຕ້ອງຄາດຄະເນສະພາບການຢ່າງຖືກຕ້ອງ, ເປັນເຈົ້າການ, ຕັ້ງໜ້າ, ປະດິດສ້າງ, ເສີມຂະຫຍາຍບົດບາດນຳໜ້າສ້າງສະພາບແວດລ້ອມແລະຮັກສາສະພາບແວດລ້ອມສັນຕິພາບ ສະຖຽນລະພາບ, ຍາດແຍ່ງໂອກາດແລະແຫຼ່ງພະລັງຈາກພາຍນອກ ເພື່ອປະກອບສ່ວນຮັບໃຊ້ການພັດທະນາປະເທດ ແລະ ຍົກສູງຖານະບົດບາດ ແລະ ກຽດສັກສີຂອງຫວຽດນາມ.
ຜົນງານທີ່ປະທັບໃຈຂອງການທູດຫວຽດນາມໃນປີ 2021
ກອງປະຊຸມໃຫຍ່ຄັ້ງທີ 13 ຂອງພັກໄດ້ຢືນຢັນຢ່າງຈະແຈ້ງວ່າ ແນວຄິດຊີ້ນຳ ການຕ່າງປະເທດແມ່ນການປະຕິບັດຢ່າງສະເໝີຕົ້ນສະເໝີປາຍ ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ, ດຳເນີນການຕ່າງປະເທດແບບຫຼາຍຝ່າຍ ຫຼາຍຮູບຫຼາຍແບບ; ເປັນເພື່ອນ ເປັນຄູ່ຮ່ວມມື ທີ່ໄວ້ວາງໃຈໄດ້ ແລະ ເປັນສະມາຊິກທີຕັ້ງໜ້າ ມີຄວາມຮັບຜິດຊອບໃນວົງຄະນາຍາດສາກົນ; ຫຼັກການ ຂອງການຕ່າງປະເທດແມ່ນຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ຕາມບັນດາຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ, ສະເໝີພາບ, ການຮ່ວມມື, ໄດ້ປະໂຫຍດຮ່ວມກັນ; ໜ້າທີ່ພື້ນຖານ ຂອງການຕ່າງປະເທດແມ່ນ ສືບຕໍ່ເສີມຂະຫຍາຍບົດບາດນຳໜ້າໃນການສ້າງແລະຮັກສາສະພາບແວດລ້ອມສັນຕິພາບ ສະຖຽນລະພາບ, ລະດົມບັນດາແຫຼ່ງພະລັງພາຍນອກເພື່ອພັດທະນາປະເທດ, ຍົກສູງຖານະບົດບາດ ແລະ ກຽດສັກສີຂອງຫວຽດນາມ.
ກຳແໜ້ນແນວທາງການຕ່າງປະເທດຂອງພັກ ແລະ ພາຍໃຕ້ການຊີ້ນຳນຳພາທີ່ໃກ້ຊິດແລະຖືກຕ້ອງຂອງສູນກາງພັກ, ຂອງກົມການເມືອງ ແລະ ຄະນະເລຂາທິການສູນກາງພັກ, ຂະແໜງການທູດໄດ້ປະສານສົມທົບຢ່າງແໜ້ນແຟ້ນກັບການຕ່າງປະເທດຂອງພັກ, ການຕ່າງປະເທດປະຊາຊົນ ແລະ ບັນດາຂັ້ນ, ບັນດາຂະແໜງການ ໃນການຜັນຂະຫຍາຍປະຕິບັດ ບັນດາໜ້າທີ່ສຳຄັນຂອງການຕ່າງປະເທດ ຢ່າງຄົບຊຸດ, ປະດິດສ້າງ ແລະ ມີປະສິດທິຜົນ, ປະກອບສ່ວນເຂົ້າໃນຜົນສຳເລັດຂອງການຕ່າງປະເທດເວົ້າສະເພາະ ແລະ ການພັດທະນາເສດຖະກິດ - ສັງຄົມຂອງປະເທດເວົ້າລວມ.
ທີໜຶ່ງ, ສືບຕໍ່ປັບປຸງສະຖານະການການຕ່າງປະເທດຢ່າງໝັ້ນຄົງ ແລະ ສະພາບແວດລ້ອມສັນຕິພາບ ສະຖຽນລະພາບ ທີ່ອຳນວຍຄວາມສະດວກ ໃຫ້ແກ່ການພັດທະນາປະເທດ. ແກ້ໄຂຜ່ານຜ່າຄວາມຫຍຸ້ງຍາກ ຍ້ອນຜົນກະທົບຈາກການແຜ່ລະບາດຂອງພະຍາດໂຄວິດ-19, ຂະແໜງການທູດໄດ້ໃຫ້ຄຳແນະນຳ, ເປັນເຈົ້າການ, ຕັ້ງໜ້າ, ສົມທົບຢ່າງປະດິດສ້າງຮູບການໂດຍກົງ ແລະ ຮູບການອອນໄລນ໌ ເພື່ອຊຸກຍູ້ການພົວພັນຮ່ວມມື ຢ່າງເລິກເຊິ່ງ ກັບຫຼາຍຄູ່ຮ່ວມມື, ໂດຍສະເພາະແມ່ນ ບັນດາປະເທດເພື່ອນບ້ານ, ບັນດາຄູ່ຮ່ວມມືທີ່ສຳຄັນ ແລະ ເພື່ອນມິດທີ່ເປັນມູນເຊື້ອ. ບັນດາການເຄື່ອນໄຫວພົວພັນຕ່າງປະເທດຂອງການນຳຂອງພັກແລະລັດ ໃນປີທຳອິດແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກ ໄດ້ສ້າງແຮງຊຸກຍູ້ເພີ່ມທະວີຄວາມໄວ້ວາງໃຈດ້ານການເມືອງ, ການແຊກຊ້ອນຜົນປະໂຫຍດ, ແລະ ພັດທະນາສາຍພົວພັນກັບຄູ່ຮ່ວມມືຫຼາຍປະເທດ, ປະກອບສ່ວນສຳຄັນເຂົ້າໃນການປັບປຸງທ່າການຕ່າງປະເທດໃຫ້ໝັ້ນຄົງ, ສະດວກດີ ສຳລັບການພັດທະນາປະເທດ ແລະ ການປົກປັກຮັກສປະເທດຊາດ ໃນສະພາບການສາກົນທີ່ສັບສົນ ແລະ ຄາດເດົາຍາກ.
ພ້ອມກັບການປ້ອງກັນປະເທດ-ຮັກສາຄວາມປອດໄພ ແລະ ບັນດາກະຊວງ, ຄະນະ, ຂະແໜງການທີ່ກ່ຽວຂ້ອງ, ຂະແໜງການທູດສືບຕໍ່ຊຸກຍູ້ການສົນທະນາ, ເຈລະຈາກັບບັນດາປະເທດທີ່ກ່ຽວຂ້ອງ ເພື່ອແກ້ໄຂບັນດາບັນຫາຊາຍແດນ ອານາເຂດ; ສືບຕໍ່ປັບປຸງເສັ້ນຊາຍແດນທາງບົກ ເພື່ອສັນຕິພາບ ການຮ່ວມມື ແລະ ການພັດທະນາ, ທັງຮັບປະກັນການປ້ອງກັນແລະຕ້ານໂລກລະບາດໂຄວິດ-19, ທັງຮັກສາແລະຊຸກຍູ້ການແລກປ່ຽນເສດຖະກິດ-ສັງຄົມ; ຈັດການແກ້ໄຂບັນຫາທີ່ເກີດຂຶ້ນຢູ່ໃນທະເລຢ່າງຖືກຕ້ອງ ແລະທັນການ, ຕັ້ງໝັ້ນຊຸກຍູ້ການເຈລະຈາ, ການຮ່ວມມືແກ້ໄຂການພິພາດຕ່າງໆບົນພື້ນຖານກົດໝາຍສາກົນ, ໂດຍສະເພາະ ອະນຸສັນຍາຂອງສະຫະປະຊາຊາດວ່າດ້ວຍກົດໝາຍທະເລ (UNCLOS) ປີ 1982.
ທີສອງ, ການທູດເສດຖະກິດ, ໂດຍສະເພາະແມ່ນການທູດສາທາລະນະສຸກ ແລະ ການທູດວັກຊີນ, ໄດ້ປະກອບສ່ວນສຳຄັນເຂົ້າໃນການຊຸກຍູ້ການພັດທະນາເສດຖະກິດ-ສັງຄົມ ແລະ ການປ້ອງກັນແລະຕ້ານການແຜ່ລະບາດຂອງພະຍາດໂຄວິດ-19. ການຂົນຂວາຍທາງການເມືອງ-ການທູດໃນຫຼາຍລະດັບ, ຫຼາຍຊ່ອງທາງ ໄດ້ປະກອບສ່ວນສຳຄັນເຂົ້າໃນການຮັກສາ ແລະ ຊຸກຍູ້ການຮ່ວມມືທາງເສດຖະກິດ, ເປີດກວ້າງຕະຫຼາດ ແລະ ລະບົບການສະໜອງ. ຂະແໜງການທູດໄດ້ປະສານສົມທົບຢ່າງແໜ້ນແຟ້ນກັບບັນດາກະຊວງ, ຄະນະ, ຂະແໜງການ, ທ້ອງຖິ່ນ ແລະ ວິສາຫະກິດ ໃນການແກ້ໄຂອຸປະສັກຫຼາຍຢ່າງ ແລະ ຊຸກຍູ້ຫຼາຍໂຄງການຮ່ວມມືຈຸດສຸມ ກັບບັນດາຄູ່ຮ່ວມມືທີ່ສຳຄັນ, ໃຊ້ປະໂຫຍດຈາກບັນດາສັນຍາການຄ້າເສລີ (FTA) ທີ່ໄດ້ລົງນາມ ເພື່ອຍູ້ແຮງການສົ່ງອອກສິນຄ້າຫຼັກຫຼາຍປະເພດ (ເຊັ່ນ ຜະລິດຕະພັນກະສິກຳ, ສິ່ງທໍ, ເກີບໜັງ, ເຄື່ອງເອເລັກໂຕຣນິກ...), ພ້ອມກັນນັ້ນ ກໍໄດ້ພະຍາຍາມຂຸດຄົ້ນບັນດາຕະຫຼາດທີ່ມີຄວາມສາມາດບົ່ມຊ້ອນຫຼາຍຢ່າງ, ຜ່ານນັ້ນ ປະກອບສ່ວນດຶງດູດການລົງທຶນຈາກຕ່າງປະເທດ, ຊຸກຍູ້ການເຕີບໂຕຂອງມູນຄ່າການສົ່ງອອກແລະກຳເຂົ້າເກີນລະດັບສູງສຸດເປັນປະຫວັດການທີ່ 600 ຕື້ໂດລາສະຫະລັດ. ການທູດສາທາລະນະສຸກ ແລະ ການທູດວັກຊີນເປັນໜຶ່ງໃນບັນດາຈຸດສະຫວ່າງໃນຜົນງານການຕ່າງປະເທດປີ 2021, ປະກອບສ່ວນສຳຄັນທີ່ສຸດ ເຂົ້າໃນຄວາມສຳເລັດຂອງຍຸດທະສາດວັກຊີນ, ສ້າງພື້ນຖານທີ່ຕັດສິນເບື້ອງຕົ້ນ ເພື່ອໃຫ້ປະເທດຄ່ອຍໆຫັນໄປສູ່ການປັບຕົວທີ່ປອດໄພແລະຍືດຫຍຸ່ນ, ການຄວບຄຸມການແຜ່ລະບາດຂອງພະຍາດຢ່າງມີປະສິດທິຜົນ, ພ້ອມທັງຍູ້ແຮງການຟື້ນຟູ ແລະ ພັດທະນາເສດຖະກິດ-ສັງຄົມ. ໃນສະຖານະການທີ່ຫຍຸ້ງຍາກທີ່ສຸດ ເມື່ອການແຜ່ລະບາດຂອງພະຍາດໂຄວິດ-19 ຄັ້ງທີສີ່ສົ່ງຜົນກະທົບຢ່າງຮ້າຍແຮງເຖິງທຸກດ້ານເສດຖະກິດ-ສັງຄົມຂອງປະເທດ, ຂະແໜງການທູດໄດ້ຊາບຊຶມແຜນນະໂຍບາຍທີ່ສະເໝີຕົ້ນສະເໝີປາຍ ຂອງພັກແລະລັດ ກ່ຽວກັບການປົກປັກຮັກສາສຸຂະພາບຂອງປະຊາຊົນເປັນສິ່ງສຳຄັນເໜືອສຸດ, ແລະໄດ້ພ້ອມກັນກັບບັນດາກະຊວງ, ຄະນະ, ຂະແໜງການທີ່ກ່ຽວຂ້ອງ ໃນການນຳໜ້າຊຸກຍູ້ການທູດສາທາລະນະສຸກ ແລະ ການທູດວັກຊີນ ຢ່າງກວ້າງຂວາງແລະເລັ່ງດ່ວນ. ການຂົນຂວາຍວັກຊີນ ແລະ ການຮ່ວມມືໃນການປ້ອງກັນແລະຕ້ານການແຜ່ລະບາດຂອງພະຍາດໂຄວິດ-19 ແມ່ນເນື້ອໃນຈຸດສຸມທີ່ສອດຮ້ອຍຕະຫຼອດຂອງບັນດາກິດຈະກຳການຕ່າງປະເທດສອງຝ່າຍ ແລະ ຫຼາຍຝ່າຍ, ໂດຍສະເພາະແມ່ນ ການຕ່າງປະເທດຂັ້ນສູງ ແລະ ຂອງບັນດາອົງການຜູ້ຕາງໜ້າຂອງຫວຽດນາມຢູ່ຕ່າງປະເທດ. ອາໄສສິ່ງດັ່ງກ່າວ, ຫວຽດນາມຈຶ່ງໄດ້ຮັບການຊ່ວຍເຫຼືອຢ່າງທັນການແລະມິີປະສິດທິຜົນ ຂອງວົງຄະນາຍາດສາກົນ ກ່ຽວກັບວັກຊີນ, ຢາປົວໂຄວິດ-19 ແລະ ອຸປະກອນການແພດ. ຖ້າຫາກຕົ້ນເດືອນພຶດສະພາ 2021, ຫວຽດນາມມີວັກຊີນພຽງສອງສາມແສນໂດສ, ແຕ່ຮອດທ້າຍປີ 2021, ຫວຽດນາມກາຍເປັນໜຶ່ງໃນ 6 ປະເທດທີ່ມີວັກຊີນປົກຫຸ້ມຫຼາຍທີ່ສຸດໃນໂລກ. ຄຽງຂ້າງນັ້ນ, ບົນພື້ນຖານການກຳແໜ້ນສະພາບການ ແລະ ທ່າອ່ຽງ, ປະສົບການສາກົນ, ຂະແໜງການທູດໄດ້ເປັນເຈົ້າການໃຫ້ຄຳປຶກສາ ເພື່ອໃຫ້ພັກແລະລັດຕັດສິນໃຈກ່ຽວກັບການປ່ຽນແປງຍຸດທະສາດ ເພື່ອປັບຕົວໃຫ້ເຂົ້າກັບການລະບາດຂອງພະຍາດໂຄວິດ-19 ຢ່າງປອດໄພ ແລະ ຟື້ນຟູ ພັດທະນາເສດຖະກິດ-ສັງຄົມ.
ທີສາມ, ສືບຕໍ່ປັບປຸງຖານະບົດບາດ ແລະ ກຽດສັກສີສາກົນຂອງປະເທດ. ໃນ 2 ປີແຫ່ງການຮັບຕຳແໜ່ງແລະບັນລຸຜົນສຳເລັດໃນບົດບາດຂອງສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໃນປີ 2020-2021, ຫວຽດນາມໄດ້ປະກອບສ່ວນແທ້ຈິງ ສຳຄັນເຂົ້າໃນວຽກງານລວມຂອງສະພາຄວາມໝັ້ນຄົງ, ສົ່ງຂໍ້ຄວາມທີ່ແຂງແຮງກ່ຽວກັບປະເທດຫວຽດນາມທີ່ເປັນເອກະລາດ, ເປັນເຈົ້າຕົນເອງ, ປ່ຽນແປງໃໝ່, ຮັກຫອມສັນຕິພາບ, ເຄົາລົບກົດໝາຍສາກົນ, ເຊື່ອຖື, ຊື່ສັດສຸຈະລິດ, ສົມດຸນໃນພຶດຕິກໍາ, ປະກອບສ່ວນທີ່ຕັ້ງໜ້າ ແລະ ມີຄວາມຮັບຜິດຊອບຕໍ່ສັນຕະພາບ, ການຮ່ວມມື, ການພັດທະນາ ແລະ ຄວາມກ້າວໜ້າໃນໂລກ (1).
ທ່ານ ຟ້າມມິີງຈິ໊ງ ກໍາມະການກົມການເມືອງສູນກາງ, ນາຍົກລັດຖະມົນຕີ ຖາມຂ່າວແລະອວຍພອນ ພະນັກງານນັກຮົບ ທີ່ເຂົ້າຮ່ວມກອງກຳລັງຮັກສາສັນຕິພາບຂອງສະຫະປະຊາຊາດທີ່ໄດ້ສຳເລັດໜ້າທີ່ ໃນກອງປະຊຸມສະຫຼຸບສອງປີທີ່ຫວຽດນາມເຂົ້າເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ໃນປີ 2020-2021, ຈັດຕັ້ງໂດຍກະຊວງການຕ່າງປະເທດ _ພາບ: VGP
ໃນສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ), ຫວຽດນາມສືບຕໍ່ເສີມຂະຫຍາຍບັນດາຜົນສຳເລັດຊອງປີເປັນປະທານ ອາຊຽນ 2020, ປະກອບສ່ວນອັນຕັ້ງໜ້າເຂົ້າໃນການປັບປຸງຄວາມສາມັກຄີ, ຄວາມເຫັນດີເຫັນພ້ອມ, ບົດບາດເປັນໃຈກາງ ແລະ ຍົກສູງຖານະຕຳແໜ່ງຂອງອາຊຽນ, ໃນນັ້ນ ໄດ້ປະຕິບັດເປັນຢ່າງດີ ບົດບາດເຊື່ອມຕໍ່ແລະຊຸກຍູ້ການຮ່ວມມືລະຫວ່າງອາຊຽນກັບສະຫະປະຊາຊາດ ເມື່ອຫວຽດນາມເປັນປະທານອາຊຽນ 2020 ແລະ ປະທານສະພາຄວາມໝັ້ນຄົງແຫ່ງສະຫະປະຊາຊດ (ເດືອນເມສາ 2021).
ເປັນຄັ້ງທຳທີ່ຫວຽດນາມໃຫ້ຄຳໝັ້ນຢ່າງແຂງແຮງໃນການຂະຈັດການປ່ອຍກ໊າດເຮືອນແກ້ວພາຍໃນປີ 2050(2) ໃນກອງປະຊຸມສຸດຍອດການປ່ຽນແປງສະພາບດິນຟ້າອາກາດແຫ່ງສະຫະປະຊາຊາດຄັ້ງທີ 26 (COP 26), ຢືນຢັນແຜນນະໂຍບາຍທີ່ສະເໝີຕົ້ນສະເໝີປາຍຂອງພັກແລະລັດຫວຽດນາມ ກ່ຽວການພັດທະນາສີຂຽວ ແລະ ຍືນຍົງ, ສະແດງໃຫ້ເຫັນເຖິງຄວາມຕັດສິນໃຈສູງ ໃນບັນດາບັນຫາລະດັບໂລກ, ສ້າງໂອກາດຊຸກຍູ້ການປ່ຽນແປງໃໝ່ຮູບແບບການເຕີບໂຕຕາມທິດທາງຍືນຍົງກວ່າອີກ.
ພ້ອມກັນນັ້ນ, ຫວຽດນາມສືບຕໍ່ເຂົ້າຮ່ວມຢ່າງຕັ້ງໜ້າໃນຫຼາຍກົນໄກ, ເວທີປາໄສ, ກອງປະຊຸມພະຫຸພາຄີທີ່ສຳຄັນ ໃນບັນດາຊ່ອງທາງການຕ່າງປະເທດຂອງພັກ, ການທູດຂອງລັດ, ການທູດລັດຖະສະພາ ແລະ ການຕ່າງປະເທດປະຊາຊົນ, ເຊັ່ນ: ກອງປະຊຸມສຳມະນາຂອງບັນດາພັກມາດຊິດໃນໂລກ, ເວທີປາໄສການຮ່ວມມືເສດຖະກິດອາຊີ-ປາຊີຟິກ (APEC), ກອງປະຊຸມສຸດຍອດອາຊີ-ເອຣົບ (ASEM), ການຮ່ວມມືອະນຸພາກພື້ນແມ່ນ້ຳຂອງ, ກອງປະຊຸມອະນາຄົດແຫ່ງອາຊີ, ກອງປະຊຸມປະທານສະພາແຫ່ງຊາດໃນທົ່ວໂລກ,... ດ້ວຍຖານະບົດບາດແລະກຽດສັກສີທີ່ນັບມື້ນັບສູງ, ຫວຽດນາມໄດ້ຮັບຄວາມໄວ້ເນື້ອເຊື່ອໃຈຈາກສາກົນ ແລະ ໄດ້ຮັບເລືອກໃຫ້ເຂົ້າຮ່ວມໃນຫຼາຍອົງການພະຫຸພາຄີທີ່ສຳຄັນ, ເຊັ່ນ: ຄະນະຜູ້ບໍລິຫານອົງການການສຶກສາ ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO), ສະພາປະຕິບັດການໄປສະນີຂອງສະຫະພັນໄປສະນີສາກົນ (UPU), ຄະນະກຳມະການກົດໝາຍສາກົນ (ILC),...
ສິ່ງທີ່ມີຄວາມໝາຍທີ່ສຸດໃນສະພາບການປະຈຸບັນແມ່ນ ບົດຂຽນຂອງສະຫາຍເລຂາທິການໃຫຍ່ ຫງວຽນຝູຈ້ອງ “ບາງບັນຫາທິດສະດີ ແລະ ພຶດຕິກຳກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ລັດທິສັງຄົມນິຍົມຢູ່ຫວຽດນາມ” ເຊິ່ງໄດ້ຮັບຄວາມສົນໃຈແລະຕີລາສູງຈາກຫຼາຍພັກການເມືອງ, ວົງການການເມືອງ ແລະ ນັກຮຽນຮູ້ສາກົນ, ຊຸກຍູ້ໃຫ້ວົງຄະນາຍາດສາກົນສືບຕໍ່ແບ່ງປັນ ແລະ ສະໜັບສະໜູນອຸດົມຄະຕິ, ເປົ້າໝາຍ ແລະ ພາລະກິດທີ່ເປັນທຳ ຂອງປະຊາຊົນຫວຽດນາມ, ພ້ອມກັນນັ້ນ ກໍ່ປະກອບສ່ວນຍົກສູງຖານະບົດບາດແລະກຽດສັກສີຂອງພັກ ແລະ ປະເທດຂອງພວກເຮົາ ໃນເວທີສາກົນ.
ວຽກງານຂໍ້ມູນຂ່າວສານການຕ່າງປະເທດ, ການທູດວັດທະນະທຳ, ວຽກງານຕໍ່ຊາວຫວຽດນາມຢູ່ຕ່າງປະເທດ ແລະ ການປົກປ້ອງພົນລະເມືອງ ໄດ້ຮັບການຜັນຂະຫຍາຍຢ່າງແຂງແຮງ ແລະ ມີປະສິດທິຜົນ. ແຜນນະໂຍບາຍ, ນະໂຍບາຍກ່ຽວກັບການທູດວັດທະນະທຳ ແລະ ວຽກງານຕໍ່ຊາວຫວຽດນາມຢູ່ຕ່າງປະເທດ ສືບຕໍ່ໄດ້ຮັບການປັບປຸງໃຫ້ສົມບູນ, ພິເສດແມ່ນຄຳສະຫຼຸບເລກທີ 12-KL/TW, ລົງວັນທີ 12 ສິງຫາ 2021, ຂອງກົມການເມືອງສູນກາງພັກ, “ກ່ຽກັບວຽກງານຕໍ່ຊາວຫວຽດນາມຢູ່ຕ່າງປະເທດໃນສະພາບການໃໝ່”, ແລະ ຂໍ້ຕົກລົງສະບັບເລກທີ 2013/QD-TTg, ລົງວັນທີ 30 ພະຈິກ 2021, ຂອງນາຍົກລັດຖະມົນຕີ, “ກ່ຽວກັບຍຸດທະສາດການທູດວັດທະນະທຳຮອດປີ 2030”. ໃນປີທີ່ຜ່ານມາ, ຫວຽດນາມໄດ້ນຳເອົາພົນລະເມືອງປະມານ 120.000 ຄົນຈາກກວ່າ 60 ປະເທດແລະເຂດແຄ້ວນ ກັບເມືອບ້ານຢ່າງປອດໄພ, ພ້ອມກັນນັ້ນກໍເພີ່ມທະວີການປົກປ້ອງຊາວປະມົງ, ເຮືອຫາປາທະເລ, ສິດແລະຜົນປະໂຫຍດທີ່ຖືກກົດໝາຍຊອບທຳ ຂອງພົນລະເມືອງຫວຽດນາມຢູ່ຕ່າງປະເທດ.
ທີ່ສີ່, ກອງປະຊຸມການຕ່າງປະເທດແຫ່ງຊາດແມ່ນເຄື່ອງໝາຍພິເສດຂອງວຽກງານການຕ່າງປະເທດໃນປີ 2021, ເພາະວ່າ ເປັນຄັ້ງທຳອິດໃນປະຫວັດສາດຂອງການປະຕິວັດຫວຽດນາມ, ກອງປະຊຸມທົ່ວປະເທດກ່ຽວກັບວຽກງານການຕ່າງປະເທດໄດ້ຮັບການຈັດຕັ້ງພາຍໃຕ້ການຊີ້ນຳໂດຍກົງຂອງກົມການເມືອງ, ຄະນະເລຂາທິການສູນກາງພັກ. ບົນພື້ນຖານການຕີລາຄາຢ່າງຮອບດ້ານກ່ຽວກັບບັນດາຜົນງານການຕ່າງປະເທດທີ່ບັນລຸໄດ້ໃນໄລຍະ 35 ປີແຫ່ງການປ່ຽນໃໝ່, ຖອດຖອນບົດຮຽນປະສົບການ, ລະບຸແນວໂນ້ມສຳຄັນ ແລະ ບັນຫາທີ່ເກີດຂຶ້ນໃນໂລກ, ກອງປະຊຸມໄດ້ກຳນົດທິດທາງ, ໜ້າທີ່, ເປັນເອກະພາບທາງດ້ານເຈດຈຳນົງແລະການກະທຳໃນທົ່ວທັງລະບົບການເມືອງ, ຈາກນັ້ນສ້າງບັນຍາກາດໃໝ່ ແລະ ແຮງກະຕູ້ນໃໝ່ ໃຫ້ແກ່ການເຄື່ອນໄຫວການຕ່າງປະເທດ ໃນໄລຍະການພັດທະນາໃໝ່ຂອງປະເທດ.
ທັນທີ ພາຍຫຼັງກອງປະຊຸມການຕ່າງປະເທດແຫ່ງຊາດ, ຂະແໜງການທູດໄດ້ຈັດຕັ້ງກອງປະຊຸມການທູດຄັ້ງທີ 31 ແລະ ກອງປະຊຸມພະແນກການພົວພັນກັບພາຍນອກຄັ້ງທີ 20 ເພື່ອຊາບຊຶມຈິດໃຈ ແລະ ຄຳສະຫຼຸບໃນກອງປະຊຸມການຕ່າງປະເທດແຫ່ງຊາດ; ບົນພື້ນຖານນັ້ນ, ປຶກສາຫາລື ແລະ ຮັບຮອງຜ່ານໂຄງການປະຕິບັດງານດ້ວຍທິດທາງແລະໜ້າທີ່ລະອຽດສະເພາະ, ແທດຈິງຂອງຂະແໜງການທູດໃນໄລຍະ 3 - 5 ປີສະເພາະໜ້າ ແລະ ວິໄສທັດຮອດປີ 2030 ເພື່ອແນໃສ່ປະກອບສ່ວນປະຕິບັດແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 13 ຂອງພັກ ໃຫ້ສຳເລັດມີໄຊ.
ບັນດາຄວາມພະຍາຍາມ ແລະ ຜົນງານທີ່ກ່າວມາເທິງນີ້ ຂອງການທູດຫວຽດນາມໃນປີ 2021 ໄດ້ປະກອບສ່ວນເຂົ້າໃນຜົນສຳເລັດລວມອັນໃຫຍ່ຫຼວງແລະມີຄວາມໝາຍປະຫວັດສາດຂອງປະເທດເຮົາ ພາຍຫຼັງ 35 ປີແຫ່ງການປ່ຽນແປງໃໝ່, ດັ່ງທີ່ກອງປະຊຸມໃຫຍ່ຄັ້ງທີ 13 ຂອງພັກໄດ້ຢືນຢັນ “ປະເທດເຮົາບໍ່ມີເວລາໃດທີ່ມີພາລະກິດອັນໃຫຍ່ໂຕ, ມີຄວາມສາມາດຊ້ອນແຝງ, ຖານະບົດບາ ແລະ ກຽດສັກສີສາກົນ ຄືທຸກວັນນີ້”. ບັນດາໝາກຜົນທີ່ສຳຄັນດັ່ງກ່າວບັນລຸໄດ້ ຍ້ອນການນຳພາອັນຖືກຕ້ອງຂອງຄະນະບໍລິຫານງານສູນກາງພັກ, ກົມການເມືອງສູນກາງ, ຄະນະເລຂາທິການສູນກາງ; ການບໍລິຫານຄຸ້ມຄອງຢ່າງເປັນເຈົ້າການ, ເດັດດ່ຽວ, ມີປະສິດທິຜົນຂອງລັດ; ການປະສານສົມທົບຢ່າງແໜ້ນແຟ້ນ, ຄົບຊຸດ ລະຫວ່າງການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ, ລະຫວ່າງຂະແໜງການທູດ ກັບບັນດາຂະແໜງການແລະຂັ້ນຕ່າງໆ; ການລົງມືຢ່າງຕັ້ງໜ້າຂອງລະບົບການເມືອງທັງໝົດ; ການເຫັນດີເຫັນພ້ອມ, ສາມັກຄີ, ສະໜັບສະໜູນຂອງປະຊາຊົນທັງຫມົດ; ການສະໜັບສະໜູນ ແລະ ຮ່ວມມືຂອງບັນດາຄູ່ຮ່ວມມື ແລະ ເພື່ອນມິດສາກົນ,...
ຜົນງານດ້ານການຕ່າງປະເທດແລະການທູດໃນປີທີ່ຜ່ານມາປະກອບສ່ວນຢືນຢັນສີສັນພິເສດແລະເອກະລັກຂອງແນວທາງການຕ່າງປະເທດແລະການທູດຫວຽດນາມ ທີ່ອີງໃສ່ພື້ນຖານແນວຄິດການທູດໂຮ່ຈີມິນ, ເຕັມໄປດ້ວຍເອກະລັກແຫ່ງຊາດ “ໄມ້ໄຜ່ຫວຽດນາມ”, ດັງທີ່ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ສະຫຼຸບຢ່າງເລິກເຊິ່ງໃນກອງປະຊຸມການຕ່າງປະເທດແຫ່ງຊາດ; ພ້ອມກັນນັ້ນ, ສືບຕໍ່ເຮັດໃຫ້ ບັນດາບົດຮຽນອັນປະເສີດກ່ຽວກັບການຕ່າງປະເທດໃນພາລະກິດການປ່ຽນແປງໃໝ່ ມີຄວາມເລິກເຊິ່ງແລະອຸດົມສົມບູນຂຶ້ນຕື່ມ. ນັ້ນແມ່ນບົດຮຽນກ່ຽວກັບການຈັດການຢ່າງຖືກຕ້ອງ, ກົມກຽວ ສາຍພົວພັນລະຫວ່າງຄວາມເປັນເອກະລາດ ເປັນເຈົ້າຕົນເອງ ແລະ ຄວາມສາມັກຄີ, ຮ່ວມມືສາກົນ, ລະຫວ່າງຜົນປະໂຫຍດຂອງຊາດ-ປະເທດຊາດ ແລະ ພັນທະ, ຄວາມຮັບຜິດຊອບສາກົນ; ບົດຮຽນກ່ຽວກັບການຍຶດໝັ້ນໃນຫຼັກການ, ແຕ່ຕ້ອງໄຫວພິບ, ປະດິດສ້າງໃນຍຸດໂທບາຍ, “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”; ບົດຮຽນກ່ຽວກັບການເພີ່ມທະວີຄວາມສາມັກຄີ, ຄວາມເຫັນດີເຫັນພ້ອມຢູ່ໃນພັກ, ໃນປະຊາຊົນ ແລະ ໃນກອງທັບ ເພື່ອຜັນຂະຫຍາຍແນວທາງການຕ່າງປະເທດຢ່າງຄົບຊຸດ, ປະດິດສ້າງ ແລະ ມີປະສິດທິຜົນ; ບົດຮຽນກ່ຽວກັບການນຳພາເປັນເອກະພາບແລະເດັດຂາດຂອງພັກ, ການຄຸ້ມຄອງລວມສູນຂອງລັດ; ບົດຮຽນກ່ຽວກັບການປະສານສົມທົບຢ່າງກົມກຽວ ລະຫວ່າງທ່າແລະກໍາລັງ, ລະຫວ່າງພະຫຸພາຄີແລະທະວິພາຄີ, ລະຫວ່າງທົ່ວໂລກແລະພາກພື້ນ, ລະຫວ່າງການທູດການເມືອງ, ການທູດເສດຖະກິດ ແລະ ການທູດວັດທະນະທຳ; ບົດຮຽນດ້ານການທູດທີ່ກະທົບໃສ່ຈິດໃຈດ້ວຍຄວາມສັດຊື່, ຈິງໃຈ, ເຊື່ອໝັ້ນ, ເຫັນອົກເຫັນໃຈ, ສົມເຫດສົມຜົນໃນການຈັດການແກ້ໄຂບັນຫາການຕ່າງປະເທດ; ບົດຮຽນກ່ຽວກັບການເພີ່ມທະວີການກໍ່ສ້າງອົງການຈັດຕັ້ງ ແລະ ພະນັກງານການຕ່າງປະເທດ ໃຫ້ທຽບເທົ່າກັບຄວາມຕ້ອງການພາລະກິດ,...
ກໍ່ສ້າງການທູດຫວຽດນາມຮອບດ້ານແລະທັນສະໄໝ
ເພື່ອຮັບໃຊ້ການພັດທະນາປະເທດ ແລະ ການປົກປັກຮັກສາປະເທດຊາດ ໃນໄລຍະໃໝ່
ເສີມຂະຫຍາຍຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດພາຍຫຼັງກວ່າ 35 ປີແຫ່ງການປ່ຽນແປງໃໝ່, ທົ່ວພັກ, ທົ່ວປວງຊົນ ແລະ ທົ່ວກອງທັບ ກຳລັງສາມັກຄີເປັນຈິດໜຶ່ງໃຈດຽວ ແລະ ຕັດສິນໃຈປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກໃຫ້ສຳເລັດມີໄຊ; ໃນສະເພາະໜ້າ, ຕັດສິນໃຈຊຸກຍູ້ການຟື້ນຟູແລະພັດທະນາເສດຖະກິດ-ສັງຄົມ, ໃຊ້ປະໂຫຍດຫຼາຍສຸດຈາກທ່າແລະກຳລັງໃໝ່ ເພື່ອສ້າງແຮງຜັກດັນບືນຕົວຂຶ້ນພາຍຫຼັງການລະບາດຂອງພະຍາດໂຄວິດ-19. ເພື່ອຕອບສະໜອງຄວາມຕ້ອງການຂອງການພັດທະນາປະເທດໃນໄລຍະໃໝ່, ເປົ້າໝາຍ ຂອງການຕ່າງປະເທດແມ່ນ ສືບຕໍ່ປັບປຸງຮັກສານສະຖານະການການຕ່າງປະເທດທີ່ສະດວກດີໃຫ້ແກ່ການສ້າງສາແລະປົກປັກຮັກສາປະເທດຊາດ. ທິດທາງ ຂອງການຕ່າງປະເທດແມ່ນ ຜັນຂະຫຍານບັນດາການເຄື່ອນໄຫວການຕ່າງປະເທດຢ່າງຄົບຊຸດ, ປະດິດສ້າງ ແລະ ມີປະສິດທິຜົນ; ເປັນເຈົ້າການ, ຕັ້ງໜ້າເຊື່ອມໂຍງສາກົນຢ່າງຮອບດ້ານແລະເລິກເຊິ່ງ. ສະຫາຍເລຂາທິການໃຫຍ່ ຫງວຽນຝູຈ້ອງ ຊີ້ນຳກອງປະຊຸມການຕ່າງປະເທດແຫ່ງຊາດ, ຂະແໜງການທູດ ພ້ອມກັບບັນດາກອງກຳລັງການຕ່າງປະເທດ ສືບຕໍ່ເສີມຂະຫຍາຍບົດບາດນຳໜ້າໃນການປະຕິບັດໜ້າທີ່ພື້ນຖານ ຂອງການຕ່າງປະເທດຄື ຮັກສາສະພາບແວດລ້ອມສັນຕິພາບ ແລະ ສະຖຽນລະພາບ, ລະດົມບັນດາແຫຼ່ງພະລັງຈາກພາຍນາກເພື່ອພັດທະນາເສດຖະກິດ-ສັງຄົມ, ຍົກສູງຖານະບົດບາດແລະກຽດສັກສີຂອງປະເທດ; ໃນນັ້ນ, ການຮັກສາສັນຕິພາບ ແລະ ສະຖຽນລະພາບແມ່ນໜ້າທີ່ສຳຄັນ ເປັນປະຈຳ, ການຮັບໃຊ້ການພັດທະນາປະເທດແມ່ນໜື້າທີ່ຈຸດສຸມໃຈກາງ, ການຍົກສູງຖານະບົດບາດ ແລະກຽດສັກສີຂອງປະເທດ ແມ່ນໜ້າທີ່ທີ່ສຳຄັນ.
ໃນຖານະທີ່ເປັນກອງກຳລັງປະຈັນບານຫຼັກໃນແນວຮົບການຕ່າງປະເທດ, ຂະແໜງການການທູດຊາບຊຶມຢ່າງເລິກເຊິ່ງມະຕິຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ແລະ ແຜນນະໂຍບາຍ, ແນວທາງການຕ່າງປະເທດຂອງພັກ, ບັນດາຄຳສະຫຼຸບ, ຄຳຊີ້ນຳຂອງການນຳພັກແລະລັດ ໃນກອງປະຊຸມການຕ່າງປະເທດແຫ່ງຊາດ ເພື່ອປະຕິບັດເປັນຢ່າງດີ ບັນດາທິດທາງ, ໜ້າທີ່ໃນໄລຍະທີ່ຈະມາເຖິງ ແນໃສ່ສ້າງການທູດຫວຽດນາມຢ່າງຮອບດ້ານ, ທັນສະໄໝ ແລະ ເຂັ້ມຂົ້ນໄປດ້ວຍເອກະລັກຂອງຊາດ.
ທີໜຶ່ງ, ຜັນຂະຫຍາຍປະຕິບັດຢ່າງຄົບຊຸດແລະມີປະສິດທິຜົນ ບັນດາໜ້າທີ່ການຮັກສາສະພາບແວດລ້ອມສັນຕິພາບ ສະຖຽນລະພາບ, ການລະດົມແຫຼ່ງພະລັງຈາກພາຍນອກເພື່ອຮັບໃຊ້ການພັດທະນາເສດຖະກິດ-ສັງຄົມ ແລະ ການຍົກສູງຖານະບົດບາດຂອງປະເທດ. ຢຶດໝັ້ນເອກະລາດ, ເປັນເຈົ້າຕົນເອງ, ທັງຮ່ວມມື ທັງຕໍ່ສູ້, ສະຫຼາດຄ່ອງແຄ້ວ, ເດັດດ່ຽວ, ທົນທານໜຽວແໜ້ນ ໃນການປົກປ້ອງອຳນາດອະທິປະໄຕ, ຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນ ໃນຄວາມສຳພັນແໜ້ນແຟ້ນ ກັບການຮັກສາສະພາບແວດລ້ອມສະຕິພາບ ສະຖຽນລະພາບ ແລະ ເອື້ອອຳນວຍ ໃຫ້ແກ່ການພັດທະນາປະເທດ. ປັບປຸງຄວາມໝັ້ນຄົງຂອງເສັ້ນຊາຍແດນແຫ່ງສັນຕິພາບ ການຮ່ວມມື ແລະ ການພັດທະນາ, ຊຸກຍູ້ການແກ້ໄຂບັນດາບັນຫາທີ່ຍັງຄົງຄ້າງກ່ຽວກັບຊາຍແດນແລະຜືນແຜ່ນດິນ ເພື່ອຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ.
ຍູ້ແຮງການຕ່າງປະເທດທະວິພາຄີ ແລະ ຍົກລະດັບການຕ່າງປະເທດພະຫຸພາຄີໃຫ້ສົມກັບທ່າແລະກຳລັງໃໝ່ຂອງປະເທດ. ສືບຕໍ່ພັດທະນາຢ່າງຮອບດ້ານການພົວພັນຮ່ວມມື, ມິດຕະພາບທີ່ເປັນມູນເຊື້ອກັບບັນດາປະເທດເພື່ອນບ້ານໃກ້ຄຽງ. ເປັນເຈົ້າການ ແລະ ຕັ້ງໜ້າຍູ້ແຮງ ແລະ ເຮັດໃຫ້ການພົວພັນກັບບັນດາຄູ່ຮ່ວມມືເລິກເຊິ່ງຍິ່ງຂຶ້ນ, ໂດຍສະເພາະແມ່ນບັນດາຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ຄູ່ຮ່ວມມືທີ່ສຳຄັນອື່ນ ແລະ ເພື່ອນມິດທີ່ເປັນທູນເຊື້ອ. ເສີມຂະຫຍາຍຜົນງານຂອງປີປະທານອາຊຽນ 2020 ແລະ ສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດປີ 2020-2021, ສືບຕໍ່ເປັນເຈົ້າການໃນການເພີ່ມທະວີບົດບາດໃນກົນໄກພະຫຸພາຄີ, ພິເສດແມ່ນອາຊຽນ, ສະຫະປະຊາຊາດ, ເອເປກ, ການຮ່ວມມືອະນຸພາກພື້ນແມ່ນໍ້າຂອງ ແລະ ກອບການຮ່ວມມືລະດັບຍຸດທະສາດອື່ນໆ, ສອດຄ່ອງກັບຄວາມຕ້ອງການ, ຄວາມສາມາດ ແລະ ເງື່ອນໄຂຕົວຈິງຂອງຫວຽດນາມ.
ທີສອງ, ຜັນຂະຫຍາຍບັນດາເສົາຫຼັກ, ບັນດາເຫຼົ່າທັບການທູດຢ່າງຮອບດ້ານແລະເຊື່ອມຕໍ່ແໜ້ນແຟ້ນນຳກັນ, ສູ້ຊົນເຮັດໃຫ້ການຕ່າງປະເທດ ແລະ ການທູດກາຍເປັນກຳລັງແຮງຊຸກຍູ້ການພັດທະນາຂອງປະເທດຢ່າງແທ້ຈິງ. ພະຍາຍາມສ້າງການທູດເສດຖະກິດຮັບໃຊ້ການພັດທະນາ, ຖືເອົາປະຊາຊົນ ທ້ອງຖິ່ນ ແລະ ວິສາຫະກິດເປັນໃຈກາງທີ່ຮັບການຮັບໃຊ້. ຍາດແຍ່ງຫຼາຍສຸດບັນດາການພົວພັນຕ່າງປະເທດ, ບັນດາປັດໄຈສາກົນທີ່ສະດວກດີ, ບັນດາສັນຍາແລະຂໍ້ຕົກລົງການຮ່ວມມືສາກົນ ເພື່ອລະດົມ, ສົມທົບແຫຼ່ງພະລາງຈາກພາຍນອກ ກັບແຫຼ່ງພະລັງພາຍໃນປະເທດ ເຂົ້າໃນການຮັບໃຊ້ບັນດາການບຸກທະລຸທາງຍຸດທະສາດ, ບັນດາຂົງເຂດ ຕິດກັບການປ່ຽນແປງໃໝ່ຮູບແບບການເຕີບໂຕ ແລະ ການປັບໂຄງສ້າງເສດຖະກິດຄືນໃໝ່ ເຊັ່ນ ວິທະຍາສາດ-ເຕັກໂນໂລຊີ, ສິ່ງແວດລ້ອມ, ການປ່ຽນແປງດິຈີຕອນ, ການເຕີບໂຕສີຂຽວ,... ໃນສະເພາະໜ້າ, ສືບຕໍ່ຊຸກຍູ້ການເປີດກວ້າງຕະຫຼາດ, ດຶງດູດເງິນລົງທຶນ, ເຕັກໂນໂລຊີຮັບໃຊ້ການຟື້ນຟູ ແລະ ພັດທະນາເສດຖະກິດ-ສັງຄົມ ໃນແລະຫຼັງການແຜ່ລະບາດຂອງພະຍາດໂຄວິດ-19; ຜັນຂະຫຍາຍຍຸດທະສາດການທູດວັດທະນະທຳ, ວຽກງານຕໍ່ຊາວຫວຽດນາມຢູ່ຕ່າງປະເທດ ແລະ ການປົກປ້ອງພົນລະເມືອງ ຢ່າງຮອບດ້ານແລະແຂງແຮງ; ສືບຕໍ່ປ່ຽນແປງໃໝ່ເນື້ອໃນ, ວິທີການ ແລະ ຍົກສູງຄຸນນະພາບຂອງວຽກງານຂໍ້ມູນການຕ່າງປະເທດ, ໂດຍສະເພາະແມ່ນການນໍາໃຊ້ພື້ນຖານດິຈິຕອນຢ່າງເຂັ້ມແຂງ.
ທີສາມ, ດຳເນີນການປ່ຽນແປງໃໝ່ ແລະ ປະດິດສ້າງໃນການຕ່າງປະເທດ ແລະ ການທູດຢ່າງບໍ່ຢຸດຢັ້ງ. ຈັດການແກ້ໄຂຢ່າງຖືກຕ້ອງສາຍພົວພັນລະຫວ່າງການສືບທອດ, ການປ່ຽນແປງໃໝ່ ແລະ ການພັດທະນາ; ໃນນັ້ນ, ການສືບທອດແລະໝູູນໃຊ້ຢ່າງປະດິດສ້າງ ແນວຄິດ ວິທີການ ແບບແຜນ ແລະ ສິລະປະການທູດໂຮ່ຈີມິນ, ມູນເຊື້ອການທູດຂອງຊາດ; ພ້ອມກັນນັ້ນ, ເພີ່ມເຕີມ ພັດທະນາ ແລະ ປັບປຸງບູລະນະຄວາມຮັບຮູ້ ແຜນນະໂຍບາຍ ຍຸດໂທບາຍການທູດ ໃຫ້ສອດຄ່ອງກັບສະພາບການໃໝ່ ຢ່າງຕໍ່ເນື່ອງ. ຄຽງຄູ່ກັນກັບບັນດາຂົງເຂດດັ້ງເດີມນັ້ນ, ຕ້ອງພະຍາຍາມຫາວິທີການໃຫມ່, ທິດທາງໃໝ່, ຂົງເຂດໃໝ່ ເພື່ອຕອບສະໜອງຄວາມຕ້ອງການພັດທະນາປະເທດໃນໄລຍະໃໝ່, ເຊັ່ນ ການທູດເຕັກໂນໂລຊີ, ການທູດດິຈີຕອນ, ການທູດສິ່ງແວດລ້ອມ, ການທູດທາງການແພດ, ການທູດພະລັງງານ,...
ການທູດທາງການແພດແລະການທູດວັກຊີນ ແມ່ນໜຶ່ງໃນບັນດາຈຸດສະຫວ່າງຂອງຜົນງານການຕ່າງປະເທດໃນປີ 2021 (ໃນພາບ: ກະຊວງການຕ່າງປະເທດຈັດພິທີຮັບວັກຊີນ AstraZeneca ຈຳນວນ 2,6 ລ້ານໂດສ ໂດຍລັດຖະບານ ເຢຍລະມັນ ມອບໃຫ້ຫວຽດນາມ ເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19) _ພາບ: TTXVN
ທີສີ່, ເພີ່ມທະວີວຽກງານການຄົ້ນຄວ້າ, ຄາດຄະເນ, ໃຫ້ຄໍາແນະນໍາຍຸດທະສາດກ່ຽວກັບການຕ່າງປະເທດ, ໂດຍສະເພາະ ບັນດາບັນຫາທີ່ກະທົບໂດຍກົງ, ຍາວນານເຖິງຄວາມປອດໄພແລະການພັດທະນາຂອງປະເທດ. ຕິດຕາມໂດຍກົງຢ່າງເປັນປະຈຳ, ຄົ້ນຄວ້າກຳແໜ້ນ ແລະ ຄາດຄະເນສະຖານະການຢ່າງຖືກຕ້ອງ ເພື່ອມີມາດຕະການຮັບມືຢ່າງທັນການ ແລະ ວິທີການແກ້ໄຂທີ່ເໝາະສົມ ໃນວຽກງານການຕ່າງປະເທດ.
ທີຫ້າ, ປະສານສົມທົບຢ່າງແໜ້ນແຟ້ນແລະຄົບຊຸດ ລະຫວ່າງການທູດ ກັບການຕ່າງປະເທດຂອງພັກ, ການຕ່າງປະເທດປະຊາຊົນ, ການປ້ອງກັນປະເທດ, ການຮັກສາຄວາມໝັ້ນຄົງ ແລະ ບັນດາຂັ້ນ, ຂະແໜງການຕ່າງໆ. ຍູ້ແຮງການສ້າງແລະປັບປຸງບູລະນະສະຖາບັນ, ນະໂຍບາຍ, ກົດໝາຍ ສຳລັບການເຄື່ອນໄຫວທາງການຕ່າງປະເທດ ແລະ ການທູດ. ປ່ຽນແປງໃໝ່ ແລະ ປັບປຸງບັນດາກົນໄກນຳພາ ຊີ້ນຳ ແລະ ປະສານສົມທົບລະຫວ່າງບັນດາຂັ້ນ, ບັນດາຂະແໜງການ ໃນການຜັນຂະຫຍາຍການເຄື່ອນໄຫວຕ່າງປະເທດ. ປັບປຸງການຈັດຕັ້ງ ແລະ ກົງຈັກຂະແໜງການທູດ ໃຫ້ກະທັດລັດ, ວິທະຍາສາດ, ສົມເຫດສົມຜົນ ແລະ ມີປະສິດທິຜົນ. ຍູ້ແຮງການຫັນເປັນທັນສະໄໝ, ການປ່ຽນແປງດິຈີຕອນ ໃນຂະແໜງການທູດ.
ທີຫົກ, ເບິ່ງແຍງການກໍ່ສ້າງຖັນແຖວພະນັກງານການທູດຢ່າງຮອບດ້ານ ທາງດ້ານການເມືອງ, ແນວຄິດ, ຄຸນສົມບັດ, ຄວາມກ້າຫານ ແລະ ສະຕິປັນຍາ, ທັນສະໄໝ, ເປັນມືອາຊີບທາງດ້ານແບບແຜນແລະວິທີການເຮັດວຽກ, ມີຈິດໃຈປ່ຽນແປງໃໝ່ ປະດິດສ້າງ. ສືບຕໍ່ເອົາໃຈໃສ່ເປັນພິເສດເຖິງການກໍ່ສ້າງ ປັບປຸງພັກ ແລະ ວຽກງານພະນັກງານ, ໃນນັ້ນ ປ່ຽນແປງໃໝ່ການຮັບສະໝັກ, ຈັດວາງ, ຜັດປ່ຽນຍົກຍ້າຍ, ຝຶກອົບຮົມ ບຳລຸງສ້າງພະນັກງານ, ການປະເມີນພະນັກງານການທູດ, ໂດຍສະເພາ ສຳລັບພະນັກງານຂັ້ນຍຸດທະສາດ ພະນັກງານນຳພາ ຄຸ້ມຄອງ; ສ້າງແລະພັດທະນາເທື່ອລະກ້າວ ຖັນແຖວຜູ້ຊ່ຽວຊານທີ່ມີຄຸນນະພາບໃນລະດັບພາກພື້ນແລະສາກົນ ໃນບັນດາຂົງເຂດສຳຄັນຂອງການຕ່າງປະເທດ ແລະ ການທູດ.
ເສີມຂະຫຍາຍມູນເຊື້ອອັນສະຫງ່າງາມ ແລະ ຜົນງານແຫ່ງການປ່ຽນແປງໃໝ່ໃນກວ່າ 35 ປີທີ່ຜ່ານມາ, ຂະແໜງການທູດພາຍໃຕ້ການນຳພາຂອງພັກ ຕັດສິນໃຈກໍ່ສ້າງພື້ນຖານການທູດຫວຽດນາມທີ່ຮອບດ້ານ, ທັນສະໄໝ, ເຕັມໄປດ້ວຍເອກະລັກປະຈຳຊາດ - ສາຍຝ່າຍການທູດ “ໄມ້ໄຜ່ຫວຽດນາມ” ເພື່ອສືບຕໍ່ປະກອບສ່ວນທີ່ສົມກຽດເຂົ້າໃນພາລະກິດການພັດທະນາປະເທດ ແລະ ການປົກປັກຮັກສາປະເທດຊາດ ເພື່ອປະເທດຫວຽດນາມສັງຄົມນິຍົມ, ເອກະລາດ, ສັນຕິພາບ ແລະ ເຂັ້ມແຂງແຮງກ້າ./.
----------------------
(1) ໃນປີ 2020 - 2021, ສະພາຄວາມໝັ້ນຄົງແຫ່ງສະຫະປະຊາຊາດຜ່ານມະຕິ 2 ສະບັບ, ຖະແຫຼງການປະທານ 3 ສະບັບ ແລະ ຖະແຫຼງຂ່າວ 1 ສະບັບ ໂດຍຫວຽດນາມສະເໜີແລະເປັນປະທານການກຽມສະບັບຮ່າງ. ສະມັດຊາໃຫຍ່ແຫ່ງສະຫະປະຊາຊາດໄດ້ລົງມະຕິກຳນົດໃຫ້ວັນທີ 27 ທັນວາ ເປັນວັນປ້ອງກັນແລະຄວບຄຸມພະຍາດສາກົນ, ເຊິ່ງຫວຽດນາມສະເໜີ ແລະ ສ້າງ ໂດຍໄດ້ຮັບການສະໜັບສະໜູນຈາກກວ່າ 120 ປະເທດ. ຫວຽດນາມໃນຖານະປະທານສະພາຄວາມໝັ້ນຄົມໃນເດືອນມັງກອນ 2020 ແລະເດືອນເມສາ 2021 ໄດ້ຈັດງານສຳຄັນສີ່ຄັ້ງ...
(2) ໝາຍຄວາມວ່າ ການປ່ອຍອາຍພິດເປັນ 0 ຫຼື ປະລິມານອາຍພິດທີ່ປ່ອຍອອກມາເທົ່າກັບປະລິມານການປ່ອຍອາຍພິດທີ່ຖືກດູດຊຶມ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 984 (ເດືອນກຸມພາ 2022)
