ວຽກງານກ່ຽວກັບຊາວຫວຽດນາມຢູ່ຕ່າງປະເທດ: ບັນດາຂີດໝາຍບົນເສັ້ນທາງ 60 ປີ ແຫ່ງການສ້າງຕັ້ງແລະພັດທະນາ
ວກ. - ວຽກງານຂົນຂວາຍຊາວຫວຽດນາມຢູ່ຕ່າງປະເທດ ແມ່ນໜ້າທີ່ໜຶ່ງ ທີ່ມີຄວາມໝາຍສຳຄັນ ໃນລະບົບວຽກງານຂົນຂວາຍປະຊາຊົນ, ຕິດແໜ້ນກັບ ພາລະກິດປະຕິວັດ ຂອງພັກແລະລັດ ແລະ ພາລະກິດ ມະຫາສາມັກຄີປວງຊົນທັງຊາດ. ເລີ່ມຈາກ ບັນດາຄວາມຮຽກຮ້ອງຕ້ອງການ, ໜ້າທີ່ສະເພາະ ໃນແຕ່ລະໄລຍະ, ພັກແລະລັດຫວຽດນາມ ໄດ້ກຳນົດແນວທາງ, ນະໂຍບາຍ ໃນວຽກງານຂົນຂວາຍ ຊາວຫວຽດນາມຢູ່ຕ່າງປະເທດ. ທັດສະນະລວມຂອງພັກ, ລັດ ແລະ ປະຊາຊົນຫວຽດນາມ ຕໍ່ພີ່ນ້ອງຮ່ວມຊາດເຮົາ ທີ່ດຳລົງຊີວິຢູ່ຕ່າງປະເທດ ແມ່ນ “ຊາວຫວຽດນາມຢູ່ຕ່າງປະເທດ ແມ່ນພາກສ່ວນໜຶ່ງ ທີ່ຂາດບໍ່ໄດ້ ແລະ ແມ່ນແຫຼ່ງກຳລັງ ຂອງປະຊາຄົມບັນດາເຜົ່າຫວຽດນາມ”.
ປີ 2019 ໄດ້ເຫັນປະຈັກຕາບັນດາຜົນງານອັນໃຫຍ່ຫຼວງໃນການພັດທະນາເສດຖະກິດ-ສັງຄົມຂອງຫວຽດນາມ. ໃນຜົນງານເຫຼົ່ານັ້ນ, ບໍ່ອາດຈະບໍ່ເວົ້າເຖິງບົດບາດ ແລະສ່ວນປະກອບຂອງຊຸມຊົນຊາວຫວຽດນາມຢູ່ຕ່າງປະເທດ. ປີ 2019 ກໍ່ແມ່ນປີທີ່ຂີດໝາຍ 60 ປີແຫ່ງການສ້າງຕັ້ງແລະພັດທະນາຂອງ ຄະນະກຳມະການແຫ່ງລັດ ກ່ຽວກັບຊາວຫວຽດນາມຢູ່ຕ່າງປະເທດ. ໃນ 6 ທົດສະວັດທີ່ຜ່ານມາ, ວຽກງານກ່ຽວກັບຊາວຫວຽດນາມຢູ່ຕ່າງປະເທດ ໄດ້ບັນລຸຜົນງານຫຼາຍຢ່າງທີ່ໜ້າຊົມເຊີຍ ໃນການຊ່ວຍເຫຼືອໃຫ້ພີ່ນ້ອງຊາວຫວຽດນາມຢູ່ຕ່າງປະເທດ ມີສະຖຽນລະພາບໃນຊີວິດ, ຮັກສາເອກະລັກວັດທະນະທຳທີ່ເປັນມູນເຊື້ອ, ເຊື່ອມຕໍ່ຊຸມຊົນຊາວຫວຽດນາມຢູ່ຕ່າງປະເທດກັບບ້ານເກີດເມືອງນອນ, ເສີມຂະຫຍາຍກຳລັງແຮງແຫ່ງມະຫາສາມັກຄີທົ່ວປວງຊົນ, ເພື່ອພາລະກິດລວມໃນການສ້າງສາ, ປົກປັກຮັກສາ ແລະພັດທະນາປະເທດ. ລະບົບຂອບກົດໝາຍ, ນະໂຍບາຍໄດ້ຮັບການສ້າງຂຶ້ນມາ, ຕອບສະໜອງນັບມື້ນັບດີໃຫ້ແກ່ຜົນປະໂຫຍດທີ່ແທດຈິງຂອງຊຸມຊົນຊາວຫວຽດນາມຢູ່ຕ່າງປະເທດ, ສ້າງເງື່ອນໄຂໃຫ້ພວກເຂົາມີຄວາມສະໜິດຕິດພັນກັບປະເທດ, ຜ່ານນັ້ນ, ບົດບາດຂອງຊາວຫວຽດນາມຢູ່ຕ່າງປະເທດໄດ້ຮັບການຢືນຢັນໃນທຸກດ້ານຂອງຊີວິດຄືກັບທຸກວັນນີ້.
ບັນດາຂີດໝາຍໃນເສັ້ນທາງ 60 ປີທີ່ຜ່ານມາ
ໃນປະຫວັດສາດ, ຄົນຫວຽດນາມອົບພະຍົບໄປຕ່າງປະເທດແຕ່ດົນນານແລ້ວ, ໃນນັ້ນ, ຂີດໝາຍສຳຄັນທຳອິດທີ່ສະແດງເຖິງການປະກົດຕົວຂອງຊາວຫວຽດນາມຢູ່ຕ່າງປະເທດ ຍັງຖືກເກັບຮັກສາໄວ້ໃນບັນດາເອກະສານປະຫວັດສາດ, ແມ່ນເຫດການທີ່ເຈົ້າຊາຍ ຫຼີລອງເຕື໋ອງ ໄດ້ນຳເອົາບາງຄອບຄົວຂອງລາຊະວົງຫຼີ ໄປປະເທດເກົາຫຼີ ໃນຕົ້ນສະຕະວັດທີ XIII, ກໍ່ຕັ້ງສາຍຕະກູນຫຼີຮົວເຊີນ ຢູ່ສາທາລະນະລັດເກົາຫຼີໃນປະຈຸບັນ. ໃນຊຸມປີທ້າຍສະຕະວັດທີ XIX ແລະຕົ້ນສະຕະວັດທີ XX ແມ່ນໄລຍະເວລາທີ່ຂີດໝາຍການອົບພະຍົບໃຫຍ່ຄັ້ງທຳອິດຂອງຊາວຫວຽດນາມໄປຕ່າງປະເທດ, ຈຳນວນຄົນຫວຽດນາມຢູ່ຕ່າງປະເທດ ແລະຈຳນວນສະຖານທີ່ທີ່ມີຄົນຫວຽດນາມຢູ່ອາໄສ ໄດ້ເພີ່ມຂຶ້ນຢ່າງໄວ. ໃນລະຫວ່າງການສ້າງຕັ້ງແລະພັດທະນາ, ຊຸມຊົນຊາວຫວຽດນາມຢູ່ຕ່າງປະເທດ ຖືກຜົນສະທ້ອນຢ່າງໃຫຍ່ຫຼວງ ຈາກການຜັນຜວນໃນປະຫວັດສາດ, ໄດ້ປະກອບດ້ວຍຫຼາຍພາກສ່ວນ, ອາໄສຢູ່ໃນຫຼາຍປະເທດ, ຫຼາຍພາກພື້ນທີ່ມີເງື່ອນໄຂເສດຖະກິດ, ການເມືອງ, ສັງຄົມທີ່ແຕກຕ່າງກັນ. ພ້ອມກັນກັບຂະບວນການເຊື່ອມໂຍງສາກົນ ແລະການແລກປ່ຽນວັດທະນະທຳຂອງຫວຽດນາມ ກັບຕ່າງປະເທດ, ໃນຊຸມປີທີ່ຜ່ານມາມໍ່ນີ້, ຊຸມຊົນຊາວຫວຽດນາມຢູ່ຕ່າງປະເທດ ໄດ້ມີການຜັນປ່ຽນແລະການພັດທະນາໃໝ່, ດ້ວຍການເພີ່ມຈຳນວນຊາວຫວຽດນາມທີ່ອອກໄປຕ່າງປະເທດພາຍໃຕ້ຮູບການຕ່າງໆເຊັ່ນ ໄປຕັ້ງຖິ່ນຖານ, ເຕົ້າໂຮມກັບຄອບຄົວ, ໄປໂຮງຮຽນ, ໄປເຮັດວຽກເຮັດທຸລະກິດ, ແຮງງານສົ່ງອອກຕາມສັນຍາ, ແຕ່ງງານ...; ພ້ອມກັນນັ້ນ ກໍ່ເຫັນມີຄົນຮຸ່ນໜຸ່ມກັບມາບ້ານເກີດເມືອງນອນເພື່ອສ້າງອາຊີບ, ລົງທຶນ ແລະ ເຂົ້າຮ່ວມກິດຈະກຳວັດທະນະທຳແລະກິດລາພາຍໃນປະເທດຫວຽດນາມ.
ຊຸມຊົນຊາວຫວຽດນາມມີມາແຕ່ດົນນານ ໃນຫຼາຍປະເທດທີ່ມີສາຍພົວພັນທາງປະຫວັດສາດ ກັບຫວຽດນາມເຊັ່ນ ກຳປູເຈຍ, ລາວ, ຈີນ, ຝຣັ່ງ, ນິວເຮບຣີດີ (ດຽວນີ້ແມ່ນປະເທດ ວານູອາຕູ)... ຕັ້ງແຕ່ວັນທຳອິດຂອງການສ້າງຕັ້ງປະເທດ, ປະທານໂຮ່ຈີມິນໄດ້ເອົາໃຈໃສ່ທີ່ສຸດເຖິງການຂົນຂວາຍພີ່ນ້ອງຮ່ວມຊາດຊາວຫວຽດນາມຢູ່ຕ່າງປະເທດ. ພາຍຫຼັງທີ່ສັນຕິພາບໄດ້ກັບຕ່າວຄືນມາຢູ່ພາກເໜືອ, ຊາວຫວຽດນາມຢູ່ຕ່າງປະເທດຫຼາຍຄົນປາດຖະໜາຢາກກັບຄືນບ້ານເກີດເມືອງນອນ ເພື່ອດຳລົງຊີວິດ ແລະສ້າງສາປະເທດຊາດ. ຕອບສະໜອງຄວາມປາດຖະໜາຂອງຊາວຫວຽດນາມຢູ່ຕ່າງປະເທດ, ວັນທີ 23-11-1959, ນາຍົກລັດຖະມົນຕີ ຟ້າມວັນດົ່ງ ໄດ້ລົງນາມໃນດຳລັດເລກທີ 416/NĐ-TTg ວ່າດ້ວຍການສ້າງຕັ້ງຄະນະກຳມະການສູນກາງກ່ຽວກັບຊາວຫວຽດນາມຢູ່ຕ່າງປະເທດ - ທີ່ເປັນຕົ້ນກຳເນີດຂອງຄະນະກຳມະການແຫ່ງລັດ ກ່ຽວກັບຊາວຫວຽດນາມຢູ່ຕ່າງປະເທດ - ຂີດໝາຍບາດກ້າວພັດທະນາທີ່ສຳຄັນຂອງວຽກງານກ່ຽວກັບຊາວຫວຽດນາມຢູ່ຕ່າງປະເທດ. ນີ້ເປັນຄັ້ງທຳອິດທີ່ອົງການສະເພາະກິດໜຶ່ງໄດ້ຮັບການສ້າງຂຶ້ນມາ ເພື່ອຊ່ວຍລັດຖະບານຕິດຕາມ ແລະຊີ້ນຳວຽກງານກ່ຽວກັບຊາວຫວຽດນາມຢູ່ຕ່າງປະເທດ, ພ້ອມກັນນັ້ນ ກໍ່ມີບົດບາດເປັນຂົວຕໍ່ລະຫວ່າງຊາວຫວຽດນາມຢູ່ຕ່າງປະເທດກັບບ້ານເກີດເມືອງນອນ, ປະເທດຫວຽດນາມ.
ພາຍຫຼັງໄດ້ຮັບການສ້າງຕັ້ງຂຶ້ນມາ, ຄະນະກຳມະການສູນກາງກ່ຽວກັບຊາວຫວຽດນາມຢູ່ຕ່າງປະເທດ ໄດ້ຮີບດ່ວນໃນການກໍ່ສ້າງກົງຈັກການຈັດຕັ້ງ ເພື່ອກະກຽມຕ້ອນຮັບບັນດາກຸ່ມຊາວຫວຽດນາມຢູ່ຕ່າງປະເທດກັບຄືນປະເທດ. ວັນທີ 10 ເດືອນມັງກອນ 1960, ເມື່ອກຳປັ່ນທະເລລຳທຳອິດທີ່ບັນທຸກຊາວຫວຽດນາມຕ່າງດ້າວໃນປະເທດໄທກວ່າ 900 ຄົນມາຮອດທ່າເຮືອ ໄຮຟັອງ, ປະທານໂຮ່ຈີມິນໄດ້ມາທີ່ທ່າທຽບເຮືອ ເສົາຄໍ (ໄຮຟັອງ) ໂດຍກົງ ເພື່ອຕ້ອນຮັບພີ່ນ້ອງຮ່ວມຊາດ, ສະແດງໃຫ້ເຫັນເຖິງຄວາມເອົາໃຈໃສ່ຢ່າງໃກ້ຊິດຂອງພັກແລະລັດຕໍ່ຊາວຫວຽດນາມຢູ່ຕ່າງປະເທດ. ແຕ່ປີ 1960 ເຖິງປີ 1964, ຄະນະກຳມະການສູນກາງກ່ຽວກັບຊາວຫວຽດນາມຢູ່ຕ່າງປະເທດໄດ້ຕ້ອນຮັບຊາວຫວຽດນາມກວ່າ 4 ໝື່ນຄົນ ຈາກປະເທດໄທ ແລະປະເທດນິວເຮບຣີດີ ກັບຄືນປະເທດ, ແກ້ໄຂວຽກເຮັດງານທຳແລະເຮັດໃຫ້ຊີວິດຂອງພວກເຂົາມີສະຖຽນລະພາບ.
ຄະນະກຳມະການສູນກາງກ່ຽວກັບຊາວຫວຽດນາມຢູ່ຕ່າງປະເທດ ສຸມໃສ່ການກໍ່ສ້າງຂະບວນການຊາວຫວຽດນາມຢູ່ຕ່າງປະເທດຮັກຊາດ, ເປັນພື້ນຖານເພື່ອສະໜັບສະໜູນການຕໍ່ສູ້ປົດປ່ອຍຊາດ ແລະທ້ອນໂຮມປະເທດຊາດເປັນເອກະພາບ. ຜົນສຳເລັດທີ່ພົ້ນເດັ່ນຂອງວຽກງານກ່ຽວກັບຊາວຫວຽດນາມຢູ່ຕ່າງປະເທດ ໃນໄລຍະນີ້ແມ່ນ ປຸກລະດົມຊາວຫວຽດນາມຍູ້ແຮງການເຄື່ອນໄຫວການທູດປະຊາຊົນ, ຕັ້ງໜ້າຊ່ວຍເຫຼືອແລະປະສານງານກັບບັນດາອົງການຕົວແທນຂອງຫວຽດນາມ ໃນການຂົນຂວາຍປະຊາຊົນແລະວົງການການເມືອງໃນປະເທດຕ່າງໆ, ນັບທັງປະຊາຊົນອາເມລິກາ, ສ້າງແນວໂຮງປະຊາຊົນຜູ້ກ້າວໜ້າໃນໂລກ ເພື່ອສະໜັບສະໜູນຫວຽດນາມ. ຊາວຫວຽດນາມຢູ່ຕ່າງປະເທດບໍ່ພຽງແຕ່ສະໜັບສະໜູນທາງດ້ານຈິດໃຈເທົ່ານັ້ນ ແຕ່ຍັງປະກອບສ່ວນໂດຍກົງ ເຂົ້າໃນການປະຕິວັດ. ຫຼາຍຂະບວນການຮັກຊາດໄດ້ຮັບການສ້າງຕັ້ງຂຶ້ນ, ໃນນັ້ນມີຂະບວນການພິເສດຂອງຊາວຫວຽດນາມຢູ່ປະເທດໄທ ແນໃສ່ລະດົມເງິນແລະສົ່ງກັບບ້ານ ເພື່ອສະໜັບສະໜູນການຕໍ່ສູ້ປົດປ່ອຍຊາດ.
ພາຍຫຼັງການທ້ອນໂຮມປະເທດເປັນເອກະພາບ, ໃນໄລຍະປີ 1976-1985, ຫວຽດນາມປະສົບຄວາມຫຍຸ້ງຍາກຫຼາຍຢ່າງຍ້ອນຖືກສົງຄາມທຳລາຍ, ຖືກປິດລ້ອມຂວ້ຳບາດ ແລະ ຍ້ອນຄວາມຜິດພາດໃນການບໍລິຫານ, ຄຸ້ມຄອງເສດຖະກິດ, ປະເທດຖືກຕົກຢູ່ໃນວິກິດການທາງເສດຖະກິດ-ສັງຄົມທີ່ແກ່ຍາວ. ໃນໄລຍະທີ່ເຕັມໄປດ້ວຍຄວາມຫຍຸ້ງຍາກລຳບາກນີ້, ຈຳນວນຊາວຫວຽດນາມທີ່ອົບພະຍົບແລະຍ້າຍໄປຕ່າງປະເທດເພື່ອອາໄສ ໄດ້ເພີ່ມຂຶ້ນຢ່າງຫຼວງຫຼາຍ, ດັ່ງນັ້ນ ຊຸມຊົນຊາວຫວຽດນາມຢູ່ຕ່າງປະເທດ ພັດທະນາຢ່າງໄວວາທາງດ້ານຈຳນວນ, ຫຼາກຫຼາຍທາງດ້ານສ່ວນປະກອບ ແລະສັບສົນທາງດ້ານທັດສະນະການເມືອງ. ໃນສະພາບການນັ້ນ, ພັກແລະລັດໄດ້ມີແຜນນະໂຍບາຍດຶງດູດການເຂົ້າຮ່ວມຫຼາຍທີ່ສຸດ ຂອງຊາວຫວຽດນາມຢູ່ຕ່າງປະເທດ ເຂົ້າໃນການຟື້ນຟູປະເທດພາຍຫຼັງສົງຄາມ, ເພີ່ມທະວີການປະກອບສ່ວນເຂົ້າໃນການສ້າງສາແລະປົກປັກຮັກສາປະເທດ, ເຂົ້າຮ່ວມການຂົນຂວາຍຫາງສຽງສາກົນ ເພື່ອຕໍ່ຕ້ານການປິດລ້ອມແລະການເກືອດຫ້າມຂອງສັດຕູ.
ແຕ່ປີ 1986, ເມື່ອຫວຽດນາມກ້າວເຂົ້າສູ່ການປ່ຽນແປງໃໝ່ຢ່າງຮອບດ້ານ, ມ້າງການປິດລ້ອມການເກືອດຫ້າມຂອງຕ່າງປະເທດ, ເປີດກວ້າງການພົວພັນຕ່າງປະເທດ ແລະ ສຳເລັດຂັ້ນຕອນການພົວພັນເປັນປົກກະຕິກັບບັນດາຄູ່ຮ່ວມງານແລະບັນດາອົງການຈັດຕັ້ງສາກົນທີ່ສຳຄັນ, ວຽກງານຕໍ່ຊາວຫວຽດນາມຢູ່ຕ່າງປະເທດມີຄວາມກ້າວໜ້າຫຼາຍຢ່າງ, ຕິດກັບຄວາມຮຽກຮ້ອງຕ້ອງການຂອງກິດຈະການປ່ຽນແປງໃໝ່. ຊຸມປີແຫ່ງການຢຶດໝັ້ນໃນພາລະກິດການປ່ຽນແປງໃໝ່, ບັນດາການປ່ຽນແປງໃນທາງບວກຂອງປະເທດ, ພ້ອມກັນກັບການສ້າງເງື່ອນໄຂອຳນວຍຄວາມສະດວກໃຫ້ຊາວຫວຽດນາມຢູ່ຕ່າງປະເທດ ກັບຄືນປະເທດເພື່ອຢ້ຽມຢາມຍາດຕິພີ່ນ້ອງ, ສົ່ງເງິນກັບບ້ານ..., ໄດ້ສົ່ງຜົນກະທົບທີ່ຕັ້ງໜ້າເຖິງຊຸມຊົນຊາວຫວຽດນາມຢູ່ຕ່າງປະເທດ.
ເຫດການສຳຄັນໜຶ່ງອີກ ທີ່ຂີດໝາຍບາດກ້າວປ່ຽນແປງໃໝ່ແນວຄິດ ໃນວຽກງານການຂົນຂວາຍຊາວຫວຽດນາມຢູ່ຕ່າງປະເທດ ແມ່ນການອອກມະຕິຂອງກົມການເມືອງສູນກາງພັກ ເລກທີ 08-NQ/TW, ວັນທີ 29 ເດືອນພະຈິກ 1993, ວ່າດ້ວຍວຽກງານຂົນຂວາຍຊາວຫວຽດນາມຢູ່ຕ່າງປະເທດ. ເປັນຄັ້ງທຳອິດທີ່ທັດສະນະ “ຊາວຫວຽດນາມຢູ່ຕ່າງປະເທດ ແມ່ນພາກສ່ວນໜຶ່ງທີ່ແຍກອອກບໍ່ໄດ້ ຂອງປະຊາຄົມບັນດາເຜົ່າຫວຽດນາມ” ໄດ້ຮັບການຢືນຢັນໃນເອກະສານຂອງພັກ. ເອກະສານສະບັບນີ້ແມ່ນພື້ນຖານໃຫ້ລັດຖະບານປະກາດໃຊ້ດຳລັດເລກທີ 74-CP, ວັນທີ 30 ເດືອນກໍລະກົດ 1994, ວ່າດ້ວຍໜ້າທີ່, ສິດຂອບເຂດ ແລະການຈັດຕັ້ງກົງຈັກຂອງຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ປ່ຽນແທນໃຫ້ຄະນະກຳມະການສູນກາງກ່ຽວກັບຊາວຫວຽດນາມຢູ່ຕ່າງປະເທດ ແລະ ດຳລັດເລກທີ 77/CP, ວັນທີ 6 ເພືອນພະຈິກ 1995, ຂອງລັດຖະບານ, ກ່ຽວກັບການຕັ້ງຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ຢູ່ພາຍໃຕ້ກະຊວງການຕ່າງປະເທດໂດຍກົງ. ນັບແຕ່ນັ້ນມາ, ວຽກງານກ່ຽວກັບຊາວຫວຽດນາມຢູ່ຕ່າງປະເທດໄດ້ກາຍເປັນໜຶ່ງໃນສີ່ເສົາຄ້ຳຂອງການທູດຫວຽດນາມ.
ອາໄສການເຊື່ອມຕໍ່ຢ່າງແໜ້ນແຟ້ນ ລະຫວ່າງວຽກງານກ່ຽວກັບຊາວຫວຽດນາມຢູ່ຕ່າງປະເທດ ກັບວຽກງານການຕ່າງປະເທດລວມຂອງປະເທດ, ວຽກງານຂົນຂວາຍຊາວຫວຽດນາມຢູ່ຕ່າງປະເທດ ໄດ້ມີການປ່ຽນແປງທີ່ສຳຄັນຫຼາຍຢ່າງ, ນັບທັງຢູ່ບັນດາພື້ນທີ່ທີ່ສັບສົນ, ມີກອງກຳລັງຕໍ່ຕ້ານຫຼາຍກອງ. ຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ໄດ້ຍູ້ແຮງການສ້າງແລະຜັນຂະຫຍາຍແຜນນະໂຍບາຍ, ນະໂຍບາຍຕໍ່ຊາວຫວຽດນາມຢູ່ຕ່າງປະເທດ; ປະກອບສ່ວນໂດຍກົງເຂົ້າໃນການສ້າງເອກະສານກົດໝາຍຫຼາຍສະບັບ ເພື່ອອຳນວຍຄວາມສະດວກໃຫ້ຊາວຫວຽດນາມໃນຫຼາຍໆບັນຫາກ່ຽວກັບກົນໄກນຳໃຊ້ຜູ້ຊ່ຽວຊານ ປັນຍາຊົນຄົນຫວຽດນາມຢູ່ຕ່າງປະເທດ ມີສ່ວນຮ່ວມໃນການໃຫ້ຄຳປຶກສາລັດຖະບານໃນຫຼາຍຂົງເຂດ, ຂໍ້ກຳນົດຕ່າງໆກ່ຽວກັບການກັບຄືນບ້ານເກີດເມືອງນອນ, ການອອກ - ເຂົ້າເມືອງ, ການຢູ່ອາໄສ, ການໃຊ້ລະບົບລາຄາດຽວ, ການສົ່ງເງິນກັບບ້ານ, ການຊື້ເຮືອນຢູ່, ການຍ້ອງຍໍຊົມເຊີຍ, ການລົງທຶນ, ທຸລະກິດ... ການຜັນຂະຫຍາຍແຜນນະໂຍບາຍ, ນະໂຍບາຍເທິງນີ້ໄດ້ເສີມຂະຫຍາຍປະສິດທິຜົນອັນໃຫຍ່ຫຼວງ, ນຳມາເຊິ່ງຜົນປະໂຫຍດແທດຈິງໃຫ້ພີ່ນ້ອງຮ່ວມຊາດຢູ່ຕ່າງປະເທດ, ຜ່ານນັ້ນຍິ່ງຢືນຢັນຄວາມເອົາໃຈໃສ່ເລິດເຊິ່ງຂອງພັກແລະລັດ ຕໍ່ຊຸມຊົນຊາວຫວຽດນາມຢູ່ຕ່າງປະເທດ, ສ້າງຄວາມຮັບຮູ້ທີ່ຖືກຕ້ອງ, ອາລົມຈິດສະໜິດແໜ້ນ ແລະ ການປະກອບສ່ວນທີ່ຕັ້ງໜ້າຂອງຊາວຫວຽດນາມຢູ່ຕ່າງປະເທດ ໃຫ້ແກ່ການກໍ່ສ້າງປະເທດຊາດ. ການຕັ້ງໜ້າຂົນຂວາຍຂອງພວກເຮົາກໍ່ໄດ້ປະກອບສ່ວນ ເຂົ້າໃນການລົບລ້າງຄວາມຄິດຫຍໍ້ທໍ້ ຂອງຊຸມຊົນສ່ວນໜຶ່ງ ທີ່ຕິດກັບລະບອບເກົ່າ, ຈຳກັດການກະທຳຕ້ານທຳລາຍ.
ປີ 2004 ແມ່ນຂີດໝາຍທີ່ມີການຫັນປ່ຽນພື້ນຖານ ແລະການສ້າງກຳລັງໜູນໃໝ່ໃນວຽກງານກ່ຽວກັບຊາວຫວຽດນາມຢູ່ຕ່າງປະເທດ. ບົນພື້ນຖານການສະຫຼຸບສັງລວມ 10 ປີແຫ່ງການປະຕິບັດມະຕິເລດທີ 08-NQ/TW, ຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ໄດ້ເປັນເຈົ້າການສະເໜີ, ໃຫ້ຄຳປຶກສາ ແລະ ສ້າງມະຕິເລກທີ 36-NQ/TW, ລົງວັນທີ 26 ມີນາ 2004, ຂອງກົມການເມືອງສູນກາງ, ກ່ຽວກັບວຽກງານຕໍ່ຊາວຫວຽດນາມຢູ່ຕ່າງປະເທດ. ມະຕິແມ່ນເອກະສານທີ່ມີຄວາມໝາຍປະຫວັດສາດມີຄຸນຄ່າພື້ນຖານ, ໃຫຍ່ຫຼວງ, ຮອບດ້ານແລະຍາວນານ ສະແດງໃຫ້ເຫັນຢ່າງເລິກເຊິ່ງເຖິງຈິນຕະນາການປ່ຽນແປງໃໝ່ ຂອງພັກກອມມູນິດຫວຽດນາມ ກ່ຽວກັບວຽກງານນີ້, ໄດ້ຮັບການເຜີຍແຜ່ຢ່າງກວ້າງຂວາງໃນທົ່ປະເທດ, ໃຫ້ຊາວຫວຽດນາມຢູ່ຕ່າງປະເທດໃນທຸກທະວີບໃນໂລກ. ພຶດຕິກຳອັນມີຊີວິດຊີວາກ່ຽວກັບ “ຊາວຫວຽດນາມຢູ່ຕ່າງປະເທດແມ່ນພາກສ່ວນໜຶ່ງທີ່ແຍກອອກບໍ່ໄດ້ ແລະແມ່ນແຫຼ່ງພະລັງຂອງປະຊາຄົມບັນດາເຜົ່າຫວຽດນາມ, ແມ່ນປັດໄຈສຳຄັນທີ່ປະກອບສ່ວນເພີ່ມທະວີການພົວພັນຮ່ວມມື, ມິດຕະພາບລະຫວ່າງປະເທດເຮົາກັບຕ່າງປະເທດ” ໄດ້ຮັບການສ່ອງແສງໃນມະຕິ, ກາຍເປັນຄວາມຮັບຮູ້ລວມ ຂອງທຸກສຳນັກງານອົງການໃນລະບົບການເມືອງ ແລະທົ່ວປວງຊົນ. ທັດສະນະຊີ້ນຳດັ່ງກ່າວຂອງພັກແລະລັດ ໄດ້ຮັບການຫັນເປັນຮູບປະທຳໃນຫຼາຍນະໂຍບາຍ, ກົດໝາຍທີ່ກ່ຽວພັນເຖິງຊາວຫວຽດນາມຢູ່ຕ່າງປະເທດ, ໃນນັ້ນມີເອກະສານກົດໝາຍສູງສຸດຄືລັດຖະທຳມະນູນປີ 2013(1). ວັນທີ 19 ພຶດສະພາ 2015, ກົມການເມືອງສູງກາງໄດ້ອອກຄຳສັ່ງສະບັບທີ 45-CT/TW, ກ່ຽວກັບການສືບຕໍ່ປະຕິບັດມະຕິເລກທີ 36-NQ/TW ຂອງກົມການເມືອງສູນກາງຊຸດທີ IX ກ່ຽວກັບວຽກງານຕໍ່ຊາວຫວຽດນາມຢູ່ຕ່າງປະເທດ ໃນສະພາບການໃໝ່, ສືບທອດບັນດາທັດສະນະຊີ້ນຳຂອງມະຕິເລກທີ 36, ພ້ອມກັນນັ້ນ ກໍ່ເນັ້ນໜັກບັນດາໜ້າທີ່ຈຸດໜັກໃຈກາງທີ່ຕ້ອງໄດ້ຜັນຂະຫຍາຍໃນໄລຍະເວລາຕໍ່ໜ້າ, ພິເສດແມ່ນສຸມໃສ່ແກ້ໄຂສິ່ງຄົງຄ້າງ, ຂໍ້ຈຳກັດຕ່າງໆ.
ວຽກງານກ່ຽວກັບຊາວຫວຽດນາມຢູ່ຕ່າງປະເທດໄດ້ແລະພວມກ້າວເຂົ້າສູ່ໄລຍະໃໝ່, ໄດ້ຮັບການຜັນຂະຫຍາຍຢ່າງແຂງແຮງ, ຮອບດ້ານ ໃນທຸກດ້ານ. ຫຼາຍນະໂຍບາຍທີ່ແທດເໝາະ ຮັບປະກັນຜົນປະໂຫຍດຕົວຈິງ ຂອງຊາວຫວຽດນາມຢູ່ຕ່າງປະເທດ ໃນການປ່ຽນແປງຂໍ້ກຳນົດກ່ຽວກັບບັນດາບັນຫາເຊັ່ນ ສັນຊາດ, ການຍົກເວັ້ນວີຊາ, ທີ່ຢູ່ອາໄສ, ການຊື້ເຮືອນແລະເປັນເຈົ້າຂອງເຮືອນໃນປະເທດຫວຽດນາມ... ເຊິ່ງໄດ້ສ້າງຄວາມເຊື່ອຖື, ເບີກບານໃຈຂອງຊຸນຊົນຊາວຫວຽດນາມຢູ່ທຸກປະເທດ ແລະເພີ່ມຄວາມຜູກພັນສະໜິດແໜ້ນ ລະຫວ່າງຊາວຫວຽດນາມຢຸ່ຕ່າງປະເທດ ກັບປະເທດຫວຽດນາມ.
ສາຍພົວພັນຂອງຊາວຫວຽດນາມຢູ່ຕ່າງປະເທດກັບບ້ານເກີດເມືອງນອນ
ຊຸມຊົນຊາວຫວຽດນາມຢູ່ຕ່າງປະເທດໃນປະຈຸບັນໄດ້ມີການພັດທະນາຢ່າງບໍ່ຢຸດຢັ້ງທາງດ້ານຈຳນວນແລະຄຸນນະພາບ, ໂດຍມີປະມານ 4,5 ລ້ານຄົນໃນກວ່າ 110 ປະເທດແລະເຂດແຄວ້ນ, ໃນນັ້ນຫຼາຍກວ່າ 500.000 ຄົນມີວຸດທິການສຶກສາລະດັບມະຫາວິທະຍາໄລຫຼືສູງກວ່າ, ຫຼາຍຄົນເປັນວິສາວະກອນ ຜູ້ຊ່ຽວຊານລະດັບສູງໃນບັນດາຂົງເຂດວິທະຍາສາດ, ເຕັກໂນໂລຊີ, ເສດຖະກິດ, ການເງິນ ແລະບາງຄົນໄດ້ເຂົ້າຮ່ວມໃນລະບົບການເມືອງຂອງບັນດາປະເທດ. ໃນແຕ່ລະປີ, ມີປະມານ 400 - 500 ເທື່ອຜູ້ຊ່ຽວຊານ, ປັນຍາຊົນຊາວຫວຽດນາມຢູ່ຕ່າງປະເທດ ເຂົ້າຮ່ວມການເຄື່ອນໄຫວວິທະຍາສາດ - ເຕັກໂນໂລຊີຢູ່ຫວຽດນາມ. ການມີສ່ວນຮ່ວມຂອງປັນຍາຊົນຫວຽດນາມຢູ່ຕ່າງປະເທດ 4 ຄົນໃນສະມາຊິກ 15 ຄົນຂອງກຸ່ມທີ່ປຶກສາເສດຖະກິດ ຂອງນາຍົກລັດຖະມົນຕີ ໄດ້ສ້າງເງື່ອນໄຂໃຫ້ປັນຍາຊົນຫວຽດນາມຢູ່ຕ່າງປະເທດ ປະກອບສ່ວນຫຼາຍກວ່າອີກເຂົ້າໃນການສ້າງສາປະເທດຊາດ.
ເດີນຕາມຮອຍບຸກຄົນສຳຄັນທີ່ປະທານໂຮ່ຈີມິນແລະຜູ້ອາວຸໂສຂອງການປະຕິວັດ ປຸກລະດົມໂດຍກົງໃຫ້ເຂົ້າຮ່ວມການຕໍ່ຕ້ານເຊັ່ນ ວິສາວະກອນ ເຈິ່ນດ້າຍເງ໋ຍ, ວິສາວະກອນ ຫວໍກຸ໋ຍຮວັນ, ດຣ ເຈິ່ນຫຶວເຕືອກ ແລະ ວິສາວະກອນ ຫວໍດິ່ງກວິ່ງ ແມ່ນບຸກຄົນໃໝ່ທີ່ກັບມາປະເທດເພື່ອເຂົ້າຮ່ວມການພັດທະນາປະເທດເຊັ່ນ ປອ ບຸ່ຍຫາຍຮຶງ - ນັກປະດິດ AI ທີ່ Google ເຊິ່ງມີໂຄງການວິໄຈທາງວິທະຍາສາດເກືອນ 100 ໂຄງການ ແລະມີສິດທິບັດເຕັກໂນໂລຊີ 10 ລາຍການ ທີ່ໄດ້ຮັບການນິຍົມຢ່າງສູຸງໃນອາເມລິກາ ກັບມາປະເທດ ແລະດຳລົງຕຳແໜ່ງຜູ້ອຳນວຍການສະຖາບັນຄົ້ນຄວ້າປັນຍາປະດິດ AI, ສາດສະດາຈານຄະນິດສາດ ຫວູຮ່າວັນ ມາເປັນຜູ້ອຳນວຍການເຕັກໂນໂລຊີ ຂອງສະຖາບັນ Vintech ຂອງກຸ່ມ Vingroup ແລະທ່ານ Philipp Roesler ຄົນເຊື້ອຊາດຫວຽດນາມ - ອະດີດຮອງນາຍົກລັດຖະມົນຕີເຢຍລະມັນ - ໃນຖານະປະທານສະພາທີ່ປຶກສາຂອງກອງທຶນເພື່ອການລົງທຶນ VinaCapital Ventures ຢູ່ຫວຽດນາມ.
ບັນດານັກທຸລະກິດຊາວຫວຽດນາມຢູ່ຕ່າງປະເທດໄດ້ກັບມາປະເທດເພື່ອທຳການທຸລະກິກ, ເຂົ້າຮ່ວມການສ້າງວິສາຫະກິດໃນປະເທດທີ່ນຳໜ້າ, ເຂັ້ມແຂງເຊັ່ນ Techcombank, Vpbank, Vingroup, Eurowindow, Masan, Sun Group, ບໍລິສັດເຄມີເຄື່ອງສຳອາງ ໝິລານ..., ປະກອບສ່ວນສ້າງວຽກເຮັດງານທຳ, ຝຶກອົບຮົມວິຊາຊີບ, ຖ່າຍໂອນເຕັກໂນໂລຊີ, ພັດທະນາເສດຖະກິດ - ສັງຄົມຢູ່ທ້ອງຖິ່ນ ແລະເພີ່ມແຫຼ່ງລາຍຮັບຈາກພາສີໃຫ້ງົບປະມານຂອງລັດ. ການໂອນເງິນສະສົມມາໃນຫວຽດນາມແຕ່ປີ 1993 ເຖິງປະຈຸບັນມີມູນຄ່າປະມານ 160 ຕື້ໂດລາສະຫະລັດ, ປະກອບສ່ວນສຳຄັນເຂົ້າໃນການດຸນການຊຳລະເງິນ, ແມ່ນແຫຼ່ງເງິນລົງທຶນປະກອບສ່ວນພັດທະນາເສດຖະກິດ - ສັງຄົມຢູ່ທ້ອງຖິ່ນຕ່າງໆໃນປະເທດ.
ດ້ວຍຄວາມຮັບຮູ້ຢ່າງເລິກເຊິ່ງ ກ່ຽວກັບຊາວຫວຽດນາມແຕ່ລະຄົນແມ່ນ "ທູດວັດທະນະທຳ”, ຊາວຫວຽດນາມຢູ່ຕ່າງປະເທດນັບມື້ນັບມີຄວາມຮັບຮູ້ແຈ້ງເຖິງຄວາມສຳຄັນ ຂອງການຮັກສາເອກະລັກວັດທະນະທຳ, ພາສາຫວຽດຢູ່ໃນສັງຄົມປະເທດພື້ນເມືອງ. ມີຫ້ອງຮຽນພາສາຫວຽດສຳລັບເດັກນ້ອຍລຸ້ນທີ 2 ແລະ ລຸ້ນທີ 3 ຫຼາຍຫ້ອງ ໄດ້ຮັບການຈັດຕັ້ງຂຶ້ນໂດຍຊຸມຊົນ ແລະເຄື່ອນໄຫວຢ່າງມີປະສິດທິຜົນ, ໄດ້ຮັບການຕີລາຄາສູງຈາກອຳນາດການປົກຄອງທ້ອງຖິ່ນ. ໂດຍສະເພາະ, ໃນບາງປະເທດແລະເຂດແຄວ້ນເຊັ່ນ ສ ເກົາຫຼີ, ເຊັກໂກ, ໄຕ້ຫວັນ (ຈີນ)...ພາສາຫວຽດນາມໄດ້ຖືກຮັບຮູ້ ແລະ ສອນເປັນພາສາທີສອງ ໃນໂຮງຮຽນມັດທະຍົມ, ບ່ອນທີ່ມີຊາວຫວຽດນາມຈຳນວນຫຼາຍ.
ເບິ່ງລວມ, ເຖິງວ່າຈະອາໄສຢູ່ໃນເຂດແຄວ້ນທີ່ແຕກຕ່າງກັນ ໃນສະພາບແວດລ້ອມທີ່ຕ່າງກັນ, ແຕ່ຊາວຫວຽດນາມຢູ່ຕ່າງປະເທດສ່ວນໃຫຍ່ມີຄວາມຮູ້ສຶກຮັກບ້ານເກີດເມືອງນອນຂອງຕົນ, ເປັນພາກສ່ວນ “ເລືອດເນື້ອເຊື້ອສາຍ” ຂອງປະຊາຄົມບັນດາເຜົ່າຫວຽດນາມ, ປະກອບສ່ວນປັບປຸງ ແລະພັດທະນາກ້ອນມະຫາສາມັກຄີປວງຊົນທັງຊາດ. ຫຼາຍບຸກຄົນ, ອົງການຈັດຕັ້ງຢູ່ຕ່າງປະເທດທີ່ມີທັດສະນະສຸດຂົ້ວ, ກົງກັນຂ້າມ ກໍ່ໄດ້ມີການປ່ຽນແປງໃນການຮັບຮູ້, ສະໜັບສະໜູນບັນດາແຜນນະໂຍບາຍ, ແນວທາງ, ນະໂຍບາຍຂອງພັກແລະລັດຫວຽດນາມ. ພິເສດແມ່ນ, ບັນດາຊ່ອງທາງຂໍ້ມູນຂ່າວສານຂອງຊາວຫວຽດນາມຢູ່ຕ່າງປະເທດ ໄດ້ກັບມາໃນປະເທດເພື່ອປະຕິບັດການໂດຍກົງ, ນຳເອົາຂໍ້ມູນພາວະວິໄສແລະຂໍ້ມູນທີ່ແທ້ຈິງ ກ່ຽວກັບການພັດທະນາເສດຖະກິດ ແລະສັງຄົມໃນປະເທດ ໃຫ້ກັບພີ່ນ້ອງຮ່ວມຊາດ, ສ້າງຫາງສຽມທີ່ດີໃນຊຸມຊົນ.
ບັນດາອົງການ, ກະຊວງ, ຄະນະ, ຂະແໜງການກໍໄດ້ເອົາໃຈໃສ່ດຶງດູດ, ເຕົ້າໂຮມແຫຼ່ງພະລັງ ແລະພູມປັນຍາຂອງຊາວຫວຽດນາມຢູ່ຕ່າງປະເທດ. ທ້າຍເດືອນພະຈິກ 2019, ສູນກາງຄະນະຊາວໜຸ່ມກອມມູນິດໂຮ່ຈີມິນໄດ້ຈັດຕັ້ງ ເວທີປາໄສປັນຍາຊົນໜຸ່ມຫວຽດນາມທົ່ວໂລກ ໂດຍມີການເຂົ້າຮ່ວມຂອງປັນຍາຊົນໜຸ່ມຊາວຫວຽດນາມ 100 ຄົນຈາກຫ້າທະວີບ. ຄະນະກຳມະການແຫ່ງຊາດກ່ຽວກັບຊາວຫວຽດນາມຢູ່ຕ່າງປະເທດ ໄດ້ຈັດຕັ້ງການເຄື່ອນໄຫວຫຼາຍຢ່າງເພື່ອເຕົ້າໂຮມບັນດາປັນຍາຊົນໜຸ່ມ. ປະເທດຍິນດີຕ້ອນຮັບຄົນຮຸ່ມໜຸ່ມກັບຄືນບ້ານເກີດເມືອງນອນ ແລະ ເຊື່ອມຕໍ່ການພັດທະນາຂອງຫວຽດນາມກັບໂລກ. ໃນປີທີ່ຜ່ານມາ, ຊຸມຊົນຊາວຫວຽດນາມຢູ່ຕ່າງປະເທດ ບໍ່ພຽງແຕ່ໄດ້ປະກອບສ່ວນສຳຄັນເຂົ້າໃນການພັດທະນາຂອງປະເທດໃນຂົງເຂດຕ່າງໆເຊັ່ນ ການລົງທຶນ, ການຄ້າ, ວິທະຍາສາດສາດ-ເຕັກໂນໂລຊີເທົ່ານັ້ນ, ຫາກຍັງໄດ້ມີສ່ວນປະກອບນັບມື້ນັບຫຼາຍໃນຂົງເຂດວັດທະນະທຳ, ກິລາ. ຕົວຢ່າງທີ່ສະແດງໃຫ້ເຫັນຄື ທີ່ຜ່ານມາ, ທິມບານບ້ວງຊາຍ 3x3 ຫວຽດນາມທີ່ມີສະມາຊິກສ່ວນໃຫຍ່ແມ່ນຊາວຫວຽດນາມຢູ່ຕ່າງປະເທດ ໄດ້ຊະນະປີ້ເຂົ້າຮອບຮອງຊະນະເລີດໃນຊີເກມ 30 ດ້ວຍໄຊຊະນະຮອບຄັດເລືອກເໜືອໄທ, ມາເລເຊຍ, ອິນໂດເນເຊຍ, ມຽນມາ, ກຳປູເຈຍ, ນຳໄປສູ່ຄວາມສຳເລັດຄັ້ງປະຫວັດສາດຂອງຄະນະຜູ້ແທນກິລາຫວຽດນາມ. ກຸນແຈຂອງໄຊຊະນະດັ່ງກ່າວແມ່ນ ບັນດານັກກິລາທີ່ມີສາຍເລືອດ ຫຼາກໂຮ່ງ ກັບຄືນມາຫວຽດນາມດ້ວຍຄວາມປາດຖະໜາສູງສຸດທີ່ຈະເປັນນັກບານບ້ວງມືອາຊີບໃນບ້ານເກີດເມືອງນອນຂອງຕົນ.
ໃນສະພາບການທີ່ປະເທດກຳລັງເຊື່ອມໂຍງສາກົນຢ່າງກວ້າງຂວາງເລິກເຊິ່ງ, ວຽກງານກ່ຽວກັບຊາວຫວຽດນາມຢູ່ຕ່າງປະເທດນັບມື້ນັບມີຄວາມໝາຍສຳຄັນ. ຊຸມຊົນຊາວຫວຽດນາມຢູ່ຕ່າງປະເທດ, ດ້ວຍບົດບາດເພີ່ມຂຶ້ນ ແລະສະຖານະພາບໝັ້ນ ຄົງນັບມື້ນັບສູງຂຶ້ນ, ແມ່ນພາກສ່ວນໜຶ່ງທີ່ຂາດບໍ່ໄດ້ ແລະແມ່ນແຫຼ່ງກຳລັງຂອງປະຊາຄົມບັນດາເຜົ່າຫວຽດນາມ. ຄວາມສາມາບົ່ມຊ້ອນແລະທ່າແຮງຂອງຊຸມຊົນຊາວຫວຽດນາມຢູ່ຕ່າງປະເທດ ຕ້ອງໄດ້ຮັບການເສີມຂະຫຍາຍໃຫ້ມີປະສິດທິຜົນຍິ່ງກວ່າອີກ. ຄຽງຂ້າງນັ້ນ, ໃນຊຸມຊົນຊາວຫວຽດນາມຢູ່ຕ່າງປະເທດ ຍັງມີພາກສ່ວນໜຶ່ງທີ່ມີແນວຄິດຈັດໂພດແລະມີອະຄະຕິຕໍ່ປະເທດ. ສິ່ງດັ່ງກ່າວໄດ້ວາງຄວາມຮຽກຮ້ອງຕ້ອງການສູງຕໍ່ວຽກງານກ່ຽວກັບຊາວຫວຽດນາມຢູ່ຕ່າງປະເທດ ເພື່ອບັນລຸຄວາມປາດຖະໜາຂອງລຸງໂຮ່ ກ່ຽວກັບຄວາມມະຫາສາມັກຄີປວງຊົນທັງຊາດ ຜ່ານຄຳຮຽກຮ້ອງ: “ຜູ້ທີ່ເປັນລູກຫຼານຂອງມັງກອນເທວະດາ / ຈົ່ງສາມັກຄີກັນຢ່າງໄວວາແລະຍືນຍົງ”.
ກ້າວເຂົ້າສູ່ປີ 2020 ດ້ວຍບັນດາເຫດການທີ່ສຳຄັນຂອງຊາດ, ນັ້ນແມ່ນສະເຫຼີມສະຫຼອງ ວັນສ້າງຕັ້ງພັກກອມມູນິດຫວຽດນາມ ຄົບຮອບ 90 ປີ, ວັນຄ້າຍວັນເກີດຂອງປະທານໂຮ່ຈີມິນ ຄົບຮອບ 130 ປີ, ວັນສ້າງຕັ້ງປະເທດຄົບຮອບ 75 ປີ, ວັນປົດປ່ອຍພາກໃຕ້, ໂຮມປະເທດເປັນເອກະພາບຄົບຮອບ 45 ປີ, ດ້ວຍຄວາມຮັບຜິດຊອບທີ່ ສຳຄັນໃນພາກພື້ນແລະສາກົນ, ຫວຽດນາມດຳລົງຕຳແໜ່ງປະທານ ອາຊຽນ, ສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໄລຍະປີ 2020 - 2021, ວຽກງານກ່ຽວກັບຊາວຫວຽດນາມຢູ່ຕ່າງປະເທດ ຕ້ອງສືບຕໍ່ໄດ້ປ່ຽນແປງໃໝ່ ແລະບຸກທະລຸບົນພື້ນຖານໝູນໃຊ້ ແຜນນະໂຍບາຍໃຫຍ່ກ່ຽວກັບມະຫາສາມັກຄີປວງຊົນທັງຊາດ, ປະກອບສ່ວນສ້າງກຳລັງແຮງສົມທົບໃຫ້ແກ່ວຽກງານການຕ່າງປະເທດຂອງພັກແລະລັດຫວຽດນາມໃນໄລຍະມາເຖິງ./.
-------------
1. ລັດຖະທຳມະນູນປີ 2013 ຢືນຢັນ “ຊາວຫວຽດນາມຢູ່ຕ່າງປະເທດແມ່ນພາກສ່ວນນໜຶ່ງທີ່ຂາດບໍ່ໄດ້ ຂອງປະຊາຄົມບັນດາເຜົ່າຫວຽດນາມ. ລັດສາທາລະນະລັດສັງຄົມນິຍົມຫວຽດນາມ ສົ່ງເສີມແລະສ້າງເງື່ອນໄຂອຳນວຍຄວາມສະດວກ ໃຫ້ຊາວຫວຽດນາມທີ່ອາໄສຢູ່ຕ່າງປະເທດ ໄດ້ຮັກສາແລະເສີມຂະຫຍາຍເອກະລັກວັດທະນະທຳຂອງຊາດຫວຽດນາມ, ຮັກສາສາຍພົວພັນສະໜິດແໜ້ນກັບຍາດພີ່ນ້ອງແລະບ້ານເກີດເມືອງນອນ, ປະກອບສ່ວນກໍ່ສ້າງບ້ານເກີດແລະພັດທະນາປະເທດ”.
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 935 (ເດືອນກຸມພາ 2020)