ພິທີສະຫລຸບວຽກງານພິມຈຳໜ່າຍ ແລະ ປະກາດ ບັນດາຜະລິດຕະພັນ ຂອງໂຄງການຮຽບຮຽງ ປະຫວັດສາດ ສາຍພົວພັນພິເສດ ຫວຽດນາມ - ລາວ, ລາວ - ຫວຽດນາມ (1930 - 2007)
ເຂົ້າຮ່ວມພິທີຍັງມີສະຫາຍ ດິງເຖຮວິງ, ກຳມະການກົມການເມືອງ, ຫົວໜ້າຄະນະໂຄສະນາອົບຮົມສູນກາງ. ຝ່າຍສາທາລະນະລັດ ປະຊາທິປະໄຕ ປະຊາຊົນລາວ ມີສະຫາຍ ອູຄຳ ແສງແກ້ວມີໄຊ, ອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ແລະ ບັນດາຜູ້ຕາງໜ້າການນຳຂອງພັກ, ກະຊວງ, ຂະແໜງການສູນກາງ ແລະ ພາກສ່ວນທີ່ກ່ຽວຂ້ອງຕ່າງໆ.
ພາຍຫຼັງການຈັດຕັ້ງຜັນຂະຫຍາຍເປັນເວລາສີ່ກວ່າປີ ດ້ວຍຄວາມເອົາໃຈໃສ່ຊີ້ນຳຢ່າງໃກ້ຊິດຂອງກົມການເມືອງ, ຄະນະ ເລຂາທິການສູນກາງຂອງສອງພັກ, ດ້ວຍຄວາມພະຍາຍາມສູ້ຊົນຂອງບັນດານັກວິທະຍາສາດ, ນັກຄົ້ນຄວ້າ, ການປະກອບສ່ວນ ຢ່າງຕັ້ງໜ້າຂອງບັນດາອະດີດຊ່ຽວຊານ ແລະ ທະຫານອາສາສະໝັກຫວຽດນາມ ທີ່ເຄີຍໄປຊ່ວຍເຫຼືອ ການປະຕິວັດລາວ; ບົນຈິດໃຈຄວາມຮັບຜິດຊອບ, ຄວາມສະເໝີພາບ, ເຄົາລົບເຊິ່ງກັນ ແລະ ກັນຂອງທັງສອງຝ່າຍ, ມາຮອດປັດຈຸບັນ ໂຄງການຮຽບຮຽງ “ປະຫວັດສາດ ສາຍພົວພັນພິເສດ ຫວຽດນາມ-ລາວ, ລາວ-ຫວຽດນາມ ໄລຍະ 1930 - 2007” ກໍ່ໄດ້ສຳເລັດຜົນ. ໂຄງການດັ່ງກ່າວ ແມ່ນໝາກຜົນ ແຫ່ງການຈັດຕັ້ງປະຕິບັດ ຂໍ້ຕົກລົງລະຫວ່າງການນຳສູງສຸດ ຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ເພື່ອແນໃສ່ສະຫລຸບ, ຕີລາຄາ, ລວບລວມ ບັນດາບົດຮຽນປະຫວັດສາດ ກ່ຽວກັບການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ໃນວິວັດທະນາການ ແຫ່ງການປະຕິວັດ ຂອງສອງຊາດ ພາຍໃຕ້ການນຳພາຂອງພັກກອມມູນິດອິນດູຈີນ ໃນເມື່ອກ່ອນ, ພັກກອມມູນິດຫວຽດນາມ, ພັກປະຊາຊົນປະຕິວັດລາວ ໃນປັດຈຸບັນ. ນີ້ເປັນໂຄງການມີຂະໜາດໃຫຍ່ ແບບບໍ່ເຄີຍມີມາກ່ອນ ກ່ຽວກັບປະຫວັດສາດສາຍພົວພັນພິເສດ ຫວຽດນາມ-ລາວ, ລາວ-ຫວຽດນາມ, ທີ່ທັງສອງຝ່າຍຫວຽດນາມ ແລະ ລາວ ໄດ້ສົມທົບກັນຄົ້ນຄວ້າ, ຮຽບຮຽງ. ໂຄງການດັ່ງກ່າວນີ້ ສົມຄູ່ກັບຄວາມສຳຄັນທີ່ສູງສົ່ງ ຂອງສາຍພົວພັນພິເສດ ຫວຽດນາມ - ລາວ, ດັ່ງທີ່ ປະທານ ໂຮ່ຈີມິນ ເຄີຍກ່າວໄວ້ວ່າ: ສອງຊາດລາວ - ຫວຽດ ໄດ້ຝັງຄວາມຮັກຢູ່ໃນໃຈ, ຮົ່ງຮ່າທັງແມ່ຂອງ ກໍ່ບໍ່ເລິກປຸນປານໄດ້; ຕອບສະ ໜອງໄດ້ຕາມຈິດໃຈທີ່ກົມການເມືອງສອງພັກໄດ້ວາງອອກ.
ໂຄງການ “ປະຫວັດສາດສາຍພົວພັນພິເສດຫວຽດນາມ-ລາວ, ລາວ-ຫວຽດນາມ ໄລຍະ 1930-2007” ລວມມີ ຫົກຜະລິດຕະພັນ: ຜະລິດຕະພັນຕົ້ນຕໍ; ເອກະສານພັກ ແລະ ລັດ; ບັນທຶກເຫດການ; ບັນທຶກຄວາມຊົງຈຳ (ບົດຂຽນຂອງ ຜູ້ນຳພັກ, ລັດ; ບັນທຶກຄວາມຊົງຈຳ ຂອງບັນດາຊ່ຽວຊານ ແລະ ທະຫານອາສາສະໝັກຫວຽດນາມ ຊ່ວຍການປະຕິວັດລາວ ຜ່ານແຕ່ລະສະໄໝ); ປຶ້ມຮູບພາບ ແລະ ຮູບເງົາເອກະສານ “ບົດເພງວິລະຊົນແຫ່ງການພົວພັນຫວຽດ - ລາວ”.
ໂຄງການ “ປະຫວັດສາດສາຍພົວພັນພິເສດຫວຽດນາມ-ລາວ, ລາວ-ຫວຽດນາມ ໄລຍະ 1930-2007” ເວົ້າລວມ ແລະ ບັນດາຜະລິດຕະພັນຕ່າງໆ ເວົ້າສະເພາະ ແມ່ນລ້ວນແຕ່ບັນລຸໄດ້ ຄຸນຄ່າທາງວິທະຍາສາດ, ການເມືອງ, ແນວຄິດ ແລະ ມີຄວາມໝາຍປະຫວັດສາດ ອັນໃຫຍ່ຫຼວງ, ປະກອບສ່ວນຕົວຈິງ ເຂົ້າໃນການໂຄສະນາ, ສຶກສາ, ຍົກສູງຄວາມຮັບຮູ້ໃຫ້ແກ່ພະນັກງານ, ສະມາຊິກພັກ ແລະ ປະຊາຊົນ, ໂດຍສະເພາະແມ່ນຕໍ່ກັບຄົນຮຸ້ນໜຸ່ມນ້ອຍ; ພ້ອມກັນນັ້ນ, ກໍ່ປະກອບສ່ວນ ຍົກສູງສະຕິໃນການຮັກສາ, ເພີ່ມພູນຄູນສ້າງ ແລະ ຂະຫຍາຍສາຍພົວພັນອັນດີງາມ, ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ ແລະລາວ ໄປຕະຫຼອດກາລະນານ; ຕໍ່ສູ້ຕ້ານການໃສ່ຮ້າຍປ້າຍສີ, ບິດເບືອນປະຫວັດສາດ ຂອງບັນດາອິດທິກຳລັງປໍລະປັກ ທີ່ມີອຸບາຍແບ່ງແຍກນ້ຳໃຈສາມັກຄີ ຂອງປະຊາຊົນສອງຊາດຫວຽດນາມ, ລາວອ້າຍນ້ອງ.
ພາຍຫຼັງທີ່ສຳເລັດການຮຽບຮຽງ ແລະ ຈັດຕັ້ງຮັບຮອງໂຄງການ, ບັນດາພາກສ່ວນທີ່ກ່ຽວຂ້ອງຂອງສອງປະເທດ ກໍ່ໄດ້ ສົມທົບຢ່າງແໜ້ນແຟ້ນໃນການແປ, ຮຽບຮຽງ ແລະ ຈັດພິມເປັນສາມພາສາ: ຫວຽດນາມ, ລາວ ແລະ ອັງກິດ; ຈັດຕັ້ງການຈຳໜ່າຍ ຢ່າງກວ້າງຂວາງແຕ່ສູນກາງ ລົງຮອດບັນດາທ້ອງຖິ່ນ, ບັນດາອົງການເກັບສຳເນົາ, ຫໍສະໝຸດ, ໂຮງຮຽນ ແລະ ເພື່ອນຜູ້ອ່ານຢູ່ທັງສອງປະເທດ.
ສະຫາຍ ອູຄຳ ແສງແກ້ວມີໄຊ, ອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ, ໄດ້ກ່າວຄຳເຫັນໂດຍເນັ້ນໜັກ ວ່າ: ພັກ ແລະ ລັດຖະບານແຫ່ງ ສປປ ລາວ ຕີລາຄາສູງ ຕໍ່ໝາກຜົນຂອງໂຄງການດັ່ງກ່າວ. ໂຄງການໄດ້ສະແດງ ໃຫ້ເຫັນເຖິງຄວາມເອົາໃຈໃສ່ຢ່າງເລິກເຊິ່ງ ຂອງສອງພັກ, ສອງລັດ ໃນການເພີ່ມພູນຄູນສ້າງ ສາຍພົວພັນພິເສດຫວຽດນາມ - ລາວ; ຜະລິດຕະພັນຂອງໂຄງການ ເປັນຂໍ້ມູນຫຼັກຖານ ທາງປະຫວັດສາດທີ່ສຳຄັນ, ເປັນແຫຼ່ງຂໍ້ມູນຂ່າວສານເພື່ອໂຄສະນາ, ສຶກສາອົບຮົມໃຫ້ແກ່ຄົນຮຸ້ນຫຼັງ ກ່ຽວກັບສາຍພົວພັນທີ່ບໍລິສຸດພຸດຜ່ອງ ລະຫວ່າງຫວຽດນາມ - ລາວ ທີ່ໄດ້ຮັບການສ້າງຂຶ້ນ, ເພີ່ມພູນຄູນສ້າງ ແລະ ຜ່ານການທົດສອບດ້ວຍການລະເວລາ.
ກ່າວຄຳປາໄສຢູ່ໃນພິທີສະຫລຸບດັ່ງກ່າວ, ປະທານປະເທດຫວຽດນາມ ເຈືອງເຕິນຊາງ ໄດ້ເນັ້ນໜັກຄວາມໝາຍຂອງການ ປະກາດບັນດາຜະລິດຕະພັນໂຄງການ ທ່າມກາງບັນຍາກາດທົ່ວພັກ ແລະ ທົ່ວປວງຊົນທັງສອງປະເທດພວມຟົດຟື້ນຈັດຕັ້ງ ການເຄື່ອນໄຫວຫຼາຍຢ່າງ ເນື່ອງໃນ “ປີແຫ່ງຄວາມສາມັກຄີມິດຕະພາບຫວຽດນາມ - ລາວ 2012”, ຂ່ຳນັບຕ້ອນຮັບງານສະເຫຼີມ ສະຫຼອງ 50 ປີວັນສ້າງສາຍພົວພັນການທູດ ແລະ 35 ປີວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ. ປະທານປະເທດ ສະເໜີໃຫ້ບັນດາພາກສ່ວນທີ່ກ່ຽວຂ້ອງຂອງສອງພັກ, ສອງປະເທດ ໃນຕໍ່ໜ້າຕ້ອງສຸມໃສ່ບາງວຽກງານດັ່ງນີ້:
ໜຶ່ງ, ສືບຕໍ່ຄົ້ນຄວ້າ, ເພີ່ມເຕີມບັນດາເຫດການ, ພະຍານປະຫວັດສາດ, ບັນດາເນື້ອໃນວິທະຍາສາດໃໝ່, ເຮັດໃຫ້ບັນດາ ບັນຫາທິດສະດີ ແລະ ພຶດຕິກຳກ່ຽວກັບການພົວພັນພິເສດລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຍິ່ງເລິກເຊິ່ງຕື່ມອີກ. ເຮັດໃຫ້ບັນດາເຫດການ, ວິທີການບັນຍາຍ, ການແປໃຫ້ຖືກຕ້ອງ ຊັດເຈນ ເພື່ອໃຫ້ໂຄງການຮັບການຈັດພິມຄືນໃໝ່ ໃນຕໍ່ໜ້າ ມີຄຸນນະພາບດີກວ່າເກົ່າ, ບໍລິບູນກວ່າເກົ່າ, ສົມຄູ່ກັບລະດັບ, ຄວາມໝາຍປະຫວັດສາດແຫ່ງການພົວພັນສອງ ປະເທດຫວຽດນາມ - ລາວ.
ສອງ, ສືບຕໍ່ຈັດຕັ້ງໂຄສະນາຢ່າງກວ້າງຂວາງໃນຖັນແຖວພະນັກງານ, ສະມາຊິກພັກ ແລະ ປະຊາຊົນສອງປະເທດກ່ຽວກັບ ເນື້ອໃນ ແລະ ຜົນສຳເລັດຂອງໂຄງການ, ຖືສິ່ງດັ່ງກ່າວເປັນການຕອບແທນບຸນຄຸນບັນດາວິລະຊົນຜູ້ເສຍສະຫຼະ, ບັນດາຮູ້ນຄົນ ປະຕິວັດທີ່ໄດ້ເສຍສະຫຼະເລືອດເນື້ອ ເພື່ອສ້າງສາຍພົວພັນພິເສດຫວຽດນາມ - ລາວ ໃນປັດຈຸບັນ; ພ້ອມກັນນັ້ນ, ກໍ່ສືບຕໍ່ເພີ່ມ ພູມຄູນສ້າງນ້ຳໃຈມິດຕະພາບດັ່ງກ່າວໃນໄລຍະໃໝ່.
ສາມ, ຄົ້ນຄວ້າບັນດາເນື້ອໃນທີ່ເໝາະສົມ, ຈັດຕັ້ງການສື່ຂ່າວເຜີຍແຜ່ກວ້າງຂວາງໃຫ້ເພື່ອນມິດສາກົນ ຮູ້ດີກ່ຽວກັບ ປະຫວັດສາດສາຍພົວພັນພິເສດຫວຽດນາມ - ລາວ.
ສີ່, ນຳເອົາເນື້ອໃນ, ຜົນສຳເລັດຂອງໂຄງການເຂົ້າໃນຫຼັກສູດການສອນ ຢູ່ໃນໂຮງຮຽນຂອງສອງປະເທດ ເພື່ອສຶກສາອົບຮົມ ຄົນຮູ້ນໜຸ່ມກ່ຽວກັບປະຫວັດສາດສາຍພົວພັນພິເສດຫວຽດນາມ - ລາວ.
ຫ້າ, ທຸກຂັ້ນ, ທຸກຂະແໜງການ, ພິເສດແມ່ນບັນດານັກວິທະຍາສາດ ຕ້ອງສືບຕໍ່ຄົ້ນຄວ້າພຶດຕິກຳຕົວຈິງ, ສະຫລຸບດ້ານ ທິດສະດີໃນແຕ່ລະຂົງເຂດ ເພື່ອປະກອບສ່ວນເຂົ້າໃນເນື້ອໃນປະຫວັດສາດ,ເອກະສານພັກ, ພິເສດແມ່ນການສ້າງ ແນວທາງການຕ່າງປະເທດທີ່ເໝາະສົມ ໃນເງື່ອນໄຂໃໝ່ ເພື່ອເສີມຂະຫຍາຍມູນເຊື້ອ, ຊຸກຍູ້ການພົວພັນຫວຽດນາມ - ລາວ ໃຫ້ຂະຫຍາຍ ຕົວຢ່າງຈົບງາມກວ່າເກົ່າໃນໄລຍະຕໍ່ໄປ.
ໂດຍ ດຶກຄາ