ຂະຫຍາຍສາຍພົວພັນພິເສດ ຫວຽດນາມ - ລາວ ເຂົ້າສູ່ລວງເລິດ ແລະ ມີປະສິດທິຜົນສູງ
ວ.ກ. ອອນໄລ - ໂດຍໄດ້ຮັບຄຳເຊີນຂອງ ສະຫາຍເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ຫງວຽນຝູຈ້ອງ ແລະ ພັນລະຍາ, ສະຫາຍປະທານປະເທດ ເຈືອງເຕິນຊາງ ແລະ ພັນລະຍາ, ຕອນເຊົ້າວັນທີ 26 ທັນວາ 2012, ສະຫາຍ ຈູມມາລີ ໄຊຍະສອນ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊັນ ປະຕິວັດລາວ, ປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ແລະ ພັນລະຍາ ພ້ອມດ້ວຍຄະນະຜູ້ແທນຂັ້ນສູງ ພັກ-ລັດ ລາວ ໄດ້ເລີ່ມຕົ້ນການຢ້ຽມຢາມສັນຖະວະໄມຕີ ສາທາລະນະລັດ ສັງຄົມນິຍົມຫວຽດນາມ ຢ່າງເປັນທາງການ.
ໃນພິທີຮັບຕ້ອນຄະນະ, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ສະແດງຄວາມຂ່ຳນັບຊົມເຊີຍຢ່າງສຸດອົກສຸດໃຈ ຕໍ່ຜົນສຳເລັດອັນສຳຄັນຕ່າງໆ ທີ່ພັກ ລັດ ແລະ ປະຊາຊົນລາວອ້າຍນ້ອງ ຍາດມາໄດ້ໃນສອງປີທີ່ຜ່ານມາ ພາຍຫຼັງການຜັນຂະຫຍາຍປະຕິບັດ ມະຕິກອງປະຊຸມໃຫຍ່ຄັ້ງທີ IX ຂອງພັກ ແລະ ແຜນການພັດທະນາເສດຖະກິດ - ສັງຄົມ 5 ປີຄັ້ງທີ VII; ພີເສດແມ່ນ ການທີ່ລາວຫາກໍ່ຈັດຕັ້ງສຳເລັດເປັນຢ່າງດີທີ່ສຸດ ກອງປະຊຸມຂັ້ນສູງ ອາຊີ - ເອີຣົບ ຄັ້ງທີ 9 (ASEM-9), ບັນດາກອງປະຊຸມກ່ຽວຂ້ອງທີ່ຜ່ານມາ, ແລະ ການທີ່ລາວໄດ້ກາຍເປັນສະມາຊິກເປັນທາງການ ຂອງອົງການການຄ້າໂລກ (WTO).
ສະຫາຍເລຂາທິການໃຫຍ່, ປະທານປະເທດ, ຈູມມາລີ ໄຊຍະສອນ ໄດ້ຕີລາຄາສູງ ຕໍ່ຜົນງານອັນສຳຄັນຕ່າງໆ ທີ່ພັກ ລັດ ແລະ ປະຊາຊົນຫວຽດນາມ ຍາດມາໄດ້ໃນສອງປີທີ່ຜ່ານມາ ພາຍຫຼັງການຜັນຂະຫຍາຍການປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນການພັດທະນາເສດຖະກິດ - ສັງຄົມ 5 ປີ 2011 – 2015, ພີເສດແມ່ນ ຄວາມຕັ້ງໜ້າພະຍາຍາມ ແລະ ຜົນງານ ໃນການຮັກສາສະຖຽນລະພາບຂອງເສດຖະກິດມະຫາພາກ ແລະ ພັດທະນາເສດຖະກິດ - ສັງຄົມ.
ສອງຝ່າຍໄດ້ສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ການສະໜັບສະໜູນ ຊ່ວຍເຫຼືອຢ່າງມີປະສິດທິຜົນ ທີ່ພັກ ລັດ ແລະ ປະຊາຊົນສອງປະເທດ ໄດ້ຊ່ວຍເຫຼືອໃຫ້ແກ່ກັນ ໃນຕະຫຼອດຂະບວນວິວັດການຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບ ກ່ອນໜ້ານີ້, ກໍ່ຄືໃນພາລະກິດການປ່ຽນແປງໃໝ່ ສ້າງສາພັດທະນາປະເທດ ແລະ ປົກປັກຮັກສາປະເທດຊາດ ໃນປັດຈຸບັນ; ສອງຝ່າຍພ້ອມກັນສະແດງຄວາມເຊື່ອໝັ້ນຢ່າງໜັກແໜ້ນວ່າ ປະຊາຊົນສອງປະເທດຈະສືບຕໍ່ຍາດໄດ້ຜົນສຳເລັດໃໝ່ ໃຫຍ່ຫຼວງກວ່າອີກ ໃນການປ່ຽນແປງໃໝ່ ປົກປັກຮັກສາແລະສ້າງສາປະເທດ, ປະຕິບັດບັນດາຈຸດໝາຍແລະໜ້າທີ່ ທີ່ກອງປະຊຸມໃຫຍ່ຂອງພັກວາງອອກ ຢ່າງສຳເລັດມີໄຊ. ພິເສດແມ່ນ ສອງຝ່າຍໄດ້ແລກປ່ຽນວິທີການ ມາດຕະການຈຳນວນໜຶ່ງ ເພື່ອແນໃສ່ປະສານສົມທົບກັນຢ່າງແໜ້າແຟ້ນ ໃນວິວັດການຜັນຂະຫຍາຍ ແຜນຍຸດທະສາດການພັດທະນາ ຂອງແຕ່ລະປະເທດ ແລະ ພ້ອມກັນຕັ້ງໜ້າພະຍາຍາມຍົກສູງຄຸນນະພາບ ປະສິທິຜົນການພົວພັນຮ່ວມມື, ໂດຍສະເພາະແມ່ນ ໃນຂົງເຂດເສດຖະກິດ, ຜັນຂະຫຍາຍປະຕິບັດຢ່າງມີປະສິດທະຜົນ ບັນດາຂໍ້ຕົກລົງຂັ້ນສູງລະຫວ່າງສອງພັກ ສອງລັດ.
ສອງສະຫາຍຜູ້ນຳຂອງສອງຝ່າຍ ໄດ້ເນັ້ນໜັກເຖິງການເຄື່ອນໄຫວຕ່າງໆ ຄື: ຕ້ອງເປັນເຈົ້າການຕັ້ງໜ້າປະຕິບັດສັນຍາຮ່ວມມື 5 ປີ 2011 – 2015, ສັນຍາຮ່ວມມືລະຫວ່າງສອງລັດຖະບານ ທາງດ້ານເສດຖະກິດ ວັດທະນະທຳ ການສຶກສາ ວິທະຍາສາດ-ເຕັກໂນໂລຊີ ປີ 2013, ຜັນຂະຫຍາຍຢ່າງມີປະສິດທິຜົນ ໂຄງການຍຸດທະສາດການຮ່ວມມືຫວຽດນາມ - ລາວ ຢູ່ທີ່ແຂວງຫົວພັນ ແລະ ແຂວງຊຽງຂວາງ, ຍູ້ແຮງການດຳເນີນປະຕິບັດບັນດາໂຄງການຮ່ວມມືລົງທຶນຢູ່ລາວ, ປະສານສົມທົບກັນຈັດຕັ້ງການສຳຫຼວດກວດຄືນ, ຕີລາຄາປະສິດທິຜົນ ຂອງບັນດາໂຄງການຮ່ວມມືລົງທຶນ, ປັນຕົ້ນແມ່ນ ໃນຂົງເຂດການຂຸດຄົ້ນແຮ່ທາດ ແລະ ພະລັງງານໄຟຟ້າ ໃນເວລາທີ່ຜ່ານມາ ເພື່ອຈະມີການດັດສົມ ໃຫ້ສອດຄ່ອງກັບ ຄວາມຕ້ອງການພັດທະນາ ຂອງສອງປະເທດ; ເນັ້ນໜັກເຖິງຄວາມຕ້ອງການມີກົນໄກ ນະໂຍບາຍພິເສດ ເພື່ອດຶງດູດການລົງທຶນ ຂອງບັນດາວິສາຫະກິດ ໃນເຂດສີ່ຫຼ່ຽມພັດທະນາ, ເພີ່ມທະວີການປະສານສົມທົບຢ່າງແໜ້ນແຟ້ນ ລະຫວ່າງສອງປະເທດ ກໍ່ຄືກັບບັນດາຝ່າຍອື່ນ ໃນກອບການຮ່ວມມືອະນຸພູມພາກລຸ່ມແມ່ນ້ຳຂອງ, ເປັນຕົ້ນແມ່ນການຄຸ້ມຄອງ ແລະ ນຳໃຊ້ຢ່າງມີປະສິດທິຜົນ ແຫຼ່ງນ້ຳ ຂອງແມ່ນ້ຳຂອງ, ເສັ້ນທາງລະບຽງເສດຖະກິດແນວຕາເວັນອອກ - ຕາເວັນຕົກ (East-West Economi Corridor: EWEC) ແລະ ບັນດາໂຄງການ ກິດຈະການຮ່ວມມືຜະຫຸພາຄີອື່ນໆ.
ສອງຝ່າຍເນັ້ນໜັກເຖິງຄວາມຕ້ອງການສືບຕໍ່ເພີ່ມທະວີການພົວພັນທາງການເມືອງ, ພົບປະຂັ້ນສຸດຍອດ; ລົງເລິກເຂົ້າໃນການແລກປ່ຽນ ຂໍ້ມູນຂ່າວສານ ບົດຮຽນ, ເປັນຕົ້ນແມ່ນ ບັນດາບັນຫາທິດສະດີ ແລະ ພຶດຕິກຳ ກ່ຽວກັບການກໍ່ສ້າງພັກ, ການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ; ປະສານສົມທົບກັນຍູ້ແຮງການໂຄສະນາ ອົບຮົມສຶກສາ ໃຫ້ບັນດາຊັ້ນຄົນປະຊາຊົນ, ເປັນຕົ້ນແມ່ນຮຸ້ນຊາວໜຸ່ມ ກ່ຽວກັບສາຍພົວພັນພິເສດຫວຽດນາມ - ລາວ ໃນໄລຍະໃໝ່, ເຊິ່ງໃນນັ້ນ ເອົາໃຈໃສ່ເປັນພິເສດເຖິງການໂຄສະນາ ອົບຮົມສຶກສາດ້ວຍຫຼາຍຮູບການ ກ່ຽວກັບບັນດາເນື້ອໃນຂອງໂຄງການປະຫວັດສາດສາຍພົວພັນພິເສດຫວຽດນາມ - ລາວ, ລາວ - ຫວຽດນາມ ; ເພີ່ມທະວີການຮ່ວມມືດ້ານການສຶກສາ - ກໍ່ສ້າງພັດທະນາແຫຼ່ງບຸກຄະລາກອນ, ຖືວ່າຂົງເຂດນີ້ແມ່ນໜຶ່ງໃນບັນດາຂົງເຂດໄດ້ຮັບບູລິມະສິດອັນດັບໜຶ່ງ, ສ້າງຮາກຖານໃຫ້ແກ່ການປັບປຸງສາຍພົວພັນພິເສດ ໝັ້ນຄົງຂະໜົງແກ່ນ ລະຫວ່າງສອງປະເທດ.
* ໃນຕອນເຊົ້າວັນດຽວກັນ ທີ 26 ທັນວາ 2012 ນັ້ນ, ຢູ່ທີ່ທຳນຽບປະທານ, ສະຫາຍປະທານປະເທດ ເຈືອງເຕິນຊາງ ໄດ້ພົບປະຫາລືກັບສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ, ຈູມມາລີ ໄຊຍະສອນ ທີ່ກຳລັງຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການ.
ໃນການພົບປະຫາລື, ສະຫາຍປະທານປະເທດ ເຈືອງເຕິນຊາງ ໄດ້ເນັ້ນໜັກວ່າ ໃນປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ, ບັນດາກະຊວງ ຄະນະກຳມະການ ຂະແໜງການ ແລະ ທ້ອງຖິ່ນຕ່າງໆຂອງສອງປະເທດ ໄດ້ຕອບສະໜອງຢ່າງຕັ້ງໜ້າ, ປະສາມສົມທົບກັນຢ່າງແໜ້ນແຟ້ນ ໃນການຈັດຕັ້ງການເຄື່ອນໄຫວຕ່າງໆ ເພື່ອສະເຫຼີມສະຫຼອງ ຂ່ຳນັບຮັບຕ້ອນ ວັນສ້າງຕັ້ງສາຍພົວພັນການທູດ ລະຫວ່າງສອງປະເທດ ຄົບຮອບ 50 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມືລະຫວ່າງຫວຽດນາມ - ລາວ ຄົບຮອບ 35 ປີ, ສະແດງໃຫ້ເຫັນເຖິງສາຍພົວພັນມິດຕະພາບ ອັນເປັນມູນເຊື້ອ, ນ້ຳໃຈສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ - ລາວ, ອັນໄດ້ສ້າງສັນຍາລັກປະທັບໃຈ ປະກອບສ່ວນປັບປຸງ ແລະ ຂະຫຍາຍຕື່ມອີກ ສາຍພົວພັນອັນດີງາມທີ່ມີມາແຕ່ເດີມ ລະຫວ່າງສອງປະເທດ. ບັນດາການເຄື່ອນໄຫວສະເຫຼີມສະຫຼອງມູນເຊື້ອ, ການແລກປ່ຽນ, ການຮ່ວມມືຢ່າງແທດຈິງ ແລະ ມີຄວາມໝາຍເລິກເຊິ່ງ ໃນປີສາມັກຄີມິດຕະພາບ ໄດ້ມີກຳລັງແຮງແຜ່ກວ້າງອອກຢ່າງແຂງແຮງ ໃນປະຊາຊົນສອງປະເທດ, ພິເສດແມ່ນ ໄດ້ຊ່ວຍໃຫ້ຮຸ້ນຊາວໜຸ່ນເຂົ້າໃຈຢ່າງເລິກເຊິ່ງກວ່າອີກ ກ່ຽວກັບສາຍພົວພັນສະໜິດແໜ້ນ, ຕະຫຼອດກາລະນານ ລະຫວ່າງຫວຽດນາມ - ລາວ, ຈາກນັ້ນ ກໍ່ເຫັນແຈ້ງກວ່າອີກ ກ່ຽວກັບໜ້າທີ່ຮັບຜິດຊອບ ແລະ ມີສະຕິພິທັກຮັກສາ ເສີມຂະຫຍາຍສາຍພົວພັນສະໜິດແໜ້ນ ສະເໝີຕົ້ນສະເໝີປາຍນັ້ນ ຢ່າງຕະຫຼອດການ ໃຫ້ຮຸ້ນຄົນລຸນຫຼັງ.
ສະຫາຍປະທານປະເທດຢັ້ງຢືນວ່າ ຫວຽດນາມຍາມໃດກໍຖືເປັນສຳຄັນພິເສດ ແລະ ໃຫ້ບູລິມະສິດສູງສຸດແກ່ການປັບປຸງ ແລະ ເພີ່ມທະວີສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານກັບ ສປປ ລາວ; ຢືນຢັນວ່າ ຈະຊີ້ນຳໆພາຢ່າງໃກ້ຊິດຕິດແທດ ແລະ ສ້າງເງື່ອນໄຂອຳນວຍຄວາມສະດວກທຸກຢ່າງໃຫ້ບັນດາກະຊວງ ຄະນະກຳມະການ ຂະແໜງການສູນກາງ, ບັນດາທ້ອງຖິ່ນ ຜັນຂະຫຍາຍການປະຕິບັດຢ່າງຕັ້ງໜ້າ ບັນດາຂໍ້ຕົກລົງລະຫວ່າງການນຳຂັ້ນສູງ ຂອງສອງປະເທດ.
ສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ຢັ້ງຢືນວ່າ ພັກ ລັດ ແລະ ປະຊາຊົນລາວ ຈະສືບຕໍ່ຕັ້ງໜ້າພະຍາຍາມຈົນສຸດຄວາມສາມາດຂອງຕົນ ເພື່ອພ້ອມກັນກັບພັກ ລັດ ປະຊາຊົນຫວຽດນາມ ເຮັດໃຫ້ສາຍພົວພັນມິດຕະພາບ ອັນເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ - ຫວຽດນາມ ນັບມື້ນັບອຸດົມສົມບູນ ເລິກເຊິ່ງ ແລະ ພັດທະນາເຂົ້າສູ່ລວງເລິກ.
ພາຍຫຼັງການພົບປະຫາລື, ສະຫາຍປະທານປະເທດ ເຈືອງເຕິນຊາງ ແລະ ສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ໄດ້ພ້ອມກັນຈັດຕັ້ງກອງປະຊຸມນັກຂ່າວ ເພື່ອປະກາດປິດປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2012.
* ໃນວັນທີ 26 ທັນວາ 2012 ດຽວກັນນັ້ນ, ຢູ່ທີ່ທຳນຽບລັດຖະບານ, ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ໄດ້ພົບປະຫາລືກັບສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ, ຈູມມາລີ ໄຊຍະສອນ.
ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ຢັ້ງຢືນວ່າ ຫວຽດນາມຍາມໃດກໍຖືເປັນສຳຄັນພິເສດ ແລະ ໃຫ້ບູລິມະສິດສູງສຸດ ແກ່ການປັບປຸງ ແລະ ເພີ່ມທະວີສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານກັບ ສປປ ລາວ. ສະຫາຍຍັງເນັ້ນໜັກວ່າ ພາຍໃຕ້ການນຳພາຂອງສະຫາຍ ຈູມມາລີ ໄຊຍະສອນ ແລະ ຄະນະບໍລິຫານງານ ສູນກາງພັກ ປປ ລາວ, ປະຊາຊົນລາວຈະສືບຕໍ່ຍາດໄດ້ຜົນສຳເລັດໃໝ່ທີ່ໃຫຍ່ຫຼວງກວ່າອີກ, ປະຕິບັດມະຕິ ກອງປະຊຸມໃຫຍ່ຄັ້ງທີ IX ຂອງພັກ ແລະ ແຜນການພັດທະນາເສດຖະກິດ - ສັງຄົມ 5 ປີ ຄັ້ງທີ່ VII ຢ່າງສຳເລັດມີໄຊ.
ສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ຕີລາຄາສູງບັນດາຜົນງານການຮ່ວມມືຮອບດ້ານ ໃນເວລາທີ່ຜ່ານມາ ລະຫວ່າງລັດຖະບານສອງປະເທດ, ໃນນັ້ນມີການປະກອບສ່ວນລະອຽດຕົວຈິງ ຂອງຄະນະກຳມາທິການຮ່ວມມືນ ຂອງສອງປະເທດ; ສະຫາຍຍັງໄດ້ສະແດງຄວາມເຊື່ອຖືຢ່າງໜັກແໜ້ນວ່າ ພາຍໃຕ້ການນຳພາ ຂອງລັດຖະບານສອງປະເທດ ການຮ່ວມມືຮອບດ້ານລະຫວ່າງສອງປະເທດ ຈະສືບຕໍ່ຂະຫຍາຍຕົວເຂົ້າສູ່ລວງເລິກ, ປະກອບສ່ວນປະຕິບັດຈຸດໝາຍການຮ່ວມື ແລະ ແຜນການພັດທະນາຂອງສອງປະເທດຢ່າງສຳເລັດມີໄຊ.
ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ແລະ ສະຫາຍເລຂາທິການໃຫຍ່, ປະທານປະເທດ ແຫ່ງ ສປປ ລາວ, ຈູມມາລີ ໄຊຍະສອນ ໄດ້ເປັນເອກະພາບກັນວ່າ ສອງປະເທດຈະສືບຕໍ່ຕັ້ງໜ້າພະຍາຍາມກວ່າອີກ ເພື່ອຂະຫຍາຍສາຍພົວພັນຮ່ວມມື ມິດຕະພາບ ອັນເປັນມູນເຊື້ອ ຮອບດ້ານໃນທຸກໆຂົງເຂດ ລະຫວ່າງສອງປະເທດ.
* ຕອນບ່າຍວັນທີ 26 ທັນວາ 2012, ຢູ່ທີ່ທຳນຽບສະພາແຫ່ງຊາດ, ສະຫາຍປະທານສະພາແຫ່ງຊາດ ຫງວຽນຊິງຮູ່ງ ໄດ້ພົບປະຫາລືກັບສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ, ຈູມມາລີ ໄຊຍະສອນ.
ສະຫາຍປະທານສະພາແຫ່ງຊາດ ຫງວຽນຊິງຮູ່ງ ຢັ້ງຢືນວ່າ ການມາຢ້ຽມຢາມ ສສ ຫວຽດນາມ ຂອງສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ໃນຄັ້ງນີ້ ໄດ້ສະແດງໃຫ້ເຫັນເຖິງຄວາມເປັນເອກະພາບສູງ ກ່ຽວກັບການສືບຕໍ່ເພີ່ມທະວີຄວາມສາມັກຄີພິເສດ ລະຫວ່າງສອງພັກ ສອງລັດ ແລະ ປະຊາຊົນສອງປະເທດຫວຽດນາມ - ລາວ. ສະຫາຍປະທານສະພາແຫ່ງຊາດ ຫງວຽນຊິງຮູ່ງ ໄດ້ລາຍງານກ່ຽວກັບໝາກຜົນການຮ່ວມມືຢ່າງແໜ້ນແຟ້ນ ແລະ ມີປະສິດທິຜົນສູງ ລະຫວ່າງສະພາແຫ່ງຊາດຂອງສອງປະເທດ ໃນເວລາທີ່ຜ່ານມາ.
ສະຫາຍເລຂາທິການໃຫຍ່, ປະທານປະເທດ ແຫ່ງ ສປປ ລາວ, ຈູມມາລີ ໄຊຍະສອນ ສະແດງຄວາມດີອົກດີໃຈ ທີ່ໄດ້ມາຢ້ຽມຢາມຫວຽດນາມ ອີກເທື່ອໜຶ່ງ; ສະຫາຍຕີລາຄາສູງການຮ່ວມື ຜູກພັນສະໜິດແໜ້ນ ແລະ ມີປະສິດທິຜົນ ລະກວ່າງສະພາແຫ່ງຊາດ ຂອງສອງປະເທດ, ໃນນັ້ນມີການຮ່ວມມືຂອງບັນດາອົງການພາລະບົດບາດ, ບັນດາການເຄື່ອນໄຫວ ແລກປ່ຽນຄະນະຜູ້ແທນ ລະຫວ່າງສອງສະພາແຫ່ງຊາດ; ສະແດງຄວາມຂອບອົກຂອບໃຈຢ່າງຈິງໃຈ ຕໍ່ສະພາແຫ່ງຊາດຫວຽດນາມ ທີ່ໄດ້ປະສານສົມທົບຢ່າງແໜ້ນແຟ້ນ ແລະ ຊ່ວຍເຫຼືອລາວ ໃນຂະບວນວິວັດການກະກຽມ ແລະ ຈັດຕັ້ງຢ່າງສຳເລັດຜົນ ກອງປະຊຸມບັນດາຄູ່ຮ່ວມ ສະພາແຫ່ງຊາດ ອາຊີ - ເອີຣົບ ຄັ້ງທີ່ 7 (ASEP - 7).
ສະຫາຍເລຂາທິການໃຫຍ່, ປະທານປະເທດ ແຫ່ງ ສປປ ລາວ ຈູມມາລີ ໄຊຍະສອນ ແລະ ສະຫາຍປະທານສະພາແຫ່ງຊາດ ຫງວຽນຊິງຮູ່ງ ພ້ອມກັນຢັ້ງຢືນຜົນສຳເລັດຂອງ ປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2012 ຊຶ່ງໄດ້ສະແດງໃຫ້ເຫັນຢ່າງມີຊີວິດຊີວາ ເຖິງຄວາມພະຍາຍາມຂອງສອງຝ່າຍ ໃນການພິທັກຮັກສາ ແລະ ສ້າງບາດກ້າວຫັນປ່ຽນອັນສຳຄັນທາງດ້ານຄວາມຮັບຮູ້ຂອງບັນດາຂັ້ນ ກະຊວງ ຄະນະກຳມະການ ຂະແໜງການ ທ້ອງຖິ່ນຕ່າງໆ ແລະ ປະຊາຊົນຂອງສອງປະເທດ, ຊາບຊືມເລິກເຊິ່ງກວ່າອີກ ກ່ຽວກັບຄວາມໝາຍອັນໃຫຍ່ຫຼວງ ຂອງການປັບປຸງ ແລະ ພັດທະນາຢ່າງບໍ່ຢຸດຢັ້ງ ສາຍພົວພັນພິເສດຫວຽດນາມ - ລາວ, ລາວ - ຫວຽດນາມ ໃນສະພາບການໃໝ່; ພ້ອມກັນລຶ້ມຄືນມູນເຊື້ອແຫ່ງການຮ່ວມສຳພັນສູ້ຮົບແບບພິເສດ ຫວຽດນາມ - ລາວ ໃນພາລະກິດການຕໍ່ສູ້ປົດປ່ອຍຊາດ ກໍຄືການສະໜັບສະໜູນ ຊ່ວຍເຫຼືອຊຶ່ງກັນແລະກັນ ຢ່າງສຸດອົກສຸດໃຈ ລະຫວ່າງສອງພັກ, ປະຊາຊົນສອງປະເທດ ໃນພາລະກິດການສ້າງສາ ແລະ ພັດທະນາຢູ່ແຕ່ລະປະເທດ ໃນຊຸມປີທີ່ຜ່ານມາ; ຢັ້ງຢືນຄວາມຕັດສິນໃຈສືບຕໍ່ຕັ້ງໜ້າພະຍາຍາມເພີ່ມພູນຄູນສ້າງ ສາຍພົວພັນມິດຕະພາບພິເສດ ອັນເປັນມູນເຊື້ອ ລະຫວ່າງສອງສະພາແຫ່ງຊາດ ແລະ ປະຊາຊົນສອງປະເທດຫວຽດນາມ - ລາວ ໃຫ້ຂະຫຍາຍຕົວເລິກເຊິ່ງ ແລະ ຮອບດ້ານກວ່າອີກໃນເວລາຕໍ່ໜ້າ./.
ໂດຍ: PV/TTXVN