ອົງການນິຕິບັນຍັດ ຫວຽດນາມ-ລາວ-ກຳປູເຈຍ ຮ່ວມມືກັນ
ວ.ກ.ອອນໄລ - ແຕ່ວັນທີ 23 ຮອດວັນທີ 26 ມີນາ 2013, ຄະນະຜູ້ແທນສະພາແຫ່ງຊາດຫວຽດນາມ ໄດ້ເຂົ້າຮ່ວມກອງປະຊຸມຄັ້ງທີ 5 ກຳມາທິການຕ່າງປະເທດຂອງສະພາແຫ່ງຊາດສາມປະເທດ ກຳປູເຈຍ-ລາວ-ຫວຽດນາມ (ກລວ) ກ່ຽວກັບ “ບົດບາດຂອງສະພາແຫ່ງຊາດ ໃນການຊ່ວຍໜູນເຂດສາມຫຼ່ຽມພັດທະນາ”.
ກອງປະຊຸມໄດ້ຈັດຕັ້ງຂຶ້ນຢູ່ທີ່ແຂວງ ມົນດຸນຄິລີ ປະເທດກຳປູເຈຍ. ຄະນະຜູ້ແທນຫວຽດນາມ ໂດຍແມ່ນທ່ານ ເຈິ່ນວັນຮັ່ງ ປະທານກຳມາທິການຕ່າງປະເທດ ສະພາແຫ່ງຊາດ ເປັນຫົວໜ້າຄະນະ.
ກ່າວຄຳປາໄສໃນວາລະໄຂການປະຊຸມ, ທ່ານ ງວນແຍນ ຮອງປະທານຜູ້ທີໜຶ່ງສະພາແຫ່ງຊາດກຳປູເຈຍ ຢັ້ງຢືນວ່າ ກອງປະຊຸມຄັ້ງນີ້ແນໃສ່ສືບຕໍ່ເພີ່ມທະວີການຮ່ວມມືລະຫວ່າງອົງການນິຕິບັນຍັດສາມປະເທດ ແລະ ຊ່ວຍໜູນໃຫ້ລັດຖະບານໃນບັນດາແຜນການການກະທຳ ແລະ ບັນດາກົນໄກ ເພື່ອຂະຫຍາຍເຂດສາມຫຼ່ຽມພັດທະນາ ຕາມທິດຍູ້ແຮງການເຕີບໂຕເສດຖະກິດ, ລົບລ້າງຄວາມອຶດຫີວຫລຸນຜ່ອນຄວາມທຸກຈົນ ເພື່ອຄວາມກ້າວໜ້າສັງຄົມ ແລະ ວັດທະນະທຳໃນເຂດນີ້.
ກອງປະຊຸມໄດ້ຊົມເຊີຍ ແລະ ສະໜັບສະໜູນຖະແຫຼງການຮ່ວມ ຂອງກອງປະຊຸມຂັ້ນສູງກ່ຽວກັບເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 7 ໃນເດືອນ ມີນາ ແລ້ວນີ້ ຢູ່ທີ່ນະຄອນຫຼວງວຽງຈັນ ແຫ່ງ ສປປ ລາວ ແລະ ບັນດາກອງປະຊຸມອື່ນທີ່ກ່ຽວຂ້ອງ.
ກອງປະຊຸມໄດ້ຕີລາຄາສູງ ຕໍ່ຄວາມມານະພະຍາຍາມຂອງຄະນະກຳມາທິການລວມເຂດ ກລວ ໃນການຜັນຂະຫຍາຍແຜນກຳນົດສັງລວມ ກ່ຽວກັບບັນດານະໂຍບາຍໃຫ້ບຸລິມະສິດຕໍ່ກັບເຂດສາມຫຼ່ຽມພັດທະນາ ແລະ ກຳນົດເປົ້າໝາຍຈະສຳເລັດພາຍໃນສອງປີ.
ບັນດາຜູ້ແທນທີ່ເຂົ້າຮ່ວມກອງປະຊຸມ ໄດ້ເປັນເອກະພາບກັນສະໜັບສະໜູນລັດຖະບານ ແລະ ບັນດາແຂວງຂອງສາມປະເທດ ໃນຂໍ້ຕົກລົງພັດທະນາຂະແໜງອຸດສາຫະກຳຢາງພາລາ ເຊິ່ງໄດ້ຖືວ່າເປັນການບຸລິມະສິດໃນການຮ່ວມມືເສດຖະກິດລະຫວ່າງສາມປະເທດ; ຊຸກຍູ້ການສ້າງຕັ້ງບັນດາໂຮງຮຽນກໍ່ສ້າງວິຊາຊ່າງ ໃຫ້ເຂດສາມຫຼ່ຽມພັດທະນາ ກລວ; ພ້ອມກັນນັ້ນກໍ່ເນັ້ນໜັກເຖິງຄຳໝັ້ນສັນຍາອັນໜັກແໜ້ນໃນການປົກປັກຮັກສາສິ່ງແວດລ້ອມ, ຄຸ້ມຄອງ ແລະ ນຳໃຊ້ຊັນພະຍາກອນທຳມະຊາດແບບຍືນຍົງ ເພື່ອການພັດທະນາຂອງແຕ່ລະປະເທດ ແລະ ຂອງທົ່ວທັງເຂດສາມຫຼ່ຽມພັດທະນາ ກລວ.
ກອງປະຊຸມສືບຕໍ່ພິຈາລະນາຂໍ້ສະເໜີຂອງສະພາແຫ່ງຊາດສາມປະເທດ ໃນການຈັດຕັ້ງບັນດາອະນຸກຳມະການ, ຫຍ່ອມຮັບຜິດຊອບສະເພາະ ຂອງແຕ່ລະປະເທດ ເພື່ອຕິດຕາມແລະຊ່ວຍເຫຼືອການປະຕິບັດບັນດານະໂຍບາຍ ທີ່ນາຍົກລັດຖະມົນຕີສາມປະເທດໄດ້ອະນຸມັດຜ່ານ.
ກອງປະຊຸມໄດ້ສະເໜີໃຫ້ສ້າງຕັ້ງກົນໄກສຳພັນລະຫວ່າງສະພາແຫ່ງຊາດໃໝ່ຂອງ ກຳປູເຈຍ-ລາວ-ຫວຽດນາມ ເຊິ່ງກວມດ້ວຍບັນດາອະນຸກຳມະການ ບັນດາຫຍ່ອມຮັບຜິດຊອບສະເພາະຂົງເຂດທີ່ຕ່າງກັນ ໃນຄວາມເອົາໃຈໃສ່ລວມຂອງສາມປະເທດ.
ໃນຄະນະຜູ້ແທນຫວຽດນາມທີ່ເຂົ້າຮ່ວມກອງປະຊຸມ ມີຜູ້ແທນສະພາຂອງບັນດາແຂວງບິ່ງເຝຶອກ ດັກນົງ ຢາລາຍ ກອນຕຸມ; ຜູ້ແທນຂອງບັນດາກຳມາທິການຕ່າງປະເທດ, ຍຸດຕິທຳ, ວັດທະນາທຳ ການສຶກສາ ຊາວໜຸ່ມແລະຍຸວະຊົນ, ການເງິນ ງົບປະມານ; ຜູ້ຕາງໜ້າກະຊວງແຜນການແລະການລົງທຶນ, ກະຊວງການຕ່າງປະເທດ ແລະ ອຸປະທູດຫວຽດນາມ ຢູ່ກຳປູເຈຍ./.
ແຫຼ່ງຂ່າວ: TTXVN