ຫ້ອງວ່າການລັດຖະບານ ຫວຽດນາມ - ລາວ ຊຸກຍູ້ການຮ່ວມມື
ຕອນເຊົ້າວັນທີ 9 ກັນຍາ 2013, ຢູ່ທີ່ນະຄອນຫຼວງວຽງຈັນແຫ່ງ ສປປ ລາວ, ຫ້ອງວ່າການລັດຖະບານລາວ ແລະ ຫ້ອງວ່າການລັດຖະບານຫວຽດນາມ ໄດ້ຈັດຕັ້ງກອງປະຊຸມສຳມະນາຄັ້ງທີສອງ ກ່ຽວກັບການຮ່ວມມືລະຫວ່າງສອງຫ້ອງວ່າການ.
ຫ້ອງປະຊຸມສຳມະນາ. ພາບ: TTXVN
ເຂົ້າຮ່ວມກອງປະຊຸມສຳມະນາ ມີສະຫາຍ ຫງວຽນກວາງຖັງ, ຮອງຫົວໜ້າຫ້ອງວ່າການລັດຖະບານຫວຽດນາມ; ສະຫາຍ ຄຳພັນ ເຜີຍຍະວົງ, ຮອງຫົວໜ້າຫ້ອງວ່າການລັດຖະບານລາວ, ພ້ອມດ້ວຍພະນັກງານ ນັກວິຊາການຫຼາຍທ່ານຂອງສອງຫ້ອງວ່າການ ກໍ່ໄດ້ເປັນກຽດເຂົ້າຮ່ວມນຳ.
ກອງປະຊຸມສຳມະນາໄດ້ສຸມໃສ່ສົນທະນາ ແລກປ່ຽນຄວາມຄິດເຫັນກ່ຽວກັບຫ້າຫົວຂໍ້: ບົດຮຽນປະສົບການໃນການກະກຽມໃຫ້ແກ່ການປະຊຸມລັດຖະບານ; ການຕິດຕາມ, ຊຸກຍູ້ປະຕິບັດການຊີ້ນຳບັນຊາຂອງລັດຖະບານ, ຂອງການນຳລັດຖະບານ; ບົດຮຽນປະສົບການໃນວຽກງານເອກະສານ ການບໍລິຫານ; ວຽກງານກະກຽມ, ຮັບໃຊ້ໃຫ້ການນຳລັດຖະບານເຮັດວຽກກັບທ້ອງຖິ່ນຕ່າງໆ; ວຽກງານແກ້ໄຂການຮ້ອງທຸກ ຮ້ອງຟ້ອງ, ແນໃສ່ຊ່ວຍໜູນ ເພີ່ມທະວີຄວາມສາມາດໃຫ້ພະນັກງານຂອງຫ້ອງວ່າການລັດຖະບານລາວ ກ່ຽວກັບວຽກງານສັງລວມ, ຮຽບຮຽງບັນນາມິການ, ວິຊາອາຊີບຫ້ອງການ ແລະ ວຽກງານເປັນເສນາທິການໃຫ້ແກ່ການນຳຫ້ອງວ່າການລັດຖະບານ.
ນອກຈາກການແລກປ່ຽນຄວາມຄິດຄວາມເຫັນ, ແບ່ງປັນບົດຮຽນປະສົບການໃນວຽກງານຂອງຕົນຕາມຫົວຂໍ້ຕ່າງໆ ທີ່ກ່າວມາເທິງນີ້, ສອງຝ່າຍຍັງໄດ້ແບ່ງປັນກັນກ່ຽວກັບບັນຫາອື່ນໆ ເຊິ່ງທຸກວັນ ຫ້ອງວ່າການລັດຖະບານສອງປະເທດ ຕ້ອງແກ້ໄຂເພື່ອຮັບໃຊ້ວຽກງານເປັນເສນາທິການໃຫ້ແກ່ການນຳລັດຖະບານ ໄດ້ຮັບຜົນນັບມື້ນັບດີກວ່າ, ປະກອບສ່ວນແທດຈິງເຂົ້າໃນການເພີ່ມພູນຄູນສ້າງສາຍພົວພັນພິເສດລະຫວ່າງສອງປະເທດ ໃຫ້ຂະຫຍາຍຕົວໝັ້ນຄົງຂະໜົງແກ່ນ./.
ແຫຼ່ງຂ່າວ: TTXVN
