ສະຫາຍເຈືອງເຕິນຊາງ ປະທານປະເທດ ແຫ່ງສາທາລະນະລັດ ສັງຄົມນິຍົມຫວຽດນາມ ໄປຢ້ຽມຢາມ ແລະ ເຮັດວຽກຢູ່ ສາທາລະນະລັດ ປະຊາທິປະໄຕ ປະຊາຊົນລາວ
ສະຫາຍປະທານປະເທດເຈືອງເຕິນຊາງ ແລະ ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ ຕັດແຖບຜ້າເປີດນຳໃຊ້ ສະໜາມບິນສາກົນ ອັດຕະປື (ພາບ: TTXVN)
ເຂົ້າຮ່ວມໃນຄະນະຜູ້ແທນຍັງມີສະຫາຍຫງວຽນຊວນຝຸກ ກຳມະການກົມການເມືອງສູນກາງ ຮອງນາຍົກລັດຖະມົນຕີແຫ່ງສາທາລະນະລັດ ສັງຄົມນິຍົມຫວຽດນາມ, ປະທານຄະນະກຳມາທິການຮ່ວມມືຫວຽດນາມ - ລາວ.
ສະໜາມບິນສາກົນ ອັດຕະປື ແມ່ນໂຄງການໜຶ່ງໃນບັນດາໂຄງການຈຸດໜັກຢູ່ພາກໃຕ້ລາວ ຊຶ່ງໄດ້ລົງທຶນເປັນເງິນ 36 ລ້ານໂດລາສະຫະລັດ ໂດຍແມ່ນກຸ່ມບໍລິສັດຮວ່າງແອງຢາລາຍ (ຫວຽດນາມ) ເປັນຜູ້ຊ່ວຍເຫຼືອ, ລັດຖະບານລາວໃຫ້ການກໍ່ສ້າງດ້ວຍຮູບການ BT (ກໍ່ສ້າງ ແລະ ມອບໂອນ) ໃນເວລາແຕ່ເດືອນພຶດສະພາ 2013 ຮອດເດືອນພຶດສະພາ 2015.
ສະໜາມບິນສາກົນ ອັດຕະປື ແມ່ນໂຄງການຈຸດໜັກທີ່ມີຄວາມໝາຍເສດຖະກິດ - ສັງຄົມທີ່ໃຫຍ່ຫຼວງ, ເປັນຂົວຕໍ່ຄົມມະນາຄົມ, ເສດຖະກິດ - ການເມືອງ, ການປ້ອງກັນຊາດ - ປ້ອງກັນຄວາມສະຫງົບລະຫວ່າງຫວຽດນາມ ແລະ ລາວ, ປະກອບສ່ວນນຳເອົາຜົນປະໂຫຍດຕົວຈິງມາໃຫ້ປະຊາຊົນໃນແຂວງອັດຕະປື...
ພ້ອມກັນກັບບັນດາການນຳຂອງລາວຕັດແຖບຜ້າເປີດນຳໃຊ້ສະໜາມບິນ, ສະຫາຍປະທານປະເທດ ເຈືອງເຕິນຊາງ ໄດ້ສະແດງຄວາງຮູ້ບຸນຄຸນຢ່າງຈິງໃຈຕໍ່ພັກ ລັດຖະບານລາວ, ກໍ່ຄືຕໍ່ອຳນາດການປົກຄອງທ້ອງຖິ່ນຂັ້ນຕ່າງໆ ແລະແຂວງອັດຕະປື ທີ່ໄດ້ເອົາໃຈໃສ່ສ້າງເງື່ອນໄຂອຳນວຍຄວາມສະດວກ ໃຫ້ວິສາຫະກິດຫວຽດນາມມາລົງທຶນຢູ່ພາກໃຕ້ລາວເວົ້າລວມ ກໍ່ຄືລົງທຶນໃນໂຄງການສະໜາມບິນອັດຕະປື ເວົ້າໂດຍສະເພາະ.
ສະຫາຍປະທານປະເທດ ເຈືອງເຕິນຊາງ ກໍ່ໄດ້ຊົມເຊີຍຢ່າງສຸດໃຈຕໍ່ ກຸ່ມບໍລິສັດຮວ່າງແອງຢາລາຍ ແລະບັນດາວິສາຫະກິດຫວຽດນາມ ທີ່ໄດ້ມີຄວາມມານະພະຍາຍາມເຄື່ອນໄຫວທຸລະກິດຢູ່ລາວ; ເນັ້ນວ່າ ການປະຕິບັດໂຄງການສະໜາມບິນສາກົນ ອັດຕະປື ຕາມຕົວແບບກໍ່ສ້າງ ແລະ ມອບໂອນນັ້ນ ເປັນການສະແດງເຖິງລັກສະນະປະສິດທິຜົນ ແທດຈິງ ແລະ ຄວາມອຸດົມສົມບູນຫຼາກຫຼາຍໃນການພົວພັນຮ່ວມມືດ້ານເສດຖະກິດລະຫວ່າງສອງປະເທດເວົ້າລວມ ແລະ ລະຫວ່າງບັນດາວິສາຫະກິດຂອງສອງປະເທດເວົ້າໂດຍສະເພາະ; ພ້ອມກັນນັ້ນ ກໍ່ສະເໜີໃຫ້ວິສາຫະກິດຫວຽດນາມສືບຕໍ່ເສີມຂະຫຍາຍຜົນສຳເລັດທີ່ບັນລຸໄດ້, ທັງຍູ້ແຮງການຮ່ວມມືທຸລະກິດ ທັງເອົາໃຈໃສ່ຊ່ວຍເຫຼືອວຽກງານສັງຄົມຢູ່ທ້ອງຖິ່ນ ບົນຈິດໃຈຊ່ວຍເຫຼືອເພື່ອນກໍ່ແມ່ນຊ່ວຍໃຫ້ກະໂຕຕົນເອງ, ປະກອບສ່ວນປັບປຸງ ແລະ ຂະຫຍາຍສາຍພົວພັນສາມັກຄີພິເສດ ມິດຕະພາບອັນເປັນມູນເຊື້ອຫວຽດນາມ - ລາວ.
ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ ແລະ ບັນດາການນຳຂອງລາວ ໄດ້ສະແດງຄວາມຄຳນັບຮັບຕ້ອນຢ່າງສຸດໃຈຕໍ່ສະຫາຍປະທານປະເທດ ເຈືອງເຕິນຊາງ ແລະຄະນະຜູ້ແທນຂັ້ນສູງຫວຽດນາມ ທີ່ໄດ້ມາຮ່ວມພິທີເປີດນຳໃຊ້ສະໜາມບິນສາກົນ ອັດຕະປື ຊຶ່ງເປັນການສະແດງເຖິງນ້ຳໃຈມິດຕະພາບອັນເລິກເຊິ່ງ ແລະ ການພົວພັນສາມັກຄີສະໜິດແໜ້ນພິເສດລະຫວ່າງຫວຽດນາມ - ລາວ, ໄດ້ເປັນການລະດົມກຳລັງໃຈອັນໃຫຍ່ຫຼວງຕໍ່ປະຊາຊົນລາວເວົ້າລວມ ແລະ ປະຊາຊົນແຂວງອັດຕະປືເວົ້າໂດຍສະເພາະ.
ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ ຕີລາຄາສູງຕໍ່ກຸ່ມບໍລິສັດຮວ່າງແອງຢາລາຍ ທີ່ໄດ້ຜັນຂະຫຍາຍການລົງທຶນ ແລະ ສຳເລັດໂຄງການສະໜາມບິນສາກົນອັດຕະປືຢ່າງໄວ ຊຶ່ງເປັນໂຄງການທີ່ມີຄວາມໝາຍການເມືອງ - ເສດຖະກິດທີ່ສຳຄັນ, ຊ່ວຍເພີ່ມທະວີການເຊື່ອມຕໍ່ລະຫວ່າງບັນດາທ້ອງຖິ່ນຂອງລາວ ແລະ ຍັງເຊື່ອມຕໍ່ລະຫວ່າງລາວກັບຫວຽດນາມ ແລະ ບັນດາປະເທດອື່ນໃນພາກພື້ນ, ສ້າງຄວາມສະດວກໃຫ້ແກ່ການເຄື່ອນໄຫວພົວພັນສັງສັນລະຫວ່າງປະຊາຊົນ; ພ້ອມກັນນັ້ນ ກໍ່ປະກອບສ່ວນຊຸກຍູ້ການພົວພັນເສດຖະກິດ, ການລົງທຶນ, ການຄ້າ, ການທ່ອງທ່ຽວຢູ່ພາກໃຕ້ລາວ.
ໃນເວລາຢູ່ລາວ, ສະຫາຍປະທານປະເທດ ເຈືອງເຕິນຊາງ ໄດ້ພົບປະເຮັດວຽກກັບສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ, ຢ້ຽມຢາມສະຫາຍຄຳໄຕ ສີພັນດອນ ອະດີດປະທານປະເທດ ອະດີດປະທານຄະນະບໍລິຫານງານສູນກາງພັກປະຊາຊົນປະຕິວັດລາວ.
ໃນການພົບປະຫາລືກັບສະຫາຍຈູມມາລີ ໄຊຍະສອນ ແລະ ສະຫາຍຄຳໄຕ ສີພັນດອນ, ສະຫາຍເຈືອງເຕິນຊາງ ໄດ້ສະແດງຄວາມເຊື່ອໝັ້ນວ່າ ປະຊາຊົນລາວອ້າຍນ້ອງຈະສືບຕໍ່ປະຕິບັດບັນດາຈຸດໝາຍຂອງກອງປະຊຸມໃຫຍ່ພັກປະຊາຊົນປະຕິວັດລາວຄັ້ງທີ IX ຢ່າງສຳເລັດມີໄຊ, ກ້າວເຖິງຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ປປ ລາວ ໃນຕົ້ນປີ 2016 ຢ່າງສຳເລັດຜົນ. ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ສະແດງຄວາມຮູ້ບຸນຄຸນຢ່າງຈິງໃຈຕໍ່ພັກ ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນປະເສີດ ທັນການ ແລະ ມີປະສິດທິຜົນແກ່ພັກ ລັດ ແລະ ປະຊາຊົນລາວ ໃນການຕໍ່ສູ້ຍາດເອົາເອກະລາດແຫ່ງຊາດກ່ອນໜ້ານີ້ ກໍ່ຄືໃນການສ້າງສາ ແລະພັດທະນາປະເທດໃນປັດຈຸບັນ; ຢືນຢັນນ້ຳໃຈມິດຕະພາບອັນຍິ່ງໃຫຍ່ ແລະ ສາຍພົວພັນສາມັກຄີພິເສດລາວ - ຫວຽດນາມຈະໝັ້ນຄົງຂະໜົງແກ່ນຕະຫຼອດການ ແລະ ຂະຫຍາຍຕົວຢ່າງບໍ່ຢຸດຢັ້ງ.
ການນຳຂອງສອງປະເທດມີຄວາມດີໃຈທີ່ສຸດທີ່ເຫັນວ່າ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ - ລາວ ໃນເວລາທີ່ຜ່ານມາສືບຕໍ່ຂະຫຍາຍຕົວໃນທຸກຂົງເຂດ.
|
Box: ຫວຽດນາມແມ່ນໜຶ່ງໃນບັນດາປະເທດທີ່ມີການລົງທຶນເຂົ້າລາວຫຼາຍກວ່າໝູ່, ດ້ວຍຈຳນວນທຶນທີ່ໄດ້ລົງມາຮອດດຽວນີ້ແມ່ນປະມານ 5,22 ຕື້ໂດລາສະຫະລັດ, ໃນນັ້ນ, ສະເພາະແຂວງອັດຕະປືແມ່ນ 654 ລ້ານໂດລາສະຫະລັດ. ມູນຄ່າການຄ້າສອງຝ່າຍເພີ່ມຂຶ້ນຢ່າງໄວ, ປີ 2014 ບັນລຸ 1,4 ຕື້ໂດລາສະຫະລັດ (ເພີ່ມ 24,5% ທຽບກັບປີ 2013); ສະເພາະການຄ້າຂາອອກຂາເຂົ້າຜ່ານດ່ານ ເບີອີ - ພູເກືອ (ແຂວງອັດຕະປື) ໄດ້ບັນລຸ 229 ລ້ານໂດລາສະຫະລັດ (ເພີ່ມ 72% ທຽບກັບປີ 2013). ສອງປະເທດຫາກໍ່ເຊັນສັນຍາການຄ້າສະບັບໃໝ່, ສູ້ຊົນຍົກມູນຄ່າການຄ້າສອງຝ່າຍຂຶ້ນເປັນ 2 ຕື້ໂດລາສະຫະລັດ ໃນປີ 2015. ວິສາຫະກິດຫວຽດນາມສ້າງວຽກເຮັດງານທຳເປັນປົກກະຕິຢູ່ລາວໄດ້ເປັນຈຳນວນໝື່ນ, ຊ່ວຍຍົກສູງສະມັດຕະພາບແຮງງານ, ເພີ່ມແຫຼ່ງລາຍຮັບໃຫ້ງົບປະມານຂອງລາວ, ພ້ອມກັນນັ້ນກໍ່ໄດ້ບໍລິຈາກເງິນເປັນຈຳນວນຫຼາຍສິບລ້ານໂດລາສະຫະລັດ ໃຫ້ແກ່ການເຄື່ອນໄຫວສະຫວັດດີການ - ສັງຄົມຢູ່ທ້ອງຖິ່ນຂອງລາວ. |
ສະຫາຍປະທານປະເທດເຈືອງເຕິນຊາງ ວາງພວງມາລາ
ທີ່ອະນຸສາວະລີການຮ່ວມສຳພັນສູ້ຮົບລະຫວ່າງ ລາວ - ຫວຽດນາມ ທີ່ແຂວງຈຳປະສັກ (ພາບ: TTXVN)
ການນຳຂອງສອງປະເທດໄດ້ເຫັນດີເປັນເອກະພາບສືບຕໍ່ຜັນຂະຫຍາຍປະຕິບັດບັນດາຄຳໝັ້ນສັນຍາຂັ້ນສູງ ແລະ ຜົນສຳເລັດແຫ່ງກອງປະຊຸມຄັ້ງທີ 37 ຄະນະກຳມາທິການຮ່ວມລັດຖະບານຫວຽດນາມ - ລາວ; ໃນນັ້ນ ມີການເພີ່ມທະວີການພົບປະແລກປ່ຽນຄະນະຜູ້ແທນຂັ້ນສູງ; ປະສານສົມທົບກັນຢ່າງແໜ້ນແຟ້ນເພື່ອຍົກສູງປະສິດທິຜົນການນຳໃຊ້ທຶນຊ່ວຍເຫຼືອທີ່ຫວຽດນາມຊ່ວຍໃຫ້ລາວໃນປີ 2015; ຍູ້ແຮງການປະຕິບັດບັນດາໂຄງການເຊື່ອມຕໍ່ທາງດ້ານຄົມມະນາຄົມ ແລະ ພະລັງງານ; ໃຫ້ລົງນາມໂດຍໄວໃນບົດບັນທຶກຊ່ວຍຈຳ ກ່ຽວກັບການເຊື່ອມຕໍ່ຄົມມະນາຄົມຂົນສົ່ງຫວຽດນາມ - ລາວ ແລະ ສັນຍາການຄ້າສິນຄ້າ ແລະ ການບໍລິການຕາມຊາຍແດນ; ສືບຕໍ່ເພີ່ມທະວີການຕິດຕາມ ກວດກາ ເພື່ອແກ້ໄຂຄວາມຫຍຸ້ງຍາກໃຫ້ໄດ້ຢ່າງທັນການ, ຊ່ວຍໜູນໃຫ້ວິສາຫະກິດຫວຽດນາມຜັນຂະຫຍາຍບັນດາໂຄງການລົງທຶນຢູ້ລາວຢ່າງມີປະສິດທິຜົນ.
ສອງຝ່າຍກໍ່ໄດ້ແລກປ່ຽນຄວາມຄິດຄວາມເຫັນກ່ຽວກັບບາງບັນຫາສາກົນ ແລະພາກພື້ນ ທີ່ທັງສອງຝ່າຍຕ່າງກໍ່ມີຄວາມສົນໃຈ, ໃນນັ້ນມີບັນຫາທະເລຕາເວັນອອກ; ສະແດງຄວາມພຶງພໍໃຈກ່ຽວກັບການພົວພັນຮ່ວມມືຢ່າງຈົບງາມ ລະຫວ່າງສອງປະເທດຢູ່ທີ່ບັນດາເວທີປາໄສພາກພື້ນ ແລະ ສາກົນ; ເຫັນດີເພີ່ມທະວີການຮ່ວມມືກັບບັນດາປະເທດສະມາຊິກສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ໃນການກໍ່ສ້າງປະຊາຄົມອາຊຽນໃຫ້ສຳເລັດໃນທ້າຍປີ 2015. ສະຫາຍປະທານປະເທດ ເຈືອງເຕິນຊາງ ຢືນຢັນຫວຽດນາມຈະສະໜັບສະໜູນໃຫ້ລາວຮັບຜິດຊອບປະຕິບັດບົດບາດເປັນປະທານ ອາຊຽນ ປີ 2016 ຢ່າງສຳເລັດຜົນ.
ບັນດາການພົບປະຫາລືລະຫວ່າງການນຳຂັ້ນສູງຂອງສອງປະເທດໄດ້ດຳເນີນໄປໃນບັນຍາກາດອົບອຸ່ນ ມິດຕະພາບ ແລະ ເຕັມໄປດ້ວຍນ້ຳໃຈສະຫາຍອ້າຍນ້ອງ. ເນື່ອງໃນໂອກາດນີ້, ສະຫາຍປະທານປະເທດ ເຈືອງເຕິນຊາງ ຖືເປັນກຽດເຊື້ອເຊີນສະຫາຍ ຈູມມາລີ ໄຊຍະສອນ ເລຂາທິການໃຫຍ່ພັກ ປປ ລາວ ປະທານປະທດແຫ່ງ ສປປ ລາວ ແລະ ສະຫາຍຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ ປປ ອະດີດປະທານປະເທດແຫ່ງ ສປປ ລາວ ມາຢ້ຽມຢາມປະເທດຫວຽດນາມໃນເວລາທີ່ເໝາະສົມ.
ໃນວັນດຽວກັນ, ສະຫາຍປະທານປະເທດ ເຈືອງເຕິນຊາງ ໄດ້ໃຫ້ກຽດຮ່ວມພິທີເປີດນຳໃຊ້ໄລຍະທີ 1 ກິດຈະການປະຕິສັງຂອນເປີດກວ້າງບູຮານສະຖານວັດທາດ - ອະນຸສາະລີເຈົ້າຊີວິດ ໄຊເສດຖາ.
ສະຫາຍປະທານປະເທດ ເຈືອງເຕິນຊາງ ກໍ່ໄດ້ໄປວາງພວງມາລາໄຫວ້ອາໄລ, ປູກຕົ້ນໄມ້ເປັນທີ່ລະນຶກທີ່ອະນຸສາວະລີການຮ່ວມສຳພັນສູ້ຮົບລະຫວ່າງລາວ - ຫວຽດນາມ ຢູ່ເມືອງປາກຊ່ອງ ແຂວງຈຳປະສັກ. ນີ້ແມ່ນໜຶ່ງໃນ 4 ກິດຈະກຳທີ່ໄດ້ກໍ່ສ້າງໃນດິນລາວ ເພື່ອສະແດງຄວາມຮູ້ບຸນຄຸນຕໍ່ບັນດາວິລະຊົນນັກຮົບຫວຽດນາມ ແລະ ລາວ ທີ່ໄດ້ເສຍສະຫຼະຊີວິດໃນເວລາສູ້ຮົບເພື່ອປົດປ່ອຍຊາດ...
ຢູແຂວງອັດຕະປື, ສະຫາຍປະທານປະເທດ ເຈືອງເຕິນຊາງ ຍັງໄດ້ໄປກວດເບິ່ງປະສິດທິຜົນຂອງໂຄງການລ້ຽງງົວດ້ວຍເຕັກໂນໂລຊີສູງ ຂອງກຸ່ມບໍລິສັດຮວ່າງແອງຢາລາຍ. ນີ້ແມ່ນຕົວແບບຟາມລ້ຽງສັດທີ່ທັນສະໄໝ, ດ້ວຍຈຳນວນງົວຫຼາຍກວ່າ 15.000 ໂຕ ຊຶ່ງວິສາຫະກິດລົງທຶນເພື່ອແນໃສ່ສວຍໃຊ້ທ່າດີດ້ານຜະລິດຕະພັນກະສິກຳ ເຊັ່ນຢາງພາລາ, ອ້ອຍ, ປາມນ້ຳມັນ ເພື່ອເປັນຫົວອາຫານສັດ, ສ້າງໃຫ້ມີຜະລິດຕະພັນງົວຄຸນນະພາບສູງ.
ການຢ້ຽມຢາມແລະເຮັດວຽກຢູ່ລາວຂອງສະຫາຍປະທານປະເທດ ເຈືອງເຕິນຊາງ ໃນຄັ້ງນີ້ໄດ້ຢືນຢັນອີກເທື່ອໜຶ່ງເຖິງນ້ຳໃຈມິດຕະພາບອັນຍິ່ງໃຫຍ່ ແລະ ການພົວພັນສາມັກຄີພິເສດລາວ - ຫວຽດນາມ ຈະໝັ້ນຄົງຍືນຍົງຕະຫຼອດການ ແລະ ຂະຫຍາຍຕົວຢ່າງບໍ່ຢຸດຢັ້ງ./.
ໂດຍ: ບທ (ສັງລວມຕາມສຳນັກຂ່າວ TTXVN)
