ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ປະທານປະເທດ ແຫ່ງສປປ ລາວ ແລະ ສະຫາຍນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ສະຫາຍຫງວຽນເຕິນຢຸງ ນາຍົກລັດຖະມົນຕີ ສສ ຫວຽດນາມ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສຳຄັນທີ່ສຸດເຂົ້າໃນການເພີ່ມທະວີ ແລະ ຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ - ຫວຽດນາມ; ພິເສດແມ່ນການພົວພັນຮ່ວມມືດ້ານເສດຖະກິດ ດ້ວຍການວາງສີລາລຶກໂຄງການຂຸດຄົ້ນ ແລະ ປຸງແຕ່ງເກືອກາລີ ທີ່ແຂວງຄຳມ່ວນ ເຊິ່ງເປັນໂຄງການລົງທຶນໃຫຍ່ທີ່ສຸດຂອງຫວຽດນາມຢູ່ລາວ.
ຜູ້ນຳລາວກໍ່ໄດ້ສະແດງຄວາມຂອບອົກຂອບໃຈສະຫາຍຫວຽດນາມ ທີ່ໄດ້ໃຫ້ການຊ່ວຍເຫຼືອຢ່າງໃຫຍ່ຫຼວງ ແລະ ມີປະສິດທິຜົນແກ່ການປະຕິວັດຂອງລາວຕະຫຼອດມາ ໃນພາລະກິດການຕໍ່ສູ້ຍາດເອົາເອກະລາດແຫ່ງຊາດກ່ອນໜ້ານີ້ ກໍ່ຄືໃນການສ້າງສາ ພັດທະນາປະເທດລາວໃນປັດຈຸບັນ.
ສະຫາຍນາຍົກລັດຖະມົນຕີ ຫງວຽນເຕິນຢຸງ ສະແດງຄວາມດີອົກດີໃຈທີ່ໄດ້ກັບມາຢາມປະເທດລາວອ້າຍນ້ອງ ແລະ ໄດ້ເຫັນກັບຕາບັນດາຜົນສຳເລັດອັນໃຫຍ່ຫຼວງ ສຳຄັນ ຮອບດ້ານ ທີ່ພັກ ລັດຖະບານ ແລະ ປະຊາຊົນລາວອ້າຍນ້ອງຍາດມາໄດ້ ໃນການຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກປະຊາຊົນປະຕິວັດລາວ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VII (2011 - 2015).
ສະຫາຍນາຍົກລັດຖະມົນຕີ ຫງວຽນເຕິນຢຸງ ສະແດງຄວາມຂອບອົກຂອບໃຈຢ່າງຈິງໃຈຕໍ່ພັກ ລັດຖະບານ ແລະ ປະຊາຊົນລາວອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າແກ່ຫວຽດນາມ ໃນພາລະກິດຕໍ່ສູ້ປົດປ່ອຍຊາດ ໂຮມປະເທດຊາດເຂົ້າເປັນເອກະພາບກ່ອນໜ້ານີ້ ກໍ່ຄືໃນການສ້າງສາພັດທະນາປະເທດຊາດຫວຽດນາມໃນປັດຈຸບັນ; ສະຫາຍກໍ່ໄດ້ອວຍພອນໄຊໃຫ້ລາວ ຈັດຕັ້ງກອງປະຊຸມໃຫຍ່ພັກປະຊາຊົນປະຕິວັດລາວ ຄັ້ງທີ X ຢ່າງສຳເລັດມີໄຊ ແລະ ຮັບປະຕິບັດບົດບາດເປັນປະທານ ອາຊຽນ ໃນປີ 2016 ຢ່າງສຳເລັດຜົນ.
ການນຳຂອງສອງປະເທດຢືນຢັນ ພັກ ລັດຖະບານ ສະພາແຫ່ງຊາດ ແລະ ປະຊາຊົນສອງປະເທດ ຈະໃຫ້ຄວາມສຳຄັນເປັນພິເສດ ແລະ ບຸລິມະສິດສູງສຸດໃຫ້ແກ່ການປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ - ລາວ.
ສອງຝ່າຍໄດ້ພ້ອມກັນແລກປ່ຽນຄວາມຄິດຄວາມເຫັນ ກ່ຽວກັບບາງບັນຫາສາກົນແລະພາກພື້ນ; ພ້ອມທັງໄດ້ເປັນເອກະພາບກັນ ສືບຕໍ່ເພີ່ມທະວີການສົມທົບຢ່າງແໜ້ນແຟ້ນໃນກອບ ອາຊຽນ ເພື່ອຮັກສາຫຼັກໝັ້ນ ແລະ ສຸລະສຽງຂອງ ອາຊຽນ ໃນບັນດາບັນຫາຍຸດທະສາດອັນສຳຄັນຂອງພາກພື້ນ, ໃນນັ້ນມີບັນຫາທະເລຕາເວັນອອກ.
ສະຫາຍນາຍົກລັດຖະມົນຕີ ຫງວຽນເຕິນຢຸງ ພົບປະຫາລືກັບ
ສະຫາຍນາຍົກລັດຖະມົນຕີ ທອງສິງ ທຳມະວົງ (ພາບ: VNTTX)
ໃນການພົບປະຫາລືສອງຝ່າຍ, ສະຫາຍນາຍົກລັດຖະມົນຕີ ທອງສິງ ທຳມະວົງ ໄດ້ສະແດງຄວາມຊົມເຊີຍຢ່າງສຸດໃຈ ຕໍ່ສະຫາຍນາຍົກລັດຖະມົນຕີ ຫງວຽນເຕິນຢຸງ ທີ່ໄດ້ນຳຄະນະຜູ້ແທນມາຢ້ຽມຢາມລາວ ເຊິ່ງເປັນການສະແດງອອກຢ່າງມີຊີວິດຊີວາເຖິງນ້ຳໃຈມິດຕະພາບອັນເລິກເຊິ່ງ ແລະ ສາຍພົວພັນສາມັກຄີອັນສະໜິດແໜ້ນລະຫວ່າງສອງພັກ ສອງປະເທດ; ພ້ອມນັ້ນສະຫາຍກໍ່ເນັ້ນວ່າ ລັດຖະບານ ແລະ ປະຊາຊົນລາວ ສະແດງຄວາມນັບຖືແລະຄວາມຂອບໃຈສະຫາຍຫວຽດນາມ ທີ່ໄດ້ໃຫ້ການຊ່ວຍເຫຼືອຢ່າງໃຫຍ່ຫຼວງ ແລະ ມີປະສິດທິຜົນແກ່ປະຊາຊົນລາວ ໃນພາລະກິດການຕໍ່ສູ້ປົດປ່ອຍຊາດກ່ອນໜ້ານີ້ ກໍ່ຄືໃນການສ້າງສາ ພັດທະນາປະເທດລາວໃນປັດຈຸບັນ.
ສະຫາຍນາຍົກລັດຖະມົນຕີ ທອງສິງ ທຳມະວົງ ສະແດງຄວາມເຊື່ອໝັ້ນວ່າ ການວາງສິລາລຶກໂຄງການຂຸດຄົ້ນແລະປຸງແຕ່ງເກືອກາລີ ທີ່ແຂວງຄຳມ່ວນ ໃນໂອກາດການມາຢ້ຽມຢາມຂອງສະຫາຍນາຍົກລັດຖະມົນຕີ ຫງວຽນເຕິນຢຸງ ຄັ້ງນີ້ ຈະນຳເອົາຜົນປະໂຫຍດມາສູ່ປະຊາຊົນສອງຊາດຢ່າງແທ້ຈິງ; ຈະຍູ້ແຮງການຮ່ວມມືດ້ານເສດຖະກິດ ການຄ້າ ການລົງທຶນ ແຮງງານ ການຖ່າຍທອດເຕັກໂນໂລຊີ-ເຕັກນິກ ລະຫວ່າງສອງປະເທດ; ປະກອບສ່ວນເພີ່ມທະວີສາຍພົວພັນຮ່ວມມືຮອບດ້ານລະຫວ່າງ ລາວ ແລະ ຫວຽດນາມ ຍິ່ງກວ່າອີກ.
ສະຫາຍນາຍົກລັດຖະມົນຕີ ຫງວຽນເຕິນຢຸງ ສະແດງຄວາມດີໃຈຊົມເຊີຍບັນດາຜົນງານອັນໃຫຍ່ຫຼວງ ສຳຄັນທີ່ພັກ ລັດຖະບານ ແລະ ປະຊາຊົນລາວບັນດາເຜົ່າຍາດມາໄດ້; ຂໍອວຍພອນໃຫ້ພັກປະຊາຊົນປະຕິວັດລາວ ຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ໃນຕົ້ນປີ 2016 ຢ່າງສຳເລັດຜົນ.
ການນຳຂອງສອງປະເທດສະແດງຄວາມປິຕິຍິນດີເມື່ອເຫັນວ່າ ສາຍພົວພັນມິດຕະພາບທີ່ເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງປະເທດຫວຽດນາມ - ລາວ ສືບຕໍ່ຂະຫຍາຍຕົວຢ່າງຈົບງາມ, ນັບມື້ນັບເຂົ້າສູ່ລວງເລິກ ແທດຈິງ ແລະ ມີປະສິດທິຜົນ ໃນທຸກຂົງເຂດ.
ຫວຽດນາມເປັນໜຶ່ງໃນບັນດາປະເທດທີ່ລົງທຶນຫຼາຍທີ່ສຸດເຂົ້າລາວ; ມູນຄ່າການຄ້າລະຫວ່າງສອງປະເທດໃນຊຸມປີມໍ່ໆມານີ້ໄດ້ເພີ່ມຂຶ້ນເລື້ອຍໆ; ສອງປະເທດຫາກໍ່ລົງນາມໃນສັນຍາການຄ້າສະບັບໃໝ່ ແລະ ສັນຍາວ່າດ້ວຍການຊື້ຂາຍ ແລກປ່ຽນສິນຄ້າ ແລະ ການບໍລິການຕາມເຂດຊາຍແດນສອງປະເທດ, ສູ້ຊົນຍົກມູນຄ່າການຄ້າສອງສົ້ມຂຶ້ນເປັນ 2 ຕື້ໂດລາສະຫະລັດໃນປີ 2015; ການຜັນຂະຫຍາຍປະຕິບັດບັນດາໂຄງການ ກິດຈະການກໍ່ສ້າງທີ່ໃຊ້ທຶນຊ່ວຍເຫຼືອກໍ່ບັນລຸຜົນອັນດີງາມ; ການຮ່ວມມືດ້ານວັດທະນະທຳ ການສຶກສາ-ກໍ່ສ້າງ ວິທະຍາສາດ-ເຕັກນິກ ການຄົມມະນາຄົມຂົນສົ່ງ ກະສິກຳ ກໍ່ໄດ້ຜັນປ່ຽນຢ່າງຕັ້ງໜ້າ.
ສອງຝ່າຍເຫັນດີເປັນເອກະສັນສືບຕໍ່ສົມທົບກັນຈັດຕັ້ງການເຄື່ອນໄຫວຕ່າງໆເປັນຢ່າງດີ ເພື່ອສະເຫຼີມສະຫຼອງວັນບຸນມະໂຫລານຕ່າງໆ ຂອງສອງປະເທດ ແຕ່ນີ້ຮອດທ້າຍປີ, ໃນນັ້ນມີການສະເຫຼີມສະຫຼອງວັນຊາດລາວຄົບຮອບ 40 ປີ ແລະ ວັນຄ້າຍວັນເກີດຂອງທ່ານປະທານ ໄກສອນ ພົມວິຫານ ຄົບຮອບ 95 ປີ; ກະກຽມເປັນຢ່າງດີໃຫ້ແກ່ກອງປະຊຸມຄັ້ງທີ 38 ຂອງຄະນະກຳມະການລະຫວ່າງລັດຖະບານສອງປະເທດ ແລະ ການປຶກສາຫາລືປະຈຳປີລະຫວ່າງສອງຮອງນາຍົກລັດຖະມົນຕີ, ລັດຖະມົນຕີວ່າການກະຊວງຕ່າງປະເທດຂອງສອງປະເທດ ທ້າຍປີ 2015; ສົມທົບກັນປະຕິບັດສັນຍາການຄ້າສະບັບໃໝ່ ແລະ ສັນຍາວ່າດ້ວຍການຊື້ຂາຍ ແລກປ່ຽນສິນຄ້າ ແລະ ການບໍລິການຕາມເຂດຊາຍແດນສອງປະເທດ ໃຫ້ໄດ້ຮັບຜົນເປັນຢ່າງດີ; ຊອກຫາມາດຕະການເພື່ອຍົກສູງມູນຄ່າການຄ້າສອງສົ້ນໃນຊຸມເດືອນທ້າຍປີ 2015; ສືບຕໍ່ຕິດຕາມ ກວດກາແກ້ໄຂຄວາມຫຍຸ້ງຍາກຕ່າງໆຢ່າງທັນການ ເພື່ອຊ່ວຍໃຫ້ວິສາຫະກິດຫວຽດນາມຜັນຂະຫຍາຍໂຄງການລົງທຶນຢູ່ລາວຢ່າງມີປະສິດທິຜົນ; ສົ່ງເສີນວິສາຫະກິດລາວລົງທຶນຢູ່ຫວຽດນາມ, ພິເສດແມ່ນ ໂຄງການກໍ່ສ້າງສາງພັກນ້ຳມັນ ແລະ ລະບົບທໍ່ສົ່ງນ້ຳມັນ ແຕ່ທ່າເຮືອຮອນລາ ແຂວງກວ໋າງບິ່ງ ຫາ ຄຳມ່ວນ ເຊິ່ງເປັນໂຄງການລົງທຶນທີ່ສຳຄັນທີ່ສຸດຂອງລາວຢູ່ຫວຽດນາມ; ເພີ່ມທະວີການຮ່ວມມືເຊື່ອມຕໍ່ເສັ້ນທາງຄົມມະນາຄົມລະຫວ່າງສອງປະເທດ, ໃນນັ້ນມີການເລີ່ມກະກຽມໃຫ້ແກ່ໂຄງການກໍ່ສ້າງເສັ້ນທາງຄວາມໄວສູງ ວຽງຈັນ-ປາກຊານ-ແທງທູຍ-ຮ່າໂນ້ຍ ແລະ ເສັ້ນທາງແຕ່ພູທິເຜິ້ງ (ແຂວງຫຼວງພະບາງ) ຫາ ນາຊອນ (ຕິດກັບເມືອງດ້ຽນບຽນຕາເວັນອອກ, ແຂວງດ້ຽນບຽນ).
ສອງຝ່າຍໄດ້ພ້ອມກັນແລກປ່ຽນກ່ຽວກັບບາງບັນຫາສາກົນ ແລະ ພາກພື້ນທີ່ທັງສອງມີຄວາມສົນໃຈ; ເຫັນດີເປັນເອກະພາບ ສືບຕໍ່ເສີມຂະຫຍາຍສາຍພົວພັນຮ່ວມມືອັນດີງາມລະຫວ່າງສອງປະເທດ ໃນບັນດາເວທີປາໄສພາກພື້ນ ແລະ ສາກົນ, ເປັນຕົ້ນແມ່ນໃນກອບການຮ່ວມມື ອາຊຽນ ເພື່ອຮັກສາຫຼັກໝັ້ນ ແລະ ສຸລະສຽງລວມຂອງ ອາຊຽນ ຕໍ່ບັນດາບັນຫາຍຸດທະສາດທີ່ສຳຄັນຂອງພາກພື້ນ, ໃນນັ້ນມີບັນຫາທະເລຕາເວັນອອກ.
ຫຼັງຈາການພົບປະຫາລື, ສະຫາຍນາຍົກລັດຖະມົນຕີ ຫງວຽນເຕິນຢຸງ ແລະ ສະຫາຍນາຍົກລັດຖະມົນຕີ ທອງສິງ ທຳມະວົງ ໄດ້ເຂົ້າຮ່ວມເປັນສັກຂີພະຍາມໃນພິທີເຊັນບົດບັນທຶກຊ່ວຍຈຳລະຫວ່າງລັດຖະບານລາວ ແລະ ລັດຖະບານຫວຽດນາມ ກ່ຽວກັບຍຸດທະສາດການຮ່ວມມືໃນຂົງເຂດຄົມມະນາຄົມຂົນສົ່ງ ໄລຍະ 2016-2025 ແລະວິໄສທັດຮອດປີ 2030.
ໃນການຢ້ຽມຢາມປະເທດລາວຄັ້ງນີ້, ສະຫາຍນາຍົກລັດຖະມົນຕີ ຫງວຽນເຕິນຢຸງ ພ້ອມຄະນະໄດ້ເດີນທາງໄປຢ້ຽມຢາມສະຫາຍ ຄຳໄຕ ສີພັນດອນ ອະດີດປະທານພັກ ອະດີດປະທານປະເທດລາວ; ສະຫາຍສະໝານ ວິຍະເກດ ອະດີດປະທານສະພາແຫ່ງຊາດ ອະດີດຫົວໜ້າຄະນະຊີ້ນຳວຽກງານແນວຄິດ ວັດທະນະທຳສູນກາງພັກ ແລະ ສະຫາຍ ສີສະຫວາດ ແກ້ວບຸນພັນ ອະດີດນາຍົກລັດຖະມົນຕີ ອະດີດປະທານແນວໂຮມສ້າງຊາດລາວ ທີ່ເຮືອນຂອງເພີ່ນ.
ກ່ອນນັ້ນ ຄືໃນຕອນເຊົ້າວັນທີ 13 ກັນຍາ, ສະຫາຍນາຍົກລັດຖະມົນຕີ ຫງວຽນເຕິນຢຸງ ແລະ ຄະນະຜູ້ແທນຂັ້ນສູງຫວຽດນາມ ໄດ້ພ້ອມກັບສະຫາຍນາຍົກລັດຖະມົນຕີ ທອງສິງ ທຳມະວົງ ເຂົ້າຮ່ວມພິທີວາງສີລາລຶກໂຄງການຂຸດຄົ້ນ ແລະ ປຸງແຕ່ງ ເກືອກາລີ ທີ່ເມືອງໜອງບົກ ແຂວງຄຳມ່ວນ ໂດຍແມ່ນກຸ່ມບໍລິສັດເຄມີຫວຽດນາມເປັນຜູ້ລົງທຶນ ເຊິ່ງແມ່ນໂຄງການຂະໜາດໃຫຍ່ທີ່ຫວຽດນາມລົງທຶນຢູ່ລາມ. ໂຄງການມີເນື້ອທີ່ຂຸດຄົ້ນ 10 ຕາລາງກິໂລແມັດ, ສາມາດຂຸດຄົ້ນປຸງແຕ່ເກືອກາລີໄດ້ 320.000 ໂຕນ/ປີ ໂດຍມີມູນຄ່າການລົງທຶນທັງໝົດ 522 ລ້ານໂດລາສະຫະລັດ, ໃນນັ້ນກຸ່ມບໍລິສັດເຄມີຫວຽດນາມ ປະກອບ 105 ລ້ານໂດລາສະຫະລັດດ້ວຍທຶນທີ່ມີຂອງຕົນ ແລະ ສ່ວນທີ່ຍັງເຫຼືອແມ່ນທຶນກູ້ຢືມຂອງທະນາຄານການຄ້າຫວຽດນາມ. ເມື່ອໂຄງການເຂົ້າສູ່ການນຳໃຊ້ ຈະລົດຜ່ອນການນຳເຂົ້າຝຸ່ນເຄມີຂອງຫວຽດນາມເຂົ້າລາວ ແລະ ແກ້ໄຂໄດ້ສະພາບການເຫຼືອເຟືອເກືອປຸງແຕ່ງອາຫານ ແລະ ຄວາມຂາດແຄນເກືອອຸດສາຫະກຳ ເກືອຄຸນນະພາບສູງຢູ່ຫວຽດນາມໃນປັດຈຸບັນ.
ສະຫາຍນາຍົກລັດຖະມົນຕີ ຫງວຽນເຕິນຢຸງ ພ້ອມຄະນະຜູ້ແທນລັດຖະບານຫວຽດນາມໄດ້ໄປຢາມສາລານິຍະລະນຶກທ່ານປະທານໂຮ່ຈີມິນ ທີ່ບ້ານຊຽງຫວາງ ເມືອງໜອງບົກ ແຂວງຄຳມ່ວນ ເຊິ່ງເປັນບ່ອນທີ່ເພີ່ນມາຢູ່ ແລະ ເຄື່ອນໄຫວປະຕິວັດແຕ່ປີ 1929 ຫາ 1931./.
ສັງລວມໂດຍ ຫງວຽນດຶກ