ທ່ານນາຍົກລັດຖະມົນຕີ ຫງວຽນເຕິນຢຸງ ໄປເຖິງ ປາຣີ ເພື່ອເຂົ້າຮ່ວມການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບພູມິອາກາດ
ວກ.ອອນໄລ - ຄ່ຳວັນທີ 29 ພະຈິດ 2015, ທ່ານນາຍົກລັດຖະມົນຕີ ຫງວຽນເຕິນຢຸງ ແລະຄະນະຜູ້ແທນຂັ້ນສູງຫວຽດນາມ ໄດ້ເດີນທາງເຖິງນະຄອນຫຼວງປາຣີ ປະເທດສາທາລະນະລັດຝຣັ່ງ ເພື່ອເຂົ້າຮ່ວມການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບພູມິອາກາດ (COP 21).
ຕ້ອນຮັບທ່ານນາຍົກລັດຖະມົນຕີ ຫງວຽນເຕິນຢຸງ ແລະຄະນະ ທີ່ສະໜາມບິນສາກົນ ຊາເລີ ເດີ ໂກນ, ປາຣີ ມີເອກອັກຄະລັດທະທູດຫວຽດນາມປະຈຳຝຣັ່ງ ທ່ານຫງວຽນງອກເຊີນ, ບັນດາພະນັກງານ ລັດຖະກອນຂອງສະຖານທູດຫວຽດນາມຢູ່ທີ່ຝຣັ່ງ, ຜູ້ຕາງໜ້າຄະນະຈັດຕັ້ງການປະຊຸມ COP 21.
ໃນເວລາເຂົ້າຮ່ວມການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບພູມິອາກາດ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ມີການພົບປະທີ່ສຳຄັນຕ່າງໆ ກັບການນຳປະເທດເຈົ້າພາບຝຣັ່ງ ເຊັ່ນ: ການພົບປະຫາລືຂອງທ່ານນາຍົກລັດຖະມົນຕີ ຫງວຽນເຕິນຢຸງ ກັບນາຍົກລັດຖະມົນຕີຝຣັ່ງ ທ່ານມານູແອນ ວາຍເຊິ, ການພົບປະກັບປະທານາທິບໍດີຝຣັ່ງ ທ່ານຟຣອງຊົວ ໂອລອງເດິ, ການພົບປະກັບປະທານສະພາສູງຝຣັ່ງ ທ່ານ ແຢຮາກ ລາກຕູແຢ ແລະ ກັບປະທານສະພາຕ່ຳຝຣັ່ງ ທ່ານ ຄລຸດ ບາກໂຕລອນ, ຕ້ອນຮັບເລຂາທິການທົ່ວປະເທດພັກກອມມູນິດຝຣັ່ງ ທ່ານ ປີແອ ໂລຄ່ອງ ແລະ ຕ້ອນຮັບຫຼາຍກຸ່ມບໍລິສັດ ແລະ ວິສາຫະກິດຝຣັ່ງ ທີ່ມີເຈຕະນາຈະລົງທຶນ, ທຳການທຸລະກິດຢູ່ຫວຽດນາມ. ເຖິງວ່າ ທ່ານນາຍົກລັດຖະມົນຕີ ຫງວຽນເຕິນຢຸງ ເຂົ້າຮ່ວມການປະຊຸມ COP 21 ເປັນການເຄື່ອນໄຫວພະຫຸພາຄີກໍ່ຕາມ, ແຕ່ກໍອາດຈະຖືວ່າ ນີ້ເປັນການຢ້ຽມຢາມປະເທດຝຣັ່ງຢ່າງເປັນທາງການ ຍ້ອນວ່າໃນໂອກາດນີ້ ນາຍົກລັດຖະມົນຕີຫວຽດນາມ ໄດ້ມີການພົບປະກັບການນຳສຸດຍອດທັງໝົດຂອງຝຣັ່ງ.
ການພົບປະ ແລະ ຕ້ອນຮັບເຫຼົ່ານີ້ ໄດ້ສະແດງໃຫ້ເຫັນເຖິງບາງຈຸດທີ່ພົ້ນເດັ່ນຄື ທັງຝ່າຍຫວຽດນາມ ແລະ ຝຣັ່ງລ້ວນແຕ່ສະແດງຄວາມຕັດສີນໃຈຍົກການພົວພັນຂຶ້ນໃຫ້ເໝາະສົມກັບການພົວພັນຄູ່ຮ່ວມຍຸດທະສາດ ເຊິ່ງສອງຝ່າຍໄດ້ລົງນາມໃນປີ 2013. ສອງຝ່າຍເປັນເອກະພາບວ່າ ທາງດ້ານການເມືອງຕ້ອງເພີ່ມທະວີການແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດ. ສອງຝ່າຍຕີລາຄາວ່າ ຄວາມພົວພັນລະຫວ່າງສອງປະເທດໄດ້ມີບາດກ້າວຂະຫຍາຍຕົວຢ່າງຕັ້ງໜ້າໃນເວລາທີ່ຜ່ານມາ ແລະ ເຫັນດີເປັນເອກະພາບວ່າ ສອງປະເທດຕ້ອງສືບຕໍ່ຜັນຂະຫຍາຍບັນດາເນື້ອໃນຂອງຄວາມພົວພັນຄູ່ຮ່ວມຍຸດທະສາດຢ່າງແຂງແຮງ ແລະ ໄດ້ເປັນເອກະພາບກັນກ່ຽວກັບຫຼາຍມາດຕະການອັນລະອຽດ ເພື່ອເພີ່ມທະວີການຮ່ວມມືຫວຽດນາມ-ຝຣັ່ງ ໃນເວລາຕໍ່ໜ້າ.
ການນຳຂອງສອງປະເທດຕີລາຄາສູງຕໍ່ການຮ່ວມມືລະຫວ່າງສອງປະເທດໃນບັນດາເວທີປາໄສຫຼາຍຝ່າຍ, ຊ່ວຍໃຫ້ຫວຽດນາມ ແລະ ຝຣັ່ງຍົກສູງຖານະບົດບາດສາກົນຂອງຕົນ. ສອງຝ່າຍເປັນເອກະສັນກັນໃຫ້ທັດສະນະວ່າ ຄວາມພິພາດຕ່າງໆຢູ່ທະເລຕາເວັນອອກ ຕ້ອງໄດ້ແກ້ໄຂດ້ວຍສັນຕິວິທີ, ບົນພື້ນຖານເຄົາລົບນັບຖືກົດໝາຍສາກົນ, ອະນຸສັນຍາສະຫະປະຊາຊາດວ່າດ້ວຍດົດໝາຍທະເລປີ 1982 (UNCLOS 1982), ຮັບປະກັນຄວາມໝັ້ນຄົງ ຄວາມປອດໄພໃນການເດີນທະເລ ແລະເດີນອາກາດ ເພື່ອຜົນປະໂຫຍດຂອງພາກພື້ນ ແລະ ຂອງທົ່ວທັງວົງຄະນະຍາດສາກົນ.
ບັນດາການພົບປະຢູ່ລະບຽງການປະຊຸມໄດ້ໃຫ້ເຫັນເຖິງຄວາມຕັດສີນໃຈການເມືອງຂອງການນຳຂອງທັງສອງປະເທດ ທີ່ປາຖະໜາຈະຊຸກຍູ້ ແລະ ເປີດກວ້າງການພົວພັນຮ່ວມມືລະຫວ່າງສອງປະເທດ ເພື່ອເຮັດໃຫ້ເນື້ອໃນແຫ່ງສາຍພົວພັນຄູ່ຮ່ວມຍຸດທະສາດທີ່ສອງຝ່າຍໄດ້ລົງນາມນັ້ນ ເປັນຮູບປະທຳ.
ທາງດ້ານເສດຖະກິດ, ສອງຝ່າຍໄດ້ເປັນເອກະພາບວ່າ ຄວາມພົວພັນເສດຖະກິດລະຫວ່າງສອງປະເທດໄດ້ຂະຫຍາຍຕົວຢ່າງແຂງແຮງໃນຊຸມປີທີ່ຜ່ານມາ. ປີ 2014 ມູນຄ່າການຄ້າສອງສົ້ນບັນລຸ 3,5 ຕື້ໂດລາສະຫະລັດ, ການລົງທຶນໂດຍກົງຂອງຝຣັ່ງ ເຂົ້າຫວຽດນາມ ກໍໄດ້ປະມານ 3,5 ຕື້ໂດລາສະຫະລັດ. ປັດຈຸບັນ ຝຣັ່ງເປັນໜຶ່ງໃນບັນດາຄູ່ຮ່ວມເອີຣົບທີ່ສຳຄັນທີ່ສຸດຂອງຫວຽດນາມ. ແຕ່ວ່າ, ທັງສອງຝ່າຍລ້ວນແຕ່ຖືວ່າ ຜົນສຳເລັດດັງກ່າວຍັງອ່ອນນ້ອຍ, ບໍ່ທັນສົມຄູ່ກັບຄວາມສາມາດບົ່ມຊ້ອນ ດັ່ງນັ້ນສອງຝ່າຍປາຖະໜາຈະຍູ້ແຮງການຮ່ວມມືດ້ານການຄ້າຍິ່ງກວ່າອີກ.
ກ່ຽວກັບການຮ່ວມມືໃນຂົງເຂດອື່ນໆ ເຊັ່ນວັດທະນະທຳ ວິທະຍາສາດເຕັກນິກ ການສຶກສາອົບຮົມ, ທັງສອງຝ່າຍມີຄວາມປີຕິຊົມຊື່ນທີ່ສຸດທີ່ເຫັນວ່າ ປັດຈຸບັນມີນັກຮຽນນັກສຶກສາຫວຽດນາມປະມານ 7.000 ຄົນ ທີ່ກຳລັງຮ່ຳຮຽນຝຶກງານຢູ່ຝຣັ່ງ, ຈຳນວນຄົນຝຣັ່ງມາທ່ອງທ່ຽວທີ່ຫວຽດນາມ ແລະຄົນຫວຽດນາມໄປທ່ອງທ່ຽວທີ່ຝຣັ່ງໄດ້ເພີ່ມຂຶ້ນທຸກໆປີ.
ກ່ຽວກັບຂົງເຂດການທ່ອງທ່ຽວ, ທ່ານນາຍົກລັດຖະມົນຕີ ຫງວຽນເຕິນຢຸງ ກໍໄດ້ເນັ້ນໜັກກັບຝ່າຍຝຣັ່ງ ວ່າ ຫວຽດນາມເປັນປະເທດທີ່ມີສັນຕິພາບ ສະຖຽນລະພາບ ແລະ ຄວາມໝັ້ນຄົງດີທີ່ສຸດ; ຫວຽດນາມຫວັງວ່າ ນັກທ່ອງທ່ຽວຝຣັ່ງຈະມາຢາມຫວຽດນາມຫຼາຍກວ່າອີກ ເປັນຕົ້ນແມ່ນໃນສະພາບທີ່ຫວຽດນາມໄດ້ຕົກລົງຍົກເວັ້ນ ວີຊ້າ ໃຫ້ແກ່ນັກທ່ອງທ່ຽວຝຣັ່ງ ໃນເວລາ 15 ວັນ; ບໍລິສັດການບິນ ຫວຽດນາມແອລາຍ ໄດ້ນຳໃຊ້ເຮືອບິນ ແອບັສ ເອ350 ໃນສາຍການບິນ ຮ່າໂນ້ຍ-ນະຄອນໂຮ່ຈີມິນ-ປາຣີ. ນີ້ແມ່ນປັດໄຈທີ່ອຳນວຍຄວາມສະດວກໃຫ້ແກ່ການພັດທະນາການທ່ອງທ່ຽວ.
ທ່ານນາຍົກລັດຖະມົນຕີກໍສະເໜີນຳລັດຖະບານຝຣັ່ງ ຄວນມີມາດຕະການອຳນວຍຄວາມສະດວກທາງດ້ານ ວີຊ້າ ໃຫ້ພົນລະເມືອງຫວຽດນາມໄປຢາມປະເທດຝຣັ່ງ ຍ້ອນວ່າປັດຈຸບັນ ຊາວຫວຽດນາມຫຼາຍຄົນທີ່ສຸດທີ່ຢາກໄປທ່ອງທ່ຽວທີ່ຝຣັ່ງ ແລະ ຝຣັ່ງກໍເປັນປະເທດທີ່ມີຊາວຫວຽດນາມດຳລົງຊີວິດຢູ່ຫຼາຍທີ່ສຸດ ດ້ວຍຈຳນວນປະມານ 300.000 ຄົນ, ເພາະສະນັ້ນ ຄວາມຕ້ອງການໄປມາຢ້ຽມຢາມຍາດຕິພີ່ນ້ອງລະຫວ່າງຫວຽດນາມ ແລະ ຝຣັ່ງ ແມ່ນຫຼາຍທີ່ສຸດ. ນອກຈາກນັ້ນ, ວິສາຫະກິດຫວຽດນາມສ່ວນຫຼາຍມີຄວາມສົນໃຈຕໍ່ຕະຫຼາດຝຣັ່ງ, ຢາກໄປຝຣັ່ງເພື່ອຊອກຮູ້ຄວາມສາມາດແລກປ່ຽນການຄ້າ ການລົງທຶນ.
ກ່ຽວກັບບັນດາຂົງເຂດການປ້ອງກັນປະເທດ, ວິທະຍາສາດເຕັກໂນໂລຊີ... ທັງສອງຝ່າຍໄດ້ເປັນເອກະສັນກັນວ່າ ຈະຊຸກຍູ້ເປີດກວ້າງການພົວພັນນີ້ຍິ່ງກວ່າອີກ ຕາມທິດຝຣັ່ງມອບໂອນເຕັກໂນໂລຊີສູງໃຫ້ຝ່າຍຫວຽດນາມ ແລະ ເຂົ້າຮ່ວມຢ່າງຕັ້ງໜ້າໃນການກໍ່ສ້າງແຫຼ່ງກຳລັງຄົນໃຫ້ຫວຽດນາມ.
ໃນໂອການນີ້, ທ່ານນາຍົກລັດຖະມົນຕີ ຫງວຽນເຕິນຢຸງ ກໍ່ໄດ້ເຊື້ອເຊີນເປັນທາງການໃຫ້ທ່ານນາຍົກລັດຖະມົນຕີ ມານູແອນ ວາຍເຊິ ມາຢ້ຽມຢາມປະເທດຫວຽດນາມ, ແລະເປັນກຽດສົ່ງຄຳເຊີນຂອງທ່ານປະທານປະເທດຫວຽດນາມ ເຈືອງເຕິນຊາງ ມາຍັງທ່ານປະທານາທິບໍດີຝຣັ່ງ ຝຣອງຊົວ ໂອລອງເດິ, ແລະຄຳເຊິີນຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ມາຍັງທ່ານປະທານສະພາສູງ, ປະທານສະພາຕ່ຳຝຣັ່ງ ໃຫ້ມາຢາມປະເທດຫວຽດນາມ. ບັນດາການນຳຝຣັ່ງ ໄດ້ສະແດງຄວາມຍິນດີ ແລະ ສັນຍາວ່າຈະຈັດການໄປຢ້ຽມຢາມຫວຽດນາມ ໃນເວລາທີ່ສະດວກດີ.
ເນື່ອງໃນໂອກາດໄປຮ່ວມການປະຊຸມ COP 21, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ມີການຕ້ອນຮັບທ່ານ ຢັອງ ເພຍ ອາກຊອມໂບ ເລຂາທິການສະມາຄົມມິດຕະພາບຝຣັ່ງ-ຫວຽດນາມ; ພົບປະ, ໂອ້ລົມຢ່າງສະໜິດສະໜົມກັບຜູ້ຕາງໜ້າວົງຄະນາຍາດຊາວຫວຽດນາມ ແລະ ພະນັກງານ ລັດຖະກອນສະຖານທູດຫວຽດນາມ ປະຈຳສາທາລະນະລັດຝຣັ່ງ.
ໃນງານຕ້ອນຮັບທ່ານເລຂາທິການສະມາຄົມມິດຕະພາບ ຝຣັ່ງ-ຫວຽດນາມ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ສະແດງຄວາມຊົມເຊີຍສະມາຄົມມິດຕະພາບ ຝຣັ່ງ-ຫວຽດນາມ ທີ່ໄດ້ມີຄວາມມານະພະຍາຍາມເພີ່ມທະວີການຕິດຕໍ່ ແລກປ່ຽນ, ປະກອບສ່ວນເຂົ້າໃນການຂະຫຍາຍສາຍພົວພັນຮ່ວມມືໃນປັດຈຸບັນລະຫວ່າງສອງປະເທດ, ທ່ານນາຍົກລັດຖະມົນຕີ ຕີລາຄາສູງຕໍ່ບັນດາໂຄງການ ແຜນງານ ການເຄື່ອນໄຫວຂອງສະມາຄົມມິດຕະພາບ ຝຣັ່ງ-ຫວຽດນາມ ໃນເວລາທີ່ຜ່ານມາ, ເປັນຕົ້ນແມ່ນການຊ່ວຍເຫຼືອຫວຽດນາມ ກຳຈັດປັດເປົ່າຜົນຮ້າຍຂອງສົງຄາມ, ແກ້ໄຂບັນດາບັນຫາພັດທະນາແບບຍືນຍົງ, ຫລຸດຜ່ອນຄວາມທຸກຍາກ, ກໍຄືການຈັດຕັ້ງການເຄື່ອນໄຫວຕ່າງໆທີ່ມີຜົນແທດຈິງ ມີຄວາມໝາຍເຊັ່ນ ການປະຊຸມສຳມະນາໃນຫົວຂໍ້ "ຫວຽດນາມໃນທຸກວັນນີ້"; ເປັນຜູ້ຂຽນຮ່ວມ "ຄຳຮຽກຮ້ອງເຄົາລົບນັບຖືຜືນແຜ່ນດິນອັນຄົບຖ້ວນ ແລະ ສັນຕິພາບຢູ່ທະເລຕາເວັນອອກ"…. ທ່ານນາຍົກລັດຖະມົນຕີ ຫງວຽນເຕິນຢຸງ ສະແດງຄວາມຫວັງວ່າ ທ່ານເລຂາທິການສະມາຄົມມິດຕະພາບ ຝຣັ່ງ-ຫວຽດນາມ ຈະສືບຕໍ່ມີການປະກອບສ່ວນອັນຕັ້ງໜ້າເຂົ້າໃນການຊຸກຍູ້ ຄວາມພົວພັນມິດຕະພາບ ແລະ ການຮ່ວມມືລະຫວ່າງສອງຊາດຫວຽດນາມ ແລະ ຝຣັ່ງ, ເປັນຂົວຕໍ່ຊ່ວຍໃຫ້ເພື່ອນມິດຝຣັ່ງ ແລະ ສາກົນນັບມື້ນັບເຂົ້າໃຈ ແລະ ຮັກແພງຫວຽດນາມ.
ທົບທວນຫຼັກໝາຍສາຍພົວພັນມິດຕະພາບຝຣັ່ງ-ຫວຽດນາມແຕ່ປີ 1961, ທ່ານຢັອງ ເພຍ ອາກຊອມໂບ ເລຂາທິການສະມາຄົມມິດຕະພາບເນັ້ນວ່າ ຄວາມສາມັກຄີລະຫວ່າງປະຊາຊົນສອງປະເທດເປັນພື້ນຖານອັນໜັກແໜ້ນ ເພື່ອເພີ່ມພູນຄູນສ້າງໃຫ້ສາຍພົວພັນມິດຕະພາບ ແລະ ຍູ້ແຮງການຮ່ວມມືສອງຝ່າຍຝຣັ່ງ-ຫວຽດນາມ ໃຫ້ເປັນຮູບປະທຳທີ່ແທດຈິງ, ເພື່ອຜົນປະໂຫຍດຂອງປະຊາຊົນສອງປະເທດ. ທ່ານເລຂາທິການຢືນຢັນ ສະມາຄົມມິດຕະພາບຝຣັ່ງ-ຫວຽດນາມ ຈະສືບຕໍ່ຜັນຂະຫຍາຍບັນດາໂຄງການ ແຜນງານ ໃຫ້ມີຜົນແທດຈິງຍິ່ງກວ່າອີກ, ເປັນຕົ້ນແມ່ນໃນການຊ່ວຍເຫຼືອຜູ້ຖືກເຄາະຮ້າຍຍ້ອນທາດພິດສີສົ້ມ ແລະ ການເຄື່ອນໄຫວດ້ານມະນຸດສະທຳຢູ່ຫວຽດນາມ, ພ້ອມກັນນັ້ນກໍສືບຕໍ່ປະກອບສ່ວນຊຸກຍູ້ການຮ່ວມມືລະຫວ່າງສອງປະເທດເວົ້າລວມ ແລະ ລະຫວ່າງບັນດາທ້ອງຖິ່ນຂອງສອງປະເທດຝຣັ່ງ-ຫວຽດນາມ ເວົ້າໂດຍສະເພາະ....
ໃນທີ່ການພົບປະໂອ້ລົມກັບຜູ້ຕາງໜ້າວົງຄະນາຍາດຊາວຫວຽດນາມ ແລະ ພະນັກງານ ລັດຖະກອນສະຖານທູດຫວຽດນາມປະຈຳສາທາລະນະລັດຝຣັ່ງ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ຕີລາຄາສູງຕໍ່ການເຄື່ອນໄຫວຕົວຈິງທີ່ຫັນເມືອຫາປະເທດຊາດບ້ານເມືອງ ຂອງພີ່ນ້ອງຊາວຫວຽດນາມທີ່ພວມດຳລົງຊີວິດ ຮ່ຳຮຽນ ທຳມາຫາກິນຢູ່ປະເທດຝຣັ່ງ; ຕີລາຄາສູງຕໍ່ການປະກອບສ່ວນອັນຕັ້ງໜ້າຂອງພະນັກງານ ລັດຖະກອນສະຖານທູດຫວຽດນາມປະຈຳຝຣັ່ງ ທີ່ໄດ້ຊຸກຍູ້ຄວາມພົວພັນຮ່ວມມືມິດຕະພາບຫວຽດນາມ-ຝຣັ່ງໃນຂົງເຂດຕ່າງໆ ໃຫ້ນັບມື້ນັບເຂົ້າສູ່ລວງເລິກ ແທດຈິງ ແລະ ມີປະສິດທິຜົນ. ທ່ານນາຍົກລັດຖະມົນຕີ ຫງວຽນເຕິນຢຸງ ຫວັງວ່າພະນັກງານ ລັດຖະກອນສະຖານທູດຫວຽດນາມປະຈຳຝຣັ່ງ ຈະຊາບຊືມກຳແໜ້ນແຜນນະໂຍບາຍ ແນວທາງ ນະໂຍບາຍການຕ່າງປະເທດຂອງພັກແລະລັດ; ປະຕິບັດເປັນຢ່າງດີການຊ່ວຍໜູນ, ວຽກງານປົກປ້ອງພົນລະເມືອງ; ຊຸກຍູ້ຄວາມພົວພັນຮ່ວມມືຫວຽດນາມ-ຝຣັ່ງ ໃຫ້ຂະຫຍາຍຕົວຢ່າງບໍ່ຢຸດຢັ້ງ ມີປະສິດທິຜົນ ແລະ ເລິກເຊິ່ງຍິ່ງກວ່າອີກ; ເປັນເຈົ້າການ ປະດິດສ້າງໃນວຽກງານ, ປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ສຳເລັດຜົນເປັນຢ່າງດີ.
ກ່ຽວພັນເຖິງການປະຊຸມ COP 21, ຄະນະຜູ້ແທນຫວຽດນາມ ນຳໂດຍທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ເຂົ້າຮ່ວມການປະຊຸມຢ່າງຕັ້ງໜ້າ. ໃນວາລະການປະຊຸມຄົບຄະນະ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ມີຄຳກ່າວປາໄສທີ່ສຳຄັນ ເຊິ່ງໄດ້ຍົກໃຫ້ແຫັນແຈ້ງວ່າ ເຖິງວ່າປະເທດຫວຽດນາມຍັງທຸກຈົນ, ຖືກຈຳກັດທາງດ້ານການເງິນກໍຕາມ, ແຕ່ຫວຽດນາມກໍໄດ້ມີຄວາມພະຍາຍາມ ເພື່ອປະກອບການເງິນຈຳນວນໜຶ່ງເຂົ້າໃນກອງທຶນລວມ ເພື່ອປົກປັກຮັກສາສິ່ງແວດລ້ອມແລະຮັບມືກັບການປ່ຽນແປງສະພາບພູມິອາກາດ. ທັດສະນະຂອງຫວຽດນາມ ແມ່ນຕ້ອງເຄົາລົບນັບຖືຄວາມແຕກຕ່າງກ່ຽວກັບລະດັບການພັດທະນາຂອງບັນດາປະເທດທີ່ຕ່າງກັນ, ໝາຍຄວາມວ່າບັນດາເປົ້າໝາຍການພັດທະນາ, ບັນດາປະເທດຈະເລີນຮັ່ງມີທີ່ປ່ອຍທາດກາກບໍນິກຫຼາຍກວ່າ ກໍຕ້ອງມີຄວາມຮັບຜິດຊອບຫຼາຍກວ່າທຽບກັບປະເທດທຸກຈົນ ປະເທດທີ່ມີການປ່ອຍອາຍແກັດເຮືອນແກ້ວໜ້ອຍ, ຕ້ອງຊ່ວຍເຫຼືອບັນດາປະເທດທຸກຈົນທາງດ້ານການເງິນ ເພື່ອຫັນປ່ຽນຕົວແບບພະລັງງານ, ລົງທຶນໃຫ້ແກ່ພະລັງງານສະອາດ. ທັດສະນະນີ້ໄດ້ຮັບການແບ່ງປັນຈາກບັນດາປະເທດທີ່ເຂົ້າຮ່ວມການປະຊຸມ COP 21.
ໃນໂຄງການດຳເນີນງານ, ທ່ານນາຍົກລັດຖະມົນຕີ ຫງວຽນເຕິນຢຸງcũng ໄດ້ມີການພົບປະກັນຫົວໜ້າຄະນະຜູ້ແທນ 24 ປະເທດທີ່ເຂົ້າຮ່ວມການປະຊຸມ COP 21. ທີ່ການພົບປະເຫຼົ່ານີ້, ບັນດາປະເທດລ້ວນແຕ່ຕີລາຄາສູງຕໍ່ການເຂົ້າຮ່ວມຢ່າງຕັ້ງໜ້າ ກໍຄືຄຳໝັ້ນສັນຍາທີ່ແຂງແຮງຂອງຫວຽດນາມ ໃນການຕໍ່ສູ້ຕ້ານການປ່ຽນແປງສະພາບພູມິອາກາດ. ການເຂົ້າຮ່ວມຂອງທ່ານນາຍົກລັດຖະມົນຕີ ຫງວຽນເຕິນຢຸງ ແລະ ຄະນະຜູ້ແທນຫວຽດນາມໃນການປະຊຸມ ໄດ້ຮັບການຕີລາຄາສູງຈາກເພື່ອນມິດສາກົນ, ພິເສດແມ່ນປະເທດເຈົ້າພາບຝຣັ່ງ, ຍ້ອນຫວຽດນາມໄດ້ປະກອບສ່ວນອັນເໝາະສົມເຂົ້າໃນຄວາມສຳເລັດຂອງການປະຊຸມ./.
ໂດຍ ແທງແອງ