ການປະຊຸມ COP 21: ຫວຽດນາມຮ່ວມມື ຮ່ວມແຮງ ກັບວົງຄະນາຍາດສາກົນເພື່ອ ຮັບມືກັບການປ່ຽນແປງສະພາບອາກາດ.
ວກ.ອອນໄລ - ໂດຍຕອບສະໜອງຕາມຄຳເຊີນຂອງທ່າຍ ຟຣອງຊົວ ໂອລອງເດິ ປະທານາທິບໍດີແຫ່ງສາທາລະນະລັດຝຣັ່ງ, ທ່ານຫງວຽນເຕິນຢຸງ ນາຍົກລັດຖະມົນຕີແຫ່ງ ສສ.ຫວຽດນາມ ໄດ້ໄປຮ່ວມການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບອາກາດ (COP 21) ທີ່ຈັດຂຶ້ນຢູ່ນະຄອນຫຼວງປາຣີ ແຕ່ວັນທີ 30 ພະຈິກ ຫາວັນທີ 1 ທັນວາ 2015.
ຢັ້ງຢືນຄຳໝັ້ນສັນຍາຢ່າງໜັກແໜ້ນ
ການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ (COP 21) ໄດ້ດຳເນີນໄປໃນສະພາບການທີ່ບັນດາປະເທດໃນໂລກກຳລັງເພີ່ມທະວີຄວາມພະຍາຍາມຮັບມືກັບບັນດາສິ່ງທ້າທາຍຄວາມສະຫງົບທີ່ບໍ່ເປັນແບດັ້ງເດີມ, ໃນນັ້ນ ມີການປ່ຽນແປງສະພາບອາກາດ. ນີ້ແມ່ນໜຶ່ງໃນບັນດາການປະຊຸມທົ່ວໂລກທີ່ໃຫຍ່ທີສຸດໃນປີ 2015 ເຊິ່ງໄດ້ຮັບຄວາມເອົາໃຈໃສ່ເປັນພິເສດຈາກວົງຄະນາຍາດສາກົນ, ຖັດຈາກການປະຊຸມທົ່ວໂລກກ່ຽວກັບການຫລຸດຜ່ອນຄວາມສ່ຽງ ຍ້ອນໄພທຳມະຊາດ, ການປະຊຸມສາກົນກ່ຽວກັບການເງິນເພື່ອການພັດທະນາ ແລະ ກອງປະຊຸມສຸດຍອດອົງການສະຫະປະຊາຊາດຮັບຮອງຜ່ານລະບຽບວາລະການປະຊຸມ 2030 ເພື່ອການພັດທະນາແບບຍືນຍົງ. ເປົ້າໝາຍຂອງການປະຊຸມ COP 21 ແມ່ນຮັບຮອງຜ່ານກອບກົດໝາຍທົ່ວໂລກໃໝ່ວ່າດ້ວຍການປ່ຽນແປງສະພາບອາກາດ ສຳລັບໄລຍະພາຍຫຼັງປີ 2020 (ເອີ້ນວ່າ ຄວາມຕົກລົງປາຣີ 2015), ຕາມນັ້ນ ບັນດາປະເທດໃຫ້ຄຳໝັ້ນສັນຍາຈະລົດການປ່ອຍອາຍກາກບອນດີໂອຊິດ ແນໃສ່ຈຳກັບການເພີ່ມອຸນຫະພູມສະເລ່ຍທົ່ວໂລກໃຫ້ຢູ່ໃນລະດັບບໍ່ເຖິງ 2 ອົງສາ C ໃນທ້າຍສະຕະວັດທີ XXI ທຽບກັບສະໄໝກ່ອນອຸດສະຫະກຳ 1850 - 1990.
ທ່ານນາຍົກລັດຖະມົນຕີ ຫງວຽນເຕິນຢຸງ ນຳໜ້າຄະນະຜູ້ແທນຫວຽດນາມເຂົ້າຮ່ວມການປະຊຸມ COP 21 ຄັ້ງນີ້ ແມ່ນເພື່ອແນໃສ່ຜັນຂະຫຍາຍ ແຜນນະໂຍບາຍເຊື່ອມໂຍງສາກົນ ຂອງຫວຽດນາມ ຢ່າງເປັນເຈົ້າການແລະຕັ້ງໜ້າ, ສະແດງໃຫ້ເຫັນເຖິງຄຳໝັ້ນສັນຍາອັນໜັກແໜ້ນຂອງຫວຽດນາມ ໃນການເຂົ້າຮ່ວມຄວາມມານະພະຍາຍາມລວມຂອງວົງຄະນາຍາດສາກົນ ແນໃສ່ຮັບມືກັບການປ່ຽນແປງສະພາບອາກາດ, ພ້ອມກັນນັ້ນກໍຊຸກຍູ້ສວຍໃຊ້ໂອກາດຮ່ວມມືລະຫວ່າງຫວຽດນາມ ກັບບັນດາປະເທດ ແລະ ບັນດາຄູ່ຮ່ວມໃນໂລກ, ເປັນຕົ້ນແມ່ນໃນຂົງເຂດການປ່ຽນແປງສະພາບອາກາດ.
ໂດຍຮັບຮູ້ໄດ້ຜົນກະທົບທີ່ຮ້າຍແຮງຂອງການປ່ຽນແປງສະພາບອາກາດ ຕໍ່ກັບການພັດທະນາແບບຍືນຍົງຢູ່ຫວຽດນາມ ກໍຄືຢູ່ໃນໂລກ, ແຕ່ດົນແລ້ວທີ່ລັດຖະບານຫວຽດນາມໄດ້ເອົາໃຈໃສ່ກໍ່ສ້າງແລະປະຕິບັດ ບັນດາໂຄງການ, ນະໂຍບາຍແຫ່ງຊາດກ່ຽວກັບການຮັບມືກັບການປ່ຽນແປງສະພາບອາກາດ. ຫວຽດນາມໄດ້ເຂົ້າຮ່ວມໃນຫຼາຍສັນຍາສາກົນທີ່ສຳຄັນ, ປະກອບສ່ວນເຂົ້າໃນວິວັດການເຈລະຈາສາກົນກ່ຽວກັບບັນຫາອາກາດ.
ໃນເວລາທີ່ຜ່ານມາ, ບັນດາກະຊວງ ຂະແໜງການ ອົງການຄົ້ນຄວ້າ, ບັນດາອົງກາຈັດຕັ້ງນອກພາກລັດຂອງຫວຽດນາມ, ບັນດາອົງການຈັດຕັ້ງສາກົນ ແລະ ຄູ່ຮ່ວມການພັດທະນາ ໄດ້ຕັ້ງໜ້າສົມທົບຢ່າງແໜ້ນແຟ້ນເພື່ອສຳເລັດລາຍງານວ່າດ້ວຍການຫລຸດຜ່ອນການປ່ອຍອາຍແກັດເຮືອນແກ້ວ (INDC) ຂອງຫວຽດນາມ. ຫວຽດນາມໄດ້ມອບ INDC ໃຫ້ອົງການຮັບຜິດຊອບຂອງສະຫະປະຊາຊາດ ແຕ່ວັນທີ 30 ກັນຍາ 2015 ເຊິ່ງປະກອບດ້ວຍສອງພາກ: ທີ່ໜຶ່ງ, ຫລຸດຜ່ອນການປ່ອຍອາຍແກັດເຮືອນແກ້ວ, ກວມດ້ວຍການເຄື່ອນໄຫວຕ່າງໆ ທີ່ຈະໄດ້ຮັບການປະຕິບັດດ້ວຍແຫຼ່ງພະລັງພາຍໃນປະເທດ (ການເຄື່ອນໄຫວປະຕິບັດງານບໍ່ມີເງື່ອນໄຂ) ແລະ ການເຄື່ອນໄຫວຕ່າງໆທີ່ອາດຈະໄດ້ປະຕິບັດ ຖ້າຫາກໄດ້ຮັບຄວາມຊ່ວຍເຫຼືອຈາກວົງຄະນາຍາດສາກົນ. ທີ່ສອງ, ປັບຕົວໃຫ້ແທດເໝາະກັບການປ່ຽນແປງດິນຟ້າອາກາດ, ກວມດ້ວຍການເຄື່ອນໄຫວຕ່າງໆທີ່ພວມໄດ້ຮັບການປະຕິບັດ, ຄວາມຂາດແຄນຕ່າງໆໃນລະບຽບກົດໝາຍ, ນະໂຍບາຍ, ການເງິນ, ແຫຼ່ງກຳລັງຄົນ ແລະ ເຕັກໂນໂລຊີ, ບັນດາມາດຕະການປັບຕົວໃຫ້ແທດເໝາະ ສຳລັບໄລຍະ 2021 - 2030.
ຮ່ວມມືຮ່ວມແຮງກັບວົງຄະນາຍາດສາກົນ ພ້ອມກັນຮັບມືກັບການປ່ຽນແປງສະພາບອາກາດ
ໃນທີ່ການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ມີບົດປະໄສສຳຄັນ ທີ່ສະແດງໃຫ້ເຫັນເຖິງຄວາມຮັບຜິດຊອບ ຄຳໝັ້ນສັນຍາ ແລະ ຄວາມມານະພະຍາຍາມຂອງຫວຽດນາມ ໃນການຮ່ວມມືຮ່ວມແຮງກັບວົງຄະນາຍາດສາກົນ ເພື່ອຮັບມືກັບບັນຫາການປ່ຽນແປງສະພາບອາກາດທົ່ວໂລກ.
ໂດຍນຳໜ້າລັດຖະບານຂອງປະເທດທີ່ຄາດຄະເນວ່າ ຈະຖືກເສຍຫາຍງ່າຍທີ່ສຸດ ຍ້ອນການປ່ຽນແປງສະພາບອາກາດ, ທ່ານນາຍົກລັດຖະມົນຕີ ຫງວຽນເຕິນຢຸງ ເນັ້ນບັນດາຜົນກະທົບອັນຮ້າຍແຮງຂອງການປ່ຽນແປງສະພາບອາກາດ ທີ່ມີຕໍ່ການພັດທະນາແບບຍືນຍົງຂອງຫວຽດນາມ ກໍຄືຂອງໂລກ, ຢັ້ງຢືນຄຳໝັ້ນສັນຍາການເມືອງອັນໜັກແໜ້ນຂອງລັດຖະບານຫວຽດນາມ ທີ່ໄດ້ ພວມ ແລະ ສືບຕໍ່ເປັນເຈົ້າການ, ມີຄວາມຮັບຜິດຊອບ ພ້ອມກັນກັບວົງຄະນາຍາດສາກົນ ຮັບມືກັບການປ່ຽນແປງສະພາບອາກາດ ດ້ວຍການກະທຳອັນລະອຽດຕົວຈິງ ໃນລະດັບຊາດ ແລະ ລະດັບໂລກ.
ກ່າວປາໄສຕໍ່ໜ້າພະນະທ່ານຜູ້ນຳ, ປະມຸກຂອງ 150 ປະເທດໃນໂລກ ແລະ ຜູ້ນຳຂອງບັນດາອົງການຈັດຕັ້ງສາກົນທີ່ຕາງໜ້າໃຫ້ 196 ພາກສ່ວນທີ່ເຂົ້າຮ່ວມກອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ, ທ່ານນາຍົກລັດຖະມົນຕີ ຫງວຽນເຕິນຢຸງ ສະແດງໃຫ້ເຫັນແຈ້ງທັດສະນະຂອງຫວຽດນາມ: “ພວກເຮົາມີໜ້າຢູ່ທີ່ການປະຊຸມຄັ້ງທີ 21 ຂອງກອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດນີ້ ເພື່ອສະແດງອອກເຖິງຄຳໝັ້ນສັນຍາສະໜັບສະໜູນ, ຊຸກຍູ້ວິວັດທະນາການເຈລະຈາ ແລະ ຮັບຮອງຜ່ານຄວາມຕົກລົງວ່າດ້ວຍສະພາບອາກາດທົ່ວໂລກ ພາຍຫຼັງປີ 2020. ເນື້ອໃນຂອງຄວາມຕົກລົງຕ້ອງຮັບປະກັນການປະກອບສ່ວນສະເໝີພາບລະຫວ່າງບັນດາປະເທດ ແລະ ມີຄວາມສົມສ່ວນກັນໃນບັນດາເນື້ອໃນ ກ່ຽວກັບການຫລຸດຜ່ອນ, ການປັບຕົວໃຫ້ແທດເໝາະ, ການເງິນ, ການພັດທະນາ ແລະ ມອບໂອນເຕັກໂນໂລຊີ,.... ບັນດາປະເທດຈະເລີນພັດທະນາຕ້ອງນຳໜ້າໃນການປະຕິບັດຄຳໝັ້ນສັນຍາຂອງຕົນ, ພ້ອມກັນນັ້ນກໍຊ່ວຍເຫຼືອ ແລະ ເພີ່ມທະວີກຳລັງຄວາມສາມາດໃຫ້ບັນດາປະເທດກຳລັງພັດທະນາ ເພື່ອພ້ອມກັນປະຕິບັດຄວາມຕົກລົງຢ່າງສຳເລັດຜົນ”.
ທ່ານນາຍົກລັດຖະມົນຕີ ຫງວຽນເຕິນຢຸງ ກໍ່ຢັ້ງຢືນວ່າ ແຕ່ນີ້ຮອດປີ 2020, ໃນເງື່ອນໄຂຫຍຸ້ງຍາກທາງດ້ານແຫຼ່ງພະລັງ ແຕ່ຫວຽດນາມກໍ່ສືບຕໍ່ຕັ້ງໜ້າຜັນຂະຫຍາຍແຜນຍຸດທະສາດ, ໂຄງການ, ແຜນການກ່ຽວກັບຮັບມືກັບການປ່ຽນແປງສະພາບອາກາດ ໃນຫຼາຍຂົງເຂດ; ປະຕິບັດພັນທະຕ່າງໆ ໃນກອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ ແລະ ອະນຸສັນຍາ ກີໂອໂຕ ຢ່າງເຂັ້ມງວດ. ຫວຽດນາມຈະປະກອບເງິນ 1 ລ້ານໂດລາສະຫະລັດ ເຂົ້າໃນກອງທຶນອາກາດຂຽວ ໄລຍະ 2016 - 2020.
ສຳລັບໄລຍະພາຍຫຼັງປີ 2020, ທ່ານນາຍົກລັດຖະມົນຕີ ຍົກໃຫ້ເຫັນແຈ້ງວ່າ, ເຖິງວ່າເປັນປະເທດກຳລັງພັດທະນາທີ່ມີຄວາມຫຍຸ້ງຍາກຫຼາຍຢ່າງ ແລະ ຖືກຜົນກະທົບຢ່າງຮ້າງແຮງຈາກການປ່ຽນແປງສະພາບອາກາດກໍ່ຕາມ, ແຕ່ຫວຽດນາມກໍ່ຍັງໃຫ້ຄຳໝັ້ນສັນຍາຈະລົດ 8% ປະລິມາມການປ່ອຍອາຍແກັດເຮືອນແກ້ວໃນປີ 2030 ແລະ ອາດຈະລົດເຖິງ 25% ຖ້າຫາກໄດ້ຮັບການຊ່ວຍເຫຼືອຢ່າງມີປະສິດທິຜົນຈາກວົງຄະນາຍາດສາກົນ. ຫວຽດນາມຈະພິຈາລະນາຕາມກຳນົດເວລາ ແລະ ດັດສົມໃຫ້ສອດຄ່ອງກັບເງື່ອນໄຂຕົວຈິງຂອງຕົນ.
ທ່ານນາຍົກລັດຖະມົນຕີ ຫງວຽນເຕິນຢຸງ ເນັ້ນວ່າ: “ສະມັດຊາໃຫຍ່ສະຫະປະຊາຊາດໄດ້ຮັບຮອງຜ່ານລະບຽບວາລະການປະຊຸມ 2030 ເພື່ອການພັດທະນາແບບຍືນຍົງ. ການຜັນຂະຫຍາຍລະບຽບວາລະການປະຊຸມ 2030 ຮຽກຮ້ອງໃຫ້ພວກເຮົາຕ້ອງມີຄວາມຕັດສີນໃຈການເມືອງຢ່າງແຂງແຮງ ແລະ ສົມທົບຢ່າງແໜ້ນແຟ້ນນຳກັນໃນການປະຕິບັດຄວາມຕົກລົງວ່າດ້ວຍສະພາບອາກາດທົ່ວໂລກ ພາຍຫຼັງປີ 2020 ຢ່າງເຂັ້ມງວດ ຄົບຖ້ວນ ແລະ ມີປະສິດທິຜົນ. ຕາງໜ້າລັດຖະບານ ແລະ ປະຊາຊົນຫວຽດນາມ, ຂ້າພະເຈົ້າຂໍສະແດງຄວາມຂອບອົກຂອບໃຈ ແລະ ຫວັງທີ່ສຸດວ່າຈະໄດ້ຮັບການຮ່ວມມື, ຊ່ວຍເຫຼືອອັນລ້ຳຄ່າຂອງບັນດາປະເທດ, ບັນດາອົງການຈັດຕັ້ງສາກົນ ໃຫ້ແກ່ການພັດທະນາເສດຖະກິດ-ສັງຄົມຂອງຫວຽດນາມເວົ້າລວມ ແລະ ໃຫ້ການຮັບມືກັບການປ່ຽນແປງສະພາບອາກາດເວົ້າໂດຍສະເພາະ. ພວກຂ້າພະເຈົ້າຈະປະຕິບັດເປັນຢ່າງດີໜ້າທີຮັບຜິດຊອບ ແລະ ບັນດາຄຳໝັ້ນສັນຍາແຫ່ງຊາດຂອງຕົນ”.
ຕາມລາຍການເຄື່ອນໄຫວທີ່ການປະຊຸມ COP 21, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ພ້ອມກັນກັບນາຍົກລັດຖະມົນຕີໂຮນລັງ ທ່ານມາກ ຣຸດທີ ແລະ ຮອງປະທານທະນາຄານໂລກ ທ່ານລໍຣ່າ ທັກເກິ ເປັນປະທານຮ່ວມໃນວາລະການປະຊຸມສົນທະນາຂັ້ນສູງ ໃນຫົວຂໍ້ “ຫວຽດນາມຮ່ວມມືຮ່ວມແຮງພ້ອມກັບບັນດາຄູ່ຮ່ວມສາກົນຮັບມືກັບສິ່ງທ້າທາຍຕ່າງໆຂອງການປ່ຽນແປງສະພາບອາກາດ ຢູ່ເຂດທົ່ງພຽງແມ່ນ້ຳຂອງ” ໂດຍມີການເຂົ້າຮ່ວມຂອງເຈົ້າໜ້າທີ່ອາວຸໂສຈາກບັນດາປະເທດ 30 ທ່ານ.
ໃນບົດປາໄສທີ່ວາລະການປະຊຸມສົນທະນານີ້, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ສັງເກດວ່າ, ວົງຄະນາຍາດສາກົນກຳລັງປະເຊີນໜ້າກັບຜົນກະທົບທາງລົບຈາກການປ່ຽນແປງສະພາບອາກາດ. ນີ້ກໍ່ແມ່ນສິ່ງທ້າທາຍທີ່ໃຫຍ່ຫຼວງຕໍ່ກັບການພັດທະນາເສດຖະກິດ-ສັງຄົມຂອງຫວຽດນາມ ເຊິ່ງເປັນໜຶ່ງໃນ 5 ປະເທດໃນໂລກທີ່ຖືກຜົນກະທົບທີ່ໜັກໜ່ວງທີ່ສຸດຂອງການປ່ຽນແປງສະພາບອາກາດ, ໃນນັ້ນມີເຂດທົ່ງພຽງແມ່ນ້ຳຂອງ. ເຂດທົ່ງພຽງແມ່ນ້ຳຂອງຂອງຫວຽດນາມມີປະຊາກອນກວ່າ 18 ລ້ານຄົນ, ເນື້ອທີ່ດິນທົ່ງພຽງເກືອບ 4 ໝື່ນຕາລາງກີໂລແມັດ, ເປັນບ່ອນທີ່ພວມຖືກຜົນກະທົບ “ຄູ່” ຍ້ອນການປ່ຽນແປງສະພາບອາກາດພາໃຫ້ນ້ຳທະເລຍຶ່ງຂຶ້ນ ແລະ ຍ້ອນການເຄື່ອນໄຫວສ້າງເຂື່ອນ, ຂຸດຄົ້ນ ແລະ ນຳໃຊ້ນ້ຳແບບບໍ່ຍືນຍົງ ຢູ່ບໍລິເວນຕົ້ນນ້ຳແມ່ນ້ຳຂອງ. ຫຼາຍແຫ່ງໃນເຂດນີ້ເຄີຍຖືກພາຍຸ ນ້ຳຖ້ວມຫຼາຍຄັ້ງ, ກໍ່ຄວາມເສຍຫາຍຢ່າງໜັກໜ່ວງທາງດ້ານຊີວິດຄົນ ແລະ ເສດຖະກິດ. ໄພແຫ້ງແລ້ງພາໃຫ້ເກີດສະພາບນ້ຳເຄັມແຊກຊຶມເຂົ້າທົ່ງນັບມື້ນັບເພີ່ມຂຶ້ນ, ເປັນຜົນສະທ້ອນເຖິງດິນປູກຝັງໃນເນື້ອທີ່ເກືອບ 7 ແສນເຮັກຕາ, ກວມເອົາປະມານ 40% ໃນລວມຍອດດິນກະສິກຳ 1,7 ລ້ານເຮັກຕາຂອງທົ່ວເຂດນີ້. ຖ້າຫາກບໍ່ມີມາດຕະການຮັບມືທີ່ສອດຄ່ອງ ກໍ່ອາດຈະຄາດຄະເນໄດ້ວ່າ ຮອດທ້າຍສະຕະວັດທີ XXI, ນ້ຳທະເລຍຶ່ງຂຶ້ນສູງ 1 ແມັດຈະເຮັດໃຫ້ນ້ຳຖ້ວມກວມເອົາ 40% ຂອງເນື້ອທີ່ ແລະ ສົ່ງຜົນສະທ້ອນເຖິງການທຳມາຫາກິນດຳລົງຊີວິດຂອງປະຊາຊົນເກືອບ 55% ໃນຈຳນວນພົນລະເມືອງເຂດທົ່ງພຽງແມ່ນ້ຳຂອງຫວຽດນາມ. ຍິ່ງກວ່ານັ້ນອີກ, ເຂດນີ້ຍັງເປັນບ່ອນຜະລິດເຂົ້າສົ່ງນອກ ເຊິ່ງກວມເອົາປະມານ 1/5 ຍອດປະລິມານການຄ້າຂາຍເຂົ້າສານໃນທົ່ວໂລກ (ປີ 2014), ສະໜອງເຂົ້າສານໃຫ້ຫຼາຍລ້ານຄົນຢູ່ຫຼາຍປະເທດໃນພາກພື້ນ ແລະ ໃນໂລກ. ໂດຍຮັບຮູ້ຢ່າງຈະແຈ້ງກ່ຽວກັບສິ່ງທ້າທາຍເຫຼົ່ານີ້, ເຖິງວ່າຍັງມີຄວາມຫຍຸ້ງຍາກ ຂໍ້ຈຳກັດຫຼາຍຢ່າງກ່ຽວກັບແຫຼ່ງພະລັງກໍ່ຕາມ, ແຕ່ລັດຖະບານຫວຽດນາມ ກໍ່ໄດ້ສຸມໃສ່ຊີ້ນຳ ແລະ ຜັນຂະຫຍາຍສັບຊ້ອນການເຄື່ອນໄຫວຮັບມືກັບການປ່ຽນແປງສະພາບອາກາດ ເຂົ້າໃນບັນດາແຜນກຳນົດ, ແຜນການພັດທະນາເສດຖະກິດ-ສັງຄົມ 5 ປີ ແລະ ປະຈຳປີຂອງເຂດ. ທ່ານນາຍົກລັດຖະມົນຕີສະແດງຄວາມພາກພູມໃຈເມື່ອເຫັນວ່າ ຄວາມມານະພະຍາຍາມຂອງຫວຽດນາມໃນເວລາທີ່ຜ່ານມາ ໄດ້ຮັບຄວາມຍອມຮັບ ແລະ ສະໜັບສະໜູນຈາກວົງຄະນາຍາດສາກົນ.
ຜ່ານການສົນທະນາ, ຫວຽດນາມໄດ້ຮັບເອົາຄຳສະເໜີແນະຕ່າງໆ ກ່ຽວກັບວິທີແກ້ໄຂ, ແບບວິທີຮ່ວມມື, ຊ່ວຍເຫຼືອໃຫ້ຫວຽດນາມຍົກສູງປະສິທິພາບການຮັບມືກັບການປ່ຽນແປງສະພາບອາກາດ ແລະ ພັດທະນາແບບຍືນຍົງຢູ່ເຂດທົ່ງພຽງແມ່ນ້ຳຂອງ./.
ສັງລວມໂດຍ ທູເຟືອງ