ຮັກສາ ແລະ ຊຸກຍູ້ຄວາມພົວພັນພິເສດ ຫວຽດນາມ - ລາວ ຢ່າງບໍ່ຢຸດຢັ້ງ
ໃນຂອບເຂດການຢ້ຽມຢາມຫວຽດນາມ, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ພົບປະເຈລະຈາກັບທ່ານ ຫງວຽນຊວນຝຸກ ນາຍົກລັດຖະມົນຕີແຫ່ງ ສສ ຫວຽດນາມ; ເຂົ້າຢ້ຽມຂ່ຳນັບທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ ແລະ ທ່ານ ເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ; ພົບປະຫາລືກັບທ່ານນາງ ຫງວຽນທິກີມເງິນ ປະທານສະພາແຫ່ງຊາດ, ທ່ານ ດິງລາທັງ ເລຂາຄະນະພັກນະຄອນໂຮ່ຈີມິນ; ວາງພວງມາລາທີ່ອະນຸສາວະລີນັກຮົບວິລະຊົນທີ່ໄດ້ເສຍສະຊີວິດ; ວາງພວງມາລາໄຫວ້ອາໄລທີ່ສຸສານປະທານໂຮ່ຈີມິນ.
ການພົບປະໄດ້ດຳເນີນໄປໃນບັນຍາກາດແຫ່ງໄມຕີຈິດມິດຕະພາບ ເຊື່ອຖືໄວ້ວາງໃຈ ແລະ ຮັກແພງຖານອ້າຍນ້ອງ. ສອງຝ່າຍສະແດງຄວາມພາກພູມໃຈຕໍ່ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ - ລາວ ທີ່ໄດ້ຮັບການປັບປຸງຄູນສ້າງ, ຂະຫຍາຍຕົວຢ່າງບໍ່ຢຸດຢັ້ງ, ນັບມື້ນັບຜູກພັນສະນິດແໜ້ນນຳກັນ ແລະ ໄວ້ເນື້ອເຊື່ອໃຈກັນ. ພິເສດ, ສັນຍາວ່າດ້ວຍການຮ່ວມມືລະຫວ່າງລັດຖະບານຫວຽດນາມ ແລະ ລາວ ໄລຍະປີ 2011-2015 ໄດ້ຮັບການຜັນຂະຫຍາຍປະຕິບັດສຳເລັດຜົນເປັນຢ່າງດີ, ປະກອບສ່ວນປັບປຸງ ແລະ ຂະຫຍາຍສາຍພົວພັນສອງຝ່າຍຢ່າງບໍ່ຢຸດຢັ້ງ ທັງລວງກວ້າງ ແລະ ລວງເລິກ. ສອງຝ່າຍກໍໄດ້ຢັ້ງຢືນຄວາມຕັດສິນໃຈຂອງສອງພັກ, ສອງລັດ ແລະ ປະຊາຊົນສອງປະເທດ ທີ່ຈະສືບຕໍ່ຮັກສາ ແລະ ຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສາມັກຄີພິເສດຫວຽດນາມ - ລາວ, ຖືວ່າມັນເປັນຊັບສົມບັດອັນລ້ຳຄ່າຂອງສອງຊາດ ທີ່ຕ້ອງໄດ້ຮັກສາ, ເສີມຂະຫຍາຍ ແລະ ຖ່າຍທອດໃຫ້ເຊັ່ນລູກເຊັ່ນຫຼາຍ.
ສອງຝ່າຍຢັ້ງຢືນ ຈະສົມທົບນຳກັນຢ່າງແໜ້ນແຟ້ນ ເພື່ອຈັດຕັ້ງປະຕິບັດເປັນຢ່າງດີ ສັນຍາ ຂໍ້ຕົກລົງລະຫວ່າງການນຳຂັ້ນສູງຂອງສອງປະເທດ ກ່ຽວກັບການເພີ່ມທະວີຄວາມພົວພັນດ້ານການເມືອງ, ການທູດ, ການປ້ອງກັນຊາດ ປ້ອງກັນຄວາມສະຫງົບ ກໍ່ຄືຮ່ວມມືກັນໃນຂົງເຂດຕ່າງໆເຊັ່ນ ເສດຖະກິດ, ການຄ້າ, ການລົງທຶນ; ເຫັນດີເປັນເອກະພາບກັນຊີ້ນຳບັນດາກະຊວງ, ຂະແໜງການ, ທ້ອງຖິ່ນ ໃນການຜັນຂະຫຍາຍປະຕິບັດແຜນການຮ່ວມມືລະຫວ່າງສອງລັດຖະບານປີ 2016 ແລະ ສັນຍາຮ່ວມມືສອງຝ່າຍຫວຽດນາມ - ລາວ ໄລຍະປີ 2016-2020 ໃຫ້ໄດ້ເປັນຢ່າງດີ; ສືບຕໍ່ບູລະນະຄະນະກຳມະການລະຫວ່າງລັດຖະບານກ່ຽວກັບການຮ່ວມມືສອງຝ່າຍ ເພື່ອໃຫ້ກົນໄກນີ້ບັນລຸປະສິດທິຜົນສູງສຸດ.
ສອງຝ່າຍເຫັນດີເປັນເອກະສັນ ສົມທົບກັນຜັນຂະຫຍາຍຢ່າງມີປະສິດທິຜົນ ບັນດາຂໍ້ຕົກລົງຮ່ວມມືທີ່ສຳຄັນ ເຊິ່ງສອງປະເທດຫາກໍ່ລົງນາມໃນປີ 2015; ຢັ້ງຢືນຈະສົມທົບກັນຜັນຂະຫຍາຍເປັນຢ່າງດີ ອະນຸສັນຍາວ່າດ້ວຍການຮ່ວມມືດ້າການປ້ອງກັນຊາດ ປ້ອງກັນຄວາມສະຫງົບໄລຍະປີ 2016-2020. ສອງຝ່າຍເຫັນດີເປັນເອກະສັນ ສືບຕໍ່ຍົກສູງຄຸນນະພາບການຮ່ວມມືໃນຂົງເຂດກໍ່ສ້າງ ແລະ ພັດທະນາຊັບພະຍາກອນມະນຸດ; ສົມທົບກັນຢ່າງແໜ້ນແຟ້ນ ແລະ ເພີ່ມທະວີການຮ່ວມມືໃນເວທີປາໄສພາກພື້ນ ແລະ ສາກົນ; ສົມທົບຢ່າງແໜ້ນແຟ້ນນຳກັນ ແລະ ກັບບັນດາປະເທດ, ບັນດາອົງການຈັດຕັ້ງສາກົນ ໃນການຄຸ້ມຄອງ, ນຳໃຊ້ແຫຼ່ງນ້ຳຂອງແມ່ນ້ຳຂອງຢ່າງຍືນຍົງ ແລະ ມີປະສິດທິຜົນ.
ເນື່ອງໃນໂອກາດນີ້, ນາຍົກລັດຖະມົນຕີຂອງສອງປະເທດ ໄດ້ເປັນສັກຂີພະຍານພິທີລົງນາມໃນເອກະສານຈຳນວນໜຶ່ງ ລະຫວ່າງບັນດາກະຊວງ, ຂະແໜງການ, ທ້ອງຖິ່ນຂອງຫວຽດນາມ ແລະ ລາວ; ເປັນສັກຂີພະຍານພິທີມອບເງິນຊ່ວຍເຫຼືອ 200.000 ໂດລາສະຫະລັດ ຂອງທະນາຄານການຄ້າຫຸ້ນສ່ວນຫວຽດນາມ (VietinBank) ໃຫ້ແກ່ການພັດທະນາວຽກງານສະຫວັດດີການສັງຄົມຂອງລາວ.
ຜົນສຳເລັດອັນດີງາມແຫ່ງການຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການຂອງນາຍົກລັດຖະມົນຕີແຫ່ງ ສປປ ລາວ ທ່ານທອງລຸນ ສີສຸລິດ ແລະ ພັນລະຍາ ປະກອບສ່ວນປັບປຸງສາຍພົວພັນພິເສດຫວຽດນາມ - ລາວ ໃຫ້ສືບຕໍ່ຂະຫຍາຍຕົວ ແລະ ແຕກດອກອອກຜົນໃໝ່, ຕອບສະໜອງຄວາມຄອງຄອຍ ແລະ ຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ຄວາມພັດທະນາຢູ່ພາກພື້ນອາຊີຕາເວັນອອກສຽງໃຕ້ ແລະ ໃນໂລກ./.
ໂດຍ ທູ່ຍລີງ