ວຽກງານການຕ່າງປະເທດຂອງທ້ອງຖິ່ນ ປະກອບສ່ວນພັດທະນາເສດຖະກິດ - ສັງຄົມ ແລະ ເຊື່ອມໂຍງເຂົ້າກັບສາກົນ
ການເຄື່ອນໄຫວພົວພັນຕ່າງປະເທດຂອງທ້ອງຖິ່ນ ໄດ້ຮັບຜົນສຳເລັດທີ່ສຳຄັນຫຼາຍຢ່າງ
ທີໜຶ່ງ, ການຕ່າງປະເທດຂອງທ້ອງຖິ່ນ ໄດ້ຮັບການຜັນຂະຫຍາຍຢ່າງຄົບຊຸດ ແລະ ຮອບດ້ານ ບົນພື້ນຖານບັນດາແຜນນະໂຍບາຍ, ນະໂຍບາຍຂອງພັກ ແລະ ລັດ, ສ້າງໃຫ້ມີການສົມທົບຢ່າງເຂົ້າແກັບເຂົ້າເກຍ ລະຫວ່າງບັນດາຊ່ອງສາຍການຕ່າງປະເທດ ແລະ ອົງການຮັບຜິດຊອບສະເພາະກ່ຽວກັບການຕ່າງປະເທດ ກັບ ບັນດາທ້ອງຖິ່ນ, ປະກອບສ່ວນສຳຄັນເຂົ້າໃນຜົນງານຂອງວຽກງານການຕ່າງປະເທດ ໃນການສ້າງໃຫ້ມີທ່າ ແລະ ກຳລັງແຮງໃຫ້ປະເທດຊາດ. ບັນດາທ້ອງຖິ່ນໄດ້ເອົາໃຈໃສ່ຊີ້ນຳບັນດາອົງການວິຊາສະເພາະ ໃນການຈັດຕັ້ງເຊື່ອມຊືມ ແລະ ຜັນຂະຫຍາຍແຜນນະໂຍບາຍຂອງພັກ ກ່ຽວກັບການເຊື່ອມໂຍງເຂົ້າກັບສາກົນ, ປະຕິບັດຂໍ້ກຳນົດຕ່າງໆຂອງລັດ ກ່ຽວກັບການຄຸ້ມຄອງບໍລິຫານການເຄື່ອນໄຫວພົວພັນຕ່າງປະເທດ, ຈາກນັ້ນ ປະກາດໃຊ້ບັນດາເອກະສານທີ່ລະອຽດ, ສອດຄ່ອງກັບສະພາບການຕົວຈິງຂອງທ້ອງຖິ່ນ, ພ້ອມນັ້ນກໍ່ກວດຄືນບັນດາຂໍ້ກຳນົດແຕ່ກ່ອນ ເພື່ອແກ້ໄຂ ປັບປຸງ ເພີ່ມເຕີມ ໃຫ້ມັນສອດຄ່ອງກັບຂໍ້ກຳນົດໃໝ່ຂອງສູນກາງ, ຮັບປະກັນໃຫ້ການເຄື່ອນໄຫວພົວພັນຕ່າງປະເທດ ໄດ້ຮັບການຜັນຂະຫຍາຍຢ່າງຄົບຊຸດ ຮອບດ້ານ ແລະ ມີປະສິດທິຜົນ.
ຄະນະພັກແຂວງ, ຄະນະປະຈຳການພັກແຂວງ, ຄະນະກຳມະການປະຊາຊົນແຂວງຢູ່ແຂວງຕ່າງໆ ຊີ້ນຳຢ່າງໃກ້ຊິດໃຫ້ບັນດາສຳນັກງານອົງການ ກົມກອງໃນທ້ອງຖິ່ນ ປະຕິບັດຖືກຕ້ອງຕາມຂໍ້ກຳນົກກ່ຽວກັບການຈັດຕັ້ງຄະນະຜູ້ແທນ, ທິມງານ ໄປເຮັດວຽກຢູ່ຕ່າງປະເທດ ແລະ ຄຸ້ມຄອງເປັນຢ່າງດີຕໍ່ຄະນະຜູ້ແທນ ທິມງານຕ່າງປະເທດທີ່ເຂົ້າມາຢ້ຽມຢາມ ແລະເຮັດວຽກຢູ່ໃນທ້ອງຖິ່ນ ຕາມຈິດໃຈປະຢັດ ແລະມີປະສິດທິຜົນ. ຫຼາຍທ້ອງຖິ່ນໄດ້ສ້າງ, ປະກາດໃຊ້ໂຄງການດຳເນີນຂົນຂວາຍການຊ່ວຍເຫຼືອກ່ຽວກັບວຽກງານນອກພາກລັດຕ່າງປະເທດ, ແຜນການຜັນຂະຫຍາຍແຫຼ່ງຂົນຂວາຍນອກພາກລັດຕ່າງປະເທດ; ສ້າງຕັ້ງຄະນະປະຕິບັດງານນອກພາກລັດຕ່າງປະເທດ ແລະ ໜ່ວຍງານຊ່ວຍວຽກໃຫ້ຄະນະປະຕິບັດງານ ເພື່ອແນໃສ່ຊີ້ນຳ ແລະ ປະສານການເຄື່ອນໄຫວຂົນຂວາຍ ແລະ ຮັບເອົາ, ນຳໃຊ້ ເງິນຊ່ວຍເຫຼືອຂອງອົງການນອກພາກລັດຕ່າງປະເທດ ເຂົ້າໃນທ້ອງຖິ່ນຂອງຕົນ.
ທີສອງ, ວຽກງານພົວພັນເສດຖະກິດກັບຕ່າງປະເທດ, ຍາດແຍ່ງເອົາແຫຼ່ງພະລັງຕ່າງໆ ເພື່ອພັດທະນາເສດຖະກິດ - ສັງຄົມທ້ອງຖິ່ນ ໄດ້ຮັບການຍູ້ແຮງ ແລະ ບັນລຸຜົນສຳເລັດອັນຕັ້ງໜ້າຫຼາຍຢ່າງ. ບັນດາຄູ່ພົວພັນຮ່ວມມືຂັ້ນທ້ອງຖິ່ນ ນັບມື້ນັບຂະຫຍາຍຕົວເຂົ້າສູ່ເນື້ອແທ້ ແລະ ມີປະສິດທິຜົນດີ, ປະກອບສ່ວນເພີ່ມທະວີໄມຕີຈິດມິດຕະພາບ, ຄວາມພົວພັນໃກ້ຊິດຕິດແໜ້ນ ລະຫວ່າງທ້ອງຖິ່ນຂອງຫວຽດນາມ ກັບທ້ອງຖິ່ນຂອງປະເທດອື່ນ, ພ້ອມນັ້ນ ກໍ່ເປີດເທສະການຮ່ວມມືໃໝ່ຢູ່ຫຼາຍແຫ່ງ.
ນອກນັ້ນ, ບັນດາທ້ອງຖິ່ນກໍ່ໄດ້ເປັນເຈົ້າການຜັນຂະຫຍາຍການເຄື່ອນໄຫວພົວພັນຕ່າງປະເທດຫຼາຍຮູບຫຼາຍແບບ ຢ່າງໄຫວພິບ, ປະກອບສ່ວນເປີດກວ້າງການພົວພັນຮ່ວມມືຂອງທ້ອງຖິ່ນ ກັບບັນດາຄູ່ຮ່ວມມືໃນໂລກ, ປະກອບສ່ວນອັນຕັ້ງໜ້າເຂົ້າໃນການໂຄສະນາ ເຜີຍແຜ່ຮູບພາບຂອງທ້ອງຖິ່ນເວົ້າໂດຍສະເພາະ ແລະຂອງຫວຽດນາມເວົ້າລວມ ໄປຍັງທົ່ົວໂລກ. ປີ 2015, ບັນດາທ້ອງຖິ່ນຂອງຫວຽດນາມ ສືບຕໍ່ລົງນາມໃນຂໍ້ຕົກລົງ, ບົດບັນທຶກການຮ່ວມມື ກັບບັນດາທ້ອງຖິ່ນຂອງປະເທດເພື່ອນບ້ານ ກໍ່ຄືກັບບັນດາທ້ອງຖິ່ນຂອງປະເທດອື່ນໃນຫຼາຍທະວີບ; ບາງທ້ອງຖິ່ນຍັງໄດ້ເຊັນບົດບັນທຶກການຮ່ວມມືກັບວິສາຫະກິດ, ອົງການຈັດຕັ້ງຕ່າງປະເທດໃນຫຼາຍຂົງເຂດ. ຄິດຮອດທ້າຍປີ 2015, ຈຳນວນຂໍ້ຕົກລົງສາກົນທີ່ຫວຽດນາມໄດ້ລົງນາມແລ້ວນັ້ນມີ 114 ສະບັບ, ໃນນັ້ນ 41 ສະບັບແມ່ນຂໍ້ຕົກລົງຮ່ວມມືລະຫວ່າງບັນດາທ້ອງຖິ່ນຂອງຫວຽດນາມ ກັບບັນດາທ້ອງຖິ່ນຂອງປະເທດອື່ນ. ໂດຍພື້ນຖານ, ບັນດາຂໍ້ຕົກລົງສາກົນທີ່ໄດ້ລົງນາມແມ່ນສຸມໃສ່ບັນດາຂົງເຂດເສດຖະກິດ, ສົ່ງເສີມການຄ້າ ການລົງທຶນ, ຄຸ້ມຄອງຕົວເມືອງ, ກໍ່ສ້າງແຫຼ່ງບຸກຄະລາກອນ, ບັນດາໂຄງການ ແຜນການຮ່ວມມືກ່ຽວກັບສິ່ງແວດລ້ອມ, ການພັດທະນາເສດຖະກິດສີຂຽວ, ການຮັບມືກັບການປ່ຽນແປງສະພາບພູມິອາກາດ, ອະນຸຮັກຄວາມຫຼາກຫຼາຍດ້ານຊີວະພາບ.
ບັນດາທ້ອງຖິ່ນໄດ້ເປັນເຈົ້າການສົມທົບຢ່າງແໜ້ນແຟ້ນ ກັບບັນດາອົງການສູນກາງ, ບັນດາອົງການຕາງໜ້າການທູດຫວຽດນາມຢູ່ຕ່າງປະເທດ ເພື່ອຜັນຂະຫຍາຍແຜນການເຜີຍແຜ່, ສົ່ງເສີມການລົງທຶນ, ການທ່ອງທ່ຽວ, ການຄ້າຢູ່ໃນ ແລະ ຕ່າງປະເທດ. ບັນດາອົງການຕາງໜ້າການທູດໄດ້ຊ່ວຍເຫຼືອທ້ອງຖິ່ນສົ່ງນອກໝາກລິ່ນຈີ, ໝາກແກ້ວມັງກອນ ໄປຍັງຕະຫຼາດສະຫະລັດອາເມຣິກາ ແລະ ອົດສະຕຣາລີ; ເຂົ້າຮ່ວມບັນດາການເຄື່ອນໄຫວຂະໜາດໃຫຍ່ຢູ່ຕ່າງປະເທດ, ເຊັ່ນຮ່ວມງານມະຫາກຳຫວຽດນາມຢູ່ ການາຄາວາ (ຍີ່ປຸ່ນ), ບັນດາເວທີປາໄສການຮ່ວມມືເສດຖະກິດຢູ່ ອິດສະຣາແອນ, ສະໂລວາເກຍ, ກອງປະຊຸມສຳມະນາກ່ຽວກັບການສົ່ງເສີມການລົງທຶນ - ການຄ້າ ຂອງທ້ອງຖິ່ນຢູ່ບັນດາປະເທດ; ຈັດຕັ້ງການພົບປະ, ສົນທະນາ ລະຫວ່າງສະມາຄົມນັກທຸລະກິດຕ່າງປະເທດ ກັບຜູ້ຕາງໜ້າວິສາຫະກິດຢູ່ທ້ອງຖິ່ນ.
ຄຽງຄູ່ກັບການຊຸກຍູ້ການເຊັນຂໍ້ຕົກລົງສາກົນ, ບັນດາທ້ອງຖິ່ນກໍ່ໄດ້ພະຍາຍາມຂົນຂວາຍ, ດຶງດູດແຫຼ່ງທຶນຈາກຕ່ງປະເທດ. ໃນປີ 2015, ບັນດານັກລົງທຶນຕ່າງປະເທດໄດ້ລົງທຶນເຂົ້າໃນ 51 ແຂວງ-ກຳແພງນະຄອນຂອງຫວຽດນາມ, ໃນນັ້ນມີຫຼາຍແຂວງໄດ້ມີການລົງທຶນຈົດທະບຽນໃໝ່ ແລະ ລົງທຶນເພີ່ມເຕີມຫຼາຍທີ່ສຸດຄື, ແຂວງບັກນິງ: 3,46 ຕື້ໂດລາສະຫະລັດ (ກວມເອົາ 16% ຂອງລວມຍອດທຶນຈົດທະບຽນ); ນະຄອນໂຮ່ຈີມິນ: 3,32 ຕື້ໂດລາສະຫະລັດ (ກວມເອົາ 14,6%); ແຂວງບິ່ງເຢືອງ: 2,95 ຕື້ໂດລາສະຫະລັດ (ກວມເອົາ 13%); ແຂວງຈ່າວິງ: 2,52 ຕື້ໂດລາສະຫະລັດ; ແຂວງໂດ່ງນາຍ: 1,94 ຕື້ໂດລາສະຫະລັດ. ຄິດໄລ່ລວມທັງໝົດໃນປີ 2015, ລວມຍອດມູນຄ່າການລົງທຶນທີ່ຈົດທະບຽນໃໝ່ ແລະ ເພີ່ມເຕີມແມ່ນ 22,757 ຕື້ໂດລາສະຫະລັດ, ເພີ່ນ 12,5% ທຽບກັບປີ 2014(1).
ກ່ຽວກັບການຊ່ວຍເຫຼືອເພື່ອພັດທະນາຢ່າງເປັນທາງການ (ODA) ແລະ ເງິນໃຫ້ກູ້ດ້ວຍດອກເບ້ຍຜ່ອນພິເສດ ຂອງຜູ້ຊ່ວຍເຫຼືອຕ່າງປະເທດ, ລວມຍອດທຶນ ODA ທີ່ນາຍົກລັກຖະມົນຕີມອບໃຫ້ໃນໄລຍະ 2010 - 2015 ແມ່ນ 96.519 ຕື້ໂດ່ງ, ໃນນັ້ນບັນດາທ້ອງຖິ່ນໄດ້ 44.978 ຕື້ໂດ່ງ ແລະ ຄາດກະການຈ່າຍເງິນທຶນຕ່າງປະເທດໄລຍະ 2010 - 2015 ຂອງບັນດາທ້ອງຖິ່ນໄດ້ 88.171 ຕື້ໂດ່ງ(2). ອາດຈະເຫັນໄດ້ວ່າ, ລະດັບສັນຍາສະໜອງ ODA ສູງຄືແນວນັ້ນ ສະແດງໃຫ້ເຫັນເຖິງການສະໜັບສະໜູນ ແລະ ຄວາມເຊື່ອຖື ຂອງຜູ້ຊ່ວຍເຫຼືອຕ່າງປະເທດ ຕໍ່ປະສິດທິຜົນແຫ່ງການຮັບແລະນຳໃຊ້ທຶນ ODA ຂອງຫວຽດນາມເວົ້າລວມ, ຂອງບັນດາທ້ອງຖິ່ນຫວຽດນາມເວົ້າໂດຍສະເພາະ.
ຄຽງຄູ່ກັນນັ້ນ, ຫຼາຍທ້ອງຖິ່ນກໍ່ສາມາດດຶງດູດແຫຼ່ງທຶນຊ່ວຍເຫຼືອຈາກບັນດາອົງການນອກພາກລັດຕ່າງປະເທດ ໄດ້ຫຼາຍພໍຄວນ, ປະກອບສ່ວນຮັບໃຊ້ໃຫ້ແກ່ບັນດາໂຄງການພັດທະນາເສດຖະກິດ - ສັງຄົມຢູ່ທ້ອງຖິ່ນ. ຄິດໄລ່ຮອດທ້າຍປີ 2015, ລວມຍອດທຶນທີ່ຜູ້ຊ່ວຍເຫຼືອຕ່າງປະເທດສັນຍາຈະສະໜອງໃຫ້ບັນດາໂຄງການ ແຜນການ ແຜນງານໃນປີ 2015 ແມ່ນປະມານ 268,88 ລ້ານໂດລາສະຫະລັດ (ຫລຸດ 12% ທຽບກັບປີ 2014). ໂຄງການລົງທຶນນອກພາກລັດຕ່າງປະເທດສ່ວນຫຼາຍແມ່ນສຸມໃສ່ບັນດາຂົງເຂດຄື ສິ່ງແວກລ້ອມ, ການສຶກສາ, ການຫລຸດຜ່ອນຄວາມທຸກຍາກ, ສາທາລະນະສຸກ, ຊົນນະບົດ, ບັນຫາຊຸມຊົນ,... ໂດຍພື້ນຖານແລ້ວ, ບັນດາອົງການນອກພາກລັດຕ່າງປະເທດ ເຄື່ອນໄຫວຢ່າງມີປະສິດທິຜົນ, ປະຕິບັດຕາມຂໍ້ກຳນົດກົດໝາຍຕ່າງໆຢ່າງເຂັ້ມງວດ, ການນຳໃຊ້ເງິນທຶນຖືກຕ້ອງຕາມຈຸດປະສົງທີ່ໄດ້ຈົດທະບຽນ, ຮັບປະກັນຄວາມຮຽກຮ້ອງຕ້ອງການດ້ານການເມືອງຕ່າງປະເທດ ແລະ ຄວາມສະຫງົບ.
ທີສາມ, ວຽກງານຖະແຫຼງຂ່າວ, ໂຄສະນາການກ່ຽວກັບການພົວພັນຕ່າງປະເທດຂອງບັນດາທ້ອງຖິ່ນ ເບິ່ງລວມໄດ້ຜັນຂະຫຍາຍຢ່າງເປັນເຈົ້າການ, ຮອບດ້ານ, ເປັນປະຈຳ, ມີຈຸດໜັກໃຈກາງ; ສົມທົບຢ່າງແໜ້ນແຟ້ນລະຫວ່າງຖະແຫຼງຂ່າວການຕ່າງປະເທດ ກັບຖະແຫຼງຂ່າວຕໍ່ພາຍໃນປະເທດ; ລະຫວ່າງຖະແຫຼງຂ່າວການຕ່າງປະເທດ ກັບການເຄື່ອນໄຫວດ້ານການເມືອງ, ເສດຖະກິດ, ວັດທະນະທຳການຕ່າງປະເທດຂອງທ້ອງຖິ່ນ; ຫັນເປັນລະອຽດວຽກງານຖະແຫຼງຂ່າວການຕ່າງປະເທດພາຍໃຕ້ຫຼາຍຮູບການທີ່ຫຼາກຫຼາຍ ແລະ ອຸດົມສົມບູນ ຕາມໂຄງການເຄື່ອນໄຫວຂອງລັດຖະບານ ກ່ຽວກັບຖະແຫຼງຂ່າວການຕ່າງປະເທດໄລຍະ 2013 - 2020 ແລະ ແຜນການຖະແຫຼງຂ່າວການຕ່າງປະເທດຂອງບັນດາທ້ອງຖິ່ນ; ເອົາໃຈໃສ່ຖະແຫຼງຂ່າວກ່ຽວກັບການສົ່ງເສີມການລົງທຶນ, ບັນດາຄວາມສາມາດບົ່ມຊ້ອນໃນການຮ່ວມມືພັດທະນາ, ບັນດາໂຄງການທີ່ຕ້ອງການລົງທຶນຂອງທ້ອງຖິ່ນ ໂດຍຜ່ານພາຫະນາສື່ມວນຊົນ, ແຜ່ນຂ່າວເອເລັກໂຕຣນິກ, ບັນດາກອງປະຊຸມສົ່ງເສີມການລົງທຶນ - ການຄ້າ, ກອງປະຊຸມສຳມະນາສາກົນ, ລາຍການໂທລະພາບ, ໃບຂ່າວການຕ່າງປະເທດຂອງທ້ອງຖິ່ນເປັນພາສາຕ່າງປະເທດ.
ຄຽງຂ້າງນັ້ນ, ການນຳບັນດາແຂວງ-ກຳແພງນະຄອງໃນທົ່ວປະເທດ ໄດ້ເອົາໃຈໃສ່ຊີ້ນຳວຽກງານຖະແຫຼງຂ່າວ ໂຄສະນາການກ່ຽວກັບການປົກປັກຮັກສາອະທິປະໄຕ, ດິນແດນ, ເຂດທະເລ ໝູ່ເກາະຂອງປະເທດຊາດໃຫ້ໄດ້ຮັບຜົນດີ. ນອກນັ້ນ, ບັນດາທ້ອງຖິ່ນພ້ອມກັນສົມທົບຢ່າງແໜ້ນແຟ້ນກັບກະຊວງການຕ່າງປະເທດ ໃນການໃຫ້ໃບອະນຸຍາດ, ແນະນຳ, ຄຸ້ມຄອງການເຄື່ອນໄຫວຂອງນັກຂ່າວຕ່າງປະເທດທີ່ເຄື່ອນໄຫວສື່ຂ່າວຢູ່ທ້ອງຖິ່ນ. ຕາມສະຖິຕິ, ບັນດາທ້ອງຖິ່ນໄດ້ສົມທົບກັນຕ້ອນຮັບນັກຂ່າວຕ່າງປະເທດ 1.700 ຄົນໃນ 370 ຄະນະ, ທິມງານ ເຂົ້າມາຂຽນບົດ, ສົ່ງຂ່າວກ່ຽວກັບຫວຽດນາມ.
ບັນດາທ້ອງຖິ່ນໄດ້ເພີ່ມທະວີການເຄື່ອນໄຫວວັດທະນະທຳການຕ່າງປະເທດ ທີ່ອຸດົມທາງດ້ານເນື້ອໃນ, ຫຼາຍຮູບຫຼາຍສີທາງດ້ານຮູບການ, ມີຈຸດໜັກໃຈກາງ, ຮັບປະກັນຄວາມປະຢັດ ປລະ ມີປະສິດທິຜົນ. ອາດຈະເຫັນໄດ້ວ່າ, ໃນປີ 2015, ບັນດາທ້ອງຖິ່ນໄດ້ຈັດຕັ້ງການເຄື່ອນໄຫວ ງານເທດສະການວັດທະນະທຳທີ່ມີປັດໃຈຕ່າງປະເທດ ຫຼາຍຄັ້ງ, ດຶງດູດແຂກໃນ ແລະ ຕ່າງປະເທດເຂົ້າຮ່ວມເປັນຈຳນວນຫຼາຍ(3). ຫຼາຍທ້ອງຖິ່ນໄດ້ຜ່ານ ຄະນະກຳມະການແຫ່ງຊາດກ່ຽວກັບການສຶກສາ ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (ຢູເນດສະໂກ) ຂອງຫວຽດນາມ ເພື່ອສືບຕໍ່ອະນຸຮັກ, ເສີມຂະຫຍາຍຄຸນຄ່າຂອງບັນດາມໍລະດົກໂລກ ທີ່ຢູເນດສະໂກໄດ້ຮັບຮອງ, ກໍ່ຄືຕັ້ງໜ້າເຂົ້າຮ່ວມວຽກງານກະກຽມເອກະສານສຳເນົາ, ຂົນຂວາຍເພື່ອໄດ້ຮັບຮອງມໍລະດົກໃໝ່. ການເຄື່ອນໄຫວເຫຼົ່ານີ້ໄດ້ປະກອບສ່ວນບໍ່ໜ້ອຍເຂົ້າໃນການໂຄສະນາ ເຜີຍແຜ່ເອກະລັກວັດທະນະທຳແຫ່ງຊາດ ແລະ ຊ່ວຍໜູນຢ່າງຕັ້ງໜ້າໃຫ້ແກ່ເປົ້າໝາຍກໍ່ສ້າງເສດຖະກິດ, ການເມືອງ, ສັງຄົມ.
ທີສີ່, ວຽກງານການຕ່າງປະເທດຕໍ່ກັບປະຊາຊົນ ແລະ ຊາວຫວຽດນາມຢູ່ຕ່າງປະເທດ ໄດ້ຮັບຄວາມເອົາໃຈໃສ່ເປັນພິເສດ. ບັນດາທ້ອງຖິ່ນລ້ວນແຕ່ໄດ້ໃຫ້ຄວາມສຳຄັນແກ່ການສ້າງ ແລະ ພັດທະນາການພົວພັນສາມັກຄີມິດຕະພາບ, ການຮ່ວມມືກັບປະຊາຊົນປະເທດຕາງໆ, ເປັນຕົ້ນແມ່ນປະຊາຊົນປະເທດເພື່ອນບ້ານ ແລະ ເປີດກວ້າງການພົວພັນກັບເພື່ອນມິດ, ຄູ່ຮ່ວມມືສາກົນ, ຜ່ານນັ້ນເພື່ອໂຄສະນາເຜີຍແຜ່ຮູບພາບບ້ານເມືອງ ດິນແດນຫວຽດນາມ ແລະ ຊຸກຍູ້ສົ່ງເສີມການລົງທຶນ, ຂົນຂວາຍດຶງດູດແຫຼ່ງພະລັງຕ່າງໆມາໃຫ້ທ້ອງຖິ່ນ.
ຄຽງຂ້າງນັ້ນ, ບັນດາທ້ອງຖິ່ນກໍ່ໄດ້ຜັນຂະຫຍາຍຢ່າງມີປະສິດທິຜົນ ຄຳສັ່ງໝາຍເລກ 45-CT/TW ວ່າດ້ວຍການສືບຕໍ່ຍູ້ແຮງການປະຕິບັດ ມະຕິສະບັບເລກທີ 36-NQ/TW ຂອງກົມການເມືອງສູນກາງພັກ (ສະໄໝທີ IX) ກ່ຽວກັບວຽກງານຕໍ່ກັບຊາວຫວຽດນາມຢູ່ຕ່າງປະເທດໃນສະພາບການໃໝ່, ພົວພັນຕິດຕໍ່, ຈັດຕັ້ງບັນດາໂຄງການ ແຜນງານການເຄື່ອນໄຫວກັບຊຸມຊົນຊາວຫວຽດນາມ, ສະມາຄົມໄທແຂວງດຽວກັນຢູ່ຕ່າງປະເທດ. ປີ 2015, ບັນດາແຂວງ-ກຳແພງນະຄອນໃນທົ່ວປະເທດ ລ້ວນແຕ່ໄດ້ຈັດຕັ້ງການພົບປະກັບຊາວຫວຽດນາມຢູ່ຕ່າງປະເທດ ເນື່ອງໃນໂອກາດບຸນປີໃໝ່ປະຈຳຊາດ, ຈັດຕັ້ງຄ້າຍລະດູຮ້ອນສຳລັບຊາວໜຸ່ມຫວຽດນາມຢູ່ຕ່າງປະເທດ, ພົວພັນຕິດຕໍ່ຢ່າງເປັນປະຈຳກັບສະມາຄົມໄທແຂວງດຽວກັນຢູ່ຕ່າງປະເທດ, ມອບໃບຍ້ອງຍໍຊົມເຊີຍໃຫ້ຊາວຫວຽດນາມຢູ່ຕ່າງປະເທດທີ່ມີຄຸນງາມຄວາມດີປະກອບສ່ວນໃຫ້ທ້ອງຖິ່ນ.
ຄິດໄລ່ຮອດທ້າຍປີ 2015, ມີຕື່ມອີກ 266 ວິສາຫະກິດຂອງຊາວຫວຽດນາມຢູ່ຕ່າງປະເທດມາລົງທຶນເຂົ້າໃນແຂວງທີ່ເປັນບ້ານເກີດເມືອງນອນຂອງຕົນ, ດ້ວຍຈຳນວນທຶນລົງທຶນຈົດທະບຽນທັງໝົດ 8.646 ຕື້ໂດ່ງ ແລະ ທຶນປະກອບສ່ວນຈົດທະບຽນ 4.530 ຕື້ໂດ່ງ, ເຊິ່ງຕົ້ນຕໍແມ່ນລົງທຶນໃສ່ບັນດາຂົງເຂດການບໍລິການ ແລະ ອຸດສາຫະກຳ, ເພສັດ, ເຄມີ, ສາທາລະນະສຸກ, ການສຶກສາ, ເຕັກໂນໂລຊີສື່ສານ, ການເງິນທະນາຄານ, ເຕັກໂນໂລຊີສູງ, ເຕັກໂນໂລຊີຊອບແວ.
ທີຫ້າ, ເພີ່ມທະວີ ຍູ້ແຮງການຮ່ວມມືຢູ່ຊາຍແດນແຫ່ງຊາດ. ບັນດາແຂວງທີ່ມີຊາຍແດນຕິດກັບປະເທດເພື່ອນບ້ານສືບຕໍ່ໃຫ້ຄວາມສຳຄັນແກ່ການເພີ່ມທະວີສົມທົບກັບບັນດາທ້ອງຖິ່ນຊາຍແດນຂອງລາວ, ກຳປູເຈຍ ເພື່ອເຮັດວຽກງານຄຸ້ມຄອງ ແລະ ປົກປັກຮັກສາເຂດຊາຍແດນລະຫວ່າງສອງຝ່າຍ ໃຫ້ໄດ້ຮັບຜົນດີ. ຫຼາຍທ້ອງຖິ່ນໄດ້ຕັ້ງໜ້າຜັນຂະຫຍາຍການເຄື່ອນໄຫວຮ່ວມມືກັບບັນດາທ້ອງຖິ່ນຂອງລາວ, ກຳປູເຈຍ, ເຊັ່ນ ຍູ້ແຮງການເຄື່ອນໄຫວແລກປ່ຽນຄະນະຜູ້ແທນ, ເຊັນຂໍ້ຕົກລົງຮ່ວມມື ແລະ ຜັນຂະຫຍາຍປະຕິບັດຂໍ້ຕົກລົງຮ່ວມມືທີ່ໄດ້ເຊັນກັນໃນພາກຕົວຈິງ, ຈັດຕັ້ງການແຮກສ່ຽວລະຫວ່າງບ້ານ-ບ້ານ, ປ້ອມທະຫານຊາຍແດນ, ດ່ານຊາຍແດນສອງຝ່າຍ, ຊ່ວຍເຫຼືອທ້ອງຖິ່ນເພື່ອນບ້ານໃນການກໍ່ສ້າງໂຄງສ້າງພື້ນຖານ, ບຳລຸງສ້າງນັກຮຽນນັກສຶກສາ, ກວດແລະປົວພະຍາດບໍ່ເສຍຄ່າ.
ການພົວພັນລະຫວ່າບັນດາທ້ອງຖິ່ນທີ່ມີຊາຍແດນຕິດກັບຈີນ ໃນປີ 2015 ໄດ້ມີການຫັນປ່ຽນຢ່າງຕັ້ງໜ້າ. ການແລກປ່ຽນຄະນະຜູ້ແທນຂັ້ນນຳຂອງທ້ອງຖິ່ນລະຫວ່າງສອງຝ່າຍ ໄດ້ດຳເນີນຢ່າງເປັນປະຈຳ. ການພົວພັນຕິດຕໍ່ແລກປ່ຽນ ຮ່ວມມືມິດຕະພາບ ສືບຕໍ່ໄດ້ຮັບການເພີ່ມທະວີ. ສອງຝ່າຍໄດ້ລົງນາມໃນຂໍ້ຕົກລົງຮ່ວມມືມິດຕະພາບ ຫຼາຍສະບັບ. ການຄ້າ - ການລົງທຶນລະຫວ່າງບັນດາແຂວງທີ່ມີຊາຍແດນຕິດຈອດກັນ ໄດ້ຮັບການຍູ້ແຮງ. ບັນດາກົນໄກຮ່ວມມືກໍ່ໄດ້ຜັນຂະຫຍາຍຢ່າງສະດວກດີ...
ບັນດາຝ່າຍທີ່ກ່ຽວ ສືບຕໍ່ເອົາໃຈໃສ່ສົມທົບກັນຄຸ້ມຄອງຊາຍແດນ ກໍ່ຄືຜັນຂະຫຍາຍບັນດາໂຄງການລົງທຶນກໍ່ສ້າງໂຄງສ້າງພື້ນຖານ, ພັດທະນາເສດຖະກິດ - ສັງຄົມຢູ່ເຂດຊາຍແດນ ໃຫ້ໄດ້ຮັບຜົນດີ, ດັ່ງນັ້ນ ສະພາບຄວາມເປັນລະບຽບ - ຄວາມສະຫງົບ ຢູ່ເຂດຊາຍແດນຕິດກັບລາວ, ກຳປະເຈຍ, ຈີນ ໄດ້ເປັນປົກກະຕິໂດຍພື້ນຖານ. ບັນດາກຳລັງເຮັດພາລະບົດບາດ ແລະ ອຳນາດການປົກຄອງທ້ອງຖິ່ນຕິດກັບຊາຍແດນຂອງແຂວງ ໄດ້ຍູ້ແຮງການໂຄສະນາຂົນຂວາຍປະຊາຊົນສອງຝ່າຍ ປະຕິບັດກົດໝາຍຊາຍແດນ; ດຳເນີນການລາຍງານແລກປ່ຽນເປັນປະຈຳ ກ່ຽວກັບການຮັກສາລະບຽບຄວາມສະຫງົບ, ສົມທົບການລາດຕະເວັນສອງຝ່າຍ, ຕໍ່ສູ້ ປ້ອງກັນ ຕ້ານອາດຊະຍາກຳ; ສືບຕໍ່ປະຕິບັດແຜນນະໂຍບາຍສ້າງຕັ້ງສາຍພົວພັນມິດຕະພາບລະຫວ່າງບ້ານ - ບ້ານ, ປ້ອມດ່ານຊາຍແດນ, ຊຸມຊົນເຂດຊາຍແດນນຳກັນ.
ບັນດາແຂວງ-ກຳແພງນະຄອນຢູ່ເຂດຊາຍຝັ່ງທະເລໃນທົ່ວປະເທດ ໄດ້ຍູ້ແຮງວຽກງານໂຄສະນາເຜີຍແຜ່ກົດໝາຍໃຫ້ຊາວປະມົງ ເພື່ອໃຫ້ເຂົາບໍ່ໄປຫາປາ ຂຸດຄົ້ນສິນໃນນ້ຳຜິດກົດໝາຍຢູ່ເຂດທະເລຂອງປະເທດອື່ນ; ເຜີຍແຜ່ບັນດາແຜນນະໂຍບາຍ, ນະໂຍບາຍບຸລິມະສິດ ແລະ ສົ່ງເສີມການລົງທຶນຕໍ່ກ່ຳປັ່ນຫາປາທະເລໄກຝັ່ງ; ເພີ່ມທະວີການລາດຕະເວນ, ກວດກາກີດກັ້ນ ແລະ ແກ້ໄຂການລະເມີດກົດໝາຍ ຢ່າງທັນການ, ຮັກສາລະບຽບຄວາມສະຫງົບ ແລະ ສິ່ງແວດລ້ອມ ນິເວດວິທະຍາທະເລ.
ທີຫົກ, ການຈັດຕັ້ງກົງຈັກ, ກໍ່ສ້າງພະນັກງານຢູ່ທ້ອງຖິ່ນ ສືບຕໍ່ໄດ້ຮັບການປັບປຸງບູລະນະ. ການນຳຄະນະພັກແຂວງ ກຳແພງນະຄອນ ນັບມື້ນັບໃຫ້ຄວາມສຳຄັນ ແລະ ເອົາໃຈໃສ່ຕໍ່ການຈັດຕັ້ງກົງຈັກ ແລະ ຖັນແຖວພະນັກງານເຮັດວຽງານການຕ່າງປະເທດ. ບັນດາອົງການຮັບຜິດຊອບການພົວພັນຕ່າງປະເທດຢູ່ທ້ອງຖິ່ນ ໄດ້ເສີມຂະຫຍາຍບົດບາດເປັນທີ່ປຶກສາໃຫ້ຄະນະພັກແຂວງ, ຄະນະກຳມະການປະຊາຊົນແຂວງ ກ່ຽວກັບວຽກງານການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ. ປັດຈຸບັນນີ້, ກົງຈັກຮັບຜິດຊອບສະເພາະວຽກງານການຕ່າງປະເທດຂອງທ້ອງຖິ່ນຕ່າງໆ ໄດ້ຮັບຄວາມເອົາໃຈໃສ່ປັບປຸງບູລະນະຕາມທິດໂຮມຫົວຂອດຕ່າງໆ ເຂົ້າເປັນເອກະພາບ, ຜັນຂະຫຍາຍວຽກງານການຕ່າງປະເທດໃຫ້ການນຳທ້ອງຖິ່ນ(4). ເດືອນມິຖຸນາ 2015, ກະຊວງການຕ່າງປະເທດ ແລະ ກະຊວງພາຍໃນ ໄດ້ປະກາດໃຊ້ໜັງສືວຽນຮ່ວມສະບັບເລກທີ 02/2015/TTLT-BNG-BNV ແນະນຳກ່ຽວກັບພາລະບົດບາດ, ໜ້າທີ່, ສິດຂອບເຂດ ແລະ ໂຄງປະກອບການຈັດຕັ້ງຂອງພະແນກພົວພັນຕ່າງປະເທດ, ໃນນັ້ນໄດ້ເພີ່ມເຕີມພາລະບົດບາດເປັນທີ່ປຶກສາ ໃຫ້ຄະນະພັກແຂວງ-ກຳແພງນະຄອນ ກ່ຽວກັບວຽກງານການຕ່າງປະເທດຂອງພັກ.
ວຽກງານອົບຮົມສຶກສາ, ບຳລຸງສ້າງວິຊາສະເພາະ ແລະ ພາສາຕ່າງປະເທດໃຫ້ພະນັກງານເຮັດວຽກງານການຕ່າງປະເທດ ມີການຫັນປ່ຽນຢ່າງຈະແຈ້ງ. ໃນປີ 2015, ມີພະນັກງານ, ຂ້າລັດຖະການ 1.600 ເທື່ອຄົນ ເຂົ້າຮ່ວມໃນ 24 ຊຸດບຳລຸງສ້າງວິຊາສະເພາະ, ບຳລຸງຍົກສູງຄວາມຮູ້ການຕ່າງປະເທດ; ຜູ້ແທນຂັ້ນຕ່າງໆເກືອບ 2.000 ຄົນໄດ້ເຂົ້າຮ່ວມໃນ 11 ກອງປະຊຸມ, ການສຳມະນາ, ຊຸດບຳລຸງຄວາມຮູ້ ໂດຍກະຊວງການຕ່າງປະເທດ ແລະ ທ້ອຖິ່ນຈັດຕັ້ງ. ຫຼາຍທ້ອງຖິ່ນໄດ້ເປັນເຈົ້າການສົມທົບກັບກະຊວງການຕ່າງປະເທດ, ຄະນະພົວພັນຕ່າງປະເທດສູນກາງ ໃນການສ້າງແຜນການ ແລະ ຈັດຕັ້ງຊຸດຝຶກອົບຮົມຄວາມຮູ້ ແລະ ທັກສະການຕ່າງປະເທດ ໃຫ້ພະນັກງານການຕ່າງປະເທດ.
ຄຽງຂ້າງຜົນສຳເລັດ ແລະ ຈຸດດີທີ່ພົ້ນເດັ່ນເທິງນີ້, ວຽກງານການຕ່າງປະເທດຂອງທ້ອງຖິ່ນ ກໍ່ຍັງມີຂໍ້ຄົງຄ້າງ ແລະ ຄວາມຫຍຸ້ງຍາກຈຳນວນໜຶ່ງ ເຊັ່ນ: 1- ການເຊື່ອມຊືມແນວທາງ, ນະໂຍບາຍຂອງສູນກາງຍັງບໍ່ທັນທັນການ ແລະ ຍັງມີລັກສະນະຮູບນອກ. 2- ວຽກງານຄົ້ນຄວ້າ, ຄາດຄະເນ, ສັງເກດສະພາບການ ຍັງບໍ່ທັນໄດ້ຮັບຄວາມເອົາໃຈໃສ່ຢ່າງຈິງຈັງ. 3- ການຜັນຂະຫຍາຍຂໍ້ຕົກລົງຮ່ວມມືສາກົນຂັ້ນທ້ອງຖິ່ນ ຍັງບໍ່ທັນເໝາະສົມ. ການເຊັນຂໍ້ຕົກລົງຮ່ວມມື ບາງເທື່ອຍັງໜັກໄປທາງຮູບການ, ບໍ່ມີເນື້ອແທ້, ປະສິດທິຜົນຕ່ຳ. 4- ບັນດາການເຄື່ອນໄຫວການທູດຮັບໃຊ້ເສດຖະກິດ, ຄື ສົ່ງເສີມການຄ້າ, ການລົງທຶນ, ທ່ອງທ່ຽວ, ດຶງດູດ, ຂົນຂວາຍດຶງດູດເອົາ FDI, ODA, ເອົາການຊ່ວຍເຫຼືອຂອງອົງການນອກພາກລັດ ໄດ້ຮັບປະສິດທິຜົນບໍ່ສູງ. ຄວາມຮັບຮູ້ຂອງພະນັກງານບັນດາອົງການ, ກົມກອງ, ວິສາຫະກິດຢູ່ທ້ອງຖິ່ນກ່ຽວກັບການເຊື່ອມໂຍງສາກົນ ຍັງຈຳກັດ, ຖືກທ່າຮັບ ແລະ ສ່ວນຫຼາຍຍັງບໍ່ທັນມີແຜນການເພື່ອຍາດແຍ່ງໂອກາດ ແລະ ຮັບມືກັບສິ່ງທ້າທາຍ. 5- ກົງຈັກການຈັດຕັ້ງ ແລະ ພະນັກງານເຮັດວຽກງານການຕ່າງປະເທດຍັງໜ້ອຍ ແລະ ບໍ່ຕອບສະໜອງໄດ້ກັບຄວາມຕ້ອງການ, ການແບ່ງງານ, ແບ່ງໜ້າທີ່ ຍັງຖືກຈຳກັດ, ຊ້ຳຊ້ອນກັນ. ຢູ່ບາງແຂວງຍັງບໍ່ທັນມີພະແນກການຕ່າງປະເທດ, ຄຸ້ມຄອງການເຄື່ອນໄຫວການຕ່າງປະເທດບໍ່ໄດ້ຮອບດ້ານ, ລວມສູນ ແລະ ເປັນເອກະພາບ, ພາໃຫ້ເກີດສະພາວະກະແຈກກະຈ່າຍ ຊ້ຳຊ້ອນກັນ, ໜ້າທີ່ການຕ່າງປະເທດຈຳນວນໜຶ່ງຖືກມອບໃຫ້ໜ່ວຍວິຊາສະເພາະສັງກັດບັນດາສຳນັກງານທີ່ຕ່າງກັນ. ກຳລັງເຮັດວຽກງານການຕ່າງປະເທດຢູ່ຫຼາຍທ້ອງຖິ່ນຍັງແບນບາງ, ຖືກຈຳກັດທາງດ້ານວິຊາສະເພາ ແລະ ພາສາຕ່າງປະເທດ. 6- ງົບປະມານສຳລັບເຄື່ອນໄຫວການຕ່າງປະເທດຂອງທ້ອງຖິ່ນ ເບິ່ງລວມຍັງຂາດເຂີນ, ເປັນຕົ້ນແມ່ນງົບປະມານເພື່ອເຄື່ອນໄຫວສົ່ງເສີມການຄ້າ, ການລົງທຶນ.
ຜັນຂະຫຍາຍການເຄື່ອນໄຫວພົວພັນຕ່າງປະເທດຂອງທ້ອງຖິ່ນ ໃຫ້ມີປະສິດທິຜົນຍິ່ງກວ່າອີກ
ໃນຊຸມປີສະເພາໜ້າ, ສະພາບການໂລກ ແລະ ພາກພື້ນຈະສືບຕໍ່ຜັນປ່ຽນຢ່າງສັບສົນ ຄາດຄະເນໄດ້ຍາກ, ຊ້ຳບໍ່ໜຳ ຢູ່ຫຼາຍແຫ່ງອາດຈະເຄັ່ງຮ້ອນຮ້າຍແຮງຂຶ້ນຕື່ມ; ການຟື້ນຟູຂອງເສດຖະກິດໂລກຍັງຈະພົບຄວາມຫຍຸ້ງຍາກຫຼາຍ. ປີ 2016 ເປັນປີທຳອິດທີ່ຫວຽດນາມປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ - ສັງຄົມໄລຍະປີ 2016 - 2020. ສຳລັບບັນດາທ້ອງຖິ່ນ, ປີນີ້ກໍ່ເປັນປີທຳອິດແຫ່ງການຜັນຂະຫຍາຍປະຕິບັດມະຕິກອງປະຊຸມໃຫຍ່ຄະນະພັກໄລຍະປີ 2015 - 2020.
ເພື່ອຜັນຂະຫຍາຍການເຄື່ອນໄຫວພົວພັນຕ່າງປະເທດໃຫ້ໄດ້ຮັບຜົນດີ, ບັນດາທ້ອງຖິ່ນຕ້ອງສຸມໃສ່ໜ້າທີ່ໃຈກາງຈຳນວນໜຶ່ງດັ່ງນີ້:
ທີໜຶ່ງ, ເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ບັນດາເອກະສານຊີ້ນຳຂອງສູນກາງກ່ຽວກັບການຕ່າງປະເທດ ຢ່າງມີປະສິດທິຜົນ, ເປັນຕົ້ນແມ່ນ ກົດລະບຽບກ່ຽວກັບການຄຸ້ມຄອງເປັນເອກະພາບການເຄື່ອນໄຫວພົວພັນຕ່າງປະເທດ ທີ່ປະກາດແນບນຳມະຕິຕົກລົງສະບັບເລກທີ 272-QĐ/TW, ລັງວັນທີ 21 ມັງກອນ 2015 ແລະ ມະຕິສະບັບເລກທີ 22-NQ/TW, ລົງວັນທີ 10 ເມສາ 2013, ຂອງກົມການເມືອງສູນກາງພັກ ວ່າດ້ວຍການເຊື່ອມໂຍງສາກົນ; ພ້ອມນັ້ນກໍ່ຍູ້ແຮງການຄົ້ນຄວ້າ, ເປັນທີ່ປຶກສາ, ຍົກສູງປະສິດທິຜົນຂອງວຽກງານການຕ່າງປະເທດ.
ທີສອງ, ສືບຕໍ່ຍູ້ແຮງການເຊື່ອມໂຍງສາກົນຢ່າງຮອບດ້ານ ແລະ ກວ້າງຂວາງເລິກເຊິ່ງ; ສ້າງ ແລະ ເປີດກວ້າງການພົວພັນມິດຕະພາບ ການຮ່ວມມື, ເພີ່ມທະວີການເຊັນຂໍ້ຕົກລົງການຮ່ວມມືກັບທ້ອງຖິ່ນຂອງປະເທດໃນພາກພື້ນ ແລະ ໃນໂລກ, ກັບບັນດາອົງການສາກົນ, ບັນດາອົງການຜູ້ຕາງໜ້າຕ່າງປະເທດຢູ່ຫວຽດນາມ ແລະ ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ຕາມທິດມີເນື້ອແທ້, ແທດຈິງ ແລະ ມີປະສິດທິຜົນ.
ທີສາມ, ເພີ່ມທະວີວຽກງານການທູດເສດຖະກິດ, ຍົກສູງປະສິດທິຜົນຂອງວຽກງານສົ່ງເສີມການຄ້າ, ການລົງທຶນ, ດຶງດູດເອົາ FDI, ODA ແລະ ການຊ່ວຍເຫຼືອຂອງບັນດາອົງການນອກພາກລັດຕ່າງປະເທດ. ມີແຜນການເຜີຍແຜ່ບັນດາສັນຍາການຄ້າເສລີທີ່ຫວຽດນາມຫາກໍ່ລົງນາມ ແລະ ກຽມຈະລົງນາມ ໃຫ້ແກ່ບັນດາສຳນັກງານອົງການ, ກົມກອງ ແລະ ວິສາຫະກິດຂອງທ້ອງຖິ່ນ. ຄຽງຄູ່ກັນນັ້ນ, ບັນດາທ້ອງຖິ່ນຄວນຍູ້ແຮງການປະຕິຮູບການບໍລິການ ຜ່ານກົນໄກ “ປະຕູດຽວ”, ຊ່ວຍໜູນການລົງທຶນ ແລະ ແກ້ໄຂຄວາມຫຍຸ້ງຍາກ, ສິ່ງຄົງຄ້າງຢ່າງທັນການ ໃຫ້ວິສາຫະກິດ, ຮັບປະກັນຄວາມປອດໄພໃຫ້ນັກລົງທຶນຕ່າງປະເທດທີ່ກຳລັງເຮັດວຽກຢູ່ໃນພື້ນທີ່ຂອງທ້ອງຖິ່ນ.
ທີສີ່, ເອົາໃຈໃສ່ວຽກງານຖະແຫຼງຂ່າວ, ໂຄສະນາການຕ່າງປະເທດ, ຜັນຂະຫຍາຍປະຕິບັດແຜນຍຸດທະສາດການທູດວັດທະນະທຳເຖິງປີ 2020; ແຜນການການກະທຳຂອງທ້ອງຖິ່ນ; ສ້າງແຫຼ່ງຂໍ້ມູນຂ່າວສານກ່ຽວກັບບັນດາປະເທດ, ບັນດາອານາເຂດທີ່ມີທ່າໄດ້ປຽບທາງດ້ານເສດຖະກິດ, ວັດທະນະທຳ, ອຸດສາຫະກຳ; ເພີ່ມທະວີການໂຄສະນາ ເຜີຍແຜ່ທ່າແຮງ ແລະ ຄວາມສາມາດບົ່ມຊ້ອນຂອງທ້ອງຖິ່ນ.
ທີຫ້າ, ປະຕິບັດວຽກງານປົກປັກຮັກສາເຂດແດນແຫ່ງຊາດໃຫ້ໄດ້ຢ່າງໝັ້ນຄົງ, ຮັບປະກັນການປ້ອງກັນຊາດ ປ້ອງກັນຄວາມສະຫງົບ ແລະ ພັດທະນາເສດຖະກິດ - ສັງຄົມຢູ່ເຂດຊາຍແດນ.
ທີຫົກ, ສືບຕໍ່ປັບປຸງບູລະນະກົງຈັກ ແລະ ຖັນແຖວພະນັກງານເຮັດວຽກງານການຕ່າງປະເທດ; ຍູ້ແຮງການພັດທະນາແຫຼ່ງບຸກຄະລາກອນ, ບຳລຸງສ້າງພະນັກງານເຮັດວຽກງານການຕ່າງປະເທດ. ເພີ່ມທະວີການອົບຮົມສຶກສາ ແລະ ບຳລຸງສ້າງຖັນແຖວພະນັກງານ, ນັກວິຊາການທີ່ເກັ່ງທາງດ້ານວິຊາສະເພາະ, ພາສາຕ່າງປະເທດ ແລະ ມີຫຼັກໝັ້ນການເມືອງ ເພື່ອຕອບສະໜອງຄວາມຕ້ອງການທີ່ນັບມື້ນັບສູງຂອງວຽກງານການຕ່າງປະເທດໃນສະພາບການໃໝ່./.
ໂດຍ ປທ. ຟ້າມລານເຮືອງ,
ຄະນະພົວພັນຕ່າງປະເທດສູນກາງ
------------------------------------
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 882 (ເດືອນເມສາ 2016)
(1) ແຫຼ່ງ: ກົມການລົງທຶນຕ່າງປະເທດ, ກະຊວງແຜນການ ແລະ ການລົງທຶນ, www.fia.mpi.gov.vn
(2) ແຫຼ່ງ: ກະຊວງການເງິນ, www.mof.gov.vn
(3) ງານເທດສະການກາເຟ ບວນເມທວດ (ແຂວງດັກລັກ), ງານເທດສະການດອກໄມ້ໄຟ (ແຂວງດ່ານັ້ງ), ງານເທດສະການໝາກໄມ້ພາກໃຕ້ ແລະ ງານເທດສະການບອນໄຊ ອາຊີ - ປາຊີຟິກ; ງານວາງສະແດງສິນຄ້າການທ່ອງທ່ຽວລະຫວ່າງປະເທດ ໄອທີອີ ຄັ້ງທີ 11; ງານເທດສະການນ້ຳຊາ ຖາຍງວຽນ ຄັ້ງທີ 3;…
(4) ຄິດໄລ່ຮອດທ້າຍປີ 2015, ຢູ່ 46 ແຂວງໃນຈຳນວນ 63 ແຂວງ-ກຳແພງນະຄອນສັງກັດສູນກາງ ໄດ້ມີພະແນກການຕ່າງປະເທດ; 17 ແຂວງມີຫ້ອງການຕ່າງປະເທດ ສັງກັດຫ້ອງວ່າການຄະນະກຳມະການປະຊາຊົນແຂວງ; ຢູ່ 44 ແຂວງມີສະຫະພັນມິດຕະພາບແຂວງ ຫຼືສະມາຄົມມິດຕະພາບກັບປະຊາຊົນຕ່າງປະເທດ.