ທ່ານນາຍົກລັດຖະມົນຕີ ຫງວຽນຊວນຝຸກ ເຂົ້າຮ່ວມກອງປະຊຸມສຸດຍອດ ເວທີປາໄສຮ່ວມມື ອາຊີ-ເອີຣົບ ຄັ້ງທີ 11
ກອງປະຊຸມໄດ້ຮັບຮອງເອົາ “ຖະແຫຼງການ ອູລານ ບາເຕີ ກ່ຽວກັບເວທີປາໄສຮ່ວມມື ອາຊີ-ເອີຣົບ ໃນທົດສະວັດທີສາມ”, “ຖະແຫຼງການຂອງປະທານກອງປະຊຸມສຸດຍອດ ອາເຊັມ 11” ແລະ ຖະແຫຼງການຂອງບັນດາຜູ້ນຳ ອາເຊັມ ກ່ຽວກັບການຕໍ່ສູ້ຕ້ານລັດທິກໍ່ການຮ້າຍສາກົນ. ນີ້ແມ່ນບັນດາທິດທາງທີ່ສຳຄັນພ້ອມດ້ວຍຫຼາຍມາດຕະການອັນລະອຽດ, ເຊິ່ງສະແດງໃຫ້ເຫັນເຖິງຄວາມຕັດສິນໃຈ ແລະ ສ້າງສິ່ງຊຸກດັນໃໝ່ເພື່ອນຳເອົາການຮ່ວມມື ອາຊີ-ເອີຣົບ ເຂົ້າສູ່ລວງເລິກ ແລະ ມີປະສິດທິຜົນ, ເຊີດຊູຖານະບົດບາດ ແລະຍົກສູງການປະກອບສ່ວນຂອງ ອາເຊັມ ເຂົ້າໃນຄວາມພະຍາຍາມລວມທົ່ວໂລກໃນທົດສະວັດແຫ່ງການພັດທະນາໃໝ່.
ຄະນະຜູ້ແທນຂັ້ນສູງຫວຽດນາມ ນຳໂດຍທ່ານນາຍົກລັດຖະມົນຕີ ຫງວຽດນຊວນຝຸກ ໄດ້ເຂົ້າຮ່ວມກອງປະຊຸມ ແລະ ມີຄວາມເຫັນທີ່ພົ້ນເດັ່ນຫຼາຍຢ່າງ, ປະກອບສ່ວນເຂົ້າໃນຜົນສຳເລັດລວມຂອງກອງປະຊຸມ.
ທ່ານນາຍົກລັດຖະມົນຕີ ຫງວຽດນຊວນຝຸກ ເປັນໜຶ່ງໃນບັນດາການນຳທີ່ຖືກເຊີນກ່າວຄຳປາໄສທີ່ເວທີປາໄສວິສາຫະກິດ ອາຊີ-ເອີຣົບ ຄັ້ງທີ 15, ແລະຂຶ້ນປາຖະກະຖາທີ່ກອງປະຊຸມຄົບຄະນະກ່ຽວກັບ “ສອງທົດສະວັດແຫ່ງການພົວພັນຄູ່ຮ່ວມມື: ຫຼຽວເບິ່ງຄືນຫຼັງ ແລະ ຫັນສູ່ອະນາຄົດ”.
ໃນກອງປະຊຸມຄັ້ງນີ້, ຫວຽດນາມໄດ້ນຳສະເໜີຂໍ້ລິເລີ່ມກ່ຽວກັບ “ກອງປະຊຸມ ອາເຊັມ ກ່ຽວກັບການສຶກສາປະດິດສ້າງ ແລະ ກໍ່ສ້າງແຫຼ່ງບຸກຄະລາກອນເພື່ອການພັດທະນາແບບຍືນຍົງ” ຊຶ່ງໄດ້ຮັບການຕີລາຄາສູງ ແລະ ຄວາມເຫັນດີເຫັນພ້ອມສະໜັບສະໜູນຈາກຫຼາຍປະເທດ. ຄຽງຂ້າງນັ້ນ, ຫວຽດນາມກໍໄດ້ເຂົ້າຮ່ວມສະໜັບສະໜູນຂໍ້ຄິດປະດິດຊອງ ລິດວາ ກ່ຽວກັບ “ກອງປະຊຸມສາກົນເພື່ອຍົກສູງອຳນາດເສດຖະກິດຂອງຜູ້ຍິງ - ສ້າງໂອກາດສະເໝີພາບທາງດ້ານວຽກເຮັດງານທຳ”. ບັນດາຜູ້ນຳທີ່ເຂົ້າຮ່ວມກອງປະຊຸມໄດ້ຕີລາຄາສູງຕໍ່ການສະເໜີທີ່ແທດຈິງຂອງຫວຽດນາມ ທີ່ແນໃສ່ປະກອບສ່ວນຍົກລະດັບການຮ່ວມມື ອາເຊັມ ໃນທົດສະວັດທີສາມ, ໃນນັ້ນມີການເພີ່ມທະວີການເຊື່ອມຈອດໂຄງສ້າງພື້ນຖານ, ການຄ້າ, ການເງິນ, ເຕັກໂນໂລຊີສື່ຂ່າວ, ແຫຼ່ງບຸກຄະລາກອນ, ເຊື່ອມຈອດອະນຸພາກພື້ນແມ່ນ້ຳຂອງ, ເຊື່ອມຕິດຢ່າງແໜ້ນແຟ້ນ ການຮ່ວມມືອາເຊັມກັບບັນດາເປົ້າໝາຍການພັດທະນາແບບຍືນຍົງ, ເປັນຕົ້ນແມ່ນຊ່ວຍໜູນຄວາມພະຍາຍາມຫລຸດຜ່ອນຄວາມທຸກຍາກ, ຮັບປະກັນສະວັດດີການສັງຄົມ ແລະ ຮັບມືກັບບັນດາສິ່ງທ້າທາຍທົ່ວໂລກເຊັ່ນ ການປ່ຽນແປງສະພາບພູມິອາກາດ, ໄພທຳມະຊາດ, ນ້ຳທະເລຍື່ງຂຶ້ນ, ນ້ຳເຄັມຄຸກຄາມ…; ເພີ່ມທະວີການເຂົ້າຮ່ວມ ແລະ ປະກອບສ່ວນຂອງວິສາຫະກິດ, ເປັນຕົ້ນແມ່ນວິສາຫະກິດຂະໜາດນ້ອຍ ຂະໜາດກາງ, ວິສາຫະກິດໃໝ່ ແລະ ຊາວໜຸ່ມ…
ບັນດາຂໍ້ລິເລີ່ມຂອງຫວຽດນາມກ່ຽວກັບການຮັບມືກັບໄພທຳມະຊາດ, ກໍ່ສ້າງທັກສະວິຊາຊີບ, ຫັນປ່ຽນຕົວແບບມາເປັນການເຕີບໂຕສີຂຽວ ກໍໄດ້ຮັບຄຳໝັ້ນສັນຍາຂອງບັນດາປະເທດສະມາຊິກທີ່ຈະສືບຕໍ່ສົມທົບຜັນຂະຫຍາຍໃນປີ 2016. ຫຼາຍປະເທດສະມາຊິກໄດ້ແບ່ງປັນທັດສະນະຂອງຫວຽດນາມກ່ຽວກັບຄວາມຕ້ອງການເພີ່ມທະວີການສົນທະນາ, ຮ່ວມມືກັນບົນຈິດໃຈກໍ່ສ້າງ, ແກ້ໄຂການປະທະກັນບົນພື້ນຖານກົດໝາຍສາກົນ, ບໍ່ມີການກະທຳແຕ່ຝ່າຍດຽວທີ່ກໍ່ຄວາມເຄັ່ງຕຶງ ສັບສົນ, ບໍ່ນາບຂູ່ຫຼືໃຊ້ກຳລັງອາວຸດ; ສ້າງຄວາມໄວ້ວາງໃຈ, ເຄົາລົບນັບຖືຂະບວນວິວັດການທູດ ແລະ ກົດໝາຍທີ່ສອດຄ່ອງກັບກົດໝາຍສາກົນ, ເພື່ອແນໃສ່ຮັບສາສັນຕິພາບ, ສະຖຽນລະພາບ ແລະ ຄວາມໝັ້ນຄົງຢູ່ອາຊີຕາເວັນອອກສຽງໃຕ້, ໃນນັ້ນມີທະເລຕາເວັນອອກ, ປະກອບສ່ວນອັນສຳຄັນເຂົ້າໃນການຊຸກຍູ້ທ່າອຽງຮ່ວມມື, ເຊື່ອມໂຍງ ແລະ ວັດທະນາຖາວອນຢູ່ອາຊີ - ປາຊີຟິກ ແລະ ໃນໂລກ. ດ້ວຍຄວາມຕັ້ງໜ້າສະເໜີຂໍ້ລິເລີ່ມ ແລະ ນຳໜ້າຊຸກຍູ້ການຜັນຂະຫຍາຍຂໍ້ລິເລີ່ມຮ່ວມມືຕ່າງໆ ໃນຂອບອາເຊັມ ໃນ 20 ປີທີ່ຜ່ານມາ ແລະ ໃນກອງປະຊຸມສຸດຍອດຄັ້ງນີ້ ຫວຽດນາມໄດ້ສືບຕໍ່ຢັ້ງຢືນບົດບາດຂອງສະມາຊິກທີ່ຕັ້ງໜ້າ ມີຄວາມຮັບຜິດຊອບໃນ ອາເຊັມ, ຜ່ານສິ່ງດັ່ງກ່າວເພື່ອເຊີດຊູຖານະບົດບາດຂອງຫວຽດນາມ.
ໃນເວລາເຂົ້າຮ່ວມກອງປະຊຸມສຸດຍອດ ອາເຊັມ ຄັ້ງທີ 11, ທ່ານນາຍົກລັດຖະມົນຕີ ຫງວຽດນຊວນຝຸກ ແລະຄະນະຜູ້ແທນຫວຽດນາມ ໄດ້ມີການພົບປະຢ່າງກວ້າງຂວາງ ກັບບັນດາຜູ້ນຳຂອງປະມານ 20 ປະເທດສະມາຊິກ ອາເຊັມ, ໃນນັ້ນມີ ປະທານາທິບໍດີ ສາທາລະນະລັດເກົາຫຼີ, ບູນກາລີ, ສະວິດ, ນາຍົກລັດຖະມົນຕີຈີນ, ລາວ, ຍີ່ປຸ່ນ, ເຢຍລະມັນ, ແຟງລັງ, ໂຮນລັງ, ມານຕາ, ໂປໂລຍ, ສະໂລເວນີ, ຮອງປະທານາທິບໍດີ ອິນເດຍ...
ຜ່ານການພົບປະເຫຼົ່ານັ້ນ, ທ່ານນາຍົກລັດຖະມົນຕີ ຫງວຽດນຊວນຝຸກ ແລະ ຜູ້ນຳຂອງບັນດາປະເທດໄດ້ເຫັນດີເປັນເອກະສັນກ່ຽວກັບບັນດາມາດຕະການອັນລະອຽດ ເພື່ອສືບຕໍ່ຍູ້ແຮງການພົວກັນ, ເປັນຕົ້ນແມ່ນຊຸກຍູ້ການຢ້ຽມຢາມຂັ້ນສູງ, ຜັນຂະຫຍາຍປະຕິບັດຂໍ້ຕົກລົງ ກົນໄກຮ່ວມມືໃນພາບຕົວຈິງ ແລະ ເພື່ມທະວີການແລກປ່ຽນສອງຝ່າຍ ລະຫວ່າງບັນດາກະຊວງ, ຂະແໜງການ, ທ້ອງຖິ່ນ.
ໃນໂອກາດນີ້, ຫວຽດນາມ ແລະ ມານຕາໄດ້ເຊັນສັນຍາວ່າດ້ວຍຫຼີກລ່ຽງການເກັບພາສີຊ້ອນ ແລະ ກີດກັ້ນການໜີພາສີສຳລັບບັນດາປະເພດພາສີລາຍໄດ້. ບັນດາປະເທດໄດ້ຕີລາຄາສູງຕໍ່ຄວາມໝັ້ນຄົງທາງດ້ານການເມືອງ-ສັງຄົມ, ຄວາມພະຍາຍາມຈັດວາງໂຄງປະກອບເສດຖະກິດຄືນໃໝ່ ແລະ ການເຊື່ອມໂຍງສາກົນຢ່າງກວ້າງຂວາງເລິກເຊິ່ງ ຂອງຫວຽດນາມ. ບັນດາປະເທດເຫັນດີເປັນເອກະສັນຈະພ້ອມກັນສ້າງເງື່ອນໄຂອຳນວຍຄວາມສະດວກ ເພື່ອໃຫ້ວົງການວິສາຫະກິດກຳເອົາໂອກາດອັນໃຫຍ່ຫຼວງ ທາງດ້ານການຄ້າ, ການລົງທຶນ ໃນບັນດາສຳພັນທະພາບເສດຖະກິດນີ້. ຜູ້ນຳບັນດາປະເທດໄດ້ຕົກລົງເພີ່ມທະວີການສົມທົບ ແລະ ສະໜັບສະໜູນຊຶ່ງກັນແລະກັນ ໃນບັນດາບັນຫາສາກົນ ແລະ ພາກພື້ນທີ່ມີຄວາມສົນໃຈລວມກັນ, ຢັ້ງຢືນຄວາມພະຍາຍາມຮ່ວມກັນຮັກສາສິ່ງແວດລ້ອມສັນຕິພາບ, ສະຖຽນລະພາບ, ເອື້ອອຳນວຍໃຫ້ແກ່ການຮ່ວມມື ແລະ ພັດທະນາ.
ອາດຈະຢັ້ງຢືນໄດ້ວ່າ ກອງປະຊຸມ ອາເຊັມ ເປັນກົນໄກຮ່ວມມືທີ່ສຳຄັນໜຶ່ງເພື່ອຊຸກຍູ້ບັນດາຜົນປະໂຫຍດ, ຄວາມເອົາໃຈໃສ່ທາງດ້ານເສດຖະກິດ, ພັດທະນາ ແລະ ຄວາມໝັ້ນຄົງ ກໍຄືຍົກສູງຖານະບົດບາດຂອງຫວຽດນາມ ແລະ ອາເຊັມ ເວົ້າລວມ. ອາເຊັມ ກວມເອົາ 19 ຄູ່ຮ່ວມມືໃນຈຳນວນ 25 ຄູ່ຮ່ວມມືຍຸດທະສາດແລະຄູ່ຮ່ວມມືຮອບດ້ານຂອງຫວຽດນາມ, ກວມເອົາ 70% ການລົງທຶນໂດຍກົງຈາກຕ່າງປະເທດແລະຍອດມູນຄ່າການຄ້າສາກົນຂອງຫວຽດນາມ ແລະ 80% ຈຳນວນນັກທ່ອງທ່ຽວທີ່ມາໃນຫວຽດນາມ. ຫວຽດນາມໄດ້ເຊັນສັນຍາການຄ້າເສລີ ຫຼືກຳລັງເຈລະຈາສັນຍາການຄ້າເສລີກັບ 47 ປະເທດໃນຈຳນວນ 50 ປະເທດສະມາຊິກ ອາເຊັມ. ນັ້ນແມ່ນບັນດາໂອກາດທີ່ດີທີ່ສຸດເພື່ອໃຫ້ບັນດາກະຊວງ, ຂະແໜງການ, ທ້ອງຖິ່ນ ແລະ ປະຊາຊົນແຕ່ລະຄົນ ເສີມຂະຫຍາຍໃນໄລຍະການພັດທະນາໃໝ່ຂອງ ອາເຊັມ./.
ສັງລວມຈາກຂ່າວສານຫວຽດນາມ