ກຳປູເຈຍ - ລາວ - ຫວຽດນາມ ພ້ອມກັນກຳໂອກາດໃໝ່ແຫ່ງການພັດທະນາ ແລະ ແບ່ງປັນຜົນປະໂຫຍດຮ່ວມກັນ
ວກ.ອອນໄລ - ກົງກັບ 11 ໂມງ 30 ນາທີ ວັນທີ 23 ພະຈິກ 2016, ຕາມເວລາຫວຽດນາມ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ຄະນະຜູ້ແທນແຫ່ງ ສສ ຫວຽດນາມ ໄດ້ມາຮອດເດີນບິນສາກົນ ສຽມຣຽບ ແຫ່ງ ລາຊະອານາຈັກ ກຳປູເຈຍ ເພື່ອເຂົ້າຮ່ວມກອງປະຊຸມຂັ້ນສູງ ເຂດສາມລ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 9, ຕາມຄຳເຊີນຂອງ ສົມເດັດ ອັກຄະມະຫາເສນາບໍດີ ເດໂຊ ຮຸນເຊັນ ນາຍົກລັດຖະມົນຕີແຫ່ງ ລາຊະອານາຈັກ ກຳປູເຈຍ.
ທ່ານຫງວຽນຊວນຟຸກ ນາຍົກລັດຖະມົນຕີແຫ່ງ ສສ ຫວຽດນາມ (ເບື້ອງຊ້າຍ), ທ່ານສົມເດັດ ຮຸນເຊັນ ນາຍົກລັດຖະມົນຕີແຫ່ງ ລາຊະອານາຈັດ ກຳປູເຈຍ (ຢູ່ໃຈກາງ) ແລະ ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ (ເບື້ອງຂວາ) ຖ່າຍຮູບຮ່ວມກັນທີ່ພິທີໄຂກອງປະຊຸມ. (ພາບ: TTXVN)
ທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນຢ້ຳເຖິງ 7 ຂໍ້ສະເໜີ ຂອງຫວຽດນາມ ທີ່ພົວພັນເຖິງບັນດາຂົງເຂດກ່ຽວກັບການປະຕິບັດຮູບການກວດກາ “ໜຶ່ງປະຕູ, ໜຶ່ງຄັ້ງຢຸດ”; ກໍ່ສ້າງກົນໄກສົນທະນາເປັນປົກກະຕິກັບວິສາຫະກິດ; ເພີ່ມຈຳນວນທຶນການສຶກສາຝຶກອົບຮົມ ແລະ ສອນວິຊາຊີບ; ຮຽກຮ້ອງໃຫ້ລາວ ແລະ ກຳປູເຈຍ ເຂົ້າຮ່ວມອະນຸສັນຍາວ່າດ້ວຍການປົກປັກຮັກສາ ແລະ ນຳໃຊ້ສາຍນ້ຳຂ້າມຊາຍແດງລະຫວ່າງປະເທດ ແລະ ທະເລສາບສາກົນ; ຊຸກຍູ້ການລົງທຶນດ້ານການທ່ອງທ່ຽວ ແລະ ອື່ນໆ.
ທ່ານນາຍົກລັດຖະມົນຕີ ຫງວຽນຊວນຟຸກ ກໍໄດ້ມີຂໍ້ສະເໜີແນະໃຫ້ບໍລິສັດໂທລະຄົມມະນາຄົມ ຫວຽດແທວ (Viettel) ຂອງຫວຽດນາມ ລົງທຶນກໍ່ສ້າງຕາໜ່າງໂທລະຄົມມະນາຄົມຂອງສາມປະເທດດ້ວຍເຕັກໂນໂລຊີ 4 ຈີ (4G), ຊ່ວຍເຫຼືອກໍ່ສ້າງລັດຖະບານເອເລັກໂຕຣນິກ ໃຫ້ສາມປະເທດ ແລະ ນຳໃຊ້ຄ່າໂທລະສັບສຳລັບຜູ້ຈອງໃຊ້ໂທລະສັບຂອງ ຫວຽດແທວ ຢູ່ສາມປະເທດ ທຽບເທົ່າກັບຄ່າໂທລະສັບຢູ່ພາຍໃນປະເທດ.
ໂດຍຕອບສະໜອງຂໍ້ສະເໜີຂອງນາຍົກລັດຖະມົນຕີ ຫງວຽນຊວນຟຸກ, ນາຍົກລັດຖະມົນຕີກຳປູເຈຍ ຮຸນແຊນ ໄດ້ສະເໜີໃຫ້ກຸ່ມບໍລິສັດຫວຽດແທວ ຊ່ວຍກໍ່ສ້າງຂົວໂທລະພາບ (videoconferences)ລະຫວ່າງນາຍົກລັດຖະມົນຕີທັງສາມ ແລະ ລະຫວ່າງບັນດາອົງການຂອງສາມປະເທດ ເພື່ອເພີ່ມທະວີການ ແລກປ່ຽນກໍ່ຄືປະຢັດງົບປະມານ. ໃນພາກຕົວຈິງ, ດ້ວຍຄວາມມານະພະຍາຍາມຫຼາຍຢ່າງ ແລະ ການກຳນົດທິດພັດທະນາຢ່າງຖືກຕ້ອງ, ໃນເວລາທີ່ຜ່ານມາ ການເຄື່ອນໄຫວຂອງຫວຽດແທວ ໄດ້ຊ່ວຍໃຫ້ຂະແໜງການໂທລະຄົມມະນາຄົມ ຂອງກຳປູເຈຍ ແລະ ລາວ ມີການປ່ຽນແປງຢ່າງຈະແຈ້ງ ແລະ ກຳລັງເປັນເຈົ້າຂອງເຄືອຂ່າຍທີ່ໃຫຍ່ອັນດັບໜຶ່ງໃນສອງປະເທດນີ້.
ສຳລັບຂະແໜງການໂທລະຄົມມະນາຄົມຂອງກຳປູເຈຍ, ເຄືອຂ່າຍໂທລະສັບມືຖື ເມັດຟອນ - Metfone (ເປັນເຄື່ອງໝາຍການຄ້າຂອງຫວຽດແທວ ຢູ່ກຳປູເຈຍ) ກໍ່ໄດ້ມີການປະກອນສ່ວນຢ່າງຫຼວງຫຼາຍ. ເຊິ່ງເປັນເທື່ອທຳອິດ ທີ່ເຄືອຂ່າຍໂທລະສັບມືຖື ໄດ້ກະຈາຍຄື່ນໄປທົ່ວທຸກເຂດຫ່າງໄກສອກຫຼີກຂອງກຳປູເຈຍ ດ້ວຍຈຳນວນສະຖານີຮັບ-ສົ່ງສັນຍານໂທລະສັບ (2ຈີ, 3ຈີ, 4ຈີ) ເກືອບ 9000 ແຫ່ງ ແລະ ລະບົບສາຍໄຍແກ້ວນຳແສງຍາວເຖິງ 20.000 ກີໂລແມັດ (ປົກຫູ້ມ 100% ຈຳນວນເມືອງ, 95% ຈຳນວນຕາແສງ), ໃນຂະນະນັ້ນ ເຄືອຂ່າຍໂທລະສັບມືຖືອັນດັບທີສອງ ມີສາຍໄຍແກ້ວນຳແສງພຽງ 5.000 ກີໂລແມັດເທົ່ານັ້ນ.
ສ່ວນຢູ່ ສປປ ລາວ, ເຄືອຂ່າຍໂທລະສັບ ຢູນີແທວ (ເຄື່ອງໝາຍການຄ້າທີ່ຮ່ວມທຶນລະຫວ່າງ ຫວຽດແທວກັບຄູ່ຮ່ວມມື) ໄດ້ກໍ່ສ້າງເຄືອຂ່າຍໂທລະສັບມືຖື ເປັນອັນດັັບໜຶ່ງໃນຕະຫຼາດ, ກະຈາຍຄື່ນໄປທົ່ວທຸກເຂດກັນດານ ຫ່າງໄກ ດ້ວຍຈຳນວນສະຖານີຮັບ-ສົ່ງສັນຍານໂທລະສັບມືຖື 4.000 ແຫ່ງ (2ຈີ, 3ຈີ ແລະ 4ຈີ) ແລະ ລະບົບສາຍໄຍແກ້ວນຳແສງຍາວ 23.000 ກີໂລແມັດ. ຄິດສະເລ່ຍ ພົນລະເມືອງ 1 ລ້ານຄົນ ມີລະບົບສາຍໄຍແກ້ວນຳແສງ 6.600 ກີໂລແມັດ (ຫຼາຍກວ່າ 6,6 ເທົ່າຕົວທຽບກັບລະດັບສະເລ່ຍຂອງໂລກ), ມີລະບົບສະຖານີຮັບ-ສົ່ງສັນຍານໂທລະສັບມືຖື 950 ແຫ່ງ (ຫຼາຍກວ່າ 5 ເທົ່າຕົວທຽບກັບລະດັບສະເລ່ຍຂອງໂລກ).
ຫຼັງຈາກກການປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ພ້ອມກັບທ່ານນາຍົກລັດຖະມົນຕີ ຮຸນເຊັນ ແລະ ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເປັນປະທານຮ່ວມໃນກອງປະຊຸມຖະແຫຼງຂ່າວ ເພື່ອປະກາດຜົນສຳເລັດຂອງກອງປະຊຸມຂັ້ນສູງເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 9 ແລະ ເປັນສັກຂີພິຍານໃນພິທີລົງນາມ “ສັນຍາສົ່ງເສີມແລະອຳນວຍຄວາມສະດວກທາງດ້ານການຄ້າໃນເຂດສາມຫລ່ຽມພັດທະນາ ກຳປູເຈຍ - ລາວ - ຫວຽດນາມ ແລະ ຕົກລົງກັນຈັດຕັ້ງກອງປະຊຸມຂັ້ນສູງ ກຳປູເຈຍ - ລາວ - ຫວຽດນາມ ຄັ້ງທີ 10 ຢູ່ ຫວຽດນາມໃນປີ 2018.
ໃນວັນດຽວກັນ, ທີ່ແຂວງສຽມຣຽບ ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ມີການພົບປະເຈລະຈາກັບທ່ານ ສົມເດັດ ຮຸນເຊັນ ນະຍົກລັດຖະມົນຕີແຫ່ງລາຊະອານາຈັກ ກຳປູເຈຍ ແລະ ພົບປະແລກປ່ຽນຄຳຄິດເຫັນກັບທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ.
ໃນການພົບປະເຈລະຈາກັບ ທ່ານສົມເດັດ ຮຸນເຊັນ ນາຍົກລັດຖະມົນຕີແຫ່ງ ລາຊະອານາຈັດ ກຳປູເຈຍ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຢືນຢັນນະໂຍບາຍອັນສະເໝີຕົ້ນສະເໝີປາຍ ຂອງພັກແລະລັດຫວຽດນາມ ໃນການປັບປຸງ ແລະ ຂະຫຍາຍສາຍພົວພັນກັບກຳປູເຈຍ ຕາມທິດນຳ “ບ້ານໃກ້ເຮືອນຄຽງທີ່ດີງາມ, ມິດຕະພາບອັນເປັນມູນເຊື້ອ, ຮ່ວມມືຮອບດ້ານ, ມີສະຖຽນລະພາບຍາວນາມ”. ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ໄດ້ສະເໜີນຳລັດຖະບານກຳປູເຈຍ ໃຫ້ສືບຕໍ່ອຳນວຍຄວາມສະດວກຊ່ວຍເຫຼືອປະຊາຊົນກຳປູເຈຍ ຜູ້ທີ່ມີຕົ້ນກຳເນີດຫວຽດນາມ ໄດ້ຮັບຄວາມສະຫງົບອຸ່ນອຽນໃນຊີວິດນິຕິກຳ, ເສດຖະກິດ ເພື່ອປະກອບສ່ວນເຂົ້າໃນການພັດທະນາເສດຖະກິດ - ສັງຄົມ ຂອງປະເທດກຳປູເຈຍ.
ໃນການພົບປະແລກປ່ຽນຄຳຄິດເຫັນກັບທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ຜູ້ນຳທັງສອງທ່ານກໍ່ໄດ້ມີການຕີລາຄາສູງຕໍ່ຄວາມໝາຍອັນສຳຄັນທີ່ສຸດ ຂອງການຢ້ຽມຢາມມິດຕະພາບທີ່ປະເທດ ສປປ ລາວ ຂອງທ່ານ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ (ໃນເວລາແຕ່ວັນທີ 24 ຫາ 26 ພະຈິກ 2016), ຊຶ່ງໄດ້ເຮັດໃຫ້ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ຂະຫຍາຍຕົວຂຶ້ນສູ່ລະດັບໃໝ່. ສອງຝ່າຍໄດ້ເຫັນດີເປັນເອກະພາບຈະສຸມໃສ່ສຳເລັດມີໄຊ ຂໍ້ຕົກລົງກ່ຽວກັບແຜນການຮ່ວມມືລະຫວ່າງສອງລັດຖະບານໃນປີ 2016, ສ້າງພື້ນຖານເບື້ອງຕົ້ນອັນສະດວກ ໃຫ້ແກ່ການຜັນຂະຫຍາຍສັນຍາວ່າດ້ວຍການຮ່ວມມືສອງຝ່າຍ ຫວຽດນາມ - ລາວ ໃນໄລຍະ 2016 - 2020.
ເນື່ອງໃນໂອກາດມາຮ່ວມກອງປະຊຸມຄັ້ງນີ້, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມີການພົບປະກັບຜູ້ຕາງໜ້າສະມາຄົນຊາວຫວຽດນາມຢູ່ນະຄອນສຽມຣຽບ. ໂດຍແບ່ງປັນຄວາມຫຍຸ້ງຍາກຂອງພີ່ນ້ອງຊາວຫວຽດນາ, ທ່ານນາຍົກລັດຖະມົນຕີໄດ້ມອບເຂົ້າສານຊ່ວຍເຫຼືອ 5 ໂຕນ ໃຫ້ຊາວຫວຽດນາມທີ່ທຸກຍາກຢູ່ ສຽມຣຽບ.
ກ່ອນເວລາເດີນທາງອອກຈາກນະຄອນສຽມຣຽບ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ນາຍົກລັດຖະມົນຕີກຳປູເຈຍ, ນາຍົກລັດຖະມົນຕີລາວ ໄດ້ມີບັນດາການພົບປະ ແລະ ເຮັດວຽກນຳກັນຢ່າງສະໜິດສະໜົມ. ຢູ່ນີ້, ບັນດາຜູ້ນຳໄດ້ສືບຕໍຢືນຢັນຄວາມຕັດສິນໃຈຂອງທັງສາມປະເທດ ໃນການຮັກສາ ແລະ ເສີມຂະຫຍາຍກົນໄກຮ່ວມມືແບບພິເສດສຳລັບເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ເພື່ອຕອບສະໜອງຄວາມມຸ່ງມາປາຖະໜາຂອງປະຊາຊົນທັງສາມປະເທດ./.
ໂດຍ ບນ (ສັງລວມຂ່າວສານຫວຽດນາມ)
