ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ເຂົ້າຮ່ວມກອງປະຊຸມປະຈຳປີຄັ້ງທີ 47 ເວທີປາໄສເສດຖະກິດໂລກ (WEF).
ວກ.ອອນໄລ - ແຕ່ວັນທີ 17 ຫາ 21 ມັງກອນ 2017, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ເຂົ້າຮ່ວມກອງປະຊຸມປະຈຳປີຄັ້ງທີ 47 ເວທີປາໄສໂລກ (WEF) ຢູ່ທີ່ເມືອງ ດາວອສ ປະເທດສະວິດເຊີແລນ ຕາມຄຳເຊີນຂອງທ່ານ ເກຼົາ ສະວາບ ປະທານ WEF.
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ເຂົ້າຮ່ວມ ແລະ ກ່າວປາໄສໃນວາລະປະຊຸມຄົບຄະນະ ກ່ຽວກັບຫົວຂໍ້ “ເອກະລັກຂອງຂະແໜງການຜະລິດ: ອາຊຽນ ໄດ້ກາຍເປັນປະຊາຄົມແລ້ວຫຼືຍັງ?”. (ພາບ: TTXVN)
ໃນກອງປະຊຸມເວທີປາໄສໂລກ WEF ປີນີ້, ດ້ວຍຫົວຂໍ້ “ຄວາມຮັບຜິດຊອບແລະການກະທຳຂອງຜູ້ນຳ”, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ກ່າວປາໄສໃນບັນດາວາລະປະຊຸມຄົບຄະນະ, ການສົນທະນາ ກ່ຽວກັບບັນດາຫົວຂໍ້ຕົ້ນຕໍຄື “ອະນາຄົດຂອງການຜະລິດໃນທັດສະນະຂອງແຜນຍຸດທະສາດພາກພື້ນ”, “ແງ່ຫວັງຂອງອາຊຽນ ພາຍຫຼັງ 50 ປີແຫ່ງການສ້າງຕັ້ງ ແລະ ພັດທະນາ”, “ການນຳພາຢ່າງເປັນເຈົ້າການ ແລະ ມີຄວາມຮັບຜິດຊອບ ໃນໂລກທີ່ມີຫຼາຍຂົ້ວ”, “ການບໍລິຫານທີ່ເຂັ້ມແຂງ ໃນການປະຕິວັດອຸດສາຫະກຳຄັ້ງທີສີ່”, “ເອກະລັກຂອງຂະແໜງການຜະລິດ: ອາຊຽນ ໄດ້ກາຍເປັນປະຊາຄົມແລ້ວຫຼືຍັງ?”. ຕາມນັ້ນ, ທ່ານນາຍົກລັດຖະມົນຕີ ຫງວຽນຊວນຝຸກ ເນັ້ນວ່າ ບັນດາປະເທດຄວນກະທຳຢ່າງມີຄວາມຮັບຜິດຊອບເພື່ອຮັກສາສັນຕິພາບ ສະຖຽນລະພາບໃນໂລກ ແລະ ໃນພາກພື້ນ; ຕີລາຄາສູງບົດບາດຂອງບັນດາອົງການຈັດຕັ້ງພະຫຸພາຄີ, ໂດຍສະເພາະແມ່ນສະຫະປະຊາຊາດ, ອາຊຽນ ໃນການຊຸກຍູ້ບັນດາຜົນປະໂຫຍດລວມຂອງປະຊາຄົມສາກົນ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ເນັ້ນວ່າ ບັນດາໂອກາດ ແລະ ສິ່ງທ້າທາຍຂອງການປະຕິວັດອຸດສາຫະກຳຄັ້ງທີສີ່ ທີ່ມີຕໍ່ບັນດາປະເທດກຳລັງພັດທະນາ, ໃນນັ້ນມີຫວຽດນາມ. ຢືນຢັນ ຫວຽດນາມພວມສຸມໃສ່ຈັດວາງໂຄງປະກອບເສດຖະກິດຄືນໃໝ່, ປ່ຽນແປງໃໝ່ຕົວແບບເຕີບໂຕໂດຍອີງໃສ່ການຍົກສູງປະສິດທິພາບແຮງງານ ແລະ ຄວາມສາມາດແຂ່ງຂັນ, ສົ່ງເສີມການປະກອບການ ປ່ຽນແປງໃໝ່ ປະດິດສ້າງ, ພັດທະນາແຫຼ່ງບຸກຄະລາກອນຄຸນນະພາບສູງ ເພື່ອຍາດແຍ່ງເອົາໂອກາດດີຂອງການປະຕິວັດອຸດສາຫະກຳຄັ້ງທີສີ່.
ໃນວາລະປະຊຸມຄົບຄະນະກ່ຽວກັບບົດບາດຂອງ ອາຊຽນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ຍົກໃຫ້ເຫັນແຈ້ງບັນດາຜົນສຳເລັດຂອງ ອາຊຽນ ໃນເສັ້ນທາງ 50 ປີແຫ່ງການກໍ່ຕັ້ງແລະພັດທະນາ, ຕີລາຄາສູງຕໍ່ຫຼັກການເຫັນດີເຫັນພ້ອມ ແລະ “ວິທີທາງອາຊຽນ” ທີ່ໄດ້ປະກອບເປັນເອກະລັກອາຊຽນ; ທ່ານໃຫ້ທັດສະນະວ່າ, ບັນດາປະເທດສະມາຊິກຄວນຮ່ວມມືນຳກັນຢ່າງແໜ້ນແຟ້ນ ເພື່ອປະຕິບັດຢ່າງມີປະສິດທິຜົນແຜນງານວິໄສທັດ 2025 ຂອງປະຊາຄົມເສດຖະກິດອາຊຽນ, ເສີມຂະຫຍາຍການຮ່ວມມືພາຍໃນກຸ່ມ, ຂຸດຄົ້ນເປັນຢ່າງດີ ບັນດາສັນຍາການຄ້າເສດລີກັບບັນດາຄູ່ຮ່ວມມື ເພື່ອແນໃສ່ສ້າງເງື່ອນໄຂດຶງດູດການລົງທຶນ, ການຄ້າເຂົ້າໃນພາກພື້ນ; ສືບຕໍ່ປະຕິບັດຢ່າງມີປະສິດທິຜົນ ບັນດາກົນໄກພາກພື້ນທີ່ອາຊຽນນຳພາ ກ່ຽວກັບການຮັບປະກັນຄວາມສະຫງົບ, ຮັກສາສັນຕິພາບ, ການຮ່ວມມື. ຢືນຢັນຫວຽດນາມປະກອບສ່ວນທີ່ສຳຄັນແລະມີຄວາມຮັບຜິດຊອບ ເຂົ້າໃນການປັບປຸງຄວາມສາມັກຄີ ແລະ ຄວາມເຫັນດີເຫັນພ້ອມຂອງອາຊຽນ, ຕັ້ງໜ້າພະຍາຍາມພ້ອມກັນກັບບັນດາປະເທດອາຊຽນ ກໍ່ສ້າງປະຊາຄົນອາຊຽນໃຫ້ໝັ້ນຄົງເຂັ້ມແຂງ.
* ໃນບັນດາການເຄື່ອນໄຫວສອງຝ່າຍ, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ພົບປະກັບທ່ານ D. Leuthard ປະທານາທິບໍດີສະວິດເຊີແລນ ແລະ ຜູ້ນຳຂອງຫຼາຍປະເທດທີ່ມາຮ່ວມກອງປະຊຸມຄື ທ່ານ C. Kern ນາຍົກລັດຖະມົນຕີໂອຕະລິດ, ທ່ານ M. Rutte ນາຍົກລັດຖະມົນຕີໂຮນລັງ, ສົມເດັດພະລາຊີນີ Maxima ແຫ່ງໂຮນລັງ, ທ່ານ R. Wickremesinghe ນາຍົກລັດຖະມົນຕີສີລັງກາ, ປະທານາທິບໍດີ ອູເກຣນ P. Poroshenko. ໃນບັນດາການພົບປະດັ່ງກ່າວນັ້ນ, ສອງຝ່າຍໄດ້ແລກປ່ຽນຫຼາຍບັນຫາຫຼາຍມາດຕະການ, ເຫັນດີເປັນເອກະສັນຈະເພີ່ມທະວີການປະສານສົມທົບ ເພື່ອປະຕິບັດບັນດາກົນໄກຮ່ວມມືສອງຝ່າຍຢ່າງມີປະສິດທິຜົນ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ກໍ່ໄດ້ມີການພົບປະກັບຜູ້ນຳຂອງບັນດາອົງການຈັດຕັ້ງສາກົນເຊັ່ນ ທ່ານເລຂາທິການໃຫຍ່ສະຫະປະຊາຊາດ A. Guterres, ທ່ານປະທານທະນາຄານໂລກ Y. Kim, ຜູ້ອຳນວຍການໃຫຍ່ຂອງອົງການການຄ້າໂລກ R. Azevedo, ທ່ານປະທານທະນາຄານພັດທະນາອາຊີ T. Nakao, ທ່ານປະທານອົງການເພື່ອຄວາມຮ່ວມມືທາງເສດຖະກິດ ແລະ ການພັດທະນາ A.Gurria. ໃນບັນດາການພົບປະດັ່ງກ່າວ, ສອງຝ່າຍໄດ້ເປັນເອກະສັນຈະສືບຕໍ່ຊຸກຍູ້ຄວາມພົວພັນຮ່ວມມື ລະຫວ່າງຫວຽດນາມ ກັບບັນດາອົງການຈັດຕັ້ງສາກົນ, ປະກອບສ່ວນຊຸກຍູ້ການພັດທະນາເສດຖະກິດຂອງຫວຽດນາມ, ເພື່ອຄວາມວັດທະນາຖາວອນຂອງພາກພື້ນ ແລະ ໃນໂລກ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ພ້ອມກັບທ່ານປະທານ WEF K. Schwab ໄດ້ເປັນສັກຂີພະຍານໃນພິທີລົງນາມໃນຂໍ້ຕົກລົງການຮ່ວມມື ລະຫວ່າງຫວຽດນາມ ແລະ WEF ກ່ຽວກັບການພັດທະນາເສດຖະກິດຫວຽດນາມໃຫ້ເຂັ້ມແຂງແຮງກ້າໃນອະນາຄົດ. ຕາມນັ້ນ, WEF ຈະຊ່ວຍເຫຼືອຫວຽດນາມໃນການເຊື່ອມຕໍ່ກັບເຄືອຂ່າຍທຸລະກິດ ແລະ ນັກຄົ້ນຄວ້າຊັ້ນນຳຂອງ WEF; ປະສານສົມທົບກັບຫວຽດນາມໃນການຄົ້ນຄວ້າ ແລະ ໃຫ້ຄຳປຶກສາກ່ຽວກັບນະໂຍບາຍໃນບັນດາຂົງເຂດທີ່ຫວຽດນາມມີຄວາມສົນໃຈ; ຍົກສູງຄວາມສາມາດ ໂດຍຜ່ານການຮັບພະນັກງານຫວຽດນາມມາຝຶກງານຢູ່ໃນບັນດາອົງການ, ການຈັດຕັ້ງຂອງ WEF. ຫວຽດນາມເປັນປະເທດທຳອິດທີ່ WEF ລົງນາມໃນຂໍ້ຕົກລົງການຮ່ວມມືແບບ PPP ແລະ ຫວັງວ່າ ຕົວແບບນີ້ຈະເປັນ “ແບບຢ່າງ” ໜຶ່ງເພື່ອຜັນຂະຫຍາຍຢູ່ປະເທດອື່ນ.
* ໃນຂອບກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ພົບປະກັບຜູ້ນຳຫຼັກແຫຼ່ງຂອງ 40 ກຸ່ມບໍລິສັດຂ້າມຊາດ, ວິສາຫະກິດຂະໜາດໃຫຍ່ໃນໂລກ ທາງດ້ານການເງິນແລະເຕັກໂນໂລຊີຄື Microsoft, Facebook, Alphabet (Google), Qualcom, Standard Chartered, Prudential, Alibaba, JETRO, Mitsubishi, UPS, Carlyle, Swiss Re… ແລະມີການສົນທະນາສະເພາະບັນຫາກັບບັນດາວິສາຫະກິດຊັ້ນນຳໃນໂລກ ກ່ຽວກັບເຕັກໂນໂລຊີຂໍ້ມູນຂ່າວສານ ແລະ ການເງິນ, ໃຫ້ຄຳຕອບໂດຍກົງກ່ຽວກັບຫຼາຍບັນຫາທີ່ວິສາຫະກິດມີຄວາມສົນໃຈ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ສະແດງຄວາມຕັດສິນໃຈຈະກໍ່ສ້າງລັດຖະບານທີ່ຊື່ກົງບໍລິສຸດ, ສ້າງສັນພັດທະນາ, ຮັບໃຊ້ປະຊາຊົນແລະວິສາຫະກິດ. ສູ້ຊົນເພື່ອປີ 2017 ຈະບັນລຸໄດ້ບັນດາເປົ້າໝາຍຕົ້ນຕໍກ່ຽວກັບສິ່ງແວດລ້ອມແຫ່ງການທຸລະກິດທີ່ສະດວກດີ ເທົ່າກັບລະດັບສະເຫຼ່ຍຂອງ 4 ປະເທດນຳໜ້າ ອາຊຽນ. ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຊົນເຊີຍຕໍ່ບັນດາກຸ່ມບໍລິສັດຕ່າງປະເທດທີ່ມາຮ່ວມມືກັບຫວຽດນາມ, ພ້ອມກັນແບ່ງປັນຜົນປະໂຫຍດ ແລະ ພ້ອມກັນພັດທະນາຖາວອນ. ບັນດາຜູ້ນຳກຸ່ມບໍລິສັດລ້ວນແຕ່ຕີລາຄາສູງຄວາມສາມາດບົ່ມຊ້ອນໃນການພັດທະນາຂອງຫວຽດນາມ, ຊົມເຊີຍຄວາມມານະພະຍາຍາມປະຕິຮູບຢ່າງແຂງແຮງຂອງລັດຖະບານຫວຽດນາມ, ໃຫ້ຄຳໝັ້ນສັນຍາຈະເຄື່ອນໄຫວຍາວນານຢູ່ຫວຽດນາມ, ກໍ່ຄືຄວາມມຸ່ງໝັ້ນສືບຕໍ່ລົງທຶນຢູ່ຫວຽດນາມ, ໂດຍສະເພາະແມ່ນໃນຂົງເຂດທີ່ຫວຽດນາມມີທ່າແຮງ ແລະ ມີຄວາມຕ້ອງການຄື ເຕັກໂນໂລຊີຂໍ້ມູນຂ່າວສານ, ກະສິກຳເຕັກໂນໂລຊີສູງ…
ການເຂົ້າຮ່ວມກອງປະຊຸມ WEF ຄັ້ງນີ້ຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ໄດ້ນຳສະເໜີ ຢືນຢັນຢ່າງໜັກແໜ້ນ ແນວທາງ, ທິດທາງ, ນະໂຍບາຍ ແລະ ຄວາມຕັດສິນໃຈຂອງຫວຽດນາມ ກ່ຽວກັບການປ່ຽນແປງໃໝ່ຮອບດ້ານ ແລະ ເຊື່ອມໂຍງສາກົນໄລຍະ 2016 - 2020. ຢືນຢັນຄຳໜັ້ນສັນຍາຂອງຫວຽດນາມໃນການກໍ່ສ້າງລັດຖະບານທີ່ຂະຫຍັນຂັນເຄື່ອນ ແລະ ສ້າງສັນພັດທະນາ, ເສີມສ້າງຄວາມເຊື່ອໝັ້ນຂອງຊຸມຊົນທຸລະກິດລະຫວ່າງຊາດ. ຄຽງຂ້າງນັ້ນ, ກໍ່ດຶງດູດຄວາມສົນໃຈ ແລະ ການສະໜັບສະໜູນຂອງປະຊາຄົນໂລກຕໍ່ກັບການເຄື່ອນໄຫວຕ່າງໆໃນປີກອງປະຊຸມສຸດຍອດ APEC 2017 ຢູ່ຫວຽດກນາມ./.
ສັງລວມໂດຍ ເຟືອງຈ່າ
