ສະຫະປະຊາຊາດ ແລະ ການປະກອບສ່ວນ ຂອງຫວຽດນາມ
ວກ.ອອນໄລ - ຜ່ານໄລຍະເວລາ 70 ກວ່າປີແຫ່ງການພັດທະນາ, ອົງການສະຫະປະຊາຊາດທີ່ມີ 193 ປະເທດສະມາຊິກ ເຊິ່ງຍາມໃດກໍ່ນຳໜ້າໃນກິດຈະການຮັກສາສັນຕິພາບ, ຊຸກຍູ້ຊີວິດສາກົນນະໂລກໃຫ້ພັດທະນາໃນທຸກດ້ານ ທຸກຂົງເຂດ, ກາຍເປັນສູນກາງແຫ່ງການກຳກັບຂັບເຄື່ອນຄວາມພະຍາຍາມຕ່າງໆ, ແນໃສ່ຮັບມື, ແກ້ໄຂສິ່ງທ້າທາຍລະດັບໂລກຕ່າງໆ ໃນສະພາບການໃໝ່ທີ່ມີການຜັນປ່ຽນຫຼາຍຢ່າງຂອງໂລກ. ສີ່ສິບປີທີ່ຜ່ານມາ, ນັບແຕ່ເມື່ອກາຍເປັນສະມາຊິກຂອງອົງການສະຫະປະຊາຊາດ ມາເຖິງປະຈຸບັນ (20-9-1977 - 20-9-2017), ຫວຽດນາມຍາມໃດກໍ່ສະແດງໃຫ້ເຫັນເຖິງບົດບາດທີ່ຕັ້ງໜ້າ, ເປັນເຈົ້າການແລະມີຄວາມຮັບຜິດຊອບຂອງຕົນ, ໄດ້ມີສ່ວນປະກອບຕົວຈິງທີ່ມີປະສິດທິຜົນ ເຂົ້າໃນອົງການຈັດຕັ້ງສາກົນທີ່ໃຫຍ່ທີ່ສຸດນີ້ຂອງໂລກ.
ສະຫະປະຊາຊາດ: ຫັນເບິ່ງຄືນໄລຍະແຫ່ງການພັດທະນາທີ່ຜ່ານມາ
ສະຫະປະຊາຊາດກຳເນີດເກີດຂຶ້ນມາພາຍຫຼັງການທຳລາຍວິນາດຂອງສົງຄາມໂລກຄັ້ງທີສອງ, ພາລະກິດທີ່ຍິ່ງໃຫຍ່ຂອງສະຫະປະຊາຊາດ ໄດ້ກຳນົດຢ່າງຈະແຈ້ງໃນແຖວທຳອິດຂອງ ກົດບັດສະຫະປະຊາຊາດ ເຊິ່ງເປັນການສ່ອງແສງເຖິງຄວາມປາຖະໜາອັນແຮງກ້າ ຂອງບັນດາປະຊາຊາດທີ່ຫາກໍ່ຜ່ານຄວາມສູນເສຍ ຄວາມເຈັບປວດໃນສົງຄາມໂລກຄັ້ງນີ້ - ນັ້ນແມ່ນກີດກັ້ນບໍ່ໃຫ້ສົງຄາມໂລກຄັ້ງໃໝ່ເກີດຂຶ້ນອີກ.
ຕາມກົດບັດສະຫະປະຊາຊາດ, ບັນດາປະເທດກໍ່ຕັ້ງໄດ້ຕັດສິນໃຈກໍ່ສ້າງສະຫະປະຊາຊາດໃຫ້ກາຍເປັນອົງການຈັດຕັ້ງສາກົນທົ່ວໂລກ ເຊິ່ງມີເປົ້າໝາຍສູງສຸດຄື ຮັບປະກັນສັນຕິພາບແລະຄວາມເປັນລະບຽບຂອງໂລກຢ່າງຍືນຍົງ, ພ້ອມກັນນັ້ນກໍ່ກຳນົດບັນດາເປົ້າໝາຍທີ່ສຳຄັນອື່ນອີກ ໃນການເຄື່ອນໄຫວຂອງສະຫະປະຊາຊາດ ນັ້ນຄື ເພີ່ມທະວີການພົວພັນມິດຕະພາບລະຫວ່າງບັນດາປະຊາຊາດ, ຊຸກຍູ້ການຮ່ວມມືເພື່ອແກ້ໄຂບັນດາບັນຫາສາກົນທາງດ້ານເສດຖະກິດ, ສັງຄົມ, ວັດທະນະທຳ, ມະນຸດສະທຳ ບົນພື້ນຖານເຄົາລົບບັນດາສິດທິມະນຸດ ແລະ ສິດເສລີພາບອັນພື້ນຖານໃຫ້ທຸກຄົນ ໂດຍບໍ່ຈຳແນກເຊື້ອຊາດ, ຜີວພັນ, ພາສາ ແລະ ສາສະໜາ. ດ້ວຍຄວາມພະຍາຍາມປະຕິບັດບັນດາໜ້າທີ່ເທິງນີ້, ໃນ 7 ທົດສະວັດທີ່ຜ່ານມາ, ສະຫະປະຊາຊາດໄດ້ບັນລຸບັນດາຜົນສຳເລັດທີ່ສຳຄັນ.
ທີໜຶ່ງ, ແກ້ໄຂການປະທະກັນ, ຂໍ້ຂັດແຍ່ງພິພາດ ດ້ວຍສັນຕິວິທີໄດ້ເປັນຈຳນວນຫຼາຍ; ຮັກສາສັນຕິພາບ, ຮັບປະກັນຄວາມສະຫງົບປອດໄພຂອງໂລກ. ສ່ວນປະກອບທີ່ໃຫຍ່ທີ່ສຸກຂອງສະຫະປະຊາຊາດແມ່ນ ໄດ້ປະກອບສ່ວນກີດກັ້ນ ບໍ່ໃຫ້ສົງຄາມໂລກຄັ້ງໃໝ່ເກີດຂຶ້ນໃນ 70 ກວ່າປີທີ່ຜ່ານມາ. ດ້ວຍການໄກ່ເກ່ຍຂອງສະຫະປະຊາຊາດ, ການວິກິດສາກົນຫຼາຍຄັ້ງໃນໂລກໄດ້ຮັບການແກ້ໄຂ, ຜົນຮ້າຍຢ້ອນຫຼັງຈຳນວນໜຶ່ງຈາກສົງຄາມກາງເມືອງລະຫວ່າງຊຸມຊົນຊົນເຜົ່າ, ສາສະໜາ ໄດ້ຮັບການແກ້ໄຂກີດກັ້ນ ຈຳກັດ, ປະກອບສ່ວນເຮັດໃຫ້ສະພາບການເປັນປົກກະຕິ, ນຳຄວາມຫວັງສູ່ໂລກກ່ຽວກັບກຳລັງແຮງຂອງອົງການໃຫຍ່ທີ່ສຸດໃນໂລກ ເຊິ່ງມີບົດບາດເປັນສູນກາງແຫ່ງການປະສົມກົມກຽວການກະທຳຂອງບັນດາປະຊາຊາດ ເພື່ອສັນຕິພາບ. ຄວາມພະຍາຍາມຂອງສະຫະປະຊາຊາດໃນການເລີກລ້າງກຳລັງອາວຸດ, ຈຳກັດການຊ່ວງເສັງກັນປະກອບອາວຸດ, ໂດຍສະເພາະແມ່ນອາວຸດທຳລາຍລ້າງສູງ, ປະກອບສ່ວນຮັກສາສັນຕິພາບແລະຄວາມໝັ້ນຄົງຂອງໂລກ.
ທີສອງ, ຊຸກຍູ້ການພົວພັນຮ່ວມມືທາງດ້ານເສດຖະກິດ, ການເມືອງ, ວັດທະນະທຳ, ສັງຄົມ ລະຫວ່າງບັນດາປະເທດສະມາຊິກ, ຊ່ວຍເຫຼືອບັນດາປະເທດກຳລັງພັດທະນາ, ດຳເນີນການບັນເທົາທຸກດ້ານມະນຸດສະທຳ ເມື່ອປະເທດສະມາຊິກປະສົບຄວາມຫຍຸ້ງຍາກ, ປົກປັກຮັກສາສິ່ງແວດລ້ອມ ລະບົບນິເວດ; ແກ້ໄຂບັນດາບັນຫາເສດຖະກິດ-ສັງຄົມຂອງປະຊາຄົມໂລກ ເຊັ່ນຊຸກຍູ້ການຮ່ວມມືພ້ອມກັນພັດທະນາ, ປົກປັກຮັກສາສິ່ງແວດລ້ອມ, ຕ້ານຄວາມອຶດຫີວທຸກຍາກ, ພະຍາດ, ຄວາມບໍ່ສະເໝີພາບ.
ທີສາມ, ວາງຂໍ້ກຳນົດກົດລະບຽບ, ຂໍ້ກຳນົດກົດໝາຍສາກົນ ເພື່ອຮັບປະກັນສິດທິມະນຸດສຳລັບປະຊາຊົນທຸກຄົນໃນໂລກ. ບັນດາການເຄື່ອນໄຫວຊ່ວຍເຫຼືອດ້ານມະນຸດສະທຳຂອງສະຫະປະຊາຊາດ ໄດ້ປະກອບສ່ວນຊ່ວຍໃຫ້ຜູ້ອົບພະຍົບລີ້ໄພຫຼາຍລ້ານຄົນ ມີຊີວິດຢູ່ເປັນປົກກະຕິ; ພ້ອມກັນນັ້ນກໍ່ປະກອບສ່ວນເປີດກວ້າງບົດບາດຂອງສະຫະປະຊາຊາດ ໃນການປົກປ້ອງສາມັນຊົນ, ກີດກັ້ນການຈຳແນກປະພຶດ ແລະ ການລະເມີດສິດທິມະນຸດ, ກີດກັ້ນບໍ່ໃຫ້ມີການຄາຕະກຳໝູ່ເກີດຂຶ້ນອີກ.
ເຖິງວ່າໄດ້ບັນລຸຜົນສຳເລັດທີ່ໜ້າປະທັບໃຈຕ່າງໆເທິງນີ້ ແຕ່ໃນເວລາເຈັດສິບກວ່າທີ່ຜ່ານມາ ສະຫະປະຊາຊາດກໍ່ຕ້ອງປະເຊີນໜ້າກັບສິ່ງທ້າທາຍບໍ່ໜ້ອຍ ເພື່ອເຮັດໃຫ້ເປົ້າໝາຍເຫຼົ່ານັ້ນປະກົດເປັນຈິງ.
ທີໜຶ່ງ, ສິ່ງທ້າທາຍຕໍ່ໂຄງການພັດທະນາແບບຍືນຍົງຂອງສະຫະປະຊາຊາດໃນເວລາຕໍ່ໜ້າ. ເພື່ອເຮັດໃຫ້ໂຄງການນີ້ປະກົດເປັນຈິງ, ຕ້ອງສ້າງສິ່ງແວດລ້ອມສັນຕິພາບໃນທົ່ວໂລກ. ຢາກໄດ້ຄືແນວນັ້ນ ຕ້ອງແກ້ໄຂໃຫ້ໄດ້ສອງບັນຫາຄື ລົບລ້າງບັນດາ “ຈຸດຮ້ອນ” ແລະ ກີດກັ້ນບໍ່ໃຫ້ເກີດການປະທະກັນ. ແຕ່ພາກຕົວຈິງໃນເວລາທີ່ຜ່ານມາພັດໃຫ້ເຫັນວ່າ, ບັນດາ “ຈຸດຮ້ອນ” ຍັງມີຢູ່ຫຼາຍແຫ່ງໃນໂລກ ແລະບາງແຫ່ງກໍ່ມີທ່າອຽງຮ້າຍແຮງດຸເດືອດກວ່າເກົ່າ; ໄພສົງຄາມຍັງບໍ່ຖືກລົບລ້າງ. ຄວາມຮຸນແຮງຍັງສືບຕໍ່ຢູ່ໃນຫຼາຍແຫ່ງ: ການປະທະກັນທີ່ທະວີຄວາມຮຸນແຮງຂຶ້ນຢູ່ຕາເວັນອອກກາງ, ເຫດການຜັນປ່ຽນທີ່ບໍ່ສາມາດຄາດເດົາໄດ້ໃນແຫຼມເກົາຫຼີ, ຂໍ້ພິພາດທີ່ເຄັ່ງຕຶງຢູ່ມະເລຈີນຕາເວັນອອກ, ທະເລຕາເວັດອອກ,... ສະພາບຄວາມສະຫງົບປອດໄພຢູ່ບາງພາກພື້ນສືບຕໍ່ສັບສົນຜິດປົກກະຕິ, ການປະທະກັນດ້ວຍກຳລັງອາວຸດລະຫວ່າງປະເທດ ແລະ ພາຍໃນແຕ່ລະປະເທດ ຍ້ອນຄວາມຂັດແຍ່ງທາງດ້ານຊົນເຜົ່າ, ສາສະໜາ ຍັງເກີດຂຶ້ນຢູ່ຫຼາຍແຫ່ງ ແລະ ມີທ່າອຽງແຜ່ກວ້າງອອກ ຊຶ່ງເປັນການຂົ່ມຂູ່ຕໍ່ສັນຕິພາບ, ສະຖຽນລະພາບຂອງພາກພື້ນແລະຂອງໂລກ. ບັນດາບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມເຊັ່ນ ອາຊະຍາກຳຂ້າມຊາດ, ການປ່ຽນແປງຂອງດິນຟ້າອາກາດ, ໄພທຳມະຊາດ, ໂລກລະບາດ... ພວມມີທ່າອຽງເພີ່ມຂຶ້ນເລື້ອຍໆ.
ພ້ອມກັນນັ້ນ, ການເຄື່ອນໄຫວກໍ່ການຮ້າຍກໍ່ມີທ່າອຽງແຜ່ກວ້າງອອກໃນຫຼາຍເຂດແລະຫຼາຍແຫ່ງໃນໂລກ ດ້ວຍລະດັບທີ່ແນບນຽນ, ໂຫດຮ້າຍກວ່າເກົ່າ ຊຶ່ງເປັນການຂົ່ມຂູ່ຄວາມສະຫງົບປອດໄພໃນທົ່ວໂລກ. ນັ້ນແມ່ນຍັງບໍ່ເວົ້າເຖິງໄພອັນຕະລາຍທີ່ອາດຈະເກີດຂຶ້ນແລະຂົ່ມຂູ່ຄວາມໝັ້ນຄົງຂອງໂລກ ຊຶ່ງເລີ່ມຈາກການແກ່ງແຍ້ງທາງຍຸດທະສາດ ລະຫວ່າງບັນດາປະເທດມະຫາອຳນາດ. ຖ້າຫາກຂໍ້ຂັດແຍ້ງທັງໝົດເທິງນີ້ບໍ່ຖືກຄວບຄຸມເປັນຢ່າງດີ ກໍ່ຈະພາໃຫ້ເກີດຄວາມສ່ຽງທີ່ຄາດເດົາບໍ່ໄດ້, ຊ້ຳພັດຍັງອາດຈະເກີດສົງຄາມອີກ, ເຮັດໃຫ້ການປະຕິບັດໂຄງການພັດທະນາແບບຍືນຍົງພົບຄວາມຫຍຸ້ງຍາກກວ່າອີກ.
ທີສອງ, ສິ່ງທ້າທາຍຕໍ່ການຮັບປະກັນການພັດທະນາແບບກົມກຽວ, ກ່ອນອື່ນໝົດແມ່ນການລົບລ້າງຄວາມອຶດຫີວ ຫລຸດຜ່ອນຄວາມທຸກຍາກ, ຫລຸດຜ່ອນຄວາມແຕກໂຕນຮັ່ງມີ - ທຸກຍາກ ລະຫວ່າງບັນດາປະເທດ, ບັນດາພາກພື້ນໃນໂລກ. ເຖິງວ່າມະນຸດຊາດໄດ້ບັນລຸຄວາມກ້າວໜ້າທີ່ຍິ່ງໃຫຍ່ໃນວິທະຍາສາດ - ເຕັກໂນໂລຊີກໍ່ຕາມ ແຕ່ກໍ່ຍັງບໍ່ທັນມີມາດຕະການ ວິທີການ ເພື່ອຮັບມືຢ່າງມີປະສິດທິພາບ ກັບໄພທຳມະຊາດ,ໂລກລະບາດ ແລະ ສະພາບຄວາມທຸກຍາກ ອຶດຫີວໃນໂລກ. ໃນຂະນະນັ້ນ, ຄວາມແຕກໂຕນຮັ່ງມີ - ທຸກຍາກນັບມື້ນັບເພີ່ມຂຶ້ນລະຫວ່າງບັນດາປະເທດ, ນັບທັງຢູ່ພາຍໃນປະເທດທີ່ພັດທະນາແລ້ວ. ເຖິງວ່າສະຫະປະຊາຊາດ ແລະ ບັນດາອົງການຈັດຕັ້ງຂອງສະຫະປະຊາຊາດ ໄດ້ເອົາໃຈໃສ່ເປັນພິເສດເຖິງການຕໍ່ສູ້ຕ້ານຄວາມທຸກຍາກ ອຶດຫີວ ແລະ ໄດ້ດຳເນີນຫຼາຍໂຄງການແຜນງານເພື່ອລົບລ້າງຄວາມອຶດຫີວ ຫລຸດຜ່ອນຄວາມທຸກຍາກຢູ່ໃນໂລກກໍ່ຕາມ ແຕ່ສະພາບຄວາມອຶດຫີວ ທຸກຍາກ ແລະ ຄວາມບໍ່ສະເໝີພາບ ຍັງຄົງເປັນຈິງປະຈັກແຈ້ງຢູ່.
ຄວາມເປັນຈິງທັງໝົດນັ້ນ ຮຽກຮ້ອງໃຫ້ໂລກຕ້ອງມີຮູບແບບການດຳເນີນງານ, ປະຕິບັດການສົມທົບ ແລະ ຮ່ວມມືໃໝ່, ມີຄວາມພະຍາຍາມຮ່ວມກັນ ໃນການຮັກສາສັນຕິພາບ, ສະຖຽນລະພາບ, ສ້າງຄວາມພົວພັນສະເໝີພາບ ລະຫວ່າງບັນດາປະເທດ ແລະ ຮັບປະກັນສິ່ງແວດລ້ອມສາກົນທີ່ສະດວກດີ ໃຫ້ແກ່ການພັດທະນາຂອງທຸກປະເທດໃນໂລກ. ສະຫະປະຊາຊາດເປັນອົງການທີ່ຮັບຜິດຊອບຕົ້ນຕໍ່ໃນການຮັບປະກັນສັນຕິພາບ ແລະ ສະຖຽນລະພາບຂອງໂລກ, ເປັນສູນກາງແຫ່ງການສົມທົບນະໂຍບາຍການຕ່າງປະເທດ ລະຫວ່າງບັນດາປະຊາຊາດ ແລະ ແກ້ໄຂຫຼາຍບັນຫາທົ່ວໂລກທີ່ສຳຄັນ ຊຶ່ງຈຳເປັນຕ້ອງສືບຕໍ່ປະຕິຮູບ ແລະ ມີການປັບຕົວຕໍ່ໄປ ເພື່ອຮັບປະກັນພາລະກິດຂອງຕົນຄື ຊ່ວຍເຫຼືອທຸກປະເທດໃນໂລກ.
ສ່ວນປະກອບຂອງຫວຽດນາມ ໃຫ້ແກ່ໃນອົງການສະຫະປະຊາຊາດ
ດ້ວຍຄວາມປະສົງຢາກກາຍເປັນສະມາຊິກຖາວອນຂອງອົງການສະຫະປະຊາຊາດ, ນັບແຕ່ເມື່ອປະເທດຫາກໍ່ໄດ້ສ້າງຕັ້ງຂຶ້ນມາ, ທ່ານປະທານ ໂຮ່ຈີມິນ ໄດ້ຕາງໜ້າປະເທດສາທາລະນະລັດ ປະຊາທິປະໄຕ ຫວຽດນາມ ຂຽນຈົດໝາຍຝາກເຖິງ ກອງປະຊຸມຄັ້ງທຳອິດຂອງ ສະມັດຊາໃຫຍ່ສະຫະປະຊາຊາດ ທີ່ຈັດຂຶ້ນຢູ່ນະຄອນຫຼວງ ລອນດອນ (ປະເທດ ອັງກິດ) ເດືອນມັງກອນ 1946, ຢັ້ງຢືນຄວາມສະໜັບສະໜູນຂອງຫວຽດນາມ ຕໍ່ບັນດາເປົ້າໝາຍຂອງສະຫະປະຊາຊາດ ແລະ ສະແດງຄວາມປະສົງຢາກປະກອບສ່ວນເຫື່ອແຮງເຂົ້າວຽກງານລວມຂອງສະຫະປະຊາຊາດ.
ໃນກອງປະຊຸມຄັ້ງທີ 32 ຂອງສະມັດຊາໃຫຍ່ສະຫະປະຊາຊາດ ວັນທີ 20 ກັນຍາ 1977, ຫວຽດນາມຖືກຮັບຮອງວ່າເປັນສະມາຊິກທີ 149 ຂອງອົງການຈັດຕັ້ງພະຫຸພາຄີທີ່ໃຫຍ່ທີ່ສຸດນີ້ຂອງໂລກ. ນີ້ເປັນເຫດການທີ່ສຳຄັນໃນພາລະກິດສ້າງສາແລະປົກປັກຮັກສາປະເທດຊາດ, ປະກອບສ່ວນຍົກສູງບົດບາດທີ່ຕັ້ງຂອງຫວຽດນາມໃນເວທີໂລກ, ປະກອບສ່ວນເຂົ້າໃນການຮັກສາສັນຕິພາບ, ການພັດທະນາ ແລະ ຄວາມກ້າວໜ້າທາງສັງຄົມຮ່ວມກັນ ຂອງປະຊາຄົມສາກົນ.
ສີ່ສິບປີທີ່ຜ່ານມານັບແຕ່ເມື່ອຫວຽດນາມເຂົ້າຮ່ວມໃນສະຫະປະຊາຊາດ, ຖານະບົດບາດ, ທີ່ຕັ້ງຂອງຫວຽດນາມໄດ້ຮັບການປົວແປງແລະຍົກສູງຂຶ້ນຢ່າງບໍ່ຢຸດຢັ້ງ; ການເຄື່ອນໄຫວຂອງຫວຽດນາມໃນສະຫະປະຊາຊາດ ນັບມື້ນັບຂະຫຍາຍຕົວທາງດ້ານແບບວິທີແລະເນື້ອໃນ ດ້ວຍການປ່ຽນແປງຫຼືດັດສົມຫຼາຍຢ່າງ ຕາມແຕ່ລະໄລຍະແຫ່ງຄວາມຮັບຮູ້, ແຜນນະໂຍບາຍຍຸດທະສາດ, ກ່ຽວກັບເປົ້າໝາຍ, ແຜນງານການເຄື່ອນໄຫວ... ການພົວພັນຮ່ວມມືລະຫວ່າງຫວຽດນາມ ແລະ ສະຫະປະຊາຊາດ ນັບມື້ນັບໄດ້ຮັບການປັບປຸງແລະພັດທະນາ ທັງລວງກວ້າງແລະລວງເລິກ ຊຶ່ງຖືກຖືວ່າເປັນຮູບແບບໜຶ່ງຂອງການພົວພັນຄູ່ຮ່ວມມືເພື່ອການພັດທະນາ.
ຫວຽດນາມໄດ້ມີຄວາມຕັ້ງໜ້າພະຍາຍາມໃນການຂົນຂວາຍ, ຍາດແຍ່ງເອົາຄວາມເຫັນດີເຫັນພ້ອມ, ສະໜັບສະໜູນທາງດ້ານຈິດໃຈແລະວັດຖຸ ຂອງບັນດາປະເທດສະມາຊິກ ແລະ ບັນດາອົງການຂອງສະຫະປະຊາຊາດ ໃຫ້ແກ່ການຟື້ນຟູປະເທດ ພາຍຫຼັງທີ່ຖືກສົງຄາມທຳລາຍຢ່າງຮ້າຍແຮງ. ດ້ານອື່ນ, ຫວຽດນາມກໍ່ຍາດແຍ່ງໄດ້ການຊ່ວຍເຫຼືອທາງດ້ານເງິນທຶນ, ມັນສະໝອງ, ເຕັກນິກຂອງສະຫະປະຊາຊາດ ເພື່ອຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມຂອງປະເທດຊາດ. ສະຫະປະຊາຊາດເປັນເວທີປາໄສໜຶ່ງ ເພື່ອໃຫ້ຫວຽດນາມຜັນຂະຫຍາຍບັນດາຄວາມຕ້ອງການຂອງນະໂຍບາຍການຕ່າງປະເທດ.
ໃນໄລຍະແຫ່ງການປ່ຽນແປງໃໝ່, ດ້ວຍການຜັນຂະຫຍາຍຢ່າງແຂງແຮງ ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຫັນການພົວພັນສາກົນເປັນຫຼາຍຮູບຫຼາຍແບບ, ເປັນເຈົ້າການ ຕັ້ງໜ້າເຊື່ອມໂຍງເຂົ້າກັບພາກພື້ນແລະສາກົນ, ຫວຽດນາມໄດ້ເພີ່ມທະວີການພົວພັນກັບບັນດາອົງການໃນລະບົບສະຫະປະຊາຊາດ, ເປີດກວ້າງການພົວພັນສອງຝ່າຍແລະຫຼາຍຝ່າຍ ກັບບັນດາປະເທດ ແລະ ບັນດາອົງການຈັດຕັ້ງສາກົນ.
ໃນຖານະເປັນສະມາຊິກຂອງອົງການສະຫະປະຊາຊາດ, ຫວຽດນາມໄດ້ເປັນເຈົ້າການໃນການຜັນຂະຫຍາຍນະໂຍບາຍການຕ່າງປະເທດໄລຍະປ່ຽນແປງໃໝ່, ເຂົ້າຮ່ວມໃນການເຄື່ອນໄຫວຂອງຫຼາຍອົງການທີ່ຂຶ້ນກັບສະຫະປະຊາຊາດ ແລະ ໃນຫຼາຍຂົງເຂດ, ສຳເລັດໜ້າທີ່ເປັນຢ່າງດີ ແລະ ເສີມຂະຫຍາຍບົດບາດເປັນເຈົ້າການ, ຕັ້ງໜ້າ, ມີຄວາມຮັບຜິດຊອບໃນສະຫະປະຊາຊາດ.
ທີໜຶ່ງ, ຫວຽດນາມໄດ້ເຄື່ອນໄຫວຢ່າງຕັ້ງໜ້າເພື່ອພາລະກິດສັນຕິພາບ, ການຮ່ວມມື ແລະ ການພັດທະນາໃນໂລກ.
ນັບຕັ້ງແຕ່ມື້ທຳອິດແຫ່ງການເຂົ້າຮ່ວມໃນສະຫະປະຊາຊາດ, ຫວຽດນາມໄດ້ເປັນເຈົ້າການໃນການປະກອບຄວາມຄິດຄວາມເຫັນ ກ່ຽວກັບບັນດາບັນຫາທີ່ກ່ຽວພັນເຖິງສັນຕິພາບ, ສະຖຽນລະພາບ, ການຮ່ວມມືຢູ່ອາຊີຕາເວັນອອກສຽງໃຕ້. ດ້ວຍບົດບາດສາມັກຄີ, ຫວຽດນາມເປັນປັດໄຈຊຸກຍູ້ການພັດທະນາ ແລະ ເພີ່ມທະວີຖານະບົດບາດຂອງອາຊຽນ, ປະກອບສ່ວນອັນສຳຄັນເຂົ້າໃນການເຮັດໃຫ້ອາຊີຕາເວັນອອກສຽງໃຕ້ມີການຫັນປ່ຽນ ຈາກພາກພື້ນທີ່ຖືກແບ່ງແຍກ, ປະເຊີນໜ້າກັນຍ້ອນສົງຄາມ ກາຍເປັນພາກພື້ນທີ່ມີສັນຕິພາບ, ການຮ່ວມມື ແລະ ພັດທະນາຢ່າງຂະຫຍັນຂັນແຂງ. ພ້ອມກັນນັ້ນ, ຫວຽດນາມໄດ້ຕັ້ງໜ້າພ້ອມກັນກັບຫຼາຍປະເທດສະມາຊິກອື່ນ ຊຸກຍູ້ໃຫ້ສະຫະປະຊາຊາດຮັບຮອງຜ່ານ ບັນດາມະຕິ, ຂໍ້ຕົກລົງ ແລະ ມາດຕະການອັນລະອຽດ ເພື່ອແນໃສ່ເສີມຂະຫຍາຍບົດບາດຂອງສະຫະປະຊາຊາດ ໃນພາລະກິດຮັກສາສັນຕິພາບ ແລະ ຄວາມໝັ້ນຄົງສາກົນ.
ຫວຽດນາມຍາມໃດກໍ່ສະໜັບສະໜູນບັນດາເປົ້າໝາຍທີ່ສຳຄັນ ຂອງສະຫະປະຊາຊາດເຊັ່ນ ຮັກສາສັນຕິພາບແລະສະຖຽນລະພາບ, ຕ້ານການແຂ່ງຂັນກັນປະກອບອາວຸດ, ດຳເນີນການເລີກລ້າງກຳລັງອາວຸດ, ກີດກັ້ນແລະແກ້ໄຂຂໍ້ຂັດແຍ່ງພິພາດ ດ້ວຍສັນຕິວິທີ, ເພີ່ມທະວີຄວາມພົວພັນມິດຕະພາບລະຫວ່າງປະຊາຊາດ. ຫວຽດນາມກໍ່ເປັນປະເທດທີ່ໄດ້ລົງນາມໃນຫຼາຍສົນທິສົນຍາສາກົນທີ່ສະຫະປະຊາຊາດເປັນຜູ້ຈັດຕັ້ງ.
ຫວຽດນາມໄດ້ມີສ່ວນປະກອບທີ່ຕັ້ງໜ້າເຂົ້າໃນການເຊີດຊູບັນດາຫຼັກການພື້ນຖານທີ່ສຸດຂອງກົດບັດສະຫະປະຊາຊາດ ແລະ ກົດໝາຍສາກົນ, ພິເສດແມ່ນຫຼັກການເຄົາລົບອະທິປະໄຕ, ຜືນແຜ່ນດິນອັນຄົບຖ້ວນຂອງບັນດາປະຊາຊາດ; ພ້ອມກັນນັ້ນ ກໍ່ໄດ້ສະແດງອອກຢ່າງເປັນປະຈຳເຖິງຄວາມຮັບຜິດຊອບ, ພາວະວິໄສ, ສະໜັບສະໜູນການປົກປັກຮັກສາຜົນປະໂຫຍດອັນຊອບທຳຂອງຝ່າຍຕ່າງໆ; ເພີ່ມທະວີການແບ່ງປັນຂໍ້ມູນຂ່າວສານກ່ຽວກັບຫຼາຍບັນຫາ ກັບບັນດາປະເທດກຳລັງພັດທະນາ, ປະກອບສ່ວນເຂົ້າໃນຄວາມພະຍາຍາມຮ່ວມກັນ ທີ່ມຸ່ງໄປສູ່ເປົ້າໝາຍເຮັດໃຫ້ການເຄື່ອນໄຫວ ຂອງສະພາຄວາມໝັ້ນຄົງແຫ່ງສະຫະປະຊາຊາດ ມີຄວາມໂປ່ງໃສແລະປະຊາທິປະໄຕກວ່າອີກ.
ຫວຽດນາມໄດ້ເປັນເຈົ້າການແລະຕັ້ງໜ້າສົມທົບກັບ ບັນດາປະເທດໃນຂະບວນການບໍ່ເຂົ້າຮ່ວມກຸ່ມ, ຕໍ່ສູ້ແລະປົກປັກຮັກສາບັນດາຫຼັກການອັນພື້ນຖານ ຂອງກົດບັດສະຫະປະຊາຊາດ ເຊັ່ນຫຼັກການກ່ຽວກັບຄວາມສະເໝີພາບທາງດ້າອະທິປະໄຕ, ບໍ່ແຊກແຊງເຂົ້າວຽກງານພາຍໃນຂອງປະເທດອື່ນ, ບໍ່ນຳໃຊ້ກຳລັງອາວຸດຫຼືຂົ່ມຂູ່ຈະໃຊ້ກຳລັງອາວຸດ, ແກ້ໄຂຂໍ້ຂັດແຍ່ງພິພາດດ້ວຍສັນຕິວິທີ ໂດຍຜ່ານການຊຸກຍູ້ ການສົນທະນາບົນພື້ນຖານກົດບັດສະຫະປະຊາຊາດ ແລະ ບັນດາຫຼັກການອັນພື້ນຖານຂອງກົດໝາຍສາກົນ...; ພ້ອມກັນນັ້ນກໍ່ປົກປັກຮັກສາຜົນປະໂຫຍດຂອງບັນດາປະເທດກຳລັງພັດທະນາ, ປະກອບສ່ວນຮັກສາສັນຕິພາບແລະສະຖຽນລະພາບສາກົນ, ສ້າງສິ່ງແວດລ້ອມອຳນວຍຄວາມສະດວກ ໃຫ້ແກ່ພາລະກິດການພັດທະນາຂອງບັນດາປະເທດ.
ໃນຖານະສະມາຊິກຂອງອະນຸສັນຍາວ່າດ້ວຍການຫ້າມໃຊ້ອາວຸດເຄມີ (CWC) ປີ 1998, ການເຂົ້າຮ່ວມການເຈລະຈາແລະເປັນໜຶ່ງໃນບັນດາປະເທດທຳອິດທີ່ໄດ້ລົງນາມໃນສົນທິສັນຍາຫ້າມທົດລອງໃຊ້ອາວຸດນິວເຄຼຍແບບຄົບວົງຈອນ (CTBT) ປີ 1996, ການເຂົ້າຮ່ວມແລະກາຍເປັນສະມາຊິກຂອງກອງປະຊຸມກ່ຽວກັບການລົດອາວຸດ (CD) ປີ 1996; ການເຂົ້າຮ່ວມວິວັດການກະກຽມໃຫ້ແກ່ບັນດາກອງປະຊຸມໃຫຍ່ຂອງສະຫະປະຊາຊາດ ເຊັ່ນກອງປະຊຸມສຳຫຼວດກ່ຽວກັບ NPT, ກອງປະຊຸມກ່ຽວກັບການຕ້ານການຄ້າອາວຸດນ້ອຍແບບຜິດກົດໝາຍ... ໄດ້ໃຫ້ເຫັນເຖິງຄວາມເປັນເຈົ້າການ, ຄວາມຕັ້ງໜ້າຕະຫຼອດຂອງຫວຽດນາມ ໃນການປະກອບສ່ວນເຂົ້າໃນວຽກງານຮ່ວມກັນ ຂອງສະຫະປະຊາຊາດ. ພິເສດ, ໃນຕະຫຼອດສະໄໝເປັນກຳມະການບໍ່ປະຈຳການຂອງສະພາຄວາມໝັ້ນຄົງ (ສະໄໝປີ 2008 - 2009) ດ້ວຍການດຳລົງຕຳແໜ່ງເປັນປະທານສະພາຄວາມໝັ້ນຄົງສອງຄັ້ງ, ຫວຽດນາມໄດ້ສະແດງໃຫ້ເຫັນເປັນຢ່າງດີເຖິງບົດບາດຂອງຕົນ, ນັບແຕ່ການດຳເນີນການປະຊຸມທີ່ສຳຄັນຂອງສະພາຄວາມໝັ້ນຄົງ, ສ້າງຄວາມເຫັນດີເຫັນພ້ອມສູງໃນເກືອບທັງໝົດທຸກຂໍ້ຕົກລົງທີ່ສະພາໄດ້ຮັບຮອງຜ່ານ, ຈົນເຖິງການສະເໜີຂໍ້ຄິດປະດິດທີ່ສຳຄັນ ເຊັ່ນຈັດຕັ້ງການສົນທະນາເປີດກ່ຽວກັບສະພາບການຕາເວັນອອກກາງ, ກ່ຽວກັບບັນຫາສັນຕິພາບແລະສະຖຽນລະພາບ... ສິ່ງດັ່ງກ່າວໄດ້ໃຫ້ເຫັນເຖິງການເຂົ້າຮ່ວມ, ປະກອບສ່ວນທີ່ມີປະສິດທິຜົນ ແລະ ມີຄວາມຮັບຜິດຊອບຂອງຫວຽດນາມ ເຂົ້າໃນການຮັກສາສັນຕິພາບແລະສະຖຽນລະພາບໃນໂລກ, ປະກອບສ່ວນແກ້ໄຂຫຼາຍບັນຫາທີສຳຄັນຂອງໂລກແລະພາກພື້ນ, ຕໍ່ສູ້ປົກປັກຮັກສາບັນດາຜົນປະໂຫຍດຂອງຊາດ ບົນຫຼັກການເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ແກ້ໄຂຂໍ້ຂັດແຍ່ງພິພາດດ້ວຍສັນຕິວິທີ, ຮັບປະກັນຜົນປະໂຫຍດອັນຊອບທຳຂອງບັນດາປະເທດສະມາຊິກ.
ນັບແຕ່ປີ 1996, ຫວຽດນາມໄດ້ມີສ່ວນປະກອບໃຫ້ແກ່ກອງທຶນເພື່ອການເຄື່ອນໄຫວຮັກສາສັນຕິພາບແຫ່ງສະຫະປະຊາຊາດ, ສະແດງໃຫ້ເຫັນເຖິງຄວາມຮັບຜິດຊອບຕໍ່ປະຊາຄົມສາກົນເວົ້າລວມ ແລະ ຕໍ່ການຮັກສາສັນຕິພາບ, ສະຖຽນລະພາບຂອງໂລກເວົ້າສະເພາະ. ການເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ ເປັນບາດກ້າວໃໝ່ຂອງຫວຽດນາມ ໃນຂະບວນວິວັດການເຊື່ອມໂຍງສາກົນ, ສະແດງໃຫ້ເຫັນເຖິງບົດບາດແລະພັນທະຂອງສະມາຊິກສະຫະປະຊາຊາດ, ປະກອບສ່ວນຕົວຈິງເຂົ້າໃນສັນຕິພາບແລະສະຖຽນລະພາບຂອງໂລກ. ມາເຖິງປະຈຸບັນ, ຫວຽດນາມຢູ່ໃນຈຳນວນ 124 ປະເທດທີ່ເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ.
ທີສອງ, ສຳເລັດເປັນຢ່າງດີວຽກງານຕ່າງໆຂອງປະເທດສະມາຊິກສະຫະປະຊາຊາດ.
ໃນຖານະເປັນສະມາຊິກສະຫະປະຊາຊາດ, ຫວຽດນາມໄດ້ພະຍາຍາມປະຕິບັດໜ້າທີ່ຂອງຕົນໃຫ້ສຳເລັດຜົນເປັນຢ່າງດີ, ຕັ້ງໜ້າເຂົ້າຮ່ວມໃນບັນດາກົນໄກວາງກຳນົດນະໂຍບາຍ, ບັນດາເວທີປາໄສທີ່ສະຫະປະຊາຊາດເປັນຜູ້ຈັດຕັ້ງ, ສົມທົບຢ່າງແໜ້ນແຟ້ນກັບບັນດາອົງການຂອງສະຫະປະຊາຊາດ ໃນການສ້າງໂຄງການຮ່ວມມືທີ່ມີປະສິດທິຜົນ ແລະ ນັບມື້ນັບມີລັກສະນະຍຸດທະສາດຍາວນານ ຮອບດ້ານ, ເປັນເຈົ້າການສະເໜີຂໍ້ຄິດປະດິດໃໝ່ຫຼາຍຢ່າງ.
ດ້ວຍສະຕິຮັບຜິດຊອບສູງຕໍ່ບັນຫາການປະຕິຮູບສະຫະປະຊາຊາດ, ຫວຽດນາມໄດ້ສະແດງຄວາມເປັນເຈົ້າການ, ຕັ້ງໜ້າໃນການຜັນຂະຫຍາຍທົດລອງຕົວແບບ “ສະຫະປະຊາຊາດໜຶ່ງດຽວ” ໃນຂອບເຂດຂໍ້ຄິດລິເລີ່ມການກະທຳເປັນເອກະພາບ ຂອງສະຫະປະຊາຊາດ. ສະພາບຕົວຈິງໃນຊຸມປີທີ່ຜ່ານມາ, ຂໍ້ຄິດລິເລີ່ມນີ້ໄດ້ບັນລຸຄວາມສຳເລັດທີ່ແນ່ນອນ, ໄດ້ເພີ່ມທະວີລັກສະນະເຊື່ອມຕໍ່ ແລະ ຍົກສູງປະສິດທິຜົນຂອງການເຄື່ອນໄຫວຊ່ວຍໜູນຫວຽດນາມ ຂອງລະບົບບັນດາອົງການຈັດຕັ້ງຂອງສະຫະປະຊາຊາດ. ນີ້ກໍ່ແມ່ນສ່ວນປະກອບຕົວຈິງຂອງຫວຽດນາມ ເຂົ້າໃນຂະບວນວິວັດການປະຕິຮູບລະບົບສະຫະປະຊາຊາດໃນປະຈຸບັນ ແລະ ເປັນຮາກຖານໃຫ້ແກ່ຂອບເຂດການຮ່ວມມືທີ່ນັບມື້ນັບມີປະສິດທິຜົນ ລະຫວ່າງຫວຽດນາມ ແລະ ສະຫະປະຊາຊາດ ໃນເວລາສະເພາະໜ້າ. ຫຼັງຄາບ້ານຮ່ວມສະຫະປະຊາຊາດຢູ່ຫວຽດນາມ ແມ່ນຫຼັງຄາບ້ານຮ່ວມທຳອິດຂອງສະຫະປະຊາຊາດໃນໂລກ, ນັ້ນເປັນການປະກອບສ່ວນຕົວຈິງ ທີ່ພົ້ນເດັ່ນຂອງຫວຽດນາມ ເຂົ້າໃນການປະຕິຮູບອົງການສະຫະປະຊາຊາດ.
ພິເສດ, ການທີ່ຫວຽດນາມເປັນເຈົ້າພາບຈັດກອງປະຊຸມຂັ້ນສູງສະຫະປະຊາຊາດ ພາກພື້ນອາຊີ-ເອີຣົບ ກ່ຽວກັບການເພີ່ມທະວີການຮ່ວມມືສ້າງຄວາມສະດວກແກ່ການຂົນສົ່ງຕໍ່ເນື່ອງ, ການຄ້າ ແລະ ການປະຕິບັດໂຄງການພັດທະນາແບບຍືນຍົງ 2030 ຕົ້ນເດືອນມີນາ 2017 ໄດ້ຂີດໝາຍການປະກອບສ່ວນຂອງຫວຽດນາມໃນ 40 ທີຜ່ານມາ ນັບແຕ່ເມື່ອຫວຽດນາມເຂົ້າຮ່ວມໃນອົງການຈັດຕັ້ງທີ່ໃຫຍ່ທີ່ສຸດຂອງໂລກ ແລະ ປີທີ່ສອງທີ່ຫວຽດນາມຮັບຜິດຊອບບົດບາດເປັນກຳມະການຂອງສະພາເສດຖະກິດແລະສັງຄົມແຫ່ງສະຫະປະຊາຊາດ (ECOSSOC) ວາລະປີ 2016 - 2018.
ອາດຈະເວົ້າໄດ້ວ່າ, ໄລຍະແຫ່ງການເຂົ້າຮ່ວມການເຄື່ອນໄຫວຂອງຫວຽດນາມຢູ່ໃນສະຫະປະຊາຊາດນັ້ນ ເປັນການສະແດງອອກຢ່າງມີຊີວິດຊີວາເຖິງນະໂຍບາຍການຕ່າງປະເທດທີ່ເປີດກວ້າງ, ຫຼາຍກ້ຳຫຼາຍຝ່າຍ ຫຼາຍຮູບແບບ ຂອງພັກແລະລັດຫວຽດນາມ; ຢືນຢັນຄຳໝັ້ນສັນຍາຂອງຫວຽດນາມກ່ຽວກັບການປະກອບສ່ວນຢ່າງຕັ້ງໜ້າ, ສ້າງສັນ, ຮ່ວມມື ແລະ ມີຄວາມຮັບຜິດຊອບ ເຂົ້າໃນການເຄື່ອນໄຫວຕ່າງໆຂອງສະຫະປະຊາຊາດ ເພື່ອຜົນປະໂຫຍດແຫ່ງການພັດທະນາລວມຂອງໂລກ; ພ້ອມກັນນັ້ນກໍ່ສະແດງໃຫ້ເຫັນເຖິງການໝູນໃຊ້ບັນດາບົດຮຽນຂອງສະໄໝແຫ່ງການປ່ຽນແປງໃໝ່ ຢ່າງປະດິດສ້າງແລະມີປະສິດທິຜົນ, ສ້າງໃຫ້ມີບັນດາເງື່ອນໄຂທີ່ສະດວກດີ ເພື່ອໃຫ້ຫວຽດນາມຍົກສູງອິດທິພົນ ແລະຖານະບົດບາດຂອງຕົນ ໃນເວທີສາກົນ. ສະຫະປະຊາຊາດແລະປະຊາຄົມໂລກ ຫຼາຍເທື່ອໄດ້ຕີລາຄາສູງກ່ຽວກັບການປະກອບສ່ວນໃນຫຼາຍດ້ານຂອງຫວຽດນາມ, ຖືວ່າຫວຽດນາມເປັນປະເທດທີ່ໄດ້ນຳໃຊ້ແຫຼ່ງທຶນຊ່ວຍເຫຼືອການພັດທະນາຢ່າງມີປະສິດທິຜົນທີ່ສຸດ, ໄດ້ຜັນຂະຫຍາຍບັນດາໂຄງການຂອງສະຫະປະຊາຊາດຢ່າງສຳເລັດຜົນ ເຊັ່ນໂຄງການກ່ຽວກັບປະຊາກອນແລະເດັດນ້ອຍ, ກ່ຽວກັບຄວາມສະເໝີພາບທາງດ້ານເພດ, ກ່ຽວກັບການລົບລ້າງຄວາມອຶດຫີວແລະຫລຸດຜ່ອນຄວາມທຸກຍາກ, ກ່ຽວກັບການຮ່ວມມືສາມຝ່າຍ, ກາຍເປັນປະເທດນຳໜ້າໃນການປະຕິບັດບັນດາເປົ້າໝາຍທີ່ສະຫະປະຊາຊາດວາງອອກມາ ເຊັ່ນໄດ້ສຳເລັດກ່ອນກຳນົດເວລາກ່ຽວກັບຫຼາຍເປົ້າໝາຍການພັດທະນາສະຫັດສະວັດ (MDG) ກໍ່ຄືມີຄວາມພະຍາຍາມປະຕິບັດບັນດາເປົ້າໝາຍການພັດທະນາແບບຍືນຍົງ (SDG).
ການເຂົ້າຮ່ວມແລະມີສ່ວນຮ່ວມຂອງຫວຽດນາມໃນ 40 ປີທີ່ຜ່ານມາ ໄດ້ປະກອບສ່ວນປັບປຸງ, ຮັກສາ, ປົກປ້ອງສິ່ງແວດລ້ອມສັນຕິພາບລວມໃນພາກພື້ນ ກໍ່ຄືໃນໂລກ, ປະກອບສ່ວນຢັ້ງຢືນຄຸນລັກສະນະຂອງປະເທດໜຶ່ງທີ່ເປັນເອກະລາດ, ສະເໝີພາບໃນປະຊາຄົມສາກົນ, ຕໍ່ສູ້ແລະປົກປັກຮັກສາບັນດາສິດທິແຫ່ງຊາດໃນບັນດາເວທີປາໄສທີ່ສຳຄັນຂອງໂລກ. ພ້ອມກັນນັ້ນ, ປະກອບສ່ວນອັນສຳຄັນເຂົ້າໃນການພາເສດຖະກິດຫວຽດນາມເຊື່ອມໂຍງເຂົ້າກັບເສດຖະກິດພາກພື້ນແລະເສດຖະກິດໂລກ.
ເສັ້ນທາງ 40 ປີແຫ່ງການເປັນສະມາຊິດຂອງອົງການສະຫະປະຊາຊາດ ກໍ່ໄດ້ນຳເອົາບົດຮຽນຕ່າງໆກ່ຽວກັບການທູດພະຫຸພາຄີມາໃຫ້ຫວຽດນາມ. ນັ້ນແມ່ນ ຕ້ອງຊາບຊືມແນວຄິດວາງຜົນປະໂຫຍດຂອງຊາດ ຂອງປະເທດຂຶ້ນແຖວໜ້າ ດ້ວຍເປົ້າໝາຍທີ່ສອດຮ້ອຍຕະຫຼອດຄື ຮັກສາເອກະລາດ ອະທິປະໄຕ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ຮັກສາລະບອບການເມືອງສັງຄົມນິຍົມໄວ້ຢ່າງໝັ້ນຄົງ, ສົມທົບກັບການສ້າງສິ່ງແວດລ້ອມສາກົນທີ່ສະດວກທີ່ສຸດ ໃຫ້ແກ່ການພັດທະນາເສດຖະກິດ-ສັງຄົມ ຂອງປະເທດ. ນັ້ນຍັງແມ່ນບົດຮຽນກ່ຽວກັບການຕັ້ງໝັ້ນນະໂຍບາຍຍູ້ແຮງການຮ່ວມມື ບົນຫຼັກການເຄົາລົບຊຶ່ງກັນແລະກັນ, ມີຜົນປະໂຫຍດຮ່ວມກັນ, ຕໍ່ສູ້ຕ້ານບັນດາປະກົດການລະເມີດຜົນປະໂຫຍດຂອງຊາດ-ປະເທດ, ປະກອບສ່ວນເຂົ້າໃນພາລະກິດສັນຕິພາບ, ເອກະລາດແຫ່ງຊາດ, ປະຊາທິປະໄຕ, ຄວາມກ້າວໜ້າທາງສັງຄົມໃນໂລກ. ນັ້ນກໍ່ແມ່ນບົດຮຽນກ່ຽວກັບຄວາມຕັ້ງໝັ້ນ ມານະພະຍາຍາມສູ້ຊົນ, ການສົມທົບຢ່າງຄ່ອງແຄ່ວລະຫວ່າງພະລັງພາຍໃນແລະພະລັງພາຍນອກ ເພື່ອສ້າງເປັນກຳລັງແຮງສັງລວມຂອງປະເທດ, ຍາດແຍ່ງເອົາກຳລັງແຮງບົ່ມຊ້ອນຂອງສະຫະປະຊາຊາດ ເພື່ອເສີມຂະຫຍາຍປະສິດທິຜົນຂອງການຮ່ວມມືໃນທຸກຂົງເຂດ...
ໃນສະພາບການໂລກທີ່ມີການຜັນປ່ຽນຫຼາຍຢ່າງທີ່ເລິກເຊິ່ງ ໄວວາ ແລະບໍ່ສາມາດຄາດເດົາໄດ້ນັ້ນ, ໂດຍພ້ອມກັນກັບບັນດາປະເທດສະມາຊິກສະຫະປະຊາຊາດ ແລະ ບັນດາຄູ່ຮ່ວມມືຂອງສະຫະປະຊາຊາດ, ຫວຽດນາມຢັ້ງຢືນບົດບາດຂອງສະຫະປະຊາຊາດ ໃນການແກ້ໄຂບັນດາບັນຫາສາກົນ, ພ້ອມກັນນັ້ນກໍ່ພະຍາຍາມຢືນຢັນວ່າ ຫວຽດນາມເປັນຄູ່ຮ່ວມມືທີ່ໄວ້ວາງໃຈ ແລະ ມີຄວາມຮັບຜິດຊອບຕໍ່ປະຊາຄົມສາກົນ, ພ້ອມກັນສູ້ຊົນເພື່ອຜົນປະໂຫຍດລວມຂອງບັນດາປະຊາຊາດ, ເພື່ອສັນຕິພາບແລະຄວາມຈະເລີນຖາວອນໃນພາກພື້ນກໍ່ຄືໃນໂລກ./.