ຜົນສຳເລັດຂອງການພົວພັນຕ່າງປະເທດ ປີ 2017: ບົດບາດທີ່ຕັ້ງໃໝ່, ບັນຍາກາດໃໝ່
ວກ. - ໃນປີ 2017, ເຖິງວ່າສັນຕິພາບ ການຮ່ວມມື ແລະການພັດທະນາ ເປັນທ່າອຽງໃຫຍ່ກໍ່ຕາມ, ແຕ່ກໍ່ອາດຈະເວົ້າໄດ້ວ່າ ພວກເຮົາໄດ້ຜັນຂະຫຍາຍການເຄື່ອນໄຫວພົວພັນຕ່າງປະເທດ ແລະ ການເຊື່ອມໂຍງ ໃນສະພາບການໂລກແລະພາກພື້ນ ມີການຜັນປ່ຽນຢ່າງໄວວາແລະສັບສົນ ທັງດ້ານການເມືອງແລະເສດຖະກິດ.
ເສດຖະກິດໂລກກຳລັງເຕີບໂຕດີຂຶ້ນ, ແຕ່ຍັງຄົງປະເຊີນກັບຄວາມສ່ຽງ, ຄວາມບັງເອີນຫຼາຍຢ່າງ ຍ້ອນຄວາມບໍ່ໝັ້ນຄົງທາງດ້ານການເງິນ-ເງິນຕາ, ຄວາມບໍ່ໝັ້ນຄົງທາງພູມິສາດການເມືອງແລະຄວາມປອດໄພສາກົນ, ຍ້ອນການເຄື່ອນໄຫວປະຊານິຍົມ ແລະລັດທິປົກປ້ອງຕະຫຼາດພາຍໃນ. ການເຊື່ອມໂຍງເສດຖະກິດ-ການຄ້າໃນພາກພື້ນແລະໃນທົ່ວໂລກ ສືບຕໍ່ໄດ້ຮັບການຮັກສາ, ແຕ່ການຮ່ວມມືສາກົນແລະເສລີພາບທາງການຄ້າກຳລັງປະສົບຄວາມຫຍຸ້ງຍາກບໍ່ນ້ອຍ, ໃນຂະນະທີ່ທຸກປະເທດລ້ວນແຕ່ມີຄວາມຕ້ອງການຮັບປະກັນແຮງຜັດດັນການເຕີບໂຕທີ່ຈຳເປັນ ແລະ ຕ້ອງປັບຕົວຢ່າງມີປະສິດທິຜົນກັບຄວາມຕ້ອງການໃໝ່ ຂອງການປະຕິວັດອຸດສາຫະກຳຄັ້ງທີ 4.
ການພົວພັນສາກົນໃນປີ 2017 ຖືກກະທົບຢ່າງແຂງແຮງຈາກການດັດສົມນະໂຍບາຍຂອງບັນດາປະເທດໃຫຍ່, ພາໃຫ້ມີການປ່ຽນແປງຫຼາຍດ້ານຢູ່ໃນພາກພື້ນຕ່າງໆ, ໃນນັ້ນມີພາກພື້ນອາຊີ-ປາຊີຟິກ. ການຮ່ວມມື ແລະການແຂ່ງຂັນໄດ້ແຊກຊ້ອນກັນຢ່າງສັບສົນ, ການເຕົ້າໂຮມກຳລັງພາຍໃຕ້ຮູບການແລະສີສັນໃໝ່ ໄດ້ວາງສິ່ງທ້າທາຍຫຼາຍຢ່າງອອກມາ ໃຫ້ບັນດາປະເທດຂະໜາດກາງແລະຂະໜາດນ້ອຍ. ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ສະເຫຼີມສະຫຼອງ 50 ປີແຫ່ງການສ້າງຕັ້ງ ໄດ້ສືບຕໍ່ຢືນຢັນບົດບາດຂອງອົງການຈັດຕັ້ງພາກພື້ນທີ່ປະສົບຄວາມສຳເລັດເປັນຢ່າງດີ, ໄດ້ມີຄວາມພະຍາຍາມໃນການຮັກສາຄວາມສາມັກຄີ ແລະ ກໍ່ສ້າງປະຊາຄົມ ອາຊຽນ, ແຕ່ກໍ່ຕ້ອງປະເຊີນກັບສິ່ງທ້າທາຍບໍ່ນ້ອຍ ເພື່ອຮັກສາບົດບາດທີ່ຕັ້ງຂອງຕົນ.
ໃນສະຖານະການດັ່ງກ່າວ, ວຽກງານພົວພັນຕ່າງປະເທດປີ 2017 ໄດ້ປະກອບສ່ວນເຂົ້າໃນບັນດາຜົນສຳເລັດດ້ານເສດຖະກິດ-ສັງຄົມຂອງປະເທດ ເຊິ່ງໄດ້ຜັນຂະຫຍາຍການພົວພັນຕ່າງປະເທດຢ່າງເປັນເຈົ້າການ, ຕັ້ງໜ້າ, ຂຸ້ນຂ້ຽວ, ຍົກລະດັບການພົວພັນສອງຝ່າຍແລະຫຼາຍຝ່າຍຂຶ້ນ, ຮັບໃຊ້ບັນດາເປົ້າໝາຍຍຸດທະສາດໃຫຍ່ທີ່ກອງປະຊຸມໃຫຍ່ຄັ້ງທີ XII ຂອງພັກວາງໄວ້. ຜົນກໍ່ຄື ປີ 2017 ຖືກປະເມີນວ່າເປັນປີສຳເລັດຜົນທີ່ສຸດຂອງການພົວພັນຕ່າງປະເທດຂອງຫວຽດນາມ. ອາດຈະເຫັນສິ່ງດັ່ງກ່າວນັ້ນໃນບາງຈຸດໃຫຍ່ລຸ່ມນີ້:
ສິ່ງທີ່ກວມລວມແລະໂດດເດັ່ນແມ່ນ ພວກເຮົາໄດ້ປະຕິບັດບົດບາດປະເທດເຈົ້າພາບຂອງປີ ເອເປກ 2017 ຢ່າງດີເດັ່ນ ເຊິ່ງຈຸດສູງສຸດຄື ສັບປະດາຂັ້ນສຸດຍອດ ເອເປກ ທີ່ໄດ້ຈັດຂຶ້ນຢູ່ນະຄອນ ດານັ້ງ. ເຫດການນີ້ໄດ້ສ້າງຜົນກະທົບທາງບວກເຖິງດ້ານຕ່າງໆຫຼາຍດ້ານ, ສືບຕໍ່ຢືນຢັນ ເອເປກ ເປັນເວທີປາໄສການຮ່ວມມື ເຊື່ອມໂຍງເສດຖະກິດຊັ້ນນຳໃນພາກພື້ນ, ໃຫ້ເຫັນແຈ້ງເຖິງບົດບາດຂອງຫວຽດນາມ ໃນເຫດການທີ່ມີລະດັບ “ທົ່ວໂລກ” ນີ້. ການເຂົ້າຮ່ວມຢ່າງຄົບໜ້າຄົບຕາຂອງບັນດາຜູ້ນຳຂອງບັນດາເຂດເສດຖະກິດສະມາຊິກ ເອເປກ ແລະ ຈຳນວນຜູ້ແທນ, ນັກທຸລະກິດ, ນັກຂ່າວທີ່ຫຼາຍກວ່າທຸກປີໃນໄລຍະ 10 ປີທີ່ຜ່ານມາ; ຂອດຕ່າງໆ ນັບແຕ່ການຈັດຕັ້ງ, ເປັນປະທານ, ປະສານການເຄື່ອນໄຫວ ເຖິງຄຸນນະພາບເນື້ອໃນຂອງເອກະສານຕ່າງໆ; ການຮັກສາຄວາມປອດໄພ ແລະຮັບປະກັນຄວາມປອດໄພເດັດຖານໃນປີ ເອເປກ 2017... ໄດ້ສ້າງຄວາມປະທັບໃຈໃຫ້ກັບເພື່ອນມິດສາກົນ. ບັນດາສະມາຊິກ, ເພື່ອນມິດ ແລະ ອົງການຂ່າວຕ່າງປະເທດໄດ້ໃຫ້ການປະເມີນສູງຕໍ່ຫົວຂໍ້ປີ ເອເປກ 2017 ຂອງຫວຽດນາມ ແລະ ສີ່ບຸລິມະສິດຂອງວາລະການປະຊຸມແລະເນື້ອໃນຂອງເອກະສານ. ເຫດການນີ້ໄດ້ພາໃຫ້ຫວຽດນາມກາຍເປັນຈຸດສຸມແຫ່ງຄວາມສົນໃຈຂອງໂລກ, ປະກອບສ່ວນສົ່ງເສີມພາບພົດຫວຽດນາມ, ຍົກສູງບົດບາດທີ່ຕັ້ງແລະອິດທິພົນຂອງຫວຽດນາມ.
ປີ ເອເປກ 2017 ແມ່ນການສະແດງອອກໃຫ້ເຫັນຢ່າງມີຊີວິດຊີວາ ເຖິງການເຄື່ອນໄຫວພົວພັນຕ່າງປະເທດຫຼາຍຝ່າຍຂອງພວກເຮົາ ເຊິ່ງໄດ້ຮັບການຍົກຂຶ້ນສູ່ລະດັບໃໝ່, ຫັນໄປສູ່ “ການເປັນເຈົ້າການປະກອບສ່ວນກໍ່ສ້າງ, ກຳນົດຫຼັກເກນການພົວພັນທົ່ວໄປ”, ຜ່ານສິ່ງດັ່ງກ່າວນັ້ນ ເພື່ອປົກປັກຮັກສາ ແລະ ຊຸກຍູ້ບັນດາຜົນປະໂຫຍດຍຸດທະສາດທາງດ້ານຄວາມໝັ້ນຄົງ ແລະການພັດທະນາຂອງຫວຽດນາມ, ພ້ອມກັນນັ້ນ ກໍ່ສະແດງເຖິງຈິດໃຈຂອງ “ສະມາຊິກທີ່ມີຄວາມຮັບຜິດຊອບໃນປະຊາຄົມສາກົນ”.
ຜົນສຳເລັດຂອງເຫດການນີ້ໄດ້ສ້າງໃຫ້ມີຄວາມຮັບຮູ້ໃໝ່, ຄວາມເຊື່ອຖືໃໝ່, ກຳລັງແຮງໃໝ່, ບັນຍາກາດໃໝ່ໃຫ້ການເຊື່ອມໂຍງສາກົນ, ປຸກລຸກຄວາມທະນົງໃຈແຫ່ງຊາດ, ມານະຈິດສ້າງຄວາມເຂັ້ມແຂງໃຫ້ແກ່ຕົນດ້ວຍຕົນເອງ ແລະ ຄວາມປາຖະໜາບືນຕົວຂຶ້ນຢ່າງແຂງແຮງ ຂອງພີ່ນ້ອງຮ່ວມຊາດໃນທົ່ວປະເທດ ແລະຊຸມຊົນນັກທຸລະກິດຫວຽດນາມ.
ໃນປີທີ່ຜ່ານມາ, ພວກເຮົາໄດ້ມີຄວາມພະຍາຍາມຫຼາຍທີ່ສຸດ ເພື່ອຍູ້ແຮງແລະເພີ່ມທະວີສາຍພົວພັນກັບບັນດາປະເທດເພື່ອນບ້ານໃກ້ຄຽງ, ປະເທດໃນພາກພື້ນ, ປະເທດໃຫຍ່, ປະເທດເພື່ອນມິດທີ່ເປັນມູນເຊື້ອໃຫ້ເລິກເຊິ່ງຍິ່ງກວ່າອີກ. ໃນປີ 2017, ບັນດາສະຫາຍຜູ້ນຳຂັ້ນສູງຂອງພວກເຮົາ ໄດ້ດຳເນີນການຢ້ຽມຢາມ 18 ຄັ້ງເຖິງ 19 ປະເທດ, ເຂົ້າຮ່ວມກອງປະຊຸມສາກົນຫຼາຍຝ່າຍ 8 ຄັ້ງ, ດຳເນີນການພົບປະສອງຝ່າຍກັບຜູ້ນຳ, ປະມຸກຂອງບັນດາປະເທດໃນໂລກເປັນຮ້ອຍຄັ້ງ, ພ້ອມກັນນັ້ນ ກໍ່ໄດ້ຕ້ອນຮັບ 36 ປະມຸກແລະນາຍົກລັດຖະມົນຕີຂອງຕ່າງປະເທດ ມາຢ້ຽມຢາມຫວຽດນາມ.
ພິເສດ, ໃນໂອກາດສັບປະດາຂັ້ນສຸດວອດ ເອເປກ 2017, ພວກເຮົາໄດ້ຍົກລະດັບການພົວພັນ ແລະ ຍູ້ແຮງການພົວພັນກັບບັນດາຄູ່ຮ່ວມມືທີ່ສຳຄັນຂອງຫວຽດນາມ. ສະເພາະໃນໂອກາດນີ້ ພວກເຮົາໄດ້ຕ້ອນຮັບທ່ານ ສີ ຈິ້ນຜິງ ເລຂາທິການໃຫຍ່, ປະທານປະເທດແຫ່ງ ສປ ຈີນ, ທ່ານ ໂດນັນ ທຣຳ ປະທານາທິບໍດີ ສະຫະລັດອາເມຣິກາ ທີ່ມາຢ້ຽມຢາມລັດຖະກິດທີ່ປະເທດຫວຽດນາມໃນວັນດຽວກັນ. ພ້ອມກັບການຟ້ຽມຢາມເຫຼົ່ານັ້ນ ແມ່ນການຢ້ຽມຢາມຂອງປະທານາທິບໍດີ ຊີເລ, ການຢ້ຽມຢາມຂອງນາຍົກລັດຖະມົນຕີ ການາດາ ແລະ ດຳເນີນການພົບປະ 50 ຄັ້ງກັບຜູ້ນຳຂອງບັນດາເຂດເສດຖະກິດສະມາຊິກຂອງ ເອເປກ.
ເນື້ອໃນຂອງການເຄື່ອນໄຫວພົວພັນຕ່າງປະເທດມີຄວາມເໝາະສົມແລະແທດຈິງແທ້, ຊຸກຍູ້ການພົວພັນກັບບັນດາຄູ່ຮ່ວມມືໃຫ້ນັບມື້ນັບເຂົ້າສູ່ລວງເລິກ ໝັ້ນຄົງ ແລະຍືນຍົງ. ຜ່ານບັນດາການສະເຫຼີມສະຫຼອງການພົວພັນທີ່ສຳຄັນກັບລາວ ແລະ ກຳປູເຈຍ, ບັນດາການຢ້ຽມຢາມຂັ້ນສູງທີ່ປະເທດອິນໂດເນເຊຍ, ມີອານມາ, ສິງກະໂປ, ໄທ..., ພວກເຮົາໄດ້ເພີ່ມທະວີຄວາມເຊື່ອຖືທາງການເມືອງ ແລະຍູ້ແຮງການພົວພັນຢ່າງມີເນື້ອແທ້ ມີປະສິດທິຜົນ ກັບບັນດາປະເທດເພື່ອນບ້ານໃນພາກພື້ນ. ການພົວພັນກັບບັນດາຄູ່ຮ່ວມມືທີ່ສຳຄັນອື່ນຄື ຈີນ, ລັດເຊຍ, ອາເມຣິກາ, ຍີ່ປຸ່ນ, ອິນເດຍ ໄດ້ຮັບການຍົກສູງທາງດ້ານການເມືອງແລະເສດຖະກິດ. ປະເທດຂອງພວກເຮົາໄດ້ສ້າງຕັ້ງການພົວພັນຄູ່ຮ່ວມມືຮອບດ້ານກັບປະເທດມີອານມາ ແລະ ປະເທດການາດາ.
ພວກເຮົາໄດ້ສືບຕໍ່ເປັນເຈົ້າການແລະຕັ້ງໜ້າເຊື່ອມໂຍງເສດຖະກິດສາກົນ, ເສີນຂະຫຍາຍບົດບາດໃນບັນດາສາຍພົວພັນເຊື່ອມໂຍງແລະຮ່ວມມືເສດຖະກິດໃນພາກພື້ນແລະສາກົນ, ສຳເລັດເປັນຢ່າງດີໜ້າທີ່ພົວພັນຕ່າງປະເທດເພື່ອຮັບໃຊ້ໃຫ້ແກ່ການພັດທະນາປະເທດ. ບັນດາການເຄື່ອນໄຫວພົວພັນຕ່າງປະເທດແລະເຊື່ອມໂຍງສາກົນ ໄດ້ເຊື່ອມຊຶມຢ່າງເລິກເຊິ່ງມະຕິສະບັບທີ 06-NQ/TW, ວັນທີ 5 ພະຈິກ 2016, ຂອງກອງປະຊຸມຄະນະບໍລິຫານງານສູນກາງພັກຄັ້ງທີສີ່ ສະໄໝທີ XII ກ່ຽວກັບການປະຕິບັດຢ່າງມີປະສິດທິຜົນຂະບວນວິວັດການເຊື່ອມໂຍງເສດຖະກິດສາກົນ, ຮັກສາສະຖຽນລະພາບທາງການເມືອງ-ສັງຄົມ ໃນສະພາບການທີ່ປະເທດເຮົາເຂົ້າຮ່ວມໃນບັນດາສັນຍາການຄ້າເສລີຮຸ່ນໃໝ່. ຫວຽດນາມພ້ອມກັບບັນດາປະເທດສະມາຊິກຢຶດໝັ້ນພື້ນຖານເພື່ອສືບຕໍ່ປຶກສາເຈລະຈາແນໃສ່ບັນລຸເຖິງ ສັນຍາຄູ່ຮ່ວມມືຂ້າມປາຊີຟິກຮອບດ້ານແລະກ້າວໜ້າ (CPTPP), ຮັບປະກັນຜົນປະໂຫຍດຂອງຫວຽດນາມ. ພວກເຮົາກໍ່ພວມພ້ອມກັບບັນດາປະເທດທີ່ກ່ຽວ ຊຸກຍູ້ການເຈລະຈາສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP), ຍູ້ແຮງການເຄື່ອນໄຫວທາງການທູດເພື່ອຂົນຂວາຍແລະຊຸກຍູ້ໃຫ້ສະຫະພາບເອີຣົບ (EU) ນຳເອົາສັນຍາການຄ້າເສລີຫວຽດນາມ-ອີຢູ (EVFTA) ອອກມາເພື່ອລົງນາມເປັນທາງການໂດຍໄວ ແລະ ໃຫ້ສັດຕະຍາບັນ, ຜັນຂະຫຍາຍປະຕິບັດ. ຜູ້ນຳຂອງບັນດາປະເທດຄູ່ຮ່ວມມືກໍ່ເປັນເອກະສັນຈະພ້ອມກັນກັບຫວຽດນາມຜັນຂະຫຍາຍປະຕິບັດຢ່າງມີປະສິດທິຜົນ ສັນຍາການຄ້າເສດລີຫວຽດນາມ - ສະຫະພັນເສດຖະກິດອາຊີ-ເອີຣົບ, ສັນຍາການຄ້າເສລີຫວຽດນາມ - ສ.ເກົາຫຼີ.
ຜົນກະທົບຈາກຄວາມສາມາດບົ່ມຊ້ອນດ້ານການເຕີບໂຕ, ຈາກຄວາມຕັດສິນໃຈປະຕິຮູບແລະເຊື່ອມໂຍງສາກົນຂອງຫວຽດນາມສະແດງອອກຜ່ານການເຄື່ອນໄຫວພົວພັນຕ່າງປະເທດທີ່ຫຼາຍຮູບຫຼາຍແບບ, ພ້ອມກັບມາດຕະການທີ່ເຂັ້ມແຂງໃນການກໍ່ສ້າງລັດຖະບານທີ່ມີລັກສະນະສ້າງສັນນັ້ນ ໄດ້ປະກອບສ່ວນຊ່ວຍໃຫ້ການພົວພັນທາງເສດຖະກິດຂອງພວກເຮົາກັບບັນດາຄູ່ຮ່ວມມືໄດ້ຮັບການເພີ່ມທະວີ, ບັນດາເປົ້າໝາຍເສດຖະກິດການຕ່າງປະເທດຂອງພວກເຮົາໄດ້ບັນລຸແລະເກີນເປົ້າໝາຍທີ່ວາງໄວ້. ຍອດມູນຄ່າການຄ້າສົ່ງອອກນຳເຂົ້າຂອງຫວຽດນາມບັນລຸ 425 ຕື້ໂດລາສະຫະລັດ, ສູງກວ່າທຸກປີນັບແຕ່ກ່ອນມາ; ຈຳນວນນັກທ່ອງທ່ຽວສາກົນທີ່ມາຫວຽດນາມບັນລຸເກືອບ 13 ລ້ານຄົນ (ເພີ່ມ 30% ທຽບກັບປີກ່ອນ). ສະເພາະໃນ ສັບປະດາຂັ້ນສຸດຍອດ ເອເປກ 2017 ໄດ້ມີການລົງນາມໃນຂໍ້ຕົກລົງ 121 ສະບັບ ທີ່ມີມູນຄ່າ 20 ຕື້ໂດລາສະຫະລັດ. ມາເຖິງປະຈຸບັນ ພວກເຮົາໄດ້ຂົນຂວາຍ 69 ປະເທດໃຫ້ການຮັບຮອງວ່າ ຫວຽດນາມເປັນປະເທດທີ່ມີພື້ນຖານເສດຖະກິດຕະຫຼາດ. ລັດຖະບານ, ບັນດາກະຊວງ, ຂະແໜງການ ແລະ ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ໄດ້ຂົນຂວາຍຢ່າງຕັ້ງໜ້າທີ່ສຸດ ແນໃສ່ເປີດຕະຫຼາດຂອງບັນດາປະເທດໃຫ້ແກ່ການສົ່ງອອກສິນຄ້າຂອງຫວຽດນາມ.
ໃນປີ 2017, ວຽກງານການຕ່າງປະເທດສືບຕໍ່ປະກອບສ່ວນປົກປັກຮັກສາຄວາມເປັນເອກະລາດ, ອະທິປະໄຕ ແລະຜືນແຜ່ນດິນອັນຄົຍຖ້ວນຂອງປະເທດໄວ້ຢ່າງໝັ້ນຄົງ, ຮັບປະກັນຄວາມໝັ້ນຄົງທາງດ້ານການເມືອງ, ຄວາມສະຫງົບ ແລະຄວາມເປັນລະບຽບ ປອດໄພທາງສັງຄົມ. ບັນດາການເຄື່ອນໄຫວປ້ອງກັນປະເທດ-ປ້ອງກັນຄວາມສະຫງົບໄດ້ຮັບການຍູ້ແຮງ, ການຮ່ວມມືທາງດ້ານການປ້ອງກັນປະເທດ-ປ້ອງກັນຄວາມສະຫງົບກັບບັນດາປະເທດຄູ່ຮ່ວມມືນັບມື້ນັບມີປະສິດທິຜົນ, ປະກອບສ່ວນທີ່ສຳຄັນເຂົ້າໃນການເພີ່ມທະວີຄວາມເຂົ້າໃຈແລະເຊື່ອຖືເຊິ່ງກັນແລະກັນລະຫວ່າງຫວຽດນາມກັບຕ່າງປະເທດ. ຫວຽດນາມ ແລະ ລາວໄດ້ສຳເລັດແຜນການເພີ່ມຄວາມຖີ່ແລະປັບປຸງຫຼັກໝາຍຊາຍແດນ; ຫວຽດນາມພ້ອມກັບກຳປຸເຈຍປະຕິບັດໄດ້ 84,6% ຂອງວຽກງານແບ່ງເຂດແດນ, ປັກຫຼັກໝາຍຊາຍແດນທາງບົກ; ຫວຽດນາມພ້ອມກັບຈີນແລະລາວຜັນຂະຫຍາຍຢ່າງມີປະສິດທິຜົນ ບັນດາເອກະສານກ່ຽວກັບການຄຸ້ມຄອງຊາຍແດນແລະດ່ານຊາຍແດນ. ຫວຽດນາມພ້ອມກັບບັນດາປະເທດອາຊຽນ ແລະ ຈີນ ເປັນເຈົ້າການຊຸກຍູ້ ແລະ ເປັນເອກະສັນຮັບຮອງຂອບຂອງປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC) ແລະເລີ່ມຕົ້ນການເຈລະຈາເປັນທາງການກ່ຽວກັບ COC. ພວກເຮົາໄດ້ຊຸກຍູ້ການເຈລະຈາແລະແລກປ່ຽນ ກ່ຽວກັບບັນດາບັນຫາໃນເຂດທະເລ ກັບບັນດາປະເທດໃນພາກພື້ນ, ພ້ອມກັນນັ້ນກໍ່ໄດ້ຕໍ່ສູ້ຢ່າງເດັດດ່ຽວ ໜຽວແໜ້ນກັບບັນດາການກະທຳລ່ວງລ້ຳອະທິປະໄຕໃນເຂດທະເລ ໝູ່ເກາະຂອງປະເທດເຮົາ. ພວກເຮົາໄດ້ຕໍ່ສູ້ຢ່າງເດັດດ່ຽວກັບບັນດາກົນອຸບາຍບິດເບືອນບັນຫາປະຊາທິປະໄຕ ສິດທິມະນຸດ ແລະ ສາສະໜາເພື່ອແຊກແຊງເຂົ້າວຽກງານພາຍໃນຂອງຫວຽດນາມ, ພ້ອມກັນນັ້ນກໍ່ຊຸກຍູ້ກົນໄກສົນທະນາກ່ຽວກັບສິດທິມະນຸດ, ແລກປ່ຽນກົງໄປກົງມາບົນຈິດໃຈສ້າງສັນ ແນໃສ່ເພີ່ມທະວີຄວາມເຂົ້າໃຈເຊິ່ງກັນແລະກັນ, ຫຼຸດຜ່ອນຄວາມແຕກຕ່າງກັນ ແລະ ແນໃສ່ຊຸກຍູ້ສົ່ງເສີມການພົວພັນທີ່ໝັ້ນຄົງກັບບັນດາປະເທດອື່ນໆ.
ວຽກງານພົວພັນຕ່າງປະເທດໃນຫຼາຍຂົງເຂດທີ່ສຳຄັນອື່ນ ກໍ່ໄດ້ຮັບການຜັນຂະຫຍາຍຢ່າງຮອບດ້ານ ມີປະສິດທິຜົນ ແລະບັນລຸຜົນສຳເລັດຫຼາຍຢ່າງ. ພວກເຮົາໄດ້ຍາດແຍ່ງການພົວພັນແລະການຮ່ວມມືທີ່ດີກັບຕ່າງປະເທດເພື່ອຍູ້ແຮງການປົກປ້ອງພົນລະເມືອງ ແລະ ຊາວປະມົງຫວຽດນາມ, ປົກປ້ອງຖານະກົດໝາຍຂອງພົນລະເມືອງກວ່າ 5.500 ຄົນ ແລະ ນຳເອົາຊາວປະມົງເກືອບ 2.000 ຄົນທີ່ຖືກຈັບກຸມຢູ່ຕ່າງປະເທດ ກັບມາໃນປະເທດ. ການທູດວັດທະນະທຳ, ການສື່ຂ່າວກັບຕ່າງປະເທດ ສືບຕໍ່ພະຍາຍາມເຊີດຊູພາບພົດຂອງຫວຽດນາມໃນທົ່ວໂລກ. ສິລະປະບ່າຍຈ່ອຍເຂດພາກກາງ ຫວຽດນາມ ຫາກໍ່ໄດ້ຮັບຮອງຈາກອົງການສະຫະປະຊາຊາດເພື່ອການສຶກສາ, ວິທະຍາສາດ ແລະ ວັດທະນະທຳ (UNESCO) ວ່າ ແມ່ນມໍລະດົກ ບໍ່ເປັນວັດຖຸ ທີ່ເປັນຕົວແທນຂອງມວນມະນຸດ, ເຮັດໃຫ້ບັນຊີລາຍຊື່ມໍລະດົກຂອງຫວຽດນາມອຸດົມສົມບູນຂຶ້ນ. ບັນດາກິດຈະກຳເຄື່ອນໄຫວທີ່ອຸດົມສົມບູນ, ແທດຈິງຄື ລະດູບານໃໝ່ໃນບ້ານເກີດເມືອງນອນ, ຄ້າຍລະດູຮ້ອນຫວຽດນາມ, ຊາວຫວຽດນາມຢູ່ຕ່າງປະເທດໄປຢ້ຽມຢາມໝູ່ເກາະ ເຈື່ອງຊາ, ເວທີປະໄສການລິເລີ່ມທຸລະກິດຂອງຊາວໜຸ່ມຫວຽດນາມ... ໄດ້ປະກອບສ່ວນເຊື່ອມຕໍ່ຊາວຫວຽດນາມຢູ່ຕ່າງປະເທດເຂົ້າກັບປະເທດຊາດບ້ານເມືອງ.
ອາດຈະເວົ້າໄດ້ວ່າ ພ້ອມກັນກັບບັນດາຜົນສຳເລັດໃນການສ້າງສາແລະປົກປັກຮັກສາປະເທດນັ້ນ ຜົນສຳເລັດຂອງການທູດຫວຽດນາມໃນປີ 2017 ໄດ້ປະກອບສ່ວນເພີ່ມທະວີກຳລັງແຮງຂອງປະເທດຊາດ, ເຮັດໃຫ້ທ່າຍຸດທະສາດຂອງຫວຽດນາມນັບມື້ນັບໝັ້ນຄົງ ເພື່ອກ້າວເຂົ້າປີ 2018, ປີຫົວລ້ຽວຫົວຕໍ່ໃນການປະຕິບັດບັນດາໜ້າທີ່ຂອງກອງປະຊຸມໃຫຍ່ຄັ້ງທີ XII ຂອງພັກ, ແນໃສ່ສືບຕໍ່ສ້າງໃຫ້ມີການປ່ຽນແປງທາງບວກຕາມຈິດໃຈມະຕິຂອງພັກ.
ການທູດຫວຽດນາມໃນປີ 2018 ແລະ ບັນດາປີຕໍ່ໄປຈະສືບຕໍ່ຜັນຂະຫຍາຍບັນດາວຽກງານການຕ່າງປະເທດຢ່າງຄົບຊຸດ, ສືບຕໍ່ເສີມຂະຫຍາຍຜົນສຳເລັດຂອງປີ ເອເປກ 2017 ຢູ່ຫວຽດນາມ ແລະ ຜົນສຳເລັດຂອງບັນດາການພົວພັນສອງຝ່າຍ, ເພີ່ມທະວີການພົວພັນຕ່າງປະເທດໃຫ້ເຂົ້າສູ່ລວງເລິກ ມີປະສິດທິຜົນ ແລະ ໝັ້ນຄົງຍິ່ງຂຶ້ນ; ຜັນຂະຫຍາຍບັນດາການພົວພັນຫຼາຍຝ່າຍ, ກຽມຄວາມພ້ອມເພື່ອປະຕິບັດບົດບາດປະທານອາຊຽນ ປີ 2020 ແລະ ສະໝັກຮັບເລືອກຕັ້ງເປັນກຳມະການບໍ່ຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ວາລະ 2020 - 2021; ເດັດດ່ຽວແລະໜຽວແໜ້ນໃນການປົກປັກຮັກສາອະທິປະໄຕ, ຜືນແຜ່ນດິນອັນຄົຍຖ້ວນ ແລະ ຄວາມໝັ້ນຄົງຂອງຊາດ; ຜັນຂະຫຍາຍຢ່າງແຂງແຮງມະຕິສະບັບທີ 06/NQ-TW ຂອງສູນກາງພັກ ກ່ຽວກັບການປະຕິບັດຢ່າງມີປະສິດທິຜົນຂະບວນວິວັດການເຊື່ອມໂຍງເສດຖະກິດສາກົນ, ຮັກສາສະຖຽນລະພາບທາງການເມືອງ-ສັງຄົມໃນສະພາບການທີ່ປະເທດເຮົາເຂົ້າຮ່ວມໃນບັນດາສັນຍາການຄ້າເສລີຮຸ່ນໃໝ່.
ພາຍໃຕ້ການນຳພາທີ່ສະຫຼາດສ່ອງໃສຂອງພັກ ແລະ ການປະສານສົມທົບຢ່າງແໜ້ນແຟ້ນຂອງບັນດາເຫຼົ່າທັບ ບັນດາຊ່ອງພົວພັນຕ່າງປະເທດ, ຂອງທົ່ວທັງລະບົບການເມືອງ ແລະທົ່ວປວງຊົນ, ການທູດຫວຽດນາມໄດ້ກຽມຄວາມພ້ອມສຳລັບສິ່ງທ້າທາຍທຸກຢ່າງໃນປີໜ້າ ແລະ ຈະສືບຕໍ່ຮັບໃຊ້ພາລະກິດສ້າງສາແລະປົກປັກຮັກສາປະເທດຊາດ, ຮັບໃຊ້ພັກ, ຮັບໃຊ້ປະເທດ, ຮັບໃຊ້ຜົນປະໂຫຍດຂອງປະເທດຊາດ-ປະຊາຊົນ./.
ໂດຍ ຟ້າມບິ່ງມິງ
ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ
------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 903 (ເດືອນມັງກອນ 2018)