ການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ
ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2021-2026:
ຜົນສໍາເລັດແລະບັນດາບັນຫາທີ່ຕັ້ງຂຶ້ນ ແນໃສ່ສືບຕໍ່ປ່ຽນແປງໃໝ່
ການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ
ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2021-2026:
ຜົນສໍາເລັດແລະບັນດາບັນຫາທີ່ຕັ້ງຂຶ້ນ ແນໃສ່ສືບຕໍ່ປ່ຽນແປງໃໝ່
ການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ
ວກ - ການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ຜູ້ແທນສະພາປະຊາຊົນແຕ່ ລະຂັ້ນ ສະໄໝປີ 2021-2026 ແມ່ນການເຄື່ອນໄຫວທາງການເມືອງ ແລະ ແມ່ນບັ້ນການດໍາເນີນຊີວິດປະຊາທິປະໄຕທີ່ກວ້າງຂວາງເລິກເຊິ່ງ ໃນທຸກຊັ້ນຄົນປະຊາຊົນ. ການເລືອກຕັ້ງໄດ້ປະສົບຜົນສຳເລັດຢ່າງຈົບງາມ, ຮັບປະກັນສິດປະຊາທິປະໄຕ, ຄວາມສະເໝີພາບ, ຖືກຕ້ອງຕາມກົດໝາຍ, ປອດໄພ, ປະຢັດ, ເປັນວັນບຸນໃຫຍ່ຂອງທົ່ວປວງຊົນຢ່າງແທ້ຈິງ. ຜົນສຳເລັດຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ຂອງປະເທດສາທາລະນະລັດ ສັງຄົມນິຍົມຫວຽດນາມ ແມ່ນປະຖົມປັດໄຈສຳຄັນໃນການສືບຕໍ່ປ່ຽນແປງໃໝ່ລະບົບການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ ໃນຂະບວນການກໍ່ສ້າງແລະບູລະນະ ລັດແຫ່ງອຳນາດກົດໝາຍສັງຄົມນິຍົມ.
ພາຍຫຼັງຂະບວນການກະກຽມຢ່າງພິຖີພິຖັນ ແລະ ເຂັ້ມງວດ, ຖືກຕ້ອງຕາມຂໍ້ກຳນົດຂອງກົດ ໝາຍ, ໃນວັນທີ 23 ພຶດສະພາ 2021, ຜູ້ມີສິດບ່ອນບັດເລືອກຕັ້ງເກືອບ 70 ລ້ານຄົນໃນທົ່ວປະເທດ ໄດ້ຕັ້ງໜ້າເຂົ້າຮ່ວມການປ່ອນບັດເລືອກຕັ້ງດ້ວຍສະຕິສິດເປັນເຈົ້າ ແລະ ຈິດໃຈຄວາມຮັບຜິດຊອບສູງສຸດຂອງພົນລະເມືອງ ເພື່ອເລືອກເອົາຜູ້ທີ່ມີຄວາມເໝາະສົມຢ່າງແທ້ຈິງກັບການເປັນຕົວແທນຂອງເຈດຈຳນົງ, ຄວາມມຸ່ງມາດປາຖະໜາ ແລະ ສິດເປັນເຈົ້າຂອງຕົນເອງ ເຂົ້າຮ່ວມສະພາແຫ່ງຊາດ, ສະພາປະຊາຊົນແຕ່ລະຂັ້ນ ສະໄໝປີ 2021-2026.
ວຽກງານການນຳພາ, ການຊີ້ນຳ, ການກະກຽມຈັດຕັ້ງການເລືອກຕັ້ງ
ໄດ້ຮັບການຜັນຂະຫຍາຍຢ່າງຖືກຕ້ອງຕາມກົດໝາຍ, ພິຖີພິຖັນ ແລະ ຮອບຄອບຖີ່ຖ້ວນ
ໃນສະພາບແວດລ້ອມທີ່ສຸດແສນພິເສດ
ການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ຜູ້ແທນສະພາປະຊາຊົນແຕ່ລະຂັ້ນ ສະໄໝ ປີ 2021-2026 ເປັນເຫດການທາງການເມືອງທີ່ສຳຄັນຢ່າງຍິ່ງ ແລະ ເປັນໜ້າທີ່ທາງການເມືອງທີ່ເປັນໃຈກາງຂອງທັງໝົດລະບົບການເມືອງ ໃນປີ 2021, ເຊິ່ງເກີດຂຶ້ນໃນສະພາບແວດລ້ອມທີ່ປະເທດມີທັງຂໍ້ສະດວກ ແລະ ຂໍ້ຫຍຸ້ງຍາກ, ສິ່ງທ້າທາຍສະຫຼັບກັນໄປ. ປະເທດຫວຽດນາມມີເອກະລາດເປັນເວລາຫຼາຍກວ່າ 75 ປີ ແລະດຳເນີນພາລະກິດການປ່ຽນແປງໃໝ່ 35 ປີ, ໄດ້ ບັນລຸຜົນງານທີ່ສຳຄັນ ແລະ ມີຄວາມໝາຍທາງປະຫວັດສາດຫຼາຍຢ່າງ. ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ຮັບຜົນສຳເລັດຢ່າງຈົບງາມ, ໄດ້ວາງບັນດາເປົ້າໝາຍ, ທິດທາງ, ໜ້າທີ່ ໃນການກໍ່ສ້າງ ແລະ ພັດທະນາປະເທດຊາດຮອດປີ 2030, ວິໄສທັດ ຮອດປີ 2045. ທົ່ວພັກ, ທົ່ວປວງຊົນ ແລະ ທົ່ວກອງທັບ ພວມອອກແຮງແຂ່ງຂັນ, ບຸກບືນສູ້ຊົນ ນຳເອົາມະຕິຂອງກອງປະຊຸມໃຫຍ່ ຄັ້ງທີ 13 ຂອງພັກ ເຂົ້າສູ່ຊີວິດຕົວຈິງ, ຈັດຕັ້ງຜັນຂະຫຍາຍໜ້າທີ່ການພັດທະນາເສດຖະກິດ-ສັງຄົມ 5 ປີ 2021-2025 ແລະ ການກໍ່ສ້າງພັກແຫ່ງອຳນາດກົດໝາຍສັງຄົມນິຍົມຫວຽດນາມ ທີ່ເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ. ຄວາມໄວ້ເນື້ອເຊື່ອໃຈຂອງປະຊາຊົນຕໍ່ກັບພັກ, ລັດ ໄດ້ຮັບການປົວແປງ, ເພີ່ມທະວີ, ສ້າງເປັນພື້ນຖານ ແລະ ສ້າງປະຖົມປັດໄຈອັນໝັ້ນແກ່ນ ເພື່ອພັດທະນາປະເທດຊາດຢ່າງວ່ອງໄວ ແລະ ຍືນຍົງ.
ເປັນຄັ້ງທຳອິດໃນປະຫວັດສາດຂອງການຈັດຕັ້ງການເລືອກຕັ້ງສະມາຊິກສະພາແຫ່ງຊາດທັງ 15 ຄັ້ງຜ່ານມາ, ບໍ່ນັບໄລຍະທີ່ປະເທດຊາດເກີດສົງຄາມ, ແມ່ນບໍ່ເຄີຍມີການເລືອກຕັ້ງໃດຖືກຈັດຕັ້ງຂຶ້ນໃນສະພາບທີ່ມີຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ, ເຊິ່ງໃນເວລາດຽວກັນ ຕ້ອງຈັດຕັ້ງການເລືອກຕັ້ງໃຫ້ປະສົບຜົນສໍາເລັດ, ຖືກຕ້ອງຕາມກົດໝາຍ, ທັງຕ້ອງຮັບປະກັນຄວາມປອດໄພໃນເງື່ອນໄຂປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19ແລະ ຕ້ອງປະຕິບັດໜ້າທີ່ໃນການຟື້ນຟູ, ພັດທະນາເສດຖະກິດ, ຮັບປະກັນຄວາມປອດໄພທາງສັງຄົມ, ຊີວິດການເປັນຢູ່ ແລະ ຄວາມປອດໄພໃຫ້ແກ່ປະຊາຊົນເປັນຢ່າງດີ. ໃນເວລາໃກ້ຈະຮອດມື້ເລືອກຕັ້ງ, ການລະບາດໃຫຍ່ຂອງໂຄວິດ-19 ໄດ້ລະບາດຂຶ້ນອີກເປັນຄັ້ງທີສີ່ ຢູ່ຫວຽດນາມ ດ້ວຍການຜັນແປທີ່ໄວກວ່າເກົ່າ, ການກາຍພັນຂອງໄວຣັດສາຍພັນໃໝ່ທີ່ແຂງແກ່ງກວ່າເກົ່າ ແລະ ອັນຕະລາຍກວ່າເກົ່າ. ຮອດມື້ການເລືອກຕັ້ງ, ການລະບາດໃຫຍ່ຂອງພະຍາດໂຄວິດ-19 ໄດ້ແຜ່ກະຈາຍຢ່າງວ່ອງໄວ ຢູ່ໃນພື້ນທີ່ຂອງ 30ແຂວງ, ນະຄອນ, ກໍ່ໃຫ້ເກີດຜົນກະທົບຢ່າງໜັກໜ່ວງ, ຫຼາຍພື້ນທີ່ຕ້ອງໄດ້ປະຕິບັດຂໍ້ກຳນົດຢ່າງເຂັ້ມງວດໃນການເວັ້ນໄລຍະຫ່າງທາງສັງຄົມ, ການແຍກກັກຕົວ, ການປິດລ້ອມທາງສັງຄົມ. ສະຖານະການໃນໂລກ ແລະ ພາກພື້ນມີການຜັນແປໄປຢ່າງສັບສົນ, ຄາດເດົາໄດ້ຍາກ, ແອບແຝງດ້ວຍໄພອັນຕະລາຍຫຼາຍຢ່າງ, ບັນດາປັດໄຈໃໝ່ທີ່ສ້າງຄວາມບໍ່ສະຫງົບ. ການຕໍ່ຕ້ານຂອງບັນດາອິດທິກຳລັງປໍລະປັກ ກໍ່ໃຫ້ເກີດຄວາມຫຍຸ້ງຍາກບໍ່ໜ້ອຍໃຫ້ແກ່ການເລືອກຕັ້ງ.
ໃນສະພາບການດັ່ງກ່າວ, ວຽກງານການນຳພາ, ຊີ້ນຳການເລືອກຕັ້ງໄດ້ຜັນຂະຫຍາຍຢ່າງສະເໝີຕົ້ນສະເໝີປາຍ, ດຸເດືອດ, ເປັນລະບົບຄົບຊຸດ ແລະ ທັນການ. ກົມການເມືອງສູນກາງພັກໄດ້ອອກຄຳສັ່ງສະບັບເລກທີ 45-ຄສ/ສກ, ລົງວັນທີ 20 ມິຖຸນາ 2020, “ວ່າດ້ວຍການນຳພາການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ຜູ້ແທນສະພາປະຊາຊົນ ແຕ່ລະຂັ້ນ ສະໄໝປີ 2021-2026”, ໄດ້ວາງ 9 ໜ້າທີ່ໃນການນຳພາ, ຊີ້ນຳຈັດຕັ້ງການເລືອກຕັ້ງໃຫ້ປະສົບຜົນສຳເລັດ, ຕິດພັນກັບວຽກການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 13 ຂອງພັກ. ບັນດາອົງການສູນກາງໄດ້ອອກເອກະສານ 140 ສະບັບ ເພື່ອຈັດຕັ້ງຜັນຂະຫຍາຍ, ແນະນຳວຽກງານການເລືອກຕັ້ງ ແລະ ຈັດຕັ້ງການຕິດຕາມ, ກວດກາການເລືອກຕັ້ງໃນພາກປະຕິບັດຕົວຈິງ. ໃນນັ້ນ, ສະພາການເລືອກຕັ້ງແຫ່ງຊາດ ໄດ້ອອກເອກະສານ 96 ສະບັບ; ໄດ້ຈັດຕັ້ງຜັນຂະຫຍາຍຄະນະກວດກາ ແລະ ຕິດຕາມໂດຍກົງ 23 ຄະນະ, ຈັດຕັ້ງປະຕິບັດຢູ່ 53 ແຂວງ, ນະຄອນ ແລະ ຈັດຕັ້ງການຕິດຕາມໂດຍຜ່ານການລາຍງານຕໍ່ກັບ 10 ແຂວງ, ນະຄອນ; ຈັດຕັ້ງກອງປະຊຸມຜ່ານທາງອອນລາຍ 2 ຄັ້ງ ເພື່ອຜັນຂະຫຍາຍວຽກງານການເລືອກຕັ້ງ, ຊີ້ນຳ ແລະ ແກ້ໄຂບັນດາຄວາມຫຍຸ້ງຍາກ, ຂໍ້ຄົງຄ້າງຕ່າງໆ ໃນຂະບວນການກະກຽມການດຳເນີນການເລືອກຕັ້ງຢ່າງທັນການ. ອົງຄະນະພັກ, ອຳນາດການປົກຄອງທຸກຂັ້ນ, ແນວໂຮມປະເທດຊາດ ແລະ ບັນດາອົງການຈັດຕັ້ງການເມືອງ-ສັງຄົມ ຢູ່ທ້ອງຖິ່ນ ໄດ້ມີມານະບຸກບຶນ, ຕັດສິນໃຈນຳພາ, ຊີ້ນຳ, ຜັນຂະຫຍາຍຢ່າງຮີບດ່ວນ, ຈິງຈັງ, ມີຄວາມຮັບຜິດຊອບ, ດຸເດືອດ ແລະ ປະດິດສ້າງທີ່ສຸດ.
ຈັດຕັ້ງເຊື່ອມຊຶມບັນດາເອກະສານ, ໜັງສືແນະນຳຂອງພັກ, ຂໍ້ກຳນົດຂອງກົດໝາຍ, ຂະບວນການກະກຽມດ້ານບຸກຄະລາກອນ, ຈັດຕັ້ງການປະຊຸມປຶກສາຫາລືນຳສະເໜີຜູ້ລົງສະໝັກຮັບເລືອກຕັ້ງສະມາຊິກສະພາແຫ່ງຊາດ, ຜູ້ແທນສະພາປະຊາຊົນແຕ່ລະຂັ້ນ ໄດ້ດຳເນີນໄປຢ່າງເຂັ້ມງວດ, ຮອບຄອບ, ຖືກຕ້ອງຕາມຂໍ້ກຳນົດ, ຕິດພັນກັບຜົນຂອງບຸກຄະລາກອນກອງປະຊຸມໃຫຍ່ຂອງພັກທຸກຂັ້ນ ແລະ ວຽກງານແຜນກໍານົດພະນັກງານ, ເສີມຂະຫຍາຍສິດປະຊາທິປະໄຕແລະ ຮັບປະກັນການນຳພາແບບລວມສູນ, ເປັນເອກະພາບພາຍໃນພັກ, ໄດ້ນຳສະເໜີຜູ້ເປັນຕົວແທນທີ່ມີຄຸນສົມບັດ, ມີຄວາມສາມາດ, ສົມຄູ່ກັບຕົວແທນໃຫ້ເຈດຈຳນົງ, ຄວາມມຸ່ງມາດປາຖະໜາ, ສິດເປັນເຈົ້າຂອງຂອງປະຊາຊົນ ບັນຈຸເຂົ້າໃນສະພາແຫ່ງຊາດ ແລະ ສະພາປະຊາຊົນໃນສະໄໝໃໝ່. ເດັດຂາດບໍ່ນໍາເອົາຜູ້ບໍ່ຄົບຖ້ວນເງື່ອນໄຂ, ມາດຖານດ້ານຄຸນສົມບັດ, ຄຸນທາດການເມືອງ, ລະເມີດກົດໝາຍ, ສໍ້ລາດບັງຫຼວງ, ຟຸມເຟືອຍ ເຂົ້າໃນບັນຊີລາຍຊື່ຜູ້ລົງຮັບສະໝັກເລືອກຕັ້ງ ແລະ ຜູ້ຖືກຮັບການເລືອກຕັ້ງຢ່າງເດັດຂາດ.
ໃນຂອບເຂດທົ່ວປະເທດ, ພາຍຫຼັງກອງປະຊຸມປຶກສາຫາລືຄັ້ງທີສາມ, ມີຜູ້ຖືກສະເໜີຊື່ລົງຮັບສະໝັກເລືອກຕັ້ງສະມາຊິກສະພາແຫ່ງຊາດຢ່າງເປັນທາງການ ຈໍານວນ 866 ທ່ານ (ບໍ່ນັບ 2 ກໍລະນີທີ່ຄະນະກໍາມະການເລືອກຕັ້ງລະດັບຊາດ ຖອນຊື່ອອກຈາກບັນຊີລາຍຊື່ຜູ້ລົງຮັບສະໝັກສະມາຊິກສະພາແຫ່ງຊາດ); ຜູ້ລົງຮັບສະໝັກເລືອກຕັ້ງຜູ້ແທນສະພາປະຊາຊົນຂັ້ນແຂວງ ຈໍານວນ 6.199 ທ່ານ; ຜູ້ລົງຮັບສະໝັກເລືອກຕັ້ງຜູ້ແທນສະພາປະຊາຊົນຂັ້ນເມືອງ ຈໍານວນ 37.468 ທ່ານ; ຜູ້ລົງຮັບສະໝັກເລືອກຕັ້ງຜູ້ແທນສະພາປະຊາຊົນຂັ້ນຕາແສງ ຈໍານວນ 405.244 ທ່ານ. ຄຸນນະພາບຂອງຜູ້ລົງຮັບສະໝັກເລືອກຕັ້ງໄດ້ຮັບການຍົກສູງຂຶ້ນ, ຮັບປະກັນທາງດ້ານມາດຕະຖານຕາມຂໍ້ກໍານົດຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ຜູ້ແທນສະພາປະຊາຊົນ ປີ 2015, ສະບັບປັບປຸງ, ເພີ່ມເຕີມ ປີ 2020, ເຊິ່ງເປັນບັນດາຜູ້ທີ່ພົ້ນເດັ່ນທາງດ້ານຄຸນສົມບັດ, ຄຸນທາດການເມືອງ, ແບບແຜນດໍາລົງຊີວິດຢ່າງແທ້ຈິງ, ມີກໍາລັງຄວາມສາມາດ ແລະ ປະສົບການໃນວຽກງານ, ມີເງື່ອນໄຂເຂົ້າຮ່ວມເຄື່ອນໄຫວວຽກງານຫຼັງຮັບການເລືອກຕັ້ງຈາກປະຊາຊົນ. ໂຄງປະກອບ, ສັດສ່ວນຜູ້ທີ່ໄດ້ຮັບການສະເໜີລົງຮັບສະໝັກເລືອກຕັ້ງມີຄວາມເໝາະສົມ, ສອດຄ່ອງກັບສະພາບການລວມ ແລະ ເງື່ອນໄຂຕົວຈິງຂອງແຕ່ລະທ້ອງຖິ່ນ. ໃນຈໍານວນຜູ້ທີ່ລົງຮັບສະໝັກເລືອກຕັ້ງສະມາຊິກສະພາແຫ່ງຊາດ ມີຜູ້ລົງຮັບສະໝັກເລືອກຕັ້ງທີ່ເປັນເພດຍິງ ມີ 393 ທ່ານ, ບັນລຸ 45,38%; ຜູ້ລົງສະໝັກຮັບເລືອກຕັ້ງທີ່ເປັນຄົນຊົນເຜົ່າສ່ວນໜ້ອຍ ມີ 185 ທ່ານ, ບັນລຸ 21,36%. ຈໍານວນຜູ້ລົງສະໝັກຮັບເລືອກຕັ້ງຜູ້ແທນສະພາປະຊາຊົນຂັ້ນແຂວງ, ຂັ້ນເມືອງທີ່ເປັນເພດຍິງ, ຊົນເຜົ່າສ່ວນໜ້ອຍ, ອາຍຸໜຸ່ມນ້ອຍ, ບໍ່ແມ່ນສະມາຊິກພັກ ຢູ່ໃນຫຼາຍທ້ອງຖິ່ນ ລ້ວນແຕ່ບັນລຸ ແລະ ສູງກວ່າຂໍ້ກໍານົດ(1). ວຽກງານພົບປະຜູ້ມີສິດປ່ອນບັດເລືອກຕັ້ງ, ເຄື່ອນໄຫວປຸກລະດົມການເລືອກຕັ້ງ ໄດ້ດໍາເນີນໄປຢ່າງມີປະຊາທິປະໄຕ, ເປີດເຜີຍ, ສະເໝີພາບ, ຖືກຕ້ອງຕາມກົດໝາຍ, ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພທາງສັງຄົມ. ຫຼາຍທ້ອງຖິ່ນໄດ້ຈັດຕັ້ງບັນ ດາຮູບການເຄື່ອນໄຫວປຸກລະດົມການເລືອກຕັ້ງທີ່ມີຫຼາຍຮູບຫຼາຍແບບ, ອຸດົມສົມບູນ, ມີລັກສະນະປະດິດສ້າງ, ຄ່ອງແຄ້ວໃນແຕ່ລະເງື່ອນໄຂຕົວຈິງ, ໝູນໃຊ້ທ່າແຮງຂອງເຕັກໂນໂລຊີຂໍ້ມູນຂ່າວສານ, ທັງຮັບປະກັນສິດໃນການເຄື່ອນໄຫວປຸກລະດົມການເລືອກຕັ້ງຂອງຜູ້ລົງຮັບສະໝັກເລືອກຕັ້ງ, ປຸກລະດົມການເຂົ້າຮ່ວມຢ່າງກວ້າງຂວາງ, ຕັ້ງໜ້າ ແລະ ດ້ວຍຄວາມຮັບຜິດຊອບຂອງຜູ້ມີສິດປ່ອນບັດເລືອກຕັ້ງ, ທັງຮັບປະກັນຄວາມຮຽກຮ້ອງດ້ານຄວາມປອດໄພໃນການຕ້ານແລະສະກັດກັ້ນພະຍາດລະບາດ.
ການສ້າງຕັ້ງຄະນະກໍາມະການເລືອກຕັ້ງລະດັບຊາດ ແລະ ບັນດາການຈັດຕັ້ງຮັບຜິດຊອບການເລືອກຕັ້ງຢູ່ທ້ອງຖິ່ນ(2) ແມ່ນຖືກຕ້ອງຕາມຂັ້ນຕອນ, ລະບຽບການ, ໄລຍະເວລາ, ຮັບປະກັນດ້ານຈໍານວນ ແລະ ສັດສ່ວນທີ່ໄດ້ກໍານົດໄວ້. ການຄັດເລືອກສະມາຊິກຂອງບັນດາການຈັດຕັ້ງຮັບຜິດຊອບການເລືອກຕັ້ງຖືກຖືສໍາຄັນ ເຊິ່ງຕ້ອງເປັນຜູ້ທີ່ມີຄວາມໜ້າເຊື່ອຖື, ເຂົ້າໃຈໃນລະບຽບກົດໝາຍ ແລະ ມີບົດຮຽນປະສົບການຕົວຈິງກ່ຽວກັບການຈັດຕັ້ງການເລືອກຕັ້ງ. ບັນດາກອງປະຊຸມຝຶກອົບຮົມວິຊາສະເພາະກ່ຽວກັບການເລືອກຕັ້ງ ໄດ້ຮັບການຈັດຕັ້ງຜັນຂະຫຍາຍຢ່າງກວ້າງຂວາງ, ຮອບຄອບ, ຖີ່ຖ້ວນ ໄປຈົນຮອດຮາກຖານທ້ອງຖິ່ນ. ບັນດາການຈັດຕັ້ງຮັບຜິດຊອບການເລືອກຕັ້ງ ນັບແຕ່ສູນກາງຈົນຮອດຮາກຖານທ້ອງຖິ່ນໄດ້ຕັ້ງໜ້າ, ເປັນເຈົ້າການ, ປະຕິບັດຢ່າງມີປະສິດທິຜົນບັນດາໜ້າທີ່, ຂອບເຂດສິດຕາມທີ່ໄດ້ກໍານົດໄວ້ ໃນກົດໝາຍຂອງທຸກຂົງເຂດການນໍາພາ, ຊີ້ນໍາ ແລະ ຈັດຕັ້ງການເລືອກຕັ້ງໃນຕົວຈິງ. ວຽກງານຂໍ້ມູນຂ່າວສານ, ການໂຄສະນາການເລືອກຕັ້ງ ໄດ້ຮັບການຈັດຕັ້ງຜັນຂະຫຍາຍເປັນລະບົບຄົບຊຸດ, ຫຼາຍຮູບຫຼາຍແບບທາງດ້ານຮູບການ, ມີຈຸດສຸມ, ຈຸດໜັກທາງດ້ານເນື້ອໃນ, ມີການສົ່ງທອດຂໍ້ມູນຂ່າວສານຢ່າງຄົບຖ້ວນ ກ່ຽວກັບການເລືອກຕັ້ງ, ຜູ້ລົງຮັບສະໝັກເລືອກຕັ້ງ, ກົງຈັກການຈັດຕັ້ງລັດ, ແຜນນະໂຍບາຍກໍ່ສ້າງ ແລະ ບູລະນະລັດແຫ່ງອໍານາດກົດໝາຍສັງຄົມນິຍົມ, ປະກອບສ່ວນສໍາຄັນໃນການຍົກສູງຄວາມຮັບຮູ້, ສະຕິການເມືອງ ແລະ ຄວາມຮັບຜິດຊອບຂອງພົນລະເມືອງ; ສ້າງບັນຍາກາດທີ່ມີປະຊາທິປະໄຕ, ຟົດຟື້ນ, ປຸກລະດົມຜູ້ມີສິດປ່ອນບັດເລືອກຕັ້ງໃນທົ່ວປະເທດ ຕັ້ງໜ້າເຂົ້າຮ່ວມການເລືອກຕັ້ງ; ຕໍ່ສູ້ຢ່າງມີປະສິດທິຜົນກັບບັນດາຖ້ອຍທໍານອງຜິດເຂວ, ບິດເບືອນ, ປໍລະປັກຄັດຄ້ານ, ທໍາລາຍມ້າງເພການເລືອກຕັ້ງ.
ວຽກງານຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພສັງຄົມ, ຕ້ານແລະສະກັດກັ້ນການລະບາດຂອງໂຄວິດ - 19 ໄດ້ຮັບການເອົາໃຈໃສ່ເປັນພິເສດ. ບັນດາທ້ອງຖິ່ນ, ໜ່ວຍງານ, ບັນດາການຈັດຕັ້ງຮັບຜິດຊອບການເລືອກຕັ້ງ ແລະ ບັນດາອົງການສາທາລະນະສຸກ ໄດ້ປະສານການຈັດຕັ້ງປະຕິບັດຢ່າງຄົບຖ້ວນ ແລະ ເຂັ້ມງວດ ຕໍ່ບັນດາມາດຕະການຕ້ານແລະສະກັດກັ້ນຕາມການຊີ້ນໍາ, ກໍ່ສ້າງ ແລະ ຝຶກຊ້ອມການຮັບມືກັບສະພາບການເລືອກຕັ້ງຕ່າງໆ, ເປັນເຈົ້າການ, ຄ່ອງແຄ້ວຮັບມືໃນທຸກສະຖານະການທີ່ຜິດປົກກະຕິ, ໂດຍສະເພາະແມ່ນຢູ່ໃນເຂດປ່ອນບັດເລືອກຕັ້ງຕ່າງໆ; ຮັບປະກັນຢ່າງຄົບຖ້ວນໃນສິດປ່ອນບັດເລືອກຕັ້ງຂອງຜູ້ມີສິດປ່ອນບັດເລືອກຕັ້ງຢູ່ “ແນວໜ້າຕ້ານແລະສະກັດກັ້ນການລະບາດຂອງພະຍາດ”, ຜູ້ມີສິດປ່ອນບັດເລືອກຕັ້ງ ຢູ່ບັນດາທ້ອງຖິ່ນຖືກແຍກກັກຕົວ, ຮັກສາໄລຍະຫ່າງທາງສັງຄົມ, ຢູ່ໃນບັນດາເຂດແຍກກັກຕົວແບບລວມສູນ, ແຍກກັກຕົວໃນຄອບຄົວ… ຄະນະພັກ, ອໍານາດການປົກຄອງແຕ່ລະຂັ້ນ ແລະ ບັນດາກໍາລັງເຈົ້າໜ້າທີ່ໄດ້ນໍາພາ, ຊີ້ນໍາຢ່າງແໜ້ນແຟ້ນ, ເປັນເຈົ້າການ, ກໍາແໜ້ນສະພາບການ, ມີແຜນງານປະສານງານຕໍ່ສູ້ເພື່ອຮັກສາຄວາມສະຫງົບທາງການເມືອງ, ຮັບປະກັນຄວາມເປັນລະບຽບຮຽບຮ້ອຍ ແລະ ປອດໄພສັງຄົມ, ມີແຜນງານຮັບມືຢ່າງທັນການ ກັບບັນດາສະພາບການເກີດໄພທໍາມະຊາດ, ນໍ້າຖ້ວມ.
ພາຍໃຕ້ການນໍາພາ, ຊີ້ນໍາຂອງພັກ; ຄວາມໃກ້ຊິດຕິດແທດກັບຄວາມຮຽກຮ້ອງຕ້ອງການ, ໜ້າທີ່ ແລະ ບັນດາຂໍ້ກໍານົດຂອງກົດໝາຍ, ສະພາການເລືອກຕັ້ງແຫ່ງຊາດ, ບັນດາອົງການ, ການຈັດຕັ້ງທີ່ກ່ຽວຂ້ອງຢູ່ສູນກາງ ແລະ ທ້ອງຖິ່ນ ໄດ້ປະຕິບັດເປັນຢ່າງດີ ໃນວຽກງານການແກ້ໄຂຄໍາຮ້ອງທຸກ, ຮ້ອງຟ້ອງ ຕໍ່ກັບວຽກງານການເລືອກຕັ້ງ ແລະ ຜູ້ລົງຮັບສະໝັກເລືອກຕັ້ງຢູ່ຂັ້ນຮາກຖານແຕ່ຫົວທີ, ບໍ່ປ່ອຍໃຫ້ເກີດການຮ້ອງຟ້ອງຈາກຄົນຈໍານວນຫຼາຍ, ອັນສ້າງຄວາມຫຍຸ້ງຍາກສັບສົນທີ່ແກ່ຍາວ. ຢູ່ບັນດາທ້ອງຖິ່ນທີ່ມີເງື່ອນໄຂພິເສດສະເພາະ ກໍໄດ້ພິຈາລະນາອະນຸຍາດໃຫ້ຈັດຕັ້ງການປ່ອນບັດເລືອກຕັ້ງແຕ່ຫົວທີ. ໄດ້ແບ່ງປັນ, ຈັດສັນງົບປະມານ, ກະກຽມບັນດາເງື່ອນໄຂທາງດ້ານພື້ນຖານວັດຖຸ, ແກ້ໄຂສະພາບຄວາມຫຍຸ້ງຍາກຕ່າງໆ ເພື່ອຮັບໃຊ້ແກ່ການເລືອກຕັ້ງຢ່າງຮອບຄອບຖີ່ຖ້ວນ, ຮັບປະກັນເປັນຢ່າງດີ ແລະ ຄົບຖ້ວນທີ່ສຸດ ຕໍ່ສິດເລືອກຕັ້ງຂອງພົນລະເມືອງ, ໂດຍສະເພາະແມ່ນຢູ່ບັນດາທ້ອງຖິ່ນທີ່ພະຍາດລະບາດມີການຜັນແປໄປຢ່າງສັບສົນ.
ການເລືອກຕັ້ງສະມາຊິກສະພາແຫ່ງຊາດຊຸດທີ 15 ແລະ ຜູ້ແທນສະພາປະຊາຊົນແຕ່ລະຂັ້ນ
ສະໄໝປີ 2021 - 2026 ໄດ້ບັນລຸຜົນສໍາເລັດຢ່າງຈົບງາມທີ່ສຸດ
ການນໍາພາທີ່ແທດເຖິງ ແລະ ຮອບດ້ານຂອງກົມການເມືອງສູນກາງ, ຄະນະເລຂາທິການສູນກາງ; ຄວາມມານະພະຍາຍາມ, ຕັດສິນໃຈ, ເອົາໃຈໃສ່ສູງສຸດໃນການຈັດຕັ້ງຜັນຂະຫຍາຍວຽກງານກະກຽມການຈັດຕັ້ງປ່ອນບັດເລືອກຕັ້ງດ້ວຍຄວາມເປັນເຈົ້າການ, ລະອຽດລະອໍ, ຮອບຄອບຖີ່ຖ້ວນ, ຄວາມເປັນມືອາຊີບ, ວ່ອງໄວ, ຕິດແທດຕົວຈິງ, ແກ້ໄຂຕໍ່ທຸກສະຖານະການທີ່ເກີດຂຶ້ນຢ່າງທັນການ, ຖືກຕ້ອງຕາມກົດໝາຍ, ດ້ວຍຈິດໃຈຄວາມຮັບຜິດຊອບສູງສຸດຂອງທັງລະບົບການເມືອງ; ການສະໜັບສະໜູນ, ຮ່ວມແຮງຮ່ວມໃຈຂອງບັນດາຊັ້ນຄົນປະຊາຊົນ, ພີ່ນ້ອງຮ່ວມຊາດທີ່ຢູ່ພາຍໃນ ແລະ ຕ່າງປະເທດ, ພ້ອມກັບຜູ້ມີສິດປ່ອນບັດເລືອກຕັ້ງໃນປະເທດທັງໝົດ ໄດ້ສ້າງຜົນສໍາເລັດຢ່າງຈົບງາມທີ່ສຸດໃນບັ້ນປ່ອນບັດເລືອກຕັ້ງຄັ້ງນີ້, ເຊິ່ງສະແດງອອກຢ່າງພົ້ນເດັ່ນໃນບາງດ້ານດັ່ງຕໍ່ໄປນີ້:
ໜຶ່ງ, ການເລືອກຕັ້ງ ດໍາເນີນໄປດ້ວຍຄວາມປອດໄພ, ບໍ່ມີບັນດາສະຖານະການທີ່ບໍ່ຄາດຄິດເກີດຂຶ້ນ, ມີຄວາມສະຫງົບທາງການເມືອງ ແລະ ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມໄດ້ຮັບການຮັກສາໄວ້ຢ່າງໝັ້ນຄົງ.
ໃນເງື່ອນໄຂຫຍຸ້ງຍາກທີ່ສຸດ, ພະຍາດໂຄວິດ-19 ຍັງມີການຜັນແປໄປຢ່າງສັບສົນ, ດ້ວຍທິດນໍາທີ່ຖືກຕ້ອງ ບໍ່ແມ່ນຍ້ອນພະຍາດລະບາດແລ້ວພາໃຫ້ບໍ່ຈັດຕັ້ງການເລືອກຕັ້ງ ແລະ ຍິ່ງບໍ່ປ່ອຍປະໃຫ້ ການເລືອກຕັ້ງເຮັດໃຫ້ສະພາບການລະບາດພະຍາດທະວີຄວາມສັນສົນໄປກວ່າເກົ່າ, ທັງລະບົບການ ເມືອງໄດ້ເຂົ້າມາມີສ່ວນຮ່ວມ, ລະດົມທຸກແຫຼ່ງກໍາລັງ, ນໍາສະເໜີແຜນງານ, ຄາດກະສະຖານະການຫຼາຍຢ່າງເພື່ອຮັບມື, ມີຫຼາຍວິທີການທີ່ປະດິດສ້າງໃນການຈັດຕັ້ງຜັນຂະຫຍາຍວຽກງານການເລືອກຕັ້ງ. ການຈັດຕັ້ງປ່ອນບັດເລືອກຕັ້ງແຕ່ຫົວທີຢູ່ບັນດາບ່ອນທີ່ມີເງື່ອນໄຂຫຍຸ້ງຍາກເປັນພິເສດ, ການຈັດວາງບັນດາຫີບບັດສໍາຮອງ, ຫີບບັດເຄື່ອນທີ່ ໄປຮອດໄປເຖິງແຕ່ລະຄອບຄົວ ຢູ່ບັນດາທ້ອງຖິ່ນທີ່ຕ້ອງແຍກກັກຕົວ, ເວັ້ນໄລຍະຫ່າງສັງຄົມ… ໄດ້ສ້າງເງື່ອນໄຂເອື້ອອໍານວຍ, ຮັບປະກັນສູງສຸດສິດເລືອກຕັ້ງຂອງຜູ້ມີສິດປ່ອນບັດເລືອກຕັ້ງ. ສະພາບຄວາມສະຫງົບຖືກຮັບປະກັນ, ຄວາມເປັນລະບຽບຮຽບຮ້ອຍ ແລະ ປອດໄພທາງສັງຄົມໄດ້ຮັບການຮັກສາໄວ້ຢ່າງໝັ້ນຄົງ, ບໍ່ມີບັນດາສະຖານະການທີ່ບໍ່ຄາດຄິດເກີດຂຶ້ນ.
ສອງ, ຜູ້ມີສິດປ່ອນບັດເລືອກຕັ້ງໄປໃຊ້ສິດ ບັນລຸອັດຕາສ່ວນ 99,60% ເມື່ອທຽບກັບຈໍານວນຜູ້ມີສິດປ່ອນບັດເລືອກຕັ້ງໃນທົ່ວປະເທດທັງໝົດ - ສູງສຸດນັບແຕ່ໃນອະດີດມາຮອດປັດຈຸບັນ. ການເລືອກຕັ້ງສາມາດເສີມຂະຫຍາຍໄດ້ຢ່າງແທ້ຈິງຈິດໃຈປະຊາທິປະໄຕ, ຍົກສູງສິດເປັນເຈົ້າຂອງປະຊາຊົນ ແລະ ຄວາມຮັບຜິດຊອບພົນລະເມືອງ ໃນການກໍ່ສ້າງອໍານາດການປົກຄອງ.
ການເລືອກຕັ້ງຄັ້ງນີ້ມີຜູ້ມີສິດປ່ອນບັດເລືອກຕັ້ງໄປໃຊ້ສິດຈໍານວນ 69.243.604 ຄົນ ໃນຈໍາ ນວນຜູ້ມີສິດປ່ອນບັດເລືອກຕັ້ງໃນທົ່ວປະເທດທັງໝົດ 69.523.133 ຄົນ, ບັນລຸ 99,60%; ສູງກວ່າ 0,25% ເມື່ອທຽບກັບການເລືອກຕັ້ງຊຸດກ່ອນ(3). ບັນດາແຂວງທີ່ມີອັດຕາສ່ວນຜູ້ມີສິດປ່ອນບັດເລືອກຕັ້ງໄປໃຊ້ສິດສູງສຸດ ຄື: ແຂວງເຮົ້າຢາງ ບັນລຸ 99,99%; ແຂວງລ້າງເຊີນ ບັນລຸ 99,99%; ແຂວງລາວກາຍ ບັນລຸ 99,98%; ແຂວງຈ່າວິງ ບັນລຸ 99,97%; ແຂວງບິ່ງເຟືອກ ບັນລຸ 99,97%; ແຂວງຫວິງລອງ ບັນລຸ 99,96%; ແຂວງເບ໊ນແຈ ບັນລຸ 99,96%; ແຂວງຮ່າຢາງ ບັນລຸ 99,96%; ແຂວງອຽນບ໊າຍ ບັນລຸ 99,96%... ພິເສດແມ່ນຢູ່ບັນດາທ້ອງຖິ່ນທີ່ຖືກຜົນກະທົບຈາກພະຍາດລະບາດ, ຕ້ອງໄດ້ແຍກກັກຕົວດ້ານສາທາລະນະສຸກ, ເວັ້ນໄລຍະຫ່າງທາງສັງຄົມ, ແຕ່ຜູ້ມີສິດປ່ອນບັດເລືອກຕັ້ງ ກໍຍັງໄປໃຊ້ສິດໃນອັດຕາສ່ວນສູງທີ່ສຸດ ເຊັ່ນ: ແຂວງບັກຢາງ ບັນລຸ 99,02%; ແຂວງບັກນິງ ບັນລຸ 99,07%; ນະຄອນຫຼວງຮ່າໂນ້ຍ ບັນລຸ 99,16%; ແຂວງຫວິງຟຸກ ບັນລຸ 99,41%; ແຂວງຫ້າຍເຢືອງ ບັນລຸ 99,67%...
ຜົນການເລືອກຕັ້ງດ້ວຍຈໍານວນຜູ້ມີສິດປ່ອນບັດເລືອກຕັ້ງໄປໃຊ້ສິດທີ່ສູງ, ບັນລຸ 99,60% ໄດ້ພິສູດໃຫ້ເຫັນວ່າ ພະລັງຊີວິດແຫ່ງຄວາມເປັນຈິງໃນທັດສະນະຂອງໂຄງການສ້າງສາປະເທດຊາດໃນສະໄໝຂ້າມຜ່ານກ້າວຂຶ້ນສັງຄົມນິຍົມ (ສະບັບປັບປຸງ, ເສີມຂະຫຍາຍ ປີ 2011): “ປະຊາທິປະໄຕສັງຄົມນິຍົມ ແມ່ນທາດແທ້ຂອງລະບອບພວກເຮົາ, ທັງເປັນຈຸດໝາຍ, ທັງເປັນກໍາລັງຜັກດັນຂອງການພັດທະນາປະເທດຊາດ”(4). “ກໍ່ສ້າງພື້ນຖານປະຊາທິປະໄຕສັງຄົມນິຍົມ, ຮັບປະກັນສິດອໍານາດຂຶ້ນກັບປະຊາຊົນຢ່າງແທ້ຈິງ ແມ່ນໜ້າທີ່ສໍາຄັນເປັນຢ່າງຍິ່ງ ແລະ ຍາວນານຂອງການປະຕິວັດຫວຽດນາມ(5)”. ການເລືອກຕັ້ງຄັ້ງນີ້ ໄດ້ຢືນຢັນເຖິງນໍ້າໃຈຮັກຊາດ, ກໍາລັງແຮງຂອງກ້ອນມະຫາສາມັກຄີທົ່ວທັງຊາດ, ສະຕິເປັນເຈົ້າ, ກໍາລັງຄວາມສາມາດ ໃນການປະຕິບັດສິດປະຊາທິປະໄຕຂອງປະຊາຊົນ, ຄວາມຮັບຜິດຊອບພົນລະເມືອງໃນການກໍ່ສ້າງອໍານາດການປົກຄອງ; ຢືນຢັນເຖິງຄວາມເຊື່ອໝັ້ນຂອງປະຊາຊົນຕໍ່ກັບພັກ, ລັດ ແລະ ລະບອບສັງຄົມນິຍົມ. ນີ້ແມ່ນພື້ນຖານການເມືອງ - ກົດໝາຍທີ່ໜັກແໜ້ນໃຫ້ແກ່ການຈັດຕັ້ງປະຕິບັດສິດອໍານາດລັດ, ກໍ່ສ້າງກົງຈັກລັດທີ່ປອດໃສ, ໜັກແໜ້ນເຂັ້ມແຂງ, ຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.
ສາມ, ຜົນການເລືອກຕັ້ງແມ່ນສາມາດເລືອກສະມາຊິກຜູ້ແທນສະພາແຫ່ງຊາດ ໄດ້ຈໍານວນ 499 ທ່ານ, ບັນລຸ 99,8% ເມື່ອທຽບກັບຈໍານວນສະມາຊິກຜູ້ແທນທີ່ໄດ້ຮັບປ່ອນບັດເລືອກຕັ້ງຕາມກົດໝາຍໄດ້ກໍານົດ, ຄຸນນະພາບສະມາຊິກຜູ້ແທນໄດ້ຮັບການຍົກສູງຂຶ້ນ, ມີໂຄງປະກອບ, ພາກສ່ວນທີ່ເໝາະສົມ, ເປັນປະຖົມປັດໄຈທີ່ສໍາຄັນ ເພື່ອສືບຕໍ່ການປ່ຽນແປງໃໝ່, ຍົກສູງຄຸນນະພາບແລະປະສິດທິພາບ ການເຄື່ອນໄຫວຂອງສະພາແຫ່ງຊາດ ຊຸດທີ 15.
ບັນດາສະມາຊິກຜູ້ແທນທີ່ໄດ້ຮັບການເລືອກຕັ້ງ ກໍຮັບປະກັນດ້ານມາດຕະຖານຕາມທີ່ກົດໝາຍໄດ້ກໍານົດ, ເປັນຜູ້ພົ້ນເດັ່ນທາງດ້ານຄຸນສົມບັດ, ຄຸນທາດການເມືອງ, ກໍາລັງຄວາມສາມາດ, ລະດັບ ແລະທາດແທ້; ສົມກັບເປັນຕົວແທນໃຫ້ເຈດຈໍານົງ, ຄວາມມຸ່ງມາດປາຖະໜາຂອງປະຊາຊົນ, ຕາງໜ້າໃຫ້ປະຊາຊົນໃນການປະຕິບັດສິດອໍານາດລັດໂດຍການເຂົ້າຮ່ວມໃນສະພາແຫ່ງຊາດ. ລະດັບວິຊາສະເພາະຂອງສະມາຊິກສະພາແຫ່ງຊາດ ຊຸດທີ 15 ໄດ້ຮັບການຍົກສູງຂຶ້ນ ເຊັ່ນ: ສະມາຊິກຜູ້ແທນທີ່ມີລະດັບເໜືອມະຫາວິທະຍາໄລ ມີ 392 ທ່ານ (ກວມເອົາ 78,55%), ໃນນັ້ນ ປະລິນຍາເອກ ມີ 144 ທ່ານ, ປະລິນຍາໂທ ມີ 248 ທ່ານ; ປະລິນຍາຕີ ມີ 106 ທ່ານ (ກວມເອົາ 21,24%). ດ້ານໜ້າທີ່ຕໍາແໜ່ງວິທະຍາສາດ: ສາດສະດາຈານ ມີ 12 ທ່ານ, ຮອງສາດສະດາຈານ 20 ທ່ານ(6). ສາຍພົວພັນລະຫວ່າງຄຸນນະພາບ ແລະ ໂຄງປະກອບສະມາຊິກຜູ້ແທນໄດ້ຮັບການແກ້ໄຂຢ່າງກົມກຽວ, ຮັບປະກັນລັກສະນະຫຼັກການ “ຖືເອົາຄຸນນະພາບເປັນໃຈກາງ, ບໍ່ແມ່ນເພື່ອໂຄງປະກອບແລ້ວບໍ່ຖືສໍາຄັນມາດຕະຖານ”(7).
ຈັດຕັ້ງການເຊື່ອມຊຶມ ແລະ ປະຕິບັດຢ່າງມີໝາກຜົນໃນແຜນນະໂຍບາຍມະຕິກອງປະຊຸມໃຫຍ່ ຄັ້ງທີ 13 ຂອງພັກ ວ່າດ້ວຍ “ການຮັບປະກັນມາດຕະຖານ, ໂຄງປະກອບ, ການຍົກສູງຄຸນນະພາບ ສະມາຊິກສະພາແຫ່ງຊາດ, ເພີ່ມທະວີຄວາມເໝາະສົມດ້ານຈໍານວນຜູ້ແທນທີ່ເຄື່ອນໄຫວເຕັມເວລາ, ຫຼຸດຜ່ອນຈໍານວນຜູ້ແທນທີ່ປະຕິບັດວຽກງານຢູ່ໃນບັນດາອົງການບໍລິຫານ, ຕຸລາການ”(8). ໃນການ ປ່ອນບັດເລືອກຕັ້ງຄັ້ງນີ້, ຈໍານວນຜູ້ແທນໃນໂຄງປະກອບເຄື່ອນໄຫວເຕັມເວລາໄດ້ຮັບເລືອກຕັ້ງ ມີ 193 ທ່ານ (ຢູ່ສູນກາງ 126 ທ່ານ, ຢູ່ທ້ອງຖິ່ນ 67 ທ່ານ), ກວມເອົາ 38,68% ເມື່ອທຽບກັບຈໍານວນສະມາຊິກສະພາແຫ່ງຊາດທັງໝົດ, ເກືອບບັນລຸ 40% ຕາມການກໍານົດຂອງກົດໝາຍວ່າດ້ວຍການຈັດຕັ້ງສະພາແຫ່ງຊາດ. ບັນດາສະມາຊິກຜູ້ແທນທີ່ເຄື່ອນໄຫວເຕັມເວລາ ລ້ວນແຕ່ແມ່ນຜູ້ທີ່ຕອບສະໜອງຄົບຖ້ວນບັນດາມາດຕະຖານທີ່ຈໍາເປັນ ເຊັ່ນ: ມີກໍາລັງຄວາມສາມາດ, ລະດັບ ແລະ ຄຸນທາດການເມືອງ, ໄດ້ຝຶກຝົນຫຼໍ່ຫຼອມຜ່ານບົດທົດສອບ, ພຶດຕິກໍາວຽກງານຕົວຈິງ. ຖັນແຖວສະມາຊິກສະພາແຫ່ງຊາດທີ່ເຄື່ອນໄຫວເຕັມເວລາ ຈະມີບົດບາດເປັນຫຼັກແຫຼ່ງໃນບັນດາການເຄື່ອນໄຫວຂອງສະພາແຫ່ງຊາດ, ອົງການຕ່າງໆ ຂອງສະພາແຫ່ງຊາດ ແລະ ຄະນະຜູ້ແທນສະພາແຫ່ງຊາດຢູ່ທ້ອງຖິ່ນ.
ໂຄງປະກອບ, ສັດສ່ວນສະມາຊິກຜູ້ແທນມີຄວາມເໝາະສົມ, ເປັນຕົວແທນທີ່ພົ້ນເດັ່ນໃຫ້ແກ່ບັນດາຊົນຊັ້ນ, ຊັ້ນຄົນ, ພາກສ່ວນ, ຂະແໜງການອາຊີບ ແລະ ຂົງເຂດວຽກງານ, ຊົນເຜົ່າ, ສາສະໜາ, ອາຍຸ, ເພດໄວ. ພິເສດແມ່ນອັດຕາສ່ວນຜູ້ແທນທີ່ເປັນເພດຍິງ, ຜູ້ແທນທີ່ເປັນຄົນຊົນເຜົ່າສ່ວນໜ້ອຍ ລ້ວນແຕ່ບັນລຸ ແລະ ລື່ນກາຍການຄາດຄະເນ, ມີຈໍານວນເພີ່ມຂຶ້ນເມື່ອທຽບກັບແຕ່ລະສະໄໝມໍ່ໆມານີ້, ສອດຄ່ອງກັບວິວັດການປະຕິບັດເປົ້າໝາຍແຫ່ງຊາດວ່າດ້ວຍຄວາມສະເໝີພາບທາງເພດ, ຮັບປະກັນການເຂົ້າຮ່ວມຂອງສະມາຊິກຜູ້ແທນບັນດາຊົນເຜົ່າ ຢູ່ໃນອົງການສະພາແຫ່ງຊາດ. ດ້ວຍຈໍານວນສະມາຊິກຜູ້ແທນທີ່ເປັນເພດຍິງໄດ້ຮັບການເລືອກຕັ້ງຈໍານວນ 151 ທ່ານ, ບັນລຸ 30,26%, ເປັນຕົວເລກສູງສຸດຕັ້ງແຕ່ສະພາແຫ່ງຊາດ ຊຸດທີ 6 ມາເຖິງປັດຈຸບັນ, ຫວຽດນາມສືບຕໍ່ເປັນປະເທດທີ່ມີອັດຕາສ່ວນສະມາຊິກຜູ້ແທນເພດຍິງໃນລະດັບສູງ ເມື່ອທຽບກັບລັດຖະສະພາຂອງບັນດາປະເທດໃນພາກພື້ນ ແລະ ໃນໂລກ. ສະມາຊິກຜູ້ແທນທີ່ເປັນຄົນຊົນເຜົ່າສ່ວນໜ້ອຍ ມີ 89 ທ່ານ (ບັນລຸ 17,84%), ໃນນັ້ນ ມີ 2 ຊົນເຜົ່າສ່ວນໜ້ອຍທີ່ມີຈຳນວນໜ້ອຍຄົນທີ່ສຸດ (ຊົນເຜົ່າລື້ ແລະ ເບຼົາ) ທີ່ມີຜູ້ແທນສະພາແຫ່ງຊາດເປັນຄັ້ງທໍາອິດ. ຈໍານວນຜູ້ແທນແຕ່ລະສະໄໝທີ່ຮັບການເລືອກຕັ້ງອີກ ມີ 203 ທ່ານ (ກວມເອົາ 40,68%) ກວມເອົາຈໍານວນທີ່ສູງກວ່າເກົ່າຫຼາຍ ເມື່ອທຽບກັບສະພາແຫ່ງຊາດຊຸດທີ 14.
ສີ່, ຜົນການເລືອກຕັ້ງຜູ້ແທນສະພາປະຊາຊົນແຕ່ລະຂັ້ນ ກໍຮັບປະກັນທາງດ້ານຈໍານວນ, ດ້ວຍໂຄງປະກອບ, ສັດສ່ວນທີ່ເໝາະສົມກັບຈຸດພິເສດຕົວຈິງຢູ່ແຕ່ລະທ້ອງຖິ່ນ.
ຢູ່ຂັ້ນແຂວງ ສາມາດປ່ອນບັດເລືອກຕັ້ງຜູ້ແທນໄດ້ 3.721 ທ່ານ, ຂັ້ນເມືອງ ປ່ອນບັດເລືອກຕັ້ງຜູ້ແທນໄດ້ 22.550 ທ່ານ, ຂັ້ນຕາແສງ ປ່ອນບັດເລືອກຕັ້ງໄດ້ 239.788 ທ່ານ(9). ຈໍານວນຜູ້ແທນທີ່ເປັນເພດຍິງກໍເພີ່ມຂຶ້ນຫຼາຍສົມຄວນ, ຂັ້ນແຂວງ ບັນລຸ 29%, ຂັ້ນເມືອງ ບັນລຸ 29,08%. ຈໍານວນຜູ້ແທນທີ່ຮັບເລືອກຕັ້ງອີກ ກໍເພີ່ມຂຶ້ນສູງເມື່ອທຽບກັບສະໄໝກ່ອນນີ້, ຢູ່ຂັ້ນແຂວງ ບັນລຸ 42,09%, ຂັ້ນເມືອງ ບັນລຸ 44,07%; ຢູ່ຂັ້ນຕາແສງ ບັນລຸ 54,04%(10).
ຄຽງຄູ່ກັບບັນດາໝາກຜົນທີ່ພົ້ນເດັ່ນນັ້ນ, ຂະບວນການກະກຽມ, ດໍາເນີນການປ່ອນບັດເລືອກຕັ້ງ ກໍຍັງສະແດງໃຫ້ເຫັນເຖິງຂໍ້ຈໍາກັດ ແລະ ຂໍ້ຄົງຄ້າງຈໍານວນໜຶ່ງ ເຊິ່ງຕ້ອງໄດ້ຖອດຖອນເປັນບົດຮຽນປະສົບການ ເຊັ່ນ: ຢູ່ໃນວຽກງານການປະຊຸມເຈລະຈາ, ແນະນໍາຜູ້ລົງຮັບສະໝັກຢູ່ໃນບາງບ່ອນ ຍັງບໍ່ທັນຮັບປະກັນຈໍານວນທີ່ເຫຼືອໄວ້, ຍັງມີກໍລະນີທີ່ຜູ້ລົງຮັບສະໝັກກະທໍາຜິດກົດໝາຍ, ມີກໍລະນີສະເພາະພິເສດກໍມີບ່ອນຍັງຕ້ອງປ່ອນບັດເລືອກຕັ້ງຄືນໃໝ່, ຍ້ອນການປ່ອນບັດເລືອກຕັ້ງບໍ່ຄົບຕາມຈໍານວນ (ຈັດຕັ້ງການປ່ອນບັດເລືອກຕັ້ງຜູ້ແທນປະຊາຊົນຂັ້ນເມືອງເພີ່ມເຕີມ ຢູ່ 2 ຫົວໜ່ວຍເລືອກຕັ້ງ ຈໍານວນ 3 ທ່ານ ແລະ ຜູ້ແທນປະຊາຊົນຂັ້ນຕາແສງ ຢູ່ 175 ຫົວໜ່ວຍເລືອກຕັ້ງ ຈຳນວນ 280 ທ່ານ ໃນຂອບເຂດທົ່ວປະເທດ)(11). ເອກະສານແນະນໍາຈໍານວນໜຶ່ງກໍຍັງຊັກຊ້າ, ຕ້ອງມີການປັບປຸງ; ຍັງມີຄວາມຜິດພາດ, ຫຼົງລືມຈໍານວນໜຶ່ງທີ່ບໍ່ຄວນເກີດຂຶ້ນ ໃນເວລາປະຕິບັດໜ້າທີ່ວິຊາສະເພາະຂອງການປ່ອນບັດເລືອກຕັ້ງ…
ບັນດາໝາກຜົນ ແລະ ຜົນສໍາເລັດອັນຈົບງາມທີ່ສຸດຂອງການເລືອກຕັ້ງ ແມ່ນຍ້ອນຫຼາຍສາເຫດ, ພົ້ນເດັ່ນແມ່ນຍ້ອນມີການນໍາພາທີ່ໃກ້ຊິດ, ຮອດດ້ານ ແລະ ທັນເວລາຂອງກົມການເມືອງສູນກາງ, ຄະນະເລຂາທິການສູນກາງ. ສະພາການເລືອກຕັ້ງແຫ່ງຊາດ, ຄະນະກໍາມະການປະຈໍາສະພາແຫ່ງຊາດ, ລັດຖະບານ, ຄະນະກໍາມະການສູນກາງແນວໂຮມແຫ່ງຊາດຫວຽດນາມ, ບັນດາອົງການ, ກະຊວງ, ອົງຄະນະພັກ, ອໍານາດການປົກຄອງໃນລະບົບການເມືອງ, ບັນດາການຈັດຕັ້ງທີ່ຮັບຜິດຊອບການເລືອກຕັ້ງ ນັບແຕ່ຂັ້ນສູນກາງໄປຮອດຮາກຖານໄດ້ມີການນໍາພາ, ຊີ້ນໍາ, ແນະນໍາ, ຕິດຕາມ, ກວດກາວຽກງານການເລືອກຕັ້ງຢ່າງເປັນປົກກະຕິ, ເຂັ້ມງວດ, ທັນເວລາ ແລະ ໃກ້ຊິດແທດເຖິງ; ເຮັດວຽກຢ່າງຕັ້ງໜ້າ, ເປັນເຈົ້າການ, ມີຄວາມຮັບຜິດຊອບ, ໝົດຈິດໝົດໃຈ ແລະ ຈັດຕັ້ງຜັນຂະຫຍາຍເກີດໝາກຜົນຢ່າງຮອບດ້ານໃນທຸກດ້ານ ຂອງວຽກງານກະກຽມການເລືອກຕັ້ງ, ຂໍ້ມູນຂ່າວສານທັນການ, ວ່ອງໄວ, ສ່ອງແສງໄດ້ເຖິງຄວາມຊື່ຕົງບໍລິສຸດ, ຊັດເຈນ, ຮັບປະກັນຄວາມສະຫງົບ, ເປັນລະບຽບຮຽບຮ້ອຍ, ຄວາມປອດໄພສັງຄົມໃນການເລືອກຕັ້ງ. ພ້ອມກັນນັ້ນ, ກໍຍ້ອນມີການສະໜັບສະໜູນ, ຂານຕອບຢ່າງຕັ້ງໜ້າ, ຄວາມເຫັນດີເຫັນພ້ອມ ແລະ ການເຂົ້າຮ່ວມດ້ວຍຄວາມຮັບຜິດຊອບຂອງບັນດາຊັ້ນຄົນປະຊາຊົນ, ພີ່ນ້ອງຮ່ວມຊາດ ຢູ່ພາຍໃນປະເທດ ແລະ ຕ່າງປະເທດ ພ້ອມກັບບັນດາຜູ້ມີສິດປ່ອນບັດໃນທົ່ວປະເທດ.
ເສີມຂະຫຍາຍໝາກຜົນການເລືອກຕັ້ງ, ສືບຕໍ່ປ່ຽນແປງໃໝ່ການຈັດຕັ້ງ
ແລະ ການເຄື່ອນໄຫວຂອງສະພາແຫ່ງຊາດ ຊຸດທີ 15
ຜົນສໍາເລັດຂອງການເລືອກຕັ້ງ ມີຄວາມໝາຍສໍາຄັນຢ່າງຍິ່ງ, ສະແດງອອກເຖິງຄວາມເປັນເອກະພາບໃນທຸກດ້ານຂອງ “ເຈດຈໍານົງຂອງພັກ, ຈິດໃຈຂອງປະຊາຊົນ”, ເປັນປະຖົມປັດໄຈທີ່ໜັກແໜ້ນໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 13 ຂອງພັກ ໃຫ້ເກີດໝາກຜົນສູງສຸດ, ກໍ່ສ້າງບັນດາອົງການລັດ, ອໍານາດການປົກຄອງແຕ່ລະຂັ້ນ ໃຫ້ມີຄວາມອາດສາມາດຄົບຖ້ວນ, ພຽງພໍເພື່ອເຄື່ອນໄຫວວຽກງານໃນໄລຍະຕໍ່ໜ້າຢ່າງມີຄຸນນະພາບ, ປະສິດທິພາບສູງ, ແນໃສ່ປັບປຸງແລະບູລະນະ
ລັດແຫ່ງອໍານາດກົດໝາຍສັງຄົມນິຍົມຫວຽດນາມ ເປັນຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ. ອໍານາດການປົກຄອງທີ່ມາຈາກການເລືອກຕັ້ງຂອງປະຊາຊົນ ຈະຕິດພັນສະໜິດແໜ້ນກັບປະຊາຊົນ, ຮັບປະກັນສິດເປັນເຈົ້າຂອງປະຊາຊົນຢ່າງຄົບຖ້ວນ; ເຄົາລົບ, ຮັບຟັງຄວາມຄິດເຫັນຂອງປະຊາຊົນ ແລະ ຍອມຮັບຕໍ່ການຕິດຕາມກວດກາຂອງປະຊາຊົນ, ເພື່ອຮັບໃຊ້ປະຊາຊົນ, ປະຕິບັດຈຸດໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທໍາ, ສີວິໄລ” ໃຫ້ເກີດຜົນເປັນຈິງ.
ເພື່ອສືບທອດມູນເຊື້ອທີ່ມີກຽດສະຫງ່າຂອງສະພາແຫ່ງຊາດຫວຽດນາມ ໃນຕະຫຼອດ 75 ປີທີ່ຜ່ານມາ, ເສີມຂະຫຍາຍບົດຮຽນປະສົບການ ແລະ ຜົນສໍາເລັດທີ່ຍາດມາໄດ້ຂອງສະພາແຫ່ງຊາດ ຊຸດທີ 14, ໃນສະໄໝຕໍ່ໜ້ານີ້, ສະພາແຫ່ງຊາດຕ້ອງໄດ້ສືບຕໍ່ປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຕາມທິດຂອງມະຕິກອງປະຊຸມໃຫຍ່ ຄັ້ງທີ 13 ຂອງພັກ, ຮັບປະກັນໃຫ້ສະພາແຫ່ງຊາດ ເປັນອົງການທີ່ເປັນຕົວແທນສູງສຸດຂອງປະຊາຊົນ, ອົງການສິດອໍານາດລັດສູງສຸດຢ່າງແທ້ຈິງ. “ປ່ຽນແປງໃໝ່ແບບວິທີ, ຍົກສູງຄຸນນະພາບ, ປະສິດທິພາບໃນການເຄື່ອນໄຫວ, ເສີມຂະຫຍາຍປະຊາທິປະໄຕ, ອໍານາດແຫ່ງກົດໝາຍ, ເພີ່ມທະວີລັກສະນະຄວາມເປັນມືອາຊີບໃນການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ”(12), ປະກອບສ່ວນສໍາຄັນເຂົ້າໃນຂະບວນວິວັດແຫ່ງການກໍ່ສ້າງ ແລະ ບູລະນະລັດແຫ່ງອໍານາດກົດໝາຍສັງຄົມນິຍົມ, ໃນນັ້ນ, ຕ້ອງສຸມໃສ່ການຈັດຕັ້ງປະຕິບັດເປັນຢ່າງດີ ຕໍ່ບັນດາບັນຫາທີ່ເປັນຈຸດສຸມ ຄືດັ່ງຕໍ່ໄປນີ້:
ໜຶ່ງ, ຮັບປະກັນການນໍາພາຢ່າງຮອບດ້ານຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ ຕໍ່ກັບການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ. ບູລະນະການຈັດຕັ້ງ, ປ່ຽນແປງໃໝ່ແບບວິທີການເຄື່ອນໄຫວ ແລະ ສາຍພົວພັນການປະສານວຽກງານຂອງຄະນະຊີ້ນໍາຂອງພັກ ຢູ່ໃນສະພາແຫ່ງຊາດ, ບັນດາການຈັດຕັ້ງພັກ ຢູ່ໃນບັນດາອົງການຂອງສະພາແຫ່ງຊາດ ເພື່ອຍົກສູງກໍາລັງຄວາມອາດສາມາດ, ປະສິດທິພາບໃນການນໍາພາ, ຊີ້ນໍາ. ຈັດຕັ້ງຜັນຂະຫຍາຍການກໍ່ສ້າງບັນດາໂຄງການຕ່າງໆທີ່ກົມການເມືອງ, ຄະນະເລຂາທິການ ໄດ້ແບ່ງວຽກຕາມທິດວຽກງານນິຕິບັນຍັດຂອງສະພາແຫ່ງຊາດ ຊຸດທີ 15, ຍຸດທະສາດການກໍ່ສ້າງ ແລະ ບູລະນະລັດແຫ່ງອໍານາດກົດໝາຍສັງຄົມນິຍົມຫວຽດນາມ ຮອດປີ 2030, ທິດທາງຮອດປີ 2045, ໃນນັ້ນ ມີຍຸດທະສາດການສ້າງກົດໝາຍ ແລະ ປະຕິຮູບຕຸລາການ ຕາມຈິດໃຈມະຕິກອງປະຊຸມໃຫຍ່ ຄັ້ງທີ 13 ຂອງພັກ. ເຊື່ອມຊຶມ ແລະ ຈັດຕັ້ງປະຕິບັດເປັນຢ່າງດີ ວາລະການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 13 ຂອງຄະນະຊີ້ນໍາຂອງພັກຢູ່ໃນສະພາແຫ່ງຊາດ ກໍຄືບັນດາມະຕິຂອງພັກ ໂດຍຜ່ານການເຄື່ອນໄຫວຕ່າງໆຂອງສະພາແຫ່ງຊາດ, ບັນດາອົງການຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ.
ສອງ, ຍົກສູງຄຸນນະພາບວຽກງານນິຕິບັນຍັດ, ຕອບສະໜອງກັບບັນດາຄວາມຮຽກຮ້ອງຕ້ອງ ການໃນການກໍ່ສ້າງລັດແຫ່ງອໍານາດກົດໝາຍສັງຄົມນິຍົມຂອງປະຊາຊົນ, ໂດຍປະຊາຊົນ, ເພື່ອປະຊາຊົນໃນໄລຍະໃໝ່. ບົນພື້ນຖານການຫັນມະຕິກອງປະຊຸມໃຫຍ່ ຄັ້ງທີ 13 ຂອງພັກໃຫ້ເປັນອັນລະອຽດ, ສະພາແຫ່ງຊາດຕ້ອງໃຫ້ບູລິມະສິດການປະຕິບັດໜ້າທີ່ໃນການສ້າງກົດໝາຍ ເພື່ອສ້າງເປັນພື້ນຖານດ້ານນິຕິກໍາທີ່ເປັນລະບົບຄົບຊຸດ ໃຫ້ແກ່ການສືບຕໍ່ກໍ່ສ້າງ ແລະ ບູລະນະລັດແຫ່ງອໍານາດກົດໝາຍສັງຄົມນິຍົມ; ປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງກົງຈັກລັດຕາມທິດກະທັດຮັດ, ຍົກສູງປະສິດທິພາບ, ປະສິດທິຜົນ. ຍູ້ແຮງການແບ່ງຂັ້ນ, ແບ່ງອໍານາດທີ່ເໝາະສົມ, ຄຽງຄູ່ກັບການເພີ່ມທະວີການຕິດຕາມ, ກວດກາ ແລະ ຄວບຄຸມກວດກາສິດອໍານາດທີ່ແໜ້ນແຟ້ນ. ເສີມຂະຫຍາຍປະຊາທິປະໄຕສັງຄົມນິຍົມ ແລະ ສິດເປັນເຈົ້າຂອງປະຊາຊົນ; ຍູ້ແຮງການປະຕິຮູບຕຸລາການ, ຕ້ານແລະສະກັດກັ້ນການສໍ້ລາດບັງຫຼວງ, ປາກົດການຫຍໍ້ທໍ້ຕ່າງໆ, ເພີ່ມທະວີຄວາມເປັນລະບຽບຮຽບຮ້ອຍ ແລະ ວິໄນໃນສັງຄົມ. ບູລະນະຢ່າງຮອບດ້ານ, ເປັນລະບົບຄົບຊຸດ ດ້ານກົດບັນຍັດໃນການພັດທະນາເສດຖະກິດຕະຫຼາດຕາມທິດສັງຄົມນິຍົມ, ສ້າງສະພາບແວດລ້ອມໃນການລົງທຶນ, ດໍາເນີນທຸລະກິດທີ່ເອື້ອອໍານວຍ, ປອດໃສ, ສະເໝີພາບໃຫ້ແກ່ທຸກພາກສ່ວນເສດຖະກິດ. ຊຸກຍູ້ການຄົ້ນຄວ້າ, ນໍາໃຊ້, ຖ່າຍທອດ, ພັດທະນາວິທະຍາສາດ ແລະ ເຕັກໂນໂລຊີ, ນໍາໃຊ້ຢ່າງແຂງແຮງຕໍ່ຜົນສໍາເລັດຂອງການປະຕິວັດອຸດສາຫະກໍາຄັ້ງທີສີ່, ນະວັດຕະກໍາໃໝ່, ການຫັນປະເທດສູ່ຍຸກດິຈິຕອນ, ການພັດທະນາເສດຖະກິດດິຈິຕອນ, ເສດຖະກິດແຫ່ງການແບ່ງປັນ, ສັງຄົມດິຈິຕອນ, ຊຸກຍູ້ພື້ນຖານເສດຖະກິດໝູນວຽນ, ຂະຫຍາຍຕົວຕາມທິດສີຂຽວ ແລະ ເປີກຄວາມຫຼາກຫຼາຍທາງຊີວະພາບ. ລະດົມ, ຄຸ້ມຄອງ ແລະ ນຳໃຊ້ບັນດາແຫຼ່ງກຳລັງຢ່າງສົມເຫດສົມຜົນ ແລະ ມີປະສິດທິຜົນ ໃນການພັດທະນາ, ໂດຍສະເພາະແມ່ນທີ່ດິນ, ການເງິນ, ການຮ່ວມມືລະຫວ່າງພາກລັດ - ເອກະຊົນ. ສ້າງພື້ນຖານວັດທະນະທໍາທີ່ກ້າວໜ້າ, ເຕັມດ້ວຍເອກະລັກຂອງຊາດ, ພັດທະນາມະນຸດຢ່າງຮອບດ້ານ. ຮັບປະກັນນະໂຍບາຍດ້ານສາທາລະນະສຸກ, ພົນລະເມືອງ, ແຮງງານ, ວຽກເຮັດງານທໍາ, ປະຕິບັດເປັນຢ່າງດີຕໍ່ສະຫວັດດີການສັງຄົມ, ຄວາມສະຫງົບປອດໄພທາງສັງຄົມ. ປົກປ້ອງ, ປົວແປງສິ່ງແວດລ້ອມ, ປັບຕົວເຂົ້າກັບການປ່ຽນແປງສະພາບດິນຟ້າອາກາດ, ຕ້ານ, ສະກັດກັ້ນ, ຫຼຸດຜ່ອນໄພທໍາມະຊາດ. ເພີ່ມທະວີການເຊື່ອມໂຍງສາກົນ, ຮັບປະກັນລັກສະນະຄວາມຖືກຕ້ອງຕາມລັດຖະທໍາມະນູນ, ຄວາມຖືກຕ້ອງຕາມກົດໝາຍ, ລັກສະນະເອກະພາບຂອງລະບົບກົດໝາຍ ແລະ ລັກສະນະຄວາມເໝາະສົມກັບຂໍ້ສັນຍາສາກົນທີ່ຫວຽດນາມເປັນສະມາຊິກ. ປັບປຸງວຽກງານປ້ອງກັນຊາດ, ປ້ອງກັນຄວາມສະຫງົບ, ປົກປັກຮັກສາຄວາມເປັນເອກະລາດ, ອໍານາດອະທິປະໄຕ, ຄວາມເປັນເອກະພາບ ແລະ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ.
ສາມ, ປ່ຽນແປງໃໝ່ ແລະ ຍູ້ແຮງວຽກງານຕິດຕາມກວດກາ ແມ່ນຂອດໃຈກາງ, ເປັນຂໍກຸນແຈ ເພື່ອຍົກສູງປະສິດທິພາບ, ປະສິດທິຜົນການເຄື່ອນໄຫວຂອງສະພາແຫ່ງຊາດ. ແຜນການຕິດຕາມກວດກາຂອງສະພາແຫ່ງຊາດ, ບັນດາອົງການຂອງສະພາແຫ່ງຊາດ ແລະ ສະມາຊິກສະພາແຫ່ງຊາດແຕ່ລະທ່ານ ຕ້ອງຮັບປະກັນລັກສະນະເປັນລະບົບ, ສຳພັນຢ່າງແໜ້ນແຟ້ນ, ມີຈຸດສຸມ, ຈຸດໜັກ, ຕິດແທດກັບບັນດາໜ້າທີ່, ວິທີແກ້ໄຂທີ່ຕັ້ງຂຶ້ນໃນມະຕິຂອງສູນກາງ, ໂດຍສະເພາະແມ່ນກ່ຽວກັບບັນດາບັນຫາໃຫຍ່ໆ, ໄດ້ຮັບຄວາມສົນໃຈ ເຊັ່ນ: ການປ່ຽນແປງໃໝ່ຮູບແບບການຂະຫຍາຍຕົວ, ການຮັກສາສະຖຽນລະພາບເສດຖະກິດມະຫາພາກ, ການສັບຊ້ອນຄືນໃໝ່ໂຄງປະກອບພື້ນຖານເສດຖະກິດ, ການປະຕິບັດບັນດາໂຄງການສໍາຄັນຂອງຊາດ, ການປະຕິຮູບການບໍລິຫານ, ການສັບຊ້ອນ, ກະທັດຮັດກົງຈັກລັດ, ໜ່ວຍງານທຸລະການລັດ; ບັນດາບັນຫາກ່ຽວກັບວັດທະນະທໍາ, ຄວາມສະຫງົບປອດໄພສັງຄົມ; ການເຊື່ອມໂຍງ, ການຮ່ວມມືເສດຖະກິດສາກົນ; ການຮັບປະກັນວຽກງານປ້ອງກັນຊາດ, ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພທາງສັງຄົມ. ບັນດາເນື້ອໃນທີ່ສະພາແຫ່ງຊາດໄດ້ເລືອກຕິດຕາມກວດກາສູງສຸດ ຕ້ອງຖືກຕ້ອງ ແລະ ຕິດແທດກັບບັນດາບັນຫາຟົດຮ້ອນທີ່ສຸດຂອງປະເທດຊາດ, ຕອບສະໜອງຢ່າງທັນການກັບຄວາມຕ້ອງການສັງຄົມ, ຈິດໃຈ, ຄວາມມຸ່ງມາດປາຖະໜາອັນຊອບທໍາຂອງປະຊາຊົນ ແລະ ຜູ້ມີສິດປ່ອນບັດເລືອກຕັ້ງ, ພິເສດແມ່ນຕ້ອງຕິດພັນກັບການປະຕິຮູບກົງຈັກ, ຍົກສູງຄຸນນະພາບພະນັກງານ, ລັດຖະກອນ, ຂ້າລັດຖະການ; ມີຄວາມໂປ່ງໃສໃນການລະດົມ, ນໍາໃຊ້ບັນດາແຫຼ່ງກໍາລັງແຮງຂອງຊາດ ແລະ ຕິດພັນກັບການຕໍ່ສູ້ຕ້ານ, ສະກັດກັ້ນການສໍ້ລາດບັງຫຼວງ ໂດຍມີພັກເປັນຜູ້ນໍາພາ. ການຕິດຕາມກວດກາສູງສຸດຂອງສະພາແຫ່ງຊາດ ກໍຄືການຕິດຕາມກວດກາຂອງບັນດາອົງການຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ ຕ້ອງຊຸກຍູ້ໃຫ້ເກີດປ່ຽນແປງຢ່າງແຂງແຮງຢ່າງແທ້ຈິງ ໃນການປະຕິບັດກົດໝາຍຂອງບັນດາອົງການລັດ ນັບແຕ່ຂັ້ນສູນກາງຈົນຮອດທ້ອງຖິ່ນ, ພິເສດແມ່ນຜູ້ນໍາພາ ຢູ່ໃນບັນດາອົງການ, ໜ່ວຍງານຂັ້ນຕ່າງໆ.
ສີ່, ສືບຕໍ່ປ່ຽນແປງໃໝ່ແບບວິທີພິຈາລະນາ, ຕັດສິນບັນດາບັນຫາສໍາຄັນຂອງປະເທດຊາດ, ແມ່ນໜ້າທີ່ທີ່ມີຄຸນລັກສະນະເປັນໃຈກາງ ແລະ ເປັນປະຈໍາຂອງສະພາແຫ່ງຊາດ. ບໍ່ຢຸດຢັ້ງການປ່ຽນແປງໃໝ່ແບບວິທີການເຄື່ອນໄຫວ ແລະ ຍົກສູງຄຸນນະພາບການຕັດສິນຂອງສະພາແຫ່ງຊາດ ກ່ຽວກັບຈຸດໝາຍ, ລະດັບຄາດໝາຍ, ນະໂຍບາຍ, ໜ້າທີ່ພື້ນຖານໃນການພັດທະນາເສດຖະກິດ - ສັງຄົມໃນໄລຍະຍາວ ແລະ ໃນແຕ່ລະປີຂອງປະເທດ; ແຜນນະໂຍບາຍການລົງທຶນໃນບັນດາແຜນງານທີ່ເປັນຈຸດໝາຍແຫ່ງຊາດ, ໂຄງການສໍາຄັນຂອງຊາດ. ການຍົກສູງຄຸນນະພາບ ແລະ ແບບວິທີການເຄື່ອນໄຫວຂອງສະມາຊິກສະພາແຫ່ງຊາດແຕ່ລະທ່ານ ເປັນປັດໄຈສໍາຄັນທີ່ສຸດ.
ຫ້າ, ຍົກສູງຄຸນນະພາບການຕັດສິນນະໂຍບາຍພື້ນຖານຂອງລັດກ່ຽວກັບການຕ່າງປະເທດ. ສືບຕໍ່ເພີ່ມທະວີການເຄື່ອນໄຫວການຕ່າງປະເທດຂອງສະພາແຫ່ງຊາດ ຕິດພັນກັບການເຄື່ອນໄຫວການຕ່າງປະເທດຂອງພັກ, ການທູດຂອງລັດຖະບານ ແລະ ການຕ່າງປະເທດປະຊາຊົນ, ເພື່ອເສີມຂະຫຍາຍຢ່າງສູງສຸດ ທ່າໄດ້ປຽບຂອງການເຄື່ອນໄຫວການຕ່າງປະເທດລັດຖະສະພາ ກໍຄືປະສິດທິພາບດ້ານກໍາລັງແຮງສັງລວມຂອງຊາດ ໃນການຈັດຕັ້ງຜັນຂະຫຍາຍວຽກງານການຕ່າງປະເທດ. ຍົກລະດັບການຕ່າງປະເທດແບບຫຼາຍຝ່າຍ, ເປັນເຈົ້າການເຂົ້າຮ່ວມ ແລະ ເສີມຂະຫຍາຍບົດບາດຂອງສະພາແຫ່ງຊາດຫວຽດນາມ ໃນບັນດາບັນຫາ ແລະ ບັນດາກົນໄກທີ່ເປັນຂໍກຸນແຈ, ສໍາຄັນ ແລະ ມີລັກສະນະຍຸດທະສາດຂອງບັນດາກົນໄກສໍາພັນລັດຖະສະພາແບບຫຼາຍຝ່າຍໃນພາກພື້ນ ແລະ ສາກົນ, ພ້ອມກັນຫັນສູ່ການຊຸກຍູ້ການເຄື່ອນໄຫວທີ່ເປັນເຈົ້າການ, ຕັ້ງໜ້າໃນການເຊື່ອມໂຍງສາກົນ, ປະກອບສ່ວນຮັກສາສັນຕິພາບ, ສະຖຽນລະພາບ, ຊຸກຍູ້ການເຈລະຈາ ແລະ ການຮ່ວມມື, ຍົກສູງຄວາມໜ້າເຊື່ອຂອງສະພາແຫ່ງຊາດ ແລະ ຖານະບົດບາດຂອງປະເທດຊາດໃນເວທີສາກົນ.
ຫົກ, ສືບຕໍ່ປ່ຽນແປງໃໝ່ການຈັດຕັ້ງຂອງສະພາແຫ່ງຊາດ, ກ່ອນອື່ນໝົດແມ່ນການສ້າງ ແລະ ເສີມຂະຫຍາຍບົດບາດສໍາຄັນຫຼັກແຫຼ່ງຂອງຖັນແຖວສະມາຊິກສະພາແຫ່ງຊາດທີ່ເຄື່ອນໄຫວເຕັມເວລາ, ເພີ່ມຈໍານວນຂອງຜູ້ແທນທີ່ເຄື່ອນໄຫວເຕັມເວລາເທື່ອລະກ້າວໃຫ້ບັນລຸອັດຕາສ່ວນ 40% ຕາມການກໍານົດຂອງກົດໝາຍວ່າດ້ວຍການຈັດຕັ້ງສະພາແຫ່ງຊາດ ປີ 2014, ສະບັບປັບປຸງ, ເພີ່ມເຕີມ ປີ 2020 ເທື່ອລະກ້າວ. ເພີ່ມທະວີບົດບາດຂອງຄະນະກຳມະການປະຈໍາ, ປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງບັນດາອະນຸກໍາມະການໃນສະພາຊົນເຜົ່າ ແລະ ບັນດາຄະນະກໍາມາທິການຂອງສະພາແຫ່ງຊາດ; ກໍານົດຢ່າງເໝາະສົມດ້ານຈໍານວນການນໍາ, ກໍາມະການຜູ້ປະຈໍາການ, ກໍາມະການທີ່ເຄື່ອນໄຫວໜ້າທີ່ສະເພາະ; ຈັດວາງບຸກຄະລະກອນທີ່ເປັນສະມາຊິກທີ່ຮັບການກໍ່ສ້າງດ້ານວິຊາສະເພາະ, ຄວາມອາດສາມາດ ແລະ ບົດຮຽນປະສົບການເຄື່ອນໄຫວໜ້າທີ່ວຽກງານທີ່ສອດຄ່ອງກັບຂົງເຂດເຄື່ອນໄຫວຂອງສະພາຊົນເຜົ່າ, ບັນດາຄະນະກໍາມາທິການຂອງສະພາແຫ່ງຊາດ. ປັບປຸງ, ບູລະນະການຈັດຕັ້ງ ແລະ ການເຄື່ອນໄຫວຂອງຄະນະເລຂາທິການສະພາແຫ່ງຊາດ, ສືບຕໍ່ປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງຫ້ອງການສະພາແຫ່ງຊາດ ແລະ ບັນດາອົງການເສນາທິການ, ຊ່ວຍວຽກຂອງສະພາແຫ່ງຊາດ, ຄະນະກຳມະການປະຈໍາສະພາແຫ່ງຊາດ ຕາມທິດຫັນເປັນມືອາຊີບ, ທັນສະໄໝ, ເຄື່ອນໄຫວມີປະສິດທິພາບ ແລະ ປະສິດທິຜົນ.
ປັບປຸງ, ບູລະນະແບບວິທີການເຄື່ອນໄຫວ, ແບບແຜນວິທີເຮັດວຽກຂອງສະພາແຫ່ງຊາດຢ່າງແຂງແຮງ. ປັບປຸງ, ເພີ່ມເຕີມ, ບູລະນະບັນດາເອກະສານກົດໝາຍວ່າດ້ວຍການເຄື່ອນໄຫວຂອງສະ ພາແຫ່ງຊາດ ເຊັ່ນ: ລະບຽບພາຍໃນການປະຊຸມຂອງສະພາແຫ່ງຊາດ; ລະບຽບການດຳເນີນງານຂອງຄະນະປະຈຳສະພາແຫ່ງຊາດ, ສະພາຊົນເຜົ່າ ແລະ ບັນດາຄະນະກໍາມາທິການ ຂອງສະພາແຫ່ງຊາດ; ບັນດາເອກະສານວ່າດ້ວຍການຮັບຕ້ອນພົນລະເມືອງ, ພົບປະຜູ້ມີສິດປ່ອນບັດເລືອກຕັ້ງ, ການແກ້ໄຂຄໍາຮ້ອງທຸກ, ຄໍາຮ້ອງຟ້ອງ…, ສ້າງກອບກົດໝາຍໃຫ້ແກ່ການເຄື່ອນໄຫວຂອງສະພາແຫ່ງຊາດ, ບັນດາອົງການຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ ຕາມທິດເສີມຂະຫຍາຍປະຊາທິປະໄຕ, ເປັນມືອາຊີບເທື່ອລະກ້າວ, ສ້າງຖານະບົດບາດເປັນໃຈກາງຂອງສະມາຊິກສະພາແຫ່ງຊາດ. ສືບຕໍ່ສ້າງການຫັນປ່ຽນຢ່າງແຂງແຮງໃນການເຄື່ອນໄຫວຂອງສະພາແຫ່ງຊາດ ນັບແຕ່ກົນໄກ “ການປະກອບຄໍາເຫັນ” ໄປສູ່ກົນໄກ “ສົນທະນາ ແລະ ໂຕ້ວາທີ”. ກໍານົດສາຍພົວພັນ ແລະ ຄວາມຮັບຜິດຊອບລະຫວ່າງບັນດາອົງການຕ່າງໆຂອງສະພາແຫ່ງຊາດ, ຈັດແຍກບົດບາດຂອງໝູ່ຄະນະ ແລະ ເສີມຂະຫຍາຍລັກສະນະຄວາມເປັນເຈົ້າການ, ຕັ້ງໜ້າ, ຄວາມຮັບຜິດຊອບສ່ວນບຸກຄົນ ຂອງສະມາຊິກສະພາແຫ່ງຊາດແຕ່ລະທ່ານ. ຫັນເປັນອັນລະອຽດ ແລະ ມີກົນໄກຈັດຕັ້ງປະຕິບັດຢ່າງມີປະສິດທິຜົນບົນພຶດຕິກໍາຕົວຈິງໃນສິດຂອງສະມາຊິກສະພາແຫ່ງຊດ ເຊັ່ນ: ສິດນໍາສະເໜີແຜນສ້າງກົດໝາຍ, ລັດຖະດໍາລັດ ແລະ ການສະເໜີກົດໝາຍ, ລັດຖະດໍາລັດ; ສິດສະເໜີການປ່ອນບັດໄວ້ວາງໃຈ ແລະ ບັນດາສິດທິຕ່າງໆ ຕາມຂໍ້ກໍານົດຂອງກົດໝາຍວ່າດ້ວຍການຈັດຕັ້ງສະພາແຫ່ງຊາດ ປີ 2014, ສະບັບປັບປຸງ, ເພີ່ມເຕີມ ປີ 2020. ສ້າງກົນໄກເພື່ອໃຫ້ສະມາຊິກສະພາແຫ່ງຊາດ ໄດ້ຕິດພັນຢ່າງແໜ້ນແຟ້ນ ແລະ ມີຄວາມຮັບຜິດຊອບຕໍ່ຜູ້ມີສິດປ່ອນບັດເລືອກຕັ້ງ, ໂດຍສະເພາະແມ່ນຜູ້ມີສິດປ່ອນບັດເລືອກຕັ້ງຢູ່ຫົວໜ່ວຍການເລືອກຕັ້ງ. ຍົກສູງປະສິດທິຜົນການພົບປະຜູ້ມີສິດປ່ອນບັດເລືອກຕັ້ງ, ການຮັບຕ້ອນພົນລະເມືອງ, ການແກ້ໄຂຄໍາຮ້ອງທຸກ, ຄໍາຮ້ອງຟ້ອງ, ຄໍາສະເໜີຂອງພົນລະເມືອງ, ຄໍາຄິດເຫັນ, ຂໍ້ສະເໜີຂອງຜູ້ມີສິດປ່ອນບັດເລືອກຕັ້ງ. ຄະນະກໍາມະການປະຈໍາສະພາແຫ່ງຊາດ ຕ້ອງໄດ້ເອົາໃຈໃສ່, ເພີ່ມທະວີການຊີ້ນໍາ, ແນະນໍາ, ຕິດຕາມກວດກາການເຄື່ອນໄຫວຂອງສະພາປະຊາຊົນແຂວງ, ນະຄອນທີ່ຂຶ້ນກັບສູນກາງ. ຫັນເປັນອັນລະອຽດບັນດາຂໍ້ກໍານົດຂອງກົດໝາຍວ່າດ້ວຍການແນະນໍາ, ຕິດຕາມກວດກາການເຄື່ອນໄຫວຂອງສະພາປະຊາຊົນ, ຖືສໍາຄັນວຽກງານບໍາລຸງ, ຍົກສູງລະດັບຄວາມຮູ້ ແລະ ຄວາມຊໍານິຊໍານານໃນການເຄື່ອນໄຫວຂອງຜູ້ແທນສະພາປະຊາຊົນແຕ່ລະຂັ້ນ.
ເຈັດ, ເພີ່ມທະວີບັນດາເງື່ອນໄຂຮັບປະກັນການເຄື່ອນໄຫວຂອງສະພາແຫ່ງຊາດ, ຂອງສະມາຊິກສະພາແຫ່ງຊາດ, ໂດຍສະເພາະແມ່ນຕໍ່ກັບບັນດາສະມາຊິກຜູ້ແທນທີ່ເຄື່ອນໄຫວເຕັມເວລາ; ມີກົນໄກເພື່ອດຶງດູງຖັນແຖວນັກຊ່ຽວຊານ, ບັນດານັກວິທະຍາສາດໃຫ້ເຂົ້າຮ່ວມ, ປະກອບສ່ວນໃຫ້ແກ່ການເຄື່ອນໄຫວຂອງສະພາແຫ່ງຊາດ. ຖືສໍາຄັນການນໍາໃຊ້ເຕັກໂນໂລຊີຂໍ້ມູນຂ່າວສານ, ສືບຕໍ່ກໍ່ສ້າງສະພາແຫ່ງຊາດເອເລັກໂຕຣນິກ. ເພີ່ມທະວີຂໍ້ມູນຂ່າວສານມວນຊົນ, ຍູ້ແຮງການເຄື່ອນໄຫວຂອງບັນດາອົງການຂ່າວສານ, ໜັງສືພິມ ໃນການສະເໜີຂ່າວກ່ຽວກັບສະພາແຫ່ງຊາດ ໄປເຖິງຜູ້ມີສິດປ່ອນບັດເລືອກຕັ້ງເປັນຈຳນວນຫຼວງຫຼາຍ ແລະ ສ່ອງແສງຄໍາຄິດເຫັນ, ຂໍ້ສະເໜີຂອງຜູ້ມີສິດປ່ອນບັດເລືອກຕັ້ງມາຍັງສະພາແຫ່ງຊາດ./.
-------------------
(1) ເບິ່ງ: ລາຍງານສະບັບເລກທີ 751/ລງ-ສລຕຊ, ລົງວັນທີ 11-6-2021, “ວ່າດ້ວຍຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2021 - 2026 ຂອງຄະນະກໍາມະການເລືອກຕັ້ງລະດັບຊາດ”.
(2) ປະກອບມີ: ຄະນະກໍາມະການເລືອກຕັ້ງຂັ້ນແຂວງ 63 ຄະນະ; ຄະນະກໍາມະການເລືອກຕັ້ງຂັ້ນເມືອງ 682 ຄະນະ; ຄະນະກໍາມະການເລືອກຕັ້ງຂັ້ນຕາແສງ 10.134 ຄະນະ; ຄະນະກໍາມະການເລືອກຕັ້ງສະມາຊິກສະພາແຫ່ງຊາດ 184 ຄະນະ; ຄະນະກໍາມະການເລືອກຕັ້ງຜູ້ແທນສະພາປະຊາຊົນຂັ້ນແຂວງ 1.059 ຄະນະ; ຄະນະກໍາມະການເລືອກຕັ້ງຜູ້ແທນສະພາປະຊາຊົນຂັ້ນເມືອງ 6.188 ຄະນະ; ຄະນະກໍາມະການຜູ້ແທນສະພາປະຊາຊົນຂັ້ນຕາແສງ 69.619 ຄະນະ ແລະ ໜ່ວຍເລືອກຕັ້ງ 84.767 ໜ່ວຍ.
(3) ການເລືອກຕັ້ງສະມາຊິກສະພາແຫ່ງຊາດ ຊຸດທີ 14 ແລະ ຜູ້ແທນສະພາປະຊາຊົນແຕ່ລະຂັ້ນສະໄໝປີ 2016 - 2021 ເຊິ່ງມີຜູ້ມີສິດປ່ອນບັດເລືອກຕັ້ງທົ່ວປະເທດທັງໝົດ 67.485.482 ຄົນ; ຜູ້ມີສິດປ່ອນບັດເລືອກຕັ້ງທີ່ໄດ້ເຂົ້າຮ່ວມການປ່ອນບັດເລືອກຕັ້ງ ແມ່ນ 67.049.091 ຄົນ (ບັນລຸ 99,35%).
(4) ສໍານັກພິມຈຳໜ່າຍ ການເມືອງແຫ່ງຊາດ - ສື້ເຖິ້ດ, ຮ່າໂນ້ຍ, ປີ 2011, ໜ້າ 84.
(5) ຫງວຽນຝູຈ້ອງ: “ບາງບັນຫາທິດສະດີ ແລະ ພຶດຕິກໍາກ່ຽວກັບລັດທິສັງຄົມນິຍົມ ແລະ ເສັ້ນທາງກ້າວຂຶ້ນສັງຄົມນິຍົມຢູ່ຫວຽດນາມ”, ວາລະສານກອມມູນິດ, ສະບັບທີ 966, ເດືອນ 5 ປີ 2021, ໜ້າ 9.
(6) ສະໄໝສະພາແຫ່ງຊາດ ຊຸດທີ 14, ສະມາຊິກຜູ້ແທນທີ່ມີລະດັບເໜືອມະຫາວິທະຍາໄລ 310 ທ່ານ (ກວມເອົາ 62,50%), ສະມາຊິກຜູ້ແທນທີ່ມີລະດັບການສຶກສາໃນລະດັບປະລິນຍາຕີ 180 ທ່ານ (ກວມເອົາ 36,30%) ແລະ ມີລະດັບການສຶກສາຕໍ່າກວ່າປະລິນຍາຕີ ມີ 6 ທ່ານ (ກວມເອົາ 1,20%).
(7) ເບິ່ງ: ຄໍາສັ່ງ ສະບັບເລກທີ 45-ຄສ/ສກພ, ລົງວັນທີ 20 ມິຖຸນາ 2020, ຂອງກົມການເມືອງ, “ວ່າດ້ວຍການນໍາພາການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ການເລືອກຕັ້ງຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2021 - 2026”.
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 13, ສພຈ ການເມືອງແຫ່ງຊາດ - ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 176.
(9) ເບິ່ງ: ລາຍງານສະບັບເລກທີ 751/ລງ-ສລຕຊ, ລົງວັນທີ 11 ມິຖຸນາ 2021, “ວ່າດ້ວຍຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2021 - 2026 ຂອງສະພາການເລືອກຕັ້ງແຫ່ງຊາດ”.
(10) ໃນການເລືອກຕັ້ງສະມາຊິກສະພາແຫ່ງຊາດ ຊຸດທີ 14 ແລະ ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2016 - 2021, ອັດຕາສ່ວນເໝາະສົມແມ່ນ 33,34% ຢູ່ຂັ້ນແຂວງ; 32,79% ຢູ່ຂັ້ນເມືອງ; 44,75% ຢູ່ຂັ້ນຕາແສງ.
(11) ໃນການເລືອກຕັ້ງສະມາຊິກສະພາແຫ່ງຊາດ ຊຸດທີ 14 ແລະ ຜູ້ແທນສະພາປະຊາຊົນແຕ່ລະຂັ້ນ ສະໄໝປີ 2016 - 2021, ຕ້ອງໄດ້ເລືອກຕັ້ງເພີ່ມເຕີມຜູ້ແທນສະພາປະຊາຊົນຂັ້ນເມືອງ 3 ທ່ານ ແລະ ຜູ້ແທນສະພາປະຊາຊົນຂັ້ນຕາແສງ 1.285 ທ່ານ.
(12) ເອກະສານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 13, ປຶ້ມໄດ້ແນະນໍາ, ເຫຼັ້ມ 1, ໜ້າ 175.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 971 (ເດືອນສິງຫາ 2021)