ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄປຢ້ຽມຢາມປະເທດຣູມານີ ແລະ ປະເທດສາທາລະນະລັດເຊັກ ຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມຄຳເຊີນ ຂອງນາຍົກລັດຖະມົນຕີຣູມານີ ວີໂອຣິກາ ແດນຊີລາ ແລະ ຂອງນາຍົກລັດຖະມົນຕີສາທາລະນະລັດເຊັກ ອານໄດຣ ບາບິດ, ນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນຂັ້ນສູງຂອງລັດຖະບານຫວຽດນາມ ໄດ້ດຳເນີນການຢ້ຽມຢາມປະເທດຣູມານີ ແລະ ປະເທດສາທາລະນະລັດເຊັກ ຢ່າງເປັນທາງການ ໃນລະຫວ່າງວັນທີ 14 - 17 ເມສາ 2019.
ໃນການຢ້ຽມຢາມ 4 ວັນຢູ່ 2 ປະເທດ, ນາຍົກລັດຖະມົນຕີຫວຽດນາມ ຫງວຽນຊວັນຝຸກ ມີໂຄງການເຮັດວຽກທີ່ໜັກພ້ອມກິດຈະການທີ່ຫຼາກຫຼາຍເກືອບ 30 ລາຍການໃນບັນດາຂົງເຂດ, ເຊັ່ນ: ບັນດາການພົບປະເຈລະຈາ, ການປະຊຸມກັບຜູ້ນຳຂັ້ນສູງຂອງສອງປະເທດ; ພົບປະກັບວົງການນັກທຸລະກິດແລະນັກລົງທຶນ, ພົບປະກັບຊາວຫວຽດນາມຕ່າງດ້າວ, ໄປຢ້ຽມຢາມແລະເຮັດວຽກຢູ່ທ້ອງຖິ່ນຕ່າງໆ ຂອງສອງປະເທດດັ່ງກ່າວ. ບັນດາການພົບປະເຈລະຈາ, ການປະຊຸກປຶກສາຫາລືໄດ້ດຳເນີນຢ່າງຈິງໃຈ, ກົງໄປກົງມາ, ມີປະສິດທິຜົນ, ເຂົ້າສູ່ເນື້ອແທ້ຕົວຈິງ, ຊຸກຍູ້ການພົວພັນທີ່ດີງາມລະຫວ່າງຫວຽດນາມ ກັບ ຣູມານີ ແລະສາທາລະນາລັດເຊັກ.
ການຢ້ຽມຢາມປະເທດຣູມານີ ແມ່ນການຢ້ຽມຢາມເປັນທາງການຄັ້ງທຳອິດ ຂອງນາຍົກລັດຖະມົນຕີຫວຽດນາມ ນັບແຕ່ປີ 1977. ໃນການພົບປະເຈລະຈາກັບນາຍົກລັດຖະມົນຕີ ວີໂອຣິກາ ແດນຊີລາ, ນາຍົກລັດຖະມົນຕີທັງສອງໃຫ້ທັດສະນະວ່າ ສອງປະເທດມີທ່າແຮງສຳລັບການຮ່ວມມືຢ່າງໃຫຍ່ຫຼວງ ແລະ ສອງປະເທດຄວນເພີ່ມທະວີ ຊຸກຍູ້ການຮ່ວມມືໃນບັນດາຂົງເຂດທີ່ຕົນມີທ່າແຮງແລະມີຄວາມຕ້ອງການ. ນາຍົກລັດຖະມົນຕີທັງສອງຕີລາຄາສູງ ການຮ່ວມມືລະຫວ່າງທ້ອງຖິ່ນຂອງສອງປະເທດໃນເວລາທີ່ຜ່ານມາ; ຖືວ່າ ນີ້ເປັນທິດທາງການຮ່ວມມືໃໝ່ ທີ່ອີງໃສ່ການພົວພັນມິດຕະພາບທີ່ມີຄວາມສາມາດພັດທະນາເປັນຢ່າງດີ; ສອງຝ່າຍຄວນປະສານສົມທົບການຜັນຂະຫຍາຍບັນດາໂຄງການຮ່ວມມືຕົວຈິງ, ແທດເໝາະ ແລະ ມີປະສິດທິຜົນ. ນາຍົກລັດຖະມົນຕີທັງສອງເຫັນດີເປັນເອກະພາບ ຈະເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ, ຜັນຂະຫຍາຍຢ່າງມີປະສິດທິຜົນ ບັນດາກົນໄກການຮ່ວມມືສອງຝ່າຍທີ່ມີຢູ່, ໂດຍສະເພາະແມ່ນ ຄະນະກຳມາທິການປະສົມກ່ຽວກັບການຮ່ວມມືທາງດ້ານເສດຖະກິດ ແລະ ເຫັນດີເປັນເອກະພາບຈະຈັດຕັ້ງກອງປະຊຸມຄັ້ງທີ 16 ໃນກາງປີ 2019.
ນາຍົກລັດຖະມົນຕີ ວີໂອຣິກາ ແດນຊີລາ ຢືນຢັນວ່າ ຣູມານີໃນຖານະປະທານສະຫະພາບເອີຣົບ ໃນ 6 ເດືອນຕົ້ນປີ 2019, ຈະເຮັດຈົນສຸດຄວາມສາມາດຂອງຕົນແລະດຳເນີນບາດກ້າວທີ່ຈຳເປັນຕ່າງໆ ເພື່ອຊຸກຍູ້ໃຫ້ມີການຮັບຮອງຜ່ານໂດຍໄວ ສັນຍາ EVFTA ແລະລົງນາມໃນສັນຍາ EVIPA ລະຫວ່າງຫວຽດນາມແລະສະຫະພາບເອີຣົບ.
ໃນການຢ້ຽມຢາມປະເທດສາທາລະນະລັດເຊັກຢ່າງເປັນທາງການ, ນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ພົບປະເຈລະຈາກັບ ນາຍົກລັດຖະມົນຕີສາທາລະນະລັດເຊັກ ອານໄດຣ ບາບິດ. ສອງຝ່າຍໄດ້ເຫັນດີເປັນເອກະສັນ ຈະສົມທົບຊຸກຍູ້ການຮ່ວມມືສອງຝ່າຍໃນຫຼາຍຂົງເຂດ, ໂດຍສະເພາະກ່ຽວກັບການສຶກສາ-ຝຶກອົບຮົມ, ກະສິກຳ, ວິທະຍາສາດເຕັກໂນໂລຊີ, ສິ່ງອວດລ້ອມ, ວັດທະນະທຳ-ການທ່ອງທ່ຽວ, ສະໜັບສະໜູນການເປີດໂດຍໄວ ສາຍການບິນໂດຍກົງລະຫວ່າງຮ່າໂນ້ຍ - ປຣາຮາ.
ສອງຝ່າຍເປັນເອກະພາບຈະສືບຕໍ່ຜັນຂະຫຍາຍຢ່າງມີປະສິດທິຜົນ ກົນໄກຄະນະກຳມະການລະຫວ່າງລັດຖະບານຫວຽດນາມ-ເຊັກ ກ່ຽວກັບການຮ່ວມມືທາງດ້ານເສດຖະກິດ; ສົ່ງເສີມແລະອຳນວຍຄວາມສະດວກໃຫ້ວິສາຫະກິດຂອງສອງປະເທດ ເພີ່ມທະວີການຕິດຕໍ່, ການເຊື່ອມຕໍ່ຄູ່ຮ່ວມງານ, ເຂົ້າຮ່ວມງານວາງສະແດງສິນຄ້າ ແລະ ການສຳມະນາຂອງກັນແລະກັນ…
ນາຍົກລັດຖະມົນຕີ ອານໄດຣ ບາບິດ ເນັ້ນວ່າ, ເປັນເພື່ອນສະໜິດສະໜົມຂອງຫວຽດນາມ ພ້ອມທັງເປັນສະມາຊິກທີ່ຫ້າວຫັນຂອງສະຫະພາບເອີຣົບ, ສາທາລະນະລັດເຊັກສະໜັບສະໜຸນການເພີ່ມທະວີການພົວພັນລະຫວ່າງຫວຽດນາມແລະສະຫະພາບເອີຣົບ, ໂດຍສະເພາະ ຈະຊຸກຍູ້ໃຫ້ສະຫະພາບເອີຣົບ ສຳເລັດເສັດສິ້ນຂັ້ນຕອນການລົງນາມໃນ EVFTA ແລະ EVIPA ໂດຍໄວໃນເວລາ ເດືອນໜຶ່ງ ຫຼືສອງເດືອນໜ້າ.
ນາຍົກລັດຖະມົນຕີ ຫງວຽນຊວັນຝຸກ ຕີລາຄາສູງຕໍ່ການທີ່ສາທາລະນະລັດເຊັກສະໜັບສະໜູນການໃຫ້ສັດຕະຍາບັນໂດຍໄວໃນ EVFTA ແລະການລົງນາມໃນ EVIPA. ນີ້ແມ່ນບັນດາສັນຍາທີ່ມີຄວາມສຳຄັນລະດັບຍຸດທະສາດ ກ່ຽວກັບການຮ່ວມມືທາງດ້ານເສດຖະກິດ-ການຄ້າ ລະຫວ່າງສະຫະພາບເອີຣົບແລະຫວຽດນາມ, ພິເສດແມ່ນຊ່ວຍໃຫ້ວິສາຫະກິດຂອງເຊັດແລະອີຢູ ໃນການເຂົ້າເຖິງຕະຫຼາດທີ່ມີຫຼາຍກວ່າ 90 ລ້ານຄົນ ແລະ ໄດ້ເປີດປະຕູໃຫ້ຄວາມສະດວກແກ່ການຮ່ວມມືໃນຫຼາຍຂົງເຂດ.
ໃນບັນດາການພົບປະເຈລະຈາສອງຝ່າຍກັບຣູມານີແລະສາທາລະນາລັດເຊັກ, ສອງຝ່າຍໄດ້ເຫັນດີວ່າ ຕ້ອງການກະກຽມເປັນຢ່າງດີໃຫ້ແກ່ການສະເຫຼີມສະຫຼອງ 70 ປີແຫ່ງການສ້າງຕັ້ງການພົວພັນທາງການທູດລະຫວ່າງຫວຽດນາມ ກັບຣູມານີ ແລະ ກັບສາທາລະນະລັດເຊັກ (1950-2020). ສອງຝ່າຍກໍໄດ້ແລກປ່ຽນກ່ຽວກັບບັນດາບັນຫາສາຫົນ ແລະພາກພື້ນທີ່ມາຄວາມສົນໃຈຮ່ວມກັນ, ເປັນເອກະສັນເນັ້ນຢ້ຳຄວາມສຳຄັນຂອງການຮັກສາສັນຕິພາບແລະຄວາມໝັ້ນຄົງ, ຊຸກຍູ້ການຮ່ວມມືແລະການພັດທະນາໃນໂລກ, ຮັບປະກັນຄວາມໝັ້ນຄົງ, ຄວາມປອດໄພ ແລະ ເສລີພາບໃນການເດີນທະເລແລະການບິນຢູ່ທະເລຕາເວັນອອກ, ແກ້ໄຂຂໍ້ພິພາດຂັດແຍ່ງດ້ວຍສັນຕິວິທີ, ບົນພື້ນຖານກົດໝາຍສາກົນ ໃນນັ້ນມີອະນຸສັນຍາສະຫະປະຊາຊາດກ່ຽວກັບກົດໝາຍທະເລປີ 1982 (UNCLOS 1982).
ບັນດາຜູນຳຂອງຣູມານີແລະສາທາລະນະລັດເຊັກ ລ້ວນແຕ່ຕີລາຄາສູງຕໍ່ຊຸມຊົນຊາວຫວຽດນາມທີ່ໄດ້ຮວມເຂົ້າກັບສັງຄົມທ້ອງຖິ່ນ, ມີສ່ວນຮ່ວມໃນການພັດທະນາເສດຖະກິດແລະສັງຄົມຂອງປະເທດເຈົ້າບ້ານ. ສອງຝ່າຍໃຫ້ທັດສະນະວ່າ ຈຳນວນຫຼວງຫຼາຍຂອງນັກຮຽນເກົ່າແລະນັກສຶກສາຫວຽກນາມທີ່ໄດ້ຮຽນຢູ່ຣູມານີແລະສາທາລະນະລັດເຊັກ ເປັນຂໍ້ໄດ້ປຽບທີ່ຍິ່ງໃຫຍ່ ເປັນປັດໄຈສຳຄັນທີ່ຈະຊ່ວຍເຊື່ອມໂຍງຫວຽດນາມກັບທັງສອງປະເທດນີ້.
ຫຼັງຈາກການເຈລະຈາ ທັງສອງຝ່າຍໄດ້ເປັນສັກຂີພະຍານພິທີລົງນາມໃນເອກະສານການຮ່ວມມືຈຳນວນໜຶ່ງ: ບົດບັນທຶກຄວາມຈຳກ່ຽວກັບການຮ່ວມມືໃນຂົງເຂດກະສິກຳ, ສັດຕະວະແພດ ແລະ ຄວາມປອດໄພທາງດ້ານອາຫານ ລະຫວ່າງຫວຽດນາມແລະຣູມານີ; ບັນດາບົດບັນທຶກຄວາມຈຳກ່ຽວກັບການຮ່ວມມືໃນຂົງເຂດທໍລະນີວິທະຍາ, ແຮ່ທາດ, ມາດຕະຖານ, ການວັດແທກ ແລະ ຄຸນນະພາບ ລະຫວ່າງຫວຽດນາມແລະສາທາລະນະລັດເຊັກ. ບົນພື້ນຖານຜົນສຳເລັດຂອງການຢ້ຽມຢາມ, ຫວຽດນາມແລະຣູມານີ, ຫວຽດນາມແລະສາທາລະນະລັດເຊັກ ໄດ້ອອກຖະແຫຼງການຮ່ວມ.
ນາຍົກລັດຖະມົນຕີ ຫງວຽນຊວັນຝຸກ ໄດ້ເຂົ້າຮ່ວມບັນດາເວທີປາໄສຫວຽດນາມແລະຣູມານີ, ເວທີປາໄສຫວຽດນາມແລະສາທາລະນະລັດເຊັກ ຊຶ່ງທ່ານໄດ້ເນັ້ນວ່າ ລັດຫວຽດນາມສ້າງສະພາບແວດລ້ອມການລົງທຶນທີ່ສະດວກດີໃຫ້ແກ່ວິສາຫະກິດ, ສ່ວນວິສາຫະກິດເອງເປັນຜູ້ຕັດສິນຂະໜາດແລະແບບວິທີການຮ່ວມມື, ໂດຍສະເພາະໃນເມື່ອຫວຽດນາມໄດ້ເຂົ້າຮ່ວມໃນ 12 ສັນຍາການຄ້າເສລີ ແລະ ມຸ່ງໄປສູ່ການເຊັນ EVFTA. ນາຍົກລັດຖະມົນຕີ ຫງວຽນຊວັນຝຸກ ໄດ້ວາງຫຼາຍບັນຫາ, “ບົດເລກ” ອອກມາ ເພື່ອຊຸກຍູ້ການຮ່ວມມືເຊັ່ນ ຍ້ອນເຫດໃດຈຳນວນແຮງງານຫວຽດນາມໄປເຮັດວຽກຢູ່ຣູມານີຍັງໜ້ອຍ ໃນເມື່ອຄວາມຕ້ອງການແຮງານຂອງຣູມານີມີຫຼາຍ; ເປັນຫຍັງໝາກໄມ້ເຂດຮ້ອນແລະອາຫານທະເລຂອງຫວຽດນາມຍັງບໍ່ທັນເຂົ້າເຖິງຕະຫຼາດຣູມານີ ໃນເວລາທີ່ກະສິກຳເຂດຮ້ອນຂອງຫວຽດນາມບໍ່ໄດ້ແຂ່ງຂັນກັບກະສິກຳເຂດອົບອຸ່ນຂອງຣູມານີ. ຍ້ອນເຫດໃດຈຳນວນນັກທ່ອງທ່ຽວລະຫວ່າງສອງປະເທດຍັງໜ້ອຍຫຼາຍ. ອາດຈະເຊື່ອມຕໍ່ໂດຍກົງລະຫວ່າງບູຄາເຣດ ກັບນະຄອນໂຮ່ຈີມິນແລະຮ່າໂນ້ຍ ໄດ້ຫຼືບໍ່?. ນາຍົກລັດຖະມົນຕີ ຫງວຽນຊວັນຝຸກ ຫວັງວ່າ ຈາກເວທີປາໄສນີ້ ບັນດາວິສາຫະກິດຈະຕິດຕໍ່ແລກປ່ຽນນຳກັນ, ຊອກຫາໂອກາດການຮ່ວມມື. ຫວຽດນາມສະແດງຄວາມຊົມເຊີຍແລະໃຫ້ຄຳໝັ້ນສັນຍາຈະສ້າງເງື່ອນໄຂອຳນວຍຄວາມສະດວກໃຫ້ບັນດາວິສາຫະກິດລົງທຶນເຂົ້າຫວຽດນາມ, ໂດຍສະເພາະແມ່ນບັນດາຂົງເຂດທີ່ຣູມານີແລະສາທາລະນະລັດເຊັກ ມີທ່າແຮງ.
ນາຍົກລັດຖະມົນຕີ ຫງວຽນຊວັນຝຸກ ກໍໄດ້ເປັນສັກຂີພະຍາມໃນພິທີເຊັນເອກະສານຕ່າງໆ: ບົດບັນທຶກຄວາມຈຳກ່ຽວກັບການຮ່ວມມືລະຫວ່າງສະພາຫໍການຄ້າແລະອຸດສາຫະກຳຫວຽດນາມ ແລະ ຣູມານີ; ລະຫວ່າງສະພາຫໍການຄ້າແລະອຸດສາຫະກຳຫວຽດນາມ ກັບ ສະຫະພັນອຸດສາຫະກຳແລະການຂົນສົ່ງ ແຫ່ງສາທາລະນະລັດເຊັກ ແລະ ບາງເອກະສານການຮ່ວມມືລະຫວ່າງວິສາຫະກິດຂອງຫວຽດນາມ ແລະ ຂອງສາທາລະນະລັດເຊັກ. ໃນຂອບເຂດການຢ້ຽມຢາມ, ນາຍົກລັດຖະມົນຕີ ຫງວຽນຊວັນຝຸກ ໄດ້ໄປຢ້ຽມຢາມຖາມຂ່າວແລະປຸກລະດົມກຳລັງໃຈຂອງຊຸມຊົນຊາວຫວຽດນາມຢູ່ຣູມານີ ແລະ ສາທາລະນະລັດເຊັກ, ພົບປະກັບສະຫະພັນສະມາຄົມຊາວຫວຽດນາມຢູ່ເອີຣົບ (ຕາງໜ້າຊຸມຊົນຊາວຫວຽດນາມຢູ່ 17 ປະເທດໃນເອີຣົບ).
ການຢ້ຽມຢາມຣູມານີແລະສາທາລະນະລັດເຊັກຢ່າງເປັນທາງການຂອງນາຍົກລັດຖະມົນຕີ ຫງວຽນຊວັນຝຸກ ແລະ ຄະນະຜູ້ແທນຂັ້ນສູງລັດຖະບານຫວຽດນາມ ໄດ້ຮັບຄວາມສຳເລັດຢ່າງດີງາມ, ປະກອບສ່ວນສືບຕໍ່ແລະຊຸກຍູ້ການພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງຫວຽດນາມແລະບັນດາປະເທດເພື່ອນມິດໃນເອີຣົບຕາເວັນອອກ, ສ້າງແຮງຊຸກດັນໃໝ່ເພື່ອສົ່ງເສີມການພົວພັນທະວິພາຄີໃນທຸກຂົງເຂດ./.
ໂດຍ ຫງວຽນດຶກ