ວກ.ອອນ​ໄລ - ​ໃນ​ການ​ຢ້ຽມຢາມ​ສາມ​ປະ​ເທດ​ຢ່າງ​ເປັນ​ທາງ​ການ ​ແຕ່​ວັນ​ທີ 20 ຫາ​ວັນ​ທີ 28 ພຶດສະພາ 2019, ນາ​ຍົກລັດຖະມົນຕີ​ຫວຽດນາມ ຫງວຽນ​ຊວັນ​ຝຸກ ​ໄດ້​ປະຕິບັດ​ໂຄງການ​ເຮັດ​ວຽກ​ທີ່​ປະກອບ​ດ້ວຍ​ການ​ເຄື່ອນ​ໄຫວ​ຫຼາຍ​ກວ່າ 50 ກິດຈະການ​ເຊັ່ນ: ບັນດາ​ການ​ເຈລະຈາ, ການ​ພົບ​ປະ​ຫາລື​ກັບ​ຜູ້ນຳ​ລະດັບ​ສູງ​ຂອງ​ສາມ​ປະ​ເທດ; ​ເຂົ້າຮ່ວມບັນດາ​ເວທີ​ປາ​ໄສ​ການ​ທຸລະ​ກິດ, ພົບ​ປະ​ກັບ​ນັກ​ລົງທຶນ, ພົບ​ປະ​ໂອ້​ລົມ​ກັບ​ຊາວ​ຫວຽດນາມ​ຢູ່​ສາມປະ​ເທດ​ດັ່ງກ່າວ, ຢ້ຽມຢາມ​ແລະ​ເຮັດ​ວຽກ​ຢູ່​ທ້ອງ​ຖິ່ນ​ຕ່າງໆ; ຢ້ຽມຢາມ​ບາງ​ພື້ນ​ຖານ​ການ​ຜະລິດ, ສູນ​ເຕັກ​ໂນ​ໂລ​ຊີ​ສູງຂອງ​ວິ​ສາ​ຫະກິດ, ກຸ່ມ​ບໍລິສັດ​ຂະໜາດ​ໃຫຍ່; ພົບ​ປະ​​ສະ​ແດງ​ຄວາມ​ຂອບ​ໃຈ​ຕໍ່​ເພື່ອນ​ຊາວ​ລັດ​ເຊຍ​ແລະ​ຊາວຊູ​ແອດທີ່​ມີ​ການ​ປະກອບສ່ວນ​ຫຼາຍ​ຢ່າງ​ໃນ​ພາລະກິດ​ການ​ຕໍ່ສູ້​ປົກ​ປັກ​ຮັກສາ​ປະ​ເທດ​ຫວຽດນາມ.

ນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະພັນລະຍາ.

ຢູ້​ໃນ​ແຕ່ລະ​ປະ​ເທດ, ບັນດາ​ການ​ເຈລະຈາ, ການ​ພົບ​ປະ​ຫາລື​ໄດ້​ຈັດ​ຂຶ້ນ​ຢ່າງ​ກົງ​ໄປ​ກົງ​ມາ, ຈິງ​ໃຈ, ມີ​ປະສິດທິ​ຜົນ ​ແລະ​ເປັນ​ສາລະ​ສຳຄັນ; ​ເອກະສານ​ການ​ຮ່ວມ​ມື​ລະຫວ່າງ​ສອງ​ຝ່າຍ​ຫຼາຍ​ສະບັບ​ໄດ້​ຮັບ​ການ​ລົງ​ນາມ.

​ໃນ​ການ​ຢ້ຽມຢາມ​ສະຫະພັນ​ລັດ​ເຊຍ, ນາ​ຍົກລັດຖະມົນຕີ​ຫວຽດນາມ ຫງວຽນ​ຊວັນ​ຝຸກ ​ໄດ້​ມີ​ການ​ແລກປ່ຽນ​ສ່ວນ​ຕົວ ​ແລະ ​ເຈລະຈາ​ກັບ​ນາຍົກລັດຖະມົນຕີລັດ​ເຊຍ ​ເດິ​ມີ​ຕຣີ ​ແມດ​ເວ​ແດບ, ພົບປະຫາລືກັບປະທານາທິບໍດີລັດເຊຍ ວະລາດີເມຍ ປູຕີນ, ພົບປະກັບປະທານສະພາດູມາລັດເຊຍ ແລະປະທານສະພາແຫ່ງຊາດລັດເຊຍ. ເນື່ອງໃຍໂອກາດນີ້, ນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ​ແລະ ນາຍົກລັດຖະມົດ​ຕີ ​ເດິ​ມີ​ຕຣີ ​ແມດ​ເວ​ແດບ ພ້ອມກັນເຂົ້າຮ່ວມພິທີເປີດ ປີໄຂວ້ຂອງສອງປະເທດ ຫວຽດນາມແລະລັດເຊຍໃນປີ 2019 - 2020.

ສອງ​ຝ່າຍ​ເນັ້ນ​​ເຖິງຄວາມ​ສຳຄັນ​ຂອງ​ການຈັດ​ຕັ້ງ​ປີ​ໄຂວ້, ດ້ວຍ​ການ​ເຄື່ອນ​ໄຫວ​ຫຼາຍ​ກວ່າ 200 ກິດຈະການ​ທີ່​ອຸດົມສົມບູນ​ຢູ່​ຫຼາຍ​ທ້ອງ​ຖິ່ນຂອງ​ສອງ​ປະ​ເທດ ​ເຊິ່ງ​ເປັນ​ເຫດການ​ທີ່​ສຳຄັນ​ສຳລັບ​ການ​ພົວພັນ​ສອງ​ຝ່າຍ. ນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ຢືນຢັນ​ວ່າ ​ເຖິງ​ວ່າສະຖານະ​ການ​ໂລກ​ຈະ​ເປັນ​ແນວ​ໃດກໍ່ຕາມ ແຕ່ລະ​ເຊຍ​ໄດ້, ພວມ ​ແລະ ​ຈະເປັນ​ເພື່ອນ​ທີ່​ຍິ່ງ​ໃຫຍ່​ແລະ​ເຊື່ອ​ຖື​ໄດ້​ຂອງ​ຫວຽດນາມ​ສະ​ເໝີ.

ສອງ​ຝ່າຍຢືນຢັນ​ວ່າ​ພະລັງງານ​ແມ່ນ​ໜຶ່ງ​ໃນ​ບັນດາ​ເສົາ​ຄ້ຳ​ທີ່​ສຳຄັນ​ຂ​ອງການ​ຮ່ວມ​ມືລະຫວ່າ​ງ​ຫວຽດນາມ​ແລະ​ລັດ​ເຊຍ; ​ເຫັນ​ດີ​ຊຸກຍູ້​​ໃຫ້​ວິສາ​ຫະກິດນ້ຳມັນ​ອາຍ​ແກ​ສຂອງ​ສອງ​ປະ​ເທດຮ່ວມ​ມື​ນຳ​ກັນ​ໃນ​ການ​ສຳ​ຫຼວດ​ແລະ​ຂຸດ​ເຈາະ​ນ້ຳມັນ​ອາຍ​ແກ​ສ​ໃນ​ໄຫຼ່​ທະວີບ​ຂອງ​ຫວຽດນາມ ​ແລະ ​ໃນ​ດິນ​ແດນ​ລັດ​ເຊຍ. ຍູ້​ແຮງ​ການ​ຮ່ວມ​ມື​ທາງ​ດ້ານ​ການ​ປ້ອງ​ກັນ​ປະ​ເທດ​ແລະປ້ອງ​ກັນ​ຄວາມ​ສະຫງົບຕາມ​ກົນ​ໄກ​ທີ່​ໄດ້​ຕົກລົງ​ກັນ​ແລ້ວ. ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ຊຸກຍູ້​ການ​ຜັນ​ຂະຫຍາຍ​ໂຄງການກໍ່ສ້າງ​ສູນ​ຄົ້ນຄວ້າ​ວິທະຍາສາດ ​ແລະ​ເຕັກ​ໂນ​ໂລ​ຊີນິວ​ເຄຼຍຢູ່​ຫວຽດນາມ; ປະ​ເມີນ​ວ່າ​ຫວຽດນາມ​ແລະ​ລັດ​ເຊຍ​ມີ​ຄວາມ​ສາມາດ​ຫຼາຍ​ຢ່າງ​ໃນ​ການ​ຮ່ວມ​ມື​ໃນ​ຂົງ​ເຂດ​ການ​ລົງທຶນ ​ເຊິ່ງມີ​ຫຼາຍ​ໂຄງການ​ໄດ້​ຖືກ​ສະ​ເໜີ​ແລະ​ຜັນ​ຂະຫຍາຍ​ໃນ​ເວລາ​ທີ່​ຜ່ານ​ມາ. ລັດ​ເຊຍ​ພ້ອມ​ແລ້ວ​ທີ່​ຈະ​ຊ່ວຍ​ເຫຼືອ​ຫວຽດນາມກໍ່ສ້າງ​ລັດຖະບານ​ເອ​ເລັກ​ໂຕຣນິກ, ປະກອບ​ດ້ວຍ ປະຕູ​ບໍລິການ​ສາທາລະນະ​ອອນ​ໄລ, ສູນ​ຮັກສາ​ຄວາມ​ປອດ​ໄພ​ທາງ​ດ້ານ​ຂໍ້​ມູນ, ຕົວ​ແບບ​ເມືອງ​ສະຫຼາດ.

​ໃນ​ການ​ຢ້ຽມຢາມ​ປະ​ເທດ​ນອກ​ແວ​ຢ່າງ​ເປັນ​ທາງ​ການ, ນາ​ຍົກລັດຖະມົນຕີ​ຫວຽດນາມ ຫງວຽນ​ຊວັນ​ຝຸກ ​ໄດ້​ມີ​ການ​ພົບ​ປະ​ເຈລະຈາ​ກັບ​ນາຍົກລັດຖະມົນຕີ ອານາ ຊູນ​ເບິ​ກ, ພົບ​ປະກັບ​ເຈົ້າ​ຊີວິດ ຮາຣັນ ທີ່​ຫ້າ ​ແລະ​ພົບ​ປະ​ກັບປະທານ​ສະພາ​ແຫ່ງ​ຊາດ ​ໂທນ ​ໂຕຣ​ເອິນ.

ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ຊຸກຍູ້ການ​ເຈລະຈາ​ສັນຍາ​ການ​ຄ້າ​ເສລີ (FTA) ລະຫວ່າງ​ຫວຽດນາມ ​ແລະສະມາຄົມ​ການ​ຄ້າ​ເສລີ​ເອີຣົບ (EFTA) ​ໃຫ້​ສຳ​ເລັດ​ກ່ອນກຳນົດ ​ເຊິ່ງ​ໃນ​ນັ້ນ ນອກ​ແວ ​ເປັນ​ປະ​ເທດ​ປະສານ​ງານ​ການ​ເຈລະຈາ; ສົ່ງ​ເສີມ​ຊຸມ​ຊົນ​ນັກທຸລະກິດ​ຂອງ​ສອງ​ປະ​ເທດ ​ສືບ​ຕໍ່​ຊຸກຍູ້​ແລະ​ເປີດ​ກວ້າງ​ການ​ຮ່ວມ​ມື​ລົງທຶນ​ທຸລະ​ກິດ, ພິ​ເສດ​ແມ່ນ​ໃນ​ບັນດາ​ຂົງ​ເຂດ​ທີ່​ສຳຄັນ​ຄື ພະລັງງານ​ແສງ​ອາທິດ, ການ​ບໍລິການ​ເຕັກນິກ​ນ້ຳມັນ​ອາຍ​ແກ​ສ, ​ເສດ​ຖະກິດ​ທະ​ເລ​ສີຂຽວ, ​ເຊິ່ງ​ໃນ​ນັ້ນ ສອງ​ຝ່າຍ​ຊຸກຍູ້​ການ​ບໍລິ​ໂພ​ກ, ຍົກ​ສູງ​ຄຸນະພາບ​ອາຫານ​ທະ​ເລ​ຂອງ​ກັນ​ແລະ​ກັນ (ປາ​ສະຫວາຍຂອງ​ຫວຽດນາມ, ປາ​ແຊນ​ມອນ​ຂອງນອກ​ແວ)…

​ໃນ​ການ​ຢ້ຽມຢາມ​ປະ​ເທດ​ຊູ​ແອດ​ຢ່າງ​ເປັນ​ທາງ​ການ, ນາ​ຍົກລັດຖະມົນຕີ​ຫວຽດນາມ ຫງວຽນ​ຊວັນ​ຝຸກ ​ໄດ້​ພົບ​ປະ​ເຈລະຈາ​ກັບ​ນາຍົກລັດຖະມົນຕີຊູ​ແອດ ສະ​ເຕຟານ ​ໂລ​ຟະ​ເວນ, ພົບ​ປະ​ກັບ​ເຈົ້າ​ຊີ​ວິດ ຄາມ​ທີ່ 16 ກຸ​ສະ​ຕາບ​ແຫ່ງ​ຊູແອດ, ພົບ​ປະ​ຫາລື​ກັບ​ປະທານ​ສະພາ​ແຫ່ງ​ຊາດ​ຊູ​ແອດ.

ນາຍົກລັດຖະມົນຕີທັງສອງ​ໄດ້​ຢືນຢັນ​ການ​ພົວພັນ​ທາງດ້ານ​ການ​ຄ້າ-ການ​ລົງທຶນ​ມີ​ບົດບາດ​ສຳຄັນ ​ແລະ ​ເພື່ອ​ຂຸດ​ຄົ້ນ​ຄວາມ​ສາມາດ​ທີ່​ຍັງ​ມີ​ຢ່າງ​ຫຼວງ​ຫຼາຍ​ໃນ​ຂົງ​ເຂດ​ນີ້, ນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ສະ​ເໜີ​ໃຫ້​ລັດຖະບານ​ຊູ​ແອດ​ເອົາ​ໃຈ​ໃສ່​ສົ່ງ​ເສີມບັນດາ​ວິ​ສາ​ຫະກິດ​ຂອງ​ຊູ​ແອດ​ເພີ່ມ​ທະວີ​ການ​ລົງທຶນ​ເຂົ້າ​ໃນ​ຫວຽດນາມ ​ໃນ​ບັນດາ​ຂົງ​ເຂດ​ທີ່​ຊູ​​ແອດ​ມີ​ທ່າ​ແຮງ​ເຊັ່ນ ອຸດສາຫະກຳ​ການຜະລິດ, ເຄມີ, ເອເລັກໂຕຣນິກ, ຂໍ້ມູນການສື່ສານ, ການປູກປ່າ, ການຂຸກຄົ້ນໄມ້ແລະແລະປຸງແຕ່ງໄມ້ແບບຍືນຍົງ, ການກຳຈັດສິ່ງເສດເຫຼືອ, ເພສັດ, ອຸດສາຫະກຳສະໜັບສະໜູນລົດໂອໂຕ.

ນາຍົກລັດຖະມົນຕີທັງສອງ​ໄດ້​ເປັນ​ເອກະ​ສັນຈະ​ສົມທົບ​ກັນ​ຢ່າງ​ແໜ້ນ​ແຟ້ນ ​ເພື່ອ​ຊຸກຍູ້​ການ​ລົງ​ນາມ​ໃນ​ສັນຍາ​ການ​ຄ້າ​ເສລີລະຫວ່າງ​ຫວຽດນາມ​ແລະ​ອີ​ຢູ (EVFTA) ​ແລະ ​ສັນຍາ​ປົກ​ປ້ອງ​ການ​ລົງທຶນ​ລະຫວ່າງ​ຫວຽດນາມ​ແລະ​ອີ​ຢູ (EVIPA) ​ໃນບໍ່ພໍ​ເທົ່າ​ໃດ​ອາທິດ​ຂ້າງ​ໜ້າ ​ແລະ ​ໃຫ້​ສັດຕະຍາບັນ​, ​ຜັນ​ຂະຫຍາ​ປະຕິບັດ​​ຢ່າງ​ໄວຫຼັງ​ຈາກ​ນັ້ນ, ​ເພື່ອ​ນຳ​ເອົາ​ຜົນ​ປະ​ໂຫຍ​ດມາ​ໃຫ້​ທຸກ​ຝ່າຍ ​ແລະ ປະກອບສ່ວນ​ເພີ່ມ​ທະວີ​ການ​ພົວພັນ​ທາງ​ດ້ານ​ການ​ຄ້າ, ການ​ລົງທຶນ​ລະຫວ່າງ​ຫວຽດນາມ​ແລະ​ຊູ​ແອດ. ນາຍົກລັດຖະມົນຕີຊູ​ແອດ​ໄດ້​ມອບ​ໜັງສື​ສະ​ແດງ​ເຈດ​ຈຳນົງ​ກ່ຽວ​ກັບສິນ​ເຊື່ອ​ການ​ສົ່ງ​ອອກຫຼາຍ​ກວ່າ 1.200 ລ້ານ​ໂດ​ລາ​ສະຫະລັດ ​ເຂົ້າ​ຫວຽດນາມ.

​ໃນ​ບັນດາ​ການ​ເຈລະຈາ, ການ​ພົບ​ປະ​ຫາລື​ກັບ​ຜູ້ນຳ​ຂອງ​ລັດ​ເຊຍ, ນອກ​ແວ, ຊູ​ແອດ, ນາຍົກ​ລັດຖະມົນຕີ​ຫວຽດນາມ​ ຫງວຽນ​ຊວັນ​ຝຸກ ​ໄດ້​ແລກປ່ຽນ​ກ່ຽວ​ກັບ​ບັນດາ​ບັນຫາ​ສາກົນ​ແລະ​ພາກ​ພື້ນ; ​ເນັ້ນ​ຄວາມ​ສຳຄັນ​ແລະ​ຄວາມ​ຈຳ​ເປັນ​ຕ້ອງ​ຮັບປະກັນ​ສັນຕິພາບ, ສະຖຽນ​ລະ​ພາບ, ຮັກສາ​ຄວາມ​ໝັ້ນຄົງ, ຄວາມ​ປອດ​ໄພ ​ແລະ​ເສລີພາບ​ໃນ​ການ​ເດີນ​ເຮືອ​ແລະ​ການບິນ​ຢູ່​ທະ​ເລ​ຕາ​ເວັນ​ອອກ. ນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ກໍ່​ໄດ້​ສະ​ເໜີ​ລັດຖະບານ​ບັນດາ​ປະ​ເທດ ສືບ​ຕໍ່​ອຳນວຍ​ຄວາມ​ສະດວກ​ໃຫ້​ຊຸມ​ຊົນ​ຊາວ​ຫວຽດນາມ​ໄດ້​ດຳລົງ​ຊີວິດ​ແລະ​ເຊື່ອມ​ໂຍງ​ຢ່າງ​ຕໍ່​ເນື່ອງ, ຮັກສາ​ເອກະ​ລັກ​ວັດທະນະທຳ​ຫວຽດນາມ, ​ເສີມ​ຂະຫຍາຍ​ບົດບາດ​ເປັນ​ຂົວຕໍ່ຊຸກຍູ້​ການພັວພັນ​ຮ່ວມ​ມື​ລະຫວ່າງ​ຫວຽດນາມ​ກັບ​ປະ​ເທດຕ່າງໆ.

​ໃນ​ການ​ຢ້ຽ​ມຢາມ​ສາມ​ປະ​ເທດ, ນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ໃຊ້​ເວລາ​​ເພື່ອພົບ​ປະ​ແລະສົນທະນາ​ກັບບັນດາ​ບໍລິສັດ​ຂະໜາດ​ໃຫຍ່, ກຸ່ມ​ເສດຖະກິດ​ຊັ້ນ​ນຳ, ກໍ່​ຄື​ໄປ​ຢ້ຽມຢາມ​ບັນດາ​ພື້ນຖານ​ເສດຖະກິດຕົວ​ແທນ​ຂອງ​ລັດ​ເຊຍ, ນອກ​ແວ, ຊູ​ແອດ ​ແລະ ​ເຂົ້າ​ຮ່ວມ​ບັນດາ​ເວທີ​ປາ​ໄສ​ການ​ທຸລະ​ກິດ, ​ເຊິ່ງ​ເປັນບ່ອນທີ່​ຊຸມ​ຊົນ​ນັກທຸລະກິດ​ຂອງ​ສອງ​ປະ​ເທດພົບ​ປະ, ຊອກ​ຫາ​ໂອກາດ​​ເພື່ອ​ຮ່ວມ​ມື, ​ເພື່ອ​ແນະນຳ​ກ່ຽວ​ກັບ​ຄວາມ​ສາມາດ​ບົ່ມ​ຊ້ອນ​ຂອງ​ຫວຽດນາມ, ກ່ຽວ​ກັບ​ບັນດາ​ນະ​ໂຍບາຍ, ທັດສະນະການ​ພັດທະນາ​ຂອງ​ຫວຽດນາມ ​ແລະ​ຮຽກຮ້ອງ​ໃຫ້​ນັກທຸລະກິດ​ນຳ​ເອົາ​ທຶນ​ແລະ​ເຕັກ​ໂນ​ໂລ​ຊີ​ທັນ​ສະ​ໄໝ ​ເຂົ້າ​ໃນ​ຫວຽດນາມ.

​ໃນຂອບເຂດ​ການ​ຢ້ຽມຢາມ, ນາ​ຍົກລັດຖະມົນຕີ​ຫວຽດນາມ ຫງວຽນ​ຊວັນ​ຝຸກ ໄດ້ໄປຢ້ຽມຢາມຖາມຂ່າວ, ໃຫ້ກຳລັງໃຈຊາວຫວຽດນາມທີ່ອາໄສຢູ່ລັດເຊຍ, ນອກແວ, ຊູແອດ; ຢືນຢັນຈະສືບຕໍ່ອຳນວຍຄວາມສະດວກ ໃຫ້ພີ່ນ້ອງຊາວຫວຽດນາມຢູ່ຕ່າງປະເທດ ປະກອບສ່ວນເຂົ້າໃນການສ້າງສາ ພັດທະນາປະເທດ ແລະ ຫວັງວ່າ “ຊາວຫວຽດນາມແຕ່ລະຄົນເປັນຕົວ​ແທນ​ຈຳໜ່າຍສິນຄ້າ​ຫວຽດນາມ”.

ນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ກໍ່​ໄດ້​ພົບ​ປະ​ແລະ​ສະ​ແດງ​ຄວາມ​ຂອບ​ໃຈ​ຕໍ່ຊ່ຽວຊານ, ​ເພື່ອນ​ມິດ​ຊາວ​ລັດ​ເຊຍ ​ແລະ ຊູ​ແອດ, ​ຜູ້​ທີ່​ໄດ້​ຊ່ວຍ​ເຫຼືອຫວຽດນາມ​ໃນ​ສະ​ໄໝ​ສົງຄາມ ​ແລະ​ໃນ​ກິດຈະການ​ປ່ຽນ​​ແປງ​ໃໝ່​ປະ​ເທດ. ທ່ານນາຍົກລັດຖະມົນຕີກ່າວວ່າ “ຈາກ​ຫົວ​ໃຈ​ສູ່​ຫົວ​​ໃຈ, ພວກ​ເຮົາ​ບໍ່​ເຄີຍ​ລືມ​ເຊິ່ງ​ກັນ​ແລະ​ກັນ, ຈື່​ຈຳ​ແຕ່ລະຄົນ​ຢູ່​ສະ​ເໝີ​ດ້ວຍ​ຄວາມຈິງ​ໃຈ, ນັບຖື ​ແລະ ​ຮູ້​ບຸນຄຸນ​ພວກ​ທ່ານ​ທຸກ​ຄົນ”.

ອາດ​ຈະ​ເວົ້າ​ໄດ້​ວ່າ, ການ​ຢ້ຽມຢາມ​ສາມປະ​ເທດ ​ລັດ​ເຊຍ, ນອກ​ແວ ​ແລະ​ຊູ​ແອດ ​ຢ່າງ​ເປັນ​ທາງ​ການ​ຂອງນາ​ຍົກລັດຖະມົນຕີ​ ຫງວຽນ​ຊວັນ​ຝຸກ ​ແລະ​ຄະນະ​ຜູ້​ແທນ​ຂັ້ນ​ສູງ​ຂອງ​ລັດຖະບານ​ຫວຽດນາມ​ ໄດ້​ປະສົບ​ຜົນສຳ​ເລັດ​ທີ່​ດີງາມ, ​ແມ່ນ​ເຫດການ​ການ​ເມືອງ​ທີ່ມີ​ຄວາມ​ໝາຍ​ສຳຄັນ ປະກອບສ່ວນ​ເຂົ້າ​ໃນ​ການ​ສືບ​ຕໍ່​ແລະ​ຊຸກຍູ້​ການ​ພົວພັນ​ມິດຕະພາບທີ່​ເປັນ​ມູນ​ເຊື້ອ​ອັນ​ດີ​ງາມ ​ແລະ ​ເປີດ​ທິດ​ທາງ​ການ​ຮ່ວມ​ມື​ໃໝ່ ດ້ວຍ​ບັນດາ​ໂຄງການ, ​ແຜນ​ງານ​ລະອຽດ​ຕົວ​ຈິງ ບົນ​ພື້ນ​ຖາມ​ການ​ປະດິດ​ສ້າງ ​ແລະ ​ປະ​ຢຸກ​​ໃຊ້ເຕັກ​ໂນ​ໂລ​ຊີ​ສູງ​ແລະ​ມີ​ປະສິດທິ​ຜົນ, ນຳ​ເອົາ​ຜົນ​ປະ​ໂຫຍ​ດມາ​ໃຫ້​ວິ​ສາ​ຫະກິດ​ແລະ​ປະຊາຊົນ​ຂອງ​ບັນດາ​ປະ​ເທດ​ທີ່​ກ່ຽວຂ້ອງ./.

​ໂດຍ ຫງວຽນດຶກ