ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ເຂົ້າຮ່ວມເວທີປາໄສຂັ້ນສູງ ການຮ່ວມມືສາກົນ "ແລວທາງແລະເສັ້ນທາງ"
ວກ.ອອນໄລ - ໂດຍຕອບສະໜອງຕາມຄຳເຊີນຂອງທ່ານເລຂາທິການໃຫຍ່, ປະທານປະເທດຈີນ ສີ ຈິ້ນຜິງ, ໃນລະຫວ່າງວັນທີ 25 - 27 ເມສາ 2019, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະ ຄະນະຜູ້ແທນລັດຖະບານຫວຽດນາມ ໄດ້ເຂົ້າຮ່ວມເວທີປາໄສຂັ້ນສູງການຮ່ວມມືສາກົນ "ແລວທາງແລະເສັ້ນທາງ" ຄັ້ງທີສອງ.
ການພົວພັນຮ່ວມມືໃນຂອບ "ແລວທາງແລະເສັ້ນທາງ" ຕ້ອງມີຄວາມສະເໝີພາບ, ຄວາມໂປ່ງໃສ, ຄວາມເປີດເຜີຍ, ຄວາມຈິງໃຈ ແລະ ຜົນປະໂຫຍດຮ່ວມກັນ
ກ່າວປາໄສທີ່ເວທີປາໄສຂັ້ນສູງການຮ່ວມມືສາກົນ "ແລວທາງແລະເສັ້ນທາງ" ດ້ວຍຫົວຂໍ້ “ການຮ່ວມມືແລວທາງແລະເສັ້ນທາງ: ການກຳນົດອະນາຄົດລວມທີ່ສົດໃສ”, ທ່ານນາຍົກລັດຖະມົນຕີ ຫງວຽນຊວັນຝຸກ ຊີ້ແຈງວ່າ, ການເຊື່ອມໂຍງຕ້ອງໄດ້ຊຸກຍູ້ຢ່າງຮອບດ້ານ ທັງໂຄງສ້າງພື້ນຖານແຂງ ແລະ ໂຄງສ້າງພື້ນຖານອ່ອນ, ລວມທັງການເຊື່ອມຕໍ່ດິຈິຕອນ, ນັບແຕ່ການຂົນສົ່ງ, ພະລັງງານ, ໂທລະຄົມມະນາຄົມ,.. ຈົນເຖິງການເຊື່ອມໂຍງຜູ້ຄົນ. ການພັດທະນາແບບຍືນຍົງຂອງ "ແລວທາງແລະເສັ້ນທາງ" ກໍ່ຄືກັນກັບ 17 ເປົ້າໝາຍການພັດທະນາແບບຍືນຍົງຂອງໂຄງການວາລະສະຫະປະຊາຊາດປີ 2030. ຄຽງຂ້າງກັບຄວາມພະຍາຍາມຂອງແຕ່ລະປະເທດ, ຄວາມຄິດລິເລີ່ມແລະກົນໄກການຮ່ວມມືສາກົນຕ້ອງຫັນໄປສູ່: (1) ຄວາມສົມດຸນລະຫວ່າງເປົ້າໝາຍການເຕີບໂຕໄລຍະສັ້ນແລະເປົ້າໝາຍການເຕີບໂຕໄລຍະຍາວ, ຮັບປະກັນປະສິດທິຜົນທາງດ້ານເສດຖະກິດ, ຄວາມໝັ້ນຄົງທາງດ້ານສິ່ງແວດລ້ອມ ແລະຄວາມກົມກຽວທາງດ້ານສັງຄົມ; (2) ຖືເອົາຄົນເປັນສູນກາງ, ດ້ວຍຄວາມຮັບຜິດຊອບສູງ, ການປະກອບສ່ວນ, ການສ້າງສັນຂອງຜູ້ຄົນ ແລະ ປະຊາຊົນຕ້ອງໄດ້ຊົມໃຊ້ຜົນສຳເລັດຈາກການຮ່ວມມື "ແລວທາງແລະເສັ້ນທາງ" ທີ່ມີຊີວິດທີ່ດີກວ່າ, ບໍ່ມີຜູ້ໃດຖືກປະໄວ້ຢູ່ຂ້າງຫຼັງ; ແລະ (3) ການຫັນປ່ຽນໄປສູ່ເສດຖະກິດດິຈິຕອນ ຊຶ່ງການເຕີບໂຕອີງໃສ່ຄວາມຄິດປະດິດສ້າງ, ວິທະຍາສາດແລະເຕັກໂນໂລຊີ ເປັນຮາກຖານຂອງການປະຕິວັດອຸດສາຫະກຳ 4.0.
ເພື່ອໃຫ້ "ແລວທາງແລະເສັ້ນທາງ" ປະສົບຜົນສຳເລັດຕົວຈິງແລະຍາວນານນັ້ນ ທັດສະນະຂອງທຸກປະເທດ, ບໍ່ວ່າຈະເປັນປະເທດໃຫຍ່ຫຼືນ້ອຍ, ຕ້ອງໄດ້ຮັບການນັບຖື, ຮັບຟັງ, ແລະຄວາມແຕກຕ່າງທຸກຢ່າງຕ້ອງໄດ້ຮັບການແກ້ໄຂໂດຍການປຶກສາຫາລືແລະການສົນທະນາ; ການພົວພັນຮ່ວມມືຕ້ອງມີຄວາມສະເໝີພາບ, ຄວາມໂປ່ງໃສ, ຄວາມເປີດເຜີຍ, ຄວາມຈິງໃຈ ແລະ ຜົນປະໂຫຍດຮ່ວມກັນ, ພ້ອມກັນນັ້ນກໍເຄົາລົບນັບຖືອະທິປະໄຕ ແລະ ຜືນແຜ່ນດິນອັນຄົບຖ້ວນ, ສອດຄ່ອງກັບກົດໝາຍສາກົນ. ນັ້ນແມ່ນບັນດາຮາກຖານເພື່ອໃຫ້ການເຊື່ອມຕໍ່ແລະການພັດທະນາປະສົບຜົນສຳເລັດ.
ບັນດາຄວາມເຫັນປະກອບສ່ວນຂອງຫວຽດນາມ ແລະ ຫຼາຍເນື້ອໃນໄດ້ສ່ອງແສງໃນປະກາດທົ່ວໄປຂອງເວທີປາໄສ. ຄະນະຜູ້ແທນຫວຽດນາມໄດ້ເຂົ້າຮ່ວມໃນຮູບແບບຕ່າງໆ ທີ່ກິດຈະກຳອື່ນໆຂອງເວທີປາໄສ, ລັດຖະມົນຕິບັນດາກະຊວງ: ແຜນການແລະການລົງທຶນ, ອຸດສາຫະກຳການຄ້າ, ຊັບພະຍາກອນທຳມະຊາດແລະສິ່ງແວດລ້ອມ, ການກວດກາລັດຖະບານ ຊຶ່ງໄດ້ເຂົ້າຮ່ວມແລະປະກອບຄວາມເຫັນໃນການສຳມະນາບັນຫາສະເພາະຕ່າງໆ.
ຊຸກຍູ້ການພົວພັນລະຫວ່າງຫວຽດນາມແລະຈີນ
ໃນການພົບປະເຈລະຈາ, ພົບປະຫາລືກັບຜູ້ນຳຂອງຈີນ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ເນັ້ນວ່າ ຫວຽດນາມໃຫ້ຄວາມສຳຄັນທີ່ສຸດຕໍ່ການສົ່ງເສີມການການພົວພັນຮ່ວມມືຍຸທະສາດຮອບດ້ານລະຫວ່າງຫວຽດນາມແລະຈີນ ໃຫ້ພັດທະນາຢ່າງໝັ້ນຄົງ, ສົດໃສ ແລະ ຍືນຍົງ; ຊົມເຊີຍແລະສະໜັບສະໜູນຄວາມຄິດລິເລີ່ມ "ແລວທາງແລະເສັ້ນທາງ" ທີ່ຮັບປະກັນບັນດາຫຼັກການການຮ່ວມມື ສັນຕິພາບ, ສະເໝີພາບແລະມີຜົນປະໂຫຍດຮ່ວມກັນ, ເຄົາລົບເຊິ່ງກັນແລະກັນ, ສອດຄ່ອງກັບກົດໝາຍສາກົນ, ຫັນໄປສູ່ເປົ້າໝາຍປະກອບສ່ວນໃຫ້ແກ່ການພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນຂອງທຸກປະເທດ.
ທ່ານນາຍົກລັດຖະມົນຕີຫວຽດນາມສະແດງຄວາມຊົມເຊີຍ ແລະສະເໜີໃຫ້ຈີນຜັນຂະຫຍາຍບັນດາໂຄງການຂະໜາດໃຫຍ່, ເຕັກໂນໂລຊີທັນສະໄໝ, ເປັນມິດກັບສະພາບແວດລ້ອມ, ເປັນຕົວແທນຂອງລະດັບການພັດທະນາຂອງຈີນ ຢູ່ປະເທດຫວຽດນາມ; ສະເໜີໃຫ້ສອງຝ່າຍເພີ່ມທະວີການຮ່ວມມືຄຸ້ມຄອງແລະນຳໃຊ້ເປັນຢ່າງດີ ແຫຼ່ງນ້ຳໃນແມ່ນ້ຳຂອງ ແລະແມ່ນ້ຳອື່ນໆທີ່ໄຫຼຜ່ານທັງສອງປະເທດ. ທ່ານນາຍົກລັດຖະມົນຕີສະເໜີໃຫ້ຈີນ, ຕະຫຼາດສົ່ງອອກໃຫຍ່ທີ່ 2 ຂອງຫວຽດນາມ, ສືບຕໍ່ເປີດປະຕູໃຫ້ສິນຄ້າກະສິກຳຂອງຫວຽດນາມ, ໂດຍສະເພາະແມ່ນໝາກໄມ້ 8 ຊະນິດ, ຊີ້ນໝູແລະຮັງນົກແອ່ນທະເລ, ອຳນວຍຄວາມສະດວກໃຫ້ແກ່ການຄ້າເຂົ້າສານລະຫວ່າງສອງປະເທດ; ສົມທົບແກ້ໄຂຂໍ້ຄົງຄ້າງບາງຢ່າງກ່ຽວກັບຂັ້ນຕອນການຊຳລະບັນຊີ, ເງິນທຶນເພີ່ມຂຶ້ນ, ຄວາມຄືບໜ້າຊ້າ, ປະສິດທິຜົນຕ່ຳ ໃນບັນດາໂຄງການຮ່ວມມືລະຫວ່າງສອງຝ່າຍ; ຊຸກຍູ້ການລົງລາຍເຊັນໃໝ່ໃນສັນຍາກ່ຽວກັບທາງລົດໄຟ, ເຊື່ອມຕໍ່ທາງລົດໄຟລະຫວ່າງ ລາວກາຍ-ເຫືອເຂົ່າ; ສະເໜີໃຫ້ເພີ່ມທ່ຽວບິນໂດຍກົງລະຫວ່າງສອງປະເທດ, ກຳນົດເວລາບິນແລະລົງຈອດທີ່ເໝາະສົມສຳລັບບໍລິສັດການບິນຫວຽດນາມ ໃຫ້ບິນຈາກ / ເຖິງ ປັກກິ່ງແລະຊຽງໄຮ່; ອຳນວຍຄວາມສະດວກໃຫ້ວິສາຫະກິດຂອງສອງປະເທດເຂົ້າຮ່ວມຢ່າງມີປະສິດທິຜົນໃນເສັ້ນທາງຂົນສົ່ງ ສິງກະໂປ - ສົງຊິ້ງ.
ກ່ຽວກັບບັນຫາທາງທະເລ, ທ່ານນາຍົກລັດຖະມົນຕີ ຫງວຽນຊວັນຝຸກ ສະເໜີໃຫ້ປະຕິບັດຢ່າງເຂັ້ມງວດຄວາມຮັບຮູ້ຮ່ວມກັນຂອງການນຳຂັ້ນສູງ, “ຂໍ້ຕົກລົງກ່ຽວກັບບັນດາຫຼັກການພື້ນຖານທີ່ຊີ້ນຳແກ້ໄຂບັນດາບັນຫາທາງທະເລ”, ປະຕິບັດຖະແຫຼງການ DOC ຢ່າງຄົບຖ້ວນແລະມີປະສິດທິຜົນ; ຕັ້ງໜ້າຊຸກຍູ້ການເຈລະຈາເພື່ອກໍ່ສ້າງ COC ທີ່ແທ້ຈິງ, ມີປະສິດທິຜົນ, ສອດຄ່ອງກັບກົດໝາຍສາກົນ ເພື່ອຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ.
ໃນການແລກປ່ຽນສອງຝ່າຍ, ທ່ານເລຂາທິການໃຫຍ່, ປະທານປະເທດຈີນ ສີ ຈິ້ນຜິງ ແລະ ທ່ານນາຍົກລັດຖະມົນຕີຈີນ ຫຼີ່ ເຄີ້ສຽງ ແລະບັນດາຜູ້ນຳຈີນ ໄດ້ສະແດງຄວາມຊົມເຊີຍຢ່າງສຸດໃຈ ຕໍ່ທ່ານນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນລັດຖະບານຫວຽດນາມ ທີ່ໄດ້ມາຮ່ວມເວທີປາໄສ; ການຢືນຢັນເລື່ອງນີ້ສະແດງໃຫ້ເຫັນເຖິງຄວາມເຄົາລົບຂອງພັກແລະລັດຫວຽດນາມ ຕໍ່ການພົວພັນຈີນ-ຫວຽດນາມ, ປະກອບສ່ວນອັນສຳຄັນເຂົ້າໃນຄວາມສຳເລັດຂອງເວທີປາໄສ; ເນັ້ນໜັກວ່າ ພັກແລະລັດຂອງຈີນໃຫ້ຄວາມສຳຄັນຢ່າງຍິ່ງຕໍ່ການພົວພັນກັບຫວຽດນາມ, ເປັນເອກະສັນຈະພ້ອມກັນກັບຫວຽດນາມຮັກສາການຕິດຕໍ່ລະດັບສູງ, ເພີ່ມທະວີຄວາມໄວ້ວາງໃຈທາງການເມືອງ, ຊຸກຍູ້ບັນດາຂົງເຂດການຮ່ວມມືຕົວຈິງ, ເປີດກວ້າງການພົວພັນປະຊາຊົນ, ປັບປຸງສາຍພົວພັນມິດຕະພາບທີ່ເປັນມູນເຊື້ອ, ຄວບຄຸມຄວາມແຕກຕ່າງໃຫ້ໄດ້ເປັນຢ່າງດີ, ຮັກສາສົນຕິພາບ ສະຖຽນລະພາບຢູ່ທະເລຕາເວັນອອກ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມເພື່ອການພັດທະນທີ່ໝັ້ນຄົງ, ສົດໃສ, ຍືນຍົງ; ຢືນຢັນວ່າ ຈີນສະໜັບສະໜູນຫວຽດນາມໃນການເສີມຂະຫຍາຍບົດບາດຂອງຕົນໃນກົນໄກພະຫຸພາຄີ, ໂດຍສະເພາະແມ່ນຫວຽດນາມຮັບບົດບາດເປັນປະທານອາຊຽນໃນປີ 2020.
ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະ ທ່ານນາຍົກລັດຖະມົນຕີຈີນ ຫຼີ່ ເຄີ້ສຽງ ໄດ້ເປັນສັກຂີພະຍານພິທີມອບຮັບເອກະສານການຮ່ວມມືທາງດ້ານການຊ່ວຍເຫຼືອ, ສຸນລະກາກອນ, ວັດທະນະທຳ ລະຫວ່າງສອງປະເທດ. ເອກະສານການຮ່ວມມືເຫຼົ່ານີ້ຈະປະກອບສ່ວນສ້າງເງື່ອນໄຂເປີດຕະຫຼາດສຳລັບສິນຄ້າກະສິກຳຂອງຫວຽດນາມ ກໍຄືຊຸກຍູ້ການທ່ອງທ່ຽວລະຫວ່າງສອງປະເທດ. ເນື່ອງໃນໂອກາດນີ້, ບັນດາກະຊວງ ຂະແໜງການຂອງສອງປະເທດ ໄດ້ເຊັນເອກະສານການຮ່ວມມືສະບັບອື່ນໆໃນຂົງເຂດກະສິກຳ.
ຢູ່ນອກຂອບເຂດເວທີປາໄສ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ມີການພົບປະສອງຝ່າຍກັບ ປະທານາທິບໍດີ ຕັດຈີກິດສະຖານ, ປະທານາທິບໍດີ ຟີລິບປີນ, ປະທານປະເທດລາວ, ນາຍົກລັດຖະມົນຕີກຳປູເຈຍ, ນາຍົກລັດຖະມົນຕີສິງຫະໂປ, ເລຂາທິການພັກເສລີປະຊາທິປະໄຕແຫ່ງຍີ່ປຸ່ນ ເພື່ອແລກປ່ຽນບັນດາມາດຕະການຊຸກຍູ້ຍິ່ງກວ່າອີກ ການພົວພັນຮ່ວມມືສອງຝ່າຍ ກໍ່ຄືເພີ່ມທະວີປະສິດທິຜົນຂອງການປະສານສົມທົບໃນບັນດາເວທີປາໄສພະຫຸພາຄີ, ປະກອບສ່ວນເຂົ້າໃນສັນຕິພາບ, ສະຖຽນລະພາບແລະຄວາມຈະເລີນຮຸ່ງເຮືອງຮ່ວມກັນ ໃນພາກພື້ນແລະໃນໂລກ.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໃຫ້ການຕ້ອນຮັບຜູ້ນຳລະດັບສູງຫຼາຍຄົນຈາກບໍລິສັດໃຫຍ່ຂອງຈີນ, ໃນຈຳນວນ 500 ບໍລິສັດທີ່ໃຫຍ່ທີ່ສຸດໃນໂລກ, ທີ່ເຄື່ອນໄຫວໃນບັນດາຂົງເຂດໂຄງສ້າງພື້ນຖານ-ການກໍ່ສ້າງ, ພະລັງງານ, ການເງິນ-ເຕັກໂນໂລຊີ.
ການເຂົ້າຮ່ວມເວທີປາໄສຂັ້ນສູງການຮ່ວມມື "ແລວທາງແລະເສັ້ນທາງ" ຂອງທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ປະກອບສ່ວນອັນຕັ້ງໜ້າ ເຂົ້າໃນການຮັກສາທ່ວງທ່າການຮ່ວມມືເພື່ອການພັດທະນາທີ່ໝັ້ນຄົງ ຂອງການຮ່ວມມືລະຫວ່າງຫວຽດນາມ-ຈີນ, ຢືນຢັນຄວາມປາຖະໜາດີແລະບົດບາດຂອງຫວຽດນາມ ໃນການເປີດກວ້າງການຮ່ວມມືແລະການເຊື່ອມຕໍ່ເສດຖະກິດສາກົນ ເພື່ອສັນຕິພາບແລະຄວາມຈະເລີນຮຸ່ງເຮືອງໃນພາກພື້ນແລະໃນໂລກ./.
ໂດຍ ຫງວຽນດຶກ