ປັບປຸງບູລະນະນະໂຍບາຍບຸລິມະສິດ
ໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ,
ເພີ່ມລະດັບເງິນອຸດໜູນຕາມພາວະເສດຖະກິດຂອງປະເທດ
ໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ,
ເພີ່ມລະດັບເງິນອຸດໜູນຕາມພາວະເສດຖະກິດຂອງປະເທດ
ກຳມະການກົມການເມືອງ, ປະທານປະເທດ ຫງວຽນຊວັນຝຸກ ກັບບັນດາທະຫານບາດເຈັບໜັກທີ່ເປັນຕົວແທນ ໃນໂອກາດວັນທະຫານເສຍອົງຄະ ແລະ ນັກຮົບສະຫຼະຊີວິດເພື່ອຊາດ - ວັນທີ 27 ກໍລະກົດ _ພາບ: TTXVN
ປະເທດຫວຽດນາມໄດ້ຜ່ານຫຼາຍພັນປີແຫ່ງການກໍ່ຕັ້ງປະເທດແລະປົກປັກຮັກສາປະເທດຊາດ, ຄົນຫວຽດນາມຫຼາຍຕໍ່ຫຼາຍລຸ້ນຄົນທີ່ມີນ້ຳໃຈຮັກຊາດ, ຮັກເຊື້ອຊາດເຜົ່າພັນ, ດ້ວຍເຈດຈຳນົງອັນແຮງກ້າ, ເດັດດ່ຽວໜຽວແໜ້ນ ຊື່ສັດສຸຈະລິດ ແລະ ມີເມດຕາຈິດ, ໄດ້ນຳເລືອດເນື້ອ, ຄວາມພະຍາຍາມ ແລະ ຊັບສິນຂອງຕົນ ເພື່ອປົກປັກຮັກສາເອກະລາດ, ເສລີພາບ, ທ້ອນໂຮມປະເທດຊາດເປັນເອກະພາບ ແລະ ສ້າງສາປະເທດທີ່ສວຍງາມ ໃຫ້ຄົນລຸ້ນຫຼັງຕໍ່ໄປໃນອະນາຄົດ.
ສືບທອດມູນເຊື້ອອັນລ້ຳຄ່າດັ່ງກ່າວຂອງຊາດ, ໃນຍຸກສະໄໝໂຮ່ຈີມິນ, ພາຍໃຕ້ການນຳພາຂອງພັກ, ປະຊາຊົນຫວຽດນາມໄດ້ຂຽນໜ້າປະຫວັດສາດອັນສະຫງ່າງາມ ໃນການຕໍ່ສູ້ຕ້ານການຮຸກຮານຈາກພາຍນອກ ເພື່ອຍາດເອົາເອກະລາດ, ເສລີພາບ ແລະ ເອກະພາບມາໃຫ້ປະເທດ. ລູກຫຼານທີ່ດີເດັ່ນຂອງຊາດຫຼາຍລ້ານຄົນ ເຊິ່ງສ່ວນຫຼາຍແມ່ນຊາວໜຸ່ມ ໄດ້ອຸທິດໄວໜຸ່ມແລະທັງຊີວິດຂອງຕົນເພື່ອປະເທດຊາດ. ຫຼາຍຄົນໄດ້ລົ້ມລົງໃນສະໜາມຮົບ ຫຼືກັບຄືນມາດ້ວຍບາດເຈັບຕະຫຼອດຊີວິດ.
ຍາດພີ່ນ້ອງຂອງຜູ້ເສຍສະລະຫຼາຍລ້ານຄົນ, ພໍ່, ແມ່, ສາມີ, ເມຍ ແລະ ລູກໆ ທີ່ບໍ່ສາມາດພົບເຫັນຄົນທີ່ຮັກໄດ້ອີກຕະຫຼອດການ. ເຂົ້າໃຈເຖິງການເສຍສະລະອັນໃຫຍ່ຫຼວງນັ້ນ, ປະທານໂຮ່ຈີມິນໄດ້ຂຽນວ່າ: “ເລືອດແດງຂອງນັກຮົບສະຫຼະຊີວິດເຫຼົ່ານັ້ນເຮັດໃຫ້ທຸງປະຕິວັດເປັນສີແດງເຂັ້ມຂຶ້ນ. ການເສຍສະຫຼະຢ່າງກ້າຫານຂອງນັກຮົບເພື່ອຊາດໄດ້ກະກຽມໃຫ້ປະເທດຂອງເຮົາ ເບັ່ງບານດ້ວຍເອກະລາດ ແລະ ອິດສະລະພາບ. ປະຊາຊົນຂອງພວກເຮົາຈະລະນຶກເຖິງຄຸນງາມຄວາມດີຂອງນັກຮົບສະຫຼະຊີວິດເພື່ອຊາດຕະຫຼອດໄປ...”(1).
ວັນທີ 16 ກຸມພາ 1947, ປະທານໂຮ່ຈີມິນລົງນາມດຳລັດສະບັບເລກທີ 20/SL ປະກາດໃຊ້ລະບົບເງິນບຳນານສຳລັບທະຫານບາດເຈັບ ແລະ ເງິນອຸດໜູນການເສຍຊີວິດ, ພ້ອມກັນນັ້ນກໍເຫັນດີນຳການສະເໜີເອົາວັນທີ 27 ເດືອນກໍລະກົດທຸກປີເປັນວັນທະຫານເສຍອົງຄະທົ່ວປະເທດ, ເປັນໂອກາດເພື່ອເຊີດຊູຊົມເຊີຍບຸນຄຸນຂອງວິລະຊົນທີ່ເສຍສະຫຼະຊີວິດ, ທະຫານເສຍອົງຄະ, ທະຫານເຈັບປ່ວຍ ແລະ ບັນດາຜູ້ທີ່ມີຄຸນງາມຄວາມດີຕໍ່ການປະຕິວັດ.
ເຖິງວ່າປະເທດຍັງມີຄວາມຫຍຸ້ງຍາກຫຼາຍຢ່າງກໍຕາມ, ແຕ່ພັກແລະລັດຫວຽດນາມຍາມໃດກໍໃຫ້ຄວາມສຳຄັນກັບການນຳພາ, ຊີ້ນຳວຽກງານເບິ່ງແຍງທະຫານເສຍອົງຄະ - ນັກຮົບສະຫຼະຊີວິດ ແລະ ຜູ້ທີ່ມີຄຸນງາມຄວາມດີຕໍ່ການປະຕິວັດ. ແຕ່ປີ 1947 ເຖິງປະຈຸບັນ, ລະບົບບັນດາເອກະສານທາງກົດໝາຍກ່ຽວກັບການໃຫ້ບຸລິມະສິດແກ່ຜູ້ທີ່ມີຄຸນງາມຄວາມດີຕໍ່ການປະຕິວັດ ໄດ້ຮັບການສ້າງແລະປະກາດໃຊ້ຢ່າງຄົບຖ້ວນ, ສົມບູນ ແລະ ທັນເວລາພໍສົມຄວນ, ໄດ້ລະບຸໄວ້ໃນລັດຖະທຳມະນູນຂອງປະເທດສາທາລະນະລັດສັງຄົມນິຍົມຫວຽດນາມ ແລະໄດ້ກຳນົດໃນເອກະສານຕ່າງໆເຊັ່ນ: ກົດດຳລັດກ່ຽວກັບການບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ, ກົດ ດຳລັດວ່າດ້ວຍການປະດັບນາມມະຍົດແຫ່ງລັດ “ແມ່ວິລະຊົນຫວຽດນາມ” ພ້ອມດ້ວຍນະໂຍບາຍບຸລິມະສິດອື່ນໆອີກຫຼາຍຢ່າງ; ເຊິ່ງໄດ້ຫັນເປັນນິຕິກຳໃຫ້ແຜນນະໂຍບາຍ, ນະໂຍບາຍຂອງພັກແລະລັດກາຍເປັນພື້ນຖານກົດໝາຍ ສຳລັບການຜັນຂະຫຍາຍປະຕິບັດບັນດານະໂຍບາຍ ແລະລະບອບບຸລິມມະສິດຢ່າງຄົບຊຸດຕໍ່ຜູ້ມີຄຸນງາມຄວາມດີ ແລະ ຍາດພີ່ນ້ອງ.
ດ້ວຍທັດສະນະແລະເປົ້າໝາຍທີ່ສະເໝີຕົ້ນສະເໝີປາຍຂອງພັກແລະລັດຄື ຕ້ອງເຊື່ອມຕິດເສດຖະກິດແລະສັງຄົມ, ລວມນະໂຍບາຍເສດຖະກິດເປັນເອກະພາບກັບນະໂຍບາຍສັງຄົມ, ການເຕີບໂຕເສດຖະກິດໄປຄຽງຄູ່ກັບການປະຕິບັກຄວາມກ້າວໜ້າ ແລະຄວາມຍຸຕິທຳທາງສັງຄົມ ໃນແຕ່ລະນະໂຍບາຍ ແລະໃນຕະຫຼອດຂະບວນວິວັດການພັດທະນາຂອງປະເທດ, ກອງປະຊຸມຄະນະບໍລິຫານງານສູນກາງພັກຄັ້ງທີ 5 ສະໄໝທີ 11 ໄດ້ປະກາດໃຊ້ມະຕິສະບັບເລກທີ 15-NQ/TW “ບາງບັນຫາກ່ຽວກັບນະໂຍບາຍສັງຄົມໄລຍະປີ 2012 - 2020” ເຊິ່ງແມ່ນຂີດໝາຍສຳຄັນສືບຕໍ່ຢືນຢັນຄວາມເອົາໃຈໃສ່ຂອງພັກເຖິງການປະຕິບັດນະໂຍບາຍສັງຄົມ ເພື່ອແນໃສ່ເປົ້າໝາຍການພັດທະນາຢ່າງໄວວາແລະຍືນຍົງ, ສຸມໃສ່ສອງກຸ່ມນະໂຍບາຍພື້ນຖານແລະສຳຄັນໃນລະບົບບັນດານະໂຍບາຍສັງຄົມແມ່ນ ນະໂຍບາຍຍຸລິມະສິດໃຫ້ແກ່ຜູ້ມີຄຸນງາມຄວາມດີ ແລະ ນະໄຍບາຍຄວາມປອດໄພທາງສັງຄົມ.
ວັນທີ 5 ພະຈິກ 2020, ກົມການເມືອງສູນກາງພັກໄດ້ອອກບົດສະຫຼຸບສະບັບເລກທີ 92-KL/TW “ກ່ຽວກັບການສືບຕໍ່ປະຕິບັດມະຕິກອງປະຊຸມສູນກາງພັກຄັ້ງທີ 5 ສະໄໝທີ 11 ບາງບັນຫາກ່ຽວກັບນະໂຍບາຍສັງຄົມໄລຍະປີ 2012 - 2020” ປະເມີນຢ່າງເລິກເຊິ່ງບັນດາຜົນສຳເລັດທີ່ໄດ້ຮັບໃນໄລຍະທີ່ຜ່ານມາ, ຢືນຢັນແຜນນະໂຍບາຍ, ນະໂຍບາຍທີ່ຖືກຕ້ອງຂອງພັກ, ລັດ ແລະ ຄວາມດີເດັ່ນຂອງລະບອບສັງຄົມນິຍົມຢູ່ປະເທດເຮົາ ຕໍ່ວຽກງານການນະໂຍບາຍສັງຄົມ, ໃນນັ້ນມີນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ. ເອກະສານກອງປະຊຸມໃຫຍ່ຄັ້ງທີ 13 ຂອງພັກກໍໄດ້ຕັ້ງຄວາມຕ້ອງການກ່ຽວກັບການປັບປຸງບູລະນະ ແລະປະຕິບັດເປັນຢ່າງດີ ກົດໝາຍ, ນະໂຍບາຍຕໍ່ຜູ້ມີຄຸນງາມຄວາມດີ ບົນພື້ນຖານແຫຼ່ງພະລັງຂອງລັດແລະສັງຄົມ, ຮັບປະກັນໃຫ້ຜູ້ມີຄຸນງາມຄວາມດີແລະຄອບຄົວ ມີມາດຕະຖານການດຳລົງຊີວິດປານກາງດີຂຶ້ນໄປ ໃນເຂດທີ່ຢູ່ອາໄສ. ຈັດສັນງົບປະມານເພື່ອສືບຕໍ່ປະຕິບັດການເພີ່ມເງິນອຸດໜູນສັງຄົມ, ອຸດໜູນບຸລິມະສິດໃຫ້ແກ່ຜູ້ມີຄຸນງາມຄວາມດີ, ແກ້ໄຂນະໂຍບາຍໂດຍພື້ນຖານສໍາລັບຜູ້ມີຄຸນງານຄວາມດີ; ຍົກລະດັບບັນດາກິດຈະກຳ “ຕອບແທນບຸນຄຸນ”.
ບົນພື້ນຖານສະຫຼຸບສັງລວມພຶດຕິກຳ ແລະ ການຜັນຂະຫຍາຍທັດສະນະຊີ້ນຳຂອງພັກ ຕໍ່ວຽກງານເບິ່ງແຍງຜູ້ມີຄຸນງາມຄວາມດີ, ໃນນັ້ນມີການຜັນຂະຫຍາຍບັນດາວຽກງານ ແລະ ໜ້າທີ່ສະເພາະ ທີ່ກຳນົດໄວ້ໃນຄຳສັ່ງເລກທີ 14-CT/TW, ລົງວັນທີ 19 ກໍລະກົດ 2017, ຂອງຄະນະເລຂາທິການສູນກາງພັກ “ກ່ຽວກັບການເພີ່ມທະວີການນຳພາຂອງພັກຕໍ່ວຽກງານດູແລຜູ້ມີຄຸນງາມຄວາມດີຕໍ່ການປະຕິວັດ”, ປີ 2020, ລັດຖະບານໄດ້ສະເໜີໃຫ້ຄະນະປະຈຳສະພາແຫ່ງຊາດພິຈາລະນາອະນຸມັດກົດດຳລັດວ່າດ້ວຍການບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ (ສະບັບປັບປຸງ) ໃນວັນທີ 9 ທັນວາ 2020 ທີ່ກອງປະຊຸມຄັ້ງທີ 51. ກົດດຳລັດປະກອບດ້ວຍ 7 ໝວດແລະ 58 ມາດຕາ ເຊິ່ງໄດ້ປັບປຸງຢ່າງພື້ນຖານ ຮອບດ້ານ ແລະ ເພີ່ມເຕີນຫຼາຍນະໂຍບາຍໃໝ່ ແນໃສ່ສືບຕໍ່ຢືນຢັນຫຼັກການທີ່ສະເໝີຕົ້ນສະເໝີປາຍຂອງພັກແລະລັດ: ການເບິ່ງແຍງສຸຂະພາບ, ຊີວິດດ້ານວັດຖຸແລະຈິດໃຈ ຂອງຜູ້ມີຄຸນງາມຄວາມດີ ແລະ ຄອບຄົວຂອງຜູ້ມີຄຸນງາມຄວາມດີຕໍ່ການປະຕິວັດ ແມ່ນຄວາມຮັບຜິດຊອບຂອງລັດແລະສັງຄົມ; ລະບອບບຸລິມະສິດໃຫ້ແກ່ຜູ້ມີຄຸນງາມຄວາມດີ ແລະ ຄອບຄົວຂອງຜູ້ມີຄຸນງາມຄວາມດີຕໍ່ການປະຕິວັດ ຕ້ອງໄດ້ຮັບການກຳນົດແລະດັດປັບໃຫ້ເໝາະສົມກັບສະພາບເສດຖະກິດ - ສັງຄົມຂອງປະເທດໃນແຕ່ລະໄລຍະ, ຮັບປະກັນມາດຕະຖານຊີວິດການເປັນຢູ່ຂອງຜູ້ມີຄຸນງາມຄວາມດີຕໍ່ການປະຕິວັດ ໃຫ້ເທົ່າກັບ ຫຼື ສູງກວ່າລະດັບສະເລ່ຍຂອງຊຸມຊົນທີ່ຢູ່ອາໄສ. ກົດດຳລັດສະບັບປັບປຸງກໍໄດ້ຂະຫຍາຍຂອບເຂດການດັດປັບ ສຳລັບຊາວຕ່າງປະເທດທີ່ມີຄຸນງາມຄວາມດີຕໍ່ການປະຕິວັດຫວຽດນາມ, ເພີ່ມບາງເປົ້າໝາຍຜູ້ມີຄຸນງາມຄວາມດີຕໍ່ການປະຕິວັດ ແລະ ຍາດພີ່ນ້ອງ ທີ່ໄດ້ຮັບຜົນຈາກລະບອບບຸລິມະສິດເຊັ່ນ: ຜູ້ຖືກສັດຕູຄຸມຂັງເນື່ອງຈາກການເຄື່ອນໄຫວປະຕິວັດໂດຍກົງ, ໄດ້ສູ້ຮົບປົກປັກຮັກສາປະເທດຊາດ, ໄດ້ເຮັດໜ້າທີ່ສາກົນຫຼັງປີ 1975; ຜູ້ທີ່ເຂົ້າຮ່ວມການຕໍ່ສູ້ປົດປ່ອຍຊາດ ແລະ ປົກປັກຮັກສາປະເທດຊາດ ທີ່ໄດ້ຮັບການຍ້ອງຍໍຈາກລັດດ້ວຍຫຼຽນໄຊໄຊຊະນະ, ຫຼຽນກາໄຊຊະນະຂອງລັດ; ເພີ່ມເຕີມຜູ້ທີ່ໄດ້ຮັບບຸລິມະສິດແມ່ນຜົວຫຼືເມຍຂອງນັກຮົບເສຍຊີວິດທີ່ແຕ່ງງານໃໝ່ ແຕ່ຍັງລ້ຽງລູກຂອງນັກຮົບເສຍຊີວິດຈົນເປັນຜູ້ໃຫຍ່ ຫຼືເບິ່ງແຍງດູແລພໍ່ຫຼືແມ່ຂອງນັກຮົບເສຍຊີວິດໃນເວລາຍັງມີຊີວິດຢູ່, ເບິ່ງແຍງດູແລພໍ່ຫຼືແມ່ຂອງນັກຮົບທີ່ກຳລັງເຄື່ອນໄຫວຢູ່ໃນແນວຮົບບໍ່ມີເງື່ອນໄຂເບິ່ງແຍງພໍ່ແມ່ຂອງຕົນໄດ້; ເພີ່ມເຕີມລະບອບປະກັນສຸຂະພາບ ແລະເງິນອຸດໜູນການເສຍຊີວິດ ສຳລັບເມຍຫຼືຜົວຂອງນັກຮົບເສຍຊີວິດທີ່ແຕ່ງງານໃໝ່; ກຳນົດເງິນອຸດໜູນປະຈຳເດືອນໃຫ້ບັນດາແມ່ວິລະຊົນຫວຽດນາມ ແມ່ນ 3 ເທົ່າຂອງອັດຕາຄ່າມາດຕະຖານ…
ລະບົບບັນດານະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີໄດ້ຮັບການປັບປຸງໃຫ້ສົມບຸນຂຶ້ນເລື້ອຍໆ ແລະ ໄດ້ຮັບການຜັນຂະຫຍາຍຢ່າງຮອບດ້ານ, ຄົບຊຸດໂດຍລະບົບການເມືອງທັງໝົດ, ວຽກງານເບິ່ງແຍງຜູ້ມີຄຸນງາມຄວາມດີໄດ້ມີການຫັນປ່ຽນຢ່າງແຂງແຮງ, ສ້າງເປັນຂະບວນການຕອບແທນບຸນຄຸນທີ່ກວ້າງຂວາງ, ຕະຫຼອດຕັ້ງແຕ່ສູນກາງໄປຮອດບ້ານ, ໝູ່ບ້ານຕ່າງໆ; ລະບອບແລະນະໂຍບາຍສຳລັບຜູ້ມີຄຸນງາມຄວາມດີໄດ້ຂະຫຍາຍອອກໄປໃສ່ຜູ້ໄດ້ຮັບຜົນປະໂຫຍດ ດ້ວຍລະດັບເງິນອຸດໜູນທີ່ເພີ່ມຂຶ້ນທຸກປີ ຕາມສະພາບເສດຖະກິດຂອງປະເທດ, ພິເສດແມ່ນ ບັນຫາສຳເນົາໜັງສືຂໍຢືນຢັນທະຫານບາດເຈັບເສຍອົງຄະ, ນັກຮົບສະຫຼະຊີວິດ ທີ່ຄ້າງຢູ່ໃນບັນດາທ້ອງຖິ່ນ, ອົງການຕຳຫຼວດ, ກອງທັບນັ້ນ ໄດ້ຮັບການແກ້ໄຂໂດຍພື້ນຖານໃນປີ 2020(2).
ມາເຖິງດຽວນີ້, ໃນທົ່ວປະເທດໄດ້ຢືນຢັນວ່າມີ 9,2 ລ້ານຄົນທີ່ມີຄຸນງາມຄວາມດີຕໍ່ການປະຕິວັດ, ໃນນັ້ນ 1,3 ຄົນມີຄຸນງາມຄວາມດີໄດ້ຮັບເງິນອຸດໜູນປະຈຳເດືອນ. ໃນແຕ່ລະປີ ໄດ້ແກ້ໄຂລະບອບເງິນອຸດໜູນຄັ້ງດຽວໃຫ້ 6.000 ຫາ 8.000 ກໍລະນີ, ຈັດຕັ້ງໃຫ້ຜູ້ມີຄຸນງາມຄວາມດີຫຼາຍກວ່າ 580.000 ຄົນເຂົ້າຮັບບໍລິການພະຍາບານປົກກະຕິ ແລະສະໜັບສະໜູນການສຶກສາປະມານ 40.000 ຄົນ. ລະດັບມາດຕະຖານຂອງເງິນອຸດໜູນ, ເບ້ຍລ້ຽງບຸລິມະສິດສຳລັບຜູ້ມີຄຸນງາມຄວາມດີ ໄດ້ເພີ່ມຂຶ້ນຕາມແຜນງານໃນການປັບເງິນເດືອນພື້ນຖານ. ໄລຍະປີ 2012 - 2019, ເງິນອຸດໜູນໄດ້ເພີ່ມຂຶ້ນປະມານ 40%, ປີ 2018 ແມ່ນ 1.515.000 ດົ່ງ ແລະປີ 2019 ແມ່ນ 1.624.000 ດົ່ງ.
ແຕ່ປີ 2012 ເຖິງປີ 2019, ໂດຍພື້ນຖານແລ້ວ, ທົ່ວປະເທດໄດ້ສຳເລັດການຊ່ວຍເຫຼືອທີ່ຢູ່ອາໄສໃຫ້ 393.707 ຄອບຄົວທີ່ມີຄຸນງາມຄວາມດີ, ລື່ນຄາດໝາຍທີ່ວາງໄວ້ໃນມະຕິເລກທີ 15-NQ/TW, ວັນທີ 1 ມິຖຸນາ 2012, ຂອງກອງປະຊຸມຄະນະບໍລິຫານງານສູນກາງພັກຄັ້ງທີ 5 ສະໄໝທີ 11: “ບາງບັນຫາກ່ຽວກັບນະໂຍບາຍສັງຄົມໄລຍະປີ 2012 - 2020”. ນະໂຍບາຍຊ່ວຍເຫຼືອທີ່ຢູ່ອາໄສໃຫ້ຜູ້ມີຄຸນງາມຄວາມດີ ໄດ້ແລະກຳລັງຊ່ວຍໃຫ້ເຂົາເຈົ້າມີຄວາມໝັ້ນຄົງໃນຊີວິດຫຼາຍຂຶ້ນ, ຄ່ອຍໆປັບປຸງ ແລະຍົກສູງຄຸນນະພາບຊີວິດຂອງເຂົາເຈົ້າ ແລະ ໄດ້ຮັບຄວາມເຫັນດີເຫັນພ້ອມ ສະໜັບສະໜູນ ຂອງປະຊາຊົນ ແລະ ບັນດາອົງການຈັດຕັ້ງສັງຄົມ. ເຄືອຂ່າຍສະຖານພະຍາບານ, ພັກຟື້ນ, ສູນສັນຍະກຳກະດູກ ແລະ ຟື້ນຟູຮ່າງກາຍ ໄດ້ຖືກວາງແຜນໂດຍລວມໃນທົ່ວປະເທດ, ດ້ວຍສະຖານພະຍາບານ ພັກຟື້ນລ້ຽງດູ 65 ແຫ່ງ ທີ່ໄດ້ລົງທຶນໃສ່ສິ່ງອຳນວຍຄວາມສະດວກ, ວັດຖຸອຸປະກອນ ແລະ ພະນັກງານ ໃຫ້ພຽງພໍກັບຄວາມຮຽກຮ້ອງຕ້ອງການພື້ນຖານ ໃນການເບິ່ງແຍງດູແລ ແລະ ພະຍາບານຜູ້ມີຄຸນງາມຄວາມດີ, ໂດຍສະເພາະແມ່ນ ທະຫານບາດເຈັບໜັກ. ໄດ້ເອົາໃຈໃສ່ລົງທຶນກໍ່ສ້າງ, ຍົກລະດັບ ປັບປຸງ ສ້ອມແປງຂຸມຝັງສົບຂອງນັກຮົບສະຫຼະຊີວິດ, ສຸສານນັກຮົບສະຫຼະຊີວິດ, ອະນຸສອນສະຖານນັກຮົບສະຫຼະຊີວິດ, ເຊິ່ງໃນທົ່ວປະເທດມີສຸສານນັກຮົບສະຫຼະຊີວິດ 3.200 ແຫ່ງ ແລະ ອະນຸສອນສະຖານນັກຮົບສະຫຼະຊີວິດຫຼາຍກວ່າ 3.000 ແຫ່ງ. ວຽກງານຄົ້ນຫາແລະເກັບໂຮມຊາກສົບຂອງນັກຮົບສະຫຼະຊີວິດ, ການກຳນົດຢືນຢັນຊາກສົບຂອງນັກຮົບສະຫຼະຊີວິດ ໄດ້ຜັນຂະຫຍາຍຢ່າງຕັ້ງໜ້າດ້ວຍຫຼາຍມາດຕະການທີ່ເໝາະສົມຄົບຊຸດ. ຂະບວນການ “ທົ່ວປວງຊົນເບິ່ງແຍງດູແລຄອບຄົວຂອງທະຫານເສຍອົງຄະ, ນັກຮົບສະຫຼະຊີວິດ ແລະ ຜູ້ມີຄຸນງາມຄວາມດີຕໍ່ການປະຕິວັດ”, ສະໜັບສະໜູນກອງທຶນ “ຕອບແທນບຸນຄຸນ” ນັບມື້ນັບຂະຫຍາຍຕົວຢ່າງກວ້າງຂວາງ, ໄດ້ຮັບຄວາມເຫັນດີເຫັນພ້ອມ ແລະສະໜັບສະໜູນຈາກສັງຄົມ.
ການປະຕິບັດເປັນຢ່າງດີນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີ ເປັນທັງອາລົມຈິດອັນສັກສິດ, ຄວາມຮັບຜິດຊອບອັນສູງສົ່ງຂອງລະບົບການເມືອງ ແລະ ທົ່ວປວງຊົນທັງຊາດ, ທັງເປັນປັດໄຈຮັບປະກັນການປະຕິບັດຄວາມກ້າວໜ້າ ແລະ ຄວາມຍຸຕິທຳທາງສັງຄົມ, ສະແດງອອກຢ່າງເລິກເຊິ່ງເຖິງຄວາມດີເດັ່ນ ແລະ ທາດແທ້ອັນດີງາມ ຂອງລະບອບສັງຄົມນິຍົມ, ປະກອບສ່ວນເຂົ້າໃນການປັບປຸງກຸ່ມກ້ອນມະຫາສາມັກຄີປວງຊົນທັງຊາດ, ເພີ່ມທະວີຄວາມເຊື່ອໝັ້ນຂອງປະຊາຊົນຕໍ່ພັກແລະລັດ. ດັ່ງນັ້ນ, ຕ້ອງຫັນການຮັບຮູ້ເປັນການກະທຳທີ່ສະເພາະແທດຈິງ ແລະ ປະກອບສ່ວນອັນຕັ້ງໜ້າເຂົ້າໃນການປະຕິບັດນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີ, ຍົກສູງປະສິດທິຜົນແລະນຳບັນດາຂະບວນການ “ຕອບແທນບຸນຄຸນ”, “ທົ່ວປວງຊົນເບິ່ງແຍງດູແລຄອຍຄົວຂອງທະຫານເສຍອົງຄະ, ນະກຮົບສະຫຼະຊີວິດ ແລະ ຜູ້ມີຄຸນງາມຄວາມດີຕໍ່ການປະຕິວັດ” ກາຍເປັນການເຄື່ອນໄຫວຢ່າງເປັນປະຈຳໃນຊີວິດສັງຄົມ.
ໃນເວລາທີ່ຈະມາເຖິງ, ພ້ອມກັນກັບການຈັດຕັ້ງປະຕິບັດກົດດຳລັດວ່າດ້ວຍການບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດສະບັບປັບປຸງ, ກະຊວງແຮງງານ - ທະຫານເສຍອົງຄະ ແລະ ສັງຄົມ ຈະສືບຕໍ່ຄົ້ນຄວ້າ, ປັບປຸງລະບຽບກົດໝາຍ, ນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີ, ຖືວ່ານີ້ແມ່ນໜຶ່ງໃນຂົງເຂດຈຸດໜັກ, ແຖວໜ້າ, ໃນນັ້ນ ໃຫ້ຄວາມສຳຄັນເຖິງບັນຫາຕ່າງໆດັ່ງນີ້:
ທີໜຶ່ງ, ສືບຕໍ່ຊາບຊຶມຢ່າງເລິກເຊິ່ງ ແລະປະຕິບັດແນວຄິດຂອງປະທານໂຮ່ຈີມິນກ່ຽວກັບວຽກງານເບິ່ງແຍງທະຫານເສຍອົງຄະ, ຄອບຄົວນັກຮົບສະຫຼະຊີວິດ; ການເບິ່ງແຍງທະຫານເສຍອົງຄະ, ຄອບຄົວນັກຮົບສະຫຼະຊີວິດ ແລະ ຜູ້ມີຄຸນງາມຄວາມດີຕໍ່ການປະຕິວັດ ຢ່າງບໍ່ຢຸດຢັ້ງ, ຖືວ່ານີ້ແມ່ນຫຼັກສິນທຳອັນດີງາມ, ທັງແມ່ນພາລະໜ້າທີ່, ຄວາມຮັບຜິດຊອບ, ຄວາມຮັກແພງສະຫາຍ ແລະ ພີ່ນ້ອງຮ່ວມຊາດຂອງຊາວຫວຽດນາມທຸກຄົນ.
ທີສອງ, ສຸມການນຳພາ ຊີ້ນຳການປະຕິບັດຢ່າງຄົບຖ້ວນ ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດຕໍ່ທະຫານເສຍອົງຄະ, ທະຫານບາດເຈັບ, ຄອບຄົວນັກຮົບສະຫຼະຊີວິດ ແລະ ຜູ້ມີຄຸນງາມຄວາມດີ. ໃນນັ້ນ, ເອົາໃຈໃສ່ເປັນພິເສດເຖິງຄອບຄົວຜູ້ມີຄຸນງາມຄວາມດີທີ່ມີຄວາມຫຍຸ້ງຍາກ, ຜູ້ມີຄຸນງາມຄວາມດີທີ່ພວມຢູ່ໂດດດ່ຽວ ບໍ່ມີບ່ອນເພິ່ງພາອາໄສ, ບັນດາຄອບຄົວຜູ້ມີຄຸນງາມຄວາມດີທີ່ຢູ່ເຂດຊົນເຜົ່າສ່ວນໜ້ອຍ, ເຂດຫ່າງໄດສອກຫຼີກ, ເຂດຖານທີ່ໝັ້ນປະຕິວັດໃນອະດີດ, ພະຍາຍາມບໍ່ໃຫ້ມີຄອບຄົວທີ່ມີຄຸນງາມຄວາມດີໃດ ຕ້ອງຢູ່ໃນສະພາບທຸກຍາກອີກ.
ທີສາມ, ສືບຕໍ່ຊຸກຍູ້ການໂຄສະນາເຜີຍແຜ່ແຜນນະໂຍບາຍ, ນະໂຍບາຍຂອງພັກແລະລັດ ກ່ຽວກັບນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ, ເນື້ອໃນໃໝ່ຂອງກົດດຳລັດວ່າດ້ວນການບຸລິມະສິດໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດປີ 2020. ດຳເນີນການປະເມີນສະຫຼຸບຢ່າງເປັນປົກກະຕິ ແລະ ຄົ້ນຄວ້າຢ່າງຮອບດ້ານ ບັນດາບັນຫາທີ່ຍັງຄົງຄ້າງໃນຂະບວນການຜັນຂະຫຍາຍປະຕິບັດ ເພື່ອປະກາດໃຊ້ລະບຽບການລະອຽດ, ແນະນຳການປະຕິບັດກົດດຳລັດຢ່າງຖີ່ຖ້ວນແລະເປັນເອກະພາບ, ສ້າງເງື່ອນໄຂສະດວກໃຫ້ບັນດານະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີເຂົ້າສູ່ຊີວິດການເປັນຢູ່.
ທີສີ່, ບຸລິມະສິດຊັບພະຍາກອນເພື່ອແກ້ໄຂຄວາມຕ້ອງການອັນຮີບດ່ວນຂອງຜູ້ມີຄຸນງາມຄວາມດີເຊັ່ນ: ເບິ່ງແຍງແມ່ວິລະຊົນຫວຽດນາມ, ການຝຶກອົບຮົມວິຊາຊີບ, ການສ້າງວຽກເຮັດງານທໍາ, ຊ່ວຍເຫຼືອຄອບຄົວຜູ້ມີຄຸນງາມຄວາມດີແກ້ໄຂຄວາມຫຍຸ້ງຍາກ ພັດທະນາການຜະລິດທຸລະກິດ ດ້ວຍການເຄື່ອນໄຫວກິດຈະກໍາສະເພາະ. ຍູ້ແຮງຂະບວນການຫັນເປັນສັງຄົມວຽກງານເບິ່ງແຍງຊີວິດຜູ້ມີຄຸນງາມຄວາມດີຕໍ່ການປະຕິວັດ ບົນພື້ນຖານລະດົມແຫຼ່ງພະລັງສັງຄົມ ສົມທົບກັບແຫຼ່ງພະລັງຂອງລັດ.
ທີຫ້າ, ຍົກສູງຄວາມສາມາດ, ປະສິດທິພາບ ແລະ ປະສິດທິຜົນການຄຸ້ມຄອງລັດຕໍ່ວຽກງານເບິ່ງແຍງຊີວິດຜູ້ມີຄຸນງາມຄວາມດີຕໍ່ການປະຕິວັດ, ຍູ້ແຮງການຄົ້ນຫາທ້ອນໂຮມຊາກສົບຂອງນັກຮົບສະຫຼະຊີວິດ ຕິດກັບການລະບຸຢືນຢັນນັກຮົບສະຫຼະຊີວິດ. ພ້ອມກັນກັບການເອົາໃຈໃສ່ກວດກາ ແລະ ຈັດການຢ່າງເຂັ້ມງວດກັບກໍລະນີການໃຊ້ປະໂຫຍດຈາກນະໂຍບາຍເພື່ອຜົນປະໂຫຍດສ່ວນຕົວນັ້ນ, ຕ້ອງຮັບປະກັນຄວາມພາວະວິໄສແລະຍຸຕິທຳລະຫວ່າງບັນດາເປົ້າໝາຍ, ສ້າງຄວາມເຊື່ອໝັ້ນຂອງປະຊາຊົນຕໍ່ນະໂຍບາຍບຸລິມະສິດໃຫ້ແກ່ຜູ້ມີຄຸນງາມຄວາມດີ.
ວາລະຄົບຮອບ 74 ປີ ວັນທະຫານເສຍອົງຄະ - ນັກຮົບສະຫຼະຊີວິດປີນີ້ ກໍ່ແມ່ນເວລາທີ່ທົ່ວພັກສູ້ຊົນເພື່ອບັນລຸເປົ້າໝາຍທີ່ກຳນົດໄວ້ໃນຄຳສັ່ງເລກທີ່ 14-CT/TW, ວັນທີ 19 ກໍລະກົດ 2017, ຂອງຄະນະເລຂາທິການສູນກາງພັກ “ກ່ຽວກັບການສືບຕໍ່ເພີ່ມທະວີການນຳພາຂອງພັກຕໍ່ວຽກງານເບິ່ງແຍງຜູ້ມີຄຸນງາມຄວາມດີຕໍ່ການປະຕິວັດ”. ນີ້ແມ່ນໜ້າທີ່ການເມືອງຂອງພັກແລະລັດ, ແຕ່ກໍແມ່ນຄວາມຮັບຜິດຊອບ, ແມ່ນຫຼັກສິນທຳຂອງຊາວຫວຽດນາມທຸກຄົນ ເພື່ອສືບຕໍ່ຈູດໄຟແຫ່ງຄວາມຮູ້ບຸນຄຸນຕໍ່ຜູ້ມີຄຸນງາມຄວາມດີຕໍ່ການປະຕິວັດ./.
----------------------------
(1) ໂຮ່ຈີມິນ: ນິພົນຄົຍຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2001, ເຫຼັ້ມ 10, ໜ້າ 3.
(2) ໄດ້ພິຈາລະນາແກ້ໄຂ 5.900 ກໍລະນີທີ່ຄ້າງຄາ; ປະເມີນແລະຍື່ນສະເໜີຕໍ່ນາຍົກລັດຖະມົນຕີເພື່ອມອບໃບ “ປະເທດຊາດຮັບຮອງຄຸນງາມຄວາມດີ” ໃຫ້ນັດຮົບສະຫຼະຊີວິດຫຼາຍກວ່າ 2.000 ຄົນ, ປະເມີນທະຫານເສຍອົງຄະ ແລະ ຜູ້ໄດ້ຮັບຜົນປະໂຫຍດດ້ານນະໂຍບາຍຄືທະຫານເສຍອົງຄະຫຼາຍກວ່າ 2,500 ຄົນ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 970 (ເດືອນກໍລະກົດ 2021)
