ວກ. - ເຂດທີ່ໝັ້ນປະຕິວັດຫວຽດບັກ ມີວັດຖຸບູຮານ, ສະຖານທີ່ປະຫວັດສາດ, ວັດທະນະທຳ ແລະ ທັດສະນີຍະພາບຫຼາຍກວ່າ 1.000 ແຫ່ງ ພ້ອມດ້ວຍບູຮານວັດຖຸແຫ່ງການປະຕິວັດ ແລະ ສະຖານທີ່ສຳຄັນທີ່ກ່ຽວຂ້ອງກັບປະຫວັດສາດວິລະກຳຂອງຫວຽດນາມ ໃນສະໄໝຕໍ່ຕ້ານພວກລ່າເມືອງຂຶ້ນຝະລັ່ງ, ສິ່ງເຫຼົ່ານີ້ກຳລັງກາຍເປັນແຫຼ່ງຊັບພະຍາກອນ​ອັນ​ໃຫຍ່​ຫຼວງ ​ເພື່ອ​ພັດທະນາ​ການທ່ອງທ່ຽວ, ປະກອບສ່ວນ​ອະນຸລັກ​ ​ແລະ ​ເສີມ​ຂະຫຍາຍ​ຄຸນຄ່າ​ວັດທະນະທຳ​ພື້ນ​ເມືອງ​ອັນ​ດີງາມ ​ຂອງ​ບັນດາ​ເຜົ່າ​ໃນ​ເຂດນີ້.

ທ່ານ ຟ້າມ ມິງ ຈີ້ງ ກຳມະການກົມການເມືອງ, ນາຍົກລັດຖະມົນຕີ ພົບປະກັບພີ່ນ້ອງຮ່ວມຊາດຊາວເຜົ່າສ່ວນໜ້ອຍແຂວງກາວບັ່ງ ທີ່ເຂດປູຊະນີຍະສະຖານປະຫວັດສາດແຫ່ງຊາດພິເສດ ປາກບໍ່ (ຕາແສງ ເຈື່ອງຮ່າ, ເມືອງ ຮ່າກວ໋າງ, ແຂວງ ກາວບັງ) _ພາບ: TTXVN

ຄວາມດຶງດູດການທ່ອງທ່ຽວຂອງເຂດ​​ທີ່ໝັ້ນ​ປະ​ຕິ​ວັດຫວຽດບັກ

ເຂດ​ທີ່ໝັ້ນ​ປະ​ຕິ​ວັດຫວຽດບັກ​ປະ​ກອບ​ມີ 6 ແຂວງ​ຄື: ກາວບັ່ງ, ບັກກ້ານ, ລ້າງເຊີນ, ຖາຍງວຽນ, ຮ່າຢາງ ແລະ ຕວຽນກວາງ; ມີເນື້ອທີ່ທຳມະຊາດ 37.204 ກມ2, ຈຳນວນປະຊາກອນ 4.576.140 ຄົນ (ປີ 2020). ເຂດ​ທີ່ໝັ້ນປະ​ຕິ​ວັດຫວຽດບັກຖືກເອີ້ນວ່າ ນະຄອນຫຼວງແຫ່ງການຕໍ່ຕ້ານແມ່ນ​ສະຖານ​ທີ່​ທີ່​ມີຕຳແໜ່ງ​ຍຸດ​ທະ​ສາດ​ທີ່​ສຳຄັນພິເສດ ທາງ​ດ້ານ​ເສດຖະກິດ, ການ​ເມືອງ, ການ​ທະຫານ ​ແລະ ສັງຄົມ; ເປັນດິນແດນແຫ່ງຄວາມຈົງຮັກພັກດີ ແລະ ຄວາມຮັກ, ປະກອບສ່ວນອັນໃຫຍ່ຫຼວງໃນໄລຍະ ກ່ອນການລຸກຮື້ຂຶ້ນແລະ ໃນສົງຄາມຕໍ່ຕ້ານພວກລ່າເມືອງຂຶ້ນຝະລັ່ງເປັນເວລາ 9 ປີ (1945-1954).

ເຂດທີ່ໝັ້ນ​ປະ​ຕິ​ວັດຫວຽດບັກ ຕັ້ງ​ຢູ່​ໃນເຂດ​ພູດ​ອຍພາກ​ເໜືອ - ເຊິ່ງ​ແມ່ນ​ໜຶ່ງ​ໃນ 7 ​ເຂດ​ທ່ອງ​ທ່ຽວ​ຂອງ​ປະ​ເທດ ​ທີ່ລະບຸໄວ້​ໃນ​ຍຸດ​ທະ​ສາດການ​ພັດທະນາ​ການທ່ອງທ່ຽວຫວຽດນາມຮອດ​ປີ 2030, ໄດ້ຮັບການອະນຸມັດໃນມະຕິຕົກລົງເລກທີ 2473/QD-TTg, ລົງວັນທີ 30 ທັນວາ 2011, ໂດຍນາຍົກລັດຖະມົນຕີ. ນີ້​ແມ່ນ​ເຂດ​ທີ່​ມີ​ທີ່​ຕັ້ງ​ພູມ​ສາດ​ທີ່​ສະດວກ​ດີ, ຕັ້ງ​ຢູ່ໃກ້​ກັບ​ນະຄອນຫຼວງ​ຮ່າ​ໂນ້ຍ, ມີ​ລະບົບ​​ໂຄງສ້າງ​ພື້ນຖານການຄົມມະນາຄົມ​ທີ່ຂ້ອນຊ້າງສະດວກ, ມີ​ທ່າ​ແຮງ​ດ້ານ​ການທ່ອງທ່ຽວ​ທີ່​ຫຼາກ​ຫຼາຍ, ອຸດົມສົມບູນ​ທັງ​ທຳ​ມະ​ຊາດ ​ແລະ ວັດທະນະທຳ.   

ກ່ຽວກັບຊັບພະຍາກອນການທ່ອງທ່ຽວທາງທຳມະຊາດເນື້ອທີ່ສ່ວນໃຫຍ່ຂອງເຂດທີ່ໝັ້ນ​ປະ​ຕິ​ວັດຫວຽດບັກແມ່ນພູດອຍແລະພູພຽງ. ເນື່ອງຈາກພູມສັນຖານພູດອຍສູງ ບວກກັບປັດໄຈທາງດິນຟ້າອາກາດ, ລະບົບອຸທົກກະສາດຂອງແມ່ນ້ຳ, ຫ້ວຍຮ່ອງ ແລະ ທະເລສາບ, ພືດພັນ..., ດັ່ງນັ້ນ ເຂດ​ນີ້​ມີ​ທິວ​ທັດ​ທີ່​ສວຍ​ສົດ​ງົດ​ງາມ, ມີ​ພູ​ສູງ, ​ເຫວ​ເລິກ ແລະ ​​ທັດສະນິຍະພາບ​ທີ່​ສວຍ​ງາມ​ຫຼາຍ​ແຫ່ງ, ສ້າງ​ພູມ​ສັນ​ຖານ​ທີ່​ດຶງ​ດູດ​ໃຈ​ເປັນ​ພິ​ເສດ ເຊັ່ນ ພູເຂົາ ເໝົາເຊີນ, ທົ່ງຫຍ້າ ເຄົາຊາວ (ແຂວງລ້າງເຊີນ); ດົ່ງວັນ, ມ້າປີ້ແລ່ງ, ຕາດຕຽນ, ກິ່ວຢໍ໋ (ແຂວງຮ່າຢາງ)... ພິເສດແມ່ນ, ພູພຽງຫີນດົ່ງວັນ ແລະ ອຸທະຍານທໍລະນີວິທະຍາ ນອນເນື້ອກກາວບັ່ງ ໄດ້ຮັບການຍອມຮັບວ່າເປັນອຸທະຍານທໍລະນີວິທະຍາລະດັບໂລກ ໂດຍອົງການການສຶກສາ ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ (UNESCO)   

ສະ​ພາບ​ອາ​ກາດ​ຂອງເຂດ​ທີ່ໝັ້ນ​ປະ​ຕິ​ວັດຫວຽດບັກມີລັກສະນະຂອງ​ລົມ​ມໍ​ລະ​ສຸມ​ເຂດ​ຮ້ອນ, ລະດູໜາວມີອາກາດໜາວເຢັນ ໄດ້ຮັບອິດທິພົນຢ່າງຫຼວງຫຼາຍຈາກພູມສັນຖານພູດອຍ, ເໝາະສໍາລັບການທ່ອງທ່ຽວພັກຜ່ອນ. ຢູ່ທີ່ນີ້ມີຖ້ຳທີ່ສວຍງາມແລະກວ້າງຫຼາຍແຫ່ງເຊັ່ນ ຖ້ຳປາກບໍ່, ຖ້ຳເງື່ອມງາວ (ແຂວງກາວບັ່ງ)...; ມີເຄືອຂ່າຍ​ແມ່​ນ້ຳ​ຫ້ວຍຮ່ອງທີ່​ໜາ​ແໜ້ນ​ພໍ​ສົມຄວນ​ ແລະ ​ມີ​ທິວ​ທັດ​ທີ່​ສວຍ​ງາມ​ເຊັ່ນ ​ແມ່​ນ້ຳກີ່ກຸ່ງ, ແມ່ນ້ຳເທືອງ (ແຂວງລ້າງເຊີນ); ແມ່ນ້ຳຍໍເກວ໋ (ແຂວຮ່າຢາງ)...; ມີທະເລສາບໃຫຍ່ຫຼາຍແຫ່ງເຊັ່ນ ທະເລສາບໜູຍກົ໊ກ (ແຂວງຖາຍງວຽນ), ທະເລສາບນາຮາງ (ແຂວງຕວຽນກວາງ), ທະເລສາບບາເບ໋ (ແຂວງບັກກ້ານ)...; ມີ​ນ້ຳ​ແຮ່​, ນ້ຳ​ຮ້ອນ​ທີ່​ສາ​ມາດ​ນຳ​ໃຊ້​ເປັນ​ນ້ຳ​ດື່ມ, ປິ່ນ​ປົວ​ພະ​ຍາດ ແລະ ຮັບ​ໃຊ້​ການ​ພັດ​ທະ​ນາ​ການ​ທ່ອງ​ທ່ຽວ​ແບບ​ຣີ​ສອດ ປະສົມ​ກັບ​ການ​ຟື້ນ​ຟູ​ສຸ​ຂະ​ພາບ. 

ລະບົບນິເວດຂອງເຂດທີ່ໝັ້ນປະ​ຕິ​ວັດຫວຽດບັກມີຄວາມຫຼາກຫຼາຍ ແລະ ອຸດົມສົມບູນ ໂດຍສ່ວນໃຫຍ່ຢູ່ໃນ​ເຂດ​ປ່າສະຫງວນ​ແຫ່ງ​ຊາດ, ເຂດອະນຸລັກ​ທຳ​ມະ​ຊາດ ​ແລະ ຊີວະ​ນາໆ​ພັນ, ເຊິ່ງມີຄວາມສຳຄັນໃນດ້ານ​ວິທະຍາສາດ, ເສດຖະກິດ, ການ​ສຶກສາ, ສິ່ງ​ແວດ​ລ້ອມ ​ແລະ ມີ​ຄວາມ​ໝາຍ​ພິ​ເສດສຳລັບ​ການ​ຂຸດ​ຄົ້ນ ​ແລະ ພັດທະນາ​ຜະລິດ​ຕະພັນ​ການທ່ອງທ່ຽວ​ນິເວດ ເຊັ່ນ​ ປ່າສະຫງວນແຫ່ງຊາດ ບາເບ໋ (ແຂວງບັກກ້ານ), ປ່າສະຫງວນແຫ່ງຊາດ ເຟຍອວັກ - ເຟຍແດ໋ນ (ແຂວງກາວບັ່ງ)...; ບັນດາເຂດອະນຸລັກ​ທຳ​ມະ​ຊາດ ເຊັ່ນ ຫືວລຽນ (ແຂວງລ້າງເຊີນ), ກິມໄຫ (ແຂວງບັກກ້ານ), ເທິ່ນຊາ - ເຟື້ອງຮວ່າງ (ແຂວງຖາຍງວຽນ); ບັນດາເຂດອະນຸລັກສາຍພັນແລະທີ່ຢູ່ອາໃສ ເຊັ່ນ ເຂດ​ອະນຸລັກ​ພັນ​ທະ​ນີ ກາວວິດຈຸ່ງແຂັງ (ແຂວງກາວບັ່ງ)...   

ກ່ຽວກັບຊັບພະຍາກອນການທ່ອງທ່ຽວທາງວັດທະນະທຳໃນເຂດ​ທີ່ໝັ້ນ​ປະ​ຕິ​ວັດຫວຽດບັກມີບູຮານວັດຖຸທາງວັດທະນະທຳ ປະຫວັດສາດ, ປະຕິວັດ, ສິລະປະ, ສະຖາປັດຕະຍະກຳ ແລະ ບູຮານ​ຄະດີ​ຫຼາຍ​ແຫ່ງ. ປະຈຸບັນ, ທົ່ວປະເທດມີວັດຖຸບູຮານຫຼາຍກວ່າ 40.000 ແຫ່ງ, ໃນນັ້ນມີ 2.509 ແຫ່ງໄດ້ຖືກຈັດອັນດັບ; ຢູ່ 6 ແຂວງໃນເຂດ​ທີ່ໝັ້ນ​ປະ​ຕິ​ວັດຫວຽດບັກ ມີບູຮານສະຖານ 98 ແຫ່ງ ໄດ້ຖືກຈັດອັນດັບ, ກວມເອົາ 3,9% ຂອງທົ່ວປະເທດ. ໃນບັນດາບູຮານສະຖານທີ່ໄດ້ຖືກຈັດອັນດັບນັ້ນ, ມີ​ບູຮານວັດຖຸທາງວັດ​ທະ​ນະ​ທຳ​ ແລະ ປະ​ຫວັດ​ສາດ​​ປະ​ຕິ​ວັດ ​ທີ່​ມີ​ຄວາມ​ສຳ​ຄັນພິເສດ​ ແລະ ​ມີ​ຄຸນ​ຄ່າສູງຫຼາຍແຫ່ງ ເພື່ອ​ພັດ​ທະ​ນາ​ການ​ທ່ອງ​ທ່ຽວ ເຊັ່ນ ປາກບໍ່ (ແຂວງກາວ​ບັງ); ເຕິນຈ່າວ, ​ເຂດອະນຸສອນ​ສະຖານ ກິມບິ່ງ (ແຂວງຕວຽນກວາງ); ເຂດປອດໄພ ATK ດິ້ງຫວາ (ແຂວງຖາຍງວຽນ);...

ບັນດາອານຸສາວະລີສະຖາປັດຕະຍະກຳ, ສິລະປະ ແລະ ບູຮານຄະດີ ກໍ່ຫຼາກຫຼາຍທີ່ສຸດ ເຊັ່ນ ຄະລືຫາດ “ລາຊາແມ້ວ”; ເມືອງເກົ່າ ດົ່ງວັນ, ເສົາທຸງ ຫຼຸງກູ໊ (ແຂວງຮ່າຢາງ); ກີ່ວ ຈີລັງ, ສະຖານທີ່ໂບຮານຄະດີ ເຖິມຄວຽນ - ເຖິມຮາຍ - ແກ້ວແລ່ງ (ແຂວງລ້າງເຊີນ); ກຳແພງ ລາຊະວົງມາກ (ແຂວງຕວຽນກວາງ)...   

ຄຸນຄ່າວັດທະນະທຳທີ່ບໍ່ມີຕົວຕົນ ອຸດົມສົມບູນທີ່ສຸດ, ໃນນັ້ນຕ້ອງເວົ້າເຖິງບັນດາ​ຄຸນຄ່າ​ວັດທະນະທຳ​ຂອງ​ຊົນ​ເຜົ່າ​ສ່ວນ​ໜ້ອຍ​ເຊັ່ນ ວິຖີ​ຊີວິດ​ພື້ນ​ເມືອງ, ງານ​ບຸນ, ດົນຕີ​​ແລະການ​ຟ້ອນລຳພື້ນ​ເມືອງ, ໝູ່​ບ້ານ​ອາຊີບ​ຫັດຖະກຳ, ໂດຍສະເພາະການຫຼິ້ນກະຈັບປີແລະຂັບແທນ ຂອງເຜົ່າໄຕ່ແລະເຜົ່ານຸ່ງ ​ໄດ້ຮັບການ​ຈັດ​ເຂົ້າ​ໃນລາຍ​ຊື່ຕົວແທນ​ມໍລະດົກ​ວັດທະນະທຳ​ທີ່ບໍ່​ມີຕົວຕົນ​ຂອງ​ມະນຸດ​ຊາດ ໂດຍ UNESCO ​ໃນ​ວັນ​ທີ 13 ທັນວາ 2019. ເຂດ​ທີ່ໝັ້ນ​ປະ​ຕິ​ວັດຫວຽດບັກ ​ເປັນ​ທີ່ຕັ້ງ​ຂອງ 46 ຊົນ​ເຜົ່າ, ​ແຕ່​ລະ​ຊົນ​ເຜົ່າ​ລ້ວນ​ແຕ່​ມີ​ງານ​ບຸນ​ປະ​ເພນີ​ທີ່​ເປັນ​ເອກະລັກ​ສະ​ເພາະ ເຊິ່ງຕົວແທນແມ່ນ​ ງານບຸນໂລ່ງຕົ່ງຂອງເຜົ່າໄຕ່ແລະເຜົ່ານຸ່ງ; ງານ​ບຸນ​ມອບອັດຕະລັກໃຫ້ຜູ້ຊາຍຊາວເຜົ່າຢ້າວ...   

ດ້ວຍທ່າແຮງແລະຂໍ້ໄດ້ປຽບເທິງນີ້, ເຂດ​ທີ່ໝັ້ນ​ປະ​ຕິ​ວັດຫວຽດບັກໄດ້ພັດທະນາການທ່ອງທ່ຽວຫຼາຍຮູບແບບທີ່ແຕກຕ່າງກັນ, ພິ​ເສດ​ແມ່ນ ​ການ​ທ່ອງ​ທ່ຽວ​ປະຕິວັດ, ​ໃນ​ນັ້ນ​ມີ​ການ​​ທ່ຽວຊົມສະຖານທີ່, ການຮຽນ​ຮູ້​ກ່ຽວ​ກັບບູຮານວັດຖຸຂອງ​ການ​ປະຕິວັດ, ການອົບຮົມມູນເຊື້ອປະເພນີປະຕິວັດ ແລະ ຈັນ​ຍາ​ບັນ​ກິນນ້ຳ​ຮູ້​ເຖິງ​ບຸນຄູນຂອງແຫຼ່ງ​ ໃຫ້​ຊາວ​ໜຸ່ມຫວຽດນາມ​; ຢ້ຽມຢາມສະໜາມຮົບເກົ່າ ຢູ່ສະຖານທີ່ປະຫວັດສາດຕ່າງໆ ເຊັ່ນ ເຂດປອດໄພ ATK ເຕິນຈ່າວ (ແຂວງຕວຽນກວາງ), ເຂດປອດໄພ ATK ດິ້ງຫວາ (ແຂວງຖາຍງວຽນ) ແລະ ເຈີ້ໂດ່ນ (ແຂວງບັກກ້ານ) ຫຼື ສະຖານທີ່ປະຫວັດສາດ ປາກບໍ່ (ແຂວງກາວບັ່ງ), ບໍລິເວນອະນຸສອນສະຖານລຸງໂຮ່ ກັບບັ້ນຮົບຊາຍແດນ ໃນປີ 1950, ອະນຸສອນສະຖານໄຊຊະນະດົງເຄ, ອະນຸສອນສະຖານແຫ່ງຊາດພິເສດ ປ່າ ເຈິ່ນຮຶງດ້າວ (ແຂວງ ກາວບັ່ງ) ຫຼືຖານທີ່ໝັ້ນປະຕິວັດ ບັກເຊີນ (ແຂວງລ້າງເຊີນ)... ຄຽງຄູ່ກັນນັ້ນ, ກຸ່ມ​ຜະ​ລິດ​ຕະ​ພັນ​ການ​ທ່ອງ​ທ່ຽວ​ກັບໄປຫາແຫຼ່ງ ຫຼືສົມທົບກັບກຸ່ມຜະລິດຕະພັນການທ່ອງທ່ຽວແບບນິເວດ, ໄປຢ້ຽມຊົມແຫຼ່ງທ່ອງທ່ຽວທໍາມະຊາດ, ສຳຫຼວດຖະໜົນຫົນທາງ ແລະ ເພີດເພີນໄປກັບທິວທັດທຳມະຊາດທີ່ງົດງາມຂອງພູເຂົາສູງ; ກຸ່ມຜະລິດຕະພັນການທ່ອງທ່ຽວຊຸມຊົນ; ການທ່ອງທ່ຽວ​ທາງ​ຈິດ​ວິນຍານ... ​ເພື່ອກະຈາຍຄວາມຫຼາກຫຼາຍທາງ​ຜະລິດ​ຕະພັນການ​ທ່ອງ​ທ່ຽວ ໂດຍອີງ​ຕາມ​ຄວາມ​ໄດ້​ປຽບ​ຂອງ​ແຕ່ລະ​ທ້ອງ​ຖິ່ນ.

ໂດຍ​ເຂົ້າໃຈແຈ້ງເຖິງ​ບົດບາດ​ສຳຄັນ​ຂອງ​ການທ່ອງທ່ຽວ​ທີ່ເປັນ​ກຳລັງ​ຊຸກຍູ້​ການ​ພັດທະນາ​ເສດຖະກິດ, ​ໃນ​ຊຸມ​ປີ​ມໍ່ໆ​ມາ​ນີ້, ບັນດາ​ທ້ອງ​ຖິ່ນ​ໃນເຂດ​ທີ່ໝັ້ນ​ປະ​ຕິ​ວັດຫວຽດບັກ ດ້ວຍຄວາມສາມາດບົ່ມຊ້ອນແລະທ່າໄດ້​ປຽບ​ຂອງຕົນ ​ໄດ້​ມີ​ຄວາມ​ມານະ​ພະຍາຍາມ​ຢ່າງ​ໃຫຍ່​ຫຼວງ ​ໃນ​ການ​ສ້າງ​ເງື່ອນ​ໄຂ​ໃຫ້​ແກ່​ການ​ພັດທະນາ​ຂະ​ແໜງ​ການ​ທ່ອງ​ທ່ຽວ, ກາຍ​ເປັນ​ຂະ​ແໜງ​ເສດ​ຖະ​ກິດ​ທີ່​ສຳ​ຄັນ, ມຸ່ງ​ໄປ​ເຖິງ​ຂະ​ແໜງ​ເສດ​ຖະ​ກິດ​ຫົວຫອກ, ເປັນຂອດບຸກທະລຸເພື່ອພັດທະນາເສດຖະກິດ-ສັງຄົມຂອງທ້ອງຖິ່ນ. ລັດໄດ້ໃຊ້ງົບປະມານຈໍານວນຫຼາຍ ເພື່ອສະໜັບສະໜູນການລົງທຶນດ້ານໂຄງສ້າງພື້ນຖານການທ່ອງທ່ຽວ ສໍາລັບບັນດາແຂວງໃນເຂດທີ່ໝັ້ນປະຕິວັດຫວຽດບັກ. ເສັ້ນທາງຄົມມະນາຄົມເຊື່ອມຕໍ່ບັນດາເສັ້ນທາງການທ່ອງທ່ຽວພາຍໃນເຂດ ໄດ້ຖືກຍົກລະດັບ ສ້ອມແປງ ແລະ ສ້າງໃໝ່, ເຊັ່ນ ທາງຫຼວງເລກທີ 3 ຖາຍງວຽນ - ບັກກ້ານ, ທາງຫຼວງຖາຍງວຽນ - ເຈີ້ເໝິຍ, ທາງຫຼວງເລກທີ 4 ກາວບັ່ງ - ລ້າງເຊີນ, ທາງຫຼວງເລກທີ 279 ລ້າງເຊີນ - ກາວບັ່ງ - ບັກກ້ານ - ຕວຽນກວາງ - ຮ່າຢາງ... ການລົງທຶນໃນການພັດທະນາຊັບພະຍາກອນມະນຸດການທ່ອງທ່ຽວ, ການສ້າງຜະລິດຕະພັນການທ່ອງທ່ຽວ ແລະ ການສົ່ງເສີມການທ່ອງທ່ຽວ ໄດ້ຮັບຄວາມເອົາໃຈໃສ່. ບັນດາແຂວງແລະຕົວເມືອງຕ່າງໆ ໄດ້ເລີ່ມດຳເນີນການເຊື່ອມໂຍງໃນການກໍ່ສ້າງຜະລິດຕະພັນການທ່ອງທ່ຽວ ພ້ອມທັງສົ່ງເສີມການຂາຍ ເພື່ອສ້າງຮູບພາບການທ່ອງທ່ຽວຂອງ “ເຂດທີ່ໝັ້ນປະຕິວັດຫວຽດບັກ” ທີ່ດຶງດູດໃຈນັກທ່ອງທ່ຽວ. ຜະລິດຕະພັນການທ່ອງທ່ຽວຈຳນວນຫຼາຍທີ່ສ້າງບົນພື້ນຖານຄຸນຄ່າທາງດ້ານວັດທະນະທໍາ, ປະຫວັດສາດ ແລະ ກາຍເປັນຍີ່ຫໍ້ຂອງແຂວງ, ເຊັ່ນ ງານບຸນກຳແພງຕວຽນ (ແຂວງຕວຽນກວາງ); ຕະຫຼາດຮັກ ເຄົາວາຍ, ງານບຸນດອກເມັດສາມຫຼ່ຽມ (ແຂວງຮ່າຢາງ)... ເຊິ່ງໄດ້ດຶງດູດນັກທ່ອງທ່ຽວໃນແລະຕ່າງປະເທດ ຢ່າງຫຼວງຫຼາຍ.

ປະຈຸບັນ, ໃນທົ່ວທັງເຂດມີສະຖານທີ່ພັກເກືອບ 1.300 ແຫ່ງ, ລວມທັງໂຮງແຮມຫຼາຍແຫ່ງມີມາດຕະຖານ 3 ຫາ 4 ດາວ; ມີຮ້ານອາຫານຫຼາຍຮ້ອຍແຫ່ງ; ມີທຸລະກິດການທ່ອງທ່ຽວເກືອບ 70 ແຫ່ງ ພ້ອມດ້ວຍລົດຂົນສົ່ງນັກທ່ອງທ່ຽວຫຼາຍກວ່າ 800 ຄັນ (1). ໃນ 5 ປີ (2015-2020), ອັດຕາການຂະຫຍາຍຕົວຂອງນັກທ່ອງທ່ຽວໃນເຂດນີ້ແມ່ນເກືອບ 4,5% ຕໍ່ປີ; ການເຕີບໂຕສະເລ່ຍ 11% ຕໍ່ປີ; ໃນນັ້ນ, ແຂວງທີ່ມີການເຕີບໂຕສະໝ່ຳສະເໝີແມ່ນ ຮ່າຢາງ, ລ້າງເຊີນ ແລະ ໃນມໍ່ໆນີ້ມີອີກແຂວງກາວບັ່ງ. ຫຼາຍ​ນະ​ໂຍບາຍ​ຂຸດ​ຄົ້ນ​ຜະລິດ​ຕະພັນ​ໄດ້​ຮັບ​ການຜັນຂະຫຍາຍ, ​ເຊັ່ນ ການ​ວາງ​ແຜນ​ກຳນົດ​ແຫຼ່ງທ່ອງ​ທ່ຽວ, ໝູ່ບ້ານວັດທະນະທຳຊົນເຜົ່າ, ການຈັດຕັ້ງງານບຸນປະເພນີ, ງານບຸນສະໄໝໃໝ່, ການໃຊ້ປະໂຫຍດຈາກພູມສັນຖານທໍາມະຊາດທີ່ຊາວຊົນເຜົ່າສ່ວນໜ້ອຍອາໄສຢູ່. ປີ 2020, ຈຳນວນນັກທ່ອງທ່ຽວມາແຂວງຕ່າງໆໃນເຂດທີ່ໝັ້ນປະຕິວັດຫວຽດບັກມີດັ່ງນີ້, ແຂວງກາວບັ່ງ: ນັກທ່ອງທ່ຽວພາຍໃນປະເທດ 605.654 ຄົນ, ນັກທ່ອງທ່ຽວຕ່າງປະເທດ 12.011 ຄົນ; ແຂວງບັກກ້ານ: ນັກທ່ອງທ່ຽວພາຍໃນປະເທດ 195.366 ຄົນ, ນັກທ່ອງທ່ຽວຕ່າງປະເທດ 3.413 ຄົນ; ແຂວງຮ່າຢາງ: ນັກທ່ອງທ່ຽວພາຍໃນປະເທດ 1.430.969 ຄົນ, ນັກທ່ອງທ່ຽວຕ່າງປະເທດ 70.319 ຄົນ; ແຂວງຕວຽນກວາງ: ນັກທ່ອງທ່ຽວພາຍໃນປະເທດ 1.704.330 ຄົນ, ນັກທ່ອງທ່ຽວຕ່າງປະເທດ 3.670 ຄົນ;...(2).  

ຢ່າງໃດກໍ່ຕາມ, ຄືກັນກັບເຂດອື່ນໆໃນປະເທດ, ຊັບພະຍາກອນ​ມະນຸດ​ດ້ານ​ການທ່ອງທ່ຽວ​ໃນ​ເຂດນີ້​ຍັງ​ອ່ອນ​ແອ​ ແລະ ​ຂາດຄວາມເປັນມືອາ​ຊີບ; ການເຊື່ອມໂຍງລະຫວ່າງບັນດາທ້ອງຖິ່ນໃນເຂດຍັງຫຼົມແຫຼວ ແລະ ບໍ່ມີປະສິດທິຜົນ ດັ່ງນັ້ນຄວາມສາມາດແຂ່ງຂັນຈຶ່ງຍັງຕ່ຳ ແລະ ຍັງ​ບໍ່​ທັນ​ໄດ້​ນຳ​ເອົາ​ຄວາມ​ໄດ້​ປຽບ​ທາງ​ຊັບພະຍາກອນ​ທຳ​ມະ​ຊາດ ​ເພື່ອ​ພັດທະນາ​ການທ່ອງທ່ຽວ. ຫຼາຍພື້ນທີ່ມີຊັບພະຍາກອນການທ່ອງທ່ຽວທີ່ດຶງດູດໃຈ ແຕ່ບໍ່ໄດ້ຮັບການລົງທຶນຢ່າງພຽງພໍ; ຍັງບໍ່​ທັນ​ປຸກ​ລະດົມ, ຂຸດ​ຄົ້ນ ​ແລະ ນຳ​ໃຊ້ທ່າແຮງ, ຂໍ້ໄດ້ປຽບ ແລະ ​ຄວາມ​ສາມາດບົ່ມຊ້ອນຢ່າງເຕັມທີ; ຍັງ​ບໍ່​ທັນ​ມີ​ການ​ເຊື່ອມ​ຕໍ່​ກັນ​ຢ່າງ​ແໜ້ນ​ແຟ້ນ​ເພື່ອ​ພັດທະນາ​ການທ່ອງທ່ຽວ​ລະຫວ່າງ​ບັນດາ​ທ້ອງ​ຖິ່ນ​ພາຍ​ໃນ ​ແລະ ຕ່າງປະ​ເທດ. ຍັງບໍ່ມີການພົວພັນແລະເຊື່ອມໂຍງຢ່າງແໜ້ນແຟ້ນ ລະຫວ່າງບັນດາທ້ອງຖິ່ນ ຢູ່ໃນແລະນອກເຂດຫວຽດບັກ ເພື່ອພັດທະນາການທ່ອງທ່ຽວ.

ໃນທ່າອ່ຽງແຫ່ງການພັດທະນາໃນປະຈຸບັນ, ໂດຍສະເພາະ ໃນສະພາບການທີ່ຫວຽດນາມເປັນສະມາຊິກຂອງຫຼາຍອົງການຈັດຕັ້ງສາກົນ, ບັນຫາການເຊື່ອມຕໍ່, ຮ່ວມມື ແລະ ເຊື່ອມໂຍງມີຄວາມສຳຄັນເປັນພິເສດ ຕໍ່ການພັດທະນາຂອງປະເທດຊາດ, ແຕ່ລະເຂດ ແລະ ແຕ່ລະທ້ອງຖິ່ນ. ການເຊື່ອມຕໍ່ກາຍເປັນຄວາມຮຽກຮ້ອງຕ້ອງການທີ່ຮີບດ່ວນທີ່ສຸດ ເພື່ອເພີ່ມທະວີແຮງແຂ່ງຂັນຂອງບັນດາພາກສ່ວນທີ່ເຂົ້າຮ່ວມ. ການເຊື່ອມໂຍງໃນການການພັດທະນາການທ່ອງທ່ຽວເບິ່ງລວມມີຄວາມກວ້າງຂວາງຫຼາຍ, ຕັ້ງແຕ່ການ​ເຊື່ອມ​ຕໍ່​ທາງພູ​ມິ​ສາດ​ລະ​ຫວ່າງພາກພື້ນ​ແລະ​ລະ​ຫວ່າງປະເທດ ຈົນເຖິງ​ການ​ເຊື່ອມ​ຕໍ່​ພາຍ​ໃນ​ພູມິພາກ​ແລະ​ພາຍ​ໃນ​ປະ​ເທດ​, ຈາກ​ການ​ເຊື່ອມ​ຕໍ່​ໃນຂະແໜງການ​ທ່ອງ​ທ່ຽວ ໄປສູ່​ການ​ເຊື່ອມ​ຕໍ່ຂ້າມ​ນອກຂະແໜງການ​; ​ແລະ ການ​ເຊື່ອມ​ໂຍງ​ຢ່າງ​ເລິກ​ເຊິ່ງລະຫວ່າງ​ບັນດາ​ຝ່າຍ​ທີ່ເຂົ້າຮ່ວມໃນການ​ເຄື່ອນ​ໄຫວ​ທ່ອງ​ທ່ຽວ. 

ຢາກເຊື່ອມຕໍ່ແລະຮ່ວມມືຢ່າງມີປະສິດທິຜົນ ໃນການພັດທະນາການທ່ອງທ່ຽວ ໃນເຂດທີ່ໝັ້ນປະຕິວັດຫວຽດບັກນັ້ນ, ການເຊື່ອມຕໍ່, ຮ່ວມມື ແລະແບ່ງງານລະຫວ່າງແຂວງຕ່າງໆໃນເຂດ ມີຄວາມໝາຍສຳຄັນອັນດັບໜຶ່ງ, ເພື່ອແນໃສ່ເສີມຂະຫຍາຍຂໍ້ໄດ້ປຽບ ແລະ ຂໍ້ດີປຽບທຽບ ຂອງແຕ່ລະທ້ອງຖິ່ນ ທາງດ້ານຊັບພະຍາກອນ ແລະ ຄວາມສາມາດພັດທະນາການທ່ອງທ່ຽວ, ພ້ອມກັນນັ້ນກໍ່ເພີ່ມເຕີມໃຫ້ແກ່ກັນ ແລະ ຊ່ວຍກັນແກ້ໄຂຂໍ້ຈຳກັດໃນການພັດທະນາ. ການເຊື່ອມຕໍ່ແລະຮ່ວມມືຈະເຮັດໃຫ້ຜະລິດຕະພັນການທ່ອງທ່ຽວຫຼາກຫຼາຍແລະອຸດົມສົມບູນຂຶ້ນ, ສ້າງ​ບັນດາ​ຜະລິດ​ຕະພັນ​ທ່ອງ​ທ່ຽວ​ສະ​ເພາະ ແລະ ມີຄຸນ​ນະພາ​ບສູງ​ໃຫ້​ທັງ​ພາກ​ພື້ນ..., ດ້ວຍ​ເຫດ​ນັ້ນ, ​ເພີ່ມ​ຄວາມ​ສາມາດ​ໃນການແຂ່ງຂັນ ​ແລະ ຄວາມ​ໄດ້​ປຽບ​ໃນ​ການ​ພັດທະນາ​ການທ່ອງທ່ຽວ​ຂອງ​ເຂດ​ທີ່ໝັ້ນປະຕິວັດ​ຫວຽດບັກ.

ປະຈຸບັນ, ບັນດາໂຄງການທ່ອງທ່ຽວທີ່ໃຊ້ປະໂຫຍດຈາກຄຸນຄ່າທາງວັດທະນະທຳແລະປະຫວັດສາດ ຕົ້ນຕໍ​ແມ່ນ​ຮັບ​ໃຊ້​ຮູບ​ແບບ​ການທ່ຽວຊົມທັດສະນິຍະພາບ, ການ​ສຶກສາ​ອຸດົມ​ຄະຕິ, ສະຫຼຸບ​ແລະ​ໃຫ້​ລາງວັນ​ໃນໄລຍະເວລາສັ້ນ. ບັນດາ​ມໍລະດົກ​ວັດທະນະທຳ​ແລະປະຫວັດສາດ​ຍັງ​ບໍ່​ທັນ​ສ້າງ​ຄວາມ​ດຶງດູດ​ຢ່າງ​ແທ້​ຈິງ; ການຈັດຕັ້ງກິດຈະກຳທ່ອງທ່ຽວບໍ່ເປັນມືອາຊີບສູງ; ຜະລິດຕະພັນການທ່ອງທ່ຽວມີໜ້ອຍ; ລາຍຮັບຈາກການທ່ອງທ່ຽວກວມເອົາອັດຕາສ່ວນຕໍ່າຂອງເສດຖະກິດຂອງແຕ່ລະແຂວງ. ດັ່ງນັ້ນ, ບັນຫາແມ່ນ ວິທີການໃຊ້ປະໂຫຍດຈາກຄຸນຄ່າທາງວັດທະນະທຳແລະປະຫວັດສາດ ຢ່າງມີປະສິດທິຜົນ, ສ້າງເຄື່ອງໝາຍແລະເອກະລັດໃຫ້ກັບຜະລິດຕະພັນການທ່ອງທ່ຽວຂອງແຕ່ລະທ້ອງຖິ່ນ, ສ້າງຍີ່ຫໍ້, ຫຼີກລ້ຽງການຊ້ຳຊ້ອນ ແລະ ຄວາມດຽວດາຍທາງດ້ານຜະລິດຕະພັນ. 

ສາເຫດຂອງບັນຫານີ້ເກີດຈາກຄວາມດຶງດູດໃຈຂອງແຫຼ່ງທ່ອງທ່ຽວຕໍ່າ, ການຄົ້ນຄວ້າກ່ຽວກັບຄຸນຄ່າມໍລະດົກເພື່ອສ້າງຜົນກະທົບໃນການດຶງດູດນັກທ່ອງທ່ຽວທີ່ຫາກໍ່ໄດ້ຮັບການລົງທຶນ ແລະ ໄດ້ຮັບຄວາມເອົາໃຈໃສ່. ວຽກ​ງານການປະດັບ​ປະດາ​ທີ່​ສ້າງ​ຂຶ້ນ​ໃໝ່​​ສ່ວນ​ໃຫຍ່​ແມ່ນ​ຫໍ​ວາງສະ​ແດງ​ຮູບພາບ, ​ສິ່ງປະດິດເຄື່ອງ​ປັ້ນດິນ​ເຜົາ, ຕົວ​ລະຄອນ ​ແລະ ​ເຫດການ, ໃຫ້ຄວາມ​ເອົາ​ໃຈ​ໃສ່ພຽງ​ໜ້ອຍ​ໜຶ່ງ​ເຖິງການ​ອອກ​ແບບ​ພື້ນທີ່ພູມິທັດ ​ຫຼື​ເຕັກນິກ​ສະຖາປັດຕະຍະກຳ​ ແລະ ສິລະປະທີ່ດຶງດູດ​ໃຈ ແລະເປັນເອກະລັກ ​ເພື່ອ​ດຶງ​ດູດ​ນັກ​ທ່ອງ​ທ່ຽວ. ໝູ່ບ້ານວັດທະນະທໍາທີ່ມີກິດຈະກໍາການທ່ອງທ່ຽວທີ່ຄ້າຍຄືກັນ. ບັນດາຈຸດ​ທີ່ໃຊ້ປະໂຫຍດ​ຈາກ​ວັດ​​ຖຸທາງ​ປະ​ຫວັດ​ສາດ​ທີ່​ມີ​​ຄວາມ​ງາມ​ທາງ​ສາຍ​ຕາ​ ດຶງດູດນັກທ່ອງທ່ຽວໃນລະດັບຕ່ຳ ເຊິ່ງຕົ້ນຕໍຕ້ອງຜ່ານຄໍາອະທິບາຍຂອງຜູ້ນໍາທ່ຽວ ຫຼື ນາຍພາສາໃນຈຸດ ຄຸນຄ່າຂອງວັດຖຸເຫຼົ່ານັ້ນ ຈຶ່ງສະແດງອອກແລະໂດດເດັ່ນ.

ຄຽງຄູ່ກັນນັ້ນ, ໂຄງສ້າງພື້ນຖານຂອງບັນດາທ້ອງຖິ່ນນັ້ນ ບໍ່ໄດ້ຮັບການລົງທຶນຢ່າງເໝາະສົມ. ໃນພື້ນທີ່ທ່ອງທ່ຽວ, ສິ່ງອຳນວຍຄວາມສິດວກທີ່ພັກສຳລັບນັກທ່ອງທ່ຽວ​ສ່ວນ​ໃຫຍ່​ແມ່ນ​ໄດ້​ຮັບ​ການ​ສ້າງ​ຕັ້ງມາ​ແຕ່​ດົນ​​ແລ້ວ, ຈໍານວນຫ້ອງໜ້ອຍ, ບໍ່ພຽງພໍສຳລັບແຂກກຸ່ມໃຫຍ່ ຫຼືຄວາມຕ້ອງການພັກຜ່ອນທີ່ຫຼາກຫຼາຍ ເຊິ່ງສ່ວນໃຫຍ່ເປັນຫ້ອງເຊົ່າ, ເຮືອນພັກ, ດັງນັ້ນຄຸນນະພາບການບໍລິການຈຶງຍັງຖືກຈຳກັດ, ຄຸນນະພາບອິນເຕີເນັດຕ່ຳ ໂທລະພາບບໍ່ດີ, ລະບົບນ້ຳຮ້ອນ ເຄື່ອງປັບອາກາດບໍ່ດີ... ການບໍລິການມີພຽງການໃຫ້ເຊົ່າຫ້ອງພັກເທົ່ານັ້ນ, ບໍ່ມີບໍລິການເສີມອື່ນໆ.   

ຄວາມ​ຕ້ອງການ​ດ້ານ​ອາຫານ, ການ​ບັນ​ເທິງ, ການ​ຊື້​ເຄື່ອງ... ຂອງ​ນັກ​ທ່ອງ​ທ່ຽວ​​ບໍ່​ໄດ້​ຮັບ​ການຕອບສະໜອງ​ຢ່າງ​ເຕັມທີ່. ທົ່ວ​ທັງເຂດນີ້​ ເກືອບ​ບໍ່​ມີ​ລະບົບ​ສະຖານປະກອບການ ​ທີ່​ໃຫ້ບໍລິການ​ກິດຈຳກຳ​ບັນ​ເທິງ ​ແລະ ການຊື້ເຄື່ອງທີ່​ທັນ​ສະ​ໄໝ; ລະບົບຜະລິດຕະພັນແລະບໍລິການເສີມ, ຂອງທີ່ລະນຶກຍັງງ່າຍດາຍ ແລະ ບໍ່ສວຍງາມ... ຍັງບໍ່ຕອບສະໜອງຄວາມຕ້ອງການທີ່ເພີ່ມຂຶ້ນຂອງນັກທ່ອງທ່ຽວ, ສະນັ້ນ ນັກທ່ອງທ່ຽວທີ່ມາຢ້ຽມຊົມຈຶງຢຸດໃນວັນໜຶ່ງ, ການພັກເຊົາໜ້ອຍລົງ. ນີ້ແມ່ນເຫດຜົນທີ່ໄລຍະເວລາພັກເຊົາຂອງນັກທ່ອງທ່ຽວສັ້ນ, ລາຍຮັບການທ່ອງທ່ຽວຈາກຄຸນຄ່າທາງດ້ານວັດທະນະທໍາ ແລະ ປະຫວັດສາດ ຍັງໜ້ອຍ.

ຍິ່ງກວ່ານັ້ນ, ໃນປະຕຸບັນ, ການເຄື່ອນໄຫວທ່ອງທ່ຽວ​ບໍ່​ພຽງ​ແຕ່​ໄດ້​ຊົມ​ທັດ​ສະ​ນີ​ຍະ​ພາບ​ເທົ່າ​ນັ້ນ, ແຕ່ສຳລັບຜະລິດຕະພັນທີ່ໃຊ້ປະໂຫຍດຈາກຄຸນຄ່າທາງວັດທະນະທຳແລະປະຫວັດສາດນັ້ນ ນັກທ່ອງທ່ຽວຈຳເປັນຕ້ອງຮູ້ ເຂົ້າໃຈສຳນວນທີ່ຊ້ອນຢູ່ເບື້ອງເລິກຂອງເປືອກວັດຖຸ, ຄົ້ນພົບຂອງດີ ຄວາມສວຍງາມ ເອກະລັກຂອງວັດທະນະທຳ ແລະ ປະຫວັດສາດ, ໂດຍສະເພາະຢ່າງຍິ່ງ ກັບນັກທ່ອງທ່ຽວຕ່າງຊາດ. ຢ່າງໃດກໍຕາມ, ຄວາມສາມາດດ້ານພາສາຕ່າງປະເທດ ແລະ ທັກສະການຕີຄວາມຂອງຜູ້ບັນຍາຍ ​ແລະ ພະນັກງານ​ບໍລິການ​ຈຳນວນ​ໜຶ່ງ​ຍັງ​ອ່ອນແອ, ວິທີຖ່າຍທອດຂໍ້ມູນຍັງແຫ້ງແລະບໍ່ດຶງດູດໃຈ; ໃນຫຼາຍສະຖານທີ່ບໍ່ມີຜູ້ບັນຍາຍ, ຜູ້ນຳທ່ຽວຢູ່ສະຖານທີ່, ດັງນັ້ນ ພວກເຂົາຈຶ່ງຕ້ອງພຶ່ງພາການຊ່ວຍເຫຼືອຂອງນາຍພາສາ ຫຼື ຜູ້ນຳທ່ຽວຂອງບໍລິສັດທ່ອງທ່ຽວ; ແຮງງານທ້ອງຖິ່ນຍັງບໍ່ທັນໄດ້ຮັບການຝຶກອົບຮົມຄວາມຮູ້ດ້ານການທ່ອງທ່ຽວ...

ບາງ​ວິທີ​ແກ້​ໄຂ​ເພື່ອ​ພັດທະນາ​ການທ່ອງທ່ຽວ​ ສົມທົບ​ກັບ​ການ​ອະນຸລັກ ​ແລະ
ສົ່ງເສີມ​ຄຸນຄ່າ​ປະຫວັດສາດ ​ແລະ ວັດທະນະທຳ​ປະຕິວັດ ​ຢູ່​ເຂດທີ່ໝັ້ນປະຕິວັດຫວຽດບັກ

ເພື່ອເຊື່ອມໂຍງການພັດທະນາການທ່ອງທ່ຽວ ກັບການອະນຸລັກ ແລະ ເສີມຂະຫຍາຍຄຸນຄ່າປະຫວັດສາດ ແລະ ວັດທະນະທຳປະຕິວັດ ໃນເຂດທີ່ໝັ້ນປະຕິວັດຫວຽດບັກ ຢ່າງມີປະສິດທິຜົນ​ ແລະ ສອດຄ່ອງ​ກັບ​ສະພາບ​ຕົວ​ຈິງ, ຈຳເປັນຕ້ອງ​ຜັນ​ຂະຫຍາຍ​​ມາດ​ຕະການ​ແກ້​ໄຂຈຳນວນໜຶ່ງ​ຄື:     

ທີໜຶ່ງ, ສົ່ງເສີມ​ການ​ປະສານ​ສົມທົບ​ການ​ລົງທຶນ​ໃນ​​ໂຄງສ້າງພື້ນຖານດ້ານການທ່ອງທ່ຽວ ​ແລະ ສິ່ງ​ອຳນວຍ​ຄວາມ​ສະດວກ​ດ້ານ​ເຕັກນິກການທ່ອງທ່ຽວ. ຍູ້ແຮງການລົງທຶນກໍ່ສ້າງລະບົບໂຄງສ້າງເສດຖະກິດ-ສັງຄົມໃຫ້ທ້ອງຖິ່ນຕ່າງໆໃນເຂດທີ່ໝັ້ນປະຕິວັດຫວຽດບັກ; ໃນນັ້ນ, ຕ້ອງເລັ່ງລັດການກໍ່ສ້າງໂຄງການສຳຄັນເຊັ່ນ ເສັ້ນທາງເຊື່ອມຕໍ່ກາວບັ່ງ - ບັກກ້ານ - ລ້າງເຊີນ, ເສັ້ນທາງຈາກລ້າງເຊີນໄປກາວບັ່ງ (ທາງຫຼວງເລກ 4), ເສັ້ນທາງເຊື່ອມຕໍ່ຖາຍງວຽນ - ຕວຽນກວາງ - ບັກກ້ານ - ກາວບັ່ງ; ເສັ້ນທາງໄປສູ່ສະຖານທີ່ທ່ອງທ່ຽວ ບູຮານສະຖານ ວັດທະນະທຳ ແລະ ປະຫວດສາດ. ​ໃຫ້​ບຸລິມະສິດ​ການ​ລົງທຶນເພື່ອ​ຍົກ​ລະດັບ​ລະບົບກຸ່ມ​ປູຊະນີຍະສະຖານ​ວັດທະນະທຳ ​ແລະ ປະຫວັດສາດ, ກໍ່ສ້າງ​ລະບົບ​ໄຟຟ້າ, ນ້ຳປະປາ, ລະບົບ​ສື່ສານຢ່າງໄວ ເພື່ອຕອບສະໜອງຄວາມຕ້ອງການພັດທະນາການທ່ອງທ່ຽວ; ພ້ອມກັນນັ້ນ, ສືບຕໍ່ການກໍ່ສ້າງ, ຍົກລະດັບ ແລະ ໃຊ້ປະໂຫຍດຈາກສະໜາມບິນທີ່ມີຢູ່ຂອງ​ບັນດາ​ແຂວງ​ຢ່າງ​ມີ​ປະສິດທິ​ຜົນ. 

ທີສອງ, ສົມທົບ​ກັນ​ໂຄສະນາ​ຈຸດໝາຍ​ປາຍທາງ, ສ້າງ​ເຄື່ອງໝາຍ​ການ​ທ່ອງ​ທ່ຽວ​ ຜ່ານ​ການ​ໂຄສະນາ​ຮູບ​ພາບ​ການທ່ອງທ່ຽວຂອງ​ເຂດທີ່ໝັ້ນປະຕິວັດຫວຽດບັກ ສູ່ສາຍຕາຊາວ​ໂລກ; ກໍານົດໂຄງການການເດີນທາງທົ່ວໄປ (ທົວ) ສໍາລັບພາກພື້ນທັງຫມົດ; ເຊື່ອມ​ຕໍ່​ບັນດາ​ເຫດການ, ງານ​ບຸນ​ຕ່າງໆ​ ຂອງ​ແຕ່ລະ​ແຂວງ ​ເພື່ອ​ສ້າງ​ຊຸດກິດຈະກຳ​ທ່ອງ​ທ່ຽວ​ທີ່​ດຶງ​ດູດ ​ແລະ ​ໃຊ້ປະໂຫຍດສູງສຸດຈາກ​ນັກ​ທ່ອງ​ທ່ຽວ​; ແລກປ່ຽນຂໍ້ມູນຂ່າວສານການທ່ອງທ່ຽວ ລະຫວ່າງບັນດາແຂວງ ຜ່ານລະບົບຖານຂໍ້ມູນຂໍ້ມູນຂ່າວສານການທ່ອງທ່ຽວ ຢ່າງສະໝ່ຳສະເໝີ. ສືບຕໍ່ລົງທຶນຍົກສູງຄຸນນະພາບຂອງຜະລິດຕະພັນການເຊື່ອມຕໍ່ທີ່ມີຢູ່ ເຊັ່ນ ການທ່ຽວຊົມທັດສະນິຍະພາບ ບູຮານສະຖານ, ຣີສອດ, ອາບນ້ຳໃນລຳທານ ທະເລສາບ, ຕຶກປາ,... ຄົ້ນ​ຄ້ວາ​ແລະພັດທະນາ​ຜະລິດ​ຕະພັນ​ທ່ອງ​ທ່ຽວຮູບແບບ​ໃໝ່​ເຊັ່ນ ການທ່ອງທ່ຽວ​ພູເຂົາ, ການທ່ອງ​ທ່ຽວ​ຜະຈົນ​ໄພ, ການທ່ອງທ່ຽວ​ກິລາ, ກອງ​ປະຊຸມ... ຟື້ນຟູແລະພັດທະນາບັນດາຜະລິດຕະພັນພິເສດທີ່ຕິດພັນກັບອາຊີບດັ້ງເດີມຂອງບັນດາທ້ອງຖິ່ນໃນເຂດຫວຽດບັກເຊັ່ນ ການລ້ຽງເຜິ້ງ, ການທໍຜ້າ ຖັກແສ່ວ, ການປູກປ່າ,... ປະສານສົມທົບ​ການ​ຂຸດ​ຄົ້ນ​ຄວາມ​ສາມາດ​ບົ່ມ​ຊ້ອນ​ດ້ານ​ການທ່ອງທ່ຽວ ​ກັບ​ການ​ພັດທະນາ​ເສດຖະກິດ - ສັງຄົມ, ຮັບປະກັນ​ການ​ປ້ອງ​ກັນ​ປະ​ເທດ, ຄວາມ​ໝັ້ນຄົງ.

ທີສາມ, ປະສານສົມທົບຢ່າງແໜ້ນແຟ້ນກັບບັນດາອົງການຮັບຜິດຊອບຢູ່ສູນກາງ (ກະຊວງວັດທະນະທຳ, ກິລາ ແລະ ການທ່ອງທ່ຽວ...), ພ້ອມ​ກັບ​ບັນດາ​ອົງການ​ການ​ທູດ, ສື່​ມວນ​ຊົນ, ການບິນ, ບໍລິສັດ​ທ່ອງ​ທ່ຽວຂະໜາດໃຫຍ່​ພາຍ​ໃນ ​ແລະ ຕ່າງປະ​ເທດ​ ​ເພື່ອ​​ໂຄສະນາ​ເຜີຍ​ແຜ່​ຮູບ​ພາບ​ການທ່ອງທ່ຽວ​ຂອງ​ແຕ່ລະ​ທ້ອງ​ຖິ່ນ ​ແລະ ທົ່ວ​ພາກ​ພື້ນ ​ໃຫ້​ນັກ​ທ່ອງ​ທ່ຽວ​ພາຍ​ໃນ ​ແລະ ຕ່າງປະ​ເທດ; ພັດທະນາ​ບັນດາ​ລາຍການ​ທ່ອງ​ທ່ຽວ, ​ເສັ້ນທາງ ​ຫຼື ​ໂຄງການ​ທ່ອງ​ທ່ຽວ​ກ່ຽວ​ກັບ​ສະ​ໜາມ​ຮົບ​ເກົ່າ ​ເພື່ອ​ເພີ່ມ​ທະວີ​ການ​ດຶງ​ດູດ​ນັກ​ທ່ອງ​ທ່ຽວ​ມາ​ຍັງ​ເຂດ​ທີ່ໝັ້ນປະຕິວັດຫວຽດນາມ. ພ້ອມກັນນັ້ນ, ຍູ້​ແຮງ​ການ​ເຄື່ອນ​ໄຫວ​ເຊື່ອມ​ໂຍງ​ເຂົ້າ​ກັບ​ສັງຄົມ ​ແລະ ພັດທະນາ​ການ​ທ່ອງ​ທ່ຽວ​ຢູ່​ເຂດທີ່ໝັ້ນປະຕິວັດຫວຽດບັກ ຕິດກັບການພັດທະນາການທ່ອງທ່ຽວຊຸມຊົນ ແລະ ເສັ້ນທາງທ່ອງທ່ຽວທັງໃນກະເທດແລະຕ່າງປະເທດ, ມີກົນໄກເພື່ອລະດົມໜ່ວຍງານທຸກພາກສ່ວນເສດຖະກິດເຂົ້າຮ່ວມທຸລະກິດການທ່ອງທ່ຽວ.   

ທີສີ່, ປະສານສົມທົບເພື່ອເປີດຄວາມຫຼາກຫຼາຍ ແລະ ຍົກສູງຄຸນນະພາບຂອງວຽກງານໂຄສະນາສົ່ງເສີມການທ່ອງທ່ຽວ; ເພີ່ມທະວີການນຳໃຊ້ເຕັກໂນໂລຊີຂໍ້ມູນຂ່າວສານທັນສະໄໝ ເຂົ້າໃນການໂຄສະນາສົ່ງເສີມການທ່ອງທ່ຽວ; ຂົນຂວາຍໜັງສືພິມອອນໄລໃຫ້ການອຸປະຖຳຂໍ້ມູນ ແລະ ສ້າງຫົວຂໍ້ແລະເນື້ອໃນໂຄສະນາ. ເຊື່ອມຕໍ່ບັນດາເວັບໄຊທ໌ຂອງແຂວງແລະນະຄອນ ເພື່ອ​ສະໜອງ​ຂໍ້​ມູນ​ຂ່າວສານ ​ແລະ ຊຸກຍູ້​ການທ່ອງທ່ຽວ, ພິ​ເສດ​ແມ່ນ​ ບັນດາ​ທ້ອງ​ຖິ່ນ​ທີ່​ໄດ້​ລົງ​ນາມ​ໃນ​ສັນຍາ​ຮ່ວມ​ມື​ພັດທະນາ​ການທ່ອງທ່ຽວ​ຄື: ຮ່າ​ໂນ້ຍ ​ແລະ ນະຄອນ​ໂຮ່ຈິ​ມິນ,...

ທີຫ້າສະໜັບສະໜູນໃຫ້ບໍລິສັດທ່ອງທ່ຽວເສີມຂະຫຍາຍ ແລະ ສົ່ງເສີມການທ່ອງທ່ຽວ ແລະ ສ້າງ​ເຄື່ອງໝາຍ​ຂອງ​ໜ່ວຍງານ​ສະ​ເພາະ ​ແລະ ທ້ອງ​ຖິ່ນ​ໂດຍ​ທົ່ວ​ໄປ... ສືບຕໍ່ເພີ່ມທະວີການຝຶກອົບຮົມ ແລະ ຍົກສູງຄຸນນະພາບຂອງຊັບພະຍາກອນມະນຸດ; ໂດຍສະເພາະ, ຕ້ອງ​ສ້າງທິມງານ​ນຳ​ທ່ຽວ​ມືອາຊີບ ທີ່​ມີ​ຄວາມ​ສາມາດ ​ແລະ ມີ​ຄວາມ​ຮູ້​ກ່ຽວກັບບັນດາສະຖານທີ່ທ່ອງທ່ຽວ ແລະ ​ບັນດາ​ແຂວງ, ນະຄອນ​ໃນ​ເຂດທີ່ໝັ້ນປະຕິວັດ​ຫວຽດບັກ ເພື່ອອະທິບາຍແລະແນະນຳນັກທ່ອງທ່ຽວ, ຊ່ວຍໃຫ້ພວກເຂົາເຂົ້າໃນຄຸນຄ່າທາງທຳມະຊາດ ແລະ ວັດທະນະທຳທີ່ໂດດເດັ່ນ ເປັນເອກະລັກຂອງທ້ອງຖິ່ນ. ເອົາໃຈໃສ່ຢ່າງເປັນປະຈຳເຖິງການປົກປ້ອງຊັບພະຍາກອນທຳມະຊາດ ແລະ ສິ່ງແວດລ້ອມການທ່ອງທ່ຽວ, ຮັບປະກັນຄວາມໝັ້ນຄົງ ແລະ ຄວາມປອດໄພຂອງນັກທ່ອງທ່ຽວ, ຮັບ​ປະ​ກັນ​ການ​ຂຸດ​ຄົ້ນ​ທ່າ​ແຮງ​ການ​ທ່ອງ​ທ່ຽວ​ຂອງ​ທັງ​ເຂດທີ່ໝັ້ນປະຕິວັດຫວຽດບັກ​ຢ່າງ​ຍືນ​ຍົງ./.

---------------------

(1) ສະ​ຫຼຸບ​ຂໍ້​ມູນຈາກ​ບັນ​ດາ​ທ້ອງ​ຖິ່ນ​ຢູ່​ເຂດ​ຫວຽດ​ບັກ ຮອດ​ເດືອນກໍລະກົດ2020.

(2) ແຫຼ່ງ: ລາຍງານຂອງພະແນກວັດທະນະທຳ ກິລາ ແລະ ການທ່ອງທ່ຽວ ບັນດາແຂວງໃນເຂດຫວຽດບັກ

- ບົດນີ້ໄດ້ລົງພິມໃນວາລະສານກອມມູນິດ ສະບັບເລກທີ 1002 (ເດືອນພະຈິກ 2022)