ສືບຕໍ່ສ້າງແລະປັບປຸງບູລະນະສະຖາບັນພັດທະນາວັດທະນະທຳ
ເພື່ອຕອບສະໜອງຄວາມຕ້ອງການຂອງການພັດທະນາປະເທດ
ໃນໄລຍະໃໝ່
ເພື່ອຕອບສະໜອງຄວາມຕ້ອງການຂອງການພັດທະນາປະເທດ
ໃນໄລຍະໃໝ່
ການປະເມີນປະສິດທິຜົນຂອງການສ້າງແລະປັບປຸງບູລະນະສະຖາບັນ
ແລະ ລະດົມຊັບພະຍາກອນ ເພື່ອພັດທະນາວັດທະນະທຳ
ບັນດາຜົນສຳເລັດທີ່ບັນລຸໄດ້
ທີໜຶ່ງ, ຂະບວນການສ້າງແລະປັບປຸງບູລະນະກົດໝາຍ ໄດ້ກໍ່ໃຫ້ເກີດຮາກຖານທາງກົດໝາຍທີ່ຮອບດ້ານ ແລະ ເປັນລະບົບ, ປະກອບສ່ວນເພີ່ມທະວີກຳລັງແຮງພາຍໃນ, ກຳລັງຂັບເຄື່ອນການພັດທະນາຂອງວັດທະນະທຳ.
ໃນຂົງເຂດວັດທະນະທຳ, ປະຈຸບັນຫວຽດນາມີກົດໝາຍ 5 ສະບັບ (ກົດໝາຍພາບພະຍົນ, ກົດໝາຍວ່າດ້ວຍມໍລະດົກວັດທະນະທຳ, ກົດໝາຍໂຄສະນາ, ກົດໝາຍວ່າດ້ວຍຊັບສິນທາງປັນຍາ, ກົດໝາຍວ່າດ້ວຍຫໍສະໝຸດ), ມີລັດຖະດຳລັດ 50 ສະບັບ, ຂໍ້ຕັດສິນຕົກລົງຂອງນາຍົກລັດຖະມົນຕີ 14 ສະບັບ ແລະ ໜັງສືວຽນ, ໜັງສືວຽນຮ່ວມຫຼາຍກວ່າ 100 ສະບັບ ທີ່ຄວບຄຸມວັດທະນະທຳໂດຍກົງ. ກົດໝາຍເຫຼົ່ານີ້ຄ່ອຍໆປະກອບເປັນກອບກົດໝາຍທີ່ຂ້ອນຂ້າງສອດຄ່ອງກັນ, ປະກອບສ່ວນຫັນຂໍ້ກຳນົດຂອງລັດຖະທຳມະນູນປີ 2013 ເປັນນິຕິກຳ ແລະ ເປັນອັນລະອຽດສະເພາະ ກ່ຽວກັບການຮັບປະກັນສິດທິໃນການປະພັນສ້າງສັນວັນນະຄະດີແລະສິລະປະ ແລະ ການຊົມໃຊ້ແລະການເຂົ້າເຖິງຄຸນຄ່າວັດທະນະທໍາ, ການເຂົ້າຮ່ວມໃນຊີວິດວັດທະນະທຳຂອງປະຊາຊົນ. ພ້ອມກັນນັ້ນ, ການຈັດຕັ້ງລະບົບກົດໝາຍ ໄດ້ຄ່ອຍໆຊ່ວຍດັດປັບການພົວພັນລະຫວ່າງບັນດາອັດຕະພາບໃນລະບົບວັດທະນະທຳ ຕາມທິດກົມກຽວແລະສົດໃສກວ່າເກົ່າ. ລັດຈາກຕໍາແໜ່ງຜູ້ບັນຊາການ ຍ້າຍມາຖືພາລະບົດບາດຂອງຜູ້ບໍລິຫານແລະຜູ້ອຸປະຖໍາ. ຈາກການຫັນປ່ຽນດ້ານໂຄງປະກອບນີ້, ບົດບາດຂອງລະບົບນະໂຍບາຍ ແລະ ກົດໝາຍໃນຂົງເຂດວັດທະນະທຳກໍ່ໄດ້ຮັບການຍົກສູງຂຶ້ນ.
ທີສອງ, ຂອບນະໂຍບາຍໄດ້ສ້າງລະບຽບລະບອບທີ່ອະນຸຍາດໃຫ້ບັນດາຂະແໜງອຸດສາຫະກຳວັດທະນະທຳຂຸດຄົ້ນ ແລະ ຫັນແຫຼ່ງຊັບພະຍາກອນວັດທະນະທຳເປັນພະລັງອ່ອນທາງວັດທະນະທຳ.
ການກຳເນີດຂອງ “ຍຸດທະສາດການພັດທະນາບັນດາຂະແໜງການວັດທະນະທຳຂອງຫວຽດນາມຮອດປີ 2020, ວິໄສທັດຮອດປີ 2030” (ປີ 2016) ໄດ້ຂີດໝາຍບາດກ້າວໃໝ່ ໃນການສ້າງສະພາບແວດລ້ອມລະບຽບລະບອບທີ່ເອື້ອອຳນວຍ ໃຫ້ບັນດາຂະແໜງການວັດທະນະທຳໃນການໃຊ້ປະໂຫຍດ ແລະ ຫັນປ່ຽນຊັບພະຍາກອນທາງວັດທະນະທຳເປັນຜະລິດຕະພັນ ແລະ ບໍລິການທາງວັດທະນະທຳທີ່ດຶງດູດໃຈ. ບັນດາກະຊວງ, ຂະແໜງການ, ໂດຍສະເພາະ ກະຊວງວັດທະນະທຳ ກິລາ ແລະ ການທ່ອງທ່ຽວ ໄດ້ຕັ້ງໜ້າຜັນຂະຫຍາຍວຽກງານສ້າງແລະປັບປຸງບູລະນະສະຖາບັນ, ນະໂຍບາຍ ແລະ ກົດໝາຍ ເພື່ອແນໃສ່ສ້າງແລວທາງກົດໝາຍ, ສົ່ງເສີມການພັດທະນາບັນດາຂະແໜງການອຸດສາຫະກຳວັດທະນະທຳ. ບັນດາການປ່ຽນແປງທີ່ຕັ້ງໜ້າທາງດ້ານສະຖາບັນແລະນະໂຍບາຍ ໄດ້ຊຸກຍູ້ໃຫ້ຕະຫຼາດອຸດສາຫະກຳວັດທະນະທຳຫວຽດນາມມີຄວາມກ້າວໜ້າໃໝ່, ມີສ່ວນປະກອບທີ່ແນ່ນອນເຂົ້າໃນການເຕີບໂຕ ຈີດີພີ ຂອງປະເທດ. ຕາມສະຖິຕິ, ບັນດາຂະແໜງການອຸດສາຫະກຳວັດທະນະທຳຂອງຫວຽດນາມບັນລຸ 3,61% ຂອງ ຈີດີພີ ທົ່ວປະເທດໃນປີ 2018 (ທຽບກັບລະດັບ 2,68% ຂອງປີ 2015). ອຸດສາຫະກຳວັດທະນະທຳຂອງຫວຽດນາມເລີ່ມຕົ້ນເສີມຂະຫຍາຍປະສິດທິຜົນຊັບພະຍາກອນວັດທະນະທຳ ແລະ ຫັນປ່ຽນຄຸນຄ່າວັດທະນະທຳ ເປັນພະລັງອ່ອນທາງວັດທະນະທຳ, ຍົກສູງຄວາມສາມາດແຂ່ງຂັນ ແລະ ການເຊື່ອມໂຍງກັບສາກົນ.
ທີສາມ, ລະບົບເອກະສານທາງກົດໝາຍກ່ຽວກັບພາສີ, ການສົ່ງເສີມການຫັນເປັນສັງຄົມ, ການສ້າງພື້ນຖານທາງດ້ານກົດໝາຍສຳລັບການລະດົມຊັບພະຍາກອນໃນສັງຄົມເພື່ອລົງທຶນໃຫ້ແກ່ວັດທະນະທຳ.
ໃນໄລຍະປີ 2014-2019, ອັດຕາການລົງທຶນດ້ານວັດທະນະທຳຈາກງົບປະມານແຫ່ງລັດເພີ່ມຂຶ້ນເທື່ອລະກ້າວ ໃນຊຸມປີທີ່ຜ່ານມາ, ການລົງທຶນພັດທະນາວັດທະນະທຳຜ່ານທຶນທີ່ມອບໃຫ້ກະຊວງວັດທະນະທຳ ກິລາ ແລະ ການທ່ອງທ່ຽວ ແມ່ນ 5.735.442 ລ້ານດົ່ງ, ໃນນັ້ນ ເງິນລົງທຶນພັດທະນາແມ່ນ 918.653 ລ້ານດົ່ງ, ທຶນງົບປະມານເພື່ອພາລະກິດແມ່ນ 4.816.789 ລ້ານດົ່ງ. ການລົງທຶນເພື່ອພັດທະນາວັດທະນະທຳຂອງທ້ອງຖິ່ນຕ່າງໆໃນໄລຍະກ່ອນປີ 2016 ໄດ້ຮັບການປະຕິບັດຜ່ານໂຄງການເປົ້າໝາຍແຫ່ງຊາດເພື່ອການພັດທະນາວັດທະນະທຳ. ໃນໄລຍະປີ 2014-2015, ໂຄງການເປົ້າໝາຍແຫ່ງຊາດເພື່ອພັດທະນາວັດທະນະທຳໄດ້ຮັບເງິນ 546 ຕື້ດົ່ງ, ໃນນັ້ນເງິນລົງທຶນການພັດທະນາແມ່ນ 290 ຕຶ້ດົ່ງ, ທຶນງົບປະມານເພື່ອພາລະກິດແມ່ນ 256 ຕື້ດົ່ງ. ໃນໄລຍະປີ 2016-2020, ທຶນທັງໝົດຂອງໂຄງການເປົ້າໝາຍແຫ່ງຊາດເພື່ອການພັດທະນາວັດທະນະທຳແມ່ນ 10.620 ຕືດົ່ງ(1). ໂດຍພື້ນຖານແລ້ວ, ເງິນລົງທຶນຈາກໂຄງການເຫຼົ່ານີ້ມີລັກສະນະເປັນ “ທຶນເບື້ອງຕົ້ນ” ໄດ້ນຳມາເຊິ່ງປະສິດທິຜົນໃນການຊຸກຍູ້ການພັດທະນາເສດຖະກິດການທ່ອງທ່ຽວ ແລະ ປັບປຸງຊີວິດດ້ານວັດທະນະທຳຂອງປະຊາຊົນ, ໂດຍສະເພາະປະຊາຊົນຢູ່ເຂດຊົນນະບົດ, ເຂດຫ່າງໄກສອກຫຼີກ, ເຂດຊາຍແດນ ເກາະດອນ. ຄຽງຄູ່ກັນນັ້ນ, ແຜນນະໂຍບາຍການຫັນເປັນສັງຄົມຖືກກຳນົດຂຶ້ນຜ່ານເອກະສານ(2) ໄດ້ສ້າງກົນໄກ ແລະ ນະໂຍບາຍບຸລິມະສິດ (ກ່ຽວກັບພາສີ, ຄ່າທຳນຽມ, ສິນເຊື່ອ, ສິດທິການໃຊ້ທີ່ດິນ...), ບັນດາແຫຼ່ງການລົງທຶນ, ການອຸປະຖຳ, ການບໍລິຈາກຈາກບຸກຄົນແລະອົງການທາງສັງຄົມ ໄດ້ຮັບການລະດົມເພື່ອການພັດທະນາວັດທະນະທຳ. ລັດກໍໄດ້ສົ່ງເສີມໃຫ້ຈັດຕັ້ງກອງທຶນຕ່າງໆເຊັ່ນ ກອງທຶນຝຶກອົບຮົມ, ສົ່ງເສີມການສຶກສາ, ພັດທະນາພອນສະຫວັນ, ສົ່ງເສີມວັນນະຄະດີແລະສິລະປະ, ພັດທະນາຮູບເງົາ, ສະໜັບສະໜູນການພິມຈຳໜ່າຍ... ຕົວຢ່າງເຊັ່ນ, ກົດໝາຍວ່າດ້ວຍພາສີມູນຄ່າເພີ່ມປີ 2008, ສະບັບປັບປຸງເພີ່ມເຕີມປີ 2014 ກຳນົດເປົ້າໝາຍທີ່ບໍ່ຕ້ອງເສຍພາສີໃນຂໍ້ 12, ມາດຕາ 5. ຕາມນັ້ນ, ໃນຂົງເຂດວັດທະນະທຳ (ປະກອບມີການເຄື່ອນໄຫວວັດທະນະທຳ, ການວາງສະແດງ; ການສະແດງສິລະປະ; ການຜະລິດຟີມຮູບເງົາ; ການນຳເຂົ້າ ແຈກຈ່າຍ ແລະ ສາຍຟີມຮູບເງົາ) ໄດ້ຮັບອັດຕາພາສີພິເສດ 5%. ສໍາລັບສິນຄ້າແລະບໍລິການອື່ນໆ ມີອັດຕາພາສີ 10% (ລວມທັງບໍລິການແລະກິດຈະກໍາການທ່ອງທ່ຽວ). ໃນເວລາມີການແຜ່ລະບາດຂອງພະຍາດໂຄວິດ-19, ລັດມີນະໂຍບາຍທັນທ່ວງທີ, ຫຼຸດຜ່ອນພາສີ, ຂະຫຍາຍກຳນົດເວລາຊຳລະພາສີ ເພື່ອໜູນຊ່ວຍວິສາຫະກິດ ແລະ ບຸກຄົນທີ່ດຳເນີນທຸລະກິດດ້ານວັດທະນະທຳ, ການທ່ອງທ່ຽວ... ນອກຈາກນັ້ນ, ບັນດາແຫຼ່ງກຳລັງອື່ນໆທີ່ຈຳເປັນເພື່ອພັດທະນາວັດທະນະທຳຢູ່ຫວຽດນາມ, ເຊັ່ນ: ຊັບພະຍາກອນມະນຸດ, ໂຄງສ້າງພື້ນຖານ, ຄວາມຮູ້ວິຊາສະເພາະ,... ກໍໄດ້ຖືກລະດົມແລະເສີມຂະຫຍາຍເພື່ອປະກອບສ່ວນສຳຄັນເຂົ້າໃນການສ້າງຜົນງານທີ່ຕັ້ງໜ້າໃນຂົງເຂດວັດທະນະທຳ ແລະ ສິລະປະ ຂອງປະເທດ.
ທີສີ່, ກົນໄກແລະນະໂຍບາຍ ພວມຄ່ອຍໆປະກອບສ່ວນຍົກສູງຄຸນນະພາບຂອງຊັບພະຍາກອນມະນຸດໃນຂົງເຂດສິລະປະແລະວັດທະນະທຳ.
ຮອດວັນທີ 30 ມິຖຸນາ 2021, ຂະແໜງວັດທະນະທຳ ກິລາ ແລະ ການທ່ອງທ່ຽວທົ່ວປະເທດ ມີທັງໝົດ 899.950 ຄົນ, ໃນນັ້ນ ຂະແໜງສິລະປະ ວັດທະນະທຳ: 19.751 ຄົນ; ຂະແໜງກິລາ ກາຍະກຳ: 10.199 ຄົນ; ຂະແໜງການທ່ອງທ່ຽວມີ 870.000 ຄົນ, ໃນນັ້ນມີ 18.907 ຄົນ ຮັບໃຊ້ທັງ 3 ຂະແໜງສິລະປະວັດທະນະທຳ, ກິລາ ກາຍະກຳ ແລະ ການທ່ອງທ່ຽວ (3). ໃນເວລາທີ່ຜ່ານມາ, ບັນດາຂໍ້ກຳນົດ, ກົດລະບຽບ, ຫຼັກດຳເນີນງານ, ຄຳແນະນຳກ່ຽວກັບການວາງແຜນ, ການເລືອກຮັບສະໝັກ, ການນຳໃຊ້, ການແຕ່ງຕັ້ງພະນັກງານ ໄດ້ສ້າງຢ່າງມີລະບຽບແບບແຜນ ແລະ ໄດ້ປ່ຽນແປງໃໝ່ໃຫ້ສອດຄ່ອງກັບສະພາບການຕົວຈິງ ແລະ ແກ້ໄຂຂໍ້ຈໍາກັດກ່ອນໜ້ານີ້. ເພາະສະນັ້ນ, ພະນັກງານຂອງຂະແໜງການພວມໄດ້ຮັບການວາງແຜນການຢ່າງມີລະບຽບແບບແຜນ, ດັດປັບໂຄງປະກອບອາຍຸ ແລະ ຄຸນສົມບັດທີ່ເໝາະສົມ. ບັນດານະໂຍບາຍຝຶກອົບຮົມ ບຳລຸງສ້າງ ຄົ້ນພົບຄົນເກັ່ງທາງດ້ານສິລະປະວັດທະນະທຳ ແລະ ການຍົກຍ້ອງໃຫ້ກຽດຄົນເກັ່ງກໍໄດ້ຮັບການປະຕິບັດ ເພື່ອດຶງດູດຊັບພະຍາກອນມະນຸດທີ່ມີຄຸນນະພາບສູງສຳລັບຂົງເຂດວັດທະນະທຳ.
ທີຫ້າ, ຂະບວນການປັບປຸງລະບອບລະບຽບການໄດ້ປະກອບສ່ວນຍົກສູງປະສິດທິຜົນການອະນຸລັກຮັກສາ ແລະ ເສີມຂະຫຍາຍຄຸນຄ່າວັດທະນະທຳ, ມໍລະດົກ ແລະ ວັດຖຸບູຮານທາງປະຫວັດສາດ-ວັດທະນະທຳ ຂອງຊາດ.
ຂະບວນການປັບປຸງລະບອບລະບຽບການໃຫ້ສົມບູນແບບ ໄດ້ປະກອບສ່ວນຍົກສູງປະສິດທິຜົນການອະນຸລັກຮັກສາ ແລະ ເສີມຂະຫຍາຍຄຸນຄ່າວັດທະນະທຳດັ້ງເດີມຂອງຊາດ, ມໍລະດົກ ແລະ ວັດຖຸບູຮານທາງປະຫວັດສາດ-ວັດທະນະທຳທີ່ຫຼາກຫຼາຍແລະອຸດົມສົມບູນຂອງຫວຽດນາມ. ຄຽງຄູ່ກັບບັນດາໂຄງການສະເພາະ ເພື່ອປະຕິບັດເປົ້າໝາຍ “ຍຸດທະສາດການພັດທະນາວັດທະນະທຳຫວຽດນາມຮອດປີ 2030” ເຊັ່ນ: ໂຄງການອະນຸລັກແລະເສີມຂະຫຍາຍຄຸນຄ່າມໍລະດົກວັດທະນະທຳຫວຽດນາມ ຢ່າງຍືນຍົງ, ໄລຍະ 2021-2025; ໂຄງການການຫັນເປັນດິຈິຕອນກ່ຽວກັບມໍລະດົກວັດທະນະທຳຫວຽດນາມ, ໄລຍະ 2021-2030; ໂຄການປະສານງານລະຫວ່າງກະຊວງສຶກສາແລະການຝຶກອົບຮົມ ກັບກະຊວງວັດທະນະທຳ ກິລາ ແລະ ການທ່ອງທ່ຽວ ໄລຍະ 2022-2026 ໃນວຽກງານການສຶກສາອົບຮົມມູນເຊື້ອ ໃຫ້ນັກຮຽນນັກສຶກສາ ຜ່ານບັນດາວັດຖຸບູຮານ, ມໍລະດົກວັດທະນະທຳທີ່ບໍ່ມີຕົວຕົນ, ພິພິທະພັນຈາກສູນກາງເຖິງທ້ອງຖິ່ນ (ໂຄງການປະສານງານສະບັບເລກທີ 217/CTr-BGDĐT- BVHTTDL, ລົງວັນທີ 4 ມີນາ 2022), ປະເທດເຮົາສືບຕໍ່ຄວາມພະຍາຍາມໃນການຍົກສູງຖານະບົດບາດຂອງຕົນ ໃນປະຊາຄົມໂລກ ແລະ ຕັ້ງໜ້າສົ່ງເສີມໂຄສະນາ ມໍລະດົກວັດທະນະທຳ ຂອງປະເທດສູ່ໂລກ, ສະແດງອອກໃນການໄດ້ຮັບເລືອກເປັນສະມາຊິກຂອງຄະນະກຳມະການລະຫວ່າງລັດຖະບານຂອງ ອະນຸສັນຍາວ່າດ້ວຍການຄຸ້ມຄອງມໍລະດົກວັດທະນະທຳທີ່ບໍ່ມີຕົວຕົນຂອງ ຢູເນສະໂກ ວາລະປີ 2022-2026, ແລະ ມີມໍລະດົກວັດທະນະທຳທີ່ບໍ່ມີຕົວຕົນອີກ 2 ລາຍການ ທີ່ໄດ້ຮັບການຈົດທະບຽນຮັບຮອງຈາກ ຢູເນສະໂກ (ວິທີປະຕິບັດແທນຂອງຊາວ ໄຕ, ໜູ່ງ, ໄທ ແລະ ສິລະປະເຄື່ອງປັ້ນດິນເຜົາຂອງຊາວຈຳ).
ທີຫົກ, ຄວາມເອົາໃຈໃສ່ໃນການປະຕິບັດຫົວຂໍ້ປະຈໍາປີຂອງຂະແໜງການວັດທະນະທໍາ, ກິລາແລະການທ່ອງທ່ຽວ ໄດ້ປະກອບສ່ວນຍົກສູງປະສິດທິຜົນຂອງການກໍ່ສ້າງສະພາບແວດລ້ອມທາງວັດທະນະທຳທີ່ປອດໃສ, ເສີມຂະຫຍາຍຄຸນຄ່າ ແລະ ບົດບາດຂອງຄອບຄົວ, ຊຸມຊົນ ແລະ ສັງຄົມ.
ໃນປີ 2022, ກະຊວງວັດທະນະທຳ ກິິລາ ແລະ ການທ່ອງທ່ຽວ ໄດ້ຈັດຕັ້ງຫົວຂໍ້ວຽກງານປະຈຳປີຄື “ປີສ້າງສະພາບແວດລ້ອມວັດທະນະທຳຢູ່ຮາກຖານ ແລະ ວຽກງານຈັດຕັ້ງພະນັກງານ”, ຈາກນັ້ນ ເຮັດໃຫ້ການກໍ່ສ້າງສະພາບແວດລ້ອມວັດທະນະທໍາເປັນບາດກ້າວໃໝ່ໃນການດໍາເນີນງານຂອງຂະແໜງການ ໂດຍມີເປົ້າຫມາຍເພື່ອຮັບປະກັນວ່າ ສະມາຊິກທຸກຄົນໃນຊຸມຊົນໄດ້ພັດທະນາຄວາມສາມາດໃນການສ້າງສັນຂອງຕົນ. ກະຊວງວັດທະນະທຳ ກິິລາ ແລະ ການທ່ອງທ່ຽວ ໄດ້ສະເໜີໃຫ້ນາຍົກລັດຖະມົນຕີອະນຸມັດໂຄງການປະຕິບັດການເຄື່ອນໄຫວ “ທົ່ວປວງຊົນພ້ອມກັນສ້າງຊີວິດວັດທະນະທຳ” ໄລຍະ 2021-2026. ນີ້ແມ່ນພື້ນຖານເພື່ອໃຫ້ຄະນະຊີ້ນຳສູນກາງສຸມໃສ່ຊີ້ນຳ ນຳພາການປະຕິບັດເນື້ອໃນໃນການເຄື່ອນໄຫວຈຸດສຸມ ແລະ ສຳຄັນ; ປະກາດໃຊ້ແຜນການຈັດຕັ້ງປະຕິບັດການເຄື່ອນໄຫວໃຫ້ທຸກຂັ້ນ, ຂະແໜງການ ແລະ ປະຊາຊົນຢ່າງທັນການ, ປະກອບສ່ວນເສີມຂະຫຍາຍບົດບາດຂອງຄອບຄົວ ຊຸມຊົນ ແລະ ສັງຄົມໃນການສ້າງສະພາບການວັດທະນະທຳ, ເຮັດໃຫ້ວັດທະນະທຳກາຍເປັນປັດໄຈຫຼໍ່ຫຼອມຄຸນຄ່າຄວາມຈິງ - ຄວາມດີ - ຄວາມງາມ.
ທີເຈັດ, ກາສ້າງສະຖາບັນແລະນະໂຍບາຍໄດ້ເຄົາລົບ ແລະ ຮັກສາຄວາມຫຼາກຫຼາຍທາງວັດທະນະທຳຂອງຊົນເຜົ່າ, ເຂດ ພາກພື້ນ, ຍົກສູງລະດັບການຊົມໃຊ້ວັດທະນະທຳຂອງປະຊາຊົນ, ປະກອບສ່ວນປົກປ້ອງຄວາມໝັ້ນຄົງທາງການເມືອງ ແລະ ຮັກສາອຳນາດອະທິປະໄຕຂອງປະເທດຊາດ.
ບັນດາໂຄງການ ແລະ ການເຄື່ອນໄຫວທີ່ຫຼາກຫຼາຍ, ອຸດົມສົມບູນເຊັ່ນ: ຊຸດຝຶກອົບຮົມ, ການສອນ, ງານບຸນວັດທະນະທຳຂອງຊົນເຜົ່າ, ງານບຸນແລະການສະແດງເຄື່ອນທີ່, ໄດ້ຈັດຂຶ້ນເປັນປະຈຳ ເພື່ອຕອບສະໜອງຄວາມຕ້ອງການຊົມໃຊ້ວັດທະນະທຳຂອງປະຊາຊົນ ແລະ ເຂດຊົນເຜົ່າສ່ວນນ້ອຍ, ເຂດຫ່າງໄກສອກຫຼີກ, ເຂດຊາຍແດນ ແລະ ໝູ່ເກາະ, ປະກອບສ່ວນຢ່າງຕັ້ງໜ້າເຂົ້າໃນການຮັດແຄບຊ່ອງຫວ່າງຄວາມມ່ວນຊື່ນດ້ານວັດທະນະທຳ ລະຫວ່າງຊົນນະບົດກັບຕົວເມືອງ, ລະຫວ່າງພາກແລະເຂດ ໃນທົ່ວປະເທດ. ການຫັນເປັນສັງຄົມໃນການເຄື່ອນໄຫວວັດທະນະທຳ-ສິລະປະ ໄດ້ຮັບການຍູ້ແຮງ ແລະ ສ້າງຜົນດີຕໍ່ສັງຄົມ.
ທີແປດ, ບັນດາໜ້າທີ່ໃນການສ້າງສະພາບແວດລ້ອມທາງວັດທະນະທຳດິຈິຕອນໄດ້ເສີມຂະຫຍາຍປະສິດທິຜົນໃນເບື້ອງຕົ້ນ.
ບັນດາໂຄງການຫັນເປັນດິຈິຕອນໄດ້ຮັບການອະນຸມັດຈາກລັດຖະບານ, ເຊັ່ນ: ໂຄງການຫັນເປັນດິຈິຕອນມໍລະດົກວັດທະນະທຳຫວຽດນາມ ໄລຍະ 2021-2030; ໂຄງການຫັນເປັນດິຈິຕອນຂອງຂະແໜງການຫ້ອງສະໝຸດ ຮອດປີ 2025 ໂດຍມີວິໄສທັດຮອດປີ 2030; ໂຄງການດິຈິຕອນຂໍ້ມູນງານບຸນຢູ່ຫວຽດນາມ ໄລຍະ 2021-2025, ໂຄງການສູນເຜີຍແຜ່ຮູບເງົາອອນໄລນ໌... ໂດຍສະເພາະ, ໃນສະພາບການແຜ່ລະບາດໃຫຍ່ຂອງໂຄວິດ-19, ບັນດາການເຄື່ອນໄຫວທາງວັດທະນະທໍາແລະສິລະປະມີແນວໂນ້ມທີ່ຈະປ່ຽນໄປສູ່ສະພາບແວດລ້ອມດິຈິຕອນ. ໂຄງການສິລະປະການສະແດງໂດຍບໍ່ມີຜູ້ຊົມໄດ້ຖືກເຜີຍແຜ່ຢ່າງກວ້າງຂວາງຜ່ານເວທີອອນໄລນ໌, ເຄືອຂ່າຍສັງຄົມ, ແລະ ມີປະສິດທິພາບສູງ.
ຂໍ້ຈໍາກັດແລະຂໍ້ບົກຜ່ອງ
ທີໜຶ່ງ, ລະບົບເອກະສານທາງກົດໝາຍກ່ຽວກັບວັດທະນະທຳມີຈຳນວນຫຼາຍ, ແຕ່ຫຼາຍສະບັບມີປະສິດທິພາບທາງກົດໝາຍ ແລະ ມີຄວາມບັງຄັບທາງກົດໝາຍຕ່ຳ, ຂາດລະບຽບການສະເພາະ ເພື່ອໃຫ້ອັດຕະພາບປະຕິບັດຕາມ ເຊິ່ງນຳໄປສູ່ປະສິດທິພາບແລະປະສິດທິຜົນຂອງການຄຸ້ມຄອງວັດທະນະທຳຂອງລັດຖືກຈຳກັດ.
ລະບົບເອກະສານທາງກົດໝາຍກ່ຽວກັບວັດທະນະທຳ ແລະ ຄອບຄົວມີປະມານ 160 ສະບັບ, ໃນນັ້ນມີຫຼາຍປະເພດ, ນັບແຕ່ກົດໝາຍ ກົດດຳລັດ ຈົນເຖິງໜັງສືວຽນ. ບັນດາເອສານທາງກົດໝາຍທີ່ຂັດແຍ້ງກັນ ທັບຊ້ອນກັນຍັງຫຼາຍ, ຫຼຸດຜ່ອນຄວາມໂປ່ງໃສ ເຮັດໃຫ້ກົດໝາຍມີຄວາມສັບສົນ ແລະ ຍາກທີ່ຈະນຳໃຊ້. ບາງຂົງເຂດຍັງບໍ່ໄດ້ຮັບການຄວບຄຸມດ້ວຍກົດໝາຍ ຫຼືກົດດຳລັດ (ສິລະປະການສະແດງ, ສິລະປະ, ການຖ່າຍຮູບ, ການສ້າງສະພາບແວດລ້ອມທາງວັດທະນະທຳ, ສະຖາບັນທາງວັດທະນະທໍາ, ການໂຄສະນາປຸກລະດົມຂົນຂວາຍທາງການເມືອງ, ສິດແລະພັນທະຂອງສິລະປິນ...), ຍັງບໍ່ທັນມີເອກະສານເພື່ອປັບແຕ່ງເທື່ອ (ຂົງເຂດວັນນະຄະດີ, ການຄຸ້ມຄອງກິດຈະກໍາເກມ...) ເຊິ່ງເປັນຜົນກະທົບຢ່າງໃຫຍ່ເຖິງວຽກງານການຄຸ້ມຄອງລັດໃນແຕ່ລະຂົງເຂດ.
ທີສອງ, ຂອບສະຖາບັນຍັງບໍ່ທັນສຳເລັດສົມບູນ ແລະ ການປັບ “ຍຸດທະສາດການພັດທະນາຂະແໜງການວັດທະນະທຳຮອດປີ 2020, ວິໄສທັດຮອດປີ 2030” ໃນສະພາບການໃໝ່ ກຳລັງຫຼຸດຜ່ອນບົດບາດການສ້າງສັນ ແລະ ຄວາມສາມາດໃນການຍົກສູງການແຂ່ງຂັນ ແລະ ການເຊື່ອມໂຍງຂອງຕະຫຼາດວັດທະນະທໍາ.
ເຖິງວ່າ “ຍຸດທະສາດການພັດທະນາຂະແໜງການວັດທະນະທຳຮອດປີ 2020, ວິໄສທັດຮອດປີ 2030” ຕັ້ງເປົ້າໝາຍສູ້ຊົນເຖິງປີ 2030 ລາຍໄດ້ຂອງບັນດາຂະແໜງອຸດສາຫະກຳວັດທະນະທຳຈະປະກອບສ່ວນ 7% ຂອງຈີດີພີ, ແຕ່ພາຍຫຼັງເກືອບ 6 ປີແຫ່ງການປະຕິບັດຍຸດທະສາດ, ການບັນລຸເປົ້າຫມາຍນີ້ຍັງຄົງເປັນສິ່ງທ້າທາຍອັນໃຫຍ່ຫຼວງ. ຂະແໜງອຸດສາຫະກຳວັດທະນະທຳຫວຽດນາມ ຍັງບໍ່ທັນໄດ້ຮັບການຄວບຄຸມໂດຍເອກະສານທາງກົດໝາຍ, ຍັງຂາດນະໂຍບາຍແລະກົດໝາຍທີ່ຈະສ້າງແລວທາງກົດໝາຍເພື່ອພັດທະນາຂະແໜງໃໝ່ ແລະ ມີທ່າແຮງນີ້, ໃນນັ້ນນະໂຍບາຍກ່ຽວກັບການລະດົມຊັບພະຍາກອນແມ່ນມີບົດບາດສຳຄັນ. ບັນດານະໂຍບາຍພັດທະນາອຸດສາຫະກຳວັດທະນະທຳ ຍັງບໍ່ເໝາະສົມກັບການເຄື່ອນໄຫວຂອງຕະຫຼາດ, ໂດຍປົກກະຕິແມ່ນການກວດກາບັນດາເນື້ອໃນຂອງຜະລິດຕະພັນວັດທະນະທຳ, ສິລະປະ ຕາມຫຼັກເກນທີ່ບໍ່ຊັດເຈນ. ດ້ານອື່ນ, ລັດບໍ່ມີກົນໄກແລະບົດລົງໂທດທີ່ເຂັ້ມແຂງພໍທີ່ຈະແກ້ບັນຫາຫຼັກຂອງຕະຫຼາດວັດທະນະທຳ ເຊັ່ນການຄຸ້ມຄອງລິຂະສິດ... ຄວາມບໍ່ພຽງພໍໃນການນຳໃຊ້ເຄື່ອງມືຄຸ້ມຄອງ ເຮັດໃຫ້ລັດບໍ່ໄດ້ເປັນອະນຸຍາໂຕຕຸລາການຂອງຜູ້ມີບົດບາດທາງເສດຖະກິດຢ່າງແທ້ຈິງ, ຍັງບໍ່ທັນດັດປັບແລະຮັບປະກັນ ຄວາມກົມກຽວທາງດ້ານຜົນປະໂຫຍດ ລະຫວ່າງຜູ້ຜະລິດ, ຜູ້ຈຳໜ່າຍ ແລະ ຜູ້ບໍລິໂພກ. ໃນສະພາບການເຊື່ອມໂຍງສາກົນ, ຫຼາຍສະຖາບັນແລະລະບອບລະບຽບທີ່ກ່ຽວຂ້ອງກັບອຸດສາຫະກຳວັດທະນະທຳ ຍັງຊັກຊ້າ ໃນການປ່ຽນແປງໃໝ່ ແລະ ບໍ່ທັນສອດຄ່ອງກັບມາດຕະຖານສາກົນ.
ທີສາມ, ກົນໄກປະສານງານລະຫວ່າງບັນດາກົມ, ສາຂາ, ອົງການທຸກຂັ້ນ, ລະຫວ່າງພາກລັດ ແລະ ພາກເອກະຊົນ ຍັງບໍ່ທັນໃກ້ຊິດ. ການເຂົ້າຮ່ວມຂອງບັນດາອັດຕະພາບລະດັບຮາກຖານ, ໂດຍສະເພາະແມ່ນ ຜູ້ທີ່ໄດ້ຮັບຜົນກະທົບໂດຍກົງຈາກລະບົບສະຖາບັນແລະນະໂຍບາຍ, ຍັງເປັນແບບຮູບການ.
ເຖິງຈະໄດ້ຖືວ່າເປັນອົງການຄຸ້ມຄອງຕົນເອງຂອງປະຊາຊົນກໍ່ຕາມ, ແຕ່ຫຼາຍອົງການສັງຄົມຢູ່ຫວຽດນາມ ຍັງເພິ່ງພາທາງການເງິນໃນລະບົບການເມືອງ ແລະ ອົງການຂອງລັດ. ເພາະສະນັ້ນ ການເຄື່ອນໄຫວຂອງອົງການຈັດຕັ້ງສັງຄົມ ຈຶ່ງມີລັກສະນະຮູບການ ແລະ ຕົກໃນທ່າຮັບຢ່າງໜັກໜ່ວງ. ກົນໄກການເຂົ້າຮ່ວມຂອງສັງຄົມໃນການວາງແຜນ, ການປະຕິບັດ ແລະ ການປະເມີນຜົນນະໂຍບາຍຂອງລັດ ແລະ ການຕິດຕາມກວດກາການເຄື່ອນໄຫວຂອງວິສາຫະກິດ ຍັງບໍ່ທັນໄດ້ກຳນົດຢ່າງຈະແຈ້ງ. ໃນຂະນະນັ້ນ, ລະບຽບການບໍລິຫານຫຼາຍຂັ້ນຕອນຂອງລັດທີ່ຄວບຄຸມການພົວພັນທາງແພ່ງ ຍັງມີຄວາມຫຍຸ້ງຍາກ, ຫຼຸດຜ່ອນບົດບາດຂອງສັງຄົມໃນການເຂົ້າຮ່ວມການຄຸ້ມຄອງ ແລະ ຄວບຄຸມການພັດທະນາ.
ທີສີ່, ລະບຽບກົດໝາຍກ່ຽວກັບການລະດົມແຫຼ່ງຊັບພະຍາກອນສະແດງໃຫ້ເຫັນວ່າ ວັດທະນະທຳຍັງບໍ່ທັນເປັນຂະແໜງອາຊີບທີ່ໄດ້ຮັບບຸລິມະສິດ, ສົ່ງເສີມໃຫ້ພັດທະນາ; ວັດທະນະທໍາຍັງພົບກັບ “ຄໍຂວດ”, “ສິ່ງກີດຂວາງ” ຈາກຄວາມຮັບຮູ້ຂອງສັງຄົມ ແລະ ຂໍ້ກໍານົດຂອງກົດໝາຍ ບໍ່ທັນກັບຄວາມຕ້ອງການຈາກຄວາມເປັນຈິງທີ່ມີຊີວິດຊີວາ.
ໃນປະຈຸບັນ, ປະສິດທິຜົນຂອງຂໍ້ກຳນົດກ່ຽວກັບນະໂຍບາຍພາສີໃນກົດໝາຍສະເພາະ ເປັນພຽງຫຼັກການກ່ຽວກັບ “ການບຸລິມະສິດ”, ເຊິ່ງການນຳໃຊ້ແມ່ນຂຶ້ນກັບຂໍ້ກຳນົດສະເພາະຂອງກົດໝາຍວ່າດ້ວຍພາສີແຕ່ລະສະບັບ. ກົດໝາຍການລົງທຶນປີ 2020 ກຳນົດວ່າ ວັດທະນະທຳແມ່ນໜຶ່ງໃນບັນດາຂະແໜງອາຊີບທີ່ໄດ້ຮັບບຸລິມະສິດໃນການລົງທຶນ, ແຕ່ພຽງແຕ່ຈຳກັດໃນຂົງເຂດທີ່ແຄບຄື ການປົກປັກຮັກສາ ແລະ ເສີມຂະຫຍາຍບັນດາຄຸນຄ່າມໍລະດົກວັດທະນະທຳ, ໃນຂະນະທີ່ ວັດທະນະທຳແມ່ນຂົງເຂດທີ່ກ້ວາງຂວາງ. ປີ 2020, ສະພາແຫ່ງຊາດໄດ້ຮັບຮອງເອົາກົດໝາຍວ່າດ້ວຍການລົງທຶນ ຕາມຮູບແບບການຮ່ວມມືລະຫວ່າງພາກລັດແລະເອກະຊົນ (PPP), ແຕ່ມີພຽງ 5 ຂົງເຂດເທົ່ານັ້ນ ທີ່ນຳໃຊ້ຮູບແບບການຮ່ວມມືລະຫວ່າງພາກລັດແລະເອກະຊົນ, ໃນນັ້ນບໍ່ມີຂົງເຂດວັດທະນະທຳ. ດັ່ງນັ້ນ, ອີງໃສ່ກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍການລົງທຶນຕາມຮູບແບບການຮ່ວມມືລະຫວ່າງພາກລັດແລະເອກະຊົນນັ້ນ ຂົງເຂດວັດທະນະທຳຍັງບໍ່ໄດ້ເປັນຂະແໜງອາຊີບທີ່ໄດ້ຮັບການສົ່ງເສີມບຸລິມະສິດ. ກົດໝາຍວ່າດ້ວຍພາສີລາຍໄດ້ວິສາຫະກິດ ກຳນົດລາຍຮັບທີ່ໄດ້ຮັບການຍົກເວັ້ນພາສີ ສໍາລັບທຶນຊ່ວຍເຫຼືອທີ່ໄດ້ຮັບໄປໃຊ້ໃນກິດຈະການດ້ານການສຶກສາ, ວິທະຍາສາດ, ວັດທະນະທໍາ, ສິລະປະ, ການກຸສົນ... ແລະ ລາຍຮັບທີ່ບໍ່ມີການແບ່ງປັນຂອງສະຖານປະກອບການທີ່ເຄື່ອນໄຫວສັງຄົມໃນຂົງເຂດການສຶກສາ-ຝຶກອົບຮົມ, ສາທາລະນະສຸກ ແລະ ບັນດາຂົງເຂດສັງຄົມອື່ນໆ ເພື່ອການລົງທຶນພັດທະນາສະຖານປະກອບການດັ່ງກ່າວ ຕາມກົດໝາຍສະເພາະ, ແຕ່ກໍບໍ່ມີຂົງເຂດວັດທະນະທຳ. ຄຽງຄູ່ກັນນັ້ນ, ນິໄສຢາກລໍຖ້າງົບປະມານຂອງລັດສໍາລັບກິດຈະກໍາວັດທະນະທໍາ ເຊິ່ງຝັງຮາກເລິກຢູ່ໃນຈິດໃຕ້ສຳນຶກຕັ້ງແຕ່ສະໄໝທີ່ເສດຖະກິດລວມສູນແລະເກື້ອກູນອຸດໜູນ, ພ້ອມກັບແນວຄວາມຄິດທີ່ວ່າ ຂະແໜງການວັດທະນະທໍາ ເປັນຂະແໜງ “ການໃຊ້ຈ່າຍເງິນ” ກໍາລັງສ້າງອຸປະສັກເພີ່ມເຕີມໃນຄວາມຮັບຮູ້ກ່ຽວກັບການລົງທຶນຊັບພະຍາກອນໃນວັດທະນະທຳ.
ທີຫ້າ, ການຢຸດຊະງັກຂອງໂຄງການເປົ້າໝາຍແຫ່ງຊາດດ້ານວັດທະນະທໍາ, ໂຄງການພັດທະນາວັດທະນະທໍາ ກຳລັງຫຼຸດຜ່ອນແຮງຈູງໃຈໃນການສົ່ງເສີມການພັດທະນາວັດທະນະທໍາ ຕິດພັນກັບເສດຖະກິດ-ສັງຄົມ, ເພື່ອຕອບສະໜອງເປົ້າຫມາຍການພັດທະນາແບບຍືນຍົງ.
ການລົງທຶນໃຫ້ແກ່ການອະນຸລັກແລະເສີມຂະຫຍາຍຄຸນຄ່າວັດທະນະທຳຮຽກຮ້ອງຕ້ອງການແຫຼ່ງຊັບພະຍາກອນຫຼາຍທີ່ສຸດ. ໃນເວລາທີ່ຜ່ານມາ, ແຫຼ່ງເງິນລົງທຶນຈາກ “ໂຄງການເປົ້າໝາຍແຫ່ງຊາດດ້ານວັດທະນະທຳປີ 2014-2015” ແລະ “ໂຄງການເປົ້າໝາຍແຫ່ງຊາດດ້ານວັດທະນະທຳໄລຍະປີ 2016-2020” ມີລັກສະນະຂອງ “ທຶນເບື້ອງຕົ້ນ” ໄດ້ກໍ່ໃຫ້ເກີດຜົນດີໃນຂົງເຂດມໍລະດົກ. ແຕ່, ການສິ້ນສຸດໂຄງການໃນປີ 2021 ໄດ້ເຮັດໃຫ້ການລະດົມຊັບພະຍາກອນເພື່ອຕອບສະໜອງຄວາມຕ້ອງການດ້ານການພັດທະນາວັດທະນະທຳຂອງທ້ອງຖິ່ນ, ເຊິ່ງເທົ່າທຽມ ຫຼືຫຼາຍກວ່າເວລາທີ່ຜ່ານມາ, ພົບຄວາມຫຍຸ້ງຍາກຫຼາຍຢ່າງ.
ທີຫົກ, ກົນໄກແລະນະໂຍບາຍການລົງທຶນດ້ານວັດທະນະທຳ ບໍ່ເໝາະສົມກັບບົດບາດ ແລະ ທີ່ຕັ້ງຂອງວັດທະນະທຳໃນການພັດທະນາ.
ໂດຍລວມແລ້ວ, ລະດັບການລົງທຶນດ້ານວັດທະນະທໍາໃນງົບປະມານລາຍຈ່າຍທັງໝົດຂ້ອນຂ້າງຕໍ່າ ເມື່ອທຽບກັບຂົງເຂດອື່ນ, ບໍ່ສົມນ້ຳສົມເນື້ອກັບຄວາມເປັນຈິງ ແລະ ບໍ່ສະໝ່ຳສະເໝີ. ຕາມມະຕິຂອງສະພາແຫ່ງຊາດສະບັບເລກທີ 40/2021/QH15, ລົງວັນທີ 13 ພະຈິກ 2021, “ວ່າດ້ວຍການຈັດສັນງົບປະມານສູນກາງໃນປີ 2022”, ສ່ວນແບ່ງງົບປະມານສໍາລັບວັດທະນະທໍາແລະຂໍ້ມູນຂ່າວສານ ກວມເອົາພຽງແຕ່ 0,9% ຂອງງົບປະມານທີ່ຈັດສັນທັງໝົດ. ບໍ່ພຽງແຕ່ຈໍາກັດຂະໜາດເທົ່ານັ້ນ, ແຕ່ໂຄງສ້າງຂອງການລົງທຶນພາກລັດໃນດ້ານວັດທະນະທໍາກໍບໍ່ພຽງພໍ. ທຶນສາທາລະນະສ່ວນໃຫຍ່ໃຊ້ສໍາລັບກິດຈະກໍາທີ່ບໍ່ແມ່ນທຸລະກິດ, ແລະ ອັດຕາການໃຊ້ຈ່າຍໃນການລົງທຶນເພື່ອການພັດທະນາຍັງຢູ່ໃນລະດັບຕໍ່າ. ດ້ວຍຂໍ້ຈຳກັດເຫຼົ່ານີ້, ການລົງທຶນຂອງລັດຍັງບໍ່ທັນສາມາດ “ຊັກຊວນ” ແລະ “ຊີ້ນຳ” ການລົງທຶນພາກເອກະຊົນໃນຕະຫຼາດໄດ້.
ທີສີ່, ຄວາມບໍ່ພຽງພໍຂອງກົນໄກ ແລະ ນະໂຍບາຍ ເຮັດໃຫ້ເກີດຄວາມບໍ່ກົນກຽວລະຫວ່າງພາກລັດແລະພາກເອກະຊົນ ໃນການເຂົ້າເຖິງແຫຼ່ງທຶນສະໜັບສະໜູນຈາກລັດ.
ຄວາມບໍ່ພຽງພໍໃນການຈັດສັນຊັບພະຍາກອນສາທາລະນະ ແລະ ການເຂົ້າເຖິງຊັບພະຍາກອນສາທາລະນະ ພ້ອມກັນກັບການບໍ່ມີມາດຖານທີ່ຈະແຈ້ງ ແລະ ສະເພາະ ເພື່ອເປັນພື້ນຖານໃຫ້ແກ່ການປະເມີນ ແລະ ການອອກຄຳຕັດສິນ ໃນການສະໜອງທຶນ ທີ່ບໍ່ໄດ້ສ້າງແຮງຈູງໃຈໃຫ້ມີຫົວຄິດປະດິດສ້າງ ແລະ ຄວາມພະຍາຍາມຍົກສູງຄຸນນະພາບຂອງບົດປະພັນ, ບໍ່ໄດ້ສ້າງສະພາບແວດລ້ອມການແຂ່ງຂັນແບບສົດໃສໃນຂົງເຂດວັດທະນະທໍາ ແລະ ສິລະປະ.
ທິດທາງແລະວິທີການແກ້ໄຂ
ການປະເມີນປະສິດທິຜົນຂອງສະຖາບັນແລະນະໂຍບາຍດັ່ງທີ່ກ່າວມາຂ້າງເທິງນີ້ ຮຽກຮ້ອງໃຫ້ສຸມໃສ່ແກ້ໄຂຄວາມບໍ່ພຽງພໍ ແລະ ຂະຈັດບັນຫາຄໍຂວດໃນການຈັດຕັ້ງ ປະຕິບັດ ຜ່ານການກຳນົດນະໂຍບາຍ ແລະ ການປັບປຸງນະໂຍບາຍໃຫ້ສົມບູນແບບ ເຊິ່ງສາມາດສ້າງກົນໄກເພື່ອສົ່ງເສີມການພັດທະນາວັດທະນະທໍາໃນໄລຍະໃໝ່. ໂດຍສະເພາະ:
ທີໜຶ່ງ, ສືບຕໍ່ສ້າງ ແລະ ປັບປຸງບູລະນະລະບົບກົດໝາຍທີ່ຄວບຄຸມຂົງເຂດວັດທະນະທຳໂດຍກົງ ເພື່ອສ້າງພື້ນຖານທາງກົດໝາຍໃນການປັບຄວາມສຳພັນສັງຄົມກ່ຽວກັບວັດທະນະທຳ, ສ້າງຊັບພະຍາກອນການພັດທະນາ. ລະອຽດຄື: ແກ້ໄຂເພີ່ມເຕີມກົດໝາຍວ່າດ້ວຍມໍລະດົກວັດທະນະທຳ ເພື່ອແກ້ໄຂຄວາມບໍ່ພຽງພໍ ແລະ ຂະຈັດບັນຫາຄໍຂວດໃນການບັງຄັບໃຊ້ກົດໝາຍວ່າດ້ວຍມໍລະດົກວັດທະນະທຳໃນປະຈຸບັນ ໃນຈຸດທີ່ບໍ່ມີການກໍານົດຊັດເຈນ, ປະສານຄວາມສຳພັນກົມກຽວ ລະຫວ່າງການອະນຸລັກ ແລະ ການເສີມຂະຫຍາຍຄຸນຄ່າວັດທະນະທຳ. ແກ້ໄຂເພີ່ມເຕີມກົດໝາຍວ່າດ້ວຍການໂຄສະນາ ໃນຂໍ້ກຳນົດກ່ຽວກັບການໂຄສະນາປະເພດໃໝ່, ສື່ໂຄສະນາທີ່ເກີດໃໝ່...; ຄົ້ນຄວ້າການສ້າງກົດໝາຍວ່າດ້ວຍສິລະປະການສະແດງ, ດຳລັດວ່າດ້ວຍການເຄື່ອນໄຫວວັນນະຄະດີ, ນະໂຍບາຍກ່ຽວກັບຊັບສິນເນື້ອໃນວັດທະນະທໍາດິຈິຕອນ... ສືບຕໍ່ແກ້ໄຂປັບປຸງບາງກົດໝາຍສະເພາະເຊັ່ນ: ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການລົງທຶນຕາມຮູບແບບການຮ່ວມມືລະຫວ່າງພາກລັດແລະເອກະຊົນ, ບັນດາກົດໝາຍວ່າດ້ວຍພາສີ, ໂດຍສະເພາະ ພາສີລາຍໄດ້ວິສາຫະກິດ, ດຳລັດສົ່ງເສີມການຫັນເປັນສັງຄົມ ເພື່ອໃຊ້ຊັບພະຍາກອນຈາກລັດຢ່າງມີປະສິດທິຜົນ, ລະດົມຊັບພະຍາກອນສັງຄົມ ແລະ ເພີ່ມປະສິດທິພາບຊັບພະຍາກອນພາຍໃນຈາກວັດທະນະທຳ. ລະອຽດຄື: ກົດໝາຍວ່າດ້ວຍການລົງທຶນຈຳເປັນຕ້ອງມີຂໍ້ກຳນົດທາງກົດໝາຍທີ່ກ່ຽວຂ້ອງ ແລະ ກົດໝາຍສະເພາະດ້ານວັດທະນະທຳ ເພື່ອສ້າງພື້ນຖານດ້ານກົດໝາຍໃຫ້ແກ່ແຫຼ່ງຊັບພະຍາກອນຂອງລັດ. ແກ້ໄຂປັບປຸງບັນດາຂໍ້ກຳນົດກົດໝາຍທີ່ກ່ຽວຂ້ອງ ເພື່ອປົດປ່ອຍຊັບພະຍາກອນຈາກວັດທະນະທຳໃນໂຄງສ້າງພື້ນຖານຂອງວັດທະນະທໍາ, ເຊັ່ນ ກົດໝາຍວ່າດ້ວຍການຄຸ້ມຄອງແລະນຳໃຊ້ຊັບສິນຂອງລັດ, ໃນນັ້ນມີນະໂຍບາຍທີ່ເໝາະສົມເພື່ອເສີມຂະຫຍາຍແລະນຳໃຊ້ຢ່າງມີປະສິດທິຜົນ ຊັບສິນໂຄງສ້າງພື້ນຖານ, ສະຖາບັນທາງວັດທະນະທຳ ແລະ ຊັບສິນທາງວັດທະນະທຳສະເພາະ; ກົນໄກເອກະລາດທາງດ້ານການເງິນທີ່ຄົບຊຸດກັບບຸກຄະລາກອນ ແລະ ແຜນການຂອງໜ່ວຍບໍລິການສາທາລະນະ ໃນຂົງເຂດວັດທະນະທໍາ. ເພີ່ມເຕີມບັນດານະໂຍບາຍຊຸກຍູ້ການພັດທະນາພອນສະຫວັນ ແລະ ສິ່ງຍອດຍິ່ງ ໃນຂົງເຂດວັດທະນະທຳ, ສິລະປະ, ຊັບພະຍາກອນບຸກຄົນຂອງຂະແໜງວັດທະນະທຳຈາກແຫຼ່ງຊັບພະຍາກອນຂອງລັດ, ໃຫ້ບຸລິມະສິດບຸກຄະລາກອນທີ່ມີຫົວຄິດປະດິດສ້າງ ແລະ ບຸກຄະລາກອນບໍລິຫານຄຸ້ມຄອງ. ນະໂຍບາຍກ່ຽວກັບຊັບພະຍາກອນຂອງລັດສຳລັບການລົງທຶນດ້ານວັດທະນະທຳຈຳເປັນຕ້ອງຄຳນຶງເຖິງນະໂຍບາຍລະດັບຊາດ, ນະໂຍບາຍລະດັບທ້ອງຖິ່ນ, ນະໂຍບາຍສະເພາະ, ນະໂຍບາຍສົ່ງເສີມການພັດທະນາວັດທະນະທຳຊັ້ນນຳອີກດ້ວຍ (ວັດທະນະທຳ, ສິລະປະ) ແລະ ສະໜັບສະໜູນການພັດທະນາວັດທະນະທໍາມະຫາຊົນ.
ທີສອງ, ສືບຕໍ່ຜັນຂະຫຍາຍໂຄງການເປົ້າໝາຍແຫ່ງຊາດດ້ານວັດທະນະທຳ. ການລົງທຶນພັດທະນາວັດທະນະທຳຕ້ອງໃຊ້ຊັບພະຍາກອນມະຫາສານ. ເງິນລົງທຶນຈາກ “ໂຄງການເປົ້າໝາຍແຫ່ງຊາດດ້ານວັດທະນະທຳໄລຍະປີ 2014-2015” ມີລັກສະນະເປັນ “ທຶນເບື້ອງຕົ້ນ” ແລະ ໄດ້ນຳມາເຊິ່ງໝາກຜົນທີ່ສຳຄັນ. ການສິ້ນສຸດໂຄງການໃນຂະນະທີ່ຄວາມຕ້ອງການໃນການພັດທະນາວັດທະນະທຳທ້ອງຖິ່ນ ແມ່ນຍັງເທົ່າທຽມຫຼືຫຼາຍກວ່າໄລຍະກ່ອນ, ເຊິ່ງເປັນສິ່ງທ້າທາຍຫຼາຍຢ່າງໃນການພັດທະນາວັດທະນະທຳ. ດັ່ງນັ້ນ, ຈຶ່ງຈຳເປັນຕ້ອງມີ ໂຄງການເປົ້າໝາຍແຫ່ງຊາດທີ່ກວມລວມ ເພື່ອຟື້ນຟູວັດທະນະທໍາ. ໃນເວລາທີ່ຈະມາເຖິງ, ເພື່ອສ້າງການປ່ຽນແປງຄວາມຮັບຮູ້ ແລະ ນຳມາເຊິ່ງຄວາມໝາຍສຳຄັນໃຫ້ບັນດາກະຊວງ, ຂະແໜງການ, ທ້ອງຖິ່ນ ແລະ ຂະແໜງການວັດທະນະທຳພິຈາລະນາ ແລະ ຮັບຮູ້ຢ່າງເລິກເຊິ່ງ ກ່ຽວກັບບັນດາບັນຫາວັດທະນະທຳ, ບົດບາດ, ຕຳແໜ່ງ, ກ່ຽວກັບຄວາມຈຳເປັນທີ່ຈະຕ້ອງເອົາໃຈໃສ່ ແລະ ລົງທຶນໃນວັດທະນະທຳຢ່າງຮອບດ້ານແລະເໝາະສົມ ແລະ ກຳນົດລະດັບຕ່ຳສຸດ 2% ຂອງຄ່າໃຊ້ຈ່າຍງົບປະມານປະຈຳປີທັງໝົດ ສຳລັບວັດທະນະທຳ ຕາມແຜນນະໂຍບາຍແລະນະໂຍບາຍຂອງພັກແລະລັດ.
ທີສາມ, ປັບປຸງລະບົບນະໂຍບາຍໃຫ້ສົມບູນແບບ, ດັດແກ້ການກໍ່ສ້າງ “ຍຸດທະສາດການພັດທະນາອຸດສາຫະກຳວັດທະນະທຳຫວຽດນາມຮອດປີ 2030, ວິໄສທັດຮອດປີ 2045”, ໃນນັ້ນ ສຸມໃສ່ການກໍ່ສ້າງຄວາມສາມາດແຂ່ງຂັນ ແລະ ການເຊື່ອມໂຍງຂອງຕະຫຼາດວັດທະນະທຳ. ໂດຍພື້ນຖານແລ້ວ, ບັນດາວິທີແກ້ໄຂໃນຂົງເຂດອຸດສາຫະກຳວັດທະນະທຳ ມຸ່ງສູ່ການປັບປຸງລະບົບກົດໝາຍໃຫ້ສົມບູນແບບ, ໂດຍສະເພາະແມ່ນ ກົດໝາຍການແຂ່ງຂັນ ເພື່ອສ້າງແລວທາງກົດໝາຍທີ່ມີປະສິດທິພາບ ແລະ ຮັບປະກັນການແຂ່ງຂັນທີ່ສະເໝີພາບ ລະຫວ່າງບັນດາພາກສ່ວນເສດຖະກິດທີ່ເຄື່ອນໄຫວໃນຕະຫຼາດວັດທະນະທຳຫວຽດນາມ. ຜັນຂະຫຍາຍກຸ່ມວິທີການແກ້ໄຂເພື່ອໃຫ້ຕະຫຼາດວັດທະນະທຳສົມບູນ, ໃຫ້ບຸລິມະສິດການພັດທະນາຂະແໜງວັດທະນະທຳຈຳນວນໜຶ່ງທີ່ມີກຳລັງແຮງ ໃນການເຊື່ອມໂຍງເຂົ້າກັບສາກົນ. ເອົາໃນໃສ່ພັດທະນາຕະຫຼາດວັດທະນະທຳໃນໂລກໄຊເບີ. ເພີ່ມທະວີການລົງທຶນກໍ່ສ້າງແຫຼ່ງຊັບພະຍາກອນມະນຸດ ແລະ ປະຕິບັດມາດຕະການຕ່າງໆຢ່າງໄຫວພິບ ໃນການຄຸ້ມຄອງບຸກຄະລາກອນໃນກົນໄກຕະຫຼາດ ແລະ ບັນດາກຸ່ມມາດຕະການແກ້ໄຂອື່ນ. ສ້າງໂຄງສ້າງຂະແໜງການທີ່ມີຈຸດສຸມ, ຈຸດໜັກໃຈກາງ, ມີວິໄສທັດ.
ທີສີ່, ສ້າງຊຸດຕົວຊີ້ວັດແຫ່ງຊາດກ່ຽວກັບການພັດທະນາວັດທະນະທໍາ. ການພັດທະນາຊຸດຕົວຊີ້ວັດທີ່ຄົບຖ້ວນ ແລະ ນຳໃຊ້ເປັນໄລຍະເພື່ອວັດແທກ, ປະເມີນຜົນ ແລະ ຕິດຕາມການປະກອບສ່ວນ ແລະ ການຂະຫຍາຍຕົວ ຂອງຂະແໜງວັດທະນະທຳ ໃນການພັດທະນາຂອງປະເທດຊາດ, ພ້ອມກັນນັ້ນ, ໃຫ້ຫຼັກຖານທີ່ໜັກແໜ້ນສຳລັບການພັດທະນາສະຖາບັນ, ການກຳນົດນະໂຍບາຍ ແລະ ໂຄງການແຊກແຊງ. ຍົກສູງຄວາມຮັບຮູ້ຂອງຄະນະພັກ, ອຳນາດການປົກຄອງ ແລະ ສັງຄົມກ່ຽວກັບບົດບາດ, ຕຳແໜ່ງ ແລະ ການປະກອບສ່ວນຂອງວັດທະນະທຳຕໍ່ການພັດທະນາຂອງປະເທດຊາດ ແລະ ຄວາມຈຳເປັນຕ້ອງສ້າງຊຸດຕົວຊີ້ວັດແຫ່ງຊາດກ່ຽວກັບການພັດທະນາວັດທະນະທຳ.
ທີຫ້າ, ຄ່ອຍໆປັບສົມດຸນຂອງໂຄງສ້າງພະນັກງານໃນຂົງເຂດວັດທະນະທຳ ແລະ ສິລະປະໃຫ້ເໝາະສົມ (ໃນດ້ານອາຍຸ, ເພດ, ສະຖານທີ່ເຮັດວຽກຢູ່ສູນກາງ, ແຂວງ/ນະຄອນ, ເມືອງ/ເມືອງ ແລະ ຕາແສງ/ຊຸມຊົນ), ມີນະໂຍບາຍຄົ້ນພົບ, ນຳໃຊ້, ໃຫ້ຄ່າຕອບແທນ, ຍ້ອງຍໍຊົມເຊີຍພະນັກງານໃນຂົງເຂດວັດທະນະທຳສິລະປະ ແລະ ເຄົາລົບໃຊ້ຜູ້ມີຄວາມເກັ່ງກ້າສາມາດ. ເອົາໃຈໃສ່ເປັນພິເສດເຖິງສິລະປິນຜູ້ອຸທິດຕົນ, ມີຜົນງານດີ ແລະ ມີອິດສິພົນຕໍ່ສັງຄົມ. ດັດປັບລະບອບເງິນເດືອນ ແລະ ເງິນອຸດໜູນ ໃຫ້ແກ່ຜູ້ປະຕິບັດງານໃນສາຂາວິຊາສະເພາະທາງສິລະປະ. ສ້າງລະບົບລາງວັນທັງທາງວັດຖຸ ແລະທາງຈິດໃຈ ທີ່ເໝາະສົມກັບຜູ້ທີ່ມີຜົນສຳເລັດ ແລະ ໄດ້ອຸທິດຕົນ.
ທີຫົກ, ສ້າງແລະປັບປຸງບູລະນະສະຖາບັນແລະນະໂຍບາຍ, ລະດົມແຫຼ່ງພະລັງໃຫ້ແກ່ການຄົ້ນຄວ້າ, ຊຸກຍູ້ການພັດທະນາເຕັກໂນໂລຊີ ແລະ ຫັນປ່ຽນດິຈິຕອນໃນຂົງເຂດວັດທະນະທຳ. ຈຳເປັນຕ້ອງມີນະໂຍບາຍບຸລິມະສິດພັດທະນາການຄົ້ນຄວ້າວັດທະນະທຳ, ພັດທະນາໂຄງສ້າງພື້ນຖານເຕັກໂນໂລຊີທີ່ຄົບຊຸດ ແລະ ທັນສະໄໝ, ຕອບສະໜອງຄວາມຕ້ອງການຂອງການປະຕິວັດອຸດສາຫະກຳຄັ້ງທີສີ່; ສ້າງລະບົບຂໍ້ມູນສະຖິຕິຂອງຂະແໜງການ; ປັບປຸບູລະນະຖານຂໍ້ມູນແຫ່ງຊາດດ້ານວັດທະນະທຳແລະສິດລະປະ; ນຳໃຊ້ເຕັກໂນໂລຊີ GIS (ລະບົບຂໍ້ມູນຂ່າວສານພູມສາດ) ໃນການຄຸ້ມຄອງ, ປົກປັກຮັກສາ ແລະ ສົ່ງເສີມຄຸນຄ່າມໍລະດົກວັດທະນະທໍາ. ເພີ່ມທະວີການຮ່ວມມືຄົ້ນຄວ້າວິທະຍາສາດກ່ຽວກັບວັດທະນະທຳແລະສິລະປະ ກັບອົງການຈັດຕັ້ງຄົ້ນຄ້ວາວິທະຍາສາດຕ່າງປະເທດ; ສົ່ງເສີມການພິມເຜີຍແຜ່ຜົນງານທາງວິທະຍາສາດດ້ານວັດທະນະທໍາແລະສິລະປະໃນລະດັບສາກົນ. ປັບປຸງບູລະນະບັນດານະໂຍບາຍວັດທະນະທຳການຕ່າງປະເທດ, ເພີ່ມທະວີການຮ່ວມມື ແລະ ແລກປ່ຽນສາກົນກ່ຽວກັບວັດທະນະທຳ, ເພີ່ມຄວາມສາມາດໃນການເປັນເຈົ້າການເຊື່ອມໂຍງເຂົ້າກັບສາກົນ, ສ້າງການແຜ່ກະຈາຍຄຸນຄ່າວັດທະນະທຳຫວຽດນາມອອກສູ່ໂລກຢ່າງແຂງແຮງ./.
--------------------
(1) ຂໍ້ມູນຂອງກະຊວງວັດທະນະທຳ ກິລາ ແລະ ການທ່ອງທ່ຽວ.
(2) ມະຕິຂອງລັດຖະບານສະບັບທີ 90-CP, ລົງວັນທີ 21 ສິງຫາ 1997, “ວ່າດ້ວຍທິດທາງແລະແຜນນະໂຍບາຍຫັນເປັນສັງຄົມ ຕໍ່ການເຄື່ອນໄຫວ ການສຶກສາ, ສາທາລະນະສຸກ, ວັດທະນະທຳ”; ດຳລັດຂອງລັດຖະບານສະບັບທີ 73/1999/NĐ-CP, ລົງວັນທີ 19 ກັນຍາ 1999, “ວ່າດ້ວຍນະໂຍບາຍສົ່ງເສີມການຫັນເປັນສັງຄົມ ຕໍ່ການເຄື່ອນໄຫວໃນຂົງເຂດການສຶກສາ, ສາທາລະນະສຸກ, ວັດທະນະທຳ, ກິລາ”; ດຳລັດຂອງລັດຖະບານສະບັບທີ 69/2008/NĐ-CP, ລົງວັນທີ 30 ພຶດສະພາ 2008, “ວ່າດ້ວຍນະໂຍບາຍສົ່ງເສີມການຫັນເປັນສັງຄົມ ຕໍ່ການເຄື່ອນໄຫວໃນຂົງເຂດການສຶກສາ, ການຝຶກອົບຮົມວິຊາຊີບ, ສາທາລະນະສຸກ, ວັດທະນະທຳ, ກິລາ, ສິ່ງແວດລ້ອມ”; ດຳລັດຂອງລັດຖະບານສະບັບທີ 59/2014/NĐ-CP, ລົງວັນທີ 16 ມິຖຸນາ 2014, “ວ່າດ້ວຍການແກ້ໄຂເພີ່ມເຕີມບາງມາດຕາ ໃນດຳລັດຂອງລັດຖະບານສະບັບທີ 69/2008/NĐ-CP ລົງວັນທີ 30 ພຶດສະພາ 2008 ວ່າດ້ວຍນະໂຍບາຍສົ່ງເສີມການຫັນເປັນສັງຄົມ ຕໍ່ການເຄື່ອນໄຫວໃນຂົງເຂດການສຶກສາ, ການຝຶກອົບຮົມວິຊາຊີບ, ສາທາລະນະສຸກ, ວັດທະນະທຳ, ກິລາ, ສິ່ງແວດລ້ອມ”.
(3) ຂໍ້ມູນຈາກກົມຝຶກອົບຮົມ, ກະຊວງວັດທະນະທໍາ, ກິລາ ແລະ ການທ່ອງທ່ຽວ
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1004 (ເດືອນທັນວາ 2022)