ການກໍ່ສ້າງແລະເສີມຂະຫຍາຍຄຸນຄ່າວັດທະນະທຳ, ກຳລັງແຮງຂອງຄົນຫວຽດນາມ
ຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ວກ. - ບັນຫາວັດທະນະທຳແລະຜູ້ຄົນຫວຽດນາມ ມີບົດບາດເປັນພື້ນຖານແລະສຳຄັນ ເຊິ່ງສະທ້ອນໃຫ້ເຫັນໃນຫຼາຍເນື້ອໃນໃນເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ. ຕໍ່ໜ້າຄວາມຮຽກຮ້ອງຕ້ອງການຂອງສະພາບການຕົວຈິງຂອງປະເທດ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ພັດທະນາທິດສະດີ, ຍົກລະດັບທັດສະນະຊີ້ນຳ ເມື່ອກຳນົດການກໍ່ສ້າງ ແລະ ເສີມຂະຫຍາຍຄຸນຄ່າວັດທະນະທຳ, ກຳລັງແຮງຂອງຄົນຫວຽດນາມ ໃນສາຍພົວພັນທີ່ເປັນເອກະພາບແລະສັດຈະວິພາກ, ສ້າງພື້ນຖານອັນໜັກແໜ້ນ, ກຳລັງໜູນທີ່ແຂງແຮງ ເພື່ອຊຸກຍູ້ການພັດທະນາປະເທດຢ່າງໄວວາ ຍືນຍົງ.
ທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັດກອມມູນິດຫວຽດນາມ ຊອກຮູ້ການພິມພາບພື້ນເມືອງ ດົງໂຮ່ ທີ່ມໍລະດົກປະຫວັດສາດ-ວັດທະນະທຳ ເດ່ນໂດ ຢູ່ຄຸ້ມ ເທື້ອງ, ໝູ່ບ້ານ ດິ່ງບາງ, ຕົວເມືອງ ຕື່ເຊີນ, ແຂວງ ບັກນິງ _ພາບ: ສາລາຄະດີ.
ບາງເນື້ອໃນກ່ຽວກັບການກໍ່ສ້າງ ແລະ ເສີມຂະຫຍາຍ
ຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ
ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ຖືກປະເມີນວ່າເປັນຂີດໝາຍການຫັນປ່ຽນທີ່ສຳຄັນ, ເປັນປະຖົມປັດໃຈໃຫ້ບັນດາວາລະຕໍ່ໄປ ເພື່ອບັນລຸຜົນສຳເລັດຕາມເປົ້າໝາຍຍຸດທະສາດການພັດທະນາປະເທດເຖິງປີ 2030 ເປັນປະເທດກຳລັງພັດທະນາ ທີ່ມີອຸດສາຫະກຳທັນສະໄໝ ລາຍໄດ້ປານກາງສູງ ແລະ ຮອດປີ 2045 ຈະກາຍເປັນປະເທດທີ່ພັດທະນາແລ້ວ ແລະມີລາຍສູງສູງ. ເພື່ອປະຕິບັດເປົ້າໝາຍຂ້າງເທິງບັນລຸຄວາມສຳເລັດມີໄຊ, ພ້ອມກັນກັບການຊຸກຍູ້ຢ່າງຮອບດ້ານຄົບຊຸດ ພາລະກິດການປ່ຽນແຜງໃໝ່, ຫັນເປັນອຸດສາຫະກຳທັນສະໄໝ, ພັດທະນາເສດຖະກິດພູມປັນຍານັ້ນ, ຈຳເປັນຕ້ອງປະຕິບັດຫຼາຍເນື້ອໃນແລະວິທີແກ້ໄຂທີ່ສໍາຄັນພ້ອມໆກັນ; ໃນນັ້ນ, ບັນຫາການກໍ່ສ້າງ ແລະ ເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມໃນໄລຍະໃໝ່ ຖືກກຳນົດໂດຍກອງປະຊຸມໃຫຍ່ຄັ້ງທີ 13 ຂອງພັກວ່າເປັນໜຶ່ງໃນບັນດາໜ້າທີ່ຈຸດສຸມໃຈກາງ.
ສືບທອດເນື້ອໃນໃນບັນດາມະຕິ, ເອກະສານຂອງພັກ, ໂດຍສະເພາະແມ່ນ ມະຕິກອງປະຊຸມສຸນກາງພັກຄັ້ງທີ 5 ສະໄໝທີ 8 “ກ່ຽວກັບການກໍ່ສ້າງ ແລະ ພັດທະນາວັນທະນະທຳຫວຽດນາມທີ່ກ້າວໜ້າ ແລະ ເຂັ້ມຂົ້ນໄປດ້ວຍເອກະລັກປະຈຳຊາດ”; ມະຕິກອງປະຊຸມສູນກາງພັກຄັ້ງທີ 9 ສະໄໝທີ 11 “ກ່ຽວກັບການກໍ່ສ້າງ ແລະ ພັດທະນາວັດທະນະທຳ ແລະ ຄົນຫວຽດນາມ ເພື່ອຕອບສະໜອງຄວາມຕ້ອງການພັດທະນາປະເທດຢ່າງຍືນຍົງ”; ເອກະສານກອງປະຊຸມໃຫຍ່ຄັ້ງທີ 12 ຂອງພັກ ກ່ຽວກັບກໍ່ສ້າງ, ພັດທະນາວັດທະນະທຳແລະຜູ້ຄົນ; ໃນເອກະສານກອງປະຊຸມໃຫຍ່ຄັ້ງທີ 13, ທັດສະນະຂອງພັກກ່ຽວກັບກໍ່ສ້າງ ແລະ ເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ ໄດ້ນຳສະເໜີໃນການພົວພັນເປັນເອກະພາບແລະສັດຈະວິພາກ ເມື່ອຢືນຢັນ: “ຮັກສາແລະເສີມຂະຫຍາຍຄຸນຄ່າວວັດທະນະທຳແລະກຳລັງແຮງຂອງຄົນຫວຽດນາມ ໃນພາລະກິດການກໍ່ສ້າງແລະປົກປັກຮັກສາປະເທດຊາດ, ການເຊື່ອມໂຍງສາກົນ”(1).
ແທ້ຈິງວ່າ, ການກໍ່ສ້າງ ແລະ ເສີມຂະຫຍາຍຄຸນຄ່າງວັດທະນະທຳແລະກຳລັງແຮງຂອງຄົນຫວຽດນາມ ແມ່ນຂະບວນວິວັດການສົມທົບຢ່າງນິ້ມນວນ, ທັງມີຄວາມປະດິກສ້າງ, ກຳນົດບັນດາຄຸນຄ່າວັດທະນະທຳ, ມາດຕະຖານດ້ານຈັນຍາບັນໃໝ່, ທັງປຸກຕື່ນ, ແຜ່ຂະຫຍາຍບັນດາຄຸນຄ່າອັນດີງາມຂອງວັດທະນະທຳ, ມາດຕະຖານດ້ານຈັນຍາບັນ, ຈິດໃຈ ແລະ ເຈດຈຳນົງຕັດສິນໃຈ, ຄວາມສາມາດບົ່ມຊ້ອນ, ທ່າແຮງ, ກຳລັງແຮງປະດິດສ້າງຂອງຄົນຫວຽດນາມ, ສ້າງກຳລັງໜູນຊຸກຍູ້ປະເທດພັດທະນາຢ່າງຍືນຍົງ, ປະເທດຊາດເຂັ້ມແຂງ ແລະ ວັດທະນາຖາວອນ, ໝັ້ນຍືນ. ຂະບວນວິວັດນີ້ກໍ່ລວມທັງການອະນຸລັກຄຸນຄ່າວັດທະນະທຳ, ຄຸນສົມບັດມູນເຊື້ອອັນດີງາມຂອງຊາດ, ບໍ່ໃຫ້ຊອດກະຈາ, ຊຸດໂຊມ ສູນເສຍໄປ; ເປັນເຈົ້າການແລະຕັ້ງໜ້າໃນການຮັບເອົາສິ່ງຍອດຢ້ຽມໃນວັດທະນະທຳ, ຄຸນສົມບັດມະນຸດ ເພື່ອປັບປຸງແລະເສີມຂະຫຍາຍຄຸນຄ່າວັດທະນະທຳແລະຄຸນທຳໃຫ້ສອດຄ່ອງກັບເປັນຈິງຂອງປະເທດ. ວິທີເຂົ້າເຖິງຄືແນວນັ້ນສະແດງໃຫ້ເຫັນເຖິງຄວາມຮັບຮູ້ໃໝ່ ໃນຈິນຕະນາການທິດສະດີ ຂອງພັກກອມມູນິດຫວຽດນາມ ກ່ຽວກັບວັດທະນະທຳແລະຄົນຫວຽດນາມ ໃນໄລຍະໃໝ່.
ບົນພື້ນຖານສາຍພົວພັນສັດຈະວິພາກ ລະຫວ່າງວັດທະນະທຳກັບຜູ້ຄົນ, ຜູ້ຄົນກັບວັດທະນະທຳ, ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ກຳນົດວ່າ: “ປຸກຕື່ນຢ່າງແຂງແຮງ ຈິດໃຈຮັກຊາດ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງຂອງປະເທດຊາດ, ກຳລັງແຮງມະຫາສາມັກຄີແວງຊົນທັງຊາດ ແລະ ຄວາມມຸ້ງມາດປາດຖະໜາພັດທະນາປະເທດໃຫ້ວັດທະນາຖາວອນ, ມີຄວາມຜາສຸກ”(2); ພ້ອມທັງ, ຖືເປັນສຳຄັນການກໍ່ສ້າງ ແລະ ເສີມຂະຫຍາຍຄວາມພາກພູມໃຈແຫ່ງຊາດ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງ, ກຳລັງຫົວຄິດປະດິດສ້າງ, ຈິດໃຈອຸທິດເພື່ອປະເທດ, ຄວາມມຸ້ງມາດປາດຖະໜາໃນຄວາມວັດທະນາຖາວອນ, ຄວາມເມດຕາ, ຄວາມເອກະພາບສັງຄົມ, ສ້າງກຳລັງແຮງສັງລວມຊຸກຍູ້ປະເທດພັດທະນາຢ່າງໄວ ແລະ ຍືນຍົງ. ນີ້ແມ່ນເນື້ອໃນທີ່ໄດ້ເນັ້ນໜັກ ແລະ ກ່າວມາຫຼາຍເທື່ອ, ເຊິ່ງສະແດງຄວາມຕັດສິນໃຈສູງຂອງພັກກອມມູນິດຫວຽດນາມ ໃນການເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ ໃນໄລຍະໃໝ່, ເໝາະສົມກັບທ່າອຽງພັດທະນາແບບພາວະວິໄສຂອງຍຸກສະໄມ, ແທດເໝາະກັບຕົວຈິງຂອງປະເທດ.
ດ້ວຍທັດສະນະຜູ້ຄົນເປັນຈຸດສຸມໃຈກາງ, ອັດຕະພາບ, ແຫຼ່ງພະລັງສຳຄັນກວ່າໝູ່ໝົດ ແລະ ເປົ້າໝາຍຂອງການພັດທະນາ; ຖືເອົາຄຸນຄ່າວັດທະນະທຳແລະຄົນຫວຽດນາມເປັນພື້ນຖານ, ກຳລັງແຮງພາຍໃນທີ່ສຳຄັນ ທີ່ຮັບປະກັນການພັດທະນາແບບຍືນຍົງ, ເອກະສານກອງປະຊຸມໃຫຍ່ຄັ້ງທີ 13 ຂອງພັກໄດ້ຢືນຢັນບົດບາດ, ທີ່ຕັ້ງ, ຄວາມໝາຍ, ຄວາມສຳຄັນ ຂອງຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ, ສ້າງພື້ນຖານເພື່ອກໍ່ສ້າງລະບົບຄຸນຄ່າວັດທະນະທຳ ທີ່ຕິດພັນແໜ້ນແຟ້ນ, ນີ້ມນວນກັບການກໍ່ສ້າງມາດຕະຖານຄົນຫວຽດນາມ. ຍ້ອນວ່າ, ຜູ້ຄົນແມ່ນອັດຕະພາບທີ່ປະດິດສ້າງຄຸນຄ່າວັດຖຸ ແລະ ຄຸນຄ່າຈິດໃຈ, ຮັບໃຊ້ໃຫ້ແກ່ຄວາມຮຽກຮ້ອງການຂອງຕົນເອງ ແລະ ສັງຄົມ. ໃນຖານະເປັນອັດຕະພາບ, ແຫຼ່ງພະລັງສຳຄັນກວ່າໝູ່ ແລະ ເປົ້າໝາຍຂອງການພັດທະນາ, ການກໍ່ສ້າງຄົນຫວຽດນາມຮຽກຮ້ອງໃຫ້ການເສີມຂະຫຍາຍຄຸນຄ່າວັດທະນທຳ ຕິດພັນກັບການຮັກສາ, ປັບປຸງບູລະນະລະບົບຄຸນຄ່າ ມາຕະຖານຜູ້ຄົນ ແລະ ປຸກຕື່ນຄວາມສາມາດ, ສະຕິປັນຍາ, ກຳລັງແຮງປະດິດສ້າງຂອງຄົນ ໃນບັນດາຂົງເຂດຂອງຊີວິດສັງຄົມ. ການເຄື່ອນໄຫວວັດທະນະທຳ, ການພົວພັນວັດທະນະທຳ, ລະບຽບລະບອບວັດທະນະທຳທັງໝົດ ລ້ວນແຕ່ສຸມໃສ່ການປັບປຸງ, ບູລະນະລະບົບຄຸນຄ່າ, ມາດຕະຖານ ແລະ ເພີ່ມພູນຄຸນສ້າງໃຫ້ຜູ້ຄົນພັດທະນາຮອບດ້ານ ທັງຄຸນສົມບັດ, ຄວາມສາມາດ; ປັບປຸງຄວາມຮັກບ້ານເກີດເມືອງນອນ, ຮັກຊາດ, ຄຸນຄ່າມະນຸດສະທຳ, ລັກສະນະຜູກພັນປະຊາຄົມ, ຄວາມຮັບຮູ້, ຄວາມຮັບຜິດຊອບ, ຄຸນສົມບັດສັງຄົມ, ແບບແຜນດຳລົງຊີວິດ ແລະ ເຮັດວຽກຕາມກົດໝາຍ, ຕັດສິນໃຈຜ່ານຜ່າຄວາມຫຍຸ້ງຍາກສິ່ງທ້າທາຍທັງໝົດ, ພິເສດແມ່ນໃນສະຖານະການໂລກລະບາດຜັນແປຢ່າງສັບສົນ. ບັນດາການເຄື່ອນໄຫວດັ່ງກ່າວນັ້ນມຸ່ງສູ່: “ພັດທະນາຜູ້ຄົນຢ່າງຮອບດ້ານ ແລະ ກໍ່ສ້າງພື້ນຖານວັດທະນະທຳຫວຽດນາມທີ່ກ້າວໜ້າ ແລະ ເຂັ້ມຂົນໄປດ້ວຍເອກະລັກປະຈຳຊາດ ເພື່ອວັດທະນະທຳແລະຄົນຫວຽດນາມ ກາຍເປັນກຳລັງແຮງພາຍໃນ, ກຳລັງໜູນໃຫ້ແກ່ການພັດທະນາປະເທດ ແລະ ປົກປັກຮັກສາປະເທດຊາດຢ່າງແທ້ຈິງ”(3). ວິທີຕັ້ງບັນຫາຄືແນວນັ້ນ ສະແດງໃຫ້ເຫັນການພັດທະນາຈິນຕະນາການທິດສະດີຂອງພັກ ກ່ຽວກັບສາຍພົວພັນລະຫວ່າງການກໍ່ສ້າງ ແລະ ການເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ ຢ່າງເລິກເຊິ່ງທີ່ສຸດ, ສອດຄ່ອງກັບພຶດຕິກຳຕົວຈິງຂອງປະເທດໃນປະຈຸບັນ.
ໜ້າທີ່ແລະວິທີແກ້ໄຂໃນການກໍ່ສ້າງ ແລະ ເສີມຂະຫຍາຍ
ຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ ໃນສະພາບການໃໝ່
ກອ່ນອື່ນໝົດ, ກ່ຽວກັບການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານຄົນຫວຽດນາມ, ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ກຳນົດວ່າ: “ສຸມໃສ່ຄົ້ນຄວ້າ, ກຳນົດ ແລະ ຜັນຂະຫຍາຍການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານຜູ້ຄົນ… ຫວຽດນາມໃນໄລຍະໃໝ່”(4). ນີ້ແມ່ນບັນຫານຫຼັກແຫຼ່ງແກ່ນສານທີ່ມີລັກສະນະກຳນົດທິດກ່ຽວກັບການກໍ່ສ້າງ, ເສີມຂະຫຍາຍຄຸນຄ່າວັດທະນະທຳ ແລະ ກຳລັງແຮງຂອງຄົນຫວຽດນາມ ໃນຊຸມປີຕໍ່ໄປນີ້. ອີກດ້ານໜຶ່ງ, ຂະບວນການພັດທະນາວັດທະນະທຳແລະຜູ້ຄົນແມ່ນຂຶ້ນສ່ວນໃຫຍ່ກັບການວ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານຄົນຫວຽດນາມ. ໃນເງື່ອນໄຂທີ່ປະເທດຍູ້ແຮງການປ່ຽນແປງໃໝ່ແລະເຊື່ອມໂຍງສາກົນຢ່າງຮອບດ້ານແລະເລິກເຊິ່ງນັ້ນ, ການກຳນົດການສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ, ມາດຕະຖານຄົນຫວຽດນາມ ຖືກນຳສະເໜີຢ່າງເປັນເອກະພາບຢູ່ລະດັບເອກະສານຂອງກອງປະຊຸມໃຫຍ່ ແມ່ນມີຄວາມໝາຍສຳຄັນທີ່ສຸດ ໃນການປັບປຸງ, ເພີ່ມເຕີ່ມບັນດາຄຸນຄ່າວັດທະນະທຳ, ພັດທະນາບຸກຄະລິດດະພາບຄົນຫວຽດນາມ.
ຕາມນັ້ນ, ຕ້ອງເປັນເຈົ້າການ, ຕັ້ງໜ້າຄົ້ນຄວ້າ, ກຳນົດ ແລະ ກໍ່ສ້າງລະບົບຄຸນຄ່າແຫ່ງຊາດ, ສ້າງພື້ນຖານອັນຫຼັກແຫຼ່ງເພື່ອເປັນເອກະພາບໃນການກໍ່ສ້າງລະບົບຄຸນຄ່າວັດທະນະທຳ ແລະ ມາດຕະຖານຜູ້ຄົນ, ພ້ອມທັງຕິດພັນຢ່າງແໜ້ນແຟ້ນ, ຄົບຊຸດກັບການກໍ່ສ້າງ, ພັດທະນາວັດທະນະທຳກັບຜູ້ຄົນ ແລະ ເສີມຂະຫຍາຍຄຸນຄ່າວັດທະນະທຳ, ກຳລັງແຮງຂອງຜູ້ຄົນໃນໄລຍະໃໝ່. ສືບຕໍ່ຮັກສາ, ປັບປຸງ, ບູລະນະບັນດາຄຸນຄ່າອັນເປັນມູນເຊື້ອຫຼັກຂອງປະເທດຊາດ, ເຊັ່ນຈິດໃຈຊາດ, ຄວາມເມດຕາຈິດ, ມະນຸດສະທຳ, ຄວາມຮັກແພງກັນ; ພົວພັນແບບເປັນມິດ ສະໜິດສະໜົມກັນ, ເອື້ອອາລີ; ຜູກພັນປະຊາຄົມບ້ານເມືອງ; ຈິດໃຈລວມໝູ່; ນ້ຳໃຈສາມັກຄີ; ຄວາມຮູ້ບຸນຄຸນ; ມັກຄວາມສະຫງົບ; ນັບຖືຄວາມຮັກແພງ; ຄວາມສາມາດອົດທົນ; ຄວາມຮັກແຂກ; ຈິດໃຈເຊື່ອໝັ້ນຕໍ່ອະນາຄົດ, ຈິດໃຈເປີດກວ້າງ; ຄວາມສາມາດກວມລວມ. ມີຫົວຄິດປະດິດສ້າງ… ຍົກລະດັບຄຸນຄ່າ, ປັບປຸງ ແລະ ພັດທະນາເພີ່ມເຕີ່ມບັນດາປັດໃຈໃໝ່ ໃນລະບົບຄຸນຄ່າ ຕອບສະໜອງກັບຄວາມຮຽກຮ້ອງຕ້ອງການກໍ່ສ້າງວັດທະນະທຳແລະຄົນຫວຽດນາມ ໃນປະຈຸບັນ. ເຊື່ອມຕິດຢ່າງແໜ້ນແຟ້ນ ການເສີມຂະຫຍາຍຄວາມຮັກຊາດ ກັບເຈດຈຳນົງສ້າງຄວາມເຂັ້ມແຂງດ້ວຍຕົນເອງ, ຄວາມກ້າຫານຂອງຊາດ, ຄວາມມຸ້ງມາດປາດຖະໜາພັດທະນາປະເທດໃຫ້ເຂັ້ມແຂງໝັ້ນແກ່ນ ແລະ ວັດທະນາຖາວອນ; ເສີມຂະຫຍາຍຈິດໃຈສາມັກຄີ, ກຳລັງແຮງທົ່ວປະເທດຊາດ, ສ້າງກຳລັງໜູນທີ່ແຂງແຮງໃຫ້ແກ່ພາລະກິດກໍ່ສ້າງ ແລະ ປົກປັກຮັກສາປະເທດຊາດ, ຊຸກຍູ້ປະເທດຊາດເຂັ້ມແຂງ, ວັດທະນາຖາວອນ ແລະ ໝັ້ນຍືນ. ອີກດ້ານໜຶ່ງ, ບົນພື້ນຖານຄຸນຄ່າຄວາມເມດຕາຈິດ, ຄວາມອະລິຍະທຳ, ຄວາມເມດຕາ, ນ້ຳໃຈໂອບອ້ອມອາລີ, ນັບຖືຄວາມຮັກແພງ, ຈັນຍາທຳ, ຈິດໃຈກວ້າງຂວາງຂອງຄົນຫວຽດນາມ, ສືບຕໍ່ຄົ້ນຄວ້າ, ກຳນົດບັນດາຄຸນຄ່າໃໝ່, ປະກອບສ່ວນເຂົ້າໃນການຊຸກຍູ້ບັນດາການພົວພັນສາກົນ. ໃນໄລຍະໃໝ່, ບັນດາຄຸນຄ່າວັດທະນະທຳ, ມາດຕະຖານຂອງຄົນຫວຽດນາມ, ເຊັ່ນຄວາມນັບຖືຕົນເອງ, ຄວາມດຸໝັ່ນຂະຫຍັນພຽນ, ອົດທຸກອົດຍາກ, ຄ່ຽມຄົມ, ງ່າຍດາຍ, ມີຄວາມເຊື່ອໝັ້ນຕໍ່ອະນາຄົດ, ສະຫຼາດສະຫຼຽວ, ມີຫົວຄິດປະດິດສ້າງ, ມີຄວາມໄຫວພິບ ແລະ ບັນດາຄຸນຄ່າວັດທະນະທຳຄອບຄົວມູນເຊື້ອອັນດີງາມ ຍິ່ງຕ້ອງໄດ້ສືບທອດ, ປັບປຸງ, ເຮັດໃຫ້ອຸດົມສົມບຸນ, ແຜ່ກະຈາຍ ແລະ ມີລັກສະນະກຳນົດທິດໃນບັນດາຂົງເຂດຊີວິດສັງຄົມ.
ການກໍ່ສ້າງລະບົບຄຸນຄ່າວັດທະນະທຳຕ້ອງມຸ່ງໄປເຖິງການເສີມຂະຫຍາຍ ແລະ ປັບປຸງມາດຕະຖານດ້ານຈັນຍາບັນຂອງມະນຸດໃຫ້ສົມບູນແບບຕາມຍຸກສະໄໝໃໝ່, ໃນນັ້ນຄຸນສົມບັດ, ສະຕິບັນຍາ, ຮ່າງກາຍ, ຄວາມງາມ ແມ່ນເນື້ອໃນຈຸດສຸມໃຈກາງ, ຫຼັກແຫຼ່ງແກ່ນສານ ເພື່ອປະກອບສ່ວນປັບປຸງບູລະນະລະບົບຄຸນຄ່າວັດທະນະທຳ, ລະບົບຄຸນຄ່າແຫ່ງຊາດ. ຕິດແທດພຶດຕິກຳຕົວຈິງເພື່ອກຳນົດເນື້ອໃນ, ມາດຕະການທີ່ເໝາະສົມແນໃສ່ກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານຜູ້ຄົນ ທີ່ຕິດກັບການຮັກສາແລະພັດທະນາລະບົບຄຸນຄ່າຄອບຄົວຫວຽດນາມ ເພື່ອຕອບສະໜອງກັບເງື່ອນໄຂການພັດທະນາເສດຖະກິດຕະຫຼາດກຳນົດທິດສັງຄົມນິຍົມ ແລະ ເຊື່ອມໂຍງສາກົນທີ່ນັບມື້ນັບເລິກເຊິ່ງກວ້າງຂວາງ. ຈາກນັ້ນ, ສ້າງພື້ນຖານໃຫ້ໝັ້ນຄົງເພື່ອປັບປຸງ, ບູລະນະລະບົບຄຸນຄ່າວັດທະນະທຳ, ກຳນົດກຳລັງໜູນດ້ານຈິດໃຈ, ເສີມຂະຫຍາຍກຳລັງແຮງຂອງຄົນຫວຽດນາມ ໃນການກໍ່ສ້າງ, ພັດທະນາ ແລະ ປົກປັກຮັກສາປະເທດຊາດ.
ກ່ຽວກັບກຳລັງໜູນໃນການກໍ່ສ້າງແລະເສີມຂະຫຍາຍກຳລັງແຮງຂອງຄົນຫວຽດນາມ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍ່ໄດ້ກຳນົດວ່າ “ກໍ່ສ້າງບັນດາກົນໄກ, ນະໂຍບາຍເສີມຂະຫຍາຍຈິດໃຈອຸທິດຕົນເພື່ອປະເທດຂອງຄົນຫວຽດນາມທຸກຄົນ. ເສີມຂະຫຍາຍປັດໄຈມະນຸດຢ່ງສຸດຂີດ”(5). ສົ່ງເສີມ, ສ້າງເງື່ອນໄຂໃຫ້ປະຊາຊົນຫວຽດນາມທຸກຄົນໄດ້ເສີມຂະຫຍາຍຄວາມສາມາດ ຄວາມຄິດສ້າງສັນໃນຊີວິດເສດຖະກິດສັງຄົມຢ່າງເສລີ. ປະຕິບັດນະໂຍບາຍສັງຄົມຢ່າງດີ, ຮັບປະກັນຄວາມປອດໄພແລະສະຫວັດດິການສັງຄົມ, ຄວາມສະຫງົບປອດໄພຂອງມະນຸດ, ປະຕິບັດຄວາມກ້າວໜ້າ ແລະ ຍຸຕິທຳທາງສັງຄົມ. ເອົາໃຈໃສ່, ເບິ່ງແຍງດູແລ, ບຳລຸງຜູ້ຄົນຢ່າງຮອບດ້ານ, ຄົບຊຸດ, ມີຄວາມສົມດຸນລະຫວ່າງຊີວິດວັດຖຸ ແລະ ຊີວິດຈິດໃຈ, ມີຄວາມກົມກຽວລະຫວ່າງຄວາມຮຽກຮ້ອງຕ້ອງການທາງດ້ານເສດຖະກິດ ແລະ ທາງດ້ານວັດທະນະທຳ, ຄຸນສົມບັດ, ຍົກສູງຄຸນນະພາບຊີວິດ ແລະ ຄວາມຜາສຸກຂອງຜູ້ຄົນຢ່າງບໍ່ຢຸດຢັ້ງ.
ທີສອງ, ກ່ຽວກັບວຽກງານການອົບຮົມສຶກສາຄົນຫວຽດນາມໃນໄລຍະໄໝ່, ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ຊີ້ແຈ້ງວ່າ: “ເພີ່ມທະວີການອົບຮົມສຶກສານ້ຳໃຈຮັກຊາດ, ຄວາມພາກພູມໃຈປະເທດຊາດ, ມູນເຊື້ອ ແລະ ປະຫວັດສາດຂອງຊາດ, ສະຕິຕື່ນຕົວສະໝັກໃຈກ່ຽວກັບຄວາມຮັບຜີດຊອບສັງຄົມຂອງປະຊາຊົນທຸກຊົນຊັ້ນ, ເປັນຕົ້ນແມ່ນຊາວໜຸ່ມ… ຍົກສູງຄວາມຮັບຮູ້, ສະຕິຕື່ນຕົວນັບຖື ແລະ ປະຕິບັດຕາມກົດໝາຍ, ປົກປັກຮັກສາສິ່ງແວດລ້ອມ, ຮັກສາເອກະລັກວັດທະນະທຳປະຈຳຊາດຂອງຄົນຫວຽດນາມ”(6); ພ້ອມທັງເອົາໃຈໃສ່ການອົບຮົມສຶກສາຄຸນສົມບັດ, ກິດຕິຄຸນມະນຸດ, ຈິນຕະນາການປະດິດສ້າງ, ທັກສະດຳລົງຊີວິດ, ທັກສະການເຮັດວຽກ, ພາສາຕ່າງປະເທດ, ເຕັກໂນໂລຊີຂໍ້ມູນຂ່າວສານ, ເຕັກໂນໂລຊີດີຈິຕອນ ແລະ ບັນດາຄຸນຄ່າຫຼັກແຫຼ່ງແກ່ນສານ; ຕິດພັນການສຶກສາດ້ານພູມປັນຍາ, ຄຸນສົມບັດ, ຄວາມສາມາດຮັບຮູ້ຄວາມງາມ, ທັກສະການດຳລົງຊີວິດ ກັບການຝຶກຝົນດ້ານຮ່າງກາຍ, ຍົກສູງຮູບຮ່າງຄົນ ຫວຽດນາມ.
ເນື້ອໃນການອົບຮົມສຶກສາຕ້ອງການຮອບດ້ານ, ແຕ່ວ່າຕ້ອງການມີການຕິດພັນຢ່າງແໜ້ນແຟ້ນ, ກົມກຽວລະຫວ່າງຄຸນຄ່າມູນເຊື້ອ ແລະ ຄຸນຄ່າທັນສະໄໝ; ທັງສືບທອດບັນດາຄຸນຄ່າ, ມາດຕະຖານ, ວາດຊົງອັນດີງາມຂອງຄົນຫວຽດນາມມູນເຊື້ອ, ທັງປັບປຸງໃຫ້ສອດຄ່ອງກັບສະພາບການປະຈຸບັນຂອງປະເທດ ແລະ ການພັດທະນາຂອງວິທະຍາສາດ, ເຕັກໂນໂລຊີທີ່ທັນສະໄໝ. ຖືເປັນສຳຄັນ ການເພີ່ມພູນຄຸນສ້າງຄວາມເມດຕາ, ຈິດໃຈກວ້າງຂວາງ, ຄວາມຈິງໃຈ, ຄວາມສັດຊື່, ນັບຖືຈັນຍາທຳ, ດຸໝັ່ນຂະຫຍັນພຽນ, ປະຢັດ, ມີຫົວຄິດປະດິດສ້າງ, ທັນສະໄໝ, ມີກິດຕິຄຸນມະນຸດທີ່ດີ, ແບບແຜນດຳລົງຊີວິດອັນດີງາມ. ຂະບວນວິວັດການອົບຮົມສຶກສາຄົນຕ້ອງການເສີມຂະຫຍາຍກຳລັງແຮງສັງລວມຂອງບັນດາອົງການຈັດຕັ້ງ, ກຳລັງ, ໃນນັ້ນ ປະສານປະສົມຢ່າງແໜ້ນແຟ້ນ ລະຫວ່າງໂຮງຮຽນກັບຄອບຄົວ ແລະ ສັງຄົມ, ເອົາໃຈໃສ່ເປັນພິເສດເຖິງການເສີມຂະຫຍາຍຄຸນຄ່າວັດທະນະທຳຄອບຄົວ ເພື່ອຄຸນສ້າງໃຫ້ຜູ້ຄົນບັນດາຄຸນຄ່າ, ມາດຕະຖານວັດທະນະທຳ, ຄຸນສົມບັດອັນດີງາມ.
ພ້ອມກັນກັບການປົກປັກຮັກສາ ແລະ ເສີມຂະຫຍາຍບັນດາຄຸນຄ່າອັນດີງາມໃນວັດທະນະທຳ, ມາດຕະຖານຄຸນສົມບັດເພື່ອອົບຮົມສຶກສາຜູ້ຄົນ, ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍ່ໄດ້ຢືນຢັນວ່າ “ປະຕິບັດມາດຕະການບຸກທະລຸຢ່າງມີປະສິດທິຜົນ ເພື່ອກີດກັ້ນຄວາມເສື່ອໂຊມທາງດ້ານສິນທຳ, ແບບແຜນດຳລົງຊີວິດ, ຍູ້ຖອຍຄວາມຫຍໍ້ທໍ້ສັງຄົມ ແລະ ຄວາມຊົ່ວຮ້າຍທາງສັງຄົມ(7). ພິເສດ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍ່ໄດ້ຊີ້ແຈ້ງວ່າ: “ບືນຕົວຂຶ້ນເພື່ອແກ້ໄຂຜ່ານຜ່າຄວາມຈຳກັດຂອງຄົນຫວຽດນາມເທື່ອລະກ້າວ; ກໍ່ສ້າງຄົນຫວຽດນາມສະໄໝໄໝ່, ຕິດພັນຢ່າງແໜ້ນແຟ້ນ, ກົມກຽວລະຫວ່າງບັນດາຄຸນຄ່າມູນເຊື້ອ ແລະ ຄຸນຄ່າທັນສະໄໝ”(8). ພັດກອມມູນິດຫວຽດນາມ ໄດ້ຕັ້ງບັນຫາແກ້ໄຂຂໍ້ຈຳກັດຂອງຄົນຫວຽດນາມ ໃນການພົວພັນແບບອິນຊີ, ບໍ່ສາມາດແຍກອອກໄດ້ ກັບການສຶກສາ, ເສີມຂະຫຍາຍບັນດານິໄສອັນດີງາມຂອງຄົນຫວຽດນາມ ທີ່ໄດ້ສ້າງຕັ້ງໃນປະຫວັດສາດຂອງຊາດ. ເນື້ອໃນນີ້ສະແດງໃຫ້ເຫັນເຖິງການປະສານປະສົມຢ່າງແໜ້ນແຟ້ນ ລະຫວ່າງ “ການກໍ່ສ້າງ” ແລະ “ການຕ້ານ” ໃນການອົບຮົມສຶກສາຜູ້ຄົນ, ສະທ້ອນເຖິງຄວາມຮັບຮູ້ຢ່າງຈະແຈ້ງກວ່າ, ເລິກເຊິ່ງ ຮອບດ້ານກວ່າອີກ ກ່ຽວກັບວັດທະນະທຳ ແລະ ຄົນຫວຽດນາມ, ທັງຢືນຢັນບັນດາຄຸນຄ່າອັນດີງາມ, ທີ່ມີຄວາມໝາຍພື້ນຖານ, ກຳນົດເອກະລັກວັດທະນະທຳແລະຄົນຫວຽດນາມ, ທັງສະແດງເຖິງຈິດໃຈຕິຊົມຕົນເອງ ແລະ ຕິຊົມຢ່າງເລິກເຊິ່ງ ຂອງພັກກອມມູນິດຫວຽດນາມ.
ຕໍ່ໜ້າສະຖານະການ: “ຈັນຍາບັນ ແລະ ວິຖີຊີວິດໃນຄອບຄົວ, ໂຮງຮຽນ, ສັງຄົມ ກຳລັງຊຸດໂຊມລົງຢ່າງໜ້າເປັນຫ່ວງ, ສ້າງຄວາມວຸ້ນວາຍໃຫ້ແກ່ສັງຄົມ”(9), ພັກກອມມູນິດ ຫວຽດນາມ ຮຽກຮ້ອງໃຫ້ຖືເປັນສຳຄັນການອົບຮົມສຶກສາ “ອຸດົມຄະຕິປະຕິວັດ, ຄຸນສົມບັດ, ແບບແຜນດຳລົງຊີວິດວັດທະນະທຳ, ຍົກສູງນ້ຳໃຈຮັກຊາດ, ຄວາມພາກພູມໃຈປະເທດຊາດ, ຫຼໍ່ລ້ຽງຄວາມໃຝ່ຝັນ ຄວາມມຸ້ງຫວັງ ຄວາມກະຫາຍບືນຕົວກ້າວຂຶ້ນ; ຍົກສູງຈິດໃຈຮັບຜິດຊອບຕໍ່ປະເທດ, ຕໍ່ສັງຄົມ… ເພື່ອພັດທະນາແບບປອດໃສ, ຮອບດ້ານ, ກົມກຽວທັງສະຕິປັນຍາ, ຮ່າງການ ແລະ ຄຸນຄ່າການຮັບຮູ້ຄວາມງາມ”(10). ໃນດ້ານການອົບຮົມສຶກສາ, ຕ້ອງການເຮັດໃຫ້ຜູ້ຄົນເຊື່ອມຊືມຈິດໃຈຊາດ, ສະແດງເຖິງບຸກຄະລິກ ຈິດວິນຍາມແລະ ຄວາມກ້າຫານກ້າຫານຂອງຊາດ; ຍົກສູງຄວາມຮັບຜິດຊອບໃນການຮັກສາ, ປັບປຸງ ແລະ ເສີມຂະຫຍາຍບັນດາຄຸນຄ່າວັດທະນະທຳ, ຄຸນສົມບັດອັນດີງາມຂອງຄອບຄົວຫວຽດນາມ ແລະ ຄຸນຄ່າມະນຸດສະທຳ, ຄວາມເມດຕາຈິດ, ວັດທະນະທຳໂຮງຮຽນທີ່ດີງາມ.
ທີສາມ, ກ່ຽວກັບການສ້າງສະພາບແວດລ້ອມວັດທະນະທຳອັນດີງາມ, ປອດໃສ. ໃນການກຳນົດທິດພັດທະນາປະເທດໄລຍະ 2021-2030, ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍ່ໄດ້ກຳນົດວ່າ ຕ້ອງເອົາໃຈໃສ່ໃຫ້ຖືກຕ້ອງເຖິງການກໍ່ສ້າງສະພາບແວດລ້ອມວັດທະນະທຳອັນປອດໃສ, ເໝາະສົມກັບສະຖານະການເຊື່ອມໂຍງສາກົນ. ດ້ວຍການຕີລາຄາຢ່າງພາວະວິໄສ, ພັກກອມມູນິດຫວຽດນາມ ໄດ້ຊີ້ແຈງຢ່າງກົງໄປກົງມາວ່າ: ວັດທະນທຳ ຍັງບໍ່ທັນໄດ້ຮັບຄວາມເອົາໃຈໃສ່ທີ່ເໝາະກັບເສດຖະກິດ ແລະ ການເມືອງ, ຍັງບໍ່ທັນກາຍເປັນແຫຼ່ງພະລັງງານ, ກຳລັງໜູນພາຍໃນຢ່າງແທ້ຈິງ ໃຫ້ແກ່ການພັດທະນາປະເທດຢ່າງຍືນຍົງ. ບົດບາດຂອງວັດທະນະທຳໃນການກໍ່ສ້າງຜູ້ຄົນຍັງບໍ່ທັນໄດ້ກຳນົດຖືກຕ້ອງຕາມລະດັບ, ຍັງມີທ່າອ່ຽງທີ່ຈະໃຫ້ຄວາມສຳຄັນກັບພາລະໜ້າທີ່ບັນເທິງເທົ່ານັ້ນ. ຂາດບັນດາຜົນງານດ້ານສິລະປະ ວັນນະຄະດີ ວັນນະກຳທີ່ດີເດັ່ນ ສ່ອງແສງຢ່າງຊີວິດຊີວາແລະຄວາມຍິ່ງໃຫຍ່ຂອງພາລະກິດປ່ຽນແປງໃໝ່, ທີ່ມີຄຸນປະໂຫຍດຕັ້ງໜ້າຕໍ່ຜູ້ຄົນ. ສະພາບແວດລ້ອມທາງວັດທະນະທຳແລະສັງຄົມ ຍັງຖືກມົນລະພິດດ້ວຍຄວາມຊົ່ວຮ້າຍທາງສັງຄົມ, ການສໍ້ລາດບັງຫຼວງ, ຄວາມຫຍໍ້ທໍ້”(11), ມີບາງດ້ານທີ່ບໍ່ດີຕໍ່ສັງຄົມ, ຂັດກັບຂະໜົບທຳນຽມແລະປະເພນີອັນດີງາມຂອງວັດທະນທຳຂອງຊາດ. ຈາກບັນດາຄວາມຈຳກັດ, ຂໍ້ຂາດຕົກປົກພ່ອງນັ້ນ, ພັກກອມມູນິດຫວຽດນາມໄດ້ຢືນຢັນວ່າ: “ການກໍ່ສ້າງ, ພັດທະນາ, ສ້າງສະພາບແວດລ້ອມ ແລະ ເງື່ອນໄຂສັງຄົມໃຫ້ສະດວກທີ່ສຸດ ເພື່ອປຸກຕື່ນນ້ຳໃຈຮັກຊາດ, ຄວາມພາກພູມໃຈຂອງຊາດ, ຄວາມເຊື່ອໝັ້ນ, ຄວາມມຸ່ງຫວັງພັດທະນາປະເທດໃຫ້ວັດທະນາຖາວອນ ແລະ ມີຄວາມສຸກ; ຄວາມສາມາດ ສະຕິປັນຍາ, ຄຸນສົມບັດຂອງຄົນຫວຽດນາມ ເປັນໃຈກາງ ເປົ້າໝາຍ ແລະ ກຳລັງໜູນທີ່ສຳຄັນທີສຸດໃນການພັດທະນາປະເທດ”(12). ພ້ອມກັນນັ້ນ, ໃຫ້ຄວາມສຳຄັນກັບການພັດທະນາວັດທະນະທຳຢ່າງຮອບດ້ານແລະຄົບຊຸດ, ພັດທະນາຊີວິດວັດທະນະທຳທີ່ອຸດົມສົມບຸນ ຫຼາກຫຼາຍ ມີອາລະບະທຳ ແລະ ສົດໃສ, ສ້າງເງື່ອນໄຂທີ່ເອື້ອອຳນວຍເພື່ອໃຫ້ບັນດາຄຸນຄ່າວັດທະນະທຳ, ມາດຕະຖານມະນຸດ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ, ເປັນພື້ນຖານຈິດໃຈ, ແຫຼ່ງພະລັງພາຍໃນ ແລະ ກຳລັງໜູນບຸກທະລຸຢ່າງແທ້ຈິງ ໃຫ້ແກ່ການພັດທະນາເສດຖະກິດ ສັງຄົມ ແລະ ເຊື່ອມໂຍງສາກົນ.
ເພື່ອກໍ່ສ້າງສະພາບແວດລ້ອມທາງວັດທະນະທຳທີ່ໃສສະອາດ, ປອດໃສ, ພັກກອມມູນິດຫວຽດນາມ ໄດ້ກຳນົດວ່າ: “ມີກົນໄກ, ນະໂຍບາຍ, ມາດຕະການເພື່ອກໍ່ສ້າງສະພາບແວດລ້ອມທາງວັດທະນະທຳທີ່ໃສສະອາດ, ປອດໃສ, ປົວແປງເງື່ອນໄຂຊົມໃຊ້ວັດທະນະທຳຂອງປະຊາຊົນ”(13). ພ້ອມກັນນັ້ນ, ປະຕິບັດໃຫ້ໄດ້ດີທິດນຳ: “ປະຊາຊົນຮູ້, ປະຊາຊົນປຶກສາຫາລື, ປະຊາຊົນປະຕິບັດ, ປະຊາຊົນກວດກາ, ປະຊາຊົນຕິດຕາມ, ປະຊາຊົນຊົມໃຊ້ຜົນປະໂຫຍດ”; ເອົາໃຈໃສ່ເສີມຂະຫຍາຍບົດບາດຂອງຄອບຄົວ, ຊຸມຊົນ, ສັງຄົມ ສ້າງກຳລັງແຮງສັງລວມ ເພື່ອສ້າງສະພາບແວດລ້ອມທາງວັດທະນະທຳທີ່ດີງາມ, ໃສສະອາດ, ເປັນ “ທິດທາງຄຸນຄ່າ” ທີ່ແທ້ຈິງເພື່ອ “ເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ; ປຸກຕື່ນຢ່າງແຂງແຮງ ຄວາມມຸ້ງມາດປາດຖະໜາພັດທະນາຂອງປະເທດຊາດ, ນ້ຳໃຈຮັກຊາດ, ຄວາມພາກພູມໃຈ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງ ແລະ ຄວາມເມດຕາຈິດ, ຈິດໃຈສາມັກຄີ, ເປັນເອກະພາບສັງຄົມ; ສ້າງສະພາບແວດລ້ອມ ແລະ ຊີວິດວັດທະນະທຳທີ່ອຸດົມສົມບຸນ, ຫຼາກຫຼາຍ, ມີອາລະຍະທຳ, ສົດໄສ ແລະ ເຊື່ອມໂຍງສາກົນ”(14).
ທີສີ່, ກ່ຽວກັບຄຸນຄ່າວັດທະນະທຳໃນບັນດາຂົງເຂດຂອງຊີວິດສັງຄົມ. ເພື່ອເສີມຂະຫຍາຍຄຸນຄ່າວັດທະນະທຳ ແລະ ກຳລັງແຮງຂອງຄົນຫວຽດນາມ ໃນບັນດາຂົງເຂດຊີວິດສັງຄົມ, ເອກະສານກອງປະຊຸມໃຫຍ່ຄັ້ງທີ່ 13 ໄດ້ຢືນຢັນວ່າ: “ກໍ່ສ້າງ ແລະ ປະຕິບັດບັນດາມາດຕະຖານວັດທະນະທຳໃນການນຳພາ, ຄຸ້ມຄອງ. ເອົາໃຈໃສ່ກໍ່ສ້າງສະພາບແວດລ້ອມວັດທະນະທຳສຳນັກງານທີ່ປອດໃສ, ປະຊາທິປະໄຕ, ສາມັກຄີ, ເມດຕາຈິດ; ຍູ້ຖອຍພະຍາດອາດຍາສິດ, ພັກພວກ, ບໍ່ມີຄວາມສາມັກຄີ, ລັດທິສວຍໂອກາດ ແລະ ອັດຖະປະໂຫຍດ. ສ້າງວັດທະນທຳວິສາຫະກິດ, ວັດທະນະທໍາຜູ້ປະກອບການ ແລະວັດທະນະທໍາທຸລະກິດ”(15). ຕາມນັ້ນ, ໃຫ້ຄວາມສຳຄັນກັບການກໍ່ສ້າງ ແລະ ແຜ່ຂະຫຍາຍຄຸນຄ່າວັດທະນະທຳ ທັງໃນການເມືອງແລະເສດຖະກິດ, ເປັນຕົ້ນແມ່ນ ໃນບັນດາອົງການຂອງພັກ, ລັດ, ອົງການຈັດຕັ້ງ, ວິສາຫະກິດ, ຊຸມຊົນປະຊາຊົນ ເພື່ອໃຫ້ວັດທະນະທຳເຊື່ອມຊືມຢ່າງເລິກເຊິ່ງ, ສ້າງກຳລົງໜູນຊຸກຍູ້ເສດຖະກິດ, ການເມືອງ, ວັດທະນະທຳ, ສັງຄົມຢ່າງຍືນຍົງ. ຍົກສູງລັກສະນະນຳໜ້າ, ເປັນແບບຢ່າງຂອງພະນັກງານ, ລັດຖະກອນ ແລະ ສະມາຊິກພັກ ຢູ່ບັນດາອົງການ, ກົມກອງໃນການປະພຶດ, ພົວພັນແລກປ່ຽນ ແລະ ແກ້ໄຂບັນດາສາຍພົວພັນ ດ້ວຍຄຸນຄ່າວັດທະນທຳຈາກຄຳເວົ້າ, ວິທີພົວພັນແລກປ່ຽນ ຈົນເຖິງການກະທຳ, ເຮັດວຽກ, ທັງຄວາມຮັບຮູ້, ຄຸນສົມບັດ, ແບບແຜນດຳລົງຊີວິດປະຊາທິປະໄຕ, ເຄົາລົບປະຊາຊົນ, ມີຄວາມຮັບຜິດຊອບ ແລະ ຄວາມຮັກແພງສະຫາຍ, ເພື່ອນຮ່ວມງານ; ຜ່ານນັ້ນ, ຊຸກຍູ້ການກໍ່ສ້າງອົງການຈັດຕັ້ງພັກ ແລະ ລະບົບການເມືອງທີ່ໃສສະອາດ ແລະ ເຂັ້ມແຂງ. ນີ້ແມ່ນເນື້ອໃນພື້ນຖານທີ່ສຸດ ເພື່ອກໍ່ສ້າງວັດທະນະທຳໃນການເມືອງ.
ສຸມໃສ່ຫັນການເຄື່ອນໄຫວວັດທະນະທຳ ຕິດພັນແລະເຊື່ອມຊືມເລິກ ເຂົ້າໃນຄວາມຮັບຮູ້, ທ່າທີ, ການປະພຶດໃນການພົວພັນ ແລະ ເຄື່ອນໄຫວປະຈຳວັນຂອງອົງການຈັດຕັ້ງ, ກຳລັງ ແລະ ປະຊາຊົນ, ຍົກສູງຄວາມຮັບຜິດຊອບ, ພັນທະພົນລະເມືອງຕໍ່ປະຊາຊົນ, ຄອບຄົວ, ຊຸມຊົນ, ສັງຄົມ ແລະ ປະເທດ. ພ້ອມກັບການກຳນົດກົນໄກປຸກຕື່ນນ້ຳໃຈອຸທິດເພື່ອປະເທດ, ສ້າງກຳລັງໜູນໃຫ້ພະນັກງານ, ລັດຖະກອນສຳເລັດໜ້າທີ່ທີ່ໄດ້ຮັບມອບໝາຍ, ຮັບໃຊ້ປະຊາຊົນຢ່າງສຸດອົກສຸດໃຈ, ຕ້ອງວິຈານຢ່າງເດັດດ່ຽວແລະເຂັ້ມງວດຕໍ່ພະນັກງານ, ລັດຖະກອນ ພາລະກອນທີ່ເມີນເສີຍ, ຂາດສະຕິຮູ້ສຶກ, ບໍ່ມີຄວາມຮັບຜິດຊອບ, ທ່າທີ່ອາດຍາເຈົ້ານາຍ, ອວດອ້າງຈອງຫອງ, ອຳນາດບາດໃຫຍ່, ລົບກວນປະຊາຊົນ.
ເພື່ອເສີມຂະຫຍາຍມເປັນຢ່າງດີ ຄຸນຄ່າວັດທະນະທຳ ແລະ ກຳລັງແຮງຂອງຄົນຫວຽດນາມໃນໄລຍະໃໝ່, ພັກກອມມູນິດຫວຽດນາມ ໄດ້ກຳນົດໃຫ້ຍົກສູງຄຸນນະພາບແລະປະສິດທິຜົນຂອງບັນດາຮູບການເຄື່ອນໄຫວວັດທະນະທຳ, ສິລະປະ, ທັງຮັບປະກັນການຊຸກຍູ້ວັດທະນະທຳໃຫ້ພັດທະນາ, ທັງປະກອບສ່ວນອົບຮົມສຶກສາ ຫຼໍ່ຫຼອມຜູ້ຄົນ, ພ້ອມທັງ: “ມີແຜນການ, ກົນໄກ ແລະ ມາດຕະການແກ້ໄຂໃຫ້ຖືກຕ້ອງ ການພົວພັນລະຫວ່າງການອະນຸລັກ ແລະ ການເສີມຂະຫຍາຍບັນດາຄຸນຄ່າວັດທະນະທຳ, ປະຫວັດສາດມູນເຊື້ອປະເທດຊາດໃນການກໍ່ສ້າງຜູ້ຄົນ, ພັດທະນາເສດຖະກິດ-ສັງຄົມ”(16); ຍົກສູງຄຸນຄ່າແນວຄິດ, ສິລະປະ, ຮັບປະກັນສິດເສລີ, ປະຊາທິປະໄຕ ໃນການປະດິດສ້າງວັນນະຄະດີ, ສິລະປະ; ເອົາໃຈໃສ່ເຖິງການບຳລຸງຈິດໃຈ, ຮູບຊົງຂອງຄົນຫວຽດນາມ, ພິເສດແມ່ນຄົນລຸ້ນໜຸ່ມ./.
-------------------------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດ ຫວຽດນາມ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, ເຫຼັ້ມ 1, 2021, ໜ້າ 202.
(2), (3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ ກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 1, ໜ້າ 34, 115 -116.
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 1, ໜ້າ 143.
(5), (6), (7), (8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 1, ໜ້າ 47, 143, 143, 143.
(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 2, ໜ້າ 72.
(10), (11), (12), (13) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 1, ໜ້າ 168, 84, 116, 114.
(14), (15), (16) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ປື້ມທີ່ໄດ້ແນະນຳ, ເຫຼັ້ມ 1, ໜ້າ 221-222, 144, 145.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 982 (ເດືອນມັງກອນ 2022)
