ເສີມຂະຫຍາຍມູນເຊື້ອອັນພິລະອາດຫານ, ຍູ້ແຮງການກໍ່ສ້າງກອງທັບປະຊາຊົນຫວຽກນາມ ໃຫ້ເປັນກອງທັບປະຕິວັດ ລະບຽບຫຼວງ ຍອດຍ້ຽມ ທັນສະໄໝເປັນແຕ່ລະກ້າວ
ວ.ກ - ກ່ອນໜ້ານີ້ 70 ປີ, ໂດຍປະຕິບັດຄຳສັ່ງຂອງທ່ານຜູ້ນຳໂຮ່ຈີມິນ, ວັນທີ 22 ທັນວາ 1944, ຢູ່ເຂດປ່າ ເຈິ່ນຮຶງດ້າວ ເມືອງງວຽນບິ່ງ ແຂວງກາວບັ່ງ, ກອງທະຫານໂຄສະນາປົກປ່ອຍຫວຽດນາມ ທີ່ເປັນຕົ້ນກຳເນີດຂອງກອງທັບປະຊາຊົນຫວຽດນາມ, ໄດ້ຖືກສ້າງຕັ້ງຂຶ້ນ. ພາຍໃຕ້ການນຳພາ ສຶກສາອົບຮົມ ແລະຝຶກຝົນຫຼໍ່ຫຼອມ ຂອງພັກກອມມູນິດຫວຽດນາມ ແລະຂອງທ່ານປະທານໂຮ່ຈີມິນ, ໃນຕະຫຼອດຂະບວນວິວັດແຫ່ງການກໍ່ສ້າງ ສູ້ຮົບ ແລະ ເຕີບໃຫຍ່ເຂັ້ມແຂງ, ກອງທັບປະຊາຊົນຫວຽດນາມ ຍາມໃດກໍ່ຢຶດໝັ້ນໃນຈຸດໝາຍ ອຸດົມຄະຕິການສູ້ຮົບ ເພື່ອເອກະລາດແຫ່ງຊາດແລະສັງຄົມນິຍົມ; ໄດ້ພ້ອມກັນກັບປະຊາຊົນຍາດເອົາບັນດາໄຊຊະນະອັນສະຫງ່າລາສີ, ສົມກັບເປັນເຄື່ອງມືຄວາມຮຸນແຮງອັນແຫຼມຄົມ, ເປັນກຳລັງການເມືອງທີ່ຈົງຮັກພັກດີແລະໄວ້ວາງໃຈໄດ້ ຂອງພັກ ລັດ ແລະ ປະຊາຊົນ, ເປັນແກນກາງໃຫ້ແກ່ປະຊາຊົນທັງຊາດໃນພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາປະເທດຊາດ.
ນັບແຕ່ເມື່ອຫາກໍ່ສ້າງຕັ້ງຂຶ້ນໃໝ່, ດ້ວຍກຳລັງທະຫານພຽງ 34 ຄົນ ແລະອາວຸດປະຖົມປະຖານທີ່ສຸດແຕ່ກອງທັບປະຊາຊົນຫວຽດນາມກໍ່ໄດ້ຮັບໄຊຊະນະໃນການບຸກໂຈມຕີຄ້າຍທະຫານ ຟາຍຄັດ ແລະ ນາເງິນ, ເລີ່ມຕົ້ນມູນເຊື້ອ “ເດັດດ່ຽວສູ້ຮົບ, ເດັດຂາດມີໄຊ” ຂອງກອງທັບ ແລະ ຫຼັງຈາກນັ້ນເກືອບແປດເດືອນ ກໍ່ໄດ້ປະກອບສ່ວນອັນສຳຄັນ ພ້ອມກັນກັບປວງຊົນທັງຊາດ ດຳເນີນການປະຕິວັດເດືອນສິງຫາປີ 1945 ທີ່ຍິ່ງໃຫຍ່ຢ່າງສຳເລັດຜົນ, ຍາດເອົາເອກະລາດແຫ່ງຊາດ, ສ້າງປະຖົມປັດໃຈໃຫ້ແກ່ການກຳເນີດເກີດຂຶ້ນຂອງປະເທດສາທາລະນະລັດ ປະຊາທິປະໄຕ ຫວຽດນາມ - ລັດແຫ່ງປະຊາທິປະໄຕ ປະຊາຊົນທຳອິດ ຢູ່ອາຊີຕາເວັນອອກສຽງໃຕ້.
ໃນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຜູ້ຮຸກຮານ, ກອງທັບປະຊາຊົນຫວຽດນາມໄດ້ເຕີບໃຫຍ່ຢ່າງໄວວາ, ຂະຫຍາຍຕົວທັງທາງດ້ານກຳລັງ ອາວຸດ ຍຸດໂທປະກອບ ແລະ ພິເສດແມ່ນບົດຮຽນສູ້ຮົບ. ອາໃສສິ່ງດັ່ງກ່າວນັ້ນ, ໃນທ່າສະໜາມຮົບສົງຄາມປະຊາຊົນ, ກອງທັບປະຊາຊົນຫວຽດນາມໄດ້ຈັດຕັ້ງບັ້ນຮົບຫຼາຍບັ້ນທີ່ມີຂະໜາດນັບມື້ນັບໃຫຍ່ໂຕ, ເປັນຕົ້ນແມ່ນການບຸກໂຈມຕີຍຸດທະສາດ ລະດູໜາວ-ບານໃໝ່ 1953 - 1954, ຍາດໄດ້ໄຊຊະນະຕັດສິນໃນບັ້ນຮົບ ດ້ຽນບຽນຝູ ອັນເປັນປະຫວັດສາດ “ທີ່ມີຊື່ສຽງໂດ່ງດັງທົ່ວຫ້າທະວີບ, ກະທົບກະເທືອນທົ່ວໂລກ”.
ໃນການຕໍ່ສູ້ກູ້ຊາດຕ້ານອາເມລິກາ, ກອງທັບປະຊາຊົນຫວຽດນາມໄດ້ກໍ່ສ້າງບັນດາເຫຼົ່າທັບ ເຫຼົ່າທະຫານ ພ້ອມດ້ວຍອາວຸດຍຸດໂທປະກອບ ແລະພາຫະນະເຕັກນິກທີ່ທັນສະໄໝພໍສົມຄວນ. ພິເສດ, ໃນໄລຍະທ້າຍຂອງການຕໍ່ຕ້ານ, ໄດ້ສ້າງຕັ້ງບັນດາເຫຼົ່າທະຫານຫຼວງເຄື່ອນທີ່. ສິລະປະຍຸດຂອງສົງຄາມປະຊາຊົນຫວຽດນາມໃນການຕໍ່ສູ້ຕ້ານຈັກກະພັດອາເມລິກາຜູ້ຮຸກຮານ ໄດ້ຂະຫຍາຍຕົວເຖິງຍອດສູງສຸດ, ເປັນຕົ້ນແມ່ນສິລະປະການສູ້ຮົບແບບຍຸດທະພູມ, ຍຸດທະສາດ ແລະ ການຊີ້ນຳປະສານການສູ້ຮົບລະຫວ່າງບັນດາສະໜາມຮົບ. ຢູ່ພາກເໜືອ, ກອງທັບໄດ້ເຂົ້າຮ່ວມພ້ອມກັບທົ່ວປວງຊົນກໍ່ສ້າງສັງຄົມນິຍົມ; ພ້ອມກັນນັ້ນ ກໍ່ໄດ້ຕີເອົາຊະນະສົງຄາມທຳລາຍດ້ວຍກອງທັບອາກາດ ແລະ ກອງທັບເຮືອ ຂອງຈັກກະພັດອາເມລິກາ, ປົກປັກຮັກສາ “ແນວຫຼັງໃຫຍ່” ພາກເໜືອໄວ້ຢ່າງໝັ້ນຄົງ, ລຳລຽງສະໜອງອາວຸດຍຸດໂທປະກອນໃຫ້ “ແນວໜ້າໃຫຍ່” ພາກໃຕ້. ຢູ່ພາກໃຕ້, ກອງທັບໄດ້ເສີມຂະຫຍາຍບົດບາດເປັນແກນກາງໃນການຕໍ່ສູ້ດ້ານການທະຫານ, ສົມທົບຢ່າງແໜ້ນແຟ້ນລະຫວ່າງຕໍ່ສູ້ດ້ານການທະຫານ ກັບຕໍ່ສູ້ດ້ານການເມືອງແລະຕໍ່ສູ້ດ້ານການທູດ; ປະຕິບັດແບບວິທີປະສານການສູ້ຮົບລະຫວ່າງບັນດາເຫຼົ່າທະຫານຫຼວງ ກັບສົງຄາມປະຊາຊົນຢູ່ທ້ອງຖິ່ນ; ຕີສັດຕູດ້ວຍສາມປາຍແຫຼມບຸກໂຈມຕີ: ການເມືອງ ການທະຫານ ຂົນຂວາຍທະຫານສັດຕູ, ແລະ ຢູ່ທັງສາມເຂດຍຸດທະສາດ: ຕົວເມືອງ ຊົນນະບົດ ເຂດພູດອຍ, ສ້າງເປັນກຳລັງແຮງສັງລວມເຮັດໃຫ້ຍຸດທະສາດຕ່າງໆຂອງຈັກກະພັດອາເມລິກາປະລາໄຊລົງ ເຊັ່ນ “ສົງຄາມພິເສດ” “ສົງຄາມພາກສ່ວນ” “ການຫັນສົງຄາມເປັນຂອງຫວຽດນາມ”, ກ້າວໄປເຖິງສຳເລັດການຕໍ່ສູ້ຕ້ານອາເມລິກາເພື່ອກູ້ຊາດ ດ້ວຍການບຸກໂຈມຕີ ແລະ ລຸກຮືຂຶ້ນຂະໜາດໃຫຍ່ໃນລະດູບານໃໝ່ປີ 1975 ຊຶ່ງຍອດສູງແມ່ນບັ້ນຮົບໂຮ່ຈີມິນອັນເປັນປະຫວັດສາດ.
ປະເທດຊາດເປັນເອກະພາບ, ທົ່ວປະເທດດຳເນີນສອງໜ້າທີ່ຍຸດທະສາດຄື ກໍ່ສ້າງ ແລະ ປົກປັກຮັກສາປະເທດຊາດ, ກອງທັບປະຊາຊົນຫວຽດນາມເປັນກຳລັງແກນກາງທີ່ແທ້ຈິງໃຫ້ແກ່ທົ່ວປວງຊົນປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນຂອງປະເທດຊາດ, ປົກປັກຮັກສາລະບອບສັງຄົມນິຍົມໄວ້ຢ່າງໝັ້ນຄົງ; ຕໍ່ສູ້ເຮັດໃຫ້ກົນອຸບາຍ ເລ່ຫຼ່ຽມ “ຜັນປ່ຽນໂດຍສັນຕິ” ຂອງບັນດາອິດທິກຳລັງສັດຕູປະລາໄຊລົງ. ພ້ອມກັບໜ້າທີ່ສູ້ຮົບ, ກອງທັບປະຊາຊົນຫວຽດນາມໄດ້ຕັ້ງໜ້າເຂົ້າຮ່ວມໃນການຮຳບາດແຜສົງຄາມ, ປ້ອງກັນ ຫຼີກລ່ຽງໄພທຳມະຊາດ, ປົກປັກຮັກສາຊີວິດ ແລະຊັບສົມບັດຂອງປະຊາຊົນ; ໂຄສະນາ ຂົນຂວາຍປະຊາຊົນປະຕິບັດແນວທາງ ແຜນນະໂຍບາຍຂອງພັກ ແລະ ນະໂຍບາຍ ກົດໝາຍຂອງລັດ; ກໍ່ສ້າງ ປັບປຸງລະບົບການເມືອງຢູ່ຮາກຖານ; ຊ່ວຍເຫຼືອປະຊາຊົນພັດທະນາເສດຖະກິດ, ລົບລ້າງຄວາມອຶດຫີວ ຫລຸດຜ່ອນຄວາມທຸກຍາກ, ປະຕິບັດສະຫວັດດີການສັງຄົມ, ເຂົ້າຮ່ວມກໍ່ສ້າງຊົນນະບົດໃໝ່,... ຜ່ານສິ່ງດັ່ງກ່າວນັ້ນ, ປະກອບສ່ວນກໍ່ສ້າງ “ທ່າສະໜາມໃນໃຈປະຊາຊົນ”, ປັບປຸງຄວາມເຊື່ອຖືຂອງປະຊາຊົນຕໍ່ກັບພັກ ແລະ ລັດ. ດ້ວຍພາລະບົດບາດ “ກອງກຳລັງອອກແຮງງານ”, ກອງທັບປະຊາຊົນ ຊຶ່ງແກ່ນກາງແມ່ນບັນດາກົມກອງປ້ອງກັນຊາດ-ເສດຖະກິດ, ບັນດາໂຮງຈັກໂຮງງານການທະຫານ, ໄດ້ຕັ້ງໜ້າເຂົ້າຮ່ວມການຜະລິດ ປະກອບສ່ວນຍູ້ແຮງການຫັນເປັນອຸດສາຫະກຳ ທັນສະໄໝ, ຍົກສູງຊີວິດການເປັນຢູ່ຂອງປະຊາຊົນ, ເພີ່ມທະວີກຳລັງແຮງຂອງການປ້ອງກັນປະເທດຊາດ - ປ້ອງກັນຄວາມສະຫງົບຢູ່ບັນດາບໍລິເວນຍຸດທະສາດ ເຂດຊາຍແດນ ເຂດທະເລໝູ່ເກາະ. ກອງທັບປະຊາຊົນຫວຽດນາມບໍ່ພຽງແຕ່ໄດ້ສຳເລັດໜ້າທີ່ຂອງຊາດຢ່າງດີເດັ່ນເທົ່ານັ້ນ ຫາກຍັງໄດ້ປະກອບສ່ວນພ້ອມກັບປະຊາຊົນຫວຽດນາມສຳເລັດພັນທະສາກົນອັນສູງສົ່ງ, ພິເສດແມ່ນຕໍ່ກັບປະຊາຊົນລາວ ແລະ ປະຊາຊົນກຳປູເຈຍ.
ເບິ່ງຄືນຫຼັງ 70 ປີແຫ່ງການກໍ່ສ້າງ ສູ້ຮົບ ແລະ ເຕີບໃຫຍ່ຂອງກອງທັບ, ບັນດາຮຸ້ນພະນັກງານ ນັກຮົບກອງທັບປະຊາຊົນຫວຽດນາມ ໄດ້ກໍ່ສ້າງທາດແທ້ ມູນເຊື້ອອັນດີງາມ “ຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ກຽມຄວາມພ້ອມສູ້ຮົບເສຍສະຫຼະຊີວິດເພື່ອເອກະລາດ ອິດສະຫຼະພາບຂອງປະເທດຊາດ, ເພື່ອສັງຄົມນິຍົມ. ສຳເລັດທຸກໜ້າທີ່, ຜ່ານຜ່າທຸກຄວາມຫຍຸ້ງຍາດ, ຕີເອົາຊະນະສັດຕູທຸກໂຕ”(1) ຄືດັ່ງຄຳຊົມເຊີຍຂອງທ່ານປະທານໂຮ່ຈີມິນ, ເຮັດໃຫ້ຊື່ສຽງ “ທະຫານຂອງລຸງໂຮ່” ລືຊ່າໄປທົ່ວ, ສົມກຽດເປັນກອງທັບທີ່ກ້າຫານ ຂອງຊາດຫວຽດນາມຜູ້ພິລະອາດຫານ.
ປັດຈຸບັນ, ພາລະກິດສ້າງສາ ແລະ ປົກປັກຮັກສາປະເທດຊາດຂອງປະຊາຊົນຫວຽດນາມ ໄດ້ດຳເນີນໄປໃນສະພາບການເມືອງໂລກ ພວມມີການປ່ຽນແປງຢ່າງໄວວາ ສັບສົນ ແລະ ເຊື່ອງຊ້ອນຫຼາຍປັດໄຈທີ່ຄາດຄະເນຍາກ ຊຶ່ງສ້າງໃຫ້ມີທັງໂອກາດແລະສິ່ງທ້າທາຍທີ່ແຊກຊ້ອນກັນ. ພາກພື້ນອາຊີ - ປາຊີຟິກສືບຕໍ່ຂະຫຍາຍຕົວຢ່າງຂະຫຍັນຂັນເຄື່ອນ, ແຕ່ກໍ່ມີຫຼາຍປັດໄຈທີ່ທຳລາຍຄວາມສະຫງົບ; ການແກ່ງແຍ້ງຍຸດທະສາດລະຫວ່າງບັນດາປະເທດມະຫາອຳນາດກໍ່ຍັງເກີດຂຶ້ນຢ່າງດຸເດືອດ; ການຊ່ວງຊິງກັນດ້ານເຂດແດນ ເຂດທະເລໝູ່ເກາະ ກໍ່ຜັນປ່ຽນຢ່າງສັບສົນ. ສຳລັບຫວຽດນາມ, ຜ່ານການປ່ຽນແປງໃໝ່ໃນເວລາເກືອບ 30 ປີ, ໄດ້ບັນລຸຜົນງານອັນໃຫຍ່ຫຼວງຫຼາຍຢ່າງທີ່ມີຄວາມໝາຍຍຸດທະສາດ, ທ່າແລະກຳລັງຂອງຫວຽດນາມນັບມື້ໄດ້ເພີ່ມທະວີ, ບົດບາດທີ່ຕັ້ງ ແລະ ອິດທິພົນຂອງຫວຽດນາມໃນເວທີສາກົນໄດ້ຮັບການຍົກສູງ, ສ້າງປະຖົມປັດໄຈເພື່ອສືບຕໍ່ພັດທະນາຢ່າງແຂງແຮງ ແລະ ໝັ້ນທ່ຽງໃນໄລຍະໃໝ່. ແຕ່ວ່າ, ຫວຽດນາມກໍ່ພວມຢືນຢູ່ຕໍ່ໜ້າສິ່ງທ້າທາຍໃຫຍ່ຫຼາຍຢ່າງ ທີ່ແຊກຊ້ອນກັນ ແລະຜັນປ່ຽນຢ່າງສັບສົນ. ບັນດາອິດທິກຳລັງສັດຕູສືບຕໍ່ປະຕິບັດກົນອຸບາຍ “ຜັນປ່ຽນໂດຍສັນຕິ”, ກໍ່ການຈະລາຈົນໂຄ່ນລົ້ມ, ໃຊ້ຖ້ອຍຄຳ “ປະຊາທິປະໄຕ”, “ສິດທິມະນຸດ” ເພື່ອຫວັງເຮັດໃຫ້ລະບອບການເມືອງຢູ່ປະເທດເຮົາປ່ຽນແປງໄປ. ຕໍ່ໜ້າສະພາບການດັ່ງກ່າວ, ໜ້າທີ່ປົກປັກຮັກສາປະເທດຊາດສັງຄົມນິຍົມມີການຂະຫຍາຍຕົວໃໝ່, ມັນວາງຄວາມຮຽກຮ້ອງຕ້ອງການນັບມື້ຍິ່ງສູງ.
ປົກປັກຮັກສາປະເທດຊາດສັງຄົມນິຍົມໃນສະພາບການໃໝ່ ຊຶ່ງໃຈກາງແມ່ນປົກປັກຮັກສາເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນ, ປົກປັກຮັກສາພັກ ລັດ ປະຊາຊົນ ແລະ ລະບອບສັງຄົມນິຍົມ ໄວ້ຢ່ານໝັ້ນຄົງ, ຮັກສາສິ່ງແວດລ້ອມສັນຕິພາບ ຄວາມສະຫງົບດ້ານການເມືອງ ເພື່ອພັດທະນາປະເທດຊາດຢ່າງຮອບດ້ານ ແມ່ນໜ້າທີ່ສຳຄັນຕົ້ນຕໍ່ຂອງທົ່ວພັກ ທົ່ວປວງຊົນ ແລະ ທົ່ວກອງທັບ, ໃນນັ້ນກອງທັບປະຊາຊົນ ແລະ ຕຳຫຼວດປະຊາຊົນຖືບົດບາດເປັນແກ່ນສານ. ເພື່ອສຳເລັດພາລະໜ້າທີ່ທີ່ໄດ້ຮັບມອບໝາຍ, ກອງທັບປະຊາຊົນຕ້ອງຕັ້ງໜ້າພະຍາຍາມຍິ່ງກວ່າອີກ, ກ່ອນອື່ນໝົດຕ້ອງສືບຕໍ່ຊາບຊືມ ກຳແໜ້ນຈຸດໝາຍ ທັດສະນະ ແນວຄິດ ທິດນຳການຊີ້ນຳຂອງພັກກ່ຽວກັບການປົກປັກຮັກສາປະເທດຊາດ ຊຶ່ງໄດ້ຫັນເປັນນິຕິກຳໃນບັນດາມະຕິ ຄຳສັ່ງຂອງພັກ, ເປັນຕົ້ນແມ່ນມະຕິກອງປະຊຸມໃຫຍ່ຄັ້ງທີ XI, ມະຕິກອງປະຊຸມສູນກາງພັກຄັ້ງທີ 8 ສະໄໝທີ XI ວ່າດ້ວຍແຜນຍຸດທະສາດປົກປັກຮັກສາປະເທດຊາດໃນສະພາບການໃໝ່. ພ້ອມກັນນັ້ນ, ຕ້ອງສືບຕໍ່ກໍ່ສ້າງໃຫ້ກຳລັງປະກອບອາວຸດປະຊາຊົນເຂັ້ມແຂງຮອບດ້ານ ມີຄຸນນະພາບສັງລວມ, ມີກຳລັງແຮງແລະຄວາມສາມາດສູ້ຮົບສູງ, ໃນນັ້ນ ສຸມໃສ່ກໍ່ສ້າງກອງທັບໃຫ້ເປັນກອງທັບປະຕິວັດ, ລະບຽບຫຼວງ, ຍອດຍ້ຽມ, ທັນສະໄໝເປັນແຕ່ລະກ້າວ.
ພຶດຕິກຳແຫ່ງວິວັດການຕໍ່ສູ້ປົດປ່ອຍຊາດ, ກໍ່ຄືໃນພາລະກິດສ້າງສາ ແລະ ປົກປັກຮັກສາປະເທດຊາດ ໄດ້ຢືນຢັນວ່າ ກອງທັບປະຊາຊົນຫວຽດນາມແມ່ນກອງທັບປະຕິວັດ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ. ຕໍ່ໜ້າສະພາບການສັບສົນໃນປັດຈຸບັນນີ້, ກວ່າເວລາໃດໝົດ ຍິ່ງຕ້ອງເອົາໃຈໃສ່ເຖິງການຮັກສາ ແລະ ເພີ່ມທະວີທາດແທ້ປະຕິວັດໃຫ້ແກ່ກອງທັບປະຊາຊັນ; ຕ້ອງອົບຮົມສຶກສາລັດທິມາກ - ເລນິນ, ແນວຄິດໂຮ່ຈີມິນ, ອຸດົມຄະຕິປະຕິວັດ, ຈຸດໝາຍສູ້ຮົບຂອງກອງທັດ, ມູນເຊື້ອປະຫວັດສາດຂອງຊາດຢ່າງເປັນປະຈຳ; ຍົກສູງຄຸນສົມບັດປະຕິວັດ, ຫຼັກໝັ້ນການເມືອງ, ຄຸນທາດແລະຄວາມສາມາດໃຫ້ພະນັກງານ ນັດຮົບ. ນັ້ນແມ່ນພື້ນຖານສຳຄັນອັນດັບໜຶ່ງທີ່ຮັບປະກັນໃຫ້ກອງທັບມີຄວາມຈົງຮັກພັກດີເດັດຖານຕໍ່ກັບພັກ ລັດ ແລະ ປະຊາຊົນ, ກຽມຄວາມພ້ອມເພື່ອຮັບເອົາ ແລະ ປະຕິບັດທຸກໜ້າທີ່ໄດ້ຮັບມອບໝາຍຢ່າງສຳເລັດມີໄຊ.
ທາດແທ້ປະຕິວັດຂອງກອງທັບປະຊາຊົນຫວຽດນາມ ແມ່ນຕັ້ງໝັ້ນໃນຈຸດໝາຍເອກະລາດແຫ່ງຊາດ ແລະ ສັງຄົມນິຍົມ; ຊາບຊືມໂຄງການການເມືອງ ແນວທາງ ທັດສະນະຂອງພັກຢ່າງເລິກເຊິ່ງ, ກຳແໜ້ນສອງໜ້າທີ່ຍຸດທະສາດຂອງການປະຕິວັດ; ປະຕິບັດມະຕິຄຳສັ່ງຂອງພັກ ນະໂຍບາຍກົດໝາຍຂອງລັດ ແລະ ບັນດາໜ້າທີ່ທີ່ໄດ້ຮັບມອບໝາຍຢ່າງເຂັ້ມງວດ, ສຳເລັດເປັນຢ່າງດີພາລະບົດບາດເປັນກອງທະຫານສູ້ຮົບ ກອງທະຫານປະຕິບັດງານ ແລະ ກອງທະຫານອອກແຮງງານທຳການຜະລິດ. ທາດແທ້ຂອງກອງທັບປະຊາຊົນຫວຽດນາມ ຍັງໄດ້ສະແດງອອກໃນການພົວພັນສະໜິດແໜ້ນແບບເລືອດເນື້ອກັບປະຊາຊົນ, ເກີດມາຈາກປະຊາຊົນ, ສູ້ຮົບເພື່ອຄວາມສຸກຂອງປະຊາຊົນ. ໃນສະພາບການໂລກາພິວັດດ້ານເສດຖະກິດ ແລະ ການເຊື່ອມໂຍງສາກົນຢ່າງກວ້າງຂວາງເລິກເຊິ່ງໃນປັດຈຸບັນ, ກອງທັບປະຊາຊົນຕ້ອງຮັບຮູ້ຢ່າງຖືກຕ້ອງ, ຈຳແນກຢ່າງຈະແຈ້ງລະຫວ່າງ ຄູ່ຮ່ວມ ແລະ ເປົ້າໝາຍ, ຮ່ວມມື ແລະ ຕໍ່ສູ້, ໂອກາດ ແລະ ສິ່ງທ້າທາຍ ທີ່ແຊກຊ້ອນກັນ. ບົນພື້ນຖານນັ້ນ, ຍົກສູງສະຕິລະວັງຕົວ, ຄາດຄະເນສະພາບການຢ່າງຖືກຕ້ອງ, ກຳແໜ້ນການຫັນປ່ຽນຕ່າງໆທຸກຢ່າງທີ່ກ່ຽວພັນເຖິງການປ້ອງກັນປະເທດ - ປ້ອງກັນຄວາມສະຫງົບ, ເປັນຕົ້ນແມ່ນຕາມທິດ ແລະ ບໍລິເວນຍຸດທະສາດ, ເພື່ອມີແຜນການ ແລະ ເປັນເຈົ້າການສົມທົບກັບບັນດາກຳລັງ ແລະ ປະຊາຊົນດຳເນີນການຕໍ່ສູ້ຢ່າງມີປະສິດທິຜົນ ຕ້ານກັບທຸກກົນອຸບາຍ ທຸກການກະທຳທຳລາຍການປະຕິວັດ ລ່ວງລ້ຳດິນແດນ ລະເມີດອະທິປະໄຕແລະຜົນປະໂຫຍດ ຂອງຊາດຫວຽດນາມ. ດ້ວຍບົດບາດເປັນກຳລັງຫຼັກແຫຼ່ງໃນໜ້າທີ່ປົກປັກຮັກສາປະເທດຊາດ, ກອງທັບປະຊາຊົນຕ້ອງເປັນເຈົ້າການໃຫ້ຄຳປຶກສາແກ່ພັກ ແລະ ລັດ ໃນການວາງແນວທາງ ກົນໄກ ນະໂຍບາຍ ກົດໝາຍ ກ່ຽວກັບການປ້ອງກັນປະເທດ; ໃຫ້ຄວາມສຳຄັນແກ່ການບູລະນະກົນໄກນຳພາຂອງພັກຕໍ່ກັບກອງທັບ ແລະ ລະບົບການປ້ອງກັນປະເທດທົ່ວປວງຊົນ; ລະບົບກົດໝາຍ, ບັນດາແຜນຍຸດທະສາດ ແຜນກຳນົດ ແຜນການສົມທົບຢ່າງແໜ້ນແຟ້ນລະຫວ່າງ ການປ້ອງກັນປະເທດ ກັບການພັດທະນາເສດຖະກິດ-ສັງຄົມ, ເປັນຕົ້ນແມ່ນຢູ່ບັນດາບໍລິເວນພື້ນທີ່ຍຸດທະສາດ; ກ່ຽວກັບການກໍ່ສ້າງ ພັດທະນາອຸດສາຫະກຳປ້ອງກັນປະເທດ, ຮັບປະກັນການປະກອບອາວຸດຍຸດໂທປະກອນໃຫ້ກອງທັບ; ກ່ຽວກັບການກໍ່ສ້າງລະບົບປ້ອງກັນປະເທດທົ່ວປວງຊົນ, ກໍ່ສ້າງທ່າສະໜາມປ້ອງກັນປະເທດທົ່ວປວງຊົນ ຕິດແໜ້ນກັບທ່າສະໜາມປ້ອງກັບຄວາມສະຫງົບປະຊາຊົນ, ກໍ່ສ້າງເຂດປ້ອງກັນຮັກສາຕາມແຂວງ (ນະຄອນ). ພ້ອມກັນນັ້ນ, ກອງທັບຕ້ອງເປັນເຈົ້າການໃຫ້ຄຳປຶກສາຢ່າງທັນການກ່ຽວກັບບັນດານະໂຍບາຍ ເພື່ອແກ້ໄຂບັນຫາປ້ອງກັນຊາດ - ປ້ອງກັນຄວາມສະຫງົບ ແລະ ບັນຫາການຕ່າງປະເທດຢ່າງສຳເລັດມີໄຊ, ຮັກສາການພົວພັນມິດຕະພາບກັບບັນດາປະເທດເພື່ອນບ້ານໃກ້ຄຽງ ບັນດາປະເທດມະຫາອຳນາດ, ຮັກສາຄວາມໝັ້ນຄົງດ້ານການເມືອງຂອງປະເທດຊາດ, ສ້າງສິ່ງແວດລ້ອມສັນຕິພາບ ສະຖຽນລະພາບເພື່ອພັດທະນາປະເທດຊາດຢ່າງຮອບດ້ານ.
ຄຽງຄູ່ກັບການຮັກສາ ແລະ ເສີມຂະຫຍາຍທາດແທ້ປະຕິວັດຂອງກອງທັບ, ບັນຫາກໍ່ສ້າງລະບຽບແບບແຜນຫຼວງກໍ່ເປັນຄວາມຮຽກຮ້ອງຕ້ອງການພາວະວິໄສ ແລະຮີບດ່ວນໜຶ່ງ. ຈຸດປະສົງຂອງການກໍ່ສ້າງລະບຽບແບບແຜນຫຼວງແມ່ນເພື່ອແນໃສ່ສ້າງໃຫ້ມີຄວາມເປັນເອກະພາບທາງດ້ານແນວຄິດ ເຈດຈຳນົງ ແລະ ການກະທຳ ເພື່ອຮັບປະກັນໃຫ້ກອງທັບເຮົາມີການຈັດຕັ້ງອັນແໜ້ນແຟ້ນ, ເປັນເອກະພາບທາງດ້ານເຄື່ອງແບບທະຫານ, ເປັນແບບຢ່າງທາງດ້ານພິທີການ ແລະ ພຶດຕິການ, ເຂັ້ມງວດທາງດ້ານລະບຽບວິໄນ, ວິທະຍາສາດໃນການປະສານການສູ້ຮົບ. ກໍ່ສ້າງໃຫ້ເປັນລະບຽບຫຼວງມີເນື້ອໃນກວ້າງທີ່ສຸດ ຊຶ່ງພົວພັນກັບທຸກການຈັດຕັ້ງ ກັບນາຍແລະພົນທະຫານທຸກຄົນ. ຕ້ອງຖືແກ່ລັກສະນະຮອບດ້ານເປັນສຳຄັນ, ພ້ອມກັນນັ້ນກໍ່ຄວນສຸມໃສ່ຈຸດໜັກໃຈກາງ, ຂອດບຸກທະລຸ, ສ້າງໃຫ້ທີການຫັນປ່ຽນຢ່າງແຂງແຮງ ໜັກແໜ້ນໃນແຕ່ລະດ້ານ, ເອົາເປັນພື້ນຖານເພື່ອກໍ່ສ້າງກົມກອງເຂັ້ມແຂງຮອບດ້ານ. ໃນເວລາຕໍ່ໜ້າ ຕ້ອງເອົາໃຈໃສ່ຍົກສູງລະດັບລະບຽບຫຼວງໃນການອົບຮົມຝຶກແອບ, ກຽມພ້ອມສູ້ຮົບ; ຄຸ້ມຄອງທະຫານ, ຄຸ້ມຄອງເຄື່ອງປະກອບ; ເປັນເອກະພາບທາງດ້ານເຄື່ອງປະກອບ ພິທີການ ແລະພຶດຕິການທະຫານ; ປະຕິບັດໜ້າທີ່ຮັບຜິດຊອບ ແລະ ລະບອບທີ່ໄດ້ວາງໄວ້. ສົມທົບຢ່າງແໜ້ນແຟ້ນລະຫວ່າງການກໍ່ສ້າງລະບຽບຫຼວງ ກັບການຮັກສາລະບຽບວິໄນຂອງກອງທັບ, ປະຕິບັດກົດໝາຍຂອງລັດ.
ຕໍ່ໜ້າການຂະຫຍາຍຕົວຂອງສະພາບການ ແລະ ໜ້າທີ່ໃນໄລຍະໃໝ່, ການກໍ່ສ້າງໃຫ້ກອງທັບມີຄວາມຍອດຍ້ຽມ ບໍ່ພຽງແຕ່ແນໃສ່ປະຕິບັດພາລະບົດບາດ ໜ້າທີ່ຂອງກອງທະຫານສູ້ຮົບໃຫ້ໄດ້ດີເທົ່ານັ້ນ ຫາກຍັງເພື່ອປະຕິບັດພາລະບົດບາດ ໜ້າທີ່ຂອງກອງທະຫານປະຕິບັດງານ ແລະ ກອງທະຫານອອກແຮງງານທຳການຜະລິດໃຫ້ໄດ້ເປັນຢ່າງດີ. ໃນການກໍ່ສ້າງໃຫ້ກອງທັບມີຄວາມຍອດຍ້ຽມນັ້ນ ກ່ອມອື່ນໝົດແລະສຳຄັນທີ່ສຸດແມ່ນກໍ່ສ້າງກອງທະຫານທີ່ຍອດຍ້ຽມທາງດ້ານການເມືອງ. ນີ້ແມ່ນປັດໃຈສຳຄັນທີ່ສຸດ ທີ່ສ້າງເປັນພື້ນຖານໃຫ້ແກ່ການຍົກສູງຄຸນນະພາບສັງລວມ, ກຳລັງແຮງສູ້ຮົບຂອງກອງທັບປະຊາຊົນ. ເພື່ອປະຕິບັດວຽກງານນີ້ໄດ້ຮັບຜົນດີ ຕ້ອງຕັ້ງໜ້າປ່ຽນແປງໃໝ່ ຍົກສູງຄຸນນະພາບຂອງການເຄື່ອນໄຫວວຽກງານຕ່າງໆເຊັ່ນ ວຽກງານພັກ, ວຽກງານການເມືອງ, ຮັບປະກັນໃຫ້ພະນັກງານ ນັກຮົບໃນກອງທັບມີຫຼັກໝັ້ນການເມືອງໜັກແໜ້ນ, ຕັ້ງໝັ້ນຈຸດໝາຍ ອຸດົມການສູ້ຮົບເພື່ອເອກະລາດແຫ່ງຊາດ ແລະ ສັງຄົມນິຍົມ; ເປັນເອກະສັນສູງ ແລະ ປະຕິບັດເປັນຢ່າງດີແຜນນະໂຍບາຍ ແນວທາງຂອງພັກ ແລະ ນະໂຍບາຍກົດໝາຍຂອງລັດ. ສືບຕໍ່ຍູ້ແຮງການ “ຮ່ຳຮຽນ ແລະ ປະຕິບັດຕາມແວ່ນແຍງຄຸນສົມບັດຂອງທ່ານປະທານໂຮ່ຈີມິນ” ໃຫ້ເຂົ້າສູ່ລວງເລິກ ແລະ ມີປະສິດທິຜົນຕົວຈິງ. ຈັດຕັ້ງເປັນຢ່າງດີຂະບວນການແຂ່ງຂັນເດັດດ່ຽວສູ້ຮົບເດັດຂາດມີໄຊ, ສຸມໃສ່ແກ້ໄຂຂອດອ່ອນ ດ້ານອ່ອນ, ກີດກັ້ນປະກົດການຫຍໍ້ທໍ້ ຫຼ້າຫຼັງ, ຕ້ານຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດ ແບບແຜນດຳລົງຊີວິດ ໃນພະນັກງານນັກຮົບ. ສືບຕໍ່ຊາບຊືມ ແລະ ປະຕິບັດມະຕິສະບັບເລກທີ 51-NQ/TW ຂອງກົມການເມືອງສູນກາງພັກ; ຮັບປະກັນຮັກສາຫຼັກການພັກນຳພາເດັດຂາດ ໂດຍກົງຕໍ່ທຸກດ້ານການເຄື່ອນໄຫວຂອງກອງທັບ. ສຸມໃສ່ກໍ່ສ້າງໃຫ້ຄະນະພັກກອງທັບປອດໃສຂາວສະອາດ ໝັ້ນຄົງເຂັ້ມແຂງ; ພິເສດແມ່ນ ເອົາໃຈໃສ່ຍົກສູງຄວາມສາມາດນຳພາຮອບດ້ານ ແລະ ກຳລັງສູ້ຮົບຂອງອົງການຈັດຕັ້ງຮາກຖານຂອງພັກ, ເປັນຕົ້ນແມ່ນ ຄວາມສາມາດຊາບຊືມມະຕິ, ຈັດຕັ້ງປະຕິບັດມະຕິ ຄຳສັ່ງຂອງຂັ້ນເທິງ ແລະ ກວດກາ ຕິດຕາມກວດກາການປະຕິບັດນັ້ນຢ່າງແໜ້ນແຟ້ນ. ຕິດແໜ້ນລະຫວ່າງການກໍ່ສ້າງໃຫ້ອົງການຈັດຕັ້ງພັກປອດໃສຂາວສະອາດ ໝັ້ນຄົງເຂັ້ມແຂງ ກັບການກໍ່ສ້າງໃຫ້ກົມກອງໝັ້ນຄົງເຂັ້ມແຂງຮອບດ້ານ, ລະຫວ່າງການກໍ່ສ້າງຖັນແຖວພະນັກງານ ກັບຖັນແຖວສະມາຊິກພັກ, ລະຫວ່າງການກໍ່ສ້າງຖັນແຖວພະນັກງານຫຼັກແຫຼ່ງ ກັບຖັນແຖວກຳມະການຄະນະບໍລິຫານງານພັກຂັ້ງຕ່າງໆ.
ເພື່ອຮັບປະກັນໃຫ້ກອງທັບມີຄວາມຍອດຍ້ຽມທາງດ້ານລະດັບ ແລະ ຄວາມສາມາດສູ້ຮົບ, ທະຫານມີຄວາມຊຳໜິຊຳນານດ້ານວິຊາຊີບ ວິຊາສະເພາະ ແມ່ນຕ້ອງເອົາໃຈໃສ່ປ່ຽນແປງໃໝ່ ຍົກສູງຄຸນນະພາບວຽກງານອົບຮົມຝຶກແອບ ແລະ ສຶກສາ-ກໍ່ສ້າງ. ການຈັດຕັ້ງທະຫານຂັ້ນຕ່າງໆຕ້ອງຍູ້ແຮງການປ່ຽນແປງໃໝ່ຢ່າງຮອບດ້ານຕາມມະຕິສະບັບເລກທີ 765 ຂອງຄະນະພັກສູນກາງທະຫານ “ຍົກສູງຄຸນນະພາບການອົບຮົມຝຶກແອບໄລຍະປີ 2013 - 2020 ແລະຊຸມປີຕໍ່ໄປ”. ສຸມໃສ່ປະຕິບັດທິດນຳ “ພື້ນຖານ, ແທດເໝາະ, ໝັ້ນຄົງ” ໃຫ້ດີ; ໃຫ້ຄວາມສຳຄັນຕໍ່ການອົບຮົມຝຶກແອບແບບຄົບຊຸດ ແລະ ລົງເລິກສະເພາະ, ຕິດແທດກັບການສູ້ຮົບຕົວຈິງ, ກັບໜ້າທີ່ ແລະ ບໍລິເວນພື້ນທີ່ເຄື່ອນໄຫວ; ສອດຄ່ອງກັບການຈັດຕັ້ງບັນຈຸກຳລັງ, ກັບການຂະຫຍາຍຕົວຂອງອາວຸດ ຍຸດໂທປະກອບ ແລະ ສິລະປະການທະຫານຫວຽດນາມ, ກໍ່ຄືສອດຄ່ອງກັບຄວາມຕ້ອງການສູ້ຮົບໃນເງື່ອນໄຂນຳໃຊ້ອາວຸດເຕັກໂນໂລຢີສູງ. ໃນການອົບຮົມຝຶກແອບຍຸດທະພູມ ຍຸດທະສາດ, ຕ້ອງເອົາໃຈໃສ່ບຳລຸງຄວາມສາມາດຈິນຕະນາການໄຈ້ແຍກ ສັງລວມ ຕີລາຄາສະພາບການ ແລະ ວິທີການຈັດຕັ້ງ ບັນຊາ ກຳກັບການໃຫ້ພະນັກງານຍຸດທະພູມ ຍຸດທະສາດ; ສ້າງໃຫ້ມີການຫັນປ່ຽນທາງດ້ານຄຸນນະພາບ, ລະດັບການບັນຊາ ເສນາທິການສູ້ຮົບໃນສິ່ງແວດລ້ອມທັງສາມ: ອາກາດ - ບົກ - ທະເລ. ໃນການອົບຮົມຝຶກແອບສູ້ຮົບ, ບັນດາກົມກອງຕ້ອງຍູ້ແຮງການປ່ຽນແປງໃໝ່ເນື້ອໃນ ວິທີການອົບຮົມຝຶກແອບ. ອົບຮົມຝຶກແອບໃຫ້ທະຫານມີຄວາມສາມາດນຳໃຊ້ອາວຸດຍຸດໂທປະກອນທີ່ໄດ້ປະກອບໃຫ້ຢ່າງຊຳໜິຊຳນານ, ມີຄວາມສາມາດເປັນເຈົ້າ ແລະ ນຳໃຊ້ອາວຸດ ພາຫະນະເຕັກນິກທັນສະໄໝທີ່ຫາກໍ່ໄດ້ປະກອບ, ມີລະດັບຍຸດທະວິທີສູງ, ເປັນພື້ນຖານເພື່ອຍົກສູງລະດັບ ແລະ ຄວາມສາມາດສູ້ຮົບຂອງກອງທັບ. ຄຽງຄູ່ກັບການອົບຮົມຝຶກແອບສູ້ຮົບ, ຕ້ອງເອົາໃຈໃສ່ເຖິງການຝຶກແອບ ຝຶກຊ້ອມຊອກຫາ ກູ້ຊີບກູ້ໄພ, ປ້ອງກັນ ຕ້ານ ແລະ ແກ້ໄຂຜົນຮ້າຍຈາກໄພທຳມະຊາດ, ຕ້ານການກໍ່ການຮ້າຍ,... ຮັບປະກັນໃຫ້ບັນດາກົມກອງສາມາດແກ້ໄຂເຫດການທີ່ເກີດຂຶ້ນໄດ້ເປັນຢ່າງດີ ແລະ ສຳເລັດໜ້າທີ່ທີ່ໄດ້ຮັບມອບໝາຍຢ່າງມີໄຊ.
ກອງປະຊຸມໃຫຍ່ຄັ້ງທີ XI ຂອງພັກໄດ້ກຳນົດທິດທາງ: ກໍ່ສ້າງໃຫ້ກອງທັບປະຊາຊົນທັນສະໄໝເປັນແຕ່ລະກ້າວ. ນີ້ແມ່ນມະຕິຕົກລົງທີ່ຖືກຕ້ອງ, ສອດຄ່ອງກັບຄວາມສາມາດຕົວຈິງຂອງປະເທດ. ດ້ວຍຄວາມເອົາໃຈໃສ່ເປັນພິເສດຂອງພັກ ແລະ ລັດ, ກອງທັບໄດ້ປະຕິບັດຖືກຕ້ອງຕາມທິດທາງ ລຳດັບດຳເນີນງານ ແຜນການທີ່ໄດ້ກຳນົດໄວ້ ແລະ ບັນລຸໄດ້ຜົນສຳເລັດທີ່ສຳຄັນຫຼາຍຢ່າງ, ໃນນັ້ນ, ບາງຂົງເຂດໄດ້ຂະຫຍາຍຕົວໄວ ມີລັກສະນະບຸກທະລຸ. ພວກເຮົາຕ້ອງສືບຕໍ່ຍູ້ແຮງການກໍ່ສ້າງໃຫ້ກອງທັບປະຊາຊົນທັນສະໄໝເປັນແຕ່ລະກ້າວ, ພ້ອມກັນນັ້ນກໍ່ສວຍໃຊ້ ແລະ ເສີມຂະຫຍາຍກຳລັງບົ່ມຊ້ອນທາງດ້ານເສດຖະກິດ ວິທະຍາສາດ-ເຕັກໂນໂລຢີ, ບັນດາຜົນສຳເລັດຂອງການຫັນເປັນອຸດສາຫະກຳ ທັນສະໄໝ ເພື່ອຍູ້ແຮງການປ່ຽນແປງໃໝ່ ຫັນເປັນທັນສະໄໝຂອງກອງທັບປະຊາຊົນ. ກ່ອນອື່ນໝົດ, ຕ້ອງສຸມໃສ່ຫັນເປັນທັນສະໄໝຕໍ່ບັນດາກຳລັງກອງທັບເຮືອ, ກອງທັບອາກາດ-ປ້ອງກັນອາກາດ, ກອງທະຫານສູ້ຮົບເອເລັກໂຕຼນິກ, ກອງທະຫານສື່ສານ,...; ພ້ອມກັນນັ້ນກໍ່ຫັນເປັນທັນສະໄໝເປັນແຕ່ລະກ້າວຕໍ່ກັບກອງກຳລັງອື່ນ, ສອດຄ່ອງກັບພາກພຶດຕິກຳ ແລະ ກຳລັງເສດຖະກິດບົ່ມຊ້ອນຂອງປະເທດ.
ເພື່ອຫັນກອງທັບເປັນທັນສະໄໝ ຕ້ອງສືບຕໍ່ເສີມຂະຫຍາຍກຳລັງພາຍໃນ, ຄົ້ນຄວ້າຜະລິດອາວຸດ ເຄື່ອງປະກອບ ເຕັກນິກທີ່ກ້າວໜ້າ ທັນສະໄໝ. ພ້ອມກັນນັ້ນ, ບັນດາກົມກອງກໍ່ຕ້ອງປະຕິບັດບັ້ນຂົນຂວາຍ “ຄຸ້ມຄອງ, ຂຸດຄົ້ນ, ນຳໃຊ້ອາວຸດ ຍຸດໂທປະກອນເຕັກນິກ ໃຫ້ດີ ທົນທານ ປອດໄພ ປະຢັດ, ແລະ ຮັບປະກັນຄວາມປອດໄພໃນການຄົມມະນາຄົມ”; ຍູ້ແຮງການແຂ່ງຂັນກັນນຶກຄິດປະດິດສ້າງ, ດັດແປງເຕັກນິກ, ຍົກສູງຄຸນນະພາບ ປະສິດທິຜົນ ຄວາມສາມາດນຳໃຊ້ບັນດາປະເພດອາວຸດ ຍຸດໂທປະກອບທີ່ມີຢູ່.
ສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມຄົບຮອບ 70 ປີ (22-12-1944 - 22-12-2014) ແລະ ວັນບຸນທົ່ວປວງຊົນປ້ອງກັນຊາດຄົບຮອບ 25 ປີ (22-12-1989 - 22-12-2014) ແມ່ນເຫດການການເມືອງທີ່ສຳຄັນຂອງກອງທັບ ແລະ ຂອງປະເທດ. ນີ້ກໍ່ແມ່ນໂອກາດເພື່ອໃຫ້ພະນັກງານ ນັກຮົບທັງໝົດໃນທົ່ວກອງທັບ ເບິ່ງຄືນເສັ້ນທາງທີ່ໄດ້ຜ່ານມາ, ເອກອ້າງທະນົງໃຈກ່ຽວກັບມູນເຊື້ອອັນສະຫງ່າງາມຂອງກອງທັບທີ່ກ້າຫານ ຂອງຊາດຫວຽດນາມຜູ້ພິລະອາດຫານ. ພວກເຮົາເຊື່ອໝັ້ນວ່າ, ດ້ວຍຄວາມເອກອ້າງທະນົງໃຈແຫ່ງຊາດ ແລະດ້ວຍມູນເຊື້ອອັນສະຫງ່າງາມຂອງກອງທັບປະຊາຊົນຫວຽດນາມຜູ້ກ້າຫານ, ພະນັກງານ ນັກຮົບທຸກຖ້ວນໜ້າໃນທົ່ວກອງທັບຈະສືບຕໍ່ຕັ້ງໜ້າພະຍາຍາມສູ້ຊົນ ເພື່ອພ້ອມກັນກັບທົ່ວພັກ ທົ່ວປວງຊົນກໍ່ສ້າງກອງທັບປະຊາຊົນຫວຽດນາມໃຫ້ເປັນກອງທັບປະຕິວັດ ລະບຽບຫຼວງ ຍອດຍ້ຽມ ທັນສະໄໝເປັນແຕ່ລະກ້າວ, ເປັນແກນກາງທີ່ແທ້ຈິງໃຫ້ທົ່ວປວງຊົນປົກປັກຮັກສາປະເທດຊາດຫວຽດນາມສັງຄົມນິຍົມໃນສະພາບການໃໝ່./.
ຂຽນໂດຍ: ພົນເອກ ຝຸ່ງກວາງແທງ,
ກຳມະການກົມການເມືອງສູນກາງພັກກອມມູນິດຫວຽດນາມ,
ຮອງເລຂາຄະນະພັກການທະຫານສູນກາງ, ລັດຖະມົນຕີວ່າການກະຊວງປ້ອງກັນປະເທດ
------------------------
(1) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2000, ເຫຼັ້ມທີ 11, ໜ້າທີ 350.