ເປັນເຈົ້າການແລະຕັ້ງໜ້າໃນການປັບປຸງຍົກສູງປະສິດທິຜົນ
ການຄຸ້ມຄອງລັດດ້ານວັດທະນະທຳ ກິລາແລະການທ່ອງທ່ຽວ
ການຄຸ້ມຄອງລັດດ້ານວັດທະນະທຳ ກິລາແລະການທ່ອງທ່ຽວ
ທ່ານເລຂາທິການໃຫຍ່ ຫງວຽນຝູຈ້ອງ ໂອ້ລົມກັບບັນດາຜູ້ແທນທີ່ມາຮ່ວມກອງປະຊຸມວັດທະນະທຳແຫ່ງຊາດ ຢູ່ຫໍສະພາແຫ່ງຊາດ, ວັນທີ 24 ພະຈິກ 2021 - ແຫຼ່ງ: vietnamnet.vn
ເປັນເຈົ້າການແລະຕັ້ງໜ້າໃນການປະຕິບັດພາລະກຳ “ວັດທະນະທຳຕ້ອງສ່ອງທາງໃຫ້ປະເທດຊາດ”
ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງພັກ ແລະ ຄຳສະຫຼຸບຂອງທ່ານເລຂາທິການໃຫຍ່ ຫງວຽນຝູຈ້ອງ ທີ່ກອງປະຊຸມວັດທະນະທຳແຫ່ງຊາດຄັ້ງປີ 2021 ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງພັກໃນຂົງເຂດວັດທະນະທຳ, ຈິດໃຈ “ການກະທຳທີ່ເດັດດ່ຽວ, ຄວາມປາຖະໜາທີ່ຈະປະກອບສ່ວນ” ໄດ້ການເປັນ “ເຂັມທິດ” ເພື່ອໃຫ້ຂະແໜງການວັດທະນະທຳ ກິລາ ແລະການທ່ອງທ່ຽວ ພ້ອມກັນມານະພະຍາຍາມ, ສ້າງສັນ ແລະ ເປັນເຈົ້າການ ໃນການສ້າງຄວາມກ້າວໜ້າທີ່ບຸກທະລຸ. ພາລະກຳປະຫວັດສາດ “ວັດທະນະທຳຕ້ອງສ່ອງທາງໃຫ້ປະເທດຊາດ” ຈາກກອງປະຊຸມວັດທະນະທຳແຫ່ງຊາດປີ 1946 ຖືເປັນຂໍ້ຄວາມທີ່ “ຮ້ອນແຮງ” ມາໂດຍຕະຫຼອດ ເພື່ອໃຫ້ຖັນແຖວພະນັກງານເຮັດວຽກງານວັດທະນະທຳທັງໝົດ ມີຄວາມຮັບຮູ້ເລິກເຊິ່ງເຖິງຄວາມຮັບຜິດຊອບທີ່ໄດ້ຮັບມອບໝາຍຈາກພັກ ລັດ ແລະປະຊາຊົນ ເປັນໜ້າທີ່ໃນການສ້າງແລະຟື້ນຟູວັດທະນະທຳຂອງຊາດ.
ກະຊວງວັດທະນະທຳ ກິລາ ແລະການທ່ອງທ່ຽວໄດ້ປະສານງານກັບຄະນະໂຄສະນາອົບຮົມສູງກາງ ເພື່ອໃຫ້ຄຳແນະນຳແກ່ກົມການເມືອງສູນກາງ ແລະຄະນະເລຂາທິການສຸນກາງ ຕັດສິນໃຈຈັດຕັ້ງກອງປະຊຸມວັດທະນະທຳແຫ່ງຊາດໃນວັນທີ 24 ພຶດສະພາ 2021, ຄົບຮອບ 75 ປີນັບຕັ້ງແຕ່ວັນທີ່ປະທານ ໂຮ່ຈີມິນ ເປັນປະທານກອງປະຊຸມວັດທະນະທຳແຫ່ງຊາດຄັ້ງທີໜຶ່ງ. ໃນກອງປະຊຸມວັດທະນະທຳແຫ່ງຊາດຄັ້ງປີ 2021, ທ່ານເລຂາທິການໃຫຍ່ ຫງຽນຝູຈ້ອງ ໄດ້ເນັ້ນໜັກຫຼາຍເທື່ອເຖິງຂໍ້ຄວາມທີ່ວ່າ: “ວັດທະນະທຳແມ່ນ ຈິດວິນຍານ ຂອງຊາດ ເຊິ່ງສະແດງເຖິງ ເອກະລັກ ຂອງຊາດ. ຕາບໃດທີ່ວັດທະນະທຳຍັງຄົງຢູ່ ປະເທດຊາດກໍ່ຈະຍັງຄົງຢູ່ ”(1). ຄຳຮຽກຮ້ອງຂອງປະທານໂຮ່ຈີມິນຜູ້ຍິ່ງໃຫຍ່ໃນເມື່ອກ່ອນ ເປັນຄຳເວົ້າທີ່ຈິງໃຈຂອງຫົວໜ້າພັກກອມມູນິດຫວຽດນາມໃນປະຈຸບັນ ແມ່ນການຢືນຢັນທີ່ຕັ້ງ ແລະບົດບາດສຳຄັນຂອງວັດທະນະທຳ ໃນການພັດທະນາປະເທດຫວຽດນາມທີ່ຍືນຍົງ.
ນັບຕັ້ງແຕ່ກອງປະຊຸມວັດທະນະທຳແຫ່ງຊາດຄັ້ງປີ 2021, ອາດຈະເວົ້າໄດ້ວ່າ “ບໍ່ນ້ຳໃຕ້ດິນ” ຕະຫຼອດການໄຫຼວຽນຂອງວັດທະນະທຳຫວຽດນາມ ໄດ້ຮັບການເປີດກວ້າງຢ່າງແທ້ຈິງ. ປະເທດຢູ່ໃນຍາມຫົວລ້ຽວຫົວຕໍ່ທີ່ສຳຄັນທີ່ສຸດ ໃນການພັດທະນາວັດທະນະທຳ. ຂໍ້ຄວາມຈາກ “ກອງປະຊຸມຢຽນໂຮ່ງ” ກ່ຽວກັບວັດທະນະທຳໄດ້ຮັບການເຜີຍແຜ່ຢ່າງແຂງແຮງ. ການເຂົ້າຮ່ວມຂອງບັນດາອົງການພັກແລະລັດ, ທັງສູນກາງແລະທ້ອງຖິ່ນ, ດ້ວຍບັນດາໂຄງການ ແຜນງານ ແລະຊັບພະຍາກອນບຸລິມະສິດ ແມ່ນສັນຍານທີ່ຕັ້ງໜ້າ ສຳລັບການພັດທະນາວັດທະນະທຳ.
ດ້ວຍຄວາມຮັບຮູ້ຢ່າງຈະແຈ້ງເຖິງພາລະກຳ ແລະ ຄວາມຮັບຜິດຊອບຂອງຕົນ, ກະຊວງວັດທະນະທຳ ກິລາ ແລະການທ່ອງທ່ຽວ ໄດ້ເປັນເຈົ້າການແລະຕັ້ງໜ້າ ໃນການປະຕິບັດໜ້າທີ່ບໍລິຫານຄຸ້ມຄອງລັດ ທາງດ້ານວັດທະນະທຳ ຄອບຄົວ ການແອບກຳລັງກາຍ ການກິລາ ແລະການທ່ອງທ່ຽວ, ດ້ວຍຈຸດປະສົງເຂົ້າຮ່ວມໃນການບັນລຸເຖິງຄວາມມຸ່ງມາດປາດຖະໜາຂອງປະເທດ, ກໍ່ສ້າງວັດທະນະທຳແລະຜູ້ຄົນຫວຽດນາມ ໃຫ້ຕອບສະໜອງຄວາມຕ້ອງການໃນການພັດທະນາປະເທດຢ່າງຍືນຍົງ; ພັດທະນາວັດທະນະທຳເທົ່າທຽມກັບເສດຖະກິດ, ການເມືອງ ແລະ ສັງຄົມ, ຕາມຈິດໃຈເນື້ອໃນຂອງມະຕິຕ່າງໆຂອງພັກ.
ປ່ຽນຄວາມຄິດ, ສ້າງຄວາມກ້າວໜ້າທາງວັດທະນະທຳ
ໜຶ່ງໃນຂີດໝາຍທີ່ໂດດເດັ່ນ ແລະ ຮອບດ້ານໃນການເຄື່ອນໄຫວທົ່ວໄປຂອງຂະແໜງວັດທະນະທຳທັງໝົດແມ່ນ ສຸມໃສ່ປ່ຽນແປງໃໝ່ຄວາມຄິດຈາກ “ການເຮັດວັດທະນະທຳ” ໄປເປັນ “ການຄຸ້ມຄອງບໍລິຫານລັດທາງດ້ານວັດທະນະທຳ” ໂດຍກຳນົດການຄຸ້ມຄອງບໍລິຫານລັດຜ່ານເຄື່ອງມືທາງກົດໝາຍ ກົນໄກ ແລະ ນະໂຍບາຍ ເປັນວຽກງານຈຸດສຸມແລະກວມລວມ ເພື່ອ “ປົດລັອກຊັບພະຍາກອນ” ແລະ “ສົ່ງເສີມຄວາມຄິດສ້າງສັນ”; ເພີ່ມທະວີ “ການປັບປຸງ ກໍ່ສ້າງ ແລະ ບູລະນະສະຖາບັນທາງວັດທະນະທຳໃຫ້ສົມບູນແບບ” ເພື່ອຂະຈັດອຸປະສັກດ້ານນະໂຍບາຍ, ໃຊ້ປະໂຫຍດຈາກຊັບພະຍາກອນທາງວັດທະນະທຳ ແລະ ສົ່ງເສີມການເຂົ້າຮ່ວມຢ່າງແຂງຂັນຂອງສັງຄົມ, ສ້າງແຮງຜັກດັນການເສີມຂະຫຍາຍກຳລັງແຮງພາຍໃນຂອງວັດທະນະທຳ... ເຊິ່ງອາດຈະເວົ້າໄດ້ວ່າ ນີ້ແມ່ນປັດໄຈຫຼັກທີ່ສ້າງຄວາມກ້າວໜ້າແລະໂດດເດັ່ນໃນກາງວາລະຂອງຂະແໜງການວັດທະນະທຳ ກິລາ ແລະການທ່ອງທ່ຽວ. ຈິດໃຈແຫ່ງການປ່ຽນແປງໃໝ່ຢ່າງແຮງນັ້ນ ໄດ້ຮັບການຍອມຮັບແລະຕີລາຄາສູງຈາກຜູ້ນຳພັກແລະລັດ.
ໃນຕົ້ນປີ 2022, ພິທີເປີດຂະບວນການ “ກໍ່ສ້າງສະພາບແວດລ້ອມວັດທະນະທຳຮາກຖານ ແລະ ວຽກງານຈັດຕັ້ງພະນັກງານ” ໄດ້ຈັດຂຶ້ນຢູ່ບ້ານເກີດຂອງປະທານໂຮ່ຈີມິນ. ນີ້ກໍ່ແມ່ນການຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XIII ຂອງພັກ ແລະບົດສະຫຼຸບທີ່ກອງປະຊຸມວັດທະນະທຳແຫ່ງຊາດປີ 2021 ໃຫ້ເປັນຮູບປະທຳຢ່າງເປັນເຈົ້າການ ເພື່ອຟື້ນຟູແລະພັດທະນາວັດທະນະທຳຫວຽດນາມ ຕາມທິດທາງກ້າວໜ້າ ແລະອຸດົມໄປດ້ວຍເອກະລັກປະຈຳຊາດ.
ຂະແໜງການວັດທະນະທຳ ກິລາ ແລະການທ່ອງທ່ຽວທັງໝົດ ເຊື່ອໝັ້ນສະເໝີວ່າ: ການເຮັດວັດທະນະທຳບໍ່ສາມາດເຫັນຜົນໄດ້ໃນທັນທີ, ແຕ່ຄວາມພະຍາຍາມທີ່ບໍ່ອິດເໝື່ອຍໃນມື້ນີ້ຈະນຳເອົາ “ໝາກໄມ້ທີ່ຫວານ” ມາໃຫ້ໃນມື້ອື່ນ. ທັດສະນະນັ້ນແລະມຸມມອງນັ້ນ ໄດ້ສະແດງອອກມາໃນແຕ່ລະວຽກງານສະເພາະ, ໃນແຕ່ລະຂັ້ນຕອນຂອງການຫັນປ່ຽນຈາກຄວາມຄິດໄປສູ່ການກະທຳຂອງແຕ່ລະບຸກຄົນ, ແຕ່ລະສ່ວນຂອງ “ລົດໄຟ” ທີ່ຂະແໜງການວັດທະນະທຳ ກິລາ ແລະການທ່ອງທ່ຽວກຳລັງເດີນທາງຢູ່. ຍອມຮັບໂອກາດ, ເບິ່ງກົງໄປທີ່ຄວາມຫຍຸ້ງຍາກ, ດ້ວຍຈິດໃຈດຸເດືອດແລະບໍ່ຫຼົບຫຼີກ, “ອຸດຕັນ” ຢູ່ບ່ອນໃດກໍ່ຈະແກ້ໄຂບ່ອນນັ້ນ.
ໃນເວລາກວ່າໜຶ່ງປີຫຼັງຈາກກອງປະຊຸມວັດທະນະທຳແຫ່ງຊາດຄັ້ງປີ 2021, ໄດ້ມີເຫດການທາງການເມືອງທີ່ສຳຄັນຫຼາຍຢ່າງ, ມີຄວາມສູງແລະຂະໜາດໃຫຍ່ຂອງຂະແໜງການວັດທະນະທຳ ແລະຂົງເຂດວັດທະນະທຳ ໄດ້ຮັບການເຂົ້າຮ່ວມແລະເປັນປະທານຂອງຜູ້ນຳພັກ ແລະ ລັດ. ໃນປີ 2022, ກະຊວງວັດທະນະທຳ ກິລາ ແລະການທ່ອງທ່ຽວ ໄດ້ເປັນເຈົ້າການໃນການໃຫ້ຄຳແນະນຳແລະປະສານງານກັບ ບັນດາຄະນະ ກະຊວງ ຂະແໜງການສູນກາງ, ບັນດາຄະນະກຳມະການຂອງສະພາແຫ່ງຊາດ ເພື່ອຈັດກິດຈະກຳທາງວັດທະນະທຳທີ່ສຳຄັນ 2 ກິດຈະກຳຄື: ກອງປະຊຸມສໍາມະນາ “ລະບົບຄຸນຄ່າຂອງຊາດ, ລະບົບຄຸນຄ່າວັດທະນະທຳ, ລະບົບຄຸນຄ່າຄອບຄົວ ແລະ ມາດຕະຖານຄົນຫວຽດນາມໃນຍຸກໃໝ່” ແລະ ກອງປະຊຸມສຳມະນາ “ສະຖາບັນ ນະໂຍບາຍ ແລະ ຊັບພະຍາກອນເພື່ອການພັດທະນາວັດທະນະທຳ”.
ໃນກອງປະຊຸມສຳມະນາສອງຄັ້ງນີ້, ຜູ້ນຳພັກແລະລັດໄດ້ຮັບຟັງ “ຄຳສະເໜີວິທີການທີ່ສັກສິດ” ແລະ ຄຳແນະນຳທິດທາງກໍ່ສ້າງແລະພັດທະນາຄຸນຄ່າວັດທະນະທຳຫວຽດນາມ ແລະກຳລັງແຮງຂອງຄົນຫວຽດນາມໃນຍຸກໃໝ່. ເພື່ອແນໃສ່ຜັນຂະຫຍາຍທັດສະນະຂອງພັກທີ່ຖືວັດທະນະທຳຕ້ອງເທົ່າທຽມກັບເສດຖະກິດ ການເມືອງ, ບັນດາບັນຫາສຳຄັນດ້ານສະຖາບັນ ນະໂຍບາຍ ແລະ ການພັດທະນາຊັບພະຍາກອນເພື່ອການພັດທະນາວັດທະນະທຳ ຈຶງຖືກຈັດຂຶ້ນໃນກອງປະຊຸມສຳມະນາກ່ຽວກັບວັດທະນະທຳປີ 2022 ແລະ ໄດ້ຮັບການທົບທວນແລະປະເມີນຈາກຫຼາຍດ້ານ. ຈາກນັ້ນ, ຈຶງເຫັນແຈ້ງຄວາມສຳຄັນຂອງການລົງທຶນດ້ານວັດທະນະທຳຢ່າງພຽງພໍ, ຂະຈັດ “ຄໍຂວດ” ໃນສະຖາບັນແລະນະໂຍບາຍ ເພື່ອສ້າງແຮງຜັກດັນຊຸກຍູ້ການພັດທະນາວັດທະນະທຳໃນຍຸກໃໝ່.
ໃນຕົ້ນປີ 2023, ກະຊວງວັດທະນະທຳ ກິລາ ແລະການທ່ອງທ່ຽວ ໄດ້ໃຫ້ຄຳແນະນຳແລະລາຍງານຕໍ່ຄະນະເລຂາທິການ ເພື່ອອະນຸມັດແຜນນະໂຍບາຍການຈັດກິດຈະກຳຕ່າງໆ ເພື່ອສະເຫຼີມສະຫຼອງຄົບຮອບ 80 ປີ ໂຄງຮ່າງວັດທະນະທຳຫວຽດນາມ (ເອີ້ນວ່າ ໂຄງຮ່າງ) ດ້ວຍລາຍການເຄື່ອນໄຫວຕ່າງໆຫຼາຍລາຍການ ຢູ່ສູນກາງເຊິ່ງມີກະຊວງວັດທະນະທຳ ກິລາ ແລະການທ່ອງທ່ຽວເປັນປະທານ ແລະ ກິດຈະກຳຕອບສະໜອງທົ່ວປະເທດທີ່ຈັດໂດຍແຂວງແລະນະຄອນຂຶ້ນກັບສູນກາງ, ຍັງຄົງເປັນເຄື່ອງໝາຍຢືນຢັນຄວາມສຳຄັນຂອງວັດທະນະທຳທີ່ມີຕົ້ນກຳເນີດມາຈາກ ໂຄງຮ່າງ ອັນເປັນປະຫວັດສາດ ທີ່ຮ່າງໂດຍທ່ານເລຂາທິການໃຫຍ່ ເຈື່ອງຈິງ ເມື່ອ 80 ປີກ່ອນ. ແສງສະຫວ່າງແລະແນວຄິດຫຼັກຂອງ ໂຄງຮ່າງ ຫຼັງຈາກແປດທົດສະຫວັດຍັງຄົງສ່ອງແສງ, ເພື່ອໃຫ້ຖັນແຖວພະນັກງານເຮັດວຽກງານວັດທະນະທຳໃນປະຈຸບັນ ສືບຕໍ່ປັບປຸງຄວາມເຊື່ອໝັ້ນ ແຮງຈູງໃຈ ແລະຄວາມຕັດສິນໃຈ ໃນການສ້າງວັດທະນະທຳໃໝ່ ດ້ວຍຄວາມປາດຖະໜາທີ່ຈະຟື້ນຟູ ແລະພັດທະນາວັດທະນະທຳຂອງຊາດ.
ພ້ອມກັນນັ້ນ ໃນໄລຍະກວ່າເຄິ່ງວາລະນີ້, ບັນດາເຄື່ອງໝາຍທີ່ໂດດເດັ່ນຂອງຂະແໜງການຍັງໄດ້ສະແດງອອກຜ່ານບັນດາລາຍການສິລະປະທີ່ເປັນເອກະລັກສະເພາະ, ສ້າງຄວາມປະທັບໃຈທີ່ດີຕໍ່ສາທາລະນະຊົນ, ພ້ອມດ້ວຍການແຂ່ງຂັນ, ງານບຸນສິລະປະ ແລະ ບັນດາລາຍການແນະນຳສິລະປິນທີ່ດີເດັ່ນ..., ປະກອບສ່ວນສ້າງຄວາມຕື່ນເຕັ້ນ ແລະ ຍົກສູງຄວາມເປັນມືອາຊີບ, ນຳຄຸນຄ່າທາງຄວາມງາມສູງມາສູ່ສາທາລະນະ, ຕອບສະໜອງຄວາມຕ້ອງການຂອງປະຊາຊົນໃນການຊົມໃຊ້ສິລະປະ. ເພື່ອສ້າງນະວັດຕະກຳທີ່ກ້າວໜ້າໃນຂົງເຂດວັດທະນະທຳນີ້, ຂະແໜງການທັງໝົດຕ້ອງເປັນເຈົ້າການ ແລະກ້າວຢ່າງໜັກແໜ້ນຜ່ານຜ່າຄວາມທ້າທາຍຫຼາຍປະການ. ໜ່ວຍສິລະປະສ່ວຍໃຫຍ່ໄດ້ມີການປ່ຽນແປງຢ່າງຕັ້ງໜ້າ ໃນການເລືອກແລະການຈັດສະແດງລະຄອນ. ໄດ້ມີການມອບລາງວັນຕ່າງໆເຊັ່ນ ລາງວັນໂຮ່ຈີມິນ, ລາງວັນລະດັບລັດສາຂາວັນນະຄະດີແລະສິລະປະ, ນາມມະຍົດສິລະປິນປະຊາຊົນ ສິລະປິນຜູ້ດີເດັ່ນ ແລະ ມີການຈັດການແຂ່ງຂັນ ແລະງານບຸນຫຼາຍຢ່າງ ເພື່ອຍົກຍ້ອງຄວາມຄິດສ້າງສັນຂອງສິລະປິນ... ມີວັນນະກຳແລະຜົນງານສິລະປະຫຼາຍຢ່າງ ທີ່ມີຄຸນຄ່າສູງທາງດ້ານແນວຄິດ ເນື້ອໃນ ແລະສິລະປະ, ສະທ້ອນບັນຫາທາງສັງຄົມໃນປະຈຸບັນຢ່າງແທ້ຈິງ; ຜ່ານນັ້ນ, ໄດ້ວາງທິດທາງດ້ານຄວາມງາມໃຫ້ຜູ້ຊົມ, ຕອບສະໜອງຄວາມຕ້ອງການຂອງປະຊາຊົນໃນການຊົມໃຊ້ສິລະປະໃນຍຸກໃໝ່.
ໃນດ້ານຄອບຄົວ, ເຄື່ອງໝາຍທີ່ໂດດເດັ່ນທີ່ສຸດໃນການບໍລິຫານລັດແມ່ນ ກະຊວງວັດທະນະທຳ ກິລາ ແລະການທ່ອງທ່ຽວ ໄດ້ສ້າງແລະໃຫ້ຄຳແນະນຳແກ່ລັດຖະບານໃຫ້ສະເໜີຕໍ່ສະພາແຫ່ງຊາດ ເພື່ອປະກາດໃຊ້ກົດໝາຍວ່າດ້ວຍການປ້ອງກັນ ແລະຄວບຄຸມຄວາມຮຸນແຮງໃນຄອບຄົວ (ຜ່ານວັນທີ 14 ພະຈິກ 2022 ໃນກອງປະຊຸມຄັ້ງທີສີ່ ສະພາແຫ່ງຊາດຊຸດທີ XV ໂດຍມີຜົນຕັ້ງແຕ່ວັນທີ 1 ກໍລະກົດ 2023). ກົດໝາຍມີຈຸດໃໝ່ທີ່ກ້າວໜ້າຫຼາຍປະການ ເຊິ່ງໄດ້ແກ້ໄຂຜ່ານຜ່າຂໍ້ຈຳກັດຂອງກົດໝາຍທີ່ປະກາດໃຊ້ໃນປີ 2007; ໃນນັ້ນ ສຸມໃສ່ການຊ່ວຍເຫຼືອຜູ້ທຸກທໍລະມານຈາກຄວາມຮຸນແຮງໃນຄອບຄົວ, ໂດຍສະເພາະ ຜູ້ທີ່ມີຄວາມສ່ຽງໃນຄອບຄົວ; ເງື່ອນໄຂເພື່ອຮັບປະກັນການປ້ອງກັນ ແລະ ຄວບຄຸມຄວາມຮຸນແຮງໃນຄອບຄົວ.
ຍົກສູງຊື່ສຽງ ແລະ ທີ່ຕັ້ງຂອງກິລາຫວຽດນາມ ໃນເວທີສາກົນ
ໃນດ້ານກິລາ, ກະຊວງວັດທະນະທຳ ກິລາ ແລະການທ່ອງທ່ຽວ ຍາມໃດກໍ່ກຳນົດທິດຊີ້ນຳແມ່ນ ການພັດທະນາກິລາໂດຍອີງໃສ່ 2 ເສົາຄ້ຳຄື: ກິລາມວນຊົນ ແລະ ກິລາສະມັດຖະນະສູງ; ແຕ່ລະສະໜາມແມ່ນສະຖານທີ່ຕັ້ງທີ່ເສີມສ້າງເຊິ່ງກັນແລະກັນ, ສົ່ງເສີມແລະປະຕິສໍາພັນເພື່ອໃຫ້ກິລາມວນຊົນກາຍເປັນຮາກຖານສໍາລັບກິລາທີ່ມີສະມັດຖະນະສູງ, ຈາກນັ້ນ ສາມາດຄົ້ນພົບຄວາມສາມາດຈຳນວນຫຼາຍ ແລະຈາກກິລາທີ່ມີສະມັດຖະພາບສູງດ້ວຍນັກກິລາທີ່ດີເດັ່ນຈະກັບຄືນມາ ສ້າງແຮງຈູງໃຈ ແລະ ຊຸກຍູ້ການພັດທະນາກິລາມວນຊົນ.
ທິດນຳການດຳເນີນງານນີ້ ໄດ້ຮັບການປະຕິບັດຢ່າງມີປະສິດທິຜົນ ໂດຍຂະແໜງການກິລາຫວຽດນາມ. ໃນເວລາທີ່ຜ່ານມາ, ດ້ວຍຄວາມຕັ້ງໃຈ ແລະ ຄວາມມານະພະຍາຍາມຂອງທົ່ວຂະແໜງການ, ຂົງເຂດການແອບກຳລັງກາຍແລະການກິລາ ໄດ້ບັນລຸຜົນງານທີ່ສຳຄັນຫຼາຍຢ່າງ; ໃນນັ້ນ, ຂະບວນການກິລາສຳລັບທຸກຄົນນັບມື້ນັບຂະຫຍາຍກວ້າງ. ຕາມສະຖິຕິຂອງກະຊວງວັດທະນະທຳ ກິລາ ແລະການທ່ອງທ່ຽວ, ໃນປີ 2022 ປະຊາຊົນ 35,6% ຫຼິ້ນກິລາເປັນປະຈຳ ແລະ 26,7% ຂອງຄອບຄົວຝຶກແອບກຳລັງກາຍ ແລະຫຼິ້ນກິລາເປັນປະຈຳໃນທົ່ວປະເທດ. ສິ່ງນີ້ສະທ້ອນໃຫ້ເຫັນຢ່າງຈະແຈ້ງວ່າ ປະຊາຊົນມີຄວາມສົນໃຈໃນການແອບກຳລັງກາຍ, ກິລາ ແລະການດູແລຕົນເອງຫຼາຍຂຶ້ນ.
ໃນດ້ານຜົນງານທີ່ໂດດເດັ່ນຂອງກິລາມວນຊົນ, ບໍ່ອາດຈະບໍ່ກ່າວເຖິງບົດບາດຂອງການຄຸ້ມຄອງແລະຊີ້ນຳໃຫ້ຂະແໜງການ ແລະທ້ອງຖິ່ນ ໃນການຈັດຕັ້ງການແຂ່ງຂັນກິລາກາຍຍະກຳໃນທຸກລະດັບ ມຸ່ງສູ່ງານມະຫາກຳກິລາແຫ່ງຊາດ ຄັ້ງທີ 9 ປີ 2022. ຕາມຂໍ້ມູນຈາກກະຊວງວັດທະນະທຳ ກິລາ ແລະການທ່ອງທ່ຽວ, ມີຕາແສງ ຄຸ້ມເມືອງ ຕົວເມືອງນ້ອຍ 9.374 ແຫ່ງ ແລະ 681 ເມືອງຈັດງານມະຫາກຳພະລະສຶກສາແລະກິລາທຸກລະດັບ; 62 ທ້ອງຖິ່ນຈັດງານມະຫາກຳກິລາປະຈຳແຂວງ. ພິເສດ, ຜົນສຳເລັດຂອງງານມະຫາກຳກິລາແຫ່ງຊາດຄັ້ງທີ 9 ຖືວ່າແມ່ນໂອກາດສຳຄັນເພື່ອໃຫ້ກິລາຫວຽດນາມ ກວດກາຄືນກຳລັງແຮງກະກຽມໃຫ້ແກ່ງານມະຫາກຳກິລາຊີເກມ, ເອຊຽນເກມ ແລະ ໂອລິມປິກ. ນີ້ຍັງແມ່ນງານມະຫາກຳກິລາໃຫຍ່ທີ່ສຸດທີ່ເຄີຍມີມາ, ຢູ່ສະຖານທີ່ເຈົ້າພາບຫຼັກຂອງແຂວງກວ໋າງນິງ ແລະ 10 ແຂວງ ນະຄອນອື່ນໆ ທີ່ມີນັກກິລາເຂົ້າຮ່ວມປະມານ 10.000 ຄົນ, ແຂ່ງຂັນກິລາ 43 ລາຍການ. ຜົນສຳເລັດຂອງກິລາຫວຽດນາມໃນໄລຍະມໍ່ໆມານີ້ ໂດດເດັ່ນເປັນພິເສດແມ່ນງານມະຫາກຳກິລາຊີເກມ 2 ຄັ້ງທີ່ຈັດຂຶ້ນຕິດຕໍ່ກັນໃນປີ 2022-2023. ຜ່ານຜ່າສິ່ງທ້າທາຍນັບບໍ່ຖ້ວນຈາກການແຜ່ລະບາດຂອງພະຍາດໂຄວິດ-19, ຫວຽດນາມໄດ້ຈັດຕັ້ງງານມະຫາກຳກິລາຊີເກມ ຄັ້ງທີ 31 ຢ່າງສຳເລັດຜົນ, ໂດຍໄດ້ຮັບການຕີລາຄາສູງຈາກເພື່ອນມິດສາກົນ ໃນການຈັດຕັ້ງການດຳເນີນການ ແລະ ສ້າງຂີດໝາຍຄວາມຊ່ຽວຊານຂອງຕົນ ດ້ວຍໄຊຊະນະອັນໜ້າເຊື່ອຂອງເຈົ້າພາບຫວຽດນາມ(2). ໃນຊິເກມຄັ້ງທີ 32 (ຈັດຂຶ້ນທີ່ກຳປູເຈຍ), ຫວຽດນາມສືບຕໍ່ນຳໜ້າພາກພື້ນ(3). ຜົນສຳເລັດຂອງຊີເກມ 2 ຄັ້ງຕິດຕໍ່ກັນ ໄດ້ຍົກລະດັບຕຳແໜ່ງ ແລະຊື່ສຽງຂອງກິລາຫວຽດນາມໃນເວທີສາກົນ.
ຢືນຢັນທີ່ຕັ້ງຂອງຂະແໜງການທ່ອງທ່ຽວໃນພື້ນຖານເສດຖະກິດຫວຽດນາມ
ໃນສະພາບການເສດຖະກິດໃນປະເທດແລະທົ່ວໂລກ ຖືກຜົນກະທົບຢ່າງໜັກຈາກການແຜ່ລະບາດຂອງພະຍາດໂຄວິດ-19, ກະຊວງວັດທະນະທຳ ກິລາ ແລະການທ່ອງທ່ຽວໄດ້ລະບຸທັງໂອກາດແລະຄວາມທ້າທາຍທີ່ເກີດຈາກພຶດຕິກຳຕົວຈິງໂດຍທັນທີ່, ຈາກນັ້ນ ໄດ້ໃຫ້ຄຳແນະນຳແລະສະເໜີຕໍ່ລັດຖະບານ ແລະກະຊວງ ຂະແໜງການຕ່າງໆ ເພື່ອອອກນະໂຍບາຍຕ່າງໆ ເພື່ອສະໜັບສະໜູນວິສາຫະກິດ ແລະຜູ້ອອກແຮງງານໃນຂະແໜງການທ່ອງທ່ຽວ, ທັງຊີ້ນຳຢ່າງທັນການແລະຮຸນແຮງ ເພື່ອຟື້ນຟູແລະພັດທະນາຂະແໜງການທ່ອງທ່ຽວຢ່າງຍືນຍົງ. ຄຽງຄູ່ກັບບັນດາໜ້າທີ່ປະຈຳປີ, ຂະແໜງການທ່ອງທ່ຽວຍັງວິທີເຂົ້າເຖິງໃໝ່ ເປົ້າໝາຍໃໝ່ ແລະ ຮູບແບບທີ່ແຕກຕ່າງກັນ, ວາງຮາກຖານການພັດທະນາການທ່ອງທ່ຽວຕະຫຼອກໄລຍະເວລາ 5 ປີ 2021-2025 ຕາມຈິດໃຈມະຕິກອງປະຊຸມໃຫຍ່ຄັ້ງທີ XIII ຂອງພັກ.
ຫຼັງຈາກຄວບຄຸມການແຜ່ລະບາດຂອງພະຍາດໂຄວິດ-19 ໄດ້, ຂະແໜງການທ່ອງທ່ຽວກໍ່ຄ່ອຍໆຟື້ນຕົວ ໂດຍຄ່ອຍໆຜ່ອນຄາຍມາດຕະການຈຳກັດການເດີນທາງແຕ່ທ້າຍປີ 2021. ພິເສດ, ຕັ້ງແຕ່ວັນທີ 15 ມີນາ 2022 ຫວຽດນາມໄດ້ກັບມາເປີດກິດຈະກຳການທ່ອງທ່ຽວພາຍໃຕ້ສະພາບປົກກະຕິໃໝ່ ຢູ່ບັນດາດ່ານຊາຍແດນ, ທາງຖະໜົນ, ທາງທະເລ, ທາງລົດໄຟ ແລະ ທາງອາກາດ. ຫວຽດນາມໄດ້ຮັບການພິຈາລະນາຈາກອົງການການທ່ອງທ່ຽວໂລກ (UNWTO) ໃຫ້ເປັນໜຶ່ງໃນປະເທດທີ່ມີນະໂຍບາຍເປີດກວ້າງຫຼາຍທີ່ສຸດໃນໂລກ; ເປັນໜຶ່ງໃນ 5 ປະເທດໃນພາກພື້ນອາຊີ-ປາຊີຟິກ ແລະເປັນປະເທດທຳອິດໃນອາຊີຕາເວັນອອກສຽງໃຕ້ ທີ່ເປີດການທ່ອງທ່ຽວເຕັມຮູບແບບ.
ການສ້າງນະໂຍບາຍເພື່ອພັດທະນາການທ່ອງທ່ຽວແບບຍືນຍົງຍັງເປັນເຄື່ອງໝາຍທີ່ໂດດເດັ່ນຂອງຂະແໜງການວັດທະນະທຳ ກິລາ ແລະການທ່ອງທ່ຽວທັງໝົດ. ກະຊວງວັດທະນະທຳ ກິລາ ແລະການທ່ອງທ່ຽວໄດ້ມີການປ່ຽນແປງໃໝ່ຫຼາຍຢ່າງ ໃນວຽກງານຊີ້ນຳ ແລະບໍລິຫານ ໂດຍສຸມໃສ່ການຄົ້ນຄວ້າ ແລະປ່ຽນແປງແນວຄິດການຄຸ້ມຄອງບໍລິຫານຢ່າງແຮງ; ເປັນເຈົ້າການໃນການໃຫ້ຄຳແນະນຳແກ່ສະພາແຫ່ງຊາດ ແລະລັດຖະບານ ໃນການປະກາດໃຊ້ນະໂຍບາຍ ແລະວິທີແກ້ໄຂ ເພື່ອຟື້ນຟູແລະພັດທະນາການທ່ອງທ່ຽວຢ່າງຮອບດ້ານແລະຍືນຍົງ. ກະຊວງວັດທະນະທຳ ກິລາ ແລະການທ່ອງທ່ຽວຍັງໄດ້ຄົ້ນຄວ້າ ໃຫ້ຄຳແນະນຳ ແລະສະເໜີໃຫ້ຂະຈັດບັນຫາຄໍຂວດໃນກົນໄກແລະນະໂຍບາຍ ເພື່ອສ້າງເງື່ອນໄຂທີ່ເອື້ອອຳນວຍໃນການດຶງດູດນັກທ່ອງທ່ຽວຕ່າງຊາກ; ພ້ອມກັນນັ້ນ, ສືບຕໍ່ເນັ້ນໜັກເຖິງບົດບາດຂອງການທ່ອງທ່ຽວພາຍໃນປະເທດ, ຖືການທ່ອງທ່ຽວພາຍໃນປະເທດເປັນຖານໃນສະພາບທີ່ຫວຽດນາມຄ່ອຍໆຟື້ນແຮງຜັກດັນການເຕີບໂຕໃນຕະຫຼາດສາກົນ. ໃນກອງປະຊຸມສົ່ງເສີມແຫຼ່ງທ່ອງທ່ຽວລະຫວ່າງປະເທດສູ່ຫວຽດນາມ (ເດືອນທັນວາ 2022) ແລະກອງປະຊຸມແຫ່ງຊາດດ້ານການທ່ອງທ່ຽວ (ເດືອນມີນາ 2023), ລັດຖະມົນຕີກະຊວງວັດທະນະທຳ ກິລາ ແລະການທ່ອງທ່ຽວ ໃນນາມຂອງຂະແໜງການທ່ອງທ່ຽວ ຍັງໄດ້ສະເໜີແນວທາງແກ້ໄຂຕໍ່ລັດຖະບານ ເພື່ອຂະຈັດບັນຫາຄໍຂວດ ແລະສ້າງກົນໄກທີ່ເປີດກ້ວາງ ແລະເອື້ອອຳນວຍຕໍ່ການພັດທະນາ ເຊິ່ງສະເໜີໃຫ້ມີການປະກາດໃຊ້ກົນໄກແລະນະໂຍບາຍທີ່ມີລັກສະນະສະເພາະ; ນະໂຍບາຍວີຊ່າແບບເປີດ; ຈັດຕັ້ງໂຄງການສົ່ງເສີມການຂະຫຍາຍແລະໂຄສະນາຢ່າງເປັນມືອາຊີບ ແລະມີປະສິດທິຜົນ ຢູ່ບັນດາຕະຫຼາດທີ່ສຳຄັນເຊັ່ນ: ເກົາຫຼີ, ຍີ່ປຸ່ນ, ເອີຣົບ, ຈີນ... ຜູ້ນຳກະຊວງວັດທະນະທຳ ກິລາ ແລະການທ່ອງທ່ຽວ ຍັງຊີ້ນຳຂະແໜງການທ່ອງທ່ຽວທັງໝົດ ໃຫ້ເອົາໃຈໃສ່ການປະຕິບັດໜ້າທີ່ແລະການແກ້ບັນຫາ ທີ່ກຳນົດໄວ້ໃນມະຕິໝາຍເລກ 08-NQ/TW ລົງວັນທີ 16 ມັງກອນ 2017 ຂອງກົມການເມືອງສູນກາງພັກກ່ຽວກັບ “ການພັດທະນາການທ່ອງທ່ຽວໃຫ້ກາຍເປັນຂະແໜງເສດຖະກິດຫົວຫອກ”, ບັນດາມະຕິສະເພາະຂອງສູນກາງກ່ຽວກັບການພັດທະນາພາກພື້ນ, ສຸມໃສ່ເສີມຂະຫຍາຍຄວາມສາມາດບົ່ມຊ້ອນ ແລະທ່າແຮງ ເພື່ອພັດທະນາແລະຍົກສູງທີ່ຕັ້ງຂອງຂະແໜງການທ່ອງທ່ຽວຫວຽດນາມໃນໄລຍະໃໝ່ ບົນພື້ນຖານປົກປັກຮັກສາ ແລະເສີມຂະຫຍາຍຄຸນຄ່າຂອງ ຊັບພະຍາກອນທຳມະຊາດ ຊັບພະຍາກອນປະຫວັດສາດ ແລະ ວັດທະນະທຳ...; ພ້ອມກັນນັ້ນ, ໃຫ້ຮີບປະຕິບັດແຜນການປະຕິບັດງານ ແລະຜັນຂະຫຍາຍມະຕິໝາຍເລກ 82/NQ-CP ລົງວັນທີ 18 ພຶດສະພາ 2023 ຂອງລັດຖະບານ ກ່ຽວກັບ “ໜ້າທີ່ ແລະວິທີແກ້ໄຂຕົ້ນຕໍ ເພື່ອຊຸກຍູ້ການຟື້ນຟູ ແລະ ເລັ່ງການພັດທະນາການທ່ອງທ່ຽວຢ່າງມີປະສິດທິຜົນແລະຍືນຍົງ” ເພື່ອໃຫ້ຂະແໜງການທ່ອງທ່ຽວສາມາດເລັ່ງການຟື້ນຕົວແລະພັດທະນາຢ່າງມີຈຸດໜັກໃຈກາງ, ແລະກາຍເປັນຂະແໜງການເສດຖະກິດຫົວຫອກທີ່ແທ້ຈິງ, ໃນກຸ່ມ 30 ປະເທດໃນໂລກທີ່ມີຄວາມສາມາດໃນການແຂ່ງຂັນດ້ານການທ່ອງທ່ຽວຊັ້ນນຳ. ຍ້ອນຄວາມມານະພະຍາຍາມດັ່ງກ່າວ, ໃນປີ 2022 ແລະ 2023, ຂະແໜງການທ່ອງທ່ຽວ ບັນລຸໄດ້ບັນດາໝາກຜົນທີ່ໜ້າຊົມເຊີຍ. ຕາມຂໍ້ມູນຈາກກົມໃຫຍ່ການທ່ອງທ່ຽວຫວຽດນາມ, ປີ 2022, ຈໍານວນນັກທ່ອງທ່ຽວສາກົນເຂົ້າມາປະເທດຫວຽດນາມບັນລຸປະມານ 3,5 ລ້ານຄົນ, ຈໍານວນນັກທ່ອງທ່ຽວໃນປະເທດທັງໝົດ ຄາດວ່າປະມານ 101,3 ລ້ານຄົນ; ລາຍໄດ້ຈາກການທ່ອງທ່ຽວທັງໝົດປະມານ 495.000 ຕື້ດົ່ງ. ຕາມລາຍງານຂອງກົມໃຫຍ່ສະຖິຕິ, ໃນ 9 ເດື່ອຕົ້ນປີ 2023, ຈໍານວນນັກທ່ອງທ່ຽວສາກົນເຂົ້າມາໃນຫວຽດນາມບັນລຸເກືອບ 8,9 ລ້ານຄົນ (ເກີນ 111% ຂອງແຜນການທີ່ວາງໄວ້)(4). ໃນພິທີມອບລັງວັນ World Travel Awards ປະຈຳປີ 2022 - ພາກພື້ນອາຊີ ແລະ ໂອເຊຍເນຍ, ການທ່ອງທ່ຽວຫວຽດນາມໄດ້ຮັບລາງວັນການທ່ອງທ່ຽວເຖິງ 16 ລາງວັນ, ເຊິ່ງສືບຕໍ່ຢືນຢັນຍີ່ຫໍ້ ບົດບາດ ແລະ ທີ່ຕັ້ງຂອງການທ່ອງທ່ຽວຫວຽດນາມ ໃນພາກພື້ນ ແລະ ໃນໂລກ.
ປະຈຸບັນ, ກະຊວງວັດທະນະທຳ ກິລາ ແລະການທ່ອງທ່ຽວ ພວມເລັ່ງລັດກໍ່ສ້າງ ແລະປັບປຸງໃຫ້ສົມບູນ ເພື່ອຍື່ນຕໍ່ອົງການທີ່ມີອຳນາດເພື່ອປະກາດໃຊ້ “ໂຄງການເປົ້າໝາຍແຫ່ງຊາດກ່ຽວກັບການຟື້ນຟູ ແລະ ພັດທະນາວັດທະນະທຳ ແລະ ສ້າງຄົນຫວຽດນາມໃນໄລຍະປີ 2026-2030, ວິໄສທັດຮອດປີ 2045”. ນີ້ແມ່ນໂຄງການສຳຄັນທີ່ສ້າງແຮງຜັກດັນ ແລະຊັບພະຍາກອນ ເພື່ອການພັດທະນາວັດທະນະທຳ ໃນການພັດທະນາປະເທດຢ່າງຍືນຍົງ. ນັ້ນກໍ່ແມ່ນເປົ້າໝາຍສຳຄັນໃນການສ້າງວັດທະນະທຳຫວຽດນາມທີ່ກ້າວໜ້າ ແລະອຸດົມໄປດ້ວຍເອກະລັກປະຈຳຊາດ. ນັ້ນກໍ່ເປັນວິທີໜຶ່ງໃນການປົກປ້ອງປະເທດຊາດຕັ້ງແຕ່ຕົ້ນແລະຈາກໄລຍະໄກ ດັງທີ່ທ່ານເລຂາທິການໃຫຍ່ ຫງວຽນຝູຈ້ອງ ຢືນຢັນໄວ້ວ່າ “ຕາບໃດທີ່ວັດທະນະທຳຍັງຄົງຢູ່ ປະເທດຊາດກໍ່ຈະຍັງຄົງຢູ່”./.
-------------------
(1) ຫງວຽນຝູຈ້ອງ: “ອອກແຮງກໍ່ສ້າງ ຮັກສາ ແລະ ເສີມຂະຫຍາຍບັນດາຄຸນຄ່າທີ່ໂດດເດັ່ນຂອງວັດທະນະທຳຫວຽດນາມທີ່ກ້າວໜ້າ ແລະອຸດົມໄປດ້ວຍເອກະລັກປະຈຳຊາດ”, ວາລະສານກອມມູນິດ ສະບັບທີ 979 (ເດືອນທັນວາ 2021), ໜ້າ 3
(2) ໃນງານມະຫາກຳກິລາຊີເກມຄັ້ງທີ 31, ຫວຽດນາມນຳໜ້າໃນຕາຕະລາງຄະແນນລວມ ດ້ວຍ 205 ຫຼຽນຄຳ, 125 ຫຼຽນເງິນ 116 ຫຼຽນທອງແດງ
(3) ໃນງານມະຫາກຳກິລາຊີເກມຄັ້ງທີ 32 (ຈັດຂຶ້ນທີ່ກຳປູເຈຍ), ຫວຽດນາມສືບຕໍ່ນຳໜ້າພາກພື້ນ ດ້ວຍ 136 ຫຼຽນຄຳ, 105 ຫຼຽນເງິນ, 118 ຫຼຽນທອງແດງ.
(4) ເບິ່ງ: “ການທ່ອງທ່ຽວຫວຽດນາມມີພື້ນຖານເພື່ອຕ້ອນຮັບນັກທ່ອງທ່ຽວສາກົນປະມານ 13 ລ້ານຄົນໃນປີ 2023”, ໜັງສືພິມປະຊາຊົນເອເລັກໂຕຣນິກ, ວັນທີ 10 ຕຸລາ 2023, https://nhandan.vn/du-lich-viet-nam-co-co-so-de-don-khoang-13-trieu-khach-quoc-te-nam-2023-post776817.html
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1030 (ເດືອນມັງກອນ 2024)
