ການກໍ່ສ້າງກອງທັບທີ່ຊຳນານການຮົບ ກະທັດລັດ ເຂັ້ມແຂງ
ກ້າວສູ່ຄວາມທັນສະໄໝ, ຕອບສະໜອງຄວາມຕ້ອງການຂອງພາລະກິດ
ການສ້າງສາ ແລະ ປົກປັກຮັກສາປະເທດຊາດ ໃນສະພາບການໃໝ່
ກ້າວສູ່ຄວາມທັນສະໄໝ, ຕອບສະໜອງຄວາມຕ້ອງການຂອງພາລະກິດ
ການສ້າງສາ ແລະ ປົກປັກຮັກສາປະເທດຊາດ ໃນສະພາບການໃໝ່
ໃນເວລາທີ່ມີຊີວິດຢູ່, ປະທານ ໂຮ່ຈີມິນ ເຄີຍຊີ້ແຈງວ່າ: “ພວກເຮົາຕ້ອງອອກແຮງກໍ່ສ້າງກອງທັບຂອງພວກເຮົາໃຫ້ເປັນກອງທັບປະຊາຊົນທີ່ເຂັ້ມແຂງແຮງກ້າ, ເປັນກອງທັບປະຕິວັດທີ່ກ້າວໄປສູ່ຄວາມເປັນແບບຫຼວງ ແລະ ທັນສະໄໝ, ເພື່ອຮັກສາສັນຕິພາບ ແລະ ປົກປັກຮັກສາປະເທດຊາດ”(1). ມະຕິກອງປະຊຸມໃຫຍ່ຄັ້ງທີ 13 ຂອງພັກໄດ້ຢືນຢັນ: “ກໍ່ສ້າງກອງທັບປະປະຊາຊົນ, ຕຳຫຼວດປະຊາຊົນທີ່ປະຕິວັດ, ເປັນແບບຫຼວງ, ຊຳນານການຮົບ, ທັນສະໄໝເທື່ອລະກ້າວ, ບາງເຫຼົ່າທັບ ເຫຼົ່າທະຫານ ກອງກຳລັງຈະກ້າວສູ່ຄວາມທັນສະໄໝໂດຍກົງ. ຮອດປີ 2025, ໂດຍພື້ນຖານແລ້ວ ກໍ່ສ້າງກອງທັບປະຊາຊົນ, ຕຳຫຼວດປະຊາຊົນ ໃຫ້ມີຄວາມຊຳນານການຮົບ ກະທັດລັດ ເຂັ້ມແຂງ, ສ້າງເງື່ອນໄຂເບື້ອງຕົ້ນທີ່ໝັ້ນຄົງ, ສູ້ຊົນເພື່ອຮອດປີ 2030 ກໍ່ສ້າງກອງທັບປະຊາຊົນ, ຕຳຫຼວດປະຊາຊົນ ທີ່ປະຕິວັດ, ເປັນແບບຫຼວງ, ຊຳນານການຮົບ ແລະ ທັນສະໄໝ”(2).
ເພື່ອສ້າງກອງທັບທີ່ທັນສະໄໝ, ໃນຊຸມປີທີ່ຜ່ານມາ, ຂະແໜງອຸດສາຫະກໍາປ້ອງກັນປະເທດໄດ້ຮັບການພັດທະນາເທື່ອລະກ້າວ ຕາມທິດທາງທັນສະໄໝແລະນໍາໃຊ້ໄດ້ໃນສອງດ້ານ, ຕອບສະໜອງຄວາມຕ້ອງການດ້ານອາວຸດແລະອຸປະກອນເຕັກນິກສ່ວນໜຶ່ງ ໃຫ້ກອງກຳລັງປະກອບອາວຸດ ແລະ ປະກອບສ່ວນອັນຕັ້ງໜ້າ ເຂົ້າໃນພາລະກິດການຫັນປະເທດເປັນອຸດສາຫະກຳ ແລະທັນສະໄໝ. ໃນນັ້ນ, ຄົ້ນຄວ້າ, ອອກແບບ, ເປັນເຈົ້າເຕັກໂນໂລຊີການປະດິດ ແລະ ຜະລິດອາວຸດຍຸດທະສາດທີ່ຈຳເປັນ ສຳລັບການປ້ອງກັນປະເທດ; ຄ່ອຍໆຮັບປະກັນມີປະລິມານພຽງພໍ, ຍົກສູງຄຸນນະພາບ, ສະໜອງອາວຸດແລະອຸປະກອນເຕັກນິກຢ່າງທັນການ ໃຫ້ບັນດາກົມກອງທີ່ເຮັດໜ້າທີ່ຝຶກອົບຮົມ, ກຽມພ້ອມສູ້ຮົບປົກປັກຮັກສາທະເລແລະເກາະ,... ຜົນງານເຫຼົ່ານີ້ແມ່ນເງື່ອນໄຂເບື້ອງຕົ້ນທີ່ສຳຄັນທີ່ສຸດ ເພື່ອສືບຕໍ່ຍູ້ແຮງການກໍ່ສ້າງກອງທັບທີ່ປະຕິວັດ ເປັນແບບຫຼວງ ຊຳນານໃນການຮົບ ແລະ ທັນສະໄໝເທື່ອລະກ້າວ, ໃຫ້ບຸລິມະສິດການຫັນເປັນທັນສະໄໝໃນບາງເຫຼົ່າທັບ ເຫຼົ່າທະຫານ ກອງກຳລັງ; ພ້ອມກັນນັ້ນ, ສ້າງເງື່ອນໄຂເບື້ອງຕົ້ນທີ່ໝັ້ນຄົງ ເພື່ອສູ້ຊົນຮອດປີ 2030 ສ້າງກອງທັບປະຊາຊົນທີ່ທັນສະໄໝ, ຕອບສະໜອງຄວາມຕ້ອງການແລະໜ້າທີ່ປົກປັກຮັກສາປະເທດຊາດ ໃນສະພາບການໃໝ່.
ໃນຊຸມປີຂ້າງໜ້າ, ຄາດວ່າ ສະພາບການຂອງໂລກແລະພາກພື້ນ, ທ່າອ່ຽງສັນຕິພາບ, ການຮ່ວມມື ແລະ ການພັດທະນາ ຍັງຄົງເປັນກະແສຫຼັກ, ແຕ່ສະພາບການຍັງມີການຜັນຜວນທີ່ສັບສົນ. ການແຂ່ງຂັນທາງຍຸດທະສາດລະຫວ່າງບັນດາປະເທດໃຫຍ່, ການປະທະກັນໃນທ້ອງຖິ່ນ, ຂໍ້ພິພາດກ່ຽວກັບອະທິປະໄຕໃນດິນແດນ, ໂດຍສະເພາະ ຂໍ້ພິພາດກ່ຽວກັບອະທິປະໄຕໃນທະເລແລະເກາະ,... ມີຄວາມສັບສົນແລະຮຸນແຮງຫຼາຍຂຶ້ນ. ການປະຕິວັດອຸດສາຫະກຳຄັ້ງທີສີ່ ເຮັດໃຫ້ເກີດມີອາວຸດໃໝ່ຫຼາຍຊະນິດ; ພ້ອມກັນນັ້ນ, ສົງຄາມໂດຍໃຊ້ອາວຸດເຕັກໂນໂລຊີສູງ ແລະ ສົງຄາມແບບບໍ່ສຳຜັດ ກໍເກີດຂຶ້ນນັບມື້ນັບຫຼາຍ. ບັນດາບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ, ໂດຍສະເພາະ ຄວາມປອດໄພເຄືອຂ່າຍ, ການກໍ່ການຮ້າຍ, ອາຊະຍາກຳຂ້າມຊາດ, ໄພທຳມະຊາດ, ໂລກລະບາດ,... ນັບມື້ນັບສັບສົນ.
ສຳລັບຫວຽດນາມ, ພາຍຫຼັງ 35 ປີແຫ່ງການປ່ຽນແປງໃໝ່, ກຳລັງຊ້ອນແຝງ ຖານະບົດບາດ ແລະ ກຽດຊື່ສຽງສາກົນຂອງຫວຽດນາມ ໄດ້ຮັກບການຍົກສູງຂຶ້ນຢ່າງບໍ່ຢຸດຢັ້ງ, ສ້າງເງື່ອນໄຂເບື້ອງຕົ້ນທີ່ສຳຄັນ ເພື່ອພັດທະນາປະເທດຢ່າງແຂງແຮງແລະຍືນຍົງໃນໄລຍະຕໍ່ໄປ. ຢ່າງໃດກໍຕາມ, ຫວຽດນາມກໍຍັງປະສົບກັບຄວາມຫຍຸ້ງຍາກແລະສິ່ງທ້າທາຍຫຼາຍປະການ. ບັນດາກຳລັງສັດຕູ ປະຕິການ ແລະພາກສ່ວນສວຍໂອກາດທາງການເມືອງ ພວມເພີ່ມທະວີການເຄື່ອນໄຫວຕໍ່ຕ້ານພັກ ລັດ ແລະ ກອງທັບຂອງພວກເຮົາ ດ້ວຍຍຸດທະສາດ “ຜັນປ່ຽນໂດຍສັນຕິ”, ຊຸກຍູ້ “ການປ່ຽນແປງຕົນເອງ”, “ການຫັນປ່ຽນຕົນເອງ”, ເຮັດໃຫ້ກອງທັບ “ບໍ່ກ່ຽວຂ້ອງກັບການເມືອງ”,... ດ້ວຍກົນອຸບາຍແລະເລ່ຫຼ່ຽມທີ່ເລິກແລບແນບນຽນ, ໂຫດຮ້າຍ, ຍາກທີ່ຈະລະບຸ. ສະຖານະການຂ້າງເທິງນີ້ ໄດ້ວາງຄວາມຮຽກຮ້ອງຕ້ອງການ, ຂໍ້ກຳນົດໃໝ່ທີ່ສູງຫຼາຍ ສຳລັບພາລະກິດການກໍ່ສ້າງກອງທັບ, ປັບປຸງການປ້ອງກັນປະເທດ ແລະ ປົກປັກຮັກສາປະເທດຊາດ.
ເພື່ອກໍ່ສ້າງກອງທັບປະຊາຊົນທີ່ຊຳນານການຮົບ ກະທັດລັດ ເຂັ້ມແຂງ ກ້າວສູ່ຄວາມທັນສະໄໝນັ້ນ ຈຳເປັນຕ້ອງຊາບຊຶມຢ່າງເລິກເຊິ່ງ ແລະ ປະຕິບັດບັນດານເນື້ອໃນຕໍ່ໄປນີ້ຢ່າງມີປະສິດທິຜົນ:
ທີໜຶ່ງ, ຊາບຊຶມແລະປະຕິບັດຢ່າງເຂັ້ມງວດແລະມີປະສິດທິຜົນ ມະຕິກອງປະຊຸມໃຫຍ່ຄັ້ງທີ 13 ຂອງພັກ, ມະຕິຂອງກົມການເມືອງສູນກາງພັກ, ມະຕິຂອງຄະນະພັກການທະຫານສູງກາງ ກ່ຽວກັບການກໍ່ສ້າງກອງທັບໃຫ້ມີຄວາມຊຳນານໃນການຮົບ ກະທັດລັດ ເຂັ້ມແຂງ.
ນີ້ແມ່ນເນື້ອໃນທີ່ກວມລວມ, ຊີ້ນຳຕະຫຼອດທັງໝົດ ແລະ ມີຄວາມໝາຍຕັດສິນຊີ້ຂາດຕໍ່ການປະຕິບັດເປົ້າໝາຍກໍ່ສ້າງກອງທັບທີ່ຊຳນານການຮົບ ກະທັດລັດ ເຂັ້ມແຂງ ກ້າວສູ່ຄວາມທັນສະໄໝ, ຮັບປະກັນໃຫ້ກອງທັບມີຄຸນນະພາບສັງລວມດີ, ມີກຳລັງແຮງສູ້ຮົບນັບມື້ນັບສູງ, ຕອບສະໜອງຄວາມຕ້ອງການ ແລະ ໜ້າທີ່ປົກປັກຮັກສາປະເທດຊາດໃນສະພາບການໃໝ່. ເພື່ອເຮັດສິ່ງນີ້ໄດ້ດີ, ກ່ອນອື່ນໝົດ, ຕ້ອງສຸມໃສ່ຊາບຊຶມຢ່າງເລິກເຊິ່ງມະຕິເລກທີ 05-NQ/TW, ລົງວັນທີ 17 ມັງກອນ 2022 ຂອງກົມການເມືອງສູນກາງພັກ, ວ່າດ້ວຍການຈັດຕັ້ງກອງທັບປະຊາຊົນຫວຽດນາມໃນໄລຍະປີ 2021-2030 ແລະໃນຊຸມປີຕໍ່ໄປ; ມະຕິເລກທີ 230-NQ/QUTW, ລົງວັນທີ 2 ເມສາ 2022, ຂອງຄະນະພັກການທະຫານສູນກາງ, ວ່າດ້ວຍການນຳພາປະຕິບັດການຈັດຕັ້ງກອງທັບປະຊາຊົນຫວຽດນາມໃນໄລຍະປີ 2021-2030 ແລະໃນຊຸມປີຕໍ່ໄປ,... ບົນພື້ນຖານນັ້ນ, ອົງການທີ່ກ່ຽວຂ້ອງທຸກຂັ້ນເປັນເຈົ້າການໃນການສ້າງແຜນການສັງລວມ, ວິທີດຳເນີນການທີ່ເຄັ່ງຄັດ ວິທະຍາສາດ, ດ້ວຍເສັ້ນທາງແລະຂັ້ນຕອນສະເພາະ, ປັບເພີ່ມຫຼືຫຼຸດການຈັດອົງການແລະຈໍານວນຂອງແຕ່ລະກຸ່ມ ໃຫ້ສອດຄ່ອງກັບແນວທາງການປ້ອງກັນປະເທດທົ່ວປວງຊົນ ແລະສົງຄາມປດຊາຊົນ, ຄວາມສາມາດໃນການຮັບປະກັນອາວຸດຍຸດໂທປະກອນ, ຮັກສາແລະເສີມຂະຫຍາຍມູນເຊື້ອຂອງກອງທັບ, ສິນລະປະການທະຫານຫວຽດນາມ. ກໍ່ສ້າງແລະປັບປຸງການຈັດຕັ້ງກອງທັບຕາມທິດທາງຊຳນານການຮົບ ກະທັດລັດ ແລະ ເຂັ້ມແຂງ, ມີໂຄງສ້າງທີ່ຄົບຊຸດ, ເໝາະສົມລະຫວ່າງບັນດາພາກສ່ວນ, ກຳລັງ; ຫຼຸດຜ່ອນຕົວກາງແລະໜ່ວຍບໍລິການ ຮັບປະກັນ. ສືບຕໍ່ຈັດຕັ້ງໜ່ວຍສຳຮອງຍຸດທະສາດຈຳນວນໜຶ່ງ ຕາມຄວາມຕັດສິນໃຈປົກປັກຮັກສາປະເທດຊາດຫວຽດນາມສັງຄົມນິຍົມ. ກໍ່ສ້າງກອງກຳລັງສຳຮອງໃຫ້ເຂັ້ມແຂງ, ກອງກຳລັງທະຫານລາດປ້ອງກັນຕົວທີ່ໝັ້ນຄົງເຂັ້ມແຂງແລະທົ່ວເຖິງ, ຮັບປະກັນໃຫ້ກອງທັບມີຄວາມສາມາດພໍທີ່ຈະເປັນຫຼັກແຫຼ່ງໃນການພ້ອມກັບທົ່ວປວງຊົນ ປະຕິບັດໜ້າທີ່ປົກປັກຮັກສາປະເທດຊາດຢ່າງສຳເລັດຜົນໃນທຸກສະຖານະການ.
ຈັດຕັ້ງໃຫ້ພາກສ່ວນທີ່ກ່ຽວຕ່າງໆ ຊາບຊຶມຢ່າງເລິກເຊິ່ງ ມະຕິຂອງກົມການເມືອງສູນກາງ, ມະຕິຂອງຄະນະພັກການທະຫານສູນກາງ ແລະ ແຜນການຂອງກະຊວງປ້ອງກັນປະເທດ ກ່ຽວກັບການດັດປັບການຈັດຕັ້ງກຳລັງ, ຮັບປະກັນຄວາມເຂັ້ມງວດ, ຖືກຕາມກົດລະບຽບ, ສອດຄ່ອງກັບຄວາມຕ້ອງການແລະໜ້າທີ່ໃນແຕ່ລະຂັ້ນ. ເສີມຂະຫຍາຍກຳລັງແຮງສັງລວມຂອງບັນດາອົງການແລະກົມກອງໃນກອງທັບ ແລະ ຂອງລະບົບການເມືອງທັງໝົດ, ເປັນເອກະພາບໃນການຮັບຮູ້ ແລະ ຍົກສູງຄວາມຮັບຜິດຊອບຂອງຄະນະພັກ, ຜູ້ບັນຊາການອົງການ ກົມກອງ ໃນການຈັດຕັ້ງປະຕິບັດໃຫ້ສຳເລັດຕາມເປົ້າໝາຍການກໍ່ສ້າງກອງທັບປະຊາຊົນທີ່ປະຕິວັດ ເປັນແບບຫຼວງ ຊຳນາມການຮົບ ແລະ ກ້າວສູ່ຄວາມທັນສະໄໝ, ຈົງຮັກພັກດີຕໍ່ພັກ ປະເທດຊາດແລະປະຊາຊົນ ໂດຍເດັດຂາດ, ມີກຳລັງແຮງສັງລວມແລະກຳລັງແຮງສູ້ຮົບທີ່ນັບມື້ນັບສູງ, ເປັນກອງກຳລັງຫຼັກແຫຼ່ງທີ່ແທ້ຈິງ ໃນການປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງໃນທຸກສະຖານະການ.
ຂະບວນການດັດປັບການຈັກຕັ້ງຂອງກອງທັບຕ້ອງຢູ່ພາຍໃຕ້ການຊີ້ນຳນຳພາຢ່າງເດັດຂາດ ໂດຍກົງໃນທຸກດ້ານຂອງພັກ, ເຊິ່ງໂດຍກົງແລະເປັນປະຈຳແມ່ນການນຳພາຂອງກົມການເມືອງສູນກາງພັກ ແລະ ການຄຸ້ມຄອງລວມສູນ ເປັນເອກະພາບຂອງລັດ; ການນຳພາ ຊີ້ນຳຂອງຄະນະພັກ, ອົງການຈັດຕັ້ງພັກ ແລະຜູ້ບັນຊາການທຸກລະດັບ. ມາດຕະການປະຕິບັດຕ້ອງຮອບດ້ານ ຄົບຊຸດ ສອດຄ່ອງກັບຄວາມເປັນຈິງ; ສົມທົບຢ່າງແໜ້ນແຟ້ນລະຫວ່າງວຽກງານແນວຄິດກັບວຽກງານຈັດຕັ້ງ ແລະວຽກງານນະໂຍບາຍ, ບໍ່ເຮັດຢ່າງອັດຕະວິໄສ, ຮ້ອນຮົນ, ດ້ານດຽວງ່າຍດາຍ ຫຼືແບບຄຳສັ່ງບໍລິຫານໂດຍເດັດຂາດ.
ທີສອງ, ຍຶດໝັ້ນຫຼັກການກໍ່ສ້າງກອງທັບທີ່ເຂັ້ມແຂງດ້ານການເມືອງ.
ນີ້ແມ່ນບັນຫາພື້ນຖານ, ຫຼັກການທີ່ບໍ່ຂະຫຍັບບໍ່ປ່ຽນແປງ ທີ່ສອດຫ້ອຍຕະຫຼອດຂະບວນການກໍ່ສ້າງ ສູ້ຮົບ ແລະ ເຕີບໃຫຍ່ຂອງກອງທັບປະຊາຊົນ, ເພື່ອຕັ້ງໝັ້ນແລະເພີ່ມທະວີທາດແທ້ຊົນຊັ້ນກຳມະກອນ, ເປົ້າໝາຍ, ອຸດົມການສູ້ຮົບຂອງພັກຂອງພວກເຮົາ;ແມ່ນປັດໄຈຕັດສິນສຳລັບຄວາມສໍາເລັດທຸກວຽກງານທີ່ໄດ້ຮັບມອບຫມາຍ. ຊາບຊຶມຢ່າງເລິກເຊິ່ງ ແລະ ຍຶດໝັ້ນແນວຄິດໂຮ່ຈີມິນ ກ່ຽວກັບການກໍ່ສ້າງກອງທັບປະຊາຊົນ; ຕາມນັ້ນ, ການກໍ່ສ້າງກອງທັບຕ້ອງຮອບດ້ານ, ກວມເອົາທຸກຂົງເຂດການທະຫານ, ການເມືອງ, ການຂົນສົ່ງ, ເຕັກນິກ ແລະ ທຸກໜ້າທີ່ການສູ້ຮົບ, ການກະກຽມສູ້ຮົບ, ການຝືກອົບຮົມ, ການອອກແຮງງານທຳການຜະລິດ ແລະ ປະຕິບັດງານ. ໃນນັ້ນ, ຕ້ອງເອົາໃຈໃສ່ເປັນພິເສດເຖິງກາສ້າງກອງທັບທີ່ເຂັ້ມແຂງດ້ານການເມືອງ, ເພາະວ່າ “ກອງທັບທີ່ບໍ່ມີການເມືອງກໍຄືກັບຕົ້ນໄມ້ທີ່ບໍ່ມີຮາກ, ບໍ່ມີປະໂຫຍດແລະເປັນອັນຕະລາຍ”(3).
ການກໍ່ສ້າງກອງທັບທີ່ຊຳນາມການຮົບ ກະທັດລັດ ແລະເຂັ້ມແຂງນັ້ນ ຕ້ອງຮັບປະກັນຄວາມກະທັດລັດທາງດ້ານການຈັດຕັ້ງ, ຍົກສູງຄຸນນະພາບທຸກດ້ານ, ຍຶດໝັ້ນແລະເພີ່ມທະວີການນຳພາເດັດຂາດ ໂດຍກົງໃນທຸກດ້ານຂອງພັກຕໍ່ກອງທັບ. ເອົາໃຈໃສ່ກໍ່ສ້າງຄະນະພັກກອງທັບທີ່ປອດໃສ ເຂັ້ມແຂງ ແລະ ໂດດເດັ່ນທາງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງແລະພະນັກງານ. ຍົກສູງຄວາມສາມາດນຳພາ, ກຳລັງແຮງສູຸ້ຮົບຂອງບັນດາຄະນະພັກ ອົງການຈັດຕັ້ງພັກ, ຄວາມເປັນແບບຢ່າງ ນຳໜ້າຂອງພະນັກງານແລະສະມາຊິກພັກໃນທົ່ວກອງທັບ. ຄະນະພັກ, ຜູ້ບັນຊາການທຸກລະດັບຕ້ອງສືບຕໍ່ປ່ຽນແປງໃໝ່ ແລະຍົກສູງຄຸນນະພາບຂອງວຽກງານອົບຮົມສຶກສາການເມືອງແລະກຳນົດທິດທາງຄວາມຄິດ, ເຮັດໃຫ້ນາຍທະຫານແລະທະຫານໝັ້ນຄົງ ແນ່ວແນ່ໃນຫຼັກໝັ້ນ, ເປົ້າໝາຍ, ອຸດົມຄະຕິຂອງຕົນ, ຮັບຮູ້ສະຖານະການໜ້າທີ່ຢ່າງເລິກເຊິ່ງ, ເຫັນແຈ້ງຄວາມສະດວກແລະຄວາມຫຍຸ້ງຍາກ, ກຳນົດຄວາມຮັບຜິດຊອບຢ່າງຈະແຈ້ງ ແລະ ຕັດສິນໃຈເຮັດທຸກວຽກງານໃຫ້ສຳເລັດຜົນ. ເອົາໃຈໃສ່ເພິ່ມທະວີການອົບຮົມສຶກສາລັດທິມາກ-ເລນິນ, ແນວຄິດໂຮ່ຈີມິນ, ແນວທາງ ທັດສະນະຂອງພັກ, ນະໂຍບາຍ ກົດໝາຍຂອງລັດ, ຄວາມດີເດັ່ນຂອງລະບອບສັງຄົມນິຍົມ,... ຕັ້ງໜ້າ ແລະເປັນເຈົ້າການນໍາໜ້າໃນການຕໍ່ສູ້ປະຕິເສດທັດສະນະທີ່ຜິດພາດແລະເປັນປະຕິປັກ, ປົກປ້ອງຮາກຖານແນວຄິດຂອງພັກ. ເດັດດ່ຽວ, ໝັ້ນໜຽວໃນການປະຕິບັດຢ່າງເຂັ້ມງວດແລະມີປະສິດທິຜົນ ບັນດາແຜນນະໂຍບາຍ, ຂໍ້ກຳນົດຂອງສູນກາງພັກ, ຂອງຄະນະພັກການທະຫານສູນກາງ ກ່ຽວກັບການກໍ່ສ້າງ ປັບປຸງພັກແລະລະບົບການເມືອງ, ກ່ຽວກັບສິ່ງທີ່ສະມາຊິກພັກບໍ່ໄດ້ຮັບອະນຸຍາດໃຫ້ເຮັດ, ກ່ຽວກັບການຍູ້ແຮງການຮ່ຳຮຽນແລະເຮັດຕາມແນວຄິດ ຄຸນສົມບັດ ແລະ ແບບແຜນໂຮ່ຈີມິນ. ເສີມຂະຫຍາຍຄຸນທາດ “ທະຫານຂອງລຸງໂຮ່”, ຕໍ່ສູ້ຢ່າງເດັດດ່ຽວຕ້ານລັດທິອັດຕະບຸກຄົນໃນສະພາບການໃໝ່, ດ້ວຍບັນດາຮູບແບບ ແລະ ວິທີການດຳເນີນທີ່ເໝາະສົມ ປະດິດສ້າງ.
ທີສາມ, ກວດກາແລະປັບປຸງການຈັດຕັ້ງ, ການບັນຈຸພະນັກງານ ແລະ ອຸປະກອນຂອງແຕ່ລະອົງການ, ກົມກອງຢ່າງເປັນປະຈຳ ເພື່ອຕອບສະໜອງຄວາມຕ້ອງການແລະໜ້າທີ່ໃນສະພາບການໃໝ່.
ການຈັດຕັ້ງ, ການບັນຈຸພະນັກງານ, ອຸປະກອນແມ່ນບັນດາປັດໄຈສຳຄັນທີ່ປະກອບເປັນຄຸນນະພາບສັງລວມ, ກຳລັງແຮງສູ້ຮົບຂອງກອງທັບ. ໃນສະພາບການພັດທະນາເສດຖະກິດການຕະຫຼາດຕາມທິດສັງຄົມນິຍົມ, ການເຊື່ອມໂຍງເຂົ້າກັບສາກົນທີ່ເລິກເຊິ່ງຍິ່ງຂຶ້ນ, ຄວາມຕ້ອງການແລະໜ້າທີ່ປົກປັກຮັກສາປະເທດຊາດນັບມື້ນັບເພີ່ມຂຶ້ນ, ການປະຕິວັດອຸດສາຫະກຳຄັ້ງທີ 4 ສົ່ງຜົນກະທົບຢ່າງເລິກເຊິ່ງກວ່າອີກໃນທຸກຂົງເຂດ ລວມທັງຂົງເຂດການປ້ອງກັນປະເທດ ຮັກສາຄວາມໝັ້ນຄົງ, ດັ່ງນັ້ນ ການປັບປຸງການຈັດຕັ້ງ ແລະການບັນຈຸພະນັກງານຂອງອົງການ ກົມກອງເວົ້າສະເພາະ, ການດັດປັບການຈັດຕັ້ງກຳລັງຂອງກອງທັບເວົ້າລວມ ແມ່ນຄວາມຕ້ອງການພາວະວິໄສແລະຮີບດ່ວນ, ປະກອບສ່ວນກໍ່ສ້າງກອງທັບທີ່ຊຳນານການຮົບ ກະທັດລັດ ເຂັ້ມແຂງ ແລະ ທັນສະໄໝ.
ບົນຈິດໃຈນັ້ນ, ແຕ່ລະຂັ້ນຄວນເປັນເຈົ້າການກວດກາ ດັດປັບ ແລະ ປັບປຸງບູລະນະການຈັດຕັ້ງ, ການບັນຈຸພະນັກງານ, ຮັບປະກັນອຸປະກອນເໝາະສົມກັບພາລະບົດບາດ ໜ້າທີ່, ອາວຸດແລະອຸປະກອນເຕັກນິກທີ່ມີຢູ່ ແລະ ສິນລະປະການທະຫານຂອງຫວຽດນາມໃນສະພາບການໃໝ່.
ທີສີ່, ຊາບຊຶມຢ່າງເລິກເຊິ່ງທັດສະນະ “ຄົນກ່ອນ, ປືນຫຼັງ”, ເອົາໃຈໃສ່ ເບິ່ງແຍງຢ່າງເປັນປະຈຳເຖິງ ການສ້າງຊັບພະຍາກອນມະນຸດຄຸນນະພາບສູງ; ເຊື່ອມໂຍງການກໍ່ສ້າງກອງທັບທີ່ຊຳນາມການຮົບ ກະທັດລັດ ເຂັ້ມແຂງ ກັບການປ່ຽນແປງໃໝ່ວຽກງານ ການສຶກສາແລະຝຶກອົບຮົມ.
ນີ້ແມ່ນໜຶ່ງໃນບັນດາຂອດກຸນແຈ ບຸກທະລຸ ທີ່ມີຄວາມໝາຍຕັດສິນຊີ້ຂາດ, ຮັບປະກັນໃຫ້ກອງທັບມີຄວາມຊຳນາມການຮົບ ກະທັດລັດ ເຂັ້ມແຂງ, ກ້າວສູ່ຄວາມທັນສະໄໝ, ປະຕິບັດສໍາເລັດໜ້າທີ່ທັງໝົດໄດ້ດີໃນເງື່ອນໄຂໃໝ່. ກຳລັງແຮງຂອງກອງທັບແມ່ນຜົນສັງລວມຂອງຫຼາຍປັດໄຈຄື: ຄົນ, ອາວຸດ, ອຸປະກອນ, ສິນລະປະການສູ້ຮົບ..., ໃນນັ້ນ, ຄົນເປັນປັດໄຈຕັດສິນ. ດັ່ງນັ້ນ, ການກໍ່ສ້າງປັດໄຈມະນຸດ ໂດຍກົງແມ່ນຊັບພະຍາກອນມະນຸດຄຸນນະພາບສູງ ຕ້ອງໄດ້ຮັບຄວາມເອົາໃຈໃສ່ ແລະ ຖືເປັນປັດໄຈທີ່ມີຄວາມໝາຍຕັດສິນຊີ້ຂາດ ໃນການກໍ່ສ້າງກອງທັບທີ່ຊຳນານການຮົບ ກະທັດລັດ ເຂັ້ມແຂງ ແລະ ກ້າວສູ່ຄວາມທັນສະໄໝ. ການສ້າງແຫຼ່ງຊັບພະຍາກອນມະນຸດຕ້ອງເອົາໃຈໃສ່ທັງດ້ານປະລິມາແລະຄຸນນະພາບ ຕາມຂັ້ນຕອນການຫັນເປັນທັນສະໄໝໃນອາວຸດແລະອຸປະກອນເຕັກນິກຂອງບັນດາເຫຼົ່າທັບ, ເຫຼົ່າທະຫານ, ກອງກຳລັງທະຫານ. ຕ້ອງມີການບຸກທະລຸໃນການສຶກສາຝຶກອົບຮົມຖັນແຖວພະນັກງານຄົ້ນຄວ້າວິທະຍາສາດການທະຫານ, ບັນດາຜູ້ຊ່ຽວຊານນຳໜ້າຂະແໜງການ, ຖັນແຖວຄູອາຈານຢູ່ບັນດາສະຖາບັນ, ໂຮງຮຽນຂອງກອງທັບ; ເອົາໃຈໃສ່ພັດທະນາພະນັກງານການທະຫານ, ການເມືອງທີ່ມີຄຸນນະພາບສູງ; ສ້າງພະນັກງານພະລາທິການ ເຕັກນິກທີ່ມີລະດັບຄວາມຮູ້ ຄວາມສາມາດດ້ານວິຊາສະເພາະເລິກເຊິ່ງ, ຕອບສະໜອງໄດ້ກັບຄວາມຕ້ອງການແລະໜ້າທີ່. ບັນດາອົງການ ໜ່ວຍງານຕ້ອງມີແຜນຳນົດ, ແຜນການສ້າງຊັບພະຍາກອນມະນຸດຄຸນນະພາບສູງ ເພື່ອຮັບປະກັນຄວາມຕ້ອງການນໍາໃຊ້ໃນທັນທີແລະໄລຍະຍາວ; ພັດທະນາມາດຖານຊັບພະຍາກອນມະນຸດ ເພື່ອເປັນພື້ນຖານໃນການກວດກາ, ຕີລາຄາ, ອົບຮົມສຶກສາ, ບຳລຸງສ້າງ, ແຕ່ງຕັ້ງແລະເລື່ອນຊັ້ນພະນັກງານໃຫ້ຖືກຕ້ອງ.
ພ້ອມກັນນັ້ນ, ຕ້ອງປ່ຽນແປງໃໝ່, ຍົກສູງຄຸນນະພາບການສຶກສາ ຝຶກອົບຮົມຢູ່ບັນດາໂຮງຮຽນຂອງກອງທັບ, ສ້າງແຫຼ່ງພະນັກງານທຸກຂັ້ນທີ່ມີຄຸນນະສົມບັດປະຕິວັດ, ແນວຄິດ, ຄວາມສາມາດດ້ານວິຊາຊີບ, ມີລະດັບຄວາມສາມາດບັນຊາການ, ບໍລິຫານງານ,… ຕາມໜ້າທີ່ຮັບຜິດຊອບຂອງຕົນ. ກໍ່ສ້າງໂຮງຮຽນ, ສະຖາບັນຄົ້ນຄວ້າຂອງກອງທັບທີ່ເກັ່ງ ກະທັດລັດ ເຂັ້ມແຂງ ທັນສະໄໝ; ເຊື່ອມໂຍງການຝຶກອົບຮົມໃນໂຮງຮຽນ ກັບການຝຶກຝົນຫຼໍ່ຫຼອມ ບຳລຸງສ້າງພະນັກງານຢູ່ໃນກົມກອງ; ເຊື່ອມໂຍງໂຮງຮຽນກັບສະໜາມຮົມ; ເຊື່ອມໂຍງທິດສະດີກັບພຶດຕິກຳຕົວຈິງ; ເຊື່ອມໂຍງຄວາມຮັບຜິດຊອບຂອງຄະນະພັກ, ຂອງຜູ້ບັນຊາການ ກັບຜົນງານການຝຶກອົບຮົມຂອງກົມກອງ. ໃນນັ້ນ, ການຈັດຕັ້ງການຝຶກອົບຮົມຕ້ອງແໜ້ນແຟ້ນ, ໄຫວພິບ, ຖືກຕ້ອງຕາມທິດນຳ, ທັດສະນະ, ຫຼັກການ, ການປະສົມປະສານ; ເອົາໃຈໃສ່ຖ່າຍທອດບົດຮຽນປະສົບການຈິງ, ຍົກສູງຄວາມສາມາດໃນການປະຕິບັດ, ເປັນເຈົ້າອາວຸດ ອຸປະກອນ ແລະ ອາວຸດຍຸດໂທປະກອນໃໝ່ທີ່ທັນສະໄໝ, ແຮງເຄື່ອນໄຫວແລະຄວາມສາມາດໃນການສູ້ຮົບ ໃນເງື່ອນໄຂໃໝ່ ໃຫ້ແກ່ທຸກກອງກຳລັງ; ຕັ້ງໜ້ານຳໃຊ້ເຕັກໂນໂລຊີຂໍ້ມູນຂ່າວສານ, ເຕັກໂນໂລຊີການຈໍາລອງ, ອຸປະກອນພາຫະນະເຕັກນິກທີ່ທັນສະໄໝ ໃນການຝຶກອົບຮົມທະຫານ. ໃນສະເພາະໜ້າ, ຕ້ອງເອົາໃຈໃສ່ຍົກສູງຄຸນນະພາບການຝຶກຊ້ອມ, ງານບຸນກິລາ ແລະ ການແຂ່ງຂັນທາງທະຫານ; ປະກາດໃຊ້ແລະຜັນຂະຫຍາຍປະຕິບັດຍຸດທະສາດ ແລະ ບັນດາແຜນພັດທະນາການສຶກສາ ແລະຝຶກອົບຮົມໃນກອງທັບ ຕາມທິດນຳ “ຄຸນນະພາບການຝຶກອົບຮົມຂອງໂຮງຮຽນ ແມ່ນຄວາມສາມາດກຽມພ້ອມສູ້ຮົບຂອງກົມກອງ”, ປະກອບສ່ວນກໍ່ສ້າງກອງທັບທີ່ຊຳນານການຮົບ ກະທັດລັດ ເຂັ້ມແຂງ, ຕອບສະໜອງຄວາມຕ້ອງການແລະໜ້າທີ່.
ທີຫ້າ, ສຸມໃສ່ກໍ່ສ້າງແລະພັດທະນາອຸດສາຫະກຳປ້ອງກັນປະເທດ ຕອບສະໜອງຄວາມຕ້ອງການປັບປຸງອາວຸດແລະອຸປະກອນທາງເຕັກນິກໃຫ້ທັນສະໄໝ.
ໃນເວລາສະເພາະໜ້າ, ຕ້ອງສືບຕໍ່ການກໍ່ສ້າງແລະພັດທະນາອຸດສາຫະກຳປ້ອງກັນປະເທດ ຕາມທິດທາງເປັນເຈົ້າການ, ສ້າງຄວາມເຂັ້ມແຂງດ້ວຍຕົນເອງ, ທັນສະໄໝແລະນຳໃຊ້ໄດ້ໃນສອງດ້ານ, ກາຍເປັນຫົວຫອກຂອງອຸດສາຫະກຳແຫ່ງຊາດ, ບັນລຸລະດັບວິທະຍາສາດແລະເຕັກໂນໂລຊີທີ່ກ້າວໜ້າ ແລະ ທັນສະໄໝ; ມີຂະໜາດການຈັດຕັ້ງ ກົນໄກ ແລະ ການເຄືອນໄຫວເໝາະສົມ; ເສີມຂະຫຍາຍເປັນຢ່າງດີ ບົດບາດ, ຄວາມຮັບຜິດຊອບ ແລະ ການເຂົ້າຮ່ວມຢ່າງຕັ້ງໜ້າ ມີປະສິດທິຜົນ ຂອງບັນດາພາກສ່ວນເສດຖະກິດ, ປະກອບສ່ວນຍົກສູງຄວາມສາມາດບົ່ມຊ້ອນ ແລະ ກຳລັງແຮງດ້ານການທະຫານ, ການປ້ອງກັນຊາດຂອງປະເທດ. ເຊື່ອມໂຍງອຸດສາຫະກຳປ້ອງກັນປະເທດ ກັບອຸດສາຫະກຳແຫ່ງຊາດ, ມີໂຄງສ້າງທີ່ສົມເຫດສົມຜົນໃນລະບົບອຸດສາຫະກຳແຫ່ງຊາດ, ບຸລິມະສິດການພັດທະນາເຕັກໂນໂລຊີທີ່ທັນສະໄໝ ແລະມີປະສິດທິຜົນສູງ, ຕອບສະໜອງຄວາມຕ້ອງການດ້ານອາວຸດຍຸດໂທປະກອນ ແລະອຸປະກອນເຕັກນິກ ໃຫ້ແກ່ກອງກຳລັງປະກອບອາວຸດປະຊາຊົນໄດ້ດີກວ່າເກົ່າ.
ເພື່ອບັນລຸເປົ້າໝາຍທີ່ໄດ້ວາງໄວ້, ຈຳເປັນຕ້ອງປັບປຸງບູລະນະໂດຍໄວ ລະບົບເອກະສານທາງກົດໝາຍ, ກົນໄກ, ນະໂຍບາຍ, ຍຸດທະສາດ, ແຜນກຳນົດ, ແຜນການພັດທະນາອຸດສາຫະກຳປ້ອງກັນປະເທດໄລຍະຍາວ ແລ ໄລຍະກາງ, ສອດຄ່ອງກັບເງື່ອນໄຂໃໝ່. ບຸລິມະສິດການພັດທະນາບັນດາຂະແໜງການ, ຜະລິດຕະພັນອຸດສາຫະກຳຂັ້ນພື້ນຖານ, ທີ່ມີລັກສະນະໃຊ້ໄດ້ໃນສອງດ້ານຢ່າງສູງ. ລົງທຶນຢ່າງມີຈຸດສຸມ ໃນການກໍ່ສ້າງໂຮງງານອຸດສາຫະກຳປ້ອງກັນປະເທດຈໍານວນໜຶ່ງ ທີ່ມີເຕັກໂນໂລຊີກ້າວໜ້າ ທັນສະໄໝ, ກ້າວໄປເຖິງການກໍ່ຮ່າງສ້າງຮູບບັນດາກຸ່ມ, ຄອມເພຼັດອຸດສາຫະກຳປ້ອງກັນປະເທດທີ່ໃຊ້ໄດ້ໃນສອງດ້ານ ທີ່ມີເຕັກໂນໂລຊີສູງ, ມີໜ້າທີ່ຄົ້ນຄວ້າ, ຜະລິດ ແລະ ຮັບປະກັນອາວຸດຍຸດໂທປະກອນ ອຸປະກອນທາງເຕັກນິກການທະຫານ. ໃນສະເພາະໜ້າ, ສຸມໃສ່ການກໍ່ສ້າງ ແລະ ພັດທະນາອຸດສາຫະກຳປ້ອງກັນປະເທດ ທີ່ມີຂະໜາດ ການຈັດຕັ້ງ ແລະ ກົນໄກການຄຸ້ມຄອງ ທີ່ເໝາະສົມ, ເສີມຂະຫຍາຍບົດບາດ ແລະຄວາມຮັບຜິດຊອບເປັນເຈົ້ນຕົນເອງ ຂອງໂຮງງານອຸດສາຫະກຳປ້ອງກັນປະເທດ. ປັບປຸງການຈັດຕັ້ງຂະແໜງການເຕັກນິກຕາມທິດທາງ “ລະອຽດອ່ອນ ກະທັດລັດ ເຂັ້ມແຂງ ເປັນເອກະພາບ”, ສອດຄ່ອງກັບລັກສະນະເຕັກໂນໂລຊີ ຂອງອາວຸດຍຸດໂທປະກອນ, ອຸປະກອນທາງເຕັກນິກ ແລະ ໜ້າທີ່ຂອງແຕ່ລະຂັ້ນ; ຮັບປະກັນວຽກງານການຄຸ້ມຄອງ, ການບັນຊາ, ການຊີ້ນຳທີ່ລຸລ່ວງ, ບໍ່ທັບຊ້ອນກັນ. ປ່ຽນແປງໃໝ່ແບບວິທີຮັບປະກັນເຕັກນິກ ສຳລັບອາວຸດຍຸດໂທປະກອນ, ອຸປະກອນທາງເຕັກນິກຮຸ້ນໃໝ່, ເຕັກໂນໂລຊີສູງ ຕາມທິດທາງລວມສູນ ເປັນເອກະພາບ; ປ່ຽນແປງໃໝ່ຈິນຕະນາການການຜະລິດອຸປະກອນທາງເຕັກນິກ ຕາມທິດຂະຫຍາຍການຮ່ວມທຶນ, ເຊື່ອມໂຍງ, ຫັນເປັນສັງຄົມ,... ສືບຕໍ່ຍົກສູງປະສິດທິຜົນຂອງການເຊື່ອມໂຍງເຂົ້າກັບສາກົນ ແລະການພົວພັນຕ່າງປະເທດດ້ານການປ້ອງກັນຊາດ, ແນໃສ່ໃຊ້ປະໂຫຍດແລະລະດົມບັນດາແຫຼ່ງພະລັງຈາກພາຍນອກ ເພື່ອຮັບໃຊ້ພາລະກິດການສ້າງຄວາມທັນສະໄໝໃຫ້ກັບກອງທັບ. ຕາມນັ້ນ, ພ້ອມກັນກັບການຊຸກຍູ້ການຮ່ວມມືໃນຂົງເຂດຕ່າງໆ, ຕ້ອງຊຸກຍູ້ການຮ່ວມມືໃນການພັດທະນາອຸດສາຫະກຳປ້ອງກັນປະເທດ ແລະ ເຕັກນິກການທະຫານ ໂດຍສົມທັບກັບການຈັດຊື້ອາວຸດ, ຍຸດໂທປະກອນໃໝ່ ທັນສະໄໝ ແລະ ຕິດກັບການຖ່າຍໂອນເຕັກໂນໂລຊີ, ໂດຍສະເພາະແມ່ນ ເຕັກໂນໂລຊີໃໝ່ ທັນສະໄໝ.
ການກໍ່ສ້າງກອງທັບທີ່ຊຳນາມການຮົບ ກະທັດລັດ ເຂັ້ມແຂງ ກ້າວສູ່ຄວາມທັນສະໄໝ ແມ່ນແຜນນະໂຍບາຍທີ່ສະເໝີຕົ້ນສະເໝີປາຍ, ຖືກຕ້ອງຂອງພັກ ແລະລັດຫວຽດນາມ. ການປະຕິບັດແຜນນະໂຍບາຍນີ້ຈະຮັບປະກັນໃຫ້ກອງທັບປະຊາຊົນຫວຽດນາມ ມີກຳລັງແຮງພຽງພໍທີ່ຈະສຳເລັດເປັນຢ່າງດີ ບົດບາດເປັນກອງກຳລັງຫຼັກແຫຼ່ງໃນພາລະກິດການປັບປຸງການປ້ອງກັນປະເທດ, ປົກປັກຮັກສາປະເທດຊາດຫວຽດນາມສັງຄົມນິຍົມ./.
------------------
(1) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 11, ໜ້າ 585.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 157 – 158.
(3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 217.
(4) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 158 – 159.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 992 (ເດືອນມິຖຸນາ 2022)