ເພີ່ມທະວີການອົບຮົມສຶກສາ ແລະ ຝຶກຝົນຫຼໍ່ຫຼອມ
ຄຸນສົມບັດປະຕິວັດ ໃຫ້ພະນັກງານ ສະມາຊິດພັກ
ຕາມແນວຄິດໂຮ່ຈີມິນ ໃນໄລຍະປະຈຸບັນ
ຄຸນສົມບັດປະຕິວັດ ໃຫ້ພະນັກງານ ສະມາຊິດພັກ
ຕາມແນວຄິດໂຮ່ຈີມິນ ໃນໄລຍະປະຈຸບັນ
ວກ. - ໃນແນວຄິດໂຮ່ຈີມິນນັ້ນ ການຮ່ຳຮຽນແລະຝຶກຝົນຫຼໍ່ຫຼອມຄຸນສົມບັດປະຕິວັດຊອງພະນັກງານ ສະມາຊິກພັກ ມີທີ່ຕັ້ງແລະບົດບາດສຳຄັນ ແລະ ມີລັກສະນະສະຖານະການສະເໝີ.
ໃນຊີວິດການເຄື່ອນໄຫວປະຕິວັດຂອງຕົນ, ປະທານໂຮ່ຈີມິນຍາມໃດກໍເອົາໃຈໃສ່ໃຫ້ຄວາມສຳຄັນກັບວຽກງານອົບຮົມສຶກສາຄຸນສົມບັດປະຕິວັດ ໃຫ້ຖັນແຖວພະນັກງານ ສະມາຊິກພັກ. ເພິ່ນເນັ້ນໜັກວ່າ, ເພື່ອໃຫ້ພັກໃສສະອາດ, ໝັ້ນຄົງເຂັ້ມແຂງ, ສົມຄວນກັບການເປັນສິນທຳແລະອາລະຍະທຳ ນັ້ນ, ພະນັກງານ ສະມາຊິກພັກທຸກຄົນຕ້ອງເຊື່ອມຊຶມຄຸນສົມບັດປະຕິວັດຢ່າງແທ້ຈິງ, ເປັນຜູ້ນຳ, ຜູ້ຮັບໃຊ້ທີ່ຊື່ສັດຂອງປະຊາຊົນ. ໃນພິໄນກຳ, ເພິ່ນຕັກເຕືອນວ່າ: “ພັກເຮົາແມ່ມພັກກຳອຳນາດການປົກຄອງ. ສະມາຊິກພັກແລະພະນັກງານທຸກຄົນຕ້ອງຊາບຊຶມຄຸນສົມບັດປະຕິວັດ ຢ່າງເລິດເຊິ່ງ, ຕ້ອງດຸໝັ່ນ ປະຢັດ ຊື່ສັດທ່ຽງທຳ ເຫັນແກ່ສ່ວນລວມ ບໍ່ເຫັນແກ່ສ່ວນຕົວ. ຕ້ອງຮັກສາພັກຂອງພວກເຮົາໃຫ້ບໍລິສຸດ, ຕ້ອງສົມຄວນເປັນຜູ້ນຳ, ຜູ້ຮັບໃຊ້ທີ່ຊື່ສັດຂອງປະຊາຊົນ”(1).
ແນວຄິດໂຮ່ຈີມິນກ່ຽວກັບຄຸນສົມບັດປະຕິວັດ
ປະທານໂຮ່ຈີມິນບໍ່ພຽງແຕ່ເນັ້ນໜັກວ່າ ຄຸນສົມບັດສິນທຳແມ່ນກົກຮາກຂອງຄົນໃນທຸກຍຸກສະໄໝເທົ່ານັ້ນ ແຕ່ເພິ່ນຍັງຍົກແນວຄວາມຄິດຄຸນສົມບັດໃໝ່ ດ້ວຍເນື້ອໃນໃໝ່ ທີ່ສະທ້ອນຄຸນສົມບັດໃນລະດັບສູງກວ່າ ກວ້າງກວ່າ ເລິກເຊິ່ງກວ່າ, ນັ້ນແມ່ນ ຄຸນສົມບັດປະຕິວັດ ຂອງພະນັກງານ ສະມາຊິກພັກ. ເພິ່ນຊີ້ແຈ້ງວ່າ ຄຸນສັມບັດປະຕິວັດເຮັດໃຫ້ພັກເຂັ້ມແຂງ ແລະ ເປັນປັດໄຈສຳຄັນທີ່ຮັບປະກັນບົດບາດນຳພາຂອງພັກ, ຮັບປະກັນໄຊຊະນະຂອງພາລະກິດການປະຕິວັດທີ່ພັກເຮົານຳພາ.
ແນວຄິດໂຮ່ຈີມິນກ່ຽວກັບຄຸນສົມບັດສິນທຳມີຮາກຖານມາຈາກຄຸນຄ່າທາງສິນທຳດັ້ງເດີມຊອງຊາດຫວຽດນາມ ເຊິ່ງກໍ່ຕົວແລະພັດທະນາຂຶ້ນ ໃນຂະບວນວິວັດການຕໍ່ສູ້ເພື່ອກໍ່ສ້າງປະເທດ ແລະ ປົກປັກຮັກສາປະເທດຊາດ. ນັ້ນຍັງແມ່ນການໝູນໃຊ້ ແລະ ພັດທະນາຄຸນສົມບັດປະຕິວັດ ຂອງລັດທິມາກ-ເລນິນ ຢ່າງປະດິດສ້າງ; ການຮັບເອົາແລະພັດທະນາບັນດາແກ່ນສານທາງວັດທະນະທຳແລະສິນທຳ ຂອງມະນຸດຊາດ ທີ່ເພິ່ນໄດ້ເຂົ້າໃກ້ໃນໄລຍະການເຄື່ອນໄຫວປະຕິວັດທີ່ຫຍຸ້ງຍາກລຳບາກ ແລະ ເຕັມໄປດ້ວຍຄວາມທ້າທາຍ ເພື່ອເປົ້າໝາຍການປົກປ່ອຍຊາດ, ປົດປ່ອຍຊົນຊັ້ນ ແລະ ປົດປ່ອຍປະຊາຊົນ. ສຳລັບການປະຕິວັດຫວຽດນາມ, ຄວາມຕ້ອງການທາງດ້ານສິນທຳກໍຍິ່ງສູງກວ່າອີກ, ເພາະວ່າ ການປະຕິວັດຫວຽດນາມຕ້ອງດຳເນີນໃນສະພາບການພິເສດຄື: ດຳເນີນໃນປະເທດກະສິກຳຫຼ້າຫຼັງ ແລະ ຕ້ອງປະເຊີນໜ້າກັບບັນດາອິດທິກຳລັງສັດຕູ ທີ່ປະຕິການທີ່ສຸດ ເລິກແລບທີ່ສຸດ. ປະທານໂຮ່ຈີມິນຊີ້ແຈງວ່າ: ການປະຕິວັດຈະສຳເລັດຢ່າງແນ່ນອນ, ແຕ່ຈະສຳເລັດໄວຫຼືຊ້າ, ລະດັບຄວາມສຳເລັດຈະໃຫຍ່ຫຼືນ້ອຍ... ແມ່ນຂຶ້ນຢູ່ກັບຄຸນສົມບັດປະຕິວັດ ຂອງບັນດານັກປະຕິວັດ, ລະດັບຄວາມຕື່ນຕົວປະຕິວັດ ແລະ ເຈດຈຳນົງໃນການຕໍ່ສູ້ຂອງມະຫາຊົນ.
ດ້ວຍຈິດໃຈນັ້ນ, ປະທານໂຮ່ຈີມິນໄດ້ເປັນແບບຢ່າງທີ່ຮຸ່ງເຮືອງເຫຼືອງເຫຼື້ອມກ່ຽວກັບຄຸນສົມບັດປະຕິວັດ ແລະ ໃນຊີວິດການເຄື່ອນໄຫວປະຕິວັດຂອງຕົນ, ເພິ່ນໄດ້ອົບຮົມສຶກສາກ່ຽວກັບຄຸນສົມບັດປະຕິວັດ ໃຫ້ແກ່ພະນັກງານ ສະມາຊິກພັກ ແລະ ປະຊາຊົນ ຢ່າງບໍ່ຢຸດຢັ້ງ. ຄຸນສົມບັດປະຕິວັດ, ດ້ານໜຶ່ງ, ແມ່ນຄວາມຮຽກຮ້ອງຕ້ອງການທີ່ຂາດບໍ່ໄດ້ ຂອງການປະຕິວັດກ່ອນໜ້ານີ້ແລະທຸກວັນນີ້; ດ້ານອື່ນ, ແມ່ນເງື່ອນໄຂຕັດສິນເບື້ອງຕົ້ນສໍາລັບຄວາມສໍາເລັດຂອງຜູ້ນໍາ.
ທ່ານປະທານໂຮ່ຈີມິນເຊື່ອໝັ້ນວ່າ ຄຸນສົມບັດປະຕິວັດແມ່ນຮາກຖານໃນການສ້າງແຮງຈູງໃຈສຳລັບການກະທຳທີ່ຖືກຕ້ອງ, ສ້າງເຈດຈຳນົງ ແລະ ຄວາມຕັດສິນໃຈປະຕິບັດໜ້າທີ່ໃຫ້ສຳເລັດຂອງນັກປະຕິວັດ. ຈາກນັ້ນ, ປະທານໂຮ່ຈີມິນຖືວ່າ ຄຸນສົມບັດປະຕິວັດແມ່ນກົກຮາກຂອງນັກປະຕິວັດ. ຖ້າມີຄຸນສົມບັດປະຕິວັດ, ເມື່ອປະສົບກັບຄວາມຫຍຸ້ງຍາກລຳບາກ ຄວາມລົ້ມເຫຼວ ຈະບໍ່ເສຍກຳລັງໃຈ ບໍ່ຖອຍຫຼັງ, ເມື່ອປະເຊີນກັບເງື່ອນໄຂທີ່ສະດວກ ຄວາມສຳເລັດ ກໍຍັງຄົງຮັກສາຈິດໃຈແຫ່ງຄວາມລຽບງ່າຍ ຄວາມສະຫງົບສະງ່ຽມ ແລະ ຄວາມຖ່ອມຕົວ; ຕັ້ງໃຈເຮັດວຽກໃຫ້ສໍາເລັດລຸລ່ວງຢ່າງດີ ໂດຍບໍ່ອິດສານິນທາໃນຄວາມສຸກ, ບໍ່ອວດອ້າງຄຸນງາມຄວາມດີ, ບໍ່ອາດຍາສິດ, ບໍ່ອວດອົ່ງຈອງຫອງ, ບໍ່ຫຼິ້ນແສ້ພານສາວ.
ທ່ານປະທານໂຮ່ຈີມິນຕີລາຄາສູງທັງສອງດ້ານຄຸນທຳ ແລະ ຄວາມສາມາດຂອງແຕ່ລະຄົນ. ໃນສາຍພົວພັນລະຫວ່າງຄຸນທຳ ແລະ ຄວາມສາມາດນັ້ນ, ເພິ່ນຢືນຢັນວ່າຄຸນທຳແມ່ນຮາກຫງົ້າ, ຕັດສິນຊີ້ຂາດກຳລັງຈິດໃຈອັນໃຫຍ່ຫຼວງຂອງຜູ້ຄົນ, ກຳລັງແຮງແຫ່ງຄວາມສາມັກຄີປວງຊົນທັງຊາດ; ຈາກນັ້ນ, ຄຸນສົມບັດສິນທຳ, ພິເສດແມ່ນຄຸນສົມບັດປະຕິວັດ, ປະກອບສ່ວນຢ່າງໃຫຍ່ຫຼວງເຂົ້າໃນຜົນສຳເລັດຂອງການປະຕິວັດຫວຽດນາມ. ຍ້ອນແນວນັ້ນ, ປະທານໂຮ່ຈີມິນຍາມໃດກໍໃຫ້ຄວາມສຳຄັນກັບການອົບຮົມສຶກສາ ຝຶກຝົນຫຼໍ່ຫຼອມຄຸນສົມບັດສິນທຳໂດຍທົ່ວໄປ ກໍຄືຄຸນສົມບັດປະຕິວັດໂດຍສະເພາະ ໃຫ້ທຸກຄົນ, ກ່ອນອື່ນໝົດແມ່ນ ໃຫ້ຖັນແຖວພະນັກງານ ສະມາຊິກພັກ.
ສະຫຼຸບລວມແລ້ວ, ທັດສະນະຂອງປະທານໂຮ່ຈີມິນ ກ່ຽວກັບຄຸນສົມບັດປະຕິວັດລວມມີບັນດາຈຸດພື້ນຖານດັ່ງຕໍ່ໄປນີ້:
ທີໜຶ່ງ, ຄຸນສົມບັດຄວາມຈົງຮັກພັກດີຕໍ່ປະເທດ, ຄວາມກະຕັນຍູຕໍ່ປະຊາຊົນ.
ຕາມປະທານໂຮ່ຈີມິນ, ນີ້ແມ່ນຄຸນສົມບັດທີ່ສຳຄັນທີ່ສຸດ, ປົກຫຸ້ມທີ່ສຸດ ແລະ ຄວບຄຸມຄຸນສົມບັດອື່ນໆ. ຈາກທັດສະນະກ່ຽວກັບຄຸນສົມບັດເກົ່າທີ່ “ຈົງຮັກພັກດີຕໍ່ກະສັດ, ກະຕັນບູຕໍ່ພໍ່ແມ່” ໃນສັງຄົມສັກດິນາຕາເວັນອອກ, ປະທານໂຮ່ຈີມິນນຳສະເໜີເນື້ອໃນໃໝ່ທີ່ສູງກວ່າແລະກວ້າງຂວາງກວ່າຄື “ຄວາມຈົງຮັກພັກດີຕໍ່ປະເທດ, ຄວາມກະຕັນຍູຕໍ່ປະຊາຊົນ”. ເພິ່ນຢືນຢັນວ່າ: “ຈົງຮັກພັກດີຕໍ່ປະເທດຊາດ, ກະຕັນຍູຕໍ່ປະຊາຊົນ, ໜ້າທີ່ໃດໆກໍ່ເຮັດສຳເລັດ, ຄວາມຫຍຸ້ງຍາກປານໃດກໍ່ຜ່ານພົ້ນໄດ້, ສັດຕູໃດໆກໍ່ສາມາດເອົາຊະນະໄດ້”(2). ຄຳຊີ້ນຳດັງກ່າວຂອງປະທານໂຮ່ຈີມິນ ແມ່ນທັງຄຳຮຽກຮ້ອງໃຫ້ມີການກະທຳ, ທັງແມ່ນທິດທາງດ້ານການເມືອງ, ຄຸນສົມບັດສິນທຳສຳລັບຊາວຫວຽດນາມແຕ່ລະຄົນ, ບໍ່ພຽງແຕ່ໃນການຕໍ່ສູ້ເພື່ອເອກະລາດແຫ່ງຊາດເທົ່ານັ້ນ ແຕ່ຍັງລວມເຖິງຕະຫຼອດໄປອີກນຳ.
ທີສອງ, ຄວາມຮັກແພງມະນຸດດ້ວຍກັນ.
ປະທານໂຮ່ຈີມິນເວົ້າກ່ຽວກັບຄວາມຮັກມະນຸດທີ່ກວ້າງຂວາງ ແລະ ເປັນເອກະລັກ. ເພີ່ນກຳນົດວ່າ ຄວາມຮັກແພງມະນຸດແມ່ນຄຸນສົມບັດທີ່ສູງສົ່ງສວຍງານທີ່ສຸດ ໃນຄວາມຮູ້ສຶກທາງສິນທຳຂອງມະນຸດ. ເພິ່ນໃຫ້ຄວາມຮັກອັນຍິ່ງໃຫຍ່ຕໍ່ຄົນທຸກຍາກ, ຄົນງານທີ່ຖືກກົດຂີ່ແລະຂູດຮີດ. ຢູ່ໃນປະທານໂຮ່ຈີມິນ, ຄວາມຮັກແພງພີ່ນ້ອງຮ່ວມຊາດແລະສະຫາຍນັ້ນ ມີຫຼວງຫຼາຍ ກວ້າງໄກ ແລະ ທົ່ວເຖິງ, ບໍ່ວ່າຈະຢູ່ໃນເຂດແຄວ້ນໃດ ພາກພື້ນໃດ, ເດັດຫຼືຜູ້ໃຫຍ່, ຊາຍຫຼືຍິງ..., ແມ່ນຊາວຫວຽດນາມທີ່ຮັກຊາດ ລ້ວນແຕ່ມີທີ່ໜຶ່ງໃນໃຈແຫ່ງຄວາມເມດຕາຂອງເພິ່ນ. ໃນພິໄນກຳ ອັນສັກສິດທີ່ປະທານໂຮ່ຈິມິນຂຽນໄວ້ໃຫ້ຄົນລຸ້ນຕໍ່ໆໄປ, ເພິ່ນໄດ້ຕັກເຕືອນວ່າ: “ຕ້ອງມີນ້ຳໃຈສະຫາຍຮັກແພງເຊິ່ງກັນແລະກັນ”(3); ພະນັກງານ ສະມາຊິກພັກທຸກຄົນ ຍາມໃດກໍເອົາໃຈໃສ່ເຖິງຄວາມຮັກແພງມະນຸດດ້ວຍກັນ.
ທີສາມ, ບັນດາຄຸນສົມບັດ ດຸໝັ້ນ ປະຢັດ ຊື່ສັດ ທ່ຽງທຳ, ເຫັນແກ່ສ່ວນລວມບໍ່ເຫັນແກ່ສ່ວນຕົວ.
ຕາມປະທານໂຮ່ຈີມິນ, ດຸໝັ່ນ ໝາຍຄວາມວ່າ ການອອກແຮງງານຢ່າງຂະຫຍັນໝັ່ນພຽນ, ປະດິດສ້າງ, ມີແຜນການ, ມີສະມັດຖະພາບສູງ, ດ້ວຍຕິດໃຈອີງໃສ່ຕົນເອງເພິ່ງຕົນເອງ, ບໍ່ຂີ້ຄ້ານ, ບໍ່ເພິ່ງພາອາໃສ ເອື່ອຍອີງຜູ້ອື່ນ. ປະຢັດ ໝາຍຄວາມວ່າ ປະຢັດກຳລັງແຮງງານ ເວລາ ເງິນທອງຂອງປະຊາຊົນ ຂອງປະເທດ ຂອງຕົນເອງ; ຕ້ອງປະຢັດຕັ້ງແຕ່ສິ່ງໃຫຍ່ໂຕ ຈົນເຖິງສິ່ງນ້ອຍໆ, ຍ້ອນວ່າ ບັນດາສິ່ງນ້ອຍໆບວກເຂົ້າເປັນສິ່ງໃຫຍ່ໂຕ. ປະຢັດຍັງໝາຍຄວາມວ່າບໍ່ສິ້ນເປືອງ, ບໍ່ໃຊ້ຈ່າຍຟຸມເຟືອຍ, ບໍ່ເຮັດຕະພຶດໄປ, ບໍ່ໂອ້ອວດ, ບໍ່ເຮັດແບບຮູບນອກ, ບໍ່ເປີດງານລ້ຽງຫຼິ້ນກິນຢ່າງເມົາມົວ. ຊື່ສັດ ໝາຍຄວາມວ່າ ຍາມໃດກໍນັບຖື ຮັກສາຊັບສິນເຄື່ອງຂອງລວມຂອງປະຊາຊົນ, ບໍ່ລະເມີດເງິນແມ່ນແຕ່ກີບ ຫຼືເຂົ້າແມ່ນແຕ່ເມັດຂອງລັດ, ຂອງປະຊາຊົນ; ຕ້ອງເປັນຄົນບໍລິສຸດ, ບໍ່ໂລບ, ບໍ່ໂລບຕຳແໜ່ງ, ບໍ່ໂລບເງິນ, ບໍ່ໂລບຄວາມສຸກ, ບໍ່ມັກຄົນຍົກຍ້ອງ ເພື່ອໃຫ້ຕົນຜ່ອງໃສ ມີທຳ ບໍ່ຄົດໂກງເສື່ອມເສຍ. ທ່ຽງທຳ ໝາຍຄວາມວ່າບໍ່ຊົ່ວ, ມີຄວາມຊື່ກົງ ກົງໄປກົງມາ, ຊອບທຳ; ສໍາລັບຕົນເອງ, ບໍ່ອວດອົງທະນົງຕົວ, ຕັ້ງໃຈຮຽນຮູ້, ຫາຄວາມກ້າວຫນ້າ, ວິຈານຕົນເອງສະເໝີ ເພື່ອພັດທະນາຄວາມດີ ແກ້ໄຂຄວາມຊົ່ວ; ຕໍ່ຄົນອື່ນ, ບໍ່ປະຈົບປະແຈງຜູ້ບັງຄັບບັນຊາ, ບໍ່ດູຖູກຜູ້ໃຕ້ບັງຄັບບັນຊາ, ຮັກສາທ່າທີ່ທີ່ຈິງໃຈ, ຖ່ອມຕົວ, ສາມັກຄີ, ຊື່ສັດ, ບໍ່ຕົວະຫຼືຫຼອກລວງ; ດ້ານການງານ ໃຫ້ເຮັດວຽກງານສ່ວນລວມກ່ອນ, ວຽກສ່ວນຕົວແລະວຽກຄອບຄົວຕາມຫຼັງ. ເຫັນແກ່ສ່ວນລວມບໍ່ເຫັນແກ່ສ່ວນຕົວ ໝາຍຄວາມວ່າ “ເຮັດວຽກເພື່ອພາລະກິດສ່ວນລວມ, ໃຫ້ຄວາມສຳຄັນກັບຜົນປະໂຫຍດສາທາລະນະເປັນອັນດັບໜຶ່ງ; ບໍ່ສະແຫວງຫາຜົນປະໂຫຍດສ່ວນຕົວ, ບໍ່ແມ່ນເພື່ອຜົນປະໂຍດສ່ວນຕົວ”(4). ເວລາຈະເຮັດຫຍັງ ຢ່າຄິດຮອດໂຕເອງກ່ອນ, ເວລາສະເຫວີຍຜົນໃຫ້ມາຕາມຫຼັງ, ຕ້ອງ “ກັງວົນກ່ອນທຸກຄົນ ສະເຫວີສຸກຫຼັງທຸກຄົນ”.
ປະທານໂຮ່ຈີມິນໃຫ້ທັດສະນະວ່າ, ແຕ່ລະຄົນ, ໂດຍສະເພາະຜູ້ທີ່ມີອິດທິພົນໃນສັງຄົມ, ຊຸມຊົນ, ຕ້ອງສູ້ຊົນ ຝຶກຝົນຫຼໍ່ຫຼອມແລະບຳລຸງສ້າງຕົນເອງຢ່າງຕໍ່ເນື່ອງ ແລະປະຕິບັດຄຸນສົມບັດ 4 ປະການຄື: ດຸໝັ່ນ, ປະຢັດ, ຊື່ສັດ, ທ່ຽງທຳ; ຖ້າຂາດຄຸນທຳໜຶ່ງກໍ່ເກີດເປັນຄົນບໍ່ໄດ້.
ທີສີ່, ຈິດໃຈສາກົນນິຍົມທີ່ຜ່ອງໃສ.
ນັ້ນແມ່ນຈິດໃຈສາມັກຄີສາກົນຂອງຊົນຊັ້ນກຳມາຊີບ, ແມ່ນຈິດໃຈສາມັກຄີລະຫວ່າງຊາວກອມມູນິດກັບບັນດາປະຊາຊາດທີ່ຖືກກົດຂີ່ ແລະ ປະຊາຊົນຜູ້ອອກແຮງງານໃນໂລກ ເຊິ່ງປະທານໂຮ່ຈີມິນໄດ້ອອກເຫື່ອເທແຮງເພີ່ມພູນຄູນສ້າງ ໃນພຶດຕິກຳການເຄື່ອນໄຫວປະຕິວັດຂອງຕົນເອງ ແລະ ດ້ວຍພາລະກິດການປະຕິວັດຂອງຊົນຊາດ. ນັ້ນກໍແມ່ນນ້ຳໃຈສາມັກຄີ, ການຮ່ວມມື ແລະ ມິດຕະພາບຂອງປະຊາຊົນຫວຽດນາມ ກັບບັນດາຜູ້ກ້າວໜ້າໃນທົ່ວໂລກ ເພື່ອເປົ້າໝາຍສັນຕິພາບ, ຄາມຍຸຕິທຳ, ຄວາມກ້າວໜ້າທາງສັງຄົມ ແລະ ຄວາມເປັນເອກະລາດແຫ່ງຊາດ.
ຕີລາຄາບົດບາດຂອງຄຸນສົມບັດປະຕິວັດ, ປະທານໂຮ່ຈີມິນກຳນົດມາດຕະຖານຂອງພະນັກງານທີ່ດີ ຄື: ພະນັກງານຕ້ອງມີທັງຄວາມສາມາດແລະຄຸນທຳ ເຊິ່ງມີຄຸນທຳເປັນຮາກຖານ. ເພິ່ນເອງທີ່ເປັນແບບຢ່າງອັນຮຸ່ງເຮືອງເຫຼືອງເຫຼື້ອມຂອງຄຸນສົມບັດປະຕິວັດ, ເປັນການຕົກຜະລຶກຂອງຄຸນສົມບັດທີ່ດີທີ່ສຸດທັງໝົດຂອງຊາວຫວຽດນາມ ແລະ ຄຸນທຳຄຸນສົມບັດກອມມູນິດອັນສູງສົ່ງຂອງລັດທິມາກ-ເລນິນ. ບັນດາກົດທາງສິນທຳທີ່ເພິ່ນຍົກອອກມາໄດ້ກາຍເປັນອາວຸດທາງຈິດໃຈອັນມີພະລັງຂອງຊາວຫວຽດນາມທັງມວນ ໃນການຕໍ່ສູ້ເພື່ອເອກະລາດ ເສລີພາບ ແລະ ສັງຄົມນິຍົມ, ເພື່ອສັນຕິພາບ ການຮ່ວມມື ແລະ ມິດຕະພາບກັບທຸກຊົນຊາດໃນໂລກ. ໃນຕະຫຼອດ 53 ປີແຫ່ງການປະຕິບັດພິໄນກຳ ຂອງປະທານໂຮ່ຈີມິນ, ແນວຄິດໂຮ່ຈີມິນກ່ຽວກັບຄຸນສົມບັດປະຕິວັດ ສືບຕໍ່ເປັນໂຄມໄຟສ່ອງທາງ ນຳພາລະກິດການປະຕິວັດຂອງປະເທດເຮົາ, ພິເສດແມ່ນໃນສະພາບການໃໝ່ໃນປະຈຸບັນ.
ສືບຕໍ່ເພີ່ມທະວີການອົບຮົມສຶກສາ ແລະ ຝຶກຝົນຫຼໍ່ຫຼອມ
ຄຸນສົມບັດປະຕິວັດໃຫ້ພະນັກງານ ສະມາຊິກພັກ ຕາມແນວຄິດໂຮ່ຈີມິນ
ໃນສະພາບການໃໝ່
ປະທານໂຮ່ຈີມິນຊີ້ແຈງວ່າ: ເພື່ອໃຫ້ພະນັກງານ ແລະ ສະມາຊິກພັກແຕ່ລະຄົນຮັກສາຄຸນສົມບັດສິນທຳອັນດີງາມຂອງຕົນໄວ້ສະເໝີ, ຮູ້ສຶກຕື່ນຕົວເຖິງອຸດົມຄະຕິປະຕິວັດ, ຕັ້ງໝັ້ນໃນສະພາບສັງຄົມແລະສະພາບແວດລ້ອມທີ່ແຕກຕ່າງກັນທັງໝົດ, ພ້ອມກັນກັບການຝຶກຝົນຫຼໍ່ຫຼອມຕົນເອງ ແລະ ການສູ້ຊົນ, ຍັງຕ້ອງໄດ້ຮັບການຊ່ວຍເຫຼືອ, ການກວດກາ ແລະ ການຊີ້ນໍາຂອງພັກ. ໂດຍສະເພາະ, ໃນເງື່ອນໄຂທີ່ພັກກາຍເປັນພັກກຳອຳນາດການປົກຄອງ, ປະທານໂຮ່ຈີມິນຖືວ່າ ການກໍ່ສ້າງແລະປັບປຸງພັກ ແມ່ນວຽກງານທີ່ຕ້ອງໄດ້ດຳເນີນການຢ່າງເປັນປະຈຳ ແລະ ຕໍ່ເນື່ອງກວ່າອີກ. ດ້ວຍທັກສະນະການເມືອງທີ່ສ້ຽມແຫຼມເປັນພິເສດ, ເພິ່ນໄດ້ຮັບຮູ້ຢ່າງຈະແຈ້ງເຖິງຄວາມເປັນສອງດ້ານຂອງອຳນາດ: ດ້ານໜຶ່ງ, ອຳນາດມີພະລັງມະຫາສານເພື່ອດັດສ້າງສັງຄົມເກົ່າ ແລະ ກໍ່ສ້າງສັງຄົມໃໝ່ ຖ້ານຳໃຊ້ຢ່າງຖືກຕ້ອງ; ອີກດ້ານໜຶ່ງ, ອຳນາດມີອານຸພາບທຳລາຍລ້າງມະຫາສານ ຖ້າຜູ້ຖືອຳນາດເສື່ອມເສຍ, ເສື່ອມໂຊມປ່ຽນທາດ, ຕົກຢູ່ໃນວິຖີແຫ່ງຄວາມກະຫາຍອຳນາດ, ສະແຫວງຫາອຳນາດ, ແກ່ງແຍ້ງຊິງອຳນາດ; ສວຍໃຊ້ອຳນາດ, ໃຊ້ອຳນາດໃນທາງທີ່ຜິດ, ປ່ຽນອຳນາດຂອງປະຊາຊົນໃຫ້ເປັນເອກະສິດ ເປັນຜົນປະໂຫຍດສ່ວນຕົວ... ດັ່ງນັ້ນ, ພັກຕ້ອງເອົາໃຈໃສ່ເປັນພິເສດເຖິງການກໍ່ສ້າງ ປັບປຸງພັກ ແລະ ປ່ຽນແປງໃໝ່ແບບວິທີການນຳພາຂອງພັກ ເພື່ອກີດກັ້ນ ຍູ້ຖອຍ ແລະ ສືບຕໍ່ກຳຈັດຄວາມຊົ່ວຮ້າຍທັງໝົດທີ່ເກີດຈາກຄວາມເສື່ອມໂຊມປ່ຽນທາດ ຂອງພະນັກງານ ສະມາຊິກພັກ, ໃນເງື່ອນໄຂທີ່ພັກກຳອຳນາດການປົກຄອງ ແລະ ນຳພາລັດແລະສັງຄົມຢ່າງຮອບດ້ານ.
ຜ່ານໄລຍະເວລາກວ່າ 35 ປີແຫ່ງການປ່ຽນແປງໃໝ່, ດ້ວຍຜົນສຳເລັດອັນໃຫຍ່ຫຼວງ ທີ່ມີຄວາມໝາຍປະຫວັດສາດ, ປະເທດຊາດບໍ່ເຄີຍມີພາລະກິດ, ທ່າແຮງ, ຖານະຕຳແໜ່ງ ແລະ ກຽດສັກສີລະດັບສາກົນຄືໃນປະຈຸບັນ. ການປະຕິບັດປະຊາທິປະໄຕພາຍໃນພັກແລະໃນສັງຄົມ ໄດ້ມີການປ່ຽນແປງຢ່າງຕັ້ງໜ້າ, ສິດເປັນເຈົ້າຂອງຂອງປະຊາຊົນໄດ້ຮັບການເສີມຂະຫຍາຍ. ພະນັກງານ ສະມາຊາຊິກພັກສ່ວນຫຼາຍຕັ້ງໜ້າປູກຝັງ ແລະ ຝຶກຝົນຫຼໍ່ຫຼອມຄຸນສົມບັດສິນທຳ, ຄວາມສາມາດດ້ານວິຊາຊີບ, ນຳໜ້າເປັນແບບຢ່າງ, ຂະຫຍັນຂັນແຂງ ແລະມີຫົວຄິດປະດິດສ້າງ ໃນການງານ, ປະກອບສ່ວນສຳຄັນເຂົ້າໃນພາລະກິດການປ່ຽນແປງໃໝ່. ຢ່າງໃດກໍຕາມ, ຕໍ່ໜ້າການກະທົບຂອງຫຼາຍປັດໄຈພາວະວິໄສແລະອັດຕະວິໄສ, ໃນນັ້ນມີດ້ານລົບ ດ້ານຫຍໍ້ທໍ້ຂອງເສດຖະກິດຕະຫຼາດ, ການໂລກາພິວັດ, ການເຊື່ອມໂຍງສາກົນ, ການພັດທະນາຂອງວິທະຍາສາດແລະເຕັກໂນໂລຊີ... ດັ່ງນັ້ນ ພະນັກງານ ສະມາຊິກພັກ ພາກສ່ວນໜຶ່ງທີ່ບໍ່ໜ້ອຍ ໄດ້ມີປະກົດການຂອງການເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ.
ໃນບັນດາກອງປະຊຸມໃຫຍ່ຂອງພັກ ແລະ ກອງປະຊຸມຄະນະບໍລິຫານງານສູນກາງພາຍຫຼັງກອງປະຊຸມໃຫຍ່, ພັກໄດ້ປະເມີນຄວາມສ່ຽງເຫຼົ່ານີ້ຢ່າງກົງໄປກົງມາ; ໃນນັ້ນ, ສິ່ງທີ່ໜ້າວິຕົກກັງວົນຄື: ການປະກົດຕົວຂອງ “ການປ່ຽນແປງຕົນເອງ”, “ການຫັນປ່ຽນຕົນເອງ” ຢູ່ພາຍໃນ, ການຈືດຈາງໄປຂອງອຸດົມຄະຕິ, ຂອງຄວາມເຊື່ອຖືໃນພັກແລະລະບອບສັງຄົມນິຍົມ. ສິ່ງທີ່ອັນຕະລາຍຫຼາຍຄື ການ “ຟື້ນຕົວລຸກຂຶ້ນ” ຂອງລັດທິອັດຕະບຸກຄົນ, ວິຖີຊີວິດທີ່ເຫັນແກ່ຕົວແລະສະແຫວງຫາຜົນປະໂຫຍດສ່ວນຕົວ, ການໄລ່ຕາມຄຸນຄ່າທາງດ້ານວັດຖຸ, ບໍ່ສົນໃຈກັບຄຸນຄ່າທາງຈິດໃຈ; ພວກເຂົາສົນໃຈພຽງແຕ່ການປູກຝັງສໍາລັບຕົນເອງ ແຕ່ເບິ່ງເບົາ ຫຼີກລ້ຽງຄວາມຮັບຜິດຊອບຕໍ່ພັກ ຕໍ່ປະເທດຊາດ ຕໍ່ປະຊາຊົນ. ຄວາມຊື່ສັດສຸຈະລິດ (ທັງໃນດ້ານອຸດົມຄະຕິ ການເມືອງ ແລະ ຄຸນສົມບັດສິນທຳ) ຂອງພະນັກງານ ສະມາຊິກພັກຈຳນວນໜຶ່ງທີ່ບໍ່ໜ້ອຍ ໄດ້ຫຼຸດລົງຢ່າງໜັກໜ່ວງ. ການຫຶງສານິນທາດ້ານຖານະຕຳແໜ່ງ, ກາແຍ້ງຊິງອຳນາດ, ໂດຍທຸກວິທີການເພື່ອຊອກຫາຄວາມສໍາພັນ, ການເຊື່ອມໂຍງ “ຜົນປະໂຫຍດກຸ່ມ” ທີ່ຜິດກົດໝາຍ, “ເພື່ອຜົນປະໂຫຍດຂອງຕົນເອງ ທຳຮ້າຍຄົນອື່ນ”, ໃຊ້ເງິນສໍ້ລາດບັງຫຼວງເພື່ອຊື້ຕຳແໜ່ງ, ຊື້ຊື່ສຽງ, ໂດຍບໍ່ຄຳນຶງເຖິງຄວາມຊື່ສັດແລະສິນທຳ. ການສໍ້ລາດບັງຫຼວງຍັງຄົງມີຢູ່ເປັນເວລານານ ແລະສັບສົນຂຶ້ນເລື້ອຍໆ, ເຮັດໃຫ້ເກີດຄວາມເຈັບປວດທາງດ້ານສິນລະທຳໃນພັກ, ຫຼຸດຜ່ອນຄວາມໄວ້ວາງໃຈຂອງປະຊາຊົນແລະສັງຄົມ ຕໍ່ການນຳພາຂອງພັກ ແລະ ລະບອບການປົກຄອງ.
ດັ່ງນັ້ນ, ຄວາມເປັນຈິງຂອງຄວາມເສື່ອມໂຊມໃນສິນທຳແລະການດຳເນີນຊີວິດຂອງພະນັກງານ ສະມາຊິກພັກຈຳນວນໜຶ່ງທີ່ບໍ່ໜ້ອຍ ໄດ້ເຮັດໃຫ້ເກີດຜົນກະທົບຢ່າງໜັກໜ່ວງ, ທຳລາຍກຽດສັກສີແລະຊື່ສຽງຂອງພັກ, ເຊິ່ງຖ້າຫາກບໍ່ສະກັດກັ້ນແລະຍູ້ຖອຍຢ່າງເດັດຂາດ ຈະສົ່ງຜົນສະກະທົບຢ່າງຮ້າຍແຮງ ເຖິງການຢູ່ລອດຂອງພັກແລະລະບອບການປົກຄອງ. ອາລົມຈິດສັງຄົມແລະຄວາມປາຖະໜາຂອງປະຊາຊົນໃນເວລານີ້ ແມ່ນຕ້ອງການຢ່າງຈິງຈັງ ແລະ ພ້ອມກັນນັ້ນກໍ່ຮຽກຮ້ອງຢ່າງເຄັ່ງຄັດ ໃຫ້ພັກມີຄວາມບໍລິສຸດແລະເຂັ້ມແຂງ ໂດຍເລີ່ມຕົ້ນຈາກສິນທຳ. ພະນັກງານ ສະມາຊິກພັກຕ້ອງພິສູດໃນຄວາມເປັນຈິງດ້ວຍການກະທຳ ພຶດຕິກຳ ແລະ ການປະພຶດວ່າ ຕົນເອງເປັນຜູ້ມີຈະລິຍະທຳ.
ໂດຍເຫັນແຈ້ງຄວາມຈິງດັ່ງກ່າວ, ໃນກອງປະຊຸມໃຫຍ່ຄັ້ງທີ 12 ຂອງພັກ, ພັກໄດ້ເນັ້ນໜັກບັນຫາ ການກໍ່ສ້າງພັກທາງດ້ານຄຸນສົມບັດສິນທຳ ແລະ ນີ້ແມ່ນໜຶ່ງໃນບັນດາຈຸດໃໝ່, ພື້ນຖານ ແລະ ສຳຄັນທີ່ສຸດ ໃນການເປີດກວ້າງເນື້ອໃນກໍ່ສ້າງພັກ: “ສຸມໃສ່ປະຕິບັດເປົ້າໝາຍ: “ກໍ່ສ້າງພັກໃຫ້ໃສສະອາດ, ໝັ້ນຄົງເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງແລະຄຸນສົມບັດສິນທຳ””(5). ເປັນຄັ້ງທຳອິດທີ່ພັກໄດ້ລວມເນື້ອໃນການກໍ່ສ້າງພັກທາງດ້ານຄຸນສົມບັດສິນທຳ - ເຊິ່ງເປັນເນື້ອໃນສຳຄັນໃນວຽກງານກໍ່ສ້າງພັກ - ໄວ້ໃນເອກະສານ. ກອງປະຊຸມໃຫຍ່ຄັ້ງທີ 13 ຂອງພັກໄດ້ເພີ່ມອົງປະກອງໜຶ່ງອີກເຂົ້າໃນວຽກງານກໍ່ສ້າງພັກ ນັ້ນຄືພະນັກງານ: “ໃນຊຸມປີທີ່ຈະມາເຖິງ ຕ້ອງເອົາໃຈໃສ່ເປັນພິເສດ ແລະ ຍູ້ແຮງການກໍ່ສ້າງແລະປັບປຸງພັກຢ່າງຮອບດ້ານ ທັງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ”(6). ນັ້ນເປັນທັງທິດທາງພຶດຕິກຳ ແລະ ຕົວບົ່ງຊີ້ ເພື່ອປະເມີນຜົນຂອງການກໍ່ສ້າງແລະປັບປຸງພັກໃນປະຈຸບັນ.
ໃນເວລາຕໍ່ໄປ, ເພື່ອເພີ່ມທະວີການອົບຮົມສຶກສາແລະຝຶກຝົນຫຼໍ່ຫຼອມຄຸນສົມບັດປະຕິວັດໃຫ້ຖັນແຖວພະນກງານ ສະມາຊິກພັກຕາມແນວຄິດໂຮ່ຈີມິນ, ຈຳເປັນຕ້ອງເອົາໃຈໃສ່ເປັນພິເສດເຖິງເນື້ອໃນຈຳນວນໜຶ່ງດັງຕໍ່ໄປນີ້:
ທີໜຶ່ງ, ພະນັກງານ ສະມາຊິກພັກທຸກຄົນຕ້ອງຕື່ນຕົວສະໝັກໃຈຮ່ຳຮຽນແລະຝຶກຝົນຫຼໍ່ຫຼອມຄຸນສົມບັດປະຕິວັດຕາມແນວຄິດ, ຄຸນສົມບັດສິນທຳ ແລະ ແບບແຜນໂຮ່ຈີມິນ. ສິ່ງນີ້ຕ້ອງໄດ້ຮັບການກຳນົດວ່າເປັນມາດຕະການທີ່ສຳຄັນທີ່ສຸດ, ແມ່ນໜ້າທີ່ປະຈຳແລະໄລຍະຍາວ ໃນພາລະກິດການປະຕິວັດຫວຽດນາມ. ການຮ່ຳຮຽນ, ການຮຽນຮູ້ດ້ວຍຕົນເອງ ເພື່ອຍົກສູງຄວາມຮູ້ຂອງພະນັກງານ ສະມາຊິກພັກກ່ຽວກັບຄຸນສົມບັດປະຕິວັດນັ້ນ ຕ້ອງໄດ້ດຳເນີນເປັນປະຈໍາ, ຕໍ່ເນື່ອງ.
ທີສອງ, ຍົກສູງຄຸນນະພາບຂອງວຽກງານກໍ່ສ້າງແລະປັບປຸງພັກ. ສິ່ງນີ້ຖືກລະບຸວ່າເປັນຂັ້ນຕອນສຳຄັນໃນການສົ່ງເສີມຄວາມຮູ້ສຶກຮັບຜິດຊອບຂອງພະນັກງານ ສະມາຊິກພັກ, ຕ້ານລັດທິອັດຕະບຸກຄົນ, ເວົ້າຄວບຄູ່ກັບເຮັດ, ແກ້ໄຂຜ່ານຜ່າສະພາບຄວາມເສື່ອມໂຊມທາງຄຸນສົມບັດສິນທຳ, ວິຖີຊີວິດຂອງພະນັກງານ ສະມາຊິກພັກຈຳນວນໜຶ່ງໃນປະຈຸບັນ.
ເພື່ອປະຕິບັດເນື້ອໃນນີ້ໃຫ້ໄດ້ເປັນຢ່າງດີ, ຕ້ອງກຳແໜ້ນບັນດາຫຼັກການຈັດຕັ້ງແລະເຄື່ອນໄຫວຂອງພັກ, ເສີມຂະຫຍາຍປະຊາທິປະໄຕໃນພັກ, ປະຕິບັດການຕິຊົມຕົນເອງແລະຕິຊົມໃຫ້ດີ, ປະຕິບັດຢ່າງເຄັ່ງຄັດ ມະຕິແລະກົດລະບຽບຂອງພັກກ່ຽວກັບການປະຕິບັດໜ້າທີ່ເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນຫົວໜ້າ(7).
ທີສາມ, ໃຫ້ຄວາມສຳຄັນກັບການສ້າງລະບຽບການເຮັດວຽກ, ກຳນົດສິດທິແລະໜ້າທີ່ຄວາມຮັບຜິດຊອບຂອງແຕ່ລະບຸກຄົນ ແລະ ອົງການຢ່າງຈະແຈ້ງ; ພ້ອມກັນນັ້ນ, ເພີ່ມທະວີການກວດກາ, ຕິດຕາມກວດກາການປະຕິບັດພາລະບົດບາດແລະໜ້າທີ່ ຂອງແຕ່ລະຊຸກຄົນ, ອົງການ. ດ້ານໜຶ່ງ, ເພື່ອໃຫ້ພະນັກງານ ສະມາຊິກພັກແຕ່ລະຄົນຍົກສູງຄວາມຮັບຜິດຊອບນັ້ນ, ຄວາມຕ້ອງການທໍາອິດແມ່ນກໍານົດຄວາມຮັບຜິດຊອບແລະຫນ້າທີ່ຂອງແຕ່ລະຄົນຢ່າງຊັດເຈນ, ຈາກນັ້ນ ການເຄື່ອນໄຫວຂອງແຕ່ລະຄົນ ແຕ່ລະອົງການຈັດຕັ້ງຈຶ່ງມີປະສິດທິຜົນ. ຄວາມເປັນຈິງໃຫ້ເຫັນວ່າ, ຕ້ອງມີຄວາມຮັບຜິດຊອບ, ມີສິດຂອບເຂດຢ່າງຈະແຈ້ງ, ແຕ່ລະຄົນຈຶ່ງຈະສາມາດປະກອບສ່ວນຕົວຈິງໃຫ້ແກ່ອົງການ, ຈຶ່ງ “ເວົ້າຄວບຄູ່ກັບເຮັດ”, ເຂົ້າຮ່ວມກຸ່ມຕໍ່ຕ້ານລັດທິອັດຕະບຸກຄົນ. ດ້ານອື່ນ, ເພື່ອລະດົມກຳລັງໃຈ ແລະສົ່ງເສີມຈິດໃຈຮັບຜິດຊອບ ແລະ ຈຳກັດຄວາມຂີ້ຄ້ານ, ຂາດຄວາມຮັບຜິດຊອບ, ຄວາມເພິ່ງພາອາໃສ, ຄວາມຄິດຫາຜົນປະໂຫຍດສ່ວນຕົວ ຂອງພະນັກງານ ສະມາຊິກພັກນັ້ນ, ຈຳເປັນຕ້ອງເພີ່ມທະວີວຽກງານກວດກາ, ຕິດຕາມກວດກາການປະຕິບັດໜ້າທີ່, ສິດຂອບເຂດຂອງພະນັກງານ ສະມາຊິກພັກ. ພ້ອມກັນນັ້ນ ກໍຄົ້ນເຜີຍ ແລະ ຈັດການຢ່າງທັນການຕໍ່ພະນັກງານ ສະມາຊິກພັກທີ່ຝ່າຝືນຄຸນນະພາບ, ເສື່ອມເສຍຄຸນສົມບັດ, ວິຖີຊີວິດ, ສວຍໂອກາດ, ບໍ່ພໍໃຈ, ກໍ່ໃຫ້ເກີດຄວາມແຕກແຍກພາຍໃນພັກ, ລະເມີດຫຼັກການການຈັດຕັ້ງແລະການດຳເນີນຊີວິດພັກ.
ທີສີ່, ປັບປຸງບູລະນະກົນໄກ ນະໂຍບາຍ ກົດໝາຍຢ່າງບໍ່ຢຸດຢັ້ງ ຕິດພັນກັບການເພີ່ມທະວີຄວາມເຂັ້ມງວດຂອງວິໄນພັກ ແລະ ກົດໝາຍຂອງລັດ. ຂະບວນການປ່ຽນແປງໃໝ່ແລະການເຊື່ອມໂຍງເຂົ້າກັບສາກົນ, ການສ້າງລັດແຫ່ງອຳນາດກົດໝາຍສັງຄົມນິຍົມໃນປະຈຸບັນ ມີຄວາມຈຳເປັນທີ່ສຸດທີ່ຈະຕ້ອງເລັ່ງລັດປັບປຸງກົນໄກ ນະໂຍບາຍ ແລະ ກົດໝາຍໃຫ້ຄົບຖ້ວນ ເພື່ອຈຳກັດ “ຊ່ອງຫວ່າງ” ທີ່ຖືກໂອກາດໄດ້ງ່າຍ; ໂດຍສະເພາະແມ່ນຕ້ອງເພີ່ມທະວີລະບຽບວິໄນ ແລະ ຄວາມເຂັ້ມງວດຂອງກົດໝາຍ ເພື່ອປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ອົງການລັດ. ພ້ອມກັນນັ້ນ, ເພີ່ມທະວີແລະເສີມຂະຫຍາຍປະຊາທິປະໄຕໃນພັກ ແລະ ປະຕິບັດລະບຽບວິໄນຂອງພັກຢ່າງເຂັ້ມງວດ; ຈັດການກັບພະນັກງານ ສະມາຊິກພັກທີ່ລະເມີດລະບຽບວິໄນໂດຍທັນການແລະເປີດເຜີຍ ໂດຍບໍ່ຄຳນຶງເຖິງຕຳແໜ່ງແລະຄວາມຮັບຜິດຊອບຂອງພວກເຂົາ; ຕໍ່ສູ້ກັບນິໄສທີ່ບໍ່ດີແລະຄວາມຊົ່ວຮ້າຍໃນພັກຢ່າງເດັດດ່ຽວ.
ທີຫ້າ, ເສີມຂະຫຍາຍບົດບາດຂອງແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ-ສັງຄົມ ແລະ ປະຊາຊົນທຸກຊັ້ນວັນນະ ໃນການຕິດຕາມກວດກາພະນັກງານ ລັດຖະກອນ. ນີ້ແມ່ນວິທີແກ້ໄຂບັນຫາທີ່ຮີບດ່ວນແລະໄລຍະຍາວ ຂອງວຽກງານກໍ່ສ້າງພັກ, ກໍຄືໃນການປ້ອງກັນແລະຕ້ານລັດທິອັດຕະບຸກຄົນ ແລະ ກີດກັ້ນສະພາບຄວາມເສື່ອມໂຊມທາງດ້ານຄຸນສົມບັດສິນທຳ, ວີຖິຊີວິດ ຂອງພະນັກງານ ສະມາຊິກພັກຈຳນວນໜຶ່ງໃນປະຈຸບັນ. ຄຽງຄູ່ກັນນັ້ນ, ຕ້ອງເສີມຂະຫຍານດ້ານຕັ້ງໜ້າຂອງຫາງສຽງສັງຄົມ ແລະ ພາຫະນະສື່ມວນຊົນໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຕ້ານຄວາມຫຍໍ້ທໍ້ເລວຊາມ. ການນຳວິທີແກ້ບັນການີ້ໄປປະຕິບັດຢ່າງດີ ຈະປະກອບສ່ວນສຶກສາອົບຮົມ ແລະ ກ່າວເຕືອນພະນັກງານ ສະມາຊິກພັກທຸກຄົນ, ແລະ ຕໍ່ສູ້ປ້ອງກັນ, ສະກັດກັ້ນການເສື່ອມໂຊມດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ./.
----------------
(1) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 15, ໜ້າ 622.
(2) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 14, ໜ້າ 619.
(3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 15, ໜ້າ 622.
(4) ຫງວຽນ ຝູຈ້ອງ: “ອອກແຮງຮ່ຳຮຽນ, ພະຍາຍາມສູ້ຊົນ ແລະ ຝຶກຝົນຫຼໍ່ຫຼອມ, ປະຕິບັດຕາມແນວຄິດ, ຄຸນສົມບັດ, ແບບແຜນຂອງປະທານໂຮ່ຈິີມິນຢ່າງບໍ່ຢຸດຢັ້ງ”, ວາລະສານກອມມູນິດ, ສະບັບທີ 968, ເດືອນມິຖຸນາ 2021, ໜ້າ 5.
(5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12, ຫ້ອງການສູນກາງພັກ, ຮ່າໂນ້ຍ, 2016, ໜ້າ 202.
(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 180.
(7) ເຊັ່ນ: ກົດລະບຽບເລກທີ 101-QD/TW ລົງວັນທີ 7 ມິຖຸນາ 2012 ຂອງຄະນະເລຂາທິການສູນກາງ, “ວ່າດ້ວຍຄວາມຮັບຜິດຊອບເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນພະນັກງານນຳພາຫຼັກແຫຼ່ງຂັ້ນຕ່າງໆ”; ກົດລະບຽບເລກທີ 08-QD/TW ລົງວັນທີ 25 ຕຸລາ 2018 ຂອງຄະນະບໍລິຫານງານສູນກາງ, “ວ່າດ້ວຍຄວາມຮັບຜິດຊອບເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນກຳມະການກົມການເມືອງ, ກຳມະການຄະນະເລຂາທິການ, ກຳມະການຄະນະບໍລິຫານງານສູນກາງ”;...
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 996 (ເດືອນສິງຫາ 2022)