ສ້າງໂລກໄຊເບີທີ່ປອດໄພແລະສົດໃສ,
ຮັບປະກັນບໍລິການທີ່ດີ ສໍາລັບກິດຈະກໍາຂໍ້ມູນ,
ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ
ຮັບປະກັນບໍລິການທີ່ດີ ສໍາລັບກິດຈະກໍາຂໍ້ມູນ,
ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ
ການພັດທະນາຢ່າງບໍ່ຢຸດຢັ້ງຂອງເຕັກໂນໂລຊີຂໍ້ມູນຂ່າວສານ ແລະ ການປະຍຸກໃຊ້ອິນເຕີເນັດເຮັດໃຫ້ເກີດພຶ້ນທີ່ຍຸດທະສາດໃໝ່ ທີ່ເອີ້ນວ່າ “ໂລກໄຊເບີ” (cyberspace - ໄຊເບີສະເປດ) ທີ່ນຳມາເຊິ່ງໂອກາດໃນການພັດທະນາຫຼວງຫຼາຍ ພ້ອມດ້ວຍຄວາມທ້າທາຍໃນທຸກດ້ານ ຂອງຊີວິດສັງຄົມໃນປະເທດຕ່າງໆ. ໃນຫວຽດນາມ, ຂໍ້ມູນຂ່າວສານ ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ ຖືເປັນໜຶ່ງໃນບັນດາຂົງເຂດທຳອິດທີ່ໄດ້ຮັບຜົນກະທົບຈາກໂລກໄຊເບີ.
ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໄດ້ເນັ້ນວ່າ: “ຍົກສູງຄຸນນະພາບ, ຮັບປະກັນຄວາມສະຫງົບ, ຄວາມປອດໄພຂອງລະບົບຂໍ້ມູນຂ່າວສານ, ໜັງສືພິມ, ອິນເຕີເນັດ, ການພິມຈຳໜ່າຍ; ເພີ່ມທະວີຄວາມສາມາດໃນການຄຸ້ມຄອງໂລກໄຊເບີ. ກໍ່ສ້າງອົງການຂ່າວ ແລະ ສຳນັກສື່ມວນຊົນທີ່ສຳຄັນ ໃຫ້ມີຄວາມແຂງແຮງພໍທີ່ຈະປະຕິບັດພາລະໜ້າທີ່ສື່ຂ່າວໂຄສະນາການທີ່ຈຳເປັນໄດ້ເປັນຢ່າງດີ ແລະ ເປັນເຈົ້າໃນແນວຮົບຂໍ້ມູນຂ່າວສານ”(1). ໂດຍຮັບຮູ້ເຖິງຄວາມສຳຄັນຂອງໂລກໄຊເບີ ຕໍ່ຊີວິດແນວຄິດ ວັດທະນະທຳ ແລະ ຄຸນສົມບັດສິນທຳຂອງປະຊາຊົນ, ໂດຍສະເພາະເຍົາວະຊົນລຸ້ນໃໝ່, ໃນວັນທີ 5 ມີນາ 2022, ນາຍົກລັດຖະມົນຕີອອກມະຕິຕົກລົງເລກທີ 311/QĐ-TTg, ອະນຸມັດໂຄງການສຶກສາອຸດົມຄະຕິປະຕິວັດ, ຄຸນສົມບັດ, ແບບແຜນດຳລົງຊີວິດ, ວັດທະນະທຳ ສຳລັບເຍົາວະຊົນແລະຊາວໜຸ່ມ ໃນໂລກໄຊເບີ ໃນໄລຍະປີ 2022-2030.
ບົດບາດຂອງໂລກໄຊເບີໃນຊີວິດວັດທະນະທຳ
ແລະ ແນວຄິດຂອງຫວຽດນາມໃນປະຈຸບັນ
ທີໜຶ່ງ, ໂລກໄຊເບີມີບົດບາດສຳຄັນໃນການສ້າງລະບົບແນວຄິດຫຼັກ ຂອງປະເທດ.
ໃນຊຸມປີທີ່ຜ່ານມາ, ພັກ ແລະ ລັດຫວຽດນາມ ຍາມໃດກໍ່ໃຫ້ຄວາມສຳຄັນກັບການພັດທະນາອິນເຕີເນັດ, ຈາກນັ້ນ, ມີແຜນນະໂຍບາຍ ແນວທາງ ນະໂຍບາຍ ແລະ ກົດໝາຍໃນການແກ້ໄຂສາຍພົວພັນ ລະຫວ່າງສະຖຽນລະພາບແລະການພັດທະນາ, ປະຊາທິປະໄຕແລະລະບຽບວິໄນຢ່າງເໝາະສົມ; ຜ່ານນັ້ນ ບັນລຸຜົນສຳເລັດທີ່ສຳຄັນ, ຊຸກຍູ້ການພັດທະນາໂລກໄຊເບີ.
ເຖິງເດືອນມັງກອນ 2022, ຢູ່ຫວຽດນາມ ມີຜູ້ໃຊ້ອິນເຕີເນັດ 72,1 ລ້ານຄົນ, ເທົ່າກັບ 73,2% ຂອງປະຊາກອນທົ່ວປະເທດ (ເພີ່ມຂຶ້ນ 4,9% ເມື່ອທຽບກັບປີ 2021), ຜູ້ໃຊ້ສື່ສັງຄົມ 76,95 ລ້ານຄົນ, ກວມເອົາ 78,1% ຂອງປະຊາກອນທັງໝົດ (ເພີ່ມຂຶ້ນ 6,9% ເມື່ອທຽບກັບປີ 2021). ອັດຕາສ່ວນຜູ້ໃຊ້ບໍລິການມືຖືທີ່ໃຊ້ໂທລະສັບສະຫຼາດກວມເອົາ 94,6%, ສູງກວ່າລະດັບສະເລ່ຍຂອງໂລກ. ເວລາສະເລ່ຍໃນການໃຊ້ອິນເຕີເນັດຕໍ່ວັນຂອງບຸກຄົນແມ່ນ 6 ຊົ່ວໂມງ 38 ນາທີ, ໂດຍເຂົ້າເຖິງຈາກໂທລະສັບມືຖືແມ່ນ 3 ຊົ່ວໂມງ 32 ນາທີ, ຈາກອຸປະກອນອື່ນໆແມ່ນ 3 ຊົ່ວໂມງ 6 ນາທີ, ມີເວລາໃຊ້ສື່ສັງຄົມ 2 ຊົ່ວໂມງ 28 ນາທີ. ສື່ສັງຄົມທີ່ຖືກນຳໃຊ້ຫຼາຍທີ່ສຸດໃນຫວຽດນາມຕາມລຳດັບດັງນີ້ Facebook, Zalo, Facebook Messenger, Tiktok, Instagram, Twitter, Telegram, Pinterest,... ສະເພາະສື່ສັງຄົມ Facebook ມີຜູ້ໃຊ້ 70,4 ລ້ານຄົນ(2). ສິ່ງນີ້ສະແດງໃຫ້ເຫັນວ່າ, ໂລກໄຊເບີເປັນທີ່ຮັກຂອງຊາວຫວຽດນາມສ່ວນໃຫຍ່ ແລະ ປະຕິບັດການການພົວພັນແລກປ່ຽນທາງສັງຄົມ.
ໂລກໄຊເບີກໍ່ແມ່ນ “ພື້ນທີ່ສະແດງຄວາມຄິດເຫັນສັງຄົມ” ຂະໜາດໃຫຍ່ ເຊິ່ງຂໍ້ມູນຂ່າວສານ (ໃນຮູບແບບຕ່າງໆ) ເປັນສາຍທີ່ເບິ່ງບໍ່ເຫັນ ທີ່ເຊື່ອມໂຍງຜູ້ເຂົ້າຮ່ວມທັງໝົດ. ພິຈາລະນາທາງດ້ານປະລິມານ, ບໍ່ມີອົງການຫຼືຊຸມຊົນອື່ນໃດທີ່ມີສະມາຊິກຈຳນວນຫຼາຍເທົ່າກັບຊຸມຊົນອອນໄລ. ພິຈາລະນາທາງດ້ານຜູ້ຊົມ, ບໍ່ມີອົງການຫຼືຊຸມຊົນອື່ນໃດທີ່ມີຜູ້ຊົມທີ່ຫຼາກຫຼາຍຄືໂລກໄຊເບີ, ເພາະວ່າ ທຸກຄົນສາມາດເຂົ້າຮ່ວມໄດ້ ໂດຍບໍ່ມີການຈຳແນກທາງເພດ ອາຍຸ ອາຊີບ ເຊື້ອຊາດ ສັນຊາດ. ພິຈາລະນາທາງດ້ານລັກສະນະ, ບໍ່ມີ “ສະໜາມຫຼິ້ນ” ໃດທີ່ມີລະດັບເສລີພາບເພື່ອໃຫ້ແຕ່ລະຄົນສະແດງທັດສະນະ ຫຼັກໝັ້ນ ບຸກຄະລິກຂອງຕົນໄດ້ຢ່າງເຕັມທີ ຄືໃນໂລກໄຊເບີ. ພິຈາລະນາທາງດ້ານການເມືອງ, ໂລກໄຊເບີແມ່ນພື້ນທີ່ໃນອຸດົມຄະຕິ ເພື່ອປະຕິບັດເປົ້າໝາຍຂອງການຕໍ່ສູ້ທາງດ້ານແນວຄິດ, ຍຸດທະສາດຂໍ້ມູນຂ່າວສານ ແລະ ການສື່ສານ ຂອງບັນດາອັດຕະພາບ ດ້ວຍບັນດາກິດຈະກຳໂຄສະນາເຜີຍແຜ່, ສ້າງຫາງສຽງ ແລະ ແນະນຳຄວາມຄິດເຫັນ… ໂລກໄຊເບີເຮັດໃຫ້ລັກສະນະສັບສົນໃນແນວຮົບແນວຄິດ ສະແດງອອກຢ່າງເລິກເຊິ່ງ ແລະ ຜັນແປປ່ຽນນັບມື້ນັບຄາດເດົາຍາກ. ສຳລັບແຕ່ລະປະເທດ, ການຄວບຄຸມຊີວິດດ້ານແນວຄິດໃນໂລກໄຊເບີແມ່ນໜ້າທີ່ສຳຄັນ ເພື່ອປົກປັກຮັກສາອຳນາດອະທິປະໄຕ ແລະ ກຳລັງແຮງດ້ານການເມືອງຂອງປະເທດ.
ຢູ່ຫວຽດນາມໃນປະຈຸບັນ, ໂລກໄຊເບີແມ່ນບ່ອນທີ່ຕ້ອງໄດ້ຮັບບຸລິມະສິດໃຫ້ຈັດຕັ້ງປະຕິບັດລະບົບແນວຄິດຊີ້ນຳ. ຈຳເປັນຕ້ອງປ່ຽນໂລກໄຊເບີເປັນ “ພື້ນທີ່ອຸດົມສົມບູນ” ເພື່ອປູກຝັງ “ເມັດພັນ” ທາງອຸດົມການທີ່ດີຂອງລັດທິມະນຸດນິຍົມ, ຄວາມກ້າວໜ້າ ແລະ ສັນຕິພາບ. ໂລກໄຊເບີຕ້ອງໄດ້ຮັບການປະຍຸກໃຊ້, ນຳໃຊ້ ແລະ ເສີມຂະຫຍາຍຢ່າງແຂງແຮງ ໃນການສ້າງລະບົບແນວຄິດຕົ້ນຕໍຂອງປະເທດ, ປະກອບສ່ວນສ້າງປະເທດໃຫ້ເຂັ້ມແຂງແຮງກ້າ ແລະ ຈະເລີນຮຸ່ງເຮືອງ.
ທີສອງ, ໂລກໄຊເບີປະກອບສ່ວນສົ່ງເສີມການພັດທະນາວັດທະນະທໍາ ແລະແນວຄິດ.
ໃນປະຈຸບັນ, ໂລກໄຊເບີແມ່ນສູນກາງເຜີຍແຜ່ຂໍ້ມູນຂ່າວສານ. ການແລກປ່ຽນ ແລະ ການປະສົມປະສານບັນດາກະແສຄວາມຄິດ ແລະ ບັນດາຄຸນຄ່າທາງວັດທະນະທຳທີ່ຫຼາກຫຼາຍ ຊ່ວຍເສີມສ້າງຊີວິດທາງແນວຄິດ ແລະ ວັດທະນະທຳ, ເປີດກວ້າງວິໄສທັດ, ຊຸກຍູ້ການເຝິກຝົນບຸກຄະລິກກະພາບ ແລະ ພັດທະນາສະຕິປັນຍາຂອງມະນຸດ. ໂລກໄຊເບີແມ່ນພື້ນຖານໃຫຍ່ໃຫ້ແກ່ຂໍ້ມູນຂ່າວສານ ແລະ ຄວາມຄິດເຫັນສັງຄົມ, ໃນນັ້ນມີຊາວເນັດຫຼາຍລ້ານຄົນ ໄດ້ຮັບຂໍ້ມູນຂ່າວສານ ແລະ ແລກປ່ຽນຂໍ້ມູນຂ່າວສານ. ສິ່ງນີ້ສົ່ງຜົນກະທົບສຳຄັນຕໍ່ວິທີການສະແຫວງຫາຄວາມຮູ້, ວິທີການນຶກຄິດ, ວິທີການເບິ່ງຊີວິດ ແລະ ກິດຈະກໍາທາງສັງຄົມ, ໂດຍສະເພາະເຍົາວະຊົນລຸ້ນໃໝ່. ຍ້ອນແນວນັ້ນ, ເພື່ອກໍ່ສ້າງປະເທດໃຫ້ມີໂລກໄຊເບີທີ່ແຂງແຮງ ກະຕືລືລົ້ນ ປອດໄພ ແລະ ພັດທະນາຢ່າງແທ້ຈິງ, ພວກເຮົາຕ້ອງມີພື້ນຖານແນວຄິດທີ່ໝັ້ນຄົງ ແລະ ວັດທະນະທຳທີ່ມີຊີວິດຊີວາ. ເຖິງເວລານັ້ນເທົ່ານັ້ນ, ເຮົາຈຶ່ງຈະສາມາດ “ຕ້ານທານ” ແລະ ລົບລ້າງຂໍ້ມູນເສດສັນປັ້ນແຕ່ງ, ຜິດພາດ ຫຼືຄວາມຄິດທີ່ບິດເບືອນແລະປະຕິການ; ບັນດາປະກົດການເສື່ອມໂຊມທາງວັດທະນະທຳກຳລັງແຜ່ກະຈາຍ ແລະ ເຜີຍແຜ່ໃນໂລກໄຊເບີ, ກໍ່ໃຫ້ເກີດຄວາມຫວາດຫວັ່ນ ແລະ ບໍ່ໄວ້ວາງໃຈໃນໝູ່ປະຊາຊົນ, ເຮັດໃຫ້ພື້ນຖານວັດທະນະທຳ ແລະ ລະບົບແນວຄິດທາງການຖືກລົດຜ່ອນອອ່ນເພຍລົງ, ປ່ຽນແປງບັນດາຄຸນຄ່າວັດທະນະທຳ, ຄວາມເຊື່ອ ແລະ ປະຫວັດສາດຂອງປະເທດຊາດ.
ທີສາມ, ໂລກໄຊເບີມີຜົນກະທົບເຖິງຜົນປະໂຫຍດຂອງປະຊາຊົນ ແລະ ຄວາມໝັ້ນຄົງແລະການພັດທະນາຂອງສັງຄົມ.
ໃນແງ່ຂອງການຄຸ້ມຄອງລັດ, ໂລກໄຊເບີຊ່ວຍເພີ່ມຄວາມຍືດຫຍຸ່ນໃນກິດຈະກຳການຄຸ້ມຄອງລັດ ແລະ ປັບປຸງຄວາມຄ່ອງຕົວຂອງລະບົບຮັກສາຄວາມປອດໄພທີ່ສຳຄັນຂອງປະເທດ. ຄຽງຄູ່ກັບບັນດາຂໍ້ໄດ້ປຽບເຫຼົ່ານີ້, ໂລກໄຊເບີຍັງມີຄວາມສ່ຽງສູງຢູ່ສະເໝີ, ນັ້ນຄື: 1- ຄວາມສ່ຽງທີ່ຈະທຳລາຍພາລະໜ້າທີ່ບໍລິຫານຂອງລັດ; 2- ຄວາມສ່ຽງທີ່ຈະທຳລາຍການຈັດຕັ້ງ ແລະ ປິດໃຊ້ງານລະບົບຮັກສາຄວາມປອດໄພທີ່ສຳຄັນຂອງປະເທດ; 3- ຄວາມສ່ຽງທີ່ຈະປັບຈິດສຳນຶກທາງສັງຄົມຄືນໃໝ່(3).
ຄວາມເປັນຈິງໃຫ້ເຫັນວ່າ, ໃນປີ 2021 ພຽງປີດຽວ, ຄວາມເສຍຫາຍທີ່ເກີດຈາກອາຊະຍາກຳທາງໄຊເບີໃນທົ່ວໂລກປະມານ 102,3 ລ້ານໂດລາສະຫະລັດຕໍ່ເດືອນ. ຢູ່ຫວຽດນາມ, ອາຊະຍາກຳເຕັກໂນໂລຊີສູງປະເພດຕ່າງໆ ກໍ່ຊອກຫາວິທີໂຈມຕີເຂົ້າໃນລະບົບຂໍ້ມູນຂ່າວສານທີ່ສຳຄັນ ກ່ຽວກັບຄວາມໝັ້ນຄົງຂອງຊາດ, ບັນດາຂະແໜງການຄົມມະນາຄົມ-ຂົນສົ່ງ, ການເງິນ, ທະນາຄານ… ແນໃສ່ຢຶດເອົາເອກະສານປິດລັບຂອງລັດ, ຂໍ້ມູນລູກຄ້າ, ກໍ່ຜົນຮ້າຍທີ່ຮ້າຍແຮງຫຼາຍຢ່າງ. ຕາມຂໍ້ມູນຈາກກົມປ້ອງກັນຄວາມປອດໄພທາງໄຊເບີ ແລະ ປ້ອງກັນແລະຕ້ານອາຊະຍາກຳເຕັກໂນໂລຊີສູງ, ກະຊວງປ້ອງກັນຄວາມສະຫງົບ, ໃນ 5 ເດືອນຕົ້ນປີ 2022, ກະຊວງປ້ອງກັນຄວາມສະຫງົບໄດ້ກວດພົບ ແລະ ວິເຄາະຄຳເຕືອນແລະສັນຍານຫຼາຍກວ່າ 8 ລ້ານລາຍການ ທີ່ກ່ຽວຂ້ອງກັບການເຄື່ອນໄຫວໂຈມຕີທາງໄຊເບີ. ໃນນັ້ນ, ກວດພົບ, ກວດສອບ ແລະ ຈັດການກັບການໂຈມຕີທາງໄຊເບີເກືອບ 400 ລາຍການ ຢູ່ໃນເວັບໄຊແລະປະຕູເອເລັກໂຕຮນິກໃນປະເທດ; ຄົ້ນພົບທີ່ຢູ່ IP ເກືອບ 1.000 ລາຍການໃນປະເທດທີ່ໃຊ້ປະໂຫຍດຈາກຊ່ອງໂວ່ດ້ານຄວາມປອດໄພ, ຕິດໄວຣັດໂຄ້ດອັນຕະລາຍ ທີ່ຢູ່ໃນເຄືອຂ່າຍຄອມຜິວເຕີ “ຜີ” ຂອງແຮັກເກີ. ພ້ອມກັນນັ້ນ, ກວດຈັບແລະຈັດການຄະດີສະເພາະແລະລາຍຄະດີ 840 ຄະດີທີ່ກ່ຽວຂ້ອງກັບອາຊະຍາກຳທາງໄຊເບີ, ອາຊະຍາກຳໂດຍໃຊ້ເຕັກໂນໂລຊີສູງ (ເພີ່ມຂຶ້ນ 42% ເມື່ອທຽບກັບ 6 ເດືອນທີ່ຜ່ານມາຂອງປີ 2021)(4).
ໂລກໄຊເບີແມ່ນ “ເຮືອນ” ຮ່ວມກັນຂອງຊຸມຊົນອອນໄລ, ດັງນັ້ນ ບັນດາສະມາຊິກໃນນັ້ນລ້ວນໄດ້ຮັບຜົນກະທົບຈາກມັນ. ໂລກໄຊເບີແມ່ນສະເໝືອນຈິງ ແຕ່ຜູ້ໃຊ້ແມ່ນຕົວຈິງ, ແລະ ບັນດາຜູ້ເຂົ້າຮ່ວມຕ້ອງໄດ້ຮັບການຮັບຮອງຈາກເຄືອຊ່າຍທີ່ເໝາະສົມ ແລະ ປອດໄພ ໂດຍລະບົບຂໍ້ບັງຄັບທາງກົດໝາຍສາກົນແລະໃນປະເທດ ເຊິ່ງຊີ້ແຈງສິດທິແລະພັນທະຂອງຝ່າຍຕ່າງໆທີ່ກ່ຽວຂ້ອງ.
ທີສີ່, ໂລກໄຊເບີແມ່ນຈຸດໃຈກາງໃນການຕໍ່ສູ້ດ້ານແນວຄິດ ເພື່ອປົກປ້ອງພື້ນຖານແນວຄິດຂອງພັກໃນປະຈຸບັນ.
ການພັດທະນາຢ່າງໄວວາຂອງເຕັກໂນໂລຊີຂໍ້ມູນຂ່າວສານແລະອິນເຕີເນັດ ໄດ້ປ່ຽນແປງວິທີການສ້າງ ເຜີຍແຜ່ ແລະ ຊີ້ນຳຄວາມຄິດເຫັນສັງຄົມຢ່າງເລິກເຊິ່ງ. ສະຖານະການໃໝ່ໆ ແລະ ບັນຫາໃໝ່ໆ ໃນດ້ານແນວຄິດເກີດຂຶ້ນແລະເພີ່ມຂຶ້ນໃນໂລກໄຊເບີ; ທັດສະນະທີ່ຜິດ ເປັນປະຕິປັກ, ແນວຄິດປະຕິການແລະຈັດໂພດຈຳນວນຫຼາຍຍັງຖືກສ້າງຂຶ້ນ ແລະ “ໝັກ” ໃນສະພາບແວດລ້ອມຂອງໂລກໄຊເບີນີ້.
ຢູ່ຫວຽດນາມໃນປະຈຸບັນ, ບັນດາອິດທິກຳລັງສັດຕູໃນປະເທດແລະຕ່າງປະເທດ ພວມພະຍາຍາມນຳໃຊ້ໂລກໄຊເບີ ເພື່ອປ້າຍສີພາບພົດຂອງປະເທດ ແລະ ເຮັດໃຫ້ຖານະບົດບາດຂອງປະເທດ ລວມເຖິງລະບົບການເມືອງ ເສື່ອມເສຍໄປ. ພວກມັນເພີ່ມທະວີການຕ້ານຢັນທຳລາຍພັກກອມມູນິດຫວຽດນາມ ແລະ ລະບົບແນວຄິດສັງຄົມນິຍົມ, ໃສ່ຮ້າຍປ້າຍສີການນຳພັກແລະລັດ, ເຜີຍແຜ່ຄວາມຄິດທີ່ເປັນສັດຕູ, ຍຸຍົງໃຫ້ເກີດຄວາມຄຽດແຄ້ນ, ບໍ່ພໍໃຈ, ຂັດແຍ້ງ… ໃນຊຸມປີມໍ່ໆມານີ້, ການໂຈມຕີທາງໄຊເບີ ແລະ ການກະທຳທີ່ກໍ່ກວນ ແລະ ກໍ່ວິນາດສະກຳດ້ານຄວາມປອດໄພ ທັງແບບດັ້ງເດີມແລະບໍ່ເປັນແບບດັ້ງເດີມ ໃນໂລກໄຊເບີ ໄດ້ເພີ່ມຂຶ້ນດ້ວຍກົນອຸບາຍທີ່ເລິກແລບແນບນຽນ ແລະ ອັນຕະລາຍທີ່ສຸດ, ກໍ່ໃຫ້ເກີດຄວາມເສຍຫາຍຮ້າຍແຮງ. ນັ້ນແມ່ນການເຄື່ອນໄຫວເຜີຍແຜ່ຂ່າວປອມ ຂ່າວຮ້າຍ ອັນຕະລາຍ, ລົບກວນຊີວິດສັງຄົມ, ໂດຍສະເພາະແມ່ນຊີວິດແນວຄິດ ແລະ ການເມືອງໃນປະຊາຊົນທຸກຊົນຊັ້ນ. ຫວຽດນາມມັກຈະຢູ່ໃນ 3 ອັນດັບຕົ້ນຂອງປະເທດທີ່ຖືກໂຈມຕີທາງໄຊເບີຫຼາຍທີ່ສຸດໃນປີ 2018, 2019, 2020 ແລະ ເປັນປະເທດທີ່ມີອັດຕາການພົບ ແຣນຊັມແວ ສູງທີ່ສຸດໃນພາກພື້ນອາຊີ-ປາຊີຟິກ ໃນປີ 2019(5)… ໃນເວລາທີ່ຜ່ານມາ, ຫວຽດນາມໄດ້ຄົ້ນພົບເວັບໄຊ, ບລ໊ອກ, ບັນຊີເຄືອຂ່າຍສັງຄົມກວ່າ 3000 ແຫ່ງ ແລະ ສະມາຄົມແລະກຸ່ມເກືອບ 100 ແຫ່ງໃນ Facebook ທີ່ລົງພິມຂ່າວ ຂໍ້ມູນຕໍ່ຕ້ານພັກແລະລັດເປັນປະຈຳ, ຍຸຍົງກໍ່ຄວາມວຸ່ນວາຍຕໍ່ຄວາມໝັ້ນຄົງ ຄວາມປອດໄພ ແລະ ຄວາມສະຫງົບຮຽບຮ້ອຍ, ຍຸຍົງໃຫ້ເກີດການຊຸມນຸມປະທ້ວງ, ການຈະລາຈົນ, ປະຕິບັດ “ການປະຕິວັດສີ”, “ການປະຕິວັດຕາມຖະໜົນ", ລົບກວນຊີວິດ ແລະ ຄວາມໝັ້ນຄົງທາງດ້ານແນວຄິດ ແລະ ການເມືອງໃນປະເທດ,…(6).
ໂລກໄຊເບີໄດ້ກາຍເປັນ “ດິນແດນພິເສດ” ແຫ່ງທີ່ 5 ຂອງປະເທດ ຖັດຈາກແຜ່ນດິນໃຫຍ່ ເກາະດອນ ເຂດນ້ຳ ແລະ ເຂດນ່ານຟ້າຂອງປະເທດ(7). ອາດເວົ້າໄດ້ວ່າ, ຫາກບໍ່ສາມາດຮັບປະກັນຄວາມປອດໄພທາງໄຊເບີສະເປດໄດ້ ຄວາມໝັ້ນຄົງຂອງຊາດກໍ່ບໍ່ສາມາດບັນລຸໄດ້; ຄວາມປອດໄພທາງໄຊເບີສະເປດກ່ຽວຂ້ອງໂດຍກົງກັບຄວາມໝັ້ນຄົງທາງດ້ານແນວຄິດ ແລະ ຄວາມໝັ້ນຄົງທາງດ້ານການເມືອງຂອງປະເທດ. ດັ່ງນັ້ນ, ເພື່ອປົກປັກຮັກສາຄວາມໝັ້ນຄົງຂອງຊາດຕັ້ງແຕ່ຕົ້ນ ຈາກໄກ, ຕ້ອງເອົາໃຈໃສ່ເປັນພິເສດເຖິງການຮັບປະກັນຄວາມປອດໄພທາງໄຊເບີສະເປດ. ພິເສດ, ການເຄື່ອນໄຫວດ້ານຂໍ້ມູນຂ່າວສານ, ການໂຄສະນາເຜີຍແຜ່ ແລະ ການຕໍ່ສູ້ກັບບັນດາຖ້ອຍທຳນອງເສກສັນປັ້ນແຕ່ງ, ປະຕິການ, ບິດເບືອນຄວາມຈິງ ແລະ ຕໍ່ຕ້ານພັກແລະລັດ ຂອງບັນດາອິດທິກຳລັງສັດຕູໃນໂລກໄຊເບີ ເຊິ່ງຕ້ອງຖືເປັນຈຸດໃຈກາງສຳຄັນໃນການຕໍ່ສູ້ດ້ານແນວຄິດໃນໂລກໄຊເບີໃນປະຈຸບັນ.
ຄວາມຕ້ອງການບາງຢ່າງສໍາລັບກິດຈະກໍາຂໍ້ມູນຂ່າວສານ, ການໂຄສະນາເຜີຍແຜ່
ແລະ ການແນະນຳຄວາມຄິດເຫັນສັງຄົມ ໃນໂລກໄຊເບີໃນປະຈຸບັນ
ກ່ຽວກັບຄວາມຕ້ອງການລວມ, ກິດຈະກຳຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຕິດເຫັນສັງຄົມໃນໂລກໄຊເບີ ຕ້ອງຮັບປະກັນຫຼັກໝັ້ນທີ່ຈະແຈ້ງ ຕາມແນວທາງການເມືອງ ແນວທາງການໂຄສະນາ ແລະ ທິດທາງຄຸນຄ່າທີ່ຖືກຕ້ອງ; ຮັກສາການນຳພາຂອງພັກ ແລະ ການຄຸ້ງຄອງຂອງລັດ; ສຸມໃສ່ຮັບໃຊ້ການພັດທະນາປະເທດ, ຮັກສາກຸ່ມກ້ອນມະຫາສາມັກຄີປວງຊົນທັງຊາດ, ປັບປຸງຊີວິດທາງດ້ານຈິດໃຈຂອງປະຊາຊົນ; ພ້ອມກັນນັ້ນ, ເພີ່ມທະວີການສົນທະນາເພື່ອເຜີຍແບ ແລະ ປະຕິເສດຖ້ອຍທຳນອງເສກສັນປັ້ນແຕ່ງ, ໃສ່ຮ້າຍປ້າຍສີ ຂອງບັນດາອິດທິກຳລັງສັດຕູ ທີ່ມີກົນອຸບາຍຕໍ່ຕ້ານທຳລາຍປະເທດເຮົາ.
ກ່ຽວກັບຄວາມຕ້ອງການສະເພາະ, ກິດຈະກຳຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມໃນໂລກໄຊເບີ ຄວນປະຕິບັດຕາມເນື້ອໃນດັ່ງຕໍ່ໄປນີ້:
ທີໜຶ່ງ, ປະຕິບັດຕາມການນຳພາທີ່ຖືກຕ້ອງແລະທົ່ວເຖິງຂອງພັກກອມມູນິດຫວຽດນາມຕໍ່ວຽກງານແນວຄິດເວົ້າລວມ ແລະ ການເຄື່ອນໄຫວຂໍ້ມູນຂ່າວສານ ແລະການໂຄສະນາ ເວົ້າສະເພາະ.
ນີ້ແມ່ນຄວາມຕ້ອງການທີ່ສຳຄັນເພື່ອຮັກສາບົດບາດນຳພາຮອບດ້ານຂອງພັກ ຕໍ່ລັດແລະສັງຄົມ. ເຖິງວ່າສະຖານະການສື່ມວນຊົນຈະພັດທະນາແລະປ່ຽນແປງແນວໃດກໍຕາມ, ບົດບາດການນຳພາ ແລະ ຫຼັກການນຳພາຂອງພັກ ໃນວຽກງານຂໍ້ມູນຂ່າວສານ ແລະ ການໂຄສະນາເຜີຍແຜ່ ກໍ່ບໍ່ປ່ຽນແປງ.
ພິເສດ, ທາງດ້ານການເມືອງ, ຕ້ອງຖືເອົາແນວທາງການເມືອງຂອງພັກເປັນອັນດັບໜຶ່ງ, ຢຶດໝັ້ນໃນທັດສະນະໜັງສືພິມ-ການສື່ສານຕາມລັດທິມາກ-ເວນິນ ແລະ ແນວຄິດໂຮ່ຈິມິນ; ຢຶດໝັ້ນຫຼັກການໂຄສະນາເຜີຍແຜ່ ແລະ ແນະນຳຄວາມຄິດເຫັນສັງຄົມຢ່າງຕັ້ງໜ້າ, ໂຮມເປັນເອກະພາບ “ເຈດຈຳນົງຂອງພັກ” ແລະ “ນ້ຳໃຈປະຊາຊົນ”, ຫັນປ່ຽນທັດສະນະ ແຜນນະໂຍບາຍ ແລະ ແນວທາງຂອງພັກ ເປັນການກະທຳທີ່ມີສະຕິຂອງປະຊາຊົນ; ສ່ອງແສງສະພາບຄວາມເປັນຈິງຂອງຊີວິດເສດຖະກິດ-ສັງຄົມຂອງປະເທດຢ່າງທັນການ; ລົງເລິກ ແລະ ເຮັດໃຫ້ຊີວິດດ້ານຈິດໃຈຂອງປະຊາຊົນອຸດົມສົມບູນຂຶ້ນເຕີ່ມ. ບັນດາອົງການຂ່າວ ແລະ ສື່ມວນຊົນຕ້ອງມີບົດບາດນຳໜ້າໃນການໂຄສະນາເຜີຍແຜ່ແນວທາງ ນະໂຍບາຍຂອງພັກໃຫ້ດີຂຶ້ນ, ບັນທຶກພັດທະນາການ ແລະ ການປ່ຽນແປງຂອງຍຸກສະໄໝຢ່າງກົງໄປກົງມາ, ສົ່ງເສີມຄວາມກ້າວໜ້າທາງສັງຄົມ ແລະ ຕິດຕາມກວດກາຄວາມຍຸຕິທຳທາງສັງຄົມ.
ທີສອງ, ປະຕິບັດຕາມທິດທາງທີ່ຖືກຕ້ອງຂອງພັກຕໍ່ວຽກງານຄວາມຄິດເຫັນສັງຄົມ.
ການກຳນົດທິດທາງແມ່ນບັນຫາສຳຄັນ, ເປັນພື້ນຖານຂອງການແນະນຳຄວາມຄິດເຫັນສັງຄົມ. ປະຫວັດສາດແລະພາກປະຕິບັດຕົວຈິງໃຫ້ເຫັນວ່າ, ບໍ່ຄວນປະເມີນພະລັງຂອງຄວາມຄິດເຫັນສັງຄົມຕ່ຳເກີນໄປ, ໂດຍສະເພາະ ໃນສະຖານະການຂອງການພັດທະນາທີ່ແຂງແຮງຂອງໂລກໄຊເບີໃນປະຈຸບັນ. ຄວາມຄິດເຫັນສັງຄົມທີ່ດີໃນໂລກໄຊເບີສາມາດກາຍເປັນ “ດິນແດນ” ຫຼໍ່ລ້ຽງແນວຄິດທີ່ດີ, ເປັນ “ແຮງຜັກດັນ” ຂອງຄຸນສົມບັດສິນທຳທາງສັງຄົມ, ເປັນ “ກາວ” ທີ່ຜູກມັດຊຸມຊົນ, ເປັນ “ແປ້ນຢັນ” ຂອງການພັດທະນາ. ໃນທາງກົງກັນຂ້າມ, ມັນສາມາດເປັນ “ມີດແຫຼມ” ພ້ອມທີ່ຈະ “ຂ້າ” ຊີວິດຈິດໃຈຂອງປະຊາຊົນ ແລະ ສາມາດກາຍເປັນ “ຕົວກະຕຸ້ນ” ໃຫ້ແກ່ຄວາມບໍ່ສະຫງົບໃນສັງຄົມ, ຊ້ຳບໍ່ໜຳ ອາດຈະກາຍເປັນສະຖານທີ່ “ເຕົ້າໂຮມກຳລັງ” ສຳລັບການປະທ້ວງ, ການຈະລາຈົນ, ການໂຄ່ນລົ້ມ, ການດຳເນີນ “ການປະຕິວັດສີ”, “ການປະຕິວັດຕາມຖະໜົມ”… ຂອງກອງກຳລັງສັດຕູ. ໃນຄວາມເປັນຈິງ, ການປະທ້ວງ, “ການປະຕິວັດສີ” ໃນບາງສ່ວນຂອງໂລກ ເຊັ່ນ ໃນປະເທດຝຣັ່ງ, ບາງປະເທດເອີຣົບຕາເວັນອອກ, ອາຟຣິກກາເຫນືອ,... ໃນຊຸມປີທີ່ຜ່ານມາ ລ້ວນແຕ່ເລີ່ມຕົ້ນໄດ້ຮັບການໂຮ່ຮ້ອງສົ່ງເສີມແລະລວບລວມ ຈາກເຄືອຂ່າຍສັງຄົມ ແລະ ແຜ່ກະຈາຍຢ່າງໄວວາ. ເຄືອຂ່າຍສັງຄົມເຮັດໜ້າທີ່ເປັນ “ຜູ້ນຳອົງການ” ຂອງ “ການລຸກຮືທາງການເມືອງ” ສ່ວນໃຫຍ່ໂດຍບໍ່ມີຜູ້ນໍາສະເພາະ.
ດ້ວຍເຫດນັ້ນ, ວຽກງານແນະນຳຄວາມຄິດເຫັນສັງຄົມໃນໂລກໄຊເບີ ຕ້ອງປະຕິບັດຢ່າງເຂັ້ມງວດ ຕາມການນຳພາທີ່ຖືກຕ້ອງຂອງພັກ, ປະກອບສ່ວນຊຸກຍູ້ພາລະກິດການປ່ຽນແປງໃໝ່ ແລະ ການພັດທະນາປະເທດ, ເສີມຂະຫຍາຍກຸ່ມກ້ອນມະຫາສາມັກຄີປວງຊັນທັງຊາດ ແລະ ຮັກສາຄວາມປອງດອງ ຄວາມໝັ້ນຄົງ ແລະ ການພັດທະນາຂອງສັງຄົມ. ບໍ່ວ່າຈະເປັນສຳນັກຂ່າວສານສູນກາງຫຼືສຳນັກຂ່າວທ້ອງຖິ່ນ, ບໍ່ວ່າຈະເປັນສື່ດັ້ງເດີມຫຼືສື່ໃໝ່, ບໍ່ວ່າຈະເປັນຂ່າວດ່ວນ ຂ່າວສັງຄົມ ລາຍການຖ່າຍທອດສົດ ຫຼືລາຍການບັນເທີງແລະໝວດໝູ່ອື່ນໆ, ຫ້າມບໍ່ໃຫ້ມີຊ່ອງທາງໃນການເຜີຍແຜ່ຄວາມແນວຄິດທີ່ຜິດພາດ, ຂໍ້ຄວາມທີ່ບໍ່ຈິງ ຫຼື ຂໍ້ມູນປອມແລະເປັນອັນຕະລາຍ ລົບກວນຄວາມຄິດເຫັນຂອງປະຊາຊົນໂດຍເດັດຂາດ.
ທີສາມ, ຢຶດໝັ້ນໃນການຮັກສາເປົ້າໝາຍຄວາມສາມັກຄີ ແລະ ສະຖຽນລະພາບທາງການເມືອງ-ສັງຄົມ; ພ້ອມກັນນັ້ນ, ສົ່ງເສີມການເຂົ້າຮ່ວມຢ່າງຕັ້ງໜ້າຂອງມະຫາຊົນໃນກິດຈະກຳຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ ຕາມແນວທາງ ແຜນນະໂຍບາຍຂອງພັກ.
ຖືຄວາມສາມັກຄີແລະຄວາມເຫັນດິເຫັນພ້ອມທາງສັງຄົມ ແລະ ຄວາມໝັ້ນຄົງທາງການເມືອງ-ສັງຄົມ ເປັນເປົ້າໝາຍຕົ້ນຕໍ່; ພ້ອມກັນນັ້ນ, ສຸມໃສ່ສ່ອງແສງທາດແທ້ທີ່ດີ ແລະ ປອດໃສຂອງສັງຄົມ, ນຳສະເໜີພາບລວມຂອງການພັດທະນາ ແລະ ຄວາມກ້າວໜ້າໃນທຸກດ້ານ ຂອງຊີວິດເສດຖະກິດ-ສັງຄົມຂອງປະເທດ.
ເພື່ອໃຫ້ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມບັນລຸຜົນທີ່ດີ, ຈໍາເປັນຕ້ອງເພີ່ມທະວີຂໍ້ມູນກ່ຽວກັບຄວາມຄິດກະແສຫຼັກ ແລະ ຄວມຄິດເຫັນສັງຄົມທີ່ຕັ້ງໜ້າ. ຂໍ້ມູນດ້ານດຽວ ຫຼື ຫຼາຍເກີນຄວນກ່ຽວກັບປະກົດການຫຍໍ້ທໍ້, ດ້ານລົບຂອງສັງຄົມ, ຂໍ້ມູນດ້ານບວກໜ້ອຍ, ແບບຢ່າງວຽກດີຄົນດີ, ເຮັດໃຫ້ເກີດຄວາມເມື່ອຍລ້າ, ຂວັນເສຍ ແລະ ສູນເສຍຄວາມໝັ້ນໃຈໃນການຮັບຟັງຄວາມຄິດເຫັນຂອງປະຊາຊົນໄດ້ງ່າຍ.
ທີສີ່, ໃຫ້ຄວາມສຳຄັນກັບການປ່ຽນແປງໃໝ່ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ.
ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ ຕ້ອງໄດ້ປ່ຽນແປງໃໝ່ທາງດ້ານວິທີການເຂົ້າເຖິງ, ເນື້ອໃນ, ປະເພດ, ຮູບແບບ, ວິທີການ, ອຸປະກອນພາຫະນະ, ລະບົບ, ກົນໄກ ແລະ ຍົກສູງຄວາມຄົບຊຸດແລະປະສິດທິຜົນ ຂອງສະຖາບັນຂໍ້ມູນຂ່າວສານ, ການສື່ສານ ແລະ ສື່ສິ່ງພິມໃນໂລກໄຊເບີ. ຈຳເປັນຕ້ອງປັບຕົວໃຫ້ເຂົ້າກັບທ່າອຽງການສື່ສານທີ່ຫຼາກຫຼາຍແລະແຕກຕ່າງກັນ, ຍູ້ແຮງການສ້າງຮູບແບບໃໝ່ໃນການແນະນຳຄວາມຄິດເຫັນສັງຄົມໃນສະພາບການຂະຫຍາຍຕົວຢ່າງໄວວາຂອງສື່ສັງຄົມອອນໄລ.
ບາງວິທີແກ້ໄຂເພື່ອສ້າງໂລກໄຊເບີທີ່ປອດໄພແລະສົດໃສ, ຮັບປະກັນຮັບໃຊ້ເປັນຢ່າງດີ
ໃຫ້ແກ່ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່ ແລະ
ການແນະນຳຄວາມຄິດເຫັນສັງຄົມ ໃນໄລຍະຈະມາເຖິງ.
ທີໜຶ່ງ, ປັບປຸງແລະເພີ່ມທະວີຂໍ້ມູນຂ່າວສານ, ການໂຄສະນາເຜີຍແຜ່ກ່ຽວກັບລະບົບແນວຄິດຫຼັກ.
ຈຸດປະສົງຂອງວຽກງານແນວຄິດ, ການໂຄສະນາເຜີຍແຜ່, ຂໍ້ມູນຂ່າວສານ ແລະ ການແນະນຳຄວາມຄິດເຫັນສັງຄົມແມ່ນ ເພື່ອປັບປຸງທັດສະນະຂອງລັດທິມາກ-ເລນິນ, ແນວຄິດໂຮ່ຈິມິນ, ການນຳພາຂອງພັກກອມມູນິດຫວຽດນາມໃນຂົງເຂດແນວຄິດ, ປັບປຸງພື້ນຖານແນວຄິດລວມສຳລັບຄວາມສາມັກຄີ, ການກໍ່ສ້າງ ແລະ ການພັດທະນາປະເທດຂອງພັກ ແລະ ທົ່ວປວງຊົນ. ດັ່ງນັ້ນ, ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ ຄວນປຸກກະຕູ້ນດ້ານດີ ຕັ້ງໜ້າຂອງຊີວິດສັງຄົມ, ສົ່ງເສີມການເຝິກຝົນຫຼໍ່ຫຼອມ ແລະ ການປະຕິບັດຕາມບັນດາຄຸນຄ່າທີ່ດີຂອງສັງຄົມນິຍົມ; ກຳແໜ້ນເວລາ, ຂອບເຂດ ແລະ ອິດທິພົນຂອງຂໍ້ມູນຂ່າວສານ, ການໂຄສະນາເຜີຍແຜ່ ແລະ ການແນະນຳຄວາມຄິດເຫັນສັງຄົມ ໃນໂລກໄຊເບີ ເພື່ອເຮັດໃຫ້ສະພາບແວດລ້ອມໃນໂລກໄຊເບີມີຄວາມປອດໄພແລະສົດໃສ, ຮັບໃຊ້ການພັດທະນາຂອງສັງຄົມ.
ທີສອງ, ເພີ່ມທະວີການສ້າງເນື້ອໃນຂໍ້ມູນຂ່າວສານທີ່ສົດໃສແລະຖືກຕ້ອງ.
ປະຕິບັດການປ່ຽນແປງໃໝ່ ໃນບັນດາໜ່ວຍງານຜະລິດຂໍ້ມູນຂ່າວສານ (ໜັງສືພິມ, ວາລະສານ, ວິທະຍຸກະຈາຍສຽງ, ໂທລະພາບ, ໜ່ວຍງານສື່ມວນຊົນ, ເຄືອຂ່າຍສັງຄົມ,…) ແລະ ຊຸກຍູ້ການປ່ຽນແປງໃໝ່ກ່ຽວກັບທັດສະນະຄະຕິ, ເນື້ອໃນ, ຮູບການ, ວິທີການ, ພາຫະນະເປີດເຜີຍໃນໂລກໄຊເບີ. ຕໍ່ສູ້ຕ້ານຖ້ອຍທຳນອງບິດເບືອນ ແລະ ເປັນປໍລະປັກໃນໂລກໄຊເບີ, ບໍ່ໄດ້ເມີນເສີຍ ບໍ່ປ່ອຍໃຫ້ກະແສຂໍ້ມູນແລະຄວາມຄິດເຫັນທີ່ບິດບ້ຽວ ຂັດກັບການນຳພາທີ່ຖືກຕ້ອງຂອງພັກ ແລະ ຜົນປະໂຫຍດຂອງປະເທດຊາດໂດຍເດັດຂາດ; ຕ້ອງຕໍ່ສູ້ຢ່າງເດັດດ່ຽວຕ້ານການໂຈມຕີຂອງຂ່າວລືທີ່ປອງຮ້າຍ, ຂໍ້ມູນທີ່ໝິ່ນປະໝາດ ໃສ່ຮ້າຍປ້າຍສີ, ຫຼຸດຜ່ອນຊື່ສຽງຂອງບຸກຄົນ ແລະ ຜູ້ນຳທຸກຂັ້ນ. ບັນດາອົງການຂອງພັກ, ລັດ ແລະ ພະນັກງານການນຳຂັ້ນຕ່າງໆ ຕ້ອງນຳໃຊ້ອິນເຕີເນັດຢ່າງຊຳນີຊຳນານ ເພື່ອຊອກຮູ້ຄວາມຄິດເຫັນຂອງປະຊາຊົນ ແລະ ຜັນຂະຫຍາຍວຽກງານ, ນຳໃຊ້ອິນເຕີເນັດເປັນເວທີໃໝ່ສຳລັບສະມາຊິກພັກແລະຜູ້ນຳ ໃນການພົວພັນສື່ສານກັບມວນຊົນ, ເຂົ້າໃຈປະຊາຊົນ, ໃກ້ຊິດກັບປະຊາຊົນ ແລະ ແກ້ໄຂບັນຫາ ຄວາມບໍ່ພຽງພໍໃນການດຳລົງຊີວິດຂອງປະຊາຊົນ; ພ້ອມກັນນັ້ນ, ຈຳເປັນຕ້ອງຫັນປ່ຽນໂລກໄຊເບີໃຫ້ເປັນຊ່ອງທາງໃໝ່ ເພື່ອເພີ່ມທະວີການຕິດຕາມປະຊາຊົນ.
ທີສາມ, ສ້າງແລະປັບປຸງລະບົບການຄຸ້ມຄອງເຄືອຂ່າຍທີ່ສົມບູນແບບ.
ໃນໂລກໄຊເບີກໍ່ຄືກັນກັບໃນສັງຄົມທີ່ແທ້ຈິງ, ການສົ່ງເສີມເສລີພາບຈຳເປັນຕ້ອງໄປຄຽງຄູ່ກັບການປະຕິບັດຕາມກົດໝາຍ. ຈຳເປັນຕ້ອງເຄົາລົບສິດທິຂອງຊາວເນັດໃນການແລກປ່ຽນຄວາມຄິດເຫັນ ແລະ ສະແດງເຈດຈຳນົງຂອງພວກເຂົາ, ແລະ ໃນຂະນະດຽວກັນ ເພື່ອສ້າງສະພາບແວດລ້ອມອອນໄລທີ່ປອດໄພແລະສົດໃສຕາມກົດໝາຍ, ສິດ ແລະ ຜົນປະໂຫຍດທີ່ຖືດຕ້ອງຕາມກົດໝາຍ ຂອງຊາວເນັດ ໄດ້ຮັບການປະກັນ.
ມີຄວາມຈຳເປັນຕ້ອງປັບປຸງຄວາມສາມາດຄຸ້ມຄອງເຄືອຂ່າຍ ແລະ ຈັດຕັ້ງອົງການບໍລິຫານເຄືອຂ່າຍທີ່ຮອບດ້ານ ໂດຍມີການເຂົ້າຮ່ວມຂອງບັນດາອັດຕະພາບທີ່ກ່ຽວຂ້ອງ, ສ້າງລະບົບໃໝ່ກ່ຽວກັບການຄຸ້ມຄອງຮ່ວມ ແລະ ການປະຕິສຳພັນຢ່າງຕັ້ງໜ້າບົນຈິດໃຈປະຕິບັດຕາມກົດໝາຍ ທີ່ເໝາະສົມກັບຄຸນຄ່າຄຸນສົມບັດ, ວັດທະນະທຳ ແລະ ປະເພນີອັນດີງາມຂອງປະເທດຊາດຫວຽດນາມ; ທົບທວນ ແກ້ໄຂ ເພີ່ມເຕີມກົດໝາຍ ແລະ ຂໍ້ບັງຄັບ ກ່ຽວກັບບໍລິການຂໍ້ມູນເຄືອຂ່າຍ, ການປ້ອງກັນຄວາມປອດໄພຂອງເຄືອຂ່າຍ, ການຄຸ້ມຄອງສັງຄົມເຄືອຂ່າຍ…; ການລວມພາລະບົດບາດຂອງອົງການທີ່ກ່ຽວຂ້ອງໃນການຄຸ້ມຄອງເນື້ອໃນ, ການຄຸ້ມຄອງຂະແໜງການ ແລະ ກົນໄກເຊື່ອມໂຍງ ປະສານງານໃນການປ້ອງກັນ ແລະ ຄວບຄຸມອາຊະຍາກຳທາງໄຊເບີ; ພັດທະນາກົນໄກການສະກັດກັ້ນທີ່ເໝາະສົມ ແລະ ພຽງພໍ; “ທໍາຄວາມສະອາດອິນເຕີເນັດ” ຢ່າງສະໝ່ຳສະເໝີ ເພື່ອສ້າງສະພາບແວດລ້ອມເຄືອຂ່າຍທີ່ປອດໄພແລະສີວິໄລ...
ທີສີ່, ຊຸກຍູ້ການປະສານລວມການສື່ສານແລະຂໍ້ມູນຂ່າວສານໃຫ້ພັດທະນາຕາມລວງເລິກ.
ຈຳເປັນຕ້ອງປະສານລວມ ແລະ ເພີ່ມປະສິດທິຜົນຂະບວນການ ແລະ ປັບໂຄງສ້າງພື້ນຖານຂໍ້ມູນຂ່າວສານ ເພື່ອປະຕິບັດການປະສານລວມຊັບພະຍາກອນສື່ສານກັບບັນດາປັດໄຈການຜະລິດທີ່ແຕກຕ່າງກັນ ຢ່າງມີປະສິດທິຜົນ. ພ້ອມກັນນັ້ນ, ປະຕິບັດການປະສານລວມ ແລະ ສົມທົບປັດໄຈຕ່າງໆເຊັ່ນ ເນື້ອໃນຂໍ້ມູນຂ່າວສານ, ການໝູນໃຊ້ເຕັກໂນໂລຊີ, ວິທີການຄຸ້ມຄອງ ເພື່ອສົ່ງເສີມການປ່ຽນແປງທາງດ້ານຄຸນນະພາບ, ຂະຫຍາຍປະສິດທິຜົນການປະສານລວມ, ສ້າງກຸ່ມສື່ກະແສຫຼັກໃໝ່ທີ່ມີອິດທິພົນ ແລະ ມີຄວາມສາມາດໃນການແຂ່ງຂັນທີ່ແຂງແຮງ ເພື່ອດໍາເນີນການຂໍ້ມູນຂ່າວສານ ແລະ ຊີ້ນຳຄວາມຄິດເຫັນສັງຄົມໃນໂລກໄຊເບີຢ່າງມີປະສິດທິຜົນ.
ໃຫ້ບຸລິມະສິດໃນການພັດທະນາອຸປະກອນເຄື່ອນທີ່, ສ້າງແລະພັດທະນາຖານຂໍ້ມູນຂ່າວສານ ແລະ ການສື່ສານລະດັບຊາດ; ຊ່ວຍເຫຼືອສື່ກະແສຫຼັກໃຫ້ໃຊ້ການສື່ສານເຄື່ອນທີ່ຄອບຄອງຕໍາແໜ່ງນໍາໜ້າໃນການຊີ້ນຳແນວຄິດ, ແນະນຳຄວາມຄິດເຫັນສັງຄົມ. ພ້ອມກັນນັ້ນ, ເພີ່ມທະວີຊຸກຍູ້ການປະດິດສ້າງ ແລະ ການປ່ຽນແປງໃໝ່ ເຕັກໂນໂລຊີຫຼັກທີ່ສຳຄັນ ເພື່ອສ້າງຄວາມກ້າວໜ້າທາງເຕັກໂນໂລຊີຂໍ້ມູນຂ່າວສານ ແລະການສື່ສານ; ການປະຍຸກໃຊ້ປັນຍາປະດິດໃນການເກັບກໍາຂໍ້ມູນ, ການຜະລິດ, ການກະຈາຍ, ການຮັບ ແລະ ການຕອບສະໜອງ. ປະສານສົມທົບກັນແກ້ໄຂຢ່າງກົມກຽວສາຍພົວພັນລະຫວ່າງສື່ດັ້ງເດີມກັບສື່ໃໝ່, ສື່ສູນກາງແລະສື່ທ້ອງຖິ່ນ, ສື່ມວນຊົນແລະສື່ສະເພາະກິດ. ສ້າງຕັ້ງລະບົບການສື່ສານມັນຕິມີເດຍດ້ວຍຊັບພະຍາກອນທີ່ເຂັ້ມຂົ້ນ, ໂຄງສ້າງທີ່ສົມເຫດສົມຜົນ ແລະ ການປະສານງານທີ່ມີປະສິດທິພາບ.
ເພື່ອປະຕິບັດວິທີແກ້ໄຂເຫຼົ່ານີ້, ຮຽກຮ້ອງໃຫ້ຜູ້ນໍາໃນທຸກລະດັບ ຮັບຮູ້ຢ່າງເລິກເຊິ່ງວ່າ ການສ້າງໂລກໄຊເບີທີ່ດີແລະປອດໄພແມ່ນການບຸລິມະສິດອັນດັບຫນຶ່ງໃນປະຈຸບັນ. ບັນດາໜ້າທີ່ສຳຄັນແລະຮີບດ່ວນໃນສະເພາະໜ້າແມ່ນ: ຕ້ອງຢຶດໝັ້ນໃນແນວທາງການເມືອງຂອງພັກ, ຊີ້ນຳຄວາມຄິດເຫັນສັງຄົມ ແລະ ຮັກສາບັນດາຄຸນຄ່າອັນດີງາມຂອງສັງຄົມໄວ້ຢ່າງໝັ້ນຄົງ; ຕ້ອງເຮັດໃຫ້ໂລກໄຊເບີກາຍເປັນສະຖານທີ່ສື່ສານ ແລະ ແລກປ່ຽນຂໍ້ມູນຂ່າວສານກັບມວນຊົນ, ແນະນຳມະຫາຊົນ ແລະ ຮັບໃຊ້ມະຫາຊົນ; ສຸມໃສ່ການຄອບຄອງໂລກໄຊເບີດ້ວຍທິດສະດີທາງວິທະຍາສາດ, ວັດທະນະທຳທີ່ກ້າວໜ້າ ແລະ ບັນດາຄຸນຄ່າດັ້ງເດີມທີ່ດີງາມ; ການຄຸ້ມຄອງເຄືອຂ່າຍຢ່າງອາລະຍະທຳ, ການນຳໃຊ້ແລະເຂົ້າເຖິງອິນເຕີເນັດຢ່າງມີປັນຍາ; ສ້າງ “ຮົ້ວສີຂຽວ” ແລະ “ສິ່ງກີດຂວາງດ້ານຄວາມປອດໄພ” ຢ່າງໜັກແໜ້ນ ເພື່ອສ້າງໂລກໄຊເບີທີ່ດີແລະປອດໄພ, ຮັບໃຊ້ຜົນປະໂຫຍດຂອງປະຊາຊົນ ແລະ ການພັດທະນາຮອບດ້ານຂອງປະເທດ./.
---------------------------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 272.
(2) ເບິ່ງ: “Digital 2022: Vietnam” (ແປໂດຍຫຍໍ້: ດີຈິຕອນ 2022: ຫວຽດນາມ), http://datareportal.com/reports/digital-2022-vietnam
(4) ເບິ່ງ: ກວ່ຽນ ວິງ: “ກວດພົບ ແລະ ຈັດການຄະດີສະເພາະ ຄະດີກໍລິນີ 840 ຄະດີທີ່ກ່ຽວຂ້ອງກັບອາຊະຍາກຳທາງໄຊເບີ”, ໜັງສືພິມຕຳຫຼວດປະຊາຊົນອອນໄລ, ວັນທີ 6 ມິຖຸນາ 2022, https://cand.com.vn /Cong-nghe/phat-hien-xu-ly-840-chuyen-an-vu-viec-lien-quan-toi-pham-mang-i656116/
(5) ເບິ່ງ: ແທ່ງ ລວນ:“ຫວຽດນາມນຢູ່ໃນອັນດັບທີ່ 3 ທີ່ຖືກການໂຈມຕີທາງໄຊເບີຫຼາຍທີ່ສຸດ”, ໜັງສືພິມຊາວໜຸ່ມອອນໄລ, ສະບັບລົງວັນທີ 8 ມີນາ 2019, https://thanhnien.vn/viet-nam-nam-trong-top-3-quoc-gia-bi-tan-cong-mang-nhieu-nhat-post831891.html; “ໜັງສືພິມຂອງ Microsoft: ຫວຽດນາມເປັນປະເທດທີ່ມີອັດຕາການຕິດເຊື້ອ ແຣນຊັມແວ ສູງທີ່ສຸດໃນອາຊີ-ປາຊີຟິກ”, ສະບັບລົງວັນທີ 24 ມິຖຸນາ 2020, https://news.microsoft.com/vi-vn/2020/06/24/bao-cao-cua-microsoft-viet-nam-la-quoc-gia-co-ty-le-nhiem-ma-doc-tong-tien-cao-nhat-chau-a-thai-binh-duong-nam-2019/
(6) ເບິ່ງ: ຫງວຽນ ຈ້ອງ ເຫງັຍ: “ທັດສະນະຂອງພັກ ແລະ ລັດກ່ຽວກັບການປ້ອງກັນອຳນາດອະທິປະໄຕແຫ່ງຊາດ ໃນໂລກໄຊເບີ ແລະ ການຮັບປະກັນຄວາມປອດໄພທາງໄຊເບີ”, ປື້ມບັນທຶກການສຳມະນາວິທະຍາສາດແຫ່ງຊາດໃນຫົວຂໍ້ ການຮັບປະກັນອຳນາດອະທິປະໄຕຂອງປະເທດ ໃນໂລກໄຊເບີ, ຈັດຮ່ວມກັນໂດຍກະຊວງປ້ອງກັນຄວາມສະຫງົບ ແລະ ສຳນັກພິມຈຳໜ່າຍການເມືອງແຫ່ງຊາດ. ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 10.
(7) ບາງປະເທດສະເໜີແນວຄວາມຄິດວ່າ “ເຂດອະວະກາດ”.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1002 (ເດືອນພະຈິກ 2022)