ປື້ມເຫຼັ້ມໜຶ່ງທີ່ມີຄຸນຄ່າເລິກເຊິ່ງ, ສະແດງໃຫ້ເຫັນເຖິງທິດທາງແລະ
ວິໄສທັດຍຸດທະສາດໃນການກໍ່ສ້າງ ແລະປັບປຸງແນວທາງການທະຫານ
ແລະ ຍຸດທະສາດການປ້ອງກັນປະເທດຂອງຫວຽດນາມ ໃນໄລຍະໃໝ່
ວິໄສທັດຍຸດທະສາດໃນການກໍ່ສ້າງ ແລະປັບປຸງແນວທາງການທະຫານ
ແລະ ຍຸດທະສາດການປ້ອງກັນປະເທດຂອງຫວຽດນາມ ໃນໄລຍະໃໝ່
ວກ. - ປື້ມ ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່ ຂຽນໂດຍທ່ານເລຂາທິການໃຫຍ່ ຫງວຽນຝູຈ້ອງ, ເລຂາທິການຄະນະພັກການທະຫານສູນກາງ ໄດ້ສະແດງໃຫ້ເຫັນເຖິງແນວຄິດສະເໝີຕົ້ນສະເໝີປາຍແລະທົ່ວເຖິງ ຂອງຜູ້ນຳພັກກອມມູນິດຫວຽດນາມ ກ່ຽວກັບທັດສະນະ, ເປົ້າໝາຍຊີ້ນຳ ແລະ ທິດທາງ, ວິທີແກ້ໄຂ ໃນການປະຕິບັດໜ້າທີ່ປົກປັກຮັກສາປະເທດຊາດໃນໄລຍະໃໝ່; ສະແດງໃຫ້ເຫັນເຖິງຄວາມຄົບຊຸດ, ຄວາມເດັດດ່ຽວ, ຄວາມຮອບດ້ານ ແລະ ຄວາມຊັກຊວນໃຈຂອງເລຂາທິການໃຫຍ່; ປະກອບສ່ວນຊີ້ແຈ້ງການພັດທະນາຄວາມຄິດທິດສະດີ ຂອງພັກກອມມູນິດຫວຽດນາມ
ທ່ານເລຂາທິການໃຫຍ່ ຫງວຽນຝູຈ້ອງ, ເລຂາທິການຄະນະພັກການທະຫານສູນກາງ ກັບບັນດາຜູ້ແທນດີເດັ່ນ ທີ່ມາຮ່ວມກອງປະຊຸມໃຫຍ່ຜູ້ແທນຊາວໜຸ່ມກອມມູນິດໂຮ່ຈີມິນກອງທັບຄັ້ງທີ X ໄລຍະປີ 2022-2027 _ພາບ: TTXVN
ເກືອບ 80 ປີແຫ່ງການກໍ່ສ້າງ, ການສູ້ຮົບ ແລະ ການເຕີບໃຫຍ່ ພາຍໃຕ້ການພຳພາ ແລະຝຶກຝົນຫຼໍ່ຫຼອມຂອງພັກແລະປະທານໂຮ່ຈິມິນ, ກອງທັບປະຊາຊົນຫວຽດນາມໄດ້ຮັບໄຊຊະນະອັນສະຫງ່າລາສີ, ສົມຄວນທີ່ຈະເປັນກຳລັງທີ່ຈົງຮັກພັກດີຢ່າງແທ້ຈິງຂອງພັກ, ລັດ ແລະ ປະຊາຊົນ, ມີບົດບາດສຳຄັນໃນພາລະກິດການຕໍ່ສູ້ເພື່ອປົດປ່ອຍ ແລະປົກປັກຮັກສາປະເທດຊາດ, ກໍ່ສ້າງພື້ນຖານການປ້ອງກັນຊາດທົ່ວປວງຊົນທີ່ເຂັ້ມແຂງ, ເປັນກອງທັບປະຕິວັດ “ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ” ຢ່າງແທ້ຈິງ; ປະກອບສ່ວນເພີ່ມພູນຄູນສ້າງມູນເຊື້ອ “ຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ກຽມພ້ອມສູ້ຮົບແລະເສຍສະຫຼະເພື່ອເອກະລາດ ແລະເສລີພາບຂອງປະເທດຊາດ, ເພື່ອສັງຄົມນິຍົມ. ສຳເລັດທຸກໜ້າທີ່, ຜ່ານຜ່າຄວາມຫຍຸ້ງຍາກທຸກຢ່າງ, ເອົາຊະນະສັດຕູທຸກໂຕ”(1), ສົມຄວນເປັນກອງທັບວິລະຊົນຂອງຊາດຫວຽດນາມວິລະຊົນ.
ປະຈຸບັນ, ສະພາບການໂລກແລະພາກພື້ນມີການຜັນຜວນຢ່າງສັບສົນແລະຄາດເດົາບໍ່ໄດ້, ແລະມີປັດໄຈຫຼາຍປະການທີ່ເຮັດໃຫ້ເກີດຄວາມບໍ່ໝັ້ນຄົງ ແລະ ມີບັນຫາເກີດຂຶ້ນເກີນຄາດຫຼາຍຢ່າງ. ບັນດາປະເທດໃຫຍ່ເພີ່ມທະວີການດັດປັບຍຸດທະສາດ ແລະ ແຂ່ງຂັນກັນຢ່າງດຸເດືອດ; ການແຂ່ງຂັນດ້ານຍຸດທະສາດ, ຂໍ້ພິພາດດ້ານອະທິປະໄຕ, ການປະທະກັນ, ການກໍ່ການຮ້າຍ ແລະ ບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ມີທ່າອຽງເພີ່ມຂຶ້ນ ແລະ ນັບມື້ນັບເຄັ່ງຮ້ອນ, ເຮັດໃຫ້ເກີດຄວາມສ່ຽງຕໍ່ຄວາມບໍ່ໝັ້ນຄົງ; ບັນດາອິດທິກຳລັງສັດຕູແລະປະຕິກິລິຍາ ສືບຕໍ່ຊຸກຍູ້ການເຄື່ອນໄຫວເພື່ອທຳລາຍການປະຕິວັດໃນປະເທດເຮົາ, ໂດຍສະເພາະແມ່ນກົນອຸບາຍ “ເຮັດໃຫ້ກອງທັບບໍ່ກ່ຽວຂ້ອງກັບການເມືອງ”, “ເຮັດໃຫ້ກອງທັບເປັນແບບພົນລະເຮືອນ”, ແບ່ງແຍກກອງທັບກັບພັກ ລັດ ແລະ ປະຊາຊົນ. ສະຖານະການໃໝ່ຮຽກຮ້ອງໃຫ້ທົ່ວພັກ, ທົ່ວປວງຊົນ ແລະ ທົ່ວກອງທັບ ຕ້ອງພະຍາຍາມສູ້ຊົນດ້ວຍເຈດຈຳນົງ ແລະ ຄວາມຕັດສິນໃຈສູງສູດ ເພື່ອຮັກສາສັນຕິພາບ, ສະຖຽນລະພາບ ແລະ ການພັດທະນາເສດຖະກິດ-ສັງຄົມ, ຮັບປະກັນຄວາມໝັ້ນຄົງ ແລະການປ້ອງກັນປະເທດ, ຍົກສູງກຳລັງແຮງສັງລວມຂອງປະເທດ; ພິເສດແມ່ນ, ຈຳເປັນຕ້ອງປ່ຽນແປງໃໝ່ແນວທາງການທະຫານ ແລະ ຍຸດທະສາດການປ້ອງກັນປະເທດຢ່າງແທ້ຈິງ, ປະກອບສ່ວນຢ່າງຕັ້ງໜ້າໃນການປ້ອງກັນຄວາມສ່ຽງຂອງການປະທະກັນແລະສົງຄາມຕັ້ງແຕ່ຕົ້ນ ແລະຈາກໄລຍະໄກ, “ຮັກສາປະເທດກ່ອນທີ່ຈະຕົກຢູ່ໃນອັນຕະລາຍ”.
ປື້ມ ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມໃນໄລຍະໃໝ່ ຂອງທ່ານເລຂາທິການໃຫຍ່ ຫງວຽນຝູຈ້ອງ, ເລຂາທິການຄະນະພັກການທະຫານສູນກາງ ແນະນຳໃຫ້ຜູ້ອ່ານຮູ້ຈັກ ລະຫວ່າງກອງປະຊຸມກາງພາກຂອງພັກສະໄໝທີ XIII ແລະກອງປະຊຸມຄັ້ງທີ 5 ຂອງສະພາແຫ່ງຊາດຊຸດທີ XV ທີ່ໄດ້ຮັບຜົນສຳເລັດຢ່າງຈົບງາມ; ບັນດາຂັ້ນ, ບັນດາຂະແໜງການທີ່ກຳລັງຈັດຕັ້ງການສະຫຼຸບ 10 ປີແຫ່ງການປະຕິບັດມະຕິກອງປະຊຸມສູນກາງພັກຄັ້ງທີ 8 ສະໄໝທີ XI, ວ່າດ້ວຍຍຸດທະສາດການປົກປັກຮັກສາປະເທດຊາດ ໃນສະພາບການໃໝ່; ຄະນະພັກການທະຫານສູນກາງ ປະສົບຄວາມສຳເລັດໃນການຈັດຕັ້ງກອງປະຊຸມຄັ້ງທີ 6, ໄລຍະປີ 2020-2025 ແລະ ກອງປະຊຸມການເມືອງທົ່ວກອງທັບໃນ 6 ເດືອນຕົ້ນປີ 2023. ດັ່ງນັ້ນ, ປື້ມເຫຼັ້ມນີ້ບໍ່ພຽງແຕ່ມີຄວາມໝາຍແທດຈິງສຳລັບຄະນະພັກ, ອົງການຈັດຕັ້ງພັກ, ຜູ້ບັນຊາການທຸກຂັ້ນ ແລະ ພະນັກງານ ນັກຮົບໃນທົ່ວກອງທັບເທົ່ານັ້ນ, ແຕ່ຍັງຊ່ວຍໃຫ້ບັນດາຂັ້ນ, ຂະແໜງການ ແລະ ທ້ອງຖິ່ນໂດຍທົ່ວໄປ ໃຫ້ກຳແໜ້ນແລະເຂົ້າໃຈແຈ້ງເຖິງແນວທາງການປ້ອງກັນປະເທດທົ່ວປວງຊົນ, ສົງຄາມປະຊາຊົນ ແລະ ໜ້າທີ່ສ້າງສາແລະປົກປັກຮັກສາປະເທດຊາດຫວຽດນາມສັງຄົມນິຍົມ ໃນສະພາບການໃໝ່.
ປື້ມມີຄວາມຈຸ 444 ໜ້າ ແລະ ມີພາບປະກອບຫຼາຍກວ່າ 50 ພາບ, ແບ່ງເປັນ 3 ພາກ, ຢືນຢັນທັດສະນະທີ່ຮອບດ້ານ, ສະເໝີຕົ້ນສະເໝີປາຍ, ວິໄສທັດຍຸດທະສາດ, ຈິນຕະນາການທີ່ແຫຼມຄົມແລະເດັດຂາດ ຂອງຜູ້ນຳພັກກອມມູນິດຫວຽດນາມ ຕໍ່ໜ້າທີ່ກໍ່ສ້າງ ແລະ ວາງແຜນກຳນົດແນວທາງການທະຫານ ແລະ ຍຸດທະສາດການປ້ອງກັນປະເທດ; ກໍ່ສ້າງກອງທັບປະຊາຊົນຫວຽດນາມທີ່ປະຕິວັດ, ເປັນແບບຫຼວງ, ຍອດຢ້ຽມ ແລະ ທັນສະໄໝ; ຢືນຢັນທີ່ຕັ້ງ ແລະ ບົດບາດຂອງກອງທັບປະຊາຊົນຫວຽດນາມ ໃນພາລະກິດການສ້າງສາ ແລະ ປົກປັກຮັກສາປະເທດຊາດ.
ການນຳພາຂອງພັກກອມມູນິດຫວຽດນາມ ແມ່ນປັດໄຈສຳຄັນທີ່ສຸດ
ທີ່ກຳນົດຄວາມເຕີບໂຕແລະກຳລັງແຮງ ຂອງກອງທັບປະຊາຊົນຫວຽດນາມ
ດ້ວຍບົດຄວາມ ສຸນທອນພົດ ແລະ ບົດສຳພາດຂອງທ່ານເລຂາທິການ 21 ບົດ, ບົນພື້ນຖານການຮັບຮູ້ແລະປະເມີນຜົນ ຄວາມສຳເລັດຂອງພາລະກິດການຕໍ່ສູ້ ເພື່ອຍາດເອົາເອກະລາດແຫ່ງຊາດ, ການສ້າງສາ ແລະ ປົກປັກຮັກສາປະເທດຊາດ ໃນເວລາເກືອບ 80 ປີທີ່ຜ່ານມາ, ພາກທີ່ໜຶ່ງ ຂອງປື້ມຊີ້ແຈ້ງແນວທາງການທະຫານ, ຍຸດທະສາດການປ້ອງກັນປະເທດ ແລະ ທິດທາງກໍ່ສ້າງກອງທັບ ເພື່ອຕອບສະໜອງຄວາມຮຽກຮ້ອງຂອງໜ້າທີ່ໃນສະພາບການໃໝ່, ໂດຍສະເພາະ ສືບຕໍ່ຢືນຢັນທັດສະນະວ່າ: ການນຳພາຂອງພັກກອມມູນິດຫວຽດນາມ ແມ່ນປັດໄຈຊີ້ຂາດໃນການເຕີບໃຫຍ່ ການພັດທະນາ ແລະ ໄຊຊະນະຂອງກອງທັບໃນທຸກໆໄລຍະການປະຕິວັດ; ການປົກປັກຮັກສາປະເທດຊາດ “ຕັ້ງແຕ່ຕົ້ນ, ຈາກໄລຍະໄກ”, “ປົກປັກຮັກສາປະເທດໃນຂະນະທີ່ຍັງບໍ່ທັນຕົກຢູ່ໃນອັນຕະລາຍ”, ພ້ອມທັງມີແຜນການແລະວິທີການກີດກັ້ນແລະຂະຈັດ ຄວາມສ່ຽງຈາກສົງຄາມ ແລະຄວາມຂັດແຍ້ງ, ປົກປັກຮັກສາສັນຕິພາບ ແລະ ຄວາມໝັ້ນຄົງຂອງປະເທດ. ນີ້ແມ່ນ ຈຸດສຳຄັນຕົ້ນຕໍ່ ໃນຈິນຕະນາການຍຸດທະສາດ ຂອງພັກກອມມູນິດຫວຽດນາມ ເຊິ່ງນຳໂດຍເລຂາທິການໃຫຍ່ ຫງວຽນຝູຈ້ອງ, ກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດຊາດ.
ການກໍ່ສ້າງປະເທດພ້ອມກັບການປົກປັກຮັກສາປະເທດ ແມ່ນກົດເກນແຫ່ງຄວາມຢູ່ລອດ ແລະ ການພັດທະນາຂອງຊາດຫວຽດນາມ, ແມ່ນຮີດຄອງປະເພນີອັນລ້ຳຄ່າຂອງບັນພະບຸລຸດຂອງພວກເຮົາໃນປະຫວັດສາດຍາວນານນັບພັນປີ. ໂດຍສືບທອດຮີດຄອງປະເພນີດັ່ງກ່າວ, ພັກກອມມູນິດຫວຽດນາມ, ນັບແຕ່ກຳເນີດແລະຕະຫຼອດຂະບວນການນຳພາການປະຕິວັດຫວຽດນາມ, ໄດ້ໝູນໃຊ້ແລະພັດທະນາ ໜ້າທີ່ຍຸດທະສາດ 2 ໜ້າທີ່ຂອງການປະຕິວັດຄື: ການກໍ່ສ້າງ ແລະ ການປົກປັກຮັກສາປະເທດຊາດສັງຄົມນິຍົມ; ໃນນັ້ນ, ການປົກປັກຮັກສາປະເທດຊາດແມ່ນເງື່ອນໄຂ ແລະປະຖົມປັດໄຈສຳຄັນເພື່ອກໍ່ສ້າງ ແລະ ພັດທະນາປະເທດຢ່າງໄວວາແລະຍືນຍົງ. ຕາມນັ້ນ, ພັກກອມມູນິດຫວຽດນາມ ໄດ້ນຳພາການກໍ່ສ້າງ ແລະ ການຈັດຕັ້ງກອງກຳລັງປະກອບອາວຸດປະຊາຊົນ, ໂດຍກົງແມ່ນກອງທັບປະຊາຊົນທີ່ເຂັ້ມແຂງ ເພື່ອເປັນແກນກາງໃນພາລະກິດການສ້າງສາ ແລະ ປົກປັກຮັກສາປະເທດຊາດ.
ຜ່ານບັນດາບົດຄວາມແລະສຸນທອນພົດສາມາດຢືນຢັນໄດ້ວ່າ ການຊີ້ນຳຂອງເລຂາທິການໃຫຍ່ ຫງວຽນຝູຈ້ອງ ກ່ຽວກັບການສ້າງແນວທາງການທະຫານ ແລະ ຍຸດທະສາດການປ້ອງກັນປະເທດໃນປື້ມເຫຼັ້ມນີ້ ໄດ້ຖອດຖອນມາຈາກຄຸນຄ່າດັ້ງເດີມ, ປະສົບການ ແລະ ບົດຮຽນອັນລ້ຳຄ່າ ໃນພາລະກິດການຕໍ່ສູ້ ເພື່ອສ້າງສາແລະປົກປັກຮັກສາປະເທດຂອງບັນພະບຸລຸດຂອງເຮົາ. ນັ້ນແມ່ນການໝູນໃຊ້ ແລະ ພັດທະນາບົດຮຽນການສ້າງປະເທດຄວບຄູ່ກັບການປົກປັກຮັກສາປະເທດ, ການທະຫານກັບການທູດ, ການທະຫານກັບເສດຖະກິດ,… ໃນສະພາບການໂລກແລະພາກພື້ນທີ່ຜັນແປໄປຢ່າງບໍ່ຢຸດຢັ້ງ ແລະ ການປ່ຽນແປງທ່າອ່ຽງການພົວພັນສາກົນ.
ບັນດາທັດສະນະ ແຜນນະໂຍບາຍ ແນວທາງການທະຫານ ແລະ ການປ້ອງກັນປະເທດ ຖືກສ້າງຂຶ້ນບົນພື້ນຖານຂອງການວິເຄາະຄວາມຫຍຸ້ງຍາກແລະຂໍ້ໄດ້ປຽບຢ່າງລະອຽດ, ການປະເມີນສະຖານະການພາຍໃນປະເທດ, ພາກພື້ນ ແລະ ສາກົນຢ່າງຖືກຕ້ອງ, ເຫັນການປ່ຽນແປງທີ່ເລິກເຊິ່ງ ການພັດທະນາທີ່ສັບສົນແລະຄາດເດົາບໍ່ໄດ້ຢ່າງຊັດເຈນ ແລະ ຄາດຄະເນທ່າອ່ຽງທີ່ຜັນຜວນ, ຈາກນັ້ນ ຊ່ວຍເພີ່ມເຕີມແລະພັດທະນາທັດສະນະແລະແນວຄິດຊີ້ນໍາຈຳນວນໜຶ່ງ ແລະ ປັບປ່ຽນໜ້າທີ່ແລະວິທີການແກ້ໄຂຫຼາຍປະການໃນທັນທີ. ໃນພາລະກິດການສ້າງສາ ແລະ ປົກປັກຮັກສາປະເທດຊາດ ໃນໄລຍະໃໝ່, ພັກກອມມູນິດຫວຽດນາມກຳນົດວ່າ ການສ້າງການປ້ອງກັນປະເທດ, ປ້ອງກັນຄວາມໝັ້ນຄົງແຫ່ງຊາດ ແມ່ນໜ້າທີ່ສຳຄັນແລະເປັນປະຈຳ ເພື່ອຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານບັນດາຫຼັກການຂອງກົດບັດສະຫະປະຊາຊາດ ແລະ ກົດໝາຍສາກົນ. ໃນຖານະເລຂາທີການຄະນະພັກການທະຫານສູນກາງ, ເລຂາທິການໃຫຍ່ ຫງວຽນຝູຈ້ອງ ໄດ້ໃຫ້ການຊີ້ນຳຈຳນວນຫຼາຍ ແນໃສ່ເພີ່ມທະວີກວ່າອີກ ການນຳພາທີ່ເດັດຂາດແລະໂດຍກົງໃນທຸກດ້ານ ຂອງພັກຕໍ່ກອງທັບ, ພ້ອມກັນນັ້ນ ສືບຕໍ່ຄົ້ນຄວ້າ ເພີ່ມເຕີມ ແລະ ປັບປຸງບູລະນະກົນໄກນຳພາຂອງພັກຕໍ່ກອງທັບ. ໃນນັ້ນ, ເລຂາທິການໃຫຍ່ຮຽກຮ້ອງໃຫ້ກໍ່ສ້າງກອງທັບປະຊາຊົນຫວຽດນາມທີ່ປະຕິວັດ, ເປັນແບບຫຼວງ, ຍອດຢ້ຽມ, ທັນສະໄໝ; ມີບົດບາດຫຼັກແຫຼ່ງໃນການກໍ່ສ້າງພື້ນຖານການປ້ອງກັນປະເທດທົ່ວປວງຊົນ, ເຊື່ອມໂຍງທ່າປ້ອງກັນປະເທດທົ່ວປວງຊົນ ກັບທ່າປ້ອງກັນຄວາມໝັ້ນຄົນທົ່ວປວງຊົນ. ກອງທັບ “ຈະຕ້ອງສືບຕໍ່ຄົ້ນຄວ້າ, ເຂົ້າໃຈສະຖານະການ ການພັດທະນາ ແລະ ຄວາມຜັນຜວນໃນທຸກທິດທາງ ແລະທຸກພື້ນທີ່, ໂດຍສະເພາະ ພື້ນທີ່ທີ່ສຳຄັນ; ເຮັດວຽກງານພະຍາກອນແລະໃຫ້ຄຳປຶກສາຍຸດທະສາດໃຫ້ໄດ້ເປັນຢ່າງດີ, ຄົ້ນພົບຢ່າງໄວ ແລະໃຫ້ຄຳປຶກສາແກ່ພັກ ລັດ ແລະ ຄະນະພັກການທະຫານສູນກາງໂດຍທັນທີ ເພື່ອຊີ້ນຳສະກັດກັ້ນຢ່າງທັນການ ແລະ ຈັດການແກ້ໄຂສະພາບການທີ່ເກີດຂຶ້ນຢ່າງມີປະສິດທິຜົນ, ບໍ່ໃຫ້ຕົກໃນທ່າຮັບ ໃນຄວາມບັງເອີນໂດຍເດັດຂາດ”(2).
ຕາມຈິດໃຈຊີ້ນຳຂອງທ່ານເລຂາທິການໃຫຍ່, ເພື່ອສ້າງກອງທັບໃຫ້ເຕີບໃຫຍ່ເຂັ້ມແຂງຢ່າງຮອບດ້ານ, ກ່ອນອື່ນໝົດຕ້ອງປັບປຸງຍົກສູງຄຸນນະພາບ ປະສິດທິພາບ ຂອງວຽກງານພັກ ແລະ ວຽກງານການເມືອງໃນທົ່ວກອງທັບ, ສ້າງກອງທັບທີ່ເຂັ້ມແຂງທາງດ້ານການເມືອງ; ເພີ່ມທະວີສາຍພົວພັນສາມັກຄີ ຄວາມຜູກພັນແບບເລືອດເນື້ອກັບປະຊາຊົນ, ເຮັດໜ້າທີ່ຂົນຂວາຍມະຫາຊົນໃນສະພາບການໃໝ່ໃຫ້ດີ; ສຸມໃສ່ກໍ່ສ້າງອົງຄະນະພັກກອງທັບໃຫ້ສະອາດປອດໃສ ແລະເຂັ້ນແຂງຢ່າງແທ້ຈິງທາງດ້ານການເມືອງ, ແນວຄິດ, ການຈັດຕັ້ງ ແລະ ຄຸນສົມບັດສິນທຳ. ພ້ອມກັນນັ້ນ, ສືບຕໍ່ເອົາໃຈໃສ່ຍົກສູງຄຸນນະພາບວຽກງານການເມືອງ; ມີແຜນນະໂຍບາຍແລະມາດຕະການເພື່ອຍົກສູງຄວາມສາມາດນຳພາ ແລະ ກຳລັງແຮງສູ້ຮົບ ຂອງບັນດາຄະນະພັກ ແລະ ອົງການຈັດຕັ້ງພັກ(3). ຕໍ່ສູ້ຢ່າງເດັດດ່ຽວເພື່ອເອົາຊະນະກົນອຸບາຍ ເລ່ລ່ຽມຂອງບັນດາອິດທິກຳລັງສັດຕູທີ່ຫວັງ “ເຮັດໃຫ້ກອງທັບປະຊາຊົນບໍ່ກ່ຽວຂ້ອງກັບການເມືອງ”. ຈຳເປັນຕ້ອງເນັ້ນແລະຢືນຢັນວ່າ ຄວາມຮຽກຮ້ອງຕ້ອງການທັງໝົດ ແລະ ກໍ່ແມ່ນບົດຮຽນຫຼັກແຫຼ່ງທີ່ນຳໄປສູ່ໄຊຊະນະຂອງການປະຕິວັດຫວຽດນາມ ແມ່ນການກໍ່ສ້າງທ່າສະໜາມຮົບໃນໃຈປະຊາຊົນ ແລະ ການລະດົມກຳລັງແຮງແຫ່ງມະຫາສາມັກຄີປວງຊົນທັງຊາດ, ດັ່ງນັ້ນ ຈຶ່ງຕ້ອງເສີມຂະຫຍາຍ “ບົດບາດຫຼັກແຫຼ່ງໃນການສ້າງພື້ນຖານການປ້ອງກັນປະເທດທົ່ວປວງຊົນ, ທ່າສະໜາມຮົບປ້ອງກັນປະເທດທົ່ວປວງຊົນ ຕິດກັບພື້ນຖານປ້ອງກັນຄວາມໝັ້ນຄົງປະຊາຊົນ, ທ່າສະໜາມຮົບປ້ອງກັນຄວາມໝັ້ນຄົງປະຊາຊົນ ແລະ ສ້າງການປ້ອງກັນເຂດທະຫານ ແລະ ເຂດປ້ອງກັນທຸກຂັ້ນທີ່ເຂັ້ມແຂງ; ເພີ່ມທະວີຄວາມສາມາດບົ່ມຊ້ອນແລະກຳລັງແຮງດ້ານປ້ອງກັນປະເທດໃຫ້ເຂັ້ມແຂງ””(4).
ທ່ານເລຂາທິການໃຫຍ່ຍັງເນັ້ນໜັກວ່າ: ຕ້ອງສືບຕໍ່ຍຶດຖືໜ້າທີ່ການພັດທະນາເສດຖະກິດເປັນໃຈກາງ, ການກໍ່ສ້າງພັກເປັນກຸນແຈ, ການພັດທະນາວັດທະນະທຳເປັນພື້ນຖານທາງດ້ານຈິດໃຈຂອງສັງຄົມ. ກໍ່ສ້າງກຳລັງແຮງສັງລວມທາງດ້ານການເມືອງ, ແນວຄິດ, ເສດຖະກິດ, ວັດທະນະທຳ, ການປ້ອງກັນປະເທດ, ປ້ອງກັນຄວາມໝັ້ນຄົງ ແລະ ການຕ່າງປະເທດ. ຍຸດທະສາດການປ້ອງກັນຄວາມໝັ້ນຄົງ, ປ້ອງກັນປະເທດ, ການສ້າງສາ ແລະ ປົກປັກຮັກສາປະເທດຊາດ ແມ່ນແຜນການທີ່ມີລັກສະນະສັງລວມ, ດ້ວຍລຳດັບການດຳເນີນ, ບາດກ້າວ ແລະ ການປະສານສົມທົບຢ່າງສະເໝີຕົ້ນສະເໝີປາຍຂອງຫຼາຍຂົງເຂດ, ໃນນັ້ນມີເສດຖະກິດ ແລະ ການຕ່າງປະເທດ: “ປະສານສົມທົບຢ່າງແໜ້ນແຟ້ນເສດຖະກິດກັບການປ້ອງກັນປະເທດ-ປ້ອງກັນຄວາມໝັ້ນຄົງ, ປ້ອງກັນປະເທດ-ປ້ອງກັນຄວາມໝັ້ນຄົງ ກັບເສດຖະກິດ ໃນແຕ່ລະຍຸດທະສາດ, ແຜນກຳນົດ, ນະໂຍບາຍການພັດທະນາເສດຖະກິດ-ສັງຄົມ; ປະສານສົມທົບຢ່າງແໜ້ນແຟ້ນການປ້ອງກັນປະເທດ-ປ້ອງກັນຄວາມໝັ້ນຄົງກັບການຕ່າງປະເທດ”(5). ນັ້ນແມ່ນຄວາມຮຽກຮ້ອງຕ້ອງການທີ່ຈຳເປັນ ໃນການເສີມຂະຫຍາຍກຳລັງແຮງສັງລວມຂອງຊາດ, ແມ່ນຫຼັກການທີ່ຂາດບໍ່ໄດ້ ໃນການກໍ່ສ້າງ ແລະ ຮັບປະກັນທ່າແລະຄວາມເຂັ້ມແຂງຂອງປະເທດ. ພ້ອມກັນນັ້ນ, ກໍ່ສ້າງລະບົບທັດສະນະທີ່ມີລັກສະນະຍຸດທະສາດຄື: ການປົກປັກຮັກສາປະເທດຊາດຕັ້ງແຕ່ຕົ້ນ ຈາກໄລຍະໄກ, ປົກປ້ອງປະເທດເມື່ອຍັງບໍ່ຕົກຢູ່ໃນອັນຕະລາຍ; ການປົກປ້ອງຄວາເປັນເອກະລາດ ເປັນເຈົ້າຕົນເອງຂອງປະເທດ ຕ້ອງຕິດພັນກັບການປົກປັກຮັກສາສັນຕິພາບ, ໂດຍຖືເອົາການປົກປັກຮັກສາສະພາບແວດລ້ອມສັນຕິພາບ ເປັນເປົ້າໝາຍທີ່ສອດຫ້ອຍຕະຫຼອດ ໃນການກໍ່ສ້າງກຳລັງແຮງສັງລວມການປ້ອງກັນເທດ, ການທະຫານ, ສ້າງເງື່ອນໄຂເພື່ອພັດທະນາເສດຖະກິດ-ສັງຄົມຂອງປະເທດ.
ສາມາດຢືນຢັນໄດ້ວ່າ ການຊີ້ນຳຂອງສະຫາຍເລຂາທິການໃຫຍ່, ເລຂາທິການຄະນະພັກການທະຫານສູນກາງ ກ່ຽວກັບແນວທາງ, ຍຸດທະສາດການທະຫານ, ການປ້ອງກັນປະເທດ ບໍ່ພຽງແຕ່ສະແດງໃຫ້ເຫັນເຖິງການປະສົມປະສານຢ່າງກົມກຽວ ລະຫວ່າງມູນເຊື້ອໃນການກໍ່ຕັ້ງປະເທດໄປຄຽງຄູ່ກັບການປົກປັກຮັກສາປະເທດຂອງຊາດຫວຽດນາມ ດ້ວຍບົດຮຽນພຶດຕິກຳທີ່ອຸດົມສົມບູນແລະມີຊີວິດຊີວາເທົ່ານັ້ນ, ແຕ່ຍັງໃຫ້ເຫັນເຖິງຈິນຕະນາການປະດິດສ້າງ ຄວາມສຸດອົກສຸດໃຈ ແລະຄວາມຮັບຜິດຊອບ ຂອງທ່ານເລຂາທິການໃຫຍ່ ເຊິ່ງຍາມໃດກໍ່ຖືເອົາຜົນປະໂຫຍດຂອງຊາດ, ຜົນປະໂຫຍດຂອງປະຊາຊົນເປັນອັນດັບໜຶ່ງ, ສູງສຸດ. ນັ້ນກໍ່ແມ່ນພື້ນຖານເພື່ອໃຫ້ທົ່ວພັກ, ທົ່ວປວງຊົນ, ທົ່ວກອງທັບສືບຕໍ່ຄົ້ນຄວ້າເພີ່ມເຕີມ ປັບປຸງບູລະນະແນວທາງການທະຫານ ແລະຍຸດທະສາດການປ້ອງກັນປະເທດ, ປະກອບສ່ວນປົກປັກຮັກສາປະເທດຊາດ “ຕັ້ງແຕ່ຕົ້ນ ຈາກໄລຍະໄກ”, ຮັກສາໃຫ້ “ພາຍໃນອົບອຸ່ນ, ພາຍນອກລາບລື່ນ”, “ປົກປັກຮັກສາປະເທດເມື່ອຍັງບໍ່ທັນຕົກຢູ່ໃນອັນຕະລາຍ”, ຮັກສາສັນຕິພາບແລະສະຖຽນລະພາບຂອງປະເທດ. ການຊີ້ນຳຂອງສະຫາຍເລຂາທິການໃຫຍ່ ໄດ້ຮັບການຈັດວາງຕາມລຳດັບ ຕັ້ງແຕ່ບັນຫາທົ່ວໄປ ຈົນເຖິງບັນດາເນື້ອໃນສະເພາະ, ຕັ້ງແຕ່ການກຳນົດທິດຍຸດທະສາດ ຈົນເຖິງຄວາມຮຽກຮ້ອງຕ້ອງການກໍ່ສ້າງກອງທັບທີ່ເຂັ້ມແຂງ; ສ່ອງແສງເຖິງການນຳພາ ຊີ້ນຳທີ່ມີລັກສະນະຮອບດ້ານ ສັງລວມ ເດັດຂາດຂອງຜູ້ນຳພັກ, ປະກອບສ່ວນຊີ້ແຈງບາດກ້າວພັດທະນາຈິນຕະນາການທິດສະດີຂອງພັກກອມມູນິດຫວຽດນາມ ກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ, ໂດຍສະເພາະ ບົດບາດນຳພາ ແລະ ຄວາມສາມາດໃນການວາງແຜນກຳນົດແນວທາງ ແລະ ນະໂຍບາຍການປ້ອງກັນປະເທດ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃນໄລຍະໃໝ່.
ການກໍ່ສ້າງກຳລັງທະຫານທີ່ຍຶດຖືບົດບາດ, ພາລະບົດບາດ, ໜ້າທີ່ ຂອງແຕ່ລະອົງການຈັດຕັ້ງ ກົມກອງ,
ເພື່ອປະກອບສ່ວນເຂົ້າໃນການກໍ່ສ້າງກອງທັບປະຊາຊົນຫວຽດນາມທີ່ປະຕິວັດ, ເປັນແບບຫຼວງ, ຍອດຢ້ຽມ
ແລະ ທັນສະໃໝເທື່ອລະກ້າວ, ໃນນັ້ນ ບາງເຫຼົ່າທັບ ເຫຼົ່າທະຫານ ກອງກຳລັງຈະກ້າວຂຶ້ນສູ່
ທັນສະໄໝໂດຍກົງ, ຕອບສະໜອງຄວາມຕ້ອງການແລະໜ້າທີ່ ໃນສະພາບການໃໝ່
ຕະຫຼອດກອງປະຊຸມໃຫຍ່ຂອງພັກ (ແຕ່ກອງປະຊຸມໃຫຍ່ຄັ້ງທີ VI ເຖິງກອງປະຊຸມໃຫຍ່ຄັ້ງທີ XII), ພັກກອມມູນິດຫວຽດນາມມີທັດສະນະທີ່ສອດຄ່ອງສະເໝີຄື: “ກໍ່ສ້າງກອງທັບປະຊາຊົນທີ່ປະຕິວັດ, ເປັນແບບຫຼວງ, ຍອດຢ້ຽມ ແລະ ທັນສະໄໝເທື່ອລະກ້າວ”. ພິເສດ, ໃນເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ, ທັດສະນະກ່ຽວກັບ “ການກໍ່ສ້າງກອງທັບທັນສະໄໝ” ສືບຕໍ່ໄດ້ຮັບການປັບປຸງ ພັດທະນາ ແລະສະແດງອອກຢ່າງຈະແຈ້ງກວ່າອີກ ໂດຍມີເປົ້າໝາຍ ແຜນງານ ແລະ ຂັ້ນຕອນສະເພາະ: “ການກໍ່ສ້າງກອງທັບປະຊາຊົນ,… ທີ່ປະຕິວັດ, ເປັນແບບຫຼວງ, ຍອດຢ້ຽມ ແລະ ທັນສະໄໝເທື່ອລະກ້າວ, ບາງເຫຼົ່າທັບ ເຫຼົ່າທະຫານ ກອງກຳລັງຈະກ້າວຂຶ້ນສູ່ທັນສະໄໝໂດຍກົງ”(6). ຜ່ານບົດຄວາມ ສຸນທອນພົດ ຄຳປາໄສ 18 ບົດໃນພາກທີສອງ ໃນປຶ້ມ ຂອງທ່ານເລຂາທິການໃຫຍ່, ເລຂາທິການຄະນະພັກການທະຫານສູນກາງ ໄດ້ຊີ້ແຈງຢ່າງຈະແຈ້ງເຖິງທັດສະນະ ແລະ ການຊີ້ນຳຢ່າງໃກ້ຊິດ ແລະ ຮອບດ້ານຂອງສະຫາຍເລຂາທິການໃຫຍ່ ຕໍ່ບັນດາເຫຼົ່າທັບ, ເຫຼົ່າທະຫານ, ສະຖາບັນການສຶກສາ ແລະ ໂຮງຮຽນການທະຫານ.
ກົມໃຫຍ່ການເມືອງກອງທັບປະຊາຊົນຫວຽດນາມແມ່ນອົງການທີ່ສຳຄັນອັນດັບໜຶ່ງໃນການເຄື່ອນໄຫວນຳພາຂອງພັກຕໍ່ກອງທັບ, ອົງການເສນາທິການຂອງກົມການເມືອງ, ຄະນະເລຂາທິການ ແລະ ໂດຍກົງແລະເປັນປະຈຳ ແມ່ນຂອງຄະນະພັກການທະຫານສູນກາງ ກ່ຽວກັບການເຄື່ອນໄຫວດ້ານວຽກງານພັກ ແລະວຽກງານການເມືອງ ໃນທົ່ວກອງທັບ, ກົມໃຫຍ່ການເມືອງກອງທັບຈຶ່ງມີຂອບເຂດເຄື່ອນໄຫວທີ່ກວ້າງຂວາງ ແລະ ເນື້ອໃນທີ່ສຳຄັນໃນ 7 ຂົງເຂດວຽກງານໃຫຍ່ຄື: ການໂຄສະນາອົບຮົມ, ການຈັດຕັ້ງ, ພະນັກງານ, ການປ້ອງກັນ, ນະໂຍບາຍ, ການຂົນຂວາຍປະຊາຊົນ, ວຽກງານມະຫາຊົນ; ພ້ອມກັນນັ້ນ, ປະສານງານກັບຄະນະກຳມະການກວດກາ ຂອງຄະນະພັກການທະຫານສູນກາງ ເພື່ອຊີ້ນຳວຽກງານກວດກາໃນທົ່ວອົງຄະນະພັກກອງທັບ. ທ່ານເລຂາທິການໃຫຍ່ໄດ້ເນັ້ນເປັນພິເສດເຖິງບັນດາບັນຫາທີ່ສຳຄັນໃນທິດທາງ, ໜ້າທີ່ຂອງກົມໃຫຍ່ການເມືອງໃນເວລາຕໍ່ໄປ. ນັ້ນແມ່ນ: ເຂົ້າໃຈເຖິງທີ່ຕັ້ງ, ບົດບາດຂອງວຽກງານພັກ ແລະ ວຽກງານການເມືອງໃນກອງທັບ ຢ່າງຄົບຖ້ວນແລະເລິກເຊິ່ງຍິ່ງຂຶ້ນ ເຊິ່ງກວ້າງກວ່ານັ້ນແມ່ນຄວາມຮັບຮູ້ເຖິງການເຄື່ອນໄຫວນຳພາຂອງພັກຕໍ່ກອງທັບໃນສະພາບການໃໝ່; ປະສານງານຢ່າງດີກັບບັນດາອົງການ, ບັນດາເຫຼົ່າທັບ ເພື່ອດຳເນີນງານດ້ານແນວຄິດແລະທິດສະດີ, ປະຕິບັດວຽກງານອົບຮົມສຶກສາທາງການເມືອງ, ການກໍ່ສ້າງອົງການຈັດຕັ້ງພັກ ແລະ ວຽກງານຂົນຂວາຍປະຊາຊົນ; ປະສານສົມທົບກັບບັນດາທ້ອງຖິ່ນ ເພື່ອເສີມຂະຫຍາຍບົດບາດປະຈັນບານ ແລະການເປັນແບບຢ່າງຂອງກອງທັບ ຢ່າງແຂງແຮງ; ເອົາໃຈໃສ່ເປັນພິເສດເຖິງວຽກງານກໍ່ສ້າງຂະແໜງການ, ກໍ່ສ້າງຖັນແຖວພະນັກງານການເມືອງຂັ້ນຕ່າງໆ. ຈາກນັ້ນ, ກໍ່ສ້າງອົງການກົມໃຫຍ່ການເມືອງທີ່ເຂັ້ມແຂງແລະເປັນແບບຢ່າງໃນທຸກດ້ານຢ່າງແທ້ຈິງ ເພື່ອສຳເລັດໜ້າທີ່ການເມືອງທີ່ໄດ້ຮັບມອບໝາຍ.
ສຳລັບກອງປ້ອງກັນອາກາດ - ກອງທັບອາກາດ ເຊິ່ງເປັນກອງກຳລັງຫຼວງທີ່ສຳຄັນຂອງກອງທັບປະຊາຊົນຫວຽດນາມ ໂດຍມີບົດບາດແລະຄວາມຮັບຜິດຊອບຫຼັກ ໃນກອງກຳລັງປ້ອງກັນທາງອາກາດສາມເຫຼົ່າທະຫານ ຂອງທ່າສະໜາມຮົບປ້ອງກັນອາກາດປະຊາຊົນ, ທ່ານເລຂາທິການໃຫຍ່ ຮຽກຮ້ອງໃຫ້ປະຕິບັດວຽກງານກໍ່ສ້າງພັກ ການອົບຮົມສຶກສາດ້ານການເມືອງ ແນວຄິດ ໃຫ້ດີ; ຕັ້ງໜ້າຈັດຕັ້ງການເຝິກແອບ, ຍົກສູງກຳລັງແຮງ, ລະດັບຄວາມຮູ້ ແລະ ຄວາມສາມາດໃນການຮົບ; ການຄຸ້ມຄອງ, ຂຸດຄົ້ນ ແລະ ໃຊ້ອາວຸດແລະອຸປະກອນທາງເຕັກນິກທີ່ມີຢູ່ ຢ່າງມີປະສິດທິພາບ ລວມເຖິງອາວຸດແລະຍານພາຫະນະໃໝ່, ເພື່ອປະກອບສ່ວນເຂົ້າໃນການປົກປ້ອງນ່ານຟ້າ, ທະເລ, ຊາຍແດນ, ໝູ່ເກາະທະເລ, ເຂດເສດຖະກິດ ແລະ ການເມືອງຂອງປະເທດຊາດຢ່າງໝັ້ນຄົງ.
ກ່ຽວກັບບົດບາດຫຼັກ ແລະ ການນຳໜ້າຂອງກອງທັບເຮືອປະຊາຊົນຫວຽດນາມ ໃນການປົກປັກຮັກສາອະທິປະໄຕ, ສິດອະທິປະໄຕ, ສິດຕັດສິນ ແລະ ຜົນປະໂຫຍດຂອງຊາດໃນທະເລ ແລະ ໝູ່ເກາະຫວຽດນາມ, ທ່ານເລຂາທິການໃຫຍ່ຮຽກຮ້ອງໃຫ້ພະນັກງານແລະນັກຮົບຕ້ອງ “ເຂົ້າໃຈທັດສະນະ, ແນວທາງ, ແຜນນະໂຍບາຍ, ນະໂຍບາຍຂອງພັກແລະລັດກ່ຽວກັບການສ້າງສາ ແລະ ປົກປັກຮັກສາປະເທດຊາດ ຢ່າງເລິກເຊິ່ງ ລວມທັງທີ່ຕັ້ງທາງຍຸດທະສາດຂອງທະເລ ແລະ ໝູ່ເກາະ”(7), ປັບປຸງຍົກສູງຄຸນນະພາບການເຝິກອົບຮົມ, ຄວາມພ້ອມຮົບ ແລະ ຄວາມສາມາດໃນການຄຸ້ມຄອງ ແລະ ປົກປັກຮັກສາອຳນາດອະທິປະໄຕທາງທະເລ ແລະ ໝູ່ເກາະ.
ທ່ານເລຂາທິການໃຫຍ່ກໍ່ໃຫ້ຄວາມເອົາໃຈໃສ່ ແລະ ຊີ້ນຳກອງກຳລັງທະຫານຮັກສາຊາຍແດນຢ່າງໃກ້ຊິດ, ໂດຍຮຽກຮ້ອງໃຫ້ກອງກຳລັງນີ້ ຕ້ອງເປັນກອງທັບການເມືອງທີ່ດີ, ເປັນກອງທັບທີ່ເຮັດວຽກງານດີ ຂອງກອງທັບປະຊາຊົນຫວຽດນາມ ທີ່ເຮັດໜ້າທີ່ປົກປັກຮັກສາອະທິປະໄຕໃນດິນແດນ, ຮັກສາຄວາມໝັ້ນຄົງ ແລະຄວາມສະຫງົບຮຽບຮ້ອຍຢູ່ເຂດຊາຍແດນ; ເຮັດໜ້າທີ່ຂົນຂວາຍມະຫາຊົນໄດ້ດີ, ປະສານສົມທົບຢ່າງແໜ້ນແຟ້ນ ລະຫວ່າງການພັດທະນາເສດຖະກິດ-ສັງຄົມ ກັບການປັບປຸງການປ້ອງກັນປະເທດ, ປ້ອງກັນຄວາມໝັ້ນຄົງຊາຍແດນ ແລະ ປະຕິບັດໜ້າທີ່ການຕ່າງປະເທດບໍລິເວນຊາຍແດນ. ສຳລັບກອງກຳລັງສືບຂ່າວດ້ານປ້ອງກັນປະເທດ, ຕ້ອງເອົາໃຈໃສ່ກໍ່ສ້າງທ່າສະໜາມຮົບສືບຂ່າວທີ່ເຂັ້ນແຂງ ແລະ ໄຫວພິບ; ເສີມຂະຫຍາຍກຳລັງແຮງສັງລວມຂອງບັນດາວິທີການແລະກຳລັງໃຫ້ສູງສຸດ; ຮັບປະກັນຄວາມໝັ້ນຄົງແລະຄວາມປອດໄພຂອງການສືບຂ່າວໃຫ້ດີ; ຄົ້ນຄວ້າພັດທະນາທິດສະດີສິລະປະການສືບຂ່າວທີ່ມີລັກສະນະແລະແບບແຜນຫວຽດນາມ…, ເພື່ອສ້າງໜ່ວຍສືບຂ່າວດ້ານປ້ອງກັນປະເທດ ທີ່ຈົ່ງຮັກພັກດີແລະໜ້າເຊື່ອຖືເປັນພິເສດ ຂອງພັກ, ລັດ, ກອງທັບ ແລະ ປະຊາຊົນ.
ເພື່ອຮັບປະກັນຄວາມເປັນເອກະພາບ, ເປັນລະບົບ, ເພີ່ມທະວີຄວາມສາມາດໃນການຄາດຄະເນ ແລະ ປະສານສົມທົບການຮົບໄດ້ຢ່າງມີປະສິດທິຜົນ, ມີຄວາມສາມາດພຽງພໍທີ່ຈະນາບຄູ່ແລະປ້ອງກັນ ແລະ ຕອບສະໜອງຄວາມຕ້ອງການໃນການສ້າງສາ ແລະປົກປັກຮັກສາປະເທດຊາດ ໃນການຜັນຜວນທີ່ສັບສົນຂອງສະພາບການຕົວຈິງ, ຕາມທັດສະນະຂອງທ່ານເລຂາທິການໃຫຍ່ ຫງວຽນຝູຈ້ອງ, ຄຽງຄູ່ກັບກອງກຳລັງຂອງບັນດາເຫຼົ່າທັບ, ເຫຼົ່າທະຫານນັ້ນ, ບັນດາສະຖາບັນການສຶກສາ ແລະ ໂຮງຮຽນພາຍໃນກອງທັບກໍ່ມີບົດບາດສຳຄັນທີ່ສຸດ. ດ້ວຍລັກສະນະພິເສດໃນປະຫວັດສາດຂອງປະເທດ, ບົດຮຽນທີ່ເປັນກົດເກນຕະຫຼອດຂະບວນການພັດທະນາຂອງຊາດຫວຽດນາມແມ່ນ ການກໍ່ຕັ້ງປະເທດຕ້ອງໄປຄຽງຄູ່ກັບການຮັກສາປະເທດ, ການກໍ່ສ້າງຕ້ອງໄປຄຽງຄູ່ກັບການປົກປັກຮັກສາປະເທດຊາດສະເໝີ. ການປ້ອງກັນປະເທດ ແລະປ້ອງກັນຄວາມໝັ້ນຄົງ ແມ່ນພາລະກິດອັນສຳຄັນຍິ່ງຂອງຊາດ, ແມ່ນໜ້າທີ່ເປັນປະຈຳແລະສຳຄັນເປັນຢ່າງຍິ່ງ ຂອງທົ່ວປວງຊົນ ແລະ ທົ່ວປະເທດ. ຄວາມເປັນຈິງໃຫ້ເຫັນວ່າ ຄືກັນກັບວຽກງານການສ້າງປະເທດ, ຖ້າຢາກປົກປັກຮັກສາປະເທດ ກໍ່ຕ້ອງມີຄວາມຮູ້, ຄວາມເຂົ້າໃຈ ແລະ ບົດຮຽນປະສົບການໃນການປົກປັກຮັກສາປະເທດ. ບັນດາສະຖາບັນການສຶກສາ ແລະ ໂຮງຮຽນໃນກອງທັບໄດ້ຮັບການຈັດຕັ້ງຂຶ້ນ ເພື່ອຕອບສະໜອງຄວາມຕ້ອງການທີ່ຫຼີກລ່ຽງບໍ່ໄດ້ນັ້ນ, ປະກອບສ່ວນເຂົ້າໃນການຝຶກອົບຮົມພະນັກງານການທະຫານ ແລະ ບຳລຸງຄວາມຮູ້ດ້ານການປ້ອງກັນປະເທດ ໃຫ້ປະຊາກອນທັງໝົດ, ໂດຍສະເພາະ ພະນັກງານນຳພາ, ຄຸ້ມຄອງທຸກລະດັບ. ຕາມນັ້ນ, ເມື່ອກ່າວເຖິງໜ້າທີ່ຂອງສະຖາບັນການສຶກສາ ແລະ ໂຮງຮຽນໃນກອງທັບໃນສະພາບການໃໝ່, ທ່ານເລຂາທິການໃຫຍ່ຮຽກຮ້ອງໃຫ້ອອກແຮງປ່ຽນແປງໃໝ່ເນື້ອໃນ, ແຜນການ, ວິທີການສຶກສາ, ຝຶກອົບຮົມ, ບຳລຸງສ້າງ, ການສອນ ແລະ ການຄົ້ນຄວ້າວິທະຍາສາດ; ສົມທົບຢ່າງແໜ້ນແຟ້ນການສະຫຼຸບສັງລວມພຶດຕິກຳຕົວຈິງ ກັບການຄົ້ນຄວ້າທິດສະດີ ເພື່ອພັດທະນາສິລະປະການທະຫານ, ວັດທະນະທຳການທະຫານຫວຽດນາມ; ຕັ້ງໜ້າເຂົ້າຮ່ວມການຕໍ່ສູ່ໃນແນວຮົບທິດສະດີ ເພື່ອປະກອບສ່ວນເຂົ້າໃນການປົກຮັກຮັກສາສະໜາມຮົບແນວຄິດຂອງພັກຢ່າງໝັ້ນຄົງ.
ພິເສດ, ເພື່ອເຊີເຊູບົດບາດ ແລະ ຄວາມຮັບຜິດຊອບຂອງຄົນລຸ້ນໜຸ່ມຫວຽດນາມໂດຍທົ່ວໄປ ແລະ ຊາວໜຸ່ມກອງທັບເວົ້າສະເພາະ, ທ່ານເລຂາທິການໃຫຍ່ໄດ້ເຂົ້າຮ່ວມແລະກ່າວຄຳເຫັນ ໃນກອງປະຊຸມພົບປະບັນດາຜູ້ແທນທີ່ດີເດັ່ນ ຂອງຄະນະຊາວໜຸ່ມກອງທັບ ໂດຍຢືນຢັນການປະກອບສ່ວນ ແລະ ການອຸທິດຂອງກຳລັງຊາວໜຸ່ມກອງທັບ ໃນພາລະກິດການຕໍ່ສູ້ເພື່ອປົກປັກຮັກສາປະເທດຊາດ, ການສ້າງສາແລະພັດທະນາປະເທດ. ນອກຈາກນີ້ ທ່ານເລຂາທິການໃຫຍ່ຍັງໄດ້ເຕືອນຄະນະຊາວໜຸ່ມທະຫານ ໃຫ້ພະຍາຍາມສ້າງ “ຄວາມມຸ່ງມາດປາດຖະໜາອັນດີງາມ-ຄວາມຮັບຜິດຊອບສູງ; ຮຽນຮູ້ດີ-ປະຕິບັດເກັ່ງ; ສາມັກຄີດີ - ມີວິໄນເຂັ້ມງວດ”, ສະແດງເຖິງຄວາມກ້າຫານ ຄວາມສະຫຼາດ ແລະ ຄຸນສົມບັດຂອງຊາວໜຸ່ມຫວຽດນາມ ໃນສະໄໝໂຮ່ຈີມິນ(8); ອອກແຮງຮ່ຳຮຽນ, ເຝິກຝົນຫຼໍ່ຫຼອມ, ຄົ້ນຄວ້າວິທະຍາສາດ, ປະຍຸກຄວາມສຳເລັດທາງວິທະຍາສາດ ແລະ ເຕັກໂນໂລຊີ ເຂົ້າໃນຂົງເຂດການທະຫານ; ເປັນກຳລັງຫຼັກແຫຼ່ງ, ປະຈັນບານ ແລະ ນຳໜ້າໃນການປົກປັກຮັກສາພື້ນຖານແນວຄິດຂອງພັກ, ພ້ອມທີ່ຈະຕະລຸມບອນ ນຳໜ້າໃນການປະຕິບັດໜ້າທີ່ຂອງກອງທັບໃຫ້ສຳເລັດ, ໂດຍສະເພາະໃນພື້ນທີ່ມີຄວາມຫຍຸ້ງຍາກ, ລຳບາກ ຖືກຕ້ອງຕາມຄຳສອນຂອງປະທານໂຮ່ຈີມິນ: “ບ່ອນໃດຕ້ອງການ ບ່ອນນັ້ນມີຊາວໜຸ່ມ, ວຽກໃດຫຍຸ້ງຍາກ ຈະມີຊາວໜຸ່ມ”(9).
ການປົກປັກຮັກສາສັນຕິພາບ - ບາດກ້າວບຸກທະລຸໃນຄວາມຄິດກ່ຽວກັບການສ້າງ
ຍຸດທະສາດການປ້ອງກັນປະເທດໃໝ່ຂອງຫວຽດນາມ
ສະຖານະການຂອງສະພາບການໃໝ່ເຮັດໃຫ້ເກີດຄວາມຕ້ອງການຮີບດ່ວນ, ຈຳເປັນຕ້ອງມີເອກະສານຍຸດທະສາດທີ່ມີລະດັບພຽງພໍ ເພື່ອກຳນົດແນວທາງປົກປັກຮັກສາປະເທດຊາດຫວຽດນາມສັງຄົມນິຍົມຢ່າງຄົບຊຸດແລະຮອບດ້ານ, ສ້າງພື້ນຖານເພື່ອຄວາມເປັນເອກະພາບໃນການຮັບຮູ້ ແລະ ການເຄື່ອນໄຫວຂອງລະບົບການເມືອງທັງໝົດ, ວາງຮາກຖານເພື່ອກຳນົດເປົ້າໝາຍ ແລະ ໜ້າທີ່ການສ້າງກອງທັບໃນໄລຍະຍາວ ແລະ ຜັນຂະຫຍາຍເປັນໂຄງການຍຸດທະສາດເລິກເຊິ່ງສະເພາະອື່ນໆ. ດັ່ງນັ້ນ, ຍຸດທະສາດການປ້ອງກັນປະເທດຫວຽດນາມ ຈຶ່ງໄດ້ກຳເນີດຂຶ້ນ. ສິ່ງສຳຄັນທີ່ສຸດໃນການສ້າງບາດກ້າວບຸກທະລຸໃນຄວາມຄິດກ່ຽວກັບການສ້າງ ຍຸດທະສາດການປ້ອງກັນປະເທດໃໝ່ ຂອງຫວຽດນາມ, ນັ້ນແມ່ນ ຖືການປົກປັກຮັກສາສະພາບແວດລ້ອມສັນຕິພາບ ເປັນຈຸດໝາຍທີ່ສອດຫ້ອຍຕະຫຼອດການກໍ່ສ້າງກຳລັງແຮງສັງລວມ ຂອງການປ້ອງກັນປະເທດ ແລະ ກຳລັງທະຫານ “ການປົກປັກຮັກສາເອກະລາດ ແລະ ຄວາມເປັນເຈົ້າຕົນເອງຂອງປະເທດ ຕ້ອງຕິດພັນກັບການປົກປັກຮັກສາສັນຕິພາບ. ນີ້ແມ່ນແນວຄວາມຄິດທີ່ເປັນເອກະລັກສະເພາະ, ພ້ອມກັນນັ້ນ ກໍ່ແມ່ນຄຸນຄ່າທົ່ວໄປຂອງຍຸກສະໄໝ ໂດຍເຂົ້າໃຈຢ່າງເລິກເຊິ່ງວ່າ: “ການປ້ອງກັນປະເທດຊາດແມ່ນການປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ; ປົກປັກຮັກສາລະບອບສັງຄົມນິຍົມ, ປົກປັກຮັກສາປະຊາຊົນ, ສ້າງສະພາບແວດລ້ອມທີ່ເອື້ອອຳນວຍຕໍ່ການພັດທະນາ, ແຕ່ຕ້ອງຕິດພັນກັບການປົກປົກຮັກສາສັນຕິພາບ ແລະ ສັນຕິພາບຖືເປັນຄຸນຄ່າອັນສັກສິດຂອງປະເທດ(10). ຖ້າວ່າບໍ່ມີເປົ້າໝາຍນີ້ ຈະບໍ່ມີປັດໄຈບຸກທະລຸໃນຄວາມຄິດຍຸດທະສາດການປ້ອງກັນປະເທດໃນໄລຍະໃໝ່; ຫຼືຖ້າຫາກຈຸດປະສົງຫຼັກບໍ່ຖືກຕ້ອງ, ບໍ່ບັນລຸ ຍຸດທາສາດຈະຜິດແລະຈະຫຼຸດລອຍໄປ.
ນອກຈາກບົດຄວາມ ຄຳປາໄສ ແລະ ບົດສຳພາດຂອງເລຂາທິການໃຫຍ່ຈຳນວນ 39 ບົດແລ້ວ, ປື້ມເຫຼັ້ມນີ້ຍັງໄດ້ອຸທິດພື້ນທີ່ສ່ວນໜຶ່ງເພື່ອພິມບົດຄວາມເຕັມເລື່ອງ “ເລຂາທິການໃຫຍ່ຫງວຽນຝູຈ້ອງ, ເລຂາທິການຄະນະພັກການທະຫານສູນກາງ - ບຸກຄົນທີ່ມີຄວາມຄິດສັດຈະວິພາກ ແລະ ວິໄສທັດຍຸດທະສາດ ໃນການສ້າງແນວທາງການທະຫານ ຍຸດທະສາດການປ້ອງກັນປະເທດ ແລະ ການປົກປັກຮັກສາປະເທດຊາດສັງຄົມນິຍົມຫວຽດນາມ” ຂອງພົນໂທ ຫງວຽນຈີວິ້ງ, ອະດິດກຳມະການສູນກາງພັກ, ອະດິດຮອງລັດຖະມົນຕີກະຊວງປ້ອງກັນປະເທດ, ເພື່ອຊ່ວຍໃຫ້ຜູ້ອ່ານມີມຸມມອງທີ່ພາວະວິໄສ ກ່ຽວກັບການຊີ້ນຳ, ການກຳນົດທິດ, ການຄິດແບບສັດຈະວິພາກ ແລະ ວິໄສທັດຍຸດທະສາດ ຂອງທ່ານເລຂາທິການໃຫຍ່ ຫງວຽນຝູຈ້ອງ, ເລຂາທິການຄະນະພັກການທະຫານສູນກາງ ໃນການສ້າງແນວທາງການທະຫານ ແລະ ຍຸດທະສາດການປ້ອງກັນປະເທດ, ປົກປັກຮັກສາປະເທດຊາດຫວຽດນາມສັງຄົມນິຍົມ. ດ້ວຍພາສາທີ່ລຽບງ່າຍ ຈິດຕະນາການແຫຼມຄົມ, ຜູ້ຂຽນບົດຄວາມໄດ້ສະຫຼູບການນຳພາ ແລະ ຊີ້ນຳຂອງສະຫາຍເລຂາທິການໃຫຍ່, ເລຂາທິການຄະນະພັກການທະຫານສູນກາງ ເຊິ່ງເປັນ “ນັກຍຸດທະສາດ” ຜູ້ສ້າງທິດທາງພື້ນຖານ ແລະ ສຳຄັນໃນແນວທາງປົກປັກຮັກສາປະເທດຊາດຫວຽດນາມສັງຄົມນິຍົມໃນຍຸກໃໝ່ - ສະແດງໃຫ້ເຫັນເຖິງຂະບວນການຄົ້ນຄວ້າ, ຮຽບຮຽງ ແລະ ຈັດຕັ້ງຊີ້ນຳການສ້າງແລະປັບປຸງເອກະສານສະເພາະເລື່ອງຂອງພັກໃຫ້ສຳເລັດສົມບູນ: ມະຕິເລກທີ 24-NQ/TW ລົງວັນທີ 16 ເມສາ 2018, ຂອງກົມການເມືອງສູນກາງພັກ ສະໄໝທີ XII, ວ່າດ້ວຍຍຸດທະສາດການປ້ອງກັນປະເທດຫວຽດນາມ. ຄົ້ນຄິດຈາກການເຮັດວຽກ, ລາຍງານໂດຍກົງ ແລະ ການຂໍຄຳເຫັນຊີ້ນຳຈາກເລຂາທິການໃຫຍ່, ຜູ້ຂຽນບົດຄວາມໄດ້ພັນລະນາເຖິງພາບລັກຂອງເລຂາທິການໃຫຍ່ວ່າ “ເປັນຜູ້ນຳທີ່ຮູ້ຈັກຮັບຟັງສະເໝີ”, ແລະ ສິ່ງທີ່ເຮັດໃຫ້ທ່ານປະຫຼາດໃຈ ແລະ ນິຍົມນັບຖື ແມ່ນແນວຄິດ ວິໄສທັດ ແລະ ວິທີການວິທະຍາສາດທີ່ໂດດເດັ່ນ ຂອງທ່ານເລຂາທິການໃຫຍ່ ເຊິ່ງສະແດງໃຫ້ເຫັນຢ່າງຈະແຈ້ງ ຕະຫຼອດຂະບວນການຊີ້ນຳ ການພັດທະນາເອກະສານສະເພາະເລື່ອງຂອງພັກ ກ່ຽວກັບວຽກງານການປ້ອງກັນປະເທດ, ການທະຫານ. ປະຫຼາດໃຈ “ໃນຄວາມຮອບຮູ້, ຄວາມຮູ້ອັນກວ້າງຂວາງ” ຂອງເລຂາທິການໃຫຍ່ກ່ຽວກັບ “ຂົງເຂດທີ່ບໍ່ຄຸ້ນເຄີຍຫຼາຍ”; ຜ່ານຂະບວນການເຮັດວຽກຮ່ວມກັບເລຂາທິການໃຫຍ່, ຜູ້ຂຽນໄດ້ຮຽນຮູ້ເພີ່ມເຕີມກ່ຽວກັບຄວາມຄ່ຽມຄົມ ແລະຄວາມລຽບງ່າຍຂອງສະຫາຍເລຂາທິການຄະນະພັກການທະຫານສູນກາງ: “ຄວາມຮູ້ດ້ານການທະຫານ ແລະ ການປ້ອງກັນປະເທດແມ່ນຂອງພວກເຈົ້າ; ໃນປື້ມ ໜັງສືພິມ ແລະ ເອກະສານຕ່າງໆຫຼວງຫຼາຍ; ສໍາລັບຂ້າພະເຈົ້າ, ຂ້າພະເຈົ້າເບິ່ງຜ່ານເລນຂອງນັກຄົ້ນຄວ້າທີ່ຮຽນຮູ້ດ້ວຍຕົນເອງ, ເຮັດວຽກແລະຮຽນຮູ້ໄປພ້ອມໆກັນ”(11). ນັ້ນແມ່ນບົດຮຽນໃຫຍ່ຈາກທ່ານເລຂາທິການໃຫຍ່ ໃນຂະບວນການສ້າງຍຸດທະສາດການປ້ອງກັນປະເທດ ແລະການທະຫານ, ແລະກໍ່ແມ່ນວິທີການທີ່ເລຂາທິການໃຫຍ່ເຂົ້າເຖິງບັນຫາ ແລະ ສະແດງຄວາມຮັບຜິດຊອບໃນຖານະເລຂາທິການຄະນະພັກການທະຫານສູນກາງ. ເຖິງວ່າຈະຖືວ່າຕົນເອງເປັນ “ຄົນນອກ” ແລະຍັງບໍ່ໄດ້ເຂົ້າຮ່ວມກອງທັບ, ແຕ່ດ້ວຍຄຳແນະນຳທີ່ຈະແຈ້ງ, ສະເພາະເຈາະຈົງ, ລະອຽດແລະເລິກເຊິ່ງ, ທ່ານເລຂາທິການໃຫຍ່ກໍ່ສະແດງໃຫ້ເຫັນເຖິງຄວາມຮອບຮູ້ ແລະ ຄວາມຮັບຮູ້ທີ່ກວ້າງຂວາງ ກໍ່ຄືຄວາມຮັບຜິດຊອບທີ່ສູງທີ່ສຸດ, ຄວາມຕັ້ງໃຈອັນແຮງກ້າ ແລະ ການຄິດຍຸດທະສາດຂອງຜູ້ນຳພັກເຮົາ: ແນວທາງການທະຫານຂອງຫວຽດນາມໃນຍຸກປະຈຸບັນມີຫຼືບໍ່? ຈຳເປັນຕ້ອງພັດທະນາແນວຄິດກ່ຽວກັບຍຸດທະສາດການປ້ອງກັນປະເທດ ແລະ ແນວທາງການກຳນົດທິດຫຼືບໍ່? ເອກະສານນີ້ມີບົດບາດຄືແນວໃດໃນຍຸດທະສາດການປົກປັກຮັກສາປະເທດຊາດ(12)… ບົນພື້ນຖານຈິນຕະນາການປັດຊະຍາ, ໃນຖານະນັກຄົ້ນຄວ້າທິດສະດີ, ເລຂາທິການໃຫຍ່ໄດ້ຊີ້ແຈງບັນຫາສຳຄັນກ່ຽວກັບວິທີການຖອດຖອນບົດຮຽນຈາກພາກປະຕິບັດຕົວຈິງ ເພື່ອຍົກຂຶ້ນເປັນທິດສະດີດ້ານການປ້ອງກັນປະເທດ ແລະ ການທະຫານ; ແລະຈາກຂົງເຂດການປ້ອງກັນປະເທດ ການທະຫານລ້ວນໆ ຫັນປ່ຽນມາເປັນຂົງເຂດການເມືອງຄືແນວໃດ. ນັ້ນແມ່ນພື້ນຖານອັນສຳຄັນໃນການຮຽບຮຽງ, ສຳເລັດ ແລະ ປະກາດໃຊ້ເອກະສານຍຸດທະສາດທີ່ສອດຄ່ອງ ແລະ ຮອບດ້ານ ເພື່ອແນໃສ່ສ້າງນະໂຍບາຍປົກປັກຮັກສາປະເທດຊາດສັງຄົມນິຍົມ ຫວຽດນາມ ໃນໄລຍະຈະມາເຖິງ. ຜູ້ຂຽນບົດຄວາມໄດ້ຢືນຢັນວ່າ: “ເປັນອັນຈະແຈ້ງວ່າ ມະຕິເລກທີ 24-NQ/TW ແມ່ນຜົນສຳເລັດຮ່ວມກັນ, ສະຕິປັນຍາສ່ວນລວມ, ຄຸນງາມຄວາມດີຮ່ວມກັນ. ແຕ່ແນວຄິດ, ການກຳນົດທິດເບື້ອງຕົ້ນ, ຄວາມເຊື່ອໃນຄວາມຈຳເປັນ ແລະຄວາມຕ້ອງການທີ່ຈະສ້າງ ແມ່ນສິ່ງທີ່ຂາດບໍ່ໄດ້ສໍາລັບບົດບາດຂອງຜູ້ນໍາ. ເລຂາທິການໃຫຍ່ ຫງວຽນຝູຈ້ອງ ບໍ່ພຽງແຕ່ແມ່ນຜູ້ນຳສູງສຸດຂອງພັກ ລັດ ເທົ່ານັ້ນ, ແຕ່ຍັງມີບົດບາດເປັນນັກຍຸດທະສາດ ແລະ ນັກຄົ້ນຄວ້າທິດສະດີ ທີ່ໄດ້ຄົ້ນຄວ້າ ຮຽບຮຽງ ແລະ ຈັດຕັ້ງຊີ້ນຳການປະຕິບັດໂດຍກົງ ປາກົດເປັນໂຄງການວິທະຍາສາດທີ່ສຳຄັນ. ດັ່ງນັ້ນ, ຄຽງຄູ່ກັບຄວາມຮັບຜິດຊອບຂອງບຸກຄົນທີ່ລົງນາມໃນມະຕິດັ່ງກ່າວນັ້ນ ເລຂາທິການໃຫຍ່ ຫງວຽນຝູຈ້ອງ ສົມຄວມໄດ້ຮັບການນັບຖືເປັນຜູ້ຂຽນ “ຍຸດທະສາດການປ້ອງກັນປະເທດຂອງຫວຽດນາມ” ໃນຍຸກໃໝ່”(13).
ສາມາດຢືນຢັນໄດ້ວ່າ ດ້ວຍເນື້ອໃນ ແລະ ຄວາມໝາຍທີ່ເລິກເຊິ່ງ, ປື້ມບາງບັນຫາກ່ຽວກັບແນວທາງການທະຫານ, ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່ ຂອງທ່ານເລຂາທິການໃຫຍ່ ຫງວຽນຝູຈ້ອງ ແມ່ນເອກະສານສຳຄັນ ທັງທາງທິດສະດີ ແລະຄຸນຄ່າທາງປະຕິບັດ ສຳລັບກອງທັບປະຊາຊົນຫວຽດນາມໂດຍສະເພາະ ແລະ ສຳລັບພາລະກິດການສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມໂດຍລວມ; ສະແດງໃຫ້ເຫັນເຖິງຄວາມເຂົ້າໃຈຢ່າງຖ່ອງແທ້ ແລະ ຈິນຕະນາການຍຸດທະສາດຂອງຫົວໜ້າພັກກອມມູນິດຫວຽດນາມ ກ່ຽວກັບແນວທາງການທະຫານ ແລະ ການປ້ອງກັນປະເທດຂອງຫວຽດນາມ; ບົນພື້ນຖານວິທີວິພາກຂອງລັດທິມາກ-ເລນິນ, ແນວຄິດໂຮ່ຈີມິນ ແລະ ແກ່ນແທ້ຂອງສິລະປະການທະຫານຫວຽດນາມ ພ້ອມດ້ວຍວິໄສທັດທາງການເມືອງທີ່ແຫຼມຄົມ ແລະປະສົບການທີ່ອຸດົມສົມບູນໃນພາກຕົວຈິງການປະຕິວັດ. ບັນດາທັດສະນະຊີ້ນຳຂອງສະຫາຍເລຂາທິການໃຫຍ່ແມ່ນແນວທາງທີ່ສຳຄັນຢ່າງແທ້ຈິງ ເພື່ອສືບຕໍ່ກໍ່ສ້າງ ແລະ ປັບປຸງແນວທາງການທະຫານ ແລະ ຍຸດທະສາດການປ້ອງກັນປະເທດຫວຽດນາມໃຫ້ສົມບູນແບບ, ຕອບສະໜອງຄວາມຕ້ອງການຂອງພາລະກິດການສ້າງສາ ແລະ ປົກປັກຮັກສາປະເທດຊາດໃນໄລຍະໃໝ່ ແລະພ້ອມກັນນັ້ນ, ກໍ່ສະແດງໃຫ້ເຫັນເຖິງການນຳພາທີ່ເລິກເຊິ່ງ ແລະ ຮອບດ້ານຂອງເລຂາທິການໃຫຍ່ຕໍ່ກອງທັບປະຊາຊົນຫວຽດນາມ - ກອງທັບທີ່ມາຈາກປະຊາຊົນ, ຕໍ່ສູ້ເພື່ອປະຊາຊົນ, ເປັນເຄື່ອງມືທີ່ແຫຼມຄົມ, ກຳລັງທາງການເມືອງທີ່ຈົງຮັກພັກດີແລະໄວ້ວາງໃຈໄດ້ຢ່າງແນ່ນອນຂອງພັກ, ລັດ ແລະ ປະຊາຊົນຫວຽດນາມ./.
--------------------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 14, ໜ້າ 435
(2), (3) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2023, ໜ້າ 124, 122
(4), (5) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 156, 125
(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 48-49
(7) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 273
(8) ເບິ່ງ: ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 392
(9) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 12, ໜ້າ 613
(10) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 419
(11) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 416
(12) ເບິ່ງ: ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 414
(13) ຫງວຽນຝູຈ້ອງ: ບາງບັນຫາກ່ຽວກັບແນວທາງການທະຫານ ແລະ ຍຸດທະສາດການປ້ອງກັນປະເທດ ໃນພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມ ໃນໄລຍະໃໝ່, ປຶ້ມທີ່ໄດ້ແນະນຳ, ໜ້າ 437
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1023 (ເດືອນຕຸລາ 2023)