ຝ່າຍການຕ່າງປະເທດແລະການທູດພິເສດ
ແລະສະເພາະຂອງຍຸກສະໄໝໂຮ່ຈີມິນ
ທີ່ເຕັມໄປດ້ວຍເອກະລັກຂອງ ໄມ້ໄຜ່ຫວຽດນາມ
ແລະສະເພາະຂອງຍຸກສະໄໝໂຮ່ຈີມິນ
ທີ່ເຕັມໄປດ້ວຍເອກະລັກຂອງ ໄມ້ໄຜ່ຫວຽດນາມ
ທ່ານເລຂາທິການໃຫຍ່ ຫງວຽນຝູຈ້ອງ ຢ້ຽມຊົມການວາງສະແດງປຶ້ມກ່ຽວກັບການທູດຫວຽດນາມ ໃນກອງປະຊຸມການທູດຄັ້ງທີ 32 _ພາບ: TTXVN
ດ້ວຍຄວາມຈຸກວ່າ 800 ໜ້າ, ປຶ້ມແບ່ງອອກເປັນ 3 ພາກ ກວມດ້ວຍພາບລວມ “ການສືບທອດແລະເສີມຂະຫຍາຍມູນເຊື້ອຂອງຊາດ, ແນວຄິດການທູດໂຮ່ຈີມິນ, ຕັດສິນໃຈກໍ່ສ້າງແລະ ແລະພັດທະນາພື້ນຖານການຕ່າງປະເທດແລະການທູຫວຽດນາມທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”” ແລະ 85 ບົດຄວາມ, ສຸນທອນພັດ, ບົດສຳພາດ, ຈົດໝາຍ, ໂທລະສານການຕ່າງປະເທດ,... ຂອງເລຂາທິການໃຫຍ່ຫງວຽນຝູຈ້ອງ, ຄວາມຄິດເຫັນ 52 ລາຍການ ຈາກນັກການເມືອງ, ຜູ້ຊ່ຽວຊານ ນັກວິຊາການ ແລະເພື່ອນມິດຕ່າງຊາດ. ເນື້ອໃນຂອງປຶ້ມຢືນຢັນທັດສະນະຮອບດ້ານ, ສະເໝີຕົ້ນສະເໝີປາຍ, ສະແດງໃຫ້ເຫັນເຖິງວິໄສທັດຍຸດທະສາດ, ຄວາມຄິດທີ່ສຽບແຫຼມ ແລະຊີ້ຂາດ ຂອງຫົວໜ້າພັກກອມມູນິດຫວຽດນາມ ຕໍ່ວຽກງານການຕ່າງປະເທດແລະການທູດ, ປະກອບສ່ວນປະຕິບັດແຜນນະໂຍບາຍ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກ່ຽວກັບ “ການກໍ່ສ້າງພື້ນຖານການທູດທີ່ຮອບດ້ານແລະທັນສະໄໝ ດ້ວຍສາມເສົາຫຼັກຄື ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ”(1), ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານບັນດາຫຼັກການພື້ນຖານຂອງກົດບັດສະຫະປະຊາຊາດ ແລະກົດໝາຍສາກົນ, ສະເໝີພາບ, ການຮ່ວມມື, ມີຜົນປະໂຫຍດຮ່ວມກັນ, ເຊີດຊູບົດບາດທີ່ຕັ້ງ ແລະກຽດສັກສີຂອງປະເທດ.
ການທູດແບບ “ໄມ້ໄຜ່ຫວຽດນາມ” ສະແດງໃຫ້ເຫັນເຖິງຄຸນສົມບັດແລະຄວາມກ້າຫານຂອງຊາດຫວຽດນາມ
ການທູດແບບ “ໄມ້ໄຜ່ຫວຽດນາມ” ແມ່ນແນວຄວາມຄິດທີ່ນັກການທູດຫຼາຍຄົມກ່າວເຖິງເມື່ອເວົ້າເຖິງນະໂຍບາຍການຕ່າງປະເທດຂອງຫວຽດນາມ. ແນວຄວາມຄິດນີ້ບໍ່ແມ່ນພັກຝ່າຍການທູດໃໝ່, ແຕ່ແມ່ນການສະຫຼຸບ ແລະສະແດງພາບພົດແຫ່ງແນວທາງການຕ່າງປະເທດ ທີ່ພັກກອມມູນິດຫວຽດນາມໄດ້ແລະກຳລັງດຳເນີນການ ໂດຍມີການປະກອບສ່ວນສຳຄັນເຂົ້າໃນການພັດທະນາຂອງປະເທດ.
ໃນກອງປະຊຸມການທູດຄັ້ງທີ 29 (ເດືອນສິງຫາ 2016), ທ່ານເລຂະທິການໃຫຍ່ ຫງວຽນຝູຈ້ອງ ໄດ້ຢືນຢັນຝ່າຍການທູດທີ່ມີເອກະລັກສະເພາະ ແລະເຕັມໄປດ້ວຍເອກະລັກຂອງ “ໄມ້ໄຝ່ຫວຽດນາມ”. ຕໍ່ມາ, ເຖິງກອງປະຊຸມການຕ່າງປະເທດແຫ່ງຊາດເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງພັກ (ເດືອນທັນວາ 2021), ທ່ານເລຂາທິການໃຫຍ່ສືບຕໍ່ຢືນຢັນ, ເພີ່ມເຕີມ, ໄຈ້ແຍກ ແລະ ເຈາະເລິກ ກ່ຽວກັບຝ່າຍການຕ່າງປະເທດແລະການທູດ ທີ່ພິເສດສະເພາະ ແລະມີເອກະລັກຂອງຍຸກໂຮ່ຈີມິນ ທີ່ເຕັມໄປດ້ວຍເອກະລັກຂອງ “ໄມ້ໄຝ່ຫວຽດນາມ”: “ຕະຫຼອດ 90 ປີທີ່ຜ່ານມາ, ພາຍໃຕ້ການນຳພາຂອງພັກກອມມູນິດ, ການຕ່າງປະເທດແລະການທູດຫວຽດນາມ ໄດ້ສືບທອດ ແລະເສີມຂະຫຍາຍເອກະລັກ, ຮາກຖານທາງວັດທະນະທຳ ແລະມູນເຊື້ອຂອງຊາດ, ເລືອກຮັບເອົາແກ່ນສານຂອງໂລກ ແລະແນວຄິດທີ່ກ້າວໜ້າຂອງຍຸກສະໄໝ, ພັດທະນາບົນພື້ນຖານທິດສະດີຂອງລັດທິ ມາກ-ເລນິນ ແລະແນວຄິດໂຮ່ຈີມິນ, ກໍ່ໃຫ້ເກີດຝ່າຍການຕ່າງປະເທດແລະການທູດທີ່ພິເສດສະເພາະ ແລະມີເອກະລັກ, ເຕັມໄປດ້ວຍເອກະລັກຂອງ “ໄມ້ໄຝ່ຫວຽດນາມ”. ນັ້ນເປັນທັງການຍຶດໝັ້ນໃນຫຼັກການ ແລະຄວາມຍືດຫຍຸ່ນ ໃນຍຸດໂທບາຍ; ນຸ່ມນວນ, ສະຫຼາດ ແຕ່ກໍ່ກ້າແກ່ນແລະດຸເດືອດຫຼາຍ; ມີຄວາມຍືດຫຍຸ່ນ ປະດິດສ້າງ ແຕ່ກ້າຫານແລະທົນທານໝັ້ນໜຽວ ຕໍ່ຄວາມຫຍຸ້ງຍາກລຳບາກແລະສິ່ງທ້າທາຍ, ເພື່ອເອກະລາດຂອງຊາດ, ເພື່ອເສລີພາບ ແລະຄວາມສຸກ ຂອງປະຊາຊົນ; ຄວາມສາມັກຄີ, ຄວາມເຫັນອົກເຫັນໃຈ ແຕ່ປົກປັກຮັກສາຜົນປະໂຫຍດຂອງຊາດ-ປະເທດຊາດຢ່າງເດັດດ່ຽວ ແລະຕໍ່ເນື່ອງ”(2).
ເນື້ອໃນນີ້ໄດ້ຮັບການຊີ້ແຈງຜ່ານບົດຄວາມພາບລວມ ແລະ ສຸນທອນພົດ 7 ບົດຂອງທ່ານເລຂາທິການໃຫຍ່ ຫງວຽນຝູຈ້ອງ ໃນກອງປະຊຸມຄະນະບໍລິຫານງານສູນກາງພັກ, ກອງປະຊຸມທາງການທູດ ແລະກອງປະຊຸມການຕ່າງປະເທດແຫ່ງຊາດ. ສະຫາຍ ບູ່ຍແທັງເຊີນ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ກ່າວວ່າ ບົດຄວາມພາບລວມຖືເປັນຈຸດເດັ່ນຂອງພາກນີ້ ແລະ ປຶ້ມທັງເຫຼັ້ມ, ຍ້ອນວ່າ ນີ້ແມ່ນບົດຂຽນຫຼ້າສຸດຂອງທ່ານເລຂາທິການໃຫຍ່ກ່ຽວກັບການຕ່າງປະເທດ ແລະ ຕີພິມເປັນຄັ້ງທຳອິດ, ເຊິ່ງໄດ້ສະຫຼຸບສັງລວມທິດສະດີ ແລະພາກປະຕິບັດການຕ່າງປະເທດຂອງຫວຽດນາມ ໃນໄລຍະການປ່ຽນແປງໃໝ່ ຢ່າງຮອບດ້ານ ແລະ ເລິກເຊິ່ງ.
ຕະຫຼອດບັນດາບົດກ່າວປາໄສ ແລະ ບົດຄວາມຂອງທ່ານ, ທ່ານເລຂາທິການໃຫຍ່ ໄດ້ເນັ້ນໜັກ ແລະຢືນຢັນທັດສະນະຂອງຕົນເປັນພິເສດວ່າ: “ການຕ່າງປະເທດແມ່ນພາລະກິດຂອງທົ່ວພັກ, ທົ່ວປວງຊົນ ແລະ ຂອງລະບົບການເມືອງທັງໝົດ, ພາຍໃຕ້ການນຳພາໂດຍກົງ ແລະ ຮອບດ້ານຂອງພັກ, ການຄຸ້ມຄອງລວມສູນຂອງລັດ; ການເຊື່ອມໂຍງຢ່າງແໜ້ນແຟ້ນ ແລະເປັນຈັງຫວະ ລະຫວ່າງການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ”(3). ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ ມີຄວາມຕິດພັນກັນຢ່າງໃກ້ຊິດ ແລະສະໜັບສະໜູນເຊິ່ງກັນແລະກັນ, ເຮັດວຽກເພື່ອເປົ້າໝາຍຮ່ວມກັນ ເພື່ອຜົນປະໂຫຍດຂອງຊາດ-ປະເທດຊາດ. ການຜັນຂະຫຍາຍຢ່າງຄົບຊຸດ, ການປະສານງານຢ່າງແໜ້ນແຟ້ນແລະກົມກຽວ ລະຫວ່າງການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ ຈະເສີມຂະຫຍາຍທ່າແຮງຂອງແຕ່ລະເສົາຄ້ຳການຕ່າງປະເທດ, ກໍ່ໃຫ້ເກີດກຳລັງແຮງສັງລວມຂອງການທູດຫວຽດນາມ.
ພ້ອມກັບການຢືນຢັນບົດບາດບຸກເບີກຂອງການຕ່າງປະເທດແລະການທູດ ໃນການສ້າງແລະຮັກສາສະພາບແວດລ້ອມທີ່ສະຫງົບສຸກແລະໝັ້ນຄົງ, ການລະດົມຊັບພະຍາກອນພາຍນອກເພື່ອພັດທະນາປະເທດ ແລະ ຍົກລະດັບຕຳແໜ່ງແລະສັກສີຂອງປະເທດ, ການພັດທະນາຄວາມຄິດດ້ານນະໂຍບາຍການຕ່າງປະເທດຂອງພັກ ຍັງສະແດງອອກໃນການຍຶດໝັ້ນເປົ້າໝາຍການຕ່າງປະເທດ ແລະດຳເນີນການຕາມຂັ້ນຕອນທີ່ເໝາະສົມ ໃນການແກ້ໄຂຄວາມສຳພັນລະຫວ່າງການຮັກສາຄວາມເປັນເອກະລາດ ເປັນເຈົ້າຕົນເອງ ແລະ ຄວາມຕັ້ງໜ້າ, ເປັນເຈົ້າການ ໃນການເຊື່ອມໂຍງເຂົ້າກັບສາກົນຢ່າງຮອບດ້ານ ແລະເລິກເຊິ່ງ; ພຶດຕິກຳທີ່ຍືດຫຍຸ່ນ ຄ່ອງແຄ້ວ ແລະ ຫຼາກຫຼາຍໃນວິທີການ ແລະ ມາດຕະການ ຕໍ່ຄວາມເປັນຈິງທີ່ສັບສົນແລະຜັນຜວນ ຂອງສະຖານະການສາກົນ, ໂດຍສະເພາະ ໃນການສ້າງຄວາມຄ້າຍຄືກັນ ແລະ ການແກ້ໄຂຄວາມບໍ່ລົງລອຍກັນ ເພື່ອກະຊັບຮັດແໜ້ນການພົວພັນຕ່າງປະເທດກັບບັນດາປະເທດໃນທົ່ວໂລກ.
ໃນຊຸມປີທີ່ຜ່ານມາ, ວຽກງານການຕ່າງປະເທດແລະການທູດຫວຽດນາມບັນລຸໄດ້ໝາກຜົນດີເດັ່ນ, ປະກອບສ່ວນສຳຄັນເຂົ້າໃນບັນດາຜົນງານລວມອັນໃຫຍ່ຫຼວງ ແລະ ສຳຄັນທາງປະຫວັດສາດ ຂອງປະເທດເຮົາ ພາຍຫຼັງເກືອບ 40 ປີແຫ່ງການປ່ຽນແປງໃໝ່; ຖ່າຍທອຂໍ້ຄວາມຂອງປະເທດທີ່ເປັນມິດ, ພ້ອມແລ້ວທີ່ຈະຮ່ວມມື, ຊ່ວຍເຫຼືອ ແລະ ແບ່ງປັນກັບປະຊາຄົມໂລກ: “ຫວຽດນາມຍາມໃດກໍ່ຖືປະຊາຊົນເປັນສູນກາງ ແລະເຕັມໃຈທີ່ຈະສະໜັບສະໜູນທຸກຄົນສະເໝີ ໂດຍບໍ່ຄຳນຶງເຖິງສັນຊາດ”(4). ຈາກນັ້ນ, ປະກອບສ່ວນສຳຄັນເຂົ້າໃນການສ້າງຄວາມເປັນຈິງທີ່ບໍ່ອາດປະຕິເສດໄດ້ ນັ້ນແມ່ນ “ປະເທດເຮົາບໍ່ເຄີຍມີພາລະກິດທີ່ຍິ່ງໃຫຍ່, ທ່າແຮງ, ຖານະຕຳແໜ່ງ ແລະ ຊື່ສຽງສາກົນຄືປະຈຸບັນ”(5).
ຄຽງຂ້າງການຊີ້ແຈງບັນດາຜົນສຳເລັດ ແລະຜົນງານອັນໃຫຍ່ຫຼວງ, ທ່ານເລຂາທິການໃຫຍ່ຍັງຮຽກຮ້ອງໃຫ້ “ຈຳເປັນຕ້ອງເບິ່ງກົງທີ່ຂໍ້ຈຳກັດ ເພື່ອແກ້ໄຂຜ່ານຜ່າ, ສືບຕໍ່ມານະພະຍາຍາມ ແລະ ປັບປຸງຕົນເອງ ໃຫ້ບັນລຸໄດ້ຜົນງານທີ່ຍິ່ງໃຫຍ່ກວ່າອີກ”.
ບົນພື້ນຖານການຕີລາຄາຄວາມສຳເລັດ ແລະໝາກຜົນທີ່ບັນລຸໄດ້ ແລະ ຊີ້ໃຫ້ເຫັນຢ່າງຈະແຈ້ງເຖິງຂໍ້ຈຳກັດ ຂອງການຕ່າງປະເທດ ແລະ ການທູດ ໃນໄລຍະທີ່ຜ່ານມາ, ທ່ານເລຂາທິການໃຫຍ່ໄດ້ຖອດຖອນບົດຮຽນອັນລ້ຳຄ່າ 5 ບົດ, ໃນນັ້ນ “ບົດຮຽນທີ່ກວມລວມ ແລະບໍ່ປ່ຽນແປງແມ່ນ ຮັບປະກັນການນຳພາໂດຍກົງ ແລະຮອບດ້ານ ຂອງພັກ ແລະ ການຄຸ້ມຄອງລວມສູນຂອງລັດ ຕໍ່ການຕ່າງປະເທດແລະການທູດ” (7); ຖືວ່າການນຳພາຂອງພັກແມ່ນປັດໄຈສຳຄັນທີ່ສຸດ ໃນການເສີມຂະຫຍາຍປະສິດທິຜົນ ແລະ ກຳລັງແຮງສັງວມ ຂອງການຕ່າງປະເທດ. ພ້ອມກັນນັ້ນ, ກຳນົດຢ່າງຈະແຈ້ງຫຼັກການ, ເປົ້າໝາຍ, ໜ້າທີ່ ແລະ ທິດທາງວຽກງານການຕ່າງປະເທດ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃນສະຖານະການໃໝ່.
ເພື່ອຮັບປະກັນການປະຕິບັດບັນດາຈຸດໝາຍນະໂຍບາຍການຕ່າງປະເທດຂອງປະເທດໃນໄລຍະຈະມາເຖິງໃຫ້ປະສົບຜົນສຳເລັດ, ມະຕິກອງປະຊຸມໃຫຍ່ຄັ້ງທີ XIII ຂອງພັກໄດ້ກຳນົດວ່າ: “ປັບປຸງຍົກສູງຄວາມກ້າຫານ, ຄຸນນະພາບ, ຄວາມສາມາດ, ແບບແຜນມືອາຊີບ ແລະ ການປະດິດສ້າງ ຂອງພະນັກງານທີ່ເຮັດວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນ; ເປັນເຈົ້າການໃນການປັບໃຫ້ເຂົ້າກັບການປ່ຽນແປງຂອງສະຖານະການ; ເພີ່ມທະວີກົນໄກປະສານສົມທົບຢ່າງໃກ້ຊິດ ລະຫວ່າງຊ່ອງທາງແລະໜ່ວຍງານການຕ່າງປະເທດ, ສົ່ງເສີມແລະປັບປຸງຍົກສູງປະສິດທິຜົນຂອງວຽກງານການຕ່າງປະເທດ ແລະຫານເຊື່ອມໂຍງເຂົ້າກັບສາກົນ”(8) ແລະ “ການກໍ່ສ້າງພື້ນຖານທູດທີ່ຮອບດ້ານ ແລະທັນສະໄໝ ດ້ວຍສາມເສົາຫຼັກຄື ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ”. ໜ້າທີ່ທີ່ກຳນົດໄວ້ສຳລັບວຽກງານການຕ່າງປະເທດຂອງຫວຽດນາມໃນເວລາທີ່ຈະມາເຖິງນັ້ນໜັກໜ່ວງຫຼາຍ ມັນຮຽກຮ້ອງໃຫ້ນັກການທູດຫວຽດນາມຮຸ່ນຕໍ່ຮຸ່ນຕ້ອງສືບທອດ ແລະເສີມຂະຫຍາຍແກ່ນແທ້ຂອງການທູດດັ້ງເດີມ, ຍາມໃດກໍ່ຍຶດໝັ້ນນ້ຳໃຈຮັກຊາດ, ເອົາໃຈໃສ່ເຖິງຜົນປະໂຫຍດຂອງຊາດ-ປະເທດຊາດເປັນອັນດັບໜຶ່ງ, ຊາບຊຶມຄຳຂວັນ “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ເສີມຂະຫຍາຍຄວາມກ້າຫານ, ສະຕິປັນຍາ, ຄວາມສຸດອົກສຸດໃຈ, ຄວາມເປັນມືອາຊີບຂອງຕົນເອງ ແລະ ຈິດໃຈສາມັກຄີຂອງໝູ່ຄະນະ, ຊາບຊຶມຢ່າງເລິກເຊິ່ງທັດສະນະຊີ້ນຳຂອງທ່ານເລຂາທິການໃຫຍ່ ຫງວຽນຝູຈ້ອງ ໃນກອງປະຊຸມການທູດຄັ້ງທີ 30 (ເດືອນສິງຫາ 2018) ທີ່ວ່າ: “ນັກການທູດທີ່ດີຈະຕ້ອງເປັນນັກການເມືອງທີ່ດີກ່ອນ, ຖືຜົນປະໂຫຍດຂອງປະເທດແລະຂອງລະບອບການປົກຄອງ ເປັນເຂັມທິດໃນການດຳເນີນການຢູ່ສະເໝີ. ນັກການທູດຈຳໄວ້ສະເໝີວ່າ ເບື້ອງຫຼັງພວກເຂົາແມ່ນພັກ, ປະເທດຊາດ ແລະ ປະຊາຊົນ. ຕ້ອງມີຄວາມໝັ້ນໃຈ, ໝັ້ນທ່ຽງ, ໝັ້ນຄົງ ແລະ ສະຫຼາດ”(9).
ເອກະລັກຂອງ “ການທູດແບບໄມ່ໄຝ່”: ຖືເອົາເອກະລາດ, ຄວາມເປັນເຈົ້າຕົນເອງ,
ສັນຕິພາບ, ມິດຕະພາບ, ຄວາມຫຼາກຫຼາຍ ແລະ ຫຼາຍຝ່າຍ ເປັນເຂັມທິດ
ໃນ 37 ປີແຫ່ງການປ່ຽນແປງໃໝ່ທີ່ຜ່ານມາ, ສືບທອດແລະເສີມຂະຫຍາຍມູນເຊື້ອການຕ່າງປະເທດທີ່ສະຫງ່າງາມຂອງຊາດ, ໂດຍສະເພາະ ແນວຄິດຂອງປະທານໂຮ່ຈີມິນ - ຜູ້ວາງຮາກຖານສຳລັບການທູດໃນຍຸກໂຮ່ຈີມິນ, ພັກກອມມູນິດຫວຽດນາມໄດ້ສືບທອດ ແລະເພີ່ມເຕີມ, ພັດທະນາ, ປັບປຸງໃຫ້ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ເປີດກວ້າງເພື່ອສັນຕິພາບ, ການຮ່ວມມື ແລະການພັດທະນາສົມບູນແບບຢ່າງຕໍ່ເນື່ອງ ໂດຍດຳເນີນນະໂຍບາຍການຕ່າງປະເທດແບບຫຼາຍທິດຫຼາຍຝ່າຍ ຫຼາຍຮູບແບບ ແລະ ການເຊື່ອມໂຍງເຂົ້າກັບສາກົນຢ່າງເປັນເຈົ້າການແລະຕັ້ງໜ້າ. ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ ໄດ້ເນັ້ນເຖິງຄວາມຕັດສິນໃຈ “ປະຕິບັດຢ່າງສະເໝີຕົ້ນສະເໝີປາຍ ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະການພັດທະນາ, ການພົບພັນຕ່າງປະເທດທີ່ຫຼາກຫຼາຍ ແລະຫຼາຍກ້ຳຫຼາຍຝ່າຍ. ຮັບປະກັນດີສຸດຜົນປະໂຫຍດຂອງຊາດຽ-ປະເທດຊາດ ບົນພື້ນຖານບັນດາຫຼັກການພື້ນຖານຂອງກົດບັດສະຫະປະຊາຊາດ ແລະກົດໝາຍສາກົນ, ສະເໝີພາບ, ການຮ່ວມມື ແລະມີຜົນປະໂຫຍດຮ່ວມກັນ. ປະສົມປະສານກຳລັງແຮງຂອງຊາດກັບກຳລັງແຮງຂອງຍຸກສະໄໝ, ເປັນເຈົ້າການແລະຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ ແລະກວ້າງຂວາງ; ຫວຽດນາມເປັນເພື່ອ, ເປັນຄູ່ຮ່ວມມືທີ່ເຊື່ອຖືໄດ້ ແລະເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບ ຂອງປະຊາຄົມສາກົນ”(10).
ໃນດ້ານການພົວພັນສອງຝ່າຍ, ບັນດາສຸນທອນພົດ, ບົດຄວາມ, ບົດປາໄສ ຂອງທ່ານເລຂາທິການ ຫງວຽນຝູຈ້ອງ ຍາມໃດກໍ່ຕີລາຄາສູງ ການພົວພັນມິດຕະພາບ ແລະການຮ່ວມມືກັບປະເທດຕ່າງໆ ບົນຫຼັກການຂອງການເຄົາລົບເຊິ່ງກັນແລະກັນ ຄວາມສະເໝີພາບ ແລະການຮ່ວມມືທີ່ເປັນປະໂຫຍດຮ່ວມກັນ. ໂດຍເສີມຂະຫຍາຍມູນເຊື້ອແຫ່ງຄວາມສັນທະວະໄມຕີຂອງບັນພະບຸລຸດຂອງພວກເຮົາ, ທ່ານເລຂາທະການໃຫຍ່ໄດ້ຢືນຢັນເຖິງຄວາມຈຳເປັນໃນການສົ່ງເສີມແລະກະຊັບ ການພົວພັນກັບປະເທດເພື່ອນບ້ານ, ປະເທດຄູ່ຮ່ວມຍຸດທະສາດຮອບດ້ານ, ປະເທດຄູ່ຮ່ວມຍຸດທະສາດ, ຄູ່ຮ່ວມມືຮອບດ້ານ ແລະ ປະເທດເພື່ອນມິດດັ້ງເດີມ, ການເພີ່ມຄວາມໄວ້ວາງໃຈ, ເສີມຂະຫຍາຍຈຸດຮ່ວມ, ຄວາມຫຍືດຍຸ່ນ ແລະຄວາມຄິດສ້າງສັນ ໃນການຈັດການກັບຂໍ້ພິພາດ ແລະ ສົ່ງເສີມສັນຕິພາບ, ຮ່ວມມືກັນພັດທະນາຮ່ວມກັນ ເພື່ອປັບປຸງສະຖານະການການຕ່າງປະເທດທີ່ມີສະຖຽນລະພາບໃຫ້ໝັ້ນຄົງ, ຮັບໃຊ້ພາລະກິດການສ້າງສາ ແລະ ປົກປັກຮັກສາປະເທດຊາດ.
ສຳລັບສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ, ລາວ-ຫວຽດນາມ, ທ່ານເລຂາທິການໃຫຍ່ຢືນຢັນວ່າ: “ໃນໄລຍະປະຕິວັດປະຈຸບັນ, ການເພີ່ມທະວີ ແລະ ການປັບປຸງຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ມີຄວາມໝາຍສຳຄັນທີ່ສຸດ ແລະເປັນປັດໄຈທີ່ຮັບປະກັນໄຊຊະນະຂອງພາລະກິດການສ້າງສາ ແລະປົກປັກຮັກສາປະເທດຊາດ ໃນແຕ່ລະປະເທດ”(12); ພັກ ລັດ ແລະ ປະຊາຊົນຫວຽດນາມ “ໃຫ້ຄວາມສຳຄັນທີ່ສຸດ ແລະ ໃຫ້ບຸລິມະສິດກ່ອນອື່ນໝົດ ຕໍ່ການພົວພັນແບບພິເສດ ທີ່ທັງແມ່ນສະຫາຍ ແລະ ທັງແມ່ນອ້າຍນ້ອງ ລະຫວ່າງສອງພັກ ແລະ ສອງປະເທດຂອງພວກເຮົາ”(13). ໃນການພົວພັນຄູ່ຮ່ວມ ແລະການຮ່ວມມືຍຸດທະສາດຮອບດ້ານ ລະຫວ່າງຫວຽດນາມແລະຈີນ, ທ່ານເລຂາທິການໃຫຍ່ຖືວ່າ ນີ້ແມ່ນຮາກຖານທີ່ສຳຄັນ, ກຳນົດທິດທາງຍຸດທະສາດໄລຍະຍາວ, ຊຸກຍູ້ການພົວພັນລະຫວ່າງສອງພັກ ແລະສອງປະເທດ ໃຫ້ພັດທະນາຢ່າງດີ ໝັ້ນຄົງ ແລະ ຍືນຍົງ. ໃນສານອວຍພອນເຖິງສະຫາຍ ສີ ຈິ້ນຜິງ ເນື່ອງໃນໂອກາດທີ່ທ່ານໄດ້ຮັບເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຈີນ ຊຸດທີ 20 ອີກຄັ້ງ, ທ່ານເລຂາທິການໃຫຍ່ ຫງວຽນຝູຈ້ອງ ຢືນຢັນວ່າ: “ຂ້າພະເຈົ້າຍາມໃດກໍຖືເປັນສຳຄັນ ແລະ ພ້ອມແລ້ວທີ່ຈະພ້ອມກັບສະຫາຍ ສືບຕໍ່ເອົາໃຈໃສ່ຢ່າງສູງ ແລະ ຊີ້ນຳທຸກຂັ້ນ, ຂະແໜງການ ແລະ ທ້ອງຖິ່ນຂອງທັງສອງຝ່າຍ ໃຫ້ເຂົ້າໃຈແລະປະຕິບັດເປັນຢ່າງດີ ບັນດາຂໍ້ຕົກລົງ ແລະ ຄວາມຮັບຮູ້ຮ່ວມກັນຂັ້ນສູງ, ນຳການພົວພັນມິດຕະພາບ ເພື່ອນບ້ານໃກ້ຄຽງ ແລະ ການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງຫວຽດນາມແລະຈີນ ຂຶ້ນສູ່ລະດັບໃໝ່, ໝັ້ນຄົງ, ດີຕໍ່ສຸຂະພາບ ແລະ ຍືນຍົງ, ຕອບສະໜອງຜົນປະໂຫຍດພື້ນຖານແລະຍາວນານຂອງສອງພັກ, ສອງປະເທດ ແລະ ປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ ໃນພາກພື້ນ ແລະ ໃນໂລກ”(14). ໃນສ່ວນຂອງການພົວພັນຄູ່ຮ່ວມມືຍຸດທະສາຮອບດ້ານ ລະຫວ່າງຫວຽດນາມແລະສະຫະລັດອາເມລິກາ ເພື່ອສັນຕິພາບ ການຮ່ວມມື ແລະການພັດທະນາທີ່ຍືນຍົງ, ທ່ານເລຂາທິການໃຫຍ່ຢືນຢັນວ່າ: “ຄວາມເຂົ້າໃຈເຊິ່ງກັນແລະກັນ, ເຂົ້າໃຈສະຖານະການຂອງກັນແລະກັນ, ການເຄົາລົບຜົນປະໂຫຍດທີ່ຊອບທຳຂອງກັນແລະກັນ ແລະ ບໍ່ແຊກແຊງກິດຈະການພາຍໃນຂອງກັນແລະກັນ ແມ່ນບັນດາຫຼັກການພື້ນຖານ ທີ່ມີຄວາມໝາຍສຳຄັນທີ່ສຸດ ໃນການພົວພັນລະຫວ່າງສອງປະເທດ ແລະການພົວພັນສາກົນ. ຫວຽດນາມຕີລາຄາສູງ ແລະໃຫ້ຄວາມສຳຄັນຢ່າງຍິ່ງ ຕໍ່ການຢືນຢັນຂອງສະຫະລັດອາເມລິກາ ທີ່ສະໜັບສະໜູນປະເທດຫວຽດນາມທີ່ “ເຂັ້ມແຂງ, ເປັນເອກະລາດ, ເປັນເຈົ້າຕົນເອງ ແລະ ຈະເລີນຮຸ່ງເຮືອງ””(15)...
ແຜນນະໂຍບາຍສົ່ງເສີມແລະກະຊັບການພົວພັນສອງຝ່າຍໃຫ້ເລິກເຊິ່ງຍັງສະແດງອອກມາຜ່ານບົດຄວາມ, ຄຳປາໄສ ແລະການສຳພາດຕ່າງໆ ເຊັ່ນ: “ເສີມຂະຫຍາຍສາຍພົວພັນມິດຕະພາບແບບດັ້ງເດີມ, ການຮ່ວມມືທີ່ຮອບດ້ານ ແລະຍືນຍົງຍາວນານ ລະຫວ່າງຫວຽດນາມແລະກຳປູເຈຍ”; “ເພີ່ມພູນຄູນສ້າງມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມແລະກູບາ ຢ່າງບໍ່ຢຸດຢັ້ງ”; “ປັບປຸງການພົວພັນຮ່ວມມືລະຫວ່າງພັກກອມມູນິດຫວຽດນາມ ແລະພັກແຮງງານເກົາຫຼີ ໃນໄລຍະໃໝ່ ຢ່າງບໍ່ຢຸດຢັ້ງ”; “ຫວຽດນາມຍາມໃດກໍ່ຖືເປັນສຳຄັນ ແລະ ບຸລິມະສິດການປັບປຸງ ແລະ ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ກັບສະຫະພັນທະລັດລັດເຊຍ”; “ເພີ່ມທະວີຄວາມໄວ້ວາງໃຈທາງການເມືອງ, ປັບປຸງການພົວພັນມິດຕະພາບ, ຊຸກຍູ້ການຮ່ວມມືທີ່ມີເນື້ອແທ້, ສ້າງການພັດທະນາໃໝ່ໃນການພົວພັນຫວຽດນາມ - ອິນໂດເນເຊຍ”; “ຍີ່ປຸ່ນເປັນໜຶ່ງໃນບັນດາຄູ່ຮ່ວມມືເສດຖະກິດທີ່ສຳຄັນທີ່ສຸດ ແລະຍາວນານທີ່ສຸດ ຂອງຫວຽດນາມ”... ຜ່ານນັ້ນ, ຢືນຢັນຄວາມພ້ອມຂອງຫວຽດນາມ ໃນການເຂົ້າຮ່ວມໃນກົນໄກການຮ່ວມມືຫຼາຍຝ່າຍ, ບັນດາອົງການພາກພື້ນແລະສາກົນ ແລະ ບັນດາກອບການຮ່ວມມືລະຫວ່າງປະເທດ ແລະບັນຫາຍຸດທະສາດທີ່ສຳຄັນ, ສອດຄ່ອງກັບຄວາມຕ້ອງການ, ຄວາມສາມາດ ແລະ ເງື່ອນໄຂຂອງປະເທດ.
ໃນການພົວພັນກັບບັນດາພັກກອມມູນິດ, ພັກກຳມະກອນ, ພັກທີ່ກຳອຳນາດ ແລະ ບັນດາພັກປະຊາທິປະໄຕ, ເພື່ອສັນຕິພາບ ແລະ ຄວາມກ້າວໜ້າໃນໂລກ, ທ່ານເລຂາທິການໃຫຍ່ ຫງວຽນຝູຈ້ອງ ໃຫ້ຄວາມສຳຄັນເປັນພິເສດ ແລະ ມີການປະກອບສ່ວນສຳຄັນ ທັງດ້ານທິດສະດີແລະພຶດຕິກຳ ຕໍ່ຄັງສົມບັດຂອງລັດທິມາກ-ເລນິນ ແລະ ແນວຄິດໂຮ່ຈີມິນ ຈາກຂະບວນການປ່ຽນແປງໃໝ່ຂອງຫວຽດນາມ. ທ່ານເລຂາທິການໃຫຍ່ເນັ້ນໜັກວ່າ: ພັກກອມມູນິດຫວຽດນາມ “ຍາມໃດກໍ່ໃຫ້ຄວາມສຳຄັນກັບການພົວພັນກັບບັນດາປະເທດສັງຄົມນິຍົມ, ກັບພັກພັກກອມມູນິດ, ພັກກຳມະກອນ ແລະ ມິດສະຫາຍດັ້ງເດີມ”(16); “ໃນພາລະກິດປະຕິວັດຂອງຕົນ, ພັກກອມມູນິດຫວຽດນາມ ຍາມໃດກໍ່ເຊີດຊູຈິດໃຈເອກະລາດ ແລະ ເປັນເຈົ້າຕົນເອງ, ປະສົມປະສານກຳລັງແຮງຂອງຊາດ ກັບກຳລັງແຮງຂອງຍຸກສະໄໝ, ຍຶດໝັ້ນເປົ້າໝາຍເອກະລາດແຫ່ງຊາດ ຕິດພັນກັບລັດທິສັງຄົມນິຍົມ”(17); “ລັດທິມາກ-ເລນິນ ກຳລັງແລະຈະສືບຕໍ່ເປັນທວນໄຟຊີ້ທິດເຍືອງທາງໃຫ້ແກ່ການປະຕິວັດຫວຽດນາມໃນຍຸກໃໝ່... ພັກກອມມູນິດຫວຽດນາມຍາມໃດກໍ່ໃຫ້ຄວາມສຳຄັນ ແລະພ້ອມທີ່ຈະຂະຫຍາຍການຮ່ວມມືກັບພັກການເມືອງ ມາກຊິດ ແລະກຳລັງທີ່ກ້າວໜ້າໃນໂລກ”(18). ພິເສດ, ທ່ານເລຂາທິການໃຫຍ່ໃຫ້ທັດສະນະວ່າ, ເພື່ອຮັກສາພາກພື້ນແຫ່ງສັນຕິພາບ, ສະຖຽນລະພາບ, ສາມັກຄີ ແລະ ເປັນເອກະພາບ ບົນພື້ນຖານກົດໝາຍສາກົນ, ຈຳເປັນຕ້ອງເຊີດຊູຕຳແໜ່ງຂອງອາຊຽນ, ສືບຕໍ່ເສີມຂະຫຍາຍບົດບາດ ແລະຄຸນຄ່າຫຼັກ ຂອງອາຊຽນ, “ການເຄື່ອນໄຫວຂອງ AIPO ມີຄວາມສຳຄັນຫຼາຍຂຶ້ນເລື້ອຍໆ, ມະຕິຂອງ AIPO ຈະຕ້ອງເຂົ້າສູ່ຊີິວິດທາງການເມືອງ ຂອງແຕ່ລະປະເທດ ຢ່າງແທ້ຈິງ”(19), “ເພື່ອໃຫ້ AIPA ມຸ່ງເປົ້າໄປທີ່ປະຊາຄົມຂອງປະຊາຊົນ, ເພື່ອປະຊາຊົນ, ຫຸ້ມຫໍ່ກັນ ແລະ ແບ່ງປັນ”(20), ພ້ອມກັນນັ້ນ ກໍ່ໃຊ້ໂອກາດໃຫ້ເປັນປະໂຫຍດນັບແຕ່ເຂົ້າຮ່ວມ WTO ແລະ ເສີມຂະຫຍາຍຄວາມໄດ້ປຽບ ແລະ ຄວາມເໜືອກວ່າ ຂອງຂະບວນການຮ່ວມມືສາກົນ ໃນການພັດທະນາເສດຖະກິດ - ສັງຄົມ...
ໃນບັນດາບົດຄວາມແລະບົດປາໃສ, ແນວຄິດ “ການຕ່າງປະເທດແມ່ນພາລະກິດຂອງທົ່ວພັກ, ທົ່ວປວງຊົນ ແລະຂອງລະບົບການເມືອງທັງໝົດ” ຍັງໄດ້ຮັບການຊີ້ນຳໂດຍທ່ານເລຂາທິການໃຫຍ່ ຫງວຽນຝູຈ້ອງ ຢູ່ສະເໝີ; ໃນນັ້ນ, ທ່ານໄດ້ເອົາໃຈໃສ່ເປັນພິເສດເຖິງບັນຫາການສ້າງເສດຖະກິດທີ່ເປັນເອກະລາດ, ເປັນເຈົ້າຕົນເອງ ແລະ ຄວາມເປັນເຈົ້າການ ໃນການເຊື່ອມໂຍງເສດຖະກິດສາກົນ, ໂດຍຖືວ່າ ນີ້ແມ່ນສອງດ້ານທີ່ມີການພົວພັນສັດຈະວິພາບນຳກັນ ແລະເພີ່ມເຕີມໃຫ້ແກ່ກັນ ເພື່ອແນໃສ່ພັດທະນາເສດຖະກິດຂອງປະເທດ ໃຫ້ນັບມື້ນັບເຂັ້ມແຂງ ຕາມທິດທາງສັງຄົມນິຍົມ. ຕາມທັດສະນະຂອງທ່ານເລຂາທິການໃຫຍ່, ການສ້າງພື້ນຖານເສດຖະກິດທີ່ເປັນເອກະລາດ ແລະເປັນເຈົ້າຕົນເອງ ບໍ່ໄດ້ໝາຍຄວາມວ່າ ຈະເບິ່ງເບົາບັນຫາການເຊື່ອມໂຍງເຂົ້າກັບສາກົນ, ແຕ່ກົງຂ້າມ, ການເຊື່ອມໂຍງເສດຖະກິດສາກົນ ແມ່ນເນື້ອໃນໜຶ່ງໃນແນວທາງເສດຖະກິດ ແລະແນວທາງການຕ່າງປະເທດ ຂອງພັກແລະລັດ ຂອງພວກເຮົາ, ການປະສົມປະສານພະລັງພາຍໃນ ກັບພະລັງພາຍນອກ ເພື່ອສ້າງໃຫ້ເກີດກຳລັງແຮງສັງລວມ ຂອງພາລະກິດການສ້າງສາພັດທະນາປະເທດ. ການເຊື່ອມໂຍງເສດຖະກິດສາກົນ ກໍເພື່ອແນໃສ່ສ້າງພື້ນຖານເສດຖະກິດທີ່ເປັນເອກະລາດ, ເປັນເຈົ້າຕົນເອງ ເພື່ອຕອບສະໜອງຄວາມຕ້ອງການ ແລະ ຜົນປະໂຫຍດຂອງປະເທດຊາດ; ພ້ອມກັນນັ້ນ, ຜ່ານການເຊື່ອມໂຍງເສດຖະກິດສາກົນ ເພື່ອເສີມຂະຫຍາຍບົດບາດ ແລະ ຄວາມສາມາດບົ່ມຊ້ອນຂອງປະເທດເຮົາ ໃນຂະບວນການຮ່ວມມື ແລະ ພັດທະນາຂອງພາກພື້ນ ແລະ ໃນໂລກ.
ສ່ວນໜຶ່ງຂອງເນື້ອໃນໂດຍລວມ “ການຕ່າງປະເທດແມ່ນພາລະກິດຂອງທົ່ວພັກ, ທົ່ວປວງຊົນ ແລະ ຂອງລະບົບການເມືອງທັງໝົດ”, ທ່ານເລຂາທິການໃຫຍ່ ໄດ້ສະແດງຄວາມເອົາໃຈໃສ່ ແລະຄວາມຮັກຕໍ່ຊຸມຊົນຊາວຫວຽດນາມຢູ່ຕ່າງປະເທດ ເປັນພິເສດ, ກໍ່ຄືຕໍ່ປະຊາຊົນຂອງປະເທດເຈົ້າພາບ. ສຳລັບຊາວຫວຽດນາມຢູ່ຕ່າງປະເທດ, ທ່ານເລຂາທິການໃຫຍ່ຢືນຢັນວ່າ: “ຊາວຫວຽດນາມຢູ່ຕ່າງປະເທດ, ບໍ່ວ່າພວກເຂົາຈະຢູ່ໃສ, ຍາມໃດກໍ່ແມ່ນພາກສ່ວນໜຶ່ງທີ່ຂາດບໍ່ໄດ້ ຂອງປະເທດຊາດ”(21); ຊຸມຊົນຊາວຫວຽດນາມຢູ່ຕ່າງປະເທດ “ແມ່ນ “ຕົວເລັ່ງ” ທີ່ສຳຄັນສຳລັບຄວາມສຳເລັດຂອງການເຄື່ອນໄຫວການທູດຂອງປະຊາຊົນໃນຂະບວນການປ່ຽນແປງໃໝ່. ຜ່ານບັນດາການເຄື່ອນໄຫວແລກປ່ຽນວັດທະນະທຳ ແລະ ສາສະໜາ, ຊາວຫວຽດນາມຢູ່ຕ່າງປະເທດ ໄດ້ປະກອບສ່ວນຮັກສາເອກະລັກ ແລະສົ່ງເສີມຄຸນຄ່າທາງວັດທະນະທຳຂອງຊາດ, ສ້າງພາບລັກສະນະຂອງຫວຽດນາມຢູ່ຕ່າງປະເທດ, ສົ່ງເສີມ, ເຜີຍແຜ່ ແລະ ຍາດໄດ້ຄວາມຮັກແພງຂອງເພື່ອນມິດຈາກບັນດາປະເທດ, ປະກອບສ່ວນຍົກສູງທີ່ຕັ້ງ ແລະ ຊື່ສຽງຂອງຫວຽດນາມໃນເວທີສາກົນ”(22). ສຳລັບປະຊາຊົນຂອງປະເທດເຈົ້າພາບ: ລາວ, ກູບາ, ຈີນ, ສະຫະພັນທະລັດລັດເຊຍ, ສະຫະລັດອາເມລິກາ, ຍີ່ປຸ່ນ, ສ.ເກົາຫຼີ, ຮັງກາລີ..., ທ່ານເລຂາທິການໃຫຍ່ເນັ້ນໜັກເຖິງການແບ່ງປັນ ບັນດາຄຸນຄ່າທີ່ຄ້າຍຄືກັນ ແລະ ຄວາມສາມາດບົ່ມຊ້ອນ ເພື່ອຊຸກຍູ້ການແລກປ່ຽນ, ການຮ່ວມມື ແລະ ຄວາມພະຍາຍາມສ້າງບັນດາຂໍ້ຕົກລົງ ແລະ ກົນໄກທີ່ມີປະສິດທິພາບ ເພື່ອຮັກສາສັນຕິພາບ ສະຖຽນລະພາບ ແລະຮັບປະກັນຄວາມໝັ້ນຄົງຮ່ວມກັນ, ປ້ອງກັນຄວາມຂັດແຍ່ງແລະສົງຄາມ, ຈັດການກັບສິ່ງທ້າທາຍຈາກຄວາມໝັ້ນຄົງແບບດັ້ງເດີມ ແລະບໍ່ເປັນແບບດັ້ງເດີມ ຢ່າງມີປະສິດທິພາບ, ພ້ອມກັນນັ້ນ ເພີ່ມທະວີຄວາມເຂົ້າໃຈຮ່ວມກັນ, ກະຊັບມິດຕະພາບ ແລະສ້າງຮາກຖານທາງສັງຄົມໃຫ້ແກ່ການພົວພັນ ລະຫວ່າງຫວຽດນາມ ແລະບັນດາປະເທດໃນທົ່ວໂລກ.
ຄວາມປະທັບໃຈດ້ານການຕ່າງປະເທດແລະການທູດຂອງຫວຽດນາມໃນເວທີສາກົນ
ການເຄື່ອນໄຫວການຕ່າງປະເທດຕາມຈິດໃຈ “ການທູດແບບໄມ້ໄຜ່” ໄດ້ລວມສະພາບການຕ່າງປະເທດໄວ້ຢ່າງໝັ້ນຄົງ ເພື່ອໃຫ້ຫວຽດນາມມີສະພາບແວດລ້ອມທີ່ສະຫງົບສຸກແລະໝັ້ນຄົງ, ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດ, ຮັບໃຊ້ການພັດທະນາເສດຖະກິດ-ສັງຄົມ ແລະ ເພີ່ມທະວີບົດບາດທີ່ຕັ້ງ ແລະຊື່ສຽງສາກົນຂອງປະເທດ. ການປະຕິບັດທາງການທູດໃນໄລຍະ 2 ປີຜ່ານມາ ຍັງສືບຕໍ່ເສີມຂະຫຍາຍ ແລະ ເພີ່ມພູນບົດຮຽນອັນລ້ຳຄ່າ ກ່ຽວກັບວຽກງານການຕ່າງປະເທດ ໃນຂະບວນການປ່ຽນແປງໃໝ່. ນັ້ນຄື: ເຮົາຍິ່ງປະເຊີນກັບຄວາມຫຍຸ້ງຍາກແລະສິ່ງທ້າທາຍຫຼາຍເທົ່າໃດ, ເຮົາກໍ່ຍິ່ງຕ້ອງຍຶດໝັ້ນໃນຫຼັກການ, ມີຄວາມຍືດຫຍຸ່ນ ແລະ ສ້າງສັນໃນຍຸດໂທບາຍຂອງເຮົາຫຼາຍຂຶ້ນເທົ່ານັ້ນ; ຈັດການການພົວພັນລະຫວ່າງເອກະລາດແລະຄວາມເປັນເຈົ້າຄົນເອງ ກັບ ຄວາມສາມັກຄີແລະການຮ່ວມມືສາກົນ, ລະຫວ່າງຜົນປະໂຫຍດຂອງຊາດ-ປະເທດຂາດ ກັບ ພັນທະແລະຄວາມຮັບຜິດຊອບສາກົນ ຢ່າງເໝາະສົມ.
ປຶ້ມເຫຼັ້ມນີ້ຕີພິມຄວາມຄິດເຫັນ 52 ຄວາມຄິດເຫັນ ຂອງຜູ້ຊ່ຽວຊານ, ນັກການເມືອງ, ນັກການທູດ, ນັກຄົ້ນຄວ້າ ແລະເພື່ອນມິດສາກົນ ກ່ຽວກັບບົດບາດແລະການປະກອບສ່ວນຂອງທ່ານເລຂາທິການໃຫຍ່ ຫງວຽນຝູຈ້ອງ ໃນການກໍ່ຕັ້ງແລະພັດທະນາຝ່າຍການທູດຫວຽດນາມທີ່ຮອບດ້ານ, ທັນສະໄໝ ແລະເຕັມໄປດ້ວຍເອກະລັກຂອງ “ໄມ້ໄຝ່ຫວຽດນາມ”. ເຫຼົ່ານັ້ນແມ່ນຄວາມຊົງຈຳ, ຄວາມຮູ້ສຶກ ແລະ ເລື່ອງລາວຂອງເອກອັກຄະລັດຖະທູດ, ເຈົ້າໜ້າທີ່ເຮັດວຽກງານການຕ່າງປະເທດ ແລະ ການທູດ, ນັກຂ່າວ ແລະ ຊາວຫວຽດນາມຢູ່ຕ່າງປະເທດ ທີ່ໄດ້ຕິດຕາມແລະພົບກັບທ່ານເລຂາທິການໃຫຍ່ ໃນລະຫວ່າງການຢ້ຽມຢາມ ແລະເດີນທາງໄປເຮັດວຽກຢູ່ພາຍໃນ ແລະ ຕ່າງປະເທດ.
ກ່າວເຖິງຄວາມສຳເລັດແລະຮອຍປະທັບໃນການຕ່າງປະເທດຂອງທ່ານເລຂາທິການໃຫຍ່ ຫງວຽນຝູຈ້ອງ, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດ ສູນກາງພັກປະຊາຊົນປະຕິວັດລາວ ຢືນຢັນວ່າ: “ບັນດາຜົນງານຂອງຫວຽດນາມເວົ້າລວມ ແລະ ຜົນສຳເລັດໃນວຽກງານການຕ່າງປະເທດເວົ້າສະເພາະ ກໍ່ແມ່ນບັນດາຜົນງານ ແລະ ບົດຮຽນອັນລ້ຳຄ່າ ສຳລັບປະເທດລາວ”(23); “ພິເສດ, ພັກແລະລັດລາວ ຕີລາຄາສູງຄວາມເຫັນຊີ້ນຳຂອງທ່ານເລຂາທິການໃຫຍ່ ຫງວຽນຝູຈ້ອງ ໃນການເນັ້ນໜັກ 6 ກຸ່ມບັນຫາ ທີ່ເປັນເປົ້າໝາຍແລະໜ້າທີ່ທີ່ຍິ່ງໃຫຍ່ ໜັກໜ່ວງ ແຕ່ສະຫງ່າລາສີ ໃນການຜັນຂະຫຍາຍປະຕິບັດແນວທາງການຕ່າງປະເທດຂອງຫວຽດນາມ”(24). ໃນບົດຄວາມເລື່ອງ “ຄຸນຄ່າຍຸກສະໄໝຂອງຝ່າຍການທູດມີເອກະລັກຂອງ “ໄມ້ໄຝ່ຫວຽດນາມ” ຂອງທ່ານເລຂາທິການໃຫຍ່ ຫງວຽນຝູຈ້ອງ”, ສະຫາຍ ຮັ່ນ ຟາງໝິງ, ຮອງປະທານຄະນະກຳມະການການຕ່າງປະເທດແຫ່ງຊາດຈີນ, ປະທານສະຖາບັນການທູດ ແລະການພົວພັນສາກົນ CHARHAR ໃຫ້ຄຳເຫັນວ່າ: “ການທູດແບບ “ໄມ້ໄຝ່ຫວຽດນາມ”... ແມ່ນທັງຄວາມມານະພະຍາຍາມ ໃນການນຳພາຂອງພັກກອມມູນິດຫວຽດນາມ ແລະ ການຄວາມຕັ້ງໜ້າໃນການຂະຫຍາຍຂົງເຂດການທູດ, ປົກປັກຮັກສາ ແລະ ພັດທະນາຜົນປະໂຫຍດແຫ່ງຊາດຂອງຫວຽດນາມ, ສົມທົບກັນຢ່າງຄ່ອງແຄ້ວ ແລະ ມີຫຼັກການ, ມານະພະຍາຍາມປັບຕົວເຂົ້າກັບໂລກທີ່ມີການປ່ຽນແປງຢ່າງບໍ່ຢຸດຢັ້ງ; ຄຽງຄູ່ກັບການພັດທະນາການພົວພັນທາງການທູດທີ່ມີຢູ່ແລ້ວ, ສ້າງຕັ້ງການພົວພັນຮ່ວມມືໃໝ່, ປະສົມປະສານຄວາມຍືດຫຍຸ່ນແລະຫຼັກການ ຢ່າງຊ່ຽວຊານ, ມຸ່ງໝັ້ນທີ່ຈະປັບຕົວໃຫ້ເຂົ້າກັບໂລກທີ່ປ່ຽນແປງຢູ່ຕະຫຼອດເວລາ; ທາງດ້ານອື່ນ, ຄວບຄູ່ໄປກັບການພັດທະນາຄວາມສຳພັນທາງການທູດທີ່ມີຢູ່, ການສ້າງຄວາມສຳພັນການຮ່ວມມືໃໝ່. ນີ້ແມ່ນຮາກຖານທາງການທູດ ເພື່ອໃຫ້ຫວຽດນາມຍັງຄົງພັດທະນາຢ່າງໝັ້ນຄົງແລະສົດໃສ ເຖິງຈະປະເຊີນກັບສະຖານະການໂລກທີ່ສັບສົນທີ່ສຸດ”(25). ຜ່ານບົດຄວາມເລື່ອງ “ຄວາມປະທັບໃຈຂອງທ່ານເລຂາທິການໃຫຍ່ ຫງວຽນຝູຈ້ອງ ໃນການພົວພັນທາງການທູດວັດທະນະທຳ ລະຫວ່າງຫວຽດນາມແລະຍີ່ປຸ່ນ”, ທ່ານ ຄຸໂຮອີວະ ຢູຈິ, ເຈົ້າແຂວງ ຄານາກາວາ, ປະເທດຍີ່ປຸ່ນ ບໍ່ພຽງແຕ່ສະແດງຄວາມຮັກແພງ ແລະ ຄວາມເຄົາລົບນັບຖື ຕໍ່ທ່ານເລຂາທິການໃຫຍ່ ຫງວຽນຝູຈ້ອງ ຍ້ອນຄວາມສະໜິດສະໜົມ ແລະເປັນມິດກັບປະຊາຊົນໃນແຂວງ ຄານາກາວາ, ແຕ່ຍັງສະແດງຄວາມໄວ້ເນື້ອເຊື່ອໃຈວ່າ: ການແລກປ່ຽນທີ່ໄດ້ຮັບການສົ່ງເສີມໃນລະດັບອຳນາດການປົກຄອງທ້ອງຖິ່ນ ຂອງທັງສອງປະເທດ ຈະປະກອບສ່ວນຊ່ວຍໃຫ້ການພົວພັນຂອງທັງສອງປະເທດ “ຂະຫຍາຍ, ຍືດຫຍຸ່ນ ແລະ ໝັ້ນຄົງ”, ແມ່ນໝາກຜົນແຫ່ງການປະຕິບັດຕົວຈິງຂອງ “ການທູດແບບໄມ້ໄຜ່ຫວຽດນາມ”(26). ມີຄວາມຄິດເຫັນແລະຄຳຢືນຢັນທີ່ມີຄຸນຄ່າ ແລະກະຕືລືລົ້ນຫຼວງຫຼາຍ ຜ່ານເນື້ອໃນຂອງບັນດາບົດຄວາມ “ການທູດຫວຽດນາມພາຍໃຕ້ການນຳພາຂອງທ່ານເລຂາທິການໃຫຍ່ ຫງວຽນຝູຈ້ອງ - ກ້າແກ່ນ ແລະ ນັບມື້ນັບພັດທະນາ”; “ການທູດຫວຽດນາມສະໜອງແບບຢ່າງທີ່ດີກວ່າໃຫ້ແກ່ປະເທດຕ່າງໆ ທົ່ວໂລກ”; “ຝ່າຍການທູດທີ່ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ” ໄດ້ຖືກນຳໄປໃຊ້ໃນທາງປະຕິບັດໂດຍຫວຽດນາມຢ່າງປະສົບຄວາມສຳເລັດ”;... ຫຼືລຽບງ່າຍ ແລະກະທັດລັດ ຄືກັນກັບຊື່ “ຄວາມປະທັບໃຈຂອງຫວຽດນາມ” ແຕ່ເຕັມໄປດ້ວຍຄວາມຄິດ ແລະຄວາມຮູ້ສຶກອັນເລິກເຊິ່ງຂອງທ່ານນາງ ລໍເຣນາ ເປນາ ເມນໂດຊາ, ປະທານສະຫະພັນແມ່ຍິງປະຊາທິປະໄຕສາກົນ, ກ່ຽວກັບປະສົບການພຶດຕິກຳຂອງຫວຽດນາມ ແລະລະບົບທິດສະດີຂອງພັກກອມມູນິດຫວຽດນາມ; ຈາກຈຸດນັ້ນ ສ້າງຄວາມຫວັງສຳລັບອະນາຄົດທີ່ສົດໃສ ສຳລັບການຕໍ່ສູ້ທີ່ພວກເຮົາກຳລັງຕໍ່ສູ້ເພື່ອໂລກທີ່ມີສັນຕິພາບ ສະເໝີພາບ ແລະ ມີຫຼາຍຂົ້ວ, ທີ່ເຊິ່ງສິດທິຂອງບັນດາຊົນຊາດ ແລະ ໂດຍສະເພາະຢ່າງຍິ່ງ ສິດທິຂອງແມ່ຍິງແລະເດັກຍິງ ໄດ້ຮັບການເຄົາລົບຢ່າງເຕັມທີ່(27). ສາມາດຢືນຢັນວ່າ, ແມ່ນແບບແຜນການທູດຂອງທ່ານເລຂາທິການໃຫຍ່ ຫງວຽນຝູຈ້ອງ ທີ່ເຕັມໄປດ້ວຍແກ່ນແທ້ຂອງວັດທະນະທຳປະຈຳຊາດຫວຽດນາມ ເຮັດໃຫ້ໄດ້ຮັບຄວາມນັບຖື ຄວາມຊື່ນຊົມ ແລະ ຄວາມໄວ້ວາງໃຈ ຈາກມິດສະຫາຍຕ່າງປະເທດ ຕໍ່ພັກກອມມູນິດຫວຽດນາມ ແລະປະເທດຫວຽດນາມຫຼາຍຂຶ້ນ, ໄດ້ກາຍເປັນປັດໄຈໜຶ່ງທີ່ເສີມສ້າງກຳລັງແຮງຂອງການທູດຫວຽດນາມ.
ຄຽງຄູ່ກັບການກ່າວເຖິງຄວາມຄິດເຫັນ, ການຕີລາຄາ ແລະ ການໄຕ່ຕອງຂອງເພື່ອນມິດສາກົນນັ້ນ, ປື້ມເຫຼັ້ມນີ້ຍັງປະກອບສ່ວນຢັ້ງຢືນການສະໜັບສະໜູນ ແລະ ຄວາມເຫັນດີເຫັນພ້ອມອັນໃຫຍ່ຫຼວງ ຂອງປະຊາຊົນຫວຽດນາມ ຕໍ່ແນວທາງແລະນະໂຍບາຍການຕ່າງປະເທດຂອງພັກກອມມູນິດຫວຽດນາມ ພາຍໃຕ້ການຊີ້ນຳຂອງ ທ່ານເລຂາທິການໃຫຍ່ ຫງວຽນຝູຈ້ອງ; ພ້ອມກັນນັ້ນ, ສະແດງໃຫ້ເຫັນເຖິງຄວາມເຄົາລົບ, ຄວາມຮັກແພງ ແລະ ຄວາມຂອບອົກຂອບໃຈຢ່າງເລິກເຊິ່ງ ຂອງປະຊາຊົນ ຕໍ່ທ່ານເລຂາທິການໃຫຍ່, ຜ່ານນັ້ນເພີ່ມຄວາມໄວ້ເນື້ອເຊື່ອໃຈ ແລະຄວາມພາກພູມໃຈ ໃນຜົນງານອັນໃຫຍ່ຫຼວງຂອງປະເທດ, ໃນນັ້ນມີການປະກອບສ່ວນສຳຄັນ ຂອງການຕ່າງປະເທດ ແລະ ການທູດຂອງຫວຽດນາມ. ເຫຼົ່ານີ້ຄື “ຂໍ້ຄວາມບາງສ່ວນກ່ຽວກັບຜູ້ນຳການທູດ “ໄມ້ໄຝ່ຫວຽດນາມ””, “ກ່ຽວກັບຝ່າຍການທູດຫວຽດນາມສະໄໝໃໝ່”, ແມ່ນຄວາມປະທັບໃຈຂອງ “ແບບແຜນການທູດທີ່ມີມະນຸດສະທຳຂອງເລດຂາທິການໃຫຍ່ ຫງວຽນຝູຈ້ອງ”,...; ຫຼືອ່ອນໂຍນແຕ່ເລິກເຊິ່ງທີ່ສຸດ, ເຊັ່ນ ““ຊຸມປີທີ່ລ້ຳຄ່າ - ຄວາມຊົງຈຳທີ່ບໍ່ອາດລືມໄດ້ກັບທ່ານເລຂາທິການໃຫຍ່ ຫງວຽນຝູຈ້ອງ” - ເລື່ອງຂອງຜູ້ທີ່ເຮັດວຽກເປັນຫົວໜ້າຄະນະພົວພັນຕ່າງປະເທດສູນກາງພັກ ເປັນເວລາ 12 ປີ, ໃນນັ້ນມີ 10 ປີ ພາຍໃຕ້ການຊີ້ນຳໂດຍກົງຂອງທ່ານເລຂາທິການໃຫຍ່ ເຊິ່ງໄດ້ກະກຽມ ແລະຮັບໃຊ້ວຽກງານການຕ່າງປະເທດຂອງທ່ານເລຂາທິການໃຫຍ່ ຫງວຽນຝູຈ້ອງ. ດ້ວຍເຫດນັ້ນ, ຜູ້ອ່ານຈຶງປະທັບໃຈກັບແບບແຜນການທູດຂອງທ່ານເລຂາທິການໃຫຍ່ຫຼາຍຍິ່ງຂຶ້ນ: “ທ່ານເລຂາທິການໃຫຍ່ບໍ່ໄດ້ເອົາໃຈໃສ່ເຖິງເຄື່ອງນຸ່ງຫົ່ມ ແລະ ການປະດັບປະດາຫຼາຍເກີນໄປ, ແຕ່ສາມາດເວົ້າໄດ້ວ່າ ລຽບງ່າຍ, ຖ່ອມຕົວ, ການພົວພັນຕ້ອນຮັບແຂກສາກົນຢ່າງຈິງໃຈ ເປີດເຜີຍ ແລະ ເປັນມິດ ດ້ວຍຮອຍຍິ້ມທີ່ອົບອຸ່ນ, ການຈັບມືທີ່ອົບອຸ່ນ, ເມື່ອຕິດຕໍ່ສື່ສານກັບແຂກ ເພິ່ນເວົ້າຢ່າງສຸຂຸມຈະແຈ້ງ ເຂັ້ມງວດ ມີໄຫວພິບ ມີແບບສະບາຍໆ ແລະສະຫງ່າງາມ”(28), ແລະຈາກນັ້ນກໍ່ເບິ່ງຄືຈະຊັດເຈນວ່າ: ທ່ານເລຂາທິການໃຫຍ່ຂອງພວກເຮົາເປັນແບບນັ້ນ - ເຂົ້າໃຈແລະເຄົາລົບນັບຖືເພື່ອນມິດສາກົນສະເໝີ.
ໃນສະພາບການໂລກາພິວັດແລະການເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງ, ປຶ້ມເຫຼັ້ມນີ້ແມ່ນຄູ່ມື ແລະ ຂໍ້ມູນອ້າງອີງທີ່ມີປະໂຫຍດຢ່າງແທ້ຈິງ, ບໍ່ພຽງແຕ່ຊ່ວຍໃຫ້ເຂົ້າໃຈທິດສະດີ ແລະ ການປະຕິບັດວຽກງານການຕ່າງປະເທດ ຂອງທ່ານເລຂາທິການໃຫຍ່ ຫງວຽນຝູຈ້ອງ, ແຕ່ຍັງເຂົ້າໃຈຢ່າງຈະແຈ້ງ ແລະ ເຫັນດ້ວຍກັບແຜນນະໂຍບາຍ, ແນວທາງ ແລະ ນະໂຍບາຍການຕ່າງປະເທດຂອງພັກກອມມູນິດຫວຽດນາມ./.
--------------------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 162
(2) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2023, ໜ້າ 18-19.
(3) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 47-48
(4) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 36
(5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 25
(6) ເບິ່ງ: ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 37-38
(7) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 38
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 165
(9) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 38
(10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 161–162
(11) ເບິ່ງ: ຫງວຽນທິທູ່ຍລິງ: “ພິທີເປີດປຶ້ມ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ຂອງທ່ານເລຂາທິການໃຫຍ່ ຫງວຽນຝູຈ້ອງ, ວາລະສານກອມມູນິດເອເລັກຕຣິກ, ວັນທີ 22 ພະຈິກ 2023
(12), (13) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 181, 201
(14), (15), (16), (17) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 213, 300-301, 408, 406
(18) (19), (20), (21), (22) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 411-412, 438, 440, 518, 523
(23), (24), (25), (26) ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 642, 644, 649-650, 688–689
(27), (28) ເບິ່ງ: ຫງວຽນຝູຈ້ອງ: ການກໍ່ສ້າງແລະພັດທະນາພື້ນຖານການຕ່າງປະເທດ ແລະການທູດຫວຽດນາມ ທີ່ທັນສະໄໝ, ຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ປຶ້ມທີ່ໄດ້ແນະນຳ, ໜ້າ 728-729, 739
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1027 (ເດືອນທັນວາ 2023)
