ເສີມຂະຫຍາຍກຳລັງແຮງຂອງປະຊາຊົນໃນການກໍ່ສ້າງ
ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ
- ບາງບັນຫາໃໝ່ທີ່ໄດ້ຍົກອອກມາໃນປະຈຸບັນ
ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ
- ບາງບັນຫາໃໝ່ທີ່ໄດ້ຍົກອອກມາໃນປະຈຸບັນ
ເສີມຂະຫຍາຍກຳລັງແຮງຂອງປະຊາຊົນ ໃນການກໍ່ສ້າງແລະປົກປັກຮັກສາ
ປະເທດຊາດຫວຽດນາມສັງຄົມນິຍົມຢ່າງໝັ້ນຄົງ - ພື້ນຖານທິດສະດີແລະພຶດຕິກຳ
ໂດຍຊາບຊຶມທັດສະນະຂອງລັດທິມາກ-ເລນິນ ແລະ ບົດຮຽນທີ່ສືບທອດມາກ່ຽວກັບບົດບາດຂອງມະຫາຊົນໃນປະຫວັດສາດແຫ່ງການສ້າງສາແລະປົກປັກຮັກສາປະເທດ, ພັກກອມມູນິດຫວຽດນາມ ໂດຍປະທານ ໂຮ່ຈີມິນ ເປັນຫົວໜ້າ ໄດ້ຢືນຢັນສະເໝີວ່າ ປະຊາຊົນແມ່ນອັດຕະພາບຂອງການປະຕິວັດ, ມີຄວາມຄິດສ້າງສັນອັນບໍ່ມີທີ່ສິ້ນສຸດ ແລະພະລັງອັນຍິ່ງໃຫຍ່. ເພິ່ນຊີ້ໃຫ້ເຫັນວ່າ: “ບໍ່ມີສິ່ງໃດໃນທ້ອງຟ້ານີ້ມີຄ່າກວ່າປະຊາຊົນ. ໃນໂລກນີ້ບໍ່ມີສິ່ງໃດທີ່ແຂງແຮງກວ່າກຳລັງສາມັກຄີຂອງປະຊາຊົນ”(1), “ດ້ວຍພະລັງຂອງປະຊາຊົນ ວຽກງານຈະໃຫຍ່ຫຼືຫຍຸ້ງຍາກປານໃດ ກໍ່ເຮັດໄດ້ທຸກຢ່າງ. ຖ້າບໍ່ມີມັນ ກໍ່ບໍ່ເຮັດສິ່ງໃດໄດ້. ປະຊາຊົນຮູ້ວິທີການແກ້ໄຂບັນຫາຕ່າງໆໄດ້ຢ່າງງ່າຍດາຍ, ວ່ອງໄວແລະສົມບູນ ເຊິ່ງຄົນເກ່ງແລະອົງການໃຫຍ່ຄິດບໍ່ເຖິງ”(2); “ຄວາມເປັນຈິດໜຶ່ງໃຈດຽວຂອງພີ່ນ້ອງຮ່ວມຊາດເຮົາກໍ່ໃຫ້ເກີດກຳແພງທອງເຫຼືອງຮອບປະເທດຊາດ. ສັດຕູຈະດຸຮ້າຍແລະເລິກແລບປານໃດກໍ່ຕາມ, ຫາກຊົນກັບກຳແພງນັ້ນ ພວກເຂົາກໍ່ຈະປະລາໄຊຢ່າງສິ້ນເຊີງ”(3).
ຕາມແນວຄິດຂອງປະທານໂຮ່ຈີມິນ “ປະຊາຊົນ” ມີຄວາມໝາຍແຝງທີ່ກວ້າງຫຼາຍ ລວມທັງຊາວຫວຽດນາມຜູ້ຮັກຊາດທັງໝົດ ເຊິ່ງເປັນກຳລັງຂະໜາດໃຫຍ່ທີ່ມີອຳນາດອັນຍິ່ງໃຫຍ່. ພະລັງຂອງປະຊາຊົນແມ່ນກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ. ນັ້ນແມ່ນກຳລັງແຮງທາງດ້ານວັດຖຸແລະຈິດໃຈ ທີ່ຫຼອມລວມຈາກຄວາມເຂັ້ມແຂງຂອງແຕ່ລະບຸກຄົນ, ຈາກແຕ່ລະກຸ່ມຊົນເຜົ່າ, ສາສະໜາ, ຊັ້ນຄົນ ແລະຊົນຊັ້ນທາງສັງຄົມ. ປະຊາຊົນແມ່ນກຳລັງທີ່ໜາແໜ້ນ, ແຕ່ຖ້າແຕ່ລະຄົນຢືນຢັດຢູ່ລຳພັງ ເຂົາຈະບໍ່ສາມາດສ້າງເປັນກຳລັງແຮງໄດ້; ພະລັງອັນຍິ່ງໃຫຍ່ຈະຖືກສ້າງຂຶ້ນ ກໍ່ຕໍ່ເມື່ອທຸກຄົນໄດ້ຕື່ນຕົວ ແລະລວມຕົວກັນເປັນອັນໜຶ່ງອັນດຽວກັນແຫ່ງເຈດຈຳນົງແລະການກະທຳ. ດັ່ງນັ້ນ, ການເອົາໃຈໃສ່ກໍ່ສ້າງແລະປັບປຸງຢ່າງຕໍ່ເນື່ອງ, ການເພີ່ມທະວີກຸ່ມກ້ອນມະຫາສາມັກຄີປວງຊົນທັງຊາດນັ້ນ ແມ່ນເງື່ອນໄຂທີ່ສຳຄັນທີ່ສຸດ ໃນການເສີມຂະຫຍາຍກຳລັງແຮງອັນຍິ່ງໃຫຍ່ຂອງປະຊາຊົນ.
ພາລະກິດການຕໍ່ສູ້ເພື່ອປົດປ່ອຍຊາດ, ໂຮມປະເທດຊາດເປັນເອກະພາບ ແລະ ກໍ່ສ້າງລັດທິສັງຄົມນິຍົມ ແມ່ນພາລະກິດທີ່ສຳຄັນທີ່ສຸດ ແຕ່ຫຍຸ້ງຍາກແລະລຳບາກຫຼາຍ ຢ່າງທີ່ບໍ່ເຄີຍເກີດຂຶ້ນມາກ່ອນ ເຊິ່ງຕ້ອງອາໄສຄວາມເສຍສະຫຼະ ແລະການອຸທິດຕົນອັນຍິ່ງໃຫຍ່ໃນທຸກດ້ານຂອງຊາດ. ພາລະກິດທີ່ຍາວນານ, ຫຍຸ້ງຍາກແລະລຳບາກນັ້ນ ຈະສຳເລັດໄດ້ກໍ່ຕໍ່ເມື່ອພັກເຕົ້າໂຮມ ລວບລວມ ແລະ ເສີມຂະຫຍາຍກຳລັງແຮງຂອງປະຊາຊົນທຸກຊົນຊັ້ນ, ກໍ່ໃຫ້ເກີດກຳລັງແຮງອັນມະຫາສານ ແລະເປັນກຳລັງແຮງຂອງ “ປະຊາຊົນຈຳນວນໝື່ນເປັນໜຶ່ງດຽວກັນ”. ການເຕົ້າໂຮມ ລວບລວມ ແລະ ເສີມຂະຫຍາຍກຳລັງແຮງຂອງປະຊາຊົນຕ້ອງອາໄສວິທີການແລະຮູບການທີ່ເໝາະສົມ, ບົນພື້ນຖານການປະສົມປະສານຜົນປະໂຫຍດທີ່ແທດຈິງຂອງປະຊາຊົນຢ່າງກົມກຽວ; ໃນນັ້ນ, ພັກແມ່ນແກນກາງທີ່ເຕົ້າໂຮມແລະສາມັກຄີປະຊາຊົນເປັນເອກະພາບ.
ຄວາມເປັນຈິງຂອງການຕໍ່ສູ້ເພື່ອປົດປ່ອຍຊາດ ແລະໂຮມປະເທດຊາດເປັນເອກະພາບໄດ້ພິສູດແລ້ວວ່າ ຍ້ອນແນວທາງການປະຕິວັດທີ່ຖືກຕ້ອງ, ທຸກສິ່ງທຸກຢ່າງລ້ວນມຸ່ງສູ່ເອກະລາດແຫ່ງຊາດ ແລະສັງຄົມນິຍົມ, ເພື່ອເສລີພາບ ແລະ ຄວາມສຸກຂອງປະຊາຊົນ; ມີຖັນແຖວພະນັກງານ ສະມາຊິກພັກທີ່ເປັນຜູ້ຮັບໃຊ້ຂອງປະຊາຊົນຢ່າງແທ້ຈິງ, ສຸດອົກສຸດໃຈ, ເສຍສະຫຼະເພື່ອປະຊາຊົນ, ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນ ດັ່ງນັ້ນພັກກອມມູນິດຫວຽດນາມຈຶ່ງໄດ້ເຕົ້າໂຮມ ລວບລວມ ແລະ ເສີມຂະຫຍາຍກຳລັງແຮງຂອງປະຊາຊົນ ທັງດ້ານກຳລັງແຮງແລະຊັບສິນ, ວັດຖຸແລະຈິດໃຈ ເພື່ອນຳມາເຊິ່ງໄຊຊະນະໃນການປະຕິວັດເດືອນສິງຫາປີ 1945, ແລະ “ໄຊຊະນະດ້ຽນບຽນຟູ ທີ່ໂດ່ງດັງ, ສະເທືອນໂລກ” ປີ 1954 ແລະ ໄຊຊະນະທີ່ຍິ່ງໃຫຍ່ໃນລະດູບານໃໝ່ປີ 1975, ປົດປ່ອຍພາກໃຕ້ຢ່າງສົມບູນ ແລະໂຮມປະເທດຊາດເປັນເອກະພາບ. ນັ້ນແມ່ນກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ, ຜູ້ຄົນຈຳນວນລ້ານເປັນໜຶ່ງດຽວກັນ, ຕັດສິນໃຈ ແລະພ້ອມກັນລຸກຂຶ້ນຕໍ່ສູ້ ເພື່ອປົດປ່ອຍປະເທດຊາດຈາກການກົດຂີ່ຂູດຮີດ ຂອງລະບອບລ່າເມືອງຂຶ້ນແລະສັກດິນາ. ການເຂົ້າຮ່ວມຢ່າງຕັ້ງໜ້າຂອງປະຊາຊົນ ໂດຍບໍ່ຄຳນຶງເຖິງຄວາມເສຍສະຫຼະ, ຄວາມຫຍຸ້ງຍາກລຳບາກ ແລະ ບໍ່ຍອມຈຳນົນຕໍ່ກອງກຳລັງຮຸກຮານຫຼືກົດຂີ່ໃດໆ ມີຕົ້ນກຳເນີດມາຈາກປະເພນີອັນລ້ຳຄ່າທີ່ຖືກສ້າງຂຶ້ນມາເປັນເວລາຫຼາຍພັນປີ ໃນການກໍ່ສ້າງແລະປົກປ້ອງປະເທດຊາດ; ໃນຍຸກປະຈຸບັນ ໄດ້ກາຍເປັນຄວາມເຊື່ອໝັ້ນອັນຍິ່ງໃຫຍ່ຂອງປະຊາຊົນ ຕໍ່ການນຳພາຂອງພັກແລະປະທານໂຮ່ຈີມິນ.
ໃນພາລະກິດການສ້າງສາແລະປົກປັກຮັກສາປະເທດຊາດ, ເພື່ອເສີມຂະຫຍາຍກຳລັງແຮງຂອງປະຊາຊົນ, ພັກເຮົາໄດ້ກຳນົດແລະຖືເອົາເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ” ເປັນຄວາມຄ້າຍຄືກັນ; ຮັບປະກັນຄວາມຍຸຕິທຳແລະຄວາມສະເໝີພາບທາງສັງຄົມ, ເບິ່ງແຍງດູແລຜົນປະໂຫຍດທີ່ແທດຈິງ ຊອບທຳ ຖືກກົດໝາຍຂອງທຸກຊົນຊັ້ນ, ທຸກຊັ້ນວັນນະທາງສັງຄົມ; ປະສົມປະສານຜົນປະໂຫຍດສ່ວນບຸກຄົນ, ຜົນປະໂຫຍດສ່ວນລວມ ແລະຜົນປະໂຫຍສັງຄົມຢ່າງກົມກຽວ,... ຖືວ່າສິ່ງເຫຼົ່ານີ້ເປັນປັດໄຈສຳຄັນໃນການປັບປຸງ ແລະພັດທະນາກຸ່ມກ້ອນມະຫາສາມັກຄີປວງຊົນທັງຊາດ. ພ້ອມກັນນັ້ນ, ພັກນຳພາການພັດທະນາເສດຖະກິດຕະຫຼາດຕາມທິດສັງຄົມນິຍົມ ດ້ວຍຫຼາຍຮູບການກຳມະສິດ, ຫຼາຍພາກສ່ວນເສດຖະກິດ, ຫຼາຍຮູບການຈັດຕັ້ງທຸລະກິດ ແລະຮູບການແຈກຢາຍທີ່ເໝາະສົມ ແລະມີປະສິດທິຜົນ; ການສ້າງລັດແຫ່ງອຳນາດກົດໝາຍສັງຄົມນິຍົມຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ; ອຳນາດລັດທັງໝົດແມ່ນຂອງປະຊາຊົນ ເຊິ່ງຮາກຖານແມ່ນພັນທະພາບລະຫວ່າງຊົນຊັ້ນກຳລະກອນ ກັບຊົນຊັ້ນຊາວນາ ແລະຖັນແຖວປັນຍາຊົນ ນຳໂດຍພັກກອມມູນິດຫວຽດນາມ. ເສີມຂະຫຍາຍສິດເປັນເຈົ້າຂອງຂອງປະຊາຊົນໃນທຸກຂົງເຂດຂອງຊີວິດສັງຄົມ, ຮັບປະກັນວ່າ ປະຊາທິປະໄຕຈະຖືກນຳໃຊ້ໃນທາງປະຕິບັດໃນແຕ່ລະຂັ້ນ, ແຕ່ລະພາກສ່ວນ ແລະ ໃນທຸກຂົງເຂດຂອງຊີວິດສັງຄົມ. ການສ້າງພື້ນຖານວັດທະນະທຳຫວຽດນາມທີ່ກ້າວໜ້າ, ອຸດົມໄປດ້ວຍເອກະລັກປະຈຳຊາດ ແລະ ພັດທະນາຢ່າງຮອບດ້ານ, ເປັນເອກະພາບໃນຄວາມຫຼາກຫຼາຍ, ຊາບຊຶມຢ່າງເລິກເຊິ່ງເຖິງຈິດໃຈມະນຸດສະທຳ ປະຊາທິປະໄຕ ແລະ ຄວາມກ້າວໜ້າທາງສັງຄົມ; ເຮັດໃຫ້ວັດທະນະທຳເຊື່ອມໂຍງຢ່າງແໜ້ນແຟ້ນ ແລະ ຊືມເລິກເຂົ້າໄປໃນຊີວິດສັງຄົມທັງໝົດ, ກາຍເປັນຮາກຖານທາງຈິດໃຈທີ່ໝັ້ນຄົງ ແລະກຳລັງແຮງພາຍໃນທີ່ສຳຄັນ ເພື່ອພັດທະນາປະເທດ. ປະຕິບັດນະໂຍບາຍສະເໝີພາບ, ສາມັກຄີ, ເຄົາລົບນັບຖື ແລະ ຊ່ວຍເຫຼືອເຊິ່ງກັນແລະກັນ ລະຫວ່າງບັນດາເຜົ່າ, ສ້າງເງື່ອນໄຂທີ່ເອື້ອອຳນວຍໃຫ້ບັນດາເຜົ່າພັດທະນາ, ຕິດພັນຢ່າງແໜ້ນແຟ້ນກັບການພັດທະນາຮ່ວມກັນຂອງປະຊາຄົມບັນດາເຜົ່າຫວຽດນາມ; ຄັດຄ້ານຕ້ານການເລືອກປະຕິບັດ ແລະການແບ່ງແຍກທາງຊົນເຜົ່າຢ່າງເດັດດ່ຽວ. ເຄົາລົບ ແລະ ຮັບປະກັນສິດເສລີພາບໃນການເຊື່ອຖື, ສາສະໜາ ແລະ ບໍ່ເຊື່ອຖື ຂອງປະຊາຊົນຕາມຂໍ້ກຳນົດຂອງກົດໝາຍ; ຕໍ່ສູ້ແລະຈັດການລົງໂທດຢ່າງເຄັ່ງຄັດ ຕໍ່ທຸກການກະທຳລະເມີດກົດໝາຍ ລະເມີດສິດເສລີພາບ ປະຊາທິປະໄຕ ເສລີພາບໃນການເຊື່ອຖື ສາສະໜາ ແລະ ການສວຍໃຊ້ “ປະຊາທິປະໄຕ”, “ຄວາມເຊື່ອ, ສາສະໜາ” ເພື່ອທຳລາຍຜົນປະໂຫຍດຂອງຊາດ-ປະເທດຊາດ ແລະຜົນປະໂຫຍດຂອງປະຊາຊົນ. ປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ການພັດທະນາຢ່າງຕໍ່ເນື່ອງ; ດຳເນີນການພົວພັນຕ່າງປະເທດແບບຫຼາຍກ້ຳ ຫຼາຍຝ່າຍ, ເປັນເຈົ້າການແລະຕັ້ງໜ້າເຊື່ອມໂຍງເຂົ້າກັບສາກົນຢ່າງກວ້າງຂວາງ; ຍົກສູງກຽດສັກສີ ແລະ ທີ່ຕັ້ງຂອງປະເທດ; ເພື່ອຜົນປະໂຫຍດຂອງຊາດ-ປະເທດຊາດ; ພ້ອມທີ່ຈະເປັນເພື່ອນ, ເປັນຄູ່ຮ່ວມມືທີ່ເຊື່ອຖືໄດ້ ແລະເປັນສະມາຊິກທີ່ມີຄວາມຮັບຜິດຊອບ ຂອງປະຊາຄົມສາກົນ, ປະກອບສ່ວນເຂົ້າໃນພາລະກິດສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມໃນໂລກ.
ດ້ວຍແຜນນະໂຍບາຍແລະວິທີແກ້ໄຂທີ່ຄົບຊຸດ, ພັກຂອງພວກເຮົາໄດ້ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ, ປະສົມປະສານກຳລັງແຮງຂອງຊາດກັບກຳລັງແຮງຂອງຍຸກສະໄໝ ຊ່ວຍໃຫ້ປະເທດຂອງພວກເຮົາເອົາຊະນະຄວາມຫຍຸ້ງຍາກລຳບາກ ແລະຄວາມທ້າທາຍທັງໝົດ, ຮັກສາເອກະລາດ ອຳນາດອະທິປະໄຕ ເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດ; ດຳເນີນການປ່ຽນແປງໃໝ່ຢ່າງຮອບດ້ານ ກ່ອນອື່ນໝົດແມ່ນການປ່ຽນແປງໃໝ່ທາງດ້ານເສດຖະກິດ, ສ້າງການພັດທະນທີ່ໂດດເດັ່ນ. ອາໄສສິ່ງດັ່ງກ່າວ “ປະເທດເຮົາບັນລຸໄດ້ບັນດາຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດ, ພັດທະນາຢ່າງແຂງແຮງແລະຮອບດ້ານ ເມື່ອທຽບກັບຊຸມປີກ່ອນການປ່ຽນແປງໃໝ່. ຂະໜາດແລະລະດັບຂອງເສດຖະກິດໄດ້ຮັບການຍົກສູງຂຶ້ນ. ຊີວິດຂອງປະຊາຊົນ ທັງດ້ານວັດຖຸແລະຈິດໃຈດີຂຶ້ນຢ່າງຈະແຈ້ງ. ປະເທດຂອງພວກເຮົາບໍ່ເຄີຍມີຄວາມໂຊກດີ, ທ່າແຮງ, ຕຳແໜ່ງ ແລະ ກຽດສັກສີສາກົນເທົ່າກັບທຸກວັນນີ້” (4). ປະຈຸບັນ, ຫວຽດນາມີການພົວພັນທາງການທູດກັບ 193 ປະເທດແລະດິນແດນ, ໃນນັ້ນ 3 ປະເທດມີການພົວພັນພິເສດ, 6 ປະເທດເປັນຄູ່ຮ່ວມມືຍຸດທະສາດຮອບດ້ານ, 13 ປະເທດເປັນຄູ່ຮ່ວມມືຍຸດທະສາດ ແລະ 12 ປະເທດເປັນຄູ່ຮ່ວມມືຮອບດ້ານ(5). ນີ້ແມ່ນພະລັງຂັບເຄື່ອນ ຊັບພະຍາກອນທີ່ສຳຄັນ, ແມ່ນພື້ນຖານແລະຄວາມເຊື່ອໝັ້ນໃຫ້ທົ່ວພັກ, ປະຊາຊົນ ແລະ ກອງທັບເຮົາ ເອົາຊະນະຄວາມຫຍຸ້ງຍາກລຳບາກແລະຄວາມທ້າທາຍ, ສືບຕໍ່ກ້າວຢ່າງໝັ້ນຄົງບົນເສັ້ນທາງແຫ່ງການປ່ຽນແປງໃໝ່ຢ່າງຮອບດ້ານ ແລະ ຄົບຊຸດ; ພັດທະນາປະເທດຢ່າງວ່ອງໄວແລະຍືນຍົງ.
ສຳລັບກອງທັບປະຊາຊົນຫວຽດນາມທີ່ມາຈາກປະຊາຊົນ, ຕໍ່ສູ້ເພື່ອປະຊາຊົນ, ມີຄວາມຜູກພັນໃກ້ຊິດກັບປະຊາຊົນ, ພາຍໃຕ້ການນຳພາທີ່ເດັດຂາດແລະໂດຍກົງໃນທຸກດ້ານຂອງພັກ, ໃນເກືອບ 80 ປີທີ່ຜ່ານມາ, ກອງກຳລັງທະຫານຍັງຄົງປະຕິບັດພາລະບົດບາດແລະໜ້າທີ່ໃນການເປັນກອງກຳລັງສູ້ຮົບ, ກອງກຳລັງປະຕິບັດງານ, ກອງກຳລັງອອກແຮງງານທຳການຜະລິດ ເປັນຢ່າງດີຕະຫຼອດມາ. ໃນທຸກສະຖານະການ, ທຸກບ່ອນທຸກທີ່, ດ້ວຍຈິດໃຈເພື່ອເອກະລາດແລະອິດສະລະພາບຂອງປະເທດຊາດ ແລະເພື່ອຄວາມສຸກຂອງປະຊາຊົນ, ພະນັກງານທະຫານແລະນັກຮົບທຸກຄົນຂອງກອງທັບປະຊາຊົນຫວຽດນາມ ພ້ອມທີ່ຈະເສຍສະຫຼະຊີວິດ, ຜ່ານຜ່າຄວາມຫຍຸ້ງຍາກລຳບາກທຸກຢ່າງໃນການສູ້ຮົບ ເພື່ອປົກປັກຮັກສາປະເທດຊາດຫວຽດນາມສັງຄົມນິຍົມ ແລະ ປົກປ້ອງປະຊາຊົນ; ເຮັດໜ້າທີ່ແກນຫຼັກ ແລະ ພ້ອມກັນກັບປະຊາຊົນໃນການປ້ອງກັນ, ຕໍ່ສູ້ ແລະເອົາຊະນະຜົນທີ່ຕາມມາຈາກໄພພິບັດທາງທຳມະຊາດ, ພະຍາດລະບາດ, ໄພພິບັດດ້ານສິ່ງແວດລ້ອມ, ການຄົ້ນຫາ ຊ່ວຍເຫຼືອ ກູ້ໄພກູ້ຊີບ, ເປັນເຈົ້າການແລະຕັ້ງໜ້າເຂົ້າຮ່ວມໃນກອງກຳລັງຮັກສາສັນຕິພາບຂອງສະຫະປະຊາຊາດ,... ເຕີມຄວາມສົດໃສໃຫ້ກັບຄຸນສົມບັດຂອງ “ທະຫານລຸງໂຮ່” ໃນຍຸກສະໄໝໃໝ່; ຜ່ານນັ້ນ, ປະກອບສ່ວນຍົກສູງບົດບາດຖານະ ແລະກຽດຊື່ສຽງຂອງຫວຽດນາມໃນເວທີສາກົນ, ປົກປັກຮັກສາປະເທດຕັ້ງແຕ່ຕົ້ນ, ຈາກໄລຍະໄກ; ປັບປຸງຄວາມເຊື່ອໝັ້ນຂອງປະຊາຊົນຕໍ່ພັກ ລັດ ແລະ ລະບອບສັງຄົມນິຍົມ, ຕໍ່ກອງທັບ, ເປັນພື້ນຖານສຳຄັນເພື່ອເຕົ້າໂຮມ ລວບລວມ ແລະ ເສີມຂະຫຍາຍກຳລັງແຮງຂອງປະຊາຊົນ.
ໃນເວລາທີ່ຈະມາເຖິງ, ເປົ້າໝາຍການພັດທະນາປະເທດທີ່ກຳນົດໂດຍພັກກອມມູນິດຫວຽດນາມຄື: “ຮອດປີ 2030, ສະເຫຼີມສະຫຼອງການກໍ່ຕັ້ງພັກຄົບຮອບ 100 ປີ: ຫວຽດນາມຈະເປັນປະເທດກຳລັງພັດທະນາ, ມີອຸດສາຫະກຳທີ່ທັນສະໄໝ ແລະ ມີລາຍໄດ້ປານກາງສູງ. ຮອດປີ 2045, ສະເຫຼີມສະຫຼອງການສະຖາປະນາສາທາລະນະລັດປະຊາທິປະໄຕຫວຽດນາມ ເຊິ່ງປະຈຸບັນແມ່ນ ສາທາລະນະລັດສັງຄົມນິຍົມຫວຽດນາມ ຄົບຮອບ 100 ປີ: ຫວຽດນາມຈະກາຍເປັນປະເທດທີ່ພັດທະນາແລ້ວ ແລະມີລາຍໄດ້ສູງ”(6). ນີ້ແມ່ນໜ້າທີ່ທີ່ຍິ່ງໃຫຍ່ແລະສະຫງ່າງາມທີ່ສຸດ, ແຕ່ກໍ່ໜັກໜ່ວງແລະສັບສົນຫຼາຍ, ມັນຮຽກຮ້ອງໃຫ້ພັກແລະລັດ ບໍ່ພຽງແຕ່ຕ້ອງມີແນວທາງທີ່ຖືກຕ້ອງ, ມີຍຸດທະສາດ ແຜນການ ແລະ ມາດຕະການທີ່ຄົບຊຸດ, ຍົກສູງຄວາມຕັດສິນໃຈຂອງທຸກຂັ້ນ ຂະແໜງການ ກອງກຳລັງ ແລະລະບົບການເມືອງທັງໝົດ, ແຕ່ຍັງຕ້ອງເສີມຂະຫຍາຍກຳລັງແຮງຂອງປະຊາຊົນ ແລະຂອງກຸ່ມກ້ອນມະຫາສາມັກຄີປວງຊົນທັງຊາດ. ຢ່າງໃດກໍ່ຕາມ, ໃນເງື່ອນໄຂໃໝ່, ການເສີມຂະຫຍາຍກຳລັງແຮງຂອງປະຊາຊົນ ໃນການປະຕິບັດໜ້າທີ່ການປະຕິວັດ ກຳລັງປະເຊີນກັບບັນຫາໃໝ່ຫຼາຍຢ່າງ.
ພະນັກງານການແພດທະຫານ ກວດແລະປິ່ນປົວພະຍາດໃຫ້ປະຊາຊົນ (ນັກຂ່າວ: ຟຸ່ງດຶກຢຸງ) _ແຫຼ່ງ: qdnd.vn
ສືບຕໍ່ເສີມຂະຫຍາຍກຳລັງແຮງຂອງປະຊາຊົນ, ຕອບສະໜອງຄວາມຕ້ອງການແລະໜ້າທີ່ໃໝ່
ໃນການສ້າງແລະປົກປ້ອງປະເທດຊາດຫວຽດນາມສັງຄົມນິຍົມຢ່າງໝັ້ນຄົງ
ທີໜຶ່ງ, ປຸກລະດົມຄວາມເອກອ້າງທະນົງໃຈຂອງຊາດ, ເສີມສ້າງຄວາມສັດທາ, ອຸດົມຄະຕິແຫ່ງການປະຕິວັດ, ຄວາມປາດຖະໜາທີ່ຈະພັດທະນາປະເທດໃຫ້ຈະເລີນຮຸ່ງເຮືອງ ແລະມີຄວາມສຸກ ຂອງປະຊາຊົນທຸກຊັ້ນວັນນະ.
ກ່ອນອື່ນໝົດ, ຕ້ອງເຮັດວຽກງານການໂຄສະນາແລະອົບຮົມສຶກສາໃຫ້ດີ, ເຮັດໃຫ້ປະຊາຊົນເຫັນຄຸນຄ່າແລະຄວາມໝາຍ ຂອງພາລະກິດການສ້າງລັດທິສັງຄົມນິຍົມ. ການກ້າວໄປສູ່ລັດທິສັງຄົມນິຍົມແມ່ນເສັ້ມທາງດຽວທີ່ຖືກຕ້ອງ ແລະ ສອດຄ່ອງກັບທ່າອ່ຽງຂອງຍຸກສະໄໝ; ຮັບປະກັນຄວາມເປັນເອກະລາດ ແລະການພັດທະນາຂອງປະເທດ, ຄວາມຈະເລີນຮຸ່ງເຮືອງ ເສລີພາບ ແລະ ຄວາມສຸກຂອງປະຊາຊົນ. ຍູ້ແຮງການໂຄສະນາກ່ຽວກັບຄວາມສຳເລັດຂອງຂະບວນການປ່ຽນແປງໃໝ່, ຢືນຢັນວ່າ ບົດບາດນຳພາຂອງພັກ ແລະ ການຄຸ້ມຄອງຂອງລັດ ແມ່ນບັນດາປັດໄຈສຳຄັນທີ່ສຸດ ທີ່ຮັບປະກັນຄວາມສຳເລັດຂອງພາລະກິດການປ່ຽນແປງໃໝ່, ກໍ່ສ້າງ ແລະ ປົກປັກຮັກສາປະເທດຊາດ. ພ້ອມກັນນັ້ນ, ເຮັດໃຫ້ປະຊາຊົນທຸກຊັ້ນຄົນເຫັນໄດ້ບົດບາດ ແລະ ພະລັງແຫ່ງຄວາມສາມັກຄີ, ຄວາມຮັບຜິດຊອບຮ່ວມກັນ, ການຮ່ວມມື ແລະ ຄວາມເປັນຈິດໜຶ່ງໃຈດຽວໃນການຜ່ານຜ່າຄວາມຫຍຸ້ງຍາກ ແລະສິ່ງທ້າທາຍມັງໝົດ; ມີພຽງຄວາມສາມັກຄີເປັນເອກະພາບເທົ່ານັ້ນ ທີ່ສາມາດສ້າງກຳລັງແຮງເພື່ອປະຕິບັດຄວາມປາດຖະໜາໃນການພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ, ຮັບປະກັນຜົນປະໂຫຍດຂອງປະຊາຊົນແຕ່ລະຄົນ. ການໂຄສະນາ ແລະ ອົບຮົມສຶກສາຕ້ອງດຳເນີນການຢ່າງເປັນປະຈຳ ດ້ວຍຮູບແບບແລະວິທີການທີ່ຫຼາກຫຼາຍ ແລະເໝາະສົມກັບເປົ້າໝາຍ; ໃນນັ້ນ, ສຸມໃສ່ການໂຄສະນາແລະອົບຮົມສຶກສາໃຫ້ຄົນຮຸ່ນໃໝ່ - ຊຶ່ງເປັນເຈົ້າຂອງຂອງປະເທດໃນອະນາຄົດ - ກ່ຽວກັບຄວາມຮັບຜິດຊອບແລະໜ້າທີ່ຂອງເຂົາເຈົ້າ. ຈາກນັ້ນ, ປັບປຸງຄວາມເຊື່ອໝັ້ນຂອງປະຊາຊົນຕໍ່ການນຳພາຂອງພັກ ແລະຕໍ່ເສັ້ນທາງໄປສູ່ລັດທິສັງຄົມນິຍົມ, “ປຸກລະດົມນ້ຳໃຈຮັກຊາດຢ່າງແຂງແຮງ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງຂອງຊາດ, ກຳລັງແຮງແຫ່ງມະຫາສາມັກຄີປວງຊົນທັງຊາດ ແລະຄວາມປາດຖະໜາທີ່ຈະພັດທະນາປະເທດໃຫ້ຈະເລີນຮຸ່ງເຮືອງ ແລະມີຄວາມສຸກ”(7) ໃນປະຊາຊົນທຸກຊັ້ນວັນນະ.
ທີສອງ, ຮັບປະກັນຜົນປະໂຫຍດຂອງປະຊາຊົນທຸກຊັ້ນວັນນະ, ປະຕິບັດຄວາມກ້າວໜ້າ ແລະຄວາມຍຸຕິທຳທາງສັງຄົມ.
ໃນຊຸມປີທີ່ຜ່ານມາ, ເສດຖະກິດແລະສັງຄົມມີການພັດທະນາຢ່າງຕໍ່ເນື່ອງ, ຈີດີພີ (GDP) ຕໍ່ຫົວຄົນເພີ່ມຂຶ້ນ, ບັນດາຂົງເຂດສັງຄົມມີການປ່ຽນແປງທີ່ດີຫຼາຍຢ່າງ, ຊີວິດດ້ານວັດຖຸແລະຈິດໃຈຂອງປະຊາຊົນທຸກຊັ້ນວັນນະ ໄດ້ຮັບການປັບປຸງໃຫ້ດີຂຶ້ນຢ່າງເຫັນໄດ້ແຈ້ງ, ຄວາມຕ້ອງການ ແລະ ຄວາມສຳພັນທາງຜົນປະໂຫຍດໃນສັງຄົມ, ຕະຫຼອດຈົນຜົນປະໂຫຍດຂອງບັນດາຊົນຊັ້ນ, ພາກສ່ວນ ແລະກຳລັງທາງສັງຄົມ ໄດ້ຮັບການຕອບສະໜອງແລະແກ້ໄຂຢ່າງກົມກຽວ ແລະໜ້າພໍໃຈຫຼາຍຂຶ້ນເລື້ອຍໆ. ບັນດາບັນຫາສັງຄົມເຊັ່ນ ແຮງງານ, ວຽກເຮັດງານທຳ, ຄວາມຊົ່ວຮ້າຍທາງສັງຄົມ, ການປະຕິບັດຄວາມຍຸຕິທຳ ແລະຄວາມສະເໝີພາບທາງສັງຄົມ,... ໄດ້ຮັບການແກ້ໄຂໃຫ້ດີຂຶ້ນ. ນັ້ນແມ່ນປັດໄຈທີ່ຕັ້ງໜ້າ, ສ້າງຮາກຖານທີ່ໝັ້ນຄົງ ເພື່ອເຕົ້າໂຮມ ລວບລວມ ແລະເສີມຂະຫຍາຍກຳລັງແຮງຂອງປະຊາຊົນ.
ຢ່າງໃດກໍ່ຕາມ, ໃນຫຼາຍເຂດ ຫຼາຍພາກພື້ນ, ໂດຍສະເພາະ ໃນເຂດຫ່າງໄກສອກຫຼີກ, ເຂດພູເຂົາ ໝູ່ເກາະ, ເຂດຊົນເຜົ່າສ່ວນໜ້ອຍ, ສະພາບການເສດຖະກິດ-ສັງຄົມຍັງມີຄວາມຫຍຸ້ງຍາກແລະຄວາມທຸກຍາກ ແລະມີຄວາມບໍ່ຮູ້ໜັງສື ເຊິ່ງເປັນຄວາມທ້າທາຍໃຫຍ່. ຄຽງຄູ່ກັນນັ້ນ, ການຜັນແຍກຄົນຮັ່ງມີ - ທຸກຍາກນັບມື້ນັບເພີ່ມຂຶ້ນ ໂດຍມີສັນຍານທີ່ຈະແຈ້ງຂຶ້ນຂອງການແບ່ງຊັ້ນທາງສັງຄົມ, ເຮັດໃຫ້ຜົນປະໂຫຍດທີ່ແທດຈິງຂອງປະຊາຊົນບໍ່ໄດ້ຮັບການຮັບປະກັນຢ່າງຄົບຖ້ວນ, ກໍ່ໃຫ້ເກີດຄວາມຫຍຸ້ງຍາກໃນການພົວພັນຊຸມຊົນ, ເພີ່ມຄວາມສ່ຽງຂອງຄວາມບໍ່ໝັ້ນຄົງທາງສັງຄົມແລະການເມືອງ, ທຳລາຍຄວາມເຊື່ອມໂຍງແລະຄວາມຜູກພັນລະຫວ່າງຊົນຊັ້ນ, ພາກສ່ວນ ແລະກຳລັງໃນສັງຄົມ. ຜົນກະທົບບໍ່ດີຈາກດ້ານລົບຂອງເສດຖະກິດຕະຫຼາດ, ເຊັ່ນ: ລັດທິປະຕິບັດນິຍົມ, ຄວາມເຫັນແກ່ຕົວ, ການຖືຜົນປະໂຫຍດທາງເສດຖະກິດເປັນອັນດັບໜຶ່ງ,... ເຮັດໃຫ້ຄຸນຄ່າທາງສັງຄົມຫຼາຍຢ່າງຖືກປີ້ນກັບກັນ, ນໍາໄປສູ່ການເບິ່ງເບົາລັກສະນະຊຸມຊົນ, ກຸ່ມເອກະພາບແຫ່ງຊາດຂາດຄວາມສາມັກຄີ; ດັ່ງນັ້ນ, ຮຽກຮ້ອງໃຫ້ພັກ ລັດ, ບັນດາຂັ້ນ ຂະແໜງການ, ແຕ່ລະອົງການ ໜ່ວຍງານ ຕ້ອງມີແຜນນະໂຍບາຍ, ນະໂຍບາຍ ແລະວີທິການແກ້ໄຂ ເພື່ອຮັບປະກັນຜົນປະໂຫຍດທີ່ຊອບທຳຖືກກົດໝາຍ ຂອງປະຊາຊົນທຸກຊົນຊັ້ນ ທັງດ້ານວັດຖຸແລະຈິດໃຈ. ຍົກສູງຈິດໃຈແລະຄວາມຮັບຜິດຊອບຂອງແຕ່ລະຄົນ ເພື່ອພາລະກິດສ່ວນລວມ, ເພື່ອເປົ້າໝາຍແລະອຸດົມຄະຕິເອກະລາດແຫ່ງຊາດ ແລະລັດທິສັງຄົມນິຍົມ, ໂດຍໃຫ້ຄວາມສຳຄັນກັບຜົນປະໂຫຍດສ່ວນລວມ ແລະຜົນປະໂຫຍດຂອງຊາດ-ປະເທດຊາດເປັນອັນດັບໜຶ່ງ. ສືບຕໍ່ປະຕິບັດເປັນຢ່າງດີ ແຜນນະໂຍບາຍທີ່ວ່າ ແຕ່ລະຂັ້ນຕອນຂອງການເຕີບໂຕທາງເສດຖະກິດ ຈະຕ້ອງຕິດກັບການຮັບປະກັນຄວາມກ້າວໜ້າ ແລະຄວາມຍຸຕິທຳທາງສັງຄົມໃຫ້ດີຂຶ້ນ; ຍູ້ແຮງແຜນນະໂຍບາຍ ແລະນະໂຍບາຍລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ຮັບປະກັນຄວາມປອດໄພທາງສັງຄົມ, ວັດທະນະທຳ, ການສຶກສາ, ການຝຶກອົບຮົມ, ສາທາລະນະສຸກ,... ປັບປຸງຍົກສູງຊີວິດດ້ານວັດຖຸແລະຈິດໃຈຂອງປະຊາຊົນ, ເພື່ອຈຳກັດການເພີ່ມຂຶ້ນຂອງຊ່ອງຫວ່າງລະຫວ່າງຄົນຮັ່ງມີ ແລະ ຄົນທຸກໃຫ້ໜ້ອຍທີ່ສຸດລະຫວ່າງພາກສ່ວນແລະຊົນຊັ້ນສັງຄົມ, ຮັບປະກັນຄວາມຍຸຕິທຳ ແລະ ຄວາມສະເໝີພາບໃນສັງຄົມ.
ທີສາມ, ເສີມຂະຫຍາຍບົດບາດຂອງປະຊາທິປະໄຕສັງຄົມນິຍົມ, ປະຕິບັດສິດເປັນເຈົ້າຂອງຂອງປະຊາຊົນຢ່າງດີ ແລະ ເພີ່ມທະວີການການປະຕິບັດລະບອບປະຊາທິປະໄຕທາງກົງຂອງປະຊາຊົນ.
ພັກແລະລັດສືບຕໍ່ຜັນຂະຫຍາຍສະຖາບັນປະຊາທິປະໄຕໃຫ້ເປັນຮູບປະທຳແລະສົມບູນແບບ, ຮັບປະກັນວ່າ ອຳນາດລັດທັງໝົດເປັນຂອງປະຊາຊົນ, ພົນລະເມືອງທຸກຄົນສາມາດສະແດງເຈດຈຳນົງ ແລະຄວາມປາດຖະໜາຂອງຕົນໄດ້ໂດຍກົງແລະສະເໝີພາບ, ມີສ່ວນຮ່ວມໂດຍກົງ ຕັ້ງໜ້າ ແລະ ເປັນເຈົ້າການ ເຂົ້າໃນກິດຈະການຂອງລັດໃນທຸກຂົງເຂດ ເສດຖະກິດ ການເມືອງ ວັດທະນະທຳ ສັງຄົມ ການປ້ອງກັນປະເທດ ປ້ອງກັນຄວາມໝັ້ນຄົງ ການຕ່າງປະເທດ ແລະອື່ນໆ. ເສີມຂະຫຍາຍບົດບາດອັນຕັ້ງໜ້າຂອງປະຊາຊົນໃນການເຂົ້າຮ່ວມການກໍ່ສ້າງແລະປັບປຸງພັກ, ກໍ່ສ້າງລັດແຫ່ງອຳນາດກົດໝາຍສັງຄົມນິຍົມ, ແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ, ສ້າງຖັນແຖວສະມາຊິກພັກ, ພະນັກງານ, ລັດຖະກອນ ໃຫ້ນັບມື້ນັບເຂັ້ມແຂງ,... ໃນແຕ່ລະການເຄື່ອນໄຫວແລະຂົງເຂດຕ່າງໆ ໃຫ້ປະຕິບັດຄຳຂວັນ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້” ໃຫ້ດີ. ການປະຕິບັດລະບອບປະຊາທິປະໄຕໄປຄວບຄູ່ກັບການຮັກສາຄວາມສະຫງົບຮຽບຮ້ອຍແລະລະບຽບວິໄນ; ຈັດການຢ່າງທັນການແລະເຂັ້ມງວດ ຕໍ່ອົງການແລະບຸກຄົນທີ່ສວຍໃຊ້ບັນຫາ “ປະຊາທິປະໄຕ”, “ສິດທິມະນຸດ” ເພື່ອກໍ່ໃຫ້ເກີດຄວາມວຸ່ນວາຍພາຍໃນ, ທຳລາຍສະຖຽນລະພາບທາງການເມືອງ-ສັງຄົມ, ຫຼືລະເມີດປະຊາທິປະໄຕ, ກໍ່ໃຫ້ເກີດອັນຕະລາຍຕໍ່ປະຊາທິປະໄຕຂອງປະຊາຊົນ.
ທີສາມ, ຍົກສູງຖານະບົດບາດແລະຕຳແໜ່ງຂອງແນວໂຮມປະເທດຊາດຫວຽດນາມ ແລະ ປະສິດທິຜົນຂອງຂະບວນການແຂ່ງຂັນກັນຮັກຊາດ.
ລັດຕ້ອງສືບຕໍ່ປັບປຸງກົດລະບຽບທາງກົດໝາຍກ່ຽວກັບການຈັດຕັ້ງແລະການເຄື່ອນໄຫວຂອງສະມາຄົມໃຫ້ສົມບູນແບບ ເພື່ອຮັບປະກັນໃຫ້ສະມາຄົມດຳເນີນງານຕາມຈຸດປະສົງແລະຄະຕິທຳຕາມກົດໝາຍ, ໂດຍສະເພາະ ການເຄື່ອນໄຫວຊ່ວຍເຫຼືອເຊິ່ງກັນແລະກັນໃນຊີວິດ, ການປົກປ້ອງສິດແລະຜົນປະໂຫຍດທີ່ຖືກກົດໝາຍຂອງສະມາຄົມ ແລະສະມາຊິກ; ເຂົ້າຮ່ວມການສ້າງສາ ແລະປົກປັກຮັກສາປະເທດຊາດ. ພ້ອມກັນນັ້ນ, ຕ້ອງສືບຕໍ່ປ່ຽນແປງໃໝ່, ປັບປຸງຍົກສູງບົດບາດທີ່ຕັ້ງ ຕຳແໜ່ງ ແລະ ຄຸນນະພາບການເຄື່ອນໄຫວຂອງແນວໂຮມປະເທດຊາດຫວຽດນາມ, ຮັບປະກັນປະຕິບັດໜ້າທີ່ແລະພາລະກິດຂອງຕົນໄດ້ດີ ໃນຖານະສູນກາງການເຕົ້າໂຮມ ລວບລວມ ແລະ ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ. ສົ່ງເສີມການເຄື່ອນໄຫວຫຼາຍຂຶ້ນມຸ່ງສູ່ຮາກຖານ, ເຖິງແຕ່ລະຄົວເຮືອນ, ໂດຍສະເພາະແມ່ນຢູ່ເຂດຫ່າງໄກສອກຫຼີກ, ເຂດມີຄວາມຫຍຸ້ງຍາກທີ່ສຸດ; ເອົາໃຈໃສ່ສົ່ງເສີມແລະຊີ້ນຳຜູ້ມີຊື່ສຽງໃນຊຸມຊົນ ໃຫ້ປະກອບສ່ວນເຂົ້າໃນການເຄື່ອນໄຫວລວມ; ເສີມຂະຫຍາຍຈຸດດີຂອງຮູບແບບຊຸມຊົນດັ້ງເດີມເຊັ່ນ: ບ້ານ, ໝູ່ບ້ານ, ຕະກູນ, ຄອບຄົວ; ແກ້ໄຂປະກົດການພາກສ່ວນນິຍົມ ແລະຂໍ້ຜິດເຂວຕ່າງໆຢ່າງທັນທ່ວງທີ່. ພ້ອມກັນນັ້ນ, ມີກົນໄກແລະນະໂຍບາຍທີ່ເໝາະສົມ ໃຫ້ອົງການປະຊາຊົນສະທ້ອນຄວາມຄິດເຫັນ ແລະຄວາມມຸ່ງມາດປາດຖະໜາ ຂອງທຸກຊັ້ນຄົນຢ່າງກົງໄປກົງມາ; ເຂົ້າຮ່ວມການກໍ່ສ້າງແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດຢ່າງຕັ້ງໜ້າ; ເພີ່ມທະວີບົດບາດຕິດຕາມກວດກາການເຄື່ອນໄຫວຂອງອົງການລັດ, ການປະຕິບັດຄວາມຮັບຜິດຊອບ ໜ້າທີ່ ແລະ ການຝຶກຝົນຫຼໍ່ຫຼອມ ຂອງຜູ້ແທນທີ່ໄດ້ຮັບການເລືອກ, ຂອງພະນັກງານ ສະມາຊິກພັກ ແລະລັດຖະກອນ, ປະກອບສ່ວນກໍ່ສ້າງແລະປົກປັກຮັກສາກອົງການຈັດຕັ້ງພັກ ແລະອຳນາດການປົກຄອງ ໃຫ້ມີຄວາມສະອາດປອດໃສ ແລະໝັ້ນຄົງເຂັ້ມແຂງ. ສືບຕໍ່ປ່ຽນແປງໃໝ່ ແລະ ປັບປຸງຍົກສູງປະສິດທິພາບ ຂອງຂະບວນການແຂ່ງຂັນກັນຮັກຊາດ ແລະຂະບວນການຂົນຂວາຍປະຊາຊົນ, ຮັບປະກັນຄວາມແທດຈິງ, ໃກ້ຊິດກັບຈຸດພິເສດ ຄວາມຕ້ອງການ ແລະໜ້າທີ່ຂອງແຕ່ລະຂັ້ນ ຂະແໜງການ ແລະຄວາມຕ້ອງການຂອງປະຊາຊົນ; ຜ່ານນັ້ນ, ສ້າງການເຄື່ອນໄຫວປະຕິວັດທີ່ເລິກເຊິ່ງ ແລະ ອຸດົມສົມບູນ ເພື່ອດຶງດູດການເຂົ້າຮ່ວມຂອງປະຊາຊົນທຸກຊັ້ນວັນນະເປັນຈຳນວນຫຼວງຫຼາຍ.
ທີຫ້າ, ເພີ່ມທະວີການກໍ່ສ້າງແລະປັບປຸງພັກ ແລະລະບົບການເມືອງໃຫ້ສະອາດປອດໃສ ແລະໝັ້ນຄົງເຂັ້ມແຂງ.
ບັນດາອົງການຈັດຕັ້ງພັກ, ຖັນແຖວພະນັກງານ ສະມາຊິກພັກ, ໂດຍສະເພາະ ໃນລະດັບຮາກຖານ, ຈະຕ້ອງໃກ້ຊິດກັບປະຊາຊົນ, ເຂົ້າໃຈແຈ້ງເຖິງແນວຄິດຈິດໃຈແລະຄວາມປາດຖະໜາອັນຊອບທຳ ຖືກກົດໝາຍຂອງປະຊາຊົນ; ສືບຕໍ່ຊາບຊຶມແລະປະຕິບັດຕາມມະຕິແລະກົດລະບຽບກ່ຽວກັບການກໍ່ສ້າງແລະປັບປຸງພັກ ແລະລະບົບການເມືອງທີ່ສະອາດປອດໃສແລະໝັ້ນຄົງເຂັ້ມແຂງຢ່າງເຄັ່ງຄັດ; ຍູ້ແຮງການຮ່ຳຮຽນແລະປະຕິບັດຕາມແນວຄິດ, ຄຸນສົມບັດສິນທຳ ແລະແບບແຜນໂຮ່ຈີມິນ; ພ້ອມກັນນັ້ນ, ຕໍ່ສູ້ຢ່າງເດັດດ່ຽວກັບການສໍ້ລາດບັງຫຼວງ, ຄວາມຫຍໍ້ທໍ້, ການໃຊ້ຈ່າຍຟຸມເຟືອຍ, ປະກົດການຂອງຄວາມເສື່ອມໂຊມທາງດ້ານແນວຄິດການເມືອງ ຄຸນສົມບັດສິນທຳ ວິຖີຊີວິດ, “ການຜັນປ່ຽນຕົນເອງ”, “ການປ່ຽນແປງຕົນເອງ”,...
ເອົາໃຈໃສ່ເພີ່ມທະວີການກໍ່ສ້າງລະບົບການເມືອງໃຫ້ສະອາດປອດໃສແລະໝັ້ນຄົງເຂັ້ມແຂງ, ຖືເອົາວຽກງານຮັບໃຊ້ປະຊາຊົນເປັນອັນດັບໜຶ່ງ, ແກ້ໄຂວຽກງານທີ່ກ່ຽວຂ້ອງໂດຍກົງກັບຊີວິດການເປັນຢູ່ຂອງປະຊາຊົນຢ່າງຖືກຕ້ອງແລະໄວວາ. ສຶກສາອົບຮົມໃຫ້ພະນັກງານ ສະມາຊິກພັກ ແລະລັດຖະກອນ ກ່ຽນກັບການສ້າງແລະປະຕິບັດຕາມແບບ “ເຄົາລົບປະຊາຊົນ, ໃກ້ຊິດປະຊາຊົນ, ເຂົ້າໃຈປະຊາຊົນ, ຮຽນຮູ້ຈາກປະຊາຊົນ ແລະ ຮັບຜິດຊອບຕໍ່ປະຊາຊົນ”, “ຮັບຟັງປະຊາຊົນ, ເວົ້າໃຫ້ປະຊາຊົນເຂົ້າໃຈ, ເຮັດໃຫ້ປະຊາຊົນເຊື່ອ”; ມີທັດສະນະຄະຕິທີ່ຈິງໃຈ, ເຄົາລົບປະຊາຊົນ, ຊີ້ນໍາແລະຊ່ວຍເຫຼືອປະຊາຊົນ; ປະຕິບັດວິທີການປະຊາທິປະໄຕໃນການນໍາພາ, ການຄຸ້ມຄອງແລະບໍລິຫານ, ເດັດດ່ຽວແກ້ໄຂຜ່ານຜ່າວິທີເຮັດວຽກແບບຄໍາສັ່ງ, ບໍລິຫານງ່າຍດາຍ.
ທີຫົກ, ຕໍ່ສູ້ຢ່າງເດັດດ່ຽວ ເພື່ອເອົາຊະນະທຸກແຜນການ ກົນອຸບາຍ ແລະການເຄື່ອນໄຫວຂອງບັນດາອິດທິກຳລັງສັດຕູ ທີ່ທຳລາຍກຸ່ມກ້ອນມະຫາສາມັກຄີປວງຊົນທັງຊາດ.
ປະຈຸບັນ, ບັນດາອິດທິກຳລັງສັດຕູພວມໃຊ້ປະໂຫຍດຢ່າງສຸດຂີດຈາກບັນຫາ “ເສລີພາບທາງຄວາມຄິດ”, “ປະຊາທິປະໄຕ”, “ສິດທິມະນຸດ”, “ຊາດ”, “ສາສະໜາ”; ຂໍ້ຈຳກັດ ແລະ ຂໍ້ບົກຜ່ອງຂອງພະນັກງານ ແລະສະມາຊິກພັກຈຳນວນໜຶ່ງ ເພື່ອບິດເບືອນແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ, ເວົ້າຄຳດູໝິ່ນຜູ້ນຳ; ຊັກຊວນໃຫ້ປະຊາຊົນເຕົ້າໂຮມກັນເປັນຈຳນວນຫຼາຍເພື່ອປະທ້ອງ, ຮ້ອງຮຽນ, ຄັດຄ້ານຕ້ານລັດຖະບານ,... ເພື່ອເຮັດໃຫ້ເກີດຄວາມບໍ່ໝັ້ນຄົງທາງການເມືອງ, ເຮັດໃຫ້ເກີດການຄັດຄ້ານ ແລະ ແບ່ງແຍກສາຍພົວພັນອັນສະໜິດສະໜົມລະຫວ່າງປະຊາຊົນກັບພັກ ແລະ ລະຫວ່າງຊົນເຜົ່າສ່ວນຫຼາຍກັບບັນດາຊົນເຜົ່າສ່ວນໜ້ອຍ, ລະຫວ່າງຜູ້ຄົນຂອງສາສະໜາທີ່ແຕກຕ່າງກັນ. ດັ່ງນັ້ນ, ຄະນະພັກ, ອົງການຈັດຕັ້ງພັກ, ສຳນັກງານ ອົງການຕ່າງໆ ຕ້ອງມີຄວາມຮັບຮູ້ຢ່າງເລິກເຊິ່ງກ່ຽວກັບໜ້າທີ່ຕໍ່ສູ້ປ້ອງກັນແລະຕ້ານ “ການຫັນປ່ຽນໂດຍສັນຕິ”, ແຜນການແລະກົນອຸບາຍຂອງກອງກຳລັງສັດຕູທີ່ຫວັງທຳລາຍກຸ່ມກ້ອນມະຫາສາມັກຄີປວງຊົນທັງຊາດ. ນີ້ແມ່ນໜ້າທີ່ອັນຮີບດ່ວນແລະເປັນປະຈຳຂອງທົ່ວພັກ, ທົ່ວປວງຊົນ ແລະຂອງກອງທັບເຮົາທັງໝົດ. ໃນຂະບວນການຈັດຕັ້ງປະຕິບັດໜ້າທີ່ນີ້, ຈຳເປັນຕ້ອງເຂົ້າໃຈທັດສະນະຊີ້ນຳຂອງພັກຢ່າງໜັກແໜ້ນ ແລະປະຕິບັດທິດນຳຕໍ່ໄປນີ້ໃຫ້ດີຄື: ເປັນເຈົ້າການ, ສະຫຼາດຄ່ອງແຄ່ວ ແລະເດັດດ່ຽວ; ປະສົມປະສານລະຫວ່າງ “ການສ້າງ” ແລະ “ການຕ້ານ” ໂດຍຖືເອົາ “ການສ້າງ” ເປັນຫຼັກ, “ການຕ້ານ” ເປັນປະຈຳສະໝ່ຳສະເໝີ. ກ່ອນອື່ນໝົດ, ຕ້ອງເສີມຂະຫຍາຍບົດບາດຂອງຖັນແຖວພະນັກງານ ສະມາຊິກພັກ, ອົງການຖະແຫຼງຂ່າວ ແລະສື່ມວນຊົນ ເພື່ອສຸມໃສ່ຕໍ່ສູ້ປະຕິເສດຖ້ອຍທຳນອງທີ່ຜິດພາດຂອງບັນດາອິດທິກຳລັງສັດຕູ, ເຜີຍແບຄວາມເຫັນທີ່ຜິດພາດ, ປົກປ້ອງເຮັດໃຫ້ພື້ນຖານແນວຄິດຂອງພັກເຂັ້ມແຂງຂຶ້ນໃນແຕ່ລະອົງການແລະໜ່ວຍງານ. ຄະນະພັກ, ອຳນາດການປົກຄອງ, ບັນດາອົງການຈັດຕັ້ງ ແລະກອງກຳລັງ, ໂດຍສະເພາະ ກອງກຳລັງປະກອບອາວຸດ ຕ້ອງກຳແໜ້ນຈຸດພິເສດຂອງສະຖານະການໃນແຕ່ລະພື້ນທີ່ ໂດຍເນັ້ນໄປທີ່ພື້ນທີ່ຍຸດທະສາດ, ເຂດຫ່າງໄກສອກຫຼີກ ແລະ ເຂດຊົນເຜົ່າສ່ວນໜ້ອຍ, ເພື່ອກວດພົບ ແລະ ຕໍ່ສູ້ກັບກົນອຸບາຍ ແລະ ການເຄື່ອນໄຫວກໍ່ການຮ້າຍຂອງກຳລັງສັດຕູທັນທີ; ຈັດການກັບສະຖານະການຢ່າງເດັດດ່ຽວແລະສະຫຼາດ ໂດຍບໍ່ປ່ອຍໃຫ້ “ຈຸດຮ້ອນ” ເກີດຂຶ້ນເປັນເວລາດົນນານ. ພ້ອມກັນນັ້ນ, ເສີມຂະຫຍາຍກຳລັງແຮງສັງລວມຂອງກຸ່ມກ້ອນມະຫາສາມັກຄີປວງຊົນທັງຊາດ ແລະຂອງລະບົບການເມືອງ, ຍູ້ແຮງການກໍ່ສ້າງຄວາມສາມາດບົ່ມຊ້ອນຂອງຊາດ, ປະຕິບັດນະໂຍບາຍຊົນເຜົ່າ, ສາສະໜາຂອງພັກ ແລະລັດຫວຽດນາມຢ່າງດີ, ຍາດແຍ່ງເອົາການສະໜັບສະໜູນຂອງເພື່ອນມິດສາກົນ,... ເພື່ອເອົາຊະນະທຸກແຜນການແລະກົນອຸບາຍທຳລາຍຂອງບັນດາອິດທິກຳລັງສັດຕູ, ປະຕິການ ແລະພວກສວຍໂອກາດທາງການເມືອງ./.
--------------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 10, ໜ້າ 453
(2), (3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 335, 179
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 103-104
(5) ເບິ່ງ: ຫວູຈ້ອງເລິມ: “ແນວຄິດທີ່ສອດຄ່ອງແລະບໍ່ປ່ຽນແປງ ກ່ຽວກັບແນວທາງການຕ່າງປະເທດ ແລະການທູດຫວຽດນາມ”, ວາລະສານແນວໂຮມເອເລັກໂຕຣນິກ, ອອກວັນທີ 22 ພະຈິກ 2023, https://tapchimattran.vn/thuc-tien/tu-tuong-nhat-quan-xuyen-suot-ve-duong-loi-doi-ngoai-ngoai-giao-viet-nam-55585.html; ວັນທີ 27 ພະຈິກ 2023, ຫວຽດນາມແລະຍີ່ປຸ່ນໄດ້ສ້າງຕັ້ງການພົວພັນຄູ່ຮ່ວມຍຸດທະສາດຮອບດ້ານ ເພື່ອສັນຕິພາບ ແລະ ຄວາມຈະເລີນຮຸ່ງເຮືອງຢູ່ອາຊີ ແລະ ໃນໂລກ
(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 112
(7) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 110
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1028 (ເດືອນທັນວາ 2023)
