1- ການ​ປະ​ສົມ​ປະ​ສານ​ເສດ​ຖະ​ກິດ​ກັບ​ການ​ປ້ອງ​ກັນ​ປະ​ເທດ ຄວາມໝັ້ນຄົງ  ແລະ ການ​ຕ່າງ​ປະ​ເທດ ແມ່ນແຜນນະໂຍບາຍຍຸດທະສາດທີ່ສຳຄັນ ເຊິ່ງສະແດງອອກມາຢ່າງຕໍ່ເນື່ອງແລະຕະຫຼອດ ໃນບັນດາເອກະສານຂອງພັກກອມມູນິດຫວຽດນາມ ເຊັ່ນ ມະຕິໝາຍເລກ 06-NQ/TW ລົງວັນທີ 5 ພະຈິກ 2016 ຂອງກອງປະຊຸມສູນກາງພັກຄັ້ງທີ 4 ສະໄໝທີ XII, “ກ່ຽວກັບການປະຕິບັດຂະບວນການເຊື່ອມໂຍງເສດຖະກິດສາກົນຢ່າງມີປະສິດທິຜົນ, ຮັກສາຄວາມໝັ້ນຄົງທາງການເມືອງ ແລະສັງຄົມ ໃນສະພາບການທີ່ປະເທດເຮົາເຂົ້າຮ່ວມບັນດາສັນຍາການຄ້າເສລີລຸ້ນໃໝ່”; ຄຳສັ່ງໝາຍເລກ 12-CT/TW ລົງວັນທີ 5 ມັງກອນ 2017 ຂອງກົມການເມືອງສູນກາງ ກ່ຽວກັບ “ການເພີ່ມທະວີການນຳພາຂອງພັກຕໍ່ການຮັບປະກັນຄວາມໝັ້ນຄົງທາງເສດຖະກິດ ໃນເງື່ອນໄຂການພັດທະນາເສດຖະກິດຕະຫຼາດຕາມທິດສັງຄົມນິຍົມ ແລະ ການເຊື່ອມໂຍງເຂົ້າກັບສາກົນ”; ມະຕິໝາຍເລກ 51-NQ/TW ລົງວັນທີ 5 ກັນຍາ 2019 ຂອງກົມການເມືອງສູນກາງ ກ່ຽວກັບ “ຍຸດທະສາດໃນການປົກປ້ອງຄວາມໝັ້ນຄົງຂອງຊາດ”; ຄຳສັ່ງໝາຍເລກ 24-CT/TW ລົງວັນທີ 5 ມັງກອນ 2017 ຂອງກົມການເມືອງສູນກາງ “ກ່ຽວກັບການຮັບປະກັນຄວາມໝັ້ນຄົງຂອງຊາດຢ່າງໝັ້ນຄົງ ໃນສະພາບການເຊື່ອມໂຍງສາກົນຢ່າງຮອບດ້ານ ແລະກວ້າງຂວາງເລິກເຊິ່ງ”.

ການປະຕິບັດທັດສະນະຂອງພັກຢ່າງເຂັ້ມງວດ ກ່ຽວກັບການປົກປ້ອງຄວາມໝັ້ນຄົງທາງເສດຖະກິດ, ການ​ຄຸ້ມ​ຄອງ​ຄວາມ​ປອດ​ໄພ ​ແລະຄວາມ​ເປັນ​ລະບຽບ​ຮຽບຮ້ອຍໃນ​ດ້ານ​ເສດຖະກິດ ​ສຸມ​ໃສ່ການ​ຊີ້​ນຳ​ນຳພາ ​ແລະ ບັນລຸ​ໝາກຜົນ​ສຳຄັນ​ຫຼາຍ​ຢ່າງ. ກອງກຳລັງຕຳຫຼວດສຸມໃສ່ການເກັບກຳສະພາບການໂລກແລະພາກພື້ນ, ຄວາມຜັນຜວນຂອງເສດຖະກິດໂລກ ທີ່ສົ່ງຜົນກະທົບຕໍ່ຫວຽດນາມ, ປະສົບການ ແລະນະໂຍບາຍຂອງປະເທດອື່ນໆ, ຄວາມສາມາດບົ່ມຊ້ອນຂອງນັກລົງທຶນຕ່າງປະເທດທີ່ເຂົ້າມາລົງທຶນຢູ່ຫວຽດນາມ, ໃຫ້ຄຳແນະນຳແກ່ພັກແລະລັດໂດຍທັນທີ ແລະ ແລກປ່ຽນກັບບັນດາກະຊວງ ຂະແໜງການທີ່ກ່ຽວຂ້ອງ ໃນໄລຍະການເຈລະຈາ ລົງນາມ ແລະຈັດຕັ້ງປະຕິບັດ ສັນຍາການຄ້າເສລີລຸ້ນໃໝ່, ຜັນຂຫຍາຍບັນດານະໂຍບາຍພັດທະນາເສດຖະກິດ-ສັງຄົມ, ຮັບປະກັນຄວາມປອດໄພທາງສັງຄົມ, ປະກອບສ່ວນພັດທະນາເສດຖະກິດ-ສັງຄົມຢ່າງມີປະສິດທິພາບ, ໂດຍສະເພາະແມ່ນ ປະຕິບັດເປົ້າໝາຍສອງປະການ ໃນຂະບວນການປ້ອງກັນແລະຕໍ່ສູ້ກັບການແຜ່ລະບາດຂອງພະຍາດໂຄວິດ-19 ແລະການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດ.

ພັດທະນາ ​ແລະ ​ຈັດ​ຕັ້ງ​ປະຕິບັດ​ແຜນການ​ແລະ​ແຜນງານຕ່າງໆ; ຈັດວາງສັບຊ້ອນແລະລະບຸກອງກຳລັງ, ມາດຕະການ, ວິທີການ ແລະ ປະສົມປະສານກອງກຳລັງປ້ອງກັນຄວາມໝັ້ນຄົງ ແລະຄວາມເປັນລະບຽບຮຽບຮ້ອຍ, ຮັບປະກັນຄວາມໝັ້ນຄົງປອດໄພຂອງລະບົບຂໍ້ມູນຂ່າວສານທີ່ສຳຄັນ ເພື່ອຄວາມໝັ້ນຄົງແຫ່ງຊາດ ໃນບັນດາຂົງເຂດ ແລະສະຖານທີ່ທາງເສດຖະກິດ, ພິເສດແມ່ນ ບັນດາຂົງເຂດເສດຖະກິດທີ່ສຳຄັນ ແລະ ບັນດາໂຄງການປ້ອງກັນຄວາມສະຫງົບແຫ່ງຊາດທີ່ສຳຄັນ. ຕັ້ງໜ້າໃຫ້ຄຳແນະນຳ ແລະ ເຂົ້າຮ່ວມຢ່າງມີຄວາມຮັບຜິດຊອບ ແລະ ມີປະສິດທິຜົນ ໃນການພັດທະນາ ປັບປຸງແກ້ໄຂ ແລະ ເພີ່ມເຕີມລະບຽບກົດໝາຍ ເພື່ອແກ້ໄຂຂໍ້ບົກຜ່ອງທີ່ຄົ້ນພົບຜ່ານການຈັດຕັ້ງປະຕິບັດບັນດາແຜນການແລະແຜນງານ ເຊິ່ງອາຊະຍາກຳທຸກປະເພດສາມາດໃຊ້ປະໂຫຍດຈາກການລະເມີດຄວາມປອດໄພ ແລະຄວາມເປັນລະບຽບຮຽບຮ້ອຍໃນດ້ານເສດຖະກິດ. ​ໃນ​ເວລາກວ່າ 5 ປີ​ແຫ່ງ​ການ​ປະຕິບັດ​ຄຳ​ສັ່ງ​ໝາຍເລກ 12-CT/TW ຂອງກົມ​ການ​ເມືອງສູນກາງ, ກອງກຳລັງ​ຕຳຫຼວດ​ໄດ້​ປົກປ້ອງ​ຄວາມໝັ້ນຄົງ ແລະຄວາມປອດ​ໄພ​ຂອງກິດຈະກຳ ກອງ​ປະຊຸມ ​ແລະ​ເວທີ​ປາ​ໄສ​ທີ່​ສຳຄັນ ກວ່າ 860 ລາຍການໃນຫວຽດນາມ, ປົກ​ປັກ​ຮັກ​ສາ​ຄະ​ນະ​ຜູ້​ແທນ​ສາ​ກົນ ແລະ ຜູ້​ນຳອະວຸໂສ​ຕ່າງ​ປະ​ເທດຫຼາຍກວ່າ 300 ​ຄົນທີ່ເດີນທາງ​ມາ​ຫວຽດ​ນາມ ເພື່ອ​ເຂົ້າ​ຮ່ວມ​ກິດຈະກຳການ​ຮ່ວມ​ມື​ສາ​ກົນ.

ກອງກຳລັງຕຳຫຼວດໄດ້ກວດຈັບ ສະກັດກັ້ນ ແລະ ແກ້ໄຂຢ່າງທັນການ ບັນດາບັນຫາຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍທີ່ສັບສົນ ທີ່ເກີດຂຶ້ນໃນໄລຍະການປະຕິບັດໜ້າທີ່ການພັດທະນາເສດຖະກິດ-ສັງຄົມ. ໃນນັ້ນ, ໃຫ້ຄຳແນະນຳໃນການແກ້ໄຂບັນຫາການຢຸດງານ ແລະການປະທ້ວງຂອງກຳມະກອນ, ຂໍ້ຂັດແຍ່ງແລະຄຳຮ້ອງທຸກ ທີ່ກ່ຽວຂ້ອງກັບການເກັບກູ້ສະຖານທີ່; ຕໍ່ສູ້​ແລະ​ຈັດການກັບ​ກຸ່ມ​ຫົວ​ຮຸນ​ແຮງ​ທີ່​ສວຍ​ໃຊ້​ການ​ຮ້ອງ​ຮຽນ, ການຢຸດງານ ແລະການປະທ້ວງ ເພື່ອ​ດຳເນີນການ​ເຄື່ອນ​ໄຫວຕໍ່ຕ້ານ​ລັດຖະບານ ເຊິ່ງປະກອບສ່ວນປັບປຸງ ​ແລະສ້າງ​ຄວາມ​ໄວ້ວາງໃຈ​ຂອງ​ປະຊາຊົນ​ ຕໍ່ອົງການພັກ ​ແລະອຳນາດການປົກຄອງຮາກຖານ.

ການຕໍ່ສູ້ກັບການສໍ້ລາດບັງຫຼວງ, ອາຊະຍາກຳທາງເສດຖະກິດ, ການລັກລອບຂົນສິນຄ້າ ແລະ ອາຊະຍາກໍາດ້ານເຕັກໂນໂລຢີສູງ ໄດ້ຮັບການສຸມໃສ່ປະຕິບັດ. ດ້ວຍ​ເຫດ​ນີ້, ຈຶງສາສາດ​ກວດຈັບ ສືບສວນ ​ແລະ ​ເປີດ​ເຜີຍ​ຄະດີ​ເສດຖະກິດ ​ແລະການ​ສໍ້​ລາດ​ບັງ​ຫຼວງທີ່ສຳຄັນ​ຫຼາຍຄະດີ ໃນຫຼາຍ​ຂົງ​ເຂດ​ເສດຖະກິດທີ່​ສຳຄັນໂດຍທັນທີ ດ້ວຍ​ຈິດ​ໃຈ “ບໍ່​ມີ​ເຂດ​ຕ້ອງ​ຫ້າມ” ແລະ “ບໍ່​ມີ​ຂໍ້​ຍົກ​ເວັ້ນ”; ລະບຸແລະກຳນົດຂັ້ນຕອນ ແລະຕ່ອງໄສ້ສຳຄັນ ເພື່ອບຸກທະລຸເຂົ້າໃນຂົງເຂດທີ່ອາດຈະເກີດການລະເມີດຫຼາຍປະການ; ສືບສວນແລະທຳລາຍລ້າງຫຼາຍກຸ່ມອາດຊະຍາກຳທາງເສດຖະກິດ, ການສໍ້ລາດບັງຫຼວງ, ການລັກລອບຂົນສິນຄ້າຂະໜາດໃຫຍ່ ຢ່າງຖືກຕ້ອງຕາມຈິດໃຈທີ່ວ່າ “ຈັດການແກ້ໄຂຄະດີດຽວ, ແຈ້ງເຕືອນທົ່ວທັງພາກພື້ນແລະຂົງເຂດ”. ໄດ້ດຳເນີນຂະບວນການໂຈມຕີຂັ້ນສູງຢ່າງຕໍ່ເນື່ອງເພື່ອປາບປາມອາຊະຍາກຳທາງອາຍາ, ອາຊະຍາກຳທາງເສດຖະກິດ ແລະ ຕໍ່ສູ້ກັບການລັກລອບຂົນສິນຄ້າ ການສໍ້ໂກງທາງການຄ້າ ແລະສິນຄ້າປອມ ຢ່າງເດັດດ່ຽວ; ໄດ້ປາບປາມແລະຊີ້ແຈງແຜນການແລະກົນອຸບາຍໃໝ່ຂອງການສໍ້ໂກງ, ການຍຶດຄອງຊັບສິນ, ການພະນັນ, ການຕະຫຼາດຫຼາຍລະດັບ ແລະການສໍ້ໂກງທາງໄຊເບີຣ໌; ໄດ້ລົບລ້າງຫຼາຍແກ໊ງ ແລະ ກຸ່ມອາຊະຍາກໍາທີ່ “ເຊື່ອງຊ້ອນຢູ່ໃນເງົາຂອງທຸລະກິດ”, ປະກອບສ່ວນສ້າງສະພາບແວດລ້ອມທີ່ສະຫງົບ ປອດໄພ ແລະດີຕໍ່ການເຄື່ອນໄຫວຜະລິດແລະທຸລະກິດ. ໃນ 5 ປີທີ່ຜ່ານມາ, ໄດ້ຄົ້ນພົບຄະດີລະເມີດກົດໝາຍໃໝ່ກວ່າ 77.000 ຄະດີ ແລະຄະດີສໍ້ລາດບັງຫຼວງກວ່າ 1.700 ຄະດີ; ດຳເນີນຄະດີໃໝ່ 17.294 ຄະດີ /ຈຳເລີຍ 22.012 ຄົນ (ຈຳນວນຄະດີເພີ່ມຂຶ້ນ 187% ແລະຈຳນວນຈຳເລີຍເພີ່ມຂຶ້ນ 149% ເມື່ອທຽບກັບ 5 ປີທີ່ແລ້ວ), ທ່າ​ອ່ຽງການ​ກວດ​ພົບ ​ແລະ​ການ​ທຳລາຍ ​ໃນ​ປີໜ້າ​ແມ່ນ​ສູງ​ກວ່າ​ປີ​ກາຍ. ດຳເນີນ​ການ​ສືບສວນ ​ແລະການຈັກການຄະດີ​ສໍ້​ລາດ​ບັງ​ຫຼວງ, ຄະດີເສດຖະກິດ ແລະການລັກລອບຂົນສິນຄ້າ ​ຢ່າງ​ເຂັ້ມ​ງວດ ເຊິ່ງໄດ້ປະກອບສ່ວນໃນການກ່າວເຕືອນແລະສະກັດ​ກັ້ນ, ​ໄດ້ກວດພົບ​ຊ່ອງ​ຫວ່າງ ​ແລະ ຂໍ້​ບົກ​ຜ່ອງ​ຫຼາຍ​ຢ່າງ ​ໃນ​ນະ​ໂຍບາຍ​ການຄຸ້ມ​ຄອງ​ເສດຖະກິດ​ ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ ຢ່າງທັນການ ພ້ອມ​ທັງ​ໃຫ້ຄຳແນະນຳ ​ແລະສະໜີແນວທາງ​ແກ້​ໄຂຜ່ານຜ່າ, ບໍ່ປ່ອຍໃຫ້​ອາຊະຍາ​ກອນ​ສວຍ​ໂອກາດ​ກໍ່​ອາດຊະຍາ​ກຳ.

ປະຕິບັດ​ວຽກ​ງານ​ຕີ​ລາຄາ​ຄວາມໝັ້ນຄົງຢ່າງມີປະສິດທິຜົນ ສຳລັບ​ແຜນ​ພັດທະນາ​ເສດຖະກິດ-ສັງຄົມ, ​ແຜນການ​ຂະ​ແໜງ​ການ ​ແລະຂົງ​ເຂດ, ​ໂຄງການ​ພັດທະນາ​ເສດຖະກິດ-ສັງຄົມ​ຂະໜາດ​ໃຫຍ່ ຫຼື ​ໃນ​ພື້ນທີ່ລະອຽດອ່ອນດ້ານການ​ປ້ອງ​ກັນປະເທດ​ແລະຄວາມ​ໝັ້ນຄົງ​ ຕາມຂໍ້ກຳນົດຂອງ​ກົດໝາຍ. ຜ່ານ​ວຽກ​ງານການ​ຕໍ່ສູ້ ​ແລະ​ແກ້​ໄຂຈັດການກັບ​ການລະ​ເມີດ​ໃນ​ຂົງ​ເຂດ​ເສດຖະກິດ, ກອງ​ກຳລັງ​ຕຳຫຼວດ​ໄດ້​ດຳ​ເນີນ​ການ​ປຶກ​ສາ​ຫາ​ລື ການໃຫ້ຄຳແນະນຳ ແລະ ການປະສານງານ​ນັບ​ພັນ​ຄັ້ງ ເພື່ອສົມທົບກັບ​ບັນດາ​ອົງການ​ຄຸ້ມ​ຄອງ​ລັດ ໜ່ວຍງານແລະວິສາຫະກິດ ໃນການ​ປະຕິບັດໜ້າທີ່ປົກ​ປັກ​ຮັກສາ​ຄວາມໝັ້ນຄົງ ຄວາມເປັນ​ລະບຽບ​ຮຽບຮ້ອຍ ແລະ ​ຕັ້ງໜ້າເຂົ້າຮ່ວມ​ໃນ​ການ​ກໍ່ສ້າງ ​ແລະປັບປຸງຂະບວນການ​ເຄື່ອນ​ໄຫວ “ປະຊາຊົນທຸກຄົນ​ປົກ​ປັກ​ຮັກສາ​ຄວາມ​ໝັ້ນຄົງຂອງ​ຊາດ”, ກໍ່ສ້າງສຳນັງານ ອົງການ ວິສາຫະກິດທີ່ປອດໄພ. ຊີ້ນຳອົງການແລະວິສາຫະກິດຕ່າງໆຢ່າງສະໝ່ຳສະເໝີ ໃນການປັບປຸງແລະເສີມສ້າງກອງກຳລັງຮັກສາຄວາມປອດໄພຕາມກົດລະບຽບ; ​​ລວບລວມ​ເອກະສານ ​ແລະ ຈັດ​ຕັ້ງ​ຊຸດຮຽນ​ຝຶກ​ອົບ​ຮົມ ໃຫ້ກັບເຈົ້າໜ້າທີ່ຮັກສາຄວາມ​ປອດ​ໄພ​ນັບໝື່ນຄົນ ຂອງສຳນັກງານ ອົງການ ແລະວິສາຫະກິດ. ຜ່ານ​ການ​ຮ່ວມ​ມື​ສາ​ກົນ​ກ່ຽວ​ກັບ​ຄວາມໝັ້ນຄົງ ແລະຄວາມສະຫງົບ​​ຮຽບ​ຮ້ອຍ, ກອງກຳ​ລັງ​ຕຳຫຼວດ​ໄດ້​ລົງ​ນາມ​ໃນ​ສັນ​ຍາ​ຕຸ​ລາ​ການ​ສອງຝ່າຍຫຼາຍສິບສະບັບ​ ​ໃນ​ຂົງ​ເຂດ​ອາຍາ ​ແລະການ​ສົ່ງອາຊະຍາກຳ​ຂ້າມ​ແດນ​ ລະຫວ່າງຫວຽດນາມ ​ແລະບັນດາ​ປະ​ເທດ​ໃນ​ໂລກ; ການຄົ້ນຄວ້າ ການສ້າງ ການເຈລະຈາ ການລົງນາມ ແລະ ການໃຫ້ສັດຕະຍາບັນສົນທິສັນຍາສາກົນ ແລະ ຂໍ້ຕົກລົງສາກົນສອງຝ່າຍແລະຫຼາຍຝ່າຍ ຫຼາຍສະບັບ; ຈັດຕັ້ງ​ແລະຂະຫຍາຍລະບົບ​ພະນັກງານປະສານງານໃນ​ຕ່າງປະ​ເທດ, ສ້າງ​ພື້ນຖານທາງກົດໝາຍ​ ແລະກົນ​ໄກ​ປະສານ​ງານ ໃນການຕໍ່ສູ້​ຕ້ານ​ອາດຊະຍາ​ກຳ​ໃນ​ຂົງ​ເຂດ​ເສດຖະກິດ; ລະດົມ​ການ​ຊ່ວຍ​ເຫຼືອຈາກ​ປະ​ເທດອື່ນໆ ​ແລະອົງການ​ຈັດ​ຕັ້ງ​ສາກົນ ​ເພື່ອ​ເສີມ​ຂະຫຍາຍ​ທ່າ​ແຮງໃນການຮັບປະກັນຄວາມ​ໝັ້ນຄົງ ​ແລະຄວາມ​ເປັນ​ລະບຽບ​ຮຽບຮ້ອຍ ​ໃນ​ທຸກ​ຂົງ​ເຂດ​ເສດຖະກິດ.

ວຽກງານການ​ຄຸ້ມ​ຄອງ​ຄວາມ​ໝັ້ນຄົງ ​ແລະຄວາມ​ເປັນ​ລະບຽບ​ຮຽບຮ້ອຍຂອງລັດ​ໃນ​ຂົງ​ເຂດ​ເສດຖະກິດນັ້ນ ໄດ້​ດຳ​ເນີນ​ໄປ​ພ້ອມໆ​ກັນ, ປະກອບສ່ວນ​ປ້ອງ​ກັນ​ແລະຫຼຸດຄວາມສ່ຽງຂອງການ “ຕົກຢູ່ເບື້ອງ​ຫຼັງ” ແລະ “ການຜິດບ່ຽງໄປ​ຈາກ​ລັດທິ​ສັງຄົມ​ນິຍົມ", ສ້າງສະພາບແວດລ້ອມ ແລະເງື່ອນໄຂເອື້ອອຳນວຍ ເພື່ອປະຕິບັດ​ກົນ​ໄກແລະນະ​ໂຍບາຍ​ສົມທົບ​ກັນ​ຢ່າງ​ແໜ້ນ​ແຟ້ນ ລະຫວ່າງ​ການ​ພັດທະນາ​ເສດຖະກິດ ​ກັບ​ການປະຕິບັດຄວາມ​ກ້າວໜ້າ​ ແລະຄວາມຍຸຕິທຳທາງສັງຄົມ, ສ້າງ​ໂອກາດ​ໃຫ້​ປະຊາຊົນ​ເຂົ້າ​ຮ່ວມ ​ແລະ​ຮັບ​ຜົນປະໂຫຍດ​ຈາກ​ຂະ​ບວນການ​ພັດທະນາ​ເສດຖະກິດ. ໝາກຜົນການ​ຄຸ້ມ​ຄອງ​ຄວາມ​ໝັ້ນຄົງ ​ແລະຄວາມ​ເປັນ​ລະບຽບ​ຮຽບຮ້ອຍຂອງລັດ​ ໃນ​ຂົງ​ເຂດ​ເສດຖະກິດ ປະກອບສ່ວນ​ປັບປຸງລະບົບ​ກົດໝາຍ ກົນ​ໄກ ແລະ ນະ​ໂຍບາຍໃຫ້ສົມບູນແບບ, ປັບປຸງ​ສະພາບ​ແວດ​ລ້ອມ​ການ​ລົງທຶນ ​ແລະ​ທຸລະ​ກິດ; ກໍ່ສ້າງ​ພື້ນຖານ​ເສດຖະກິດ​ການ​ຕະຫຼາດ​ທີ່​​ນັບ​ມື້​ນັບຄົບຊຸດ ແລະ​ເຊື່ອມ​ໂຍງ​ເຂົ້າ​ກັບ​ຕະຫຼາດ​ພາກ​ພື້ນ​ແລະ​ໂລກ, ນຳເສດຖະກິດຂອງ​ປະ​ເທດ​ເຮົາເຊື່ອມໂຍງເຂົ້າກັບໂລກ ຕາມທິດທາງຍືນຍົງແລະເລິກເຊິ່ງຍິ່ງຂຶ້ນ, ສ້າງ​ພື້ນຖານ​ຊຸກຍູ້​ການ​ຫັນ​ເປັນ​ອຸດສາຫະກຳ ​ແລະ ທັນ​ສະ​ໄໝ​ຂອງ​ປະ​ເທດ​ຊາດ​ໃນ​ໄລຍະຕໍ່ໄປ.

2- ປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ, ຫວຽດນາມໄດ້ເປັນເຈົ້າການເຊື່ອມໂຍງເຂົ້າກັບປະຊາຄົມໂລກຢ່າງຮອບດ້ານ ເລິກເຊິ່ງ ​ໃນ​ສະພາບ​ການ​ແຂ່ງຂັນ​ຍຸດ​ທະ​ສາດ​ລະຫວ່າງ​ບັນດາ​ປະ​ເທດ​ໃຫຍ່​ໃນ​ພາກ​ພື້ນ ອາຊີປາຊີ​ຟິກ, ​ໃນ​ນັ້ນ ​ການ​ແຂ່ງຂັນທາງ​ເສດຖະກິດ​ແລະການ​ຄ້າ​ ມີການຂະຫຍາຍຕົວ​ແລະເຄັ່ງຮ້ອນຫຼາຍຂຶ້ນ, ສ້າງໂອກາດ​ແລະຄວາມ​ໄດ້​ປຽບຫຼາຍຢ່າງ, ​ແຕ່​ຍັງກໍ່ໃຫ້ເກີດຄວາມ​ທ້າ​ທາຍ​ຫຼາຍ​ປະການ​ໃຫ້​ແກ່​ການ​ປົກ​ປ້ອງ​ຄວາມ​ໝັ້ນຄົງ ​ແລະຄວາມ​ເປັນ​ລະບຽບ​ຮຽບຮ້ອຍ​ໃນ​ຂົງ​ເຂດ​ເສດຖະກິດ, ພົ້ນ​ເດັ່ນ​ຄື: 1- ຕ່າງປະ​ເທດ​ເພີ່ມ​ທະວີ​ການ​ເຄື່ອນ​ໄຫວ​ສົ່ງຜົນກະທົບ, ໃຊ້​ເຄື່ອງ​ມື​ທາງເສດຖະກິດແລະນະ​ໂຍບາຍ​ທີ່​ນາບ​ຂູ່ຄວ້ຳບາດທາງ​ເສດຖະກິດ​ ເພື່ອ​ສ້າງແຮງ​ກົດ​ດັນຕໍ່ຫວຽດນາມ, ນາບ​ຂູ່​ຄວາມ​ໝັ້ນຄົງທາງ​ເສດຖະກິດ; 2- ຄວາມເປັນເອກະລາດແລະເປັນເຈົ້າຕົນເອງທາງເສດຖະກິດຫຼຸດລົງ, ສູນເສຍຄວາມລະມັດລະວັງເມື່ອເຂົ້າຮ່ວມໃນໂຄງການລິເລີ່ມ ແລະຍຸດທະສາດຂອງປະເທດໃຫຍ່ ເຊິ່ງນຳໄປສູ່ຜົນກະທົບທາງການເມືອງແລະການປ່ຽນແປງ; 3- “ການປ່ຽນແປງຕົນເອງ”, “ການຜັນປ່ຽນຕົນເອງ” ໃນການສ້າງແລະປະຕິບັດນະໂຍບາຍແລະກົດໝາຍທາງດ້ານເສດຖະກິດ, ຂົ່ມຂູ່​ຕໍ່​ຜົນ​ປະ​ໂຫຍ​ດຂອງ​ຊາດ-ປະເທດຊາດ; 4- ການຈັດຕັ້ງອົງການທາງການເມືອງຝ່າຍຄ້ານ, ເກີດ “ການປະຕິວັດສີ”, “ການປະຕິວັດຕາມ​ຖະ​ໜົນ”, ນາບ​ຂູ່​​ບົດ​ບາດ​ການ​ນຳ​ພາ​ຂອງ​ພັກ, ເຮັດໃຫ້ເກີດ​ຄວາມ​ບໍ່​ໝັ້ນ​ຄົງໃນໝູ່ກຳມະກອນ; 5- ບັນດາບັນຫາທາງສັງຄົມເຊັ່ນ ການຂະຫຍາຍຕົວຂອງຕົວເມືອງ, ການສູງອາຍຸຂອງປະຊາກອນ, ຊ່ອງ​ຫວ່າງ​ລະຫວ່າງ​ຄົນ​ຮັ່ງມີ​ແລະ​ຄົນທຸກ​ຍາກ ​ແລະ ລະດັບ​ການ​ພັດທະນາ... ສົ່ງ​ຜົນ​ກະທົບ​ຕໍ່​ຄວາມ​ໝັ້ນຄົງ ​ແລະ ຄວາມ​ເປັນ​ລະບຽບ​ຮຽບຮ້ອຍ​ໃນ​ຂົງ​ເຂດເສດຖະກິດ; 6- ບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ, ໂດຍສະເພາະ ຄວາມໝັ້ນຄົງທາງໄຊເບີຣ໌, ຄວາມໝັ້ນຄົງທາງອາຫານ, ຄວາມໝັ້ນຄົງດ້ານພະລັງງານ, ຄວາມໝັ້ນຄົງດ້ານສິ່ງແວດລ້ອມ; ການປັບປ່ຽນວິທີການ ແລະຍຸດ​ທະວິທີການເຄື່ອນໄຫວ ​​ຂອງ​ອາ​ຊະ​ຍາ​ກອນ​ທຸກ​ປະ​ເພດ​ສືບ​ຕໍ່​ມີ​ຄວາມ​ສັບ​ສົນ.

ເພື່ອເພີ່ມທະວີວຽກງານຄຸ້ມຄອງລັດທາງດ້ານຄວາມໝັ້ນຄົງ ແລະຄວາມເປັນລະບຽບຮຽບຮ້ອຍ, ປະກອບສ່ວນຈຳກັດຄວາມທ້າທາຍ ແລະຕອບສະໜອງຄວາມຕ້ອງການໃນການຮັກສາຄວາມໝັ້ນຄົງຂອງຊາດ ໃນສະພາບການເຊື່ອມໂຍງເຂົ້າກັບສາກົນຢ່າງຮອບດ້ານແລະເລິກເຊິ່ງ, ຈຳເປັນຕ້ອງ​ເອົາ​ໃຈ​ໃສ່​ປະຕິບັດບາງ​ວຽກ​ງານ​ສຳຄັນໃຫ້​ມີ​ປະສິດທິ​ຜົນ​ຄື:

ທີໜຶ່ງ, ສືບ​ຕໍ່ຊາບຊຶມແລະ​ປະ​ຕິ​ບັດ​ທັດ​ສະ​ນະ​ຂອງ​ພັກ​ຢ່າງ​ຮອບ​ດ້ານ ແລະ ສະ​ໝ່ຳ​ສະເໝີ: ການພັດທະນາເສດຖະກິດເປັນຈຸດສຸມ; ການກໍ່ສ້າງ​ພັກ​ເປັນ​ກຸນ​ແຈ; ​ການເພີ່ມ​ທະວີ​ການ​ປ້ອງ​ກັນປະເທ​ດ ແລະປ້ອງ​ກັນ​ຄວາມໝັ້ນຄົງ​ ເປັນ​ວຽກ​ງານ​ທີ່ສຳຄັນ ​ແລະ​ເປັນ​ປະຈຳ; ປະສົມປະສານ​ເສດຖະກິດ​ກັບ​ການ​ປ້ອງ​ກັນ​ປະ​ເທດ ປ້ອງ​ກັນ​ຄວາມ​ໝັ້ນຄົງ ແລະ ການປ້ອງ​ກັນ​ປະ​ເທດ ປ້ອງກັນຄວາມ​ໝັ້ນຄົງ​ ກັບ​ເສດຖະກິດ ຢ່າງແໜ້ນແຟ້ນ. ຮັກສາແລະເພີ່ມທະວີການນຳພາໂດຍກົງແລະເດັດຂາດໃນທຸກດ້ານ ຂອງຄະນະພັກ ແລະການຄຸ້ມຄອງຂອງອຳນາດການປົກຄອງທຸກຂັ້ນ ຕໍ່ວຽກງານຮັບປະກັນຄວາມໝັ້ນຄົງ ແລະຄວາມເປັນລະບຽບຮຽບຮ້ອຍ ໃນຂົງເຂດເສດຖະກິດ. ເສີມຂະຫຍາຍກຳລັງແຮງສັງລວມຂອງທັງລະບົບການເມືອງ, ຂອງບັນດາສຳນັກງານ ອົງການ ແລະຂະແໜງການ ໂດຍມີກອງກຳລັງຕຳຫຼວດເປັນແກນຫຼັກ.

ທີສອງ, ​ເອົາ​ໃຈ​ໃສ່ ​ແລະ ສຸມ​ໃສ່ການນຳພາ​ຊີ້​ນຳ ​ແລະ ຜັນຂະຫຍາຍປະຕິບັດມາດ​ຕະການ​ປ້ອງ​ກັນ​ຄວາມ​ໝັ້ນຄົງ​ ແລະຄວາມ​ເປັນ​ລະບຽບ​ຮຽບຮ້ອຍ​ໃນ​ຂົງ​ເຂດ​ເສດຖະກິດ, ສຸມ​ໃສ່​ກຳ​ແໜ້ນ​ສະພາບ​ການ​, ​ຄົ້ນ​ຫາຢ່າງທັນການ ​ແລະ ​ແນະນຳ​ໃຫ້​ພັກ​ແລະລັດ ​ໃນ​ການ​ແກ້​ໄຂ​ບັນດາ​ຜົນ​ກະທົບ​ທາງ​ລົບ ​ໃນ​ການ​ເຊື່ອມ​ໂຍງ​ເຂົ້າ​ກັບ​ສາກົນ ​ແລະ ພັດທະນາ​ເສດຖະກິດ; ສະເໜີທິດທາງແກ້ໄຂຂໍ້ຄົງຄ້າງ ແລະ ຂໍ້ບົກພ່ອງໃນການປະກາດໃຊ້ ແລະ ຈັດຕັ້ງປະຕິບັດແນວທາງແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ ກ່ຽວກັບການຄຸ້ມຄອງເສດຖະກິດ. ໃຫ້ຄຳແນະນຳກັບກະຊວງ, ຄະນະ, ຂະແໜງການ ແລະທ້ອງຖິ່ນ ໃນການສ້າງແລະປັບປຸງບູລະນະໂຄງການ, ແຜນງານປົກປ້ອງຄວາມໝັ້ນຄົງທາງເສດຖະກິດ, ເພີ່ມທະວີການຮັບປະກັນຄວາມໝັ້ນຄົງຂອງກຳມະກອນ ໂດຍສະເພາະ ໃນເຂດອຸດສາຫະກຳ, ເຂດເສດຖະກິດ, ເຂດປຸງແຕ່ງສົ່ງອອກ, ວິສາຫະກິດທີ່ມີການລົງທຶນຈາກຕ່າງປະເທດ. ໃຫ້ຄຳແນະນຳ ແລະ ປະສານງານ ເພື່ອຮັບມືກັບການປະທ້ວງ ແລະ ການຢຸດງານ ຂອງກຳມະກອນ ຢ່າງມີປະສິດທິຜົນ ຕາມຄຳຂວັນທີ່ວ່າ “ສີ່ສິ່ງຢູ່ກັບບ່ອນ” (ກອງກຳລັງໃນສະຖານທີ່, ການບັນຊາໃນສະຖານທີ່, ຍານພາຫະນະໃນສະຖານທີ່, ໂລຈິສະຕິກໃນສະຖານທີ່). ​ເຂົ້າ​ຮ່ວມໃນ​ການ​ຕີ​ລາຄາ ​ແລະຕິດຕາມ​ກວດກາ​ບັນດາ​ໂຄງການ, ແຜນງານ ​ແລະແຜນການ​ການລົງທຶນຈາກ​ຕ່າງປະ​ເທດ, ກວດຈັບ​ແລະສະກັດ​ກັ້ນ​ໂດຍທັນທີ ການ​ເຄື່ອນ​ໄຫວ​ທີ່​ເປັນ​ອັນຕະລາຍ​ຕໍ່​ຄວາມ​ໝັ້ນຄົງ ​ແລະ ຄວາມ​ເປັນ​ລະບຽບ​ຮຽບຮ້ອຍ​ໃນ​ຂົງ​ເຂດ​ເສດຖະກິດ. ໝູນໃຊ້ທັດສະນະກ່ຽວກັບ “ຄູ່ຮ່ວມ, ເປົ້າໝາຍ” ຢ່າງເໝາະສົມ, ແກ້ໄຂຜ່ານຜ່າທ່າອ່ຽງທັງສອງຄື ຄວາມແຂງກະດ້າງ ​ຫຼື​ຄວາມ​ຄຸມເຄືອ​ສູນ​ເສຍຄວາມ​ລະ​ມັດ​ລະ​ວັງ ​ໃນ​ການ​ປົກ​ປ້ອງ​ຄວາມໝັ້ນຄົງ​ຂອງ​ຊາດ​ໃນຂົງເຂດ​ເສດ​ຖະ​ກິດ​.

ທີສາມ, ມຸ່ງເນັ້ນການໃຫ້ຄຳປຶກສາແລະແນະນຳແນວທາງເພີ່ມທະວີການຄຸ້ມຄອງທາງການເມືອງພາຍໃນຂະແໜງການເສດຖະກິດແລະສາຂາຕ່າງໆ. ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ແຜນການ, ວິທີ​ການ, ກົນອຸບາຍ ​ຂອງ​ອາດຊະຍາ​ກຳ​ທາງ​ເສດຖະກິດ​​ປະ​ເພດຕ່າງໆ; ຈັດການແກ້ໄຂຢ່າງທັນການຕໍ່ປະກົດດານຂອງການເສື່ອມໂຊມທາງດ້ານແນວຄິດການເມືອງ, ຈັນຍາບັນ, ວິຖີ​ຊີວິດ, “ການປ່ຽນແປງຕົນເອງ”, “ການຜັນປ່ຽນຕົນເອງ”, ການເຄື່ອນໄຫວຕິດຕໍ່ ການຊື້ຈ້າງຈອບອອຍຂອງບັນດາອິດທິກຳລັງສັດຕູ ປະຕິກິລິຍາ ແລະພວກຜູ້ຮ້າຍ ທີ່ສົ່ງຜົນກະທົບຕໍ່ພາຍໃນ, ​ໂດຍ​ສະ​ເພາະ​ແມ່ນ ​ບັນດາ​ອົງການ​ກຳນົດ​ນະ​ໂຍບາຍ ​ແລະພະນັກງານຫຼັກແຫຼ່ງ ​ໃນ​ຂົງ​ເຂດ​ເສດຖະກິດ​ທີ່​ສຳຄັນ. ໃຫ້ຄຳແນະນຳແລະປະສານສົມທົບການກວດກາ, ກວດສອບ ແລະຈັດການຕາມກົດລະບຽບສຳລັບໂຄງການທີ່ບໍ່ປະຕິບັດຕາມຄຳໝັ້ນສັນຍາ, ບໍ່ມີປະສິດທິຜົນ, ສິ້ນເປືອງຊັບພະຍາກອນ ແລະ ກໍ່ໃຫ້ເກີດມົນລະພິດຕໍ່ສິ່ງແວດລ້ອມ.

ທີສີ່, ຊີ້ນຳການເກັບກຳ, ການຄົ້ນເຜີຍ ແລະ ການຕໍ່ສູ້ ກັບກົນອຸບາຍແລະການເຄື່ອນໄຫວມ້າງເພທຳລາຍຂອງບັນດາອິດທິກຳລັງສັດຕູ ປະຕິການທີ່ລະເມີດຄວາມໝັ້ນຄົງແລະຄວາມເປັນລະບຽບຮຽບຮ້ອຍໃນຂົງເຂດເສດຖະກິດ. ຍົກສູງສະຕິລະວັງຕົວ, ໃຊ້ມາດຕະການທີ່ເໝາະສົມ ເພື່ອຮັບປະກັນ​ການ​ປ້ອງ​ກັນ ​ແລະ ສະກັດ​ກັ້ນ​ຢ່າງ​ມີ​ປະສິດທິພາບ ຕໍ່​ການ​ເຄື່ອນ​ໄຫວ​ທີ່​ສ້າງ​ຄວາມ​ເສຍ​ຫາຍ ​ແລະຫຼຸດຄວາມເປັນ​ເອກະລາດ ​ແລະຄວາມເປັນເຈົ້າຕົນເອງທາງ​ເສດຖະກິດ, ການ​ຫັນປ່ຽນ​ດ້ານ​ການ​ເມືອງ ແລະ​ລະ​ເມີດ​ຜົນ​ປະ​ໂຫຍ​ດຂອງ​ຊາດ-ປະເທດຊາດ ​ແລະ ຄວາມ​ໝັ້ນຄົງຂອງ​ຊາດ. ສຸມໃສ່ການຄົ້ນເຜີຍແລະ​ປ້ອງ​ກັນ​ເຈດຕະນາ ແລະຈັດການແກ້​ໄຂໂດຍທັນທີ ການ​ກະທຳ​ລະ​ເມີດ​ຂອງ​ຄູ່​ຮ່ວມ​ມື​ຕ່າງປະ​ເທດ​ທີ່​ສວຍ​ໃຊ້​ຊ່ອງ​ຫວ່າງ ​ແລະຈຸດອ່ອນ ​ເພື່ອ​ສ້າງ​ຂໍ້​ອ້າງ​ສຳລັບແຮງ​ກົດ​ດັນ, ການ​ແກ່ງ​ແຍ້​ງ, ການ​ຫຼົບ​ຫຼີກ​ພາສີ, ການ​ໂອນ​ລາຄາ, ການເຂົ້າ​ຊື້ກິດຈະກຳ ແລະການຄອບງຳ​ຕະຫຼາດ​ພາຍໃນປະເທດ. ປ້ອງກັນ ກວດພົບ ແລະກີດກັ້ນຢ່າງມີປະສິດທິພາບ ຕໍ່ການເຄື່ອນໄຫວຂອງໜ່ວຍງານຕ່າງປະເທດທີ່ຕິດຕັ້ງບຸກຄົນເຂົ້າ​ໃນ​ອົງ​ການ​ຄົ້ນຄວ້າ​ ​ວາງກຳນົດ​ນະ​ໂຍ​ບາຍ​ເສດ​ຖະ​ກິດ​, ພາກສ່ວນເສດຖະກິດທີ່ສໍາຄັນ ຈໍາເປັນ ແລະ ປິດລັບ. ກຳແໜ້ນສະພາບການ, ໄຈ້ແຍກ, ຕີລາຄາ, ຄາດຄະເນລ່ວງໜ້າ ແລະມີ​ມາດ​ຕະການ​ແກ້​ໄຂ​ຢ່າງ​ທັນ​ການ ​ຕໍ່​​ສັນຍານ​ຄວາມ​ບໍ່​ໝັ້ນຄົງ​ໃນສະພາບການເສດຖະກິດແລະ​ການ​ເງິນ​ໃນໂລກແລະ​ພາກ​ພື້ນ ​ທີ່​ສົ່ງ​ຜົນ​ກະທົບ​ທາງ​ລົບ​ໂດຍ​ກົງ​ຕໍ່​ເສດຖະກິດ​ຂອງ​ປະ​ເທດ.

ທີຫ້າ, ເພີ່ມທະວີການຕໍ່ສູ້ປ້ອງກັນແລະປາບປາມອາຊະຍາກຳທາງເສດຖະກິດທີ່ມີການຈັດຕັ້ງແລະຂ້າມຊາດ, ການຟອກເງິນ, ການສໍ້ລາດບັງຫຼວງ, ການລັກລອບຂົນສິນຄ້າ, ການຜະລິດແລະບໍລິໂພກຂອງປອມ, ການສໍ້ໂກງທາງການຄ້າ, ສິນເຊື່ອມືດ, ອາຊະຍາກໍາເຕັກໂນໂລຢີສູງ ແລະ ການລະເມີດຄວາມປອດໄພທາງອິນເຕີເນັດ. ສຸມໃສ່ການສືບສວນ ແລະຈັດການແກ້ໄຂຄະດີສໍ້ລາດບັງຫຼວງ ຄະດີເສດຖະກິດທີ່ສຳຄັນ ແລະ ຂໍ້ກັງວົນຂອງຄວາມຄິດເຫັນຂອງປະຊາຊົນ ດ້ວຍຈິດໃຈທີ່ “ເດັດດ່ຽວ, ໜຽວແໜ້ນ, ບໍ່ຈົ່ງຈຽມ, ບໍ່ຫຼົບຫຼີກ, ບໍ່ຢ້ານການຕຳກັນ, ບໍ່ຢູ່ພາຍໃຕ້ແຮງກົດດັນຈາກອົງການຫຼືບຸກຄົນໃດໆ, ເຮັດຢ່າງແຂງແຮງ, ດຸເດືອດ, ມີ​ຈັງຫວະ ຄົບຊຸດ ​ແລະ ມີ​ປະສິດທິ​ຜົນ​ກວ່າ”, “ຂົນຂວາຍໃຫ້ຍອມຈຳນົນ, ໄລ່ຈັບຕົວຜູ້​ທີ່​ຫຼົບໜີອອກນອກປະ​ເທດ”, “ຈັດການແກ້ໄຂຄະດີດຽວ, ແຈ້ງເຕືອນທົ່ວທັງພາກພື້ນແລະຂົງເຂດ”.

ທີຫົກ, ສຸມໃສ່ຜັນຂະຫຍາຍບັນດາວິທີແກ້ໄຂບັນຫາ ເພື່ອລວບລວມແລະສ້າງຂະບວນການທົ່ວປວງຊົນປົກປ້ອງຄວາມໝັ້ນຄົງຂອງປະເທດຊາດ; ການປັບປຸງທ່າສະໜາມຮົບຮັກສາຄວາມໝັ້ນຄົງປະຊາຊົນ, ລະບົບຮັກສາຄວາມໝັ້ນຄົງປະຊາຊົນໃນທຸກພື້ນທີ່ແລະຂົງເຂດເສດຖະກິດ; ລະດົມການເຂົ້າຮ່ວມຢ່າງຕັ້ງໜ້າແລະສະໝັກໃຈຂອງປະຊາຊົນຈຳນວນຫຼາຍ ເພື່ອກ່າວປະນາມອາຊະຍາກຳ, ສະໜັບສະໜູນກອງກຳລັງຕຳຫຼວດໃນການຕໍ່ສູ້ກັບອາຊະຍາກຳທຸກປະເພດໃນຂົງເຂດເສດຖະກິດ. ສືບຕໍ່ເພີ່ມທະວີການຮ່ວມມືສາກົນໃນດ້ານຄວາມໝັ້ນຄົງ ແລະຄວາມເປັນລະບຽບຮຽບຮ້ອຍ, ປັບປຸງທາງເດີນທາງກົດໝາຍໃຫ້ສົມບູນແບບ ເພື່ອຮັບ​ໃຊ້​ການ​ຕໍ່​ສູ້​ຕ້ານ​ອາ​ຊະ​ຍາ​ກຳ​ທາງ​ເສດ​ຖະ​ກິດ​ຈາກ​ນອກ​ຊາຍ​ແດນປະເທດ.

ດ້ວຍທ່າແລະພະລັງ, ກຳລັງແຮງສັງລວມຂອງຊາດແລະກຽດສັກສີລະດັບສາກົນ, ພາຍຫຼັງເກືອບ 40 ປີແຫ່ງການປ່ຽນແປງໃໝ່, ການກໍ່ສ້າງເສດຖະກິດຕະຫຼາດຕາມທິດສັງຄົມນິຍົມ ແລະ ການເຊື່ອມໂຍງເສດຖະກິດສາກົນ, ປະເທດເຮົາພວມປະເຊີນກັບກາລະໂອກາດດີ ແລະ ໂອກາດໃໝ່ແຫ່ງການພັດທະນາ, ​ແຕ່​ຍັງ​ປະ​ເຊີນ​ກັບ​ຄວາມ​ທ້າ​ທາຍ​ທີ່​ສັບສົນ​ໃນ​ໂລກ​ທີ່​ມີ​ການ​ປ່ຽນ​ແປງ​ຢ່າງ​ວ່ອງ​ໄວ. ໃນສະຖານະການໃໝ່ນັ້ນ, ການ​ຄຸ້ມ​ຄອງຂອງລັດດ້ານ​ຄວາມ​ໝັ້ນຄົງ ແລະ​ຄວາມ​ເປັນ​ລະບຽບ​ຮຽບຮ້ອຍ​ທາງ​ດ້ານ​ເສດຖະກິດ ​ຕ້ອງ​ກຳ​ແໜ້ນ​ທັດສະນະ​ຂອງ​ພັກ ​ແລະ ລັດ; ປະ​ຕິ​ບັດ​ເປົ້າ​ໝາຍ ໜ້າທີ່ ແລະວິ​ທີ​ແກ້​ໄຂ​ທີ່​ໄດ້​ວາງ​ໄວ້​ຢ່າງ​ມີ​ປະ​ສິດ​ທິ​ຜົນ, ຮັກສາຄວາມເປັນເຈົ້າການທາງຍຸດທະສາດ, ບໍ່ໃຫ້ຕົກໃນທ່າຮັບ ຄວາມບັງເອີນ ໃນທຸກສະຖານະການ, ປະກອບສ່ວນພ້ອມກັບພັກ, ກອງທັບທັງໝົດ ແລະ ປວງປະຊາຊົນ ໃຊ້ປະໂຫຍດຈາກໂອກາດ, ເອົາຊະນະຄວາມທ້າທາຍ, ສູ້ຊົນພາປະເທດເຖິງປີ 2045 ກາຍເປັນປະເທດທີ່ພັດທະນາແລ້ວ ແລະມີລາຍໄດ້ສູງ ຕາມຈິດໃຈມະຕິກອງປະຊຸມໃຫຍ່ຄັ້ງທີ XIII ຂອງພັກ./.

-------------------------------------------

  - ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1032 (ເດືອນກຸມພາ 2024)