ໄຊຊະນະດ້ຽນບຽນຝູ - ບົດຮຽນປະຫວັດສາດ ແລະ
ຄວາມໝາຍຕໍ່ພາລະກິດການປ່ຽນແປງໃໝ່ ໃນປະຈຸບັນ
ຄວາມໝາຍຕໍ່ພາລະກິດການປ່ຽນແປງໃໝ່ ໃນປະຈຸບັນ
ວກ. - ໄຊຊະນະດ້ຽນບຽນຝູແມ່ນໄຊຊະນະອັນສະຫງ່າລາສີຂອງປະເທດອານານິຄົມ ໂດຍເອົາຊະນະກອງທັບທີ່ທັນສະໄໝຂອງຈັກກະພັດຕາເວັນຕົກ. ນີ້ກໍ່ແມ່ນໄຊຊະນະທີ່ເປັນຕົວແບບທີ່ສຸດ ໃນປະຫວັດສາດການຕໍ່ສູ້ ລະຫວ່າງປະຊາຊົນທີ່ຖືກກົດຂີ່ ກັບຜູ້ຮຸກຮານຈາກຕ່າງປະເທດ ເຊິ່ງເປັນຈຸດເລີ່ມຕົ້ນຂອງຂະບວນການລົ້ມສະຫຼາຍຂອງລັດທິລ່າເມືອງຂຶ້ນແບບເກົ່າໃນທົ່ວໂລກ. ເພາະສະນັ້ນ, ໄຊຊະນະດ້ຽນບຽນຝູເປັນສັນຍາລັກທີ່ເປັ່ງປະກາຍຂອງຈິດໃຈທີ່ອັງອາກກ້າແກ່ນ, ບໍ່ອ່ອນຍອມ, ສະຕິປັນຍາ ແລະ ຄວາມຄິດປະດິດສ້າງ ຂອງປະຊາຊົນຫວຽດນາມຕະຫຼອດໄປ. ເຈັດສິບປີຜ່ານໄປແລ້ວ ແຕ່ໄຊຊະນະນີ້ຍັງຄັງຮັກສາຄຸນຄ່າ ແລະຄວາມໝາຍໃນການປະຕິວັດໃນປະຈຸບັນ.
ປະທານໂຮ່ຈີມິນ ແລະ ບັນດາສະຫາຍໃນຄະນະປະຈຳສູນກາງພັກ ພົບປະກັນເພື່ອຕົກລົງເປີດການຮົບໃນລະດູໜາວ-ລະດູບານໃໝ່ ປີ 1953-1954 ແລະ ບັ້ນຮົບດ້ຽນບຽນຝູ (ປະຊຸມຢູ່ຕາແສງ ຝູດິ່ງ, ເມືອງ ດິ້ງຫ່ວາ, ແຂວງ ຖາຍງວຽນ ທ້າຍປີ 1953) _ທີ່ມາ: hochiminh.vn
1- ດ້ຽນບຽນຝູ ແມ່ນຮ່ອມພູໃຫຍ່ທາງຕາເວັນຕົກຂອງເຂດພູດອຍຕາເວັນຕົກສຽງເໜືອຫວຽດນາມ. ທົ່ງນາດ້ຽນບຽນຝູມີຄວາມຍາວປະມານ 18 ກມ. ແລະ ກວ້າງ 6 ກມ. ເຖິງ 8 ກມ. ນີ້ແມ່ນທົ່ງນາທີ່ໃຫຍ່ທີ່ສຸດ, ຮັ່ງມີທີ່ສຸດ ແລະ ມີປະຊາກອນໜາແໜ້ນທີ່ສຸດ ໃນພາກຕາເວັນຕົກສຽງເໜືອ. ດ້ຽນບຽນຝູຕັ້ງຢູ່ໃກ້ຊາຍແດນຫວຽດນາມ-ລາວ, ຕັ້ງຢູ່ທີ່ສາມແຍກຖະໜົນສາຍຫຼັກທີ່ສຳຄັນແລະຖະໜົນສາຍໜ້ອຍຫຼາຍສາຍ, ທິດຕາເວັນອອກສ່ຽງເໜືອ ຕິດກັບເມືອງລາຍເຈົາ, ທິດຕາເວັນອອກແລະທິດຕາເວັນອອກສ່ຽງໃຕ້ເຊື່ອມຈອດກັບເມືອງ ຕ່ວນຢ້າວ, ເຊີນລາ, ນ່າສານ, ທິດຕາເວັນຕົກຕິດກັບ ຫຼວງພະບາງ ແລະທິດໃຕ້ຕິດກັບ ຊຳເໜືອ (ລາວ). ສຳລັບພວກລ່າເມືອງຂຶ້ນຝຣັ່ງ ແລະ ພວກອາເມລິການຜູ້ແຊກແຊງ, ດ້ຽນບຽນຝູແມ່ນເຂດຍຸດທະສາດທີ່ສຳຄັນທີ່ສຸດ, ແມ່ນຈຸດຍຸດທະສາດເຄື່ອນທີ່ໃນຕອນກາງ ລະຫວ່າງພາກເໜືອຫວຽດນາມ ພາກເໜືອລາວ ແລະ ພາກຕາເວັນຕົກສຽງໃຕ້ຂອງຈີນ ເຊິ່ງອາດຈະກາຍເປັນຖານທັບຂອງກອງທັບບົກແລະກອງທັບອາກາດ ທີ່ຈະເປັນປະໂຫຍດທີ່ດີໃນການປະຕິບັດກົນອຸບາຍຮຸກຮານຂອງພວກເຂົາຢູ່ອາຊີຕາເວັນອອກສຽງໃຕ້.
ກອງກຳລັງສັດຕູຢູ່ດ້ຽນບຽນຝູ ໄດ້ຈັດຕັ້ງເປັນກຸ່ມຖານທີ່ໝັ້ນ ທີ່ປະກອບດ້ວຍເຂດຍ່ອຍສະໜັບສະໜູນເຊິ່ງກັນແລະກັນ 3 ເຂດ, ລວມທັງໝົດ 49 ຖານ. ແຕ່ລະຖານມີຄວາມສາມາດໃນການປ້ອງກັນ; ຖານທີ່ໝັ້ນຫຼາຍແຫ່ງໄດ້ຮັບການຈັດຕັ້ງເຂົ້າເປັນກຸ່ມຖານທີ່ໝັ້ນທີ່ເອີ້ນວ່າ “ສູນຕ້ານທານທີ່ສັບຊ້ອນ” ໂດຍມີກອງກໍາລັງເຄື່ອນທີ່, ມີກຳລັງໄຟທີ່ເຂັ້ມແຂງ ແລະ ລະບົບປ້ອມປ້ອງກັນທີ່ໝັ້ນແກ່ນ, ອ້ອມຮອບດ້ວຍຂຸມການຈະລາຈອນແລະຮົ້ວລວດໜາມ, ມີຄວາມສາມາດໃນການປ້ອງກັນທີ່ເປັນອິດສະຫຼະຂ້ອນຂ້າງແຂງກ້າ. ເຂດຍ່ອຍແຕ່ລະເຂດປະກອບມີສູນຕ້ານທານທີ່ໝັ້ນແກ່ນຄືແນວນັ້ນຫຼາຍແຫ່ງ. ແຕ່ລະສູນຕ້ານທານກໍ່ຄືກຸ່ມຖານທີ່ໝັ້ນທັງໝົດໄດ້ຮັບການປົກປ້ອງໂດຍລະບົບປ້ອມປາການໃຕ້ດິນ, ມີລະບົບຂຸມຄອງ (ຮົ້ວຫຼືສະໜາມລວດໜາມ, ເຂດທຸ່ມລະເບີດ) ແລະ ໂດຍລະບົບກຳລັງໄຟທີ່ເຂັ້ມແຂງຫຼາຍ.
ດ້ຽນບຽນຝູມີສະໜາມບິນສອງແຫ່ງ. ນອກຈາກສະໜາມບິນຢູ່ ເມື່ອງແຖງ ແລ້ວ, ຍັງມີສະໜາມບິນສຳຮອງຢູ່ ໂຮ່ງກູ໊ມ, ເຊິ່ງເຊື່ອມຕໍ່ກັບ ຮ່າໂນ້ຍ ແລະ ຫານຟ່ອງ ໃນແຕ່ລະມື້ ດ້ວຍຂົວທາງອາກາດ, ໂດຍມີເຮືອບິນຂົນສົ່ງໂດຍສະເລ່ຍເກືອບ 100 ລຳຕໍ່ວັນ ແລະ ບັນທຸກສິນຄ້າໄດ້ປະມານ 200 ເຖິງ 300 ໂຕນ ແລະ ສະໜອງສິນຄ້າດ້ວຍຈ້ອງຊູຊີບປະມານ 100 ເຖິງ 150 ໂຕນ. ດ້ວຍກຳລັງແຮງ ແລະ ໂຄງປະກອບການປ້ອງກັນທີ່ໝັ້ນແກ່ນ, ທ່ານ ຮ. ນາວາ - ຜູ້ບັນຊາການກອງກຳລັງທະຫານສົ່ງນອກຝຣັ່ງ ຢູ່ອິນດູຈີນ ເຄີຍໃຫ້ຄຳເຫັນວ່າ ດ້ຽນບຽນຝູແມ່ນກຸ່ມຖານທີ່ໝັ້ນທີ່ແຂງແຮງທີ່ສຸດເທົ່າທີ່ເຄີຍມີມາໃນອິນດູຈີນ ຈຶງເປັນ “ປ້ອມປາການທີ່ບໍ່ສາມາດໂຈມຕີໄດ້”(1).
ທາງຝ່າຍຫວຽດນາມ, ມີບັນດາກອງກຳລັງຫຼວງຊັ້ນຍອດທີ່ມີຈິດໃຈສູ້ຮົບສູງ, ອາວຸດຍຸດໂທປະກອນທີ່ກ້າວໜ້າ ແລະ ມີຄວາມຕັດສິນໃຈທຳລາຍລ້າງສັດຕູ; ມີກຳລັງແຮງຂອງແນວຫຼັງທີ່ກວ້າງໃຫຍ່, ປະຊາຊົນເຊື່ອໝັ້ນຕໍ່ການນຳພາຂອງພັກກອມມູນິດຫວຽດນາມ ແລະ ພ້ອມແລ້ວທີ່ຈະສຸມກຳລັງທັງໝົດເພື່ອໜູນຊ່ວຍແນວໜ້າ, ຈັດລຳລຽງສະບຽງອາຫານ ແລະ ຍຸດໂທປະກອນໃຫ້ກອງທັບປະຕິບັດໜ້າທີ່ໄດ້ສຳເລັດ.
ດ້ວຍຄວາມຕັດສິນໃຈທີ່ຈະລວມກອງກຳລັງຫຼວງຊັ້ນຍອດສ່ວນໃຫຍ່ໃນແນວຮົບດ້ຽນບຽນຝູ ເພື່ອດັບສູນກອງທະຫານຊັ້ນຍອດຂອງສັດຕູ ໃນກຸ່ມຖານທີ່ໝັ້ນທີ່ເຂັ້ມແຂງທີ່ສຸດໃນສະໜາມຮົບອິນດູຈີນ, ຫຼັງຈາກການສູ້ຮົບຕໍ່ເນື່ອງຍາວນານ 56 ວັນແລະຄືນ, ກຸ່ມຖານທີ່ໝັ້ນດ້ຽນບຽນຝູຖືກທຳລາຍ, ບັ້ນຮົບດ້ຽນບຽນຝູອັນເປັນປະຫວັດສາດໄດ້ຮັບໄຊຊະນະຢ່າງສົມບູນເມື່ອວັນທີ 7 ພຶດສະພາ 1954(2).
ໄຊຊະນະດ້ຽນບຽນຝູຖືເປັນຈຸດສຸດຍອດຂອງສົງຄາມຕໍ່ຕ້ານພວກລ່າເມືອງຂຶ້ນຝຣັ່ງຜູ້ຮຸກຮານ, ສ້າງພື້ນຖານອັນໜັກແໜ້ນ ແລະຕັດສິນຢຸດຕິການປົກຄອງຂອງລ່າເມືອງຂຶ້ນຝຣັ່ງໃນສາມປະເທດອິນດູຈີນ, ແມ່ນໄຊຊະນະຂອງນ້ຳໃຈຮັກຊາດອັນແຮງກ້າ, ເຈດຈຳນົງອົງອາດກ້າແກ່ນ ແລະ ບໍ່ຍອມຈຳນົນ ຂອງຊາດຫວຽດນາມ ທີ່ໄດ້ຮັບການຫຼໍ່ລອມຈາກປະຫວັດສາດນັບພັນປີ. ນີ້ກໍ່ແມ່ນໄຊຊະນະຂອງແນວທາງສົງຄາມປະຊາຊົນທີ່ຖືກຕ້ອງແລະປະດິດສ້າງຂອງພັກກອມມູນິດຫວຽດນາມ ເຊິ່ງນຳໂດຍປະທານໂຮ່ຈີມິນ, ໄຊຊະນະຂອງເຈດຈຳນົງຕັດສິນໃຈສູ້ຮົບ ຕັດສິນໃຈເອົາຊະນະ, “ກ້າສູ້, ຕັດສິນໃຈສູ້ຮົບ, ຮູ້ສູ້ຮົບ ແລະ ຮູ້ເອົາຊະນະ”; ໄຊຊະນະຂອງກຳລັງແຮງແຫ່ງມະຫາສາມັກຄີປວງຊົນທັງຊາດ, ຈິດໃຈແຫ່ງເອກະລາດ ເປັນເຈົ້າຕົນເອງ, ອີງໃສ່ຕົນເອງ ສ້າງຄວາມເຂັ້ມແຂງດ້ວຍຕົນເອງ, ອອກແຮງຍາດແຍ່ງການສະໜັບສະໜູນ ແລະຊ່ວຍເຫຼືອຈາກສາກົນ, ສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝ. ທ່ານພົນເອກ ຫວໍ ງວຽນ ຢ໊າບ ເນັ້ນວ່າ: “ຄວາມເລິກເຊິ່ງຂອງໄຊຊະນະດ້ຽນບຽນຝູໄດ້ຊ່ອນຢູ່ໃນມູນເຊື້ອທີ່ອົງອາດກ້າແກ່ນ ແລະບໍ່ຍອມຈຳນົນ ທີ່ມີມານັບພັນປີຂອງປະເທດ, ຈາກຄວາມກ້າຫານໃນຕຳນານຂອງເດັດຊາຍໃນໝູ່ບ້ານ ຢ໋ອງ ອາຍຸສາມປີທີ່ຕໍ່ສູ້ກັບສັດຕູກໍ່ຖືວ່າສາຍໄປແລ້ວ, ຄວາມໂກດແຄ້ນທີ່ສະຫວັນທັ້ງເກົ້າຍັງຕ່ຳເກີນໄປເມື່ອເຂົາບິນຂຶ້ນໄປບົນເມກຊັ້ນຟ້າ. ຄວາມເລິກເຊິ່ງນັ້ນຊ່ອນຢູ່ໃນບົດກະວີຂອງ ຫຼີ ເທື່ອງ ກຽດ: “ດິນແດນທາງໃຕ້ເປັນຂອງກະສັດພາກໃຕ້”, ຈາກ ຄຳຮຽກຮ້ອງນາຍແລະພົນທະຫານ, ຖະແຫຼງການໄຊຊະນະໃນການຕ້ານກອງທະຫານອູ່... ເຖິງ ຄຳຮຽກຮ້ອງປະຊາຊົນທົ່ວປະເທດຮ່ວມການຕໍ່ຕ້ານ ຂອງປະທານໂຮ່ຈີມິນ”(3).
2- ເຈັດສິບປີຜ່ານໄປ, ແຕ່ຄວາມໝາຍປະຫວັດສາດ, ຄວາມສູງຂອງຍຸກສະໄໝ ແລະ ບົດຮຽນອັນລ້ຳຄ່າ ຈາກໄຊຊະນະຄັ້ງປະຫວັດສາດດ້ຽນບຽນຝູ ຍັງຄົງມີຄຸນຄ່າ ແລະມີຄວາມກ່ຽວຂ້ອງຢ່າງເລິກເຊິ່ງ ກັບພາລະກິດການປ່ຽນແປງໃໝ່ຂອງປະເທດຊາດ ໃນປະຈຸບັນ.
ໄຊຊະນະດ້ຽນບຽນຝູເປັນສັນຍາລັດອັນຍິ່ງໃຫຍ່ຂອງນ້ຳໃຈຮັກຊາດ, ເຈດຈຳນົງທີ່ອົງອາດກ້າແກ່ນ ແລະ ບໍ່ຍອມຈຳນົນ ຂອງຊາດຫວຽດນາມ. ການຮົບທີ່ຕັດສິນຊີ້ຂາດໃນດ້ຽນບຽນຝູ ໄດ້ດຳເນີນຢູ່ເຂດພູດອຍທີ່ກັນດານ, ຫ່າງໄກຈາກແນວຫຼັງ, ມີກິ່ວສູງ ເຫວຊັນຫຼາຍແຫ່ງ ແລະ ເກືອບບໍ່ມີຕາໜ່າງຄົມມະນາຄົມຍຸດທະສາດ. ຕໍ່ໜ້າສະພາບການດັ່ງກ່າວ, ກຳລັງແຮງສັງລວມຂອງທັງແນວຫຼັງແລະແນວໜ້າ ໄດ້ຮັບການເສີມຂະຫຍາຍຢ່າງສູງ ເພື່ອຕອບສະໜອງຄວາມຕ້ອງການຂອງທະຫານໃຫ້ຄົບຖ້ວນ ແລະທັນທ່ວງທີ່ ໃນຕະຫຼອດບັ້ນຮົບ. ດ້ວຍນ້ຳໃຈຮັກຊາດອັນແຮງກ້າ ແລະ ຈິດໃຈ “ຕັດສິນໃຈສູ້ຮົບເພື່ອໃຫ້ປະເທດຊາດຍືນຍົງຄົງຕົວ”, ທົ່ວພັກ, ທົ່ວກອງທັບ ແລະ ທົ່ວປວງຊົນຫວຽດນາມ ໄດ້ກໍ່ສ້າງແນວຫຼັງທີ່ໝັ້ນຄົງ, ປະກອບສ່ວນກຳລັງຄົນແລະກຳລັງຊັບ ເພື່ອຮັບໃຊ້ບັ້ນຮົບດ້ຽນບຽນຝູ.
ດ້ວຍຄຳຂວັນ “ທັງໝົດເພື່ອແນວໜ້າ, ທັງໝົດເພື່ອໄຊຊະນະ”, ປະຊາຊົນບັນດາເຜົ່າຜ່ານຜ່າຄວາມຫຍຸ້ງຍາກ, ຮັບໃຊ້ບັ້ນຮົບຕະຫຼອດທັງກາງເວັນແລະກາງຄືນ. ພີ່ນ້ອງຮ່ວມຊາດນັບແສນຄົນໄດ້ສະໝັກເປັນຄົນງານ ແລະ ອາສາສາໝັກຊາວໜຸ່ມຢ່າງກະຕືລືລົ້ນ ເຂົ້າຮ່ວມການກໍ່ສ້າງເສັ້ນທາງ, ຂົນສົ່ງຮັບໃຊ້ສະໜາມຮົບ, ຮັບປະກັນການຂົນສົ່ງເຄື່ອງຂອງແລະອາວຸດຍຸດໂທປະກອນໃຫ້ສະໜາມຮົບທີ່ຫ່າງຈາກແນວຫຼັງຫຼາຍຮ້ອຍກິໂລແມັດ ໃນສະພາບເສັ້ນທາງທີ່ຫຍຸ້ງຍາກ, ພາຫະນະຂົນສົ່ງທີ່ປະຖົມປະຖານ ແລະ ສັດຕູໄດ້ໂຈມຕີຢ່າງດຸເດືອດ.
ຄຽງຄູ່ກັບນ້ຳໃຈສາມັກຄີອັນຍິ່ງໃຫຍ່ ແລະ ການປະກອບສ່ວນທາງດ້ານກຳລັງຄົນແລະກຳລັງຊັບອັນໃຫຍ່ຫຼວງໃຫ້ແກ່ບັ້ນຮົບດ້ຽນບຽນຝູນັ້ນ, ຄວາມກ້າຫານ ແລະສະຕິປັນຍາຂອງຫວຽດນາມ ຍັງສະແດງໃຫ້ເຫັນເຖິງຄວາມຕັດສິນໃຈສູ້ຮົບ, ຄວາມຕັດສິນໃຈຍາດເອົາໄຊຊະນະຂອງປວງຊົນທັງຊາດ ໂດຍສະເພາະແມ່ນ ກອງທະຫານທີ່ປະຈັນບານໃນແນວໜ້າ, ຕໍ່ສູ້ກັບສັດຕູໂດຍກົງ. ບັ້ນຮົບດ້ຽນບຽນຝູແມ່ນບັ້ນຮົບໄລຍະຍາວ, ບ່ອນທີ່ລວມສູນຄວາມພະຍາຍາມສູງສຸດຂອງທັງສອງຝ່າຍ. ເພາະສະນັ້ນ, ນີ້ແມ່ນການສູ້ຮົບທີ່ລໍາບາກທີ່ສຸດໂດຍທີ່ມີຄວາມສູນເສຍແລະການເສຍສະລະຈໍານວນຫຼາຍ. ແຕ່ພາຍໃຕ້ການນຳພາ, ຈັດຕັ້ງ, ອົບຮົມສຶກສາ ແລະ ຝຶກຝົນຫຼໍ່ຫຼອມຂອງພັກກອມມູນິດຫວຽດນາມ ເຊິ່ງນຳໂດຍປະທານໂຮ່ຈີມິນ, ແຫຼ່ງກຳເນີດພະລັງທາງດ້ານຈິດໃຈອັນຊະນະເລີດຂອງຊາດ ໄດ້ຮັບການປຸກຕື່ນແລະຫັນເປັນຄວາມເຂັ້ມແຂງທາງດ້ານວັດຖຸ ເພື່ອເອົາຊະນະສັດຕູ.
ໄຊຊະນະດ້ຽນບຽນຝູແມ່ນໄຊຊະນະສູງສຸດຂອງສົງຄາມຕໍ່ຕ້ານພວກລ່າເມືອງຂຶ້ນຝຣັ່ງຜູ້ຮຸກຮານ, ສ້າງພື້ນຖານທີ່ສຳຄັນແລະຕັດສິນຊີ້ຂາດການລົງນາມໃນ ສັນຍາເຊີແນວ ກ່ຽວກັບການຢຸດຕິສົງຄາມ ແລະ ຟື້ນຟູສັນຕິພາບຢູ່ອິນດູຈີນ. ເວລາ 17:30 ໂມງ ຂອງວັນທີ 7 ພຶດສະພາ 1954, ກອງທັບປະຊາຊົນຫວຽດນາມ ໄດ້ຢຶດກອງບັນຊາການຂອງກຸ່ມຖານທີ່ໝັ້ນດ້ຽນບຽນຝູ, ນາຍພົນ ເດິ ກັດສະຕຣີ ແລະ ເຈົ້າໜ້າທີ່ທັງໝົດຂອງລາວຖືກຈັບທັ້ງເປັນ. ໄຊຊະນະຄັ້ງປະຫວັດສາດທີ່ດ້ຽນບຽນຝູ - ຈຸດສຸດຍອດຂອງການບຸກໂຈມຕີຍຸດທະສາດໃນລະດູໜາວ-ລະດູບານໃໝ່ ປີ 1953-1954 ແມ່ນໄຊຊະນະທີ່ຍິ່ງໃຫຍ່ທີ່ສຸດ, ສະຫງ່າລາສີທີ່ສຸດຂອງຊາດຫວຽດນາມໃນສົງຄາມຕໍ່ຕ້ານພວກລ່າເມືອງຂຶ້ນຝຣັ່ງຜູ້ຮຸກຮານ (1945-1954). ບັ້ນຮົບດ້ຽນບຽນຝູໄດ້ຮັບໄຊຊະນະຢ່າງສົມບູນມື້ໜຶ່ງກ່ອນທີ່ກອງປະຊຸມ ເຊີແນວ ປຶກສາຫາລືກ່ຽວກັບບັນຫາອິນດູຈີນຢ່າງເປັນທາງການ ເຊິ່ງໄດ້ສ້າງ “ຖານະ” ແລະ “ກຳລັງ” ໃໝ່ໃຫ້ແກ່ພວກເຮົາຢູ່ໃນໂຕະເຈລະຈາ. ໄຊຊະນະຄັ້ງນີ້ປະກອບສ່ວນຊີ້ຂາດໃນການທັບມ້າງຄວາມຕັ້ງໃຈຮຸກຮານຂອງພວກລ່າເມືອງຂຶ້ນຝຣັ່ງ ແລະ ສະກັດກັ້ນການແຊກແຊງຂອງອາເມລິກາຢ່າງສິ້ນເຊິງ, ບັງຄັບໃຫ້ພວກເຂົາລົງນາມໃນສັນຍາ ເຊີແນວ ແລະຢຸດຕິສົງຄາມໃນອິນດູຈີນ. ປະທານໂຮ່ຈີມິນຊີ້ໃຫ້ເຫັນຢ່າງຈະແຈ້ງວ່າ: “ດ້ຽນບຽນຝູປຽບເໝືອນຫຼັກໝາຍປະຫວັດສາດທີ່ມີສີທອງທີ່ຮຸ່ງເຮືອງເຫຼືອງເຫຼື້ອມ. ມັນບັນທຶກຢ່າງຊັດເຈນບ່ອນທີ່ລັດທິລ່າງເມືອງຂຶ້ນກຳລັງກິ້ງລົງຄ້ອຍແລະລົ້ມສະຫຼາຍ, ໃນຂະນະດຽວກັນ, ຂະບວນການປົດປ່ອຍຊາດທົ່ວໂລກກໍ່ເພີ່ມຂຶ້ນເພື່ອໄຊຊະນະທີ່ສົມບູນ”(4).
ຫວຽດນາມໄດ້ຮັບການຍອມຮັບ ແລະໃຫ້ຄຳໝັ້ນສັນຍາທີ່ຈະເຄົາລົບສິດທິຂັ້ນພື້ນຖານຂອງຊາດ, ເຄິ່ງໜຶ່ງຂອງປະເທດໄດ້ຮັບການປົດປ່ອຍຢ່າງສົມບູນ.
ໄຊຊະນະດ້ຽນບຽນຝູໄດ້ຢືນຢັນແນວທາງການຕໍ່ຕ້ານທີ່ຖືກຕ້ອງ, ປະດິດສ້າງຂອງພັກເຮົາ ແລະ ປະທານໂຮ່ຈີມິນ. ນັ້ນແມ່ນແນວທາງການຕໍ່ຕ້ານຂອງປວງຊົນ, ຮອບດ້ານ, ໄລຍະຍາວ, ອີງໃສ່ຕົນເອງ, ເສີມຂະຫຍາຍສຸດຂູດມູນເຊື້ອຮັກຊາດ, ເຈດຈຳນົງຕໍ່ສູ້ ເພື່ອເອກະລາດ ແລະ ເສລີພາບຂອງຊາດຫວຽດນາມ. ໃນເດືອນກັນຍາ 1953, ກົມການເມືອງສູນກາງພັກໄດ້ປະຊຸມເພື່ອປຶກສາຫາລືກ່ຽວກັບພາລະກິດທາງການທະຫານໃນລະດູໜາວ - ລະດູບານໃໝ່ປີ 1953-1954, ວາງກຳນົດບັນດາຫຼັກການຊີ້ນຳຍຸດທະສາດ ແລະ ປະຕິບັດການຮົບ. ວັນທີ 6 ທັນວາ 1953, ກົມການເມືອງສູນກາງພັກອະນຸມັດແຜນການສູ້ຮົບລະດູບານໃໝ່ປີ 1954 ແລະ ຕົກລົງເປີດບັ້ນຮົບດ້ຽນບຽນຝູ; ມອບໝາຍໃຫ້ພົນເອກ ຫວໍ ງວຽນ ຢ໊າບ ເປັນເລຂາທິການຄະນະກຳມະການພັກ ແລະຜູ້ບັນຊາການບັ້ນຮົບ. ກ່ອນທີ່ຈະໄປແນວໜ້າ, ປະທານໂຮ່ຈີມິນໄດ້ມອບອຳນາດໃນການຕັດສິນໃຈຢ່າງເຕັມທີ່ ໃຫ້ພົນເອກ ແລະແນະນຳວ່າ: ບັ້ນຮົບນີ້ມີຄວາມສຳຄັນຫຼາຍ ທັງທາງດ້ານການເມືອງ ແລະການທະຫານ, ເຮົາຕ້ອງຊະນະ, ຖ້າເຮົາໝັ້ນໃຈວ່າຈະຊະນະກໍ່ສູ້, ຖ້າເຮົາບໍ່ໝັ້ນໃຈວ່າຈະຊະນະກໍ່ຢ່າສູ້. ເດືອນທັນວາ 1953, ປະທານໂຮ່ຈີມິນ ໄດ້ສົ່ງຈົດໝາຍເຖິງພະນັກງານແລະທະຫານໃນບັ້ນຮົບດ້ຽນບຽນຝູ ເພື່ອໃຫ້ກຳລັງໃຈໃນການສູ້ຮົບ ແລະຮັກສາຄວາມຕັດສິນໃຈທີ່ຈະຍາດເອົາໄຊຊະນະ.
ເນື່ອງຈາກການວາງແນວທາງການຕໍ່ຕ້ານ ແລະ ຈັດຕັ້ງປະຕິບັດແນວທາງການຕໍ່ຕ້ານທົ່ວປວງຊົນຕິດພັນກັບຄວາມຮອບດ້ານຢ່າງສຳເລັດຜົນ, ພັກເຮົາໄດ້ປຸກລະດົມແລະເສີມຂະຫຍາຍໃນລະດັບສູງ ຈິດໃຈຮັກຊາດ, ຄວາມຂະຫຍັນຂັນແຂງ, ຄວາມຄິດສ້າງສັນຂອງປະຊາຊົນໃນທຸກດ້ານ ການທະຫານ, ການເມືອງ, ເສດຖະກິດ, ວັດທະນະທຳ; ລວບລວມ ເຕົ້າໂຮມພະລັງອັນຍິ່ງໃຫຍ່ຂອງປະຊາຊົນຕັ້ງແຕ່ເໜືອຮອດໃຕ້, ຈາກເຂດທົ່ງພຽງເຖິງເຂດພູດອຍ, ຈາກຕົວເມືອງເຖິງຊົນນະບົດ, ຈາກເຂດເສລີໄປເຖິງເຂດທີ່ສັດຕູປົກຄອງຊົ່ວຄາວ; ຈາກແນວຫຼັງເຖິງແນວໜ້າ; ເສີມຂະຫຍາຍກຳລັງແຮງຂອງບັນດາປັດໄຈພາຍໃນ, ມູນເຊື້ອແລະຜູ້ຄົນຂອງຫວຽດນາມ, ຈິດໃຈສາມັກຄີ, ເຈດຈຳນົງອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງຂອງຊາດ. ຜູ້ຮັກຊາດທຸກຄົນໃນແຕ່ລະຕຳແໜ່ງໄດ້ເຂົ້າຮ່ວມຢ່າງຕັ້ງໜ້າໃນການຕໍ່ຕ້ານ, ສ້າງສາປະເທດຊາດ, ປະກອບສ່ວນເຂົ້າໃນບັ້ນຮົບດ້ຽນບຽນຝູ.
ໄຊຊະນະດ້ຽນບຽນຝູຢືນຢັນຄວາມເຕີບໃຫຍ່ ແລະເຂັ້ມແຂງຂອງກອງທັບປະຊາຊົນຫວຽດນາມ. ບັ້ນຮົບນີ້ໄດ້ເຕົ້າໂຮມບັນດາກອງກຳລັງທີ່ເຂັ້ມແຂງທີ່ສຸດ ແລະ ຈັດຕັ້ງປະຕິບັດການທາງທະຫານປະສານກັນ, ສ້າງກຳລັງແຮງເພື່ອເອົາຊະນະສັດຕູ. ນີ້ແມ່ນບັ້ນຮົບຂະໜາດໃຫຍ່ທີ່ສຸດໂດຍໃຊ້ກຳລັງຂອງກອງທັບ. ນອກຈາກນີ້ຍັງແມ່ນບັ້ນຮົບທີ່ມີການປະສານສົມທົບດ້ານການທະຫານໃນລະດັບທີ່ໃຫຍ່ທີ່ສຸດໃນສົງຄາມຕໍ່ຕ້ານພວກລ່າເມືອງຂຶ້ນຝຣັ່ງ, ເປັນຂີດໝາຍຂອງຄວາມເຕີບໃຫຍ່ແລະເຂັ້ມແຂງຂອງກອງທັບປະຊາຊົນຫວຽດນາມ. ພ້ອມກັນກັບການເຕົ້າໂຮມກຳລັງ, ຮູບແບບການສູ້ລົບຂອງບັ້ນຮົບຍັງມີການພັດທະນາທີ່ສຳຄັນຫຼາຍເມື່ອທຽບກັບບັນດາບັ້ນຮົບບຸກໂຈມຕີກ່ອນໜ້ານີ້. ວິທີການສູ້ຮົບ “ສູ້ຢ່າງໝັ້ນຄົງ, ກ້າວໜ້າຢ່າງໝັ້ນຄົງ”(5), ກຽມພ້ອມສູ້ຮົບເມື່ອໝັ້ນໃຈວ່າຈະຊະນະຈຶ່ງບຸກ, ຖ້າບໍ່ໝັ້ນໃຈວ່າຈະຊະນະກໍ່ຢ່າສູ້ ໄດ້ຢືນຢັນຢ່າງຈະແຈ້ງເຖິງຄວາມເປັນເຈົ້າການໃນການບຸກໂຈມຕີສັດຕູໃນສະໜາມຮົບຂອງກອງທັບຫວຽດນາມ.
ໄຊຊະນະດ້ຽນບຽນຝູແມ່ນການຫຼອມລວມກຳລັງແຮງຂອງຊາດຫວຽດນາມ ກັບກຳລັງແຮງຂອງຍຸກສະໄໝ. ດັ່ງທີ່ປະທານໂຮ່ຈີມິນຢືນຢັນ, ໄຊຊະນະດ້ຽນບຽນຝູ “ແມ່ນໄຊຊະນະອັນຍິ່ງໃຫຍ່ຂອງປະຊາຊົນເຮົາ, ແຕ່ກໍ່ແມ່ນໄຊຊະນະລວມຂອງທຸກຊົນຊາດທີ່ຖືກກົດຂີ່ໃນໂລກ”(6).
ການຕໍ່ສູ້ຂອງຊາດຫວຽດນາມເພື່ອເອກະລາດແລະສັນຕິພາບໄດ້ຮັບການສະໜັບສະໜູນຈາກປະຊາຊົນໃນບັນດາປະເທດທີ່ຮັກຫອມສັນຕິພາບ, ປະຊາທິປະໄຕ ແລະຄວາມກ້າວໜ້າທົ່ວໂລກ. ການຕໍ່ສູ້ຕ້ານພວກລ່າເມືອງຂຶ້ນຝຣັ່ງຂອງປະຊາຊົນຫວຽດນານາມໄດ້ຮັບການປະສານງານການຕໍ່ສູ້ຈາກປະຊາຊົນສອງປະເທດເພື່ອນບ້ານ ລາວ ແລະ ກຳປູເຈຍ; ໄດ້ຮັບການຊ່ວຍເຫຼືອສຳຄັນຂອງຈີນ, ສະຫະພາຍໂຊວຽດ (ກ່ອນໜ້ານີ້) ແລະຄວາມເຫັນດີເຫັນພ້ອມແລະສະໜັບສະໜູນຈາກເພື່ອນຕ່າງຊາດ ລວມເຖິງຜູ້ຮັກສັນຕິພາບໃນຝຣັ່ງ. ທຸກຊາດຕ້ອງຕໍ່ສູ້ຍາດເອົາເອກະລາດ ແລະເສລີພາບດ້ວຍຕົວພວກເຂົາເອງ, ແຕ່ການເລັ່ງປະຕິກິລິຍາແບບຕ່ອງໂສ້ທີ່ດ້ຽນບຽນຝູຈູດໃຫ້ເກີດພະລັງສັ່ນສະເທືອນຂະໜາດໃຫຍ່ ແລະ ການໜູນຊ່ວຍຂອງກຳລັງແຮງແຫ່ງຍຸກສະໄໝ ສ້າງອົງປະກອບດ້ານກາລະໂອກາດ, ແຫຼ່ງກຳລັງ ແລະ ການປະສານງານການຕໍ່ສູ້ລະຫວ່າງບັນດາຂະບວນການທີ່ກ້າວໜ້າ, ໄດ້ຊ່ວຍເຫຼືອຫຼາຍປະເທດບົນເສັ້ນທາງແຫ່ງການຕໍ່ສູ້ ເພື່ອເອກະລາດ ແລະ ເສລີພາບໄດ້ຮັບໄຊຊະນະ.
3- ພາຍຫຼັງໄຊຊະນະຄັ້ງປະຫວັດສາດທີ່ດ້ຽນບຽນຝູ, ປະຊາຊົນຫວຽດນາມຍັງສ້າງໄຊຊະນະອັນສະຫງ່າລາສີຢ່າງຕໍ່ເນື່ອງ: “ໄຊຊະນະຮ່າໂນ້ຍ - ດ້ຽນບຽນຝູໃນອາກາດ” ປີ 1972; ບັ້ນຮົບໂຮ່ຈີມິນອັນເປັນປະຫວັດສາດໃນປີ 1975, ໄດ້ປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ, ທົ່ວປະເທດກ້າວເຂົ້າສູ່ການກໍ່ສ້າງລັດທິສັງຄົມນິຍົມ, ປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ຢ່າງໝັ້ນຄົງ.
ເສີມຂະຫຍາຍຈິດໃຈໄຊຊະນະດ້ຽນບຽນຝູ, ຜ່ານເກືອບ 40 ແຫ່ງການປ່ຽນແປງໃໝ່, ພາຍໃຕ້ການນຳພາຂອງພັກກອມມູນິດຫວຽດນາມ, ກິດຈະການປ່ຽນແປງໃໝ່ປະເທດໄດ້ບັນລຸຄວາມສຳເລັດອັນຍິ່ງໃຫຍ່ ແລະມີຄວາມໝາຍປະຫວັດສາດ, ປະກອບສ່ວນເຮັດໃຫ້ “ປະເທດຂອງພວກເຮົາບໍ່ເຄີຍມີໂຊກມີໄຊ, ທ່າແຮງ, ຖານະຕຳແໜ່ງ ແລະ ກຽດສັກສີສາກົນທີ່ມີໃນປະຈຸບັນນີ້ ”(7). ຢ່າງໃດກໍ່ຕາມ, ຕໍ່ໜ້າການຜັນແປຢ່າງວ່ອງໄວ ແລະ ຄາດເດົາບໍ່ໄດ້ໃນໂລກ ແລະ ສະຖານະການໃນພາກພື້ນ, ພວກເຮົາຈຳເປັນຕ້ອງສືບຕໍ່ເສີມຂະຫຍາຍບົດຮຽນປະຫວັດສາດອັນລ້ຳຄ່າ ຈາກໄຊຊະນະດ້ຽນບຽນຝູ ໃນເງື່ອນໄຂໃໝ່.
ນັ້ນແມ່ນບົດຮຽນກ່ຽວກັບການຮັກສາແລະເພີ່ມທະວີບົດບາດນຳພາຂອງພັກ, ປັບປຸງຍົກສູງຄວາມສາມາດນຳພາ ແລະກຳລັງແຮງສູ້ຮົບຂອງພັກ ຢ່າງບໍ່ຢຸດຢັ້ງ. ໃນສະພາບການແລະເງື່ອນໄຂປະຈຸບັນ, ຈຳເປັນຕ້ອງເສີມສ້າງຄວາມເຂັ້ມແຂງທາງການເມືອງ, ຄວາມເຂັ້ມແຂງທາງແນວຄິດ ແລະ ການສ້າງຕັ້ງອົງການຈັດຕັ້ງຂອງພັກ. ຕ້ອງປ່ຽນແປງໃໝ່ແບບວິທີການນຳພາຂອງພັກໃຫ້ສອດຄ່ອງກັບຄວາມຕ້ອງການແລະໜ້າທີ່ຂອງການປະຕິວັດ; ດຳເນີນການອົບຮົມສຶກສາ ແລະຝຶກຝົນຫຼໍ່ຫຼອມ ຄຸນສົມບັດປະຕິວັດໃຫ້ພະນັກງານ ສະມາຊິກພັກຢ່າງສະໝ່ພສະເໝີ; ສົ່ງເສີມການຮ່ຳຮຽນແລະປະຕິບັດຕາມແນວຄິດ ຄຸນສົມບັດ ແລະ ແບບແຜນຂອງໂຮ່ຈີມິນ ໂດຍຕິດກັບຄວາມຮັບຜິດຊອບໃນການເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະພະນັກງານນຳພາ, ພະນັກງານຄຸ້ມຄອງ ແລະ ຫົວໜ້າສຳນັກງານ ອົງການຕ່າງໆ.
ນັ້ນແມ່ນບົດຮຽນກ່ຽວກັບການເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ ໃນສະພາບການໃໝ່. ໃນສະພາບການໃໝ່, ພັກກອມມູນິດຫວຽດນາມສືບຕໍ່ຢືນຢັນວ່າ: ຄວາມສາມັກຄີປວງຊົນທັງຊາດອັນຍິ່ງໃຫຍ່ແມ່ນແນວທາງຍຸດທະສາດຂອງການປະຕິວັດຫວຽດນາມ, ແມ່ນແຮງຜັກດັນແລະຊັບພະຍາກອນທີ່ຍິ່ງໃຫຍ່ ໃນການສ້າງສາແລະປົກປັກຮັກສາປະເທດຊາດ. ເພີ່ມທະວີກ້ອນກຳລັງມະຫາສາມັກຄີປວງຊົນທັງຊາດບົນພື້ນຖານຂອງພັນທະພາບລະຫວ່າງຊົນຊັ້ນກຳມະກອນ ກັບຊົນຊັ້ນຊາວນາ ແລະ ຖັນແຖວປັນຍາຊົນ ທີ່ນຳໂດຍພັກກອມມູນິດຫວຽດນາມ. ເສີມຂະຫຍາຍແຫຼ່ງກຳລັງ ແລະ ຄວາມສາມາດສ້າງສັນທັງໝົດ ຂອງປະຊາຊົນຢ່າງແຂງແຮງ ເພື່ອສ້າງສາ ແລະ ປົກປັກຮັກສາປະເທດຊາດ; ຖືເອົາເປົ້າໝາຍໃນການສ້າງຫວຽດນາມທີ່ມີສັນຕິພາບ, ເອກະລາດ, ເອກະພາບ, ຜືນແຜ່ນດິນອັນຄົບຖ້ວນ, ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ ເປັນຈຸດທີ່ຄ້າຍຄືກັນ; ເຄົາລົບຄວາມແຕກຕ່າງທີ່ຂັດຕໍ່ຜົນປະໂຫຍດຮ່ວມກັນຂອງຊາດ-ປະເທດຊາດ; ເຊີດຊູຈິດໃຈຊາດ, ມູນເຊື້ອຮັກຊາດ, ຄວາມຮັກຄວາມກະຕັນຍູ, ຄວາມເອື້ອເຟື້ອເຜື່ອແຜ່ ເພື່ອເຕົ້າໂຮມແລະສາມັກຄີຄົນຫວຽດນາມທັງໝົດ ທັງໃນແລະຕ່າງປະເທດ, ເພີ່ມທະວີການພົວພັນທີ່ໃກ້ຊິດສະໜິດແໜ້ນ ລະຫວ່າງປະຊາຊົນກັບພັກແລະລັດ, ສ້າງພະລັງຊີວິດໃໝ່ຂອງກ້ອນກຳລັງມະຫາສາມັກຄີປວງຊົນທັງຊາດ. ກອງປະຊຸມໃຫຍ່ຄັ້ງທີ XIII ຂອງພັກສືບຕໍ່ຢືນຢັນວ່າ: “ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ປະຊາທິປະໄຕສັງຄົມນິຍົມ ແລະ ສິດເປັນເຈົ້າຂອງຂອງປະຊາຊົນ”(8) ໃນພາລະກິດການສ້າງສາ ແລະປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງ. ການປຸກລະດົມແລະເສີມຂະຫຍາຍກ້ອນກຳລັງມະຫາສາມັກຄີປວງຊົນທັງຊາດ ຍາມໃດກໍ່ຕິດແໜ້ນກັບຄວາມຕ້ອງການເປີດກວ້າງປະຊາທິປະໄຕ ແລະ ການຮັກສາວິໄນຂອງຊາດໃນຊີວິດສັງຄົມ. ເພື່ອປະຕິບັດແນວທາງສັງຄົມນິຍົມແລະເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ” ໃຫ້ສຳເລັດມີໄຊ, ຈຳເປັນຕ້ອງສືບຕໍ່ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ເຈດຈຳນົງ, ມານະຈິດ, ພະລັງງານແລະຄວາມຄິດສ້າງສັນຂອງຊາວຫວຽດນາມໃນທຸກຂົງເຂດຂອງຊີວິດສັງຄົມ. ພິເສດ, ເພື່ອເສີມຂະຫຍາຍບົດບາດຂອງຕົນໃນຖານະແກນນຳຂອງກ້ອນກຳລັງມະຫາສາມັກຄີປວງຊົນທັງຊາດ ພັກເອງຕ້ອງເປັນແບບຢ່າງຂອງຄວາມສາມັກຄີແລະຄວາມເປັນເອກະພາບ. “ຄວາມສາມັກຄີພາຍໃນພັກຄືແກນກາງ ເປັນຮາກຖານທີ່ໝັ້ນຄົງ ເພື່ອສ້າງຄວາມສາມັກຄີໃນລະບົບການເມືອງ, ຄວາມມະຫາສາມັກຄີປວງຊົນທັງຊາດ ແລະ ສາມັກຄີສາກົນ”(9).
ນັ້ນແມ່ນບົດຮຽນກ່ຽວກັບຈິດໃຈເອກະລາດ, ການອີງໃສ່ຕົນເອງ ສ້າງຄວາມເຂັ້ມແຂງດ້ວຍຕົນເອງ, ການສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ. ສະພາບການໃໝ່ໃນປະຈຸບັນຈຳເປັນຕ້ອງມີຄວາມເຂົ້າໃຈທີ່ຖືກຕ້ອງ ແລະ ກຳແໜ້ນເນື້ອໃນຂອງການສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝ ເພື່ອຮັບປະກັນຜົນປະໂຫຍດສູງສຸດຊອງຊາດ-ປະເທດຊາດຫວຽດນາມ. ຖ້າຫາກໃນໃນໄລຍະສົງຄາມຕໍ່ຕ້ານພາກລ່າເມືອງຂຶ້ນແລະຈັກກະພັດ, ກໍາລັງແຮງຂອງຊາດໄດ້ຖືກກຳນົດວ່າແມ່ນນ້ຳໃຈຮັກຊາດ, ຄວາມສາມັກຄີແຫ່ງຊາດ, ເຈດຈຳນົງແລະຄວາມຕັດສິນໃຈສູ້ຮົບ ຕັດສິນໃຈຍາດເອົາໄຊຊະນະ, ແລ້ວປະຈຸບັນນີ້, ພັກກອມມູນິດຫວຽດນາມກໍ່ເນັ້ນເຖິງປັດໄຈ “ກຳລັງສັງລວມຂອງປວງຊົນທັງຊາດ” ດ້ວຍບັນຫາສຳຄັນຕົ້ນຕໍ່ແມ່ນຄວາມສາມັກຄີປວງຊົນທັງຊາດອັນຍິ່ງໃຫຍ່ - ແມ່ນການສັງລວມທ່າແຮງຂອງປະເທດໃນດ້ານເສດຖະກິດ, ການເມືອງ, ວັດທະນະທໍາ, ສັງຄົມ, ການປ້ອງກັນປະເທດແລະປ້ອງກັນຄວາມໝັ້ນຄົງ ຖືກສ້າງຂຶ້ນໂດຍຂະໜາດແລະຄຸນນະພາບຂອງປະຊາກອນຂອງປະເທດ ເຊິ່ງສະແດງອອກໃນການປະສົມປະສານລະຫວ່າງກຳລັງແຮງທາງດ້ານວັດຖຸ ແລະ ກຳລັງແຮງທາງດ້ານຈິດໃຈ. ກຳລັງແຮງຂອງຍຸກປະຈຸບັນປະກອບດ້ວຍບັນດາກະແສທີ່ສຳຄັນ, ພິເສດແມ່ນ ກະແສສັນຕິພາບ, ການຮ່ວມມື ແລະ ການພັດທະນາ; ລະບຽບໂລກທີ່ມີຫຼາຍຂົ້ວ ຫຼາຍສູນກາງ, ປະຊາທິປະໄຕ ແລະ ຄວາມສະເໝີພາບ; ກຳລັງແຮງຂອງກອງກຳລັງທີ່ກ້າວໜ້າໃນການຕໍ່ສູ້ເພື່ອສັນຕິພາບ ແລະ ກຳລັງແຮງຂອງປະເທດຕ່າງໆ./.
-----------------------------
(1) ແຜນການນາວາແມ່ນແຜນການຍຸດທະສາຂະໜາດໃຫຍ່ທີ່ມີຈຸດປະສົງເພື່ອທຳລາຍກອງທະຫານຫຼວງຂອງຫວຽດນາມສ່ວນໃຫຍ່ພາຍໃນ 18 ເດືອນ, ບັນລຸໄຊຊະນະທາງຍຸດທະສາດຢ່າງເດັດຂາດ, ບັງຄັບໃຫ້ຫວຽດນາມຕ້ອງເຈລະຈາຕາມເງື່ອນໄຂທີ່ລັດຖະບານຝຣັ່ງກຳນົດໄວ້, ເນື້ອແທ້ແມ່ນປ່ຽນຫວຽດນາມໃຫ້ເປັນອານານິຄົມ ແລະຖານທັບທະຫານຂອງພວກລ່າເມືອງຂຶ້ນຝຣັ່ງແລະພວກແຊກແຊງອາເມລິກາຢ່າງຖາວອນ.
(2) ທີ່ດ້ຽວບຽນຝູ, ຫວຽດນາມໄດ້ດັບສູນແລະຈັບສັດຕູໄປເປັນສະເລີຍເສິກກວ່າ 16.000 ຄົນ, ໃນນັ້ນມີກອງບັນຊາການທັງໝົດຂອງກຸ່ມຖານທີ່ໝັ້ນ ລວມມີ: ນາຍພົນ 1 ທ່ານ, ນາຍພັນ 16 ທ່ານ, ນາຍຮ້ອຍແລະນາຍທະຫານຊັ້ນລ່າງ 1.749 ຄົນ. ກອງກຳລັງສັດຕູທີ່ຖືກດັັບສູນລວມມີ: ກອງພັນທະຫານລາບຊັ້ນຍອດ 17 ກອງພັນ (ລວມກອງພັນຈ້ອງຊູຊີບ 7 ກອງພັນ), ກອງພັນປືນໃຫຍ່ 3 ກອງພັນ, ກອງພັນທະຫານຊ່າງເກືອບ 1 ກອງພັນ ລວມເປັນ 21 ກອງພັນ. ໂດຍລວມແລ້ວ ໃນສະໜາມຮົບທົ່ວປະເທດນັ້ນ ການບຸກໂຈມຕີໃນລະດູໜາວ-ລະດູບານໃໝ່ນີ້, ຫວຽດນາມໄດ້ດັບສູນສັດຕູ 112.000 ຄົນ, ເຊິ່ງກໍ່ຄືໜຶ່ງສ່ວນສີ່ຂອງກອງກຳລັງຕິດອາວຸດຂອງສັດຕູໃນອິນດູຈີນ, ໃນນັ້ນ 25 ກອງພັນຖືກດັບສູນຢ່າງສິ້ນເຊິງ. ຈຳນວນເຮືອບິນຖິ້ມລະເບີດ, ເຮືອບິນຮົບ ແລະຂົນສົ່ງ, ນັບທັງເຮືອບິນຖິ້ມລະເບີດ ບີ. 24 ແລະເຮືອບິນຂົນສົ່ງໜັກ ຊີ. 119 ຂອງອາເມລິການ ທີ່ຖືກຍິງແລະທຳລາຍໃນດ້ຽນບຽນຝູແມ່ນ 62 ລຳ, ລວມທັງໃນສະໜາມຮົບທົ່ວປະເທດແມ່ນ 177 ລຳ, ນັ້ນແມ່ນພາກສ່ວນທີ່ສຳຄັນຂອງກອງທັບອາກາດສັດຕູຢູ່ອິນດູຈີນ. ເບິ່ງ: ພົນເອກ ຫວໍ ງວຽນ ຢ໊າບ: ດ້ຽນບຽນຝູ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2013, ໜ້າ 205-206
(3) ພົນເອກ ຫວໍ ງວຽນ ຢ໊າບ: ດ້ຽນບຽນຝູ, ປຶ້ມທີ່ໄດ້ແນະນຳ, ໜ້າ 359
(4) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 14, ໜ້າ 315
(5) ໃນການຮົບຂັ້ນເດັດຂາດນີ້, ປະທານ ໂຮ່ຈີມິນ ໄດ້ໃຫ້ຄວາມໄວ້ເນື້ອເຊື່ອໃຈຕໍ່ພົນເອກ ຫວໍ ງວຽນ ຢ໊າບ ແລະ ແນະນຳວ່າ: “ບັ້ນຮົບນີ້ມີຄວາມສຳຄັນຫຼາຍ ທັງທາງດ້ານການເມືອງ ແລະການທະຫານ, ເຮົາຕ້ອງຊະນະ, ຖ້າເຮົາໝັ້ນໃຈວ່າຈະຊະນະກໍ່ສູ້, ຖ້າເຮົາບໍ່ໝັ້ນໃຈວ່າຈະຊະນະກໍ່ຢ່າສູ້”. ດັ່ງນັ້ນ, ທີ່ສະໜາມຮົບດ້ຽນບຽນຝູ, ຄະນະກຳມະການພັກ, ກອງບັນຊາການບັ້ນຮົບໄດ້ເປັນເຈົ້າການ ແລະ ປະດິດສ້າງໃນການປ່ຽນທິດນຳການສູ້ຮົບ, ປ່ຽນຈາກ “ສູ້ໄວ, ຊະນະໄວ” ມາເປັນ “ສູ້ຢ່າງໝັ້ນຄົງ, ກ້າວໜ້າຢ່າງໝັ້ນຄົງ”. ຕາມ: ພົນເອກ ຫວໍ ງວຽນ ຢ໊າບ: ດ້ຽນບຽນຝູ - ການພົບປະປະຫວັດສາດ, ສພຈ. ກອງທັບປະຊາຊົນ, ຮ່າໄນ້ຍ, 2000, ໜ້າ 66. ເມື່ອວັນທີ 30 ມັງກອນ 1954, ພົນເອກ ຫວໍ ງວຽນ ຢ໊າບ ໄດ້ສົ່ງຈົດໝາຍລາຍງານເລື່ອງນີ້ເຖິງປະທານໂຮ່ຈີມິນ, ເລຂາທິການໃຫຍ່ ເຈື່ອງຈິງ ແລະ ກົມການເມືອງສູນກາງວ່າ: “ພວກຂ້າພະເຈົ້າຮັບຮູ້ວ່າ, ຕໍ່ສັດຕູທີ່ເສີມກຳລັງຄືຢູ່ດ້ຽນບຽນຝູ, ເຮົາຕ້ອງໃຊ້ວິທີການດັບສູນສັດຕູເທື່ອລະກ້າວ”. ແຜນການ “ສູ້ຢ່າງໝັ້ນຄົງ, ກ້າວໜ້າຢ່າງໝັ້ນຄົງ” ຂອງຄະນະກຳມະການພັກບັ້ນຮົບ ໄດ້ຮັບການອະນຸມັດຈາກກົມການເມືອງສູນກາງ. ຕາມ: ດ້ຽນບຽນຝູ - ກອງປະຊຸມເຊີແນວ, ເອກະສານຂອງພັກ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2014, ໜ້າ 214-221.
(6) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 14, ໜ້າ 271.
(7) ເອກະສານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 25.
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 50.
(9) ເອກະສານກອງປະຊຸມຄັ້ງທີແປດ ຂອງຄະນະບໍລິຫານງານສູນກາງພັກສະໄໝທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2023, ໜ້າ 139.
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1036 (ເດືອນເມສາ 2024)
