ປຶ້ມ “ສະພາແຫ່ງຊາດໃນຂະບວນການປ່ຽນແປງໃໝ່ເພື່ອຕອບສະໜອງ
ຄວາມຕ້ອງການໃນການກໍ່ສ້າງແລະປັບປຸງລັດແຫ່ງອຳນາດກົດໝາຍ
ສັງຄົມນີຍົມຫວຽດນາມ ໃຫ້ສົມບູນແບບ” ຂອງເລຂາທິການໃຫຍ່
ຫງວຽນຝູຈ້ອງ ສືບຕໍ່ກຳນົດທິດໃຫ້ສະພາແຫ່ງຊາດປ່ຽນແປງໃໝ່
ແລະ ພັດທະນາຢ່າງບໍ່ຢຸດຢັ້ງ
ຄວາມຕ້ອງການໃນການກໍ່ສ້າງແລະປັບປຸງລັດແຫ່ງອຳນາດກົດໝາຍ
ສັງຄົມນີຍົມຫວຽດນາມ ໃຫ້ສົມບູນແບບ” ຂອງເລຂາທິການໃຫຍ່
ຫງວຽນຝູຈ້ອງ ສືບຕໍ່ກຳນົດທິດໃຫ້ສະພາແຫ່ງຊາດປ່ຽນແປງໃໝ່
ແລະ ພັດທະນາຢ່າງບໍ່ຢຸດຢັ້ງ
ວກ. - ປຶ້ມ“ສະພາແຫ່ງຊາດໃນຂະບວນການປ່ຽນແປງໃໝ່ເພື່ອຕອບສະໜອງຄວາມຕ້ອງການໃນການກໍ່ສ້າງແລະປັບປຸງລັດແຫ່ງອຳນາດກົດໝາຍສັງຄົມນີຍົມຫວຽດນາມໃຫ້ສົມບູນແບບ” ຈັດພິມໂດຍຄະນະປະຈຳສະພາແຫ່ງຊາດ, ສຳນັກພິມຈຳໜ່າຍການເມືອງແຫ່ງຊາດ ສື້ເຖິ້ດ ແລະ ບັນດາອົງການທີ່ກ່ຽວຂ້ອງ ໄດ້ຈັດເປັນລະບົບການນຳພາ ຊີ້ນຳ ແລະກຳນົດທິດ ຂອງສະຫາຍເລຂາທິການໃຫຍ່ ຫງວຽນຝູຈ້ອງ ຕໍ່ໜ້າທີ່ການກໍ່ສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມໃຫ້ສົມບູນແບບໂດຍທົ່ວໄປ ແລະ ຕໍ່ການຈັດຕັ້ງແລະການເຄື່ອນໄຫວຂອງສະພາແຫ່ງຊາດຫວຽດນາມໂດຍສະເພາະ.
ສະຫາຍເລຂາທິການໃຫຍ່ ຫງວຽນຝູຈ້ອງ ກັບບັນດາ ສສ ເຂົ້າຮ່ວມກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດຊຸດທີ XV _ພາບ: TTXVN
ປຶ້ມດັ່ງກ່າວປະກອບສ່ວນຊີ້ແຈ້ງການຜັນຂະຫຍາຍແນວຄິດທິດສະດີຂອງພັກກອມມູນິດຫວຽດນາມ ກ່ຽວກັບການກໍ່ສ້າງລັດແຫ່ງອຳນາດກົດໝາຍສັງຄົມນິຍົມໂດຍທົ່ວໄປ ແລະ ການປັບປຸງຍົກສູງຄວາມສາມາດດ້ານການຈັດຕັ້ງ, ປະສິດທິພາບແລະປະສິດທິຜົນການເຄື່ອນໄຫວຂອງສະພາແຫ່ງຊາດຫວຽດນາມ ໂດຍສະເພາະ. ປຶ້ມດັ່ງກ່າວໄດ້ຄັດເລືອກເອົາ 95 ບົດຂຽນ, ບົດກ່າວປາໄສ, ສຳພາດຂອງສະຫາຍ ຫງວຽນຝູຈ້ອງ ໂດຍແບ່ງອອກເປັນ 3 ພາກຄື: ພາກທີ 1: ການກໍ່ສ້າງ ແລະ ປັບປຸງລະບອບລະບຽບກົດໝາຍສັງຄົມນິຍົມຂອງລັດຫວຽດນາມ; ພາກທີ 2: ການປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ; ພາກທີ 3: ຄວາມໄວ້ເນື້ອເຊື່ອໃຈ, ການສະໜັບສະໜູນ, ຄວາມເຫັນດີເຫັນພ້ອມ ແລະ ຄວາມຮັກແພງຂອງພະນັກງານ, ປະຊາຊົນ ແລະ ເພື່ອນມິດສາກົນທີ່ມີຕໍ່ສະຫາຍ ຫງວຽນຝູຈ້ອງ. ພິເສດ, ດ້ວຍຮູບຖ່າຍທີ່ລ້ຳຄ່າກວ່າ 100 ແຜ່ນທີ່ໄດ້ຄັດເລືອກ, ປື້ມດັ່ງກ່າວ ຍັງສະແດງໃຫ້ເຫັນບັນດາການເຄື່ອນໄຫວຂອງສະຫາຍ ຫງວຽນຝູຈ້ອງ ໃນໄລຍະຕ່າງໆ ຕິດພັນກັບບັນດາການເຄື່ອນໄຫວຂອງສະພາແຫ່ງຊາດ, ກັບຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດ.
ປຶ້ມດັ່ງກ່າວໄດ້ສະແດງໃຫ້ເຫັນເຖິງແນວຄິດທີ່ສອດຄ່ອງ, ຍຸດທະສາດ ແລະ ວິໄສທັດອັນເລິກເຊິ່ງຂອງສະຫາຍເລຂາທິການໃຫຍ່ ກ່ຽວກັບການກໍ່ສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມຂອງຫວຽດນາມ “ທີ່ເປັນຂອງປະຊາຊົນ, ໂດຍປະຊາຊົນ, ເພື່ອປະຊາຊົນຢ່າງແທ້ຈິງ”, “ແມ່ນເຄື່ອງມືສະແດງອອກ ແລະ ປະຕິບັດສິດເປັນເຈົ້າຂອງປະຊາຊົນ, ຮັບປະກັນ ແລະ ປົກປັກຮັກສາຜົນປະໂຫຍດຂອງປະຊາຊົນສ່ວນຫຼາຍ”. ນີ້ແມ່ນບັນດາບັນຫາທີ່ມີຄວາມໝາຍຍຸດທະສາດ ແລະ ມີຄວາມໝາຍລວມ, ແມ່ນພື້ນຖານດ້ານທິດສະດີແລະພຶດຕິກຳ ແລະ ມີຄວາມໝາຍອັນເລິກເຊິ່ງ, ມີເນື້ອໃນສຳຄັນ ແລະກຳນົດທິດທາງໃນວຽກງານກໍ່ສ້າງ ແລະ ພັດທະນາປະເທດຢ່າງຮອບດ້ານ.
ບັນດາຈຸດເດັ່ນທີ່ສຳຄັນໃນປຶ້ມຂອງສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ສະແດງອອກໃນ 3 ດ້ານພື້ນຖານຄື:
ທີ່ໜຶ່ງ, ການສະຫຼຸບຜົນງານໃນການພັດທະນາທິດສະດີ ແລະ ສະຫຼຸບພຶດຕິກຳຂອງພັກກອມມູນິດຫວຽດນາມ ກ່ຽວກັບລັດທິສັງຄົມນິຍົມ ແລະ ເສັ້ນທາງກ້າວໄປສູ່ສັງຄົມນິຍົມຢູ່ຫວຽດນາມ ດ້ວຍການພິນິດພິເຄາະຢ່າງມີວິທະຍາສາດ, ຄ່ອງແຄ້ວ ແລະ ເຕັມໄປດ້ວຍການຊັກຊວນ.
ສະຫາຍຢືນຢັນວ່າ: ການກ້າວໄປສູ່ລັດທິສັງຄົມນິຍົມແມ່ນຄວາມມຸ່ງມາດປາດຖະໜາຂອງປະຊາຊົນຫວຽດນາມ, ເປັນການເລືອກອັນຖືກຕ້ອງຂອງປະທານ ໂຮ່ຈີມິນ ແລະ ພັກກອມມູນິດຫວຽດນາມ, ສອດຄ່ອງກັບທ່າອ່ຽງພັດທະນາຂອງປະຫວັດສາດ; “ສັງຄົມສັງຄົມນິຍົມທີ່ຊາວຫວຽດນາມ ພວມມານະພະຍາຍາມກໍ່ສ້າງ ແມ່ນສັງຄົມທີ່ປະຊາຊົນຮັ່ງມີ, ປະເທດເຂັ້ມແຂງ, ມີປະຊາທິປະໄຕ, ຍຸຕິທຳ, ອາລະຍະທຳ; ໂດຍປະຊາຊົນເປັນເຈົ້າຂອງ; ມີເສດຖະກິດທີ່ພັດທະນາສູງ, ອີງໃສ່ກຳລັງການຜະລິດທີ່ທັນສະໄໝ ແລະ ການພົວພັນການຜະລິດທີ່ກ້າວໜ້າເໝາະສົມ; ມີວັດທະນະທຳທີ່ກ້າວໜ້າ ແລະ ອຸດົມສົມບູນໄປດ້ວຍເອກະລັກປະຈຳຊາດ; ປະຊາຊົນມີຊີວິດທີ່ອີ່ມໜຳສຳລານ, ເສລີ, ຜາສຸກ ແລະ ມີເງື່ອນໄຂໃນການພັດທະນາຢ່າງຮອບດ້ານ; ບັນດາຊົນເຜົ່າໃນວົງຄະນາຍາດຫວຽດນາມ ລ້ວນແຕ່ສະເໝີພາບ, ສາມັກຄີ, ເຄົາລົບນັບຖື ແລະ ຊ່ວຍເຫຼືອເຊິ່ງກັນແລະກັນ ພ້ອມກັນພັດທະນາ; ມີລັດແຫ່ງອຳນາດກົດໝາຍສັງຄົມນິຍົມ ຂອງປະຊາຊົນ, ໂດຍປະຊາຊົນ, ເພື່ອປະຊາຊົນ ພາຍໃຕ້ການນໍາພາຂອງພັກກອມມູນິດ; ມີການພົວພັນມິດຕະພາບ ແລະ ການຮ່ວມມືກັບບັນດາປະເທດໃນໂລກ. ຮູບແບບລັດທິສັງຄົມນິຍົມຫວຽດນາມ ແມ່ນການພັດທະນາທິດສະດີຢ່າງປະດິດສ້າງສະເພາະຂອງພັກກອມມູນິດຫວຽດນາມ. ເພື່ອເຮັດໃຫ້ຮູບແບບດັ່ງກ່າວເປັນຮູບປະທຳ: “ຈຳຕ້ອງຜ່ານສະໄໝຂ້າມຜ່ານອັນຍາວນານ ດ້ວຍຫຼາຍຂັ້ນຕອນ, ຫຼາຍຮູບແບບການຈັດຕັ້ງເສດຖະກິດແລະສັງຄົມທີ່ແຊກຊ້ອນພັນ, ມີການຕໍ່ສູ້ລະຫວ່າງອັນເກົ່າແລະອັນໃໝ່”. ສະໄໝຂ້າມຜ່ານໄປສູ່ລັດທິສັງຄົມນິຍົມແມ່ນພາລະກິດແຫ່ງ “ການປະດິດສ້າງທີ່ຍິ່ງໃຫຍ່”, “ເຕັມໄປດ້ວຍສິ່ງທ້າທາຍ ແລະຄວາມຫຍຸ້ງຍາກ”, “ເປົ້າໝາຍໄລຍະຍາວ”, “ບໍ່ອາດຟ້າວຟັ່ງໄດ້”.
ຈາກການວິເຄາະທາງເລືອກທີ່ຫຼີກລ່ຽງບໍ່ໄດ້, ພາວະວິໄສ ແລະ ຖືກຕ້ອງຂອງພັກກອມມູນິດຫວຽດນາມ ແລະປະຊາຊົນຫວຽດນາມ ກ່ຽວກັບເສັ້ນທາງໄປສູ່ລັດທິສັງຄົມນິຍົມ, ສະຫາຍເລຂາທິການໃຫຍ່ ໄດ້ຢັ້ງຢືນເຖິງລັກສະນະອັນດີງາມຂອງປະຊາທິປະໄຕໃນສັງຄົມນິຍົມ ແລະ ລັດແຫ່ງອຳນາດກົດໝາຍສັງຄົມນິຍົມຂອງລັດຫວຽດນາມ; ຢືນຢັນຄວາມຖືກຕ້ອງ ແລະ ຄວາມຄິດປະດິດສ້າງຂອງພັກກອມມູນິດຫວຽດນາມ ໃນການພັດທະນາເສດຖະກິດຕະຫຼາດຕາມທິດສັງຄົມນິຍົມ ແລະ ບັນດາຜົນງານອັນໃຫຍ່ຫຼວງຂອງຂະບວນການປ່ຽນແປງໃໝ່ປະເທດ; ພິເສດແມ່ນ ບົດບາດນຳພາຂອງພັກ ເຊິ່ງເປັນປັດໄຈຕັດສິນໄຊຊະນະແຫ່ງການປ່ຽນແປງໃໝ່ ແລະ ກໍ່ສ້າງປະເທດຊາດ. ບົນພື້ນຖານການຕີລາຄາບັນດາຜົນງານທີ່ບັນລຸໄດ້ ແລະ ຂໍ້ຈຳກັດຂອງການປ່ຽນແປງໃໝ່ປະເທດ, ສະຫາຍຍັງໄດ້ສະເໜີບັນດາວິທີແກ້ໄຂ ເພື່ອພັດທະນາປະເທດໃນສະໄໝຂ້າມຜ່ານ, ໃນນັ້ນການສ້າງລັດແຫ່ງອຳນາດກົດໝາຍສັງຄົມນິຍົມມີຄວາມໝາຍສຳຄັນທີ່ສຸດ ເພື່ອຊຸກຍູ້ປະຊາທິປະໄຕສັງຄົມນິຍົມ, ຮັບປະກັນອຳນາດລັດເປັນຂອງປະຊາຊົນ; ປົກປ້ອງ ແລະ ສົ່ງເສີມສິດທິມະນຸດ ແລະ ສິດພົນລະເມືອງ ແລະ ເສີມຂະຫຍາຍບົດບາດນຳພາຂອງພັກໃນເງື່ອນໄຂໃໝ່.
ທີ່ສອງ, ສະແດງໃຫ້ເຫັນເຖິງທັດສະນະທີ່ເປັນເອກະພາບຂອງພັກກອມມູນິດຫວຽດນາມ ກ່ຽວກັບການກໍ່ສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມໃຫ້ສົມບູນແບບ ແລະ ຊີ້ແຈ້ງລັກສະນະ, ເປົ້າໝາຍ, ຫຼັກການປະຕິບັດ ແລະ ຄວາມຮຽກຮ້ອງຕ້ອງການທີ່ໄດ້ວາງອອກ ເພື່ອສ້າງລັດຂອງພວກເຮົາໃຫ້ສົມບູນແບບໃນສະຖານະການປະຈຸບັນ.
ໃນການປຶກສາຫາລືກ່ຽວກັບທາດແທ້ຂອງລັດຫວຽດນາມ, ສະຫາຍໄດ້ຊີ້ອອກຢ່າງຈະແຈ້ງເຖິງຄວາມແຕກຕ່າງຈາກລັດແຫ່ງອຳນາດກົດໝາຍນາຍທຶນຢູ່ບ່ອນ: “ອຳນາດກົດໝາຍພາຍໃຕ້ລະບອບທຶນນິຍົມແມ່ນເຄື່ອງມືປົກປັກຮັກສາ ແລະ ຮັບໃຊ້ສິດຜົນປະໂຫຍດຂອງຊົນຊັ້ນນາຍທຶນ, ໃນຂະນະທີ່ອຳນາດກົດໝາຍພາຍໃຕ້ລະບອບສັງຄົມນິຍົມແມ່ນເຄື່ອງມືສະແດງອອກ ແລະ ປະຕິບັດສິດອຳນາດຂອງປະຊາຊົນ, ຮັບປະກັນ ແລະ ປົກປັກຮັກສາຜົນປະໂຫຍດຂອງປະຊາຊົນສ່ວນຫຼາຍ”. ລັດແຫ່ງອຳນາດກົດໝາຍສັງຄົມນິຍົມຂອງຫວຽດນາມ ແມ່ນລັດຂອງປະຊາຊົນ, ໂດຍປະຊາຊົນ, ເພື່ອປະຊາຊົນ. ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມ ເພື່ອຮັກສາ ແລະ ເສີມຂະຫຍາຍລັກສະນະປະຊາຊົນ, ປະຊາທິປະໄຕ ແລະ ມະນຸດສະທຳຂອງລັດເຮົາ, “ການສ້າງປະຊາທິປະໄຕສັງຄົມນິຍົມ, ຮັບປະກັນສິດອຳນາດຂອງປະຊາຊົນຢ່າງແທ້ຈິງ ແມ່ນວຽກງານສຳຄັນ, ຍາວນານ ຂອງການປະຕິວັດຫວຽດນາມ”.
ໃນຂະບວນວິວັດການສ້າງສາ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມໃຫ້ສົມບູນແບບ, ສະຫາຍເລຂາທິການໃຫຍ່ກໍ່ເນັ້ນໜັກຢູ່ສະເໝີວ່າ: “ຢຶດໝັ້ນ ແລະໝູນໃຊ້, ພັດທະນາລັດທິມາກ-ເລນິນ ແລະ ແນວຄິດໂຮ່ຈິມິນຢ່າງປະດິດສ້າງ; ຢຶດໝັ້ນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມ; ຮັບປະກັນການນຳພາ, ການກຳອຳນາດຂອງພັກ, ທາດແທ້ຊົນຊັ້ນກຳມະກອນ, ລັກສະນະປະຊາຊົນ, ລັກສະນະຊາດຂອງລັດແຫ່ງອຳນາດກົດໝາຍສັງຄົມນິຍົມ”; “ປະຕິບັດຕາມຫຼັກການຢ່າງສະເໝີຕົ້ນສະເໝີປາຍ: ອຳນາດລັດທັງໝົດເປັນຂອງປະຊາຊົນ, ເສີມຂະຫຍາຍສິດເປັນເຈົ້າຂອງປະຊາຊົນ”; ຕ້ອງ “ເຄົາລົບລັດຖະທຳມະນູນ ແລະ ກົດໝາຍ” ແລະ “ໃຫ້ຄວາມສຳຄັນກັບການສຶກສາ, ປັບປຸງຍົກສູງຄຸນສົມບັດສັງຄົມນິຍົມ”, ຖືວ່າ “ປະຊາຊົນເປັນໃຈກາງ, ເປົ້າໝາຍ, ອັດຕະພາບ ແລະ ກຳລັງຂັບເຄື່ອນການພັດທະນາປະເທດຊາດ”; “ເຄົາລົບ, ຮັບປະກັນ ແລະ ປົກປ້ອງສິດທິມະນຸດ ແລະ ສິດພົນລະເມືອງ”; ຮັບປະກັນ “ລັກສະນະກວມລວມ, ຄົບຊຸດ, ເຊື່ອມໂຍງລະຫວ່າງການປ່ຽນແປງໃໝ່ນິຕິບັນຍັດ, ການປະຕິຮູບດ້ານບໍລິຫານ, ການປະຕິຮູບຕຸລາການ” ແລະ “ການສົມທົບຢ່າງກົມກຽວລະຫວ່າງການສືບທອດ, ຄວາມໝັ້ນຄົງ ກັບການປ່ຽນແປງໃໝ່, ການພັດທະນາ”...
ສະຫາຍຢືນຢັນວ່າ: ໃນໄລຍະປະຈຸບັນ, ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຢູ່ຫວຽດນາມ ຍາມໃດກໍ່ຕ້ອງຕັ້ງຢູ່ສະພາບແວດລ້ອມການປ່ຽນແປງໃໝ່ແບບວິທີການນຳພາຂອງພັກ, ກໍ່ສ້າງພັກແລະລະບອບການເມືອງທີ່ສະອາດປອດໃສແລະໝັ້ນຄົງເຂັ້ມແຂງ; ຕິດພັນກັບການຮັກສາຄວາມໝັ້ນຄົງດ້ານການເມືອງ, ປ່ຽນແປງໃໝ່ລະບົບການເມືອງຢ່າງຮອບດ້າຕາມທິດກະທັດລັດຮັກກຸມ, ດຳເນີນການຢ່າງມີປະສິດທິພາບ, ປະສິດທິຜົນ ແລະ ພັດທະນາແບບຍືນຍົງ.
ທັດສະນະຂອງສະຫາຍເລຂາທິການໃຫຍ່ ຫງວຽນຝູຈ້ອງ ກ່ຽວກັບການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມ ແມ່ນພາກສ່ວນໜຶ່ງທີ່ສຳຄັນຂອງລະບົບທັດສະນະກ່ຽວກັບລັດທິສັງຄົມນິຍົມ ແລະ ເສັ້ນທາງໄປສູ່ສັງຄົມນິຍົມຢູ່ຫວຽດນາມ; ປະກອບສ່ວນເພີ່ມພູນຄູນສ້າງອຸດົມຄະຕິ, ການເມືອງ - ກົດໝາຍ, ພື້ນຖານວິທະຍາສາດ ແລະ ທິດທາງໃຫ້ແກ່ການພັດທະນາຂອງພັກ ແລະ ປະເທດໃນໄລຍະປະຈຸບັນ.
ທີ່ສາມ, ສະຫຼຸບແລະຕີລາຄາໄລຍະການການເຄື່ອນໄຫວປ່ຽນແປງໃໝ່ ແລະ ພັດທະນາຂອງສະພາແຫ່ງຊາດຫວຽດນາມ ໃນແຕ່ລະດ້ານການເຄື່ອນໄຫວ ແລະ ແຕ່ລະໄລຍະ; ພ້ອມກັນນັ້ນ, ຍັງມີການກຳນົດທິດແລະຊີ້ນຳຢ່າງໃກ້ຊິດ ເພື່ອໃຫ້ສະພາແຫ່ງຊາດປ່ຽນແປງໃໝ່ການຈັດຕັ້ງແລະການເຄື່ອນໄຫວຢ່າງບໍ່ຢຸດຢັ້ງ ໃຫ້ນັບມື້ນັບສົມບູນແບບ ແລະ ມີປະສິດທິຜົນກວ່າອີກ.
ໃນຖານະເປັນຜູ້ແທນສະພາແຫ່ງຊາດ 5 ສະໄໝຕິດຕໍ່ກັນ (ແຕ່ປີ 2002 ເຖິງປະຈຸບັນ), ແລະ ໃນຂະນະດຽວກັນເປັນປະທານສະພາແຫ່ງຊາດ ຊຸດທີ XI, XII (ເດືອນກໍລະກົດ 2006 – ເດືອນກໍລະກົດ 2011), ສະຫາຍ ຫງວຽນຝູຈ້ອງ ໄດ້ເອົາໃຈໃສ່, ສະເໜີທິດທາງສະເພາະ. ປ່ຽນແປງໃໝ່ການຈັດຕັ້ງແລະການເຄື່ອນໄຫວຂອງສະພາແຫ່ງຊາດໃນແຕ່ລະດ້ານ; ປັບປຸງປະສິດທິຜົນການເຄື່ອນໄຫວຂອງແຕ່ລະອົງການ ຫົວໜ່ວຍ ເພື່ອກໍ່ສ້າງສະພາແຫ່ງຊາດໃຫ້ເຂັ້ມແຂງ, ມີປະສິດທິຜົນ, ແທດຈິງ, ຕອບສະໜອງຄວາມຮຽກຮ້ອງຕ້ອງການຂອງການກໍ່ສ້າງ ແລະ ປົກປັກຮັກສາປະເທດຊາດຫວຽດນາມ ໃນໄລຍະໃໝ່.
ຈາກພຶດຕິກຳການຈັດຕັ້ງ ແລະ ການເຄື່ອນໄຫວຕົວຈິງຂອງສະພາແຫ່ງຊາດ, ສະຫາຍໄດ້ຢັ້ງຢືນເຖິງບົດບາດ ແລະ ທີ່ຕັ້ງອັນສຳຄັນຂອງສະພາແຫ່ງຊາດ, ສະເໝີຕົ້ນສະເໝີປາຍ ແລະ ຕິດພັນກັບປະເທດຊາດ, ປະຕິບັດພາລະ ໜ້າທີ່ ແລະ ສິດອຳນາດຕາມລັດຖະທຳມະນູນແລະກົດໝາຍຢ່າງມີປະສິດທິຜົນ; ການປະກອບສ່ວນອັນໃຫຍ່ຫຼວງ ແລະ ສຳຄັນເຂົ້າໃນພາລະກິດຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ. ສະຫາຍຊີ້ໃຫ້ເຫັນເຖິງໝາກຜົນທີ່ບັນລຸໄດ້ໃນການກໍ່ສ້າງ ແລະ ປັບປຸງລະບົບກົດໝາຍໃຫ້ສົມບູນແບບ; ການເຄື່ອນໄຫວຕິດຕາມກວດກາສູງສຸດ; ການຊັກຖາມແລະການຕອບຄໍາຊັກຖາມ; ການເຄື່ອນໄຫວຕັດສິນຕົກລົງບັນຫາສຳຄັນຂອງປະເທດ; ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດ. ສະຫາຍຢືນຢັນວ່າ, ສະພາແຫ່ງຊາດ “ພັດທະນາຢ່າງບໍ່ຢຸດຢັ້ງ, ເປັນເຈົ້າການ, ປະຕິບັດປະຊາທິປະໄຕຢ່າງແທດຈິງ ແລະ ມີປະສິດທິຜົນ, ມີການປະດິດສ້າງຫຼາຍຢ່າງ ທັງດ້ານແນວຄິດ ແລະ ການປະຕິບັດ, ໄດ້ຮັບຄວາມໄວ້ວາງໃຈຈາກຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດເພີ່ມຂຶ້ນ”, “ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ເປັນຂອງປະຊາຊົນ, ໂດຍປະຊາຊົນ ແລະເພື່ອປະຊາຊົນ ພາຍໃຕ້ການນຳພາຂອງພັກ, ເສີມຂະຫຍາຍສິດເປັນເຈົ້າຂອງປະຊາຊົນ” ແລະ “ເຮັດໃຫ້ມີຄວາມຮັບຮູ້ຢ່າງເລິກເຊິ່ງກ່ຽວກັບການສ້າງສາປະຊາທິປະໄຕສັງຄົມນິຍົມ, ປະກອບສ່ວນເພີ່ມທະວີຄວາມຜູກພັນສະໜິດແໜ້ນລະຫວ່າງປະຊາຊົນ ກັບພັກແລະລັດ, ສ້າງຮູບແບບການເຄື່ອນໄຫວ ແລະ ປະຊາທິປະໄຕຂອງລະບົບການເມືອງສັງຄົມນິຍົມຢູ່ປະເທດເຮົາ ໃນສາຍຕາຂອງເພື່ອນມິດສາກົນ.” ພ້ອມກັນນັ້ນ, ສະຫາຍຍັງໄດ້ຊີ້ອອກຢ່າງກົງໄປກົງມາເຖິງຂໍ້ບົກຜ່ອງ ແລະ ຂໍ້ຈຳກັດທີ່ຕ້ອງແກ້ໄຂໃນແຕ່ລະດ້ານສະເພາະ ຂອງການເຄື່ອນໄຫວຂອງສະພາແຫ່ງຊາດ.
ບົນພື້ນຖານທັດສະນະ ແລະ ແນວທາງຂອງພັກ, ໄຈ້ແຍກຢ່າງຈະແຈ້ງຄວາມຮຽກຮ້ອງຕ້ອງການກ່ຽວກັບການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ, ສະຫາຍ ຫງວຽນຝູຈ້ອງ ໄດ້ຊີ້ແຈ້ງວ່າ: ຍູ້ແຮງການເຄື່ອນໄຫວນິຕິບັນຍັດ, ກໍ່ສ້າງ ແລະ ປັບປຸງລະບົບກົດໝາຍໃຫ້ເປັນຄົບຊຸດ, ເປັນເອກະພາບ, ເປັນໄປໄດ້, ເປີດກວ້າງ ແລະ ໂປ່ງໃສ; ສືບຕໍ່ປ່ຽນແປງໃໝ່ ແລະ ຍົກສູງປະສິດທິຜົນວຽກງານຕິດຕາມກວດກາ, ຮັບປະກັນຜົນປະໂຫຍດຂອງຊາດ ແລະ ບັນດາຊົນເຜົ່າຕາມຄວາມມຸ່ງມາດປາດຖະໜາຂອງປະຊາຊົນ; ສືບຕໍ່ຊຸກຍູ້ການເຄື່ອນໄຫວການຕ່າງປະເທດ, ເພີ່ມທະວີການພົວພັນທາງການທູດຂອງລັດຖະສະພາ, ເປັນເຈົ້າການ ແລະ ຕັ້ງໜ້າເຊື່ອມໂຍງ ແລະ ຮ່ວມມືກັບສາກົນ ເພື່ອເສີມຂະຫຍາຍບົດບາດ, ທີ່ຕັ້ງ, ຊື່ສຽງຂອງຫວຽດນາມ ໃນເວທີສາກົນ, ຮັກສາສະພາບແວດລ້ອມດ້ານການເມືອງສັນຕິພາບ, ສ້າງເງື່ອນໄຂສະດວກໃຫ້ແກ່ການປະຕິບັດສຳເລັດຜົນ ພາລະກິດການປ່ຽນແປງໃໝ່; ການຈັດຕັ້ງການເລືອກຕັ້ງຕ້ອງເປັນປະຊາທິປະໄຕ, ສະເໝີພາບ, ຖືກຕ້ອງຕາມກົດໝາຍ, ປອດໄພ ແລະ ປະຢັດ ເພື່ອເລືອກຕັ້ງແລະເລືອກຕັວແທນທີ່ມີຄຸນທຳ, ມີຄວາມສາມາດ ແລະ ສົມຄວນທີ່ຈະເປັນຕົວແທນຂອງປະຊາຊົນ ເຊິ່ງຈະປະກອບສ່ວນກໍ່ສ້າງ, ເສີມສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມທີ່ເປັນຂອງປະຊາຊົນ ໂດຍປະຊາຊົນ ເພື່ອປະຊາຊົນຢ່າງແທ້ຈິງ....
ພິເສດ, ສະຫາຍເລຂາທິການໃຫຍ່ຊີ້ອອກວ່າ, ຕ້ອງເພີ່ມທະວີການນຳພາຂອງພັກ, ເພາະວ່ານີ້ແມ່ນປັດໄຈຕັດສິນໃຫ້ສະພາແຫ່ງຊາດປະຕິບັດສຳເລັດທຸກໜ້າທີ່ສຳຄັນທີ່ປະຊາຊົນມອບໝາຍໃຫ້; ພ້ອມກັນນັ້ນ, ເຮົາຕ້ອງ “ເສີມຂະຫຍາຍປະຊາທິປະໄຕໃນການເຄື່ອນໄຫວຂອງສະພາແຫ່ງຊາດ”, ຖືວ່ານີ້ແມ່ນຄວາມຮຽກຮ້ອງຕ້ອງການສຳຄັນ “ສ້າງຄວາມເຂັ້ມແຂງ ແລະ ຄວາມຂະຫຍັນຂັນເຄື່ອນ, ມີຫົວຄິດປະດິດສ້າງຈາກລະບົບການເມືອງຂອງປະເທດເຮົາ”; ສະພາແຫ່ງຊາດຕ້ອງ “ໃກ້ຊິດ ສະໜິດສະໜົມກັບປະຊາຊົນຢ່າງແໜ້ນແຟ້ນ, ເຂົ້າໃຈຢ່າງເລິກເຊິ່ງກ່ຽວກັບແນວຄິດ, ຄວາມມຸ່ງມາດປາດຖະໜາຂອງປະຊາຊົນ, ເຄົາລົບຟັງ ແລະ ສະທ້ອນເຖິງຄວາມມຸ່ງມາດປາດຖະໜາຂອງປະຊາຊົນ”, ຖືວ່ານີ້ແມ່ນປັດໄຈສຳຄັນ, ຮັບປະກັນໃຫ້ສະພາແຫ່ງຊາດຕັດສິນໃຈຖືກຕ້ອງ, ແມ່ນອົງການຕາງໜ້າສູງສຸດຂອງປະຊາຊົນຢ່າງແທ້ຈິງ. ການປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດຕ້ອງໄດ້ດຳເນີນໄປຢ່າງ “ແໜ້ນແຟ້ນ, ຄົບຊຸດ”, “ມີແບບແຜນ”, “ມີຈຸດໝາຍທີ່ຈະແຈ້ງ, ມີບາດກ້າວທີ່ໜັກແໜ້ນ ແລະ ນຳມາເຊິ່ງໝາກຜົນຕົວຈິງ”...
ປຶ້ມດັ່ງກ່າວຍັງໄດ້ຄັດເລືອກເອົາ 57 ຄວາມເຫັນທີ່ເປັນເອກະພາບ, ສະແດງໃຫ້ເຫັນເຖິງທັດສະນະ, ຄວາມຄິດ, ຄວາມຮູ້ສຶກຂອງພະນັກງານ, ສະມາຊິກພັກ, ປັນຍາຊົນ, ບັນດາຜູ້ແທນສະພາແຫ່ງຊາດ ແລະ ຜູ້ມີສິດເລືອກຕັ້ງໃນທົ່ວປະເທດ ຕໍ່ການນຳພາຂອງພັກ ແລະຂອງສະຫາຍເລຂາທິການໃຫຍ່ ຫງວຽນຝູຈ້ອງ; ເຊື່ອໝັ້ນໃນກິດຈະການປ່ຽນແປງໃໝ່, ກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມທີ່ເປັນຂອງປະຊາຊົນ, ໂດຍປະຊາຊົນ, ເພື່ອປະຊາຊົນຢ່າງແທ້ຈິງ, ໃນນັ້ນສະພາແຫ່ງຊາດ ແມ່ນອົງການອຳນາດລັດສູງສຸດ, ອົງການຕາງໜ້າສູງສຸດຂອງປະຊາຊົນ ພາຍໃຕ້ການນຳພາຂອງພັກ.
ປຶ້ມ“ສະພາແຫ່ງຊາດໃນຂະບວນການປ່ຽນແປງໃໝ່ເພື່ອຕອບສະໜອງຄວາມຕ້ອງການໃນການກໍ່ສ້າງແລະປັບປຸງລັດແຫ່ງອຳນາດກົດໝາຍສັງຄົມນີຍົມຫວຽດນາມໃຫ້ສົມບູນແບບ” ສະແດງໃຫ້ເຫັນເຖິງແນວຄິດສະເໝີຕົ້ນສະເໝີປາຍ ແລະຄວາມໝັ້ນຄົງຂອງສະຫາຍເລຂາທິການໃຫຍ່ ກ່ຽວກັບການປ່ຽນແປງໃໝ່ ແລະປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມໃຫ້ສົມບຸນແບບ; ໃນນັ້ນ, ກຳນົດທິດໃຫ້ແກ່ການປ່ຽນແປງໃໝ່ທັງດ້ານແນວຄິດ ແລະ ການກະທຳ, ປ່ຽນແປງໃໝ່ການຈັດຕັ້ງ ແລະ ວິທີການເຄື່ອນໄຫວຂອງສະພາແຫ່ງຊາດ ແລະ ບັນດາອົງການຂອງສະພາແຫ່ງຊາດ, ຍົກສູງຄຸນນະພາບ ແລະ ຄວາມສາມາດຂອງບັນດາສະມາຊິກສະພາ ໃຫ້ເໝາະສົມກັບຄວາມຮຽກຮ້ອງຕ້ອງການ ແລະ ໜ້າທີ່ໃນສະພາບການໃໝ່./.
