ວ.ກ.ອອນໄລ - ຕອນບ່າຍວັນທີ 12 ມີນາ 2013, ຢູ່ທີ່ນະຄອນຫຼວງວຽງຈັນ ແຫ່ງ ສປປ ລາວ, ກອງປະຊຸມຂັ້ນສູງກ່ຽວກັບ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 7 (ກລວ 7) ໄດ້ຈັດຂຶ້ນຢ່າງເປັນທາງການ. ກອງປະຊຸມໂດຍແມ່ນທ່ານນາຍົກລັດຖະມົນຕີ ຫງວຽນເຕິນຢຸ໊ງ ເປັນປະທານ.
ນາຍົກລັດຖະມົນຕີຫວຽດນາມ ຫງວຽນເຕິນຢຸ໊ງ, ນາຍົກລັດຖະມົນຕີກຳປູເຈຍ ຮຸນແຊນ, ນາຍົກລັດຖະມົນຕີລາວ ທອງສິງ ທຳມະວົງ ລົງນາມໃນຖະແຫຼງການຮ່ວມ
ໃຫ້ກຽດເຂົ້າຮ່ວມກອງປະຊຸມມີທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ຮູນແຊນ ນາຍົກລັດຖະມົນຕີແຫ່ງ ລາຊະອານາຈັກກຳປູເຈຍ ແລະ ຜູ້ຕາງໜ້າບັນດາກະຊວງ ຂະແໜງການຂອງສາມປະເທດ.
ກອງປະຊຸມໄດ້ຮັບຟັງ ທ່ານປະທານກຳມາທິການປະສານງານ ລັດຖະມົນຕີກະຊວງແຜນການແລະການລົງທຶນຫວຽດນາມ ບູ່ຍກວາງວິງ ອ່ານລາຍງານຂອງກຳມາທິການປະສານງານລວມ ກລວ ກ່ຽວກັບຜົນງານຕ່າງໆ ໃນການຊຸກຍູ້ການຮ່ວມມືພັດທະນາ ຢູ່ເຂດສາມຫຼ່ຽມພັດທະນາ ກລວ, ພິເສດແມ່ນ ຄວາມຄືບໜ້າໃນການຜັນຂະຫຍາຍແຜນກຳນົດສັງລວມດັດສົມການພັດທະນາ ເສດຖະກິດ-ສັງຄົມ ເຂດສາມຫຼ່ຽມພັດທະນາ ກລວ ຮອດປີ 2020 ແລະ ບົດບັນທຶກຊ່ວຍຈຳກ່ຽວກັບນະໂຍບາຍບຸລິມະສິດໃຫ້ແກ່ ເຂດສາມຫຼ່ຽມພັດທະນາ ໄລຍະ 2010 - 2012. ລາຍງານຂອງກຳມາທິການປະສານງານ ກໍ່ໄດ້ນຳສະເໜີຂໍ້ສະເໜີຕ່າງໆ ກ່ຽວກັບທິດທາງ ແລະ ວິທີການຍົກສູງປະສິດທິຜົນການຮ່ວມມື ແລະ ດຶງດູດການລົງທຶນໃນເວລາທີ່ຈະມາເຖິງ.
ກ່ຽວກັບທິດທາງຮ່ວມມືໃນອະນາຄົດ, ບົນພື້ນຖານຄວາມຄິດເຫັນໃນການສົນທະນາ, ທ່ານນາຍົກລັດຖະມົນຕີ ຫງວຽນເຕິນຢຸ໊ງ ໄດ້ສະຫລຸບວ່າ ມອບໃຫ້ກຳມາທິການປະສານງານ ປະຕິບັດໃນທັນທີວຽກງານຕ່າງໆດັ່ງນີ້: ສືບຕໍ່ຄົ້ນຄວ້າວາງວິທີແກ້ອັນລະອຽດ ແນໃສ່ຜັນຂະຫຍາຍ ແຜນກຳນົດສັງລວມທີ່ໄດ້ຖືກດັດສົມປີ 2010 ໃຫ້ມີປະສິດທິຜົນກວ່າອີກ; ກວດຄືນບັນດາຂໍ້ສັນຍາທະວິພາຄີ ແລະ ພະຫຸພາຄີທີ່ມີຢູ່ປັດຈຸບັນຂອງ 3 ປະເທດ ແລະ ກໍ່ສ້າງສັນຍາວ່າດ້ວຍການສົ່ງເສີມອຳນວຍຄວາມສະດວກໃຫ້ແກ່ການຄ້າໃນເຂດສາມຫຼ່ຽມພັດທະນາ ກລວ ເພື່ອສະເໜີໃຫ້ລົງນາມໃນ ກອງປະຊຸມຂັ້ນສູງ ກລວ ຄັ້ງທີ່ 8; ມອບໃຫ້ລັດຖະມົນຕີກະຊວງຄົມມະນາຄົມ 3 ປະເທດ ສ້າງຫຼັກດຳເນີນງານເພື່ອປະຕິບັດຢ່າງມີປະສິດທິຜົນ ບົດບັນທຶກຊ່ວຍຈຳ 3 ຝ່າຍ ກ່ຽວກັບການຄົມມະນາຄົມທາງບົກ ລະຫວ່າງລັດຖະບານ 3 ປະເທດຢູ່ ຈຳປາສັກ; ເປັນເອກະສັນກັນ ຖືການພັດທະນາອຸດສາຫະກຳຢາງພາລາ ເປັນຂະແໜງບຸລິມະສິດໜຶ່ງ ໃນການຮ່ວມມືພັດທະນາເສດຖະກິດລະຫວ່າງ 3 ປະເທດ. ສາມປະເທດສຸມໃສ່ພັດທະນາແຫຼ່ງແຮງງານຄຸນນະພາບສູງຮັບໃຊ້ບັນດາໂຄງການລົງທຶນຢູ່ເຂດນີ້; ຮຽກຮ້ອງບັນດາຄູ່ຮ່ວມທີ່ພັດທະນາ ໃຫ້ຕັ້ງໜ້າຊ່ວຍໜູນ ແລະ ຮ່ວມມືຢ່າງແໜ້ນແຟ້ນກັບລັດຖະບານ 3 ປະເທດເພື່ອການພັດທະນາເສດຖະກິດ-ສັງຄົມ ໃນເຂດສາມຫຼ່ຽມພັດທະນາ.
ກຳມາທິການປະສານງານ ແລະ ບັນດາອົງການທີ່ກ່ຽວຂ້ອງ ເປັນເຈົ້າການ ແລະ ຕັ້ງໜ້າປະຕິບັດການເຄື່ອນໄຫວຊຸກຍູ້ການລົງທຶນ ແລະ ການຄ້າ; ຮັບປະກັນສິ່ງແວດລ້ອມມີຄວາມສະຫງົບ ປອດໄພ ແລະ ສະຖຽນລະພາບໃຫ້ນັກລົງທຶນ ແລະ ປະຊາຊົນຢູ່ເຂດສາມຫຼ່ຽມພັດທະນາ; ຜັນຂະຫຍາຍຂໍ້ສັນຍາຕ່າງໆ ໃນຂົງເຂດປົກປັກຮັກສາສິ່ງແວດລ້ອມ, ກໍ່ສ້າງໂຄງການລວມ ແລະ ແຜນການເຄື່ອນໄຫວເພື່ອພິທັກຮັກສາບັນດາສວນທຳມະສາດໃນເຂດສາມຫຼ່ຽມພັດທະນາ ກລວ.
ສຳເລັດສິ້ນສຸດກອງປະຊຸມ, ນາຍົກລັດຖະມົນຕີ 3 ປະເທດໄດ້ລົງນາມໃນ ຖະແຫຼງການຮ່ວມກ່ຽວກັບການຮ່ວມມືຢູ່ເຂດສາມຫຼ່ຽມພັດທະນາ, ຢັ້ງຢືນຄຳໝັ້ນສັນຍາຂອງລັດຖະບານ 3 ປະເທດໃນການຍົກສູງຄຸນນະພາບຊີວິດການເປັນຢູ່ຂອງປະຊາຊົນ 13 ແຂວງໃນເຂດສາມຫຼ່ຽມພັດທະນາ, ແລະ ເຮັດໃຫ້ເຂດສາມຫຼ່ຽມພັດທະນາກາຍເປັນແບບຢ່າງແຫ່ງຜົນສຳເລັດ ຂອງການຮ່ວມມືໃນພາກພື້ນ./.
ແຫຼ່ງຂ່າວ: TTXVN
