ບາງບັນຫາທິດສະດີ ແລະ ພຶດຕິກຳກ່ຽວກັບວຽກງານທີ່ປຶກສາຍຸດທະສາດ
ໃນຂົງເຂດການຈັດຕັ້ງກໍ່ສ້າງພັກ ໃນໄລຍະເກືອບ 40 ປີ
ແຫ່ງການດຳເນີນການປ່ຽນແປງໃໝ່ (ຕອນທີ 2)
ໃນຂົງເຂດການຈັດຕັ້ງກໍ່ສ້າງພັກ ໃນໄລຍະເກືອບ 40 ປີ
ແຫ່ງການດຳເນີນການປ່ຽນແປງໃໝ່ (ຕອນທີ 2)
ວກ. - ດ້ວຍການເອົາໃຈໃສ່ຢ່າງເປັນປະຈຳຂອງພັກ, ວຽກງານທີ່ປຶກສາຍຸດທະສາດໃນຂົງເຂດການຈັດຕັ້ງກໍ່ສ້າງພັກ ໃນໄລຍະເກືອບ 40 ປີແຫ່ງການດຳເນີນການປ່ຽນແປງໃໝ່ ໄດ້ບັນລຸຜົນສຳເລັດທາງບວກ ທີ່ໜ້າເພິ່ງພໍໃຈ. ນີ້ແມ່ນພື້ນຖານໃຫ້ອັດຕະພາບທີ່ປຶກສາສືບຕໍ່ຍົກສູງຄຸນນະພາບວຽກງານທີ່ປຶກສາຍຸດທະສາດ ໃນຂົງເຂດການຈັດຕັ້ງກໍ່ສ້າງພັກ, ປະກອບສ່ວນເຂົ້າໃນວຽກງານກໍ່ສ້າງພັກ ແລະ ລະບົບການເມືອງທີ່ສະອາດປອດໃສ ແລະເຂັ້ມແຂງ ແລະການພັດທະນາປະເທດໃນຍຸກໃໝ່.
ສະຫາຍ ເຈິ່ນ ເກິ໋ມ ຕູ໊, ກຳມະການກົມການເມືອງ, ຜູ້ປະຈຳຄະນະເລຂາທິການ, ປະທານຄະນະກຳມະການກວດກາສູນກາງພັກ ມາເຮັດວຽກກັບຜູ້ຕາງໜ້າການນຳອົງການ, ຄະນະກຳມະການພັກ, ໜ່ວຍງານບໍລິການສາທາລະນະ, ແນວໂຮມປະເທດຊາດ ແລະ ອົງການຈັດຕັ້ງການເມືອງ-ສັງຄົມໃນລະດັບສູນກາງ ກ່ຽວກັບສະພາບການສະຫຼຸບການຈັດຕັ້ງປະຕິບັດມະຕິໝາຍເລກ 18-NQ/TW _ພາບ: TTXVN
ເພື່ອຍົກສູງຄຸນນະພາບວຽກງານທີ່ປຶກສາຍຸດທະສາດໃນຂົງເຂດການຈັດຕັ້ງກໍ່ສ້າງພັກ, ວິທີແກ້ໄຂທີ່ຈະຕ້ອງໄດ້ເອົາໃຈໃສ່ ແລະ ຈັດຕັ້ງປະຕິບັດຢ່າງຄົບຊຸດຄື:
ທີໜຶ່ງ, ປັບປຸງບູລະນະພາລະບົດບາດ ໜ້າທີ່ ແລະ ການຈັດຕັ້ງກົງຈັກ ຂອງບັນດາອົງການພັກສູນກາງທີ່ເຮັດວຽກງານທີ່ປຶກສາ ໃນຂົງເຂດການຈັດຕັ້ງກໍ່ສ້າງພັກ.
ສືບຕໍ່ກວດຄືນພາລະບົດບາດ, ໜ້າທີ່, ອຳນາດຂອບເຂດ, ການພົວພັນຮ່ວມມື, ໂຄງສ້າງການຈັດຕັ້ງພາຍໃນ ຂອງອົງການຈັດຕັ້ງພັກຂັ້ນສູນກາງ ເພືື່ອປັບປຸງໃຫ້ມີຄວາມກະທັດລັດຮັດກຸມ ແລະ ສົມເຫດສົມຜົນເທື່ອລະກ້າວ, ລົບລ້າງການຈັດຕັ້ງມືກາງ, ຊ້ຳຊ້ອນ ຫຼື ບໍ່ເໝາະສົມກັບພາລະບົດບາດ ໜ້າທີ່, ເພື່ອໃຫ້ກົງຈັກເຄື່ອນໄຫວຢ່າງສະໝ່ຳສະເໝີ, ມີປະສິດທິພາບ, ປະສິດທິຜົນ ແລະ ປະຕິບັດໜ້າທີ່ທີ່ໄດ້ຮັບມອບໝາຍ ໄດ້ດີຢູ່ສະເໝີ.
ສຸມໃສ່ການປັບໂຄງສ້າງພະນັກງານ, ລັດຖະກອນ ແລະ ພາລະກອນ ໃນແຕ່ລະອົງການ, ສ້າງການປ່ຽນແປງຢ່າງຈະແຈ້ງ, ຮັບປະກັນອັດຕາສ່ວນພະນັກງານ, ລັດຖະກອນ, ພາລະກອນ ທີ່ມີຄຸນສົມບັດດ້ານການຄົ້ນຄວ້າ ແລະ ທີ່ປຶກສາທົ່ວໄປ ກວມຫຼາຍກວ່າ 50% ຂອງພະນັກງານທີ່ໄດ້ຮັບມອບໝາຍທັງໝົດ, ໃນນັ້ນ 20%–30% ເປັນຜູ້ຊ່ຽວຊານລະດັບສູງ, ລວມທັງຜູ້ຊ່ຽວຊານຈຳນວນຫຼາຍ ທີ່ມີຕຳແໜ່ງໜ້າທີ່ພຽງພໍ ທີ່ຈະເຮັດໜ້າທີ່ທີ່ປຶກສາຍຸດທະສາດໃຫ້ກັບສູນກາງ. ເດັດດ່ຽວໃນການປັບຫຼຸດຈຳນວນພະນັກງານ, ລັດຖະກອນ, ພາລະກອນ ທີ່ຂາດຄຸນສົມບັດ ແລະ ຄວາມສາມາດ, ຂາດສະຕິໃນການບໍລິການ ແລະ ບໍ່ສຳເລັດໜ້າທີ່ທີ່ໄດ້ຮັບມອບໝາຍ.
ສືບຕໍ່ປ່ຽນແປງໃໝ່ວຽກງານການຮັບສະໝັກບຸກຄະລາກອນ, ວຽກງານການຜັດປ່ຽນພະນັກງານ, ລັດຖະກອນໃນລະບົບການເມືອງ, ມີນະໂຍບາຍທີ່ເໝາະສົມ ແລະໜ້າດຶງດູດໃຈ ເພື່ອດຶງດູດບຸກຄະລາກອນທີ່ມີຄຸນທຳ ແລະຄວາມສາມາດ ມາເຮັດວຽກໃນບັນດາອົງການພັກຂັ້ນສູນກາງ, ຈັດຕັ້ງແລະສັບຊ້ອນຢ່າງເໝາະສົມລະຫວ່າງໄວ ໃຫ້ມີການສືບທອດ ແລະ ການພັດທະນາ, ຫຼີກເວັ້ນການຂາດເຂີນພະນັກງານທີ່ມີຄຸນສົມບັດໃນການໃຫ້ຄຳປຶກສາຍຸດທະສາດ.
ທີສອງ, ກໍ່ສ້າງຖັນແຖວພະນັກງານເຮັດວຽກງານທີ່ປຶກສາໃນຂົງເຂດການຈັດຕັ້ງກໍ່ສ້າງພັກ.
ປ່ຽນແປງໃໝ່ວຽກງານການຄັດເລືອກຮັບສະໝັກ ເພື່ອດຶງດູດ ແລະ ຄັດເລືອກພະນັກງານ ເຂົ້າເຮັດວຽກງານທີ່ປຶກສາ ໃນຂົງເຂດການຈັດຕັ້ງກໍ່ສ້າງພັກ ຜູ້ທີ່ມີຄວາມດີເດັ່ນຢ່າງແທ້ຈິງ ທາງດ້ານຄຸນວຸດທິ, ຄວາມສາມາດ, ຄຸນສົມບັດສິນທຳ ເຂົ້າເຮັດວຽກໃນຄະນະຈັດຕັ້ງຂອງອົງຄະນະພັກທຸກຂັ້ນ; ກະຈາຍແຫຼ່ງສັນຫາບຸກຄະລາກອນຈາກອົງການ, ໜ່ວຍງານ ແລະ ສະຖາບັນການສຶກສາ ແລະມະຫາວິທະຍາໄລ.
ໃຫ້ຄວາມສຳຄັນກັບການວາງແຜນ, ສ້າງແຫຼ່ງກຳລັງພະນັກງານເຮັດວຽກງານທີ່ປຶກສາໃນຂົງເຂດການຈັດຕັ້ງກໍ່ສ້າງພັກ ໃນທຸກຂັ້ນ ແລະ ທຸກຂະແໜງການ. ວຽກງານການວາງແຜນຜັງພະນັກງານ ຕ້ອງໄດ້ຮັບການປະຕິບັດຢ່າງເຂັ້ມງວດ, ມີວິທີການ, ມີວິໄສທັດໄລຍະຍາວ ແລະ ມີຄວາມເປີດກວ້າງ; ຈາກນັ້ນ, ສ້າງແຜນການຝຶກອົບຮົມແລະບຳລຸງສ້າງ, ສ້າງຄວາມເປັນເຈົ້າການທາງດ້ານແຫຼ່ງພະນັກງານນຳພາ, ເພື່ອຕອບສະໜອງຄວາມຕ້ອງການແລະໜ້າທີ່ໃນສະເພາະໜ້າແລະຍາວນານ ຂອງຂະແໜງການ. ການສືບຕໍ່ຊອກຫາແຫຼ່ງພະນັກງານໜຸ່ມໃນຫຼາຍສຳນັກງານ, ອົງການ, ຂະແໜງການ ແລະ ວິຊາຊີບ ທີ່ເປັນຜູ້ມີຄຸນທຳ, ມີພອນສະຫວັນ, ມີແນວໂນ້ມ ແລະຄວາມສາມາດໃນວຽກງານການຈັດຕັ້ງກໍ່ສ້າງພັກ, ເອົາມາວາງແຜນເພື່ອຝຶກອົບຮົມ ສົ່ງເສີມ ສ້າງແຫຼ່ງກຳລັງ.
ໃຫ້ຄວາມສຳຄັນກັບການຝຶກອົບຮົມ ແລະ ບຳລຸງສ້າງທາງທິດສະດີການເມືອງ, ວິຊາສະເພາະ, ວິຊາຊີບ, ຈັນຍາບັນດ້ານວິຊາຊີບ ໃຫ້ແກ່ພະນັກງານທີ່ເຮັດວຽກງານທີ່ປຶກສາດ້ານການຈັດຕັ້ງກໍ່ສ້າງພັກ. ນອກຈາກເນື້ອໃນກ່ຽວກັບຄຸນວຸດທິ ວິຊາຊີບ, ທິດສະດີການເມືອງ ແລະ ວິຊາສະເພາະແລ້ວ, ເນື້ອໃນສຳຄັນໃນການຝຶກອົບຮົມ ແລະບຳລຸງສ້າງພະນັກງານທີ່ເຮັດວຽກງານການຈັດຕັ້ງນັ້ນແມ່ນ ທັກສະ ແລະ ປະສົບການການປະເມີນ, ການຮັບຮູ້ຜູ້ຄົນ ແລະ ທັກສະ, ວິທີການ, ປະສົບການໃນການຈັດການກັບສະຖານະການທາງດ້ານການຈັດຕັ້ງ, ພະນັກງານ, ສະມາຊິກພັກ ແລະ ການປົກປ້ອງການເມືອງພາຍໃນ.
ປ່ຽນແປງໃໝ່ຢ່າງແຂງແຮງໃນວຽກງານການຕີລາຄາ, ການຈັດວາງສັບຊ້ອນ, ການແຕ່ງຕັ້ງເລື່ອນຊັ້ນ ແລະ ການນຳໃຊ້ພະນັກງານທີ່ປຶກສາກ່ຽວກັບການຈັດຕັ້ງກໍ່ສ້າງພັກ ໂດຍສະເພາະພະນັກງານໜຸ່ມ. ຍູ້ແຮງການຜັດປ່ຽນພະນັກງານໃນລະບົບການເມືອງ ແລະໃນຂົງເຂດການເຮັດວຽກ, ສ້າງສະພາບແວດລ້ອມການຝຶກອົບຮົມຕົວຈິງທີ່ອຸດົມສົມບູນ ໃຫ້ແກ່ພະນັກງານໃນອົງການຈັດຕັ້ງກໍ່ສ້າງພັກ ເພື່ອສູ້ຊົນພະຍາຍາມແລະເຕີບໃຫຍ່. ສ້າງແບບແຜນ, ວິທີເຮັດວຽກຢ່າງເປັນມືອາຊີບ ແລະ ວິທະຍາສາດ ໃຫ້ແກ່ຖັນແຖວພະນັກງານທີ່ເຮັດວຽກງານທີ່ປຶກສາດ້ານການຈັດຕັ້ງກໍ່ສ້າງພັກ. ປັບປຸງລະບົບສະຖາບັນ ແລະ ກຳນົດມາດຕະຖານ ກ່ຽວກັບແບບແຜນ ວິທີການເຮັດວຽກຂອງພະນັກງານທີ່ປຶກສາດ້ານການຈັດຕັ້ງກໍ່ສ້າງພັກໃຫ້ສົມບູນແບບ. ສ້າງຊຸດມາດຖານໃນການປະເມີນຄຸນນະພາບພະນັກງານໃນຂົງເຂດການຈັດຕັ້ງກໍ່ສ້າງພັກ.
ທີສາມ, ປ່ຽນແປງໃໝ່ແບບວິທີການ, ຍົກສູງຄຸນນະພາບຂອງເນື້ອໃນທີ່ປຶກສາໃນຂົງເຂດການຈັດຕັ້ງກໍ່ສ້າງພັກ.
ກຳນົດຢ່າງຈະແຈ້ງກ່ຽວກັບລັກສະນະລະບົບຂອງເນື້ອໃນທີ່ປຶກສາ ໃນຂົງເຂດການຈັດຕັ້ງກໍ່ສ້າງພັກ. ປັບປຸງກົນໄກດຳເນີນງານດ້ານທີ່ປຶກສາໃນບັນດາອົງການຂອງພັກໂດຍທົ່ວໄປ ແລະ ໃນການຈັດຕັ້ງກໍ່ສ້າງພັກໂດຍສະເພາະ. ຕ້ອງເຊື່ອມໂຍງຢ່າງແໜ້ນແຟ້ນ ແບບອິນຊີ ລະຫວ່າງການຄົ້ນຄວ້າທິດສະດີ ກັບການສະຫຼຸບສັງລວມພຶດຕິກຳ, ເຄົາລົບພຶດຕິກຳຕົວຈິງ, ຖືເອົາຄວາມຕ້ອງການ ແລະຂໍ້ຮຽກຮ້ອງຕົວຈິງ ເປັນຈຸດເລີ່ມຕົ້ນ ແລະ ເປັນຈຸດໝາຍປາຍທາງ ຂອງວຽກງານຄົ້ນຄວ້າ ແລະ ໃຫ້ຄຳປຶກສາ; ໃຫ້ຄວາມສໍາຄັນກັບແນວຄິດສ້າງສັນ; ເອົາໃຈໃສ່ເຖິງລະບອບວິຈານ, ລະບອບວິຈານຕົນເອງ, ລະບອບຮັບເອົາການວິພາກວິຈານ, ປະຊາທິປະໄຕ ແລະ ພາວະວິໄສ ໃນການຄົ້ນຄວ້າ-ໃຫ້ຄຳປຶກສາ ໃນການສ້າງແນວທາງ, ແຜນນະໂຍບາຍ ແລະ ນະໂຍບາຍການພັດທະນາປະເທດຊາດ; ສ້າງກົນໄກ, ວິທີການ ແລະ ຮູບແບບການຜັນຂະຫຍາຍ ການຫັນແນວທາງ ແລະ ແຜນນະໂຍບາຍຂອງພັກ ເປັນນະໂຍບາຍ ແລະກົດໝາຍຂອງລັດ.
ວຽກງານທີ່ປຶກສາຍຸດທະສາດໃນຂົງເຂດການຈັດຕັ້ງກໍ່ສ້າງພັກ ຕ້ອງສຸມໃສ່ບັນດາເນື້ອໃນດັ່ງນີ້:
1. ໃຫ້ຄຳປຶກສາກ່ຽວກັບການຈັດຕັ້ງປະຕິບັດໜ້າທີ່ ແລະ ວິທີແກ້ໄຂທີ່ໄດ້ກຳນົດໄວ້ໃນມະຕິໝາຍເລກ 28-NQ/TW, ລົງວັນທີ 17 ພະຈິກ 2022, ຂອງກອງປະຊຸມສູນກາງພັກຄັ້ງທີ 6 ສະໄໝ XIII “ວ່າດ້ວຍການສືບຕໍ່ປ່ຽນແປງໃໝ່ແບບວິທີການນຳພາ ແລະ ກຳອຳນາດຂອງພັກ ຕໍ່ລະບົບການເມືອງ ໃນໄລຍະໃໝ່”. ສຸມໃສ່ການຄົ້ນຄ້ວາພັດທະນາ ແລະ ສະເໜີໃຫ້ຄຳປຶກສາກ່ຽວກັບແຜນນະໂຍບາຍ ແລະ ວິທີການສືບຕໍ່ປັບປຸງຮູບແບບລວມຂອງລະບົບການເມືອງໃຫ້ສົມບູນແບບ ໃນ 3 ດ້ານ: ພາລະບົດບາດ, ໜ້າທີ່; ໂຄງປະກອບການຈັດຕັ້ງ; ການພົວພັນລະຫວ່າງບັນດາສະຖາບັນການຈັດຕັ້ງໃນລະບົບ. ສຸມໃສ່ບັນດາແຜນນະໂຍບາຍ ແລະ ວິທີແກ້ໄຂ ເພື່ອສືບຕໍ່ປັບປຸງກົງຈັກຂອງພັກໃຫ້ສົມບູນແບບ ຢ່າງສອດຄ່ອງກັບທີ່ຕັ້ງ ແລະບົດບາດກຳອຳນາດຂອງພັກ ໃນເງື່ອນໄຂຂອງການກໍ່ສ້າງ ແລະ ປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ ແລະ ເສດຖະກິດການຕະຫຼາດຕາມທິດສັງຄົມນິຍົມ. ໃຫ້ຄຳປຶກສາກ່ຽວກັບການຈັດຕັ້ງ ແລະ ຜັນຂະຫຍາຍ ທິດທາງການສ້າງ ແລະ ປັບປຸງບູລະນະ ລັດແຫ່ງອຳນາດກົດໝາຍສັງຄົມນິຍົມຫວຽດນາມ ທີ່ໄດ້ກຳນົດໄວ້ໃນມະຕິໝາຍເລກ 27-NQ/TW, ລົງວັນທີ 9 ພະຈິກ 2022, ຂອງກອງປະຊຸມສູນກາງພັກ ຄັ້ງທີ 6, ສະໄໝທີ XIII, “ວ່າດ້ວຍການສືບຕໍ່ກໍ່ສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມ ໃນໄລຍະໃໝ່ ໃຫ້ສົມບູນແບບ”. ຄົ້ນຄວ້າ, ສະເໜີນແຜນະໂຍບາຍ, ວິທີການປ່ຽນແປງໃໝ່ການຈັດຕັ້ງ ແລະ ການເຄື່ອນໄຫວຂອງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ, ສອດຄ່ອງກັບການປ່ຽນແປງໃໝ່ການຈັດຕັ້ງກົງຈັກຂອງພັກ ແລະ ລັດ, ເສີມຂະຫຍາຍປະຊາທິປະໄຕ, ຮັບປະກັນສິດເປັນເຈົ້າຂອງປະຊາຊົນ;
2. ຄົ້ນຄວ້າ ແລະ ສະເໜີຄຳປຶກສາ ກ່ຽວກັບການສືບຕໍ່ການປ່ຽນແປງໃໝ່ວຽກງານພະນັກງານ, ກໍ່ສ້າງຖັນແຖວພະນັກງານທີ່ທຽບເທົ່າກັບໜ້າທີ່ວຽກງານ, ຕອບສະໜອງຄວາມຕ້ອງການຂອງການພັດທະນາປະເທດຊາດໃນໄລຍະໃໝ່; ສຸມໃສ່ໃຫ້ຄຳປຶກສາແກ່ຄະນະພັກ, ອົງການຈັດຕັ້ງພັກ ໃນການຄັດເລືອກ ແລະ ສັບຊ້ອນພະນັກງານທີ່ມີຄຸນສົມບັດເໝາະສົມທີ່ຈະໄດ້ຮັບເລືອກເຂົ້າສູ່ຄະນະພັກ ແລະ ຕຳແໜ່ງການນຳ ຂອງອົງການລັດ, ແນວໂຮມປະເທດຊາດຫວຽດນາມ ແລະ ອົງການການເມືອງ-ສັງຄົມ ທຸກຂັ້ນ. ສືບຕໍ່ໃຫ້ຄຳປຶກສາແນະນຳ ໃນການປັບປຸງລະບຽບ ກ່ຽວກັບກົນໄກການນຳພາລວມໝູ່ ແລະບຸກຄົນຮັບຜິດຊອບ, ຄວາມຮັບຜິດຊອບຂອງຜູ້ນຳໜ້າໃນວຽກງານພະນັກງານ, ໂດຍສະເພາະ ໃນການຕີລາຄາ, ແນະນຳ ແລະ ແຕ່ງຕັ້ງພະນັກງານ. ຄົ້ນຄ້ວາສະເໜີແຜນນະໂຍບາຍ, ວິທີການສຶບຕໍ່ປ່ຽນແປງໃໝ່ ແລະປັບປຸງນະໂຍບາຍໃຫ້ສົມບູນແບບ, ສ້າງແຮງຈູງໃຈໃຫ້ພະນັກງານ, ລັດຖະກອນ, ພາລະກອນ ໃນການເຮັດວຽກ ແລະ ອຸທິດຕົນ; ວິທີການເພີ່ມທະວີ ແລະ ຍົກສູງປະສິດທິຜົນຂອງການຄວບຄຸມອຳນາດ ໃນວຽກງານພະນັກງານ.
ທີສີ່, ຍົກສູງປະສິດທິຜົນການປະສານງານລະຫວ່າງບັນດາອົງການພັກຂັ້ນສູນກາງ ໃນການໃຫ້ຄຳປຶກສາໃນຂົງເຂດການຈັດຕັ້ງກໍ່ສ້າງພັກ.
ເພື່ອຍົກສູງຄຸນນະພາບຄຳປຶກສາເປັນລາຍລັກອັກສອນ ຂອງອົງການທີ່ປຶກສາແລະຊ່ວຍວຽກຂອງພັກ, ໂດຍສະເພາະ ຄຳປຶກສາດ້ານຍຸດທະສາດ, ການວາງແຜນນະໂຍບາຍ ແລະ ແນວທາງ, ຈຳເປັນຕ້ອງເພີ່ມທະວີການເຂົ້າຮ່ວມ ແລະ ສົມທົບ ລະຫວ່າງບັນດາອົງການຂອງພັກຢູ່ສູນກາງ ໃນການຜັນຂະຫຍາຍໂຄງການທີ່ຍື່ນສະເໜີຕໍ່ຄະນະບໍລິຫານງານສູນກາງ, ກົມການເມືອງ ແລະ ຄະນະເລຂາທິການ ຜ່ານການເຂົ້າຮ່ວມໃນຄະນະຊີ້ນຳ, ທີມງານບັນນາທິການ ແລະ ທິມງານສະໜັບສະໜູນໂຄງການ. ເພີ່ມທະວີການປະສານງານໃນວຽກງານຄົ້ນຄວ້າ ເພື່ອຮັບໃຊ້ວຽກງານທີ່ປຶກສາ ເຊັ່ນ: ການຈັດຕັ້ງການປຶກສາຫາລື, ການຈັດສຳມະນາ ແລະ ການໂອ້ລົມສົນທະນາ. ສຳລັບເນື້ອໃນຄຳປຶກສາທີ່ກ່ຽວພັນກັບຫຼາຍຂະແໜງການ ຈຳເປັນຕ້ອງເຊີນຜູ້ຊ່ຽວຊານ ແລະ ນັກວິທະຍາສາດ ຈາກບັນດາອົງການສູນກາງຂອງພັກ ມາໃຫ້ຄຳປຶກສາໃນຂະແໜງການນັ້ນໆ ເພື່ອຮ່ວມດຳເນີນການຫົວຂໍ້ຄົ້ນຄວ້າທາງເລິກ, ເຂົ້າຮ່ວມການສະໜອງຂໍ້ມູນຂ່າວສານ ຕາມຄວາມຕ້ອງການຂອງໂຄງການ ເພື່ອຮັບປະກັນລັກສະນະພາວິະວິໄສໃນການປະເມີນ, ສະແດງຄວາມຄິດເຫັນ ແລະ ຄວາມແທດຈິງ ແລະ ຄວາມເປັນໄປໄດ້ ຂອງວິທີແກ້ບັນຫາທີ່ສະເໜີ.
ທີຫ້າ, ຮັບປະກັນເງື່ອນໄຂ ແລະ ແຫຼ່ງກຳລັງ ທີ່ຮັບໃຊ້ວຽກງານທີ່ປຶກໄສໃນຂົງເຂດການຈັດຕັ້ງກໍ່ສ້າງພັກ.
ສືບຕໍ່ປັບປຸງລະບຽບການກ່ຽວກັບການກໍ່ສ້າງພະນັກງານທີ່ປຶກສາໃຫ້ສົມບູນແບບ; ກຳນົດມາດຕະຖານ ແລະ ເງື່ອນໄຂສຳລັບຕຳແໜ່ງຜູ້ຊ່ຽວຊານໃຫ້ຊັດເຈນ; ຍົກສູງຄຸນນະພາບວຽກງານທີ່ປຶກຂອງພະນັກງານໃນຕໍາແໜ່ງຜູ້ຊ່ວຍ ແລະເລຂານຸການ; ສືບຕໍ່ປັບປຸງກົນໄກ ແລະ ນະໂຍບາຍດ້ານຕຳແໜ່ງງານຂອງພະນັກງານ, ລັດຖະກອນ ແລະ ພາລະກອນໃຫ້ສົມບູນແບບ, ໃນນັ້ນມີຕຳແໜ່ງໜ້າທີ່ຂອງພະນັກງານທີ່ປຶກສາ; ສືບຕໍ່ປ່ຽນແປງໃໝ່ວຽກງານຄັດເລືອກ ຮັບສະໝັກ, ນຳໃຊ້, ຄຸ້ມຄອງ, ຝຶກອົບຮົມ ບຳລຸງສ້າງ, ວາງແຜນການ, ສັບຊ້ອນພະນັກງານ, ລັດຖະກອນ, ພາລະກອນ; ເລັ່ງປັບປຸງກົນໄກ ແລະ ນະໂຍບາຍໃຫ້ສົມບູນແບບ ເພື່ອດຶງດູດແລະສົ່ງເສີມບຸກຄະລາກອນທີ່ມີຄວາມສາມາດ ແລະ ຜູ້ຊ່ຽວຊານ ມາເຮັດວຽກທີ່ປຶກສາໃນອົງການສູນກາງພັກ ໃນຂົງເຂດການຈັດຕັ້ງກໍ່ສ້າງພັກ. ຮັບປະກັນເງື່ອນໄຂ ແລະແຫຼ່ງກຳລັງທາງເສດຖະກິດ, ສິ່ງອຳນວຍຄວາມສະດວກ ແລະ ສະພາບແວດລ້ອມແຫ່ງການເຮັດວຽກ: ຊຸກຍູ້ການປະຕິຮູບເງິນເດືອນ ໂດຍໃຫ້ຄວາມສຳຄັນກັບຄຸນລັກສະນະຂອງພະນັກງານ, ລັດຖະກອນ ແລະ ພາລະກອນທີ່ເຮັດວຽກໃນໜ່ວຍງານທີ່ປຶກສາ ຂອງອົງການພັກຂັ້ນສູນກາງ; ຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການປະຕິບັດວຽກງານທີ່ປຶກສາຂອງອົງການພັກຂັ້ນສູນກາງ; ຍູ້ແຮງການລົງທຶນດ້ານພື້ນຖານວັດຖຸແລະເຕັກນິກ ຮັບໃຊ້ໃຫ້ແກ່ວຽກງານທີ່ປຶກສາແລະຄົ້ນຄວ້າ ຂອງບັນດາອົງການພັກຂັ້ນສູນກາງ; ຊອກຫາວິທີແກ້ໄຂເພື່ອຍົກສູງຄຸນນະພາບ, ປະສິດທິຜົນຂອງວຽກງານໃຫ້ຄຳປຶກສາໂຄງການ ທີ່ຍື່ນສະເໜີໃຫ້ຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ; ສ້າງສະພາບແວດລ້ອມແຫ່ງການເຮັດວຽກທີ່ມີປະຊາທິປະໄຕ, ໂປ່ງໃສ, ຍຸຕິທຳ ແລະ ມີວັດທະນະທຳ; ເຄົາລົບແລະຮັບຟັງຄຳເຫັນວິພາກວິຈານ ແລະ ເນື້ອໃນຄວາມຄິດເຫັນທີ່ແຕກຕ່າງກັນ ໃນຂະບວນການໃຫ້ຄຳປຶກສາ./.
