ຍົກລະດັບການພົວພັນຕ່າງປະເທດດ້ານປ້ອງກັນຊາດ,
ຕອບສະໜອງຄວາມຮຽກຮ້ອງຕ້ອງການຂອງພາລະກິດສ້າງສາ
ແລະ ປົກປັກຮັກສາປະເທດຊາດໃນສະພາບການໃໝ່
ຕອບສະໜອງຄວາມຮຽກຮ້ອງຕ້ອງການຂອງພາລະກິດສ້າງສາ
ແລະ ປົກປັກຮັກສາປະເທດຊາດໃນສະພາບການໃໝ່
ຜົນງານຂອງການພົວພັນຕ່າງປະເທດດ້ານປ້ອງກັນຊາດ
ໃນພາລະກິດການຕໍ່ສູ້ປົດປ່ອຍຊາດ ແລະ ສ້າງສາ, ປົກປັກຮັກສາປະເທດຊາດ
ໃນສອງຄັ້ງແຫ່ງການຕໍ່ສູ້ຕ້ານລ່າເມືອງຂຶ້ນຝຣ່ັງ ແລະ ຈັກກະພັດອາເມລິກາ, ໂດຍເຊື່ອມຊຶມ ແລະ ປະຕິບັດຕາມແຜນນະໂຍບາຍ, ນະໂຍບາຍການຕ່າງປະເທດຂອງພັກ: “ການປະຕິວັດຫວຽດນາມ ແມ່ນພາກສ່ວນໜຶ່ງຂອງການປະຕິວັດໂລກ”, “ຊ່ວຍເພື່ອນແມ່ນຊ່ວຍຕົນເອງ”, ການພົວພັນຕ່າງປະເທດດ້ານປ້ອງກັນຊາດ ມີບົດບາດສໍາຄັນພິເສດ ໃນການຮ່ວມສໍາພັນກັບສອງປະເທດເພື່ອນມິດເພື່ອຕໍ່ສູ້ ນັ້ນແມ່ນປະເທດລາວ ແລະ ປະເທດກໍາປູເຈຍ ເພື່ອຕ້ານສັດຕູຕົວດຽວໃນແຫຼມອິນດູຈີນ, ປະກອບສ່ວນເຂົ້າໃນການປັບປຸງກໍາລັງແຮງສາມັກຄີລະຫວ່າງກອງທັບຂອງເຮົາກັບກອງທັບປະຊາຊົນລາວ ແລະ ກໍາປູເຈຍ ໃນການຕໍ່ສູ້.
ພ້ອມດຽວກັນນັ້ນ, ການພົວພັນຕ່າງປະເທດດ້ານປ້ອງກັນຊາດກໍກາຍເປັນຊ່ອງທາງທີ່ສໍາຄັນ ເພື່ອຮັບເອົາການສະໜັບສະໜູນ, ຊ່ວຍເຫຼືອຂອງສະຫະພາບໂຊວຽດ, ຈີນ ແລະ ປະເທດເພື່ອນມິດອ້າຍນ້ອງຈໍານວນໜຶ່ງໃນໂລກ, ຕັ້ງແຕ່ການປະກອບອາວຸດ, ຍຸດທະພັນ, ພະລາທິການ, ການແພດທະຫານ ຈົນເຖິງການແຕ່ງຕັ້ງພະນັກງານໄປບັນດາປະເທດ ເພື່ອຮຽນເອົາບົດຮຽນໃນການຕໍ່ສູ້, ຍົກສູງລະດັບຄວາມຮູ້ດ້ານທິດສະດີການເມືອງການທະຫານ ແລະ ວິທີການສູ້ຮົບ, ປະກອບສ່ວນອັນສໍາຄັນເຂົ້າໃນການສ້າງສາ ແລະ ພັດທະນາກອງທັບປະຊາຊົນຫວຽດນາມ, ຕອບສະໜອງບັນດາຄວາມຮຽກຮ້ອງທີ່ຈໍາເປັນຂອງການຕໍ່ຕ້ານ. ໃນໄລຍະນີ້, ກອງທັບປະຊາຊົນຫວຽດນາມ ໄດ້ຈັດການແນະນໍາບົດຮຽນ ໃນການສ້າງກໍາລັງ, ບົດຮຽນໃນການຕໍ່ສູ້ດ້ານການເມືອງ, ການຕໍ່ສູ້ປະກອບອາວຸດ ແລະ ສິລະປະດໍາເນີນການຕໍ່ສູ້ຂອງປະຊາຊົນ ກັບກອງທັບຫຼາຍປະເທດໃນໂລກ, ຈາກນັ້ນ, ໄດ້ເປີດກ້ວາງການພົວພັນດ້ານການທະຫານ, ປ້ອງກັນຊາດ ແລະ ຍົກສູງອິດທິພົນ, ຖານະບົດບາດຂອງກອງທັບປະຊາຊົນຫວຽດນາມ ຕໍ່ເພື່ອນມິດສາກົນ.
ຜ່ານການພົວພັນຕ່າງປະເທດດ້ານປ້ອງກັນຊາດ, ຫວຽດນາມບໍ່ພຽງແຕ່ຍາດແຍ່ງ ແລະ ເສີມຂະຫຍາຍປະສິດທິຜົນກໍາລັງແຮງຄວາມສາມັກຄີສາກົນເທົ່ານັ້ນ ແຕ່ຍັງປະກອບສ່ວນເຂົ້າໃນການປັບປຸງ, ເພີ່ມທະວີຄວາມສາມັກຄີພາຍໃນລະບົບບັນດາປະເທດສັງ ຄົມນິຍົມຢ່າງຕັ້ງໜ້າ, ປະກອບສ່ວນເຂົ້າໃນການປະຕິບັດແຜນນະໂຍບາຍສ້າງຄວາມສາ ມັກຄີສາກົນ, ສົມທົບລະຫວ່າງກໍາລັງແຮງຂອງຊາດ ກັບກໍາລັງແຮງຍຸກສະໄໝຢ່າງມີໄຊ, ສ້າງກໍາລັງແຮງສັງລວມຕີເອົາໄຊຊະນະສັດຕູຜູ້ຮຸກຮານ, ປະຕິບັດສໍາເລັດພາລະກິດປົດປ່ອຍພາກໃຕ້, ທ້ອນໂຮມປະເທດເປັນເອກະພາບອີກດ້ວຍ.
ໃນໄລຍະສ້າງສາ ແລະ ປົກປັກຮັກສາປະເທດຊາດ, ໂດຍສະເພາະແມ່ນຫຼັງປີ 1986, ພາຍໃຕ້ແສງສະຫວ່າງແຫ່ງການປ່ຽນແປງໃໝ່ໃນກອງປະຊຸມໃຫຍ່ຄັ້ງທີ 6 ຂອງພັກ, ບົນພື້ນຖານແນວທາງການຕ່າງປະເທດ “ເປີດກ້ວາງ”, ຫວຽດນາມໄດ້ເປີດກວ້າງການພົວພັນຮ່ວມມືດ້ານປ້ອງກັນຊາດ ກັບຫຼາຍປະເທດ. ການພົວພັນຕ່າງປະເທດ ດ້ານປ້ອງກັນຊາດໃນໄລຍະນີ້ ສືບຕໍ່ເປັນຊ່ອງທາງການທູດທີ່ສໍາຄັນ, ມີການປ່ຽນແຜງໃໝ່ຢ່າງຫຼວງຫຼາຍ, ປະກອບສ່ວນພ້ອມກັບການທູດຂອງລັດ ທັບມ້າງວົງປິດລ້ອມຂອງສັດຕູ, ຊຸກຍູ້ຂະບວນວິວັດແຫ່ງການຫັນການພົວພັນກັບຈີນ ແລະ ອາເມລິກາເປັນປົກກະຕິ, ປະກອບສ່ວນເຂົ້າໃນການຮັກສາສະພາບແວດລ້ອມສັນຕິພາບ ແລະ ຄວາມໝັ້ນຄົງ ເພື່ອສ້າງສາປະເທດຊາດ, ເພີ່ມທະວີກໍາລັງບົ່ມຊ້ອນດ້ານປ້ອງກັນຊາດ.
ໃນໄລຍະການເຊື່ອມໂຍງສາກົນ, ເພື່ອເຊື່ອມຊຶມ ແລະ ຜັນຂະຫຍາຍແນວທາງການຕ່າງປະເທດຂອງພັກໃນແຕ່ລະສະໄໝກອງປະຊຸມໃຫຍ່, ປະຕິບັດມະຕິກອງປະຊຸມສູນກາງພັກຄັ້ງທີ 8 ສະໄໝທີ 11, ລົງວັນທີ 25 ຕຸລາ 2013, “ວ່າດ້ວຍຍຸດທະສາດປົກປັກຮັກສາປະເທດຊາດໃນສະພາບການໃໝ່”; ມະຕິຂອງກົມການເມືອງສູນກາງພັກ ສະບັບເລດທີ 22-NQ/TW, ລົງວັນທີ 10 ພຶດສະພາ 2013, “ວ່າດ້ວຍການເຊື່ອມໂຍງສາກົນ” ແລະ ມະຕິຂອງຄະນະພັກທະຫານສູນກາງສະບັບເລກທີ 806-NQ/QUTW, ລົງວັນທີ 31 ທັນວາ 2013, “ວ່າດ້ວຍການເຊື່ອມໂຍງສານກົນ ແລະ ການພົວພັນຕ່າງປະເທດດ້ານປ້ອງກັນຊາດເຖິງປີ 2020 ແລະ ໃນຊຸມປີຕໍ່ໜ້າ”, ວຽກງານພົວພັນຕ່າງປະເທດດ້ານປ້ອງກັນຊາດສືບຕໍ່ຜັນຂະຫຍາຍຢ່າງ “ຕັ້ງໜ້າ, ເປັນເຈົ້າການ, ແໜ້ນແຟ້ນ, ມີໄຫວພິບ, ມີປະສິດທິຜົນ”, ຍາດໄດ້ບັນດາຜົນງານທີ່ສໍາຄັນຢ່າງຫຼວງຫຼາຍ. ການຮ່ວມມືສາກົນ ແລະ ການພົວພັນຕ່າງປະເທດດ້ານປ້ອງກັນຊາດ ສືບຕໍ່ໄດ້ຮັບການເປີດກ້ວາງ ແລະ ພັດທະນາທັງລວງກ້ວາງ ແລະ ລວງເລິກ, ກາຍເປັນເນື້ອໃນສໍາຄັນໜຶ່ງໃນການພົວພັນຕ່າງປະເທດຂອງພັກ, ການທູດຂອງລັດ ແລະ ການທູດປະຊາຊົນ; ສ້າງພື້ນຖານການປ້ອງກັນຊາດໃນທົ່ວປວງຊົນທັງຊາດ ເພື່ອເສີມຂະຫຍາຍກໍາລັງແຮງຂອງຊາດ ສົມທົບກັບກໍາລັງແຮງຂອງຍຸກສະໄໝ, ສ້າງກໍາລັງແຮງສັງລວມ - ພື້ນຖານອັນໜັກແໜ້ນ ເພື່ອປະຕິບັດວິທີການ ແລະ ແຜນອຸບາຍປົກປັກຮັກສາປະເທດຊາດແຕ່ຫົວທີ, ຈາກທາງໄກ.
ບັນດາໝາກຜົນ, ຜົນສໍາເລັດທີ່ສໍາຄັນຂອງການພົວພັນຕ່າງປະເທດດ້ານປ້ອງກັນ ຊາດ ໄດ້ປະກອບສ່ວນເຂົ້າໃນພາລະກິດປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດ ຢ່າງໝັ້ນຄົງ ແລະ ແທດເໝາະກັບພຶດຕິກໍາຕົວຈິງ; ຍົກສູງອິດທິພົນ ແລະ ຖານະບົດບາດຂອງປະເທດເວົ້າລວມ, ເວົ້າສະເພາະແມ່ນຂອງກອງທັບປະຊາຊົນຫວຽດນາມ ໃນເວທີສາກົນ; ປະກອບສ່ວນເຂົ້າໃນການແກ້ໄຂບັນດາບັນຫາຊາຍແດນ, ເຂດແດນ, ສ້າງເສັ້ນຊາຍແດນສັນຕິພາບ, ມິດຕະພາບ; ສົມທົບລະຫວ່າງການຮ່ວມມື ແລະ ການຕໍ່ສູ້ຢ່າງໄຫວພິບ, ແກ້ໄຂສາຍພົວພັນດ້ານປ້ອງກັນຊາດ ກັບບັນດາປະເທດຢູ່ພາຍໃນ ແລະ ຢູ່ນອກພາກພື້ນ ໃຫ້ໄດ້ເປັນຢ່າງດີ, ພິເສດແມ່ນບັນດາປະເທດໃຫຍ່, ສ້າງທ່າຕ່າງຝ່າຍຕ່າງມີຜົນປະໂຫຍດ, ຮັກສາສະພາບແວດລ້ອມສັນຕິພາບ, ຄວາມໝັ້ນຄົງ, ສະກັດກັ້ນໄພອັນຕະລາຍທີ່ເກີດການປະທະກັນ ແລະ ສົງຄາມ, ຮັບໃຊ້ພາລະກິດສ້າງສາ ແລະ ພັດທະນາປະເທດຊາດ; ປະກອບສ່ວນເຂົ້!ໃນການປັບປຸງ ແລະ ເພີ່ມທະວີກໍາລັງບົ່ມຊ້ອນດ້ານປ້ອງກັນຊາດ, ສ້າງເປັນກອງທັບຫຼວງ, ຍອດຢ້ຽມ ແລະ ທັນສະໄໝ; ຍົກສູງປະສິດທິຜົນການສົມທົບ ລະຫວ່າງການຕໍ່ສູ້ດ້ານການເມືອງ, ການທະຫານ ແລະ ການທູດ ໃນໜ້າທີ່ປົກປັກຮັກສາປະເທດຊາດ.
ໂດຍປະຕິບັດຕາມທັດສະນະຂອງພັກ “ສົມທົບລະຫວ່າງກໍາລັງແຮງຂອງຊາດ ກັບ ກໍາລັງແຮງຍຸກສະໄໝ, ມີຄວາມເປັນເຈົ້າການ ແລະ ມີຄວາມຕັ້ງໜ້າໃນການເຊື່ອມໂຍງສາກົນຢ່າງຮອບດ້ານ, ກ້ວາງຂວາງ ແລະ ເລິກເຊິ່ງ”, ການພົວພັນຕ່າງປະເທດດ້ານປ້ອງກັນຊາດຕ້ອງມີຄວາມເປັນເຈົ້າການ ໃນການເປີດກ້ວາງສາຍພົວພັນສອງຝ່າຍ ກັບບັນດາປະເທດໃນໂລກ. ເຖິງປະຈຸບັນ, ຫວຽດນາມໄດ້ມີການພົວພັນດ້ານປ້ອງກັນຊາດກັບ 100 ປາຍປະເທດ, ປະກອບມີ 5 ປະເທດເປັນກໍາມະການຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ແລະ ບັນດາປະເທດມະຫາອໍານາດໃນໂລກ. ການຮ່ວມມືດ້ານປ້ອງກັນຊາດລະຫວ່າງຫວຽດນາມ ແລະ ບັນດາປະເທດ ນັບມື້ນັບກ້າວເຂົ້າສູ່ລວງເລິກ ບົນພື້ນຖານເນື້ອໃນຕ່າງໆ, ຂົງເຂດການຮ່ວມມືແທດເໝາະກັບພຶດຕິກໍາຕົວຈິງ, ສອດຄ່ອງກັບເງື່ອນໄຂ, ຄວາມຕ້ອງການ ແລະ ຜົນປະໂຫຍດຂອງຫວຽດນາມ ແລະ ຂອງບັນດາປະເທດຄູ່ຮ່ວມມື, ສຸມໃສ່ຂົງເຂດຕ່າງໆ ເຊັ່ນ: ແລກປ່ຽນຄະນະຜູ້ແທນ, ບັນດາກົນໄກປຶກສາຫາລື, ສົນທະນາ, ກໍ່ສ້າງ, ຮ່ວມມືລະຫວ່າງທະຫານບັນດາເຫຼົ່າຮົບ, ອຸດສາຫະກຳປ້ອງກັນຊາດ, ການແພດທະຫານ, ການກູ້ຊີບ - ກູ້ໄພ, ການລາດຕະເວນກວດກາລວມເຂດຊາຍແດນທາງບົກ, ທາງທະເລ, ສ້າງສັນມິດຕະພາບການປ້ອງກັນຊາດເຂດຊາຍແດນ; ມີຄວາມເປັນເຈົ້າການໃນການເຂົ້າຮ່ວມ ແລະ ຈັດຕັ້ງການເປັນເຈົ້າພາບບັນດາງານແຂ່ງຂັນການທະຫານສາກົນ ເຊັ່ນ: Army Games, ງານແຂ່ງຂັນການທະຫານອາຊຽນ; ບັນລຸໄດ້ປະສິດທິຜົນສູງໃນການຮ່ວມມືແກ້ໄຂຜົນຍ້ອນຫຼັງຂອງການສົງຄາມ; ແກ້ໄຂມົນລະພິດຈາກລະເບີດ, ໝາກມິນ ແລະ ສານພິດສີສົ້ມ/ດີໂອຊິນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢູ່ບັນດາພື້ນທີ່ຈຸດສຸມໃນທົ່ວປະເທດຢ່າງຫຼວງຫຼາຍ.
ກ່ຽວກັບການພົວພັນຕ່າງປະເທດດ້ານປ້ອງກັນຊາດຫຼາຍຝ່າຍ, ຫວຽດນາມໄດ້ເຂົ້າຮ່ວມຢ່າງຕັ້ງໜ້າ, ມີຄວາມຮັບຜິດຊອບສູງ ແລະ ມີຄວາມເປັນເຈົ້າການປະກອບສ່ວນເຂົ້າ ໃນການສ້າງ ແລະ ວາງແຜນນະໂຍບາຍເທື່ອລະກ້າວ, ສະເໜີແນວຄິດປະດິດສ້າງທີ່ມີ ຄຸນຄ່າໃນບັນດາກົນໄກການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບຂອງພາກພື້ນ ແລະ ສາກົນຢ່າງຫຼວງຫຼາຍ ເຊັ່ນ: ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ (ADMM), ກອງປະຊຸມລັດລັດຖະມົນຕີກະຊວງປ້ອງກັນປະເທດບັນດາປະເທດອາຊຽນເປີດກ້ວາງ (ADMM+), ເວທີປາໄສຄວາມສະຫງົບພາກພື້ນອາຊຽນ (ARF), ກອງປະຊຸມສົນທະນາ Shangri-La, ກອງປະຊຸມຄວາມສະຫງົບສາກົນມົດສະກູ, ເວທີປາໄສ ແຊງຊານ - ປັກກິງ, ກອງປະຊຸມສົນທະນາການປ້ອງກັນຊາດ ເຊອຸນ ແລະ ອື່ນໆ.
ພົນໂທ ຟານວັນຢາງ, ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ຫົວໜ້າຄະນະຜູ້ແທນການທະຫານຫວຽດນາມ ເຂົ້າຮ່ວມກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດ ອາຊຽນ ຄັ້ງທີ 15, ໄດ້ຈັດຂຶ້ນໃນຮູບແບບອອນໄລນ໌, ວັນທີ 15 ມິຖຸນາ 2021 _ພາບ: TTXVN
ພິເສດ, ຜົນສຳເລັດຂອງການເປັນປະທານອາຊຽນປີ 2020 ໃນຊ່ອງທາງການປ້ອງກັນປະເທດດ, ການທະຫານ ແມ່ນຈຸດເດັ່ນຂອງການຕ່າງປະເທດດ້ານປ້ອງກັນຊາດ. ດ້ວຍບັນດາຄວາມພະຍາຍາມທີ່ໂດດເດັ່ນ, ບັນດາມາດຕະການທີ່ໄຫວພິບ, ປະດິດສ້າງ, ແກ້ໄຂຜ່ານຜ່າຄວາມຫຍຸ້ງຍາກແລະສິ່ງທ້າທາຍທີ່ເກີດຈາກຜົນກະທົບຂອງການລະບາດໃຫຍ່ຂອງໂຄວິດ-19, ຫວຽດນາມໄດ້ເຮັດສໍາເລັດບັນດາເນື້ອໃນ, ກິດຈະກຳປ້ອງກັນຊາດ, ການທະຫານທັງໝົດຢ່າງມີໄຊ, ຮັບປະກັນປະສິດທິຜົນແລະແທດຈິງທາງດ້ານເນື້ອໃນ, ຄວາງເຄົາລົບນັບຖືແລະຮອບຄອບຖີ່ຖ້ວນທາງດ້ານພິທີການ, ຮັບປະກັນຄວາມປອດໄພທັງໃນດ້ານຄວາມປອດໄພ, ສຸຂະພາບ ແລະ ຄວາມປອດໄພຂອງເຄືອຂາຍ. ບັນດາໝາກຜົນທີ່ດີຂອງກອງປະຊຸມການທະຫານ ແລະ ການປ້ອງກັນປະເທດ ໃນປີທີ່ຫວຽດນາມເຂົ້າຮັບຕຳແໜ່ງປະທານອາຊຽນ, ໂດຍສະເພາະກອງປະຊຸມ ADMM-14, ADMM+ ຄັ້ງທີ 7 ແລະ ພິທີສະເຫຼີມສະຫຼອງວັນສ້າງຕັ້ງ ADMM+ ຄົບຮອບ 10 ປີ, ໄດ້ຢືນຢັນອີກເທື່ອໜຶ່ງເຖິງຖານະບົດບາດ, ທີ່ຕັ້ງ ແລະ ກຽດສັກສີ ຂອງຫວຽດນາມເວົ້າລວມ, ຂອງກອງທັບປະຊາຊົນຫວຽດນາມເວົ້າສະເພາະ ໃນພາກພື້ນແລະໃນເວທີສາກົນ.
ໃນຂອບເຂດສະຫະປະຊາຊາດ, ຕັ້ງແຕ່ປີ 2014 ເຖິງປະຈຸບັນ, ຫວຽດນາມໄດ້ສົ່ງເຈົ້າໜ້າທີ່ແລະພະນັກງານກວ່າ 250 ຄົນພ້ອມໂຮງໝໍພາກສະໜາມສາມຮອບ ໄປປະຕິບັດໜ້າທີ່ຮັກສາສັນຕິພາບຂອງສະຫະປະຊາຊາດຢູ່ຊູດັງໃຕ້, ສາທາລະນະລັດ ອາຟຣິກາກາງ ແລະ ສຳນັກງານໃຫຍ່ຂອວສະຫະປະຊາຊາດ; ກຳລັງສຳເລັດການກະກຽມເພື່ອສົ່ງທີມວິສາວະກອນໄປຮ່ວມຄະນະ UNISFA ຢູ່ຊູດານ. ຈາກນັ້ນ, ໄດ້ຢັ້ງຢືນຄວາມຮັບຜິດຊອບຂອງຫວຽດນາມ ໃນການປະຕິບັດພັນທະ ຂອງປະເທດທີ່ເປັນ ສະມາຊິກຂອງສະຫະປະຊາຊາດ ແລະ ປະກອບສ່ວນຢ່າງຕັ້ງໜ້າເຂົ້າໃນສັນຕິພາບຂອງໂລກ.
ບັນດາຜົນງານຂອງການຕ່າງປະເທດດ້ານປ້ອງກັນຊາດໃນເວລາທີ່ຜ່ານມາ ແມ່ນໄດ້ເລີ່ມຈາກການນຳພາໂດຍກົງແລະເດັດຂາດໃນທຸກດ້ານຂອງພັກ, ການຄຸ້ມຄອງ ບໍລິຫານເປັນເອກະພາບຂອງລັດ, ໂດຍກົງຈາກຄະນະພັກທະຫານສູນກາງ ແລະ ກະ ຊວງປ້ອງກັນປະເທດ; ການປະສານງານຢ່າງແໜ້ນແຟ້ນແລະມີປະສິດທິຜົນ ລະຫວ່າງບັນດາກະຊວງ, ຄະນະ, ຂະແໜງການ, ທ້ອງຖິ່ນ, ຊ່ອງທາງພົວພັນຕ່າງປະເທດຕ່າງໆ ແລະ ເຈດຈຳນົງ, ຄວາມພະຍາຍາມອັນພົ້ນເກັ່ນຂອງຖັນແຖວພະນັກງານປະຕິບັດໜ້າທີ່ພົວພັນຕ່າງປະເທດດ້ານປ້ອງກັນຊາດ ບົນຈິດໃຈ “ໜ້າທີ່ໃດກໍຕ້ອງເຮັດຫຼ້ອນ, ຄວາມ ຫຍຸ້ງຍາກໃດກໍຕ້ອງຜ່ານຜ່າ”. ບັນດາຜົນງານດັ່ງກ່າວ ສືບຕໍ່ໄດ້ຮັບການຢັ້ງຢືນ ແລະ ເປັນບົດຮຽນກ່ຽວກັບການຍົກສູງຈິດໃຈເອກະລາດ ເປັນເຈົ້າຕົນເອງ, ຍາມໃດກໍຖືຜົນ ປະໂຫຍດຂອງຊາດ-ປະເທດຂຶ້ນກ່ອນ ໃຫ້ເລິກເຊິ່ງກ່ວາເກົ່າ; ໝູນໃຊ້ທັດສະນະ ຄວາມສາມັກຄີສາກົນຂອງລັດທິ ມາກ-ເລນິນ ແລະ ແນວທາງການທະຫານ, ການປ້ອງກັນ ຊາດຂອງພັກ, ແນວຄິດແລະແບບແຜນການທູດ ໂຮ່ຈີມິນ ແລະ ມູນເຊື້ອການທູດຫວຽດນາມເຂົ້າໃນເງື່ອນໄຂໃໝ່ຂອງປະເທດຢ່າງປະດິດສ້າງ, ໄຫວພິບ ແລະ ມີປະສິດທິຜົນ.
ໜ້າທີ່, ວິທີການແກ້ໄຂຈຳນວນໜຶ່ງ ເພື່ອຍົກລະດັບການພົວພັນຕ່າງປະເທດ
ດ້ານປ້ອງກັນຊາດ, ຕອບສະໜອງຄວາມຮຽກຮ້ອງຕ້ອງການຂອງພາລະກິດສ້າງສາ
ແລະ ປົກປັກຮັກສາປະເທດຊາດ ໃນສະພາບການໃໝ່
ໃນຕໍ່ໜ້າ, ສະພາບແວດລ້ອມດ້ານການເມືອງ ແລະ ຄວາມໝັ້ນຄົງໃນໂລກ ແລະ ໃນພາກພື້ນຍັງສືບຕໍ່ສັບສົນ, ມີຄວາມສ່ຽງ ແລະ ຄວາມບໍ່ໝັ້ນຄົງຫຼາຍຢ່າງ; ພາລະກິດສ້າງສາ ແລະ ປົກປັກຮັກສາປະເທດຊາດສັງຄົມນິຍົມ ໄດ້ຢືນຢູ່ຕໍ່ໜ້າກາລະໂອກາດໃໝ່ຢ່າງຫຼວງຫຼາຍ ແຕ່ກໍມີຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ, ໄດ້ຕັ້ງຂຶ້ນບັນດາ ຄວາມຮຽກຮ້ອງຕ້ອງການໃໝ່ທີ່ນັບມື້ນັບສູງຂຶ້ນ ຕໍ່ການພົວພັນຕ່າງປະເທດດ້ານປ້ອງກັນ ຊາດ. ການແກ່ງແຍ້ງຍຸດທະສາດ, ການເຕົ້າໂຮມກຳລັງລະຫວ່າງບັນດາປະເທດໃຫຍ່ ສືບຕໍ່ເກີດຂຶ້ນຢ່າງດຸເດືອດ. ໃນພາກພື້ນ ແລະ ໃນໂລກເກີດມີການຂັດແຍ່ງ, ແກ່ງແຍ້ງ, ປະເຊີນໜ້າກັນຢ່າງດຸເດືອດ, ຊ້ຳບໍ່ໜຳ ແມ່ນເກີດການປະທະກັນ ເກີດສົງຄາມລະຫວ່າງ ບັນດາປະເທດ, ການເຕົ້າໂຮມກຳລັງໃໝ່ຕ່າງໆ. ຄຽງຄູ່ກັນນັ້ນ, ການຕໍ່ສູ້ປົກປັກຮັກສາ ອະທິປະໄຕ ແລະ ຜືນແຜ່ນດິນອັນຄົບຖ້ວນ ຍັງພົບຄວາມຫຍຸ້ງຍາກ ແລະ ສິ່ງທ້າທາຍ ຫຼາຍຢ່າງ; ບັນດາກຳລັງສັດຕູຍັງບໍ່ທັນປະປ່ອຍກົນອຸບາຍ “ຫັນປ່ຽນໂດຍສັນຕິ” ຕ້ານ ແລະທຳລາຍການປະຕິວັດຫວຽດນາມ; ບັນດາບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ເຊັ່ນ: ໄພທຳມະຊາດ, ຄວາມໝັ້ນຄົງດ້ານສິ່ງແວດລ້ອມ, ຄວາມໝັ້ນຄົງຂອງແຫຼ່ງນ້ຳ, ຄວາມມັ້ນຄົງທາງໄຊເບີຣ໌, ອາດຊະຍາກຳຂ້າມຊາດ, ການກໍ່ການຮ້າຍ ແລະອື່ນໆ ທີ່ສົ່ງຜົນກະທົບນັບມື້ນັບເລິກເຊິ່ງຕໍ່ປະເທດເຮົາໃນທຸກຂົງເຂດ, ໃນນັ້ນ, ມີການປ້ອງກັນຊາດ, ເຊິ່ງຮຽກຮ້ອງໃຫ້ເພີ່ມທະວີການຮ່ວມມືສາກົນຈິ່ງສາມາດແກ້ໄຂໄດ້.
ສະພາບການດັ່ງກ່າວໄດ້ສົ່ງຜົນກະທົບຕໍ່ໜ້າທີ່ການທະຫານ, ການປ້ອງກັນຊາດ, ການສ້າງກອງທັບ, ປົກປັກຮັກສາປະເທດຊາດໂດຍກົງ, ໄດ້ຮຽກຮ້ອງໃຫ້ວຽກງານການຕ່າງປະເທດດ້ານປ້ອງກັນຊາດ ຕ້ອງສືບຕໍ່ໝູນໃຊ້ ແລະ ເສີມຂະຫຍາຍຜົນງານທີ່ຍາດມາໄດ້; ພ້ອມກັນນັ້ນ, ຍົກລະດັບຈິນຕະນາການ, ການເຄື່ອນໄຫວ, ປ່ຽນແປງໃໝ່ທັງ ດ້ານເນື້ອໃນ ແລະ ທັງດ້ານຮູບການ, ສືບຕໍ່ຜັນຂະຫຍາຍບົດບາດນຳໜ້າຂອງການພົວ ພັນຕ່າງປະເທດໃນການສ້າງຕັ້ງ ແລະ ຮັກສາສະພາບແວດລ້ອມສັນຕິພາບ ສະຖຽນລະພາບ, ລະດົມບັນດາແຫຼ່ງກຳລັງພາຍນອກ ເພື່ອພັດທະນາປະເທດຊາດ, ຍົກສູງຖານະບົດບາດ ແລະ ກຽດສັກສີຂອງປະເທດ, ປະກອບສ່ວນເຂົ້າໃນການປະຕິບັດໜ້າທີ່ສ້າງກອງທັບປະຊາຊົນຊົນປະຕິວັດ, ກອງທັບຫຼວງ, ຍອດຢ້ຽມ, ທັນສະໄໝເທື່ອລະກ້າວຢ່າງມີໄຊ, ໃນນັ້ນ, ເຫຼົ່າທັບ, ເຫຼົ່າຮົບ, ກຳລັງຈຳນວນໜຶ່ງຈະກ້າວຂຶ້ນທັນສະໄໝໂດຍກົງ. ເຖິງປີ 2025, ສ້າງກອງທັບໃຫ້ກະທັດຫັດ, ເຂັ້ມແຂງໂດຍພື້ນຖານ, ສ້າງປະຖົມປັດໄຈອັນໜັກແໜ້ນເພື່ອສູ້ຊົນເຖິງປີ 2030 ຈະສ້າງໄດ້ກອງທັບປະຊາຊົນປະຕິວັດ, ກອງທັບຫຼວງ, ຍອດຢ້ຽມ ແລະ ທັນສະໄໝ”(1), ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດໃນສະພາບການໃໝ່ຢ່າງຕັ້ງໜ້າ. ເພື່ອເຮັດຫຼ້ອນບັນດາໜ້າທີ່ດັ່ງກ່າວໄດ້ເປັນຢ່າງດີ, ການພົວພັນຕ່າງປະເທດດ້ານປ້ອງກັນຊາດຕ້ອງສຸມໃສ່ການປະຕິບັດບັນດາໜ້າທີ່, ວິທີການແກ້ໄຂຕົ້ນຕໍຢ່າງຄົບຊຸດ ດັ່ງນີ້:
ໜຶ່ງແມ່ນ, ເພີ່ມທະວີການນຳພາໂດຍກົງແລະເດັດຂາດໃນທຸກດ້ານຂອງພັກກອມມູນິດຫວຽດນາມ, ການຄຸ້ມຄອງເປັນເອກະພາບຂອງລັດ ແລະ ການບໍລິຫານຂອງ ລັດຖະບານ, ໂດຍກົງແມ່ນຄະນະພັກການທະຫານສູນກາງແລະກະຊວງປ້ອງກັນປະເທດ ຕໍ່ວຽກງານພົວພັນຕ່າງປະເທດດ້ານປ້ອງກັນຊາດໃນສະພາບການໃໝ່. ຜັນຂະຫຍາຍແນວ ທາງການຕ່າງປະເທດທີ່ໄດ້ກຳນົດໃນເອກະສານກອງປະຊຸມໃຫຍ່ຄັ້ງທີ 13 ຂອງພັກ; ມະຕິກອງປະຊຸມສູນກາງພັກຄັ້ງທີ 8 ສະໄໝທີ 11, ລົງວັນທີ 25 ຕຸລາ 2013, “ວ່າດ້ວຍຍຸດທະສາດການປົກປັກຮັກສາປະເທດຊາດໃນສະພາບການໃໝ່”; ມະຕິຂອງກົມການເມືອງສູນກາງພັກສະໄໝທີ 11 ສະບັບເລກທີ 22-NQ/TW, ລົງວັນທີ 10 ເມສາ 2013, “ວ່າດ້ວຍການເຊື່ອມໂຍງສາກົນ”; ມະຕິກອງປະຊຸມໃຫຍ່ຜູ້ແທນອົງຄະນະພັກກອງທັບຄັ້ງທີ 11 ແລະ ມະຕິຂອງຄະນະພັກການທະຫານສູນກາງສະບັບເລກທີ 806-NQ/QUTW, ລົງວັນທີ 31 ທັນວາ 2013, “ວ່າດ້ວຍການເຊື່ອມໂຍງສາກົນ ແລະ ການຕ່າງປະເທດດ້ານປ້ອງກັນຊາດເຖິງປີ 2020 ແລະ ໃນຊຸມປີຕໍ່ໜ້າ” ຢ່າງມີປະສິທິຜົນ. ປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງຢ່າງສະເໝີຕົ້ນສະເໝີປາຍ, ເສີມຂະຫຍາຍກຳລັງແຮງພາຍໃນ, ຍາດແຍ່ງກຳລັງແຮງພາຍນອກໃຫ້ໄດ້ຫຼາຍທີ່ສຸດ; ຢຶດມັ້ນນະໂຍບາຍຫັນການພົວພັນເປັນຫຼາຍຝ່າຍ, ຫຼາຍຮູບຫຼາຍແບບຕາມທິດນຳ “ເພີ່ມເພື່ອນມິດ, ຫຼຸດຜ່ອນສັດຕູ”; ສົມທົບລະຫວ່າງການຕ່າງປະເທດ ກັບການປ້ອງກັນຊາດ, ປ້ອງກັນຄວາມສະຫງົບຢ່າງແໜ້ນແຟ້ນ; ຖືເອົາການຕ່າງປະເທດດ້ານປ້ອງກັນຊາດ ເຊື່ອມຕິດກັບຍຸດທະສາດສັງລວມຂອງການຕ່າງປະເທດຂອງພັກ, ການທູດຂອງລັດ ແລະການທູດປະຊາຊົນ; ລະຫວ່າງການຕໍ່ສູ້ດ້ານການທູດກັບການຕໍ່ສູ້ໃນສະໜາມຮົບຕົວຈິງຂອງບັນ ດາກຳລັງ ເພື່ອເຮັດໃຫ້ທຸກກົນອຸບາຍ, ເລ່ລ່ຽມລ່ວງລະເມີດອະທິປະໄຕ, ສິດອະທິປະໄຕ, ສິດພິພາກສາ ແລະ ຜົນປະໂຫຍດຂອງປະເທດຫວຽດນາມ ຖືກປະລາໄຊ; ເພີ່ມທະວີການປັບປຸງຈັດວາງກຳລັງດ້ານປ້ອງກັນຊາດຫວຽດນາມໃນຍຸດທະສາດປົກປັກຮັກສາປະເທດ ຊາດ.
ສອງແມ່ນ, ສືບຕໍ່ປ່ຽນແປງໃໝ່ຈິນຕະນາການ, ຍົກສູງຄວາມຮັບຮູ້ຂອງທົ່ວພັກ, ທົ່ວປວງຊົນທັງຊາດ ແລະ ທົ່ວກອງທັບ ກ່ຽວກັບທີ່ຕັ້ງ, ບົດບາດ ແລະ ໜ້າທີ່ຂອງການຕ່າອງປະເທດດ້ານປ້ອງກັນຊາດໃນວຽກງານພົວພັນຕ່າງປະເທດຂອງພັກ, ການທູດຂອງລັດ, ການທູດປະຊາຊົນຢ່າງສັງລວມ, ຮັບໃຊ້ໜ້າທີ່ສ້າງສາ ແລະ ປົກປັກຮັກສາປະເທດຊາດໃນສະພາບການໃໝ່. ກຳນົດການຕ່າງປະເທດດ້ານປ້ອງກັນຊາດ ແມ່ນໜຶ່ງໃນບັນດາເສົາຄ້ຳ ເພື່ອຊຸກຍູ້ການພົວພັນດ້ານການເມືອງ, ສ້າງຄວາມໄວ້ວາງໃຈກັບປະເທດອື່ນໆ, ພ້ອມທັງເປັນເວທີໂດຍກົງສຳລັບການຮ່ວມມືແລະຕໍ່ສູ້ ເພື່ອຮັກສາສະພາບແວດລ້ອມສັນຕິພາບ, ຄວາມໝັ້ນຄົງ, ປະກອບສ່ວນອັນສຳຄັນເຂົ້າໃນການປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ປົກປັກຮັກສາພັກ, ລັດ, ປະຊາຊົນ ແລະ ລະບອບສັງຄົມນິຍົມຢ່າງໝັ້ນຄົງ; ຍົກສູງອິດທິພົນ, ຖານະບົດບາດຂອງປະເທດ, ຂອງກອງທັບໃນພາກພື້ນແລະໃນເວທີສາກົນ, ປະກອບສ່ວນອັນຕັ້ງໜ້າເຂົ້າໃນພາລະກິດສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະຄວາມກ້າວໜ້າທາງສັງຄົມໃນພາກພື້ນ ແລະ ໃນທົ່ວໂລກ; ຍາດແຍ່ງບັນດາແຫຼ່ງພະລັງຈາກພາຍນອກເພື່ອເພີ່ມທະວີກຳລັງບົ່ມຊ້ອນດ້ານປ້ອງກັນຊາດ, ຮັບໃຊ້ຢ່າງໄດ້ການໄດ້ງານໃຫ້ແກ່ໜ້າທີ່ສ້າງກອງທັບປະຕິວັດ, ກອງທັບຫຼວງ, ຍອດຢ້ຽມ, ທັນສະໄໝເທື່ອລະກ້າວ.
ສາມແມ່ນ, ຍົກສູງຄຸນນະພາບວຽກງານຄົ້ນຄ້ວາ ຄາດຄະເນ ແລະ ເປັນເສນາທິ ການຍຸດທະສາດ ກ່ຽວກັບການພົວພັນຕ່າງປະເທດດ້ານປ້ອງກັນຊາດ. ເພີ່ມທະວີການກຳ ແໜ້ນ, ຄົ້ນຄ້ວາ, ຄາດຄະເນສະພາບການ ແລະ ເປັນເສນາທິການກ່ຽວກັບຍຸດທະສາດ, ໂດຍສະເພາະແມ່ນບັນດາທ່າອ່ຽງ, ພາລະວັດໃໝ່ຢູ່ພາກພື້ນ ແລະ ໃນໂລກ, ການແກ່ງ ແຍ້ງດ້ານຍຸດທະສາດ, ການເຕົ້າໂຮມກຳລັງ, ການແຊກແຊງຂອງປະເທດໃຫຍ່ຕ່າງໆ, ສະ ພາບການເຂດທະເລຕາເວັນອອກ, ຊາຍແດນອານາເຂດ; ຖືເປັນສຳຄັນການຕີລາຄາ, ວິໄຈບັນດາຂໍ້ສະດວກ, ຄວາມຫຍຸ້ງຍາກ ທີ່ສົ່ງຜົນກະທົບໂດຍກົງຕໍ່ການປ້ອງກັນຊາດ - ປ້ອງກັນຄວາມສະຫງົບຂອງປະເທດ ແລະ ໜ້າທີ່ພົວພັນຕ່າງປະເທດດ້ານປ້ອງກັນຊາດ, ເປັນພື້ນຖານໃຫ້ແກ່ການເປັນເສນາທິການຊ່ວຍພັກ, ລັດ, ຄະນະພັກການທະຫານສູນກາງ ແລະກະຊວງປ້ອງກັນປະເທດ ໃນການສ້າງ, ວາງແຜນຍຸດທະສາດ, ນະໂຍບາຍການຕ່າງ ປະເທດດ້ານປ້ອງກັນຊາດ ແລະ ມາດຕະການຕ່າງໆໃນການແກ້ໄຂສາຍພົວພັນກັບບັນດາ ປະເທດ, ອົງການການຈັດຕັ້ງສາກົນຢ່າງທັນທ່ວງທີ ແລະ ຖືກຕ້ອງ, ສອດຄ່ອງກັບສະພາບການສາກົນ, ພາກພື້ນ ແລະ ກັບຂະບວນວິວັດການເຊື່ອມໂຍງສາກົນຂອງປະເທດເຮົາ, ຕອບສະໜອງຄວາມຮຽກຮ້ອງຕ້ອງການ ແລະໜ້າທີ່ປົກປັກຮັກສາປະເທດຊາດໃນສະພາບການໃໝ່. ມີການປະສານງານກັບບັນດາກະຊວງ, ຄະນະ, ຂະແໜງການ, ທ້ອງຖິ່ນ ແລະ ກອງກຳລັງທີ່ກ່ຽວຂ້ອງ ໃນການຄົ້ນຄ້ວາ ຄາດຄະເນ ແລະ ເປັນເສນາທິການຍຸດທະສາດ ກ່ຽວກັບການພົວພັນຕ່າງປະເທດດ້ານປ້ອງກັນຊາດ ຢ່າງເປັນປະຈຳ, ແໜ້ນແຟ້ນ ແລະ ມີປະສິດທິຜົນສູງ ເພື່ອເສີມຂະຫຍາຍກຳລັງແຮງສັງລວມໃນການວິໄຈ, ຕີລາຄາສະພາບການ, ນຳເອົາວຽກງານດັ່ງກ່າວເຂົ້າສູ່ລວງເລິກ ແລະ ມີປະສິດທິຜົນສູງ.
ສີ່ແມ່ນ, ຍົກສູງປະສິດທິຜົນການພົວພັນຕ່າງປະເທດດ້ານປ້ອງກັນຊາດສອງຝ່າຍ, ນຳເອົາການພົວພັນຮ່ວມມືກັບບັນດາປະເທດເຂົ້າສູ່ລວງເລິກ ແລະ ມີທາດແທ້. ຊຸກຍູ້ ການພົວພັນຮ່ວມມືດ້ານປ້ອງກັນຊາດສອງຝ່າຍ, ປັບປຸງຄວາມໄວ້ວາງໃຈດ້ານການເມືອງ ກັບປະເທດບ້ານໃກ້ເຮືອນຄຽງ, ຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານຕ່າງໆ, ບັນດາ ປະເທດອາຊຽນ ແລະ ບັນດາປະເທດເພື່ອນມິດທີ່ເປັນມູນເຊື້ອ ບົນຫຼັກການຮັບປະກັນຜົນ ປະໂຫຍດຂອງປະເທດ, ຂອງຊາດ, ສະເໝີພາບ, ຕ່າງຝ່າຍຕ່າງມີຜົນປະໂຫຍດ, ປະຕິບັດຕາມກົດໝາຍສາກົນ. ໃນຂະບວນການຜັນຂະຫຍາຍ, ຕ້ອງຢຶດໝັ້ນບັນດາບັນ ຫາທີ່ມີລັກສະນະເປັນຫຼັກການ ແຕ່ຕ້ອງມີຄວາມຄ່ອງແຄ້ວ, ອ່ອນໂຍນ, ໄຫວພິບໃນການປະພຶດ, ປະຕິບັດ “ຖືເອົາຫຼັກການເປັນພື້ນ ເພື່ອໝູນໃຊ້ຢ່າງໄຫວພິບ”; ກຳນົດ “ຄູ່ຮ່ວມມື, ເປົ້າໝາຍ” ຢ່າງຈະແຈ້ງ ເພື່ອທັງຮ່ວມມື, ທັງຕໍ່ສູ້, ເພີ່ມທະວີການຮ່ວມມື, ຫຼີກລ່ຽງການ ປະທະກັນ, ປະເຊີນໜ້າກັນ, ຫຼີກເວັ້ນການຕົກຢູ່ໃນທ່າໂດດດ່ຽວ, ຂຶ້ນກັບຫຼືຕົກໃສ່ສະພາບ ຕ້ອງ “ເລືອກຝ່າຍ”. ເພີ່ມທະວີບັນດາມາດຕະການສ້າງຄວາມເຊື່ອໝັ້ນຍຸດທະສາດ, ມີຄວາມເຂົ້າໃຈເຊິ່ງກັນແລະກັນ, “ເພີ່ມເພື່ອນມິດ, ຫຼຸດຜ່ອນສັດຕູ”; ຢຶດໝັ້ນການແກ້ໄຂ ບັນດາບັນຫາທີ່ບໍ່ລົງຮອຍກັນແລະປະທະກັນດ້ວຍສັນຕິວິທີ, ບົນຈິດໃຈເຄົາລົບນັບຖືກົດໝາຍສາກົນ, ກົດບັດສະຫະປະຊາຊາດ. ຫັນເອົາບັນດາຮູບການ, ເນື້ອໃນພົວພັນ ຕ່າງປະເທດດ້ານປ້ອງກັນຊາດເປັນຫຼາຍຮູບຫຼາຍແບບ; ຜັນຂະຫຍາຍປະຕິບັດບັນດາເນື້ອໃນການຮ່ວມມືທີ່ໄດ້ລົງນາມຢ່າງມີປະສິດທິຜົນ, ສຸມໃສ່ການຊຸກຍູ້ບັນດາກົນໄກປຶກສາຫາລື, ສົນທະນາ, ຮ່ວມມືລະຫວ່າງທະຫານບັນດາເຫຼົ່າຮົບ, ກາຝຶກອົບຮົມ, ອຸດສາຫະກຳການປ້ອງກັນປະເທດ, ການແພດທະຫານ, ການກູ້ໄພ-ກູ້ຊີບ, ສ້າງສັງມິດຕະພາບດ້ານປ້ອງກັນຊາດເຂດຊາຍແດນ, ແກ້ໄຂຜ່ານຜ່າຜົນຍ້ອນຫຼັງຂອງການສົງຄາມ ແລະການຮັກສາສັນຕິພາບຂອງສະຫະປະຊາຊາດ ແລະອື່ນໆ, ສອດຄ່ອງກັບທ່າແຮງຂອງແຕ່ລະຄູ່ຮ່ວມມື ແລະ ຄວາມຕ້ອງການຂອງຫວຽດນາມ.
ຫ້າແມ່ນ, ປະຕິບັດຕາມຄຳສັ່ງຂອງຄະນະເລຂາທິການສູນກາງພັກສະບັບເລກທີ 25-CT/TW “ວ່າດ້ວຍການຍູ້ແຮງ ແລະ ຍົກລະດັບການພົວພັນຕ່າງປະເທດຫຼາຍຝ່າຍໃນສະພາບການໃໝ່” ຢ່າງຕັ້ງໜ້າ ແລະ ມີປະສິດທິຜົນ. ມີຄວາມເປັນເຈົ້າການປະກອບສ່ວນເຂົ້າໃນການສ້າງ ແລະ ວາງແຜນນະໂຍບາຍຢ່າງຕັ້ງໜ້າ, ສະເໜີບັນດາແນວຄິດປະດິດສ້າງ ແລະ ມີສ່ວນຮ່ວມໃນບັນດາກົນໄກ, ເວທີປາໄສຄວາມໝັ້ນຄົງພາກພື້ນແລະສາກົນ ຢ່າງມີຄວາມຮັບຜິດຊອບ ແລະ ມີປະສິດທິຜົນ, ໂດຍສະເພາະແມ່ນກົນໄກການຮ່ວມມືດ້ານປ້ອງກັນຊາດ ໃນຂອບເຂດສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ), ໂດຍອາຊຽນເປັນເຈົ້າພາທາງ, ປະກອບສ່ວນສ້າງປະຊາຄົມການເມືອງ-ຄວາມໝັ້ນຄົງອາຊຽນ, ປະກອບສ່ວນເຂົ້າໃນການຮັກສາສັນຕິພາບ, ຄວາມໝັ້ນຄົງ ແລະ ການພັດທະນາຂອງພາກພື້ນແລະຂອງໂລກ ຢ່າງຕັ້ງໜ້າ. ສືບຕໍ່ຍູ້ແຮງການເຂົ້າຮ່ວມກິດຈະກຳຮັກສາສັນຕິພາບຂອງສະຫະປະຊາຊາດ ຕາມມະຕິຂອງສະພາແຫ່ງຊາດສະບັບເລກທີ 130/2020/QH14, ລົງວັນທີ 13 ພະຈິກ 2020, “ວ່າດ້ວຍການເຂົ້າຮ່ວມກອງກຳລັງຮັກສາສັນຕິພາບຂອງສະຫະປະຊາຊາດ” ຕາມທິດ ເປີດກ້ວາງຂົງເຂດ, ພື້ນທີ່ ແລະ ຂະໜາດ.
ຫົກແມ່ນ, ມີຄວາມເປັນເຈົ້າການຍົກສູງຄຸນນະພາບ, ປະສິດທິຜົນວຽກງານຂໍ້ມູນ ຂ່າວສານ, ໂຄສະນາການຕ່າງປະເທດຢ່າງຕັ້ງໜ້າ. ສົມທົບກັບຫຼາຍກຳລັງ, ມາດຕະການ ຢ່າງຄົບຊຸດ, ສະໜອງຂໍ້ມູນຂ່າວສານໃຫ້ພະນັກງານ, ນັກຮົບ, ປະຊາຊົນ, ພີ່ນ້ອງຮ່ວມ ຊາດຫວຽດນາມຢູ່ຕ່າງປະເທດ ແລະ ປະຊາຄົມສາກົນ ມີຄວາມເຂົ້າໃຈກ່ຽວກັບແຜນນະໂຍບາຍ, ແນວທາງການຕ່າງປະເທດ, ນະໂຍບາຍປ້ອງກັນປະເທດທີ່ສັນຕິພາບ, ປ້ອວກັນຕົວເອງຂອງພັກ ແລະລັດເຮົາ, ບັນດາຜົນງານການພັດທະນາຂອງປະເທດ, ຂອງກອງທັບປະຊາຊົນຫວຽດນາມ ຢ່າງຈະແຈ້ງ ແລະ ທັນທ່ວງທີ; ເຮັດໃຫ້ໂລກໄດ້ຮູ້ວ່າຫວຽດນາມບໍ່ພຽງແຕ່ເປັນປະເທດທີ່ຮັກຫອມສັນຕິພາບ, ກຳລັງພັດທະນາຢ່າງແຂງແຮງເທົ່ານັ້ນ ແຕ່ຍັງ ເປັນປະເທດໜຶ່ງທີ່ໄດ້ແລະກຳລັງໄດ້ມີສ່ວນຮ່ວມຢ່າງຮັບຜິດຊອບ ໃນການແກ້ໄຂບັນດາບັນຫາສາກົນແລະພາກພື້ນ, ເພື່ອສັນຕິພາບ ການພັດທະນາ ແລະ ຄວາມຈະເລີນຮຸ່ງເຮືອງຂອງຜູ້ຄົນທົ່ວໂລກ. ຈາກນັ້ນ, ປະກອບສ່ວນເຂົ້າໃນການຍົກສູງປະສິດທິຜົນການຕ່າງປະເທດດ້ານປ້ອງກັນຊາດ; ສ້າງຄວາມເຫັນດີເຫັນພ້ອມ, ການສະໜັບສະໜູນຕໍ່ພາລະກິດການສ້າງສາ ແລະ ປົກປັກຮັກສາປະເທດຊາດຂອງພັກ, ລັດ ແລະ ກອງທັບເຮົາໃນສະພາບການໃໝ່, ຕ້ານຄືນບັນດາທັດສະນະບິດເບື່ອນຂອງກຳລັງສັດຕູ ທີ່ໄດ້ສວຍໃຊ້ບັນຫາເຊື່ອມໂຍງສາກົນ, ການຕ່າງປະເທດດ້ານປ້ອງກັນຊາດ ເພື່ອແບ່ງແຍກພັກ, ກອງທັບ ກັບປະຊາຊົນເຮົາ.
ເຈັດແມ່ນ, ສືບຕໍ່ປັບປຸງລະບົບເອກະສານຂໍ້ກຳນົດກົດໝາຍທີ່ກ່ຽວຂ້ອງກັບການຕ່າງປະເທດດ້ານປ້ອງກັນຊາດໃຫ້ສົມບູນ, ຮັບປະກັນຄວາມສອດຄ່ອງກັບກົດໝາຍ ແລະການປະຕິບັດສາກົນ ແລະ ສອດຄ່ອງ ເປັນເອກະພາບກັບເອກະສານກົດໝາຍການຕ່າງປະເທດຂອງຊາດ, ສອດຄ່ອງກັບຈຸດພິເສດການເຄືື່ອນໄຫວພົວພັນຕ່າງປະເທດດ້ານປ້ອງກັນຊາດ, ຕອບສະໜອງທັງຄວາມຮຽກຮ້ອງຕ້ອງການໃນສະເພາະໜ້າ ແລະໄລຍະຍາວ. ກ່ອນອື່ນໝົດ, ສ້າງແລະຍື່ນສະເໜີໃຫ້ລັດຖະບານປະກາດໃຊ້ຍຸດທະສາດເຊື່ອມໂຍງເຂົ້າກັບສາກົນແລະການທູດປ້ອງກັນປະເທດຮອດປີ 2030. ແລະ ຊຸມປີຕໍ່ໄປ, ເປັນພື້ນຖານເພື່ອຜັນຂະຫຍາຍບັນດາໜ້າທີ່ພົວພັນຕ່າງປະເທດດ້ານປ້ອງກັນຊາດ, ຕອບສະໜອງຄວາມຮຽກຮ້ອງຕ້ອງການສ້າງສາ ແລະ ປົກປັກຮັກສາປະເທດຊາດ ໃນສະພາບການໃໝ່. ເພີ່ມທະວີການປະສານງານ ລະຫວ່າງບັນດາອົງການ, ໜ່ວຍງານປະຕິບັດວຽກງານການຕ່າງປະເທດດ້ານປ້ອງກັນຊາດ ໃນທົ່ວກອງທັບ, ພ້ອມກັນນັ້ນ, ເພີ່ມທະວີການປະສານສົມທົບກັບບັນດາກະຊວງ, ຄະນະ, ຂະແໜງການ, ທ້ອງຖິ່ນທີ່ກ່ຽວຂ້ອງໃນການຜັນຂະຫຍາຍປະຕິບັດໜ້າທີ່ການຕ່າງປະເທດດ້ານປ້ອງກັນຊາດ ຢ່າງມີປະສິດທິຜົນ.
ແປດແມ່ນ, ປັບປຸງການຈັດຕັ້ງ, ຍົກສູງຄຸນນະພາບຖັນແຖວພະນັກງານປະຕິບັດວຽກງານການເຊື່ອມໂຍງສາກົນ ແລະ ການຕ່າງປະເທດດ້ານປ້ອງກັນຊາດ. ສືບຕໍ່ ປັບປຸງກົງຈັກການຈັດຕັ້ງບັນດາອົງການພົວພັນຕ່າງປະເທດ ຕາມທິດກະທັດຫັດ, ມີປະສິດ ທິພາບ ແລະ ປະສິດທິຜົນ; ປະຕິບັດຫຼາຍມາດຕະການຢ່າງຄົບຊຸດ ໃນການສ້າງຖັນແຖວ ພະນັກງານປະຕິບັດວຽກງານການຕ່າງປະເທດດ້ານປ້ອງກັນຊາດ ທີ່ມີຄຸນທາດການເມືອງທີ່ໜັກແໜ້ນ, ມີສະຕິການຈັດຕັ້ງ ລະບຽບວິໄນ ຢ່າງເຂັ້ມງວດ, ມີຄຸນທາດ, ຄຸນສົມບັດ, ແບບແຜນການດຳລົງຊີວິດທີ່ຈົບງາມ, ປອດໃສ, ມີຄວາມຮູ້ຢ່າງຮອບດ້ານ, ມີຄວາມຊຳ ນານດ້ານວິຊາການ, ວິຊາສະເພາະ, ພາສາຕ່າງປະເທດ, ຕອບສະໜອງຄວາມຮຽກຮ້ອງ ຕ້ອງການເປີດກ້ວາງ ແລະ ຍົກລະດັບວຽກງານການຕ່າງປະເທດດ້ານປ້ອງກັນຊາດ ໃນ ສະພາບການໃໝ່./.
--------------------
(1) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສນຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 157 - 158.
- ບົດນີ້ໄດ້ລົງພິມໃນວາລະສານກອມມູນິດ ສະບັບເລກທີ 987 (ເດືອນເມສາ 2022)
