ແນວໂຮມປະເທດຊາດຫວຽດນາມເຕົ້າໂຮມ, ຂົນຂວາຍ
ຊາວຫວຽດນາມທີ່ອາໄສຢູ່ຕ່າງປະເທດ ໃຫ້ສາມັກຄີກັນ,
ມຸ່ງສູ່ການສ້າງສາ ແລະ ປົກປັກຮັກສາປະເທດຊາດ
ຊາວຫວຽດນາມທີ່ອາໄສຢູ່ຕ່າງປະເທດ ໃຫ້ສາມັກຄີກັນ,
ມຸ່ງສູ່ການສ້າງສາ ແລະ ປົກປັກຮັກສາປະເທດຊາດ
ວກ. - ໃນທຸກເວລາ, ແນວໂຮມປະເທດຊາດຫວຽດນາມມີບົດບາດສຳຄັນໃນການເຕົ້າໂຮມແລະຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດ - ໜ້າທີ່ໜຶ່ງທີ່ສຳຄັນໃນພາລະກິດການປະຕິວັດຂອງຊາດຫວຽດນາມເວົ້າລວມ, ຂອງການເພີ່ມທະວີກ້ອນມະຫາສາມັກຄີປວງຊົນທັງຊາດເວົ້າສະເພາະ. ໃນໄລຍະເວລາທີ່ຈະມາເຖິງນີ້, ຕໍ່ໜ້າຄວາມຕ້ອງການຂອງພາລະກິດການສ້າງສາແລະປົກປັກຮັກສາປະເທດຊາດ, ແນວໂຮມປະເທດຊາດຫວຽດນາມສືບຕໍ່ມານະພະຍາຍມ ເພື່ອເຮັດສຳເລັດພາລະກິດຂອງຕົນ.
ຄວາມສາມັກຄີປວງຊົນທັງຊາດໃນບັນດາແຜນນະໂຍບາຍ, ນະໂຍບາຍທີ່ສຳຄັນ
ຂອງພັກແລະລັດ ກ່ຽວກັບວຽກງານສຳລັບຊາວຫວຽດນາມທີ່ອາໄສຢູ່ຕ່າງປະເທດ
ໃນຊ່ວງຊີວິດຂອງຕົນ, ປະທານໂຮ່ຈີມິນຍາມໃດກໍ່ເນັ້ນໜັກວ່າ: ສາມັກຄີ, ສາມັກຄີ, ມະຫາສາມັກຄີ. ຄວາມສໍາເລັດ, ຄວາມສໍາເລັດ, ຄວາມສໍາເລັດທີ່ຍິ່ງໃຫຍ່. ນັ້ນແມ່ນ “ເສັ້ນໄໝສີແດງ” ທີ່ສອດຮ້ອຍຕະຫຼອດໃນແນວຄິດທັງໝົດຂອງເພິ່ນ, ກໍຄື ໃນປະມວນຫຼັກການແລະທິດນຳ ທີ່ເພີ່ນກຳນົດໄວ້ ໃຫ້ແກ່ການປະຕິວັດຫວຽດນາມ. ນັ້ນກໍແມ່ນການສະທ້ອນແລະຄວາມສືບຕໍ່ຮີດຄອງປະເພນີອັນຍາວນານ ຂອງຊາດຫວຽດນາມ: ຍູ້ເຮືອແມ່ນປະຊາຊົນ, ພິກປີ້ນເຮືອກໍປະຊາຊົນ. ການພິກເຮືອໃຫ້ຮູ້ວ່າ ກຳລັງຂອງຄົນຄືກັບນ້ຳ. ພາລະກິດປະຕິວັດຂອງປະເທດຊາດບໍ່ສາມາດປະສົບຜົນສຳເລັດໄດ້, ຖ້າບໍ່ມີການສະໜັບສະໜູນຈາກປະຊາຊົນຈຳນວນຫຼວງຫຼາຍຈາກທຸກຊັ້ນວັນນະ ໂດຍບໍ່ຈຳແນກຊົນເຜົ່າ ສາສະໜາ ຊົນຊັ້ນ, ຢູ່ໃນປະເທດຫຼືຢູ່ຕ່າງປະເທດ, ຍິງຫຼືຊາຍ, ຮັ່ງມີຫຼືທຸກຍາກ...
ໃນເວລາເດີນທາງໄປຕ່າງປະເທດເພື່ອຊອກຫາວິທີທາງກອບກູ້ປະເທດຊາດ ແລະ ໃນໄລຍະຕົ້ນຂອງການສ້າງສາປະເທດຊາດ, ປະທານໂຮ່ຈີມິນ ແລະ ບັນດາຜູ້ນຳຮຸ່ນກ່ອນຂອງພັກ ໄດ້ເຄື່ອນໄຫວໃນໝູ່ປະຊາຊົນ ແລະ ໃນປະຊາຄົມຊາວຫວຽດນາມທີ່ອາໄສຢູ່ຕ່າງປະເທດ, ໄດ້ຮັບການດູແລ ປົກປ້ອງ ແລະ ຊ່ວຍເຫຼືອ ຈາກເພື່ອນຮ່ວມຊາດ; ດັ່ງນັ້ນ, ເພິ່ນໄດ້ສົນໃຈແລະເຂົ້າໃຈແຈ້ງທີ່ສຸດເຖິງ ບົດບາດສຳຄັນຂອງຊາວຫວຽດນາມທີ່ອາໄສຢູ່ຕ່າງປະເທດໃນການປະຕິວັດ. ເພິ່ນໄດ້ກໍ່ຕັ້ງຮາກຖານເບື້ອງຕົ້ນໂດຍກົງ ເພື່ອສ້າງຕັ້ງບັນດາອົງການຂອງຊາວຫວຽດນາມທີ່ອາໄສຢູ່ຝລັ່ງ, ຈີນ, ໄທ..., ກ້າວໄປເຖິງການກໍ່ຕັ້ງຂະບວນການຊາວຫວຽດນາມຕ່າງປະເທດຮັກຊາດ ທີ່ຂະຫຍາຍຕົວຢ່າງແຂງແຮງໃນປະເທດເຫຼົ່ານີ້, ສ້າງພື້ນຖານເພື່ອໜູນຊ່ວຍການເຄື່ອນໄຫວປະຕິວັດໃນປະເທດ.
ຫຼັງຈາກທີ່ປະເທດໄດ້ຮັບເອກະລາດ, ປະທານໂຮ່ຈີມິນໄດ້ຮຽກຮ້ອງແລະປຸກລະດົມພີ່ນ້ອງຮ່ວມຊາດຊາວຫວຽດນາມທີ່ອາໄສຢູ່ຕ່າງປະເທດ ໃຫ້ເສີມຂະຫຍາຍນ້ຳໃຈຮັກຊາດ, ຍາດແຍ່ງເອົາຄວາມຮັກແພງຂອງປະຊາຊົນທ້ອງຖິ່ນ, ດ້ວຍຫຼາຍມາດຕະການທີ່ເໝາະສົມ ເພື່ອສະໜັບສະໜູນປະເທດຊາດ. ຕອບສະໜອງຄຳຮຽກຮ້ອງຂອງປະທານໂຮ່ຈີມິນ, ພີ່ນ້ອງຮ່ວມຊາດຊາວຫວຽດນາມທີ່ອາໄສຢູ່ຕ່າງປະເທດ ໄດ້ປະກອບສ່ວນອັນໃຫຍ່ຫຼວງທາງດ້ານວັດຖຸ ຈິດໃຈ ແລະ ສະຕິປັນຍາ ໃຫ້ປະເທດຊາດ, ພິເສດແມ່ນ ໃນໄລຍະທີ່ຫຍຸ້ງຍາດ ລຳບາກ ເມື່ອປະເທດສາທາລະນະລັດປະຊາທິປະໄຕຫວຽດນາມ ຫາກໍ່ໄດ້ກໍາເນີດ. ໃນສົງຄາມຕໍ່ຕ້ານສອງຄັ້ງ ຕ້ານພວກລ່າເມືອງຂຶ້ນຝຣັ່ງ ແລະ ຕ້ານຈັກກະພັດອາເມລິກາຜູ້ຮຸກຮານ, ແຫຼ່ງກຳລັງແຮງຂອງປະຊາຄົມຊາວຫວຽດນາມທີ່ອາໄສຢູ່ຕ່າງປະເທດ ສືບຕໍ່ໄດ້ຮັບການເສີມຂະຫຍາຍສຸດຂີດ, ປະກອບສ່ວນອັນໃຫຍ່ຫຼວງເຂົ້າໃນພາລະກິດປະຕິວັດ ຮັກສາເອກະລາດແຫ່ງຊາດ ແລະຄວາມເປັນເອກະພາບຂອງປະເທດຊາດ.
ສືບຕໍ່ຈິດໃຈມະຫາສາມັກຄີປວງຊົນທັງຊາດຂອງປະທານໂຮ່ຈີມິນ, ໃນພາລະກິດການປ່ຽນແປງໃໝ່, ພັກແລະລັດຫວຽດນາມ ໄດ້ສືບຕໍ່ຢືນຢັນບົດບາດທີ່ຕັ້ງສຳຄັນຂອງປະຊາຄົມຊາວຫວຽດນາມທີ່ອາໄສຢູ່ຕ່າງປະເທດ. ທັດສະນະແລະນະໂຍບາຍທີ່ສອດຮ້ອຍຕະຫຼອດຂອງພັກແລະລັດ ກໍ່ຄືນ້ຳໃຈຂອງຊາວຫວຽດນາມທຸກຄົນໃນປະເທດ, ຍາມໃດກໍຢືນຢັນ: ຊາວຫວຽດນາມທີ່ອາໄສຢູ່ຕ່າງປະເທດແມ່ນພາກສ່ວນທີ່ແຍກອອກບໍ່ໄດ້ ແລະ ເປັນແຫຼ່ງພະລັງໜຶ່ງຂອງປະຊາຄົມຊາດພັນຫວຽດນາມ. ດ້ວຍພາລະກຳ ສິດຂອບເຂດແລະ ຄວາມຮັບຜິດຊອບຂອງຕົນ, ໃນຊຸມປີທີ່ຜ່ານມາ ແນວໂຮມປະເທດຊາດຫວຽດນາມ ໄດ້ເປັນເຈົ້າການແລະຕັ້ງໜ້າ ໃນວຽກງານການຂົນຂວາຍ ແລະ ເຕົ້າໂຮມຊາວຫວຽດນາມທີ່ອາໄສຢູ່ຕ່າງປະເທດ ໃຫ້ພ້ອມກັນບຳລຸງຄູນສ້າງກ້ອມມະຫາສາມັກຄີປວງຊົນທັງຊາດ, ປະກອບສ່ວນສ້າງສາ ແລະ ປົກປັກຮັກສາປະເທດຊາດ.
ເພື່ອປະຕິບັດແຜນນະໂຍບາຍຂອງພັກ, ກົມການເມືອງສູນກາງພັກຊຸດຕ່າງໆ ໄດ້ອອກບັນດາເອກະສານທີ່ສຳຄັນ ກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ(1), ຕາມນັ້ນ:
1- ວຽກງານສໍາລັບຊາວຫວຽດນາມທີ່ອາໄສຢູ່ຕ່າງປະເທດ ຕ້ອງສະແດງອອກຢ່າງຄົບຖ້ວນເຖິງ ມູນເຊື້ອມະຫາສາມັກຄີປວງຊົນທັງຊາດ. ພື້ນຖານຂອງຄວາມສາມັກຄີນັ້ນແມ່ນສະຕິຊາດແລະນ້ຳໃຈຮັກຊາດ, ຄວາມທະນົງໃຈແຫ່ງຊາດ ແລະ ເປົ້າໝາຍລວມຂອງຊາວຫວຽດນາມທຸກຄົນແມ່ນ ການຮັກສາເອກະລາດແຫ່ງຊາດ ແລະ ເອກະພາບຂອງປະເທດຊາດ, ເພື່ອ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸຕິທຳ ແລະ ອາລະຍະທຳ”. ລົບລ້າງຄວາມຮູ້ສຶກຜິດ ອະຄະຕິ ແລະ ການຈໍາແນກປະຕິບັດ ທີ່ເກີດຈາກອະດີດ ຫຼືຈາກພາກສ່ວນຊົນຊັ້ນ; ສ້າງຈິດໃຈເປີດກວ້າງ ຄວາມເຄົາລົບ ຄວາມເຂົ້າໃຈ ຄວາມໄວ້ວາງໃຈເຊິ່ງກັນແລະກັນ ແລະ ມຸ່ງໄປຂ້າງໜ້າເຖິງອະນາຄົດ. ຊາວຫວຽດນາມທຸກຄົນ, ບໍ່ຈຳແນກຊົນເຜົ່າ ສາສະໜາ ຕົ້ນກໍາເນີດ ສະຖານະພາບທາງສັງຄົມ ເຫດຜົນຂອງການໄປຕ່າງປະເທດ, ຄວາມປາຖະໜາຢາກປະກອບສ່ວນເຂົ້າໃນການບັນລຸເປົ້າໝາຍທີ່ກ່າວມາຂ້າງເທິງນີ້ ລ້ວນແຕ່ໄດ້ເຕົ້າໂຮມຢູ່ໃນກຸ່ມກ້ອນມະຫາສາມັກຄີປວງຊົນທັງຊາດ.
2- ຊາວຫວຽດນາມທີ່ອາໄສຢູ່ຕ່າງປະເທດແມ່ນພາກສ່ວນທີ່ແຍກອອກບໍ່ໄດ້ ແລະເປັນແຫຼ່ງພະລັງໜຶ່ງຂອງປະຊາຄົມຊາດພັນຫວຽດນາມ ໃນກິດຈະການກໍ່ສ້າງແລະປົກປັກຮັກສາປະເທດຊາດ, ແມ່ນປັດໃຈສຳຄັນທີ່ປະກອບສ່ວນເພີ່ມທະວີການພົວພັນຮ່ວມມືແລະມິດຕະພາບ ລະຫວ່າງຫວຽດນາມກັບບັນດາປະເທດໃນໂລກ.
3- ວຽກງານສຳລັບຊາວຫວຽດນາມທີ່ອາໄສຢູ່ຕ່າງປະເທດ ແມ່ນຄວາມຮັບຜິດຊອບຂອງທັງລະບົບການເມືອງ ແລະຂອງປະຊາຊົນທັງໝົດ. ບັນດາອົງການຈັດຕັ້ງພັກ, ລັດ, ແນວໂຮມປະເທດຊາດຫວຽດນາມ ແລະ ບັນດາອົງຄະນະມະຫາຊົນ, ບັນດາຂະແໜງການ ທຸກຂັ້ນຕັ້ງແຕ່ສູນກາງ ຈົນເຖິງທ້ອງຖິ່ນ, ຢູ່ໃນປະເທດແລະຕ່າງປະເທດ ແລະ ປະຊາຊົນທຸກຄົນ ຕ້ອງຖືວ່າ ນີ້ແມ່ນໜ້າທີ່ທີ່ສຳຄັນ ເພື່ອເສີມຂະຫຍາຍກຳລັງແຮງຂອງມະຫາສາມັກຄີປວງຊົນທັງຊາດ ເພື່ອພາລະກິດສ້າງສາ ແລະປົກປັກຮັກສາປະເທດຊາດ.
ແນວໂຮມປະເທດຊາດຫວຽດນາມປະຕິບັດວຽກງານຂົນຂວາຍ
ເຕົ້າໂຮມ ແລະ ສາມັກຄີຊາວຫວຽດນາມທີ່ອາໄສຢູ່ຕ່າງປະເທດ
ປະຕິບັດແຜນນະໂຍບາຍ, ແນວທາງຂອງພັກ, ສິດຂອບເຂດແລະໜ້າທີ່ ທີ່ໄດ້ກຳນົດໃນລັດຖະທຳມະນູນແລະກົດໝາຍ, ແນວໂຮມປະເທດຊາດຫວຽດນາມໄດ້ເປັນເຈົ້າການແລະຕັ້ງໜ້າ ໃນການປ່ຽນແປງໃໝ່, ຂະຫຍາຍເນື້ອໃນ ແລະແບບວິທີການເຄື່ອນໄຫວ, ເຮັດໃຫ້ວຽກງານຂົນຂວາຍ ເຕົ້າໂຮມຊາວຫວຽດນາມທີ່ອາໄສຢູ່ຕ່າງປະເທດ ກາຍເປັນເນື້ອໃນທີ່ສຳຄັນ ເປັນໜ້າທີ່ທີ່ສອດຮ້ອຍຕະຫຼອດໂຄງການດຳເນີນງານ ໂດຍຜ່ານກອງປະຊຸມໃຫຍ່ຂອງຕົນ, ໃນໂຄງການປະສານງານ ປະຕິບັດການປະຈໍາປີ ຂອງຄະນະກຳມະການສູນກາງແນວໂຮມປະເທດຊາດຫວຽດນາມ ກັບບັນດາຄູ່ຮ່ວມມືທີ່ກ່ຽວຂ້ອງ(2).
ຜ່ານໂຄງການປະສານງານ ປະຕິບັດການປະຈໍາປີຂອງຄະນະກຳມະການສູນກາງແນວໂຮມປະເທດຊາດຫວຽດນາມ, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ບັນດາອົງການສະມາຊິກ ຈະເປັນເອກະພາບກັນສ້າງແຜນການສະເພາະ ໂດຍສຸມໃສ່ຜັນຂະຫຍາຍວຽກງານຂໍ້ມູນຂ່າວສານ, ໂຄສະນາແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດ, ໂຄງການປະຕິບັດງານ, ຄຳຮຽກຮ້ອງຂອງຄະນະປະທານ ຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ກັບປະຊາຄົມຊາວຫວຽດນາມທີ່ອາໄສຢູ່ຕ່າງປະເທດ.
ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ປະສານສົມທົບກັບຄະນະກຳມະການແຫ່ງລັດກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ໃນວຽກງານທີ່ປຶກສາ, ຄົ້ນຄວ້າ, ວິພາກວິຈານ, ປະກອບຄວາມຄິດເຫັນ ເພື່ອສ້າງນະໂຍບາຍ, ກົດໝາຍທີ່ກ່ຽວຂ້ອງກັບຊາວຫວຽດນາມທີ່ອາໄສຢູ່ຕ່າງປະເທດ. ຜ່ານນັ້ນ, ດຳເນີນການກວດກາຄືນ ບັນດາເອກະສານກົດໝາຍທີ່ລັດປະກາດໃຊ້ ທີ່ກ່ຽວຂ້ອງກັບຊາວຫວຽດນາມທີ່ອາໄສຢູ່ຕ່າງປະເທດ; ປະສານສົມທົບແລະທາບທາມຄວາມເຫັນເຊິ່ງກັນແລະກັນ ໃນການສ້າງ ປັບປຸງແກ້ໄຂ ເພີ່ມເຕີມ ແລະ ບູລະນະບັນ ດາແຜນນະໂຍບາຍ, ແນວທາງ, ນະໂຍບາຍ, ກົດໝາຍທີ່ກ່ຽວຂ້ອງ ກັບຊາວຫວຽດນາມທີ່ອາໄສຢູ່ຕ່າງປະເທດໃຫ້ສົມບູນແບບ, ເຊັ່ນ ກົດໝາຍວ່າດ້ວຍສັນຊາດຫວຽດນາມ, ກົດໝາຍວ່າດ້ວຍທີ່ຢູ່ອາໄສ, ກົດໝາຍວິທະຍາສາດແລະເຕັກໂນໂລຊີ, ກົດໝາຍວ່າດ້ວຍການລົງທຶນ...; ປະສານສົມທົບການຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດ ໃຫ້ສະໜັບສະໜູນ ແລະປະຕິບັດແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດ; ແບ່ງປັນແລກປ່ຽນຂໍ້ມູນສະພາບການຂອງປະຊາຄົມ, ກຳສະພາບແນວຄິດຈິດໃຈ ແລະ ຄວາມປາຖະໜາຂອງເຂົາເຈົ້າ ເພື່ອສ່ອງແສງ ສະເໜີໃຫ້ພັກແລະລັດ ເພື່ອຮັບປະກັນສິດ ແລະ ຜົນປະໂຫຍດທີ່ຖືກກົດໝາຍ ຊອບທຳ ຂອງຊາວຫວຽດນາມທີ່ອາໄສຢູ່ຕ່າງປະເທດ; ປະສານສົມທົບການປະເມີນ ແລະ ສະເໜີແນະ ກ່ຽວກັບມາດຕະຖານຄັດເລືອກຊາວຫວຽດນາມທີ່ອາໄສຢູ່ຕ່າງປະເທດທີ່ດີເດັ່ນ ເພື່ອແນະນຳໃຫ້ເຂົ້າຮ່ວມຄະນະກຳມະການສູນກາງແນວໂຮມປະເທດຊາດຫວຽດນາມຊຸດຕ່າງໆ; ສົມທົບກັນຈັດຕັ້ງເຫດການປະຈຳປີ ສຳລັບຊາວຫວຽດນາມທີ່ອາໄສຢູ່ຕ່າງປະເທດ, ເຊັ່ນ ລາຍການ “ລະດູບານໃໝ່ໃນບ້ານເກີດເມືອງນອນ”, ຈັດຕັ້ງໃຫ້ພີ່ນ້ອງຮ່ວມຊາດໄປຢາມໝູ່ເກາະ ເຈື່ອງຊາ...
ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ເປັນປະທານບັນດາການເຄື່ອນໄຫວຕິດຕໍ່ພົວພັນ, ແລກປ່ຽນຂໍ້ມູນຂ່າວສານ, ເກັບກຳຄວາມຄິດຈິດໃຈ, ຄວາມມຸ່ງມາດປາດຖະໜາຂອງຊາວຫວຽດນາມທີ່ອາໄສຢູ່ຕ່າງປະເທດ; ສົ່ງຜູ້ແທນເຂົ້າຮ່ວມກິດຈະກຳທີ່ຈັດໂດຍສະມາຄົມ, ອົງການຂອງຊາວຫວຽດນາມທີ່ອາໄສຢູ່ຕ່າງປະເທດ; ຈັດຕັ້ງຄະນະຜູ້ແທນເຮັດວຽກ ຂອງຄະນະກຳມະການສູນກາງແນວໂຮມປະເທດຊາດຫວຽດນາມ ເພື່ອໄປຢາມແລະເຮັດວຽກ ກັບປະຊາຄົມຊາວຫວຽດນາມທີ່ອາໄສໃນປະເທດຕ່າງໆ; ຕ້ອນຮັບແລະເຮັດວຽກກັບບັນດາສະມາຄົມ, ອົງການ, ບຸກຄົນຊາວຫວຽດນາມທີ່ອາໄສຢູ່ຕ່າງປະເທດ ທີ່ມາຄຳນັບ ແລະ ຢ້ຽມຢາມແນວໂຮມປະເທດຊາດຫວຽດນາມ; ຕິດຕາມກວດກາການປະຕິບັດນະໂຍບາຍ ກົດໝາຍ ເພື່ອຮັບປະກັນສິດແລະຜົນປະໂຫຍດທີ່ຊອບທຳ ຖືກກົດໝາຍ ຂອງຊາວຫວຽດນາມທີ່ອາໄສຢູ່ຕ່າງປະເທດ; ສ້າງແລະອອກບົດແນະນຳກ່ຽວກັບການຍ້ອງຍໍໃຫ້ລາງວັນ ແກ່ໝູ່ຄະນະແລະບຸກຄົນ ຊາວຫວຽດນາມທີ່ອາໄສຢູ່ຕ່າງປະເທດ ທີ່ມີຜົນງານໂດດເດັ່ນໃນການເຕົ້າໂຮມ ສາມັກຄີປະຊາຄົມ ແລະ ມີການເຄື່ອນໄຫວຕົວຈິງຫຼາຍຢ່າງ ໃນການກໍ່ສ້າງບ້ານເກີດເມືອງນອນ; ຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດ ໃຫ້ຕັ້ງໜ້າຕອບສະໜອງການຂົນຂວາຍ ແລະ ຂະບວນການແຂ່ງຂັນກັນຮັກຊາດ, ໂດຍສະເພາະແມ່ນ ບັນດາຂະບວນການ ແລະການຂົນຂວາຍ ທີ່ເປີດຕົວໂດຍແນວໂຮມປະເທດຊາດຫວຽດນາມ. ພ້ອມກັນນັ້ນ, ແນວໂຮມປະເທດຊາດຫວຽດນາມກໍ່ໃຫ້ຄວາມສຳຄັນ ແລະ ເປັນເຈົ້າການໃນການຂົນຂວາຍ ປັນຍາຂົນທີ່ເກັ່ງ, ນັກທຸລະກິດທີ່ປະສົບຄວາມສໍາເລັດ, ຜູ້ຊົງຄຸນວຸດທິ, ບຸກຄົນທີ່ໂດດເດັ່ນ ໃນປະຊາຄົມຊາວຫວຽດນາມທີ່ອາໄສໃນປະເທດຕ່າງໆ ໃຫ້ເພີ່ມທະວີການຮ່ວມມືຄົ້ນຄວາມວິທະຍາສາດ, ລົງທຶນທາງປັນຍາໃນຂົງເຂດຫົວຫອກຂອງວິທະຍາສາດແລະເຕັກໂນໂລຊີ, ລົງທຶນໃນບັນດາໂຄງການຈຸດສຸມທາງເສດຖະກິດ, ຍົກສູງຊີວິດດ້ານວັດທະນະທຳຈິດໃຈ, ຮັກສາ ເສີມຂະຫຍາຍ ແລະ ຍົກຍ້ອງເອກະລັກວັດທະນະທຳຂອງຊາດ ທັງຢູ່ພາຍໃນ ແລະ ຕ່າງປະເທດ; ສົມທົບກັນໜູນຊ່ວຍປະຊາຄົມຊາວຫວຽດນາມຢູ່ບັນດາປະເທດ ທີ່ມີຄວາມຕ້ອງການທີ່ຖືກຕ້ອງຕາມກົດໝາຍ ສຳລັບຊີວິດວັດທະນະທຳ ຈິດວິນຍານ ແລະ ສາສະໜາ; ໜູນຊ່ວຍຊາວຫວຽດນາມທີ່ອາໄສຢູ່ຕ່າງປະເທດ ທີ່ປະສົບຄວາມຫຍຸ້ງຍາກ, ຖືກຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດ...
ແນວໂຮມປະເທດຊາດຫວຽດນາມຄັດເລືອກຊາວຫວຽດນາມທີ່ດີເດັ່ນ ໃນພື້ນທີ່ສຳຄັນ, ໃນປະເທດທີ່ມີຊາວຫວຽດນາມຈຳນວນຫຼາຍ ໃຫ້ເຂົ້າຮ່ວມໃນຄະນະປະທານ ຄະນະກຳມະການສູນກາງແນວໂຮມປະເທດຊາດຫວຽດນາມ(3) ແລະ ແນະນຳໃຫ້ເຂົ້າຮ່ວມໃນຄະນະກຳມະການແນວໂຮມປະເທດຊາດຫວຽດນາມທຸກຂັ້ນ. ນີ້ແມ່ນກຳລັງຫຼັກແຫຼ່ງທີ່ຕາງໜ້າໃຫ້ປະຊາຄົມຊາວຫວຽດນາມທີ່ອາໄສຢູ່ຕ່າງປະເທດ ເພື່ອສ່ອງແສງແລະສະໜອງຂໍ້ມູນເປັນປະຈຳ ກ່ຽວກັບການເຄື່ອນໄຫວຂອງປະຊາຄົມ, ສະມາຄົມຊາວຫວຽດນາມທີ່ອາໄສຢູ່ຕ່າງປະເທດ ໃຫ້ກັບບັນດາອົງການທີ່ກ່ຽວຂ້ອງຂອງປະເທດ; ໂຄສະນາກ່ຽວກັບແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ໃຫ້ກັບຊາວຫວຽດນາມທີ່ອາໄສຢູ່ຕ່າງປະເທດ; ເປັນຂົວຕໍ່ເປີດກວ້າງການພົວພັນຄູ່ຮ່ວມມື ແລະ ການເຄື່ອນໄຫວຮ່ວມມືໂດຍຜ່ານ “ຊ່ອງທາງ” ການທູດປະຊາຊົນຂອງແນວໂຮມປະເທດຊາດຫວຽດນາມ.
ແນວໂຮມປະເທດຊາດຫວຽດນາມໃນແຂວງ, ນະຄອນຕ່າງໆ ໄດ້ຕັ້ງໜ້າປະສານງານແລະສະໜັບສະໜູນການສ້າງຕັ້ງ ແລະ ການຈັດຕັ້ງການເຄືອນໄຫວ ຂອງສະມາຄົມຕິດຕໍ່, ສະມາຄົມທ້ອງຖິ່ນຂອງຍາດຕິພີ່ນ້ອງຊາວຫວຽດນາມທີ່ອາໄສຢູ່ຕ່າງປະເທດ, ພ້ອມກັບອົງການທ້ອງຖິ່ນ ສ້າງເງື່ອນໄຂທີ່ເອື້ອອຳນວຍຕໍ່ວຽກງານຂົນຂວາຍແລະເຕົ້າໂຮມຍາດຕິພີ່ນ້ອງແລະຊາວຫວຽດນາມທີ່ອາໄສຢູ່ຕ່າງປະເທດ ທີ່ເປັນຄົນຂອງທ້ອງຖິ່ນ.
ໜ້າທີ່ແລະແນວທາງແກ້ໄຂຫຼັກຂອງແນວໂຮມປະເທດຊາດຫວຽດນາມ
ໃນໄລຍະຈະມາເຖິງ
ພາລະກິດການປ່ຽນແປງໃໝ່ຢ່າງຮອບດ້ານແລະຂະບວນການເຊື່ອມໂຍງສາກົນຢ່າງກວ້າງຂວາງ ໄດ້ແລະກຳລັງເປີດໂອກາດທີ່ດີໃຫ້ປະເທດ, ແຕ່ຍັງກໍ່ໃຫ້ເກີດສິ່ງທ້າທາຍຕໍ່ລະບົບການເມືອງ ໃນການຢືນຢັນຖານະຕຳແໜ່ງຂອງປະເທດໃນເວທີສາກົນ, ພາໃຫ້ເສດຖະກິດພັດທະນາຢ່າງໄວແລະຍືນຍົງ, ສ້າງໃຫ້ມີການບຸກທະລຸຫຼາຍຢ່າງ; ພ້ອມກັນນັ້ນ, ກໍ່ຮັກສານສະຖຽນລະພາບດ້ານການເມືອງ, ປົກປັກຮັກສາຄວາມເປັນເອກະພາບ, ຜືນແຜ່ນດິນອັນຄົບຖ້ວນ ແລະ ອະທິປະໄຕໃນທະເລແລະໝູ່ເກາະ ຂອງປະເທດຊາດ. ໃນສະຖານະການນັ້ນ, ວຽກງານກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ຕ້ອງສືບຕໍ່ໄດ້ຮັບຄວາມເອົາໃຈໃສ່ ແລະຜັນຂະຫຍາຍຢ່າງຮອບດ້ານ ແຂງແຮງ ແລະ ແທ້ຈິງກວ່າອີກ ໃນບັນດາຂັ້ນ ຂະແໜງການ ທ້ອງຖິ່ນ ແລະ ໜ່ວຍງານ. ເພື່ອສືບຕໍ່ປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດແນວໂຮມປະເທດຊາດຫວຽດນາມຄັ້ງທີ 9, ວາລະປີ 2019-2024; ປະຕິບັດແນວທາງ ແຜນນະໂຍບາຍ ມະຕິ ຄຳສັ່ງຂອງພັກ ກ່ຽວກັບວຽກງານສຳລັບຊາວຫວຽດນາມທີ່ອາໄສຢູ່ຕ່າງປະເທດ, ຍູ້ແຮງການຂົນຂວາຍແລະເຕົ້າໂຮມຊາວຫວຽດນາມທີ່ອາໄສຢູ່ຕ່າງປະເທດ ໃຫ້ສາມັກຄີກັນຫັນສູ່ການສ້າງສາແລະປົກປກຮັກສາປະເທດຊາດ, ໃນໄລຍະທີ່ຈະມາເຖິງ ແນວໂຮມປະເທດຊາດຫວຽດນາມທຸກຂັ້ນຕ້ອງສຸມໃສ່ປະຕິບັດໜ້າທີ່ ແລະວິທີແກ້ໄຂທີ່ສຳຄັນຈຳນວນໜຶ່ງດັ່ງຕໍ່ໄປນີ້:
ທີໜຶ່ງ, ຊຸກຍູ້ໃຫ້ມີການປ່ຽນແປງຢ່າງແຂງແຮງ, ກ້າວໄປເຖິງຄວາມເປັນເອກະພາບໃນຄວາມຮັບຮູ້ຂອງບັນດາອົງການ ໜ່ວຍງານໃນລະບົບການເມືອງ ແລະ ປະຊາຊົນທຸກຊັ້ນວັນນະ ກ່ຽວກັບຄວາມສຳຄັນຂອງວຽກງານຂົນຂວາຍ ເຕົ້າໂຮມ ແລະສາມັກຄີຊາວຫວຽດນາມທີ່ອາໄສຢູ່ຕ່າງປະເທດ; ເຊີດຊູບົດບາດຂອງບັນດາອົງການສະມາຊິກແນວໂຮມປະເທດຊາດຫວຽດນາມ ໃນວຽກງານຕໍ່ກັບຊາວຫວຽດນາມທີ່ອາໄສຢູ່ຕ່າງປະເທດ; ລົບລ້າງຈິນຕະນາການເກົ່າທີ່ມີຄວາມຮູ້ສຶກຜິດອັນໜັກໜ່ວງ ກ່ຽວກັບອະດີດທາງປະຫວັດສາດ, ອະຄະຕິກ່ຽວກັບຊົນຊັ້ນສັງຄົມ, ການຈຳແນກການປະພຶດຕໍ່ຖານະສັງຄົມ ຊົນເຜົ່າ ສາມະໜາ ສະຖານະການຮັ່ງມີ-ທຸກຍາກ ແລະ ລະດັບການພັດທະນາ ເພື່ອມຸ່ງໄປສູ່ການເປີດກວ້າງ ຄວາມເຫັນອົກເຫັນໃຈ ຄວາມເຄົາລົບນັບຖື ແລະ ຄວາມໄວ້ເນື້ອເຊື່ອໃຈຂອງຊາວຫວຽດນາມທີ່ອາໄສຢູ່ຕ່າງປະເທດ ຕາມຈິດໃຈມະຕິເລກທີ 36-NQ/TW, ລົງວັນທີ 26 ມີນາ 2004, ຂອງກົມການເມືອງສູນກາງພັກ, “ວ່າດ້ວຍວຽກງານຕໍ່ກັບຊາວຫວຽດນາມທີ່ອາໄສຢູ່ຕ່າງປະເທດ”: ປະຊາຄົມຊາວຫວຽດນາມທີ່ອາໄສຢູ່ຕ່າງປະເທດແມ່ນພາກສ່ວນທີ່ແຍກອອກບໍ່ໄດ້ຂອງປະຊາຄົມຊາດພັນຫວຽດນາມ.
ທີສອງ, ສືບຕໍ່ປະສານງານການກວດຄືນເອກະສານກ່ຽວກັບນະໂຍບາຍ ກົດໝາຍຂອງລັດ ທີ່ກ່ຽວຂ້ອງກັບຊາວຫວຽດນາມທີ່ອາໄສຢູ່ຕ່າງປະເທດ ເພື່ອສະເໜີໃຫ້ອົງການທີ່ມີອຳນາດແກ້ໄຂ ແລະເພີ່ມເຕີມໃຫ້ເໝາະສົມ ກັບຄວາມຕ້ອງການ, ຄວາມປາດຖະໜາທີ່ແທ້ຈິງ ແລະ ຜົນປະໂຫຍດທີ່ຖືກຕ້ອງຕາມກົດໝາຍ, ພ້ອມກັນນັ້ນ ສຸມໃສ່ແກ້ໄຂບັນດາບັນຫານທີ່ຍັງຄົງຄ້າງ ຄ້າງຄາໃນຂະບວນການຜັນຂະຫຍາຍປະຕິບັດ ໃນເວລາທີ່ຜ່ານມາ; ຍູ້ແຮງການຄົ້ນຄວ້າ, ສະເໜີແນະການປັບປຸງບູລະນະກົນໄກການດຶງດູດ ການໃຊ້ປະໂຫຍດຈາກຊັບພະຍາກອນ “ສະໝອງສີຂີ້ເຖົ່າ”, ທ່າແຮງການລົງທຶນ ແລະ ອິດທິພົນທາງບວກ ຂອງຊຸມຊົນແລະບຸກຄົນຊາວຫວຽດນາມໃນປະເທດເຈົ້າພາບ ແລະ ທ່າແຮງ ຄວາມສາມາດຊ້ອນແຝງອື່ນອີກ ຂອງຊາວຫວຽດນາມທີ່ອາໄສຢູ່ຕ່າງປະເທດ ເພື່ອປະກອບສ່ວນເຂົ້າໃນການພັດທະນາປະເທດ ແລະການເຊື່ອມໂຍງສາກົນຂອງປະເທດ.
ເພີ່ມທະວີວຽກງານການຕິດຕາມກວດກາ ແລະ ການວິຈານສັງຄົມ ຂອງແນວໂຮມປະເທດຊາດຫວຽດນາມ ໃນການສືບຕໍ່ປັບປຸງບູລະນະ ແລະ ການປະຕິບັດແຜນນະໂຍບາຍ ນະໂຍບາຍ ກົດໝາຍ ກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ; ປະຕິບັດເປັນຢ່າງດີ ໜ້າທີ່ເປັນຕົວແທນ ແລະ ປົກປ້ອງສິດທິດ ແລະ ຜົນປະໂຫຍດທີ່ຖືກຕ້ອງຕາມກົດໝາຍແລະຊອບທຳ ຂອງຊາວຫວຽດນາມທີ່ອາໄສຢູ່ຕ່າງປະເທດ; ສົມຄວນເປັນຂົວຕໍ່ເພື່ອຈັດຕັ້ງໃຫ້ຊາວຫວຽດນາມທີ່ອາໄສຢູ່ຕ່າງປະເທດ ເຂົ້າຮ່ວມການກໍ່ສ້າງພັກແລະລັດ ຕາມລະບຽບການ. ປະສານງານກັບອົງການສະມາຊິກລະດັບດຽວກັນ, ໂດຍສະເພາະ ອົງການຈັດຕັ້ງທາງການເມືອງ-ສັງຄົມ, ສະມາຄົມຊາວຫວຽດນາມທີ່ອາໄສຢູ່ຕ່າງປະເທດ, ສະມາຄົມຍາດຕິພີ່ນ້ອງຂອງຊາວຫວຽດນາມທີ່ອາໄສຢູ່ຕ່າງປະເທດ... ໃນການເກັບກຳຄວາມຄິດຈິດໃຈ, ຄວາມປາຖະໜາ ຂອງພີ່ນ້ອງຮ່ວມຊາດ, ຈາກນັ້ນ ສະເໜີໃຫ້ພັກແລະລັດພິຈາລະນາແກ້ໄຂຄວາມຕ້ອງການ, ຄວາມປາຖະໜາອັນຊອບທຳຂອງຊຸມຊົນ; ໃນນັ້ນ, ເອົາໃຈໃສ່ຊ່ວຍເຫຼືອພີ່ນ້ອງຮ່ວມຊາດແກ້ໄຂບັນດາບັນຫາກ່ຽວກັບສະຖານະທາງກົດໝາຍ, ການກັບເຂົ້າສູ່ສັນຊາດຄືນໃໝ່, ສ້າງເງື່ອນໄຂສະດວກໃຫ້ແກ່ພີ່ນ້ອງຮ່ວມຊາດກ່ຽວກັບລະບຽບການທາງປົກຄອງແລະທາງແພ່ງ ເມື່ອມາຢ້ຽມຢາມຍາດຕິພີ່ນ້ອງ ຕະຫຼອດຈົນເລື່ອງການລົງທຶນ, ການທຸລະກິດ, ການດຳລົງຊີວິດ ແລະ ເຮັດວຽກຢູ່ຫວຽດນາມ... ແນວໂຮມປະເທດຊາດຫວຽດນາມ ລະດົມຊັບພະຍາກອນສັງຄົມ ຢູ່ໃນແລະຕ່າງປະເທດ ເພື່ອພ້ອມກັນກັບບັນດາອົງການ ແລະ ໜ່ວຍງານທີ່ກ່ຽວຂ້ອງ ສະໜັບສະໜູນແລະຊ່ວຍເຫຼືອ ຊາວຫວຽດນາມທີ່ອາໄສຢູ່ຕ່າງປະເທດ ທີ່ປະສົບຄວາມຫຍຸ້ງຍາກ ຖືກໄພພິບັດ.
ທີສາມ, ແນວໂຮມປະເທດຊາດຫວຽດນາມ ປະສານງານກັບບັນດາອົງການທີ່ກ່ຽວຂ້ອງ ຍູ້ແຮງວຽກງານໂຄສະນາ ຂົນຂວາຍຊຸມຊົນຊາວຫວຽດນາມທີ່ອາໄສຢູ່ຕ່າງປະເທດແລະຍາດຕິພີ່ນ້ອງຂອງເຂົາ ສາມັກຄີກັນແລະຫັນສູ່ປິຕຸພູມ. ສຸມໃສ່ການໂຄສະນາແຜນນະໂຍບາຍ ນະໂຍບຍຂອງພັກແລະລັດ, ໂດຍສະເພາະແມ່ນ ມະຕິເລກທີ່ 36-NQ/TW ຂອງກົມການເມືອງສູນກາງພັກ ແລະ ບົດສະຫຼຸບສະບັບເລກທີ 12-KL/TW, ລົງວັນທີ 12 ສິງຫາ 2021, ຂອງກົມການເມືອງສູນກາງພັກ, “ວ່າດ້ວຍວຽກງານຕໍ່ກັບຊາວຫວຽດນາມທີ່ອາໄສຢູ່ຕ່າງປະເທດ ໃນສະພາບການໃໝ່”; ເສີມຂະຫຍາຍບົດບາດຂອງອົງການຂ່າວ ແລະ ວິທະຍຸກະຈາຍສຽງ ໃນລະບົບແນວໂຮມປະເທດຊາດຫວຽດນາມ ແລະ ບັນດາອົງການສະມາຊິກ ໃນການປະຕິບັດໜ້າທີ່; ປ່ຽນແປງໃໝ່ ແລະ ເປີດຄວາມຫຼາກຫຼາຍ ຂອງຮູບການແລະແບບວິທີການໂຄສະນາ, ປະສານງານທິດທາງສື່ສານໃຫ້ກັບຊາວຫວຽດນາມທີ່ອາໄສຢູ່ຕ່າງປະເທດ ກ່ຽວກັບບັນດາບັນຫາທີ່ສັບສົນ, ອ່ອນໄຫວ; ປັດປະຕິເສດຢ່າງມີປະສິດທິຜົນ ກັບຂໍ້ມູນທີ່ຜິດພາດ, ບິດເບືອນສະຖານະການຂອງປະເທດ, ບັນຫາຊາຍແດນດິນແດນ, ຊົນເຜົ່າ, ສາສະໜາ, ປະຊາທິປະໄຕ, ສິດທິມະນຸດ ແລະ ສິດເສລີພາບໃນການປາກເວົ້າ.
ແນວໂຮມປະເທດຊາດຫວຽດນາມປະສານສົມທົບກັບຄະນະກຳມະການແຫ່ງຊາດກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ໃນການເອົາໃຈໃສ່ສະໜັບສະໜູນ, ຮັບຮູ້, ປົກປ້ອງ ແລະ ສົ່ງເສີມໃຫ້ສື່, ໜັງສືພິມ ແລະ ບຸກຄົນ ຊາວຫວຽດນາມໃນຕ່າງປະເທດເຜີຍແຜ່ຢ່າງແຂງຂັນ ແລະແນະນຳສະຖານະການຂອງປະເທດ ຕໍ່ຊຸມຊົນຢ່າງສະໝ່ຳສິເໝີ ແລະພາວະວິໄສ.
ຕັ້ງໜ້າໂຄສະນາ ຂົນຂວາຍ, ເຂົ້າຮ່ວມຢ່າງມີປະສິດທິຜົນ ໃນຂະບວນການປອງດອງຊາດ ເພື່ອສ້າງແລະປັບປຸງກ້ອນມະຫາສາມັກຄີປວງຊົນທັງຊາດຢ່າງໝັ້ນຄົງ. ເປັນເຈົ້າການໃນການປະສານງານກັບບັນດາກະຊວງ ຂະແໜງການ ແລະ ໜ່ວຍງານ ໃນການຄົ້ນຄວ້າ, ກຳສະພາບການ ແລະ ຂະຫຍາຍພື້ນທີ່ຕິດຕໍ່ ເພື່ອລົບລ້າງຄວາມຮູ້ສຶກຜິດໃນອະດີດ; ຂົນຂວາຍຜູ້ທີ່ມີອິດທິພົນ ຫຼືບຸກຄົນຊາວຫວຽດນາມທີ່ອາໄສຢູ່ຕ່າງປະເທດ ທີ່ຍັງມີອະຄະຕິ ມີຄວາມຮູ້ສຶກຜິດຕໍ່ປະເທດ, ໃຫ້ເຂົາມີຄວາມຄິດທີ່ຕັ້ງໜ້າ ແລະ ຫັນສູ່ປະເທດຊາດ.
ທີສີ່, ເພີ່ມທະວີການຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດ ໃນການກໍ່ສ້າງປະຊາຄົມທີ່ສາມັກຄີ ແລະ ມີຄວາມເຂັ້ມແຂງທາງດ້ານເສດຖະກິດ, ເຊື່ອມໂຍງ ແລະປະຕິບັດຕາມກົດໝາຍຂອງປະເທດເຈົ້າພາບ, ຮັກສາແລະເສີມຂະຫຍາຍເອກະລັກວັດທະນະທຳ ແລະ ມູນເຊື້ອອັນດີງາມຂອງຊາດ, ເພື່ອຮ່ວມແຮງຮ່ວມມືກັນກໍ່ສ້າງປະເທດຊາດ. ໃນນັ້ນ, ເອົາໃຈໃສ່ປະສານງານ ຊຸກຍູ້ວຽກງານສະໜັບສະໜູນຊຸມຊົນຮັກສາແລະເສີມຂະຫຍາຍເອກະລັກວັດທະນະທຳຂອງຊາດ, ການສອນແລະຮຽນພາສາຫວຽດນາມ, ໂດຍສະເພາະແມ່ນ ສໍາລັບລຸ້ນໜຸ່ມຂອງຊາວຫວຽດນາມທີ່ອາໄສຢູ່ຕ່າງປະເທດ; ຊ່ວຍໜູນຊຸມຊົນທີ່ຕ້ອງການກິດຈະກໍາທາງຈິດວິນຍານແລະສາດສະໜາ; ສົມທົບກັນໃນການຂົນຂວາຍ ແລະ ດຶງດູດຊາວຫວຽດນາມທີ່ອາໄສຢູ່ຕ່າງປະເທດ ໃຫ້ເຂົ້າຮ່ວມໃນກິດຈະກໍາ, ການຂົນຂວາຍ, ຂະບວນການແຂ່ງຂັນຢູ່ໃນປະເທດ, ຕອບສະໜອງ ຄຳຮຽກຮ້ອງ ຂອງຄະນະປະທານ ຄະນະກຳມະການສູນກາງ ແນວໂຮມປະເທດຊາດຫວຽດນາມ.
ທີຫ້າ, ສົມທົບກັນໜູນຊ່ວຍປັບປຸງສະມາຄົມດັ້ງເດີມ ແລະ ສ້າງສະມາຄົມໃໝ່; ກຳນົດທິດທາງການຄັດເລືອກແລະຝຶກອົບຮົມ ປັດໄຈໄວໜຸ່ມທີ່ມີຄວາມຕັ້ງໜ້າ ຄວາມສາມາດ ຄວາມກະຕືລືລົ້ນ ໃຫ້ເຂົ້າໃນຄະນະນຳຂອງສະມາພັນ; ປ່ຽນແປງໃໝ່ແລະຂະຫຍາຍຮູບການເຕົ້າໂຮມ, ໂດຍສະເພາະແມ່ນ ເຕົ້າໂຮມຄົນລຸ້ນໃໝ່; ຄົ້ນຄວ້າສະເໜີກົນໄກ ນະໂຍບາຍສະເພາະທີ່ເໝາະສົມ ເພື່ອໜູນຊ່ວຍສະມາພັນ. ຄົ້ນຄວ້າບັນດາຮູບແບບທີ່ມີຢູ່ ແລະ ສືບຕໍ່ສະເໜີການທົດລອງຮັບຮູ້ບັນດາສະມາພັນຊາວຫວຽດນາມທີ່ອາໄສຢູ່ຕ່າງປະເທດ ເປັນສະມາຊິກຂອງແນວໂຮມປະເທດຊາດຫວຽດນາມ ແລະ ຂອງອົງການຈັດຕັ້ງສະມາຊິກຂອງແນວໂຮມປະເທດຊາດຫວຽດນາມ.
ທີຫົກ, ປະສານສົມທົບເພື່ອດຳເນີນການຍ້ອງຍໍໃຫ້ລາງວັນຢ່າງສະໝ່ຳສະເໝີ ແລະ ບໍ່ສະໝ່ຳສະເໝີ ເພື່ອຮັບຮູ້ ສົ່ງເສີມ ແລະ ລະດົມກຳລັງໃຈ ໃຫ້ແກ່ບັນດາໝູ່ຄະນະ ແລະ ບຸກຄົນ ຊາວຫວຽດນາມທີ່ອາໄສຢູ່ຕ່າງປະເທດ ທີ່ມີຜົນງານໃນການເຄື່ອນໄຫວກໍ່ສ້າງຊຸມຊົນ, ມຸ່ງສູ່ບ້ານເກີດເມືອງນອນ, ກໍ່ສ້າງປະເທດ; ສືບຕໍ່ຄົ້ນຄວ້າສະເໜີຮູບແບບການຍ້ອງຍໍໃຫ້ລາງວັນ ແລະການໃຫ້ກຳລັງໃຈທີ່ແທດຈິງ, ເໝາະສົມກັບສະຖານທີ່ແລະເປົ້າໝາຍສະເພາະແຕ່ລະແຫ່ງ.
ທີເຈັດ, ເສີມຂະຫຍາຍຫຼາຍກວ່າອີກ ບົດບາດຂອງສະມາຊິກຄະນະກຳມະການແນວໂຮມປະເທດຊາດຫວຽດນາມໃນທຸກລະດັບ ທີ່ເປັນຊາວຫວຽດນາມຢູ່ຕ່າງປະເທດ ແລະ ບົດບາດຂອງສະພາທີ່ປຶກສາດ້ານການຕ່າງປະເທດແລະຊາວຫວຽດນາມຢູ່ຕ່າງປະເທດ ໃນການເກັບກຳສະພາບການແລະສ່ອງແສງສະພາບການ, ໃຫ້ຄຳປຶກສາຊ່ວຍຄະນະກຳມະການສູນກາງ, ຄະນະປະທານ ແລະ ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ໃນການຕິດຕາມກວດກາແລະວິຈານນະໂຍບາຍ, ກົດໝາຍ ແລະ ບັນດາເນື້ອໃນທີ່ກ່ຽວຂ້ອງກັບຊາວຫວຽດນາມທີ່ອາໄສຢູ່ຕ່າງປະເທດ.
ທີແປດ, ເປັນເຈົ້າການໃນການຄົ້ນຄວ້າ, ສະເໜີ ແລະ ເຂົ້າຮ່ວມການສ້າງ, ປັບປຸງບູລະນະກົນໄກ ເພື່ອປະສານສົມທົບຢ່າງແໜ້ນແຟ້ນແລະຄົບຊຸດກວ່າອີກ ລະຫວ່າງບັນດາອົງການທີ່ເຮັດວຽກກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ. ເພີ່ມປະສິດທິຜົນຂອງການປະຕິບັດກົດລະບຽບການປະສານງານ ແລະ ປະສານງານຢ່າງປົກກະຕິ ລະຫວ່າງ ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ກັບ ຄະນະກຳມະການແຫ່ງລັດກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ໃນວຽກງານການຂົນຂວາຍ ເຕົ້າໂຮມ ແລະ ສາມັກຄີຊາວຫວຽດນາມທີ່ອາໄສຢູ່ຕ່າງປະເທດ.
ເພື່ອປະຕິບັດບັນດາເປົ້າໝາຍທີ່ກອງປະຊຸມໃຫຍ່ຄັ້ງທີ່ 13 ຂອງພັກກອມມູນິດຫວຽດນາມວາງອອກມາ, ສູ້ຊົນຮອດປີ 2030 ຫວຽດນາມຈະກາຍເປັນປະເທດກຳລັງພັດທະນາທີ່ມີອຸດສາຫະກຳທັນສະໄໝ, ມີລາຍໄດ້ປານກາງສູງ ແລະ ເຖິງປີ 2045 ຈະກາຍເປັນປະເທດພັດທະນາແລະມີລາຍໄດ້ສູງນັ້ນ, ການເສີມຂະຫຍາຍກຳລັງແຮງຂອງກ້ອນມະຫາສາມັກຄີປວງຊົນທັງຊາດ, ເພີ່ມທະວີຄວາມມຸ່ງມາດປາຖະໜາ ເຈດຈຳນົງ ແລະ ຄວາມສາມາດຊ້ອງແຝງຂອງຄົນຫວຽດນາມຢູ່ໃນແລະຕ່າງປະເທດ ແມ່ນມີຄວາມໝາຍສຳຄັນ ຕັດສິນຊີ້ຂາດ. ໃນການເດີນທາງອັນສະຫງ່າງາມແລະມີຄວາມຮັບຜິດຊອບນັ້ນ, ດ້ວຍບົດບາດແລະພາລະກຳຂອງຕົນ, ແນວໂຮມປະເທດຊາດຫວຽດນາມຈະສືບຕໍ່ປະກອບສ່ວນປັບປຸງ ແລະ ເສີມຂະຫຍາຍກຳລັງແຮງຂອງກ້ອນມະຫາສາມັກຄີປວງຊົນທັງຊາດ, ໃນນັ້ນມີວຽກງານກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ, ເພື່ອເສີມຂະຫຍາຍບົດບາດຂອງພາກສ່ວນທີ່ແຍກອອກບໍ່ໄດ້ຂອງປະຊາຄົມຊາດພັນຫວຽດນາມ, ເປັນສ່ວນໜຶ່ງຂອງເລືອດເນື້ອທີ່ຕິດພັນກັບຕົ້ນກໍາເນີດຂອງຊາດ, ແມ່ນແຫຼ່ງກຳລັງອັນສຳຄັນປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ./.
---------------
(1) ປະກອບມີ: ມະຕິຂອງກົມການເມືອງສູນກາງພັກ ສະບັບເລກທີ 36-NQ/TW, ລັງວັນທີ 26 ມີນາ 2004, “ວ່າດ້ວຍວຽກງານສໍາລັບຊາວຫວຽດນາມທີ່ອາໄສຢູ່ຕ່າງປະເທດ”; ຄຳສັ່ງຂອງກົມການເມືອງສູນກາງພັກ ສະບັບເລກທີ 45-CT/TW, ລົງວັນທີ 19 ພຶດສະພາ 2015, “ວ່າດ້ວຍການສືບຕໍ່ຍູ້ແຮງການປະຕິບັດມະຕິຂອງກົມການເມືອງສູນກາງພັກຊຸດທີ 9 ສະບັບເລກທີ 36-NQ/TW, ກ່ຽວກັບວຽກງານສໍາລັບຊາວຫວຽດນາມທີ່ອາໄສຢູ່ຕ່າງປະເທດໃນສະພາບການໃໝ່”; ບົດສະຫຼຸບຂອງກົມການເມືອງສູນກາງພັກ ສະບັບເລກທີ 12-KL/TW, ລົງວັນທີ 12 ສິງຫາ 2021, “ວ່າດ້ວຍວຽກງານສໍາລັບຊາວຫວຽດນາມທີ່ອາໄສຢູ່ຕ່າງປະເທດໃນສະພາບການໃໝ່”.
(2) ຄະນະປະທານ ຄະນະກຳມະການສູນກາງ ແນວໂຮມປະເທດຊາດຫວຽດນາມ ຊຸດທີ 5 ໄດ້ຜັນຂະຫຍາຍແຜນການ “ເພີ່ມທະວີການຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດ ແລະ ຍາດຕິພີ່ນ້ອງຂອງເຂົາ”; ຄະນະປະທານ ຄະນະກຳມະການສູນກາງ ແນວໂຮມປະເທດຊາດຫວຽດນາມ ຊຸດທີ 7 ໄດ້ສ້າງແລະຜັນຂະຫຍາຍແຜນການ “ແນວໂຮມປະເທດຊາດຫວຽດນາມ ເຕົ້າໂຮມແລະສາມັກຄີ ຊາວຫວຽດນາມທີ່ອາໄສຢູ່ຕ່າງປະເທດ ໃນສະພາບການໃໝ່”; ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ລົງນາມໃນມະຕິຮ່ວມ ສະບັບເລກທີ 01/2010/NQLT-MTTW-UBNVNONN, ລົງວັນທີ 3 ມີນາ 2010, ວ່າດ້ວຍກົດລະບຽບ “ການປະສານງານລະຫວ່າງຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ກັບ ຄະນະກຳມະການແຫ່ງລັດກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ວ່າດ້ວຍການຂົນຂວາຍຊາວຫວຽດນາມທີ່ອາໄສຢູ່ຕ່າງປະເທດແລະຍາດຕິພີ່ນ້ອງຂອງເຂົາ”; ປະກາດໃຊ້ໂຄງການປະຕິບັດງານປະຈໍາປີ ສະບັບເລກທີ 30/CTr-MTTW-BTT, ລົງວັນທີ 17 ຕຸລາ 2012, ວ່າດ້ວຍ “ເພີ່ມທະວີການໂຄສະນາ ຂົນຂວາຍ ເຕົ້າໂຮມ ແລະ ສາມັກຄີ ຊາວຫວຽດນາມທີ່ອາໄສຢູ່ຕ່າງປະເທດ ໃນສະພາບການໃໝ່”; ລົງນາມໂຄງການປະຕິບັດງານສະບັບເລກທີ 17/CTPH-MTTW-TCTV, ລັງວັນທີ 18 ສິງຫາ 2016 ພ້ອມກັບບັນດາອົງການຈັດຕັ້ງສະມາຊິກ, ວ່າດ້ວຍການປະສານງານການເຄື່ອນໄຫວການທູດປະຊາຊົນ ແລະ ວຽກງານສໍາລັບຊາວຫວຽດນາມທີ່ອາໄສຢູ່ຕ່າງປະເທດ...
(3) ແຕ່ຊຸດທີ 1 ເຖິງຊຸດທີ 9 ຂອງຄະນະກຳມະການສູນກາງແນວໂຮມປະເທດຊາດຫວຽດນາມ, ມີຊາວຫວຽດນາມທີ່ອາໄສຢູ່ຕ່າງປະເທດທີ່ດີເດັ່ນ 86 ທ່ານ ເຂົ້າຮ່ວມໃນ ຄະນະກຳມະການສູນກາງແນວໂຮມປະເທດຊາດຫວຽດນາມ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 989 (ເດືອນພຶດສະພາ 2022)