ຫວຽດນາມຊຸກຍູ້ການທູດວັດທະນະທຳ
ໃນຂະບວນການເຊື່ອມໂຍງເຂົ້າກັບສາກົນ
ແລະການພັດທະນາປະເທດຊາດ
ໃນຂະບວນການເຊື່ອມໂຍງເຂົ້າກັບສາກົນ
ແລະການພັດທະນາປະເທດຊາດ
ວກ. - ການທູດວັດທະນະທຳແມ່ນໜຶ່ງໃນສາມເສົາຫຼັກຂອງການທູດທີ່ຮອບດ້ານຂອງຫວຽດນາມ ໃນຍຸກແຫ່ງການເຊື່ອມໂຍງໂລກ. ດ້ວຍຄວາມຍືດຫຍຸ່ນ ແລະ ຄວາມໄຫວພິບ, ການທູດວັດທະນະທຳໄດ້ເສີມຂະຫຍາຍບົດບາດທີ່ຕັ້ງໜ້າຂອງຕົນ ໃນພາລະກິດການສ້າງສາ ແລະ ປົກປັກຮັກສາປະເທດຫວຽດນາມ ສັງຄົມນິຍົມ, ປະກອບສ່ວນສ້າງກຳລັງແຮງສັງລວມແຫ່ງຊາດ, ຮັບໃຊ້ການຜັນຂະຫຍາຍປະຕິບັດບັນດາເປົ້້າໝາຍການຕ່າງປະເທດຂອງປະເທດຊາດ.
ບົດບາດຂອງວັດທະນະທຳໃນການຊຸກຍູ້ການແລກປ່ຽນ ແລະ ການຮ່ວມມືສາກົນ
ການທູດວັດທະນະທຳແມ່ນການເຄື່ອນໄຫວທາງການທູດທີ່ຕິດພັນກັບວັດທະນະທຳ, ຕາມນັ້ນ, ວັດທະນະທຳຖືກໃຊ້ເປັນວັດຖຸ ແລະ ວິທີການໃນການສ້າງ ຮັກສາ ແລະ ພັດທະນາ ການພົວພັນກັບຕ່າງປະເທດ ເພື່ອບັນລຸເປົ້າໝາຍ ແລະ ຜົນປະໂຫຍດພື້ນຖານຂອງປະເທດທີ່ກ່ຽວຂ້ອງກັບຄວາມໝັ້ນຄົງ, ການພັດທະນາ ແລະ ການຂະຫຍາຍອິດທິພົນ, ພ້ອມທັງສ້າງເອກະລັກທາງການທູດຂອງປະເທດ. ການທູດວັດທະນະທຳເຄີຍຖືກປະເທດຕ່າງໆ ນຳໃຊ້ໃນຫຼາກຫຼາຍຮູບແບບ ເຊັ່ນ ການສົ່ງເສີມການເຄື່ອນໄຫວໂຄສະນາຊວນເຊື່ອແລະຂໍ້ມູນຂ່າວສານຕ່າງປະເທດ; ການກໍ່ສ້າງກິດຈະການວັດທະນະທຳ ແລະ ປະຫວັດສາດຢູ່ຕ່າງປະເທດ; ການເຄື່ອນໄຫວພົບປະແລກປ່ຽນສິລະປະ ວັດທະນະທຳ, ການຈັດກິດຈະກຳທາງວັດທະນະທຳ; ການເຂົ້າຮ່ວມບັນດາອົງການຈັດຕັ້ງສາກົນກ່ຽວກັບວັດທະນະທຳ; ການເສີມຂະຫຍາຍບົດບາດຂອງຊາວຫວຽດນາມຢູ່ຕ່າງປະເທດ ໃນການຊຸກຍູ້ການເຄື່ອນໄຫວພົບປະແລກປ່ຽນວັດທະນະທຳ…
ໃນສະຖານະການໂລກາພິວັດ ແລະ ການເຊື່ອມໂຍງສາກົນນັບມື້ນັບເລິກເຊິ່ງ, ຫຼາຍປະເທດໃຊ້ວັດທະນະທຳເປັນເຄື່ອງມືທີ່ທີ່ມີປະສິດທິພາບຂອງ “ອຳນາດອ່ອນ”. ບັນດາປະເທດສ່ວຍຫຼາຍ, ບໍ່ພຽງແຕ່ປະເທດທີ່ພັດທະນາເທົ່ານັ້ນ ແຕ່ລວມທັງປະເທດທີ່ຫາກໍ່ພົ້ນເດັ່ນຂຶ້ນ ກໍ່ມີນະໂຍບາຍເຜີຍແຜ່ວັດທະນະທຳໃນຕ່າງປະເທດ, ດັງນັ້ນຈຶ່ງມີການສ້າງ ຮັກສາ ແລະ ພັດທະນາການພົວພັນລະຫວ່າງປະເທດ. ຜ່ານການທູດວັດທະນະທຳ, ບັນດາປະເທດ, ໂດຍສະເພາະແມ່ນບັນດາປະເທດໃຫຍ່, ແຜ່ຂະຫຍາຍອິດທິພົນໄປທົ່ວໂລກ. ອາເມລິກາ, ຈີນ, ຍີ່ປຸ່ນ, ເກົາຫຼີໃຕ້,… ເປັນປະເທດທີ່ຂະຫຍາຍ “ຄູນຄ່າ” ແລະ ອິດທິພົນຂອງຕົນເອງຢູ່ສະເໝີ ໂດຍຜ່ານກິດຈະກຳການທູດທາງວັດທະນະທຳ. ຄຽງຄູ່ກັນນັ້ນ, ໃນຂະບວນການແລກປ່ຽນວັດທະນາທຳ ແລະ ການປະຕິສຳພັນທາງວັດທະນະທຳ,ປະເທດຕ່າງໆຈະມີການແລກປ່ຽນທາງວັດທະນະທຳ, ການແຊກຊ້ອນ ຮັບເອົາປັດໄຈວັດທະນະທຳຂອງກັນແລະກັນ, ການເພີ່ມສົມບັດທາງວັດທະນະທຳຂອງແຕ່ລະປະເທດ; ພ້ອມກັນນັ້ນ, ດັດແປງ ອະນຸຮັກ ສົ່ງເສີມ ແລະ ປັບປຸງຄູນຄ່າວັດທະນະທຳຂອງປະເທດຕົນເອງ ໃຫ້ສອດຄ່ອງກັບກະແສໂລກ, ຍຸກສະໄໝ.
ສຳລັບບັນດາປະເທດທີ່ກຳລັງພັດທະນາຄືຫວຽດນາມ, ການທູດວັດທະນະທຳເສີມຂະຫຍາຍບົດບາດ ໃນຖານະວິທີການເຜີຍແຜ່ວັດທະນະທຳ ແລະ ຄຸນຄ່າຂອງມະນຸດ, ໂຄສະນາພາບພົດ, ຍົກສູງທີ່ຕັ້ງແລະສຽງຂອງປະເທດໃນເວທີສາກົນ; ພ້ອມກັນນັ້ນ, ສ້າງກຳລັງໜູນ ແລະ ໂອກາດໃຫ້ແກ່ການພັດທະນາ. ການທູດວັດທະນະທຳເປັນສ່ວນປະກອບທີ່ສຳຄັນ ຂອງພື້ນຖານການທູດຫວຽດນາມທີ່ຮອບດ້ານ ແລະ ທັນສະໄໝ. ຕະຫຼອດປະຫວັດສາດຫຼາຍພັນປີແຫ່ງການຮັກສາເອກະລາດ ອຳນາດອະທິປະໄຕ ແລະ ການປົກປ້ອງເອກະພາບ ແລະ ຜືນແຜ່ນດິນອັນຄົບຖ້ວນ, ກໍ່ຄືໃນການສ້າງສາປະເທດຊາດ, ຫວຽດນາມໄດ້ໝູນໃຊ້ການທູດວັດທະນະທຳຢ່າງມີຄວາມຫົວຄິດປະດິດສ້າງ ແລະ ໄຫວພິບ ຜ່ານຍຸດທະສາດ “ການທູດແບບໃຈເຖິງໃຈ”, “ການທູດສັນຕິພາບ”.
ຫວຽດນາມແມ່ນປະເທດທີ່ມີວັດທະນະທຳ, ອາລະຍະທຳອັນຍາວນານ, ມີປະຫວັດສາດຫຼາຍພັນປີ. ພື້ນຖານວັດທະນະທຳນັ້ນມີລະບົບຄຸນຄ່າ ແລະ ເອກະລັກຂອງຕົນເອງ, ເຮັດໃຫ້ເກີດ “ພະລັງອ່ອນ” ຂອງວັດທະນະທຳຫວຽດນາມ. ການທູດວັດທະນະທຳໄດ້ຮັບການກຳນົດວ່າເປັນເສົາຫຼັກໜຶ່ງ, ຮ່ວມກັບການທູດການເມືອງ ແລະ ການທູດເສດຖະກິດ ປະກອບເປັນການທູດຫວຽດນາມທີ່ຮອບດ້ານ ແລະ ທັນສະໄໝ. ໃນນັ້ນ, ການທູດການເມືອງມີບົດບາດກຳນົດເປົ້າໝາຍ, ກຳນົດທິດທາງໃຫ້ແກ່ວຽກງານການທູດດ້ານວັດທະນະທຳ. ການທູດເສດຖະກິດແມ່ນພື້ນຖານວັດຖຸ, ສ້າງແຫຼ່ງກຳລັງແຮງເພື່ອຊຸກຍູ້ການທູດວັດທະນະທຳ. ໃນສາຍພົວພັນທີ່ກົງກັນຂ້າມ, ການທູດວັດທະນະທຳນຳເອົາບັນດາຄຸນຄ່າທາງວັດທະນະທຳ ເອກະລັກ ຄວາມປອງດອງ ແລະ ຄວາມເປັນມະນຸດ ເຂົ້າໃນການທູດທາງການເມືອງ, ຜ່ານນັ້ນ ປະກອບສ່ວນຊຸກຍູ້ ແລະ ເພີ່ມທະວີລົງເລິກການພົວພັນກັບບັນດາຄູ່ຮ່ວມມື, ໂຄສະນາພາບລັກສະນະຂອງຊາດ, ບັນດາເຄື່ອງໝາຍຂອງທ້ອງຖິ່ນ, ຮັບໃຊ້ການພັດທະນາປະເທດ, ປຸກລະດົມນ້ຳໃຈ ຄວາມຮູ້ສຶກຜູກພັນ ຕໍ່ບ້ານເກີດເມືອງນອນຂອງຊາວຫວຽດນາມໃນຕ່າງປະເທດ.
ການທູດວັດທະນະທຳເສີມຂະຫຍາຍບົດບາດຂອງຕົນ
ໃນຖານະໜຶ່ງໃນສາມເສົາຫຼັກຂອງພື້ນຖານການທູດຮອບດ້ານຫວຽດນາມ
ກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ (ເດືອນມັງກອນ 2011) ໄດ້ກຳນົດແຜນນະໂຍບາຍກ່ຽວກັບ “ການເຊື່ອມໂຍງເຂົ້າກັບສາກົນຢ່າງເປັນເຈົ້າການແລະຕັ້ງໜ້າ”, ກຸ່ມຄຳສັບ “ການທູດວັດທະນະທຳ” ໄດ້ຮັບການນຳໃຊ້ເປັນຄັ້ງທຳອິດ ເຊິ່ງໄດ້ຖືວ່າທ່ຽບເທົ່າກັນກັບການທູດການເມືອງ ແລະ ການທູດເສດຖະກິດ. ຍຸດທະສາດການທູດວັດທະນະທຳເຖິງປີ 2020 ຖືກປະກາດໃຊ້ໂດຍນາຍົກລັດຖະມົນຕີ ໃນຂໍ້ຕົກລົງເລກທີ 208/2011/QĐ-TTg, ລົງວັນທີ 14 ກຸມພາ 2011, ໄດ້ເນັ້ນໜັກທັດສະນະວ່າ: “ການທູດວັດທະນະທຳພ້ອມກັນກັບການທູດເສດຖະກິດ ແລະ ການທູດການເມືອງ ເປັນສາມເສົາຫຼັກຂອງພື້ນຖານການທູດທີ່ຮອບດ້ານ ແລະ ທັນສະໄໝ ຂອງຫວຽດນາມ. ສາມເສົາຫຼັກນີ້ຕິດພັນ ແລະ ກະທົບເຊິ່ງກັບແລະກັນ, ປະກອບສ່ວນເຂົ້າໃນການປະຕິບັດແນວທາງ, ນະໂຍບາຍການຕ່າງປະເທດຂອງພັກ ແລະ ລັດ. ການທູດການເມືອງມີບົດບາດກຳນົດທິດທາງ, ການທູດເສດຖະກິດເປັນພື້ນຖານວັດຖຸ ແລະ ການທູດວັດທະນະທຳເປັນພື້ນຖານຈິດໃຈ ຂອງການເຄື່ອນໄຫວການຕ່າງປະເທດ”. ພ້ອມກັນນັ້ນ, ບັນດາສົນທິສັນຍາ ແລະ ຂໍ້ຕົກລົງສາກົນ ກ່ຽວກັບວັດທະນະທຳທີ່ໄດ້ລົງນາມໃໝ່ ຫຼື ຕໍ່ອາຍຸ ໄດ້ສ້າງພື້ນຖານນິຕິກຳ, ຍົກສູງຄວາມຮັບຮູ້ກ່ຽວກັບການທູດວັດທະນະທຳ ແລະ ຜັນຂະຫຍາຍພາລະບົດບາດຂອງການທູດວັດທະນະທຳເທື່ອລະກ້າວ ໃນການເຄື່ອນໄຫວການຕ່າງປະເທດຂອງຊາດ.
ວຽກງານການທູດວັດທະນະທຳໄດ້ຮັບການຜັນຂະຫຍາຍນັບມື້ນັບເປັນແບບແຜນ ແລະ ມືອາຊີບ, ຕິດພັນ ແລະ ຊຸກຍູ້ການທູດການເມືອງ ແລະ ການທູດເສດຖະກິດ, ປະກອບສ່ວນສ້າງເປັນກຳລັງແຮງສັງລວມແຫ່ງຊາດ, ຮັບໃຊ້ການຜັນຂະຫຍາຍບັນດາເປົ້າໝາຍການຕ່າງປະເທດຂອງປະເທດ.
ການທູດວັດທະນະທຳໄດ້ກາຍເປັນໜຶ່ງໃນບັນດາການເຄື່ອນໄຫວຕົ້ນຕໍ່ ໃນເນື້ອໃນຂອງໂຄງການ, ແຜນການ, ແຜນງານການເຄື່ອນໄຫວການຕ່າງປະເທດທີ່ສຳຄັນ ຂອງບັນດາຂັ້ນ, ຂະແໜງການ ແລະ ທ້ອງຖິ່ນຕ່າງໆ. ການເຄື່ອນໄຫວການທູດວັດທະນະທຳໄດ້ຜັນຂະຫຍາຍໃນຂອບເຂດທີ່ກວ້າງຂວາງ, ທັງພາຍໃນ ແລະ ຕ່າງປະເທດ, ໃນທຸກທະວີບ; ມີຄວາມຫຼາກຫຼາຍທາງດ້ານເປົ້າໝາຍ, ຄວາມອຸດົມສົມບຸນກ່ຽວກັບເນື້ອໃນ ແລະ ຮູບການ, ມີແບບແຜນໃນບັນດາການຢ້ຽມຢາມຂອງການນຳພັກແລະລັດ, ກໍ່ຄືການຕ້ອນຮັບປະມຸກລັດຂອງຫຼາຍປະເທດ ທີ່ມາຢ້ຽມຢາມຫວຽດນາມ; ໃນບັນດາກອງປະຊຸມ ແລະ ເຫດການສາກົນສຳຄັນທີ່ຫວຽດນາມເປັນເຈົ້າພາບ; ບັນດາໂອກາດສະເຫຼີມສະຫຼອງການສ້າງຕັ້ງການພົວພັນການທາງການທູດລະຫວ່າງຫວຽດນາມ ແລະ ປະເທດຕ່າງໆ. ຜ່ານການເຄື່ອນໄຫວເຫຼົ່ານີ້, ຈິດໃຈ ແລະ ເອກະລັກຂອງວັດທະນະທຳຫວຽດນາມໄດ້ແຜ່ກະຈາຍ, ຢືນຢັນແນວທາງການຕ່າງປະເທດທີ່ຢຶດໝັ້ນໃນຄວາມເປັນເອກະລາດ, ເປັນເຈົ້າຕົນເອງ ເພື່ອສັນຕິພາບ ມິດຕະພາບ ການຮ່ວມມື ແລະ ການພັດທະນາ, ການຫັນເປັນຫຼາຍທິດ ຫຼາຍຝ່າຍ ແລະ ເຊື່ອມໂຍງສາກົນຢ່າງເລິກເຊິ່ງກວ້າງຂວາງ ແລະ ຮອບດ້ານ; ພ້ອມກັນນັ້ນ, ກໍ່ຍົກໃຫ້ເຫັນຄວາມສວຍງາມຂອງຮີດຄອງປະເພນີມະນຸດສະທຳ ຄວາມສັດຊື່ ສັນຕິພາບ ຄວາມສາມັກຄີ ແລະ ມິດຕະພາບຂອງຫວຽດນາມ.
ການທູດວັດທະນະທຳສົມທົບຢ່າງແໜ້ນແຟ້ນກັບການທູດເສດຖະກິດ ໃນການເຄື່ອນໄຫວສົ່ງເສີມການລົງທຶນ ການຄ້າ ແລະ ການທ່ອງທ່ຽວ ເພື່ອແນໃສ່ສ້າງຮູບພາບຂອງຫວຽດນາມທີ່ເປັນຈຸດໝາຍປາຍທາງທີ່ດຶງດູດໃຈຢູ່ໃນໂລກ ດ້ວຍລະບົບການເມືອງທີ່ໝັ້ນຄົງ, ປະຊາຊົນທີ່ເປັນມິດ, ວັດທະນະທຳທີ່ເປັນເອກະລັກ ແລະ ຫຼາກຫຼາຍ. ອົງການການສຶກສາ ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ (UNESCO) ໄດ້ຮັບຮອງຊື່ມໍລະດົກທາງທຳມະຊາດ ແລະ ວັດທະນະທຳຂອງໂລກຫຼາຍລາຍການຂອງຫວຽດນາມ. ການລົງທະບຽນໃນລາຍຊື່ແຫຼ່ງມໍລະດົກໂລກທາງວັດທະນະທຳ ແລະ ທຳມະຊາດໂລກ, ເຂດສະຫງວນຊີວະມົນທົນໂລກ ແລະ ອຸທະຍານທໍລະນີໂລກ ບໍ່ພຽງແຕ່ເປັນຄຳໝັ້ນສັນຍາແຫ່ງຊາດເທົ່ານັ້ນ, ແຕ່ຍັງເປັນຮູບແບບການໃຊ້ປະໂຫຍດເພື່ອຕອບສະໜອງຄວາມຕ້ອງການຂອງການພັດທະນາທີ່ເປັນມິດຕໍ່ສິ່ງແວດລ້ອມແລະຍືຍົງ. ເຖິງທ້າຍເດືອນທັນວາ 2020, ຫວຽດນາມໄດ້ສ້າງເອກະສານ ແລະ ໄດ້ຮັບຜົນສຳເລັດໃນການຂົນຂວາຍໃຫ້ UNESCO ຮັບຮອງມໍລະດົກ ແລະ ນາມະຍົດຕ່າງໆ 44 ລາຍການ. ຫຼາຍທ້ອງຖິ່ນໄດ້ຮັບຜົນສຳເລັດ ໃນການເຮັດໃຫ້ການທ່ອງທ່ຽວກາຍເປັນໜຶ່ງໃນຂະແໜງເສດຖະກິດຫົວຫອກ ໂດຍທີ່ອີງໃສ່ທ່າແຮງດ້ານທັດສະນິຍະພາບ ແລະ ບັນດາມໍລະດົກທາງວັດທະນະທຳ ເຊິ່ງຊ່ວຍເສີມພາບລັກສະນະຂອງຫວຽດນາມໃນແຜນທີ່ມໍລະດົກ ແລະ ວັດທະນະທຳໂລກ; ພ້ອມກັນນັ້ນ, ປະກອບສ່ວນເຂົ້າໃນການໂຄສະນາສົ່ງເສີມຄວາມຫຼາກຫຼາຍທາງຊີວະພາບ ວັດທະນະທຳ ມູນເຊື້ອ ແລະ ຜູ້ຄົນຫວຽດນາມ ໃຫ້ກັບເພື່ອນມິດສາກົນ.
ຜ່ານການເຄື່ອນໄຫວທາງການທູດວັດທະນະທຳ, ພາບລັກສະນະຂອງປະເທດແລະຜູ້ຄົນ ແລະ ຄວາມງາມຂອງວັດທະນະທຳຫວຽດນາມ ໄດ້ຮັບການໂຄສະນາ ແລະ ໄດ້ຮັບການຮັບຮູ້ໃນຫຼາຍປະເທດ ແລະ ພາກພື້ນທົ່ວໂລກ. ການເຄື່ອນໄຫວໂຄສະນາສົ່ງເສີມທີ່ໄດ້ຜັນຂະຫຍາຍຢ່າງແຂງຂັນໃນເຫດການການຕ່າງປະເທດ, ວັນບຸນ, ງານສະແດງສິນຄ້າ, ເທດສະການວັດທະນະທຳ ແລະ ການທ່ອງທ່ຽວ, ແຜນງານລາຍສັບປະດາ/ລາຍວັນຂອງຫວຽດນາມຢູ່ຕ່າງປະເທດ ໃນປະເທດທີ່ເປັນຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານຂອງຫວຽດນາມ, ໂຄງການຍົກຍ້ອງໃຫ້ກຽດແກ່ວີລະບຸລຸດຂອງຊາດ ແລະ ຜູ້ມີຊື່ສຽງທາງວັດທະນະທຳ, ໂດຍສະເພາະແມ່ນໂຄງການ “ເຊີດຊູຍົກຍ່ອງປະທານໂຮ່ຈີມິນ, ວິລະຊົນແຫ່ງການປົດປ່ອຍຊາດຫວຽດນາມ, ນັກວັດທະນະທຳທີ່ດີເດັ່ນ”, ທີ່ໄດ້ຮັບການຜັນຂະຫຍາຍຢ່າງມີປະສິດທິຜົນຢູ່ 100 ກວ່າປະເທດ ແລະ ອານາເຂດໃນໂລກ… ການເຊື່ອມໂຍງບັນດາຂົງເຂດການເມືອງ, ເສດຖະກິດ, ວັດທະນະທຳ, ການທ່ອງທ່ຽວ ແລະ ວຽກງານຊຸມຊົນ ໄດ້ຮັບຄວາມເອົາໃຈໃສ່ເປັນພິເສດ, ເຊິ່ງໄດ້ປະກອບສ່ວນເຂົ້າໃນການແນະນຳໃຫ້ເພື່ອນມິດສາກົນ ຮູ້ຈັກພາບລັກສະນຂອງຫວຽດນາມ ທີ່ມີປະຫວັດສາດທີ່ສະຫງ່າອົງອາດ, ປະເທດທີ່ສວຍງາມ ແລະ ມີຄວາມສາມາດບົ່ມຊ້ອນໃນການພັດທະນາສູງ; ຄົນຫວຽດນາມຮັກຄວາມສະຫງົບ, ມີຄວາມເມດຕາ ຄວາມອົດທົນ, ເຄົາລົບຄວາມກະຕັນຍູ, ດູ້ໝັ່ນຂະຫຍັນພຽນ, ມີຫົວຄິດປະດິດສ້າງ, ມີນ້ຳໃຈມິດຕະພາບ ແລະ ຮັກແຂກ; ວັດທະນະທຳຫວຽດນາມກ້າວໜ້າ ແລະ ເຕັມໄປດ້ວຍເອກະລັກຂອງຊາດ. ບັນດາການເຄື່ອນໄຫວດັ່ງກ່າວຍັງປະກອບສ່ວນ ຖ່າຍທອດຂ່າວສານກ່ຽວກັບແຜນນະໂຍບາຍ ທິດທາງການພັດທະນາ ແລະ ການເຊື່ອມໂຍງສາກົນຂອງຫວຽດນາມ ເຖິງເພື່ອນມິດສາກົນ ແລະ ຊຸມຊົນຊາວຫວຽດນາມໃນຕ່າງປະເທດ.
ໃນຂອບເຂດເວທີປາໄສຫຼາຍຝ່າຍ, ການທູດວັດທະນະທຳໄດ້ປະກອບສ່ວນທີ່ຕັ້ງໜ້າໃນການເຊື່ອມໂຍງສາກົນດ້ານວັດທະນະທຳ, ຍົກສູງຄວາມສາມາດເປັນເຈົ້າການ, ເຂົ້າຮ່ວມການສ້າງ “ກະຕິກາ” ຂອງເວທີປາໄສ, ມີການປະກອບສ່ວນຫຼາຍຢ່າງໃນບັນດາເປົ້າໝາຍສັນຕິພາບ, ຄວາມໝັ້ນຄົງ, ການພັດທະນາ ແລະ ເພີ່ມທະວີຖານະບົດບາດຂອງປະເທດ. ທີ່ກອງປະຊຸມຂອງ UNESCO, ຫວຽດນາມໄດ້ແບ່ງປັນບົດຮຽນປະສົບການຢ່າງແຂງຂັນ, ສະແດງໃຫ້ເຫັນເຖິງການເປັນສະມາຊິກທີ່ມີຄວາມຮັບຜິດຊອບຂອງອົງການນີ້ ໃນຫຼາຍປີທີ່ຜ່ານມາ. ຫວ່າງມໍ່ໆນີ້, ສອງຝ່າຍໄດ້ລົງນາມໃນບົດບັນທຶກການຮ່ວມມືລະຫວ່າງລັດຖະບານຫວຽດນາມ ແລະ UNESCO ໄລຍະປີ 2021-2025 ເນື່ອງໃນໂອກາດການຢ້ຽມຢາມ UNESCO ຂອງນາຍົກລັດຖະມົນຕີຫວຽດນາມ ຟ້າມມິງຈີ້ງ. ການທູດວັດທະນະທຳໄດ້ຊຸກຍູ້ຜົນປະໂຫຍດຂອງຫວຽດນາມ ໃນເວທີປາໄສ UNESCO, ປະກອບສ່ວນເຂົ້າເຖິງຢ່າງມີປະສິດທິຜົນ ບັນດາແຫຼ່ງກຳລັງແຮງ, ໝູນໃຊ້ຄວາມມຸ່ງມາດປາຖະໜາ ແລະ ບົດຮຽນຂອງອົງການນີ້ ເພື່ອຮັບໃຊ້ຜົນປະໂຫຍດ, ຄວາມຮຽກຮ້ອງຕ້ອງການພັດທະນາປະເທດ ໃນບັນດາຂົງເຂດວັດທະນະທຳ, ການສຶກສາ ແລະ ວິທະຍາສາດ. ຫວຽດນາມໄດ້ກາຍເປັນສະມາຊິກຂອງສະຖາບັນ ແລະ ເວທີປາໄສຫຼາຍຝ່າຍທີ່ສຳຄັນເກືອບທັງໝົດ ໃນທຸກລະດັບຂອງເວທີແລະອົງການທາງວັດທະນະທຳລະດັບພາກພື້ນ, ລະຫວ່າງພາກພື້ນ ແລະ ສາກົນ, ເຊັ່ນ: ກອງປະຊຸມສຸດຍອດອາຊີ-ເອຣົບ (ASEM), ກອງປະຊຸມຂັ້ນສູງອາຊີຕາເວນອອກ (EAS), ເວທີປາໄສການຮ່ວມມືອາຊີຕາເວນອອກ - ອາເມລິກາລາຕິນ (FEALAC), ອົງການພາສາຝຣັ່ງ, ບັນດາອົງການຈັດຕັ້ງບໍ່ຂຶ້ນກັນລັດຖະບານ (NGOs) ກ່ຽວກັບວັດທະນະທຳ… ຢູ່ພາກພື້ນ, ຜ່ານການເຄື່ອນໄຫວທາງດ້ານການທູດວັດທະນະທຳ, ຫວຽດນາມໄດ້ເສີມຂະຫຍາຍພາລະບົດບາດທີ່ຕັ້ງໜ້າ ໃນການຮ່ວມມື, ກໍ່ສ້າງປະຊາຄົມວັດທະນະທຳ-ສັງຄົມ ອາຊຽນ ແລະ ຮ່ວມມືວັດທະນະທຳອາຊຽນ, ປະກອບສ່ວນເພີ່ມທະວີຄວາມເຂົ້າໃຈຂອງປະຊາຊົນຫວຽດນາມ ກ່ຽວກັບອາຊຽນ; ພ້ອມກັນນັ້ນ, ໂຄສະນາພາບພົດຂອງຫວຽດນາມເຖິງບັນດາປະເທດໃນພາກພື້ນ ແລະ ນອກພາກພື້ນ, ສ້າງເອກະລັກສະເພາະຂອງອາຊຽນ.
ບັນດາການເຄື່ອນໄຫວການທູດວັດທະນະທຳສຳລັບຊຸມຊົນຊາວຫວຽດນາມຢູ່ຕ່າງປະເທດ ກໍ່ໄດ້ຮັບການຜັນຂະຫຍາຍຢ່າງຕັ້ງໜ້າ ດ້ວຍຮູບການທີ່ນັບມື້ນັບຫຼາກຫຼາຍ, ປະກອບສ່ວນເຂົ້າໃນການປະຕິບັດມະຕິເລກທີ 36-NQ/TW, ລົງວັນທີ 26 ມີິນາ 2004, ຂອງກົມການເມືອງສູນກາງພັກສະໄໝທີ 9 “ກ່ຽວກັບວຽກງານສຳລັບຊາວຫວຽດນາມຢູ່ຕ່າງປະເທດໃນສະພາບການໃໝ່”; ຄຳສັ່ງເລກທີ 45-CT/TW, ລົງວັນທີ 19 ພຶດສະພາ 2015, ຂອງກົມການເມືອງສູນກາງພັກ “ກ່ຽວກັບສືບຕໍ່ຍູ້ແຮງການປະຕິບັດມະຕິເລກທີ 36-NQ/TW, ຂອງກົມການເມືອງສູນກາງພັກສະໄໝທີ 9 “ກ່ຽວກັບວຽກງານສຳລັບຊາວຫວຽດນາມຢູ່ຕ່າງປະເທດ ໃນສະພາບການໃໝ່”; ບົດສະຫຼຸບເລກທີ 12-KL/TW, ລົງວັນທີ 12 ສິງຫາ 2021, ຂອງກົມການເມືອງສູນກາງພັກ “ກ່ຽວກັບວຽກງານສຳລັບຊາວຫວຽດນາມຢູ່ຕ່າງປະເທດ ໃນສະພາບການໃໝ່”. ຕົວຢ່າງເຊັ່ນ: ລາຍການວັນຫວຽດນາມຢູ່ຕ່າງປະເທດ ທີ່ຈັດຂຶ້ນໃນຫຼາຍປະເທດຄື ສະວິດເຊີແລນ, ເດນມາກ, ສະເປນ, ອິນເດຍ, ລັດເຊຍ,… ເຊິ່ງໄດ້ສ້າງຜົນກະທົບຢ່າງຕັ້ງໜ້າ, ປະກອບສ່ວນສ້າງທ່າພັດທະນາການພົວພັນຂອງຫວຽດນາມ ກັບຄູ່ຮ່ວມມືຫຼາຍປະເທດ. ນີ້ແມ່ນໂຄງການສັງລວມບັນດາການເຄື່ອນໄຫວດ້ານການເມືອງ, ເສດຖະກິດ, ວັດທະນະທຳ ທີ່ດຳເນີນຢູ່ຫຼາຍປະເທດໃນແຕ່ລະໄລຍະ, ສຸມໃສ່ແນະນຳກາລະໂອກາດຮ່ວມມືດ້ານການລົງທຶນ, ການຄ້າ, ການທ່ອງທ່ຽວ, ການບໍລິການ, ແນະນຳວັດທະນະທຳຫວຽດນາມ, ການພົບປະແລກປ່ຽນປະຊາຊົນ,… ການເຄື່ອນໄຫວວັດທະນະທຳທີ່ຫຼາກຫຼາຍ ທີ່ມຸ່ງສູ່ປະຊາຄົມຊາວຫວຽດນາມຢູ່ຕ່າງປະເທດ ໄດ້ຊຸກຍູ້ການເຊື່ອມຕໍ່ປະຊາຊົນຫວຽດນາມໃນທົ່ວໂລກ ກັບບ້ານເກີດເມືອງນອນ, ມີການປະກອບສ່ວນທີ່ແທ້ຈິງ ເຂົ້າໃນພາລະກິດການປົກປັກຮັກສາ, ສ້າງສາ ແລະ ພັດທະນາປະເທດ, ມີຜົນກະທົບອັນເລິກເຊິ່ງໃນການປຸກຕື່ນຄວາມເອກອ້າງທະນົງໃຈແຫ່ງຊາດ, ຄວາມຮັກແພງຜູກພັນກັບບ້ານເກີດເມືອງນອນ, ຊຸກຍູ້ການແຜ່ລາມບັນດາຄຸນຄ່າຫວຽດນາມໄປສູ່ໂລກ, ຮັກສາ ແລະ ເສີມຂະຫຍາຍເອກະລັກວັດທະນະທຳ ແລະ ມູນເຊື້ອອັນດີງານຂອງຊາດ.
ການທູດວັດທະນະທຳກໍ່ໄດ້ປະກອບສ່ວນອັນຕັ້ງໜ້າ ຊ່ວຍໃຫ້ບັນດາຂະແໜງການ, ບັນດາທ້ອງຖິ່ນ ປະຕິບັດສຳເລັດບັນດາແຜນການພັດທະນາເສດຖະກິດ-ສັງຄົມ. ກໍ່ສ້າງເຄື່ອງໝາຍການຄ້າທ້ອງຖິ່ນເທື່ອລະກ້າວ. ການທູດວັດທະນະທຳໄດ້ຄ່ອຍໆລວມເຂົ້າກັບເນື້ອໃນຂອງຍຸດທະສາດ, ໂຄງການ ແລະ ການວາງແຜນໃນທ້ອງຖິ່ນ ກ່ຽວກັບການພັດທະນາວັດທະນະທຳ ການທ່ອງທ່ຽວ ແລະ ເສດຖະກິດ-ສັງຄົມ. ງານບຸນ, ເຫດການທາງວັດທະນະທຳທີ່ຈັດເປັນປະຈຳ ແລະ ປະຈຳປີຈຳນວນຫຼາຍ ຄ່ອຍໆກາຍເປັນ “ເຄື່ອງໝາຍການຄ້າ” ຂອງທ້ອງຖິ່ນ, ສ້າງແຮງດຶງດູດໃຈໃຫ້ກັບຄະນະທູຕານຸທູດ ເພື່ອນມິດ ແລະ ແຂກຈາກຕ່າງປະເທດ, ຜ່ານນັ້ນ, ເຮັດໃຫ້ພາບລັກສະນະຂອງທ້ອງຖິ່ນຂອງຫວຽດນາມ ມີຄວາມໃກ້ຊິດ, ເປັນມິດ ແລະ ເປີດກວ້າງກວ່າອີກ, ປະກອບສ່ວນດຶງດູດການລົງທຶນໃນປະເທດ ແລະ ຕ່າງປະເທດ, ຊຸກຍູ້ການພັດທະນາເສດຖະກິດຂອງທ້ອງຖິ່ນເວົ້າສະເພາະ ແລະ ທົ່ວປະເທດເວົ້າລວມ.
ສະຫຼຸບລວມ, ໃນຊຸມປີທີ່ຜ່ານມາ, ໂດຍສະເພາະແມ່ນໃນ 10 ປີແຫ່ງການຜັນຂະຫຍາຍຍຸດທະສາດການທູດວັດທະນະທຳເຖິງປີ 2020, ການທູດວັດທະນະທຳໄດ້ສົມທົບຢ່າງແໜ້ນແຟ້ນ, ມີແບບແຜນ, ມີປະສິດທິຜົນ ກັບການທູດການເມືອງ ແລະ ການທູດເສດຖະກິດ, ສ້າງຜົນກະທົບສຳຄັນ ແລະ ປະກອບສ່ວນເຂົ້າໃນການຍົກສູງປະສິດທິຜົນການຜັນຂະຫຍາຍວຽກງານການຕ່າງປະເທດເວົ້າລວມ.
ສືບຕໍ່ປະກອບສ່ວນຍົກສູງບົດບາດ ແລະ
ເຜີຍແຜ່ຄຸນຄ່າຂອງຫວຽດນາມໄປສູ່ປະຊາຄົມໂລກ
ສະຖານະການໂລກແລະພາກພື້ນໄດ້ຮັບການຄາດຄະເນວ່າ ຈະມີການເຄື່ອນໄຫວ ແລະປ່ຽນແປງຢ່າງບໍ່ຢຸດຢັ້ງ ແລະ ຈະທະວີຄວາມສັບສົນ, ຄາດເດົາບໍ່ໄດ້ຫຼາຍຂຶ້ນ. ບັນດາການຫັນປ່ຽນທາງດ້ານການເມືອງ, ເສດຖະກິດ, ວັດທະນະທຳ, ສັງຄົມ, ເປັນຕົ້ນແມ່ນບັນດາຜົນງານຂອງການປະຕິວັດວິທະຍາສາດ-ເຕັກໂນໂລຊີທັນສະໄໝ ຈະສົ່ງຜົນກະທົບຢ່າງແຂງແຮງ, ຫຼາຍທິດ, ຫຼາຍລະດັບ ເຖິງທຸກໆປະເທດ, ໃນຫຼາຍຂົງເຂດ, ໃນນັ້ນມີວັດທະນະທຳ. ຄວາມຮຽກຮ້ອງຕ້ອງການກ່ຽວກັບການພົບປະແລກປ່ຽນທາງວັດທະນະທຳ, ການຮ່ວມມືປະຊາຊົນລະຫວ່າງປະເທດຕ່າງໆ ນັບມື້ນັບໄດ້ຮັບຄວາມເອົາໃຈໃສ່. ໃນຖານະທີ່ເປັນປັດໄຈສຳຄັນທີ່ສ້າງເປັນພະລັງອ່ອນຂອງຊາດ, ໃນສະພາບການໂລກາພິວັດ ແລະ ການເຊື່ອມໂຍງສາກົນສືບຕໍ່ໄດ້ຮັບການຊຸກຍູ້, ບັນດາປະເທດລ້ວນແຕ່ມີທ່າອຽງຮັບຮູ້ວັດທະນທຳເປັນອົງປະກອບສຳຄັນ ໃນການພົວພັນສາກົນ, ຊຸກຍູ້ຄວາມໄວ້ເນື້ອເຊື່ອໃຈ, ສົ່ງເສີມຜະລິດຕະພັນວັດທະນະທຳ ເພື່ອເຜີຍແຜ່ເອກະລັກຂອງຊາດ, ຍົກສູງພາບພົດ ແລະ ຖານະບົດບາດຂອງປະເທດ, ພ້ອມທັງອະນຸລັກ ດູດຊຶມ ແລະ ເພີ່ມພູນສົມບັດທາງວັດທະນະທຳຂອງຊາດ. ແມ່ນວັດທະນະທຳນັ້ນເອງທີ່ເປັນປັດໄຈຊີ້ນຳ, ເປັນເງື່ອນໄຂທີ່ຈຳເປັນແລະຂາດບໍ່ໄດ້ ສຳລັບການບັນລຸເປົ້າໝາຍຂອງການທູດເສດຖະກິດ, ການທູດການເມືອງ, ການເພີ່ມທະວີຄວາມເຂົ້າໃຈ, ການປັບປຸງ ແລະ ເຮັດໃຫ້ການພົວພັນລະຫວ່າງປະເທດເລິກເຊິ່ງກວ່າອີກ, ປະກອບສ່ວນໂດຍກົງຕໍ່ສັນຕິພາບ, ຄວາມໝັ້ນຄົງ, ການຮ່ວມມື ແລະ ການພັດທະນາ.
ໃນຖານະປະເທດທີ່ມີປະຫວັດສາດອັນຍາວນານໃນການສ້າງສາ ແລະ ປົກປັກຮັກສາປະເທດ ດ້ວຍວັດທະນະທຳທີ່ຫຼາກຫຼາຍ ແລະເຕັມໄປດ້ວຍເອກະລັກປະຈຳຊາດ, ຫວຽດນາມຈຶງມີຄວາມສາມາດບົ່ມຊ້ອນອັນໃຫຍ່ຫຼວງ ເພື່ອພັດທະນາ ແລະ ຜັນຂະຫຍາຍນະໂຍບາຍການທູດວັດທະນະທຳ ທີ່ສົມກັບລະດັບແລະຖານະບົດບາດຂອງປະເທດ, ກໍ່ຄືປະກອບສ່ວນທີ່ສຳຄັນ ແລະ ມີປະສິດທິຜົນ ເຂົ້າໃນຂະບວນການເຊື່ອມໂຍງສາກົນຢ່າງຮອບດ້ານ, ເລິກເຊິ່ງກວ້າງຂວາງ ໃນຊຸມປີຂ້າງໜ້າ. ຍຸດທະສາດການທູດວັດທະນະທຳເຖິງປີ 2030 ໄດ້ກຳນົດເປົ້າໝາຍ “ການນຳໃຊ້ເຄື່ອງມືທາງວັດທະນະທຳໃນການທູດ ເພື່ອເຮັດໃຫ້ການພົວພັນຂອງຫວຽດນາມກັບບັນດາຄູ່ຮ່ວມມື ໄປສູ່ລວງເລິກແລະໝັ້ນຄົງ, ຮັບປະກັນຜົນປະໂຫຍດຂອງຊາດ-ປະເທດຊາດ, ສ້າງ ແລະ ຮັກສາສະພາບແວດລ້ອມທີ່ສະຫງົບແລະໝັ້ນຄົງ, ລະດົມຊັບພະຍາກອນພາຍນອກ, ຫັນປ່ຽນເງື່ອນໄຂແລະຕຳແໜ່ງທີ່ເອື້ອອຳນວຍຂອງປະເທດ ໃຫ້ເປັນຊັບພະຍາກອນ ສຳລັບການພັດທະນາເສດຖະກິດ-ສັງຄົມ, ພ້ອມທັງນຳໃຊ້ບັນດາມາດຕະການການທູດ ເພື່ອເຊີດຊູບັນດາຄຸນຄ່າ ແລະ ຄວາມງາມຂອງວັດທະນະທຳຫວຽດນາມ, ຮັບເອົາສິ່ງຍອດຍ້ຽມຂອງມະນຸດ, ຜ່ານນັ້ນປຸກຕື່ນຄວາມມຸ່ງມາດປາຖະໜາພັດທະນາປະເທດ, ເພີ່ມທະວີພະລັງອ່ອນ, ຍົກສູງຖານະບົດບາດຂອງປະເທດ”(1). ເປົ້າໝາຍນີ້ເນັ້ນໜັກອີກເທື່ອໜຶ່ງເຖິງບົດບາດຂອງການທູດວັດທະນະທຳ ໃນພື້ນຖານການທູດຫວຽດນາມທີ່ຮອບດ້ານ ແລະ ທັນສະໄໝ. ການທູດວັດທະນະທຳຈະພ້ອມກັນກັບການທູດການເມືອງ, ການທູດເສດຖະກິດ ຮັບໃຊ້ບັນດາເປົ້າໝາຍ ແລະ ຜົນປະໂຫຍດຂອງຊາດ ປະເທດຊາດ, ໂດຍສະເພາະເປົ້າໝາຍຂອງສັນຕິພາບ, ຄວາມໝັ້ນຄົງ, ການພັດທະນາ ແລະ ຖານະບົດບາດ, ອິດທິພົນ; ເຊື່ອມໂຍງວັດທະນະທຳຢ່າງໃກ້ຊິດກັບຍຸດທະສາດການພັດທະນາເສດຖະກິດ-ສັງຄົມ, ຍຸດທະສາດໂດຍລວມກ່ຽວກັບການເຊື່ອມໂຍງສາກົນ ແລະ ທິດທາງນະໂຍບາຍການຕ່າງປະເທດເຖິງປີ 2030 ຂອງພັກ ແລະ ປະເທດ. ການທູດວັດທະນທຳຂອງຫວຽດນາມໃນເວລາຕໍ່ໄປຈະໄດ້ຜັນຂະຫຍາຍກັບຫ້າໜ້າທີ່ລະອຽດຄື: 1- ຊຸກຍູ້ ແລະ ເພີ່ມທະວີການພົວພັນ ແລະ ຄວາມໄວ້ເນື້ອເຊື່ອໃຈລະຫວ່າງຫວຽດນາມກັບບັນດາປະເທດ, ພາກພື້ນ ແລະ ອົງການສາກົນອື່ນໆ; 2- ການເຊື່ອມໂຍງຢ່າງຕັ້ງໜ້າ ແລະ ກວ້າງຂວາງ ໃນດ້ານວັດທະນະທຳ ໃນອົງການແລະເວທີປາໄສພາກພື້ນ ແລະ ສາກົນ; 3- ໂຄສະນາ ແລະ ເຜີຍແຜ່ພາບພົດປະເທດ, ຜູ້ຄົນ ແລະ ວັດທະນະທຳຫວຽດນາມ ໃນເວທີສາກົນ; 4- ຂົນຂວາຍ, ປົກປັກຮັກສາ ແລະ ເສີມຂະຫຍາຍມໍລະດົກຫວຽດນາມທີ່ໄດ້ຮັບການຍອມຮັບໃນລະດັບສາກົນ; 5- ເລືອກຮັບເອົາແກ່ນສານຂອງວັດທະນະທຳມະນຸດ ເພື່ອເພີ່ມພູນຄູນສ້າງເອກະລັກທາງວັດທະນະທຳຂອງຊາດ.
ໃນໂລກທີ່ໂລກາພິວັດ ແລະ ເຊື່ອມໂຍງສາກົນຢ່າງແຂງແຮງຄືປະຈຸບັນ ວັດທະນະທຳໄດ້ຮັບການຍອມຮັບຫຼາຍຂຶ້ນຈາກປະເທດຕ່າງໆວ່າ ເປັນບົດບາດສຳຄັນ, ເປັນແຫຼ່ງພະລັງພາຍໃນ ແລະ ເປັນກຳລັງໜູນໃນການພັດທະນາ, ການປົກປັກຮັກສາປະເທດຊາດໃນສະຖານະການໃໝ່. ດັງນັ້ນ ຈຶງຈຳເປັນຕ້ອງເສີມຂະຫຍາຍ ແລະ ຖ່າຍທອດຄຸນຄ່າຄວາມງາມທີ່ມີຄວາມໝາຍເລິກເຊິ່ງ, ມີມະນຸດອາລະຍະທຳສູງສຸດ, ມູນເຊື້ອວັດທະນະທຳຂອງຊາດແລະຍຸກສະໄໝ ເຂົ້າໃນການເຄື່ອນໄຫວການຕ່າງປະເທດ ເພື່ອໃຫ້ວັດທະນະທຳສາມາດມີສ່ວນຮ່ວມຢ່າງຮອບດ້ານ, ມີປະສິດທິຜົນ ແລະ ເປັນຮູບປະທຳຫຼາຍຂຶ້ນ ໃນການຜັນຂະຫຍາຍບັນດາເປົ້າໝາຍ ແລະ ໜ້າທີ່ການຕ່າງປະເທດໃນເວລາຕໍ່ໄປ.
ເພື່ອບັນລຸເປົ້າໝາຍດັ່ງກ່າວ, ການທູດວັດທະນະທຳຈຳເປັນຕ້ອງຍຶດຕິດກັບໜ້າທີ່ຮັບໃຊ້ ແລະ ຮັບປະກັນເປົ້າໝາຍສູງສຸດໃນການປົກປັກຮັກສາ ແລະ ເຊີດຊູຜົນປະໂຫຍດຂອງປະເທດຊາດຄື: ສັນຕິພາບ, ຄວາມໝັ້ນຄົງ, ອິດທິພົນຕໍ່ໂລກ ແລະ ເສີມຂະຫຍາຍຖານະບົດບາດຂອງປະເທດ. ຂະບວນການຜັນຂະຫຍາຍຈຳເປັນຕ້ອງຕິດພັນຢ່າງແໜ້ນແຟ້ນກັບນະໂຍບາຍການຕ່າງປະເທດຂອງພັກແລະປະເທດ, ແຜນພັດທະນາເສດຖະກິດ-ສັງຄົມຂອງສູນກາງ, ບັນດາກະຊວງ, ຂະແໜງການ, ທ້ອງຖິ່ນ. ນອກຈາກນັ້ນ, ຈຳເປັນຕ້ອງກຳນົດການເຄື່ອນໄຫວວັດທະນະທຳ ເພື່ອໃຫ້ເຂົ້າໃຈໃນຄວາມໝາຍກວ້າງໆ, ບໍ່ພຽງແຕ່ລວມຢູ່ໃນການເຄື່ອນໄຫວທາງວັດທະນະທຳ ແລະ ສິລະປະສະເພາະເທົ່ານັ້ນ, ຫາກຍັງລວມເຖິງຂົງເຂດຕ່າງໆເຊັ່ນ ວິທະຍາສາດ, ການສຶກສາ, ການແລກປ່ຽນລະຫວ່າງບຸກຄົນ… ແລະຂົງເຂດອື່ນໆຂອງຊີວິດສັງຄົມ.
ການເຊື່ອມໂຍງວຽກງານການທູດວັດທະນະທຳ ກັບການທູດການເມືອງ, ການທູດດ້ານເສດຖະກິດ ແລະ ວຽກງານຊາວຫວຽດນາມຢູ່ຕ່າງປະເທດ ຕ້ອງໄດ້ຮັບການຊຸກຍູ້ຢ່າງຕໍ່ເນື່ອງ. ບັນດາປັດໄຈເຫຼົ່ານີ້ ມີການພົວພັນແບບອິນຊີ, ກະທົບເຊິ່ງກັນແລະກັນ, ຊ່ວຍເຫຼືອເຊິ່ງກັນແລະກັນ. ຖ້າວ່າການທູດການເມືອງທີ່ມີບົດບາດກຳນົດທິດທາງ, ການທູດເສດຖະກິດສ້າງພື້ນຖານດ້ານວັດຖຸ ເຊິ່ງການທູດວັດທະນະທຳສ້າງພື້ນຖານທາງຈິດໃຈໃຫ້ແກ່ການເຄື່ອນໄຫວການຕ່າງປະເທດ, ເຮັດໃຫ້ມີສີສັນສະເພາະ, ສິລະປະການທູດທີ່ອ່ອນນວນ, ໄຫວພິບ, ຮັກຫອມສັນຕິພາບ, ການພົວພັນສັນຕິ ແລະ ສະໜິດສະໜົມນຳກັນ, ເຕັມໄປດ້ວຍລັກສະນະມະນຸດສະທຳ ໃຫ້ແກ່ພື້ນຖານການທູດການເມືອງ, ຍູ້ແຮງການເຊື່ອມໂຍງສາກົນ, ສ້າງແລະໂຄສະນາພາບພົດຂອງປະເທດຊາດ, ເຄື່ອງໝາຍການຄ້າຂອງທ້ອງຖິ່ນ,… ຊ່ວຍເຫຼືອການທູດດ້ານເສດຖະກິດ.
ການຜັນຂະຫຍາຍວຽກງານການທູດວັດທະນະທຳຢ່າງຮອບດ້ານ ແລະ ມີປະສິດທິຜົນນັ້ນ ຕ້ອງໄດ້ຮັບຮູ້ຢ່າງເລິກເຊິ່ງ ແມ່ນໜ້າທີ່ລວມຂອງລະບົບການເມືອງທັງໝົດ, ຂອງບັນດາອົງການພັກ, ອົງການລັດ, ບັນດາອົງການຈັດຕັ້ງ, ທ້ອງຖິ່ນ, ວິສາຫະກິດ, ປະຊາຊົນ ແລະ ຊາວຫວຽດນາມຢູ່ຕ່າງປະເທດ ພາຍໃຕ້ການນຳພາຂອງພັກກອມມູນິດຫວຽດນາມ ແລະ ການຄຸ້ມຄອງເປັນເອກະພາບຂອງລັດ. ສືບຕໍ່ຍູ້ແຮງການແບ່ງຂັ້ນ, ແບ່ງສິດ, ສ້າງສະພາບແວດລ້ອມທາງກົນໄກ, ນະໂຍບາຍທີ່ສະດວກ ເພື່ອຜັນຂະຫຍາຍວຽກງານການທູດດ້ານວັດທະນະທຳ.
ສືບຕໍ່ສືບທອດ, ຮັບເອົາ ແລະ ໝູນໃຊ້ຢ່າງມີຫົວຄິດປະດິດສ້າງ ເພື່ອປັບປຸງເນື້ອໃນ, ຂໍ້ຄວາມສຳຄັນ ແລະ ເອກະລັກຂອງການທູດວັດທະນະທຳຫວຽດນາມໃຫ້ສົມບູນແບບ; ເພີ່ມຄວາມສອດຄ່ອງກັນລະຫວ່າງການທູດວັດທະນະທຳ ແລະ ການທູດສາທາລະນະ. ຄຽງຄູ່ກັນນັ້ນ, ການຜັນຂະຫຍາຍວຽກງານການທູດວັດທະນະທຳໃນສະພາບການປະຈຸບັນຄວນໃຫ້ຄວາມສຳຄັນກັບການຕິດຕາມທ່າອຽງ ແລະ ການພັດທະນາຂອງການປະຕິວັດອຸດສາຫະກຳຄັ້ງທີສີ່ຢ່າງໃກ້ຊິດ, ໂດຍສະເພາະແມ່ນຄວາມກ້າວໜ້າດ້ານດິຈິຕອນ ແລະ ເຕັກໂນໂລຊີດິຈິຕອນ ເພື່ອປັບຕົວຕອບສະໜອງ ແລະ ເຮັດໃຫ້ການທູດວັດທະນະທຳຫວຽດນາມເຊື່ອມໂຍງເຂົ້າກັບພາກພື້ນ ແລະ ໂລກຢ່າງໄວແລະເລິກເຊິ່ງກວ້າງຂວາງ.
ຄວບຄູ່ໄປກັບວິໄສທັດການພັດທະນາປະເທດເຖິງປີ 2030 ແລະ 2045, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ກຳນົດແຜນນະໂຍບາຍດັງຕໍ່ໄປນີ້: “ສ້າງພື້ນຖານການທູດທີ່ຮອບດ້ານແລະທັນສະໄໝ ດ້ວຍສາມເສົາຫຼັກ: ການທູດຂອງພັກ, ການທູດຂອງລັດ ແລະ ການທູດປະຊາຊົນ”(2). ນີ້ແມ່ນແຜນນະໂຍບາຍສຳຄັນ ເຊິ່ງສະທ້ອນເຖິງຄວາມເຕີບໃຫຍ່ຂະຫຍາຍຕົວຂອງພື້ນຖານການທູດຫວຽດນາມ ແລະ ຍັງເປັນຄວາມຮຽກຮ້ອງຕ້ອງການທີ່ຮີບດ່ວນ ຍຸດທະສາດ ແລະ ຍາວນານສຳລັບວຽກງານການຕ່າງປະເທດເວົ້າລວມ, ໃນນັ້ນມີການທູດວັດທທະນະທຳ. ຍຶດໝັ້ນໃນເປົ້າໝາຍ ແລະ ໜ້າທີ່ທີ່ໄດ້ວາງໄວ້, ພ້ອມກັນນັ້ນກໍມີຄວາມໄຫວພິບ, ມີຫົວຄິດປະດິດສ້າງໃນແນວຄິດ ແລະ ວິທີການດຳເນີນການ, ການທູດວັດທະນະທຳຈະສືບຕໍ່ເສີມຂະຫາຍບົດບາດຂອງຕົນໃນຖານະເສົາຫຼັກດ້ານນະໂຍບາຍການຕ່າງປະເທດທີ່ສຳຄັນ ແລະ ມີການປະກອບສ່ວນອັນໃຫຍ່ຫຼວງໃນການຍົກລະດັບ ແລະ ເຜີຍແຜ່ຄຸນຄ່າຂອງຫວຽດນາມສູ່ປະຊາຄົມສາກົນ./.
----------------
(1) ຂໍ້ຕົກລົງເລກທີ 2013/QĐ-TTg, ລົງວັນທີ 30 ພະຈິກ 2021, ຂອງນາຍົກລັດຖະມົນຕີ, ວ່າດ້ວຍ “ການອະນຸມັດຍຸດທະສາດການທູດວັດທະນະທຳເຖິງປີ 2030”.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ພາກ 1, ໜ້າ 162.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 998 (ເດືອນກັນຍາ 2022)