ການເຂົ້າໃກ້ຄວາມຄິດກ່ຽວກັບ “ຄູ່ຮ່ວມງານ”, “ເປົ້າໝາຍ”
ໃນສະຖານະການໃໝ່
ໃນສະຖານະການໃໝ່
ຫຼັກການຂອງການກຳນົດ “ຄູ່ຮ່ວມງານ”, “ເປົ້າໝາຍ” ລະບຸໄວ້ຢ່າງຈະແຈ້ງວ່າ: “ຜູ້ທີ່ສະໜັບສະໜູນການເຄົາລົບເອກະລາດ ອຳນາດອະທິປະໄຕ, ສ້າງຕັ້ງແລະຂະຫຍາຍການພົວພັນມິດຕະພາບ ແລະ ການຮ່ວມມືທີ່ສະເໝີພາບແລະມີຜົນປະໂຫຍດຮ່ວມກັບຫວຽດນາມ ແມ່ນຄູ່ຮ່ວມງານຂອງເຮົາ. ກອງກຳລັງໃດກໍ່ຕາມທີ່ສົມຮູ້ຮ່ວມຄິດ ແລະ ກະທຳການຕໍ່ຕ້ານຈຸດໝາຍຂອງປະເທດເຮົາ ໃນພາລະກິດສ້າງສາ ແລະ ປົກປັກຮັກສາປະເທດຊາດສັງຄົມນິຍົມ ລ້ວນແຕ່ແມ່ນເປົ້າໝາຍຂອງການຕໍ່ສູ້. ດ້ານອື່ນ, ໃນສະຖານະການປະຈຸບັນທີ່ພັດທະນາຢ່າງໄວວາແລະສັບສົນ, ຈໍາເປັນຕ້ອງມີທັດສະນະສັດຈະວິພາກວ່າ: ໃນແຕ່ລະເປົ້າໝາຍອາດຈະມີດ້ານທີ່ຕ້ອງການຍາດແຍ່ງເອົາແລະຮ່ວມມື; ໃນບາງຄູ່ຮ່ວມງານ, ອາດຈະມີດ້ານທີ່ແຕກຕ່າງກັນ, ຂັດແຍ້ງກັບຜົນປະໂຫຍດຂອງພວກເຮົາ”(1).
ອີງຕາມຫຼັກການດັ່ງກ່າວ, ພັກກອມມູນິດຫວຽດນາມກຳນົດ “ຄູ່ຮ່ວມງານ”, “ເປົ້າໝາຍ” ຈາກສອງທັດສະນາຄື:
ທີໜຶ່ງ, ເບິ່ງ “ຄູ່ຮ່ວມງານ”, “ເປົ້າໝາຍ” ເປັນສິ່ງທີ່ມີຕົວຕົນ “ທັງຊຸດ”. ທັດສະນະນີ້ມີຈຸດເດັ່ນທີ່ການຈໍາແນກໄດ້ງ່າຍ. ອົງການໃດກໍ່ຕາມທີ່ມີນະໂຍບາຍແລະການກະທຳທີ່ສອດຄ່ອງກັບຜົນປະໂຫຍດແຫ່ງຊາດຂອງຫວຽດນາມ, ຫວຽດນາມຈະຖືວ່າພວກເຂົາເປັນ “ຄູ່ຮ່ວມງານ” ໃນການຮ່ວມມື. ອົງການໃດທີ່ທຳລາຍຜົນປະໂຫຍດແຫ່ງຊາດຂອງຫວຽດນາມແມ່ນ “ເປົ້າໝາຍ” ຂອງການຕໍ່ສູ້. ແຕ່ວ່າ, ທັດສະນາການນີ້ພຽງແຕ່ໝາະກັບບັນດາຕົວຕົນທີ່ຍາມໃດກໍເຄົາລົບເອກະລາດ ແລະ ອຳນາດອະທິປະໄຕ, ສ້າງແລະຂະຫຍາຍການພົວພັນກັບຫວຽດນາມ ຫຼືກົງກັນຂ້າມ, ຕົວຕົນທີ່ຍາມໃດກໍ່ຄັດຄ້ານຕ້ານຫວຽດນາມແມ່ນ “ເປົ້າໝາຍ” ທີ່ພວກເຮົາຕ້ອງຕໍ່ສູ້. ດັ່ງນັ້ນ, ເພື່ອກຳນົດ “ຄູ່ຮ່ວມງານ”, “ເປົ້າໝາຍ” ໄດ້ຢ່າງຖືກຕ້ອງນັ້ນ, ຈໍາເປັນເພື່ອຫຼີກລ່ຽງການຄິດແບບອຸປະໄນທີ່ບໍ່ຄົບຖ້ວນ, ໂດຍສະເພາະອີງໃສ່ພຽງແຕ່ນະໂຍບາຍ ແລະ ການດໍາເນີນການບາງຢ່າງ ເພື່ອປະເມີນລັກສະນະຂອງຕົວຕົນນັ້ນ; ຫຼີກລ້ຽງອະຄະຕິທາງປະຫວັດສາດ ຫຼືອຸດົມການ.
ທີ່ສອງ, ການເບິ່ງ “ຄູ່ຮ່ວມມື”, “ເປົ້າໝາຍ” ຜ່ານການປະພຶດຂອງພວກເຂົາໃນບັນດາບັນຫາ ແລະ ສະພາບການສະເພາະເມື່ອກ່ຽວຂ້ອງກັບຫວຽດນາມ. ມະຕິເນັ້ນໜັກວ່າ, “ໃນສະຖານະການປະຈຸບັນທີ່ພັດທະນາຢ່າງໄວວາແລະສັບສົນ, ຈໍາເປັນຕ້ອງມີທັດສະນະສັດຈະວິພາກ: ໃນແຕ່ລະເປົ້າໝາຍອາດຈະມີດ້ານທີ່ຕ້ອງການຍາດແຍ່ງເອົາແລະຮ່ວມມື; ໃນແຕ່ລະຄູ່ຮ່ວມງານ, ອາດຈະມີດ້ານທີ່ຂັດແຍ້ງກັບຜົນປະໂຫຍດຂອງພວກເຮົາທີ່ຕ້ອງຕໍ່ສູ້”. ນີ້ແມ່ນວິທີເບິ່ງທີ່ເໝາະສົມກັບບັນດາຕົວຕົນທີ່ມີນະໂຍບາຍ ແລະ ການກະທຳທີ່ແຕກຕ່າງກັນ, ໂດຍອີງໃສ່ບັນຫາສະເພາະ ແລະ ສະພາບການສະເພາະ ໃນການພົວພັນກັບຫວຽດນາມ. ແຕ່ວ່າ, ການເບິ່ງ “ຄູ່ຮ່ວມງານ”, “ເປົ້າໝາຍ” ຕາມວິທີນີ້ ຖືວ່າເປັນສິ່ງທ້າທາຍອັນໃຫຍ່ຫຼວງສະເໝີ ເພາະຕ້ອງມີຫຼັກໝັ້ນອັນໜັກແໜ້ນແລະໝັ້ນຄົງ ເພື່ອຜົນປະໂຫຍດຂອງຊາດ ປະເທດຊາດ, ບໍ່ແມ່ນເພື່ອຜົນປະໂຫຍດພາກສ່ວນຂອງທ້ອງຖິ່ນ; ມີສະຕິປັນຍາສ່ອງໃສເພື່ອຮັບຮູ້ຢ່າງຈະແຈ້ງ ບັນດາການກະທຳເຄົາລົບ ແລະ ຮ່ວມມືທີ່ມີປະໂຫຍດຕໍ່ປະເທດຫວຽດນາມ ແລະ ບັນດາກົນອຸບາຍ ເຈດຕະນາທີ່ຈະທຳລາຍຫວຽດນາມ ແຕ່ຖືກປົກປິດຢ່າງເລິດແລບແນບນຽນ, ມີວິທີ ແລະ ລະອຽດແຍບຍົນ. ທັດສະນາການນີ້ຍັງຕ້ອງມີຄວາມກ້າຫານທາງການເມືອງທີ່ເຂັ້ມແຂງ ເພາະຄວາມເປັນຈິງສະແດງໃຫ້ເຫັນວ່າ ມີທັດສະນະທີ່ແຕກຕ່າງກັນສະເໝີ ເມື່ອພິຈາລະນາພຶດຕິກໍາສະເພາະຂອງແຕ່ລະຕົວຕົນ ແລະ ມີອະຄະຕິທີ່ກ່ຽວຂ້ອງກັບປະຫວັດສາດ, ຄວາມແຕກຕ່າງໃນລະບອບການເມືອງແລະລະບົບຄຸນຄ່າ.
ໝູນໃຊ້ແນວຄິດຂອງໂຮ່ຈີມິນ ໃນການກຳນົດ “ຄູ່ຮ່ວມງານ”, “ເປົ້າໝາຍ”
ວັນທີ 19 ມັງກອນ 1955, ທີ່ພິທີເປີດຊຸດຮຽນທີ 1, ມະຫາວິທະຍາໄລປະຊາຊົນຫວຽດນາມ, ປະທານ ໂຮ່ຈີມິນ ໄດ້ຕັກເຕືອນພະນັກງານ ແລະ ນັກສຶກສາວ່າ: “ຕ້ອງກຳນົດຂອບເຂດຢ່າງຈະແຈ້ງ, ແບ່ງຂວາຊ້າຍໃຫ້ຊັດເຈນ. ການກໍານົດຂອບເຂດແມ່ນການລະບຸໃຫ້ຊັດເຈນວ່າ ໃຜເປັນເພື່ອນ, ໃຜເປັນສັດຕູ? ສຳລັບຜູ້ອື່ນ, ຜູ້ໃດທີ່ເຮັດສິ່ງທີ່ມີຜົນປະໂຫຍດຕໍ່ປະຊາຊົນ, ປະເທດຊາດເຮົາ ຜູ້ນັ້ນເປັນເພື່ອນຂອງພວກເຮົາ. ຜູ້ໃດທີ່ເຮັດສິ່ງທີ່ເປັນອັນຕະລາຍຕໍ່ປະຊາຊົນ, ປະເທດຊາດເຮົາ ຜູ້ນັ້ນເປັນສັດຕູຂອງພວກເຮົາ. ສຳລັບຕົນເອງ, ແນວຄວາມຄິດແລະການກະທໍາທີ່ເປັນປະໂຫຍດຕໍ່ປະເທດຊາດແລະພີ່ນ້ອງຮ່ວມຊາດເຮົາ ແມ່ນເປັນມິດ. ແນວຄວາມຄິດແລະການກະທໍາທີ່ເປັນອັນຕະລາຍຕໍ່ປະເທດຊາດແລະພີ່ນ້ອງຮ່ວມຊາດເຮົາ ແມ່ນເປັນສັດຕູ. ດັ່ງນັ້ນ ບໍ່ພຽງແຕ່ພາຍນອກ, ແຕ່ພາຍໃນພວກເຮົາເອງ ກໍ່ມີເພື່ອນມິດ ແລະ ສັດຕູ. ເພາະສະນັ້ນ, ພວກເຮົາຈໍາເປັນຕ້ອງພະຍາຍາມເພີ່ມເພື່ອນມິດຢູ່ພາຍໃນແລະພາຍນອກ, ເດັດດ່ຽວຕ້ານສັດຕູທັງພາຍນອກແລະພາຍໃນຕົວຂອງເຮົາເອງ”(2).
ເພື່ອຈຸດປະສົງໃນການສອນພະນັກງານ ແລະ ນັກຮຽນ ກ່ຽວກັບວິທີຄິດ ແລະ ພຶດຕິກຳຕໍ່ຜູ້ຄົນອ້ອມຂ້າງ ແລະ ກັບຕົນເອງ, ປະທານ ໂຮ່ຈີມິນ ກ່າວເຖິງຕົນຕົວທີ່ວິເຄາະຄື “ຜູ້ອື່ນ” ແລະ “ຕົນເອງ”; ແງ່ມຸມເພື່ອຈຳແນກຄວາມແຕກຕ່າງຕາມພຶດຕິກໍາ: (ໃຜ) ເຮັດຫຍັງ ແລະ ຄວາມຄິດແລະການກະທໍາ (ຂອງຕົນເອງ). “ເພື່ອນ”, “ສັດຕູ” ແມ່ນຄຳປຽບທຽບທີ່ເຂົ້າໃຈງ່າຍ, ເໝາະກັບສະພາບການໃນເວລານັ້ນ.
ເມື່ອນຳໃຊ້ເຂົ້າໃນວຽກງານການຕ່າງປະເທດໃນສະພາບການປະຈຸບັນ, ດ້ວຍບັນດາອັດຕະພາບໃນການພົວພັນສາກົນທີ່ເປັນປະເທດຕ່າງໆນັ້ນ, ມະຕິດັ່ງກ່າວໄດ້ກຳນົດ “ຜົນປະໂຫຍດຂອງປະຊາຊົນ, ເພື່ອປະເທດຊາດຂອງເຮົາ” ເປັນ “ການເຄົາລົບເອກະລາດ, ອຳນາດອະທິປະໄຕ, ກໍ່ສ້າງແລະຂະຫຍາຍການພົວພັນມິດຕະພາບ, ການຮ່ວມມືທີ່ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດກັບຫວຽດນາມ”. ເຊັ່ນດຽວກັນ, ບັນດາ “ສິ່ງ (ເລື່ອງ) ທີ່ເປັນອັນຕະລາຍຕໍ່ປະຊາຊົນແລະປະເທດຊາດເຮົາ” ຖືກລວມເຂົ້າດ້ວຍກັນເປັນ “ກົນອຸບາຍແລະການກະທຳຕໍ່ຕ້ານທຳລາຍຈຸດໝາຍຂອງປະເທດພວກເຮົາໃນການສ້າງສາແລະປົກປັກຮັກສາປະເທດຊາດ”. ຫຼັກການສະເໝີຕົ້ນສະເໝີປາຍເມື່ອນຳໃຊ້ແນວຄິດຂອງປະທານໂຮ່ຈິມິນ ໃນການສ້າງແລະຜັນຂະຫຍາຍຫຼັກການກຳນົດ “ຄູ່ຮ່ວມງານ”, “ເປົ້າໝາຍ” ແມ່ນ ຖືຜົນປະໂຫຍດຂອງຊາດຫວຽດນາມເປັນມາດຖານ.
ການກຳນົດ “ຄູ່ຮ່ວມງານ”, “ເປົ້າໝາຍ” ສອດຄ່ອງກັບ
ຄວາມຕ້ອງການໃໝ່ຂອງສະຖານະການ
ມະຕິດັ່ງກ່າວເກີດຂຶ້ນໃນສະພາບການຂອງໂລກ, ພາກພື້ນທີ່ມີຄວາມສັບສົນແລະຄາດເດົາໄດ້ຍາກ. ການໂຈມຕີຂອງຜູ້ກໍ່ການຮ້າຍໃນສະຫະລັດອາເມລິກາເມື່ອວັນທີ 11 ກັນຍາ 2001 ຖືເປັນໜຶ່ງໃນຕົວຢ່າງທົ່ວໄປ. ມື້ຫຼັງຈາກເຫດການກໍ່ການຮ້າຍ, ວັນທີ 12 ກັນຍາ 2001, ສະພາຄວາມໝັ້ນຄົມແຫ່ງສະຫະປະຊາຊາດ ໄດ້ຜ່ານມະຕິສະບັບເລກທີ 1368, ຮຽກຮ້ອງໃຫ້ປະຊາຄົມສາກົນໃຊ້ຄວາມພະຍາຍາມຫຼາຍກວ່າເກົ່າ ໃນການປ້ອງກັນ ແລະ ປາບປາມການກໍ່ການຮ້າຍ, ຊຸກຍູ້ການປະສານສົມທົບລະຫວ່າງປະເທດຕ່າງໆ ໃນການປະກາດໃຊ້ກົດໝາຍ, ສອດຄ່ອງກັບອະນຸສັນຍາ, ມະຕິວ່າດ້ວຍການຕໍ່ຕ້ານການກໍ່ການຮ້າຍ ຂອງສະຫະປະຊາຊາດ ແລະ ສະພາຄວາມໝັ້ນຄົງແຫ່ງສະຫະປະຊາຊາດ. ຈາກນັ້ນ, ການຕ້ານການກໍ່ການຮ້າຍກາຍເປັນຫົວຂໍ້ທີ່ພົ້ນເດັ່ນ ໃນການພົວພັນລະຫວ່າງປະເທດ ເມື່ອສະຫະລັດອາເມລິກາສົ່ງທະຫານເຂົ້າໄປໃນອັບການິສະຖານ ແລະ ເຕົ້າໂຮມກອງກຳລັງປະສົມຂອງ 40 ປະເທດທີ່ມີກຳລັງທະຫານ 130.000 ຄົນ, ໃນນັ້ນມີສະມາຊິກຂອງອົງການສົນທິສັນຍາອັດລັງຕິກເໜືອ (NATO), ໂຄ່ນລົ້ມລັດຖະບານຕາລີບັນ, ປະກາດເປົ້າໝາຍຄວບຄຸມເພື່ອປ້ອງກັນບໍ່ໃຫ້ກອງກຳລັງກໍ່ການຮ້າຍ ອານ ເກດາ ມີຖານປະຕິບັດການທີ່ປອດໄພໃນອາບການິສະຖານ(3). ຕໍ່ຈາກນັ້ນ, ເດືອນມີນາ 2003, ອາເມລິກາບຸກໂຈມຕີ ອີຮັກ. ຫຼັງຈາກຫຼາຍກວ່າ 3 ອາທິດ, ກອງທັບປະສົມຂອງອາເມລິກາ, ອັງກິດ ແລະ ບາງປະເທດ ໄດ້ຍຶດຄອງນະຄອນຫຼວງແບກແດດ (ປະເທດ ອີຮັກ).
ໃນພາກພື້ນອາຊີຕາເວັນອອກສຽງໃຕ້ ກໍ່ມີບາງເຫດການທີ່ໜ້າສົນໃຈ. ເດືອນເມສາ 2001, ຈີນໄດ້ສົ່ງເຮືອບິນຮົບເຂົ້າໃກ້ເຮືອບິນສອດແນມ EP3 ຂອງອາເມລິກາ ເຊິ່ງຖືວ່າໄດ້ບິນເຂົ້າສູ່ຝັ່ງທະເລທາງພາກໃຕ້ຂອງຈີນ ໃນເຂດເກາະໄຫໜານ. ເຮືອບິນ EP3 ຂອງອາເມລິກາຕ້ອງລົງຈອດສຸກເສີນ ຢູ່ເກາະໄຫໜານ. ນັກວິຊາການບາງຄົນກ່າວວ່າ, ເຫດການນີ້ສະແດງໃຫ້ເຫັນວ່າ ຈີນໄດ້ປ່ຽນແປງຄວາມຄິດຕໍ່ອາເມລິກາ, ກ່ຽວກັບອຳນາດອະທິປະໄຕ ແລະ ສິດອະທິປະໄຕຂອງຈີນ ຢູ່ທະເລຕາເວັນອອກ, ມີຄວາມໝັ້ນໃຈກວ່າໃນການຮັບມືກັບການເຄື່ອນໄຫວຂອງອາເມລິກາຢູ່ທະເລຕາເວັນອອກ(4). ເດືອນພະຈິກ 2002, ທີ່ນະຄອນຫຼວງພະນົມເປນ (ກຳປູເຈຍ), ເນື່ອງໃນໂອກາດກອງປະຊຸມສຸດຍອດອາຊຽນຄັ້ງທີ 8, ອາຊຽນ ແລະ ຈີນ ໄດ້ລົງນາມໃນຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) - 10 ປີຜ່ານໄປນັບຕັ້ງແຕ່ຂໍ້ຄິດກ່ຽວກັບປະມວນຫຼັກການການປະພຶດຢູ່ທະເລຕາເວັນອອກ (COC) ໄດ້ຮັບການແນະນຳໃນເອກະສານຂອງອາຊຽນໃນປີ 1992.
ການພົວພັນຂອງຫວຽດນາມກັບບັນດາປະເທດໃຫຍ່, ໂດຍສະເພາະກັບຈີນ ແລະ ອາເສລິກາ ໃນໄລຍະນັ້ນ ກໍ່ມີຈຸດເດັ່ນຫຼາຍຢ່າງ. ສຳລັບຈີນ, ວັນທີ 30 ທັນວາ 1999, ຢູ່ນະຄອນຫຼວງຮ່າໂນ້ຍ, ໄດ້ມີການລົງນາມໃນ “ສົນທິສັນຍາວ່າດ້ວຍຊາຍແດນທາງບົກລະຫວ່າງສາທາລະນະລັດສັງຄົມນິຍົມຫວຽດນາມ ແລະ ສາທາລະນະລັດປະຊາຊົນຈີນ”. ນີ້ແມ່ນຄັ້ງທຳອິດໃນປະຫວັດສາດທີ່ 2 ປະເທດມີການກຳນົດເສັ້ນຊາຍແດນທາງບົກທີ່ຊັດເຈນ. ວັນທີ 25 ທັນວາ 2000, ສອງຝ່າຍໄດ້ລົງນາມໃນສັນຍາວ່າດ້ວຍການກຳນົດເຂດແດນໃນອ່າວຕົງກິນ, ກຳນົດເຂດແດນຂອງທະເລອານາເຂດ, ໄຫຼ່ທະວີບ ແລະ ເຂດເສດຖະກິດຈຳເພາະ ໃນອ່າວຕົງກິນ; ພ້ອມກັນນັ້ນ, ໄດ້ລົງນາມໃນສັນຍາວ່າດ້ວຍການຮ່ວມມືດ້ານການປະມົງຢູ່ອ່າວຕົງກິນ. ສຳລັບອາເມລິກາ, ສອງຝ່າຍໄດ້ລົງນາມໃນສັນຍາການຄ້າທະວິພາຄີໃນວັນທີ 13 ກໍລະກົດ 2000 (ມີຜົນສັກສິດແຕ່ວັນທີ 10 ທັນວາ 2001), ເປີດກວ້າງຄວາມສາມາດບົ່ມຊ້ອນດ້ານການສົ່ງອອກທີ່ດີທີ່ສຸດ ສຳລັບສິນຄ້າຂອງຫວຽດນາມ, ລວມທັງສ້າງພື້ນຖານໃຫ້ຫວຽດນາມໃນການເລັ່ງລັດຂະບວນການເຈລະຈາເພື່ອເຂົ້າຮ່ວມອົງການການຄ້າໂລກ. ຄຽງຂ້າງບັນດາການເຄື່ອນໄຫວດ້ານມະນຸດສະທຳເຊັ່ນ ການຊອກຫາຊາວອາເມລິກາທີ່ຫາຍສາບສູນໃນສົງຄາມ (MIA), 2 ຝ່າຍຍັງໄດ້ພະຍາຍາມຊຸກຍູ້ການຮ່ວມມືໃນຂົງເຂດການສຶກສາ, ວິທະຍາສາດແລະເຕັກໂນໂລຊີ ແລະ ການພົບປະແລກປ່ຽນລະຫວ່າງປະຊາຊົນ...
ຢູ່ໃນປະເທດ, ເດືອນກຸມພາ 2001, ຊາວຊົນເຜົ່າສ່ວນນ້ອຍຈຳນວນໜຶ່ງໃນເຂດພູພຽງ ໄຕງວຽນ ທີ່ຖືກຍຸຍົງແລະຂົນຂວາຍ ໂດຍພວກປະຕິການທີ່ຖືກເນລະເທດ ແລະ ກອງກຳລັງສັດຕູແລະປະຕິການ, ໄດ້ເຂົ້າຮ່ວມການຊຸມນຸມກໍ່ຄວາມວຸ້ນວາຍ ແລະ ເດີນຂະບວນປະທ້ວງ, ເຊິ່ງກໍ່ໃຫ້ເກີດຜົນສະທ້ອນທາງການເມືອງ, ສັງຄົມ ແລະ ເສດຖະກິດໃນພື້ນທີ່ດັ່ງກ່າວຢ່າງຮ້າຍແຮງ. ມີສາເຫດຫຼາຍປະການທັງພາຍໃນແລະພາຍນອກທີ່ນໍາໄປສູ່ເຫດການນີ້. ສາເຫດພາຍໃນເລີ່ມຕົ້ນມາຈາກຄວາມຫຍຸ້ງຍາກຂອງປະຊາຊົນບັນດາເຜົ່າໃນຊຸມປີທ້າຍສະຕະວັດທີ 20, ແຕ່ບໍ່ທັນໄດ້ຮັບການເອົາໃຈໃສ່, ແບ່ງປັນ ແລະ ແກ້ໄຂຢ່າງທັນການ ຈາກອຳນາດການປົກຄອງທ້ອງຖິ່ນ. ສາເຫດພາຍນອກແມ່ນຍ້ອນອົງການປະຕິການຟູນໂຮທີ່ຖືກເນລະເທດ ແລະ ກອງກຳລັງສັດຕູແລະປະຕິການ ໄດ້ສວຍໂອກາດນີ້ປອມຕົວເປັນ “ອາສາສະໝັກເພື່ອປະຊາຊົນ” ເພື່ອປະຕິບັດກົນອຸບາຍແລະການເຄື່ອນໄຫວສວຍໂອກາດທາງການເມືອງ(5). ໃນເວລານັ້ນ, ອົງການຟູນໂຮ ມີສຳນັກງານໃຫຍ່ຢູ່ເມືອງ ສະປາແຕນເບີກ ໃນລັດ ໂຄໂລຮາໂດ (ສະຫະລັດອາເມລິກາ)(6).
ການກໍານົດ “ຄູ່ຮ່ວມງານ”, “ເປົ້າໝາຍ” ໃນວຽກງານການຕ່າງປະເທດ
ການປະຕິບັດວຽກງານການຕ່າງປະເທດໃນເວລາເກືອບ 2 ທົດສະວັດໄດ້ສະແດງໃຫ້ເຫັນວ່າ: ຫຼັກການກຳນົດ “ຄູ່ຮ່ວມງານ”, “ເປົ້າໝາຍ” ໃນມະຕິແມ່ນພື້ນຖານສຳຄັນທີ່ສຸດ ເພື່ອໃຫ້ຫວຽດນາມຈັດການການພົວພັນກັບຕ່າງປະເທດຢ່າງກົມກຽວ ແລະ ໜ້າພໍໃຈ, ໂດຍສະເພາະແມ່ນການພົວພັນກັບປະເທດໃຫຍ່.
ໃນການພົວພັນກັບປະເທດຈີນ, ຫວຽດນາມໄດ້ກຳນົດຢ່າງຈະແຈ້ງບັນດາຂົງເຂດທີ່ອາດຈະຮ່ວມມື ແລະ ບັນດາຂົງເຂດທີ່ຕ້ອງຕໍ່ສູ້, ແລະ ໄດ້ຕັ້ງໝັ້ນໃນການຈັດການສອງດ້ານນີ້ຢ່າງສຳເລັດຜົນ. ບົນພື້ນຖານຄຳຂວັນທີ່ວ່າ “ເພື່ອນບ້ານມິດຕະພາບ, ການຮ່ວມມືຮອບດ້ານ, ສະຖຽນລະພາບໄລຍະຍາວ, ມຸ່ງໄປສູ່ອະນາຄົດ” ເຊິ່ງກຳນົດໄວ້ໃນປີ 1999, ທັງສອງຝ່າຍໄດ້ເພີ່ມຈິດໃຈ “ເພື່ອນບ້ານທີ່ດີ, ເພື່ອນມິດທີ່ດີ, ຄູ່ຮ່ວມງານທີ່ດີ” ໃນປີ 2005. ປິ 2008, ທັງສອງຝ່າຍຕົກລົງທີ່ຈະສ້າງຂອບການຮ່ວມມືຍຸດທະສາດຮອບດ້ານ. ກ່ຽວກັບບັນຫາຊາຍແດນ ແລະ ດິນແດນ, ສອງຝ່າຍໄດ້ສຳເລັດການແບ່ງເຂດ ແລະ ປັກຫຼັກໝາຍຊາຍແດນທັງໝົດໃນປີ 2008 ແລະ ລົງນາມໃນເອກະສານ 3 ສະບັບກ່ຽວກັບການຄຸ້ມຄອງຊາຍແດນທາງບົກໃນປີ 2009. ໃນດ້ານການຄ້າ, ນັບແຕ່ປີ 2004, ຈີນໄດ້ກາຍເປັນຄູ່ຮ່ວມມືການຄ້າໃຫຍ່ທີ່ສຸດຂອງຫວຽດນາມ. ຕາມຕົວເລກສະຖິຕິຂອງກົມສຸລະກາກອນຫວຽດນາມ, ປີ 2021, ການແຜ່ລະບາດຂອງພະຍາດໂຄວິດ-19 ມີຄວາມສັບສົນ, ມູນຄ່າການຄ້າສອງສົ້ນລະຫວ່າງຫວຽດນາມ - ຈີນຍັງບັນລຸ 165,8 ຕື້ໂດລາສະຫະລັດ, ເພີ່ມຂຶ້ນ 24,6% ເມື່ອທຽບກັບປີ 2020. ໃນຂະນະນັ້ນ, ຕາມສະຖິຕິຂອງກົມສຸລະກາກອນຈີນ, ມູນຄ່າການຄ້າສອງສົ້ນລະຫວ່າງຫວຽດນາມແລະຈີນ ເປັນຄັ້ງທຳອິດທີ່ສູງກວ່າ 200 ຕື້ໂດລາສະຫະລັດ, ບັນລຸ 230,2 ຕື້ໂດລາສະຫະລັດ, ເພີ່ມຂຶ້ນ 19,7% ເມື່ອທຽບກັບປີ 2020 ຖ້າຄິດໄລ່ເປັນເງິນໂດລາສະຫະລັດ ແລະ 12% ເມື່ອຄິດໄລ່ເປັນເງິນຢວນ (ສະກຸນເງິນຈີນ). ຈີນສືບຕໍ່ເປັນຕະຫຼາດນຳເຂົ້າໃຫຍ່ທີ່ສຸດຂອງຫວຽດນາມ ແລະ ເປັນຕະຫຼາດສົ່ງອອກໃຫຍ່ອັນດັບສອງຂອງຫວຽດນາມ. ຫວຽດນາມ ສືບຕໍ່ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງຈີນໃນອາຊຽນ ແລະ ຄູ່ຮ່ວມມືການຄ້າໃຫຍ່ອັນດັບ 6 ຂອງຈີນໃນໂລກ ຖັດຈາກ ອາເມລິກາ, ຍີ່ປຸ່ນ, ສ.ເກົາຫຼີ, ເຢຍລະມັນ ແລະ ອົດສະຕຮາລີ(7). ກ່ຽວກັບບັນດາບັນຫາໃນທະເລ, ສອງຝ່າຍໄດ້ລົງນາມໃນ “ຂໍ້ຕົກລົງກ່ຽວກັບບັນດາຫຼັກການພື້ນຖານທີ່ຊີ້ນຳການແກ້ໄຂບັນຫາທາງທະເລ ລະຫວ່າງຫວຽດນາມ ແລະ ຈີນ” ໃນປີ 2011, ຮັກສາການເຄື່ອນໄຫວເປັນປະຈຳຂອງບັນດາກົນໄກເຈລະຈາຂັ້ນລັດຖະບານ ກ່ຽວກັບຊາຍແດນແລະດິນແດນ, ບັນດາການປະຊຸມລະຫວ່າງຮອງລັດຖະມົນຕີການຕ່າງປະເທດ 2 ປະເທດ ແລະ 3 ກົນໄກເຈລະຈາຄື: ຄະນະປະຕິບັດງານຫວຽດນາມ - ຈີນ ກ່ຽວກັບເຂດນ່ານນ້ຳອ່າວຕົງກິນ, ຄະນະເຮັດວຽກການຮ່ວມມືໃນຂົງເຂດທີ່ອ່ອນໄຫວໜ້ອຍໃນທະເລ, ຄະນະເຮັດວຽກປຶກສາຫາລືກ່ຽວກັບການຮ່ວມມືເພື່ອການພັດທະນາຮ່ວມກັນໃນທະເລ... ສຳລັບບັນຫາທີ່ມີຢູ່ຕາມປະຫວັດສາດເຊິ່ງກ່ຽວຂ້ອງກັບອະທິປະໄຕ, ສິດອະທິປະໄຕ ແລະ ອຳນາດຕັດສິນຂອງຫວຽດນາມໃນທະເລຕາເວັນອອກ... ກໍ່ໄດ້ຮັບການແກ້ໄຂຢ່າງໜ້າພໍໃຈ ດ້ວຍຄວາມເຂົ້າໃຈຊາບຊຶມຢ່າງເຂັ້ມງວດໃນຫຼັກການ “ຄູ່ຮ່ວມງານ”, “ເປົ້າໝາຍ”. ຫວຽດນາມຢຶດໝັ້ນແລະເດັດດ່ຽວໃນການປົກປ້ອງອະທິປະໄຕ, ສິດອະທິປະໄຕ ແລະ ອຳນາດຕັດສິນຂອງປະເທດຊາດ, ແກ້ໄຂຂໍ້ພິພາດຕ່າງໆ ຜ່ານການເຈລະຈາສັນຕິພາບ, ບົນພື້ນຖານກົດໝາຍລະຫວ່າງປະເທດ. ໃນເວລານັ້ນ, ການພົວພັນຮ່ວມມືກັບຈີນຍັງຄົງໄດ້ຮັບການຮັກສາແລະຊຸກຍູ້. ຕາມລາຍງານຂອງກົມໃຫຍ່ສະຖິຕິຫວຽດນາມ, ປີ 2014, ຈີນແມ່ນຕະຫຼາດນຳເຂົ້າໃຫຍ່ອັນດັບໜຶ່ງຂອງຫວຽດນາມ ໂດຍມີມູນຄ່າປະມານ 43,7 ຕື້ໂດລາສະຫະລັດ, ເພີ່ມຂຶ້ນ 18,2% ເມື່ອທຽບກັບປີ 2013. ການຂາດດຸນການຄ້າຈາກຈີນໃນປີ 2014 ຄາດວ່າ 28,9 ຕື້ໂດລາສະຫະລັດ, ເພີ່ມຂຶ້ນ 21,8% ເມື່ອທຽບກັບປີ 2013(8). ໃນການພົວພັນກັບສະຫະລັດອາເມລິກາ, ຫວຽດນາມປະສົບຄວາມສຳເລັດໃນການຮ່ວມມືໃນດ້ານຕ່າງໆ. ເດືອນມີນາ 2006, ຫວຽດນາມໄດ້ສິ້ນສຸດການເຈລະຈາສອງຝ່າຍກັບອາເມລິກາ ກ່ຽວກັບເລື່ອງຫວຽດນາມເຂົ້າເປັນສະມາຊິກອົງການການຄ້າໂລກ. ເດືອນທັນວາ 2006, ລັດຖະສະພາອາເມລິກາໄດ້ຜ່ານ ກົດລະບຽບການພົວພັນທາງການຄ້າປົກກະຕິຖາວອນ (PNTR) ກັບຫວຽດນາມ. ນີ້ແມ່ນບາດກ້າວທີ່ຕັດສິນຊີ້ຂາດ ໃນຂະບວນການເຂົ້າເປັນສະມາຊິກອົງການການຄ້າໂລກ ຂອງປະເທດຫວຽດນາມ. ວັນທີ 25 ກໍລະກົດ 2013, ສອງຝ່າຍຕົກລົງສ້າງຕັ້ງການພົວພັນ “ຄູ່ຮ່ວມມືຮອບດ້ານ”. ທາງດ້ານການຄ້າ, ພາຍຫຼັງທີ່ສັນຍາການຄ້າຫວຽດນາມ - ສະຫະລັດອາເມລິກາ ມີຜົນບັງຄັບໃຊ້, ມູນຄ່າການຄ້າລະຫວ່າງສອງຝ່າຍເພີ່ມຂຶ້ນຢ່າງໄວວາ ຈາກ 450 ລ້ານໂດລາສະຫະລັດ (ປີ 1995) ຂຶ້ນເປັນຫຼາຍກວ່າ 111 ຕຶ້ໂດລາສະຫະລັດ (ປີ 2021). ສະຫະລັດອາເມລິກາກາຍເປັນຕະຫຼາດສົ່ງອອກທີ່ໃຫຍ່ທີ່ສຸດຂອງຫວຽດນາມຢ່າງວ່ອງໄວ ແລະ ຍັງເປັນຕະຫຼາດສົ່ງອອກເກີນດຸນໃຫຍ່ທີ່ສຸດຂອງຫວຽດນາມ. ກ່ຽວກັບການລົງທຶນໂດຍກົງຈາກຕ່າງປະເທດ (FDI), ເຖິງວ່າ ອາເມລິກາຈະບໍ່ໄດ້ຢູ່ໃນອັນດັບໜຶ່ງໃນກຸ່ມປະເທດທີ່ລົງທຶນໃນຫວຽດນາມ, ແຕ່ຫວຽດນາມໄດ້ໃຊ້ປະໂຫຍດຈາກການລົງທຶນຂອງອາເມລິກາ ເຂົ້າໃນບັນດາຂະແໜງການພິເສດແລະຂົງເຂດທີ່ຈຳເປັນ ເພື່ອດຳເນີນການຫັນປະເທດເປັນອຸດສາຫະກຳແລະທັນສະໄໝ ແລະ ປ່ຽນແປງໃໝ່ຮູບແບບການເຕີບໂຕຂອງປະເທດ. ນັ້ນແມ່ນບັນດາຂະແໜງການ, ຂົງເຂດເຕັກໂນໂລຊີສູງ, ມີຄຸນຄ່າເພີ່ມສູງ ແລະ ໄດ້ຮັບການລົງທຶນຈາກບໍລິສັດລະດັບໂລກທີ່ມີວິໄສທັດໄລຍະຍາວ ຂອງສະຫະລັດອາເມລິກາ ເຊັ່ນ: Apple, Qualcomm, Nike, Morgan Stanley, ACORN International, General Dynamics, Google... ທາງດ້ານການປ້ອງກັນປະເທດ, ເດືອນກັນຍາ 2011, ສອງຝ່າຍໄດ້ລົງນາມໃນບົດບັນທຶກຄວາມເຂົ້າໃຈ (MoU) ວ່າດ້ວຍການຮ່ວມມືດ້ານປ້ອງກັນປະເທດ. ຕາມນັ້ນ, ອາເມລິກາພ້ອມແລ້ວທີ່ຈະສະໜັບສະໜູນ, ແບ່ງປັນບົດຮຽນ ແລະ ຂໍ້ມູນ, ຝຶກອົົບຮົມພະນັກງານທີ່ປະຕິບັດກົດໝາຍທາງທະເລຂອງຫວຽດນາມ, ພ້ອມທັງໜູນຊ່ວຍຫວຽດນາມ ດ້ວຍຍຸດໂທປະກອນບາງຢ່າງໃຫ້ກອງກຳລັງປະຕິບັດກົດໝາຍໃນທະເລ (ກຳປັ່ນ, ເຮືອລາດຕະເວນຢູ່ທະເລ), ການຮ່ວມມືດ້ານການແພດທະຫານ... ເດືອນມິຖຸນາ 2015, ສອງຝ່າຍໄດ້ລົງນາມໃນຖະແຫຼງການວິໄສທັດຮ່ວມ ກ່ຽວກັບການພົວພັນດ້ານການປ້ອງກັນປະເທດ ລະຫວ່າງຫວຽດນາມ - ສະປະລັດອາເມລິກາ. ບົນພື້ນຖານນັ້ນ, ການພົວພັນທາງດ້ານການປ້ອງກັນປະເທດ ລະຫວ່າງສອງປະເທດ ໄດ້ພັດທະນາຢ່າງໄວວາ ແລະ ນັບມື້ນັບມີເນື້ອແທ້, ບັນດາການເຄື່ອນໄຫວຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມ ກໍ່ໄດ້ຮັບການຊຸກຍູ້.
ດ້ານ “ເປົ້າໝາຍ” ໃນການພົວພັນກັບອາເມລິກາສ່ວນໃຫຍ່ແມ່ນກ່ຽວຂ້ອງເຖິງບັນດາບັນຫາປະຊາທິປະໄຕ, ສິດທິມະນຸດ, ສິດເສລີທາງດ້ານສາສະໜາ ແລະ ການເຄື່ອນໄຫວຂອງອິດທິກຳລັງສັດຕູ ແລະ ພວກປະຕິການ ທີ່ຕໍ່ຕ້ານທຳລາຍຫວຽດນາມ ຢູ່ອາເມລິກາ. ທຸກປີ, ກະຊວງການຕ່າງປະເທດອາເມລິກາ ໄດ້ເຮັດບົດລາຍງານປະເມີນສະຖານະການປະຊາທິປະໄຕ, ສິດທິມະນຸດ ແລະ ສິດເສລີທາງສາສະໜາ ຢູ່ຫວຽດນາມຢ່າງບໍ່ຖືກຕ້ອງຕາມພາວະວິໄສ. ບັນດາອິດທິກຳລັງສັດຕູ, ປະຕິການໄດ້ຕໍ່ຕ້ານຫວຽດນາມຢ່າງດຸເດືອດເຊັ່ນ: ການຈັດຕັ້ງຫວຽດເຕິນ, ການຈັດຕັ້ງທີ່ເອີ້ນວ່າ “ລັດເດກາອິດສະຫຼະ”... ລ້ວນມີສຳນັກງານໃຫຍ່ໃນສະຫະລັດອາເມລິກາ. ໃນສະຫະລັດອາເມລິກາ, ຍາມໃດກໍ່ມີບັນດາກຸ່ມຊຸກຍູ້ການເຊື່ອມໂຍງການພົວພັນດ້ານເສດຖະກິດ-ການຄ້າ ກັບເງື່ອນໄຂປະຊາທິປະໄຕ, ສິດທິມະນຸດ ແລະ ສາສະໜາ. ຕົວຢ່າງທົ່ວໄປໜຶ່ງແມ່ນ ເລື່ອງທີ່ວັນທີ 15 ກັນຍາ 2004, ອາເມລິກາໄດ້ຈັດໃຫ້ຫວຽດນາມຢູ່ໃນ ລາຍຊື່ປະເທດທີ່ຕ້ອງກັງວົນເປັນພິເສດ ກ່ຽວກັບເສລີພາບທາງສາສະໜາ (CPC). ແຕ່, ດ້ວຍການກຳນົດດ້ານ “ຄູ່ຮ່ວມງານ”, “ເປົ້າໝາຍ” ຢ່າງຈະແຈ້ງໃນແຕ່ລະການກະທຳ, ແຕ່ລະບຸກຄົນສຳຄັນ ໃນສະຫະລັດອາເມລິກາ, ຫວຽດນາມໄດ້ຕໍ່ສູ້ກັບກຸ່ມຫົວຮຸນແຮງຢ່າງເດັດດ່ຽວ, ອົດທົນພະຍາຍາມສົນທະນາກັບຜູ້ທີ່ມີຄວາມເຂົ້າໃຈ ແລະ ສະໜັບສະໜູນການພົວພັນລະຫວ່າງສອງປະເທດ; ເຮັດໃຫ້ສະຖານະການໃນເຂດພູພຽງ ໄຕງວຽນ ມີສະຖຽນລະພາບ; ພ້ອມກັນນັ້ນ, ເຊີນນັກຂ່າວແລະຜູ້ຊ່ວຍສະມາຊິກລັດຖະສະພາສະຫະລັດຈໍານວນໜຶ່ງ ເຂົ້າມາພາກສະໜາມ ເພື່ອເຂົ້າໃຈລັກສະນະແລະຄວາມຈິງຂອງບັນຫາ. ຮອດວັນທີ 14 ພະຈິກ 2006, ສະຫະລັດອາເມລິກາໄດ້ຖອນຫວຽດນາມອອກຈາກບັນຊີລາຍຊື່ CPC. ຫຼາຍຄົນໃຫ້ຄວາມເຫັນວ່າ, ຖ້າບໍ່ມີເຫດການນີ້, ຈະເປັນການຍາກທີ່ລັດຖະສະພາອາເມລິກາຈະອະນຸມັດລະບຽບການ PNTR ກັບຫວຽດນາມ ໃນໜຶ່ງເດືອນຕໍ່ມາ.
ຄວາມເປັນຈິງແຫ່ງການພົວພັນຂອງຫວຽດນາມກັບບັນດາປະເທດ (ທັງໃນແລະນອກພາກພື້ນ) ໃນເກືອບ 20 ປີສະແດງໃຫ້ເຫັນວ່າ: ທີໜຶ່ງ, ຫວຽດນາມກຳນົດ “ຄູ່ຮ່ວມງານ”, “ເປົ້າໝາຍ” ເມື່ອຈັດການສາຍພົວພັນກັບບັນດາປະເທດຕົ້ນຕໍແມ່ນວິທີທີ 2 ເຊິ່ງແມ່ນການເບິ່ງພຶດຕິກຳຂອງພວກເຂົາໃນບັນຫາສະເພາະ ແລະ ສະຖານະການສະເພາະ ເມື່ອຕິດຕໍ່ກັບຫວຽດນາມ; ເມື່ອມີຜົນປະໂຫຍດສອງຝ່າຍ ຈະສວຍໃຊ້ການຮ່ວມມື; ເມື່ອຜົນປະໂຫຍດບໍ່ເຂົ້າກັນຫຼືຂັດແຍ້ງກັນ, ຫວຽດນາມຈະມີຮູບການຕໍ່ສູ້ທີ່ເໝາະສົມ. ທີສອງ, ມີປະເທດໜ້ອຍທີ່ສຸດ ທີ່ຍາມໃດກໍ່ເຄົາລົບຈຸດໝາຍຂອງຫວຽດນາມ, ເຊິ່ງຜົນປະໂຫຍດສອດຄ່ອງກັບຜົນປະໂຫຍດຂອງຫວຽດນາມ ແລະ ກໍ່ມີປະເທດໜ້ອຍທີ່ສຸດ ທີ່ຕໍ່ຕ້ານຫວຽດນາມໂດຍຕະຫຼອດ. ເລື່ອງນີ້ແມ່ນຄວາມຈິງສໍາລັບທັງປະເທດທີ່ຢູ່ຫ່າງໄກຈາກຫວຽດນາມ ເຊິ່ງເກືອບວ່າບໍ່ມີການພົວພັນດ້ານເສດຖະກິດການຄ້າກັບຫວຽດນາມ, ແຕ່ກໍ່ຍັງໄດ້ຮັບຜົນກະທົບຈາກບັນດາປະເທດໃຫຍ່ ໃນບັນຫາທີ່ກ່ຽວຂ້ອງກັບຫວຽດນາມ ກ່ຽວກັບບັນຫາປະຊາທິປະໄຕ, ສິດທິມະນຸດ, ສາສະໜາ... ທີ່ເວທີປາໄສຫຼາຍຝ່າຍໃນພາກພື້ນ ແລະ ສາກົນ. ທີສາມ, ວິທີການເຂົ້າເຖິງຕາມຕົວຕົນຈິງ ໃນຫຼາຍກໍລະນີໄດ້ສ້າງຄວາມຫຍຸ້ງຍາກບໍ່ນ້ອຍໃຫ້ກັບຫວຽດນາມ ໃນການສ້າງຄວາມເຫັນດີເຫັນພ້ອມພາຍໃນ ເມື່ອຍັງມີທັດສະນະທີ່ແຕກຕ່າງກັນ ເມື່ອປຶກສາຫາລືບັນດາບັນຫາສັບສົນໃນການພົວພັນກັບບັນດາປະເທດໃຫຍ່, ໂດຍສະເພາະແມ່ນຈີນ ແລະ ອາເມລິກາ.
ການກຳນົດ “ຄູ່ຮ່ວມງານ”, “ເປົ້າໝາຍ” ໃນສະຖານະການໃໝ່
ໂລກກຳລັງຫັນໄປສູ່ສະພາບການໃໝ່ - ສະຖານະການຫຼັງການແຜ່ລະບາດຂອງໂຄວິດ-19, ການປະທະກັນລະຫວ່າງລັດເຊຍ - ຢູເຄຮນ ເກີດຂຶ້ນຢ່າງສັບສົນ... ເຖິງວ່າຍັງບໍ່ທັນກຳນົດຢ່າງຈະແຈ້ງກໍ່ຕາມ, ແຕ່ພັດທະນາການມາຮອດປະຈຸບັນສະແດງໃຫ້ເຫັນວ່າ, ໃນອີກ 5-10 ປີຂ້າງໜ້າ, ລັກສະນະເດັ່ນດ້ານການພົວພັນສາກົນຄາດວ່າຈະເຄື່ອນຕົວໄປໃນທິດທາງທີ່ບັນດາປະເທດໃຫຍ່ຍັງຮ່ວມມື, ແຕ່ຍັງສືບຕໍ່ແຂ່ງຂັນກັນ ປະເຊີນໜ້າກັນຢ່າງດຸເດືອດ, ຮຸນແຂງກວ່າໃນ 5-10 ປີຜ່ານມາ, ໂດຍສະເພາະ ບັນດາບັນຫາທີ່ກ່ຽວຂ້ອງເຖິງພູມສາດ-ການເມືອງ, ພູມສາດ-ເສດຖະກິດ, ການປ້ອງກັນປະເທດ-ຄວາມໝັ້ນຄົງ, ວິທະຍາສາດ-ເຕັກໂນໂລຊີ... ເຮັດໃຫ້ມີການປ່ຽນແປງຢ່າງວ່ອງໄວ ໃນການຊັ່ງຊາກຳລັງ ລະຫວ່າງບັນດາປະເທດ ທາງດ້ານກຳລັງເສດຖະກິດ, ການປ້ອງກັນປະເທດ ແລະ ອິດທິພົນລະຫວ່າງປະເທດຕ່າງໆ, ສົ່ງເສີມການເຕົ້າໂຮມກຳລັງ ແລະ ການເຊື່ອມໂຍງລະຫວ່າງປະເທດໃນຮູບແບບໃໝ່.
ວັນທີ 12 ຕຸລາ 2022, ສະພາຄວາມໝັ້ນຄົງແຫ່ງສະຫະປະຊາຊາດ ໄດ້ຮັບຮອງຜ່ານ ມະຕິທີ່ເນັ້ນໜັກຫຼັກການເຄົາລົບຄວາມເປັນເອກະພາບດ້ານດິນແດນ, ປ້ອງກັນກົດບັດສະຫະປະຊາຊາດ, ຄັດຄ້ານລັດເຊຍຍຶດເອົາ 4 ແຂວງພາກຕາເວັນອອກ ແລະ ພາກໃຕ້ຂອງຢູເຄຮນ ດ້ວຍຄະແນນສຽງເຫັນດີ 143 ສຽງ. ແຕ່ວັນທີ 22 ກຸມພາ 2022 ຮອດວັນທີ 20 ຕຸລາ 2022, ສະຫະລັດອາເມລິກາ ແລະ ປະເທດຕາເວັນຕົກ ໄດ້ກຳນົດບົດລົງໂທດ 9.873 ລາຍການ ຕໍ່ອົງການແລະບຸກຄົນຂອງລັດເຊຍ, ໃນນັ້ນມີປະທານາທິບໍດີລັດເຊຍ ວະລາດີເມຍ ປູຕີນ(9). ໃນການພົວພັນກັບຈີນ, ອຳນາດການປົກຄອງຂອງປະທານາທິບໍດີອາເມລິການ ໂຈ ໄບເດນ ດຳເນີນນະໂຍບາຍ “ແກ່ງແຍ້ງເມື່ອຈຳເປັນ, ຮ່ວມມືເມື່ອເປັນໄປໄດ້, ປະເຊີນໜ້າເມື່ອຖືກບັງຄັບ”(10). ການຖືວ່າຈີນເປັນຄູ່ແຂ່ງນັ້ນ ແມ່ນຄວາມຮັບຮູ້ຮ່ວມກັນຂອງທັງພັກຣີພັບບລີກັນ ແລະ ພັກເດໂມແຄຣດ. ເດືອນມິຖຸນາ 2022, ໃນ “ເອກະສານຍຸດທະສາດສະບັບໃໝ່” ທີ່ໄດ້ຮັບການຮັບຮອງເອົາໃນກອງປະຊຸມສຸດຍອດຂອງອົງການນາໂຕ້ ເຊິ່ງຈັດຂຶ້ນໃນເມືອງ ມາດຮິດ (ສະເປນ), ເປັນຄັ້ງທຳອິດທີ່ ນາໂຕ້ ຖືວ່ານະໂຍບາຍ “ບັງຄັບ” ຂອງຈີນເປັນການທ້າທາຍຕໍ່ "ຜົນປະໂຫຍດ, ຄວາມໝັ້ນຄົງ ແລະ ຄຸນຄ່າ” ຂອງນາໂຕ້(11). ສຳລັບຈີນ, ໃນບົດລາຍງານການເມືອງທີ່ນຳສະເໜີໃນກອງປະຊຸມໃຫຍ່ຄັ້ງທີ 20 ຂອງພັກກອມມູນິດຈີນ (ແຕ່ວັນທີ16 ເຖິງ 22 ຕຸລາ 2022), ທ່ານ ສີ ຈິ້ນຜິງ ປະທານປະເທດຈີນຢືນຢັນ “ຫຼັກໝັ້ນທີ່ຊັດເຈນ” ຂອງຕົນແມ່ນ ຕໍ່ຕ້ານລັດທິເຈົ້າຄອງໂລກຢ່າງເດັດດ່ຽວ ແລະ ກ້າແກ່ນໃນການປະເຊີນໜ້າກັບ “ການຂົ່ມເຫັງ”; ຈີນ “ພ້ອມແລ້ວທີ່ຈະປະເຊີນໜ້າກັບຟອງໃຫຍ່, ລົມແຮງ ແລະ ນັບທັງພະຍຸອັນຕະລາຍ”; ຈະຊະນະ “ສົງຄາມພາກພື້ນ”(12).
ເສດຖະກິດໂລກຍັງຖືກຄາດຄະເນວ່າ ຈະປະເຊີນກັບຄວາມຫຍຸ້ງຍາກຫຼາຍກວ່າໄລຍະຜ່ານມາ. ກອງທຶນເງິນຕາສາກົນ (IMF) ຄາດຄະເນວ່າ ເສດຖະກິດໂລກຈະເຕີບໂຕ 3,2% ໃນປີ 2022 ແລະ 2,7% ໃນປີ 2023 ເຊິ່ງເປັນອັດຕາທີ່ຕ່ຳທີ່ສຸດ ນັບແຕ່ປີ 2001 (ຍົກເວັ້ນໄລຍະວິກິດການການເງິນໂລກປີ 2008-2009 ແລະ ການແຜ່ລະບາດຂອງພະຍາດໂຄວິດ-19); ອັດຕາເງິນເຟີ້ເພີ່ມຂຶ້ນຢ່າງວ່ອງໄວ ແລະ ຈະແກ່ຍາວຮອດທ້າຍປີ 2024, ເສດຖະກິດຫຼາຍແຫ່ງອາດຈະຕົກຢູ່ໃນສະພາບຖົດຖອຍໃນປີ 2023(13). ການຄ້າແລະການລົງທຶນສາກົນ ເຊິ່ງໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19 ຂະນະນີ້ໄດ້ຮັບຜົນກະທົບທາງລົບເພີ່ມອີກຈາກການປະທະກັນລະຫວ່າງລັດເຊຍ-ຢູເຄຮນ. ເຊັ່ນດຽວກັນ, ລະບົບຕ່ອງໂສ້ການຜະລິດແລະການກະຈາຍສິນຄ້າທົ່ວໂລກທີ່ແຕກຫັກຢູ່ແລ້ວ ກໍ່ຈະພັງທະລາຍລົງອີກ, ເຮັດໃຫ້ມັນມີຄວາມຫຍຸ້ງຍາກຫຼາຍທີ່ຈະຟື້ນຕົວ. ສະຖານະການດັ່ງກ່າວ ສົ່ງຜົນຮ້າຍແຮງຕໍ່ທຸກປະເທດ, ໂດຍສະເພາະແມ່ນບັນດາປະເທດທຸກຍາກ, ປະເທດທີ່ໄດ້ຮັບຜົນສະກະທົບຈາກການປະທະກັນທາງອາວຸດ.
ເມື່ອເກີດການແກ່ງແຍ້ງແລະປະເຊີນໜ້າກັນ, ບັນດາປະເທດໃຫຍ່ເຄີຍເພີ່ມທະວີການແກ່ດຶງ, ຊື້ຈ້າງຈອບອອຍ, ຊ້ຳຍັງ “ບັງຄັບ” ປະເທດຂະນ້ອຍ ໃຫ້ສະໜັບສະໜູນແລະປະຕິບັດຕາມ. ສະນັ້ນ, ເມື່ອບັນດາປະເທດຂະໜາດນ້ອຍ ແລະ ຂະໜາດກາງ ປະສົບກັບຄວາມຫຍຸ້ງຍາກທາງດ້ານເສດຖະກິດ ຫຼື ຂໍ້ຂັດແຍ່ງພາຍໃນທີ່ບໍ່ສາມາດແກ້ໄຂໄດ້, ປະເທດເຫຼົ່ານນີກໍ່ຍາກທີ່ຈະຮັກສາ “ເອກະລາດ” ຈາກຜົນກະທົບຂອງບັນດາປະເທດໃຫຍ່. ຜົນການລົງຄະແນນສຽງຢູ່ກອງປະຊຸມສະມັດຊາໃຫຍ່ແຫ່ງສະຫະປະຊາຊາດກ່ຽວກັບບັນດາບັນຫາທີ່ກ່ຽວຂ້ອງເຖິງບັນດາປະເທດໃຫຍ່ສະແດງໃຫ້ເຫັນວ່າ, ນັບແຕ່ສົງຄາມເຢັນສິ້ນສຸດລົງ, ບັນດາປະເທດຂະໜາດນ້ອຍ ແລະ ຂະໜາດກາງ ສ່ວນຫຼາຍເລືອກໃຊ້ນະໂຍບາຍ “ປ້ອງກັນຕົວ” ບໍ່ເຂົ້າຂ້າງກັບຝ່າຍໃດ, ຕັດສິນໃຈລົງຄະແນນສຽງຕາມບັນຫາ ແລະ ສະຖານະການສະເພາະ(14). ຍົກຕົວຢ່າງ, ໃນກອງປະຊຸມຂອງຂະບວນການບໍ່ເຂົ້າຮ່ວມກຸ່ມໃນຊຸມປີມໍ່ໆມານີ້, ເບລາຣຸດ, ອູການດາ, ຊິມບຳເວ - ບັນດາປະເທດທີ່ບໍ່ກ່ຽວຂ້ອງເຖິງພາກພື້ນອາຊີປາຊີຟິກ ໄດ້ນຳໜ້າໃນການຄັດຄ້ານບັນດາປະເທດ ອາຊຽນ ປັບປຸງສະຖານະການພາກພື້ນ (ລວມທັງສະພາບການຢູ່ທະເລຕາເວັນອອກ)(15
ໃນສະຖານະການດັ່ງກ່າວ, ອາດຈະເຫັນວ່າ, ເປັນເລື່ອງຍາກທີ່ປະເທດໃດຈະສະໜັບສະໜູນຫວຽດນາມສະເໝີໄປ ຫຼືກົງກັນຂ້າມ ໃນບັນດາບັນຫາທີ່ກ່ຽວຂ້ອງກັບການພົວພັນລະຫວ່າງປະເທດ, ໂດຍສະເພາະແມ່ນບັນດາປະເທດໃຫຍ່. ເວົ້າຢ່າງອື່ນ, ມັນເປັນການຍາກທີ່ປະເທດໃດໜຶ່ງຈະເປັນ “ຄູ່ຮ່ວມງານ” ຫຼື “ເປົ້າໝາຍ” ສະເໝີກັບຫວຽດນາມ. ຈຸດປະສົງກາຍເປັນປະເທດທີ່ພັດທະນາແລ້ວແລະມີລາຍໄດ້ສູງພາຍໃນປີ 2045 ຈະສຳເລັດໄດ້ ກໍ່ຕໍ່ເມື່ອຫວຽດນາມຮັກສາສະພາບແວດລ້ອມທີ່ສະຫງົບ ໝັ້ນຄົງ ແລະ ເອື້ອອຳນວຍຕໍ່ການພັດທະນາ. ໃນສະພາບແວດລ້ອມພາຍນອກທີ່ນັບມື້ນັບສັບສົນ ແລະ ບໍ່ສາມາດຄາດຄະເນໄດ້ ແລະ ເພື່ອໃຫ້ບັນລຸຄວາມມຸ່ງມາດປາດຖະໜາໃນການພັດທະນາ, ການກຳນົດ “ຄູ່ຮ່ວມງານ”, “ເປົ້າໝາຍ” ໃນການຈັດການແກ້ໄຂສາຍພົວພັນກັບບັນດາປະເທດ, ນອກຈາກຈຸດໝາຍແກ້ໄຂບັນດາສິ່ງທ້າທາຍແລ້ວ, ຈຳເປັນຕ້ອງສຸມໃສ່ການໃຊ້ປະໂຫຍດຈາກໂອກາດ, ສ້າງຄວາມໄວ້ເນື້ອເຊື່ອໃຈທາງຍຸດທະສາດ ກັບບັນດາຄູ່ຮ່ວມມື, ເພາະວ່າ ຖ້າບໍ່ມີຄວາມໄວ້ເນື້ອເຊື່ອໃຈທາງຍຸດທະສາດ ກໍ່ຍາກທີ່ຈະມີສະຖຽນລະພາບໃນສະພາບແວດລ້ອມທີ່ບໍ່ໝັ້ນຄົງຢູ່ສະເໝີ, ຍາກທີ່ປະເທດໃດຈະໃຫ້ຄຳໝັ້ນສັນຍາຮ່ວມມືຍາວນານກັບຫວຽດນາມ, ໂດຍສະເພາະການຂາຍຫຼືຖ່າຍທອດເຕັກໂນໂລຊີຫຼັກໃຫ້ກັບຫວຽດນາມ.
ໂລກປ່ຽນແປງ, ສະພາບແວດລ້ອມແຫ່ງຄວາມໝັ້ນຄົງ ແລະ ການພັດທະນາຂອງຫວຽດນາມໄດ້ປ່ຽນແປງໄປ, ຈຸດໝາຍຍຸດທະສາດຂອງຫວຽດນາມກໍ່ສູງກວ່າໄລຍະກ່ອນ, ວິທີກຳນົດ “ຄູ່ຮ່ວມງານ”, “ເປົ້າໝາຍ” ຕາມຕົວຕົນຈິງຖືກກ່າວວ່າ ໄດ້ສໍາເລັດພາລະກິດຂອງຕົນແລ້ວ. ໃນສະພາບການໃໝ່ຈໍາເປັນຕ້ອງກໍານົດ “ຄູ່ຮ່ວມງານ”, “ເປົ້າໝາຍ” ຕາມພຶດຕິກໍາ. ວິທີການກຳນົດນີ້ສອດຄ່ອງກັບການປ່ຽນແປງຂອງສະຖານະການໃໝ່, ອຳນວຍຄວາມສະດວກໃຫ້ຂະບວນການສ້າງຄວາມເຫັນດີເຫັນພ້ອມໃນການວາງກຳນັດ ແລະ ການຜັນຂະຫຍາຍນະ ໂຍບາຍການຕ່າງປະເທດ. ວິທີການກຳນົດນີ້ກໍ່ບໍ່ເປັນຜົນກະທົບເຖິງນະໂຍບາຍຂອງຫວຽດນາມ ເມື່ອມີຕົວຕົນໃດທີ່ເປັນ “ຄູ່ຮ່ວມງານ” ຫຼືເປັນ “ເປົ້າໝາຍ” ຂອງປະເທດຂອງພວກເຮົາຢູ່ສະເໝີ. ວິທີການກຳນົດນີ້ ພ້ອມກັນຄຳນຳ “ເພີ່ມເພື່ອມມິດ, ຫຼຸດຜ່ອນສັດຕູ” ໃນແນວຄິດການທູດຂອງໂຮ່ຈີມິນ ສືບຕໍ່ມີຄວາມໝາຍສຳຄັນໃນການປະຕິບັດວຽກງານການຕ່າງປະເທດ, ສ້າງທ່າແລະກຳລັງແຮງໃໝ່ ໃຫ້ກັບປະເທດຫວຽດນາມໃນ “ກະດານໝາກຮຸກ” ລະດັບພາກພື້ນແລະລະດັບໂລກ./.
--------------------------
(1) ຄະນະແນວຄິດ - ວັດທະນະທຳສູນກາງ: ເອກະສານເພື່ອຄົ້ນຄວ້າຮ່ຳຮຽນມະຕິຂອງກອງປະຊຸມຄັ້ງທີ 8 ຄະນະບໍລິຫານງານສູນກາງພັກ (ສະໄໝທີ 9), ສພຈ. ການເມືອງແຫ່ງຊາດ, ຮ່າໂນ້ຍ, 2003, ໜ້າ 44.
(2) ໂຮ່ຈີມິນ: ພົງສາມະດານຊີວະປະຫວັດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2016, ເຫຼັ້ມ 6 (1955-1957), ໜ້າ 15-16.
(3) ເບິ່ງ: “Afghanistan War: How did 9/11 lead to a 20-year war?” (ແປ: ສົງຄາມໃນອາບການິສະຖານ: ເຫດການ 11-9 ພາໃຫ້ເກີດສົງຄາມທີ່ແກ່ຍາວ 20 ປີຄືແນວໃດ?”, Imperial War Museums, 2022, https://www.iwm.org.uk/history/afghanistan-war-how-did-911-lead-to-a-20-year-war
(4) Shirley A. Kan (Coordinator): “China - U.S. Aircraft Collision Incident of April 2001: Assessments and Policy Implications” (ແປ: ເຫດການເຮືອບິນຊົນກັນລະຫວ່າງຈີນກັບອາເມລິກາໃນເດືອນ ເມສາ 2001: ການປະເມີນແລະຄວາມໝາຍນະໂຍບາຍ”, CRS Report for Congress, ວັນທີ 10 ຕຸລາ 2001, https://sgp.fas.org/crs/row/RL30946.pdf
(5) ກຸ່ມນັກຂ່າວຂອງໜັງສືພິມກອງທັບປະຊາຊົນ: “ກໍ່ສ້າງ “ປ້ອມປາການໃນໃຈປະຊາຊົນ” ຢູ່ເຂດພູພຽງໄຕງວຽນ: ຈາກບົດຮຽນອັນນອງເລືອດ ເຖິງບັນດາຜົນງານອັນໃຫຍ່ຫຼວງ”, ໜັງສືພິມເອເລັກໂຕຮນິກຂອງກອງທັບປະຊາຊົນ, ວັນທີ 11 ທັນວາ 2020, https://www.qdnd.vn/chinh-tri/cac-van-de/xay-thanh-tri-long-dan-o-tay-nguyen-tu-bai-hoc-xuong-mau-den-thanh-qua-to-lon-646348
(6) ເບິ່ງ: ຫງວຽນ ຍື ຟອງ: “ຄວາມຈິງກ່ຽວກັບ “ການກໍ່ຄວາມວຸ່ນວາຍທີ່ມີສີສັນການເມືອງ” ຢູ່ເຂດພູພຽງໄຕງວຽນ”, ເວັບໄຊທ໌ Vnexpress, ວັນທີ 7 ມີນາ2002, https://vnexpress.net/su-that-ve-cuoc-gay-roi-mang-mau-sac-chinh-tri-o-tay-nguyen-1956176.html
(7) ເບິ່ງ: ຫວູ ເຄວ: “ປີ 2021: ການຄ້າຫວຽດນາມ - ຈີນ ເພີ່ມຂຶ້ນເກືອບ 25%”, ເວັບໄຊທ໌ VnEconomy, ວັນທີ 25 ມັງກອນ 2022, https://vneconomy.vn/nam-2021-thuong-mai-viet-nam-trung-quoc-tang-gan-25.htm
(8) ເບິ່ງ: ຈູງ ນິງ: “ຂາດດຸນການຄ້າຈາກຈີນແມ່ນເກືອບ 29 ຕື້ໂດລາສະຫະລັດ ໃນປີ 2014”, ເວັບໄຊທ໌ ການເງິນຫວຽດນາມ, ວັນທີ 29 ທັນວາ 20214, https://thoibaotaichinhvietnam.vn/nhap-sieu-tu-trung-quoc-gan-29-ty-usd-trong-nam-2014-24512.html
(9) ເບິ່ງ: “Total number of list-based sanctions imposed by Australia, Canada, the European Union (EU), France, Japan, Switzerland, the United Kingdom (UK), and the United States on Russia from February 22 to October 20, 2022, by target” (ແປ: ຈຳນວນການລົງໂທດຕາມລາຍການທັງໝົດ ທີ່ກຳນົດໂດຍອົດສະຕຣາລີ, ການາດາ, ສະຫະພາບເອີຮົບ, ຝະຣັ່ງ, ຍີ່ປຸ່ນ, ສະວິດ, ອັງກິດ ແລະ ອາເມລິກາ ຕໍ່ລັດເຊຍ ນັບແຕ່ວັນທີ 22 ກຸມພາ ເຖິງ 20 ຕຸລາ 2022, ຕາມຄາດໝາຍ. theo mục tiêu”, Statista, 2022, https://www.statista.com/statistics/1293531/western-sanctions-imposed-on-russia-by-target/
(10) Cheng Li: “Biden’s China strategy: Coalition-driven competition or Cold War-style confrontation?” (ແປ: ຍຸດທະສາດຈີນຂອງປະທານາທິບໍດີສະຫະລັດອາເມລິກາ ໂຈ ໄບເດນ: ການແຂ່ງຂັນທີ່ຂັບເຄື່ອນໂດຍພັນທະມິດຫຼືການປະເຊີນໜ້າແບບສັງຄາມເຢັນ?), Brookings, ເດືອນພຶດສະພາ 2021, https://www.brookings.edu/research/bidens-china-strategy-coalition-driven-competition-or-cold-war-style-confrontation/
(11) “NATO declares China a security challenge for the first time” (ແປ: ນາໂຕ້ ປະກາດຈີນເປັນຄວາມທ້າທາຍດ້ານຄວາມໝັ້ນຄົງເປັນຄັ້ງທຳອິດ), Aljareera, ວັນທີ 30 ມັງກອນ 2022, https://www.aljazeera.com/news/2022/6/30/nato-names-china-a-strategic-priority-for-the-first-time
(12) Nation Congress: “Full text of the report to the 20th National Congress of the Communist Party of China” (ແປ: ລາຍງານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນສະບັບເຕັມ), Xinhua, ວັນທີ 25 ຕຸລາ 2022, https://english.news.cn/20221025/8eb6f5239f984f01a2bc45b5b5db0c51/c.html
(13) ເບິ່ງ: “Lastest World Economic Outlook Growth Projections” (ແປ: ການຄາດຄະເນການເຕີບໂຕຂອງເສດຖະກິດໂລກຫຼ້າສຸດ), International Monetary Fund, ເດືອນຕຸລາ 2022, https://www.imf.org/en/Publications/WEO/Issues/2022/10/11/world-economic-outlook-october-2022
(14) Ilyin - Ilya V. - Bilyuga, S. - Malkov - Sergey: “The Impirical analysis of the voting results in the UN General Asembly” (ແປ: ການວິເຄາະຜົນການລົງຄະແນນຈິງໃນກອງປະຊຸມສະມັດຊາໃຫຍ່ແຫ່ງສະຫະປະຊາຊດາ), Social Studys, 2022, https://www.sociostudies.org/almanac/articles/the_empirical_analysis_of_the_voting_results_in_the_un_general_assembly/
(15) ຜູ້ຂຽນບົດຄວາມໄດ້ເຂົ້າຮ່ວມກອງປະຊຸມລະດັບລັດຖະມົນຕີໂດຍກົງຂອງຂະບວນການບໍ່ເຂົ້າຮ່ວມກຸ່ມຢູ່ນະຄອນຫຼວງ ກາຮາກາດ (ເວເນຊູເອລາ) ປີ 2019.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1004 (ເດືອນມັນວາ 2022)