ການຄ້າສາກົນໃນສະພາບການໃໝ່:
ກາລະໂອກາດແລະສິ່ງທ້າທາຍສຳລັບຫວຽດນາມ
ກາລະໂອກາດແລະສິ່ງທ້າທາຍສຳລັບຫວຽດນາມ
ຜົນກະທົບຂອງການແຜ່ລະບາດຂອງໂຄວິດ-19
ຕໍ່ເສດຖະກິດໂລກ ແລະເສດຖະກິດຫວຽດນາມ
ທີໜຶ່ງ, ອັດຕາການເຕີບໂຕທາງເສດຖະກິດຫຼຸດລົງ. ການແຜ່ລະບາດຂອງໂຄວິດ-19 ໄດ້ສົ່ງຜົນກະທົບຢ່າງເລິກເຊິ່ງ ເຖິງທຸກດ້ານຂອງຊີວິດເສດຖະກິດແລະສັງຄົມ ຂອງບັນດາປະເທດໃນທົ່ວໂລກ. ພິເສດ, ໃນຂົງເຂດເສດຖະກິດ, ການແຜ່ລະບາດຂອງໂຄວິດ-19 ເຮັດໃຫ້ອັດຕາການເຕີບໂຕຂອງເສດຖະກິດໂລກຫຼຸດລົງຢ່າງໜັກໜ່ວງ ຍ້ອນການຢຸດຊະງັກຂອງຕ່ອງໂສ້ການສະໜອງທົ່ວໂລກ ພ້ອມກັບມາດຕະການຈຳກັດການເຄື່ອນໄຫວຂອງຫຼາຍປະເທດໃນທົ່ວໂລກ. ຕາມທະນາຄານໂລກ (WB), ປີ 2020, ອັດຕາການເຕີບໂຕຂອງ ຈີດີພີ ທົ່ວໂລກບັນລຸ 3,6% ເຊິ່ງປັນລະດັບຕ່ຳສຸດໃນຮອບ 50 ປີທີ່ຜ່ານມາ (1970-2020). ເມື່ອປະເຊີນກັບຜົນກະທົບຮຸນແຮງຈາກການແຜ່ລະບາດຂອງໂຄວິດ-19, ປະເທດຕ່າງໆຕ້ອງໃຊ້ມາດຕະການທີ່ບໍ່ເຄີຍມີມາກ່ອນ ເພື່ອຫຼຸດຜ່ອນຜົນກະທົບແລະຜົນຕາມມາຂອງການແຜ່ລະບາດ, ເຊັ່ນ: ການຈໍາກັດການເດີນທາງລະຫວ່າງປະເທດ, ການເວັ້ນໄລຍະຫ່າງທາງສັງຄົມ ແລະ ການລະງັບກິດຈະກໍາໃນສະຖານທີ່ຜະລິດແລະທຸລະກິດ ແລະອື່ນໆ. ປະເທດສ່ວນໃຫຍ່ໃນທົ່ວໂລກໄດ້ຕົກລົງທີ່ຈະປິດຊາຍແດນ ແລະ ໂຈະການອອກວີຊາຊົ່ວຄາວ ສໍາລັບຄົນຕ່າງປະເທດ. ໃນປີ 2021 ເສດຖະກິດໂລກໄດ້ຟື້ນຕົວຢ່າງວ່ອງໄວ ໂດຍມີການເຕີບໂຕເຖິງ 5,8%(1). ຜ່ານນະໂຍບາຍສັກວັກແຊງປ້ອງກັນແລະຄວບຄຸມພະຍາດຢ່າງກວ້າງຂວາງ ຕະຫຼອດໂຄງການໜູນຊ່ວຍຂອງບັນດາພັນທະມິດໃນພາກພື້ນ ແລະ ອົງການຈັດຕັ້ງສາກົນ, ການແຜ່ລະບາດຂອງພະຍາດໂຄວິດ-19 ຈຶງຖືກຄວບຄຸມເທື່ອລະກ້າວ. ປີ 2022, ເສດຖະກິດໂລກສືບຕໍ່ໄດ້ຮັບຜົນກະທົບຈາກການປະທະກັນລະຫວ່າງຣັດເຊຍ-ຢູເຄຣນ, ເຮັດໃຫ້ວັດຖຸດິບແລະນ້ຳມັນເຊື້ອໄຟຕົກຢູ່ໃນສະພາບຂາດແຄນຢ່າງຮ້າຍແຮງ, ຜັກດັນລາຄາພະລັງງານແລະສະບຽງອາຫານເພີ່ມຂຶ້ນ, ເຮັດໃຫ້ການເຕີບໂຕຂອງໂລກຊ້າລົງ ແລະ ເພີ່ມການຄາດຄະເນອັດຕາເງິນເຟີ້.
ໃນຖານະຂອງປະເທດໜຶ່ງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ຕົວຊີ້ວັດເສດຖະກິດມະຫາພາກຂອງຫວຽດນາມ ໄດ້ມີການປ່ຽນແປງຢ່າງຈະແຈ້ງ. ປີ 2020, ເຖິງວ່າອັດຕາການເຕີບໂຕຂອງລວມຍອດຜະລິດຕະພັນພາຍໃນ (ຈີດີພີ) ບັນລຸ 2,1% ກໍ່ຕາມ, ແຕ່ເມື່ອທຽບກັບປີ 2019 ຕົວເລກນີ້ຫຼຸດລົງ 4,1%. ປີ 2021, ເສດຖະກິດຫວຽດນາມເຕີບໂຕ 2,58%, ຕ່ຳກວ່າປີ 2020 ແລະ ກໍຕ່ຳກວ່າເມື່ອທຽບກັບເປົ້າໝາຍທີ່ວາງໄວ້ 6,5%. ນີ້ກໍແມ່ນອັດຕາການເຕີບໂຕທາງເສດຖະກິດຂອງຫວຽດນາມຕ່ຳທີ່ສຸດໃນຮອບຫຼາຍ.
ທີສອງ, ອັດຕາສ່ວນການຄ້າຫຼຸດລົງ. ປີ 2019, ເສດຖະກິດໂລກຖືກຜົນກະທົບທາງລົບຈາກການແຜ່ງລະບາດຂອງໂຄວິດ-19, ດັ່ງນັ້ນ ອັດຕາສ່ວນການຄ້າທົ່ວໂລກໄດ້ຫຼຸດລົງ 22%; ຍອດມູນຄ່າການສົ່ງອອກທົ່ວໂລກຫຼຸດລົງ 1.400 ຕື້ໂດລາສະຫະລັດ. ໃນປີ 2020, ການຄ້າທົ່ວໂລກເລີ່ມເຕີບໂຕຢ່າງວ່ອງໄວອີກເທື່ອໜຶ່ງ, ບັນລຸລະດັບສູງສຸດເຖິງ 28.500 ຕື້ໂດລາສະຫະລັດ, ເພີ່ມຂຶ້ນ 13% ເມື່ອທຽບກັບໄລຍະກ່ອນການແຜ່ລະບາດຂອງໂຄວິດ-19(2). ຕາມອົງການການຄ້າໂລກ (WTO), ອັດຕາການເຕີບໂຕຂອງການຄ້າສິນຄ້າໃນໄຕມາດທໍາອິດ ແລະ ໄຕມາດທີສອງຂອງປີ 2022 ເພີ່ມຂຶ້ນ 4,8% ແລະ 4,7% ຕາມລໍາດັບ ເມື່ອທຽບໃສ່ໄລຍະດຽວກັນຂອງປີ 2021, ແນວໃດກໍດີ, ຄາດຄະເນປະລິມານການຄ້າສິນຄ້າໃນປີ 2022 ຈະເຕີບໂຕພຽງ 3,5% ແລະໃນປີ 2023 ແມ່ນ 1% ຍ້ອນຜົນກະທົບທີ່ກ່ຽວຂ້ອງເຖິງການປະທະກັນລະຫວ່າງ ລັດເຊຍ - ຢູເຄຣນ ແລະ ນະໂຍບາຍການເງິນທີ່ເຂັ້ມງວດຂຶ້ນ ຂອງປະເທດເສດຖະກິດທີ່ສຳຄັນ.
ເຊັ່ນດຽວກັບປະເທດອື່ນໆໃນທົ່ວໂລກ, ການແຜ່ລະບາດຂອງພະຍາດໂຄວິດ-19 ແຕ່ເດືອນມີນາ 2020 ໄດ້ສົ່ງຜົນກະທົບຕໍ່ລະບົບການສະໜອງຢູ່ຫວຽດນາມ. ບັນດາຕະຫຼາດຄູ່ຄ້າທີ່ສຳຄັນຂອງຫວຽດນາມ ຄື: ອາເມລິກາ, ສະຫະພາບເອີຣົບ (EU), ຍີ່ປຸ່ນ, ຝຣັ່ງ ແລະອື່ນໆ ລ້ວນແຕ່ໄດ້ຫຼຸດຄວາມຕ້ອງການນຳເຂົ້າຢ່າງຫຼວງຫຼາຍ. ບັນດາຜະລິດຕະພັນທີ່ສຳຄັນຂອງຫວຽດນາມ ລ້ວນແຕ່ໄດ້ຮັບຜົນກະທົບຄູ່ ເມື່ອຂັ້ນຕອນວັດສະດຸປ້ອນໄດ້ຮັບການປັບປຸງ, ແຕ່ປະເຊີນໜ້າກັບບັນຫາໃນຕະຫຼາດຜະລິດຕະພັນ. ດັ່ງນັ້ນ, ອັດຕາສ່ວນການສົ່ງອອກໃນປີ 2020 ຫຼຸດລົງກວ່າ 31% ເມື່ອທຽບກັບປີ 2019; ມູນຄ່າການສົ່ງອອກ ແລະ ນຳເຂົ້າຂອງຫວຽດນາມ ບັນລຸ 545,36 ຕື້ໂດລາສະຫະລັດ, ໃນນັ້ນມູນຄ່ານການສົ່ງອອກບັນລຸ 282,66 ຕື້ໂດລາສະຫະລັດ, ກວມເອົາ 51,8% ຂອງໂຄງປະກອບການສົ່ງອອກແລະນຳເຂົ້າຂອງຫວຽດນາມ. ໃນສະພາບການທີ່ເສດຖະກິດໂລກຖືກຜົນກະທົບທາງລົບຈາກການແຜ່ລະບາດຂອງໂຄວິດ-19, ໝາກຜົນນີ້ຖືເປັນສັນຍານທາງບວກຕໍ່ເສດຖະກິດຫວຽດນາມ. ປີ 2021, ຍອດມູນຄ່າການຄ້າສິນຄ້າບັນລຸ 668,54 ຕື້ໂດລາສະຫະລັດ, ເພີ່ມຂຶ້ນ 22,6% ເມື່ອທຽບກັບປີ 2020. ໃນນັ້ນ, ມູນຄ່າການສົ່ງອອກ ແລະ ການນໍາເຂົ້າເພີ່ມຂຶ້ນ 19% ແລະ 26,5% ຕາມລໍາດັບ. ຕາມຂໍ້ມູນຂອງກົມສຸນລະກາກອນຫວຽດນາມ, ໃນ 10 ເດືອນຕົ້ນປີ 2022, ມູນຄ່າການສົ່ງອອກຂອງຫວຽດນາມບັນລຸ 312,9 ຕື້ໂດລາສະຫະລັດ, ເພີ່ມຂຶ້ນ 16% ເມື່ອທຽບໃສ່ໄລຍະດຽວກັນຂອງປີ 2021. ບັນດາຂະແໜງການເສດຖະກິດໃນປະເທດ ແລະ ຂະແໜງການລົງທຶນໂດຍກົງຈາກຕ່າງປະເທດ (FDI) ມີການເຕີບໂຕຂ້ອນຂ້າງສະໝ່ຳສະເໝີ; ດຸນການຄ້າເກີນດຸນ (ເກີນດຸນການຄ້າເຖິງ 9,6 ຕື້ໂດລາສະຫະລັດ). ໝາກຜົນນີ້ແມ່ນຍ້ອນການຄຸ້ມຄອງເປັນເອກະພາບ ຍືດຫຍຸ່ນ ແລະ ໃກ້ຊິດ ຂອງລັດຖະບານຫວຽດນາມ ໂດຍມີເປົ້າໝາຍ "ການປັບຕົວທີ່ປອດໄພແລະຍືດຫຍຸ່ນ, ການຄວບຄຸມການແຜ່ລະບາດຂອງໂຄວິດ-19 ຢ່າງມີປະສິດທິຜົນ”. ນີ້ແມ່ນປະຖົມປັດໄຈເພື່ອໃຫ້ການເຄື່ອນໄຫວນຳເຂົ້າແລະສົ່ງອອກຂອງຫວຽດນາມ ນຳມາເຊິ່ງບັນດາໝາກຜົນທີ່ດີຢ່າງຕໍ່ເນື່ອງ ໃນສະພາບການທີ່ເສດຖະກິດໂລກບໍ່ໝັ້ນຄົງ.
ການແຜ່ລະບາດຂອງໂຄວິດ-19 ໄດ້ຊຸກຍູ້ບັນດາທ່າອ່ຽງການປັບໂຄງສ້າງ ແລະ ລັກສະນະການຄ້າລະຫວ່າງປະເທດ ເນື່ອງຈາກການແຜ່ລະບາດຂອງພະຍາດທີ່ຂັດຂວາງຕ່ອງໂສ້ການສະໜອງທົ່ວໂລກ ເຮັດໃຫ້ວິສາຫະກິດສ້າງແບບຈໍາລອງ ແລະປະເມີນຄວາມສ່ຽງໄດ້ຍາກ. ໃນສະພາບການນັ້ນ, ໂຄງສ້າງການຄ້າສິນຄ້າຂອງຫວຽດນາມໄດ້ໃຫ້ເຫັນມີການປ່ຽນແປງ ໂດຍສິນຄ້າຫຼຸດລົງຢ່າງຈະແຈ້ງເຊັ່ນ: ນ້ຳມັນເຊື້ອໄຟ, ເຄື່ອງຈັກ, ກົນຈັກ, ເຫຼັກກ້າ ແລະອື່ນໆ. ໃນນັ້ນ, ຄວາມຕ້ອງການສິນຄ້າເຊັ່ນ: ຢາປົວພະຍາດ ແລະ ອຸປະກອນປ້ອງກັນ, ອາຫານ ແລະອື່ນໆ ເພີ່ມຂຶ້ນຢ່າງໄວວາ. ການຄ້າບໍລິການການທ່ອງທ່ຽວຫຼຸດລົງຢ່າງໄວ. ປີ 2020, ຈຳນວນນັກທ່ອງທ່ຽວສາກົນທີ່ມາຢາມຫວຽດນາມຫຼຸດລົງ 78,7% ເມື່ອທຽບກັບໄລຍະດຽວກັນຂອງປີ 2019, ລາຍຮັບລວມຈາກການທ່ອງທ່ຽວຫຼຸດລົງ. ມາດຕະການປ້ອງກັນການແຜ່ລະບາດຂອງພະຍາດດັ່ງກ່າວ ໄດ້ເຮັດໃຫ້ສະມັດຕະພາບ ແລະ ປະລິມານການຜະລິດຫຼຸດລົງ. ນອກຈາກນັ້ນ, ການແຜ່ລະບາດຂອງໂຄວິດ-19 ໄດ້ສົ່ງຜົນກະທົບໂດຍກົງຕໍ່ສຸຂະພາບຂອງຜູ້ອອກແຮງງານ, ເຮັດໃຫ້ເກີດການຂາດແຄນຊັບພະຍາກອນມະນຸດໃນໂຮງງານຜະລິດ. ພ້ອມກັນນັ້ນ, ການສະໜອງສິນຄ້າທີ່ຈຳເປັນ ບໍ່ຕອບສະໜອງໄດ້ກັບຄວາມຕ້ອງການຂັ້ນຕ່ຳຂອງປະຊາຊົນ. ນອກຈາກນັ້ນ, ບັນດາມາດຕະການຮັບມືກັບການແຜ່ລະບາດຂອງພະຍາດໄດ້ຂັດຂວາງຕ່ອງໂສ້ການຜະລິດກະສິກຳ ແລະ ອຸດສາຫະກຳຫຼາຍແຫ່ງ, ສົ່ງຜົນກະທົບຕໍ່ຂະບວນການນຳຜະລິດຕະພັນສູ່ຜູ້ບໍລິໂພກ, ຂັດຂວາງການຜະລິດ, ເຮັດໃຫ້ເກີດການຢຸດຊະງັກໃນຕ່ອງໂສ້ການສະໜອງ.
ທ່າອ່ຽງການປ່ຽນແປງຂອງການຄ້າຫວຽດນາມ
ການບັນທຸກແລະຂົນສິນຄ້າສົ່ງອອກທີ່ທ່າເຮືອ ກາດຫຼາຍ (ນະຄອນໂຮ່ຈີມິນ) _ແຫຼ່ງ: nhiepanhdoisong.vn
ທີໜຶ່ງ, ໃນສະພາບການແຜ່ລະບາດຂອງໂຄວິດ-19 ນັ້ນ, ການຄ້າເອເລັກໂຕຣນິກສືບຕໍ່ພັດທະນາຢ່າງແຂງແຮງ ແລະ ກາຍເປັນທ່າອຽງບຸລິມະສິດ.
ບັນດາວິສາຫະກິດນັບມື້ນັບເອົາໃຈໃສ່ເຖິງການຂະຫຍາຍກິດຈະກຳອີຄອມເມີຊ. ກິດຈະກໍາອີຄອມເມີຊມີການປ່ຽນແປງຢ່າງໄວວາ ດ້ວຍວິທີການແລກປ່ຽນໃໝ່ຈໍານວນຫຼາຍເພື່ອໃຫ້ສອດຄ່ອງກັບພຶດຕິກໍາຂອງຜູ້ບໍລິໂພກ. ໃນຊຸມປີທີ່ຜ່ານມາ, ອີຄອມເມີຊຍັງຄົງຮັກສາອັດຕາການເຕີບໂຕທີ່ໝັ້ນຄົງ, ໃນປີ 2022 ໄດ້ເພີ່ມຂຶ້ນຢ່າງແຂງແຮງ ດ້ວຍອັດຕາການເຕີບໂຕ 20%. ພ້ອມກັນນັ້ນ, ໃນໄລຍະປີ 2020-2021, ມູນຄ່າເງິນສົດໝູນວຽນມີແນວໂນ້ມເພີ່ມຂຶ້ນ, ເຖິງວ່າອັດຕາສ່ວນຂອງເງິນສົດຕໍ່ວິທີການຊໍາລະທັງໝົດຈະຫຼຸດລົງກໍຕາມ (ປີ 2020, ອັດຕາສ່ວນນີ້ແມ່ນ 11,66% ແລະປີ 2021 ແມ່ນ 11,48%); ກິດຈະກໍາການຊຳລະເງິນທີ່ບໍ່ແມ່ນເງິນສົດ ມີການເຕີບໂຕສູງ (ການຊໍາລະເງິນຜ່ານຊ່ອງທາງອິນເຕີເນັດເພີ່ມຂຶ້ນ 48,8% ໃນດ້ານປະລິມານ ແລະ 32,6% ໃນມູນຄ່າ; ການຊໍາລະເງິນຜ່ານຊ່ອງທາງໂທລະສັບມືຖືເພີ່ມຂຶ້ນ 76,2% ໃນດ້ານປະລິມານ ແລະ 87,5% ໃນມູນຄ່າ); ອັດຕາສ່ວນທຸລະກຳຖອນເງິນສົດຜ່ານເຄື່ອງຖອນເງິນອັດຕະໂນມັດ (ATM) ໃນຈຳນວນທຸລະກຳທັງໝົດ ທີ່ປະມວນຜົນຜ່ານລະບົບຂອງບໍລິສັດຫຸ້ນສ່ວນຊຳລະເງິນແຫ່ງຊາດຫວຽດນາມ (NAPAS) ໄດ້ຫຼຸດລົງຢ່າງຫຼາຍຈາກ 26% (ປີ 2020) ເຫຼືອ 12% (ປີ 2021). ໃນອະນາຄົດ, ຮູບການອີຄອມເມີຊຈະກາຍເປັນການບຸລິມະສິດຂອງຜູ້ບໍລິໂພກ, ພ້ອມກັນນັ້ນ, ການໃຊ້ເງິນສົດຈະຄ່ອຍໆຖືກແທນທີ່ດ້ວຍວິທີການຊຳລະເງິນອອນໄລນ໌, ປະກອບສ່ວນຊຸກຍູ້ການພັດທະນາເຕັກໂນໂລຊີທາງການເງິນ (Fintech) ຢ່າງແຂງແຮງ. ດ້ານອື່ນ, ການຄ້າດິຈິຕອນ ແລະ ການຄ້າຂ້າມຊາຍແດນ ໄດ້ເລັ່ງຂະບວນການຫັນເປັນດິຈິຕອນ, ພັດທະນາໂຄງສ້າງພື້ນຖານດ້ານເຕັກໂນໂລຊີຂໍ້ມູນຂ່າວສານ ແລະ ການເຊື່ອມຕໍ່ອິນເຕີເນັດ. ປີ 2022, ເສດຖະກິດດິຈິຕອນຂອງຫວຽດນາມ ມີອັດຕາການເຕີບໂຕ 28% ເຊິ່ງເປັນອັດຕາການເຕີບໂຕສູງທີ່ສຸດ ຢູ່ອາຊີຕາເວັນອອກສ່ຽງໃຕ້. ການແຜ່ລະບາດຂອງໂຄວິດ-19 ພ້ອມກັບມາດຕະການເວັ້ນໄລຍະຫ່າງທາງສັງຄົມ ໄດ້ກະຕຸ້ນໃຫ້ວິສາຫະກິດປັບປ່ຽນພາລະບົດບາດຕ່າງໆຢ່າງຕັ້ງໜ້າ ແລະ ຍົກສູງຄຸນນະພາບຮັບໃຊ້ລູກຄ້າເມື່ອໃຊ້ເວທີອອນໄລນ໌.
ທີສອງ, ການຄ້າສາກົນຊຸກຍູ້ການຮ່ວມມືທາງດ້ານເຕັກໂນໂລຊີດິຈິຕອນ.
ນອກເໜືອຈາກສັນຍາການຄ້າເສລີ (FTA) ແລ້ວ ຈະມີການຈັດເຮັດສັນຍາດິຈິຕອນສຳລັບສິນຄ້າແລະບໍລິການດ້ານການສື່ສານ. ພາຍຫຼັງ 3 ປີແຫ່ງການຜັນຂະຫຍາຍສັນຍາຄູ່ຮ່ວມມືຮອບດ້ານແລະກ້າວໜ້າ ຂ້າມປາຊີຟິກ (CPTPP), ບັນດາວິສາຫະກິດ ຫວຽດນາມ ໄດ້ໃຊ້ປະໂຫຍດຈາກໂອກາດຈາກ CPTPP ຢ່າງມີປະສິດທິຜົນ ແລະ ບັນລຸໝາກຜົນທີ່ຕັ້ງໜ້າ. ຕາມລາຍງານຂອງກະຊວງອຸດສາຫະກຳແລະການຄ້າ, ປີ 2021, ມູນຄ່າການສົ່ງອອກຂອງຫວຽດນາມ ໄປຍັງປະເທດສະມາຊິກ CPTPP ບັນລຸປະມານ 45,7 ຕື້ໂດລາສະຫະລັດ, ເພີ່ມຂຶ້ນ 18,1% ເມື່ອທຽບກັບປີ 2020. ໃນທາງກົງກັນຂ້າມ, ມູນຄ່າການນຳເຂົ້າທັງໝົດຂອງຫວຽດນາມຈາກປະເທດສະມາຊິກ CPTPP ບັນລຸປະມານ 45,5 ຕື້ໂດລາສະຫະລັດ, ເພີ່ມຂຶ້ນ 37,6% ເມື່ອທຽບກັບປີ 2020. ໃນ 10 ເດືອນຕົ້ນປີ 2022, ມູນຄ່າການສົ່ງອອກແລະການນຳເຂົ້າທັງໝົດລະຫວ່າງຫວຽດນາມ ກັບບັນດາປະເທດສະມາຊິກ CPTPP ບັນລຸ 88,1 ຕື້ໂດລາສະຫະລັດ, ເພີ່ມຂຶ້ນ 19,2% ເມື່ອທຽບກັບໄລຍະດຽວກັນຂອງປີ 2021. ໃນນັ້ນ, ມູນຄ່າການສົ່ງອອກໄປຍັງປະເທດສະມາຊິກ CPTPP ບັນລຸ 45,1 ຕື້ໂດລາສະຫະລັດ, ເພີ່ມຂຶ້ນ 22,1% ເມື່ອທຽບກັບໄລຍະດຽວກັນຂອງປີ 2021. ການຄ້າບໍລິການດິຈິຕອນໄດ້ຮັບການເປີດກວ້າງ, CPTPP ກາຍເປັນບັນທັດຖານນະໂຍບາຍດ້ວຍຂໍ້ຕົກລົງເສດຖະກິດດິຈິຕອນ. ການສົ່ງເສີມໃຫ້ມີການເພີ່ມຂຶ້ນ ແລະ ການນຳໃຊ້ມາດຕະຖານເຫຼົ່ານີ້ ສາມາດປູທາງເພື່ອຊຸກຍູ້ໃຫ້ມາດຕະຖານດິຈິຕອນ ໄດ້ຮັບການຍອມຮັບຢ່າງກວ້າງຂວາງ ແລະມີປະສິດທິຜົນ.
ທີສາມ, ການຄ້າໄປສູ່ການພັດທະນາແບບຍືນຍົງ.
ບັນດາສັນຍາການຄ້າເສລີຮຸ່ນໃໝ່ບໍ່ໄດ້ຈຳກັດຢູ່ພຽງການຄ້າແລະບໍລິການ ແຕ່ຍັງກວມເອົາຂົງເຂດອື່ນອີກ ລວມທັງສິ່ງແວດລ້ອມ ແລະ ການພັດທະນາແບບຍືນຍົງ. ຂໍ້ກຳນົດກ່ຽວກັບສິ່ງແວດລ້ອມ ແລະ ການພັດທະນາແບບຍືນຍົງ ໄດ້ຖືກເຊື່ອມໂຍງ ແລະ ກາຍເປັນບົດທີ່ແຍກຕ່າງຫາກໃນກອງປະຊຸມ. ພາຍຫຼັງ 2 ປີແຫ່ງການຜັນຂະຫຍາຍປະຕິບັດສັນຍາການຄ້າເສລີ ຫວຽດນາມ - ສະຫະພາບເອີຣົບ (EVFTA), ການຄ້າສອງຝ່າຍລະຫວ່າງຫວຽດນາມ ແລະ ສະຫະພາບເອີຣົບ ເຕີບໂຕຂຶ້ນຢ່າງດີ, ແຕ່ບໍ່ເໝາະສົມກັບຄວາມສາມາດບົ່ມຊ້ອນ ແລະ ຄວາມຕ້ອງການຂອງສອງຝ່າຍ. ໃນເວລາທີ່ຜ່ານມາ, ວິສາຫະກິດຫວຽດນາມຈຳນວນໜຶ່ງ ໄດ້ເປັນເຈົ້າການໃນການສ້າງເຄື່ອງໝາຍການຄ້າຂອງຕົນເອງ, ປັບປຸງການຜະລິດເພື່ອໃຫ້ໄດ້ມາດຕະຖານສິ່ງແວດລ້ອມ ເມື່ອເຂົ້າຮ່ວມຢ່າງເລິກເຊິ່ງໃນຕ່ອງໂສ້ການສະໜອງຂອງຕະຫຼາດອີຢູ. ເອີຣົບສົ່ງເສີມການພັດທະນາແຫຼ່ງພະລັງງານສີຂຽວ ແລະພະລັງງານທົດແທນຢູ່ຫວຽດນາມ. ບັນດາວິສາຫະກິດເອີຣົບ ກໍ່ປາຖະໜາທີ່ຈະແບ່ງປັນປະສົບການ, ເຕັກໂນໂລຢີ ແລະ ການລົງທຶນທາງການເງິນ ເພື່ອຊຸກຍູ້ການພັດທະນາແບບຍືນຍົງ ຂອງເສດຖະກິດຫວຽດນາມ. ທາງດ້ານຫວຽດນາມ, ວິສາຫະກິດຈຳນວນໜຶ່ງ ໄດ້ເປັນເຈົ້າການໃນການຍົກສູງຄວາມສາມາດ, ປັບຍຸດທະສາດການການຜະລິດ ແລະ ທຸລະກິດໃຫ້ເໝາະສົມ ເພື່ອປັບຕົວແລະພັດທະນາຢ່າງວ່ອງໄວ ບົນເສັ້ນທາງສີຂຽວ ແລະ ຍືນຍົງ. ຍິ່ງກວ່ານັ້ນ, ເພື່ອສະໜັບສະໜູນໃຫ້ວິສາຫະກິດປັບຕົວເຂົ້າກັບມາດຕະຖານຂອງສັນຍາການຄ້າເສລີໂດຍໄວ, ກະຊວງອຸສາຫະກຳແລະການຄ້າ ໄດ້ສ້າງໂຄງການສະໜັບສະໜູນວິສາຫະກິດ ໃນການໃຊ້ປະໂຫຍດຈາກສັນຍາການຄ້າເສດລີ ໂດຍມີກິດຈະກຳຕ່າງໆເຊັ່ນ: ການໂຄສະນາແລະເຜີຍແຜ່ຄຳໝັ້ນສັນຍາ ກໍ່ຄືກົດລະບຽບແຫຼ່ງກຳເນີດສິນຄ້າ; ສົ່ງເສີມການສົ່ງອອກບົນແພຼດຟອຣ໌ມດິຈິຕອນ, ສະໜັບສະໜູນການເຊື່ອມຕໍ່ທາງການຄ້າ; ໂຄສະນາເຜີຍແຜ່ແລະໜູນຊ່ວຍວິສາຫະກິດ ໃນການປ້ອງກັນແລະຫຼີກລ່ຽງຄວາມສ່ຽງ ຈາກມາດຕະການປ້ອງກັນການຄ້າ ທີ່ຖືກນຳໃຊ້ໃນເມື່ອສົ່ງອອກສິນຄ້າ. ຍິ່ງກວ່ານັ້ນ, ສຳລັບຕະຫຼາດທີ່ມີຂໍ້ກຳນົດແຫຼ່ງກຳເນີດວັດຖຸດິບທີ່ເຂັ້ມງວດ, ວິສາຫະກິດຕ້ອງໃຊ້ແຫຼ່ງວັດຖຸດິບທີ່ໄດ້ມາດຖານ ເພື່ອໃຫ້ກົງຕາມກົດລະບຽບແຫຼ່ງກຳເນີດສິນຄ້າ, ເພື່ອໃຫ້ການສົ່ງອອກໄປຍັງຕະຫຼາດພາຍນອກເປັນຜົນດີ, ມີປະສິດທິຜົນສູງແລະ ຍືນຍົງ. ນີ້ກໍ່ແມ່ນທ່າອ່ຽງທົ່ວໂລກທີ່ບໍ່ສາມາດປີ້ນກັບໄດ້ ແລະ ເປັນຂໍ້ກໍານົດບັງຄັບສຳລັບວິສາຫະກິດຫວຽດນາມ ທີ່ຈະເຂົ້າຮ່ວມຢ່າງເລິກເຊິ່ງ ໃນຕ່ອງໂສ້ມູນຄ່າໃໝ່.
ທີສີ່, ມີການປ່ຽນແປງແລະການປັບໂຄງສ້າງຂອງຕ່ອງໂສ້ການສະໜອງ ໃຫ້ມີຄວາມໜ້າເຊື່ອຖື ຄວາມປອດໄພ ແລະ ຄວາມຍືນຍົງຫຼາຍຂຶ້ນ.
ການແຜ່ລະບາດຂອງໂຄວິດ-19 ໄດ້ສ້າງຄວາມທ້າທາຍໃຫ້ກັບຕ່ອງໂສ້ການສະໜອງ ໂດຍການຂັດຂວາງແລະລົບກວນຕ່ອງໂສ້ມູນຄ່າທົ່ວໂລກ, ໂດຍສະເພາະ ໃນດ້ານໂລຈິສະຕິກ. ການຂາດແຄນເຊມີຄອນດັກເຕີຣ໌, ລາຄາພະລັງງານທີ່ສູງຂຶ້ນ, ຄ່າຂົນສົ່ງເພີ່ມຂຶ້ນ ແລະອື່ນໆ ລ້ວນແມ່ນເຫດຜົນກະຕຸ້ນການຈັດໂຄງສ້າງເຄືອຂ່າຍການຜະລິດທີ່ຍືດຫຍຸ່ນຫຼາຍຂຶ້ນ. ຢູ່ຫວຽດນາມ, ການບໍລິໂພກຢ່າງຍືນຍົງກຳລັງໄດ້ຮັບຄວາມສົນໃຈຈາກຊຸມຊົນຜູ້ບໍລິໂພກ ແລະ ວິສາຫະກິດຫຼາຍຂຶ້ນເລື້ອຍໆ. ໃນເວລາທີ່ຜ່ານມາ, ການແຜ່ລະບາດຂອງໂຄວິດ-19 ໄດ້ກະຕຸ້ນໃຫ້ຜູ້ບໍລິໂພກຕັດສິນໃຈຊື້ຕາມແຜນແລະຕັ້ງໃຈ ແລະ ປ່ຽນມາໃຊ້ການບໍລິໂພກທີ່ຍືນຍົງ ແລະ ສົມເຫດສົມຜົນຫຼາຍຂຶ້ນ. ສິນຄ້າທີ່ຖືກເລືອກອັນດັບໜຶ່ງແມ່ນອາຫານ ແລະ ຜະລິດຕະພັນທາງການແພດ ເພາະວ່າ ສິນຄ້າເຫຼົ່ານີ້ປະກອບສ່ວນສຳຄັນໃນການປົກປ້ອງສຸຂະພາບ ແລະ ຮັບປະກັນຊີວິດ ທ່າມກາງພະຍາດລະບາດທີ່ຍັງແຜ່ລາມໄປໃນຮູບແບບທີ່ເປັນອັນຕະລາຍກວ່າອີກ. ເຖິງວ່າການແຜ່ລະບາດຂອງໂຄວິດ-19 ຈະນຳເອົາຂໍ້ເສຍ ແລະ ຄວາມຫຍຸ້ງຍາກຫຼາຍຢ່າງ ມາໃຫ້ວິສາຫະກິດ, ແຕ່ຄວາມເປັນຈິງສະແດງໃຫ້ເຫັນວ່າ ນີ້ກໍ່ແມ່ນໂອກາດເພື່ອໃຫ້ວິສາຫະກິດພັດທະນາຕາມທິດທາງຍືນຍົງ, ມຸ່ງສູ່ຄຸນຄ່າຂອງຊຸມຊົນເພີ່ມຂຶ້ນ. ວິສາຫະກິດຫວຽດນາມຫຼາຍແຫ່ງ ໄດ້ປ່ຽນຮູບແບບການດຳເນີນທຸລະກິດ, ຈາກການຜະລິດເຖິງການແຈກຢາຍ, ການຂົນສົ່ງ ແລະ ການບໍລິໂພກ. ນີ້ແມ່ນວິທີແກ້ໄຂທີ່ເໝາະສົມທີ່ສຸດ ໃນການຊ່ວຍໃຫ້ວິສາຫະກິດພັດທະນາແບບຍືນຍົງ ໃນຕ່ອງໂສ້ການສະໜອງໃນປະຈຸບັນ.
ທີຫ້າ, ບຸລິມະສິດການຮ່ວມມືສອງຝ່າຍ ການຮ່ວມມືພາກພື້ນ ແລະ ການຮ່ວມມື ກຸ່ມ.
ການແຜ່ລະບາດຂອງໂຄວິດ-19 ສະແດງໃຫ້ເຫັນເຖິງຂໍ້ເສຍຂອງໂລກາພິວັດ, ກະຕຸ້ນທ່າອ່ຽງຂອງລັດທິກີດກັນທາງການຄ້າ, ເຖິງວ່າໂລກາພິວັດ ແລະການເຊື່ອມໂຍງສາກົນ ຍັງເປັນທ່າອ່ຽງພາວະວິໄສກໍຕາມ. ຢູ່ຫວຽດນາມ, ການເຊື່ອມໂຍງເສດຖະກິດສາກົນຍັງຄົງໄດ້ຮັບການຮັກສາແລະຊຸກຍູ້ ໃນສະພາບການບໍ່ໝັ້ນຄົງ ຂອງເສດຖະກິດໂລກ ດ້ວຍປັດໄຈທີ່ເຊື່ອມໂຍງກັນ ແລະ ສະທ້ອນກັບຫຼາຍປະການ. ການເປີດການຄ້າລະດັບພາກພື້ນກໍມີທ່າອ່ຽງເພີ່ມຂຶ້ນ, ຫວຽດນາມເຈລະຈາແລະລົງນາມໃນບັນດາສັນຍາການຄ້າເສລີຮຸ່ນໃໝ່, ເຊັ່ນ ສັນຍາການຄ້າເສລີ ຫວຽດນາມ - ສະຫະພາບເອີຣົບ, ສັນຍາຄູ່ຮ່ວມເສດຖະກິດຮອບດ້ານພາກພື້ນ (RCEP). ລັດຖະບານຫວຽດນາມສະເໜີບັນດາຂົງເຂດທີ່ມີທ່າແຮງ ແລະ ການຮ່ວມມືທີ່ມີແງ່ຫວັງ ເຊິ່ງສາມາດນຳໄປໃຊ້ປະໂຫຍດ ແລະຜັນຂະຫຍາຍເພື່ອສົ່ງເສີມການພົວພັນສອງຝ່າຍ, ໂດຍສະເພາະ ໃນຂະບວນການຟື້ນຟູ, ພັດທະນາເສດຖະກິດແລະສັງຄົມ ໃນໄລຍະທີ່ການແຜ່ລະບາດຂອງໂຄວິດ-19 ຈະຖືກຄວບຄຸມແລະຂັບໄລ່. ການເຊື່ອມໂຍງທາງເສດຖະກິດໃນລະດັບພາກພື້ນທີ່ເພີ່ມຂຶ້ນ ກໍໄດ້ຊຸກຍູ້ຂະບວນການປ່ຽນເສັ້ນທາງການຄ້າ ຈາກປະເທດນອກກຸ່ມທີ່ເຊື່ອມໂຍງ ແລະ ສົ່ງເສີມໃຫ້ເກີດກະແສການຄ້າໃນລະດັບພາກພື້ນ, ປະກອບສ່ວນຟື້ນຟູເສດຖະກິດໃນສະຖານະການໃໝ່.
ໂອກາດ ແລະ ສິ່ງທ້າທາຍຕໍ່ການຄ້າຫວຽດນາມໃນໄລຍະໃໝ່
ໂອກາດທີ່ຈະໄດ້ໃຊ້ໃຫ້ເປັນປະໂຫຍດ
ທີໜຶ່ງ, ໃນສະຖານະການປະຈຸບັນ, ບັນດາທ່າອ່ຽງໃໝ່ສືບຕໍ່ຢືນຢັນທິດທາງບຸລິມະສິດການຕ່າງປະເທດຂອງຫວຽດນາມ ແມ່ນຖືກຕ້ອງ; ຫວຽດນາມແມ່ນສະມາຊິກຂອງຄວາມຄິດລິເລີ່ມ ແລະ ການເຊື່ອມໂຍງພາກພື້ນຫຼາຍຢ່າງ, ເຊັ່ນ: ເວທີປາໄສການຮ່ວມມືເສດຖະກິດອາຊີ-ປາຊີຟິກ (APEC), ສະມາຄົມປະຊາດອາຊີຕາເວັນອອກສ່ຽງໃຕ້ (ASEAN), ທະນາຄານພັດທະນາອາຊີ (ADB), CPTPP, EVFTA, RCEP ແລະອື່ນໆ. ນອກຈາກນັ້ນ, ຫວຽດນາມກໍໄດ້ເຂົ້າຮ່ວມຂະບວນການເຈລະຈາຂໍ້ຄິດລິເລີ່ມ ແລະ ສັນຍາຈຳນວນໜຶ່ງ ເຊັ່ນ ກອບເສດຖະກິດອິນໂດ-ປາຊີຟິກ (IPEF), ສັນຍາການຄ້າເສລີລະຫວ່າງຫວຽດນາມແລະກຸ່ມປະເທດ EFTA(3) (VN - EFTA FTA), ສັນຍາການຄ້າເສລີລະຫວ່າງຫວຽດນາມ ແລະ ອິດສຣາແອນ (VIFTA). ຈາກນັ້ນ, ຂະບວນການເຊື່ອມໂຍງເຂົ້າກັບສາກົນຂອງຫວຽດນາມນັບມື້ນັບກວ້າງຂວາງ, ຫຼາກຫຼາຍ ແລະ ຫຼາຍລະດັບ. ໃນການພົວພັນຮ່ວມມືກັບຄູ່ຮ່ວມຂະໜາດນ້ອຍ, ຕຳແໜ່ງຂອງຫວຽດນາມໄດ້ຮັບການເພີ່ມທະວີ, ປະກອບສ່ວນນຳການພົວພັນທະວິພາຄີ ແລະ ພະຫຸພາຄີຍ່ອຍ ເຂົ້າສູ່ລວງເລິກ,ແທດຈິງ ແລະ ມີປະສິດທິຜົນ.
ທີສອງ, ບົດບາດແລະຄຸນຄ່າຂອງພາກພື້ນອາຊີ-ປາຊີຟິກນັບມື້ໄດ້ຮັບການປັບປຸງຜ່ານບັນດາສັນຍາການຄ້າເສດລີທະວິພາຄີ, ພະຫຸພາຄີຍ່ອຍ ແລະ ພາກພື້ນຮຸ້ນໃໝ່. ໃນນັ້ນ, ຫວຽດນາມມີບົດບາດສຳຄັນໃນລະບົບການສະໜອງ ແລະ ລະບົບເສດຖະກິດ-ການຄ້າໃນພາກພື້ນແລະໃນໂລກ. ມີສະພາບແວດລ້ອມເສດຖະກິດມະຫາພາກ ແລະ ສະຖານະການທາງການເມືອງທີ່ໝັ້ນຄົງ, ດ້ວຍພື້ນຖານເສດຖະກິດທີ່ຂະຫຍັນຂັນເຄື່ອນ, ຕະຫຼາດຜູ້ບໍລິໂພກທີ່ນັບມື້ນັບຂະຫຍາຍຕົວ ແລະ ສະພາບແວດລ້ອມທາງທຸລະກິດທີ່ສົມບູນແບບຫຼາຍຂຶ້ນ, ຕົວຊີ້ວັດຫຼາຍປະການກ່ຽວກັບສະພາບແວດລ້ອມທາງທຸລະກິດ ແລະ ຄວາມສາມາດໃນການແຂ່ງຂັນຂອງຫວຽດນາມ ໄດ້ຮັບການປັບປຸງຢ່າງຕັ້ງໜ້າ ແລະອື່ນໆ ແມ່ນບັນດາຂໍ້ໄດ້ປຽບທີ່ດີ ເພື່ອໃຫ້ຫວຽດນາມຍາດແຍ່ງໂອກາດ ແລະ ດຶງດູດບໍລິສັດຂະໜາດໃຫຍ່ ແລະ ບໍລິສັດເຕັກໂນໂລຊີຂັ້ນສູງ ທີ່ຕ້ອງການປ່ຽນການຜະລິດ ແລະ ຕ່ອງໂສ້ການສະໜອງລະດັບພາກພື້ນ ແລະ ທົ່ວໂລກ. ໃນເວລາທີ່ຜ່ານມາ, ການແຜ່ລະບາດຂອງໂຄວິດ-19 ໄດ້ສົ່ງຜົນກະທົບທາງລົບເຖິງເສດຖະກິດໂລກ, ເຮັດໃຫ້ກະແສເງິນລົງທຶນໂດຍກົງຈາກຕ່າງປະເທດໃນທົ່ວໂລກຫຼຸດລົງຢ່າງແຮງ. ປີ 2020, ເຖິງວ່າກະແສເງິນລົງທຶນໂດຍກົງຈາກຕ່າງປະເທດເຂົ້າໃນຫວຽດນາມຫຼຸດລົງ 25% ເມື່ອທຽບກັບປີ 2019 ກໍຕາມ ແຕ່ເຖິງປີ 2021, ໃນສະພາບການບໍ່ໝັ້ນຄົງຂອງເສດຖະກິດໂລກ, ກະແສເງິນລົງທຶນໂດຍກົງຈາກຕ່າງປະເທດເຂົ້າໃນຫວຽດນາມເພີ່ມຂຶ້ນຢ່າງໄວ, ເພີ່ມຂຶ້ນ 9,1% (ຫຼາຍກວ່າ 31 ຕື້ໂດລາສະຫະລັດ).
ທີສາມ, ການຄ້າດິຈິຕອນ ແລະ ເສດຖະກິດດິຈິຕອນກາຍເປັນພະລັງຂັບເຄີ່ອນການຟື້ນຟູ ແລະ ພັດທະນາເສດຖະກິດ. ປີ 2021, ເສດຖະກິດດິຈິຕອນໃນຫວຽດນາມໄດ້ປະກອບ 6% ເຂົ້າໃນ ຈີດີພີ, ໃນນັ້ນ, ຂົງເຂດການຄ້າເຕີບໂຕໄວທີ່ສຸດ ດ້ວຍອັດຕາການເພີ່ມຂຶ້ນຫຼາຍກວ່າ 50% ເມື່ອທຽບໃສ່ໄລຍະດຽວກັນຂອງປີ 2020; ຍອດມູນຄ່າການສົ່ງອອກແລະນຳເຂົ້າສິນຄ້າ ບັນລຸເຖິງ 668,5 ຕື້ໂດລາສະຫະລັດ. ບໍລິສັດແລະວິສາຫະກິດຫຼາຍແຫ່ງໃນປະເທດແລະຕ່າງປະເທດ ໄດ້ໃຊ້ມາດຕະການທີ່ທັນການ ເພື່ອຕອບໂຕ້ການແຜ່ລະບາດຂອງພະຍາດໂຄວິດ-19 ແລະ ສວຍໃຊ້ກາລະໂອກາດໃນການປັບປຸງປະສິດທິພາບການເຮັດວຽກ ໂດຍການນໍາໃຊ້ເຕັກໂນໂລຊີໃນການຄຸ້ມຄອງ, ການຜະລິດ ທຸລະກິດ ແລະ ອື່ນໆ. ຜ່ານນັ້ນ, ການຄ້າດິຈິຕອນຊ່ວຍໃຫ້ຮັກສາ ແລະ ພັດທະນາລະບົບຕ່ອງໂສ້ການເຊື່ອມໂຍງລະຫວ່າງວິສາຫະກິດ, ລະຫວ່າງວິສາຫະກິດແລະລູກຄ້າ, ປະກອບສ່ວນຢ່າງຫຼວງຫຼາຍ ເພື່ອຫຼຸດຜ່ອນຜົນກະທົບທາງລົບ ຍ້ອນການຂາດຕອນຂອງລະບົບຕ່ອງໂສ້ການສະໜອງ.
ສິ່ງທ້າທາຍຈຳນວນໜຶ່ງ
ທີໜຶ່ງ, ໃນສະພາບການທີ່ການແຜ່ລະບາດຂອງໂຄວິດ-19 ຖືກຄວບຄຸມຢ່າງທັນການ, ຫວຽດນາມຈຳເປັນຕ້ອງນຳສະເໜີນະໂຍບາຍທີ່ສົມເຫດສົມຜົນ ເພື່ອຟື້ນຟູເສດຖະກິດ ແລະ ກະກຽມແຫຼ່ງກຳລັງເພື່ອຮັບມືກັບພະຍາດລະບາດອື່ນໆ ທີ່ອາດຈະເກີດຂຶ້ນ; ການລົງທຶນພາກລັດຍັງຄົງເປັນປັດໄຈສຳຄັນໃນການເຕີບໂຕເສດຖະກິດ, ຢ່າງໃດກໍຕາມ ການຊຸກຍູ້ການລົງທຶນພາກລັດບໍ່ພຽງແຕ່ສຸມໃສ່ການເປີດໂຄງການທີ່ຫຼາກຫຼາຍເທົ່ານັ້ນ ແຕ່ຍັງຕ້ອງມີການກວດກາ, ຕິດຕາມກວດກາຢ່າງຮອບຄອບ ເພື່ອຮັບປະກັນປະສິດທິຜົນໃນໄລຍະຍາວ.
ທີສອງ, ໃນຂະບວນການປະຕິບັດສົນທິສັນຍາສາກົນ ແລະພັນທະກໍລະນີດ້ານການຄຸ້ມຄອງສິ່ງແວດລ້ອມ, ຫວຽດນາມຍັງປະສົບກັບຄວາມຫຍຸ້ງຍາກຈາກບັນຫາພາຍໃນ. ຍົກຕົວຢ່າງເຊັ່ນ, ກ່ຽວກັບບັນຫາການຕໍ່ສູ້ກັບການປ່ຽນແປງສະພາບດິນຟ້າອາກາດ, ຫວຽດນາມຍັງບໍ່ທັນອອກກອບກົດໝາຍທີ່ສົມບູນຕາມມາດຖານສາກົນ ເພື່ອປະຕິບັດຄຳໝັ້ນສັນຍາຕໍ່ສູ້ກັບການປ່ຽນແປງສະພາບດິນຟ້າອາກາດ.
ທີສາມ, ການແຜ່ລະບາດຂອງໂຄວິດ-19 ສະແດງໃຫ້ເຫັນເຖິງຄວາມບອບບາງແລະ ຄວາມແຕກຫັກງ່າຍ ຂອງລະບົບຕ່ອງໂສ້ການສະໜອງທົ່ວໂລກ. ເຖິງວ່າລະບົບຕ່ອງໂສ້ການສະໜອງຈະໄດ້ຮັບການປັບໂຄງສ້າງໃໝ່ໃນເບື້ອງຕົ້ນ, ແຕ່ໃນຄວາມເປັນຈິງແລ້ວ ວິສາຫະກິດອຸດສາຫະກຳຂອງຫວຽດນາມ ສ່ວນໃຫຍ່ຍັງນ້ອຍ ແລະ ບໍ່ສາມາດເຂົ້າຮ່ວມຢ່າງເລິກເຊິ່ງໃນຕ່ອງໂສ້ມູນຄ່າໄດ້. ຕາມກະຊວງອຸສາຫະກຳແລະການຄ້າ, ໃນປະຈຸບັນ ຫວຽດນາມມີວິສາຫະກິດປະມານ 2.000 ແຫ່ງທີ່ຜະລິດອາໄຫຼ່ ແລະ ສ່ວນປະກອບ, ໃນນັ້ນ ມີວິສາຫະກິພຽງປະມານ 300 ແຫ່ງເທົ່ານັ້ນ ທີ່ເຂົ້າຮ່ວມໃນຕ່ອງໂສ້ການສະໜອງ. ການປະຍຸກໃຊ້ວິທະຍາສາດ ແລະເຕັກໂນໂລຊີ, ໂດຍສະເພາະ ອີຄອມເມີຊ ຍັງບໍ່ທັນໄດ້ຮັບການນຳໃຊ້ຢ່າງເຕັມທີ່ ສົ່ງຜົນໃຫ້ຮູບແບບທຸລະກິດສົ່ງອອກຂອງບໍລິສັດຫວຽດນາມເຂົ້າເຖິງຕະຫຼາດຜູ້ບໍລິໂພກໄດ້ຊ້າ, ຂະບວນການຄ້າສິນຄ້າດຳເນີນໄປຢ່າງຊ້າໆ, ສົ່ງຜົນກະທົບໂດຍກົງຕໍ່ການເຄື່ອນໄຫວສົ່ງອອກ. ທາດແທ້ຂອງກິດຈະກໍາການຄົ້ນຄວ້າປະດິດສ້າງຕ້ອງມີຄວາມສ່ຽງຢ່າງຫຼາຍ, ດັ່ງນັ້ນວິສາຫະກິດຈຶ່ງຕ້ອງຍອມຮັບຄວາມສ່ຽງ ແລະ ລົງທຶນໃນການຄົ້ນຄວ້າ ແລະ ການພັດທະນາຫຼາຍຂຶ້ນ.
ສາມາດເຫັນໄດ້ວ່າ, ການແຜ່ລະບາດຂອງໂຄວິດ-19 ສົ່ງຜົນກະທົບຢ່າງກວ້າງຂວາງເຖິງທຸກດ້ານຂອງເສດຖະກິດໂລກ, ດ້ວຍການປ່ຽນແປງຢ່າງໄວວາແລະຫຼາກຫຼາຍ. ການຄ້າສາກົນລົງຄ້ອຍຍ້ອນການຢຸດຊະງັກຂອງຕ່ອງໂສ້ການສະໜອງ, ຂະແໜງການບໍລິການກໍຫຼຸດລົງຢ່າງຫຼາຍ. ບັນດາວິສາຫະກິດ, ໂດຍສະເພາະວິສາຫະກິດຂະໜາດກາງແລະຂະໜາດນ້ອຍ ຕ້ອງປະເຊີນກັບການກະທົບທາງລົບ, ພິເສດແມ່ນ ການລົ້ມລະລາຍ, ການຢຸດຊະງັກຂອງການຜະລິດ. ພຶດຕິກໍາຂອງຜູ້ບໍລິໂພກ ແລະ ການຄ້າມີແນວໂນ້ມທີ່ຈະປ່ຽນແປງ, ຄວາມຍືນຍົງ ແລະ ປະສິດທິພາບ (ການບໍລິໂພກສີຂຽວ, ການບໍລິໂພກແບບວົງກົມ, ການຫຼຸດຜ່ອນການປ່ອຍອາຍພິດເຮືອນແກ້ວ) ໄດ້ກາຍເປັນທ່າອ່ຽງຂອງໂລກ. ຄຽງຄູ່ກັບຜົນກະທົບທາງດ້ານເສດຖະກິດ-ການຄ້າແລ້ວ, ການແຜ່ລະບາດຂອງພະຍາດໂຄວິດ-19 ໄດ້ປັບໂຄງສ້າງແລະຊຸກຍູ້ທ່າອ່ຽງການຄ້າສາກົນ. ການປ່ຽນແປງແລະການປັບຕົວໃນການຄ້າສາກົນ ໃນໄລຍະປະຈຸບັນ ມີຜົນກະທົບຢ່າງກວ້າງຂວາງຕໍ່ການເຄື່ອນໄຫວເສດຖະກິດ ແລະການຄ້າຂອງຫວຽດນາມ. ທ່າອ່ຽງການຄ້າໃໝ່ຄ່ອຍໆປະກົດຂຶ້ນ, ໂດຍສະເພາະ: 1- ອີຄອມເມີຊມີການເຕີບໂຕຢ່າງແຂງແຮງ ແລະ ກາຍເປັນທ່າອ່ຽງບຸລິມະສິດ; 2- ການຄ້າສາກົນຊຸກຍູ້ການພັດທະນາຕາມທິດທາງການຮ່ວມມືທາງດ້ານດິຈິຕອນ; 3- ການຄ້າມຸ່ງສູ່ການພັດທະນາແບບຍືນຍົງ; 4- ການຫັນປ່ຽນແລະການປັບໂຄງສ້າງຕ່ອງໂສ້ການສະໜອງໄປສູ່ຄວາມໜ້າເຊື່ອຖື ຄວາມປອດໄພ ແລະ ຄວາມຍືນຍົງ; 5- ໃຫ້ບຸລິມະສິດການຮ່ວມມືລະຫວ່າງສອງປະເທດ, ພາກພື້ນ ແລະ ກຸ່ມບໍລິສັດ ໃນຂະນະທີ່ໂລກາພິວັດຊ້າລົງ. ທ່າອ່ຽງເຫຼົ່ານີ້ນຳມາເຊິ່ງໂອກາດ ແລະ ສິ່ງທ້າທາຍຫຼາຍຢ່າງໃຫ້ແກ່ຫວຽດນາມ; ການໃຊ້ປະໂຫຍດຈາກໂອກາດ ແລະ ການແກ້ໄຂບັນຫາຄວາມທ້າທາຍ ຈະຊຸກຍູ້ໃຫ້ເສດຖະກິດປັບຕົວໄດ້ໄວ, ເຂົ້າຮ່ວມຢ່າງເລິກເຊິ່ງກ່ວາອີກ ໃນຕ່ອງໂສ້ການສະໜອງລະດັບໂລກ ຂອງສິນຄ້າແລະບໍລິການ, ພັດທະນາຕາມທິດທາງຍືນຍົງ, ສີຂຽວ ແລະ ເປັນມິດກັບສິ່ງແວດລ້ອມ./.
------------------------
(1) ຖູຍ ຫ່ຽນ: “ຄວາມທ້າທາຍໃນການບັນລຸເປົ້າໝາຍການເຕີບໂຕຂອງ ຈີດີພີ 6,5% - 7% ໃນໄລຍະປີ 2021-2025”, ໜັງສືພິມເອເລັກໂຕຣນິກຂອງສຳນັກຂ່າວສານຫວຽດນາມ, ວັນທີ 14 ຕຸລາ 2022, https://www.vietnamplus.vn/thach-thuc-khi-dat-tang-truong-gdp-tu-657-giai-doan-20212025/823685.vnp
(2) ຟ້າມ ແຮັ້ງ: “ການຄ້າໂລກບັນລຸລະດັບສູງສຸດເປັນປະຫວັດການທີ 28.500 ຕື້ໂດລາສະຫະລັດໃນປີ 2021, ແຕ່ອາດຈະຫຼຸດລົງໃນປີ 2022”, ເວັບໄຊຂອງສະຖາບັນວິທະຍາສາດສະຖິຕິ, ວັນທີ 24 ກຸມພາ 2022, https://vienthongke.vn/thuong-mai-toan-cau-dat-muc-cao-ky-luc-285-nghin-ty-do-la-vao-nam-2021-nhung-co-the-giam-xuong-vao-nam-2022/
(3) ກຸ່ມ EFTA ປະກອບດ້ວຍ 4 ປະເທດຄື ສະວິດ, ນອກແວ, ອຽກລັງ, ເລັກເຕນສະເຕນ.
- ບົດນີ້ໄດ້ລົງພິມໃນວາລະສານກອມມູນິດ, ສະບັບທີ 1011 (ເດືອນເມສາ 2023)
