ຮອຍປະທັບທາງການທູດຂອງຫວຽດນາມ ໃນປີ 2022
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນ ຝູ ຈ້ອງ ຕ້ອນຮັບທ່ານເລຂາທິການອົງການສະຫະປະຊາຊາດ ອານໂຕນີໂອ ກູເຕີແຣດ ທີ່ມາຢາມຫວຽດນາມຢ່າງເປັນທາງການ ເນື່ອງໃນໂອກາດສະເຫຼີມສະຫຼອງ 45 ປີແຫ່ງການຫວຽດນາມເຂົ້າເປັນສະມາຂິກ ຂອງອົງການສະຫະປະຊາຊາດ _ ພາບ: TTXVN
ໂລກກໍາລັງກ້າວສູ່ໄລຍະໃໝ່
ເມື່ອເບິ່ງຄືນຫຼັງໄປໃນປີ 2022, ໂລກມີການປ່ຽນແປງທີ່ໃຫຍ່ຫຼວງ ແລະ ສັບສົນຫຼາຍຢ່າງ, ລວມທັງການພັດທະນາທີ່ບໍ່ເຄີຍເກີດຂຶ້ນມາກ່ອນ. ສັນຕິພາບ, ການຮ່ວມມື ແລະ ການເຊື່ອມໂຍງ ເພື່ອການພັດທະນາ ແມ່ນຄວາມປາຖະໜາລວມກັນຂອງບັນດາປະເທດ, ປະຊາຊາດ, ແຕ່ໂລກກໍ່ປະເຊີນກັບສິ່ງທ້້າທາຍຫຼາຍປະການ. ການແຂ່ງຂັນທາງຍຸດທະສາດລະຫວ່າງບັນດາປະເທດໃຫຍ່ ເກີດຂຶ້ນຢ່າງດຸເດືອດ ແລະ ຮຸນແຮງກວ່າແຕ່ກ່ອນ, ໃນນັ້ນ, ການປະທະກັນລະຫວ່າງລັດເຊຍ ແລະ ຢູເຄຮນ ໄດ້ສົ່ງຜົນກະທົບຢ່າງແຮງ ຕໍ່ສະຖານະການຄວາມໝັ້ນຄົງ, ການເມືອງ ແລະ ເສດຖະກິດ ຂອງໂລກ, ຊຸກຍູ້ການແຂ່ງຂັນດ້ານອາວຸດໃນຫຼາຍປະເທດ. ການຮ່ວມມື, ການຕໍ່ສູ້ກັນໃນເວທີປາໄສພະຫຸພາຄີໃນຫຼາຍແຫ່ງ ພ້ອມກັບການເຕົ້າໂຮມກຳລັງທີ່ສັບສົນຂຶ້ນເລື້ອຍໆ. ຄຽງຄູ່ກັບຄວາມທ້າທາຍດ້ານຄວາມໝັ້ນຄົງແບບດັ້ງເດີມ (ການປະທະກັນທາງອາວຸດ, ຊົນເຜົ່າ, ຄວາມບໍ່ໝັ້ນຄົງທາງສັງຄົມແລະການເມືອງ, ການຂັດແຍ້ງທາງດິນແດນ...) ນັ້ນ, ຄວາມທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ, ໂດຍສະເພາະແມ່ນ ການປ່ຽນແປງຂອງດິນຟ້າອາກາດ ແລະ ໂລກລະບາບ ທີ່ເກີດຂຶ້ນຢ່າງຮຸນແຮງຫຼາຍຂຶ້ນ.
ໂດຍພື້ນຖານແລ້ວ ໂລກໄດ້ປ່ຽນຈາກການຮັບມື ໄປສູ່ການຄວບຄຸມ ແລະ ການປັບຕົວຢ່າງປອດໄພ ກັບການແຜ່ລະບາດຂອງໂຄວິດ-19. ການຄ້າສາກົນ, ການເມືອງ ແລະ ເສດຖະກິດ-ສັງຄົມ ກັບເຂົ້າສູ່ພາວະເປັນປົກກະຕິໂດຍພື້ນຖານແລ້ວ. ຢ່າງໃດກໍ່ຕາມ, ຂະບວນການຟື້ນຟູຍັງປະສົບກັບຫຼາຍບັນຫາ ເນື່ອງຈາກຜົນກະທົບທີ່ຍືດເຍື້ອຈາກການແຜ່ລະບາດຂອງໂຄວິດ-19. ເສດຖະກິດໂລກເວົ້າລວມ ແລະ ເສດຖະກິດຂອງຫຼາຍປະເທດ ຍັງປະສົບກັບຄວາມຫຍຸ້ງຍາກ ແລະ ການເຕີບໂຕທີ່ຕໍ່າ ຄວບຄູ່ກັບອັດຕາເງິນເຟີ້ສູງ, ລະບົບຕ່ອງໂສ້ການສະໜອງທົ່ວໂລກ ຍັງບໍ່ຟື້ນຕົວເຕັມສ່ວນ, ຄວາມໝັ້ນຄົງດ້ານພະລັງງານ ແລະ ຄວາມໝັ້ນຄົງດ້ານສະບຽງອາຫານ ຍັງປະເຊີນກັບສິ່ງທ້າທາຍຫຼາຍຢ່າງ.
ການເປີດປະຕູຄືນໃໝ່ຂອງປະເທດສ່ວນໃຫຍ່ ໄດ້ສ້າງຄວາມສະດວກໃຫ້ແກ່ການແລກປ່ຽນ ແລະ ການຮ່ວມມືສາກົນ. ບັນດາການເຊື່ອມໂຍງເສດຖະກິດ, ໂດຍສະເພາະ ການເຊື່ອມໂຍງພາກພື້ນ ແລະ ອະນຸພາກພື້ນ ໄດ້ຮັບການຊຸກຍູ້ຢ່າງແຂງແຮງ ເພື່ອສົ່ງເສີມການຟື້ນຟູເສດຖະກິດ ພາຍຫຼັງການແຜ່ລະບາດຂອງໂຄວິດ-19. ຂະບວນການປັບໂຄງສ້າງເສດຖະກິດຄືນໃໝ່ ສືບຕໍ່ໄດ້ຮັບການຊຸກຍູ້ ໂດຍການປະຕິວັດອຸດສາຫະກຳຄັ້ງທີ 4, ການແຂ່ງຂັນທາງດ້ານຍຸດທະສາດລະຫວ່າງບັນດາປະເທດໃຫຍ່ ແລະ ຄວາມຕ້ອງການອັນຮີບດ່ວນເພື່ອການພັດທະນາແບບຍືນຍົງແລະປົກຫຸ້ມ; ໃນນັ້ນ, ທ່າອ່ຽງຂອງການເປັນເຈົ້າຕົນເອງທາງຍຸດທະສາດ, ການຫັນເປັນດິຈິຕອນ, ການເຕີບໂຕສີຂຽວ ແລະ ການຫັນປ່ຽນລະບົບຕ່ອງໂສ້ການສະໜອງ ໄດ້ດຳເນີນໄປຢ່າງແຮງ.
ສະພາບການສາກົນໃນປີ 2022 ດ້ວຍບັນດາຈຸດດີແລະຂໍ້ເສຍຂອງມັນ ໄດ້ສົ່ງຜົນສະທ້ອນເຖິງຫວຽດນາມໃນຫຼາຍດ້ານ, ເຮັດໃຫ້ວຽກງານການຕ່າງປະເທດ ແລະ ການທູດມີຄວາມໜັກໜ່ວງ ແລະ ສັບສົນກວ່າອີກ.
ການທູດຂອງຫວຽດນາມເກັບກ່ຽວຜົນສຳເລັດໃໝ່
ດ້ວຍຄວາມປະທັບໃຈທີ່ສຳຄັນຫຼາຍຢ່າງ
ທີໜຶ່ງ, ສືບຕໍ່ຮັກສາສະຖານະການການຕ່າງປະເທດທີ່ເອື້ອອຳນວຍຕໍ່ການພັດທະນາ ແລະ ການປ້ອງກັນປະເທດຊາດ.
ບັນດາກິດຈະກຳການຕ່າງປະເທດທີ່ສຳຄັນ ໄດ້ຮັບການຈັດຕັງໃນເວລາທີ່ເໝາະສົມ ດ້ວຍນະໂຍບາຍທີ່ຖືກຕ້ອງ ໄດ້ຊ່ວຍເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ຮັດແໜ້ນມິດຕະພາບ ແລະ ສ້າງແຮງຜັກດັນໃໝ່ ໃນການນຳການພົວພັນກັບບັນດາຄູ່ຮ່ວມມື ໄປສູ່ທິດທາງທີ່ຖືກຕອ້ງຢ່າງເລິກເຊິ່ງ, ໂດຍສະເພາະປະເທດເພື່ອນບ້ານໃກ້ຄຽງ, ຄູ່ຮ່ວມມືທີ່ສຳຄັນ, ເພື່ອນມິດທີ່ເປັນມູນເຊື້ອ ແລະ ຄູ່ຮ່ວມທີ່ມີທ່າແຮງ.
ປີ 2022, ບັນດາການຢ້ຽມຢາມ, ການໂອ້ລົມທາງໂທລະສັບ ຂອງການນຳພັກ ແລະ ລັດ ຫວຽດນາມ ເຖິງບັນດາປະເທດຄື: ຈີນ, ລາວ, ກຳປູເຈຍ, ປະເທດສະມາຊິກອາຊຽນ, ອາເມລິກາ, ຍີ່ປຸ່ນ, ສ.ເກົາຫຼີ, ອົດສະຕຣາລີ, ໂຮນລັງ...; ການເຂົ້າຮ່ວມໃນຫຼາຍອົງການ ແລະ ເວທີປາໄສສາກົນທີ່ສຳຄັນ, ເຊັ່ນ: ສະຫະປະຊາຊາດ, ອາຊຽນ, ເວທີປາໄສການຮ່ວມມືດ້ານເສດຖະກິດອາຊີປາຊີຟິກ (APEC), ສະພາລະຫວ່າງລັດຖະສະພາ ແຫ່ງສະມາຄົມປະຊາຊາດອາຊີຕາເວັນອອກສ່ຽງໃຕ້ (AIPA)..., ພ້ອມຜູ້ນຳຂັ້ນສູງຂອງຫຼາຍປະເທດມາຢ້ຽມຢາມຫວຽດນາມ(1) ໄດ້ສະແດງໃຫ້ເຫັນພາບພົດທີ່ມີຊີວິດຊີວາໃນດ້ານການຕ່າງປະເທດ ແລະ ການທູດ ເຊິ່ງດຶງດູດຄວາມສົນໃຈ ແລະ ການສະໜັບສະໜູນຈາກຄວາມຄິດເຫັນສາທາລະນະໃນປະເທດ ແລະ ຕ່າງປະເທດ. ນີ້ແມ່ນຜົນຂອງຂະບວນການຜັນຂະຫຍາຍປະຕິບັດ ແນວທາງການຕ່າງປະເທດທີ່ກອງປະຊຸມໃຫຍ່ຄັ້ງທີ 13 ຂອງພັກຢ່າງແຂງແຮງ, ປະກອບສ່ວນປັບປຸງສະພາບແວດລ້ອມສັນຕິພາບ, ສະຖຽນລະພາບ, ອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ, ຍົກສູງບົດບາດ ຕຳແໜ່ງ ແລະ ກຽດຊື່ສຽງຂອງຫວຽດນາມໃນເວທີໂລກ.
ຊາບຊຶມແຜນນະໂຍບາຍປົກປັກຮັກສາປະເທດແຕ່ຕົ້ນ ແຕ່ໄກ, ການທູດຫວຽນາມໄດ້ຈັດການແກ້ໄຂບັນຫາທີ່ເກີດຂຶ້ນກ່ຽວກັບຊາຍແດນແລະດິນແດນ ຢ່າງເໝາະສົມ ແລະ ທັນການ; ພ້ອມກັນນັ້ນ, ຢຶດໝັ້ນໃນການຊຸກຍູ້ການສົນທະນາແລະການເຈລະຈາ ແລະ ບັນລຸໄດ້ບັນດາໝາກຜົນສຳຄັນທີ່ສຸດ ກ່ຽວກັບການກຳນົດຊາຍແດນແລະການປັກຫຼັກໝາຍຊາຍແດນ ບົນພື້ນຖານເຄົາລົບກົດໝາຍສາກົນ, ຜ່ານນັ້ນ ປັບປຸງຮັດແໜ້ນເສັ້ນຊາຍແດນແຫ່ງສັນຕິພາບ ມິດຕະພາບ ການຮ່ວມມື ແລະ ການພັດທະນາ, ສ້າງເງື່ອນໄຂອຳນວຍຄວາມສະດວກໃຫ້ແກ່ການຮັກສາສະພາບແວດລ້ອມສັນຕິພາບ ແລະ ການພັດທະນາຂອງປະເທດ.
ຄຽງຄູ່ກັນນັ້ນ, ຂະແໜງການທູດໄດ້ປະສານງານຢ່າງແໜ້ນແຟ້ນ ກັບທຸກຂັ້ນແລະຂະແໜງການຕ່າງໆ ເພື່ອປົກປ້ອງພື້ນຖານແນວຄິດຢ່າງເດັດດ່ຽວ ແລະ ຕໍ່ສູ້ກັບການເຄື່ອນໄຫວທີ່ຕ້ານພັກແລະລັດ ໃນໜ້າຊື່ການຕ່າງປະເທດ; ພ້ອມກັນນັ້ນ, ຊຸກຍູ້ການສົນທະນາແລະການຮ່ວມມື ເພື່ອໃຫ້ປະຊາຄົມສາກົນສາມາດເຂົ້າໃຈແນວທາງ ນະໂຍບາຍ ແລະ ຄວາມສຳເລັດຂອງຫວຽດນາມໃນດ້ານປະຊາທິປະໄຕ ສິດທິມະນຸດ ແລະ ສາສະໜາ ໄດ້ຢ່າງຖືກຕ້ອງ.
ທີສອງ, ການທູດທາງເສດຖະກິດໄດ້ປະກອບສ່ວນສຳຄັນເຂົ້າໃນການຊຸກຍູ້ການຟື້ນຟູ ແລະ ການພັດທະນາເສດຖະກິດ-ສັງຄົມ.
ໂດຍເຂົ້າໃຈແຜນນະໂຍບາຍການທູດທາງເສດຖະກິດຢ່າງເລິກເຊິ່ງວ່າ ເປັນໜ້າທີ່ພື້ນຖານແລະໃຈກາງຂອງການທູດຫວຽດນາມ, ຂະແໜງການທູດໄດ້ປະສານງານຢ່າງໃກ້ຊິດກັບກະຊວງ, ຄະນະ, ຂະແໜງການ ແລະ ທ້ອງຖິ່ນຕ່າງໆ ເພື່ອເປັນເຈົ້າການແລະຕັ້ງໜ້າຊຸກຍູ້ບັນດາເນື້ອໃນເສດຖະກິດ ໃນການເຄື່ອນໄຫວການຕ່າງປະເທດ, ໂດຍສະເພາະການທູດຂັ້ນສູງ, ຜ່ານນັ້ນ ໄດ້ປະສົບຄວາມສຳເລັດໃນການລົງນາມສັນຍາຫຼາຍສະບັບ ແລະ ໂຄງການຮ່ວມມືທີ່ສຳຄັນ ເຊິ່ງກໍ່ໃຫ້ເກີດຜົນປະໂຫຍດຫຼາຍຢ່າງໃຫ້ແກ່ເສດຖະກິດ-ສັງຄົມ.
ການທູດທາງເສດຖະກິດໄດ້ຕິດຕາມຈຸດສູນກາງການຄຸ້ມຄອງເສດຖະກິດ-ສັງຄົມຂອງລັດຖະບານຢ່າງໃກ້ຊິດ, ສວຍໂອກາດຢ່າງມີໄຫວພິບເມື່ອບັນດາປະເທດເປີດປະເທດຄືນໃໝ່, ຍາດແຍ່ງເອົາຜົນປະໂຫຍດຈາກສັນຍາການຄ້າເສລີທີ່ໄດ້ລົງນາມ ແລະ ທ່າອ່ຽງການພັດທະນາໃໝ່ໃນໂລກ ຢ່າງມີປະສິດທິຜົນ ເພື່ອຂະຫຍາຍແລະເພີ່ທະວີການຮ່ວມມືທາງເສດຖະກິດກັບຫຼາຍປະເທດ, ໜູນຊ່ວຍບັນດາທ້ອງຖິ່ນ ແລະ ວິສາຫະກິດຫວຽດນາມ ຍົກສູງປະສິດທິຜົນດ້ານເສດຖະກິດການຕ່າງປະເທດ ແລະ ການເຊື່ອມໂຍງເສດຖະກິດສາກົນ ດ້ວຍຄຳຂວັນ “ຖືປະຊາຊົນ, ທ້ອງຖິ່ນ ແລະ ທຸລະກິດເປັນສູນກາງແຫ່ງການບໍລິການ”. ການທູດທາງເສດຖະກິດໄດ້ປະກອບສ່ວນຢ່າງຕັ້ງໜ້າເຂົ້າໃນຄວາມໝັ້ນຄົງຂອງເສດຖະກິດມະຫາພາກ, ຊຸກຍູ້ການຟື້ນຟູ ແລະ ພັດທະນາເສດຖະກິດ. ໃນປີ 2022, ການເຕີບໂຕຂອງ ຈີດີພີ ຂອງປະເທດສູງກວ່າ 8%, ການເບີກຈ່າຍເງິນລົງທຶນໂດຍກົງຈາກຕ່າງປະເທດກວ່າ 22 ຕື້ໂດລາສະຫະລັດ, ມູນຄ່າການນຳເຂົ້າແລະສົ່ງອອກສູງເປັນປະຫວັດການ 732 ຕື້ໂດລາສະຫະລັດ, ສືບຕໍ່ຢູ່ໃນກຸ່ມ 25 ປະເທດເສດຖະກິດແຖວໜ້າຂອງໂລກທາງດ້ານການຄ້າ,... ນີ້ແມ່ນບັນດາຜົນງານສຳຄັນ ທີ່ມີຄວາມໝາຍຫຼາຍດ້ານ ໃນສະພາບເສດຖະກິດ, ການຄ້າ ແລະ ການລົງທຶນຂອງໂລກຫຼຸດລົງ, ເສດຖະກິດຂອງຫຼາຍປະເທດໃນໂລກປະສົບກັບຄວາມຫຍຸ້ງຍາກ.
ທີສາມ, ຖານະຕຳແໜ່ງ ແລະ ກຽດສັກສີຂອງຫວຽດນາມ ສືບຕໍ່ໄດ້ຮັບການຍົກສູງຂຶ້ນໃນເວທີສາກົນ.
ໃນການຜັນຂະຫຍາຍແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ ສັນຕິພາບ ມິດຕະພາບ ການຮ່ວມມືແລະການພັດທະນ, ຫວຽດນາມໄດ້ເປັນເຈົ້າການແລະຕັ້ງໜ້າປະກອບສ່ວນທີ່ສຳຄັນ ເຂົ້າໃນຄວາມພະຍາຍາມລວມ ຂອງປະຊາຄົມສາກົນ, ໂດຍສະເພາະແມ່ນ ໃນການຮັກສາສັນຕິພາບ, ຕ້ານກັບການປ່ຽນແປງດິນຟ້າອາກາດ, ປ້ອງກັນແລະຄວບຄຸມພະຍາດ ແລະ ການພັດທະນາແບບຍືນຍົງ. ການມີສ່ວນຮ່ວມໃນການແກ້ໄຂບາງບັນຫາສາກົນທີ່ສຳຄັນ, ສຸລະສຽງ, ຂໍ້ລິເລີ່ມ, ການປະພຶດແລະວິທີການແກ້ໄຂທີ່ເໝາະສົມ ແລະ ສົມເຫດສົມຜົນຂອງຫວຽດນາມ ດ້ວຍຈິດໃຈສະເໝີພາບ ເປັນມິດສັນຕິ ມະນຸດສະທຳ ແລະ ເຄົາລົບກົດໝາຍສາກົນ ໄດ້ຮັບຄວາມເຫັນອົກເຫັນໃຈ ແລະ ການສະໜັບສະໜູນຂອງປະຊາຄົມໂລກ. ຍ້ອນເຫດນັ້ນ, ຫວຽດນາມສືບຕໍ່ໄດ້ຮັບເລືອກເຂົ້າເປັນສະມາຊິກ ຂອງອົງການຈັດຕັ້ງສາກົນທີ່ສຳຄັນ ຫຼາຍແຫ່ງ, ເຊັ່ນ ໄດ້ຮັບເລືອກເປັນຄັ້ງທີ 2 ໃຫ້ດຳລົງຕຳແໜ່ງສະພາສິດທິມະນຸດແຫ່ງສະຫະປະຊາຊາດ ໃນໄລຍະປີ 2023-2025, ດຳລົງຕຳແໜ່ງຮອງປະທານສະມັດຊາໃຫຍ່ສະຫະປະຊາຊາດສະໄໝທີ 77, ໄດ້ຮັບເລືອກໃຫ້ເປັນຄະນະກຳມະການລະຫວ່າງລັດຖະບານຂອງອະນຸສັນຍາວ່າດ້ວຍການຄຸ້ມຄອງມໍລະດົກວັດທະນະທຳທີ່ບໍ່ມີຕົວຕົນ ປີ 2023 ຂອງອົງການການສຶກສາ, ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ (UNESCO) ວາລະປີ 2022-2026.
ທີສີ່, ຍູ້ແຮງແລະຍົກສູງຄຸນນະພາບຂອງການຄົ້ນຄວ້າ, ການຄາດຄະເນ ແລະ ໃຫ້ຄຳປຶກສາດ້ານການຕ່າງປະເທດ.
ປີ 2022, ຂະແໜງການທູດໄດ້ສຳເລັດຫຼາຍໂຄງການສຳຄັນ ເພື່ອແນໃສ່ຜັນຂະຫຍາຍແນວທາງການຕ່າງປະເທດ ຂອງກອງປະຊຸມໃຫຍ່ຄັ້ງທີ 13 ຂອງພັກ ເຊິ່ງໄດ້ວາງທິດທາງ, ມາດຕະການທີ່ສຳຄັນແລະຍາວນານ ສຳລັບວຽກງານການຕ່າງປະເທດ ແລະ ຂະແໜງການທູດ ໃນເວລາທີ່ຈະມາເຖິງ. ຄຽງຄູ່ກັນນັ້ນ, ໄດ້ປະສານງານຢ່າງແໜ້ນແຟ້ນ ກັບບັນດາກະຊວງ ແລະ ຂະແໜງການທີ່ກ່ຽວຂ້ອງ ເພື່ອໃຫ້ຄຳແນະນຳທັນທີ ກ່ຽວກັບແຜນນະໂຍບາຍ ແລະ ມາດຕະການທີ່ເໝາະສົມ ສຳລັບບັນຫາສາກົນທີ່ສັບສົນ, ຜ່ານນັ້ນ ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ, ຍາດແຍ່ງກາລະໂອກາດປັບປຸງການຮ່ວມມື, ຫຼຸດຜ່ອນຜົນກະທົບດ້ານລົບ ຈາກຄວາມຜັນຜວນໃນໂລກ.
ທີຫ້າ, ການທູດທາງວັດທະນະທຳສົມທົບຢ່າງມີປະສິດທິຜົນ ກັບການທູດທາງເສດຖະກິດ ແລະ ການສື່ສານການຕ່າງປະເທດ ສືບຕໍ່ໂຄສະນາພາບພົດຂອງປະເທດ ຜູ້ຄົນ ວັດທະນະທຳ ແລະ ຄວາມສຳເລັດດ້ານການພັດທະນາ ຂອງຫວຽດນາມ ຢ່າງກວ້າງຂວາງໃນທົ່ວໂລກ.
ປີ 2022, ຫວຽດນາມໄດ້ຈັດຕັ້ງການເຄື່ອນໄຫວຫຼາຍຢ່າງ ເພື່ອເຊີດຊູໃຫ້ກຽດປະທານ ໂຮ່ຈີມິນ ຢູ່ຕ່າງປະເທດ, ປະສົບຄວາມສຳເລັດໃນການລະດົມປະຊາຄົມໂລກໃຫ້ຍອມຮັບມໍລະດົກຫຼາຍຢ່າງຂອງຫວຽດນາມ(2). ໂດຍເຂົ້າໃຈແຈ້ງແຜນນະໂຍບາຍປັບປຸງຄວາມສາມັກຄີທົ່ວປວງຊົນທັງຊາດ, ວຽກງານກ່ຽວກັບຊາວຫວຽດນາມທີ່ອາໄສຢູ່ຕ່າງປະເທດ ສືບຕໍ່ໄດ້ຮັບການຜັນຂະຫຍາຍຢ່າງຕັ້ງໜ້າ ດ້ວຍຫຼາຍໂຄງການເຊື່ອມໂຍງ ແລະ ດຶງດູດຊາວຫວຽດນາມທີ່ອາໄສຢູ່ຕ່າງປະເທດ ເຂົ້າຮ່ວມການປະກອບສ່ວນສ້າງສາບ້ານເກີດເມືອງນອນ, ປະເທດຊາດ ແລະ ພ້ອມກັນນັ້ນ ກໍຕັ້ງໜ້າເບິ່ງແຍງພີ່ນ້ອງຮ່ວມຊາດໃຫ້ມີຊີວິດເປັນປົກກະຕິ ແລະ ພັດທະນາ. ວຽກງານຄຸ້ມຄອງພົນລະເມືອງໄດ້ຮັບການຜັນຂະຫຍາຍຢ່າງທັນການ ແລະ ມີປະສິດທິຜົນ, ເຊັ່ນ: ການອົບພະຍົບພົນລະເມືອງ ແລະ ຊາວຕ່າງປະເທດຫຼາຍພັນຄົນຢ່າງປອດໄພໃນຢູແກຼນ, ການປົກປ້ອງຊາວປະມົງ, ເຮືອປະມົງ, ສິດທິ ແລະ ຜົນປະໂຫຍດທີ່ຖືກຕ້ອງຕາມກົດໝາຍແລະຊອບທຳຂອງພົນລະເມືອງຫວຽດນາມຢູ່ຕ່າງປະເທດ.
ເສີມຂະຫຍາຍເອກະລັກທາງການທູດ “ໄມ້ໄຜ່ຫວຽດນາມ”
ສະຫາຍເລຂາທິການໃຫຍ່ພັກກອມູນິດຫວຽດນາມ ຫງວຽນ ຝູ ຈ້ອງ ໄດ້ຢືນຢັນວ່າ, ບັນດາຜົນງານດ້ານການຕ່າງປະເທດ ແລະ ການທູດຂອງຫວຽດນາມ ແມ່ນ “ຈຸດສະຫວ່າງ”(3) ໃນບັນດາຜົນງານລວມຂອງປະເທດໃນປີ 2022. ຜົນສຳເລັດດັ່ງກ່າວ ແມ່ນຍ້ອນແນວທາງການຕ່າງປະເທດທີ່ຖືກຕ້ອງຂອງພັກແລະລັດ, ພາລະກິດ ທ່າແຮງ ຖານະຕຳແໜ່ງ ແລະ ກຽດສັກສີຂອງປະເທດ ພາຍຫຼັງກວ່າ 35 ປີແຫ່ງການປ່ຽນແປງໃໝ່; ແມ່ນການຕົກຜະລຶກຂອງຄວາມເຫັນດີເຫັນພ້ອມ ແລະ ຄວາມພະຍາຍາມຂອງທົ່ວພັກ ທົ່ວປວງຊົນ ກອງທັບ ແລະ ລະບົບການເມືອງ ໃນການດຳເນີນວຽກງານການຕ່າງປະເທດ, ໃນນັ້ນ ມີຄວາມພະຍາຍາມ ແລະ ການປະກອບສ່ວນຢ່າງບໍ່ຢຸດຢັ້ງ ຂອງພະນັກງານ ສະມາຊິກພັກໃນຂະແໜງການທູດ.
ຜົນງານຂອງການຕ່າງປະເທດແລະການທູດໃນປີ 2022 ກໍ່ຄືແຕ່ກອງປະຊຸມໃຫຍ່ຄັ້ງທີ 13 ຂອງພັກມາເຖິງດຽວນີ້ ໄດ້ຢືນຢັນວ່າ: ເອກະລັກທາງການທູດ “ໄມ້ໄຜ່ຫວຽດນາມ” ມີພື້ນຖານມາຈາກແນວຄິດການທູດໂຮ່ຈີມິນ ພ້ອມດ້ວຍຮີດຄອງປະເພນີເອກະລັກທາງວັດທະນະທຳ ແລະ ການທູດທີ່ເປັນມິດສັນຕິຂອງຊາດ ເຊິ່ງເໝາະສົມກັບເງື່ອນໄຂສະເພາະຂອງຫວຽດນາມ ແລະ ຕອບສະໜອງຄວາມຕ້ອງການພັດທະນາຂອງປະເທດໃນໄລຍະປະຈຸບັນ. ຕໍ່ໜ້າການປ່ຽນແປງທີ່ສັບສົນຂອງສະຖານະການສາກົນ, ການທູດ “ໄມ້ໄຜ່ຫວຽດນາມ” ຍັງຄົງຮັກສາທີ່ຕັ້ງທີ່ໝັ້ນຄົງ, ກ້າຫານ, ລຸກຂຶ້ນໄດ້ຍ້ອນ “ຮາກທີ່ໝັ້ນຄົງ” ຄືຄວາມຢຶດໝັ້ນໃນເອກະລາດ, ເປັນເຈົ້າຕົນເອງ, ຫັນການພົວພັນເປັນຫຼາຍກ້ຳຫຼາຍຝ່າຍ, ເພື່ອຜົນປະໂຫຍດຂອງຊາດ-ປະເທດຊາດ, ຍຶດຖືຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ; ພ້ອມກັນນັ້ນ, ມີຄວາມຍືດຫຍຸ່ນ, ໄຫວພິບ, ປະດິດສ້າງ ແລະ ການເຄື່ອນໄຫວໃນຍຸດໂທບາຍ ເພື່ອປັບຕົວໃຫ້ເຂົ້າກັບສະຖານະການໃໝ່ ຕາມຄໍາຂວັນທີ່ວ່າ “ຖືເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ການຮ່ວມມືຢ່າງສະເໝີພາບ ແລະ ຜົນປະໂຫຍດຮ່ວມກັນ.
ເອກະລັກທາງການທູດ “ໄມ້ໄຜ່ຫວຽດນາມ” ໄດ້ຮັບການເສີມຂະຫຍາຍ ແລະ ສະແດງອອກຢ່າງຈະແຈ້ງ ໃນແຕ່ລະກິດຈະກຳການຕ່າງປະເທດ, ໂດຍສະເພາະແມ່ນ ໃນກິດຈະກຳການຕ່າງປະເທດຂັ້ນສູງ, ລວມທັງການປະພຶດກັບແຕ່ລະຄູ່ຮ່ວມມື ແລະ ໃນແຕ່ລະກົນໄກ, ເວທີປາໄສພະຫຸພາຄີ. ຜ່ານນັ້ນ, ທັງຢືນຢັນວ່າ ຫວຽດນາມກ້າຫານ ຈິງໃຈ ມີເມດຕາ ຊື່ສັດ ເຊື່ອຖືໄດ້ ແລະ ມີຄວາມຮັບຜິດຊອບ, ແລະ ພ້ອມທັງຮັກສາສະຖານະການນະໂຍບາຍການຕ່າງປະເທດໂດຍລວມທີ່ເອື້ອອຳນວຍຕໍ່ການພັດທະນາປະເທດ ແລະ ປົກປັກຮັກສາປະເທດຊາດ ໃນສະພາບທີ່ມີຫຼາຍປັດໄຈບໍ່ໝັ້ນຄົງ ແລະ ບໍ່ແນ່ນອນຂອງໂລກ.
ພຶດຕິກຳຕົວຈິງດ້ານການຕ່າງປະເທດ ແລະ ການທູດໃນປີ 2022 ສືບຕໍ່ເຮັດໃຫ້ບັນດາບົດຮຽນອັນລ້ຳຄ່າ ຂອງການຕ່າງປະເທດ ເລິກເຊິ່ງກວ່າອີກ, ດັ່ງທີ່ສະຫາຍເລຂາທິການໃຫຍ່ ຫງວຽນ ຝູ ຈ້ອງ ໄດ້ສະຫຼຸບໃນກອງປະຊຸມການຕ່າງປະເທດແຫ່ງຊາດໃນເດືອນທັນວາ 2021, ພ້ອມດຽວກັນນັ້ນ ໄດ້ເພີ່ມບົດຮຽນໃໝ່ຄື: 1- ຕໍ່ໜ້າສະຖານະການທີ່ຜັນແປຢ່າງສັບສົນ, ຫຍຸ້ງຍາກ ແລະ ທ້າທາຍ, ຈຳເປັນຕ້ອງສະຫງົບສະຕິ ໃຈເຢັນ, ສະຫຼາດຄ່ອງແຄ້ວ ແລະ ຮອບຄອບ ເພື່ອຈັດການກັບການພົວພັນຕ່າງປະເທດຢ່າງເໝາະສົມ ບົນພື້ນຖານການຮັກສາເອກະລາດ, ຄວາມເປັນເຈົ້າຕົນເອງ ແລະ ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ, ເຄົາລົບກົດໝາຍສາກົນ; 2- ບໍ່ລົດລະໃນການປ່ຽນແປງໃໝ່ ປະດິດສ້າງ, ການປັບຕົວເຂົ້າກັບສະຖານະການໃໝ່, ພະຍາຍາມຊອກຫາວິທີການໃໝ່, ທິດທາງໃໝ່, ຂົງເຂດໃໝ່, ຈັບເອົາໂອກາດຢ່າງອ່ອນໄຫວ, “ຫັນປ່ຽນໄພຂົ່ມຂູ່ເປັນໂອກາດ”; 3- ປັບປຸງຍົກສູງຄວາມສາມາດໃນການຄົ້ນຄ້ວາ, ຄາດຄະເນ, ທີ່ປຶກສາດ້ານການຕ່າງປະເທດ, ປະເມີນສະຖານະການຢ່າງຖືກຕ້ອງ, “ຮູ້ຕົວເອງ, ຮູ້ຈັກຄົນອື່ນ”, “ຮູ້ການເວລາ, ຮູ້ຈັກສະຖານະການ” ເພື່ອຍືດຫຍຸ່ນ “ເຂັ້ມແຂງ, ອ່ອນໂຍນ”, “ຮູ້ກ້າວໜ້າ, ຮູ້ຈັກຖອນຕົວ” ເພື່ອຈະມີຄວາມໄຫວພິບ ໃນການພັດທະນາຢ່າງໄວວາ ແລະ ສັບສົນ ຂອງສະຖານະການພາກພື້ນແລະໂລກ; 4- ຕ້ອງເອົາໃຈໃສ່ເປັນພິເສດ ເຖິງການກໍ່ສ້າງແລະປັບປຸງພັກຢ່າງຮອບດ້ານ ທາງດ້ານການເມືອງ ແນວຄິດ ຄຸນສົມບັດສິນທຳ ການຈັດຕັ້ງ ແລະ ພະນັກງານຢູ່ໃນຂະແໜງການທູດ.
ສືບຕໍ່ກໍ່ສ້າງຂະແໜງການທູດທີ່ປອດໃສ, ໝັ້ນຄົງເຂັ້ມແຂງ,
ເປັນມືອາຊີບ, ຮອບດ້ານ ແລະ ທັນສະໄໝ
ປີ 2023 ແມ່ນປີຫົວລ້ຽວຫົວຕໍ່ທີ່ມີບົດບາດສຳຄັນທີ່ສຸດ ໃນການປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກ. ເຖິງວ່າປະເທດໄດ້ຮັບຜົນງານອັນໃຫຍ່ຫຼວງໃນປີທີ່ຜ່ານມາ, ແຕ່ກໍ່ຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍໃຫຍ່ຫຼາຍຢ່າງ. ໃນຂະນະນັ້ນ, ຄາດຄະເນວ່າ, ສະພາບການໃນໂລກ ແລະ ພາກພື້ນຈະສືບຕໍ່ມີການປ່ຽນແປງຢ່າງສັບສົນ ແລະ ບໍ່ສາມາດຄາດຄະເນໄດ້ ໃນດ້ານພູມສາດ-ການເມືອງ, ເສດຖະກິດ-ສັງຄົມ.
ມະຕິກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດວ່າ: ປະຕິບັດຢ່າງຕໍ່ເນື່ອງແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ, ຫັນການພົວພັນຕ່າງປະເທດເປັນຫຼາຍຝ່າຍ ຫຼາຍຮູບແບບ; ເປັນເຈົ້າການແລະຕັ້ງໜ້າ ໃນການເຊື່ອມໂຍງສາກົນ ຢ່າງຮອບດ້ານ ແລະ ເລິກເຊິ່ງ; ເປັນເພື່ອນ, ເປັນຄູ່ຮ່ວມມືທີ່ໄວ້ວາງໃຈໄດ້ ແລະ ເປັນສະມາຊິດທີ່ຫ້າວຫັນ ແລະ ມີຄວາມຮັບຜິດຊອບ ໃນປະຊາຄົມສາກົນ(4).
ເພື່ອສືບຕໍ່ຜັນຂະຫຍາຍແນວທາງການຕ່າງປະເທດທີ່ສະເໝີຕົ້ນສະເໝີປາຍ ແລະ ຖືກຕ້ອງດັ່ງກ່າວ ແລະ ເສີມຂະຫຍາຍທ່າແລະພະລັງໃໝ່ ຂອງປະເທດ, ຂະແໜງການທູດໄດ້ກຳແໜ້ນບັນດາມະຕິ, ບົດສະຫຼຸບ, ຄຳສັ່ງຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ສະພາແຫ່ງຊາດ ແລະ ລັດຖະບານ, ພ້ອມກັນກັບບັນດາຂັ້ນ ແລະ ຂະແໜງການ ເພື່ອປະຕິບັດບັນດາທິດທາງ ແລະ ໜ້າທີ່ຕໍ່ໄປນີ້ໃຫ້ໄດ້ເປັນຢ່າງດີ:
ທີ່ໜຶ່ງ, ສືບຕໍ່ປັບປຸງສະຖານະການການຕ່າງປະເທດໃຫ້ແໜ້ນແຟ້ນກ່ວາອີກ ເພື່ອແນໃສ່ສ້າງເງື່ອນໄຂທີ່ເອື້ອອຳນນວຍຕໍ່ການປະຕິບັດບັນດາເປົ້າໝາຍພັດທະນາປະເທດ, ປົກປັກຮັກສາເອກະລາດ ອະທິປະໄຕ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ ໃນຄວາມສຳພັນໃກ້ຊິດກັບໜ້າທີ່ຮັກສາສັນຕິພາບ ແລະ ສະຖຽນລະພາບ.
ປະສານສົມທົບການທູດຂອງພັກ, ການທູດຂອງລັດ, ການທູດປະຊາຊົນ ກັບການຕ່າງປະເທດໃນທຸກຂົງເຂດ ຢ່າງແໜ້ນແຟ້ນ ລະຫວ່າງສູນກາງແລະທ້ອງຖິ່ນ ເພື່ອເສີມຂະຫຍາຍກຳລັງແຮງສັງລວມ ໃນການຜັນຂະຫຍາຍກິດຈະກຳການຕ່າງປະເທດ, ໂດຍສະເພາະແມ່ນ ການຕ່າງປະເທດຂັ້ນສູງ, ຜ່ານນັ້ນ ຊຸກຍູ້ບັນດາການພົວພັນການຕ່າງປະເທດເຂົ້າສູ່ລວງເລິກ, ມີເນື້ອແທ້ ແລະ ມີປະສິດທິຜົນ.
ສືບຕໍ່ພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານ ກັບບັນດາປະເທດເພື່ອນບ້ານໃກ້ຄຽງ; ພ້ອມກັນນັ້ນ, ເປັນເຈົ້າການແລະຕັ້ງໜ້າ ໃນການເປີດກວ້າງ ແລະ ເພື່ມທະວີການພົວພັນ ກັບບັນປະເທດຄູ່ຮ່ວມມື, ໂດຍສະເພາະ ປະເທດຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ປະເທດເພື່ອນມິດດັ້ງເດີມ ແລະ ຄູ່ຮ່ວມທີ່ມີທ່າແຮງ. ປະຕິບັດໜ້າທີ່ສາກົນຢ່າງດີ, ສືບຕໍ່ປະກອບສ່ວນທີ່ຕັ້ງໜ້າແລະ ມີຄວາມຮັບຜິດຊອບ ເຂົ້າໃນບັນດາອົງການ ແລະ ເວທີປາໄສຫຼາຍຝ່າຍທີ່ສຳຄັນ, ພິເສດແມ່ນ ສະຫະປະຊາຊາດ, ອາຊຽນ, ເອເປກ, ອະນຸພາກພື້ນແມ່ນ້ຳຂອງ ແລະອື່ນໆ, ຜ່ານນັ້ນ ປັບປຸງແລະຍົກສູງຖານະບົດບາດ ແລະ ກຽດສັກສີຂອງປະເທດຫວຽດນາມ. ສືບຕໍ່ສະແດງສຽງທີ່ແຂງແຮງ ແລະ ຫຼັກໝັ້ນນະໂຍບາຍການຕ່າງປະເທດທີ່ແຂງຂັນ, ສອດຄ່ອງກັບທີ່ຕັ້ງ ແລະ ອຳນາດໃໝ່ຂອງປະເທດ, ໂດຍສະເພາະຢ່າງຍິ່ງ ໃນບັນຫາຜົນປະໂຫຍດຫຼັກ ແລະ ຜົນປະໂຫຍດຍຸດທະສາດຂອງຫວຽດນາມ.
ທີສອງ, ຜັນຂະຫຍາຍຢ່າງຮອບດ້ານ ແລະ ເຊື່ອມໂຍງບັນດາເສົາຄ້ຳທາງການທູດຢ່າງແໜ້ນແຟ້ນ, ເຮັດໃຫ້ວຽກງານການຕ່າງປະເທດ ແລະ ການທູດ ເປັນພະລັງຂັບເຄື່ອນທີ່ແຂງແຮງ, ປະກອບສ່ວນສຳຄັນເຂົ້າໃນການພັດທະນາປະເທດຢ່າງວ່ອງໄວ ແລະ ຍືນຍົງ.
ຈັດຕັ້ງປະຕິບັດການທູດດ້ານເສດຖະກິດຢ່າງມີປະສິດທິຜົນ ເພື່ອຮັບໃຊ້ການພັດທະນາຂອງປະເທດຮອດປີ 2030. ໃນນັ້ນ, ຈຸດສຸມແມ່ນ ຊຸກຍູ້ການເປີດກວ້າງຕະຫຼາດສົ່ງອອກ, ດຶງດູດເງິນລົງທຶນທີ່ກ່ຽວຂ້ອງກັບເຕັກໂນໂລຊີສູງ, ສົມທົບຢ່າງມີປະສິດທິຜົນກັບແຫຼ່ງທຶນພາຍໃນປະເທດ ເພື່ອຮັບໃຊ້ການປ່ຽນແປງໃໝ່ຮູບແບບການເຕີບໂຕ, ກໍ່ສ້າງພື້ນຖານເສດຖະກິດທີ່ເປັນເອກະລາດ ເປັນເຈົ້າຕົນເອງ ໄປຄຽງຄູ່ກັບການເຊື່ອມໂຍງສາກົນ ຢ່າງຮອບດ້ານ ເລິກເຊິ່ງ ແລະ ມີປະສິດທິຜົນ. ໃຊ້ປະໂຫຍດຈາກຂໍ້ຕົກລົງ ແລະ ສັນຍາການຄ້າເສລີທີ່ມີຜົນບັງຄັບໃຊ້; ເປັນເຈົ້າການໃນການເຂົ້າຮ່ວມບັນດາຂໍ້ລິເລີ່ມຫຼາຍຝ່າຍ ກ່ຽວກັບການເຊື່ອມໂຍງ ແລະ ການເຊື່ອມຕໍ່ເສດຖະກິດ ທີ່ສອດຄ່ອງກັບຜົນປະໂຫຍດ ແລະ ເງື່ອນໄຂຂອງຫວຽດນາມ. ສືບຕໍ່ຜັນຂະຫຍາຍຢ່າງຮອບດ້ານ ແລະເຂັ້ມແຂງ ການທູດທາງວັດທະນະທຳ, ການສື່ຂ່າວການຕ່າງປະເທດ, ວຽກງານຊາວຫວຽດນາມຢູ່ຕ່າງປະເທດ, ການປົກປ້ອງພົນລະເມືອງ ແລະ ປົກປ້ອງສິດທິແລະຜົນປະໂຫຍດທີ່ຊອບທຳ ຖືກກົດໝາຍ ຂອງອົງການຈັດຕັ້ງ ແລະ ບຸກຄົນຫວຽດນາມ ໃນການເຊື່ອມໂຍງເຂົ້າກັບສາກົນ.
ທີສາມ, ຊຸກຍູ້ ແລະ ປັບປຸງຄຸນນະພາບການຄົ້ນຄ້ວາ, ການຄາດຄະເນ ແລະ ການໃຫ້ຄຳປຶກສາ ກ່ຽວກັບການຕ່າງປະເທດ, ຮັກສາຄວາມເປັນເຈົ້າການ ຕັ້ງໜ້າ ໃນໂລກທີ່ມີການປ່ຽນແປງ.
ຄຽງຄູ່ກັບການຕິດຕາມສະພາບການພາກພື້ນແລະສາກົນຢ່າງໃກ້ຊິດ ເພື່ອໃຫ້ຄຳແນະນຳແກ່ພັກແລະລັກໂດຍທັນທີ, ຕ້ອງສຸມໃສ່ຄົ້ນຄວ້າ ຕີລາຄາ ແລະ ຄາດຄະເນການປ່ຽນແປງໃນສະຖານະການໂລກແລະພາກພື້ນ, ທິດທາງເຄື່ອນໄຫວດ້ານນະໂຍບາຍ ແລະ ການພົວພັນຕ່າງປະເທດ ຂອງບັນດາຄູ່ຮ່ວມມືທີ່ສຳຄັນ, ທ່າອ່ຽງການເມືອງ, ເສດຖະກິດ, ວັດທະນະທຳ-ສັງຄົມ, ວິທະຍາສາດ-ເຕັກໂນໂລຊີໃນໂລກ, ໂດຍສະເພາະທ່າອ່ຽງການຫັນເປັນດິຈິຕອນ, ການຫັນເປັນສີຂຽວ, ການປ້ອງກັນແລະຄວບຄຸມໂລກລະບາດ, ສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ. ບົນພື້ນຖານນັ້ນ, ໃຫ້ຄຳແນະນຳ, ວາງແຜນຍຸດທະສາດ ນະໂຍບາຍ ແລະ ຂັ້ນຕອນນະໂຍບາຍ ການຕ່າງປະເທດ ທີ່ເໝາະສົມ.
ທີສີ່, ຕັດສິນໃຈສ້າງຂະແໜງການທູດໃຫ້ມີຄວາມປອດໃສ, ໝັ້ນຄົງເຂັ້ມແຂງ, ເປັນມືອາຊີບ, ຮອບດ້ານ ແລະ ທັນສະໄໝ.
ດ້ວຍບັນດາມາດຕະການທີ່ຄົບຊຸດ, ໂດຍລວມທັງສະເພາະໜ້າແລະຍາວນານ ກ່ຽວກັບການຈັດຕັ້ງກົງຈັກ, ພະນັກງານ, ພື້ນຖານວັດຖຸ, ແບບວິທີການດຳເນີນງານ ແລະອື່ນໆ, ການທູດຫວຽດນາມສືບຕໍ່ຊຸກຍູ້ການຊາບຊຶມ ແລະ ການປະຕິບັດຢ່າງເຂົ້ມງວດ ຕາມມະຕິແລະຂໍ້ສະຫຼຸບ ຂອງຄະນະບໍລິຫານງານສູນກາງ ກ່ຽວກັບການເພີ່ທະວີການກໍ່ສ້າງແລະປັບປຸງພັກ ຢ່ງເຂັ້ມງວດ; ເດັດດ່ຽວໃນການກິດກັ້ນແລະຍູ້ຖອຍ ຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ” ຢູ່ພາຍໃນ. ກວດຄືນ, ປັບປຸງ, ຍົກສູງຄວາມສາມາດໃນການຈັດຕັ້ງກົງຈັກ ຕາມທິດທາງກະທັດລັດຮັດກຸມ, ມີປະສິດທິພາບ ແລະ ປະສິດທິຜົນ. ຍົກສູງຄຸນນະພາບຂອງວຽກງານພະນັກງານ, ໂດຍສະເພາະ ໃນການຮັບສະໝັກ, ການຈັດວາງສັບຊ້ອນ, ການວາງແຜນ, ການຍົກຍ້າຍຜັດປ່ຽນ, ການອົບຮົມສຶກສາ, ການຝຶກຝົນ ແລະ ການຕີລາຄາພະນັກງານ ເພື່ອແນໃສ່ສ້າງຖັນແຖວພະນັກງານການທູດທີ່ຂະຫບາຍຕົວຮອບດ້ານ ທາງດ້ານການເມືອງ, ແນວຄິດ, ຄຸນສົມບັດສິນທຳ, ຄວາມກ້າຫານແລະມີສະຕິປັນຍາ, ທັນສະໄໝ, ເປັນມືອາຊີບທາງດ້ານແບບແຜນ ແລະວິທີເຮັດວຽກ, ມີຄວາມສາມາດກ້າວສູ່ລະດັບພາກພື້ນ ແລະ ສາກົນເທື່ອລະກ້າວ.
ພ້ອມກັບປະເທດ, ການທູດຫວຽດນາມພວມກ້າວເຂົ້າສູ່ໄລຍະໃໝ່ຂອງການພັດທະນາ ເຊິ່ງຕ້ອງການຄວາມຕັດສິນໃຈຢ່າງແຮງກ້າທີ່ຈະປ່ຽນໃໝ່ທັງແນວຄິດ ແລະ ການກະທຳ ເພື່ອສ້າງການຫັນປ່ຽນໃໝ່ທີ່ມີປະສິດທິຜົນສູງກວ່າສຳລັບວຽກງານການຕ່າງປະເທດ. ເຊື່ອມຊຶມເອກະລັກທາງການທູດ “ໄມ້ໄຜ່ຫວຽດນາມ” ແລະ ມູນເຊື້ອອັນສະຫງ່າງາມຂອງການທູດປະຕິວັດ, ເສີມຂະຫຍາຍສຸດຂີດ ຈິດໃຈຮັບໃຊ້ພັກແລະປະເທດຊາດ ແລະ ຮັບໃຊ້ປະຊາຊົນ, ດ້ວຍສັດທາ ບັນຍາກາດໃໝ່ ແລະ ຄວາມກ້າຫານທີ່ໄດ້ຖືກຫຼໍ່ຫຼອມຜ່ານການທົດສອບແລະຄວາມທຸກລຳບາກຫຼາຍຢ່າງ, ຂະແໜງການການທູດທັງໝົດ ພາຍໃຕ້ການນຳພາຂອງພັກ ຕັດສິນໃຈທິ່ຈະພະຍາຍາມສ້າງການທູດທີ່ສະອາດປອດໃສ, ໝັ້ນຄົງເຂັ້ມແຂງ, ເປັນມືອາຊີບ, ຮອບດ້ານ ແລະ ທັນສະໄໝ, ສືບຕໍ່ປະກອບສ່ວນອັນສົມກຽດເຂົ້າໃນພາລະກິດການພັດທະນາປະເທດ, ສ້າງສາແລະປົກປັກຮັກສາປະເທດຊາດກວຽດນາມ./.
---------------------
(1) ປີ 2022, ຫວຽດນາມໄດ້ຈັດຕັ້ງການເຄື່ອນໄຫວວຽກງານການຕ່າງປະເທດໂດຍກົງ, ທາງໂທລະສັບ ແລະ ທາງອອນໄລນ໌ຂອງບັນດາການນຳສຳຄັນ ເກືອບ 70 ກິດຈະກຳ.
(2) ປີ 2022, ອົງການການສຶກສາ, ວິທະຍາສາດ ແລະ ວັດທະນະທໍາ ສະຫະປະຊາຊາດ ໄດ້ຮັບຮອງເມືອງ ກາວແຫຼັງ (ແຂວງດົ່ງທ້າບ) ເປັນສະມາຊິກຂອງເຄືອຂ່າຍເມືອງແຫ່ງການຮຽນຮູ້ທົ່ວໂລກ; ສິລາຈາລຶກ ມາຍາຍ ແລະ ເອກະສານຮັ່ນໂນມ ຢູ່ໝູ່ບ້ານເຈືອງລຶວ ເປັນມໍລະດົກຄວາມຊົງຈຳຂອງໂລກ ໃນພາກພື້ນອາຊີປາຊີຟິກ.
(3) ສຳນັກຂ່າວສານຫວຽດນາມ: “ຄຳປາໄສຂອງເລຂາທິການໃຫຍ່ໃນກອງປະຊຸມຂອງລັດຖະບານກັບທ້ອງຖິ່ນ”, ໜັງສືພິມເອເລັກໂຕຼນິກ Vietnamplus, ອອກວັນທີ 3 ມັງກອນ 2023, https://www.vietnamplus.vn/phat-bieu-cua-tong-bi-thu-tai-hoi-nghi-chinh-phu-voi-dia-phuong/839295.vnp
(4) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 161-162.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1006 (ເດືອນມັງກອນ 2023).
