ກອງປະຊຸມສຸດຍອດເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 8 ເປັນການສ້າງປະຖົມປັດໃຈ ເພື່ອຊຸກຍູ້ການເຊື່ອມຕໍ່ລະຫວ່າງ ກຳປູເຈຍ-ລາວ-ຫວຽດນາມ
17:55, 03-12-2014
ວ.ກ.ອອນໄລ - ວັນທີ່ 25 ພະຈິກ 2014, ຢູ່ທີ່ນະຄອນຫຼວງວຽງຈັນ ແຫ່ງ ສປປ ລາວ, ກອງປະຊຸມສຸດຍອດເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 8 ໄດ້ດຳເນີນໄປຢ່າງເປັນທາງການ ແລະອັດລົງດ້ວຍຜົນສຳເລັດຢ່າງຈົບງາມ ຊຶ່ງມີການເຂົ້າຮ່ວມຂອງທ່ານ ຫງວຽນເຕິນຢຸງ ນາຍົກລັດຖະມົນຕີແຫ່ງ ສສ ຫວຽດນາມ, ທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ແລະ ສົມເດັດ ຮຸນເຊັນ ນາຍົກລັດຖະມົນຕີແຫ່ງລາຊະອານາຈັກກຳປູເຈຍ.
ກອງປະຊຸມໄດ້ສຸມໃສ່ທົບທວນຄວາມຄືບໜ້າ ແລະສິ່ງທ້າທາຍໃນການຈັດຕັ້ງປະຕິບັດ “ແຜນແມ່ບົດການພັດທະນາເສດຖະກິດ - ສັງຄົມ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຮອດປີ 2020 ສະບັບປັບປຸງ” ແລະ “ບົດບັນທຶກຄວາມຈຳກ່ຽວກັບບັນດານະໂຍບາຍບຸລິມະສິດ ແລະ ອຳນວນຄວາມສະດວກໃຫ້ແກ່ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ”.
ກອງປະຊຸມກໍ່ໄດ້ເຫັນດີເປັນເອກະພາບມາດຕະການອັນລະອຽດຈຳນວນໜຶ່ງ ແນໃສ່ຍົກສູງປະສິດທິຜົນການຮ່ວມມືເຊັ່ນ ສ້າງລາຍຊື່ບັນດາໂຄງການຮ່ວມມືບູລິມະສິດໃນເຂດສາມຫຼ່ຽມພັດທະນາ ເພື່ອຂົນຂວາຍດຶງດູດການລົງທຶນຈາກບັນດາປະເທດຄູ່ຮ່ວມທີ່ພັດທະນາ; ຄົ້ນຄວ້າເພື່ອກຳນົດຂໍ້ຕົກລົງລະຫວ່າງສາມປະເທດກ່ຽວກັບນະໂຍບາຍບຸລິມະສິດພິເສດ ໃຫ້ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ບົນພື້ນຖານສົມທົບລະຫວ່າງບັນດາຂໍ້ຕົກລົງສອງຝ່າຍ ແລະ ຂໍ້ຕົກລົງຫຼາຍຝ່າຍທີ່ມີຢູ່ແລ້ວ; ສ້າງແຜນແມ່ບົດພັດທະນາການທ່ອງທ່ຽວໃນເຂດສາມຫຼ່ຽມພັດທະນາ ເພື່ອສ້າງໃຫ້ມີບາດກ້າວຫັນປ່ຽນອັນສຳຄັນ ຂອງຂະແໜງການທ່ອງທ່ຽວສາມປະເທດ.
ກອງປະຊຸມກໍ່ໄດ້ເຫັນດີເປັນເອກະພາບມອບໃຫ້ບັນດາກະຊວງກະສິກຳຂອງສາມປະເທດ ດຳເນີນການແລກປ່ຽນແລະບູລະນະແຜນການພັດທະນາອຸດສາຫະກຳຢາງຢືດຂອງສາມປະເທດ ກຳປູເຈຍ, ລາວ, ຫວຽດນາມ ເພື່ອສະເໜີຕໍ່ກອງປະຊຸມຄະນະກຳມະການປະສານງານຮ່ວມຄັ້ງທີ 10, ພ້ອມກັນນັ້ນກໍ່ເພີ່ມທະວີການຮ່ວມມືດ້ານຄວາມສະຫງົບລະຫວ່າງປະເທດ, ພິເສດແມ່ນການປ້ອງກັນຕ້ານການຄ້າມະນຸດ, ຢາເສບຕິດ, ການກໍ່ອາຊະຍາກຳຂ້າມແດນ, ການແຜ່ລະບາດຂອງເຊື້ອພະຍາດຂ້າມແດນ ແລະ ຮ່ວມມືດ້ານການຫລຸດຜ່ອນໄພພິບັດທາງທຳມະຊາດ, ການເກັບກູ້ລະເບີດຍັງບໍ່ທັນແຕກທີ່ຕົກຄ້າງຫຼັງສົງຄາມ. ຊຸກຍູ້ບັນດາໂຄງການຮ່ວມມືພ້ອມກັນປົກປັກຮັກສາສິ່ງແວດລ້ອມ ແລະຄຸ້ມຄອງບັນດາແຫຼ່ງຊັບພະຍາກອນທຳມະຊາດ.
ກອງປະຊຸມສຸດຍອດເຂດສາມຫຼ່ຽມພັດທະນາ ຄັ້ງທີ 8 ດຳເນີນໄປໃນສະພາບທີ່ສາມປະເທດຫວຽດນາມ, ລາວ ແລະ ກຳປູເຈາ ລ້ວມແຕ່ກຳລັງຊຸກຍູ້ວິວັດການເຊື່ອມໂຍງກັບສາກົນ, ໃນນັ້ນການຮ່ວມມືລະຫວ່າງສາມປະເທດນັບມື້ເຂົ້າສູ່ລວງເລິກ ແລະມີປະສິດທິຜົນໃນທຸກຂົງເຂດ.
ກອງປະຊຸມນີ້ໄດ້ສຳເລັດສິ້ນສຸດລົງກ່ອນເວລາທີ່ປະຊາຄົມອາຊຽນເປັນຮູບເປັນຮ່າງຂຶ້ນໃນປີ 2015, ມັນສ້າງກຳລັງຊຸກດັນໃຫ້ການຮ່ວມມືລະຫວ່າງສາມປະເທດຂະຫຍາຍຕົວ ແນໃສ່ຈຸດໝາຍຫຍໍ້ສັ້ນຄວາມແຕກໂຕນກັນດ້ານການພັດທະນາ ແລະ ລຶບລ້າງຄວາມທຸກຍາກ, ເປີດກວ້າງການພົວພັນດ້ານການຄ້າ ການລົງທຶນ ແລະ ຍາດແຍ່ງໂອກາດຮ່ວມມືເພື່ອການພັດທະນາ ທີ່ມາຈາກການສ້າງຕັ້ງປະຊາຄົມອາຊຽນ ໃນປີ 2015.
ໃນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ນຳສະເໜີຂໍ້ສະເໜີແນະທີ່ສຳຄັນຫຼາຍຂໍ້ເພື່ອເປີດກວ້າງການຮ່ວມມືເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຊຶ່ງຝ່າຍລາວ ແລະກຳປູເຈຍ ໄດ້ຕີລາຄາສູງ ແລະ ເນື້ອໃນເຫຼົ່ານີ້ໄດ້ຖືກສ່ອງແສງຢູ່ໃນຖະແຫຼງການຮ່ວມຂອງກອງປະຊຸມ.
ພິເສດ, ກອງປະຊຸມໄດ້ເຫັນດີເປັນເອກະພາບກັບຂໍ້ສະເໜີຂອງທ່ານນາຍົກລັດຖະມົນຕີ ຫງວຽນເຕິນຢຸງ ກ່ຽວກັບການຍົກລະດັບ ແລະເປີດກວ້າງຂອບການຮ່ວມມືຂອງເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ແລະມອບໃຫ້ຄະນະກຳມະການປະສານງານຮ່ວມຄົ້ນຄວ້າສ້າງໂຄງການກ່ຽວກັບການເຊື່ອນຕໍ່ເສດຖະກິດສາມປະເທດ ເພື່ອສະເໜີຕໍ່ກອງປະຊຸມສຸດຍອດເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 9.
ໃນຂອບກອງປະຊຸມ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ເຂົ້າຢ້ຽມຄຳນັບທ່ານ ຈູມມາລີ ໄຊຍະສອນ ເລຂາທິການໃຫຍ່ພັກ ປປ ລາວ, ປະທານປະເທດແຫ່ງ ສປປ ລາວ, ພົບປະສົນທະນາກັບທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ແລະ ພົບປະກັບ ສົມເດັດ ຮຸນເຊັນ ນາຍົກລັດຖະມົນຕີແຫ່ງ ລາຊະອານາຈັກກຳປູເຈຍ ເພື່ອແລກປ່ຽນ, ຊຸກຍູ້ບັນດາບັນຫາການຮ່ວມມືລະຫວ່າງຫວຽດນາມ - ລາວ ແລະ ຫວຽດນາມ - ກຳປູເຈຍ.
ໃນບັນດາການພົບປະກັບການນຳຂັ້ນສູງຂອງລາວ, ສອງຝ່າຍໄດ້ຢືນຢັນສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະຜັນຂະຫຍາຍປະຕິບັດບັນດາກົນໄກຮ່ວມມືສອງຝ່າຍໃຫ້ມີປະສິດທິຜົນສູງ.
ສອງຝ່າຍຕີລາຄາສູງ ແລະ ຊົມເຊີຍບັນດາກະຊວງ ຂະແໜງການ ທ້ອງຖິ່ນຂອງສອງປະເທດ ທີ່ໄດ້ສົມທົບກັນຢ່າງແໜ້ນແຟ້ນ ເພື່ອປະຕິບັດຂໍ້ຕົກລົງຂອງກອງປະຊຸມຄະນະກຳມະການຮ່ວມມືລະຫວ່າງລັດຖະບານສອງປະເທດ ຄັ້ງທີ 36 ໃຫ້ໄດ້ເປັນຢ່າງດີ ແລະພວມຕັ້ງໜ້າສົມທົບກັນກະກຽມໃຫ້ແກ່ກອງປະຊຸມຄັ້ງທີ 37 ໃນຕົ້ນປີ 2015.
ສອງຝ່າຍຖືວ່າ ຄວນຕັ້ງໜ້າປະສານສົມທົບກັນໃນການຜັນຂະຫຍາຍບັນດາໂຄງການເຊື່ອນຕໍ່ທີ່ມີລັກສະນະຍຸດທະສາດລະຫວ່າງສອງປະເທດ ແລະສ້າງເງື່ອນໄຂອຳນວນຄວາມສະດວກໃຫ້ວິສາຫະກິດຂອງສອງປະເທດດຳເນີນການລົງທຶນ, ທຸລະກິດ.
ສອງຝ່າຍກໍ່ໄດ້ເຫັນດີເປັນເອກະພາບວ່າ ຄວນສຳເລັດໂດຍໄວການເຈລະຈາ ແລະ ເຊັນສັນຍາການຄ້າຫວຽດນາມ - ລາວສະບັບໃໝ່ ເພື່ອສ້າງຂອບນິຕິທຳໃຫ້ແກ່ການສູ້ຊົນຍົກລວມຍອດມູນຄ່າການຄ້າລະຫວ່າງສອງປະເທດຂຶ້ນເປັນ 2 ຕື້ໂດລາສະຫະລັດໃນປີ 2015.
ໃນການພົບປະກັບສົມເດັດ ຮຸນເຊັນ ນາຍົກລັດຖະມົນຕີແຫ່ງ ລາຊະອາຂາຈັກກຳປູເຈຍ, ສອງທ່ານນາຍົກລັດຖະມົນຕີໄດ້ຢືນຢັນຄວາມຕັດສິນໃຈຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວ, ຮັກສາການພົບປະຂັ້ນສູງ ແລະ ສືບຕໍ່ການຮ່ວມມືຢ່າງແໜ້ນແຟ້ນໃນບັນດາຂົງເຂດເສດຖະກິດ, ການຄ້າ, ການລົງທຶນ, ປ້ອງກັນຄວາມສະຫງົບ, ປ້ອງກັນປະເທດ...; ສູ້ຊົນຍົກລວມຍອດມູຄ່າການຄ້າສອງຝ່າຍຂຶ້ນເປັນ 5 ຕື້ໂດລາສະຫະລັດໃນປີ 2015.
ສອງຝ່າຍກໍ່ໄດ້ຢືນຢັນຄວາມຕັດສິນໃຈປະຕິບັດການແບ່ງເຂດປັກຫຼັກໝາຍຊາຍແດນເທິງໜ້າດິນໃຫ້ສຳເລັດໂດຍໄວ ເພື່ອປະກອບສ່ວນສ້າງເສັ້ນຊາຍແດນລະຫວ່າງສອງປະເທດເປັນຊາຍແດນແຫ່ງສັນຕິພາບ ມິດຕະພາບ ສະຖຽນລະພາບ ແລະການພັກທະນາ.
ທ່ານນາຍົກລັດຖະມົນຕີ ຫງວຽນເຕິນຢຸງ ຕີລາຄາສູງຕໍ່ການຮ່ວມມືຂອງລັດຖະບານກຳປູເຈຍ ໃນການຮັບປະກັນບັນດາສິດທິຖືກກົດໝາຍຂອງວົງຄະນາຍາດຊາວຫວຽດນາມທີ່ດຳລົງຊີວິດ ແລະທຳມາຫາກິນຢູ່ກຳປູເຈຍ. ທ່ານນາຍົກລັດຖະມົນຕີທັງສອງກໍ່ເຫັນດີເປັນເອກະພາບສືບຕໍ່ສ້າງເງື່ອນໄຂອຳນວຍຄວາມສະດວກ ແລະ ໃຫ້ການປະພຶດແບບສະເໜີພາບແກ່ພົນລະເມືອງຂອງກັນແລະກັນ./.
ສັງລວມໄດຍ: PV