ທ່ານ ຫງວຽນຊວນຝຸກ ນາຍົກລັດຖະມົນຕີແຫ່ງ ສສ ຫວຽດນາມ ເຂົ້າຮ່ວມກອງປະຊຸມສຸດຍອດ ຈີ7 ເປີດກວ້າງ
ວກ.ອອນໄລ - ແຕ່ວັນທີ 26 - 28 ພຶດສະພາ 2016, ທ່ານ ຫງວຽນຊວນຝຸກ ນາຍົກລັດຖະມົນຕີແຫ່ງ ສສ ຫວຽດນາມ ໄດ້ເຂົ້າຮ່ວມກອງປະຊຸມສຸດຍອດ ຈີ7 ເປີດກວ້າງ ແລະ ຢ້ຽມຢາມປະເທດ ຍີ່ປຸ່ນ ຕາມຄຳເຊີນຂອງທ່ານ ຊິນໂຊ ອາເບະ ນາຍົກລັດຖະມົນຕີ ຍີ່ປຸ່ນ. ນີ້ເປັນຄັ້ງທຳອິດໃນປະຫວັດສາດ 42 ປີ ຂອງກຸ່ມປະເທດ ຈີ7 ທີ່ຫວຽດນາມຖືກເຊີນເຂົ້າຮ່ວມກອງປະຊຸມສຸດຍອດ ຈີ7 ເປີດກວ້າງ, ເຊິ່ງເປັນການສະແດງໃຫ້ເຫັນເຖິງຄວາມຮັບຮູ້ຂອງ ຍີ່ປຸ່ນ ແລະ ບັນດາປະເທດ ຈີ7 ຕໍ່ທີ່ຕັ້ງຂອງຫວຽດນາມໃນເວທີໂລກ.
ການທີ່ ຍີ່ປຸ່ນ ແລະ ບັນດາປະເທດ ຈີ7 ເຊີນຫວຽດນາມເຂົ້າຮ່ວມເປັນຄັ້ງທຳອິດໃນກອງປະຊຸມສຸດຍອດ ຈີ7 ເປີດກວ້າງນີ້ ຍັງສະແດງໃຫ້ເຫັນເຖິງຄວາມໄວ້ວາງໃຈ, ການຕີລາຄາສູງຕໍ່ບົດບາດ ແລະ ຄວາມຮັບຜິດຊອບຂອງຫວຽດນາມ ໃນການແກ້ໄຂບັນດາບັນຫາຂອງພາກພື້ນ ແລະ ສາກົນ ເຊັ່ນການສູ້ຊົນເພື່ອບັນລຸບັນດາເປົ້າໝາຍການພັດທະນາແບບຍຶນຍົງ (SDGs), ເພີ່ມທະວີການເຊື່ອມສຳພັນເສດຖະກິດ, ແກ້ໄຂສະພາບການເຕີບໂຕຊ້າລົງຂອງເສດຖະກິດໂລກ, ພັດທະນາລຸ່ມແມ່ນ້ຳຂອງ, ແລະ ກໍ່ສ້າງສິ່ງແວດລ້ອມແຫ່ງສັນຕິພາບ ແລະ ສະຖຽນລະພາບ ໃຫ້ແກ່ການພັດທະນາ.
ໃນເວລາສາມວັນ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ດຳເນີນແຜນການເຮັດວຽກຢ່າງຮີບດ່ວນ ດ້ວຍການເຄື່ອນໄຫວ 19 ຄັ້ງ, ທັງສອງຝ່າຍ ແລະ ຫຼາຍຝ່າຍ, ປະກອບດ້ວຍບັນດາວາລະການປະຊຸມຂອງກອງປະຊຸມສຸດຍອດ ຈີ7 ເປີດກວ້າງ; ພົບປະຫາລືກັບນາຍົກລັດຖະມົນຕີ ຍີ່ປຸ່ນ ຊິນໂຊ ອາເບະ; ດຳເນີນການພົບປະຫາລື ສົນທະນາ ແລກປ່ຽນ ກັບບັນດາການນຳເຊັ່ນ ປະທານາທິບໍດີຝຣັ່ງ ຟຣັງຊວາ ໂຮລັງ, ນາຍົກລັດຖະມົນຕີອັງກິດ ເດວິດ ແຄເມີຣອນ, ນາຍົກລັດຖະມົນຕີເຢຍລະມັນ ອັງເກລາ ແມເຄິນ, ນາຍົກລັດຖະມົນຕີການາດາ ຈັດສະຕິນ ທຣູໂດ, ປະທານາທິບໍດີສະຫະລັດອາເມຣິກາ ບາຣັກ ໂອບາມາ, ນາຍົກລັດຖະມົນຕີອີຕາລີ ມັດເຕໂອ ເຣນຊີ, ປະທານາທິບໍດີສີລັງກາ, ເລຂາທິການໃຫຍ່ສະຫະປະຊາຊາດ ບັນ ກີມູນ, ປະທານຄະນະກຳມາທິການເອີຣົບ ແລະ ປະທານຄະນະມົນຕີເອີຣົບ, ຜູ້ອຳນວຍການໃຫຍ່ກອງທຶນການເງິນສາກົນ (IMF), ເລຂາທິການໃຫຍ່ອົງການຮ່ວມມືເສດຖະກິດແລະການພັດທະນາ (OECD), ປະທານທະນາຄານໂລກ ຈິນ ຊອງກິມ, ຜູ້ວ່າການລາຊະການແຂວງ ອາຍຈິ…; ເຂົ້າຮ່ວການສົນທະນານະໂຍບາຍເສດຖະກິດຂັ້ນສູງ ຫວຽດນາມ - ຍີ່ປຸ່ນ, ໃຫ້ການຕ້ອນຮັບປະທານອົງການຮ່ວມມືສາກົນຍີ່ປຸ່ນ (JICA), ປະທານອົງການສົ່ງເສີມການຄ້າຍີ່ປຸ່ນ (JETRO) ແລະກໍໄດ້ໃຊ້ເວລາເພື່ອພົບປະ ສົນທະນາກັບຜູ້ຕາງໜ້າວິສາຫະກິດຍີ່ປຸ່ນ ເຊັ່ນ ບໍລິສັດ ເອ.ແອນ.ເອ. ໂຮນດິງ ຈຳກັດ., ປະທານ ຜູ້ອຳນວຍການບໍລິສັດ ມິດຊູບີຊິ, ໄປຢາມຟາມກະເສດ ໂຢໂກຢາມາ.
ໃນເວທີກອງປະຊຸມສຸດຍອດ ຈີ7 ເປີດກວ້າງ ແລະ ບັນດາການພົບປະຫາລືສອງຝ່າຍ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ເນັ້ນ: ຫວຽດນາມຍາມໃດກໍ່ພະຍາຍາມປັບປຸງ, ຂະຫຍາຍສາຍພົວພັນກັບທຸກປະເທດໃນໂລກບົນຈິດໃຈ “ເປັນເພື່ອນ, ເປັນຄູ່ຮ່ວມມືທີ່ໄວ້ວາງໃຈໄດ້ ແລະ ເປັນສະມາຊິກທີ່ມີຄວາມຮັບຜິດຊອບ ຂອງປະຊາຄົມໂລກ”.
ຢັ້ງຢືນຫຼັກໝັ້ນກ່ຽວກັບສັນຕິພາບ, ສະຖຽນລະພາບ ແລະ ການພັດທະນາທີ່ຍືນຍົງ
ໃນບົດປາໄສທີ່ກອງປະຊຸມພາຍໃຕ້ຫົວຂໍ້ “ຄວາມໝັ້ນຄົງ ແລະ ວັດທະນາຖາວອນຢູ່ອາຊີ”, ທ່ານນາຍົກລັດຖະມົນຕີ ຫງວຽນຊວນຝຸກ ຢັ້ງຢືນຫວຽດນາມສະໜັບສະໜູນຂໍ້ສະເໜີຕ່າງໆ ຂອງຍີ່ປຸ່ນໃນລະບຽບວາລະການປະຊຸມ ແລະ ໄດ້ມີສ່ວນປະກອບອັນສຳຄັນເຂົ້າໃນເນື້ອໃນສົນທະນາຢູ່ທີ່ປະຊຸມ, ພິເສດແມ່ນການເຊື່ອມສຳພັນເສດຖະກິດ, ການປ່ຽນແປງສະພາບພູມິອາກາດ ແລະ ສັນຕິພາບ, ສະຖຽນລະພາບຢູ່ພາກພື້ນ ແລະ ໃນໂລກ.
ທ່ານນາຍົກລັດຖະມົນຕີ ຫງວຽນຊວນຝຸກ ເນັ້ນເຖິງຄະຕິບົດ: ເມື່ອມີສັນຕິພາບ, ສະຖຽນລະພາບ ຈຶ່ງມີການພັດທະນາ ແລະ ຄວາມວັດທະນາຖາວອນ; ບັນດາການເຄື່ອນໄຫວກະທຳແຕ່ຝ່າຍດຽວ, ຝືນກົດໝາຍສາກົນ ແລະ ຂໍ້ຕົກລົງພາກພື້ນພວມນາບຂູ່ຢ່າງຮ້າຍແຮງຕໍ່ສັນຕິພາບ ແລະ ສະຖຽນລະພາບໃນພາກພື້ນ... ທ່ານນາຍົກລັດຖະມົນຕີກໍ່ໄດ້ຍົກໃຫ້ເຫັນແຈ້ງວ່າ: ສັນຕິພາບ ແລະ ການພັດທະນາຂອງຫວຽດນາມຕິດແໜ້ນກັບສັນຕິພາບ ແລະ ຄວາມວັດທະນາຖາວອນລວມຂອງໂລກ. ຈະສາມາດຮັບປະກັນຄວາມຈະເລີນພັດທະນາ ແລະ ຂະຫຍາຍຕົວແບບຍືນຍົງຢູ່ຫວຽດນາມ, ອາຊີ ແລະ ໃນໂລກໄດ້ ກໍ່ຕໍ່ເມື່ອມີສິ່ງແວດລ້ອມສາກົນທີ່ມີສັນຕິພາບ ແລະ ສະຖຽນລະພາບ.
ເພື່ອສະແດງໃຫ້ເຫັນເຖິງຫຼັກໝັ້ນຂອງຫວຽດນາມກ່ຽວກັບສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ ຂອງພູມິພາກອາຊີ - ປາຊີຟິກເວົ້າໂດຍສະເພາະ ແລະ ຂອງທົ່ວໂລກເວົ້າລວມ, ທ່ານນາຍົກລັດຖະມົນຕີ ຫງວຽນຊວນຝຸກ ເນັ້ນ: ພວກເຮົາພວມຢືນຢູ່ຕໍ່ໜ້າບັນດາສິ່ງທ້າທາຍທີ່ນັບມື້ນັບໃຫຍ່ ຕໍ່ສັນຕິພາບ ແລະ ຄວາມສະຫງົບຂອງພາກພື້ນ, ກ່ອນອື່ນໝົດແມ່ນຄວາມສະຫງົບ, ຄວາມປອດໄພ ແລະ ເສລີພາບໃນການເດີນທະເລ, ເດີນອາກາດຢູ່ທະເລຕາເວັນອອກ. ບັນດາການເຄື່ອນໄຫວກະທຳແຕ່ຝ່າຍດຽວ, ຝືນກົດໝາຍສາກົນ ແລະ ຂໍ້ຕົກລົງພາກພື້ນ, ເຊັ່ນການຄູນສ້າງແນວປະກາລັງເປັນເກາະທຽມຂະໜາດໃຫຍ່, ເຮັດໃຫ້ສະພາບການດັ້ງເດີມປ່ຽນແປງໄປ ແລະ ເພີ່ມທະວີການປະກອບການທະຫານ ເຊິ່ງພວມນາບຂູ່ຢ່າງຮ້າຍແຮງຕໍ່ສັນຕິພາບ ແລະ ສະຖຽນລະພາບໃນພາກພື້ນ. ສະພາບການດັ່ງກ່າວນັ້ນ ມັນຮຽກຮ້ອງໃຫ້ບັນດາປະເທດທີ່ກ່ຽວຂ້ອງ ຕ້ອງອົດທົນອົດກັ້ນ, ແກ້ໄຂຂໍ້ພິພາດດ້ວຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982, ປະຕິບັດຕາມຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ເພີ່ມທະວີບັນດາມາດຕະການສ້າງຄວາມໄວ້ວາງໃຈ ແລະ ການທູດແບບປ້ອງກັນ, ກ້າວເຖິງການສຳເລັດປະມວມຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC).
ທ່ານນາຍົກລັດຖະມົນຕີ ຫງວຽນຊວນຝຸກ ໃຫ້ທັດສະນະວ່າ ບັນດາປະເທດ, ເປັນຕົ້ນແມ່ນບັນດາປະເທດໃນກຸ່ມ ຈີ7 ຄວນມີສຸລະສຽງ ແລະ ການກະທຳຕົວຈິງເພື່ອປະກອບສ່ວນອັນຕັ້ງໜ້າເຂົ້າໃນການສ້າງສິ່ງແວດລ້ອມແຫ່ງສັນຕິພາບ ສະຖຽນລະພາບ ແລະ ແກ້ໄຂບັນດາບັນຫາລວມຂອງໂລກ ກໍ່ຄືບັນຫາຢູ່ພາກພື້ນ; ພິເສດແມ່ນບັນດາເປົ້າໝາຍການພັດທະນາແບບຍືນຍົງ, ກໍ່ສ້າງໂຄງສ້າງພື້ນຖານ, ປ້ອງກັນແລະຕ້ານໄພທຳມະຊາດ, ຮັບມືກັບການປ່ຽນແປງສະພາບພູມິອາກາດ, ຕ້ານການກໍ່ການຮ້າຍ, ຄວາມໝັ້ນຄົງດ້ານສະບຽງອາຫານ, ແຫຼ່ງນ້ຳ, ການເດີນທະເລ, ການເດີນອາກາດ… ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມເຊື່ອໝັ້ນຢ່າງໜັກແໜ່ນ ຕໍ່ບົດບາດສຳຄັນຂອງບັນດາປະເທດໃນກຸ່ມ ຈີ7 ໃນການຊຸກຍູ້ຟື້ນຟູເສດຖະກິດໂລກ, ເຊື່ອມຕໍ່ການຄ້າ, ການລົງທຶນ ກໍ່ຄືແກ້ໄຂສິ່ງທ້າທາຍຕໍ່ການພັດທະນາຂອງທົ່ວໂລກໄດ້ຢ່າງມີປະສິດທິຜົນ ເພື່ອສິ່ງແວດລ້ອມແຫ່ງສັນຕິພາບ, ສະຖຽນລະພາບຢູ່ພູມິພາກອາຊີ-ປາຊີຟິກ ແລະ ໃນໂລກ.
ໂດຍແບ່ງປັນຄວາມເຫັນຂອງທ່ານນາຍົກລັດຖະມົນຕີ ຫງວຽນຊວນຝຸກ, ການນຳບັນດາປະເທດກຸ່ມ ຈີ7, ການນຳບັນດາປະເທດ ແລະ ອົງການຈັດຕັ້ງສາກົນທີ່ເຂົ້າຮ່ວມກອງປະຊຸມ ໄດ້ຮຽກຮ້ອງໃຫ້ເພີ່ມທະວີການຮ່ວມມື ເພື່ອຮັກສາຄວາມເຕີບໂຕຂອງໂລກ; ຮັບມືກັບໄພທຳມະຊາດ, ໄພແຫ້ງແລ້ງ; ຊ່ວຍໜູນໃຫ້ບັນດາປະເທດກຳລັງພັດທະນາ, ໃນນັ້ນມີບັນດາປະເທດອາຊຽນ ກໍ່ສ້າງໂຄງສ້າງພື້ນຖານຄຸນນະພາບສູງ, ເພີ່ມທະວີການເຊື່ອມຈອດ ແລະ ສຸດທ້າຍແມ່ນເພີ່ມທະວີການກໍ່ສ້າງຄວາມໄວ້ວາງໃຈ ເພື່ອແນໃສ່ແກ້ໄຂບັນດາຈຸດຮ້ອນຢູ່ພາກພື້ ແລະ ໃນໂລກ, ໃນນັ້ນມີຄວາມສະຫງົບ ຄວາມປອດໄພໃນການເດີນທະເລ ແລະ ເດີນອາກາດຢູ່ທະເລຕາເວັນອອກ ແລະ ທະເລຈີນຕາເວັນອອກ.
ທ່ານນາຍົກລັດຖະມົນຕີ ຫງວຽນຊວນຝຸກ ຊົມເຊີຍບັນດາປະເທດທີ່ມີຫຼັກໝັ້ນຕັ້ງໜ້າ, ສະໜັບສະໜູນຫວຽດນາມ ແລະ ອາຊຽນ ໃນການແກ້ໄຂຂໍ້ພິພາດຕ່າງໆດ້ວນສັນຕິວິທີ ຢູ່ທະເລຕາເວັນອອກ ສອດຄ່ອງກັບກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982, ຮັບປະກັນຄວາມສະຫງົບ, ຄວາມປອດໄພ, ເສລີພາບໃນການເດີນທະເລ ແລະ ເດີນອາກາດຢູ່ທະເລຕາເວັນອອກ, ປະກອບສ່ວນຮັກສາສັນຕິພາບ, ສະຖຽນລະພາບ ໃຫ້ແກ່ການພັດທະນາ ແລະ ວັດທະນາຖາວອນຢູ່ໃນພາກພື້ນ ແລະ ໃນໂລກ.
ຊຸກຍູ້ການພົວພັນສອງຝ່າຍ
ໃນການພົບປະຫາລືສອງຝ່າຍກັບບັນດາປະມຸກປະເທດ, ການນຳອົງການຈັດຕັ້ງສາກົນ ຢູ່ພາຍນອກກອງປະຊຸມສຸດຍອດ ຈີ7 ເປີດກວ້າງ, ທ່ານນາຍົກລັດຖະມົນຕີ ຫງວຽນຊວນຝຸກ ຢັ້ງຢືນລັດຖະບານຫວຽດນາມຕັດສິນໃຈນຳເອົາການພົວພັນຮ່ວມມື ລະຫວ່າງຫວຽດນາມກັບບັນດາປະເທດ ແລະ ບັນດາອົງການຈັດຕັ້ງສາກົນ ເຂົ້າສູ່ລວງເລິກ ແລະ ມີເນື້ອແທ້, ພິເສດແມ່ນການຮ່ວມມືດ້ານເສດຖະກິດ; ສະແດງຄວາມປະສົງຢາກໃຫ້ບັນດາປະເທດ ແລະ ບັນດາຄູ່ຮ່ວມມື ສະໜັບສະໜູນຫວຽດນາມ ໃນການເພີ່ມທະວີບົດບາດແລະຄວາມຮັບຜິດຊອບຂອງຕົນ ຢູ່ທີ່ບັນດາອົງການຈັດຕັ້ງສາກົນ, ສືບຕໍ່ສົມທົບຢ່າງແໜ້ນແຟ້ນ ຢູ່ບັນດາເວທີປາໄສຫຼາຍຝ່າຍທີ່ສຳຄັນ ຢູ່ໃນພາກພື້ນ ແລະ ໃນໂລກ, ໃນນັ້ນມີການສະໜັບສະໜູນໃຫ້ຫວຽດນາມສະໝັກຮັບເລືອກຕັ້ງເປັນສະມາຊິກບໍ່ຖາວອນ ຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ວາລະປີ 2020-2021 ແລະ ສະໝັກຮັບເລືອກຕັ້ງເຂົ້າດຳລົງຕຳແໜ່ງ ເລຂາທິການອົງການການສຶກສາ ວິທະຍາສາດ ແລະວັດທະນະທຳ ແຫ່ງສະຫະປະຊາຊາດ ວາລະປີ 2017-2021.
ການນຳຂອງບັນດາປະເທດ, ອົງການຈັດຕັ້ງສາກົນ ລ້ວນແຕ່ຕີລາຄາສູງບົດບາດ ແລະ ອິດທິພົນຂອງຫວຽດນາມໃນພາກພື້ນ ກໍ່ຄືແບ່ງປັນ, ສະໜັບສະໜູນຄວາມເຫັນຂອງທ່ານນາຍົກລັດຖະມົນຕີ ຫງວຽນຊວນຝຸກ ແລະ ສະແດງຄວາມປະສົງຢາກສືບຕໍ່ຊຸກຍູ້ພັດທະນາການພົວພັນກັບຫວຽດນາມ.
ການເຂົ້າຮ່ວມຢ່າງແທ້ຈິງ ແລະ ມີລັກສະນະກໍ່ສ້າງຂອງຫວຽດນາມໄດ້ຮັບການຕີລາຄາສູງຈາກກອງປະຊຸມ ແລະ ປະເທດຍີ່ປຸ່ນທີ່ເປັນເຈົ້າພາບ./.
ສັງລວມໂດຍ ຫງວຽນດຶກ