ວຽກງານການພົວພັນຕ່າງປະເທດ ຂອງກຳລັງຕຳຫຼວດປະຊາຊົນ ໃນສະພາບການໃໝ່
ວກ.ອອນໄລ - ໃນເວລາທີ່ຜ່ານມານ, ວຽກງານການພົວພັນຕ່າງປະເທດ ການຮ່ວມມືສາກົນໄດ້ຮັບໃຊ້ເປັນຢ່າງດີໃຫ້ແກ່ການປະຕິບັດໜ້າທີ່ຂອງກຳລັງຕຳຫຼວດທັງໝົດ, ໄດ້ສ້າງທ່າສະໜາມຮົບໃໝ່ທີ່ໝັ້ນຄົງ ເພື່ອຮັບປະກັນຄວາມໝັ້ນຄົງຂອງຊາດ, ແກ້ໄຂບັນດາບັນຫາສາກົນໃນການຕໍ່ສູ້ປ້ອງກັນແລະຕ້ານອາຊະຍາກຳປະເພດຕ່າງໆ ຢ່າງມີປະສິດທິຜົນ, ພ້ອມທັງເຂົ້າຮ່ວມຢ່າງຕັ້ງໜ້າໃນການເພີ່ມທະວີການພົວພັນມິດຕະພາບແລະການຮ່ວມມືສາກົນຂອງປະເທດ, ປະກອບສ່ວນເຂົ້າໃນການຍົກສູງຖານະບົດບາດປະເທດຫວຽດນາມໃນເວທີສາກົນ.
ພົນເອກ, ສຈ. ປອ. ໂຕເລິມ ກຳມະການກົມການເມືອງ, ລັດຖະມົນຕີກະຊວງຕຳຫຼວດ. (ພາບ: cand.com.vn)
ປະເທດຫວຽດນາມກຳລັງກ້າວເຂົ້າສູ່ໄລຍະເຊື່ອມໂຍງສາກົນຢ່າງເລິກເຊິ່ງກວ້າງຂວາງ, ຮອບດ້ານ, ດ້ວຍກາລະໂອກາດແລະຄວາມສະດວກຫຼາຍຢ່າງ ທີ່ແຊກຊ້ອນກັບຄວາມສ່ຽງແລະສິ່ງທ້າທາຍບໍ່ໜ້ອຍ ໃນການສ້າງສາພັດທະນາແລະປົກປັກຮັກສາປະເທດຊາດຫວຽດນາມສັງຄົມນິຍົມ. ທ່າອຽງການເຄື່ອນໄຫວຂອງການພົວພັນສາກົນມີຄວາມສັບສົນຫຼາຍ, ສົ່ງຜົນກະທົບໂດຍກົງເຖິງຜົນປະໂຫຍດແລະຄວາມໝັ້ນຄົງຂອງຫວຽດນາມ. ໂດຍສວຍໃຊ້ຄວາມສັບສົນຂອງສະພາບການໂລກ, ພາກພື້ນ ແລະ ວິວັດການເຊື່ອມໂຍງສາກົນນັບມື້ນັບເລິກເຊິ່ງກວ້າງຂວາງຂອງຫວຽດນາມ, ບັນດາກຳລັງສັດຕູໄດ້ເພິ່ມທະວີການເຄື່ອນໄຫວລະເມີດຄວາມໝັ້ນຄົງແຫ່ງຊາດ, ພິເສດແມ່ນການນຳໃຊ້ກົນອຸຍາຍ, ເລ່ລ່ຽມທີ່ແນບນຽນ, ສວຍໃຊ້ບັນຫາປະຊາທິປະໄຕ ສິດທິມະນຸດ ເພື່ອກໍ່ຄວາມກົດດັນ ແລະ ແຊກແຊງເຂົ້າໃນວຽກງານພາຍໃນຂອງປະເທດຫວຽດນາມ; ຜ່ານການເຄື່ອນໄຫວຮ່ວມມື, ຊ່ວຍເຫຼືອການພັດທະນາ ເພື່ອຊຸກຍູ້ “ສັງຄົມພົນລະເຮືອນ" ຕາມມາດຕະຖານຕາເວັນຕົກ, ກ້າວໄປເຖິງການກໍ່ຕັ້ງກຳລັງຝ່າຍຄ້ານຕ້ານພັກກອມມູນິດຫວຽດນາມ, ຫວັງເຮັດໃຫ້ລະບອບການເມືອງໃນຫວຽດນາມປ່ຽນແປງໄປ. ສະພາບການດັ່ງກ່າວໄດ້ວາງຄວາມຮຽກຮ້ອງຕ້ອງການແລະໜ້າທີ່ທີ່ສຳຄັນທີ່ສຸດ ຮີບດ່ວນທີ່ສຸດ ໃຫ້ແກ່ວຽກງານຕຳຫຼວດເວົ້າລວມ ແລະ ວຽກງານການພົວພັນຕ່າງປະເທດຂອງກຳລັງຕຳຫຼວດປະຊາຊົນເວົ້າສະເພາະ, ເຊິ່ງຮຽກຮ້ອງໃຫ້ວຽກງານພົວພັນຕ່າງປະເທດຂອງກຳລັງຕຳຫຼວດປະຊາຊົນຕ້ອງມີການເຊື່ອມຊືມຢ່າງເລິກເຊິ່ງກ່ຽວກັບແນວທາງ, ນະໂຍບາຍການພົວພັນຕ່າງປະເທດຂອງພັກ ແລະ ລັດ ໃນໄລຍະແຫ່ງການປ່ຽນແປງໃໝ່ແລະເຊື່ອມໂຍງສາກົນ; ປະຕິບັດຢ່າງເຂັ້ມງວດທິດນຳການພົວພັນຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມືແລະພັດທະນາ; ຫັນການພົວພັນສາກົນເປັນຫຼາຍຮູບຫຼາຍແບບ ຫຼາຍກ້ຳຫຼາຍຝ່າຍ; ເປັນເຈົ້າການໃນການປ້ອງກັນ, ຈຳກັດ, ຕໍ່ສູ້ເອົາຊະນະທຸກກົນອຸບາຍ, ການກະທຳທີ່ລະເມີດຕໍ່ຄວາມໝັ້ນຄົງແຫ່ງຊາດ.
ໃນຊຸມປີທີ່ຜ່ານມາ, ວຽກງານພົວພັນຕ່າງປະເທດຂອງຕຳຫຼວດປະຊາຊົນໄດ້ບັນລຸຜົນສຳເລັດອັນໃຫຍ່ຫຼວງຫຼາຍຢ່າງ. ໂດຍຜ່ານການພົວພັນຕ່າງປະເທດແລະການຮ່ວມມືສາກົນ, ກຳລັງຕຳຫຼວດໄດ້ຕັ້ງໜ້າ, ເປັນເຈົ້າການເກັບກຳ ໄຈ້ແຍກຂໍ້ມູນຂ່າວສານ, ຕີລາຄາ ຄາດຄະເນສະພາບການສາກົນແລະພາຍໃນປະເທດຢ່າງເໝາະສົມ, ຈາກນັ້ນໄດ້ໃຫ້ຄຳປຶກສາ ຄຳສະເໜີໃຫ້ພັກແລະລັດຢ່າງທັນເວລາ ເພື່ອວາງແຜນນະໂຍບາຍແລະການຕັດສິນໃຈຍຸທະສາດ, ແລະກຳນົດ ແກ້ໄຂຢ່າງທັນການ ບັນດາບັນຫາທີ່ພົວພັນເຖິງການປ້ອງກັນຄວາມສະຫງົບ, ການປ້ອງກັນຊາດ ໃນບັນດາການພົວພັນ ກໍລະນີທີ່ມີຄວາມຮູ້ສຶກໄວ. ເດືອນມັງກອນ 2018, ທີ່ກອງປະຊຸມຕຳຫຼວດທົ່ວປະເທດຄັ້ງທີ 73, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຍ້ອງຍໍບັນດາໜ້າວຽກຂອງກຳລັງຕຳຫຼວດ, ໃນນັ້ນເນັ້ນໜັກເຖິງຄວາມຕັ້ງໜ້າ, ເປັນເຈົ້າການເສີມຂະຫຍາຍທ່າແຮງໃນວຽກງານການພົວພັນຕ່າງປະເທດແລະການຮ່ວມມືສາກົນ ຂອງກຳລັງຕຳຫຼວດປະຊາຊົນ. ສິ່ງດັ່ງກ່າວສະແດງອອກໃນລາຍລະອຽດລຸ່ມນີ້:
1- ກຳລັງຕຳຫຼວດປະສານສົມທົບຢ່າງແໜ້ນແຟ້ນ, ຮອບດ້ານ ກັບຂະແໜງການພົວພັນຕ່າງປະເທດ ແລະ ບັນດາກະຊວງ, ຂະແໜງການ, ທ້ອງຖິ່ນ ໃນການຜັນຂະຫຍາຍປະຕິບັດບັນດາໜ້າທີ່ວຽກງານການພົວພັນຕ່າງປະເທດຢ່າງມີປະສິດທິຜົນ; ເຮັດເປັນຢ່າງດີ ບົດບາດເປັນເສນາທິການ, ແນະນຳ, ຮັບປະກັນບໍ່ໃຫ້ຕົກໃສ່ທ່າຮັບ ບໍ່ຖືກຕົກຊະເງີ້ຕໍ່ການຜັນແປສັບສົນຂອງສະພາບການການເມືອງ, ຄວາມສະຫງົບ, ເສດຖະກິດ -ສັງຄົມຂອງໂລກ ແລະ ພາກພື້ນ, ກໍ່ຄືບັນດາການປ່ຽນແປງໃຫຍ່ໃນການພົວພັນສາກົນ. ພິເສດ, ວຽກງານພົວພັນຕ່າງປະເທດຂອງຕຳຫຼວດໄດ້ມີການປະກອບສ່ວນຫຼຸດຜ່ອນຜົນກະທົບທາງລົບຂອງການໂລກາພິວັດ, ຂອງເສດຖະກິດພູມປັນຍາ, ການປະຕິວັດວິທະຍາສາດ-ເຕັກໂນໂລຊີ ແລະ ການຄິດໄລ່, ນະໂຍບາຍຍຸດທະສາດຂອງບັນດາປະເທດໃຫຍ່ໃນການພົວພັນກັບຫວຽດນາມ. ບັນດາຜົນງານເຫຼົ່ານີ້ໄດ້ປະກອບສ່ວນເຂົ້າໃນການຮັບໃຊ້ຢ່າງມີປະສິດທິຜົນ ການຜັນຂະຫຍາຍແນວທາງ, ນະໂຍບາຍການພົວພັນຕ່າງປະເທດຂອງພັກແລະລັດ; ປັບປຸງ, ຊຸກຍູ້, ເປີດກວ້າງ, ເພີ່ມທະວີການພົວພັນລະຫວ່າງ ຕຳຫຼວດປະຊາຊົນຫວຽດນາມ ແລະ ກຳລັງປ້ອງກັນຄວາມສະຫງົບ, ຕຳຫຼວດ, ການສືບຂ່າວ, ພາຍໃນ, ປະຕິບັດກົດໝາຍຂອງປະເທດຕ່າງໆ; ຮັກສາຄວາມສົມດຸນຍຸດທະສາດ, ປັບປຸງສະພາບແວດລ້ອມແຫ່ງສັນຕິພາບ, ສະຖຽມລະພາບ; ຊຸກຍູ້ການພົວພັນຮ່ວມມືສາກົນຂອງ ຫວຽດນາມໃນຫຼາຍຂົງເຂດ; ເສີມຂະຫຍາຍແຫຼ່ງພະລັງເພື່ອພັດທະນາເສດຖະກິດ - ສັງຄົມ, ຮັບປະກັນການປ້ອງກັນຄວາມສະຫງົບ, ປ້ອງກັນຊາດ.
2- ກຳລັງຕຳຫຼວດ ໄດ້ພະຍາຍາມເພີ່ມທະວີ ເປີດກວ້າງການຮ່ວມມືສາກົນ, ຜ່ານນັ້ນເພື່ອປັບປຸງທ່າສະໜານປ້ອງກັນຄວາມສະຫງົບທີ່ໝັ້ນຄົງ, ເສີມຂະຫຍາຍກຳລັງແຮງສັງລວມໃນການຮັບປະກັນຄວາມສະຫງົບແຫ່ງຊາດ, ຮັກສາຄວາມເປັນລະບຽບຮຽບຮ້ອຍ, ຄວາມປອດໄພສັງຄົມ. ເສີມຂະຫຍາຍບົດບາດ “ນຳໜ້າ, ເປີດທາງ”, ກຳລັງຕຳຫຼວດປະຊາຊົນໄດ້ປະກອບສ່ວນສ້າງພື້ນຖານໃຫ້ແກ່ການຜັນຂະຫຍາຍການຮ່ວມມືຮອບດ້ານ, ເລິກເຊິ່ງກວ້າງຂວາງ ຂອງຫວຽດນາມກັບບັນດາປະເທດໃນພາກພື້ນ ແລະ ໃນໂລກ. ກະຊວງຕຳຫຼວດໄດ້ເປັນເຈົ້າການໃນການສະເໜີ, ຜັນຂະຫາຍກົນໄກເຈລະຈາດ້ານຄວາມສະຫງົບ ກັບຫຼາຍຄູ່ຮ່ວມມືທີ່ສຳຄັນຢ່າງມີປະສິດທິຜົນ, ປະກອບສ່ວນເຂົ້າໃນການກໍ່ສ້າງ ແລະ ເພີ່ມທະວີຄວາມເຊື່ອໝັ້ນການເມືອງ, ຈາກນັ້ນເປີດກວ້າງ ແລະ ພັດທະນາການພົວພັນຮ່ວມມືໃນບັນດາຂົງເຂດການເມືອງ, ການພົວພັນຕ່າງປະເທດ, ເສດຖະກິດ, ການຄ້າ, ວັດທະນະທຳ-ສັງຄົມ ກັບປະເທດຕ່າງໆ. ນັບແຕ່ປີ 2008 ຫາ 2018, ກະຊວງຕຳຫຼວດໄດ້ເຊັນເອກະສານການຮ່ວມມືກັບປະເທດຕ່າງໆເປັນ 80 ສະບັບ, ສ້າງຂອບກົດໝາຍໃຫ້ແກ່ການຮ່ວມມືສາກົນ, ຍາດແຍ່ງແຫຼ່ງພະລັງສາກົນ, ສ້າງເງື່ອນໄຂອັນສະດວກດີໃຫ້ແກ່ການກໍ່ສ້າງກຳລັງຕຳຫຼວດປະຊາຊົນ ທີ່ປະຕິວັດ ລະບຽບຫຼວງ ຍອດຍ້ຽມ ທັນສະໄໝເທື່ອລະກ້າວ, ປົກປັກຮັກສາຄວາມສະຫງົບແຫ່ງຊາດ, ຄວາມເປັນລະບຽບຮຽບຮ້ອຍ, ຄວາມປອດໄພສັງຄົມໃນສະພາບການໃໝ່ ໃຫ້ໄດ້ຢ່າງໝັ້ນຄົງ.
3- ໂດຍຜ່ານວຽກງານການພົວພັນຕ່າງປະເທດ, ການຮ່ວມມືສາກົນ, ກຳລັງຕຳຫຼວດໄດ້ເປັນເຈົ້າການໃນການແລກປ່ຽນຂໍ້ມູນຂ່າວສານ, ຕີລາຄາ, ຄາດຄະເນ ສະພາບການໂລກ, ພາກພື້ນແລະໃນປະເທດຢ່າງຖືກຕ້ອງເໝາະສົມແລະຮອບດ້ານ; ແບ່ງປັນບົດຮຽນ, ລະດົມແຫຼ່ງພະລັງຕ່າງໆຈາກພາຍນອກ ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍພາຍໃນປະເທດ ກໍ່ຄືຍົກສູງປະສິດທິຜົນໃນການເຂົ້າຮ່ວມການກີດກັ້ນ, ຮັບມືກັບການນາບຂູ່ດ້ານຄວາມສະຫງົບປອດໄພທີ່ບໍ່ເປັນແບບດັ້ງເດີມ ທີ່ມີລັກສະນະທົ່ວໂລກ. ຍ້ອນການເພີ່ມທະວີວຽກງານການພົວພັນຕ່າງປະເທດພິເສດສະເພາະໃນຂົງເຂດຮັກສາຄວາມໝັ້ນຄົງແລະຄວາມເປັນລະບຽບຮຽບຮ້ອຍ ດັ່ງນັ້ນວຽກງານປ້ອງກັນແລະຕ້ານອາຊະຍາກຳປະເພດຕ່າງໆ, ເປັນຕົ້ນແມ່ນອາຊະຍາກຳກໍ່ການຮ້າຍ, ອາຊະຍາກຳທີ່ມີການຈັດຕັ້ງຂ້າມຊາດ, ອາຊະຍາກຳທີ່ສວຍໃຊ້ເຕັກໂນໂລຊີສູງ, ກໍ່ຄືການຕໍ່ສູ້ຕ້ານການເຄື່ອນໄຫວສວຍໃຊ້ປະຊາທິປະໄຕ, ສິດທິມະນຸດ ແລະ ການເຄື່ອນໄຫວຂອງບັນດາອົງການຈັດຕັ້ງປະຕິການຄົນຫວຽດນາມພັດຖິ່ນ... ໃນເວລາຜ່ານມາໄດ້ບັນລຸປະສິດທິຜົນແທ້ຈິງ, ໄດ້ປະກອບສ່ວນຕັດສິນໃນການເອົາຊະນະກົນອຸບາຍ, ການຕໍ່ຕ້ານທຳລາຍຂອງບັນດາອິດທິກຳລັງສັດຕູ ແລະ ອາຊະຍາກຳທີ່ມີການຈັດຕັ້ງຕ່າງໆ.
4- ໂດຍຜ່ານເຄື່ອນໄຫວຮ່ວມມືສາກົນ, ກຳລັງຕຳຫຼວດປະຊາຊົນໄດ້ປະກອບສ່ວນຢ່າງຕັ້ງໜ້າເຂົ້າໃນການສົ່ງບັນດາຂໍ້ຄວາມກ່ຽວກັບແນວທາງ, ນະໂຍບາຍການພົວພັນຕ່າງປະເທດຂອງພັກແລະລັດ, ເຮັດໃຫ້ປະຊາຄົມສາກົນເຂົ້າໃຈຢ່າງຈະແຈ້ງກ່ຽວກັບສະພາບການຂອງຫວຽດນາມ; ຫຼຸດຜ່ອນຜົນກະທົບ, ການແຊກແຊງທີ່ດື້ດ້ານດ້ວຍເຈດຕະນາຮ້າຍ ເຂົ້າໃນວຽກງານພາຍໃນຂອງຫວຽດນາມ; ປະກອບສ່ວນເພີ່ມທະວີຄວາມເຫັນດີເປັນເອກະພາບ, ຄວາມສະໜັບສະໜູນ ຈາກເພື່ອນມິດສາກົນຕໍ່ຫວຽດນາມ ໃນການຕໍ່ສູ້ປົກປັກຮັກສາຄວາມໝັ້ນຄົງແຫ່ງຊາດ, ເປັນຕົ້ນແມ່ນຄວາມປອດໄພ ອະທິປະໄຕທາງທະເລ ໝູ່ເກາະ, ແລະຕໍ່ສູ້ປະຕິເສດກົນອຸບາຍ, ການເຄື່ອນໄຫວສວຍໃຊ້ບັນດາບັນຫາກ່ຽວກັບປະຊາທິປະໄຕ, ສິດທິມະນຸດ, ຊົນເຜົ່າ, ສາດສະໜາທີ່ຕໍ່ຕ້ານທຳລາຍຫວຽດນາມ... ພິເສດ, ກະຊວງຕຳຫຼວດໄດ້ເປັນເຈົ້າການໃນການໃຫ້ຄຳປຶກສາແລະສະເໜີກັບພັກ, ລັດກ່ຽວກັບບັນດາບັນຫາແລະຈຸດເວລາດຳເນີນການສົ່ງຂໍ້ຄວາມຂັ້ນສູງ ເພື່ອປັບປຸງຄວາມເຊື່ອໝັ້ນການເມືອງ, ເພີ່ມທະວີການຮ່ວມມືທີ່ແທ້ຈິງ, ມີປະສິດທິຜົນກັບບັນດາປະເທດໃຫຍ່, ຜ່ານນັ້ນເພື່ອປະກອບສ່ວນເຂົ້າໃນການແກ້ໄຂສິ່ງກີດຂວາງ, ຫຍໍ້ສັ້ນຊ່ອງຫວ່າງ ຄວາມແຕກຕ່າງກັນ, ຍົກສູງປະສິດທິຜົນໃນການຮ່ວມມື ແລະເພີ່ມທະວີພາລະບົດບາດ, ອິດທິພົນຂອງຫວຽດນາມໃນເວທີສາກົນ.
ແຕ່ວ່າ, ວຽກງານການພົວພັນຕ່າງປະເທດ, ການຮ່ວມມືສາກົນຂອງກຳລັງຕຳຫຼວດປະຊາຊົນໃນເວລາທີ່ຜ່ານມາກໍ່ຍັງມີຂໍ້ຈຳກັດຈຳນວນໜຶ່ງ. ວຽກງານປະສານສົມທົບ, ການແລກປ່ຽນຂໍ້ມູນຂ່າວສານ ສະພາບການລະຫວ່າງຕຳຫຼວດໃນບັນດາກົມກອງ ທ້ອງຖິ່ນ ກັນບັນດາຄູ່ຮ່ວມມືຕ່າງປະເທດນັ້ນ ຍັງບໍ່ໄດ້ຮັບຄວາມເອົາໃຈໃສ່ຢ່າງຖືກຕ້ອງ; ຍັງມີສະພາບການຄວາມຮຽກຮ້ອງ, ເຫດການ, ການແລກປ່ຽນຜ່ານຊ່ອງ ອິນເຕີປົນ ຍັງບໍ່ໄດ້ຮັບການຕອບສະໜອງຢ່າງທັນເວລາ. ບາງກົນໄກຮ່ວມມື, ຂໍ້ຕົກລົງສາກົນ ບໍ່ໄດ້ເຂົ້າສູ່ລວງເລິກ, ແທ້ຈິງ. ວຽກງານໂຄສະນາອົບຮົມ, ການສຶກສາດ້ານກົດໝາຍ ແລະ ຂໍ້ກຳນົດກ່ຽວກັບການຄຸ້ມຄອງເສັ້ນຊາຍແດນ, ຫຼັກໝາຍຊາຍແດນປະເທດ ໃຫ້ປະຊາຊົນບັນດາແຂວງທີ່ຕິດຈອດຊາຍແດນ ກໍ່ຍັງບໍ່ໄດ້ດຳເນີນຢ່າງເປັນປະຈຳ. ຕຳຫຼວດບາງທ້ອງຖິ່ນຍັງບໍ່ມີການຄົ້ນຄວ້າແນະນຳກ່ຽວກັບການຜັນຂະຫຍາຍແຜນການຮ່ວມມືປະຈຳປີຂອງກະຊວງຕຳຫຼວດກັບບັນດາຄູ່ຮ່ວມມື ໃນການແຕ່ງຕັ້ງຄະນະອອກເມືອງ ແລະ ຕ້ອນຮັບຄະນະເຂົ້າເມືອງຢ່າງລະອຽດ, ດັ່ງນັ້ນເວລາທີ່ມີຄະນະຜູ້ແທນນອກແຜນການກໍ່ເກີດຄວາມອຶດອັດກະວົນກະວາຍ, ຕົກໃສ່ທ່າຮັບ. ຖັນແຖວພະນັກງານປະຕິບັດວຽກງານພົວພັນຕ່າງປະເທດກໍ່ຍັງເຄື່ອນໄຫວຄວບຕຳແໜ່ງ ແລະ ມີຂໍ້ຈຳກັດກ່ຽວກັບພາສາຕ່າງປະເທດ ດັ່ງນັ້ນມີບາງບ່ອນ, ບາງເວລາ ກໍ່ບໍ່ສາມາດຕອບສະໜອງຄວາມຮຽກຮ້ອງຕ້ອງການ, ໜ້າທີ່; ພະນັກງານຊຳນານໃນພາສາຕ່າງປະເທດ ກໍ່ຍັງຂາດແລະຖືກຈຳກັດໃນການແປແລະບັນນາທິການພາສາຕ່າງປະເທດ. ບັນດາຂໍ້ຈຳກັດເທິງນີ້ ໄດ້ສົ່ງຜົນກະທົບທີ່ແນ່ນອນເຖິງປະສິດທິຜົນຂອງການເຄື່ອນໄຫວພົວພັນຕ່າງປະເທດ ແລະ ການຮ່ວມມືສາກົນຂອງກຳລັງຕຳຫຼວດປະຊາຊົນ.
*
* *
ໃນເວລາຕໍ່ໄປນີ້, ສະຖານະການຢູ່ພາກພື້ນ ແລະ ສາກົນຈະຍັງມີການຜັນແປທີ່ສັບສົນແລະຄາດເດົາຍາກ ຊຶ່ງຈະສົ່ງຜົນກະທົບໂດຍກົງເຖິງສະພາບແວດລ້ອມຄວາມສະຫງົບ ແລະ ການພັດທະນາຂອງປະເທດເຮົາ, ເຖິງການພົວພັນຮ່ວມມື, ການພົວພັນຕ່າງປະເທດຂອງພັກ, ລັດຫວຽດນາມ ກັບປະເທດຕ່າງໆໃນໂລກ ແລະ ໃນພາກພື້ນ. ການປະຕິວັດອຸດສາຫະກຳຄັ້ງທີສີ່ຈະຊ່ວຍໃຫ້ພື້ນຖານເສດຖະກິດຂອງບັນດາປະເທດໃນໂລກມີການພັດທະນາກວ່າອີກ ແຕ່ຈະນຳມາຊຶ່ງບັນດາບັນຫາກ່ຽວກັບຄວາມສະຫງົບ, ຄວາມປອດໄພສັງຄົມ. ປະຊາທິປະໄຕ, ສິດທິມະນຸດ ຈະຍັງເປັນປາຍແຫຼມບຸກຈົມຕີຂອງບັນດາອິດທິກຳລັງສັດຕູ, ໃນນັ້ນພວກມັນຈະສຸມໃສ່ສວຍໃຊ້ບັນດາເຫດການການເມືອງ, ເສດຖະກິດ, ສັງຄົມ, ການເຈລະຈາບັນດາສັນຍາການຄ້າເສລີຮຸ່ນໃໝ່ (ສອງຝ່າຍ, ຫຼາຍຝ່າຍ) ແລະ ການປົກປັກຮັກສາລາຍງານຕາມກົນໄກກວດສອບເປັນໄລຍະທົ່ວໄປ (UPR) ຂອງສະພາສິດທິມະນຸດສະຫະປະຊາຊາດ ແລະ ບົດລາຍງານແຫ່ງຊາດກ່ຽວກັບການປະຕິບັດສົນທິສັນຍາສາກົນກ່ຽວກັບສິດມະນຸດສະບັບຕ່າງໆ ເພື່ອເສດສັນປັ້ນແຕ່ງ, ຕູ່ຫາ ແລະ ຍຸຍົງສົ່ງເສີມການເຄື່ອນໄຫວຕໍ່ຕ້ານທຳລາຍ ພັກ, ລັດຫວຽດນາມ. ໜ້າທີ່ສ້າງສະພາບແວດລ້ອມແຫ່ງສັນຕິພາບ, ສະຖຽມລະພາບໃນສະຖານະການພາລະກິດປ່ຽນແປງໃໝ່ເຂົ້າສູ່ລວງເລິກ, ເຊື່ອມໂຍງສາກົນນັບມື້ນັບເລິກເຊິ່ງກວ້າງຂວາງ ເຊິ່ງກຳລັງວາງອອກບັນດາຄວາມຮຽກຮ້ອງຕ້ອງການໃໝ່ ຕໍ່ວຽກງານການພົວພັນຕ່າງປະເທດຂອງ ພັກ, ລັດ ແລະ ຂອງຂະແໜງການຕຳຫຼວດ.
ຜັນຂະຫຍາຍລັດຖະດຳລັດເລກທີ 01/NĐ-CP, ສະບັບລົງວັນທີ 06 ສິງຫາ 2018 ຂອງລັດຖະບານ ວ່າດ້ວຍ “ກຳນົດພາລະບົດບາດ, ໜ້າທີ່, ສິດອຳນາດ ແລະ ໂຄງປະກອບການຈັດຕັ້ງຂອງຕຳຫຼວດ”, ກະຊວງຕຳຫຼວດໄດ້ສ້າງຕັ້ງຮູບແບບການຈັດຕັ້ງໃໝ່ຕາມທິດກະທັດຮັດ, ເຄື່ອນໄຫວທີ່ມີຜົນສັກສິດ, ມີປະສິດທິຜົນໂດຍພື້ນຖານ. ຕາມນັ້ນ, ວຽກງານການພົວພັນຕ່າງປະເທດຂອງຕຳຫຼວດປະຊາຊົນຕ້ອງມີການກຳນົດຢ່າງຈະແຈ້ງ ກ່ຽວກັບບັນດາໜ້າທີ່ວຽກງານທີ່ເປັນຈຸດສຸມໃຈກາງໃນສະພາບການໃໝ່, ດັ່ງຕໍ່ໄປນີ້:
ທີໜຶ່ງ, ເຊື່ອມຊືມ, ປະຕິບັດໃຫ້ເຂັ້ມງວດ ແຜນນະໂຍບາຍ, ນະໂຍບາຍກ່ຽວກັບການພົວພັນຕ່າງປະເທດແລະການເຊື່ອມໂຍງສາກົນຂອງພັກ, ລັດ ຕາມກຳນົດທິດ “ເປັນເຈົ້າການ ແລະ ຕັ້ງໜ້າເຊື່ອມໂຍງສາກົນ, ດ້ວຍທິດນຳ “ຜັນຂະຫຍາຍໃຫ້ຄົບຊຸດແລະຮອບດ້ານ” ບັນດາການເຄື່ອນໄຫວພົວພັນຕ່າງປະເທດໃນຂົງເຂດຕ່າງໆ ທີ່ກອງປະຊຸມໃຫຍ່ຄັ້ງທີ XII ຂອງພັກໄດ້ວາງອອກ. ປະສານສົມທົບໃຫ້ດີລະຫວ່າງການເຄື່ອນໄຫວພົວພັນຕ່າງປະເທດຂອງພັກ, ການພົວພັນທາງການທູດຂອງລັດ ແລະ ການພົວພັນທາງການທູດສະເພາະຂະແໜງການຕຳຫຼວດໃນການຜັນຂະຫຍາຍວຽກງານພົວພັນການທູດ; ເຊື່ອມຕິດການເຄື່ອນໄຫວພົວພັນຕ່າງປະເທດ, ການຮ່ວມມືສາກົນ ກັບວຽກງານປົກປັກຮັກສາຄວາມສະຫງົບແຫ່ງຊາດ, ຮັກສາສັນຕິພາບ, ສະຖຽມລະພາບຢູ່ພາກພື້ນ ແລະ ໃນໂລກ ເພື່ອພັດທະນາປະເທດແບບຍືນຍົງ.
ທີສອງ, ເພີ່ມທະວີການຄົ້ນຄວ້າ, ຕີລາຄາຜົນກະທົບຂອງນະໂຍບາຍ, ເຈຕະນາຂອງບັນດາປະເທດໃນການພົວພັນສາກົນ ເຖິງສະພາບແວດລ້ອມແຫ່ງຄວາມສະຫງົບຍຸດທະສາດ, ເຖິງຜົນປະໂຫຍດ, ຄວາມສະຫງົບແຫ່ງຊາດຂອງຫວຽດນາມ ເພື່ອເປັນເສນາທິການໃຫ້ພັກ, ລັດໃນການວາງກຳນົດ ແລະ ປະຕິບັດນະໂຍບາຍການພົວພັນປະເທດຕ່າງໆ. ປະສານສົມທົບໃຫ້ແໜ້ນແຟ້ນກັບກະຊວງ, ຂະແໜງການຕ່າງໆ ເພື່ອຕິດຕາມ, ຕີລາຄາສະພາບການໂລກ, ພາກພື້ນ ແລະ ພາຍໃນປະເທດ ຢ່າງຮອບດ້ານ ແທດເໝາະ; ຍົກສູງຄວາມສາມາດເກັບກຳ, ວິເຄາະ, ຄົ້ນຄວ້າ ແລະ ຄາດຄະເນຍຸດທະສາດ; ຕັ້ງໜ້າ, ເປັນເຈົ້າການໃນການເປັນເສນາທິການ, ປຶກສາກ່ຽວກັບນະໂຍບາຍ ແລະ ຜັນຂະຫຍາຍການເຄື່ອນໄຫວພົວພັນພາຍໃນປະເທດ ແລະ ການພົວພັນຕ່າງປະເທດຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມ, ພົວພັນຕ່າງປະເທດຕິດພັນກັບການປົກປັກຮັກສາຄວາມສະຫງົບແຫ່ງຊາດໃຫ້ໝັ້ນຄົງ. ວຽກງານພົວພັນຕ່າງປະເທດຕ້ອງຮັບໃຊ້ໃຫ້ແກ່ວິວັດການພັດທະນາອຸດສາຫະກຳຄວາມສະຫງົບ, ແນໃສ່ຫັນກຳລັງຕຳຫຼວດປະຊາຊົນເປັນທັນສະໄໝ. ປະຕິບັດເປັນຢ່າງດີວຽກງານປະສານສົມທົບກັບຂະແຫນງການທູດ ແລະ ບັນດາກຳລັງເຈົ້າໜ້າທີ່ກ່ຽວຂ້ອງໃນການໝູນໃຊ້, ນຳໃຊ້ໃຫ້ມີປະສິດທິຜົນ ມາດຕະການພົວພັນການທູດເພື່ອປະກອບສ່ວນປົກປັກຮັກສາຄວາມສະຫງົບແຫ່ງຊາດໃຫ້ໝັ້ນຄົງ. ຮັບປະກັນການປະສານສົມທົບແບບປົກກະຕິ, ທັນເວລາ, ແໜ້ນແຟ້ນ ແລະ ມີປະສິດທິຜົນຢູ່ທຸກໆລະດັບ, ພ້ອມທັງແກ້ໄຂໃຫ້ໄດ້ດີບັນດາໜ້າທີ່ທີ່ພົວພັນເຖິງການພົວພັນຕ່າງປະເທດໃນການປະຕິບັດໜ້າທີ່ຂອງຂະແໜງການຕຳຫຼວດ.
ທີສາມ, ສືບຕໍ່ປັບປຸງ, ເປີດກວ້າງ, ພັດທະນາການພົວພັນຮ່ວມມືທີ່ພົວພັນເຖິງວຽກງານຕຳຫຼວດກັບບັນດາປະເທດ ແລະ ອົງການຈັດຕັ້ງສາກົນ, ພິເສດແມ່ນ ບັນດາຄູ່ຮ່ວມມືທີ່ເປັນມູນເຊື້ອ ທີ່ມີຄວາມເຊື່ອໝັ້ນສູງ, ບັນດາປະເທດທີ່ໃກ້ຄຽງ, ບັນດາປະເທດທີ່ຂຶ້ນກັບສະມາຄົມບັນດາປະເທດອາຊີຕາເວັນອອກສຽງໃຕ້ (ASEAN), ບັນດາປະເທດໃຫຍ່; ເຮັດໃຫ້ບັນດາການພົວພັນຮ່ວມມືໄປສູ່ລວງເລິກ, ສະຖຽມລະພາບ, ໝັ້ນຄົງ, ມີໃຈກາງ, ຈຸດສຸມເປັນເທື່ອລະກ້າວ. ເປັນເຈົ້າການກຳເອົາກາລະໂອກາດ, ຮັບຮູ້ໃຫ້ຈະແຈ້ງຄວາມທົດສອບສິ່ງທ້າທາຍ, ເລືອກຕັ້ງຂອບເຂດ, ລະດັບການເຂົ້າຮ່ວມ ແລະ ຕັ້ງໜ້າລິເລີ່ມກົນໄກເຊື່ອມຕໍ່ພາກພື້ນ, ສາກົນກ່ຽວກັບຄວາມສະຫງົບໃຫ້ເໝາະສົມກັບຜົນປະໂຫຍດຄວາມໝັ້ນຄົງຂອງຫວຽດນາມ; ສືບຕໍ່ເປັນເຈົ້າການໃນການວາງຄວາມຄິດລິເລີ່ມກ່ຽວກັບການຈັດຕັ້ງກອງປະຊຸມລະຫວ່າງຜູ້ນຳອົງການປ້ອງກັນຄວາມສະຫງົບ ບັນດາປະເທດ ອາຊຽນ, ອາຊຽນ+, ອາຊຽນ - ເອຣົບ ເພື່ອນັບມື້ນັບຍົກສູງບົດບາດ, ຖານະທີ່ຕັ້ງຂອງຫວຽດນາມ ແລະ ກະຊວງຕຳຫຼວມ ໃນພາກພື້ນແລະໃນໂລກ. ເພີ່ມທະວີການເຄື່ອນໄຫວໃນບັນດາເວທີປາໄສຫຼາຍຝ່າຍ, ເປັນເຈົ້າການປະສານສົມທົບກັບບັນດາປະເທດຄູ່ຮ່ວມມື ເຂົ້າຮ່ວມການແກ້ໄຂບັນດາບັນຫາທີ່ບໍ່ເປັນແບບດັ້ງເດີມ ທີ່ມີລັກສະນະທົ່ວໂລກ; ເປັນເຈົ້າການໃນການສົນທະນາກັບປະເທດຕ່າງໆ, ບັນດາອົງການຈັດຕັ້ງສາກົນ ກ່ຽວກັບບັນດາບັນຫາທີ່ມີຄວາມເອົາໃຈໃສ່ຮ່ວມກັນ; ເດັດດ່ຽວຕໍ່ສູ້ຕ້ານການເຄື່ອນໄຫວສວຍໃຊ້ປະຊາທິປະໄຕ, ສິດທິມະນຸດເພື່ອທຳລາຍຫວຽດນາມ ຂອງບັນດາອິດທິກຳລັງສັດຕູ.
ທີສີ່, ຕັ້ງໜ້າເປັນເສນາທິການ, ສະເໜີການປ່ຽນແປງ, ປັບປຸງ, ປົວແປງບູລະນະລະບົບກົດໝາຍ, ສ້າງຂອບກົດໝາຍ ເພື່ອຮັບໃຊ້ໃຫ້ມີປະສິດທິຜົນ ວຽກງານການພົວພັນຕ່າງປະເທດ, ການຮ່ວມມືສາກົນກ່ຽວກັບການຕໍ່ສູ້ກີດກັ້ນແລະຕ້ານອາຊະຍາກຳ, ແກ້ໄຂການວິກິດການ ແລະ ຄວາມນາຍຂູ່ດ້ານຄວາມສະຫງົບທີ່ບໍ່ເປັນແບບດັ້ງເດີມ. ຄົ້ນຄວ້າເປີດກວ້າງ ແລະ ສ້າງຕັ້ງບັນດາກົນໄກຮ່ວມມືສອງຝ່າຍ ກັບບັນດາປະເທດ, ບັນດາອົງການຈັດຕັ້ງສາກົນໃນພາກພື້ນ ແລະ ໃນໂລກ ກ່ຽວກັບການກີດກັ້ນແລະຕໍ່ຕ້ານອາຊະຍາກຳຢາເສບຕິດ, ອາຊະຍາກຳຟອກເງິນ, ອາຊະຍາກຳຄ້າຂາຍເຖື່ອນ, ອາຊະຍາກຳຄ້າຂາຍມະນຸດ, ອາຊະຍາກຳທີ່ສວຍໃຊ້ເຕັກໂນໂລຊີສູງ… ປະຕິບັດໃຫ້ມີປະສິດທິຜົນ ບັນດາສົມທິສັນຍາສາກົນ, ບັນດາສັນຍາ, ຂໍ້ຕົກລົງການຮ່ວມມື ເຊິ່ງປະເທດຫວຽດນາມໄດ້ເຊັນ ຫຼື ເຂົ້າຮ່ວມ. ສືບຕໍ່ຄົ້ນຄວ້າກໍ່ສ້າງ, ເຈລະຈາ, ເຊັນ ຫຼື ຍື່ນໃຫ້ຂັ້ນທີ່ມີສິດອຳນາດເຊັນ, ອະນຸມັດຜ່ານ, ໃຫ້ສັດຕະບັນຍັດ ບັນດາສົມທິສັນຍາ, ຂໍ້ຕົກລົງສາກົນສອງຝ່າຍແລະຫຼາຍຝ່າຍ ແນໃສ່ສ້າງຂອບກົດໝາຍທີ່ເໝາະສົມ, ຕອບສະໜອງຄວາມຮຽກຮ້ອງການຮ່ວມມືປົກປັກຮັກສາຄວາມສະຫງົບແຫ່ງຊາດ.
ທີຫ້າ, ເພີ່ມທະວີປະສິດທິຜົນວຽກງານຄຸ້ມຄອງລັດກ່ຽວກັບການພົວພັນຕ່າງປະເທດ ແລະ ຮ່ວມມືສາກົນ; ເປັນປະທານ, ປະສານສົມທົບກັບບັນດາກົມກອງທີ່ກ່ຽວຂ້ອງ ສະເໜີປະກາດໃຊ້ຈົດໝາຍວຽນຂອງກະຊວງຕຳຫຼວດ ກ່ຽວກັບການຄຸ້ມຄອງເປັນເອກະພາບ ຕໍ່ການເຄື່ອນໄຫວພົວພັນຕ່າງປະເທດຂອງກຳລັງຕຳຫຼວດປະຊາຊົນ ໃນສະພາບການໃໝ່, ເຊິ່ງເໝາະສົມກັບຕົວແບບການຈັດຕັ້ງກົນຈັກຂອງກະຊວງຕຳຫຼວດ ຕາມລັດຖະດຳລັດເລກທີ່ 01/2018/NĐ-CP ສະບັບລົງວັນທີ 06 ສິງຫາ 2018, ຂອງລັດຖະບານວ່າດ້ວຍ “ກຳນົດພາລະບົດບາດ, ໜ້າທີ່, ສິດອຳນາດ ແລະ ໂຄງປະກອບການຈັດຕັ້ງຂອງຕຳຫຼວດ”. ຄົ້ນຄວ້າ, ສະເໜີໃຫ້ຄະນະເລຂາທິການ ພິຈາລະນາ, ປະກາດໃຊ້ຄຳສັ່ງ ກ່ຽວກັບວຽກງານການພົວພັນຕ່າງປະເທດຂອງກຳລັງຕຳຫຼວດປະຊາຊົນ ໃນສະພາບການໃໝ່. ກວດຄືນ ແລະ ຈັດວາງໜ້າທີ່ວຽກງານໃຫ້ເໝາະສົມກັບຄວາມສາມາດຕໍ່ກຳລັງວິຊາສະເພາະທີ່ປະຕິບັດວຽກງານການພົວພັນຕ່າງປະເທດຂອງຕຳຫຼວດປະຊາຊົນ ໃນສະພາບການໃໝ່. ເສີມຂະຫຍາຍບົດບາດເປັນເສນາທິການຍຸດທະສາດ ໃຫ້ແກ່ພັກ, ລັດ ກ່ຽວກັບບັນດາໄພອັນຕະລາຍນາບຂູ່ຄວາມສະຫງົບແຫ່ງຊາດ ແລະ ເປັນເຈົ້າການມີວິທີການແກ້ໄຂ, ຂໍ້ສະເໜີກໍ່ສ້າງ, ປະຕິບັດນະໂຍບາຍ, ແຜນນະໂຍບາຍ ກ່ຽວກັບການພັດທະນາເສດຖະກິດ - ສັງຄົມ, ຮັບປະກັນການປ້ອງກັນຄວາມສະຫງົບ - ການປ້ອງກັນຊາດ, ກໍ່ຄືປັບປຸງ, ເພີ່ມທະວີຄວາມເຊື່ອໝັ້ນໃນການເປີດກວ້າງ ແລະ ພັດທະນາການພົວພັນກັນປະເທດຕ່າງໆ.
ທີຫົກ, ເອົາໃຈໃສ່ໃນການກໍ່ສ້າງ, ສຶກສາອົບຮົມ, ບຳລຸງຖັນແຖວພະນັກງານປະຕິບັດວຽກງານພົວພັນຕ່າງປະເທດ ທີ່ມີຄຸນນະທາດການເມືອງອັນໝັ້ນແກ່ນ, ມີລະດັບຄວາມຮູ້ວິຊາສະເພາະ, ວິຊາການທີ່ຕອບສະໜອງໄດ້ດີ ຄວາມຮຽກຮ້ອງຕ້ອງການ, ໜ້າທີ່ວຽກງານຕຳຫຼວດເວົ້າລວມ ແລະ ໜ້າທີ່ພົວພັນຕ່າງປະເທດ, ການຮ່ວມມືສາກົນຂອງກຳລັງຕຳຫຼວດເວົ້າສະເພາະ. ເພີ່ມທະວີ, ຍົກສູງປະສິດທິຜົນວຽກງານການນຳ, ການບັນຊາ ຕາມທິດເປັນເຈົ້າການ, ມີຄວາມຮັບຜິດຊອບ, ມືອາຊີບ ແລະ ມີປະສິດທິຜົນ, ເພື່ອປະກອບສ່ວນເຂົ້າໃນການປະຕິບັດໃຫ້ສຳເລັດມີໄຊ “ຍຸດທະສາດປົກປັກຮັກສາປະເທດຊາດໃນສະພາບການໃໝ່”, ຮັກສາຄວາມໝັ້ນຄົງທາງການເມືອງ, ປົກປັກຮັກສາອຳນາດອະທິປະໄຕ, ຮັບໃຊ້ການພັດທະນາແບບຍືນຍົງ ແລະ ຕັ້ງໜ້າ, ເປັນເຈົ້າການເຊື່ອມໂຍງສາກົນຂອງປະເທດ./.
ພົນເອກ, ສດ. ປອ. ໂຕເລິມ
ກຳມະການກົມການເມືອງ, ລັດຖະມົນຕີກະຊວງຕຳຫຼວດ
--------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 914 (ເດືອນກຸມພາ 2018)
