ວກ. - ​ໃນ​ວິວັດ​ການກະຊັບການ​ພົວພັນ​ຮ່ວມ​ມື​ກັບ​ບັນດາ​ປະ​ເທດ​ໃນ​ໂລກ, ໂດຍສະເພາະປະເທດໃຫຍ່ ແລະຄູ່ຮ່ວມມືທີ່ສຳຄັນ, ແຕ່ປີ 2001 ເຖິງປະຈຸບັນ, ພັກແລະລັດຫວຽດນາມໄດ້ຄ່ອຍໆສ້າງແລະຜັນຂະຫຍາຍ ການພົວພັນຄູ່ຮ່ວມມືຍຸດທະສາດ ແລະຄູ່ຮ່ວມມືຍຸດທະສາດຮອບດ້ານ ກັບບັນດາປະເທດສຳຄັນ ໃນພາກພື້ນແລະໃນທົ່ວໂລກ, ລວມເຖິງ 6 ປະເທດຄູ່່ຮ່ວມຍຸດທະສາດ, 12 ປະເທດຄູ່ຮ່ວມຍຸດທະສາດຮອບດ້ານ ແລະ 12 ປະເທດຄູ່ຮ່ວມຮອບດ້ານ ⁽¹⁾. ບັນດາການພົວພັນເຫຼົ່ານີ້ ໄດ້ແລະກຳລັງປະກອບສ່ວນສຳຄັນ ໃນການສ້າງເງື່ອນໄຂທີ່ໝັ້ນຄົງ ເພື່ອຊ່ວຍຮັບປະກັນ ແລະປັບປຸງສະພາບແວດລ້ອມສັນຕະພາບ ແລະສະຖຽນລະພາບ ໃນພາລະກິດການປົກປັກຮັກສາ ແລະພັດທະນາປະເທດ ຢ່າງວ່ອງໄວແລະຍືນຍົງ, ກໍ່ຄື ການຍົກສູງຖານະບົດບາດ ແລະຕຳແໜ່ງຂອງຫວຽດນາມ ໃນເວທີສາກົນ ແລະ ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ ຢ່າງສຳເລັດມີໄຊ

ສະພາບການໂລກແລະພາກພື້ນ 

ສາມາດສະຫຼຸບລັກສະນະ​ທີ່​ພົ້ນ​ເດັ່ນບາງປະການ​ ຂອງສະພາບການ​ໂລກ ​ແລະ ພາກ​ພື້ນ ຕັ້ງ​ແຕ່​ຕົ້ນ​ສັດຕະວັດ​ທີ 21 ຈົນ​ເຖິງ​ປະຈຸ​ບັນ ໄດ້ດັງນີ້:

ທີໜຶ່ງ, ສັນຕິພາບ ເອກະລາດແຫ່ງຊາດ ປະຊາທິປະໄຕ ການຮ່ວມມື ແລະ ການພັດທະນາ ຍັງຄົງເປັນແນວໂນ້ມຫຼັກ, ​ແມ່ນ​ເງື່ອນ​ໄຂ​ສະດວກ​ເພື່ອ​ໃຫ້​ບັນດາ​ປະ​ເທດ​ປະຕິບັດ​ການ​ພົວພັນ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ, ປະກອບສ່ວນ​ເຂົ້າ​ໃນ​ການ​ປັບປຸງສັນຕິພາບ ​ແລະ ສະຖຽນ​ລະ​ພາບ​ໃນ​ໂລກ. ຢ່າງໃດກໍ່ຕາມ, ກະແສນີ້ກຳລັງປະເຊີນກັບຄວາມຫຍຸ້ງຍາກແລະອຸປະສັກຫຼາຍຢ່າງ ອັນເນື່ອງຈາກລັດທິຊາດນິຍົມສຸດຂົ້ວ, ລັດທິເອກະນິຍົມຝ່າຍດຽວ, ລັດທິກີດກັນທາງການຄ້າ, ລັດທິອຳນາດນິຍົມຂອງປະເທດໃຫຍ່, ການແຂ່ງຂັນດ້ານຍຸດທະສາດ ແລະສົງຄາມການຄ້າ ແລະ ການພັດທະນາທີ່ສັບສົນແລະຄາດເດົາບໍ່ໄດ້ ໃນສະພາບການການເມືອງ - ຄວາມໝັ້ນຄົງຂອງໂລກ. ການປະທະກັນທີ່ຍືດເຍື້ອຍໃນຕາເວັນອອກກາງ, ບັນຫາຂອງໄຕ້ຫວັນ (ຈີນ), ຄວາມສ່ຽງຂອງວິກິດການນິວເຄຼຍຢູ່ແຫຼມເກົາຫຼີ, ການ​ປະ​ທະ​ກັນໃນ​ຢູ​ເຄຣນທີ່​ບໍ່​ມີ​ຈຸດ​ຈົບຢ່າງ​ຈະ​ແຈ້ງ, ຄວາມ​ເປັນ​ໄປ​ບໍ່​ໄດ້​ຂອງ​ການ​ຢຸດ​ຍິງຖາວອນ​ ໃນ​ການ​ປະ​ທະ​ກັນ​ລະ​ຫວ່າງ ອິດ​ສະ​ຣາ​ແອນ ແລະ ຮາມາດ ໄດ້​ເປີດ​ເຜີຍ​ໃຫ້​ເຫັນ “ຈຸດ​ຮ້ອນ” ຂອງການຮັກສາຄວາມໝັ້ນຄົງແບບດັ້ງເດີມບົນແຜນທີ່ໂລກກຳລັງເພີ່ມຂະໜາດແລະອັນຕະລາຍຮ້າຍແຮງ. ຜົນກະທົບຂອງການປ່ຽນແປງສະພາບດິນຟ້າອາກາດ, ມົນລະພິດຕໍ່ສິ່ງແວດລ້ອມ, ຄວາມໝັ້ນຄົງຂອງແຫຼ່ງນ້ຳ, ຄວາມປອດໄພຂອງເຄືອຂ່າຍ, ຄວາມໝັ້ນຄົງດ້ານຂໍ້ມູນ ແລະອື່ນໆ ສະທ້ອນໃຫ້ເຫັນເຖິງຄວາມຈິງທີ່ວ່າ ບັນດາຄວາມທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ ທີ່ໄດ້ ກຳລັງ ແລະຈະເປັນໄພຂົ່ມຂູ່ທີ່ແທ້ຈິງຕໍ່ຊີວິດຂອງມະນຸດ ແລະຄວາມສາມາດຂອງປະເທດຕ່າງໆໃນການບັນລຸຄວາມຮັບຮູ້ທົ່ວໄປ ແລະການດໍາເນີນການຮ່ວມກັນ ບໍ່ແມ່ນເລື່ອງງ່າຍ.

ທີສອງ, ສະຖານະການໂລກກຳລັງເຄື່ອນຕົວໄວຂຶ້ນໄປສູ່ແນວໂນ້ມແບບຫຼາຍຂົ້ວແລະຫຼາຍສູນກາງ. ພາຍໃຕ້ອິດທິພົນຄອບງຳຂອງລັດທິປະຕິບັດນິຍົມໃນການພົວພັນສາກົນ, ການພົວພັນຄູ່ຮ່ວມ ແລະ ເປົ້າໝາຍ, ພັນທະມິດ ແລະ ຝ່າຍກົງຂ້າມ, ມິດ ແລະ ສັດຕູ,... ທີ່ມີຄວາມສຳພັນກັນຢ່າງຊັບຊ້ອນ ແລະສາມາດສັບປ່ຽນກັນໄດ້ ຢ່າງບໍ່ເປັນລະບຽບ. ບັນດາປະເທດໃຫຍ່, ດ້ານໜຶ່ງ, ຮ່ວມມືແລະປະນີປະນອມກັນ; ໃນອີກດ້ານໜຶ່ງ, ແກ່ງແຍ້ງກັນນັບມື້ນັບຮຸນແຮງແລະສັບສົນ. ໃນນັ້ນ, ການເຄື່ອນໄຫວຂອງຄວາມສຳພັນສະຫະລັດອາເມລິກາ - ຈີນ ມີບົດບາດສຳຄັນໃນການກຳນົດສະຖານະການໂລກໃນເວລາທີ່ຈະມາເຖິງ.

ເມື່ອປຽບທຽບດັດຊະນີອຳນາດຂອງອາຊີໃນຊຸມປີທີ່ຜ່ານມາມໍ່ນີ້ ⁽²⁾ ໃນດ້ານຄວາມເຂັ້ມແຂງທາງເສດຖະກິດ, ຄວາມເຂັ້ມແຂງທາງການທະຫານ, ຄວາມສາມາດສ້າງຕົນເອງໃຫ້ເຂັ້ມແຂງ ຕິດພັນກັບບັນດາປັດໄຈພາຍໃນ, ຊັບພະຍາກອນໃນອະນາຄົດ, ບັນດາສາຍພົວພັນທາງເສດຖະກິດ, ເຄືອຂ່າຍທາງທະຫານ, ອິດທິພົນທາງການທູດ ແລະອິດທິພົນທາງວັດທະນະທຳ ລະຫວ່າງສະຫະລັດອາເມລິກາ ແລະ ຈີນ ສະແດງໃຫ້ເຫັນວ່າ, ເຖິງແມ່ນວ່າສະຫະລັດອາເມລິກາຍັງຄົງຮັກສາຕໍາແໜ່ງທີ 1 ໃນດັດຊະນີ 6/8, ແຕ່ການຈັດອັນດັບຂອງມັນ (ໃນລະດັບ 100) ໄດ້ຫຼຸດລົງຂ້ອນຂ້າງຫຼາຍ. ໃນ​ດ້ານ​ການ​ພົວ​ພັນ​ທາງ​ເສດ​ຖະ​ກິດ ​ແລະ​ອິດ​ທິ​ພົນ​ທາງ​ການ​ທູດ​ພຽງຢ່າງດຽວ​, ຈີນ​ໄດ້​ລື່ນ​ກາຍ​ອາ​ເມລິ​ກາ​ ແລະ​ກ້າວຂຶ້ນສູ່​ຕໍາ​ແໜ່ງຜູ້​ນໍາ​. ລັດ​ເຊຍ ​ແລະ ອິນ​ເດຍ ຍັງ​ເປັນ​ຄູ່​ຕໍ່ສູ້​ທີ່​ແຂງ​ແຮງ​ຂຶ້ນເລື້ອຍໆ ​ໂດຍ​ສະ​ເພາະ​ແມ່ນ​ດ້ານ​ກຳລັງ​ເສດຖະກິດ, ກໍາລັງ​ການທະຫານ, ການ​ເພິ່ງ​ພາ​ຕົນ​ເອງ ​ແລະ ຊັບພະຍາກອນ​ໃນ​ອະນາຄົດ. ຍີ່ປຸ່ນສືບຕໍ່ຮັກສາຕຳແໜ່ງທີ່ສາມໃນດ້ານກຳລັງແຮງເສດຖະກິດ ແລະການພົວພັນທາງເສດຖະກິດ, ແຕ່ກຳລັງຫຼຸດຊ່ອງຫວ່າງລົງ ເມື່ອທຽບກັບອິນເດຍ ເຊິ່ງແມ່ນປະເທດທີ່ມີຂະໜາດເສດຖະກິດໃຫຍ່ເປັນອັນດັບຫ້າຂອງໂລກ. ໃນຂະນະນັ້ນ, ຄວາມສາມາດທາງການທະຫານຂອງຍີ່ປຸ່ນກໍ່ເພີ່ມຂຶ້ນໜຶ່ງລະດັບ, ຈາກອັນດັບທີ 7 ມາເປັນອັນດັບທີ 6 ພາຍໃນປີ 2023...

ທີສາມ, ພາກພື້ນອິນໂດປາຊີຟິກຖືເປັນຈຸດສຸມໃໝ່ ຂອງການເຄື່ອນໄຫວທາງພູມສາດ-ການເມືອງ ແລະ ພູມສາດ-ເສດຖະສາດໂລກ, ເຊິ່ງການແຂ່ງຂັນທາງຍຸດທະສາດເກີດຂຶ້ນລະຫວ່າງມະຫາອຳນາດແລະສູນກາງອຳນາດ. ເປັນພາກພື້ນທີ່ມີທີ່ຕັ້ງທາງພູມສາດ-ຍຸດທະສາດ ໃນດ້ານເສດຖະກິດ ການເມືອງ ການປ້ອງກັນປະເທດ ແລະຄວາມໝັ້ນຄົງ; ມີຊັບພະຍາກອນທຳມະຊາດທີ່ອຸດົມສົມບູນ ແລະເສັ້ນທາງເດີນທະເລທີ່ສຳຄັນຫຼາຍເສັ້ນທາງ; ປະຊາກອນກວມເອົາຫຼາຍກວ່າເຄິ່ງໜຶ່ງຂອງປະຊາກອນໂລກ; ມີການມີຢູ່ຂອງເສດຖະກິດຊັ້ນນຳຂອງໂລກສາມແຫ່ງຄື ສະຫະລັດອາເມລິການ, ຈີນ, ຍິີ່ປຸ່ນ ແລະຕະຫຼາດທີ່ເຕີບໂຕຢ່າງວ່ອງໄວສ່ວນໃຫຍ່ ເຊັ່ນ ອິນເດຍ, ຈີນ, ອາຊີຕາເວັນອອກສຽງໃຕ້,... ພາກພື້ນອິນໂດປາຊີຟິກຖືເປັນ “ຫົວລົດຈັກ” ຂອງການເຕີບໂຕທາງເສດຖະກິດໂລກ, ການເຊື່ອມໂຍງ ແລະ ການບູລະນາການທາງເສດຖະກິດ. ຢ່າງໃດກໍ່ຕາມ, ພາກພື້ນນີ້ຍັງລວມບັນດາ “ຈຸດຮ້ອນ” ຂອງຂໍ້ຂັດແຍ້ງກ່ຽວກັບອະທິປະໄຕທາງທະເລແລະເກາະ; ຂໍ້ຂັດແຍ່ງກ່ຽວກັບການຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດ; ຂໍ້ຂັດແຍ່ງດ້ານສິ່ງແວດລ້ອມ; ຄວາມ​ສ່ຽງ​ຂອງ​ການ​ປະ​ທະ​ກັນ, ແມ່ນ​ແຕ່​ສົງ​ຄາມ​ນິວ​ເຄຼຍ,... ສົ່ງ​ຜົນ​ກະ​ທົບ​ຢ່າງຮ້າຍແຮງ​ຕໍ່​ຄວາມ​ໝັ້ນ​ຄົງ ແລະ​ສະ​ຖຽນ​ລະ​ພາບ​ຂອງ​ພາກ​ພື້ນ ແລະ ໂລກ.

ພາຍໃນ 5 ປີ ນັບຕັ້ງແຕ່ປີ 2017 - ເປັນເວລາທີ່ພັກກອມມູນິດຈີນ ຕັ້ງເປົ້າໝາຍໃນການສົ່ງເສີມການກໍ່ສ້າງ “ໜຶ່ງແລວທາງ, ໜຶ່ງເສັ້ນທາງ” ເຊິ່ງເປັນຕົ້ນກຳເນີດຂອງໂຄງການລິເລີ່ມ “ແລວທາງແລະເສັ້ນທາງ” (BRI) ໃນກົດລະບຽບຂອງພັກ ຈາກກອງປະຊຸມໃຫຍ່ຄັ້ງທີ XIX, ມີເອກະສານ ແລະ ເອກະສານການປັບປ່ຽນຫຼາຍເຖິງ 17 ສະບັບ⁽³⁾ ໂດຍໃສ່ຊື່ ຍຸດທະສາດ/ວິໄສທັດ/ຂໍ້ລິເລີ່ມ/ແຜນການອິນໂດປາຊີຟິກ ຫຼືເອກະສານນະໂຍບາຍອື່ນໆ ກ່າວເຖິງອິນໂດປາຊີຟິກວ່າ ເປັນໂຄງສ້າງພູມສາດ-ການເມືອງທີ່ສຳຄັນເພື່ອຊີ້​ນຳ​ນະ​ໂຍບາຍ​ການ​ຕ່າງປະ​ເທດ ​ແລະ ຄວາມ​ໝັ້ນຄົງ​ຂອງ​ບັນດາ​ປະ​ເທດ ​ແລະ ບັນດາ​ອົງການ​ຈັດ​ຕັ້ງ​ພາກ​ພື້ນ. ນັ້ນ​ແມ່ນ​ຫຼັກ​ຖານ​ທີ່​ຈະ​ແຈ້ງ​ກ່ຽວ​ກັບ​ການ​ເຊື່ອມ​ໂຍງ​ເຂົ້າກັນ​ຂອງ​ຜົນ​ປະ​ໂຫຍ​ດທາງ​ຍຸດ​ທະ​ສາດ ​ແລະຜົນປະໂຫຍດທີ່ຫຼີກ​ລ່ຽງບໍ່​ໄດ້ ເຊິ່ງຕິດພັນກັນ​ກັບ​ການ​ປະ​ທະ​ກັນ ​ແລະ ຄວາມ​ຂັດ​ແຍ່ງ​ກັນ ​ລະຫວ່າງ​ບັນດາອັດຕະພາບ​ທີ່​ກ່ຽວຂ້ອງ.

ທີສີ່, ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ກາຍເປັນ “ແກນຫຼັກ” ຂອງກົນໄກການຮ່ວມມືທາງເສຖະກິດໃນພາກພື້ນອາຊີປາຊີຟິກ ແລະ ຖືເປັນທິດທາງບຸລິມະສິດໃນການດຳເນີນຍຸດທະສາດການສ້າງສົມດຸນຂອງບັນດາປະເທດໃຫຍ່. ຈີນໄດ້ເພີ່ມການຄ້າກັບອາຊຽນ ໂດຍຮັກສາຕຳແໜ່ງຄູ່ຮ່ວມມືການຄ້າໃຫຍ່ທີ່ສຸດຂອງອາຊຽນຕັ້ງແຕ່ປີ 2009 ແລະ ອາຊຽນກາຍເປັນຄູ່ຮ່ວມມືການຄ້າໃຫຍ່ທີ່ສຸດຂອງຈີນຕັ້ງແຕ່ປີ 2020 ມາເຖິງປະຈຸບັນ ⁽⁴⁾. ອາເມລິກາເນັ້ນໜັກວ່າ ອາຊຽນແມ່ນຄູ່ຮ່ວມມືທາງເສດຖະກິດທີ່ສຳຄັນ⁽⁵⁾, ເຄົາລົບແລະສະໜັບສະໜູນບົດບາດສຳຄັນຂອງອາຊຽນ ໃນໂຄງສ້າງອາຊີຕາເວັນອອກ ແລະ ອາຊີປາຊີຟິກ, ແລະມຸ່ງໝັ້ນທີ່ຈະສະໜັບສະໜູນອາຊຽນຕໍ່ໄປໃນການສ້າງປະຊາຄົມ, ຜັນຂະຫຍາຍໂຄງການລິເລີ່ມການເຊື່ອມໂຍງອາຊຽນ - ສະຫະລັດອາເມລິກາ ແລະຍົກລະດັບການພົວພັນຂຶ້ນເປັນການພົວພັນຄູ່ຮ່ວມຍຸດທະສາດຮອບດ້ານພາຍໃນປີ 2022. ໃນຂະນະນັ້ນ, ຍີ່ປຸ່ນສືບຕໍ່ຖືວ່າ ອາຊຽນເປັນບຸລິມະສິດໃນນະໂຍບາຍການຕ່າງປະເທດ, ສະໜັບສະໜູນຄວາມສາມັກຄີຂອງອາຊຽນ, ໃຫ້ຄວາມສຳຄັນກັບບົດບາດສູນກາງຂອງອາຊຽນໃນພາກພື້ນ, ເຄົາລົບແລະປະກອບສ່ວນຢ່າງມີຄວາມຮັບຜິດຊອບຕໍ່ກົນໄກທີ່ນຳໂດຍອາຊຽນ. ຍີ່ປຸ່ນແລະອາຊຽນໄດ້ສ້າງການພົວພົນຮ່ວມມືທີ່ກວມລວມຫຼາຍຂົງເຂດ ແລະກາຍເປັນຄູ່ຮ່ວມມືທີ່ເຊື່ອຖືໄດ້ລະຫວ່າງກັນ. ປະຈຸບັນ, ຍີ່ປຸ່ນ​ແມ່ນ​ຄູ່​ຮ່ວມ​ມື​ການ​ຄ້າ ​ແລະ ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ (FDI) ​ໃຫຍ່​ອັນ​ດັບ 4 ຂອງ​ອາ​ຊຽນ⁽⁶⁾. ຍີ່​ປຸ່ນ​ຍັງນຳ​ໜ້າ​ໃນ​ການ​ສະ​ໜັບ​ສະ​ໜູນ​ການ​ປະ​ຕິ​ບັດຕາມວິໄສທັດ​ອາ​ຊຽນ​ວ່າດ້ວຍ​ອິນ​ໂດ​ປາ​ຊີ​ຟິກ ເພື່ອ​ສັນ​ຕິ​ພາບ ສະ​ຖຽນ​ລະ​ພາບ ແລະ ຄວາມ​ຈະ​ເລີນ​ຮຸ່ງ​ເຮືອງ​ໃນ​ພາກ​ພື້ນ.

ປະເທດອື່ນໆກໍ່ໄດ້ຍູ້ແຮງການຮ່ວມມືກັບອາຊຽນ. ອິນເດຍຖືວ່າອາຊຽນເປັນເສົາຄ້ຳຂອງນະໂຍບາຍ “ປະຕິບັດການຕາເວັນອອກ” ແລະ ເປັນຈຸດສຸມຂອງຄວາມຄິດລິເລີ່ມອິນໂດປາຊີຟິກຂອງອິນເດຍ. ໂອສະຕຣາລີຢືນຢັນຄວາມມຸ່ງໝັ້ນໃນການສົ່ງເສີມການພົວພັນຄູ່ຮ່ວມມືຍຸດທະສາດກັບອາຊຽນໃນໄລຍະໃໝ່ ໃນກອງປະຊຸມສຸດຍອດພິເສດອາຊຽນ - ໂອສະຕຣາລີ ເຊິ່ງຈັດຂຶ້ນຢູ່ເມືອງຊິດນີ (ໂອສະຕຣາລີ) ໃນເດືອນມີນາ 2018; ຢືນຢັນອີກຄັ້ງເຖິງຄວາມຄວາມມຸ່ງໝັ້ນໃນການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ໃນກອງປະຊຸມຄັ້ງທີ 13 ຂອງຄະນະກຳມະການການຮ່ວມມືສອງຝ່າຍອາຊຽນ - ໂອສະຕຮາລີ (ວັນທີ 3 ມີນາ 2023). ລັດ​ເຊຍ​ສະ​ແດງ​ຄວາມ​ສົນ​ໃຈໃນ​ອາຊີປາຊີ​ຟິກຫຼາຍ​ຂຶ້ນ​ເລື້ອຍໆ. ໃນ​ກອງ​ປະ​ຊຸມ​ເຈົ້າ​ໜ້າ​ທີ່​ອາ​ວຸ​ໂສ ອາ​ຊຽນ-ລັດ​ເຊຍ (ARSOM) ຄັ້ງ​ທີ 19 (ເມ​ສາ 2023) ເຊິ່ງຈັດຂຶ້ນທີ່ເມືອງຊຽມຣຽບ (ກຳປູເຈຍ), ທັງສອງຝ່າຍຢືນຢັນອີກຄັ້ງເຖິງຄວາມມຸ່ງໝັ້ນໃນການເພີ່ມທະວີການພົວພັນຄູ່ຮ່ວມມືຍຸດທະສາດ. ລັດ​ເຊຍ​ຢືນຢັນ​ການ​ສະໜັບສະໜູນ​ບົດບາດ​ໃຈກາງ​ຂອງ​ອາ​ຊຽນ​ໃນ​ການ​ພັດທະນາ​ໂຄງ​ປະກອບ​ພາກ​ພື້ນ ​ເພື່ອ​ຮັກສາ​ສັນຕິພາບ ສະຖຽນ​ລະ​ພາບ ​ແລະ ຄວາມ​ຈະ​ເລີ​ນຮຸ່ງ​ເຮືອງ.

ຂະບວນການສ້າງແລະຍົກລະດັບການພົວພັນຄູ່ຮ່ວມມືຍຸດທະສາດ,
ຄູ່ຮ່ວມມືຍຸດທະສາດຮອບດ້ານ ຂອງຫວຽດນາມ

ຂະ​ບວນ​ການ​ທີ່​ບັນ​ດາ​ປະ​ເທດ​ໃຫຍ່ແລະອົງ​ການ​ຈັດ​ຕັ້ງ​ພາກ​ພື້ນ ເພີ່ມ​​ອິດ​ທິ​ພົນ​ໃນ​ພາກ​ພື້ນອາ​ຊີປາ​ຊີ​ຟິກ ແລະ ອິນ​ໂດ​ປາ​ຊີ​ຟິກ ໄດ້​ສະ​ແດງ​ໃຫ້​ເຫັນເຖິງການ​ບຸ​ລິ​ມະ​ສິດ​ສຳ​ລັບ​ອາ​ຊຽນ. ສຳລັບຫວຽດນາມ, ໃນດ້ານໜຶ່ງ, ສິ່ງນີ້ສ້າງເງື່ອນໄຂສະດວກໃຫ້ຫວຽດນາມ ໃນການຮ່ວມມືພັດທະນາ; ໃນອີກດ້ານໜຶ່ງ, ເພີ່ມແຮງກົດດັນດ້ານການແຂ່ງຂັນທັງພາຍໃນ ແລະນອກພາກພື້ນ.

ກ່ອນ​ປີ 2000, ປະຕິບັດ​ນະ​ໂຍບາຍ​ເປີດປະເທດ, ​ເຊື່ອມ​ໂຍງ​ເຂົ້າ​ກັບ​ສາກົນ, ຫັນ​ການ​ພົວພັນ​ຕ່າງປະ​ເທດ​ເປັນ​ຫຼາຍ​ຝ່າຍ ​ຫຼາຍ​ຮູບ​ຫຼາຍ​ແບບ, ຫວຽດນາມ​ໄດ້​ສ້າງ​ການ​ພົວພັນ​ມິດຕະພາບ ​ແລະການ​ຮ່ວມ​ມື​​ກັບກວ່າ 180 ​ປະ​ເທດ​ແລະ​ດິນ​ແດນທົ່ວ​ໂລກ ຢ່າງ​ວ່ອງ​ໄວ.  ແນວໃດກໍ່ຕາມ, ຄວາມ​ສາມາດ​ບົ່ມ​ຊ້ອນ​ດ້ານ​ການ​ພົວພັນ​ຕ່າງປະ​ເທດ​ຫຼາຍ​ຢ່າງ​ຍັງ​ບໍ່​ທັນ​ໄດ້​ຮັບ​ການ​ຂຸດ​ຄົ້ນ​ຢ່າງ​ເຕັມທີ່. ກອງປະຊຸມໃຫຍ່ພັກກອມມູນິດຫວຽດນາມ ຄັ້ງທີ X (ປີ 2006) ຕັ້ງແຜນນະໂຍບາຍ “ນຳ​ການ​ພົວ​ພັນ​ສາ​ກົນທີ່ໄດ້ຈັດຕັ້ງຂຶ້ນ​ເຂົ້າ​ສູ່​ລວງ​ເລິກ ໝັ້ນຄົງ ແລະ ຍືນຍົງ”⁽⁷⁾. ແຜນນະໂຍບາຍນີ້ສືບຕໍ່ໄດ້ຮັບການຢືນຢັນຜ່ານກອງປະຊຸມໃຫຍ່ຂອງພັກຄັ້ງທີ XI (ປີ 2011), ກອງປະຊຸມໃຫຍ່ຄັ້ງທີ XII (ປີ 2016) ແລະ ກອງປະຊຸມໃຫຍ່ຄັ້ງທີ XIII (ປີ 2021). ພິເສດ, ລາຍງານການເມືອງຂອງຄະນະບໍລິຫານງານສູນກາງຊຸດທີ XII ໃນກອງປະຊຸມໃຫຍ່ຄັ້ງທີ XIII ຂອງພັກ ໄດ້ກຳນົດທິດທາງການພົວພັນຕ່າງປະເທດວ່າ “ຊຸກຍູ້ແລະກະຊັບການພົວພັນສອງຝ່າຍກັບບັນດາຄູ່ຮ່ວມມື, ພິເສດແມ່ນ ຄູ່ຮວມມືຍຸດທະສາດ, ຄູ່ຮ່ວມມືຮອບດ້ານ ແລະ ບັນດາຄູ່ຮ່ວມມືທີ່ສຳຄັນອື່ນໆ, ສ້າງການປະສົມປະສານຜົນປະໂຫຍດແລະເພີ່ມຄວາມໜ້າເຊື່ອຖື”⁽⁸⁾. ແຜນນະ​ໂຍບາຍ​ນີ້​ລວມຢູ່ໃນ​ນະ​ໂຍບາຍ​ການ​ຕ່າງປະ​ເທດ​ໂດຍລວມຂອງ​ຫວຽດນາມ ​ແມ່ນ​ເອກະລາດ, ເປັນເຈົ້າ​ຕົນ​ເອງ, ​ເປີດ​ກວ້າງ, ຫັນ​ເປັນ​ຫຼາຍ​ຝ່າຍ ຫຼາຍຮູບຫຼາຍແບບ, ​ເຊື່ອມ​ໂຍງ​ເຂົ້າ​ກັບ​ສາກົນ​ຢ່າງຮອບດ້ານ ​ແລະ ກວ້າງຂວາງ. ຈຸດປະສົງ​ພື້ນຖານ​ຂອງ​ການ​ລົງ​ເລິກ​ການ​ພົວພັນ​ຕ່າງປະ​ເທດ​ແມ່ນ ​ຊຸກຍູ້​ການ​ພົວພັນ​ຕ່າງປະ​ເທດ​ໃຫ້​ພັດທະນາ​ຢ່າງ​ບໍ່​ຢຸດ​ຢັ້ງ, ມີ​ປະສິດທິ​ຜົນ ​ແລະ ​ແທດ​ຈິງ​ ໃຫ້ແກ່​ທຸກ​ຝ່າຍ​ທີ່​ກ່ຽວຂ້ອງ. ຜ່ານນັ້ນ, ເພີ່ມທະວີຄວາມໝັ້ນຄົງແລະຍືນຍົງຂອງບັນດາການພົວພັນຕ່າງປະເທດ, ປັບປຸງຄວາມໄວ້ວາງໃຈເຊິ່ງກັນແລະກັນ ແລະຜົນປະໂຫຍດຍຸດທະສາດພື້ນຖານຮ່ວມກັນ, ຫຼີກ​ລ້ຽງ​ການ​ນຳ​ການ​ພົວ​ພັນ​ຕ່າງ​ປະ​ເທດ​ເຂົ້າ​ສູ່​ພາວະຫຼ້າຊ້າ.

​ໃນ​ຂະບວນ​ການກະຊັບການ​ພົວພັນ​ຮ່ວມ​ມື​ກັບ​ບັນດາ​ປະ​ເທດ​ໃນ​ໂລກ, ພິ​ເສດ​ແມ່ນ​ບັນດາ​ປະ​ເທດ​ໃຫຍ່ ​ແລະ ບັນດາ​ຄູ່​ຮ່ວມ​ມື​ທີ່​ສຳຄັນ, ມາ​ຮອດ​ປະຈຸ​ບັນ, ພັກ ​ແລະ ລັດ ຫວຽດນາມ ​ໄດ້​ຄ່ອຍໆ​ສ້າງ ​ແລະ ຜັນ​ຂະຫຍາຍ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ, ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ກັບ 18 ປະ​ເທດ​ສຳຄັນ​ໃນ​ພາກ​ພື້ນ ແລະທົ່ວໂລກ⁽⁹⁾.

ຈາກພຶດຕິກຳຕົວຈິງຂອງການພົວພັນຍຸດທະສາດໃນການພົວພັນສາກົນໂດຍທົ່ວໄປ ແລະ ໂດຍສະເພາະໃນຫວຽດນາມ, ພວກ​ເຮົາ​ສາມາດ​ຖອດຖອນ​ຄຳພິນິດພິຈາລະນາບາງຢ່າງກ່ຽວກັບ​ວິ​ທີ​ການ​ທູດ​ຂອງ​ຫວຽດນາມ ​ໃນ​ໄລຍະ​ຜ່ານ​ມາ ​ໃນ​ການ​ຊຸກຍູ້​ການ​ພົວພັນ​ກັບ​ບັນດາ​ຄູ່​ຮ່ວມ​ມື​ຍຸດ​ທະ​ສາດ ​ແລະ ຜົນງານທີ່​ບັນລຸ​ໄດ້. ໂດຍສະເພາະ:

ທີໜຶ່ງ, ຄຽງ​ຄູ່​ກັບ​ເປົ້າ​ໝາຍຕົ້ນຕໍໃນການ​ຮັບປະກັນ​ຜົນ​ປະ​ໂຫຍ​ດສູງ​ສຸດ​ຂອງ​ຊາດ-ປະ​ເທດ​ຊາດ ​ບົນ​ພື້ນຖານຂອງບັນດາ​ຫຼັກການ​ພື້ນຖານ​ຂອງ​ກົດ​ບັດ​ສະຫະ​ປະຊາ​ຊາດ ​ແລະ ກົດໝາຍ​ສາກົນ, ຄວາມ​ສະ​ເໝີ​ພາບ, ການ​ຮ່ວມ​ມື ​ແລະ ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ, ຫວຽດນາມຊຸກຍູ້​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ, ການສະໜັບສະໜູນ​ໄລຍະຍາວ ​ແລະ ຄວາມ​ໄວ້ວາງ​ໃຈ​ຍຸດ​ທະ​ສາດ ໃນຂະບວນການສ້າງ ແລະ ຍົກລະດັບການພົວພັນຄູ່ຮ່ວມມືຍຸດທະສາດ ແລະ ຄູ່ຮ່ວມມືຍຸດທະສາດຮອບດ້ານ. ຈີນ​ແມ່ນ​ປະ​ເທດເພື່ອນບ້ານທີ່​ໃກ້ຊິດ, ມີ​ຄວາມ​ຄ້າຍຄື​ກັນກັບຫວຽດນາມ​ຫຼາຍປະການ ​ໃນ​ປະຫວັດສາດ​ແລະ​ວັດທະນະ​ທຳ​ແລະ ທັງສອງ​ພະຍາຍາມ​ກ້າວ​ໄປ​ສູ່​ສັງຄົມ​ນິຍົມ​ພາຍ​ໃຕ້​ການ​ນຳພາ​ຂອງ​ພັກ​ກອມ​ມູນິດ​. ການ​ນຳ​ຂັ້ນ​ສູງ​ຂອງ​ສອງ​ປະ​ເທດໄດ້​ຮັກ​ສາ​ການ​ແລກ​ປ່ຽນເປັນປະຈຳ ແລະກຳນົດທິດທາງ​ການ​ພົວ​ພັນ​ລະ​ຫວ່າງ​ຫວຽດ​ນາມແລະຈີນ; ພ້ອມ​ກັນ​ນັ້ນ, ກໍ​ມີ​ບົດບາດ​ຍຸດ​ທະ​ສາດ​ສຳຄັນ​ໃນ​ການ​ພັດທະນາ​ການ​ພົວພັນ​ລະຫວ່າງ​ສອງ​ພັກ ​ແລະ ສອງ​ປະ​ເທດ. ສະຫະພາບໂຊວຽດ (ໃນເມື່ອກ່ອນ) ແມ່ນ​ໜຶ່ງ​ໃນ​ບັນດາ​ປະ​ເທດ​ທຳ​ອິດ​ໃນ​ໂລກ​ທີ່​ໄດ້​ສ້າງ​ຕັ້ງ​ການ​ພົວພັນ​ທາງ​ການ​ທູດ​ກັບຫວຽດນາມຢ່າງ​ເປັນ​ທາງ​ການ ​ໃນ​ວັນ​ທີ 30 ມັງກອນ 1950, ​ໄດ້​ວາງ​ຮາກ​ຖານ​ໃຫ້​ແກ່​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ການ​ຮ່ວມ​ມື​ອັນ​ດີງາມ​ລະຫວ່າງຫວຽດນາມ​ແລະລັດ​ເຊຍໃນເວລາຕໍ່ມາ. ຜ່ານການພົວພັນລະຫວ່າງຫວຽດນາມກັບສະຫະພາບໂຊວຽດກ່ອນໜ້ານີ້ ແລະ ລັດເຊຍໃນປະຈຸບັນ ໄດ້ຮັບຄວາມໄວ້ວາງໃຈມາໂດຍຕະຫຼອດ ແລະ ໄດ້ຜ່ານຜ່າຄວາມທ້າທາຍຫຼາຍຢ່າງ ຂອງເວລາແລະການປ່ຽນແປງຄັ້ງໃຫຍ່ຂອງຍຸກສະໄໝ. ອິນເດຍ​ແມ່ນ​ໜຶ່ງ​ໃນ​ບັນດາ​ຄູ່​ຮ່ວມ​ມື​ທີ່​ໄວ້​ເນື້ອ​ເຊື່ອ​ໃຈ​ທີ່​ສຸດ​ຂອງ​ຫວຽດນາມ ໂດຍສະ​ແດງ​ການ​ສະໜັບສະໜູນ​ເສັ້ນທາງການພັດທະນາ ​ແລະນະ​ໂຍບາຍ​​ຂອງ​ຫວຽດນາມຢ່າງສະໝ່ຳສະເໝີ​ ໃນ​ຫຼາຍ​ເວທີ​ປາ​ໄສ​ຫຼາຍ​ຝ່າຍ​ໃນ​ພາກ​ພື້ນ ​ແລະ ສາກົນ. ການປ່ຽນແປງ​ສຳຄັນໃນ​ການ​ພົວພັນ​ຫວຽດນາມ-ສະຫະລັດອາ​ເມ​ລິ​ກາ ຈາກ​ການ​ພົວພັນ​ຄູ່​ຮ່ວມ​ມື​ຮອບດ້ານ (2013) ສູ່ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ (2023) ​ໄດ້​ຮັບ​ການ​ສົ່ງເສີມ​ຢ່າງ​ແທ້​ຈິງ ຜ່ານ​ການ​ຢ້ຽມຢາມ​ຄັ້ງ​ປະຫວັດສາດ​ຂອງ​ທ່ານ​ເລຂາທິການ​ໃຫຍ່ ຫງວຽນ ຝູ ຈ້ອງ ​ເຖິງສະຫະລັດອາເມລິກາ ເນື່ອງໃນ​ໂອກາດ​ທີ່ທັງ​ສອງ​ປະ​ເທດ​ສະ​ເຫຼີມສະຫຼອງ ຄົບຮອບ 20 ປີ​ແຫ່ງ​ການ​ພົວພັນ​ກັບສູ່​ປົກກະຕິ​ໃນ​ປີ 2015.

ທີສອງ, ເວລາໃນການສ້າງຂອບຄູ່ຮ່ວມມືຍຸດທະສາດ ແລະຄູ່ຮ່ວມມືຍຸດທະສາດຮອບດ້ານຂອງຫວຽດນາມ ຕິດພັນກັບການຢ້ຽນຢາມຮ່ວມກັນຂອງຜູ້ນຳຂັ້ນສູງຂອງຫວຽດນາມ ແລະຜູ້ນຳຂັ້ນສູງຂອງປະເທດອື່ນໆ ໂດຍມີຈຸປະສົງຕົ້ນຕໍແມ່ນເພື່ອກຳນົດທິດທາງຍຸດທະສາດຂອງການພົວພັນສອງຝ່າຍ ໃນສະພາບການໃໝ່ຂອງ​ທົດ​ສະ​ວັດ​ທໍາ​ອິດ​ຂອງ​ສັດ​ຕະ​ວັດ​ທີ XXI. ໃນຫຼາຍກໍລະນີ, ນັ້ນແມ່ນການຢ້ຽມຢາມຫວຽດນາມຢ່າງເປັນທາງການຄັ້ງທຳອິດຂອງຜູ້ນຳພັກແລະປະມຸກແຫ່ງລັດ. ຕົວຢ່າງເຊັ່ນ, ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມແລະຈີນ ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນລະຫວ່າງການຢ້ຽມຢາມ​ຈີນຢ່າງເປັນມິດຕະພາບ​ຢ່າງ​ເປັນ​ທາງ​ການ​ ຂອງ​ທ່ານ​ເລຂາທິການ​ໃຫຍ່ ນົງດຶກແມັ້ງ (ເດືອນພຶດສະພາ 2008). ​ໃນລະຫວ່າງ​ການ​ຢ້ຽມຢາມ, ການ​ນຳ​ຂັ້ນ​ສູງ​ຂອງ​ສອງ​ປະ​ເທດ​ໄດ້​ເຫັນ​ດີ​ສ້າງ “ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ” ​ໃນ​ສະຕະວັດ​ທີ XXI ບົນ​ພື້ນຖານ​ຂອງຄໍາຂວັນຕົວອັກສອນສີທອງ 16 ຕົວ “ເພື່ອນບ້ານທີ່ເປັນມິດ, ການ​ຮ່ວມ​ມືຮອບດ້ານ, ຄວາມໝັ້ນຄົງໃນໄລຍະ​ຍາວ, ມຸ່ງສູ່ອະນາຄົດ” ແລະ ຈິດ​ໃຈ​ທີ່​ດີ 4 ປະ​ເທດ “ເພື່ອນ​ບ້ານ​ທີ່​ດີ, ໝູ່ເພື່ອນທີ່​ດີ, ສະຫາຍ​ທີ່​ດີ, ຄູ່​ຮ່ວມ​ມື​ທີ່​ດີ”. ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດຫວຽດນາມ - ລັດ​ເຊຍ ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ການ​ຢ້ຽມຢາມຫວຽດນາມຢ່າງເປັນທາງການ​ຄັ້ງ​ທຳ​ອິດ​ຂອງ​ທ່ານ​ປະທານາທິບໍດີ​ ວະລາດີເມຍ ປູຕີນ ​ໃນ​ຖານະປະທານາທິບໍດີ ລັດ​ເຊຍ ໃນ​ປີ 2001 ​ແລະສອງຝ່າຍຮ່ວມ​ກັນ​ອອກ​ຖະ​ແຫຼ​ງການ​ຮ່ວມ ວ່າດ້ວຍ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ລະຫວ່າງຫວຽດນາມແລະລັດ​ເຊຍ. ຕໍ່​ຈາກນັ້ນ, ດ້ວຍຄວາມປາດ​ຖະ​ໜາ​ຢາກ​ເຮັດໃຫ້ການ​ພົວ​ພັນ​ລະ​ຫວ່າງຫວຽດ​ນາມ - ລັດ​ເຊຍ ມີຄວາມ​ເລິກ​ເຊິ່ງແລະມີ​ປະ​ສິດ​ທິ​ຜົນຫຼາຍຂຶ້ນ, ທັງສອງປະ​ເທດຈຶງ​ຕັດ​ສິນ​ໃຈ​ຍົກ​ລະ​ດັບ​ການ​ພົວ​ພັນໃຫ້ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ ເຊິ່ງເປັນຂອບ​ການ​ພົວ​ພັນທີ່ສູງທີ່ສຸດຂອງຫວຽດ​ນາມ​ໃນ​ປີ 2012, ​ເປັນ​ຂີດ​ໝາຍ​ການ​ພັດທະນາ​ໃໝ່​ ໃນ​ການ​ພົວພັນ​ລະຫວ່າງ​ສອງ​ປະ​ເທດ. ເດືອນກັນຍາ 2023, ໃນໂອກາດການຢ້ຽມຢາມຫວຽດນາມຢ່າງເປັນທາງການຂອງທ່ານປະທານາທິບໍດີ ສະຫະລັດອາ​ເມ​ລິ​ກາ ໂຈ ໄບເດນ, ຜູ້​ນຳຂອງສອງປະ​ເທດ​ໄດ້​ອອກ​ຖະ​ແຫຼ​ງການ​ຮ່ວມ ວ່າດ້ວຍການ​ຍົກ​ລະດັບ​ການ​ພົວພັນຫວຽດນາມ - ສະຫະລັດອາ​ເມ​ລິ​ກາ ຂຶ້ນ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ເພື່ອ​ສັນຕິພາບ ການ​ຮ່ວມ​ມື ແລະ ການ​ພັດທະນາ​ແບບ​ຍືນ​ຍົງ. ເດືອນພະຈິກ2023, ການ​ນຳ​ຫວຽດນາມ ​ແລະ ຍີ່ປຸ່ນ ​ໄດ້​ອອກ​ຖະ​ແຫຼ​ງການ​ຮ່ວມ ວ່າດ້ວຍ​ການ​ຍົກ​ລະດັບ​ການ​ພົວພັນ​ຫວຽດນາມ - ຍີ່​ປຸ່ນ ຂຶ້ນ​ສູ່​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ເພື່ອ​ສັນຕິພາບ ​ແລະ ຄວາມຈະເລີນຮຸ່ງເຮືອງໃນອາຊີ ​ແລະທົ່ວ​ໂລກ...

ທີສາມ, ​ເນື້ອ​ໃນ​ຂອງ​ຖະ​ແຫຼ​ງການ​ສ້າງ​ຂອບ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຂອງ​ຫວຽດນາມ ລ້ວນ​ແຕ່​ມຸ່ງເປົ້າໄປທີ່ເປົ້າໝາຍທີ່​ສຳຄັນ, ໄລຍະຍາວ​ນານ, ຍຸດ​ທະ​ສາດ ​ແລະ ມີ​ຄວາມ​ໝາຍ​ສຳລັບແຕ່ລະ​ຝ່າຍ. ຕົວຢ່າງເຊັ່ນ ຖະແຫຼງການຮ່ວມວ່າດ້ວຍການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສ.ເກົາຫຼີ (ເດືອນທັນວາ 2022) ເນັ້ນໜັກວ່າ ສອງຝ່າຍ​ໄດ້​ເຫັນ​ດີ​ເປັນ​ເອກະສັນ​ເພີ່ມ​ທະວີ​ການ​ຢ້ຽມຢາມ ​ແລະ ​ການແລກປ່ຽນ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ ​ຜ່ານ​ບັນດາ​ຮູບ​ແບບທີ່ຍືດຫຍຸ່ນແລະຫຼາກຫຼາຍ ເຊັ່ນ ການ​ຢ້ຽມຢາມ​ສອງ​ປະ​ເທດ, ການ​ພົບ​ປະ​ຢູ່​ບັນດາ​ກອງ​ປະຊຸມ​ຫຼາຍ​ຝ່າຍ, ການ​ໂອ້​ລົມ​​ອອນໄ​ລນ໌, ​ການແລກປ່ຽນຈົດໝາຍແລະໂທລະເລກ; ຢືນຢັນການເພີ່ມທະວີຄວາມເຂັ້ມແຂງແລະເລິກເຊິ່ງ ຂອງບັນດາກົນໄກການພົບປະ ການແລກປ່ຽນ ແລະ ການໂອ້ລົມສົນທະນາ ລະຫວ່າງບັນດາອົງການລັດຖະບານ ແລະອຳນາດການປົກຄອງທ້ອງຖິ່ນ, ລະຫວ່າງບັນດາລັດຖະສະພາ, ບັນດາພັກການເມືອງ, ອົງການຈັດຕັ້ງ ແລະ ຊົນຊັ້ນທາງສັງຄົມ ຂອງສອງປະເທດ ມີຄວາມໝາຍສຳຄັນໃນການຊຸກຍູ້ການພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ - ສ.ເກົາຫຼີ; ຕັດສິນໃຈຂະຫຍາຍແລະພັດທະນາກົນໄກການເຈລະຈາ ແລະການຮ່ວມມືລະຫວ່າງສອງຝ່າຍ⁽¹⁰⁾. ຖະແຫຼງການຮ່ວມກ່ຽວກັບຄູ່ຮ່ວມມືຍຸດທະສາດລະຫວ່າງຫວຽດນາມແລະສິງກະໂປ (ເດືອນເມສາ 2018) ຢືນຢັນຄວາມມຸ່ງໝັ້ນໃນການ​ຮັກສາ​ການ​ພົບ​ປະ​ແລກປ່ຽນ​ຄະນະ​ຜູ້​ແທນ​ທຸກ​ຂັ້ນ​ ໃນ​ທຸກ​ຊ່ອງ​ທາງ​ຂອງ​ພັກ, ລັດ, ລັດຖະບານ, ລັດຖະສະພາ ​ແລະການ​ພົບ​ປະ​ແລກປ່ຽນລະຫວ່າງ​ປະຊາຊົນ; ຕົກລົງ​ເພີ່ມ​ທະວີ​ການ​ປຶກສາ​ຫາລື ​ແລະການເຈລະຈາ ​ເພື່ອ​ແລກປ່ຽນ​ທັດສະນະ, ຫຼັກໝັ້ນ ​ແລະ ຄວາມລິ​ເລີ່​ມກ່ຽວ​ກັບ​ບັນຫາ​ຍຸດ​ທະ​ສາດ⁽¹¹⁾.

ທີສີ່, ວິທີທີ່ຫວຽດນາມຊຸກຍຸ້ການພົວພັນກັບ​ບັນດາ​ຄູ່​ຮ່ວມ​ມື, ພາຍ​ໃນ​ແຕ່ລະ​ຄູ່​ຮ່ວມ​ມື​ມີບັນຫາທີ່ແຕກຕ່າງກັນຫຼາຍ ຂຶ້ນຢູ່ກັບ​ຈຸດ​ແຂງ​ແລະລຳດັບຄວາມສຳຄັນສະເພາະ ​ຂອງ​ແຕ່ລະຄູ່ຮ່ວມມື. ໝາກຜົນ​ແຫ່ງ​ການ​ຊຸກຍູ້​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ກໍ່​ມີ​ຄວາມ​ແຕກ​ຕ່າງ​ກັນ​ຫຼາຍ​ຢ່າງ.

ສໍາລັບປະເທດຈີນ, ຫວຽດ​ນາມຊຸກ​ຍູ້​ການ​ພົວ​ພັນ​ມິດ​ຕະ​ພາບ​ທີ່​ເປັນ​ເພື່ອນ​ບ້ານ​ໃກ້​ຄຽງ ແລະ ການ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ. ​ເຖິງ​ວ່າ​ການ​ພົວພັນ ຫວຽດນາມ - ຈີນ ຈະມີ​ການຂຶ້ນໆລົງໆ, ​ແຕ່​ການ​ພົວພັນ​ມິດຕະພາບ ​ແລະ ການ​ຮ່ວມ​ມື​ຍັງ​ຄົງ​ແມ່ນ​ກະແສຫຼັກ ​ເຊິ່ງນຳຜົນປະ​ໂຫຍ​ດຕົວຈິງມາໃຫ້ປະຊາຊົນ​ສອງ​ປະ​ເທດ ໂດຍມີການພັດທະນາ​ຢ່າງ​ເລິກ​ເຊິ່ງ ​ແລະ ກ້ວາງ​ຂວາງ​ໃນ​ທຸກ​ຂົງ​ເຂດ, ຕັ້ງແຕ່​​ການ​ເມືອງ ​ເສດຖະກິດ ຈົນເຖິງວັດທະນະທຳ ແລະ ການປ້ອງ​ກັນຊາ​ດ ການຮັກສາຄວາມໝັ້ນຄົງ. ຫວຽດນາມ​ແມ່ນ​ຄູ່​ຮ່ວມ​ມື​ການ​ຄ້າ​ໃຫຍ່​ທີ່​ສຸດ​ໃນ​ອາ​ຊຽນມາຢ່າງຕໍ່ເນື່ອງ (ນັບ​ແຕ່​ປີ 2016) ​ແລະ ​ເປັນ​ຄູ່​ຮ່ວມ​ມື​ການ​ຄ້າ​ໃຫຍ່​ອັນ​ດັບ 6 ໃນ​ໂລກ (ນັບ​ແຕ່​ປີ 2020) ຂອງ​ຈີນ. ໃນດ້ານ​ການ​ລົງທຶນ, ນັບ​ມາ​ຮອດ​ວັນ​ທີ 20 ສິງຫາ 2022, ຈີນຢູ່ໃນອັນ​ດັບ​ທີ 6 ​ໃນ​ຈຳນວນ 139 ປະ​ເທດ​ແລະດິນແດນທີ່​ລົງທຶນໂດຍກົງໃນຫວຽດນາມ ດ້ວຍ​ຍອດ​ຈຳນວນ​ທຶນ​ຈົດ​ທະບຽນ 22,42 ຕື້ໂດລາສະຫະລັດ⁽¹²⁾.

ໃນການພົວພັນກັບລັດເຊຍ ເຊິ່ງເປັນຄູ່ຮ່ວມມືຍຸດທະສາດທຳອິດ ແລະຍັງເປັນຄູ່ຮ່ວມມືທີ່ມີການພົວພັນທາງການເມືອງ ແລະເສດຖະກິດແບບດັ້ງເດີມກັບຫວຽດນາມ, ຫວຽດນາມ ​ເອົາ​ໃຈ​ໃສ່​ເຖິງ​ການ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ລັດ​ເຊຍມີ​ກຳລັງ​ແຮງ​ຄື: ການປ້ອງ​ກັນ​ປະ​ເທດ - ຄວາມ​ໝັ້ນຄົງ ​ແລະ ພະລັງງານ. ພາຍຫຼັງ​ສັນຍາ​ການ​ຄ້າ​ເສລີລະຫວ່າງ ຫວຽດນາມ ​ແລະ ສະຫະພັນ​ເສດຖະກິດ​ເອີ​ຣົບ ມີ​ຜົນ​ສັກສິດ​ໃນ​ປີ 2016, ຫວຽດນາມຊຸກຍູ້​ການ​ເຂົ້າ​ເຖິງ​ຕະຫຼາດ​ລັດ​ເຊຍ​ຢ່າງ​ຮອບດ້ານ ​ໂດຍ​ຜ່ານ​ສັນຍາ​ການ​ຄ້າ​ເສລີ EAEU, ສ້າງ​ເງື່ອນ​ໄຂສຳລັບການ​ພັດທະນາ​ການ​ຄ້າ​ສອງ​ສົ້ນ ​ລະຫວ່າງ​ຫວຽດນາມແລະລັດ​ເຊຍ ໃຫ້ເພີ່ມ​ຂຶ້ນ​ຢ່າງ​ແຂງ​ແຮງ​ກ່ວາ​ເກົ່າ ໂດຍເພີ່ມຂຶ້ນເປັນ​ສອງ​ເທົ່າ​ໃນ​ໄລຍະປີ 2016-2021, ສອດຄ່ອງກັບອັດຕາການເຕີບໂຕຕໍ່ປີປະມານ 15% ແລະມີມູນຄ່າຫຼາຍກວ່າ 5,5 ຕື້ໂດລາສະຫະລັດໃນປີ 2021. ປີ 2022, ຍ້ອນ​ໄດ້​ຮັບ​ຜົນ​ກະທົບ​ຈາກ​ຫຼາຍ​ປັດ​ໄຈ, ມູນ​ຄ່າ​ການ​ນຳ​ເຂົ້າ ​ແລະ ສົ່ງ​ອອກ​ຂອງ​ສອງ​ຝ່າຍ​ຈະ​ໄດ້​ຮັບ​ຜົນ​ກະທົບ​ຢ່າງ​ຫຼວງ​ຫຼາຍ. ຕາມ​ຕົວ​ເລກ​ສະຖິຕິ​ຂອງ​ກົມສຸນລະກາກອນຫວຽດນາມ, ວົງ​ເງິນ​ການ​ຄ້າ​ສອງ​ສົ້ນ​ລະຫວ່າງ​ຫວຽດນາມ​ແລະລັດ​ເຊຍ ​ໃນ​ປີ 2022 ​ບັນລຸ 3,55 ຕື້ໂດລາສະຫະລັດ, ຫຼຸດ​ລົງ 35,4% ​ເມື່ອ​ທຽບ​ກັບ​ປີ 2021. ໂດຍສະເພາະ ມູນຄ່າການ​ສົ່ງ​ອອກ​ຂອງ​ຫວຽດນາມ​ໄປ​ຍັງ​ລັດ​ເຊຍ​ບັນລຸ 1,55 ຕື້ໂດລາສະຫະລັດ, ຫຼຸດ​ລົງ 51,4%; ການນຳເຂົ້າມີມູນຄ່າ 1,99 ຕື້ໂດລາສະຫະລັດ, ຫຼຸດ​ລົງ 13,2%. ໃນດ້ານການລົງທຶນ, ເຖິງເດືອນມີນາ 2023, ລັດເຊຍມີໂຄງການລົງທຶນທີ່ຖືກຕ້ອງ 171 ໂຄງການ ດ້ວຍທຶນຈົດທະບຽນລວມກວ່າ 970 ລ້ານໂດລາສະຫະລັດ, ຢູ່ໃນອັນດັບທີ່ 28/143 ປະເທດແລະດິນແດນທີ່ລົງທຶນໃນຫວຽດນາມ. ໃນທາງກົງກັນຂ້າມ, ຫວຽດນາມມີໂຄງການລົງທຶນທີ່ຖືກຕ້ອງໃນລັດເຊຍ 17 ໂຄງການ ດ້ວຍທຶນຈົດທະບຽນລວມ 1,63 ຕື້ໂດລາສະຫະລັດ. ລັດ​ເຊຍຢູ່ໃນ​ອັນ​ດັບ​ທີ 4 ກ່ຽວ​ກັບ​ແຫຼ່ງ​ທຶນ​ໃນ​ຈຳ​ນວນ 78 ປະ​ເທດແລະດິນແດນ​ທີ່​ຫວຽດ​ນາມໄປ​ລົງ​ທຶນໃນ​ຕ່າງ​ປະ​ເທດ, ກວມເອົາ 7% ຂອງເງິນ​ລົງ​ທຶນທັງໝົດ​ຂອງ​ຫວຽດ​ນາມໃນ​ຕ່າງ​ປະ​ເທດ⁽¹³⁾.

ສໍາລັບປະເທດອິນເດຍ, ການ​ພົວພັນ​​ສອງຝ່າຍລະຫວ່າງ​ພັກ, ລັດ, ສະພາ​ແຫ່ງ​ຊາດ ​ແລະການແລກປ່ຽນລະຫວ່າງ​ປະຊາຊົນ​ ລະຫວ່າງຫວຽດນາມ​ແລະອິນ​ເດຍ ນັບ​ມື້​ນັບ​​ຂະຫຍາຍຕົວ. ການ​ພົວພັນ​ລະຫວ່າງ​ສອງ​ປະ​ເທດ​ໄດ້ຂະຫຍາຍອອກໄປໃນ​ຫຼາຍ​ຂົງ​ເຂດ​ທີ່​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ, ການ​ແລກປ່ຽນ​ດ້ານ​ການ​ຄ້າ​ນັບ​ມື້​ນັບ​ເພີ່ມ​ຂຶ້ນ; ບັນດາ​ຂົງ​ເຂດການ​ຮ່ວມ​ມື​ຄື: ການປ້ອງ​ກັນ​ປະ​ເທດ - ປ້ອງ​ກັນ​ຄວາມໝັ້ນຄົງ, ວິທະຍາສາດ - ​ເຕັກ​ໂນ​ໂລ​ຢີ ​ແລະ ການ​ສຶກສາ-ການຝຶກອົບຮົມ ​ນັບ​ມື້​ນັບ​ໄດ້​ຮັບ​ການ​ຊຸກຍູ້ ​ແລະພັດທະນາ​ຢ່າງ​ແຮງ ເຊິ່ງນຳ​ຜົນ​ປະ​ໂຫຍ​ດຕົວ​ຈິງ​ມາໃຫ້​ທັງ​ສອງ​ຝ່າຍ.

ສໍາລັບປະເທດ ສ.ເກົາຫຼີ, ພາຍຫຼັງກວ່າ 30 ປີນັບຕັ້ງແຕ່ສະຖາປະນາການພົວພັນທາງການທູດ (1992-2022) ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະ ສ.ເກົາຫຼີ ໄດ້ຮັບການຊຸກຍູ້ທັງໃນດ້ານປະລິມານແລະຄຸນນະພາບ ໃນສະພາບການຂອງໂລກມີການປ່ຽນແປງທີ່ຄາດເດົາບໍ່ໄດ້ຫຼາຍຢ່າງ. ການຮ່ວມມືທາງເສດຖະກິດເປັນຈຸດສະຫວ່າງ ແລະເປັນເສົາຫຼັກທີ່ສຳຄັນ ໃນການພົວພັນຮ່ວມມືລະຫວ່າງສອງປະເທດມາໂດຍຕະຫຼອດຈົນເຖິງປະຈຸບັນ. ສອງຝ່າຍໄດ້ຈັດຕັ້ງແລະມີສ່ວນຮ່ວມໃນບັນດາກົນໄກການຮ່ວມມືສອງຝ່າຍແລະຫຼາຍຝ່າຍ. ບໍລິສັດ ສ.ເກົາຫຼີ ຂະໜາດໃຫຍ່ຫຼາຍແຫ່ງເຊັ່ນ Samsung, LG,... ໄດ້ເລືອກຫວຽດນາມເປັນສະຖານທີ່ຍຸດທະສາດໃນການຜະລິດຜະລິດຕະພັນເອເລັກໂຕຣນິກຈຳນວນຫຼາຍໃນລະດັບໂລກ. ການຮ່ວມມືດ້ານການທ່ອງທ່ຽວແລະການແລກປ່ຽນລະຫວ່າງປະຊາຊົນ ກໍ່ໄດ້ຮັບການຜັນຂະຫຍາຍຢ່າງຟົດຟື້ນໂດຍທັງສອງປະເທດ ເຊິ່ງປະກອບສ່ວນເພີ່ມທະວີຄວາມ​ເຂົ້າ​ໃຈ​ເຊິ່ງກັນ​ແລະ​ກັນ, ສ້າງ​ພື້ນຖານ​ອັນ​ໜັກ​ແໜ້ນ​ເພື່ອ​ຊຸກຍູ້​ການ​ຮ່ວມ​ມື​ລະຫວ່າງ​ສອງ​ປະ​ເທດ​ໃຫ້​ເລິກ​ເຊິ່ງກ່ວາ​ອີກ.

ໃນການພົວພັນກັບປະເທດຍີ່ປຸ່ນ, ສອງ​ປະ​ເທດ​ໃຫ້​ບຸລິມະສິດ​ການ​ຮ່ວມ​ມື​ໃນ​ຂົງ​ເຂດ​ພັດທະນາ​ເສດຖະກິດ, ການ​ລົງທຶນ, ການ​ຄ້າ, ການ​ຊ່ວຍ​ເຫຼືອ​ດ້ານ​ການ​ພັດທະນາ, ​ແຮງ​ງານ, ການທ່ອງທ່ຽວ, ການຝຶກອົບຮົມຊັບພະຍາກອນ​ມະນຸດ​ຄຸນ​ນະພາ​ບສູງ, ການຖ່າຍທອດ​ວິທະຍາສາດແລະ​ເຕັກ​ໂນ​ໂລ​ຢີທີ່​ກ້າວໜ້າ​ຈາກ​ຍີ່ປຸ່ນ,... ເພື່ອຮັບໃຊ້ພາລະກິດການພັດທະນາປະເທດ. ການພົວພັນຮ່ວມມືຕົວຈິງລະຫວ່າງສອງປະເທດມີຄວາມກ້າວໜ້າຫຼາຍຢ່າງ, ການແລກປ່ຽນລະຫວ່າງປະຊາຊົນ ແລະ ການຮ່ວມມືລະຫວ່າງທ້ອງຖິ່ນຂອງສອງປະເທດ ມີຄວາມໃກ້ຊິດສະໜິດສະໜົມ. ຫວຽດນາມເປັນປະເທດທຳອິດໃນໂລກທີ່ໄດ້ນຳພາສາຍີ່ປຸ່ນເຂົ້າສູ່ການສອນໃນລະດັບມັດຖະຍົມສຶກສາຕອນຕົ້ນຢ່າງເປັນທາງການ ຕັ້ງແຕ່ປີ 2003 ແລະໃນລະດັບປະຖົມສຶກສາຕັ້ງແຕ່ປີ 2019. ມາ​ຮອດ​ປະ​ຈຸ​ບັນ, ຈຳ​ນວນ​ນັກ​ຮຽນຊາວ​ຫວຽດ​ນາມຢູ່ຍີ່​ປຸ່ນມີຈຳນວນຫຼາຍກວ່າ 51.000 ​ຄົນ⁽¹⁴⁾.

ໃນຂະນະດຽວກັນ, ສຳລັບໂອສະຕຣາລີ ເຊິ່ງເປັນປະເທດຕາເວັນຕົກທຳອິດທີ່ສະຖາປະນາການພົວພັນທາງການທູດກັບ ປະເທດສາທາລະນະລັດ ປະຊາທິປະໄຕ ຫວຽດນາມ (ປະຈຸບັນແມ່ນ ປະເທດສາທາລະນະລັດ ສັງຄົມນິຍົມຫວຽດນາມ)  ພາຍຫຼັງການລົງນາມສັນຍາປາຣີກ່ຽວກັບຫວຽດນາມໃນປີ 1973, ຜົນສຳເລັດທີ່ໂດດເດັ່ນທີ່ສຸດແມ່ນ ການພັດທະນາແບບກ້າວກະໂດດໃນຫຼາຍຂົງເຂດ ຂອງການພົວພັນລະຫວ່າງສອງປະເທດ. ການຮ່ວມມືທາງດ້ານເສດຖະກິດຫວຽດນາມ-ໂອສະຕຣາລີ ມີຄວາມກ້າວໜ້າຢ່າງແຂງແຮງໃນໄລຍະທີ່ຜ່ານມາ. ມູນຄ່າການຄ້າສອງສົ້ນມີການເຕີບໂຕໄດ້ດີ: ປີ 2022 ບັນລຸ 15,7 ຕື້ໂດລາສະຫະລັດ (ເພີ່ມຂຶ້ນ 26,7% ເມື່ອທຽບກັບປີ 2021), ໃນນັ້ນມູນຄ່າການສົ່ງອອກ ບັນລຸ 5,6 ຕື້ໂດລາສະຫະລັດ (ເພີ່ມຂຶ້ນ 26,2% ເມື່ອທຽບກັບປີ 2021) ແລະມູນຄ່າການນຳເຂົ້າ ບັນລຸ 10,1 ຕື້ໂດລາສະຫະລັດ (ເພີ່ມຂຶ້ນ 27,3% ເມື່ອທຽບກັບປີ 2021). ການຂາດດຸນການຄ້າຂອງຫວຽດນາມຈາກໂອສະຕຣາລີ ແມ່ນ 4,6 ຕື້ໂດລາສະຫະລັດ (ເພີ່ມຂຶ້ນ 28,7% ເມື່ອທຽບກັບປີ 2021). ສອງປະເທດກໍ່ໄດ້ຊຸກຍູ້ການຮ່ວມມືໃນດ້ານການກະເສດ ເຊັ່ນ ການປຸງແຕ່ງນົມ ແລະການລ້ຽງສັດຂະໜາດໃຫຍ່ ເຊິ່ງເປັນຂົງເຂດທີ່ໂອສະຕຣາລີມີທ່າແຮງ. ນີ້ກໍ່ແມ່ນລັກສະນະເດັ່ນໃນການພົວພັນຫວຽດນາມ-ໂອສະຕຣາລີ ນັບແຕ່ເມື່ອສອງຝ່າຍຍົກລະດັບການພົວພັນເປັນຄູ່ຮ່ວມມືຍຸດທະສາດ.

ສໍາລັບບັນດາປະເທດໃນພາກພື້ນ, ຫວຽດນາມໄດ້ສ້າງການພົວພັນຄູ່ຮ່ວມມືຍຸດທະສາດກັບຫ້າທະເທດຕົ້ນຕໍໃນອາຊຽນ ລວມມີ ອິນໂດເນເຊຍ, ສິງກະໂປ, ໄທ, ຟີລິບປິນ ແລະ ມາເລເຊຍ ເພື່ອສ້າງຂອບການຮ່ວມມື ແລະກົນໄກການຮ່ວມມືໃໝ່ ທີ່ມີລັກສະນະຍຸດທະສາດ ເພື່ອອາຊຽນທີ່ໝັ້ນຄົງ ໃນໄລຍະຍາວ ໃນອະນາຄົດ. ນັບຕັ້ງແຕ່ການຍົກລະດັບການພົວພັນເປັນຄູ່ຮ່ວມມືຍຸດທະສາດ, ການພົວພັນຂອງຫວຽດນາມກັບຄູ່ຮ່ວມມືທັງຫ້ານັ້ນ ມີການປ່ຽນແປງທາງບວກຫຼາຍຢ່າງໃນການຮ່ວມມືຫຼາຍດ້ານ. ຜົນຂອງການຮ່ວມມືຄ່ອຍໆເຂົ້າສູ່ລວງເລິກ ແລະ ມີຜົນປະໂຫຍດຕົວຈິງຫຼວງຫຼາຍ ແລະຮັບໃຊ້ຢ່າງໄດ້ການໄດ້ງານໃຫ້ແກ່ການສ້າງສາແລະພັດທະນາປະເທດ.

ທີຫ້າ, ການພົວພັນຄູ່ຮ່ວມມືຍຸດທະສາດ ແລະ ຄູ່ຮ່ວມມືຍຸດທະສາດຮອບດ້ານຂອງຫວຽດນາມລວມມີການຮ່ວມມືສອງຝ່າຍ ແລະ ການຮ່ວມມືຫຼາຍຝ່າຍ. ຫວຽດນາມ ແລະ ຍີ່ປຸ່ນປະສານງານແລະສະໜັບສະໜູນເຊິ່ງກັນແລະກັນຢ່າງໃກ້ຊິດ ໃນບັນດາອົງການ ແລະ ເວທີປາໄສພະຫຸພາຄີໃນພາກພື້ນ ແລະສາກົນ ເຊັ່ນ ເວທີປາໄສການຮ່ວມມືອາຊີ-ເອີຣົບ (ASEM), ເວທີປາໄສການຮ່ວມມືທາງເສດຖະກິດອາຊີ-ປາຊີຟິກ (APEC), ເວທີປາໄສຄວາມໝັ້ນຄົງລະດັບພາກພື້ນອາຊຽນ (ARF), ສະຫະພາບລັດຖະສະພາບັນດາປະເທດໃນໂລກ (IPU), ເວທີປາໄສລັດຖະສະພາອາຊີ-ປາຊີຟິກ (APPF), ສະພາລະຫວ່າງລັດຖະສະພາອາຊຽນ (AIPA), ອົງການການຄ້າໂລກ (WTO), ສະຫະປະຊາຊາດ... ຫວຽດນາສະໜັບສະໜູນການລົງສະໝັກຮັບເລືອກຕັ້ງຂອງຍີ່ປຸ່ນ ສຳລັບຕຳແໜ່ງສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ວາລະປີ 2016-2017 ແລະ ຍີ່ປຸ່ນ ກໍ່ສະໜັບສະໜູນ​ຫວຽດ​ນາມ ໃນການສະໝັກ​ຮັບ​ເລືອກ​ຕັ້ງ​ເປັນ​ສະ​ມາ​ຊິກ​ບໍ່​ຖາວອນຂອງ​ສະ​ພາ​ຄວາມ​ໝັ້ນ​ຄົງແຫ່ງ​ສະ​ຫະ​ປະ​ຊາ​ຊາດ ວາລະປີ 2020-2021. ສະພາແຫ່ງຊາດຫວຽດນາມ ແລະລັດຖະສະພາຍີ່ປຸ່ນ ມີຄວາມເຫັນຄ້າຍກັນໃນການສ້າງແລະຮັກສາສະພາບແວດລ້ອມທີ່ສັນຕິພາບແລະໝັ້ນຄົງ ເພື່ອການພັດທະນາ; ໃຫ້ການສະໜັບສະໜູນ​ເຊິ່ງກັນ​ແລະກັນ​ເປັນ​ປະຈຳ​ ໃນ​ທັດສະນະ​​ກ່ຽວ​ກັບ​ການຈັດການ​ແກ້​ໄຂ​ບັນຫາ​ຄວາມ​ໝັ້ນຄົງ​ທາງ​ທະ​ເລ ​ແລະ ການບິນ​ຢູ່​ພາກ​ພື້ນ, ກໍ່​ຄື​ບັນຫາ​ທະ​ເລ​ຕາ​ເວັນ​ອອກ. ຫວຽດນາມ​ແລະຍີ່ປຸ່ນ ​ໄດ້ປະສານງານ ​ຊຸກຍູ້​ການ​ລົງ​ນາມ ​ໃຫ້​ສັດຕະຍາບັນ ​ແລະ ກຳລັງຮ່ວມມືກັນ​ເພື່ອ​ປະຕິບັດ​ສັນຍາ​ຄູ່​ຮ່ວມ​ມືຮອບດ້ານແລະກ້າວໜ້າ​ຂ້າມ​ປາຊີ​ຟິກ (CPTPP) ຢ່າງ​ມີ​ປະສິດທິ​ຜົນ.

ຫວຽດນາມສະໜັບສະໜູນອິນເດຍໃຫ້ມີບົດບາດຫຼາຍຂຶ້ນໃນສະຖາບັນພະຫຸພາຄີລະດັບພາກພື້ນແລະສາກົນ, ຮັກສາແລະຮັບປະກັນລະບຽບໂລກທີ່ມີຫຼາຍຂົ້ວ ຕາມກົດໝາຍສາກົນ ແລະ ສະໜັບສະໜູນອິນເດຍໃຫ້ເປັນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດເມື່ອມີການຂະຫຍາຍກົນໄກນີ້ ແລະ ເຂົ້າຮ່ວມເອເປກ. ອີນເດຍສະໜັບສະໜູນ​ຂໍ້​ສະ​ເໜີ​ຂອງ​ຫວຽດນາມ ໃນການ​ຜັນ​ຂະຫຍາຍ​ບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່​ແລ້ວ ລະຫວ່າງ ອິນ​ເດຍແລະອາ​ຊຽນ ໂດຍນຳ​ບັນດາ​ໂຄງການ​ເຊື່ອມ​ຕໍ່​ການ​ຮ່ວມ​ມື​ ອິນ​ເດຍ-ອາ​ຊຽນ ​ແລະ ​ແມ່​ນ້ຳຂອງ-ແມ່ນ້ຳຄົງຄາ ​ໄປ​ສູ່ເນື້ອໃນແທ້ຈິງຫຼາຍຂຶ້ນ. ອິນ​ເດຍກໍ່​ສະໜັບສະໜູນ​ບົດບາດ​ໃຈກາງ​ຂອງ​ອາ​ຊຽນ ​ໃນ​ໂຄງ​ປະກອບ​ພາກ​ພື້ນ ໂດຍຖື​ອາ​ຊຽນເປັນ​ຈຸດ​ສຸມຂອງ​ນະ​ໂຍບາຍ “ປະຕິບັດການ​ຕາ​ເວັນ​ອອກ” ຂອງ​ອິນ​ເດຍ.

ໂດຍລວມແລ້ວ, ການພົວພັນຮ່ວມມືກັບບັນດາຄູ່ຮ່ວມມືຍຸດທະສາດຂອງຫວຽດນາມປະສົບຄວາມສຳເລັດຫຼວງຫຼາຍ ເຊິ່ງພິສູດປະສິດທິພາບຂອງຮູບແບບນີ້. ຢ່າງ​ໃດ​ກໍ່ຕາມ, ການ​ພົວພັນ​ດັ່ງກ່າວ​ຍັງ​ປະສົບ​ກັບ​ຄວາມ​ຫຍຸ້ງຍາກ ​ແລະ ຂໍ້​ຈຳກັດ​ຫຼາຍ​ຢ່າງ. ຄຽງຄູ່ກັບຄວາມຫຍຸ້ງຍາກທີ່ຕິດພັນກັບແຕ່ລະຄູ່ຮ່ວມມືສະເພາະ, ຂໍ້ຈຳກັດທົ່ວໄປແມ່ນໝາກຜົນຂອງການຮ່ວມມືບໍ່ແທດເໝາະກັບຄວາມສາມາດບົ່ມຊ້ອນຂອງສອງຝ່າຍ, ໃນຫຼາຍກໍລະນີ ພວກເຂົາບໍ່ໄດ້ສ້າງບາດກ້າວບຸກທະລຸໃນການພົວພັນສອງຝ່າຍ ຕາມທີ່ປະເມີນໂດຍເອກະສານຂອງກອງປະຊຸມໃຫຍ່ຄັ້ງທີ XIII ຂອງພັກ​ກອມ​ມູນິດ​ຫວຽດນາມ ທີ່ວ່າ: “ຜົນ​ປະ​ໂຫຍດ​ທີ່​ກ່ຽວໂຍງກັນຂອງການພົວກັບ​ຄູ່​ຮ່ວມ​ມື​ທີ່​ສໍາ​ຄັນ ບໍ່​ໄດ້​ຮັບ​ການໃຊ້ປະໂຫຍດຢ່າງດີ ​ແລະສົ່ງເສີມຢ່າງ​ມີ​ປະສິດທິ​ຜົນ”⁽¹⁵⁾. ດັ່ງນັ້ນ, ການຄົ້ນຄວ້າຢ່າງຮອບດ້ານ ຫຼາຍມິຕິ ເລິກເຊິ່ງ ແລະ ເປັນລະບົບ ກ່ຽວກັບການພົວພັນຂອງຫວຽດນາມກັບແຕ່ລະຄູ່ຮ່ວມມືຍຸດທະສາດ, ກໍ່ຄືການຄົ້ນຄວ້າແລະການປະເມີນໂດຍລວມ ກ່ຽວກັບການພົວພັນຄູ່ຮ່ວມມືຍຸດທະສາດຂອງຫວຽດນາມ ຈຶງມີຄວາມໝາຍສຳຄັນທັງທາງດ້ານທິດສະດີ ແລະ ພຶດຕິກຳຕົວຈິງ./.

-------------------------

(1) ເບິ່ງ: “ສືບຕໍ່ການປ່ຽນແປງໃໝ່, ກໍ່ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມທີ່ທັນສະໄໝ ເຂັ້ມແຂງຮອບດ້ານ ແລະ ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ””, ວາລະສານກອມມູນິດ, ສະບັບທີ 1.028 (ເດືອນທັນວາ2023), ໜ້າ 11

(2) ເບິ່ງ: “Lowy Institute Asia Power Index 2023”, https://power.lowyinstitute.org/

(3) ນັ້ນແມ່ນບັນດາ ຍຸດທະສາດ/ວິໄສທັດ/ຂໍ້ຄິດລິເລີ່ມ/ແຜນການ ອິນເດຍ-ປາຊີຟິກ... ຂອງ ຍີ່ປຸ່ນ, ໂອສະຕຣາລີ, ສະຫະລັດອາເມລິກາ, ໂຮນລັງ, ຝຣັ່ງ, ເຢຍລະມັນ, ແຊັກ, ສະຫະພາບເອີຣົບ (EU), ອີຕາລີ, ການາດາ, ອັງກິດ, ອິນເດຍ, ສ.ເກົາຫຼີ, ລິດວາ, ບັງກລາເທດ, ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ASEAN), ສະມາຄົມຂອບມະຫາສະໝຸດອິນເດຍ (IORA)

(4) ຫຶວຮຶງ: “ແງ່​ຫວັງ​ຈາກ​ສັນ​ຍາ​ການ​ຄ້າ​ເສ​ລີ​ອາ​ຊຽນ-ຈີນ​ສະ​ບັບ 3.0”, ໜັງສືພິມປະຊາຊົນເອເລັກໂຕຣນິກ, ອອກວັນທີ 16 ກຸມພາ 2023, https://nhandan.vn/trien-vong-tu-hiep-dinh-thuong-mai-tu-do-asean-trung-quoc-phien-ban-30-post739000.html

(5) ປີ 2019, ສະຫະລັດອາເມລິກາກາຍເປັນຄູ່ຮ່ວມມືທາງການຄ້າທີ່ໃຫຍ່ອັນດັບສອງຂອງອາຊຽນ ແລະ ຜູ້ລົງທຶນໂດຍກົງຈາກຕ່າງປະເທດທີ່ໃຫຍ່ທີ່ສຸດຂອງອາຊຽນ

(6) ເລ ງ້ອກ ທວີ່ ເຢືອງ: “ການພົວພັນອາຊຽນ - ຍີ່ປຸ່ນ: ໄລຍະທາງ 50 ປີແຫ່ງການຮ່ວມມື”, ວາລະສານເອເລໂຕຣນິກກອມມູນິດ, ອອກວັນທີ 15 ຕຸລາ 2023, https://www.tapchicongsan.org.vn/web/guest/the-gioi-van-de-su-kien/-/2018/828916/quan-he-asean---nhat-ban--chang-duong-50-nam-hop-tac.aspx

(7) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X, ສພຈ. ການເມືອງແຫ່ງຊາດ, ຮ່າໂນ້ຍ, 2006, ໜ້າ 112

(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 163

(9) ລວມມີຄູ່ຮ່ວມມືຍຸດທະສາດ 17 ປະເທດ: ລັດເຊຍ (ປີ 2001), ອິນເດຍ (ປີ 2007), ຈີນ (ປີ 2008), ຍີ່ປຸ່ນ, ສ.ເກົາຫຼີ ແລະ ແອັດສະປາຍ (ປີ 2009), ອັງກິດ (ປີ 2010), ເຢຍລະມັນ (ປີ 2011), ອີຕາລີ, ໄທ, ອິນໂດເນເຊຍ, ສິງກະໂປ ແລະ ຝຣັ່ງ (ປີ 2013), ມາເລເຊຍ ແລະ ຟີລິບປິນ (ປີ 2015), ໂອສະຕຣາລີ (ປີ 2018), ນູແວນເຊລັງ (ປີ 2020); ຄູ່ຮ່ວມມືຍຸດທະສາດຮອບດ້ານກັບ 6 ປະເທດ: ຈີນ (ປີ 2008), ລັດເຊຍ (ປີ 2012), ອິນເດຍ (ປີ 2016), ສ.ເກົາຫຼີ (ປີ 2022), ສະຫະລັດອາເມລິກາ (ປີ 2023), ຍີ້ປຸ່ນ (ປີ 2023)

(9) ເບິ່ງ: “ຖະແຫຼງການຫວຽດນາມ - ສ.ເກົາຫຼີ ວ່າດ້ວຍການພົວພັນຄູ່ຮ່ວມມືຍຸດທະສາດຮອບດ້ານ”, ໜັງສືພິມເອເລັກໂຕຣນິກຂອງພັກກອມມູນິດຫວຽດນາມ, ອອກວັນທີ 6 ທັນວາ 2022, https://dangcongsan.vn/thoi-su/tuyen-bo-chung-viet-nam-han-quoc-ve-quan-he-doi-tac-chien-luoc-toan-dien-626715.html

(10) ເບິ່ງ: “ຖະແຫຼງການຮ່ວມວ່າດ້ວຍການພົວພັນຄູ່ຮ່ວມມືຍຸດທະສາດຫວຽດນາມ - ສິງກະໂປ”, ໜັງສືພິມແຮງງານເອເລັກໂຕຣນິກ, ອອກວັນທີ 26 ເມສາ2018, https://laodong.vn/thoi-su/tuyen-bo-chung-ve-quan-he-doi-tac-chien-luoc-viet-nam-singapore-603560.ldo

(11) ເບິ່ງ: “ການຮ່ວມມືທາງເສດຖະກິດ, ການຄ້າລະຫວ່າງຫວຽດນາມແລະຈີນໃນລະດັບໃດ?”, ໜັງສືພິມເຍິນເຢິນເອເລັກໂຕຣນິກ, 2022, https://special.nhandan.vn/hoptackinhte_viettrung/index.html

(13) ເບິ່ງ: “ເວທີປາໄສວິສາຫະກິດ “ຫວຽດນາມ - ສະຫະພັນທະລັດລັດເຊຍ: ໂອກາດການຮ່ວມມືໃໝ່ ແລະ ບັນດາຂົງເຂດທີ່ມີຄວາມສາມາດບົ່ມຊ້ອນ”, ເວັບໄຊຂອງກະຊວງອຸດສາຫະກຳການຄ້າຫວຽດນາມ, ອອກວັນທີ 6 ເມສາ 203, https://moit.gov.vn/tin-tuc/hoat-dong/hoat-dong-cua-lanh-dao-bo/dien-dan-doanh-nghiep-viet-nam-lien-bang-nga-co-hoi-hop-tac-moi-va-cac-linh-vuc-tiem-nang.html

(14) ນິງເຊີນ - ຮຸ່ງຢຸຍ: “ຫວຽດນາມ - ຍີ່ປຸ່ນ: ເຄິ່ງ​ສັດ​ຕະ​ວັດ​ແຫ່ງ​ມິດ​ຕະ​ພາບ​ແລະ​ການ​ຮ່ວມ​ມື​ທີ່​ເຂັ້ມ​ແຂງ​”, ໜັງສືພິມເຍິນເຢິນເອເລັກໂຕຣນິກ, ອອກວັນທີ 26 ພະຈິກ2023, https://special.nhandan.vn/50-nam-viet-nam-nhat-ban/index.html

(15) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 88

• ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1031 (ເດືອນກຸທພາ 2024)