ປະຕິບັດພິໄນກຳຂອງທ່ານປະທານໂຮ່ຈີມິນ: 45 ປີເບິ່ງຄືນຫຼັງ ແລະຫັນສູ່ອະນາຄົດ*
1- ເປັນຜູ້ກໍ່ຕັ້ງພັກ ແລະເປັນຜູ້ນຳສູງສຸດຂອງພັກ, ກ່ອນເມື່ອກະກຽມໄປສູ່ແດນແຫ່ງນິລັນດອນ, ທ່ານປະທານໂຮ່ຈີມິນໄດ້ຂຽນພິໄນກຳ ເພື່ອກຳນົດໜ້າທີ່ຕ່າງໆແລະຜົນປະໂຫຍດຕ່າງໆ ທີ່ພັກເຮົາແລະຄົນຮຸ້ນຫຼັງຕ້ອງເຮັດ ແລະໄດ້ຊົມໃຊ້.
ໃນພິໄນກຳ, ທ່ານປະທານໂຮ່ຈີມິນຕັກເຕືອນຄືນໃໝ່ກ່ຽວກັບວຽກງານທີ່ຕ້ອງເຮັດໃຫ້ແກ່ພັກ: “ພັກຄວນມີແຜນການດີທີ່ສຸດເພື່ອພັດທະນາເສດຖະກິດ ແລະ ວັດທະນະທຳ, ແນໃສ່ຍົກສູງຊີວິດການເປັນຢູ່ຂອງປະຊາຊົນຢ່າງບໍ່ຢຸດຢັ້ງ”. ແຜນການດັ່ງກ່າວນີ້ຍັງຕ້ອງຫັນເປັນລະອຽດຕໍ່ແຕ່ລະເປົ້າໝາຍ, ຕໍ່ຜູ້ມີຄຸນງາມຄວາມດີແຕ່ລະຄົນ, ເຊັ່ນຕໍ່ຜູ້ທີ່ໄດ້ເສຍສະຫຼະຊີວິດເພື່ອຊາດ, ນັກຮົບຜູ້ເສຍອົງຄະ; ພໍ່ແມ່, ລູກເມຍຂອງນັກຮົບເສຍຊີວິດ, ຂອງນັກຮົບຜູ້ເສຍອົງຄະ; ຊາວໜຸ່ມໃນກຳລັງປະກອບອາວຸດ; ຊາວໜຸ່ມຕະລຸມບອນ; ແມ່ຍິງ ຈົນເຖິງຜູ້ຖືກເຄາະຮ້າຍຂອງລະບອບເກົ່າ...
ໃນພິໄນກຳ, ພາກທີ່ທ່ານປະທານໂຮ່ຈີມິນຕັກເຕືອນອົງການທີ່ເພິ່ນກໍ່ຕັ້ງແລະນຳພານັ້ນ ໄດ້ໃຊ້ຄຳກຳມະ “ຄວນ”; ຕໍ່ກັບປະຊາຊົນ, ເພິ່ນໃຊ້ຄຳສັບ “ຄວາມປາຖະໜາ”. ທ່ານປະທານໂຮ່ຈີມິນຂຽນ: “ຄວາມປາຖະໜາສຸດທ້າຍຂອງຂ້າພະເຈົ້າແມ່ນ: ທົ່ວພັກ, ທົ່ວປວງຊົນເຮົາ ສາມັກຄິສູ້ຊົນ, ກໍ່ສ້າງປະເທດຫວຽດນາມ ສັນຕິພາບ, ເອກະພາບ, ເອກະລາດ, ປະຊາທິປະໄຕ ແລະ ຮັ່ງມີເຂັ້ມແຂງ, ແລະປະກອບສ່ວນຢ່າງສົມກຽດ ເຂົ້າໃນພາລະກິດປະຕິວັດໂລກ”. ໃນພາກສຸດທ້າຍຂອງພິໄນກຳ, ເມື່ອ “ຈົ່ງຄວາມຮັກແພງອັນມະຫາສານໄວ້”, ທ່ານປະທານໂຮ່ຈີມິນຂຽນຕາມລະດັບດັ່ງນີ້: “ໃຫ້ທົ່ວປວງຊົນ, ທົ່ວພັກ, ທົ່ວກອງທັບ, ໃຫ້ພວກຫຼານຊາວໜຸ່ມ ແລະ ເຍົາວະຊົນໝົດທຸກຄົນ”. ເປັນອັນວ່າ, ກ່ອນອື່ນໝົດ, ທ່ານປະທານໂຮ່ຈີມິນຕັກເຕືອນພັກ, ແຕ່ເທິງສຸດ ແມ່ນເພື່ອຮັບໃຊ້ປະຊາຊົນ.
ເພື່ອປະຕິບັດຄຳຕັກເຕືອນນັ້ນໃຫ້ປະກົດເປັນຈິງໄດ້, ໃນພາກ ກ່ອນອື່ນເວົ້າກ່ຽວກັບພັກ, ທົ່ວພັກຕ້ອງປະຕິບັດບັນດາບັນຫາອັນພື້ນຖານລຸ່ມນີ້ໃຫ້ດີ:
ທີໜຶ່ງ, ພັກຕ້ອງສາມັກຄີ. ໃນພິໄນກຳ ທ່ານປະທານໂຮ່ຈີມິນໃຫ້ຄຳຕັກເຕືອນແກ່ພັກດັ່ງນີ້: “ບັນດາສະຫາຍແຕ່ສູນກາງຮອດບັນດາໜ່ວຍພັກ ຄວນປົກປັກຮັຄວາມສາມັກຄີເປັນເອກະພາບຂອງພັກຄືກັບປົກປັກຮັກສາແກ້ວຕາຂອງຕົນ”.
ຄວາມເອົາໃຈໃສ່ ກ່ອນອື່ນໝົດ ທີ່ສະແດງອອກຢູ່ໃນພິໄນກຳ ນັ້ນ ກໍ່ແມ່ນຄວາມເອົາໃຈໃສ່ທີ່ສຸດຂອງທ່ານປະທານໂຮ່ຈີມິນ ນັບແຕ່ມື້ສ້າງຕັ້ງພັກຈົນເຖິງເມື່ອສຳເລັດພິໄນກຳ. ຄວາມເອົາໃຈໃສ່ນັ້ນເລີ່ມຈາກຄວາມຮຽກຮ້ອງຕ້ອງການໃນໂຕພາວະວິໄສຂອງພັກ ແລະ ພຶດຕິກຳປະຕິວັດທີ່ເພິ່ນຂຽນຢູ່ໃນນິພົນຫຼາຍສະບັບ ໃນສະໄໝທີ່ຕ່າງກັນ ແລະສະຫລຸບໄວ້ໃນພິໄນກຳ. ຍ້ອນເພີ່ນຖືວ່າ: ສາມັກຄີແມ່ນກຳລັງແຮງທີ່ຊະນະເລີດຂອງພັກ ແລະ ສາມັກຄີຢູ່ໃນພັກແມ່ນແກ່ນສານຂອງຄວາມສາມັກຄີທັງຊາດ; ສາມັກຄີແມ່ນກຳລັງແຮງຂອງພັກບົນເສັ້ນທາງປົກປ່ອຍຊາດ ແລະ ກໍ່ສ້າງສັງຄົມໃໝ່.
ເອົາໃຈໃສ່ບັນຫາສາມັກຄີຂອງພັກ, ທ່ານປະທານໂຮ່ຈີມິນ ໄດ້ຊີ້ແຈງໃຫ້ພັກເຫັນວ່າ “ວິທີດີທີ່ສຸດເພື່ອປັບປຸງ ແລະເພີ່ມທະວີຄວາມສາມັກຄີ ແລະ ຄວາມເປັນເອກະພາບ” ແມ່ນຕ້ອງຍຶດໝັ້ນຫຼັກການຈັດຕັ້ງ ແລະດຳເນີນຊີວິດພັກ. ຢູ່ນີ້, ຄວນເອົາໃຈໃສ່ເຖິງການເນັ້ນໜັກຂອງທ່ານປະທານໂຮ່ຈີມິນ ກ່ຽວກັບເນື້ອໃນຂອງຫຼັກການຈັດຕັ້ງ ແລະດຳເນີນຊີວິດພັກ ຊຶ່ງເພິ່ນໄດ້ຂຽນຢູ່ໃນພິໄນກຳ. ເພິ່ນພຽງແຕ່ສຸມໃສ່ສາມເນື້ອໃນຕົ້ນຕໍຄື: “ໃນພັກຕ້ອງປະຕິບັດປະຊາທິປະໄຕຢ່າງກວ້າງຂວາງ, ປັນປະຈຳ”; “ຕິຊົມຕົນເອງ ແລະ ຕິຊົມຢ່າງເຂັ້ມງວດ”; “ຕ້ອງມີນ້ຳໃຈສະຫາຍ ຮັກແພງຊຶ່ງກັນແລະກັນ”.
ລວງເລິກຂອງແນວຄິດໂຮ່ຈີມິນສະແດງງອອກໃນພິໄນກຳ ແມ່ນຢູ່ທີ່: ເພິ່ນໄດ້ເລືອກເອົາບັນດາບັນຫາສຳຄັນຕົ້ນຕໍຢູ່ໃນບັນດາບັນຫາເປັນລວາດໆ ທີ່ຕ້ອງແກ້ໄຂ ແລະ ໄດ້ຊີ້ແຈ້ງວິທີແກ້ໄຂດີສຸດ ເພື່ອພາໄປເຖິງການຫັນປ່ຽນໃນພຶດຕິກຳປະຕິວັດ. ໃນລວງເລິກຂອງແນວຄິດນັ້ນ ມີທັດສະນະທີ່ພົ້ນເດັ່ນຂຶ້ນຄື: ມີແຕ່ປະຕິບັດປະຊາທິປະໄຕຢ່າງກວ້າງຂວາງ ເປັນປະຈຳເທົ່ານັ້ນ ຈຶ່ງໄປເຖິງຄວາມເປັນເອກະພາບທາງດ້ານແນວຄິດ, ແລະຄວາມເປັນເອກະພາບດ້ານແນວຄິດນັ້ນ ເປັນພື້ນຖານອັນໝັ້ນຄົງໃຫ້ແກ່ຄວາມເປັນເອກະພາບໃນການຈັດຕັ້ງ ແລະ ການກະທຳຂອງທົ່ວພັກ. ກໍບົນພື້ນຖານຄວາມເປັນເອກະພາບດ້ານແນວຄິດນັ້ນ ການຕິຊົມຕົນເອງແລະຕິຊົມຈຶ່ງມີຫຼັກຖານຈະແຈ້ງໃຫ້ແກ່ຄວາມເຂັ້ມງວດ. ພ້ອມກັນນັ້ນ, ນັ້ນກໍເປັນພື້ນຖານອັນຖືກຕ້ອງໃຫ້ແກ່ນ້ຳໃຈສະຫາຍຮັກແພງຊຶ່ງກັນແລະກັນ.
ທີສອງ, ສະມາຊິກພັກຕ້ອງບຳລຸງສ້າງຄຸນສົມບັດສິນທຳຢ່າງເປັນປະຈຳ. ເລີ່ມແຕ່ພາລະໜ້າທີ່ອັນສູງສົ່ງ “ພັກເຮົາແມ່ນພັກກຳອຳນາດ” ແລະ ພະນັກງານ ສະມາຊິກຂອງພັກແມ່ນຜູ້ກຳຕຳແໜ່ງ ກຳລັງອຳນາດທີ່ສຳຄັນຂອງລັດ ໂດຍປະຊາຊົນມອບໝາຍໃຫ້, ທ່ານປະທານໂຮ່ຈີມິນໄດ້ກຳນົດແຈ້ງໜ້າທີ່ຂອງ “ສະມາຊິກພັກ ແລະພະນັກງານແຕ່ລະຄົນ” ແມ່ນຕ້ອງ ປະຕິບັດບັນດາມາດຕະຖານຄຸນສົມບັດ ຕາມຄຳແທ້ຈິງ 4 ຄຳດັ່ງນີ້:
“ຊາບຊືມຄຸນສົມບັດປະຕິວັດຢ່າງແທ້ຈິງ,
ດຸໝັ່ນ ປະຢັດ ຊື່ສັດ ທ່ຽງທຳ, ເຫັນແກ່ສ່ວນລວມ ບໍ່ເຫັນແກ່ສ່ວນຕົວ.
ຕ້ອງຮັກສາໃຫ້ພັກເຮົາປອດໃສຂາວສະອາດ,
ຕ້ອງສົມກັບເປັນຜູ້ນຳພາ, ເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ”.
ບັນດາ “ມາດຕະຖານຄຸນສົມບັດ” ຂອງພະນັກງານ ສະມາຊິກພັກ ທີ່ທ່ານປະທານໂຮ່ຈີມິນ ຊີ້ອອກມານັ້ນກວມດ້ວຍ: 1- ມາດຕະຖານຄຸນສົມບັດ: “ຄຸນສົມບັດປະຕິວັດ”; 2- ມາດຕະຖານບຸກຄະລິກລັກສະນະ: “ດຸໝັ່ນ ປະຢັດ ຊື່ສັດ ທ່ຽງທຳ, ເຫັນແກ່ສ່ວນລວມ ບໍ່ເຫັນແກ່ສ່ວນຕົວ”; 3- ມາດຕະຖານຄວາມຮັບຜິດຊອບ: “ຮັກສາໃຫ້ພັກເຮົາປອດໃສຂາວສະອາດ”; 4- ມາດຕະຖານກຽດສັກສີ: “ຕ້ອງສົມກັບເປັນຜູ້ນຳພາ, ເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ”. ຕາມວິທີຕັ້ງບັນຫາຄືເທິງນີ້, ທ່ານປະທານໂຮ່ຈີມິນ ກຳນົດແຈ້ງຄຸນສົມບັດປະຕິວັດ ເປັນພຽງ “ມາດຕະຖານ” ໜຶ່ງໃນ 4 “ມາດຕະຖານ” ຄຸນສົມບັດຂອງພະນັກງານ ສະມາຊິກພັກ.
ຄວາມສຳນຶກ ຄຸນສົມບັດປະຕິວັດ ຖືກທ່ານປະທານໂຮ່ຈີມິນ ຊີ້ອອກມາໃນຫຼາຍບົດຂຽນ ບົດປາໄສຂອງເພິ່ນ. ແຕ່ຈະແຈ້ງຮັດກຸມທີ່ສຸດແມ່ນໃນບົດຄຸນສົມບັດປະຕິວັດ ທີ່ເພິ່ນຂຽນໃນປີ 1958 ຊຶ່ງມີເນື້ອໃນດັ່ງນີ້:
“ເວົ້າໂດຍຫຍໍ້, ຄຸນສົມບັດປະຕິວັດແມ່ນ:
ຕັດສິນໃຈຕໍ່ສູ້ຕະຫຼອດຊີວິດເພື່ອໃຫ້ພັກ, ໃຫ້ການປະຕິວັດ. ນັ້ນເປັນສິ່ງສຳຄັນຕົ້ນຕໍທີ່ສຸດ.
ອອກແຮງເຮັດວຽກໃຫ້ພັກ, ຮັກສາລະບຽບວິໄນຂອງພັກ, ປະຕິບັດແນວທາງ ນະໂຍບາຍຂອງພັກໃຫ້ໄດ້ເປັນຢ່າງດີ.
ຕັ້ງຜົນປະໂຫຍດຂອງພັກ ແລະຂອງປະຊາຊົນຂຶ້ນເທິງ, ຂຶ້ນກ່ອນຜົນປະໂຫຍດສະເພາະຂອງຕົນເອງ. ຮັບໃຊ້ປະຊາຊົນຢ່າງສຸດອົກສຸດໃຈ. ຕໍ່ສູ້ເພື່ອພັກ, ເພື່ອປະຊາຊົນໂດຍບໍ່ຢ້ານເສຍຊີວິດ, ເປັນແບບຢ່າງໃນທຸກວຽກງານ.
ອອກແຮງຮ່ຳຮຽນລັດທິມາກ - ເລນິນ, ຍາມໃດກໍ່ໃຊ້ການຕິຊົມຕົນເອງແລະຕິຊົມ ເພື່ອຍົກສູງແນວຄິດ ແລະ ປົວແປງວຽກງານຂອງຕົນໃຫ້ດີຂຶ້ນ ແລະ ພ້ອມກັນກັບສະຫາຍຂອງຕົນກ້າວໜ້າ”(1).
ພິຈາລະນາທາງດ້ານປະຫວັດສາດ, ອາດຈະເຫັນວ່າ ຄວາມສຳນຶກກ່ຽວກັບຖານະນາມຂອງນັກປະຕິວັດ ໃນປຶ້ມ ເສັ້ນທາງປະຕິບັດ (ຂຽນປີ 1927) ແລະຄຸນສົມບັດປະຕິວັດ (ຂຽນປີ 1958) ເຖິງຄຸນສົມບັດຂອງພະນັກງານ ສະມາຊິກພັກໃນພິໄນກຳ (ຖືກປະກາດເປັນທາງການປີ 1969) ແມ່ນເປັນເອກະພາບກັນດ້ານເນື້ອໃນ. ໃນນັ້ນ, ທ່ານປະທານໂຮ່ຈີມິນ ລ້ວມແຕ່ຊີ້ແຈ້ງບັນດາສາຍພົວພັນ: ກັບພັກ, ກັບວຽກງານ, ກັບທຸກຄົນ, ກັບຕົນເອງ. ຄວາມສຳນຶກຄຸນສົມບັດຂອງພະນັກງານ ສະມາຊິກພັກໃນພິໄນກຳ ຂອງທ່ານປະທານໂຮ່ຈີມິນ ແມ່ນຄວາມສຳນຶກທີ່ສົມບູນທີ່ສຸດ, ແມ່ນຄຳຊີ້ບອກສຸດທ້າຍ ແລະມໍ່ໃກ້ທີ່ສຸດຂອງເພິ່ນກ່ຽວກັບຄຸນສົມບັດຂອງພະນັກງານ ສະມາຊິກຂອງພັກ. ນີ້ແມ່ນຮາກຖານເພື່ອກໍ່ສ້າງມາດຕະຖານຄຸນສົມບັດໃຫ້ພະນັກງານ ສະມາຊິກພັກໃນປັດຈຸບັນ.
ທີສາມ, ບັນດາວິທີແກ້ເພື່ອກໍ່ສ້າງຄວາມສາມັກຄີໃນພັກ. ຕັ້ງບັນຫາເລີ່ມຈາກບັນດາຄວາມຮຽກຮ້ອງຕ້ອງການພາຍໃນຂອງພັກກຳອຳນາດ ແລະ ເລີ່ມຈາກ “ວຽກງານໜຶ່ງທີ່ໃຫຍ່ໂຕທີ່ສຸດ ສັບສົນທີ່ສຸດ ແລະຫຍຸ້ງຍາກທີ່ສຸດ” ຂອງ “ການຕໍ່ສູ້ຕ້ານກັບສິ່ງທີ່ໄດ້ເກົ່າແກ່ ເປເພແລ້ວ, ເພື່ອສ້າງອັນໃໝ່ ດີງາມສົດໃສຂຶ້ນມາ” ທີ່ພັກຕ້ອງປະຕິບັດ ແລະ ຮຽກຮ້ອງຕ້ອງການໃຫ້ “ພວກເຮົາຕ້ອງມີແຜນການທີ່ກຽມຄວາມພ້ອມ ຈະແຈ້ງ ແລະ ຮອບຄອບຖີ່ຖ້ວນ, ເພື່ອບໍ່ໃຫ້ຕົກໃສ່ທ່າຮັບ ຂາດຕົກບົກພ່ອງ ແລະ ຜິດພາບ”, ທ່ານປະທານໂຮ່ຈີມິນ ໄດ້ວາງວິທີແກ້ອອກມາ ນັ້ນຄື: “ວຽກທີ່ຕ້ອງເຮັດກ່ອນອື່ນໝົດ” ແມ່ນ “ປັບປຸງພັກຄືນໃໝ່”. ຕາມເພິ່ນ, ຈຸດປະສົງຂອງວຽກທີ່ຕ້ອງເຮັດກ່ອນອື່ນໝົດ ນີ້ຍັງແມ່ນແນໃສ່ “ເຮັດໃຫ້ສະມາຊິກພັກແຕ່ລະຄົນ, ສະມາຊິກຊາວໜຸ່ມແຕ່ລະຄົນ, ໜ່ວຍພັກແຕ່ລະໜ່ວຍ ລ້ວນແຕ່ອອກແຮງເຮັດຫຼ້ອນໜ້າທີ່ທີ່ພັກມອບໝາຍໃຫ້ຕົນ, ຮັບໃຊ້ປະຊາຊົນຢ່າງສຸດອົກສຸດໃຈ”.
ເປັນອັນວ່າ, ໃນພິໄນກຳ, ທ່ານປະທານໂຮ່ຈີມິນ ໄດ້ຕັກເຕືອນພັກກອມມູນິດຫວຽດນາມ: ປະການກ່ອນອື່ນໝົດ ແມ່ນບັນຫາກໍ່ສ້າງພັກ ກໍ່ສ້າງຖັນແຖວສະມາຊິກພັກ ແລະ ວຽກທີ່ຕ້ອງເຮັດ ກ່ອນອື່ນໜົດ ແມ່ນປັບປຸງພັກ ໃຫ້ພັກຍາມໃດກໍ່ສຳເລັດໜ້າທີ່ ຄວາມຮັບຜິດຊອບຂອງຕົນຕໍ່ກັບປະຊາຊົນ. ສາມໜ້າທີ່ນີ້ມີຄວາມພົວພັນແບບອິນຊີນຳກັນ. ນັ້ນກໍແມ່ນສາມໜ້າທີ່ສຳຄັນຕົ້ນຕໍ ເພື່ອໃຫ້ພັກ “ສົມກັບເປັນຜູ້ນຳພາ, ເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ” ຢ່າງແທ້ຈິງ.
2- ສີ່ສີບຫ້າປີທີ່ຜ່ານມາ, ພັກກອມມູນິດຫວຽດນາມ ຍາມໃດກໍເອົາໃຈໃສ່ປະຕິບັດຄຳຕັກເຕືອນ ກ່ອນອື່ນໝົດ ແມ່ນກໍ່ສ້າງ ແລະ ວຽກທີ່ຕ້ອງເຮັດກ່ອນອື່ນໝົດ ແມ່ນປັບປຸງພັກ ຊຶ່ງທ່ານປະທານໂຮ່ຈີມິນ ໄດ້ບອກສອນຕັກເຕືອນ. ບັນດາໜ້າທີ່ເຫຼົ່ານີ້ໄດ້ຮັບຄວາມເອົາໃຈໃສ່ເປັນພິເສດຂອງພັກກອມມູນິດຫວຽດນາມ, ໂດຍສະເພາະແມ່ນນັບແຕ່ເມື່ອພັກລິເລີ່ມ ແລະ ນຳພາພາລະກິດປ່ຽນແປງໃໝ່ຢູ່ຫວຽດນາມ.
ດ້ວຍທ່າທີ່ “ສັງເກດຄວາມຈິງໂດຍກົງ, ຕີລາຄາຄວາມຈິງຢ່າງຖືກຕ້ອງ, ເວົ້າແຈ້ງຄວາມຈິງ”(2) ເພື່ອເຫັນແຈ້ງຂໍ້ຂາດຕົກບົກພ່ອງຕ່າງໆ ໃນການກໍ່ສ້າງພັກ, ກອງປະຊຸມໃຫຍ່ຄັ້ງທີ VI ຂອງພັກກອມມູນິດຫວຽດນາມ (ປີ 1986) ໄດ້ກຳນົດຄວາມຕັດສິນໃຈ: ເພີ່ມທະວີກຳລັງແຮງຂອງພັກ, ຍົກສູງອິດທິພົນຂອງພັກໃນມະຫາຊົນ, ຮັບປະກັນໃຫ້ພັກບືນຕົວຂຶ້ນ ໃຫ້ທຽບເທົ່າກັບລະດັບໜ້າທີ່ໃໝ່. ພັກກອມມູນິດຫວຽດນາມຕ້ອງກາຍເປັນພັກນຳພາທີ່ໝັ້ນຄົງເຂັ້ມແຂງ ໃນການປະຕິວັດສັງຄົມນິຍົມ. ແລະ, ກຳນົດ: “ຕ້ອງເຮັດໃຫ້ພັກປອດໃສຂາວສະອາດ, ກ່ອນອື່ນໝົດຕ້ອງປັດເຂ່ຍຜູ້ເສື່ອມໂຊມປ່ຽນທາດອອກຈາກພັກ”(3) ດ້ວຍວິທີແກ້ໄຂໃຫຍ່ 6 ວິທີກ່ຽວກັບການກໍ່ສ້າງພັກແນໃສ່ ເບິ່ງແຍງດູແລການກໍ່ສ້າງພັກໃຫ້ໝັ້ນຄົງເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ, ເພື່ອຈາກນັ້ນ ສົ່ງຜົນກະທົບຕັດສິນເຖິງການຂະຫຍາຍຕົວຂອງການປະຕິວັດຫວຽດນາມ. ພາຍຫຼັງກອງປະຊຸມໃຫຍ່, ພັກກອມມູນິດຫວຽດນາມ ໄດ້ດຳເນີນມາດຕະການຕ່າງໆຫຼາຍຢ່າງກ່ຽວກັບແນວຄິດ ການເມືອງ ການຈັດຕັ້ງ ແລະ ພິເສດແມ່ນການດຳເນີນບັ້ນຂົນຂວາຍປັບປຸງເຮັດໃຫ້ພັກປອດໃສຂາວສະອາດ ໄດ້ສ້າງໃຫ້ມີການຫັນປ່ຽນຢ່າງຈະແຈ້ງໃນໜ້າທີ່ກໍ່ສ້າງ ແລະ ປັບປຸງພັກ ຕາມພິໄນກຳ ຂອງທ່ານປະທານໂຮ່ຈີມິນ. ກອງປະຊຸມໃຫຍ່ຄັ້ງທີ VI ຂອງພັກກອມມູນິດຫວຽດນາມ ໄດ້ວາງພື້ນຖານທິດສະດີ ແລະ ພຶດຕິກຳໃຫ້ແກ່ວຽກງານກໍ່ສ້າງ ປັບປຸງພັກ ຕາມແນວຄິດໂຮ່ຈີມິນ ໃນກອງປະຊຸມໃຫຍ່ຄັ້ງຕໍ່ໄປ.
ໂຄງການກໍ່ສ້າງປະເທດຊາດໃນສະໄໝຂ້າມຜ່ານຂຶ້ນສູ່ສັງຄົມນິຍົມ (ປີ 1991) ຂອງພັກກອມມູນິດຫວຽດນາມ ກໍ່ໄດ້ກຳນົດວ່າ “ເພື່ອຮັບພາລະບົດບາດນຳພາ, ພັກຕ້ອງໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ”, ດັ່ງນັ້ນ, ພັກ “ຕ້ອງປ່ຽງແປງໃໝ່ດ້ວຍຕົນເອງ ແລະປັບປຸງຕົນເອງຢ່າງເປັນປະຈຳ, ອອກແຮງຍົກສູງ ລະດັບປັນຍາຄວາມຮູ້, ກຳລັງຄວາມສາມາດນຳພາ. ຮັກສາ ມູນເຊື້ອສາມັກຄີເປັນເອກະພາບ ໃນພັກ...”(4). ພ້ອມກັນກັບບັນດາມາດຕະການກໍ່ສ້າງພັກ, ກອງປະຊຸມໃຫຍ່ຄັ້ງທີ VII ໄດ້ກຳນົດຄວາມຕັດສິນໃຈປະຕິບັດ ”ເຮັດໃຫ້ຖັນແຖວສະມາຊິກພັກປອດໃສຂາວສະອາດ ແລະຍົກສູງຄຸນນະພາບຂອງຖັນແຖວສະມາຊິກພັກ”, “ປະຕິບັດວິໄນໄລ່ອອກຈາກພັກ ຕໍ່ກັບສະມາຊິກພັກທີ່ເສື່ອມໂຊມປ່ຽນທາດທາງດ້ານການເມືອງ ແລະຄຸນສົມບັດ, ຜູ້ກໍ່ຄວາມແບ່ງແຍກ ພັກພວກໃນພັກ, ຜູ້ສໍ້ລາດບັງຫຼວງ ກິນສິນບົນ, ຂົ່ມເຫງມະຫາຊົນ”. ແລະເປັນຄັ້ງທຳອິດທີ່ໃນກອງປະຊຸມໃຫຍ່ຄັ້ງທີ VII, ພັກກອມມູນິດຫວຽດນາມ ໄດ້ຕັດສິນ: “ໃຫ້ອອກຈາກພັກດ້ວຍບັນດາຮູບການທີ່ເໝາະສົມ ຕໍ່ກັບບັນດາສະມາຊິກພັກທີ່ບໍ່ມີຄວາມຫ່ວງໄຍສະໜິດແໜ້ນກັບພັກ, ມານະຈິດສູ້ຮົບຖືກເສື່ອມເສຍ, ໃນພາກຕົວຈິງບໍ່ມີຄຸນປະໄຫຍດຕໍ່ວຽກງານນຳພາຂອງພັກ”(5).
ສະຫລຸບສັງລວມໄລຍະເວລາ 10 ປີແຫ່ງການປ່ຽນແປງໃໝ່ (1986 - 1996), ກອງປະຊຸມໃຫຍ່ຄັ້ງທີ VIII ຂອງພັກກອມມູນິດຫວຽດນາມ ໄດ້ກຳນົດແຈ້ງ ກໍ່ສ້າງພັກແມ່ນໜ້າທີ່ຫຼັກແຫຼ່ງ, ແມ່ນບົດຮຽນທີ່ຕ້ອງສືບຕໍ່ຢັ້ງຢືນ ແລະ ຕ້ອງຍູ້ແຮງໃນການເຄື່ອນໄຫວພຶດຕິກຳຂອງພັກ. ໂດຍຕັ້ງບັນຫາ, ຕໍ່ໜ້າການກະທົບຂອງເສດຖະກິດຕະຫຼາດ ແລະຂອງການເປີດປະຕູກັບຕ່າງປະເທດ, “ພະນັກງານ ສະມາຊິກພັກຖືກຜົນກະທົບຢ່າງເປັນປະຈຳ ຂອງຫຼາຍປັດໃຈທີ່ສຳຄັນທີ່ສຸດ, ນັບທັງການເຄື່ອນໄຫວຕ້ານພັກ, ບັນຫາຮັກສາທາດແທ້ຊົນຊັ້ນກຳມະກອນຂອງພັກ ກໍ່ຢືນຢູ່ຕໍ່ໜ້າສິ່ງທ້າທາຍໃໝ່ຕ່າງໆ. ແຕ່, ພັກບໍ່ໄດ້ກຽມຄວາມພ້ອມຢ່າງພຽງພໍໃຫ້ແກ່ບາດກ້າວຫັນປ່ຽນນີ້”, ກອງປະຊຸມໃຫຍ່ຄັ້ງທີ VIII ຢັ້ງຢືນ “ພັກເຮົາຕ້ອງສືບຕໍ່ປ່ຽນແປງໃໝ່ດ້ວຍຕົນເອງ, ປັບປຸງຕົນດ້ວຍຕົນເອງ, ຍົກສູງກຳລັງສູ້ຮົບ ແລະ ກຳລັງຄວາມສາມາດນຳພາຂຶ້ນໃຫ້ສູງກວ່າອີກ”. ວາງໜ້າທີ່ ແລະ ວິທີແກ້ໄຂໃຫຍ່ 7 ປະການອອກມາ ຊຶ່ງ “ໜ້າທີ່ທີ່ມີຄວາມໝາຍສຳຄັນອັນດັບໜຶ່ງ” ແມ່ນ “ຮັກສາ ແລະ ເພີ່ມທະວີທາດແທ້ຊົນຊັ້ນກຳມະກອນຂອງພັກ”, ພັກກອມມູນິດຫວຽດນາມ ໄດ້ຕັ້ງບັນຫາ “ຢຶດໝັ້ນຈຸດໝາຍເອກະລາດແຫ່ງຊາດ ແລະ ສັງຄົມນິຍົມ”(6) ຂຶ້ນເໜືອສຸດ. ດ້ວຍຈິດໃຈດັ່ງກ່າວ, ຕາມມະຕິມະຕິກອງປະຊຸມສູນກາງພັກຄັ້ງທີ 6 (ເທື່ອທີ 2) ສະໄໝທີ VIII, ພັກກອມມູນິດຫວຽດນາມ ໄດ້ດໄນີນບັ້ນຂົນຂວາຍກໍ່ສ້າງ ປັບປຸງພັກ, ປະຕິບັດການຕິຊົມຕົນເອງ ແລະຕິຊົມຢູ່ໃນພັກ ແລະ ໄດ້ຮັບປະສິດທິຜົນຕົວຈິງ.
ກອງປະຊຸມໃຫຍ່ຄັ້ງທີ IX ຂອງພັກກອມມູນິດຫວຽດນາມໄດ້ຢືນຢັນ “ການກໍ່ສ້າງ ປັບປຸງພັກຢ່າງເປັນປະຈຳ, ສ້າງຄວາມເປັນເອກະພາບດ້ານທັດສະນະ ມານະຈິດ ແລະ ການກະທຳຢູ່ພາຍໃນພັກ”(7) ແມ່ນໜຶ່ງໃນສີ່ບົດຮຽນຂອງ 15 ປີ ແຫ່ງການປ່ຽນແປງໃໝ່ໃນການກໍ່ສ້າງພັກ. ແຕ່, ກອງປະຊຸມໃຫຍ່ຄັ້ງທີ IX ກໍ່ຊີ້ໃຫ້ເຫັນ “ຂໍ້ຂາດຕົກບົກພ່ອງໃນວຽກງານການສຶກສາ, ອົບຮົມຝຶກຝົນຖັນແຖວພະນັກງານ ສະມາຊິກພັກ, ຍັງບໍ່ທັນກີດກັ້ນ ແລະ ຍູ້ຖອຍຄວາມເສື່ອມໂຊມປ່ຽນທາດທາງດ້ານການເມືອງ ແລະຄຸນສົມບັດ ແບບແຜນດຳລັງຊີວິດບໍ່ໄດ້”(8). ກອງປະຊຸມໃຫຍ່ຕົກລົງ: “ໃນຊຸມປີຕໍ່ໜ້າ, ທົ່ວພັກສືບຕໍ່ປະຕິບັດບັນດາມະຕິຕົກລົງຂອງພັກວ່າດ້ວຍການກໍ່ສ້າງພັກ, ໂດຍສະເພາະຢ່າງຍິ່ງແມ່ນ ມະຕິກອງປະຊຸມສູນກາງພັກຄັ້ງທີ 6 (ເທື່ອທີ 2) ສະໄໝທີ VIII, ສຸມໃສ່ເຮັດວຽກງານທີ່ສຳຄັນຕ່າງໆໃຫ້ດີ” ຊຶ່ງກ່ອນອື່ໝົດແມ່ນໜ້າທີ່ “ອົບຮົມສຶກສາແນວຄິດການເມືອງ, ຝຶກຝົນຫຼໍ່ຫຼອມຄຸນສົມບັດປະຕິວັດ, ຕ້ານລັດທິອັດຕະບຸກຄົນ”(9). “ແຕ່ລະຄະນະພັກ, ແຕ່ລະໜ່ວຍພັກມີແຜນການສຳຫຼວດກວດກາການປະຕິບັດວິໄນກຳຂອງທ່ານປະທານໂຮ່ຈີມິນ ກ່ຽວກັບການຍົກສູງຄຸນສົມບັດປະຕິວັດ, ຕ້ານລັດທິອັດຕະບຸກຄົນ”(10).
ຈາກການສັງເກດ “ສະພາບການເສື່ອມໂຊມປ່ຽນທາດທາງດ້ານການເມືອງ, ແນວຄິດ, ຄຸນສົມບັດ, ແບບແຜນດຳລົງຊີວິດ ຂອງພະນັກງານ ສະມາຊິກພັກພາກສ່ວນໜຶ່ງທີ່ບໍ່ໜ້ອຍ ຕິດແໜ້ນກັບພະຍາດອາດຍາສິດ ສໍ້ລາດບັງຫຼວງ ຟຸມເຟືອຍ ທີ່ພວມເກີດຂຶ້ນຢ່າງຮ້າຍແຮງ ຊຶ່ງການກີດກັ້ນກໍ່ບໍ່ມີປະສິດທິຜົນ”(11), ຢູ່ທີ່ກອງປະຊຸມໃຫຍ່ຄັ້ງທີ X, ພັກກອມມູນິດຫວຽດນາມ ໄດ້ສະຫລຸບ: “ວຽກງານກໍ່ສ້າງ ປັບປຸງພັກຍັງບໍ່ໄດ້ຕາມຄວາມຕ້ອງການ”(12). ໂດຍຖອດຖອນບົດຮຽນຈາກ 20 ປີແຫ່ງການດຳເນີນວຽກງານກໍ່ສ້າງພັກແຕ່ເມື່ອປະຕິບັດການປ່ຽນແປງໃໝ່ຢ່າງຮອບດ້ານ, ເລິ່ມຈາກພຶດຕິກຳດັ່ງກ່າວເທິງນີ້, ກອງປະຊຸມໃຫຍ່ຄັ້ງທີ X ໄດ້ຕົກລົງ “ສືບຕໍ່ປ່ຽນແປງໃໝ່ດ້ວຍຕົນເອງ, ປັບປຸງພັກດ້ວຍຕົນເອງ”, ດ້ວຍຈຸດໝາຍ “ເພີ່ມທະວີທາດແທ້ຊົນຊັ້ນກຳທະກອນ ແລະ ລັກສະນະນຳໜ້າ, ຍົກສູງກຳລັງຄວາມສາມາດນຳພາ ແລະ ກຳລັງແຮງສູ້ຮົບຂອງພັກ; ກໍ່ສ້າງໃຫ້ພັກປອດໃສຂາວສະອາດ, ໝັ້ນຄົງເຂັ້ມແຂງທາງດ້ານການເມືອງ ແນວຄິດ ແລະການຈັດຕັ້ງ ຢ່າງແທ້ຈິງ, ມີຄວາມເດັດດ່ຽວສະຫຼຽວສະຫຼາດດ້ານການເມືອງ, ມີຄຸນສົມບັດປະຕິວັດອັນຜ່ອງໃສ, ມີລະດັບສະຕິປັນຍາສູງ, ມີແບບວິທີນຳພາຢ່າງວິທະຍາສາດ, ຍາມໃດກໍ່ຕິດພັນກັບປະຊາຊົນ”(13). ກອງປະຊຸມໃຫຍ່ຄັ້ງທີ X ໄດ້ວາງໜ້າທີ່ແລະວິທີແກ້ໄຂໃຫຍ່ 9 ປະການກ່ຽວກັບການກໍ່ສ້າງພັກ, ໃນນັ້ນມີຂໍ້ສະເໜີກ່ຽວກັບການ “ຮ່ຳຮຽນ, ຊາບຊືມ, ປະຕິບັດຕາມແນວຄິດ ແລະ ແວ່ນແຍງຄຸນສົມບັດຂອງທ່ານປະທານໂຮ່ຈີມິນ”(14). ບັ້ນຂົນຂວາຍນີ້ໄດ້ຖືກປຸກລະດົມ ແລະ ໃນເບື້ອງຕົ້ນໄດ້ນຳມາເຊິ່ງປະສິທິຜົນອັນຕັ້ງໜ້າໃຫ້ແກ່ວຽກງານກໍ່ສ້າງ ແລະ ປັບປຸງພັກ.
3- ໃນສີ່ສິບຫ້າປີທີ່ຜ່ານມາ, ປະຕິບັດຄຳຕັກເຕືອນໃນພິໄນກຳ ຂອງທ່ານປະທານໂຮ່ຈີມິນ, ຕໍ່ໜ້າການເຄື່ອນເໜັງຂອງສະພາບການ, ໜ້າທີ່ໃໝ່, ພັກກອມມູນິດຫວຽດນາມຍາມໃດກໍ່ກຳນົດວ່າ ການກໍ່ສ້າງແລະປັບປຸງພັກແມ່ນໜ້າທີ່ເປັນປະຈຳ, ແມ່ນວຽກງານກ່ອນອື່ນໝົດ ເພື່ອປະຕິບັດໜ້າທີ່ຕ່າງໆໃຫ້ໄດ້ຢ່າງສຳເລັດຜົນ ກໍ່ຄືຍົກສູງຢ່າງບໍ່ຢຸດຢັ້ງ ອິດທິພົນແລະຄວາມເຊື່ອຖື ຂອງສະມາຊິກພັກ ແລະ ຂອງປະຊາຊົນຕໍ່ກັບພັກ. ສິ່ງດັ່ງກ່າວໄດ້ນຳມາຊຶ່ງໄຊຊະນະໃຫ້ແກ່ພາລະກິດປ່ຽນແປງໃໝ່, ປົກປັກຮັກສາລະບອບການເມືອງ ແລະ ການນຳພາສັງຄົມຂອງພັກ.
ແຕ່ວ່າ, ຄຽງຂ້າງບັນດາຜົນງານທີ່ຍາດມາໄດ້ນັ້ນ, ວຽກງານກໍ່ສ້າງພັກ ແລະຖັນແຖວພະນັກງານ ສະມາຊິກພັກ ກໍ່ຍັງມີຄວາມຈຳກັດ ຂໍ້ຂາດຕົກບົກພ່ອງບໍ່ໜ້ອຍ ທີ່ໜ້າກັງວົນໃຈ, ເປັນຕົ້ນແມ່ນ ສະພາບຄວາມເສື່ອມໂຊມດ້ານແນວຄິດ ການເມືອງ ຄຸນສົມບັດ ແລະ ແບບແຜນດຳລົງຊີວິດ ຂອງພະນັກງານ ສະມາຊິກພັກພາກສ່ວນໜຶ່ງທີ່ບໍ່ໜ້ອຍ; ສະພາບການອາດຍາສິດ, ຫ່າງເຫີນປະຊາຊົນ, ການຈັດຕັ້ງບໍ່ແໜ້ນແຟ້ນ, ຫຼັກການຂອງພັກຖືກລະເນີດ.
ໃນສະພາບດັ່ງກ່າວນັ້ນ, ຢູ່ທີ່ກອງປະຊຸມໃຫຍ່ຄັ້ງທີ XI, ພັກກອມມູນິດຫວຽດນາມສືບຕໍ່ຮຽກຮ້ອງໃຫ້ຕ້ອງກໍ່ສ້າງໃຫ້ພັກປອດໃສຂາວສະອາດແລະໝັ້ນຄົງເຂັ້ມແຂງຢ່າງແທ້ຈິງ ທັງດ້ານການເມືອງ ແນວຄິດ ການຈັດຕັ້ງ ພະນັກງານ ແລະ ແບບແຜນນຳພາ,... ຍົກສູງກຳລັງຄວາມສາມາດນຳພາ ແລະ ກຳລັງແຮງສູ້ຮົບຂອງພັກ. ກອງປະຊຸມໃຫຍ່ໄດ້ວາງໜ້າທີ່ອັນພື້ນຖານ 8 ປະການທີ່ມີລັກສະນະເປັນລະບົບ ຮອບດ້ານກ່ຽວກັບການກໍ່ສ້າງພັກ ຊຶ່ງຕ້ອງປະຕິບັດໃຫ້ໄດ້ຮັບປະສິດທິຜົນ ເພື່ອສືບຕໍ່ປະຕິບັດຄຳຕັກເຕືອນກ່ອນອື່ນໝົດ ຂອງທ່ານປະທານໂຮ່ຈີມິນຕໍ່ກັບພັກ.
ປະຕິບັດມະຕິກອງປະຊຸມໃຫຍ່ຄັ້ງທີ XI, ກອງປະຊຸມສູນກາງພັກຄັ້ງທີ 4 ໄດ້ປຶກສາພິຈາລະນາ ແລະ ອອກມະຕິຕົກລົງ “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປັດຈຸບັນ” ຊຶ່ງມີສາມບັນຫາອັນຮີບດ່ວນທີ່ຕ້ອງເຮັດໃນທັນທີທັນໃດຄື:
“ທີໜຶ່ງ, ເດັດດ່ຽວຕໍ່ສູ້ກີດກັ້ນ, ຍູ້ຖອຍສະພາບຄວາມເສື່ອມໂຊມດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ ຂອງພະນັກງານ ສະມາຊິກພັກຈຳນວນໜຶ່ງທີ່ບໍ່ໜ້ອຍ, ກ່ອງອື່ນໝົດແມ່ນພະນັກງານນຳພາ ຄຸ້ມຄອງຂັ້ນຕ່າງໆ ເພື່ອຍົກສູງກຳລັງຄວາມສາມາດນຳພາ ແລະກຳລັງແຮງສູ້ຮົບຂອງພັກ, ປັບປຸງຄວາມເຊື່ອຖືຂອງສະມາຊິກພັກ ແລະຂອງປະຊາຊົນຕໍ່ກັບພັກ.
ທີສອງ, ກໍ່ສ້າງຖັນແຖວພະນັກງານນຳພາ ຄຸ້ມຄອງຂັ້ນຕ່າງໆ, ເປັນຕົ້ນແມ່ນຢູ່ຂັ້ນສູນກາງ, ຕອບສະໜອງໄດ້ກັບ ຄວາມຮຽກຮ້ອງຕ້ອງການຂອງພາລະກິດການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງສາກົນ.
ທີສາມ, ກຳນົດແຈ້ງສິດຕັດສິນ ແລະ ໜ້າທີ່ຮັບຜິດຊອບ ຂອງຜູ້ນຳໜ້າຄະນະພັກ ອຳນາດການປົກຄອງ ແລະສາຍພົວພັນກັບລວມໝູ່ຄະນະພັກ ສຳນັກງານ ອັງການ; ສືບຕໍ່ປ່ຽນແປງໃໝ່ແບບວິທີການນຳພາຂອງພັກ.
ໃນສາມບັນຫາເທິງນີ້, ບັນຫາທີໜຶ່ງແມ່ນຈຸດໜັກໃຈກາງ ສອດຫ້ອຍຕະຫຼອດ ແລະ ຮີບດ່ວນກວ່າເພິ່ນໝົດ”(15).
ນີ້ແມ່ນບາດກ້າວຂະຫຍາຍຕົວໃໝ່ ແລະ ເຂົ້າສູ່ເນື້ອແທ້ຂອງວຽກງານກໍ່ສ້າງ ປັບປຸງພັກ ຕາມແນວຄິດໂຮ່ຈີມິນ ຊຶ່ງລວມສູນກ່ອນອື່ນໝົດຢູ່ໃນເປົ້າໝາຍທີ່ເປັນພະນັກງານການນຳຂັ້ນຕ່າງໆ ແຕ່ກົມການເມືອງເຖິງຂັ້ນຮາກຖານ ແລະ ດ້ວຍວິທີແກ້ໄຂ 4 ວິທີ, ໃນນັ້ນເອົາຫຼັກການຕິຊົມຕົນເອງ ແລະຕິຊົມເປັນພື້ນຖານ, ສົມທົບກັບວິທີແກ້ໄຂກ່ຽວກັບການຈັດຕັ້ງພະນັກງານ ແລະ ການດຳເນີນຊີວິດພັກ,... ແນໃສ່ຈຸດໝາຍຄື ກໍ່ສ້າງໃຫ້ພັກກອມມູນິດຫວຽດນາມໝັ້ນຄົງເຂັ້ມແຂງທາງດ້ານການເມືອງແນວຄິດ, ເປັນເອກະພາບທາງດ້ານມານະຈິດແລະການກະທຳ, ປອດໃສຂາວສະອາດທາງດ້ານຄຸນສົມບັດແລະແບບແຜນດຳລົງຊີວິດ, ໜັກແໜ້ນທາງດ້ານການຈັດຕັ້ງ, ໄດ້ຮັບຄວາມສະໜັບສະໜູນຂອງປະຊາຊົນ, ຕັ້ງຕົວຢູ່ຢ່າງໝັ້ນຄົງ ແລະ ມີກຳລັງພຽງພໍ ມີລະດັບພຽງພໍເພື່ອນຳພາການປະຕິບັດພາລະກິດປະຫວັດສາດຂອງຕົນ.
ພວກເຮົາເຊື່ອໝັ້ນວ່າ ດ້ວຍຄວາມຕັດສິນໃຈ ແລະບັນດາວິທີແກ້ໄຂໃໝ່, ດ້ວຍການປະສານສົມທົບຢ່າງແໜ້ນແຟ້ນລະຫວ່າງກຸ່ມວິທີແກ້ໄຂ ຕິຊົມຕົນເອງແລະຕິຊົມ, ຍົກສູງລັກສະນະນຳໜ້າເປັນແບບຢ່າງຂອງຂັ້ນເທິງ ກັບວິທີແກ້ໄຂກ່ຽວກັບການຈັດຕັ້ງພະນັກງານ ແລະການດຳເນີນຊີວິດພັກ, ກ່ຽວກັບກົນໄກນະໂຍບາຍ, ກ່ຽວກັບການສຶກສາອົບຮົມ, ພັກກອມມູນິດຫວຽດນາມແນ່ນອນຈະປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ໄດ້ເປັນຢ່າງດີ ເພື່ອປັບປຸງພັກກອມມູນິດຫວຽດນາມໄດ້ຕາມຄຳສັບຢ່າງແທ້ຈິງ ຄືດັ່ງທີ່ລຸງໂຮ່ໄດ້ຂຽນໄວ້ 4 ເທື່ອໃນພິໄນກຳ, ເພື່ອໃຫ້ພັກເຮົາສົມກຽດເປັນພັກແຫ່ງຄຸນສົມບັດ ແລະ ອາລະຍະທຳ, ພັກໂດຍແມ່ນທ່ານປະທານໂຮ່ຈີມິນກໍ່ຕັ້ງຂຶ້ນ ແລະ ໃຫ້ການຝຶກຝົນຫຼໍ່ຫຼອມ./.
ຂຽນໂດຍ: ຮສ.ດຣ. ຟ້າມໂຮ່ງເຈືອງ
ສະຖາບັນໂຮ່ຈີມິນແລະບັນດາຜູ້ນຳຂອງພັກ,
ສະຖາບັນການເມືອງແຫ່ງຊາດໂຮ່ຈີມິນ
---------------------------
* ບົດນີ້ໄດ້ລົງພິນໃນວາລະສານກອມມູນິດ ສະບັບທີ 865 (ເດືອນພະຈິກ 2014)
(1) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2000, ເຫຼັ້ມທີ 9, ໜ້າທີ 285.
(2), (3), (4) ເອກະສານກອງປະຊຸມໃຫຍ່ຂອງພັກ ໃນສະໄໝແຫ່ງການປ່ຽນແປງໃໝ່ (ກອງປະຊຸມໃຫຍ່ຄັ້ງທີ VI, VII, VIII, IX), ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2005, ໜ້າທີ 10, 149, 330.
(5), (6), (7), (8), (9), (10) ອກະສານຄືຂ້າງເທິງ, ໜ້າທີ 303, 518-519, 632, 679, 680, 680-681.
(11), (12), (13), (14) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2006, ໜ້າທີ 22, 65, 279, 286.
(15) ເອກະສານກອງປະຊຸມຄະນະບໍລິຫານງານສູນກາງພັກຄັ້ງທີ 4 ສະໄໝທີ XI, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2012, ໜ້າທີ 26.